<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің Kyzylorda Hub алаңында «Amanat» партиясының Қызылорда облыстық филиалымен бірлескен өңір жастарына арналған «Amanat AI ToT» жасанды интеллект бойынша оқыту бағдарламасы өз жұмысын бастады.Бағдарламаның ашылу рәсімінде «Amanat» партиясы Қызылорда облыстық филиалының төрағасы Жандос Базартай сөз сөйлеп, жобаның негізгі мақсатына тоқталды. Ол өз сөзінде жасанды интеллекттің бүгінгі таңда тек ІТ саласының мамандарына ғана емес, барлық бағыттағы мамандар үшін қажетті маңызды дағдыға айналғанын жеткізді.Іс-шараға университеттің Ғылыми жұмыстар және халықаралық байланыстар жөніндегі проректоры Майнура Бурибаева қатысып, оқу орнында жасанды интеллект бағыты қарқынды дамып келе жатқанын атап өтті. Сонымен қатар, білім беру бағдарламаларына заманауи цифрлық технологиялар енгізіліп, студенттердің цифрлық құзыреттілігін арттыруға ерекше мән беріліп отырғанын жеткізді.&nbsp;Аталған шара Қазақстандағы Жасанды интеллект және цифрландыру жылы аясында, сондай-ақ «Цифрлық мемлекет» тұжырымдамасын жүзеге асыру мақсатында ұйымдастырылып отыр.&nbsp;Екі күнге жоспарланған бағдарламаға өңірдің әр ауданынан келген 30 жас қатысуда. Оқытудың басты мақсаты – аудан жастарына жаңа технологияларды меңгертіп, оларды өз өңірлерінде білім тарататын тренерлер деңгейіне дейін жеткізу және жасанды интеллект сауаттылығын арттыру.Бағдарлама аясында қатысушылар генеративті жасанды интеллект негіздерімен танысып, нейрожелілермен жұмыс істеу қағидаттарын, тиімді сұраныс (промпт) құрастыру тәсілдерін меңгереді. Сонымен қатар, жасанды интеллект көмегімен мәтін, сурет және презентациялар әзірлеу, Vibecoding бағыты арқылы бағдарламалау тілдерін терең білмей-ақ цифрлық өнімдер жасау, сондай-ақ күрделі технологиялық ұғымдарды қарапайым тілмен түсіндіру және жергілікті деңгейде оқыту жұмыстарын ұйымдастыру әдістері бойынша білім алады.&nbsp;Бұл бастама өңір жастарының цифрлық дағдыларын дамытып қана қоймай, олардың инновациялық ойлау қабілетін арттыруға және заманауи технологияларды тиімді қолдана білетін жаңа буын көшбасшыларын қалыптастыруға бағытталған.

Қорқыт ата университетінде өңір жастарына арналған «Amanat AI ToT» оқыту бағдарламасы басталды

<a href="https://kyzylorda-news.kz/">Kyzylorda-news.kz</a> &nbsp;Алматы қаласында «Үздік жыл психологі» республикалық байқауының жеңімпаздары марапатталды. Қызылордадағы Зияткерлік мектептің педагог-психологі Жадыра Қонысбаева мен Семейдегі NIS-тің педагог-психологі Жадыра Бейсембаева ІІ орынға ие болды.Жадыра Қонысбаева байқауда «Эмоция мен дарын үндестігі: тұлғалық үйлесімнің жаңа формуласы» атты авторлық бағдарламасын ұсынды. Жоба жасөспірімдердің эмоционалдық интеллектісін инновациялық әдістер арқылы дамытуға бағытталған. Бағдарлама цифрлық ортада өсіп келе жатқан жас буынның психологиялық тұрақтылығын нығайтып, эмоционалдық сауаттылығын қалыптастыруға және тұлғалық әлеуетін ашуға мүмкіндік береді.Ал Семейдегі NIS-тің педагог-психологі Жадыра Бейсембаева «Оқушылардың академиялық жетістігін психологиялық-педагогикалық қолдаудың интегративті моделі» атты бағдарламасын таныстырды. Бағдарлама диагностикалық, түзету және педагогикалық жұмыстарды біріктіру арқылы оқушылардың оқу жетістігін арттыруға және олардың психологиялық жағдайын жақсартуды көздейді.Айта кетейік, «Үздік жыл психологі» республикалық байқауы педагог-психологтердің кәсіби шеберлігін арттыруға, озық тәжірибелерді бөлісуге және оқушылардың психологиялық саулығын қолдауға бағытталған.Байқауды жыл сайын Қазақстан Республикасы Оқу-ағарту министрлігінің «Дарын» республикалық ғылыми-практикалық орталығы өткізеді.

NIS педагог-психологтері кәсіби шеберлігін республикалық байқауда дәлелдеді

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің Біліктілікті арттыру және қосымша білім беру орталығында профессор-оқытушылар құрамына арналған біліктілікті арттыру курсы ұйымдастырылды.Курс «Өрлеу» біліктілікті арттыру ұлттық орталығы» АҚ Қызылорда облысы бойынша кәсіби даму институтының ұйымдастыруымен «Оқу нәтижелерін бағалау құралдары: заманауи модельдер мен технологиялар» тақырыбында өтті. Оқу бағдарламасын институттың тәжірибелі оқытушылары жүргізді.Оқыту барысында білім беру процесіндегі заманауи бағалау жүйелері мен инновациялық оқыту технологияларын қолдану мәселелері кеңінен қарастырылды. Атап айтқанда, критериалды бағалау жүйесінің тұжырымдамалық негіздері мен бағалау түрлері, білім беру саласында жасанды интеллектті педагогикалық инновациялармен ұштастырудың әдістемелік негіздері, сондай-ақ AI интеграциясы негізінде сабақ моделін құрастыру жолдары талқыланды.<img src="https://knadmin.beoblood.kz/uploads/Whats_App_Image_2026_03_12_at_17_46_121_aa3a979f4f.jpeg" alt="Қорқыт профессор оқытушылар ">Сонымен қатар тыңдаушыларға білім беру процесінің тұжырымдамалық және нормативтік-құқықтық негіздері түсіндіріліп, «Педагог мәртебесі туралы» заң мен «Педагогтің кәсіби стандарты» талаптары таныстырылды. Курс барысында SOLO таксономиясы, UDL тәсілі, Lesson Study, Action Research және Learning Study секілді заманауи педагогикалық зерттеу әдістері туралы ақпарат берілді.Курс аясында білім алушылардың оқу стильдері мен жас ерекшеліктерін ескере отырып саралап оқыту әдістемесі қарастырылып, SCAFFOLD тәсілі негізінде құзыреттілікке бағытталған оқу тапсырмаларын әзірлеу жолдары көрсетілді.Аталған курс профессор-оқытушылар құрамының кәсіби құзыреттілігін арттыруға және білім беру процесінде заманауи бағалау құралдары мен инновациялық технологияларды тиімді қолдануға бағытталды.Іс-шара қорытындысы бойынша қатысушыларға сертификат табысталды. Салтанатты рәсімге университеттің Басқарма мүшесі – Академиялық мәселелер жөніндегі проректор Дана Абдрашева, «Өрлеу» біліктілікті арттыру ұлттық орталығы» АҚ Қызылорда облысы бойынша кәсіби даму институтының директоры Қызжібек Абдраманова және директор орынбасары Сәкен Серікбаев қатысты.

Профессор-оқытушылар құрамына арналған біліктілікті арттыру курсы ұйымдастырылды

<a href="https://kyzylorda-news.kz/">Kyzylorda-news.kz</a> &nbsp;Қорқыт ата атындағы Қызылорда университетінде шетелдік студенттерге «Заң мен тәртіп» қағидатын түсіндіруге арналған кездесу өтті.Іс-шара барысында қатысушыларға Қазақстан Республикасында 2025–2030 жылдарға арналған «Заң мен тәртіп» тұжырымдамасының негізгі бағыттары таныстырылып, қоғамда заң үстемдігін қалыптастырудың маңыздылығы айтылды. Сондай-ақ студенттерге құқықтық мәдениетті арттыру, қоғамдық тәртіпті сақтау және Қазақстан Республикасының заңнамасын құрметтеу қажеттігі түсіндірілді.<img src="https://knadmin.beoblood.kz/uploads/korkyt_c991f74cda.jpeg" alt="коркыт.jpeg">Шараның басты мақсаты – шетелдік студенттердің құқықтық сауаттылығын арттыру және қоғамдағы заң мен тәртіп қағидаттарын кеңінен насихаттау.

Шетелдік студенттерге «Заң мен тәртіп» қағидаты түсіндірілді

<a href="https://kyzylorda-news.kz/">Kyzylorda-news.kz</a>&nbsp;Қызылорда қаласында Kyzylorda Hub алаңында ұлттық технологиялық форум Digital Qazaqstan аясында ұйымдастырылатын Digital Qazaqstan Battle стартап-жобалар байқауының өңірлік жартылай финалы өтті. Шараның басты мақсаты – елімізде технологиялық кәсіпкерлікті дамыту, перспективалы стартаптарды анықтау және олардың әрі қарай дамуына қолдау көрсету.Жүлде қоры 19 млн теңгені құрайтын Digital Qazaqstan Battle байқауы Қазақстанның түрлі өңірлеріндегі инновациялық жобаларды біріктіретін маңызды алаң саналады. Байқау бірнеше кезеңнен тұрады: алдымен жобалар ұйымдастыру комитеті мен сарапшылар комиссиясының іріктеуінен өтеді, кейін өңірлік жартылай финалдарда үздік стартаптар анықталып, финалға жолдама алады. Байқаудың финалдық кезеңі 2026 жылғы 27 наурызда&nbsp;Шымкент қаласында Digital Qazaqstan ұлттық технологиялық форумы аясында өтеді.Қызылордадағы жартылай финалға әртүрлі бағыттағы 12 инновациялық стартап-жоба қатысты. Қатысушылар өз жобаларын қазылар алқасына ұсынып, олардың тиімділігі, инновациялық әлеуеті және нарықтағы даму мүмкіндіктері бойынша бағаланды.Жартылай финалға қатысқан жобалар қатарында: FoodLink – қоғамдық тамақтану орындарын толық цифрландыруға арналған SaaS-платформа; Cortex AI – рентген суреттеріндегі патология белгілерін анықтайтын жасанды интеллект жүйесі; Zhailau AI – мал шаруашылығын басқаруға арналған аппараттық және бағдарламалық жасақтаманы біріктіретін платформа; Sheber.kz – клиенттерді тұрмыстық қызмет көрсететін шеберлермен байланыстыратын онлайн-платформа; EPICfolio – студенттердің оқу бағдарламасынан тыс жетістіктерін автоматты бағалауға арналған AI-платформа; PhishGuard – фишинг және алаяқтық сайттардан қорғайтын жасанды интеллект негізіндегі жүйе; PrepAI – IELTS емтиханына дайындалуға арналған онлайн-платформа; AgriX – ауыл шаруашылығына арналған AI-платформа, ол жер жағдайына сәйкес егін егу және тыңайтқыш қолдану бойынша нақты ұсыныстар береді; MediaHub – медиакреаторларға арналған цифрлық экожүйе; Kutim.kz – тері жағдайын фотосурет арқылы талдап, күтім бойынша ұсыныстар беретін AI-платформа; EcoQogam – жастардың экологиялық белсенділігін арттыруға бағытталған геймификацияланған мобильді қосымша; ProjectZero AI – идеяларды веб-қосымшаларға айналдыруға мүмкіндік беретін low-code/no-code интеллектуалды платформасы.Жартылай финалдың қазылар алқасы құрамында Сабит Ибадулла (Қызылорда облысының цифрлық технологиялар басқармасының басшысы), Ғани Ерназаров («JSOFT» ЖШС директоры) және Антон Баев («Grand Technology» басшысы) болды. Бағалау барысында қазылар алқасы жобалардың масштабталу әлеуетіне, инновациялық тартымдылығына, даму көрсеткіштеріне және команда құрамына ерекше назар аударды.«Digital Qazaqstan Battle жартылай финалына қатысу мен үшін үлкен тәжірибе болды. Өз жобамды сарапшылар алдында таныстырып, олардың ұсыныстары мен бағасын алу – маңызды қадам. Енді финалда өңіріміздің атынан лайықты өнер көрсетуге тырысамын», – деді жеңімпаз атанған Cortex AI жобасының авторы Асылжан Абдуллаев.Бағалау нәтижесінде үздік жоба анықталып, ол Қызылорда өңірінің атынан 27 наурызда Шымкент қаласында өтетін Digital Qazaqstan Battle финалында бақ сынайды.«Digital Qazaqstan Battle – өңірлердегі талантты IT-командаларды анықтап, олардың жобаларын жаңа деңгейге шығаруға мүмкіндік беретін алаң. Қызылордадағы жартылай финалда ұсынылған жобалардың деңгейі жоғары болды, бұл өңірде технологиялық стартаптарға қызығушылық артып келе жатқанын көрсетеді», – деп атап өтті Kyzylorda Hub жетекшісі Жанарыс Тубекбаев.Digital Qazaqstan Battle байқауы еліміздегі технологиялық стартаптарды қолдауға және инновациялық экожүйені дамытуға бағытталған маңызды бастамалардың бірі. Мұндай алаңдар жас кәсіпкерлерге өз идеяларын таныстырып, сарапшылардан кері байланыс алуға және жобаларын жаңа деңгейге көтеруге мүмкіндік береді.

Қызылордада Digital Qazaqstan Battle стартап-баттлының өңірлік жартылай финалы ұйымдастырылды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде Қазақстанның еңбек сіңірген қайраткері, жырау, өнертанушы, профессор Алмасбек Нұрмаханұлы Алматовтың 70 жылдық мерейтойына арналған Ғылыми кеңестің кеңейтілген салтанатты мәжілісі өтті.Жиынды университеттің Басқарма төрағасы – Ректоры Наурызбай Байқадамов ашып, мерейтой иесінің қазақтың жыраулық дәстүрін дамыту мен насихаттаудағы, сондай-ақ ұлттық өнерді ғылыми тұрғыда зерттеп, жас ұрпаққа жеткізудегі еңбегін ерекше атап өтті.Алматов Алмасбек Нұрмаханұлы – профессор, жырау, педагог, өнертанушы. Ол 1956 жылдың 13 ақпанында Қызылорда облысы Қармақшы ауданы, Қорқыт станциясында дүниеге келген. №185 орта мектептің түлегі. Еңбек жолын туған ауылында жұмысшы болып бастап, кейін ұлттық өнер мен ғылым саласында үлкен жетістіктерге жетті.Алмасбек Нұрмаханұлы университет тарихында алғаш рет «Дәстүрлі өнер – жыр» мамандығы бойынша «Дәстүрлі музыкалық өнер» кафедрасының іргетасын қалап, оның алғашқы меңгерушісі болып қызмет атқарды. Оның бастамасымен ұлттық өнерді ғылыми тұрғыда зерттеу мен жүйелеуге бағытталған маңызды жұмыстар жүзеге асырылды.Салтанатты жиын барысында Алмасбек Нұрмаханұлына Қорқыт ата атындағы Қызылорда университетінің құрметті профессоры аттестаты табысталып, арнайы профессор мантиясы кигізілді.Іс-шараға жазушы, тарихшы-этнограф Қойшығара Салғараұлы, Қазақстанның Халық жазушысы Жүрсін Ерман, ҚР Парламенті Мәжілісінің депутаты Жанарбек Әшімжан, академик Қылышбай Бисенов және мәдениет пен өнер саласының белгілі өкілдері қатысты. Сонымен қатар жиынға университеттің профессор-оқытушылар құрамы мен Ғылыми кеңес мүшелері де қатысты.Кездесу барысында қонақтар мерейтой иесінің шығармашылық жолы мен ғылыми еңбектеріне тоқталып, қазақ руханиятына қосқан үлесіне жоғары баға берді. Сонымен қатар ғалымның алты томдық шығармалар жинағының тұсаукесер рәсімі өтті.Шара барысында Алмасбек Алматовтың шәкірттері мен жас өнерпаздар жырдан шашу шашып, ұстазға құрмет көрсетті. Жиын соңында мерейтой иесі сөз сөйлеп, көрсетілген құрмет пен жылы лебіздер үшін алғысын білдірді.Бүгінде Алмасбек Алматов жыраулық дәстүрді жаңғыртып, оны ғылыми тұрғыда зерттеп, жас ұрпаққа насихаттап келе жатқан көрнекті тұлғалардың бірі ретінде танылып отыр.

Ұлт руханиятына үлес қосқан тұлға: Алмасбек Алматовтың 70 жылдығы аталып өтті

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың төрағалығымен өткен кадрлық өзгерістерге байланысты мәжілісте Оқу-ағарту министрлігінің бұйрығымен Қызылорда облысының білім саласында сапаны қамтамасыз ету департаментінің басшысы лауазымына тағайындалған Бекмағанбетов Мәди Бауыржанұлы таныстырылды.<img src="https://knadmin.beoblood.kz/uploads/yzylorda_oblysyny_bilim_salasynda_sapany_amtamasyz_etu_departamentini_basshysy_tanystyryldy1_48e944864a.jpg" alt="Қызылорда облысының білім саласында сапаны қамтамасыз ету департаментінің басшысы таныстырылды1.jpg">Нұрлыбек Машбекұлы жаңа басшыға игі тілегін білдіріп, саладағы мемлекеттік саясатты тиімді іске асыру, білім сапасын арттыруға бағытталған жұмысты жүйелеу қажеттігін атап өтті.<blockquote>«Білім сапасын әділ бағалаудың тәуелсіз тетіктерін енгізуде, жүйенің ашықтығы мен қоғамдық сенімді нығайтуда кешенді шаралар қабылдау қажет. Білім беру, әсіресе жекеменшік білім беру ұйымдарының біліктілік талаптарына сәйкестігіне қатаң бақылау орнатуды тапсырамын», – деді аймақ басшысы.</blockquote>Мәди Бекмағанбетов еңбек жолын білім беру ұйымдарында бастаған. Әр жылдары облыстық ішкі саясат басқармасында маман, облыстық білім басқармасының бөлім басшысы лауазымдарында қызмет атқарған.2020-2023 жылдар аралығында облыс әкімі аппаратында ұйымдастыру-инспекторлық жұмыс және аймақтық даму бөлімінің бас инспекторы, бөлім басшысы болған. 2023 жылдан бүгінге дейін облыс әкімі аппараты басшысының орынбасары қызметін атқарып келді.Фото: Нұрболат Нұржаубай

Қызылорда облысының білім саласында сапаны қамтамасыз ету департаментінің басшысы таныстырылды

<a href="https://kyzylorda-news.kz/">Kyzylorda-news.kz</a> Қазалы ауданы орталығындағы №266 мектеп-лицейде 8 наурыз – Халықаралық әйелдер күні мерекесі қарсаңында білім саласында жемісті еңбек етіп жүрген ұстаз-аналар мен ардагерлердің құрметіне арналған мерекелік салтанатты шара өтті. Мерекелік шара қазақ тарихындағы батыр қыздар мен аналарымыз туралы ерекше қойылыммен басталды.«Сұлулықтың сүйкімді періштесі» атты салтанатты шараға аудан әкімінің орынбасары Дәурен Тлеумбетов қатысып, ауданның барша ұстаздар қауымына аудан әкімі Алмасбек Есмахановтың мерекелік құттықтауын жеткізді.<blockquote>-Баршаңызды шуақты көктемнің шұғылалы мерекесі - Халықаралық әйелдер күнімен шын жүректен құттықтаймын! Бұл мереке – мейірімділік пен ізгіліктің, сұлулық пен жылулықтың символы. Ал білім саласында еңбек етіп жүрген Сіздер – сол асыл қасиеттердің шынайы иесісіздер. Ұлы ойшыл Абай Құнанбайұлы «Адамның адамшылығы – жақсы ұстаздан» деген. Расында, қоғамның дамуы да, мемлекеттің болашағы да ұстаздың еңбегімен тығыз байланысты. Жыл өткен сайын елімізде білім саласын дамытуға деген үлкен қолдау көрсетіліп келеді. Мемлекет басшысы Қасым-Жомарт Кемелұлы Тоқаевтың бастамасымен қолға алынған «Келешек мектептері» ұлттық жобасы аясында Жанқожа батыр ауылынан 300 орындық мектеп пайдалануға берілді. 2025 жылы аудан орталығындағы №234 Ж.Жабаев атындағы мектепке күрделі жөндеу жүргізілсе, тағы да 8 білім ордасына ағымдағы жөндеу жұмыстары жүргізілді. Аудандағы бірқатар білім ордалары жабдықталған кабинеттермен қамтамсыз етіліп, 25 білім беру ұйымдарына талапқа сай бейнекамера орнатылды. Бүгінгі барша нәзік жандылардың мерейлі мерекесінде, өздеріңізге зор денсаулық, отбасыларыңызға амандық, еңбектеріңізге жеміс тілеймін, - деді Дәурен Оңғарбайұлы.</blockquote>Салтанатты шарада Дәурен Оңғарбайұлы барша ұстаздар қауымын санаулы күндерден кейін елімізде өтетін Президентіміз Қасым-Жомарт Кемелұлы Тоқаевтың бастамасымен қолға алынған Қазақстан Республикасының жаңа Конституциясына арналған республикалық референдумға ауызбіршіліктің үлгісін көрсетіп, белесене атсалысуға шақырды.Мерекелік шарада ауданның білім саласында табысты еңбек етіп жүрген бірқатар мұғалімдер облыс әкімі мен аудан әкімінің, облыстық білім басқармасы басшысының «Алғыс хатымен» марапатталса, Ғани Мұратбаев атындағы №17 орта мектебінің бастауыш сынып мұғалімі Бағым Сакиева Қазалы ауданының «Құрмет грамотасымен» марапатталды. Сондай-ақ бір қолымен бесікті тербетіп, ұрпақ тәрбиелеу ісінеде ерекше үлес қосып жүрген аналарға «Алтын» және «Күміс» алқалар табысталды.Марапаттау рәсімінен кейін, сахна төріне барша білім саласындағы нәзік жандылар қауымына арналған аудан әкімінің ықылас гүлі шығарылды.Мерекелік көңілді кешті өнерлі ұстаздар қауымы, мектеп оқушылары, түрлі ән байқауларының жеңімпаздары әуелеген әнмен көркемдеді. Ал қазақ эстрадасының жарық жұлдызы Кеңес Әлімжан шарада ән шырқап, ұстаздарға ерекше мерекелік көңіл-күй сыйлады. Шара соңы оқушылардың орындауындағы керемет хормен аяқталып, барша ұстаздар қауымына гүл шоқтары ұсынылды.

Қазалылық ұстаздар қауымы құрметке бөленді

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде 8 наурыз – Халықаралық әйелдер күніне арналған «Анаға тағзым, аруға құрмет» атты салтанатты жиын өтті. Айырықша жылулық пен құрметке толы жиынға Басқарма төрағасы – Ректор Наурызбай Байқадамов қатысып, әйел-аналардың қоғамдағы және білім мен ғылым саласындағы ерекше орнына тоқталды. Наурызбай Сейтқалиұлы өз сөзінде университет дамуына өлшеусіз үлес қосып жүрген нәзік жандылардың кәсібилігіне, жауапкершілігіне және адал еңбегіне ризашылығын білдірді.<blockquote>«Бүгінде оқу ордасында қызмет ететін 1047 маманның 726-сы – әйелдер, яғни ұжымның 70 пайызын құрайды. Университетте білім алып жатқан 11 мыңнан астам студенттің 7533-і – қыз балалар (65%). Бұл – білім мен ғылым саласында әйелдердің белсенділігі мен көшбасшылық әлеуетінің айқын көрінісі. Ғылыми жобалар көрсеткіші де осы үрдісті нақтылай түседі. 2025 жылы жүзеге асқан 38 жобада еңбек еткен 201 ғалымның 98-і әйелдер болса, 2026 жылы орындалып жатқан 23 жобаның 107 орындаушысының 60-ы – әйел қызметкерлер. Бұл деректер нәзік жандылардың ғылымдағы табандылығы мен кәсіби біліктілігін дәлелдейді»,- деді Ректор. &nbsp;</blockquote><img src="https://knadmin.beoblood.kz/uploads/Whats_App_Image_2026_03_05_at_18_22_03_1_a55e9e91a0.jpeg" alt="коркыт ">Мерекелік кеш барысында оқу орнының стратегиялық ілгерілеуіне үлес қосып жүрген әріптестер марапат төрінен көрінді. Кеш соңы Педагогика және дәстүрлі өнер институтының әсерлі концертімен түйінделіп, әйелдер қауымына ықылас гүлдері табысталды. Анаға құрмет, әйелге ізет көрсетілген тағылымды кеш барша қатысушыларға шаттық пен шабыт сыйлап, көктем мерекесінің шынайы рухын айшықтай түсті.<img src="https://knadmin.beoblood.kz/uploads/Whats_App_Image_2026_03_05_at_18_21_54_dbb2c2bcb8.jpeg" alt="коркыт ">

 «Анаға тағзым, аруға құрмет» атты салтанатты жиын өтті

<a href="https://kyzylorda-news.kz/">Kyzylorda-news.kz</a> Халықаралық әйелдер күні қарсаңында Orda School мектебінде нағыз ертегі орнады. Кәдімгі оқу сыныбы небәрі бір кеште махаббат пен мейірімге толы мерекелік сахнаға айнала кетті. 5-сынып оқушылары бұл кешке бар жанын салды: айналаны шарлармен безендіріп, төбеден нәзік ленталар мен аналарының суреттерін іліп қойды. Әр фотоның астында бала жүрегінен шыққан ең тәтті тілектер мен алғыс сөздері менмұндалап тұрды.Бұл кеш тек көктем мерекесі емес, бала бойындағы адамгершілік пен отбасына деген құрметті оятатын «Адал азамат» бағдарламасының жарқын көрінісі болды. Шығармашылық арқылы бүлдіршіндер ең басты нәрсені — мейірімді болуды және жақындарын бағалай білуді үйренді.Концерттің ең сиқырлы тұсы — ағылшын тіліндегі ертегі-әндер болды. Оқушылар сахнада нағыз актерлердей өнер көрсетті: «Кішкентай ханзаданың» сырлы әлемі, «Қасқыр мен жеті лақ» ертегісіндегі ана туралы нәзік ән, сүйкімді Қызыл Телпек пен Пьероның бейнелері көрерменді баурап алды. Ал финалдағы «Буратино» әні барлық кейіпкердің басын қосып, көңілді аяқталды. Балалардың өз қолдарымен дайындаған костюмдері әр бейнеге ерекше жылулық сыйлады.Кештің ең толқынысты сәті — қорытынды нөмір болды. Сыныпта «Анашым, әрқашан қасымда бол» әні әуелегенде, залдағы аналардың көзіне жас үйірілді. Бұл ән — бала махаббатының ең шынайы үні еді.Мереке соңында балалар аналарына өз қолдарымен жасаған сыйлықтарын — гүл пішінді әдемі магниттерді тарту етті. Гүлдің ортасындағы баланың суреті мен «Анашым, мен сенің гүліңмін» деген жазу әр ананың жүрегін елжіретті. Бұл кішкентай сыйлық енді әр үйдің төрінде үлкен махаббаттың белгісі болып тұрады.Бұл мереке Orda School-да баланың жан-жақты дамуына, оның талантын ұштауға қаншалықты көңіл бөлінетінін тағы бір мәрте көрсетті. Мұнда баланың қанатын қатайтып, биікке ұшуына көмектесетін, өз ісіне ғашық ұстаздар еңбек етеді. Дәл осындай жылы қарым-қатынас пен заманауи тәсілдердің арқасында оқушыларымыз жаңа белестерді бағындырып келеді.Осынау әдемі бағдарламаны дайындап, жүзеге асырған ағылшын тілі пәнінің мұғалімі Қадыр Фариза ЖаңабайқызыФото: Orda School мектебі

Orda School-дағы сахна сиқыры мен аналардың жадыраған күлкісі

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаевтың қатысуымен Р.Әліарыстанұлы атындағы жеке мектепті мемлекеттік меншікке алу бойынша меморандумға қол қою рәсімі өтті. Оған жауапты сала басшылары, селекторлық режимде қала, аудан әкімдері, зиялы қауым өкілдері қатысты.Аймақ басшысы атқарылған ауқымды жұмыстарға, соңғы жылдары бюджет қаржысының басым бөлігі әлеуметтік салаға, оның ішінде білім саласына бағытталғанына тоқталды.<blockquote>«Өңірімізде Президентіміздің, Үкіметтің ерекше қолдауымен тың бастамалар жүзеге асырылуда. Жас ұрпақтың сапалы білім алуы – жұмысымыздың басты басымдығы. Білім беру саласына соңғы 3 жылда 812 млрд. 245 млн. теңге, биыл 302 млрд. теңге қаралды.Бөлінген қаржының түпкілікті мақсатқа жетуін қадағалаудың нақты шараларды қабылданған. 2023 жылдан бері «Фейс-бақылау» мобильдік қосымшасы қолданысқа енгізіліп, балабақшаларға жалған тіркелген 19 263 бала анықталды, 28 млрд. 100 млн. теңге үнемделді. Емхананың жалған анықтамасын тіркеу, негізсіз демалыс күндерін анықтау есебінен 6 млрд. 700 млн. теңге бюджетке қайтарылды.Облыста демографиялық өсім мен халықтың көшіп-қону белсенділігі жоғары болғандықтан, оқушы санының жыл сайын артқаны байқалады. Жаңа оқу жылында 1-11 сыныпта 189 288 оқушы тіркелді, өткен оқу жылымен салыстырғанда 4 364 балаға көбейген.Осы ретте орын қажеттілігі жеке инвестиция есебінен де шешімін табуда. Жеке секторға мемлекет тарапынан қолдау жасалған. Біз өз кезегімізде таза, шынайы жұмыс істейтін кәсіпкерлерді үнемі қолдап келеміз.Өткенде мемлекет және қоғам қайраткері Мұрат Бақтиярұлы бизнестің әлеуметтік жауапкершілігі аясында 2023 жылдың қыркүйегінде ашылған «Oрда скул-2» жеке мектебін мемлекет меншігіне сыйға берді. Бүгін де дәл сондай игі істің куәсі боламыз.Біздің ең бірінші міндетіміз – балаларымыздың жан-жақты, сапалы білім алуына қолайлы жағдай жасап, жайлы орта қалыптастыру. Өскелең ұрпақ тәрбиесімен айналысатын барша бастамаларыңызға сәттілік тілеймін және ортақ жұмысты бірлесіп атқаруға шақырамын!» – деді Н.Нәлібаев.</blockquote>Рәсімде облыстық білім басқармасының басшысы Асқарбек Есжанов пен Р.Әліарыстанұлы атындағы жеке мектептің құрылтайшысы Шәркүл Иманбердиева мектеп ғимаратын облыстық коммуналдық меншікке беру туралы меморандумға қол қойды.<img src="https://knadmin.beoblood.kz/uploads/Zheke_mektep_imaratyn_oblysty_kommunaldy_menshikke_beru_turaly_memorandum_a_ol_ojyldy1_4bc40ed7ac.jpg" alt="Жеке мектеп ғимаратын облыстық коммуналдық меншікке беру туралы меморандумға қол қойылды1.jpg">Сонымен бірге Шәркүл Иманбердиева, мемлекет және қоғам қайраткері Бақберген Досманбетов, «Ұлағат» мектебінің құрылтайшысы, Қазақстанның еңбек сіңірген қайраткері Қалқазбек Әжібеков сөз сөйлеп, жас ұрпаққа сапалы білім берудің маңыздылығына тоқталды.Айта кету керек, өткен жылы өңірде 13 білім беру ұйымы жаңадан ашылды. «Келешек мектептері» ұлттық жобасы аясында 10 мектеп салынып, пайдалануға берілді.Фото: Қызылорда облысы әкімінің баспасөз қызметі

Жеке мектеп ғимаратын облыстық коммуналдық меншікке беру туралы меморандумға қол қойылды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде БҰҰ-Әйелдер ұйымының Орталық Азия бойынша байланыс кеңсесінің басшысы, Қазақстандағы Өкілдігінің жетекшісі Джерен Гювеннің қатысуымен «Әйелдер мен қыздардың әділдікке тең қол жеткізуі: онлайн және офлайн кеңістікте» тақырыбында панельдік дискуссия өтті.Кездесуді Басқарма төрағасы–Ректор Наурызбай Байқадамов ашып, университеттің жетістіктері мен әйелдердің білім мен ғылымдағы рөлін атап өтті. Қазіргі таңда оқу орнында 1047 қызметкер еңбек етсе, оның 726-сы, яғни 70%-ы – әйелдер. Ал 11 мыңнан астам студенттің 7533-ін (65%) қыздар құрайды.<blockquote>«Бұл көрсеткіштер әйелдердің кәсіби және академиялық кеңістіктегі белсенділігін, олардың ғылым мен білімдегі әлеуетінің жоғары екенін көрсетеді. Біздің қыздарымыз тек білімде ғана емес, спортта да табысқа жетіп келеді. Университетімізде 2 халықаралық дәрежедегі спорт шебері, 13 ҚР спорт шебері және 21 спорт шеберлігіне кандидат білім алуда», – деді ректор.</blockquote>Өз кезегінде Джерен Гювен университетпен алдағы уақытта бірлесіп, академиялық бағытта серіктестік орнатуға ниетті екенін атап өтті. Ол Қызылордадағы алғашқы серіктес ретінде Қорқыт ата университетімен жұмыс жасауға қызығушылық білдірді.Дискуссия барысында Джерен Гювен «Серіктестік пен ықпал арқылы гендерлік теңдікті ілгерлету» тақырыбында баяндама жасап, БҰҰ Әйелдер құрылымының Еуропа және Орта Азия бойынша 18 ел мен аумақты қолдайтынын, сондай-ақ гендерлік теңдік пен зорлық-зомбылықтың алдын алу бағытында жүргізіліп жатқан жұмыстарды баяндады.<img src="https://knadmin.beoblood.kz/uploads/or_yt_ata_universitetinde_jelder_men_yzdardy_dildikke_te_ol_zhetkizui_ta_yrybynda_paneldik_diskussiya_tti_1_536b575bd7.jpg" alt="Қорқыт ата университетінде «Әйелдер мен қыздардың әділдікке тең қол жеткізуі» тақырыбында панельдік дискуссия өтті 1.jpg">Іс-шара аясында Ғылыми жұмыстар және халықаралық байланыстар жөніндегі проректор Майнура Бурибаева университеттегі ғылыммен айналысып жүрген әйелдердің жетістіктеріне тоқталды. Оның айтуынша, 2026 жылы ректор грантын иеленген 20 адамның 15-і нәзік жанды, ал орындалып жатқан 23 ғылыми жобаның 60%-ында қыз-келіншектер жұмыс істейді.Панельдік пікірталаста Құқықтану білім беру бағдарламасы бойынша аға оқытушы, заң ғылымдарының кандидаты Ляззат Қаржаубаева «Гендерлік теңсіздік мәселелері» тақырыбында баяндама жасады. Сонымен қатар, «Қызжібек» студенттік ұйымының өкілдері мен студенттер «Сталкингтің көрінбейтін шекарасы» тақырыбында өз ойларын ортаға салды.Жиын интерактивті форматта өтіп, қатысушылар әйелдердің құқықтары мен әділеттілікті қолдауға арналған өз ойларын тақтаға жазды. Іс-шара студенттердің нәзік жанды аруларға арналған әнімен қорытындыланды.

Қазақстан және Қызылорда облысының жаңалықтары: Білім