<a href="https://kyzylorda-news.kz/">Kyzylorda-news.kz</a> Дунфан қаласында «Бір белдеу-бір жол» бастамасы аясындағы халықаралық ауыл шаруашылығы конференциясы өтті.&nbsp;Аталған конференция Қытай мен Қазақстан арасындағы агроөнеркәсіптік ынтымақтастықты кеңейтуге, озық тәжірибе алмасуға, инвестициялық мүмкіндіктерді таныстыруға және бірлескен жобаларды іске асыруға бағытталды. Іс-шара барысында ауыл шаруашылығын жаңғырту, аграрлық технологиялар, өнім өңдеу бағыттары бойынша өзекті мәселелер талқыланды.Сонымен қатар, конференция аясында Хайнань халықаралық экономикалық даму бюросы, Хайнань-Хэйлунцзян сауда-өнеркәсіп палатасы, Дунфан жүгері өнеркәсібі қауымдастығы, Баян уезінің ауыл шаруашылығын дамыту компаниясы арасында ынтымақтастық жөніндегі үшжақты меморандумға қол қойылды.Аталған келісімдер Қытай-Қазақстан агроөнеркәсіптік серіктестігін тереңдетуге, «Бір белдеу – бір жол» бастамасы аясында өзара тиімді жобаларды ілгерілетуге оң серпін беретін болады.

Қазақстан-Қытай ауыл шаруашылығы ынтымақтастығы жаңа деңгейге көтерілді

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласында Жалағаш ауданының ауыл шаруашылығы өнімдері жәрмеңкесі ұйымдастырылды.Жаңа жыл мерекесі қарсаңында өткен жәрмеңкеде қала тұрғындарына аудан еңбеккерлері өндірген табиғи, экологиялық таза әрі сапалы өнімдер базар бағасынан 15-30 пайызға төмен бағамен ұсынылды.Жәрмеңкеге 140 тоннадан астам ауыл шаруашылығы өнімі жеткізілді. Атап айтқанда, жоғары сұрыпты күріш, картоп, сәбіз, пияз, қырыққабат, асқабақ, қызылша, қызанақ, бұрыш, алма, жүзім, сондай-ақ ет және балық өнімдері тұрғындар тарапынан жоғары сұранысқа ие болды.Бұл жәрмеңке ауыл еңбеккерлеріне өз өнімдерін тікелей тұтынушыға ұсынуға, ал қала тұрғындарына сапалы азық-түлікті қолжетімді бағамен сатып алуға мүмкіндік берді.Фото: Жалағаш ауданы әкімінің баспасөз қызметі

Ауыл шаруашылығы өнімдерінің жәрмеңкесі өтті

<a href="https://kyzylorda-news.kz/">Kyzylorda-news.kz</a> &nbsp;Сырдың төменгі ағысын мекендеген елдің кәсібі – мал бағу, одан қалды «өзен жағалағанның өзегі талмас» деген тәмсілді мықтап ұстанған. Дарияның құяр сағасын жағалай жатқан елдің жігіттері теңізде түнеп, тіршілік етеді. Сонысымен отбасын асырайды. Балық десе, бір иығын бұрып тұратын осындағы ауылдардың бірін айтсақ дейміз. Ол – Қамыстыбас көлінің жағасында балық өсіру питомнигі орналасқан Қосжар ауылы.Құрылғалы 60 жылға жуықтаған Қос­жар елді мекені Арал ауданына қа­райды. Мұнда балықшылар ғана емес, оны өсі­рушілер де тұрады. Анығында 1966 жылы 5 наурызда Қамбаш көлінің жаға­сына теңіздің тартылуына байланысты балық өсіру питомнигінің құрылысы түсті.Мақсаты – теңізде азайып бара жатқан асылтұқымды сазан, дөңмаңдай, ақ амур секілді балық түрлерін сақтау, көбейту, өсіру. Питомник түскесін, жұмысшы қа­жет. Жақын маңайдағы ауылдан көшіп ке­лушілердің көбейген кезі де осы тұс. Міне, бір питомниктің арқасында бір ауыл осылай пайда болған деседі. Ал Қосжар деген атауға келсек, көл жағалай арасы шақырымға жуық екі жар бар. Дәл ортада ауыл орналасқан. Қосжар атауы жер бедеріне байланысты берілгені осыдан-ақ белгілі.<blockquote>– 1965 жылы осында көшіп келдік. Сол кезде балық өсіретін тоғандар салынып жатты. Мекеме әлі жұмыс бастамаған кез. Сонда 5-6 үй ғана болды ғой. Күлмаш, Бимаш, Сүлеймен дейтін ақсақалдардың шаңырағы отырды. Қамбаштың бер жағын­да көне колхоздың ізі бар. «Сталин жолы» деп аталды. Сол елден де адамдар көшіп келді. Бес-алты жылдан соң мектеп, медпункт салынды. Дәуқара Аймағанбетов басшылыққа келген жылы осы Қосжарда шиферлі тамдар көбейген. Қазір бұл ауылда 100-ге жуық шаңырақ бар. Біраз азамат сол балық мекемесінде, одан бөлек, мектеп пен балабақша, әкімшілік пен клуб үйінде қызмет істеп келеді. Аудандағы көп ауылға қарағанда жұмыссызы жоқ елдің бірі осы – Қосжар, – деді бізбен кездескен балық шаруашылығының ардагері Шарап Байбосынов ақсақал.</blockquote><img src="https://knadmin.beoblood.kz/uploads/aral_e96abe76bd.jpg" alt="арал Фото: Нурболат Нуржаубай">Қария өмірінің көп бөлігі питомникпен байланысты. Осы саладан зейнетке шыққан оның әлі де балық өсірушілерге үйретері көп. Бір қызығы, онда «жоғары білім», «диплом» деген болмапты. Сірә, сол қатырма қағазды бұрынғы басшылар да керек етпеген сияқты. Шарап ата питомникте жай жұмысшы болып бас­тап, балықты қолдан көбейтудің жолын тәжірибе жүзінде үйренген. Сонысымен бас балық өсіруші деген лауазымға дейін өскен. Дала академиктері осылай пайда болған ғой.Бұл кәсіпті қазір ұлы Қылышбек атқа­рады. Питомникке маңдай тері әбден сіңген Шарап әкеден ұлы да көп нәрсені үйренген. Қылышбек балықты өсіріп қана қоймай, аталығы мен аналығының күйін қарау, уылдырықтан бастап бір немесе екі жаздық балыққа дейінгі өсуін қадағалау сияқты жұмыстарды әбден меңгеріпті.<blockquote>– Қарапайым тілмен түсіндірейін, – деді питомникте тоған бригадирі болып қызмет істейтін Қылышбек Байбосынов. – Үлкен 30 келіден жоғары аналық сазанды қолға түсіреміз. Одан бөлек он шақты аталық болады. Жұмыс барысында аналық балықты ұйықтатамыз. Оның да процесі болады. Ұйықтаған балықтың салмағын өлшеп, соған сәйкес екпе салынады. Кәдімгідей толғатады. Ұйқыда жатқан балықтың уылдырығы кәдімгі сөк сияқты сусып түсуі қажет. Оны балықтың жаялығы дейтін болады, соған сығып салып, арнайы қалбырға аударамыз.</blockquote>Ендігі жұмыс аталық балықпен болады. Ол жерден үш аталықтың шоғалын (ұрығын) алып, әлгі аналықтан алған уылдырыққа араластырамыз. Бұл жерде бір аналыққа үш еркек балықтың шоғалы қажет. Айтпақшы, уылдырық пен шоғалды араластырғанда, бұған тек құстың қауыр­сынын ғана пайдаланамыз. Өйтпесе болмайды, уылдырықты зақымдамау үшін құс­тың жұмсақ қанаты ғана жарайды. Одан соң жаңа сауған сиырдың таңғы сүтінің бір литрін он литр суға араластырып, уылды­рыққа қосып тағы араластырамыз.Қылышбек ағаның айтуынша, уылды­рықтан майда балық өніп шығам дегенше жұмыс өте күрделі. Әлгі уылдырықтың екі-үш күннен соң дер­нәсілге (личинка) айналып, су ішінде сусылдап жүргенін байқайсың. Питомникте уылдырықтан бастап 30-40 грамдық ша­баққа дейінгі бағу, санау, тоғанға жіберу, тоғандағы балықты жемдеу, одан көлге тасымалдау сияқты жұмыстар жыл бойы үздіксіз жүре береді.<img src="https://knadmin.beoblood.kz/uploads/aral_fe47d8b591.jpg" alt="арал. Фото: Нурболат Нуржаубай.jpg">Қосжардағы питомник пен осы мекемеге қарасты Қаратереңдегі «Тастақ» учаскесінде балық өсіруге арналған арнайы инкубациялық цехтың бірі гума­нитарлық көмек арқылы Израильден келген құралдармен жабдықталған. Об­лыс­тағы балық қорын көбейтуге респуб­ли­калық бюджет қаржысымен жыл сайын Кіші Арал теңізіне және «Ақшатау» мен «Қамыстыбас» көлдер жүйесіне осы «Қамыс­тыбас балық питомнигі» РМКҚ арқылы бір жаздық 12 млн және екі жаздық 420 мың шабақ жіберіледі екен.Ал ауыл әкімі Мәди Әбдікеровпен тіл­дескенімізде, балықшы ауылдың бірлігі бүтін екенін айтады. Қазір ел ішінде ата­кәсіптің ізімен жүргендер көп. Одан бөлек, Үкімет қолдауынан да тыс қалған емес.<blockquote>– &nbsp;Қосжар – бірлігі мен тірлігі жарасқан Сыр бойындағы үлгілі ауылдардың бірі. Үлкені сөйлесе, кішісі соған тоқтайтын қазақы қалыппен ел ақсақалдары да жас­тарға ақыл-кеңестерін айтып, қажет кезде жат әдеттерден тыйып отырады. Со­ның арқасында шығар, ауыл ішінде жат пиғыл, жаман қылық жоқ. Барлығы да бір атаның баласындай тату-тәтті тұр­мыс кешіп келеді. Былтыр ауылға кіре­бе­ріс жерді көгалдандырдық, 5 млн теңге қаржы бөлінді. Сондай-ақ жаңа әкімшілік ғимараты әріптестік негізде 13 млн тең­геге салынды. Биыл қосымша абаттанды­ру жұмысы жүрді. Ең бастысы, облыстан қаржы бөлініп, ауылдағы басты көшеге асфальт төселді. Ауылда балық шаруа­шы­лығымен қатар, төрт түлікті көбейтіп отырған қожалықтар да бар, – дейді ол.</blockquote><img src="https://knadmin.beoblood.kz/uploads/faaa4195_cc23_474a_8530_5075c2fb1fbe_b52e2a05a6.jpg" alt="арал Фото: Нурболат Нуржаубай.">Аудан орталығынан 110 шақырым алыс жатқан Оскар ауылы округ ретінде 2005 жылы құрылған. 600-ге жуық тұрғыны бар елді мекенде балық өсіру питомнигінен бөлек, әлеуметтік ғимараттар жұмыс істеп тұр. Ауыл ішіндегі көшелерге асфальт және қиыршық тас төселген. Түнгі қауіпсіздікке арналған жарықшамдар да түгел орнатылыпты.Ержан ҚОЖАС,Фото: Нұрболат Нұржаубай

Қосжар ауылы: балық аулау дәстүрлері және тұрақты даму

Арал: ауыл шаруашылығы саласында инвестиция көлемі жоғары 

<a href="https://kyzylorda-news.kz/">Kyzylorda-news.kz</a> Қазақстан бойынша күріш өндірісінің негізгі үлесі тиесілі Қызылорда облысы ежелден диқандардың маңдай терімен танылған өңір. Сыр бойының берекелі даласында өсірілген ақ маржан – ел ырысы, халық несібесі. Ала жаздай атыз жағалап, аптап ыстықта бел жазбай еңбек еткен шаруалардың қажырлы еңбегі қандай құрметке де лайық.Осындай ауыр да абыройлы жолды ширек ғасырға жуық уақыт бұрын таңдаған жандардың бірі – Сырдария ауданына қарасты Шаған ауылының тұрғыны, тәжірибелі диқан Кенжетай Омаров. Ол облыс орталығынан шамамен 60 шақырым қашықта орналасқан, егіншілікпен аты шыққан берекелі ауылда дүниеге келіп, осында өсіп-өнді. Ауылдағы №37 орта мектепті тәмамдаған соң туған жерден алыстамай, ірі шаруашылық саналатын «Шаған-Жер» серіктестігіне жұмысқа орналасты. Содан бері ширек ғасырдан астам уақытын дала еңбегіне арнап келеді.Күріш шаруашылығы – сырт көзге қарапайым көрінгенімен, аса үлкен жауапкершілік пен тиянақтылықты талап ететін сала. Егіс науқаны көктемнен басталып, күзге дейін бір сәтке де тыным таппайды. Әсіресе су режимін дұрыс сақтау, атызды уақытылы бастырып, қайта құрғату – мол өнім алудың басты кепілі.<blockquote>– Күріш егудің өзіне тән қиындығы аз емес. Әр кезеңнің өз талабы бар. Шаруашылықта бірнеше сорт егіледі. Соның ішінде «Маршал», «Лидер», «Янтарь» сорттары тұрақты түрде өсіріледі. «Маршал» ауруға төзімділігімен ерекшеленсе, «Лидер» нәзік болғанымен, дәмдік сапасы жоғары. Халық сұранысына ие болған соң бұл сорттарды жыл сайын егеміз, – дейді тәжірибелі диқан.</blockquote>«Шаған-Жер» серіктестігі – кезінде Кеңес одағы тұсында рекордтық өнім жинап, «күріш фабрикасы» атанған алпауыт шаруашылықтардың бірі. Бүгінде бес мыңға жуық тұрғыны бар ауыл халқының едәуір бөлігі осы серіктестікте еңбек етіп, күнкөрісін қамтып отыр. Аграрлық аймақ саналатын өңір үшін мұндай шаруашылықтардың ел экономикасына қосып отырған үлесі зор.Соңғы жылдары Сыр өңірінде су тапшылығы сезілгенімен, шағандық диқандар тығырықтан шығудың жолын тауып келеді. Ұтымды жоспарлау мен тәжірибеге сүйенген еңбектің арқасында биылғы егін көлемі де жылдағыдан кем болмайды деген сенім бар. Қазіргі таңда күріш жинау науқаны қызу жүріп, әрбір дәнді ысырапсыз жинау басты мақсатқа айналған.Шаруашылықта егіншілікпен айналысып, жоғары көрсеткішке қол жеткізіп жүрген озаттар аз емес. Солардың қатарында Кенжетай Омаров та бірнеше мәрте үздік күрішші атанып, әріптестері арасында абыройға ие болған. Биыл да ол өткен жылдардағы рекордтық нәтижесін қайталауға ниетті.<blockquote>– Жақсы өнім алудың тағы бір маңызды шарты – техниканың жарақтылығы. Соңғы жылдары серіктестік басшылығы заманауи техникаларды сатып алып, егістікті тегістеу, себу және жинау жұмыстарын толық механикаландыруға күш салды. Бұл біздің жұмысымызды жеңілдетіп қана қоймай, өнім сапасын арттыруға мүмкіндік берді, – дейді диқан.</blockquote>Осындай еңбек адамдарының маңдай тері мен табандылығының арқасында Сырдария даласында ақ күріштің даңқы артып, ел қамбасы толығып келеді. Озат күрішші Кенжетай Омаровтың еңбегі – ауыл шаруашылығына адалдықтың, туған жерге деген жанашырлықтың жарқын көрінісі.

Сырдария ауданындағы озат күрішші – дала еңбегінің жарқын үлгісі

<a href="https://kyzylorda-news.kz/">Kyzylorda-news.kz</a> Жыл сайын мемлекет тарапынан аграрлық саланы қолдауға қомақты қаржы бөлініп келеді. Мәселен, биыл өңірдің ауыл шаруашылығында 211,5 млрд теңгенің өнімі өндіріліп, өсім көрсеткіші 1,9 пайызға артса, саланың негізгі қорына салынған инвестиция көлемі 44,9 пайызға артқан. Бұл туралы Өңірлік коммуникациялар қызметінің ақпарат алаңында облыстық ауыл шаруашылығы және жер қатынастары басқармасының басшысы Талғат Дүйсебаев мәлімдеді.<blockquote>– Биыл облыс бойынша 189,6 мың гектар жерге ауыл шаруашылығы дақылдары егілді. Негізгі дақыл күріштің көлемі 80,9 мың гектарды құрайды. Мемлекет басшысының тапсырмасына сәйкес, жылдан жылға суды көп қажет ететін күріш көлемі оңтайландырылып келеді. Өткен жылмен салыстырғанда биыл күріш көлемі 4,7 мың гектарға қысқарды. Су ресурстарын тиімді пайдалану мақсатында егістік жерлерді лазерлік тегістеу жұмысы өз жемісін көрсетті. Нәтижесінде, диқандар күріштің 60 мың гектарын осы әдіс арқылы егіп, суды 20 пайызға үнемдей отырып өнімділікті арттырды. 2026 жылы бұл көрсеткішті 65 мың гектарға жеткізіп, 2028 жылға дейінн егісті толығымен тегістеу жоспарланып отыр. Одан бөлек, 50,6 мың гектарға сүдігер айдау жұмыстары жүргізіліп, 4,5 мың гектар жерге күздік бидай егілді. Өңірде тамшылатып, жаңбырлатып суару әдістерін пайдалану арқылы егіс көлемі 8,1 мың гектарға жеткізіліп, өткен жылмен салыстырғанда 2 есеге артты. Сонымен қатар, мемлекет тарапынан ұсынылған мүмкіндіктерді барынша тиімді пайдаланып, бәсекеге қабілетті агроөнеркәсіп кешенін құру, саланы әртараптандыру бағытында бірқатар жобалар қолға алынды. Атап айтқанда, өңірде құны 40 млрд теңгеге жүгеріні терең өндеуге бағытталған Қызылорда крахмал-сірне зауыты жобасы жүзеге асырылуда. Бұл жоба 2025-2029 жылдары аралығында екі кезеңде іске асырылатын болады. Бірінші кезеңде - кептіру кешенінің құрылысы жүргізілсе, екінші кезеңде жүгеріні терең өңдейтін зауыт салынады. Алғашқы кезеңінде зауыт тәулігіне 1 200 тонна жүгері дәнін кептіріп, 30 мың тонналық сақтау қоймасы салынатын болады. Бүгінгі күні зауыт құрылысы үшін 35 гектар жер телімі табысталып, 10 мың гектар жерге дән жүгері дақылын егуге шаруалармен келісімдер жасалды,- деді Талғат Тұрсынұлы.</blockquote><img src="https://knadmin.beoblood.kz/uploads/Biyl_oblysty_auyl_sharuashyly_y_salasyna_tartyl_an_investicziya_k_lemi_44_9_pajyz_a_artty_76f6084916.jpg" alt="Биыл облыстың ауыл шаруашылығы саласына тартылған инвестиция көлемі 44,9 пайызға артты.jpg">Сондай-ақ, егісті әртараптандыру, күрішті оңтайландыру мақсатында швейцариялық «Харвест Груп» компаниясымен бірлесіп, құны 51 млрд теңгеге техникалық қарасора, жүгері және соя өсірілетін болады. Бұл жоба аясында 21 мың гектарға қарасора, жүгері және соя дақылдарын егіп, терең өндейтін агроиндустриялық кластер құру жоспарланып отыр.<blockquote>– Аймақта мал шаруашылығын дамытуға жасалынған қолдаулардың нәтижесінде төрт түлік мал басы өсіп, өнім өндіру тұрақты ұлғаюда. Биыл Жаңақорған ауданында қуаттылығы жылына 5 000 басты құрайтын «Қожамберді батыр» ЖШС мал сою және ет экспорттау орталығы іске қосылды. Аталған серіктестік Түркия мемлекетімен 1 000 тонна ет өнімдерін экспорттауға келісім шарт жасады. Бұдан бөлек, сүт бағыты бойынша «Қызылорда Құрылыс НК» ЖШС-нің жалпы құны 7,5 млрд теңгені құрайтын «Қызылорда қаласында 800 басқа арналған тауарлы-сүт фермасын құру» жобасы жүзеге асты. 2026 жылы «Романов» шаруа қожалығының 400 басқа арналған сүт-тауарлы фермасының құрылысын іске қосу межеленуде,- деді Талғат Дүйсебаев.</blockquote>Фото: Нұрболат Нұржаубай

Биыл облыстың ауыл шаруашылығы саласына тартылған инвестиция көлемі 44,9 пайызға артты

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаевтың төрағалығымен мәжіліс өтіп, су тапшылығы жағдайында алдағы егін егу маусымына дайындық барысы жан-жақты талқыланды. Мәжіліске «Қызылорда крахмал-сірне зауыты» ЖШС директоры Шухрат Құрбанов және шаруа қожалықтары құрылымдарының жетекшілері қатысты.Аудан басшысы суармалы сумен қамтамасыз ету, алдағы маусымда су тапшылығының болатынын ескерте отырып, егіс құрылымын қайта қарау мәселелерін атап өтті. Атап айтқанда, күріш алқаптарын қысқартып, су аз қажет ететін жүгері, мақсары және өзге де балама дақылдарға кезең-кезеңімен көшу бағыттарына тоқталды. Бұл жұмыстар аграрлық саланың тұрақтылығын сақтауға және су ресурстарын тиімді пайдалануға мүмкіндік беретінін айтты. Осы бағытта ауданда жүгері дақылын терең өңдейтін зауыт құрылысы салынатынын, қазір жұмыстар басталғанын жеткізді.Мәжіліс барысында “Қызылорда крахмал-сірне зауыты” серіктестігінің директоры Ш.Құрбанов “Жүгері дақылын терең өңдеу зауытын салу” жобасы туралы түсіндіріп өтті. Жобаның жалпы құны - 40 миллиард теңге. Жоба толық іске қосылған кезде 500 жаңа жұмыс орны ашылады деп күтілуде. Өндіріс орны суды аз қажет ететін жүгері дақылын еккен шаруашылықтардың өнімін толық қабылдайтын болады. Бұл ауыл шаруашылығы өнімдерінің өңделу деңгейін арттырып, отандық өнім көлемін көбейтуге және экспорттық әлеуетті нығайтуға мүмкіндік береді.Мәжіліс барысында шаруашылық құрылымдарының өкілдері өз ұсыныс-пікірлерін жеткізді.Аудан әкімі бірлесе жұмыс жасауды, алдағы егін маусымына дайындықты сапалы жүргізу керектігін атады.Фото: Сырдария ауданы әкімінің баспасөз қызметі

Сырдария: Егін егу маусымына дайындық барысы пысықталды

<a href="https://kyzylorda-news.kz/">Kyzylorda-news.kz</a> Қызылорда қаласының «Журба» көшесінде Қармақшы ауданының ауыл шаруашылығы өнімдерінің жәрмеңкесі ұйымдастырылып, қала халқына арзан әрі сапалы өнімдер ұсынылды. Ауданнан жалпы 150 тоннаға жуық өнім тиелген 45 автокөлік жеткізілді.Жәрмеңкеге 25 тонна күріш, 80 тонна бақша өнімдері, ет пен 2 тонна жеміс-жидектер, сүт және сүт өнімдері, 1 тонна балық, мал азығы, сондай-ақ тосап пен табиғи бал жеткізілді.Барлық өнімдер нарықтағы бағадан 10–15 пайызға төмен, сондай-ақ белгіленген бағадан да арзан сатылып, қала тұрғындары үшін қолжетімді баға ұсынылды.Атап өту қажет, Қармақшының айран-шұбаты мен күріш өнімдері қызу сұраныспен саудаланды. Жәрмеңкеге келген жұртшылық ауданымыздың табиғи, экологиялық таза өнімдерін жоғары бағалап, өз ризашылықтарын білдірді.Фото: Қармақшы ауданы әкімінің баспасөз қызметі

Қармақшының табиғи өнімдері - Қызылордада!

<a href="https://kyzylorda-news.kz/">Kyzylorda-news.kz</a> Сырдария ауданында егін шаруашылығына қатысты өзекті мәселелер талқыланған арнайы мәжіліс өтті. Жиынға аудан әкімі Берік Сәрменбаев, облыстық ауыл шаруашылығы және жер қатынастары басқармасының басшысы Талғат Дүйсебаев қатысып, аймақтағы су тапшылығы жағдайында алдағы егін егу маусымына дайындық барысы жан-жақты қаралды.Мәжіліске ауданға жұмыс сапарымен келген “Қазсушар” РМК Қызылорда филиалы директорының орынбасары Айдос Асанбаев, Су ресурстарын реттеу, қорғау және пайдалану жөніндегі Арал–Сырдария бассейндік су инспекциясының басшысы Зейнулла Қазтоғанов, «Қызылорда крахмал-сірне зауыты» ЖШС-нің директоры Шухрат Құрбанов, сондай-ақ “Аграрлық Несие Корпорациясы” АҚ облыстық филиалының өкілі Нұржан Жаналиев, “Фитосанитария” &nbsp;Қызылорда облыстық филиалының директоры Жанат Дүзелбаева және тиісті сала басшылары мен шаруа қожалықтарының жетекшілері қатысты.Жиын барысында облыстық ауыл шаруашылығы және жер қатынастары басқармасының басшысы Талғат Дүйсебаев вегетациялық кезеңде аудандағы суармалы егіншілікпен айналысатын шаруашылықтардың қазіргі жағдайы, биылғы ауыл шаруашылығы науқанының қорытындысы және келер жылғы егін егу кезеңіне жоспарланған жұмыс бағыттарын талқыланды. Басқарма басшысы Сырдария өзені бойындағы су көлемінің азаюы және оның егістік алқаптарына әсеріне назар аударды.Күн тәртібіндегі мәселелер бойынша сөз алған сала мамандары суармалы сумен қамтамасыз ету, су тапшылығының салдарын азайту, егіс құрылымын қайта қарау қажеттігін атап өтті. Атап айтқанда, күріш алқаптарын қысқартып, су аз қажет ететін дақылдарға – жүгері, мақсары және өзге де балама өнімдерге кезең-кезеңімен көшу жөнінде ұсыныстар айтылды. Бұл бағыттағы жұмыстар аграрлық саланың тұрақтылығын сақтауға және су ресурстарын тиімді пайдалануға мүмкіндік беретіні атап өтілді.Сондай-ақ мәжілісте Мемлекет басшысының ауыл шаруашылығында су үнемдеу технологияларын кеңінен енгізу жөніндегі тапсырмалары да тілге тиек етілді. Осыған байланысты, тамшылатып және жаңбырлатып суару сынды заманауи әдістерді енгізу, су арналары мен қашыртқыларды тазалау, суды есепке алу жүйесін жетілдіру мәселелері күн тәртібінде тұр.Мәжілісте шаруашылық құрылымдары өкілдері ұсыныс-пікірлерін жеткізді.Аудан әкімі жиынды қорытындылай келе, алдағы вегетациялық кезеңге дайындықты бүгіннен бастап күшейтудің маңызын атап өтті. Көктемгі дала жұмыстарына қажетті тұқым, тыңайтқыш және ауыл шаруашылығы техникаларын толық әрі сапалы әзірлеу, су көздерін ұтымды пайдалану бағытында нақты жоспарлар әзірлеу қажет екенін жеткізді. Сонымен қатар, барлық жауапты сала басшылары мен шаруашылық жетекшілерін бірлесіп, үйлесімді жұмыс істеуге шақырып, аграрлық саланың тұрақты дамуын қамтамасыз ету ортақ міндет екенін атап өтті.Фото: Сырдария ауданы әкімінің баспасөз қызметі

Егін егу маусымына дайындық пен су тапшылығы мәселесі талқыланды

<a href="https://kyzylorda-news.kz/">Kyzylorda-news.kz</a> &nbsp;Қармақшы ауданының әкімі Жандос Еркінбектің төрағалығымен өткен кезекті мәжілісте 2025 жылғы егін жинау науқанының қорытындысы туралы, спорттық инфрақұрылымды дамыту және бұқаралық спортты қолдау туралы мәселелері қаралды.Жиынға аудан әкімінің орынбасарлары, бөлім, мекеме, кәсіпорын басшылары, кент және ауылдық округ әкімдері қатысты.Жиында күн тәртібіндегі бірінші мәселе бойынша аудандық ауылшаруашылық және жер қатынастары бөлімінің басшысы Әсет Омаров егін шаруашылығын дамыту мен суды үнемдеу технологияларын қолданысқа енгізу бағытында жоспарларын мәлімдеді. Осыған сәйкес аудан әкімі суды тиімді әрі уақтылы жеткізу – егін шаруашылығындағы ең басты міндеттердің бірі екенін атап өтті. Суды аз қажет ететін егіс көлемін ұлғайту және суды үнемдеу технологияларын қолданысқа енгізу бағытында нақты шараларды қабылдауды, алдағы егін егу маусымына дайындық жұмыстарын пысықтауды, ауыл, орман және балық шаруашылығындағы негізгі капиталға салынған инвестициялар бойынша нақты шараларды қабылдауды жүктеді.Сонымен қатар, күн тәртібіндегі екінші мәселе бойынша аудандық дене тәрбиесі, спорт және туризм бөлімінің басшысы Ғалым Ержанов ауданда спорттық инфрақұрылымды дамыту және бұқаралық спортты қолдау бағытында жоспарларын атап өтті. Бұл бағыттағы мәселе бойынша аудан әкімі аудандағы спорт саласын дамыту бағытында тиісті шараларды қабылдауды, жастар мен жасөспірімдердің бұқаралық спортпен шұғылдануын арттыру мақсатында нақты жұмыстар жасауды, аудан спортшыларын қолдау бағытында жұмыстарды жандандырып, жастардың облыстық, республикалық және әлемдік сайыстарға қатысу деңгейін көтеруді тапсырды.Жиын соңында аудан әкімі мәжілісте айтылған әрбір мәселе бойынша нақты тапсырмалар беріп, олардың орындалуын бақылауда ұстауды жауапты тұлғаларға жүктеді.

Егін жинау науқанының қорытындысы және спорттық инфрақұрылымды дамыту мәселелері талқыланды

<a href="https://kyzylorda-news.kz/">Kyzylorda-news.kz</a> Ағымдағы жылдың 18 қазан күні Қызылорда қаласында облыстық «Алтын Күз – 2025» мерекелік шарасы аясында Қармақшы ауданының ауыл шаруашылығы өнімдерінің жәрмеңкесі ұйымдастырылған болатын. Ауқымды шара аясында ауданнан жеткізілген күріш, бақша өнімдері, көкөніс, ет, балық, сүт өнімдері қала тұрғындарына қолжетімді бағада ұсынылды. Жәрмеңкеге келген тұрғындар өнімдердің сапасына оң бағасын беріп, ризашылықтарын білдірді.Осыған орай, Қармақшы ауданы әкімшілігінің мәжіліс залында аталған шараға белсенді атсалысқан азаматтарды марапаттау рәсімі өтті. Іс-шараны аудан әкімі Жандос Еркінбек ашып, жиналғандарды құттықтады.<blockquote>«Облыс орталығында өткен осындай ауқымды шараға белсене қатысып, аудан абыройын арттырған барлық азаматтарға шынайы алғысымды білдіремін. Бұл — бір ғана саланың емес, бүкіл ауданның ортақ жеңісі. Қармақшы қашан да еңбек пен бірліктің мекені екенін тағы бір мәрте дәлелдеді», – деді өз сөзінде.</blockquote>Шара барысында бірнеше сала қызметкерлері облыс әкімінің Алғыс хатымен марапатталды.Марапаттау рәсімінен кейін сөз алған аудандық мәслихат төрағасы Әділ Қошалақов аудан еңбеккерлеріне ризашылығын білдіріп, ауыл шаруашылығы саласының ел экономикасындағы маңызына тоқталды.Еске салсақ, Қармақшы ауданы былтыр егін шаруашылығынан «Үздік» деп танылса, биыл мал шаруашылығы саласы бойынша «Озат аудан» атанып отыр. Бұл жетістік — аудан басшылығы мен ауыл еңбеккерлерінің тынымсыз еңбегінің нәтижесі.<img src="https://knadmin.beoblood.kz/uploads/7_arma_shy_audany_auylsharuashyly_zh_rme_kesinde_zho_ary_ba_alandy_495d6d1046.jpg" alt="7Қармақшы ауданы ауылшаруашылық жәрмеңкесінде жоғары бағаланды.jpg">

Қармақшы ауданы ауылшаруашылық жәрмеңкесінде жоғары бағаланды

<a href="https://kyzylorda-news.kz/">Kyzylorda-news.kz</a>&nbsp; Облыс әкімі Нұрлыбек Нәлібаев егін жинау науқанының аяқталуына орай «Алтын күз-2025» мерекесі аясында облыс орталығында ұйымдастырылған ауыл шаруашылығы өнімдерінің жәрмеңкесін аралап шықты.Оған Парламент Сенаты мен Мәжілісінің депутаттары, мемлекет және қоғам қайраткерлері, Қазақстанның Еңбек Ерлері қатысты.Жәрмеңкеде барлық аудандар мен Қызылорда қаласының шаруалары өз өнімдерін өндіруші бағасымен ұсынды. Аудандардан 500-ге жуық жүк көлігімен 1000 тоннадан астам өнім жеткізілді.Сауда сөрелеріне 150 тоннадан астам күріш, 30 тонна ет және 35 тоннадай балық өнімдері, 300 тонна картоп, 300 тоннадан астам көкөніс пен жеміс-жидек, 250 тонна бақша, 10 тоннадай сүт, 10 тоннаға жуық бакалея және кондитер өнімдері, 100 бас тоқты және 30 тонна жем-шөп қойылды.<img src="https://knadmin.beoblood.kz/uploads/2_Altyn_k_z_zh_rme_kesi_tti_9b2e852af6.jpeg" alt="2 “Алтын күз” жәрмеңкесі өтті.jpeg">Арал ауданының жәрмеңкесі халыққа ерекше көңіл-күй сыйлады. Әсіресе, тұтынушылар Аралдың балығын алуға кезек тосты. Теңізді өлкенің шаруалары 60 тоннадай өнім әкелген.Атап айтқанда, 15 тонна балық өнімдері, 20 тонна қауын-қарбыз, 4 тонна ет өнімдері, 20 тонна қызанақ, 1 тоннадай сүт, 3 тонна ас тұзы бар.Сондай-ақ, 40 бас қой мен тоқты жеткізілген.Молшылық мерекесінің жәрмеңкесіне Қазалы ауданының шаруалары 10 тонна күріш, 12 тонна балық, 5 тонна ет, 20 тонна бақша өнімдерін, 7 тонна асқабақ, 15 тонна картоп, 10 тонна пияз, 3 тонна сүт өнімдері, 1 тонна Қазалы кәмпиттерін шығарды.Қармақшы ауданынан 40 көлікке тиелген 100 тонннаға жуық өнім келген. Сатылымда 20 тонна күріш, 1,5 тонна балық, 30 тонна көкөніс, 25 тоннадай бақша, 10 тонна қызанақ, 1 тонна ет және кондитер мен сүт өнімдері, мал азығы бар.Ал, Жалағаш ауданының шаруалары 200 тоннаға жуық өнімдерін қала тұрғындарына ұсынды. Атап айтқанда, 40 тонна күріш, 40 тонна картоп, 10 тонна сәбіз, 20 тонна пияз, 20 тонна асқабақ, 30 тонна қауын, қарбыз, 30 тонна көкөніс өнімдері, 3 тоннадан астам ет пен балық өнімдері, 1 тоннадай сүт өнімдері.<img src="https://knadmin.beoblood.kz/uploads/1_Altyn_k_z_zh_rme_kesi_tti_a767f8bb22.jpeg" alt="1 “Алтын күз” жәрмеңкесі өтті.jpeg">Сырдария ауданынан жеткен 50 көлік азық-түлік тауарларына толы. Мұнда тұрғындар қарбыз-қауын, жеміс-жидек, күріш, сүт өнімдері мен балық өнімдерінің саудасын қыздырды.Барлығы 170 тоннадан астам, оның ішінде 25 тонна күріш, 60 тонна картоп, сәбіз, пияз, 10 тонна асқабақ, 40 тонна бақша, 2 тонна ет, сүт өнімдері, 5 тонна көкөніс пен жемістер, 2 тоннадан астам бакалея өнімдері халық сұранысына ие болды. Сонымен қатар, 10 бас қой мен 10 бас тоқты және 30 тонна мал азығын да саудалаушылар көп болды.Тасбөгет кентінің орталық алаңында шиелілік шаруалар табиғи таза өнімдерін ұсынып, жәрмеңке көркін қыздырды. Мұнда саудаға 150 тоннадан астам өнім қойылған.Атап айтқанда, 20 тоннадан астам күріш, 30 тонна бақша өнімі, 50 тонна картоп, 12 тонна асқабақ, 40 тонна көкөніс, 4 тонна ет, сүт өнімдері, 1 тонна бакалея өнімдері сатылды.<img src="https://knadmin.beoblood.kz/uploads/3_Altyn_k_z_zh_rme_kesi_tti_adb20ce992.jpeg" alt="3 “Алтын күз” жәрмеңкесі өтті.jpeg">Астана даңғылының бойында орналасқан Жаңақорған ауданының 50 көлігінде 10 тоннаға жуық күріш, 45 тонна картоп, 30 тонна бақша, 60 тоннадан астам көкөніс пен жемістерді саудаға шығарылды. Сондай-ақ, ет, балық, кондитер өнімдері де бар.Сол жағалауға жайғасқан Қызылорда қаласының шаруалары 12 тонна күріш, 8 тонна картоп, 12 тонна ет пен балық өнімдерін, 16 тонна қауын мен қарбыз, 6 тонна асқабақ, 15 тонна көкөніс пен жеміс өнімдерін, 2 тонна кондитер өнімдерін, мал азығын да ұсынды.Биыл Сыр диқандары күзгі жиын-терімге уақытылы кірісіп, толағай табысқа қол жеткізді. 470 мың тоннаға жуық күріш жиналып, оның әр гектарынан 58,1 центнерден өнім алынды.Дәнді және майлы дақылдар, картоп, көкөніс, бақша өнімдерінен де мол өнім жиналды.Фото: Қызылорда облысы әкімінің баспасөз қызметі

Қазақстан және Қызылорда облысының жаңалықтары: Ауыл шаруашылығы