<a href="https://kyzylorda-news.kz/">Kyzylorda-news.kz.</a> Шиелі ауданы әкімдігінің баспасөз орталығында Шиелі аудандық Орталық мешітінің бас имамы Бақыт Ұлжаевтың қатысуымен брифинг өтті.&nbsp;Жиын барысында мұсылмандардың қасиетті мерекесі «Құрбан айттың» өткізілуі, оған сойлатын малға қойылатын шарттар, еттің үлестірілуі секілді мәселелер айтылды.&nbsp;Бақыт Ұлжаевтың айтуынша ең алдымен құрбандық шалатын адам ақыл-есі дұрыс, балиғат жасына толған мұсылман болу, тұрғылықты мекенде болу, жолаушы болмауы шарт. Алла Тағала Құран Кәрімде : «Намаз оқы және құрбан шал» деп, әмір еткендіктен аталған азаматтардан басқа мұлмандарға шамасы келсе, құрбандық шалу міндеттеледі.Құрбандыққа шалынатын малға қойылатын шарттар да бар. Мәселен құрбандыққа 5 жастан асқан түйе мен 2 жасар сиыр, өгіз, 1 жасар қойды шалуға болады. Ірі қара мен түйені 7 адам бірігіп сойып, етін Алла жолында міскендерге таратып бергені дұрыс.Құрбандыққа жарамайтын малдар қатарына: бір немесе екі көзінің соқыр, құрбан шалу орнына өз бетінше жетуіне шамасы жетпейтіндей ақсақ малдар, мүйіздерінің сынған малдар, тума құйрығы не құлағы жоқ боп туылған, лас нәрсемен тамақтанған малдар жатады.Ет үлестіруге келсек, сойылған ет 3-ке бөлініп, бір бөлігі құрбандық шалушының отбасына, бір бөлігі туған-туыс, көршілеріне, келесі бір бөлігін мұқтаж жандарға, немесе толықтай мұқтаж жандарға берілсе болады.Ал егер, құрбандық шалуы уәжіп болған адамның мүмкіндігі болмаса, өкілдік арқылы құрбандық шалуға мүмкіндік жасалған. Құрбандық шалуда өкілдік дегеніміз мойнына құрбандық шалу уәжіп болған адам құрбандық шала алмаған жағдайда жасалатын амал. Бұл уақытта құрбандық шалушы басқа бір кісіні өкіл ретінде қойып, өкіл сол кісінің атынан құрбандық шалуына болады.

Шиеліде Құрбан айтқа байланысты брифинг өтті

<a href="https://kyzylorda-news.kz/">Kyzylorda-news.kz.</a> Жуырда Шиелі аудан әкімдігінің мәжіліс залында аудандық мәслихат төрағасы А.Жандарбековтың төрағалығымен және аудан әкімінің орынбасары Е.Әпетовтің қатысуымен VIІI шақырылған аудандық мәслихаттың кезектен тыс 4 сессиясы өтті.Сессия жұмысына аудан әкімінің орынбасарлары, кент және ауыл округтерінің әкімдері, дербес бөлім басшылары мен БАҚ өкілдері қатысты.Күн тәртібінде Шиелі ауданы бойынша бөлшек салықтың арнаулы салық режимін қолдану кезінде мөлшерлеме мөлшерін төмендету, Шиелі аудандық мәслихаттың 2022 жылғы 3 тамыздағы ««Шиелі аудандық мәслихатының 2018 жылғы 20 наурыздағы ««Шиелі ауданының мәслихат аппараты» мемлекеттік мекемесінің «Б» корпусы мемлекеттік әкімшілік қызметшілерінің қызметін бағалаудың әдістемесін бекіту туралы» №21/16 шешіміне өзгерістер енгізу туралы» №25/6 шешімінің күшін жою, Аудандық мәслихаттың 2018 жылғы 18 маусымдағы «Шиелі ауданының әкімдігі жанындағы терроризмге қарсы аудандық комиссия құрамын бекіту туралы» №25/18 шешіміне өзгерістер енгізу, «Шиелі ауданында мүгедектігі бар балалар қатарындағы кемтар балаларды жеке оқыту жоспары бойынша үйде оқытуға жұмсалған шығындарын өндіріп алу тәртібін және мөлшерін айқындау туралы» Шиелі аудандық мәслихатының 2021 жылғы 12 қарашадағы №14/2 шешіміне өзгерістер енгізу туралы мәселелер қаралды.Күн тәртібіндегі мәселелер бойынша аудандық кәсіпкерлік, өнеркәсіп және туризм бөлімінің басшысы Бақберген Әбсадық, аудандық мәслихат төрағасы Айтбай Жандарбеков, «Шиелі ауданы әкімінің аппараты» коммуналдық мемлекеттік мекемесінің басшысы Азамат Мыңбаев, аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Ағыбай Төлегенов хабарлама жасады.Шығарылған мәселелер бойынша аудандық мәслихат депутаттары ұсыныс-пікірлерін жеткізіп, бөлім басшылары тарапынан тиісті жауаптар берілді.

Шиеліде мәслихаттың кезектен тыс IV сессиясы өтті

<a href="https://kyzylorda-news.kz/">Kyzylorda-news.kz.</a> Жуырда Шиелі ауданы қоғамдық даму бөлімінің тапсырысы аясында салауатты өмір салтын қалыптастыру және бұқаралық спортты насихаттау мақсатында бұқаралық ақпарат құралдары &nbsp;қызметкерлері арасында теннистен турнир өттті. Спорттық сайысқа аудан әкімінің орынбасары мен бірқатар БАҚ өкілдері қатысты.&nbsp;Жарыстың ашылу салтанатын ең әуелі аудан әкімінің орынбасары Болатбек Ысмағұлов ашып беріп, сайысқа қатысқан қатысушыларға сәттілік тіледі. Содан соң ауданда қызмет етіп жүрген баспасөз саласының 14 өкілі турнир көрігін қыздырып, тартысты ойын өрнегін көрсетті.&nbsp;Жарыс нәтижесінде үздік ойын өрнегін көрсетіп, жүзден жүйрік атанған «Шарайна-Сейхун» газетінің атынан Нұрлан Қарашаев 1 орынды иеленді. Ал жүлделі 2 орынды Қазақстан Республикасының Журналистер одағының мүшесі, облыстық «Кызылординские вести» газетінің Шиелі ауданы бойынша меншікті тілшісі Мақсұт Ибрашев қанжығаланды. 3 орынға «Өскен өңір» газетінің фототілшісі Бақытжан Бәйімбет жайғасты. Бұдан өзге жеңімпаздарға және жарыста бой көрсеткен қатысушыларға кубоктар мен медальдар, сондай-ақ дипломдар мен арнайы сый-сияпаттар табыс етілді. Тартысқа толы теннис турнирі жылда жалғасын табады деген сенім бар.

Шиеліде теннис турнирі тартысты өтті

<a href="https://kyzylorda-news.kz/">Kyzylorda-news.kz.</a> Біздің заманауи дамыған қоғамда тұратынымызға қарамастан, отбасындағы тұрмыстық зорлық-зомбылық күн тәртібінен түскен емес. Көп жағдайда отбасын сақтап қалу мақсатында жәбірленушілер бұл туралы ашық айтпайды-онысы бекер. Қазақстан Республикасының Конституциясында адамның қадір-қасиетіне қол сұғылмайды, әркімнің ар-намысы мен абыройлы атының қорғалуына құқығы бар деп анық жазылған.&nbsp;Осыған қарамастан аудан көлемінде жыл басынан бастап отбасы жанжалын шығарған 78 құқық бұзушыға қатысты қорғау нұсқама шығарылса, отбасы тұрмыстық қатынастар аясында жасалған құқық бұзушылығы үшін 9 азаматтың мінез-құлқына ерекше талап орнатылған.Аталған деректер бойынша Қазалы АПб-і ЖПҚБ-нің Әйелдерді зорлық-зомбылықтан қорғау тобының инспекторы мен учаскелік полиция инспекторлары бірлесіп, «Тұрмыстық зорлық-зомбылық профилактикасы туралы» ҚР Заңын негізге ала отырып, қорғау нұсқамасы мен ерекше талап орнатылған құқық бұзушылардың мекен-жайларына барып, ахуалды бақылап, профилактикалық түсіндірме жұмыстарын тұрақты түрде жүргізуде.Атап кететін жайт маскүнемдікпен жасалған тұрмыстық зорлық-зомбылық жәбірленуші мен құқық бұзушыға ғана емес, отбасындағы кәмелетке толмаған балаларына да кері әсерін тигізері сөзсіз. Отбасындағы білектінің алдында әйел - әлсіз, ал бала - қорғансыз болып тұр. Әлсіздерге қол көтеру ерлеріміздің азаматтығына үлкен сын!&nbsp;Дегенменде отбасын саналы түрде құрған ересек адамдар отбасы алдындағы жауапкершілікті сезініп, тұрмыстық зорлық зомбылыққа жол бермеу өз қолдарында екенін ұмытпағандары жөн.

Отбасы тұрмыстық зорлық-зомбылыққа жол жоқ

<a href="https://kyzylorda-news.kz/">Kyzylorda-news.kz.</a> Қ.Сәтбаев атындағы №216 орта мектептің бастауышсынып оқушысы Іңкәр Серікбаева республикалық «Жұлдыз болғым келеді» шығармашылық байқауында «Өлең оқу» номинациясы бойынша үздік өнер көрсетіп, бірінші дәрежелі дипломмен марапатталды.Сайыста Іңкәр Мұқағали Мақатевтың «Үш бақытым» өлеңін жатқа оқыды. Талантымен тәнті еткен бүлдіршін тыңдармандардың ықыласына бөленді. Мәнерлеп оқудағы шеберлігімен көзге түскен шәкіртті шыңдаған жетекшісі Бақыткүл Темірова.Бақыткүл Қожабайқызы – бастауыш сынып мұғалімі. Жоғары санатты, жиырма бес жылдық еңбек өтілі бар. Ізденімпаз ұстаз аудандық «Үздік бастауыш сынып мұғалімі – 2016» байқауының бас жүлдегері. Өнерге жақын ұстаз «Қорқыт сазы» ¬фольклорлы-этнографиялық ансаблінің әншісі әрі аудан, ¬облыс сахнасында көрермен көзайымына айналған.Жаңартылған білім беру аясында оқушылардың білім сапасын арттыруға арналған педагогикалық оқу байқауының жеңімпазы. Білім қызметкерлерінің «Наурыз шапағаты» фестивалінің бірнеше дүркін лауреаты. М.Ералиеваны еске алуға арналған «Сағынам» байқауы, Р.Бағланованың 85 жылдығына арналған «Ақмаңдайлым» өнер байқауының бас жүлдегері.<blockquote>«Іңкәр мектептегі қоғамдық жүмыстарға белсене араласады. Әдебиет пәніне ерекше жақын. Ол қазақ ақындарының патриоттық өлеңдерін сүйіп оқиды. Жаттап, мәнерлеп оқып, мектеп сахнасында нақышына келтіре орындап жүр. Өлең оқығанда айналасын ұмытып, қолын сермеп, жан-дүниесімен беріледі. Ондай сәтте оны бөлмей, жымия, тыңдап отырамын. Шәкіртімнің болашағынан зор үміт күтемін. Біз бірге әлі талай асуды бағындырамыз», – дейді сынып жетекшісі Бақыткүл Темірова.</blockquote>

Өнер шыңына өрлеген

<a href="https://kyzylorda-news.kz/">Kyzylorda-news.kz.</a> Қазалы ауданының әлеуметтік-экономикалық жағдайы жақсарып келеді. Соңғы кездері аудан тұрғындарының жаңа іс бастауға құштарлығы артып, кәсіпкерлік көкжиекті кеңейтуге көптеп үлес қосуда. Осындай іскер жас Әділбек Омаров «Тайланд» және құйылмалы балмұздақты қазалылықтарға ұсынғанына бір жыл болды. Бұдан бөлек, сүттен дайындалатын коктейлі де сұранысқа ие.<blockquote>«Тай балмұздағы қуырылып дайындалады. Оны қуыру үшін арнайы қоспалар қажет. Кәдімгі сүт, кілегей немесе йогурт, сосын таңдауға қарай банан, киви араластырылып арнайы плитада әзірленеді. Бұл табиғи таза өнімдермен жасалады. Балмұздақты бұлай дайындаудың негізі – орама-қуыру немесе жылу деп аударылады. Бірақ іс жүзінде, тай балмұздағын жасау әлдеқайда жеңіл. Ол елу сантиметрлік пеш пен ингредиенттерге арналған бірнеше контейнері бар арнайы құрылғыда жасалады. Бұл пештің құпиясы – -30 градусқа дейін салқындатылады. Мұндай жағдайда дайындалатын балмұздақ құймақ сияқты қуырылып, көз алдыңызда мұздайды. Дәмі тіл үйірер ерекше әрі тез еріп кетпейтіндіктен жақын ауылдардан тапсырыспен алып кететіндер бар», – дейді жас кәсіпкер.</blockquote>Оның айтуынша, тай балмұздағын әзірлеу аса қиындық туындатпайды. Дайындау кезінде құрылыс қалақшаларына ұқсас ұшы бар пышақпен балмұздақ қоспалары ұсақталып араластырылады. Осылай бірнеше рет қайталанып, жұқа қабатқа таралады. Қуырылып балқытылған балмұздақ 5 бөлікке кесіледі. Әр бөлік түтік пішіндес, қарсы бағытта домаланады.Бұралған нәзіктік қағазға арналған шыныаяққа немесе орауышқа салынып, клиенттің өтініші бойынша үсті безендіріледі. Пісіру көрінісі өте керемет. Тұтынушылар осындай әдемі қимылды қызықтап әрі дәмді десерт жеу үшін кезекке тұрады.Әділбектің жас болған соң жаңа идеялары көп. Ол үшін біршама тер төгіп, еңбек ету қажет.<blockquote>«Осы кәсіпті меңгеруге ағамның септігі тиді. Оның Қызылордада «Мега» сауда орталығында түрлі балмұздақ сататын орны болды. Сол жерде бос уақытымда жұмыс істедім. Соның арқасында студент кезімде қаржыдан тарықпадым. Тіпті ауысқан қаражатты жинап, осы күні жеке кәсібімді игеруге мүмкіндік туды. Алдағы уақытта осы ісімді кеңейткім келеді», – дейді Әділбек Тұрарұлы.</blockquote>

Әділбек Омаров: Алдағы уақытта кәсібімді кеңейткім келеді

<a href="https://kyzylorda-news.kz/">Kyzylorda-news.kz.</a> Облыс әкімдігі жанындағы әйелдер істері және отбасылық-демографиялық саясат жөніндегі комиссия мүшелерінің Шиелі ауданына іссапары бойынша комиссия отырысы өтті.Оны комиссия төрағасы, аудан әкімінің орынбасары Б.Ысмағұлов ашып, жүргізіп отырды.Жиынға аудан әкімі жанындағы әйелдер істері және отбасылық – демографиялық саясат жөніндегі комиссия отырысына облыс әкімдігі жанындағы Әйелдер істері және отбасылық-демографиялық саясат жөніндегі комиссия мүшесі, облыстық әйелдер кеңесінің төрайымы Райкүл Байназарова Қаламқас Каримова комиссия хатшысы ауданымызға іссапармен арнайы қатысып, бірқатар талдаулар жасалды. Аудандағы әйелдер белсенділігі, кәсіпкерлік қызметпен айналысатын қыз-келіншектердің жобалары, биліктегі нәзік жандар үлесі, әжелер мектебі, «Мерейлі отбасы» Ұлттық конкурсына қатысудағы жетістіктер сараланды.Отбасы саясаты мәселелері бойынша қоғамдық қабылдау өткізілді және мүгедек балалары бар және көп балалы мемлекеттік қызметшілерге арналған психологиялық тренингтер ұйымдастырылды.&nbsp;Отбасы – ұрпақтар сабақтастығын жалғастыруда, адам бойындағы асыл қасиеттерді қалыптастыруда рухани – адамгершіліктің бастауы. Отбасының амандығы, толықтығы мен тыныштығы, ауызбіршілігі мен сыйластығы, үйлесімділігі – еліміздің дамуы мен жарқын болашағының көрінісі.Елімізде әр саладағы әйелдердің үлесін арттыру үшін мемлекет тарапынан қолдау шаралары да жүргізіліп келеді. Оған дәлел – Мемлекеттік маңызы бар құжат қоғам өмірінің барлық салаларында гендерлік теңдік қағидаттарын іске асыру мақсатындағы Қазақстан Республикасындағы 2030 жылға дейінгі отбасылық және гендерлік саясат Тұжырымдамасы.Отбасы саясаты жөніндегі Шиелі ауданында атқарылып отырған жұмыстар жайлы аудандық қоғамдық даму бөлімінің басшысы, аудан әкімі жанындағы Әйелдер істері және отбасылық-демографиялық саясат жөніндегі комиссия төрағасының орынбасары Кенжехан Есенбаев, «Ұрпақ тәрбиесі – ұлт болашағы» тақырыбында баяндама жасауға Шиелі аудандық орталық кітапханасының әдістемелік бөлім меңгерушісі Эльмира Бектұрғанова, Шиелі ауданы бойынша білім бөлімінің басшысы Жібек Орынбайқызы отбасы саясаты, бала тәрбиесіне қатысты сөз беріліп, бірқатар атқарылған жұмыстары бойынша ұсыныс-пікірлерін жеткізді.

Шиеліде әйелдер істері және отбасылық-демографиялық саясат жөніндегі комиссия отырысы өтті

<a href="https://kyzylorda-news.kz/">Kyzylorda-news.kz.</a> Өнер өлкесінде өзіндік із, ән әлемінде қайталанбас қолтаңбасын қалдырған Ізеевтер отбасылық ансамблінің құрылғанына қырық жыл. Осы орайда Кәукей ауылында өнерлі отбасының жүріп өткен жолын өскелең ұрпаққа насихаттау мақсатында «Өмірін өнерімен өрнектеген» атты кездесу кеші өтті.1959 жылы Кәукей елді мекенінде «Қызыл отау» аталатын шағын мекеме жұмыс істеді. Оның ішінен ашылған клуб, кітапханаға өнер иелері ерлі-зайыпты Шамшырақ Ізей мен Мейірбану Әлиева басшылық етті. Сол кездері екінші дүниежүзілік ән фестивалінде халық күйшісі Қобылаш пен ақиық қобызшы, домбырашы Махамбет Әуезов, тағы басқа 250 адамнан құралған халық аспаптар оркестрінің сүйемелдеуімен Шамшырақ Ізей Абайдың «Көзімнің қарасы», «Айттым сәлем, Қаламқас» және «Сырымбет» әндерін, Мейірбану Әлиева халық әні «Ботакөз», «Ләйлім шырақты» жеке дауыста орындап, лауреат атанған-ды. Отыз екі жыл бойы бір орында табан аудармастан еңбек еткен Мейірбану Әлиева «Еңбек ардагері», «Құрмет» орденімен марапатталған. Бүгінде үлгілі отбасында дүниеге келген ұл-қыздар да өнерімен көпті тәнті етіп жүр. Ұрпақтар сабақтастығы деген осы емес пе?Өмірін өнерімен өрнектеген жандар 1981 жылы «Ізеевтер» отбасылық вокалды ансамблін құрды. Құрамында соло-ритм гитарада Талғат, бас гитарада Бағдат, синтезаторда Шарапат, дауылпазда Қайрат, әншілер Айзада, Айгүл, Жанат, Ләззат, биші Сәнімкүл болды.Отбасылық ансамбльге Шарапат Ізей жетекшілік жасап, республикалық, облыстық, аудандық байқаулардың жүлдегері атанды. Құрылғанына қырық жылға жуықтаған отбасылық ансамбль әлі де жұмысын тоқтатқан жоқ. Түрлі мәдени іс-шараларға белсене қатысып, аудан, облыс әкімі, «Nur Otan» партиясының Құрмет грамотасы, Алғыс хаттарын алды. Қазіргі таңда ансамбль құрамында 14 адам өнер көрсетеді.Ансамбльге 1989-1991 жылдар аралығында клуб меңгерушісі Айгүл Ізей басшылық жасады. 1991 жылғы шілде айынан бастап, Кәукей ауылдық клубының меңгерушісі Шарапат Ізей жетекші. Өнерлі отбасы 2015 жылы «Мерейлі отбасы» байқауына қатысып, екінші орынды иеленді. Жыл сайын дәстүрлі түрде өтетін Ретро әндер фестивалінде өнер көрсетіп, тыңдарман көзайымына айналып жүр. 1991 жылдың қыркүйек айынан ¬бастап Мейірбану Әлиеваның ізін Жібек Шайхы жалғап, халыққа қызмет етеді. Ол қазір ансамбльдің концерт жүргізушісі әрі әншісі. Жиырма жеті жылдан бері кітапхана саласында еңбек етіп келеді.Қазіргі кезде Ізеевтер отбасылық вокалды ансамблінің құрамында әнші Айзада, Айгүл, Қайрат, Гүлжанат, Жібек, Ринат, биші Ақерке, Аружан, ең кішкентай жас әншілер Асылжан, Рахат бар. Қайрат Шамшырақұлы аудандық «Ең үздік ән-әуез пәні мұғалімі» сайысының жеңімпазы. К.Дүйсекеев атындағы аудандық, облыстық «Туған жер» әншілер конкурсының жеңімпазы атанып, республикалық деңгейде өнер көрсетті. Ол ІІ Халықаралық «ХХІ ғасыр ұрпақтары даму тенденциясының педагогикалық һәм социокинетикалық парадигмалары», «Ғаламдық жаһандану жағдайындағы балалар ұйымдарының даму тенденциясы» атты ғылыми-тәжірибелік конференцияға қатысып, баяндама жасаған. Шығармасы халықаралық «Лучшие люди» энциклопедиясына енген. Түркия мемлекетінде «Түркі мәдениеті» ұйымдастырумен өткен Халықаралық қорының Алғыс хатымен марапатталған. Қайрат қазіргі таңда білім саласында ең маңызды мәселелердің бірі – теле-интелектуалды және шығармашылық потенциалы жоғары, дарынды балалардың дамуына өркениетті жағдай жасауда. Шәкірттерге сапалы білім, үлгілі тәрбие беру жолында жемісті еңбек етіп келеді.Айгүл Шамшыраққызы Әйтеке би кентіндегі «Айгөлек» балабақшасында музыка сабағынан дәріс береді. Шәкірттері аудандық, облыстық, республикалық, халықаралық байқаулардың жүлдегерлері. Өнерлі жан көптеген жетістікке қол жеткізді.Ансамбльдің бишісі Ақерке Шамшырақова Алматы қаласы, Райымбек ауданы, Кенен Әзірбаев атындағы мектепте директордың тәрбие ісі жөніндегі меңгерушісі қызметінде. Ол 2011 жылы Халықаралы ІІІ «Ақкөгершін» балалар шығармашылығы байқауында үшінші орын иеленіп, дипломант атанды. «Ізеевтер» отбасылық ансамблінің жас әншісі Ринат Шарапатұлы өнер жолын 5 жасынан бастады.Мектепішілік іс-шараларда өнерімен көзге түсіп, қоғамдық жұмыстардың белортасынан табылды. Клубтағы ән үйірмесінің белді мүшесі болды. Жас талант халықаралық, облыстық, аудандық байқаулардың жүлдегері. Қазір Алматы қаласында КАЗГУ-дың үшінші курс студенті. Университет жанындағы «Студ-Весна» атты шығармашылық байқауына қатысып, бірінші орын алды. Халықаралық Қазақ Радиосының ұйымдастыруымен жастар арасында «Ән сал» атты старт өнер-шығармашылығы байқауының үш турлы байқауында бас жүлде еншіледі. Қазақстан телеарнасы «Таңшолпан» телебағдарламасына жолдама алды. «Мисс – Гранпри» атты шығармашылық байқауына қатысып, бас жүлде иеленді.Ансамбльдің ең жас әншілері Асылжан және Рахат Шамшырақовтар. Асылжан Шарапатқызы Кәукей ауылындағы №225 орта мектебінің 4 сыныбында, Рахат Шамшырақ Әйтеке би кентіндегі Е.Бозғұлов атындағы №249 мектеп-лицейдің 5 сыныбында оқиды. Екеуі де ән әлеміне бала кезінен қанат қақты. Олар республикалық «Ақкөгершін» байқауының жүлдегері.Өнер кешінде «Ізеевтер» отбасылық вокалды ансамблінің мүшелері Т.Базарбаевтың «Ауылым», Ш.Қалдаяқовтың «Кешікпей келем деп ең», «Бәрінен де сен сұлу», «Ана туралы жыр», С.Махамбеттің «Қазағым», С.Жүнісовтің «Менің жанұям», А.Қалаубаеваның «Пай, пай – шіркін-ай» және қазақ әндер жинағынан «Попури» орындап, халықтың қошеметіне бөленді.

Қазалылық Ізеевтердің ізгі жолы

<a href="https://kyzylorda-news.kz/">Kyzylorda-news.kz.</a> Жаңақорған ауданының азаматы, жас кәсіпкер кент орталығындағы Абдулла Алтый Сүлеймен көшесінің бойына жас кәсіпкер Асан Алкеевтің демеушілігімен арнайы қоқыс тастайтын темір жәшіктер қойып, көпшіліктің ықыласына бөленді.- Қасиетті Құрбан айт мұсылмандар мерекесіне орай Биылғы садақаны осылай жасауды жөн көрдім. Кенттің әрбір азаматы тазалыққа бетұруы керек. Қоқыстар көшеде шашылып жатпай, арнайы жәшіктерге тасталуы керек" деген пікірін білдірген Асан Сұлтанбекұлы жәшіктердің тезарада жасалып бітілуіне үлес қосқан Қалымбетов Дәулет есімді дәнекерлеушіні де айта өтті. Кешегі мәслихат депутаттарының сайлауы науқанында жігерлі жастарды көріп, рухымыз бір серпіліп қалғаны жасырын емес. Елдің негізгі қозғаушы күші жастар екені де даусыз. Көптің ықыласына бөленген Асан Алкеев есімді ең жас үміткердің насихаттық жұмысында қоғамдық көліктердің мәселелесін көтеру де тегін емес екен. Қасиетті құрбан айт мерекесінде кенттегі барлық бағыттағы қоғамдық көліктерді әр жұма сайын тегін ұсынуды бастап кетті. Біз осы жаңалықты ести сала әр бағыттағы маршутқа мініп, халықтың көңіл-күйін байқап қайттық. Жаңақорған кенті 226,6 км. аумақты қамтитын облыстағы ең үлкен кент. Мұнда үш бағытта қоғамдық көліктер қатынайды. Біз ең ұзақ жол кестесін түзген КТУ маршутына жайғасып, елдің пікірін тыңдадық. Рамазан айы басталғандықтан халықтың көбі ауызашарға қажетті азық-түлік алуға орталық базарға бет алған. Рамазан айында есен-саулық сұрасқан ел әр жұма сайын тегін көлік жүргізіп жатқан жастарға алғыстарын жаудырды. Соның бірі – Құттығыз Байділлақызы: – «Жастарыңды көрсет, ертеңіңді айтайын» демей ме? Біздің арамызда қоғамның қамын ойлайтын, иманды ұлдардың бары қуантады. Кешегі сайлауда есімі есте қалған жас Асан Алкеевтің отбасына, ата-анасына рахмет айтамын. Болашағынан үлкен үміт күтеміз, –деді. Қуанышты жаңалықты естіген қария Айқожа Балтабаев та риза болып, батасын берді. Ақиқатын айту керек, бұл игі іс жеке кәсіпкердің өз қаражатына ұйымдастырылады. Бұған жергілікті билік өкілдерінің ешқандай жауапкершілігі жоқ. Алла разылығы үшін игі амал жасап жатқан Асан Алкеев: « Кешегі сайлау науқаны кезінде Рамазан айында қоғамдық көліктерді тегін жүргіземіз деп айтқан болатынмын. Осы уәдемізді орындау мақсатында достарыммен бірге әр жұмада игі амал жасауды жөн санадым. Біздің ниетіміз қолдан келген кішкентай болса да көмекті бөлісу, ағайынның батасын алу. Достарым да бұл идеямызды қолдап, әр жұмадағы істі қолдауға ниеттерін білдіруде. Бізге елдің ризалығынан артық ештеңе керек емес! Еліміз үшін күш біріктіріп, халықты сауаптылыққа, имандылыққа бағыттағымыз келеді, – дейді ақ жүрек жас ағынан жарыла.Іскерлігімен елге танылып, кәсібін дөңгелетіп жүргізумен қатар көмекке мұқтаж азаматтарға қол ұшын созып, жанашырлық танытып, көпшіліктің ыстық ілтипатына бөленіп жүрген туған жерден түлеп ұшқан азаматтар аз емес. Міне, осындай жанның бірі, жерлесіміз Сабыржан Зайнидинов. Атақ пен даңқты жаны сүймейтін қарапайым тұлғаның әрбір ісі ілкімді, шаруасы мығым, кәсібі кісі қызығарлық, пайымпарасатына жан сүйсінеді. Әсілінде, адамның адамшылығы–мейірімі мен көңіл шуағының өзінен артылып, өзгеге сәулесін түсіруінде, ары мен жанын ізгілікке толтыра білуінде сияқты. Міне, туған жеріне ғана емес, тұтас қазаққа қамқорлық жасауда қарым-қабілетін жұмсап келе жатқан біздің кейіпкеріміз былай дейді:– Кәсіпкер болудың өз қыр-сыры бар. Өзіңнің тырнақтап жинаған қаражатыңа, әрбір басқан қадамыңа есеп беріп, бақылап отырмасаң бір күнде еткен еңбегің еш кетуі мүмкін. Әрине, тиыннан теңге құрау оңай болмады. Ал, теңгені еселеп өсіру тіптен қиын. Әр теңгенің қадірін білдік, нарықты әбден зерттеп, біліміміз бен тәжірбиемізді үнемі жетілдіріп отырдық. Кәсіпкер ешқашан қателесуден қорықпайтын, кеткен қателіктен ой түйіп қоймай, еңбек ету арқылы нәтижеге қол жеткізе алатын адам. Сәтсіздікке ұшырап, бастаған ісін тастап кететін жандар шынайы кәсіпкер бола алмасы белгілі. Өзгелердің жетістігіне қызығып, менің жұмысым неге өрге баспады деп қаймығуға мүлдем бой алдырмаған дұрыс.Сонымен қатар, кәсіп бастамақ ниеттегі адам өзінің ресурстарына қарай білуі керек. Нақтырақ айтқанда білім, күш, ақша, таныстық, қабілет-қарымын есептей біліп, үлкен тәуекелдер мен сәтсіздіктерге дайын болуы қажет. Кез келген нәрсені түсіндіру үшін салыстырмалы мысалдарға жүгінеміз. Қазіргі кәсіпкерлердің үлкен өкілдері бизнесті майдан деп түсіндіреді. Майданда адам – стратегиясын таңдап, қауіп-қатерлерден аман қалудың жолдарын барынша ойлап жүретін болса, бизнесте де дәл солай деген сөз. Жеңіл жеткізу үшін әйгілі кәсіпкер Стив Джобстың «Бизнес дегеніміз – аз ғана қағидалардан тұратын қызықты ойын» деген сөзін қолдансақ болады.Мұхаммед Пайғамбарымыз (с.ғ.с) хадисінде айтады: «Қолыңнан ештеңе келмесе, ең болмаса жылы жүзбен күліп амандас. Соның өзі садақа», – деп. Қайырымды адам қашанда тура жолда жүріп, адамгершілік қасиеттерді бойына жұмылдырады. Қайырымы кең қазақ сынды халықтың әр баласы әлсізге қол ұшын созып, көмек беруге дайын тұрған. Мейірімді, бауырмал, көмекке дайын тұратын абзал адамдар әркез қоғамның негізгі тірегі. Жақсылық жасау имандылықтың, тәрбиеліліктің, парасаттылықтың айқын көрінісі. «Не берсең де балаға бер, бала үшін жаса» деген халқымыздың игі дәстүрі қазіргі кезде қайырымдылық қоғамдарының істәжірибелерімен жалғастырылып келеді. Сол игі істі менде қолымнан келгенімше атқарудамын.– Жалпы, қайырымдылық – сауапты іс. Дегенмен қоғамда «Шық бермес Шығайбайлар» аз емес. Жалпы, қайырымдылық өзі жүре келе пайда болатын нәрсе ме, әлде тәрбиеден бе?– Қазақта «уызына жарымаған» деген сөз бар. Осы сөздің астарында терең мағыналы тәрбие бар деп ойлаймын. Жоғарыда сіз мысалға келтірген Шығайбайлардың көбісін осындай топқа жатқызар едім. Көбіне адал еңбегімен емес, түрлі көлденең табыстармен байыған адамдар өте сараң келетінін көріп жүрміз. Ондайлар қолындағысынан бір тиын артық шықса кедейленіп қаламын деп ойлайды.Өзім әке-шешемнің тұңғышы болғандықтан, көбіне атамның тәрбиесінде өстім. Сол кісі «Ер жігіттің басына не келіп, не кетпейді, жақсылық көрсең де, жамандық көрсең де сабыр ете біл», – дегенді жиі айтып отыратын. Ол кісі «Құдай біреуге байлық береді, бірақ кілтін аспанға іліп қояды екен. Құдай сондай байлықтан сақтасын», – дегенді аузынан тастамайтын. Сол сөздер санамызда бала кезімізден жатталып қалған. Көп қазақ, әсіресе ауылды жерде өскен жігіттер осындай тәрбие көріп өсті. Сондықтан қайырымдылық пен мейірім &nbsp;және жомарттық деген нәрсе ұлттық тәрбиенің негізгі ұстын-дарының бірі деп ойлаймын.– Артыңыздан еріп-келе жатқан жастарға қандай да бір бағытбағдар беру немесе дәріс оқу сынды ойларыңыз жоқ па?– Осы тұста айта кетейін, біздің негізгі бағытымыз қайырымдылық қой. Әйткенмен, көпшілігі берген азықтүлікті ішіп-жеп, ертесіне қайтадан алақан жайып отырады. &nbsp;Алла Тағаланың берген ризығын игілікті жолға жұмсап, мұқтаж жандарға қол ұшын созуды өмірімнің бір бөлшегіне айналдырғандаймын. Әрине, сауап көзге көрінбейтін нығмет. Алайда Алла алдына барғанда абыройыңды асқақтатады. Бұл дүниеде кәсібіңе береке береді. Мен мұндай істі жұрт «Асан меценат екен», деп айтсын деген оймен жасамаймын. Жомарт жан бергенін айтпайды демекші, «Оң қолың берген садақаны сол қолың көрмесің» деген хадис бар. Түптен келгенде жомарттықтың негізгі өзегі – қайырымдылық. Алланың разылығын тапқым келеді, – деді ол.Сондай-ақ, Асан белсенді жастарға, жалғыз басты қарттар мен аз қамтылған отбасыларға, мүмкіндігі шектеулі жандар мен көп балалы үйлерге қол ұшын созып, қайырымдылық акцияларына көмек көрсетіп тұратын тұрақты қолдаушылардың бірі. &nbsp;&nbsp;Түйін. Мәдениеті дамыған елдерде қоғамдық көліктер тегін жүрген күндері халық та сол құрметке сай әлеуметтік мәдениетін жоғары екенін білдіру үшін, көлік жүргізушілеріне доңғалақ ауыстыруға, көлік тазалауға қолғабыс етеді. Мұны олар өзінің қоғам алдындағы жауапкершілігі ретінде қабылдайды. Ал бізде ше? Сондықтан әрбір қоғамдық көлікті өзіміздің дүниеміздей аялап, ішінде тазалықты сақтап, сөзіміз бен іс-әрекетімізді түзесек, бейпіл әңгімеден нақты іске кіріссек, қоғам үшін үн қосқан болар едік-ау! Құрбан айт мерекесінде сауапты іспен де, салауатты іспен де ерекшеленетін ай екенін естен шығармасақ игі.

Жаңақорғандық жас кәсіпкер ел игілігіне қызмет етуде

Kyzylorda-news.kz. Қызылорда облысының әкімі Нұрлыбек Нәлібаев Сыр елі жұртшылығын қасиетті Құрбан айт мерекесімен құттықтады.Құрметті жерлестер! Сіздерді қасиетті Құрбан айт мерекесімен шын жүректен құттықтаймын! Бұл – барша мұсылман ізгі амал жасауға асығатын, ізгілікке ұмтылатын ұлық мереке. Айт күні тек қана құрбандық шалумен шектелмей, ағайын-туысқа, мүгедектер мен мұқтаж жандарға, көршілер мен жетімдерге қол ұшын созу дәстүрі қалыптасқан. Қайырымдылық пен қамқорлық қоғамның тұтастығына, ұлттар мен діндердің өзара ынтымақтастығына жол ашады. Құрбан айт – адамзат баласын жақсылық жасауға үндейтін мейрам болғандықтан, бұл күндері ағайын-туыс бір-бірін құттықтап, араздасқан жандар татуласады. Осылайша адамдардың бір-біріне деген ізет-құрметі, ілтипаты еселене түседі. Бірлігімізді бекемдеп, тұтастығымызды нығайтатын мерекеде шалған құрбандықтарыңыз, қасиетті күндерде жасаған ізгі амалдарыңыз бен игі ниеттеріңіз қабыл болсын! Құрбан айт күні әрбір отбасында амандық, елімізде бірлік пен ынтымақ болсын деп тілеймін! Құрбан айт құтты болсын!&nbsp;

Аймақ басшысы Құрбан айт мерекесімен құттықтады

Жаңақорғандықтар Құрбан айт мерекесін ерекше атап өтті

<a href="https://kyzylorda-news.kz/">Kyzylorda-news.kz.</a> Бүгін елімізде бұқаралық ақпарат құралдары қызметкерлерінің кәсіби мерекесі күні. &nbsp;Осыған орай бүгін аудан әкімдігінің мәжіліс залында бұқаралық ақпарат құралдарының қызметкерлері күніне арналған салтанатты іс шара өтті.&nbsp;Іс шарада аудан әкімі Мұрат Жолкелдіұлы жергілікті журналистерді, ұзақ жыл осы салада қызмет еткен ардагер қаламгерлерді мерекемен құттықтап, жылы лебізін арнады.&nbsp;<blockquote>«Ғасырға жуық тарихы бар «Жаңақорған тынысы» газеті оқырмандарының белсенділігімен мақтана алады. Бүгінгі күні 6000-нан аса тұрақты оқырманы бар басылымның таралымы ұдайы артып, аудан халқы белсенді тұтына бастағанынан аңғарамыз. Былтырғы бас қосуымызда ауданымыздың төл басылымы «Жаңақорған тынысы» басылымның 90 жылдығын атап өтуді жоспар еттік. Жоспарға сай биыл қаңтар айында жас ақындар айтысы өтті. Наурыз айында А.Сопыбеков атындағы аудандық кітапханасында «Газет - елдік пен ерлік жаршысы» атты ардагер қаламгерлермен кездесу кеші өтті. Қазан айында республикалық ақындар айтысы мен қорытынды гала концертін өткізу жоспарымызда бар. Биыл 90 жылға толған «Жаңақорған тынысы» газетінің ауқымы аудандық болғанымен алаштық идеяны көтеріп, елдік сана, мемлекеттілік мүдде аясындағы еңбегін ұтымды атқарып келеді. «Жаңақорған тынысы» газетінің ұжымына және аудан жаңалықтарын креативті тұрғыда жариялап жүрген блогерлерге, ардагер қаламгерлерге шығармашылық шабыт, еңбектеріңізге табыс тілеймін!Еліміздің өркендеуі жолында қаламдарыңыз мұқалмай қызмет ете берулеріңізге тілектеспін. Қашанда Жаңа, Әділетті Қазақстанның идеясын насихаттайтын ауданның төл басылымының бәсі биік бола берсін!», - деді аудан басшысы.&nbsp;</blockquote>Сонымен бірге салтанатты шара барысында мәслихат төрағасы Ғ.Сопбеков, сот төрғасы А.Түбекбаева құттықтау сөз сөйлеп, ізгі лебіздерін білідірді.Одан кейін «Жаңақорған тынысы» газетінің бас редакторы Б.Үсейнова аудандық газеттің тарихи жолы мен бүгіні жайлы тарихи шолу жасаса, облыстық жас ақындар айтысының бірнеше дүркін жеңімпазы, жас ақын М.Абдуллаев «Жаңақорған тынысы» газетіне арнайы арнауын оқып, көпшіліктің ыстық ықыласына бөленді. Журналистердің кәсіби мерекесі күні дәстүрлі басылымдар жөнінде ой толғауды жөн көрдік. Қазір қоғамда ақпараттық технологиялардың дамуымен қатар дәстүрлі басылымдардың рөліне де ерекше мән берілуі керек.Ғаламторды қанша жерден мақтасақ та, ол газет пен журналдай бола алмайтынына сенімдімін. Заман талабын ескерген дұрыс шығар, бірақ тасқа басылған дүниелердің салмағы қашанда жоғары деп ойлаймын. Бүгінде осыған байланысты екі жақты пікір бар. «Газет-журналсыз өмір сүру мүмкін емес. Бұрынғылар ғаламторсыз-ақ газет оқып, көзін ашқан. Ал жаңа заман адамдарының өмірін онсыз елестету қиын.Ғаламтор адамды елітіп, өзіне тәуелді қылады. Қолдану дұрыс та шығар, бірақ газетсіз елдің тіліне нұқсан келеді» деп аға буын өкілдері баспасөз болашағына алаңдаушылық танытса, енді біреулері: «Қолымыздағы тетікті бассақ болғаны, ақпараттың барлығы дайын тұр. Газет-журналға жазылып, ақша шығарып не керегі бар? Тіпті болмаса, сол газеттің электронды нұсқасын оқуға болмай ма?» деп қарсы дау айтып жатады. Бүгінгі ақпараттық технология қарыштап дамыған қоғамда ғаламтор айнымас досымызға айналғандай. Әйтеуір бәрі керемет, бәрі оңай. Дегенмен, ғаламтордың пайдасынан бөлек, зиянды жағы да жетерлік.Телефонға телмірген жастардың қоғамдық көлікте құлағын бітеп алып, әлеуметтік желілерден шықпай, ешкімді елеместен міз бақпай отыратынын қайтерсің?! Тіпті кіп-кішкентай бүлдіршіндер де ұялы телефонның мүмкіндіктерін біліп алған. Ғаламтормен санасы шырмалған бүгінгі буын ертеңгіге қандай өнеге бермек?! Жастарымыз рухани жұтаңдыққа ұшырап жатқан жоқ па?! Көкейімізде сан сауал... Өз басым, бос уақытымды әлеуметтік желіге арнағаннан гөрі, газет-журналмен дос болуды артық санаймын және мұны әдетке айналдырдым.Ғаламтормен жұмыс істеу тиімді әрі жедел болғанымен, ондағы ақпараттың дәлдігі мен шынайылығына ешкім кепілдік бере алмайды.Ал баспасөз беттерінде нақты мәліметтер ғана жарияланады. Елдегі болып жатқан елеулі оқиғаларды жұртшылыққа жеткізіп, жан дүниеңді байытып, ой-өрісіңді өсіретін, сезімге сезім, ойға ой қосып, таным көкжиегін кеңейтетін де газет емес пе? Қажет ақпаратты экраннан оқығаннан гөрі газетті қолмен ұстап, сезініп оқыған көңілге де қонымды, жүрекке жақын. Өзіме солай. Газет – қаншама адамның үздіксіз ізденісі, табанды еңбегі. Ел азаматтарының ізгі істері, қоғамдағы өзекті мәселелер жайын айтқан журналистердің мірдің оғындай өткір сөздерін газет бетінен ғана табатын сияқтымын. Алайда қазір жастар газет, кітап оқуға құлықсыз деген пікір қалыптасқан. Мен бұл пікірді теріске шығарар едім. Сол үшін газет-журнал оқырмандарының көп болғанын қалаймын. Сөз соңында айтарым, газет оқу бұл – зиялылықтың белгісі.Бұқаралық ақпарат құралдары ақпаратты жеткізетін құрал ғана емес, ұлттық идеологияның жаршысы, мемлекеттік бағдарламалардың насихатшысы, ең бастысы, ұлттық қауіпсіздіктің өзегі. Иә, журналист еңбегі 8 сағаттық жұмыс қалыбына сыймайды. Кейде бір мақала жазу үшін бірнеше күн ізденіп, сөздің киесіне құрметпен қарап, қиналатыны бар. Үздіксіз еңбектің артында сапалы мақалалар туындап, оқырманын сусындатады. Журналистер қауымының осынау еңбегі бұқаралық ақпарат құралдары қызметкерлерінің күні ескерілетіні анық. Аудандық мәслихат төрағасы Ғалымжан Сопбеков сөз өнерінің қасиетін жақсы түсінеді ғой, салтанатты кеште тұрақты авторлар мен белсенді оқырмандарға ерекше ілтипат білдірді.<blockquote>«Газеттің сөзі бір күндік, өзі мың күндік» дегендей журналистер түнді түнге жалғап, шабыт іздеп, мақала жазады. Баспасөз тарихында қазақ басылымдарының орны ерекше. Әрбір мақаланың мазмұны кейде айлар бойы ұйқас іздеп, оқиды, тоқиды, пікірлеседі. Тіпті жылдап жазатын шығармалары да болады. Әрі оны бітіргенінше дамыл таппайды. Мұның бәрі жұмысқа деген жауаптылығы, шығармасына деген шынайылығы, газет өндірісіне адалдығынан. Мұндай ауыртпалықты екінің бірі түсіне бермейді. «Халыққа қызмет – кәсіби ақпаратты дер кезінде жеткізу, мемлекеттік саясатты ақпараттандыру. Мемлекеттік саясаттың негізінде халықтың әл-ауқатын көтеру, тұрмысын сапалы ету жатыр. Сол тұрғыда барлық мемлекеттік бағдарламалар, бастамалардың бәрі халыққа жету мәселелері өзекті. Сонымен қатар күнделікті халықтың көкейтесті мәселелерін шешуде аянбай қызмет етіп келе жатырсыздар. Сіздердің материалдарыңыз арқылы тек қана қоғамдық-саяси, экономикалық өзгерумен қатар әр жеке адамның да өмірін өзгертіп, иә болмаса, өмірін құтқарып жатқан жайттар бар. Сондықтан бүгінгі кәсіби мерекелеріңізбен құттықтаймын. Әрқайсыңыздың арттарыңызда тұтас ұжым тұр. Сіздер арқылы сол ұжымдарыңызды құттықтаймын. Шүкір, қаламгер ағаларымыздың артында лайықты ізбасарлары қалды. Оған бүгінгі «Жаңақорған тынысы» газетінің кескін-келбеті мен мазмұны дәлел. Бүгінде біздің газеттің өңірдегі кез-келген газеттен шоқтығы биік, мерейі үстем. Төл басылым – «Жаңақорған тынысы» алдағы уақытта да осы биіктен түспей, асқақтай беруіне тілектеспін, – деді.</blockquote>Өтпелі кезеңдерде аудандық газеттің сақталып қалып, дамуына үлес қосқан ардагер қаламгерлер арамызда жүр. Сондай қаламгердің бірі Алмас Бекжігітов:– 1998 жылы газетке келдім. Бұл кезде Қазақстан нарықтық экономикаға бейімделіп, редакция мен баспахана бірікті. Сөйтіп, баспа кәсіпорыны болып құрылды. 2000 жылы «Қазполиграфия» АҚ аудандық газет редакциясы отырған ғимаратты меншігі екенін мәлімдеді. Сөйтіп редакция ғимаратсыз қалды. Бұдан бөлек, баспахана өндірісінде де қиындықтар болды. Бұдан бөлек, күн тәртібінде газеттің тиражын арттыру, журналистердің жалақысын тұрақты беру және т.б мәселелер тұрды. Мұндай қиындықтарды жеңу оңай болмады. Журналистер қай заманда болмасын қоғамның қозғаушы күші. Қалың халық пен билік арасындағы алтын арқау. Сондықтан бұл салаға екінің бірі келе бермейді. Келген күнде оның қадір-қасиетін тереңнен ұғынуға тиіс. Сонда ғана жолынан жаңылмайды, – деді.Кездесуде газеттің тұрақты оқырмандары да бой көрсетті. «Жаңақорған тынысы» газеті бір-екі сағат кешіксе, редакцияға телефон шалып, ренішін білдіріп жататын оқырмандарымыз көп. Олар газеттің тұрақты оқырманы ғана емес, газеттің тігіндісін жинап, ұрпағына газет оқу мәдениетін насихаттап жүрген көкірегі ашық адамдар.&nbsp;Сондай-ақ, Изатулла Нәрзілдаев та жалынды арнауын арнап, журналистерді бір серпілтіп тастады. Кездесу соңында аудан әкімі ардагер журналистер мен «Жаңақорған тынысы» газетінің шығармашылық ұжымын марапат биігіне шығарып, құрмет көрсетті. Шара соңында аудандық журналистиканы дамытуға айрықша үлес қосқан медиа майталмандары мен сала ардагерлеріне аудан әкімінің «Құттықтау хаты» мен бағалы силықтары табысталды.

Қазақстан және Қызылорда облысының жаңалықтары