<a href="https://kyzylorda-news.kz/">Kyzylorda-news.kz.</a>&nbsp;Кореядағы Кванджу қалалық округінің білім басқармасынан Достық үйіне делегация келді. Оларды Кванджу қалалық білім басқармасының басшысы Джон Сон Су бастап келді. Делегация құрамында 50-ден астам тарих пәні бойынша олимпиадалар мен түрлі байқаулардың жеңімпаз оқушылары бар. Меймандарды Қызылорда облыстық қоғамдық даму басқармасының «Қоғамдық келісім» КММ директоры Бақытжан Камалов пен өңірлік корей этномәдени бірлестігінің жетекшісі Денис Пак қарсы алды.Кездесуде «Қоғамдық келісім» КММ директоры Бақытжан Камалов Қызылорда мен Корея арасындағы үлкен дәрежедегі достықты, жан-жақты байланысты сөз етті.<blockquote>«Қасиетті Сыр өңірі өз отанынан алшақ өмір сүріп жатқан корей халқына алтын бесік бола білді. Корейлер қай кезеңде болмасын аймақтың барлық саласында өзіндік қолтаңбаларын қалдырып келеді. Қазіргі таңда өңірде 7 мыңнан астам корей ұлтының өкілдері бар. 1937 жылы Қиыр Шығыстан жер аударылған корей халқымен бірге келген корей педагогикалық институтының негізінде Сыр өңірінде алғаш Жоғарғы оқу орны ашылды. Содан бері білім, ғылым саласы бойынша екі ел арасы үзілген емес. Қазіргі уақытта Қорқыт ата атындағы Қызылорда университеті Оңтүстік Кореяның бірнеше жоғары оқу орындарымен тығыз әріптестік байланыстар орнатқан. Жыл сайын университетте корей күндері өткізіліп тұрады. Оқу орнында ағылшын және корей тілі мамандығы бойынша бірнеше студенттер білім алып жүр», - деді Бақытжан Камалов.</blockquote>Ал «Қазақстан корейлер қауымдастығы» Қызылорда облыстық қоғамдық бірлестігінің жетекшісі Денис Пак бірлестіктің ынтымақ пен достықтың нәтижесінде 34 жылда жеткен жетістіктері мен игілікке толы ізгі жұмыстарына тоқталды.Мұнан соң Кванджу қалалық білім басқармасының басшысы Джон Сон Су Қызылордаға келудегі мақсатын айтып өтті.<blockquote>«Біздің сапарымыз 6 күнге есептелген. Басты мақсатымыз Корей халқының батырлары мекен еткен жерлерді зерттеу. Бүгін Қызылордаға келіп Корей халқы батырларының 5-ші ұрпағымен жүздесіп, пікірлескенімізге қатты қуанып отырмыз. Білім мен мәдениет бағытында өзара ынтымақтастық орнатсақ деген ұсынысым бар», - дей келе батыр ұрпақтарына сый-сияпат көрсетті.&nbsp;</blockquote><img src="https://knadmin.beoblood.kz/uploads/assambl_91a9e5d60e.jpg" alt="ассамбл..jpg"><img src="https://knadmin.beoblood.kz/uploads/assambl_3_7d6492fe6a.jpg" alt="ассамбл.3.jpg">

Қызылорда облысына Кванджу қаласынан делегация келді

<a href="https://kyzylorda-news.kz/">Kyzylorda-news.kz.</a> Баспаналы болуды армандап жүрген сырбойылық жастар үшін қуанышты жаңалық. Бүгіннен бастап алғаш рет «Сыр жастары» жастарға арналған жеңілдетілген ипотекалық несие беру бағдарламасына құжат қабылдау басталды.&nbsp;Бұл бағдарламаға 35 жасқа дейінгі азаматтар қатыса алады. Несиелеу мерзімі – 19 жылды құраса, пайыздық мөлшерлемесі 5 пайыз. Бағдарламаның бастапқы жарнасы – 10 пайызды құрайды. Бағдарламаға өтініш беру 15 күнтізбелік күн ішінде жүзеге асырылады. Бүгін басталған науқан 26 қазан күні аяқталады. Бұл жөнінде Қызылорда облысының Өңірлік коммуникациялар қызметінде өткен брифингте облыстық қоғамдық даму басқармасы басшысының орынбасары Артур Қамбаров хабарлады.<blockquote>«Қызылорда облысының 85 жылдық мерейтойы аясында аймақ басшысының тікелей қолдауымен көптен бері баспаналы болуды мақсат етіп жүрген және баспана кезегіне тұра алмаған жастар үшін «Сыр жастары» жеңілдетілген ипотекалық бағдарламасы басталды. «Сыр жастары» бағдарламасының басты талаптары: ҚР азаматтығының болуы, қатысушының жасы 35 жастан аспауы, соңғы 2 жылда Қызылорда облысында тұрақты тіркеуде болуы және кемінде бір жыл жұмыспен қамтылған болуы шарт. Бағдарлама аясында табысталатын үйлер қаламыздың сол жағалауында орналасқан, жалпы көлемі 66 шаршы метрден кем емес 3 бөлмелі пәтерлер болады деп күтілуде. Бұл бағдарлама Сыр жастарының үйлі болуы үшін үлкен мүмкіндік, - деді басқарма басшысының орынбасары Артур Раушанбекұлы.</blockquote>Аталмыш бағдарламаға денсаулық сақтау, білім беру, бюджеттік сала, мәдениет, спорт, ЖОО және ҒЗИ, журналистер, әлеуметтік сала, Ұлттық холдингтер мен компаниялардың жергілікті филиалдары, екінші деңгейлі банктер, құрылыс, қоғамдық тамақтану және қызмет көрсету саласының қызметкерлері құжат тапсыра алады. Дегенмен, осы санаттағы қатысушалардың ресми жұмыс өтілі кемінде 6 айды құрауы тиіс.<blockquote>«Сыр жастары» бағдарламасына қатысу үшін бірнеше құжаттардың тізімі бекітілді. Атап айтқанда, белгіленген нысан бойынша жастарға жеңілдікпен несие беруге арналған электронды өтініш, білімі туралы құжаттың сканерленген түрі, жұмыс өтілі көрсетілген анықтаманың сканерленген түрі, ҚР Еңбек кодексінің 35-бабына сәйкес еңбек өтілін растайтын сканерленген құжаттар, Қызылорда облысының мәдениет және спорт басқармасынан сканерленген растайтын анықтамалар, «Сыр жастары» бағдарламасына қатысу үшін үміткерлерді іріктеу кезектілікке сәйкес санаттар бойынша тізімге енгізу жинаған балл санымен айқындалады. Санат бойынша ең көп балл жинаған қатысушыға уәкілетті органмен электронды түрде жолдама жіберіледі. Жолдаманы алған жастар әрі қарай «Отбасы банкінде» төлем қабілетіллігін растайды, содан кейін келісім шарт рәсімделіп, үй табысталатын болады, - деді «Отбасы банкі» АҚ Қызылорда облысы бойынша филиалының директоры Әділжан Сәулебаев.</blockquote>Айта кетейік, «Сыр жастары» бағдарламасына өтініш пен құжаттарды тапсыру электронды түрде «Азаматтарға арналған Үкімет» Мемлекеттік корпорациясы» КЕ АҚ арқылы kezekte.kz сайтында тіркелуі керек. Одан кейін «Жұмыс істейтін жастарға арналған «SyrJastary» жеңілдетілген ипотекалық несие беру» сервисінде жүзеге асыра алады.<img src="https://knadmin.beoblood.kz/uploads/Whats_App_Image_2023_10_13_at_09_28_56_3ebad036e9.jpeg" alt="WhatsApp Image 2023-10-13 at 09.28.56.jpeg"><img src="https://knadmin.beoblood.kz/uploads/Whats_App_Image_2023_10_13_at_09_28_56_1_cccc2a2893.jpeg" alt="WhatsApp Image 2023-10-13 at 09.28.56 (1).jpeg"><img src="https://knadmin.beoblood.kz/uploads/Whats_App_Image_2023_10_13_at_09_28_56_2_842dabd35c.jpeg" alt="WhatsApp Image 2023-10-13 at 09.28.56 (2).jpeg">

«Сыр жастары» ипотекалық несие беру бағдарламасына құжат қабылдау басталды

<a href="https://kyzylorda-news.kz/">Kyzylorda-news.kz.</a> 31 тамыз - 4 қыркүйек аралығында Румыния мемлекетінің Констанца қаласында ересектер арасында тоғызқұмалақтан әлем кубогі өтті.Жарысқа қатысушы Қазақстан құрамасының ойыншысы, жалағаштық Кенжебекова Ақерке Батырбекқызы тоғызқұмалақ спортының рапид түрінен жүлделі ІІ орынды иеленді.Ақерке Батырбекқызы бұған дейін 2016 жылы Ресей Федерациясының Алтай Республикасында тоғызқұмалақтан өткен жастар арасындағы Азия чемпионатының ІІ орын иегері. 2017 жылы Астана қаласында өткен ересектер арасында IV әлем чемпионатының қола жүлдегері. 2018 жылы Моңғолия Республикасында өткен ересектер арасында IV Азия чемпионатының алтын жүлде иегері атанған. Сондай-ақ, ол 4-12 тамыз аралығында Моңғолия Республикасы, Баян-Өлгей қаласында 9 елден 200-ден астам спортшы қатысқан тоғызқұмалақтан өткен VI Азия чемпионатының алтын жүлде иегері атанып, еліміздің мерейін асқақтатқан болатын.Талай байрақты бәсекеде бой көрсетіп, жеңіс тұғырынан көрініп жүрген Ақерке Кенжебекова «Наркескен» спорт клубының «Тоғызқұмалақ» үйірмесінің жаттықтырушысы.<blockquote>«Үлкен додаларға қатысып жетістікке жетуіме жағдай жасап отырған «Наркескен» спорт клубының директоры Ғалымжан Ержанов пен осы спортта мені машықтандырған Асхат Маратұлына үлкен алғысымды білдіремін», - деді Ақерке Кенжебекова.</blockquote>

Әлем кубогі: Қызылордалық тоғызқұмалақтан жүлделі орын иеленді

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың 2021 жылғы 16-17 тамыздағы Корея Республикасына жасаған мемлекеттік сапары екі ел арасындағы достық қарым-қатынастарды нығайта түсті. Оның ішінде генерал Хон Бом До сүйегін тарихи отанына қайтару рәсімі Қызылорда облысы мен Корея Республикасының өңірлері арасында екіжақты байланыстардың орнауына және дамуына зор серпін берді.ҚР Сыртқы істер министрлігі мен ҚР Корея Республикасындағы Елшілігінен облыс делегациясының Кореяға сапарын қолдайтыны туралы хаттар, биыл Корея Республикасы Тэчжон қаласы мэрінің және Чоллабук-до провинциясы губернаторының шақыру хаттары келіп түскен еді.Осыған орай, ел Президентінің шетелден инвестиция тарту жөніндегі тапсырмасына сәйкес облыс әкімі Нұрлыбек Нәлібаев бастаған облыс делегациясы 22-24 мамыр аралығында Корея Республикасының Сеул қаласына іссапармен барды. Іссапар барысында аймақ басшысы бірқатар іскерлік кездесулерге қатысып, өңірдің инвестициялық жобаларын таныстырды. Кореяның озық өндірістік технологияларын Сыр елінде енгізудің артықшылықтарына баса назар аударып, ынтымақтастық туралы меморандумдарға қол қойды.Делегация құрамында Қазақстан Республикасының Кореядағы Төтенше және Өкілетті Елшісі Б. Дүйсенбаев, облыстық мәслихат төрағасы Н.Байқадамов, Қорқыт ата атындағы Қызылорда университетінің ректоры Б.Кәрімова бар.Іссапардың басты мақсаты – өңірге, өндіріс саласына шетелдік инвестиция тарту, жаңа өндіріс орындарын ашу. Аймаққа озық технологиялар әкелу және тәжірибе алмасу бағыттарында өзара ынтымақтастық орнату.Іссапардың алғашқы күні делегация мүшелері білім және ғылым салаларында ынтымақтастық орнату үшін Шинхан университетінің президенті Канг Сонг Чонг мырзамен кездесті. Әлеуметтік ғылымдар бағыты бойынша Кореяның маңдайалды ЖОО-лардың бірі – Шинхан университеті 1960 жылы құрылған.Кездесуде Канг Сонг Чонг мырза Қызылордада университет филиалын ашуға ынталы екенін білдірді. Осы ретте алдағы 20-30 жылдықта өңірдің еңбек нарығында қандай мамандықтардың сұранысқа ие болатынын екіжақты зерттей келіп, жоғары оқу орнын ашу жоспарлануда. Бұл мәселелерді әрі қарай пысықтау үшін алдағы шілде айында Шинхан университеті президентінің Қызылордаға іссапарын ұйымдастыру көзделген. Еңбек нарығының болашақтағы бағыты зерттелгеннен кейін Шинхан университетінің филиалы қандай мамандықтар бойынша ашылатыны нақтыланады.Аймақ басшысы білім беруге, ғылымды өркендетуге салынған инвестицияның қайтарымы келешекте айқын көрінетінін айтып, осы саладағы жобаларды қолдап келеді.Делегацияның Корея Республикасындағы іссапары Сеул Ұлттық ғылыми-техникалық университетінің Президенті Ли Донг Хун мырзамен кездесумен жалғасты. Басқосуға ҚР Ғылым және жоғары білім министрі Саясат Нұрбек вице-министрлермен бірге онлайн қосылып, бастамаларға қолдау көрсетілетінін айтты.&nbsp;Президент Қасым-Жомарт Кемелұлы Тоқаевтың білім сапасын арттыру үшін әлемдегі озық жоғары оқу орындарының филиалдарын елімізде ашуды тапсырғаны белгілі. Бұл ең алдымен білікті мамандарды оқытып шығаруға, жоғары технологияларды игеруге жол ашады.Корея – білім және ғылым, биотехнология, медицина, жасанды интеллект салаларында алдыңғы қатардағы мемлекеттердің бірі. Делегация мүшелері білім және ғылым салаларында бірлескен жобаларды жүзеге асыруға баса мән берді. &nbsp;Корея мен Қазақстан арасында жоғары білім саласындағы екіжақты ынтымақтастықты дамыту үшін биыл Халықаралық ынтымақтастық жөніндегі жетекші университеттік жоба әзірленді. Жоба Корея Республикасының Үкіметінде мақұлданып, Білім министрлігінен гранттық жоба ретінде 1 млрд теңгедей қаржы бөлінеді.&nbsp;Жоба аясында Қорқыт Ата университетінде жасанды интеллект мектебінің құрылуы – тек Қызылорда облысының ғана емес, жалпы еліміздің білім саласындағы үлкен жетістік.Нәтижесінде өңірімізде IT технологиялар, киберқауіпсіздік және компьютерлік ғылымдар бойынша білім беріледі. Облыс әкімдігі өз кезегінде бұл жобаның өңірімізде сәтті іске асырылуына жан-жақты қолдау көрсетеді.&nbsp;Аймақ басшысы екі білім ордасы арасындағы ынтымақтастық білім және ғылым саласындағы жаңа ғылыми жетістіктерге жол ашатынын атап өтті.23 мамыр күні Сыр өңірінің делегациясы Корея Республикасы Тэджон қаласының мэрі Ли Чан Ву мырзамен кездесті. Қызылорда облысы мен Тэджон қаласын ерекше тарихи байланыстар біріктіреді. 2021 жылдың тамыз айында Кореяның ұлттық батыры Хон Бом Доның сүйегі Қызылордадан осы Тэджон қаласының Ұлттық зиратына әкелініп жерленген болатын.Кореяның ең ірі қалаларының бірі және ғылыми-технологиялық астанасы – Тэджон қаласымен тиімді ынтымақтастық орнатудың жөні бөлек.&nbsp;Өзара байланыстарды одан әрі дамыту мақсатында тараптар келіссөз жүргізіп, екіжақты ынтымақтастықтың бағыттарын айқындады. Кездесу нәтижесінде Тэджон қаласының мэрі Ли Чан Ву мырза мен Қызылорда облысы әкімі Н.Нәлібаев өңірлер арасындағы байланысты өркендету үшін бауырластық қатынастар орнату туралы Меморандумға қол қойды. Меморандум аясында сауда-экономикалық, инвестициялық, мәдени-гуманитарлық, туризм, білім және ғылым салаларында өзара ынтымақтастықты дамыту көзделген.Айта кету керек, Корея университеттерінің басты артықшылығы – мұндағы оқу орындарының жанында ғылыми-тәжірибелік зертханалар, өндірістік базалар бар. Зерттеу жұмыстарының іс жүзінде, яғни теорияның практикада қолданылуына ерекше мән беріледі. Студенттер білім алумен қатар, оқу орны жанындағы зертханаларда, өндірістік базаларда тәжірибе жинақтап, диплом алған кезде мамандығының қыр-сырын жан-жақты меңгеріп шығады. Практикада шыңдалған мамандарға жұмыс табу қиынға соқпайды. Сол себепті, Қызылорда облысы Корея Республикасының ғалымдарымен әріптестік орнатып, озық тәжірибелерін Сыр өңірінің білім ордаларында енгізуге мүдделі. Сеул Ұлттық ғылыми-техникалық университеті Нью-Йорк университетімен тығыз қарым-қатынас орнатқан. Осындай озық оқу орындары таратқан ілім-білімді біздің түлектеріміз де игерсе деген жоспар бар. Жас ұрпақтың таным көкжиегі кеңейсе, жаңа белестерге шығатынымыз анық.Тэджон қаласы жетекші білім және ғылым орталығы екендігін ескеріп, Қызылорда облысының үздік мектеп түлектері үшін арнайы гранттар бөлу мәселесі қарастырылады. Бұл екіжақты байланыстарды жаңа деңгейге көтереді. Өз кезегінде, облыс әкімдігі Меморандумда көзделген бағыттар бойынша белсенді жұмыс жүргізуге және жан-жақты қолдау көрсетуге дайын. Облыс әкімі Нұрлыбек Нәлібаев Корея Республикасы Тэджон қаласының мэрі Ли Чан Ву мырзамен кездесуден кейін Тэджон ұлттық зиратына қайта жерленген генерал Хон Бом До мемориалына барып, тағзым етті.Еске салсақ, өткен жылы Корея Республикасының делегациясы Сыр өңіріне арнайы келіп, генерал Хон Бом Доның сүйегін туған жерінде қайта жерлеу үшін алып кетті. Екіжақты кездесулер аясында Корея елімен бірқатар бірлескен жобаны іске асыру туралы келісім жасалды.Хон Бом До – Кореяның азаттығы үшін күрескен бірегей тұлға. Генерал өмірінің соңғы жылдарын Қызылорда қаласында өткізгені белгілі. Туған жерінде батырдың ерлік даңқы ұмытылмаған. Ал Қызылорда қаласында Хон Бом Доның құрметіне мемориал тұрғызылған және қала көшелерінің бірі оның есімімен аталады.Облыс әкімі Н.Нәлібаев және делегация мүшелері Тэджон қаласында орналасқан ұлттық зиратқа барып, «Отан үшін құрбан болған боздақтарға арналған мемориал» кешенінде болды. Генерал Хон Бом До зиратына Қызылорда халқының ыстық ықыласын білдіретін гүл шоқтарын қойды.24 мамыр күні облыс әкімі Нұрлыбек Машбекұлы Чоллабук-до провинциясының губернаторы Ким Гван Ён мырзамен кездесті. Аймақ басшысының өңірдің инвестициялық мүмкіндіктері туралы ақпараттарына кореялықтар қызығушылық танытып, жобаларды қолдау ниетін білдірді.&nbsp;Чоллабук-до — күріш өсіру және азық-түлік өндіруден Оңтүстік Кореяның басты ауыл шаруашылығы аймағы. Облыс басшысы осы саладағы озық инновациялық технологияларды зерттеуге, «Ақылды фермалар» құруға, ауыл шаруашылығы өнімдерін терең өңдеу бағытындағы бірлескен жобаларды жүзеге асыруға қатысты нақты ұсыныстар айтты. Сондай-ақ Қызылорда қаласында Корей күріш егу технологиялары мен әдістері зерттелетін демонстрациялық алаң құрудың артықшылықтарын түсіндіріп берді.Жоба аясында арнайы егістік жер бөлініп, кореялық күріш егу әдістері, су үнемдеу технологиялары мен суды мониторингілеу бойынша тәжірибе алмасу көзделуде. Бастамалардың барлығын жүйелі іске асыру үшін Қызылорда облысының ауыл шаруашылығы және жер қатынастары басқармасы мен Чоллабук-до провинциясының Халықаралық ынтымақтастық орталығы арасында Меморандумға қол қойылды. Бұл іс-шаралар өзара қарым-қатынастарды дамытуға негіз болады.Чоллабук-до провинциясы мэрімен кездесуден кейін аймақ басшысы бастаған делегация Кореяның Ауылдық аймақтарды дамыту агенттігіне барды.Осы провинцияда орналасқан агенттік – ауыл шаруашылығы саласына озық технологияларды енгізу, кәсіпорындарды ғылыми-инновациялық сүйемелдеу, «Ақылды фермалар» құру және жаңа ауыл шаруашылығы техникаларын жасау бағытында практикалық зерттеулер жүргізетін Кореяның бірегей орталығы.&nbsp;Агенттікте егіншілік саласына жаңа әдістер мен сорттар қосу мақсатында Кореяның егін және күріш шаруашылығы ұлттық институты жұмыс жасауда.Кездесуде тараптар күріш өсірудегі кореялық инновациялық әдістер мен технологияларды қолдану, суды үнемдеу мен мониторингілеудің озық тәжірибелерін енгізу бойынша бірлесіп жұмыс жасау туралы келесімге келді.Сондай-ақ әкімдік кореялық әлеуетті компанияларымен бірлесіп, облыс аумағында жемістер, көкөністер және бақша өнімдерін терең өңдеуге бағытталған кәсіпорындар құруға қолдау көрсетеді.&nbsp;Алдағы уақытта Агенттік пен облыстық ауыл шаруашылығы және жер қатынастары басқармасы арасында тиісті жұмыстар жалғастырылмақ.<img src="https://knadmin.beoblood.kz/uploads/349316683_617750153639712_1538492275458567624_n_db1e276b54.jpg" alt="349316683_617750153639712_1538492275458567624_n.jpg">

Қызылорда облысы әкімінің Корея еліне сапары: Екіжақты байланыстың орнауына және дамуына зор серпін берді

<a href="https://kyzylorda-news.kz/">Kyzylorda-news.kz.</a> Америкалық Work and Travel студенттерге арналған танымал бағдарламасы арқылы жұмыс істеп, тәжірибе жинап жүрген жерлесіміз, жас ізденуші Ұлыстан Қарасаев. Осы тұста АҚШ-қа арман қуып жеткен Ұлыстанмен сұхбаттасудың сәті түскен еді.– Ең алдымен өзіңіз жайлы айтып өтсеңіз…Мен Ұлыстан Жомартұлы, 2002 жылы қасиетті Қызылжар топырағында дүниеге келгенмін. Ыбырай Алтынсарин атындағы №204 мектептің 2020 жылғы түлегімін. Қазір Алматы қаласындағы, Қазақстан-Британ техникалық университетінің 2-ші курс студентімін. Қарапайым қоғамда тума-туыс, таныс көп шоғырланан жерге барып үйренгенбіз. Алайда бұл жолы тәуекелге бел байлап, бағымды сынап көрдім. Осылайша таптаурындарды бұзып, 2022 жылдың жазында «WORK AND TRAVEL» бағдарламасымен Америкаға баруды ұйғардым.– Бағдарлама жайына толығырақ тоқтала кетсеңіз…– «WORK AND TRAVEL» бұл – америкалықтардың тұрмыс-тіршілігі, мәдениетімен танысып, шетелден тәжірибе жинақтауға арналған бағдарлама. Ол көріп, ағылшын тілін жетілдіргісі келетін студенттерге арналып құрылған теңдесіз халықаралық байланыс бағдарламасы. Екі бөлімнен тұрады. Біріншісі – сонда жұмыс жасау. 15 мамырдан 15 қыркүйек аралығында дейін әрбір студент өзіне ыңғайлы күнтізбесін жасайды. Дегенмен студенттер тек ойын-сауық саябақтары, мейрамханалар, дүкендер, Ұлттық саябақтар, қонақ үйлер секілді қызмет көрсету саласында ғана жұмыс істей алады. Жұмысты көбіне АҚШ-тың шығысында орналасқан Нью-Йорк, Нью-Джерси, Масачусетс сынды штаттарында жасайды.Екінші – саяхаттау. Жұмыс мерзімі аяқталғаннан соң студенттер 30 күнге дейін саяхаттауға құқылы. Яғни, студент жаз бойы жинаған ақшасын, басқа қалаларға саяхаттауға жаратса болады. Бұл саяхат көбінесе Американың батыс қалаларына жасалады. Студенттерге Лос-Анджелес, Лас-Вегас, Сан-Франциско секілді қалаларға саяхаттау мүмкіндігі туады. Міне, бағдарламаның бар баяны осы.– АҚШ-тың қай қаласындасыз? Қашан бардыңыз және қандай мамандықта оқып жүрсіз?– Мен АҚШ-тың Нью-Джерси штатындағы, Оушен сити қаласында бірінші маусымнан бастап жұмыс жасап жатырмын. Бұл қалада фаст-фудта кассашы қызметін атқарып жүрмін. Жоғарыда айтып кеткендей, бірінші бөлімімен келдім. Алдымен мұнда осындай қарапайым жұмыс жасауға мүмкіндік береді.– Құпия болмаса мұндағы айлық-табысыңыз қанша?– АҚШ-та ақшаны сағатына төлейді. Мен Оушен сити қаласында екі жерде жұмыс жасаймын. Бірінші негізгі жұмысымда 7-8 сағат көлемінде жұмыс жасап, сағатына 13 АҚШ долларын аламын. Ал екінші жұмыста сағатына 17 доллар. Бір күнгі жұмысқа 5-6 сағат беріледі. Сөйтіп, аптасына бір күнімді демалысқа арнаймын. Орташа есеппен алғанда бір айда 3500-4000 доллар көлемінде ақша табамын.– Бұл қала несімен таңғалдырды?– Бұл қаланың бір ерекшелігі мұнда ешқандай ішімдік, темекі секілді зиянды заттар сатылмайды. Қала көшелері соның арқасында таза және тұрғандары да керемет.Тағы бір таңғалдырар тұсы ол – Атлант мұхитынан ескен салқын жел. Оушен сити қаласында жаздық орташа температура 26-30 градус аралығында болады. Мұхит лебі ескенде өзіңді жеңіл сезінесің. Бұл да қаланың ерекше тұстарының бірі. Алайда, мұның барлығы туған жер топырағына жетпейді.– Жалпы сіздің мұхит асып, арман қууыңызға не түрткі болды?– Америка құрама штаттарын көру бала күнгі армандарымның бірі еді. 11 сынып тәмамдаған шақта АҚШ-қа жоғары оқуға түсемін деген жоспарым болған. Бірақ ағылшын тілін жеткілікті білмегендіктен бұл жай арман болып қалды. Кейін Алматы қаласына жоғарғы оқу орнына түскеннен кейін, студенттерге арналған «WORK AND TRAVEL» бағдарламасы туралы естідім. Бұның өмірімдегі ең үлкен мүмкіндіктердің бірі екенін түсініп, осы бағдарлама арқылы шетелге баруға бекінді. Қуанышыма орай ең үлкен армандарымның бірі 19 жасымда орындалды.– Онда тәжірибе алмасу, яғни жұмыс жасау барысында қандай қиыншылықтармен кезіктіңіз?– Ондағы қиыншылықтың бірі ағылшындардың айтуынша, «Jet Lag» болатын. Яғни, мұндағы уақыт белдеуінің басқаша болуы. Нью-Йорктың Алматы уақытынан 10 сағат айырмашылығы бар. Бірақ 3-4 күннен кейін бәрі өз орнына келді.Ал келесі, үлкен қиыншылықтардың бірі жергілікті тұрғандарды түсініп, олармен сөйлесу болды. Себебі Америка тұрғындарының ағылшын тілінде сөйлеу акценттері, мен ойлағаннан да қиын болып шықты. Сонымен қатар бірге жұмыс жасайтын Коста-Рика, Колумбия және Тайланд секілді елдердің студенттерінің ағылшын акцентіне үйреніп кету оңай болмады.– «WORK AND TRAVEL» бағдарламасы бойынша АҚШ-қа барғысы келетін жасқа қандай ақыл-кеңес берер едіңіз?– Бұл бағдарламаға қызығушылығы артып, бағын сынағысы келген немесе жоспарлап жүрген студенттерге айтарым көп. Бұл – өмірлеріңде берілетін ең керемет мүмкіндік. Және мұндай мүмкіндікті қорыққаннан немесе тіл білмегендіктен жіберіп алу үлкен қателік болады. Сол себепті ойыңыздан барлық күмәніңізді артқа тастап, өзіңізге деген үлкен сеніммен арманыңызға қол жеткізіңіз. Бұл ересек өмірге жасалатын үлкен қадам. Себебі АҚШ-та жүргенде жауапкершіліктің көп бөлігі өзіңізге түседі. Бұл тек өзіңізге тәуелді болуға көмектеседі дегім келеді.Сонымен қатар ағылшын тілін барынша жақсы меңгеріңіз, неғұрлым жақсы білсеңіз, соғұрлым Америкаға саяхатыңыз оңай болады. Бұл бағдарламаға қомақты ақша кетуі мүмкін, бірақ оны сіз еселеп, қайтарып алып келе аласыз. Егер мүмкіндік болса, міндетті түрде қалыс қалмаңыз.– Әңгімеңізге рахмет!

Ұлыстан Қарасаев: Студент жастарға мүмкіндік берген бағдарлама 

Kyzylorda-news.kz. Бокстан Ташкентте өтіп жатқан әлем чемпионатында Санжар Тәшкенбай топ жарды. Отандасымыз финалда грузин боксшысы Сахил Алохвердовиді жеңді.48 килоға дейінгі салмақтағы жекпе-жекте Санжар айқын жеңіске жетті. Төрешілер бірауыздан қазақ боксшысын жеңімпаз деп таныды.&nbsp;&nbsp;

Қазақ боксшысы Санжар Тәшкенбай әлем чемпионы атанды

<a href="https://kyzylorda-news.kz/">Kyzylorda-news.kz.</a> Сыр өңіріне тағы бір сүйіншілейтіндей хабар жетті. Сәуір айының 17-23 күндері Италияда Милан дизайн апталығы өтіп, оған Сыр өңірінен София Темірболат өз туындыларын жолдаған еді. Көрмеде сырбойылық жас Софияның эко картиналары үздік шығып, финалист атанды.Айта кетелік, София қылқаламмен емес, азық-түліктен босаған қаптамалардың қиындыларынан картина жасау арқылы әлемді тәнті етті. Иә, кәдімгі қаптама. Тұз, макарон өнімдерінен босаған қаптаманы ойланбастан, тіпті сыртына соншалық назар аудармастан да қоқысқа лақтыратынымыз белгілі. Оны кәдеге жаратуға болады екен. Көрменің негізгі мақсаты да осы, қоршаған ортаны қорғауға үндеу. Көрме талабы бойынша қатысушылар өз еліндегі тұрмыстық қалдықтарды қайта өңдеу арқылы қоршаған ортаны қорғауға үлес қосу, назар аудару. Бұл орайда София «Аралтұз» өнімі, кәмпит, шәй, күріш, макарон өнімдерінің қаптамасын ұтымды пайдалана білді. Әсіресе тұздың көк түсті қаптамалары теңізді бейнелеуге үйлесе кетті.Милан дизайн апталығында Софияның туындыларын ұсынған санаты бойын-ша әлемдегі үздіктер, дизайнерлер, қоршаған ортаға көзқарасы ерек 73 мемлекеттен 600-дай талантты жандар қатысқан екен.Италиядағы көрме әйгілі «Palazzo Bandello» заманауи өнер галереясында өтті.<blockquote>«Бұл көрменің орны бөлек. Бұл сұлулықты, өнерді тамашалау ғана емес, қоршаған ортаны қорғауды мақсат еткен, табиғатты аялауға үндейтін мазмұнды шара. Көрме жетекшісі Россана Орланди – итальяндық дизайн саласының аңыз адамы, Николетта Орланди Бруньони ханым – көрме жетекшісі. Бұл көрме қоқысты қайта өңдеу мен қоршаған ортаны қорғауға көзқарасы ерекше, қор-шаған орта салдарын зерттеуге көптеген жылдар арнаған, қайта өңдеудің тұжырымдамасын жасап, ерекше қайталанбас, дизайнерлік талғамы жоғары, авторлық картиналар жасайтын шеберлерге өз туындыларын ұсынуға мүмкіндік жасады. Қателеспесем, Милан дизайн апталығы аясында өткізілген эко-көрмеге Қазақ елінен алғаш қатысқан мен ғана. Осы тақырып аясында Россана Орланди ханымның жеке галереясы бар. Оны арнайы барып көрсем деген арманым бар. Көрмені ұйымдастырушыларға алғысым шексіз», – дейді София Темірболат.</blockquote>София бұл жобамен 8 жылдан бері айналысып келеді. Бұл туындының басты мақсаты – экологиялық мәселелерге баршаның назарын аудару.<blockquote>«Бұл арт-жоба қоршаған ортаның жай-күйі туралы көптеген флешмобтардан гөрі қоғам назарын аударта алады. Мен өз картиналарымда көбіне еліміздің экологиялық мәселесіне айналған Арал теңізінің табиғатын бейнелеймін. Мен апатты салдарға тоқталмай, картиналардың эстетикалық және терең мағынасы арқылы адамдарды табиғатқа жақындатуға тырыстым. Өнер мен экология ұштасқан жобаны жасауға түрткі болған Арал проблемасы болды. Мен өз қаламда табиғат пен адам арасындағы жақын қарым-қатынасты көрсету мақ-сатында көрме ұйымдастырып тұрамын, адам мен табиғат туралы 30-дан астам көлемді картиналар жасадым. Адамдарды қоршаған орта жайлы ақпаратпен қамтамасыз ете отырып, бір-бірімізге мәселенің ауқымын түсінуге, оны шешу жолдарын табуға және планетамызды сақтауға көмектесе аламыз. Бұл – эко-өмір салты туралы ақпарат беру жобасы. Жоба барысында қоқысты қалай сұрыптау керек, нені қайта өңдеуге болады, қайта өңдеуге болмайтын дүниелер нені көркем картиналар жасау процесінде қолданған дұрыс, неден бас тарту керек деген тренингтер бар. Бұл жоба экологиялық материалдарды пайдалануды талап етеді: азық-түлік қаптамасы бұл картиналар үшін жақсы материал болады. Мұндай жұмыстардың астарында табиғи ресурстарды сақтау тұжырымдамасы жатыр. Мен 15-тен астам көрме өткіздім. Картиналарды жасау процесін әлеуметтік желілерге жариялаймын. Әр адам қоршаған ортаны қорғау үшін таңдау жасай алады: полиэтилен пакеттерін сатып алмау, қайта пайдалануға болатын заттарды пайдалану, пластикті аз тұтыну. Себебі біздің планетамыздың эко ахуалы әрқайсымызға байланысты», – дейді өз туындысымен әлемнің назарын аударған жеңімпаз.</blockquote>София көрмеге Арал теңізінің тұз қаптама қиындысымен бейнелеген картиналар сериясын ұсыныпты. Туындыға қарасаң теңізі шалқыған, су бетінде аққу-қазы тербелген сұлулығына көз тоймас теңізді тамашалап, қуа-насыз. Арал теңізінің бейнесі дегенде суы тартылған, табаны кеберсіген, қайығы жағада қалған көріністі көз алдымызға елестеткен едік. Алайда Софияның да, бұл көрменің де мақсаты биік. Адамзат табиғатты аялай білсе, қоршаған ортаны қорғауға үлес қосса, экологиялық мәселелерді де жеңуге болады. Бір сөзбен айтқанда, бәрі де адамзаттың қолында. Шынашақтай София ізгілікке үндеп жүр.

Милан дизайн апталығы: Сырбойылық Софияның эко картинасы

<a href="https://kyzylorda-news.kz/">Kyzylorda-news.kz.</a> Әрбір адамның ойының түкпірінде «шетел көрсем, басқа өркениетпен таныссам» деген арман бой тасалап жатқаны анық. Бұл үшін беделді шенеунік немесе табысты кәсіпкер болу міндетті емес. Мәселен, аудандық «Қазалы» газетінде 7 жылдан бері күзетші болып жұмыс істеп жүрген Нұрбол Дауылбай былтырдан бері әлем елдерін аралауды, сол арқылы ой «шекарасын» бұзуға шындап кіріскен. Бақыт құсын қолына қондырып, той шығындарынан құтылғаннан кейін Қазалы қаласының тұрғыны қасиетті Меккеде кіші қажылығын өтеп, Дубай, Түркия мемлекеттерін көзбен көріп қайтты. Жақында осы қызықты тақырып төңірегінде жерлесімізбен әңгіме өрбітуді құп көрдік.– Нұрбол, шетел аралау ойыңызға қайдан келді, не түрткі болды?– Бала кезден теледидардан басқа мемлекеттердің дамыған мегаполистері мен тұмса табиғатын көп көретінбіз. Теледидарда саяхат жайында арнайы бағдарлама да болды. Содан мектеп бітіріп, оң-солымызды танығаннан кейін оқу, одан кейін күйбең тірлікке сүңгіп кеттік. Алайда, бала кездегі көкжәшіктен көрген дүниені шынайы тамашалау туралы арман алдамады. Бұған келіншегім де түрткі болды. Отау құрып, тойды аман-есен атқарғаннан кейін бірнеше жыл уақытымыз несиемізді жабуға кетті. Ағайынды шақырып, қуанышпен бөліскеніме өкінбеймін, әрине, десе де, сол шығынға тағы бірнеше елге табан тіреп қайтуға болар еді.Жарым – Мөлдір екеуміз интернеттен саяхатшы блогерлердің өміріне қарап қызығып, армандап отырамыз. Құр арман бізді шетел асырмайтынын білдік. Сөйтіп, қалтаға шақ туристік компаниялардың қызметтері туралы іздендік. Әсіресе, карантиннің кезінде ұтымды турлардың жарнамасы қаптап кетті ғой. Соның бірін тәуекел етіп, сатып алдық. Үш айдан кейін Меккеге барып, арманымыз орындалды. Аллаға алғысымызды жаудырып, дұға-тілегімізді айтып қайттық.– Жұрт саяхаттау арқылы өмірге деген көзқарасын өзгертіп жатады. Сіз қандай әсер алдыңыз?– Қазақстанның да табиғаты тамаша. Бірақ қаладағы цивилизация жағынан бізден бірнеше адым алда келе жатқан елдер көп. Сол артықшылықтың ортасына барып тұрып, бұрын көрмеген игілікті қолмен ұстап, көзбен көру адамға ерекше әсер береді. Жетілген, дамыған дүниені көрген жан сол төңіректе жоспар құра алады. Ал саяхат жасау – мақсатыңның мықтылығына тікелей байланысты. Әйтпесе, артық ақша тапсақ үйімізді жаңартып, көлік алуға жұмсап жіберетініміз жасырын емес. Тіпті, қарызға кіріп, бірнеше несие алып, төргі бөлмеге миллион теңге тұратын гарнитур, құны соған жуықтайтын диванға аянбайтын азаматтарымыз көп. Мұның дұрыс емес екеніне біздің көзіміз жетті. Әрине, әркімнің өз таңдауы, ұстанымы бар, оған қарсы келе алмаймыз.Әлгінде айттым, келешекте атқаратын және қолға алатын істі жүзеге асыру үшін алдағы күндерге мақсат қоюды саяхаттаған кезімде қалай жоспар жасауды үйрендім. Бір елге бару үшін жыл бойы дайындық жасау керек. Қаржы жинау, қажетті заттарды жоспарлау, ұшу-қону – бәрі назардан тыс қалмауы тиіс. Мақсатқа ұмтылуды дұрыс жоспарлау күнделікті осындағы өміріме, белгілі бір жетістікке жетуіме тікелей әсер етіп жүр десем арттық айтқандық емес. Әлі де өзге елдің өркениетінен аларым көп деп ойлаймын. Ол жайында амандық болса, алдағы уақытта тағы әңгімелесе берерміз.– Кіші қажылыққа баруға қанша қаражат жұмсадыңыз? Қомақты қаржыны қалай жинағаныңыз да көпшілікті қызықтыратыны анық.– Өзім бес уақыт намазда болғаннан кейін қасиетті мекенге баруды біраздан бері ойлап жүрген едім. Алланың қалауымен мұның да сәті түсті. Меккеге бару үшін турдың өзін 620 мың теңгеге сатып алдым. Бұдан бөлек жеке жол шығындары бар, ауылдағы ағайын-туысқа үлестіретін базарлығымыз бар, бас-аяғы миллион теңгеге жуық қаржы жұмсадым.Жұмыстан бос уақытта таксиге шығамын. Келіншегім екеуміз интернет арқылы кәсіп жасайтынымыз бар. Бұдан бөлек кезекті еңбек демалысынан түсетін қаржы бар, бәрінің басын біріктіріп 1 жылдан аса уақыт дайындалдым. Алла алдындағы үлкен сапар болғаннан кейін, тек материалдық тұрғыда емес, моральдық дайындығымды да пысықтауым керек болды. Барынша рухани тазаруға тырысып, қасиетті Меккеге бару туралы арманым орындалды.– Шетелге барғанда туған жерден қандай артықшылық байқадыңыз? Несімен есте қалды?– Әлгінде айтып өткенімдей замана игілігі көп көзге түседі. Мәселен, Дубайды алсақ, туризмді мықтап жолға қойған. Аспанмен таласқан ғимараттар, саяхатшының алаңсыз тынығуына, серуендеуіне лайықты жағдай жасалған. Мұнда жыл 12 ай жаз болып тұратынын ескерсек, қай мезгілде де шетелден келуші адам қарасы азаймайды. Жүздеген жыл бұрын сахара құмның ортасында күнін күріп отырған елдің әп сәтте бағын жаққан құдайдың шеберлігіне таңғаласың. Күндердің бір күнінде біздің де мемлекетіміз бен халқымыз табан астында жатқан қара алтынның қызығын көрсе, қиындықсыз өмір сүрсе, деген ойға шомып кеткенімді де жасырмаймын.Жалпы, сырт елде жүргенде көшеде көрген әрбір дүниені еріксіз өз еліңдікімен салыстырасың. Мысалы, жұрт тамсана айтатын сафариді Қазақстанда да жасап қоюға болады емес пе?! Құмды жер жеткілікті. Дубайдағыдай сәнді әшекеймен әсемделген түйелерді жинақтап, құмды жазықтың ортасында шай ішу – алып бара жатқан қаржыны талап етпейді. Соның өзін арабтар бизнес қылып отыр. Құмның ортасында отырып, жағажай жасап алған жұртқа қарап, қызыға да, қызғана да қарағанымыз рас.– Алдағы жоспарларыңызбен бөліссеңіз. Енді қай мемлекет сіздерді қызықтырып отыр?– Ендігі сапарымыз – Парсы шығанағында жалғасады. Желтоқсан айына брон жасап қойдық. Бұл саяхаттың ұтымды жері – 3 мемлекеттің 6 қаласымен танысуға мүмкіндік береді. Алып кемемен шекаралас жатқан Оман, Катар, Әбу-Даби сияқты елдерге саяхаттауды да өткен жылы жоспарлаған едік.Шетел аралап жүріп, тіл үйренудің маңызын жете ұғындық. Қалтасы көтеретін азаматтар өздерімен бірге мобилограф, аудармашы алып жүретінін білесіздер. Ал, барған елдің тілін жетік білу, керек затыңды сұрай алу шығындарыңызды біршама азайтуға көмектеседі. Дубайда көп нысандарда орысша қызмет көрсетеді. Дегенмен, барлығы дерлік ағылшынша біледі. Сондықтан, өзге елдің өркениетімен толыққанды танысу үшін ағылшын тілін білу керек.– Өзге мемлекетке қыдырып барғысы келетін Қазалы ауданының тұрғындарына қандай кеңес бересіз?– Әрине, ең бірінші, жол шығындарын дұрыс, шынайы есептеу керек. Ғаламторда бар ақпарапен танысып, белгілі бір қызметтің нақты бағасын білмей, ойша жоспар құру шетелдегі көңіл-күйіңізді құртуы мүмкін. Сол себепті, мәселен, Қазалыда тұратын болсаңыз, ұшақ ұшатын қалаға дейінгі пойыз билетінің бағасына дейін жоспарға қосуыңыз қажет. Бұл артық шығын жасамауға, ойдағыдай демалуыңызға көп септігін тигізеді.Бұдан кейін шетелдегі ауа-райын зерттеп, барынша минималды киім-кешек алу керек. Өйткені, бірнеше чемоданды арқалап жүру бейтаныс әлемнен әсер алуға айрықша кедергі келтіреді. Сонымен бірге жеке құжаттардың көшірмесін жасап, түпнұсқасын сенімді жерге, орналасқан отельге тастап кету келеңсіздіктердің алдын алады. Ең бастысы, өзгеріске дайын екеніңді сезіну, тәуекел етуден тартынбау керек. Бір мәрте шетел көрген адам басқа да мәдениетпен, өзге ұлттың игілігімен танысуға құмартып алатын әдеті бар. Сондықтан алғашқы сапар саяхатшылықты жаныңызға серік етуге негізгі себеп болады.– Көңіл көгжиегімізді кеңейткен әңгімеңізге рахмет!

Нұрбол Дауылбай: Шартарапты шарлаған көңіл көкжиегін дамытады

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінің биылғы түлегі Алима Баймұхамбетова АҚШ пен Германияның беделді жоғары оқу орындарына шақырту алды. &nbsp;Атап айтқанда, Drexel university, Аrizona state university және Jacobs university дарынды оқушының жоғары білімі мен жан-жақтылығы ерекше қызықтырып, әртүрлі &nbsp;көлемде жеңілдіктер ұсынып отыр. Ал американдық Vanderbilt university Алиманың оқуына толықтай грант бөлуге дайын екендіктерін жеткізді. &nbsp;Вандербильт университеті – АҚШ-тың инженерия, технология мен медицина-биологиялық ғылымдар саласындағы үздік жоғары оқу орындарының бірі және әлемдегі ең үлкен зерттеушілік базасы бар университеттердің қатарында 14 орында тұр.Алима Баймұхамбетова&nbsp;бұл университетте инженер мамандығы бойынша білімін жалғастыруға шешім қабылдап отыр.

Қызылордадағы NIS-тің оқушысы әлемнің төрт университетіне шақырту алды

<a href="https://kyzylorda-news.kz/">Kyzylorda-news.kz.</a> 2023 жылы «Болашақ» бағдарламасы бойынша 555 стипендия бөлінеді, деп хабарлайды <a href="https://kaz.zakon.kz/6020893-biyl-bolasha-badarlamasy-boyynsha-555-stipendiya-blned.html">Zakon.kz</a>.Бұл туралы мемлекеттік кеңесші Ерлан Қариннің төрағалығымен шетелде кадрлар даярлау жөніндегі республикалық комиссияның кезекті отырысында айтылды.2023 жылы «Болашақ» бағдарламасы бойынша барлығы 555 стипендия, оның ішінде магистратураға 395, резидентура және докторантураға 50, тағылымдамадан өтуге 110 стипендия бөлінді.Отырыста шетелде тағылымдамадан өту үшін «Болашақ» стипендиясын тағайындау мәселесі де қаралды. Комиссия шешіміне сәйкес 25 азаматқа стипендия берілді.Айта кету керек, «Болашақ» бағдарламасының стипендиясын алуға құжат тапсыру биылғы қыркүйек айына дейін жалғасады.

Биыл «Болашақ» бағдарламасы бойынша 555 стипендия бөлінеді

<a href="https://kyzylorda-news.kz/">Kyzylorda-news.kz.</a>&nbsp; Түркияның Газиантеп провинциясындағы Нурдагы қаласы қатты зардап шекті. Сондықтан оны толығымен бұзып тастауға шешім қабылданды. Бұл туралы губернатордың міндетін атқарушы Осман Бильгин мәлімдеді.Қазіргі кезде адам болуы мүмкін деген соңғы сегіз үйде іздестіру жұмыстары жүргізіліп жатыр.<blockquote>"Біз үлкен апатты бастан кешірдік. Қала құрылысы министрі Куруммен бір шешімге келді. Үйіндінің бәрін жинаймыз, қаланы толығымен бұзамыз, 100 процентке сүріледі. Бір ғана қираған үйдің астынан 150 адам шықты. Барлығы қайтыс болған. Біз қаланы жаңадан салып шығамыз", - деді Бильгин.</blockquote>Түрік бұқаралық ақпарат құралдарының мәліметіне сәйкес, қала халқының саны кем дегенде 40 мың адам болғанАйта кетері, бұған дейін Түркияның қала құрылысы мен қоршаған орта министрлігі 10 провинцияда 132 мың үйдің салынғанын хабарлаған. Соның ішінде 7 584 нысан жер сілкінісі кезінде толығымен немесе ішінара қираған. Бұдан бөлек, 12 617 үй тұруға жарамсыз деп танылды.6 ақпанда Түркияның оңтүстік-батысында 7,7 магнитудалы қатты жер сілкінісі болды. Соңғы ақпаратқа сәйкес, 31 мыңнан астам адам қайтыс болды.

Түркияда бір қаланы толығымен бұзып тастауға шешім қабылданды

<a href="https://kyzylorda-news.kz/">Kyzylorda-news.kz.</a> Түркияның вице-президенті Фуат Октай елдегі жойқын жер сілкінісі салдарынан қаза тапқандар туралы жаңа деректерді жариялады, деп хабарлайды РИА Новости.&nbsp;Фуат Октайдың сөзінше, соңғы мәліметтер бойынша Түркиядағы зілала салдарынан көз жұмғандар саны 24 617-ге дейін өскен.&nbsp;Сондай-ақ ол 113 адамды қамауға алуға ордер берілгенін айтты. Бұл азаматтар талапқа сай салынды деген ғимараттардың құлауына байланысты күдікке ілінген. Қазіргі таңда бір адам қамауға алынған.&nbsp;Еске сала кетейік, дүйсенбі 6 ақпан күні Түркияның оңтүстік-шығысында магнитудасы 7,5 болатын жойқын жер сілкінісі болды. Дәл осы күні магнитудасы 7,6 болатын тағы бір жер сілкінісі тіркелді. Табиғи апат көршілес Сирияға да әсер етті.&nbsp;Түркия президенті Режеп Тайип Ердоғанның айтуынша, бұл - елдегі 1939 жылдан бергі ең үлкен зілзала.&nbsp;Табиғи апатқа байланысты Түркияда жеті күндік аза тұту күні жарияланды. Сондай-ақ апаттан зардап шеккен 10 провинцияда үш айға төтенше жағдай режимі енгізілді. Зілаза салдарынан Қазақстанның екі азаматы қаза тапты. Олардың денесі 11 ақпанда елге жеткізілді.&nbsp;

Қазақстан және Қызылорда облысының жаңалықтары: Әлем