<a href="https://kyzylorda-news.kz/">Kyzylorda-news.kz.</a> Жаза мерзімін өтеп, арнаулы білім ала алмай, темір торға тоғытылғандар ҚАЖ мекемелерінде кәсіптік білім алып, мамандық игеруде.Қызылорда облысы бойынша ҚАЖ департаменті №60 мекемесінде жазасын өтеп жүрген 140 азамат арнаулы білімін дәлелдейтін құжат алды. Газэлектрдәнекерлеуші, арнайы тігінші, аспазшы, техник – механик, ағаш ұстасы мамандықтары бойынша кәсіби сауатын арттырған сотталғандар енді тұрақты жұмысқа тұрып, жалақы алу мүмкіндігіне ие болады.Қызылорда қаласында М.Ықсанов атындағы Қызылорда құрылыс және бизнес және Қызмет көрсету және сервис колледжі, М.Саламатов атындағы Қызылорда қызмет көрсету және сервис колледжі, С.Ысқақов атындағы Құрылыс және бизнес колледждерінен арнаулы білім беретін мамандар жаза мерзімін өтеушілерге диплом табыстап, алдағы уақытта қандай жұмыс орындарына орналасқан тиімді екеніне бағыт-бағдар берді.<blockquote>«Мамандықтары бойынша диплом алған азаматтар жаза мерзімі аяқталғанша осы мекемеде ақылы жұмысқа орналасып, жалақы алып, қылмыспен келтірген шығындарды өтеуге мүмкіндіктері бар. Бұл азаматтар жақсы оқығаны үшін ай сайын 28 мың көлемінде шәкіртақы алып тұрды. Сотталғандардың жеке істері бойынша атқару парақтары болса, шәкіртақысынан белгіленген сома ұсталып отырды. Сотталғандардың туыстары үшін материалдық қолдау көрсету үшін, жеке басына қатысты қажетті заттарды сатып алу үшін шәкіртақысын пайдалануға мүмкіндік берілді», - деді сотталғандардың еңбегін ұйымдастыру бөлімшесінің бастығы Бағлан Қалиев.</blockquote>«Техник – механик» мамандығы бойынша диплом алған жазасын өтеуші мамандық игеріп қана қоймай, ай сайын шәкіртақы да алып тұрғанын айтады.<blockquote>«Бізді қоғамнан сотталған деп бөлмей, жеке тұлға ретінде қалыптасуымызға жағдай жасап, білім алуымызға, мамандық иесі атануымызға мүмкіндік жасап отырған мекеме әкімшілігіне алғысымды білдіремін. Осы мамандықты игердім, ай сайын шәкірақы алып тұрдым. Бостандыққа шыққан соң да осы мамандығым бойынша кәсіп ашып, өзімді одан әрі дамытамын», - деді жазасын өтеуші.</blockquote>Қолдарына диплом алған 140 азамат тек темір тордың аржағында ғана емес, бостандықта да алған білімімен жұмысқа орналаса алады.&nbsp;

Қызылорда: Кәсіптік білім алғандар жұмысқа орналаса алады

<a href="https://kyzylorda-news.kz/">Kyzylorda-news.kz.</a> Қазалы ауданының әкімі Мұхтар Оразбаев Әйтеке би кентінің тұрғындарымен кездесіп, талап-тілектерін тыңдады. «Жеңіс» саябағында өткен жиында Мұхтар Әуесұлы ең әуелі жиылған көпшілікті қасиетті Құрбан айт мерекесімен құттықтады. Мұнан соң жыл басынан бері ауданда атқарылып жатқан ауқымды жұмыстарды тілге тиек етіп, алдағы жоспарларымен бөлісті.Ұсыныс-пікірлерге кезек келгенде тұрғындар өздерінің мұң-мұқтаждарын аудан басшысының назарына ұсынып, ойларын ортаға салды. Нақтыласақ, бірнеше көшеге жаяу жүргіншілер жолы қажет екені, жол жайы және түнгі жарықшамдар орнату мен ауыстыру мәселесі көтерілді.&nbsp;Сонымен қатар тұрғындар аудандағы биылғы асфальтталған көшелерге жол белгілерін көптеп орнату керектігін, қоғамдық көліктің уақытылы қатынауын бақылауды және тағы бірқатар өзекті мәселелерді аудан басшысының назарына салды.Аудан басшысы тұрғындардың талап-тілегі ескерусіз қалмайтындығын, қажетті шаралар бірлесіп атқарылатындығын жеткізді. Сондай-ақ, айтылған ұсыныстарға байланысты жауапты сала жетекшілеріне бірқатар тапсырмалар жүктеді.Басқосу соңында Әйтеке би кентінің тұрғындары аудан көлеміндегі атқарылып жатқан жұмыстарға оң бағасын беріп, алдағы жұмыстарға сәттілік тіледі.

Мұхтар Оразбаев Әйтеке би кентінің тұрғындарымен кездесті

<a href="https://kyzylorda-news.kz/">Kyzylorda-news.kz.</a> Қазақстанда шағын және орта кәсіпті барынша дамытып, елдің әлеуметтік-экономикалық деңгейін көтеру – бүгінгі таңда басты міндеттерінің бірі. Иә, кәсіп те, кәсіпкерлер саны жыл сайын артып келеді. Олар жұмыссыздықты жоюда өз үлестерін қосуда. Кәсіптің де сан түрі бар. Кәсіп ашамын деген әрбір адамға елімізде мүмкіндік көп. Таңдау өз еркіңде. Алайда кәсіп көп болғанымен, ұлттық тағамдарымызды өндіретін кәсіпкерлер қарасы аз. Бүгінде ұлттық тағамға сұраныс бар ма? Ұлттық тағамдарымыз өз деңгейінде насихатталып жүр ме?&nbsp;Иә, қазір қолдың құрт-майына сұраныс жоғары. Өйткені, тұтынушылар да түрлі қоспасы бар ағарғаннан гөрі таза табиғи өнімді тұтынғысы келеді. Ол – иіркөлдік Гүлжанат Асанова. Өткен жылдың қарашасында қайтарымсыз грантты жеңіп алып, ұлттық өнімдерді сатылымға шығаруда. Кәсіпкер құрт, ірімшік, май, қаймақ өнімдерін жасап шығаруда. Одан бөлек, Гүлжанаттың түрлі тәтті пісіруге де икемі бар. Тапсырыс түссе дастарқаныңызды тәттілермен толтырып беруге дайын.&nbsp;<blockquote>«Шағын және орта бизнесте ұлттық тағамдарымыз бен отандық өнімдерімізді барынша дәріптеуіміз қажет. Сол себепті мен дәл осы ұлттық өнімдерді таңдадым. Қазақтың қандай ұлттық тағамы болса да дәмді әрі адам денсаулығына пайдалы. Сондықтан біз ұлттық тағамдарымызды ұялмай дәріптеп, көпшілікке ұсына аламыз. Дәл құрт өнімі сұранысқа ие, тіпті оны бренд ретінде қалыптастырып экспортқа шығаруға болар еді. Қазіргі таңда екі саланы да қоса алып жүрмін. Ұлттық өнімдерге өзге облыстардан тапсырыс көп. Өз балаларыма да табиғи өнім бергенді жөн көремін. Әсіресе, құртта кальций дәрумені көп. Бұл адамға ең қажетті дәруменнің бірі», – дейді кәсіпкер.&nbsp;</blockquote>Жас кәсіпкердің айтуынша, шағын және орта бизнесте ең бірінші тәуекел керек. Ал тәуекел етпеген жағдайда жақсы нәтиже күтпеген дұрыс. Қазір Қазақстанда мүмкіндік көп. Кәсіп бастаймын деген адамға еш кедергі жоқ. Ең бастысы ниет пен әрекетті ұштастыра білу керек. Кәсіпте әрдайым заман талабына сай өнім өндіруің қажет. Серіктестеріңнен айырылып қалмас үшін, бәсекеге қабілетті болуың керек.&nbsp;<blockquote>«Қазіргі таңда бизнес орталықтар, бизнес тренерлер өте көп. Бүгінде көпшілігі өз кәсібін ашқысы келеді. Кәсіпкер болудың бір артықшылығы ешкімге тәуелді емессің. Өзіңе би, өзіңе қожасың. «Айлық қашан түседі?» деп күтіп отырмайсың. Бір сөзбен айтқанда, ешкімге тәуелді болмайсың. Бұл жерде еңбегіңе қарай, нәтижесін көресің. Жалпы, кәсіпкер болудың артықшылығы көп. Отбасыңа, жақындарыңа көңіл бөлуге уақыт табасың. Таңдау өз еркіңде. Кемшілігі табыс көзі бірде бар болса, бірде жоқ болуы мүмкін. Ол өзіңнің еңбегіңе байланысты болмақ. Мен алдағы уақытта осы істі әрі қарай жалғастырып, кең көлемді жұмысы бар цех ашқым келеді. Ол уақыттың еншісінде», – дейді кәсіпкер Гүлжанат Асанова.</blockquote>Иә, кәсіп бастаймын дегенге мүмкіндік көп, ал тағамға келсек, ұлттық өнімнен артығы жоқ.

Қармақшылық тұрғын қолдың құртын кәсіп қылуда

<a href="https://kyzylorda-news.kz/">Kyzylorda-news.kz.</a> Кеңес Шайық «Агро-Өркен» жауапкершілігі шектеулі серіктестігінің агроном-бригадирі. Ол отыз жылдан астам уақытын ел ризығы үшін аянбай тер төгіп келеді. Осы кезге дейін бар жиған-терген тәжірибесін оңтайлы қолданып, егін алқабына себілген дәнді-дақылдардан мол өнім алу жолында сүбелі үлес қосып келеді. Жан-тәнімен беріле халық үшін қызмет еткен оның еңбегі де елеусіз емес. Соның арқасында қат-қат алғыс пен құрметке бөленді.&nbsp;Мәселен, ерекше атап өтетін болсақ, осыдан екі жыл бұрын «Агро-Өркен» жауапкершілігі шектеулі серіктестігінің директоры Медеу Бердібайұлы мол өнім жинағаны үшін егіс бригадирі қызметін атқарған Кеңес Нұрмашұлына 1 миллион теңге сыйға тарту еткен. Былтыр ҚР ауыл шаруашылығы министрлігінің «Ауыл шаруашылығы үздігі» төсбелгісімен марапатталды. Мұнымен қоса, егістік басында емін-еркін жүретін көлікті иемденіп, еңбегіне орай басшылық тарапынан сыйға алу бір ғанибет. Осыдан кейін таңдаған кәсіпті ер азамат қалайша ұнатпауы тиіс?! Бүгінгі ісіне бар ілімін жұмсай, махаббатпен қарайтын бас агрономның айтуынша, мұндағы жұмысшылармен қатар таңмен таласып, сағат 4:30-да егістікке шығады. Сондағысы – еккен дәнді ауыртпай, арам шөбін көбейтпей, халықтың несібесін кемітпей, берекелі өнім алу мақсатында егістікті кешкі алтыға дейін бақылап-барлайды. Егін алқабының жай-күйімен қанығады. Осылайша, әрбір шаруаны ұршықша иіріп, жұмыстың барысын үйлестіріп тұрады. Кешегі аптада арнайы ақылы қызмет көрсететін ұшақпен зиянкестерге қарсы гербицид пен пестицид себілді. Соларды пайдалану арқылы ауылшаруашылық өнімдерін 18-20 процент сақтау мүмкіндігі бар екендігін тілге тиек етті егіс бригадирі Кеңес Нұрмашұлы.&nbsp;<blockquote>– Біздің 1800 гектар тегістелген жерге 5 ауыспалы егістік ротациялық кестеге сай егіс орналасқан. Ал биыл барлығы 1707 гектардан жоғары жерге ауыл шаруашылығы дақылдарын орналастыру межеленді. Оның ішінде, 750 гектар жерге күріш дақылын, 555 гектар жерде көне жоңышқа, 257 гектар жерге жаңа жоңышқа, 145 гектар жерге бидай егу жоспарланды. Бұл жоспардың үдесінен шығып, наурыз айында жер дайындалып, бидай сәуір айына дейін егілді. Құдайға шүкір, шығымы жаман емес. Алла қаласа, алдағы күндері бір дәнін жоймай жинап аламыз деген үмітімізді үкілеп жүрміз. «Мағжан и К» жауапкершілігі шектеулі серіктестігімен келісім шартқа отырып, 185 тонна бірінші репродукциялы «Янтарь» тұқымы, 15 тонна бірінші репродукциялы «Лидер» тұқымы алынды. Сонымен қатар, 3 тонна бірінші репродукциялы «Семиреченская местная» жоңышқа және 500 келі «донник» жоңышқа тұқымы алынды. «BayDala» жауапкершілігі шектеулі серіктестігімен келісім шарт жасалып, 69 тонна карбамид, 75 тонна аммофос, 225 тонна аммоний сульфаты тыңайтқышы алынды. Сондай-ақ, «EXPLANTA» жауапкершілігі шектеулі серіктестігімен келісім шарт дайындап, «Солито, каратэ атты гербицидтер алынды, – дейді Кеңес Нұрмашұлы.</blockquote>Биыл көктем басталысымен құрал-сайманын қамдаған «Агро-Өркен» жауапкершілігі шектеулі серіктестігі 750 гектар күріш дақылы, 145 гектар бидай, 257 гектар жаңа жоңышқа, 555 гектар көне жоңышқа сепкен болатын. Адал еңбек етіп, тер төккен дала жұмысшыларының несібесі мол болып, егін бітік шықсын деген тілектестік білдірдік. Енді 500 гектар жер келесі жылға егін егуге егістік жерлері айдалып дайындалды. Сонымен бірге, 15 шақырым каналдар экскаватор арқылы қазылып, су жолдары ашылды. Қазіргі уақытта 10 механизатор, 15 сушы, механик, гидротехник, агроном, егіс бригадирлері шамамен 50 адам таң атысы, кеш батысы санаспастан жұмыс істейді.

Егін бітік шықса, ел ырысы 

<a href="https://kyzylorda-news.kz/">Kyzylorda-news.kz.</a> Осыдан 3-4 жыл бұрын аз қамтылған және көпбалалы отбасылар тобына әлеуметтік қолдау шараларын күшейту бойынша тапсырмалар берілген болатын. Атаулы әлеуметтік көмек көрсетудің жаңа тәртібі жайында елеулі мемлекеттік бастамалар ұсынды. Осыған орай ауылдағы аналардың бизнес-идеясына берілетін қайтарымсыз грант көптің көңілінен шығуда. Бұл азаматтардың өмір сүру сапасын жақсарту және табысын арттыруға септігін тигізеді.Қызылорда облысы кәсіпкерлер палатасының Қазалы ауданындағы филиалы арқылы «Еңбек» нәтижелі жұмыспен қамтуды және жаппай кәсіпкерлікті дамыту бағдарламасы аясында жеке кәсібін ашқысы келетін көпбалалы отбасылар үшін өтеусіз грант берілуде. Оның игілігін көргендер өз ісін бастап та кетті.Гүлжахан Қартабаева көпбалалы отбасыларға қайтарымсыз 500 мың теңге мемлекеттік грант берілетінін ести салысымен “Бастау бизнес” оқу курсына тіркеледі. Кәсіпкер ана өткен жылы бұл қаражат тек қана құрал-жабдықтар сатып алуға жұмсалған болса, биыл құс пен мал алуға болатынына ерекше қуанды. Шилі ауылында туып-өскен оған мал ұстау жат емес-тін. Қазалыдағы қайын жұрты да төрт түлікті түлетіп жүргендер қатарында. Ата-енесі мен жұбайы Жалғас сыртта мал шаруашылығымен айналысқан. Құдай қосқан қосағымен бірге ұл-қыз тәрбиелеп, өсірді. Алайда тоғыз жыл бұрын жан жарынан қапияда айрылған ана ағайын-туыстың арқасында Әйтеке би кентінен үй алды. Қазір жалғыз өзі үлкен отбасын асырап отыр.Бүгінде далалық жерде қара жұмысты қопарып, мал сауып, құрт қайнатқан бесаспап әйел төрт түліктің киесі мен берекесін түсінеді. Мемлекет берген өтеусіз грант 505000 теңгеге екі бие алып, оның өнімін қазалылықтарға бүгінге дейін ұсынып келеді. Түскен қаражатты жылқының жем-шөбіне жұмсайды. Ортақ шаруашылықты жүргізуге балалары көмектеседі. Оларға кәсіп ашып, оны дамытудың қыр-сырын үйретіп, төрт түлікті баптай білуге бейімдеп жүр. Бүгінде Гүлжахан кәсібін ұршықша иіріп, оны ұқсатып, ұлғайтуды қолға алған. Осындай еңбекқор жан берекелі істің дамыту жолдарын тауып, табысын еселеп отыр. Соның арқасында түйе де алып, шұбат пен қымыран ұсынып отырған жайы бар. Ауласынан ашқан шағын қараша үйде жайлаудағы жағдайды жасап қойған кәсіпкерге келушілер де толастамайды. Таң атысы, кеш батысы адам аяғы үзілген емес. Бірі саумал ішсе, екіншілері қымыз қабылдайды. Кейбірі шұбаттан дәм татады. Тынымсыз кәсіпкер сұраныс бойынша құрт та әзірлейді.&nbsp;<blockquote>«Ата кәсіптің түсінген жанға берері мол. Дастарқаныңнан несібе үзілмейді. Ет өнімі мен ағарғанды табиғи тұтынған пайдалы. Кәсіпкерлік ісін жүргізу курсын оқығаннан кейін бизнес сауатым ашылды. Сабақта кіріс пен шығысты қалай есептеп, шаруашылығыңды иіріп әкетудің түрлі жолдары түсіндірілді. Қазір игілігін көріп отырмын. Жылқылардан бөлек түйе және азын-аулақ уақ мал мен тауық асыраймын. Жалқауланбай еңбек етсең күнкөріс көзі табылады»,– дейді ол.</blockquote>Жылда жұмыспен қамтуды қамтамасыз ету және табысын арттыру үшін көпбалалы ауылдықтарға жаңа бизнес-идеяларға қайтарымсыз мемлекеттік гранттардан бөлек, көпбалалы аналар мен мүмкіндігі шектеулі жандар арасында кәсіпкерлікті дамытуға микрокредиттер бөлінеді деп күтіледі. Бұл Гүлжахан Оразғалиқызының үмітін үкілеп отыр. Ол алдағы уақытта бүгінгі шаруасын үлкейтіп, сүтті бие алуды көздеуде.

Саумалды сауда көзіне айналдырған

<a href="https://kyzylorda-news.kz/">Kyzylorda-news.kz.</a> Ұлттық салт-дәстүрімізбен үндесіп жатқан асыл дініміздің құндылықтарын дәріптейтін мешіт мұсылман қауымы үшін қай кезде де киелі орын саналады.Бүгін қасиетті Құрбан айт мерекесінде аудан орталығы - Әйтеке би кентінің шығыс беткейінде асарлатып салынған “Халық” атындағы жаңа мешіттің салтанатты ашылуы өтті.Көпшілік бас қосқан шараға арнайы барған аудан әкімі Мұхтар Оразбаев ізгілікке, мейірбандылыққа шақыратын мешіт қызметінің маңызы зор екендігіне тоқталып, аудан әкімінің “Құттықтауы” мен арнайы сыйлығын табыстады.<blockquote>«Ең әуелі баршаңызды исі мұсылман қауым үшін қасиетті мереке – Құрбан айт мейрамымен шын жүректен құттықтаймын! Міне, осындай ерекше күнде біз Сіздермен «Халық» атындағы мешіттің ашылуына куә болғалы отырмыз. Жүрегі ізгілікке толы жандардың аманатымен, бастамасымен қолға алынған «Халық» атындағы мешіттің бой көтеруіне қарапайым халықтың жасаған еңбегі орасан. «Бір жеңнен қол, бір жағадан бас шығарып» ауызбіршіліктің ерен үлгісін көрсетіп, имандылық үйінің салынуна аянбай тер төккен азаматтарға ерекше алғысымды білдіремін», - деді аудан басшысы.</blockquote>Аталған шарада сөз алған Қызылорда облысының бас имамы Абуов Болатбек қажы асыл дініміздің құндылықтарын дәріптейтін мешіт үйінің жамағатпен көрікті болатынын айтып, жастар үшін ата-ананы сыйлап, құрмет тұтуға үндейтін ілім алуына мүмкіндік жасалғанына қуанышты екендігін жеткізді.Сонымен бірге, «Халық» атындағы жаңа мешіттің бас имамы болып бұған дейін “Әли-Муса” мешітінің бас имамы қызметін атқарып келген Бақытжан Қаниевтың тағайындалғанын айтып өтті.Басқосуда аудандық ардагерлер кеңесінің төрағасы Оразғали Бекбанов та тұрғындарды жаңа ғимараттың ашылуымен құттықтап, жүрек жарды лебізін айтты.Сонымен қатар ҚР ішкі істен министрлігінің Құрметті ардагері, Журналистер одағының мүшесі Беганыш Жақсыбай мен игілікті істің басында жүрген жандардың атынан бір топ азаматтар ыстық ықыластарымен бөлісті.Мұнан соң жаңа мешіт лентасы қиылып, құран оқылып, қонақтар ғимаратпен танысты.Осылайша Әйтеке би кентінен бой көтеріп, заманауи үлгіде салынған «Халық» атындағы мешіт Құрбан айт мерекесінде жамағатқа есігін айқара ашты. Мұнда 700 адамдық қатымхана, неке қию залы, сүндеттеу бөлмелері және 350 адамға арналған асхана жұмыс жасайды.Айта кетейік, мешіттің ашылуына орай ұлттық спорт түрінен сайыстар және құран жаттау жарысы өткізілді. Жеңімпаздар мен жүлдегерлер арнайы сыйлықтармен марапатталды.

Құрбан айт мерекесінде Қазалыда жаңа мешіт ашылды

<a href="https://kyzylorda-news.kz/">Kyzylorda-news.kz.</a> Жаныңа шипа дарытып, тіпті ажал құрсауынан арашалап алатын адам жанының арашашысы дәрігерлер қашанда қоғамда айрықша бағаланады. Елеулі еңбегі мен жылулыққа толы мейірімді қалыппен халықтың ақ батасын алып жүрген қызметкерлер кез келген мақтауға лайық.&nbsp;Бүгінде басы ауырып, балтыры сыздаған жанға демеу, антына адал дәрігерлер ауданымызда жетіп артады. Солардың қатарына Ерболат Жасанов пен Салтанат Қабылованың отбасын қосуға болады. Ерлі-зайыптылар Қазалы теміржол ауруханасында қызмет атқарады. Ерболат дәрігер уролог болса, Салтанат осы аурухананың провизоры. Отбасында Нұрай, Ердәулет, Рамазан және Медина мен Хансұлтан есімді ұл-қыздарын тәрбиелеуде. Қос дәрігер тұрғындар мен ұжымдастары арасында абырой мен беделге ие. Екеуі де ең алдымен адамгершілігі әрі біліктілігімен танылып, өзгелерден озық тұрады.&nbsp;Ерболат мұғалімдер отбасында тәрбиеленсе де әке жолын қумады. Ол өз арманын медицина саласымен ұштастырды. Бала кездегі қиялын 1998 жылы Ақтөбе қаласындағы М.Оспанов атындағы Батыс Қазақстан мемлекеттік медицина академиясында жүзеге асырады. Таңдаған білім ордасында әрбір сабаққа ықыласпен қатысып, оқу орнындағы емдеу ісі факультетін хирургия саласы бойынша бітіреді. Қызылорда облыстық медициналық орталығында хирургия мамандығы бойынша бір жыл интернатурада жүріп, алғашқы тәжірибеден өткен соң жолдамамен Қазалыдағы теміржол ауруханасында дәрігер уролог қызметіне келеді. Қазір білікті маман гемодиализ бөлімінің меңгерушісі лауазымын атқаруда. Яғни созылмалы бүйрек жетіспеушілігімен сырқаттанатындарға қажетті ем-дом жүргізеді.&nbsp; Білікті дәрігердің айтуынша, урология – ерлердің бүйрек, қуық, простатит ауруларын және несеп жолдарындағы тастарды хирургиялық және дәрі-дәрмекпен емдеу саласына жатады.<blockquote>– Бүгінгі күні еркектер денсаулығының басты мәселесіне айналған простатит суықтан және инфекция жұқтырып алудан да болады. Мұндай дертке бір орында ұзақ отыратын жүргізуші, есепші және басқа да кәсіппен шұғылданатын кісілер жиі шалдығады. Простатитке 20-60 жас аралығындағылар жиі ұшырайды. Десек те уақыт өткізіп алмай урологқа уақытылы қаралған дұрыс. Тағайындалған емді дұрыс қабылдағандар одан айыға алады. Жалпы 18-40 жастан асқан ер-азаматтар жылына бір рет урологқа қаралып тұрғаны жөн. Себебі соңғы жылдары ерлер арасында бедеулік белең алуда. Егер ер азамат шаңырақ көтеріп, 6 айда әйелі жүкті болмаса дереу урологтың көмегіне жүгіну керек. Қазір ерлердің көбі намыстанып, дәрігерге көрінбей ем алу мерзімін өткізіп алады. Есесіне олар ұрпақ сүю қабілетінен айырылып қалуы мүмкін, – дейді Ерболат.</blockquote>Ерболат қосымша дәрігер трансфузиолог қызметін жүргізеді. Оның өз міндетіне деген жауапкершілікті жақсы сезінетінін Қазалы теміржол ауруханасының бас дәрігері Құбыл Ршымбетовтың пікірінен айқын аңғардық.<blockquote>– Ерболат Жасанов ауруханада жатқан урологиялық науқастарға өз бетінше ота жасайды. Соның арқасында ересектер мен балалар арасында диспансерлік науқастардың есебі азайып, санитарлық ағарту жұмыстары жақсарған. КАП-ЭЛМ-01 «Андро-Гин» аппаратымен простатиттің барлық түрін: созылмалы везикулит, эрекцияның бұзылысы, ер бедеулігін емдейді. Бүгінде Ерекең Арал, Қазалы, Қармақшы аудандарының созылмалы бүйрек жетіспеушілігінің науқастарына аптасына төрт сағаттық жоспарлы гемодиализ сеансын жасап, жұртшылықтың алғысына бөленіп жүр. Әріптестері мен халық арасында беделі жоғары, сауатты маман саналады, – дейді бас дәрігер.</blockquote>Салтанат Егізбайқызы да М.Оспанов атындағы Батыс Қазақстан мемлекеттік медицина академиясында фармацевт мамандығы бойынша білім алды. Қазір ауруханадағы емделушілерге дайындалған дәрілердің сапасын тексеріп, бөлімшелерге қажетті мөлшерін босатады. Жұмысын тиянақты орындайтын маман он жылдан аса медицина саласында сүбелі үлес қосып келеді.&nbsp;Қай кезде де бірінші байлық – денсаулық екені заңдылық. Солай бола тұра бұл қағиданың орындалуы үшін білікті мамандардың да рөлі ерекше екенін ескерген жөн. Сондықтан түн ұйқысын төрт бөліп, науқастардың айығуына себепші ақ халаттылардың халық денсаулығын жақсарту жолында қайраттары қажымасын дейміз.

Жұбы жазылмайтын шипагерлер

<a href="https://kyzylorda-news.kz/">Kyzylorda-news.kz.</a> Өткен ғасырдың алпысыншы жылдарының соңында Жаңақазалы поселкесіндегі №420 қазақ орта мектебіндегі бастауыш класта оқып жүргенімізде Қобылаш Жаймұратов ән сабағынан дәріс берді. Зұлмат жылдарға сәйкес келген қызылша шешегінің ізі ме, әлде басқа себебі болды ма оның жүзіндегі қара қошқыл, бұжырлы дақтар көңілімізге қорқыныш ұялататын. Кейін көзіміз үйренісе келе түсі тым қара көрінген ағайдың жүрегінің соншалықты ақтығы, мейрімділігі, бір балаға дауыс көтеруді білмейтін жұмсақтығы ештеңені елетпей, бізді ол кісімен етене жақын қылып жіберді. Кез келген музыкалық аспапты шебер меңгерген біліктілігі, бауырына қыса отырып шертетін мандолинасының әуезді дауысы арасында бәрімізді айналасына жинап алатын. Сондай күндердің бірінде бәрімізді қасына шақырып сөзін бастады:– Е-е, балалар, сендер қазір ештеңеге мұқтаж емессіңдер, не ішем, не жеймін, не кием демейсіңдер. Ал білесіңдер ме, ата-әжелерің мен әке-аналарыңның, жалпы қазақ атаулының басынан небір нәубеттің өткенін.&nbsp;1931 жылдан күшіне мінген ашаршылық алапаты басталғанда жасөспірім жігіт едім. Мұны сендерге айтпас та едім, бірақ бала болсаңдар да өмірдің күнгейі мен көлеңкесін, ащысы мен тұщысын жүректеріңмен сезініп, содан тәжірибе жинақтап, нәтиже шығаратын азамат болып өскендерің дұрыс болар деген оймен айтып отырмын.&nbsp;1933 жылдың соңына қарай ауылдарды аралап, аштықтан аман қалған үлкендерді, әсіресе балаларды талғажау етерлік азық беріп, шамамыз келгенше әлдендіретін, қайтыс болғандарын жерлейтін комиссияның құрамында жұмыс жүргіздік. Сонда көрген сұмдықтарды ешқашан ұмытпаймын. Мысалы, сендер қазір көшеде кездейсоқ өліп жатқан ит пен мысықты көргеннің өзінде жандарың ашып біразға дейін ұмыта алмай жүресіңдер ғой. Ал ол кезде адамдар, үлкен де, кіші де, тіпті емізулі нәрестеге дейін кез келген жерде өліп жатты. Біз оларды арбамен жинап, бір қабірге топтап көметінбіз. Тірі қалғандарының аузына су тамызып, аздап быламық жұтқызып тиісті жерге жібереміз. Сондай азапты күндердің бірінде шеткерілеу орналасқан жан-жағы ашық-тесік шағын, жұпыны киіз үйдің түндігінен түтін шығып жатқанын байқап кіре кетуді жөн көрдік. Ішке кірсек, бір қарт кісі ортаға қойған қазанның астына от жағып отыр екен. Ішінде ет қайнап жатыр. Бүлкілдеп қайнап жатқан қазанның ішінен жас баланың білегін, қарт кісінің қасында аузы ашық тұрған дорбадан баланың басы мен кесілген өзге еттерін көргенде бұған еш амал жасай алмайтынымызды сезіп кейін шықтық. Мінекей балалар, осыдан өткен сұмдық бола ма?!Ағайдың айтқан әңгімесі бала көңілімізді, жан-дүниемізді астан-кестең етсе де естігеніміз дұрыс болды. Қазақтың басынан өткен ашаршылық, нәубет, қолдан жасалған қырғын, кеңестік саясаттың сансыз сұмдығы айтылуы, жазылуы, зерттелуі, ойсыраған орнын толтыруға мемлекет тарапынан әлі де болса нақты қадамдар жасалып, күш салынуы керек. Себебі, бұл болашақ ұрпақ үшін зор тағлым аларлық сабақ болуы тиіс тарих қатпары деп білемін.

Қазақты қайыстырған қасірет

<a href="https://kyzylorda-news.kz/">Kyzylorda-news.kz.</a> 2014 жылдан бастап,жүзеге асырыла бастаған «Серпін – 2050» жобасы елдегі ең танымал әлеуметтік бастамалардың бірі. Қазірхалықтың игі жобаға деген қызығушылығы орасан зор. Ол жастардың сапалы білім алып, тұрақты жұмыс табуына зор мүмкіндік берері сөзсіз. Осы кезде «Серпін – 2050» жобасы қанатын кеңге жаюда.&nbsp;Десек те көпшіліктің көкейінде әліде бірқатар сауал бар. Олар әсіресе, жобаға қатысу шарттары, оқу орындары мен мамандықтар, білім гранттарының қалай бөлінетіндігі төңірегінде болып отыр.&nbsp;Серпіліс беретін мүмкіндіктерБүгінде мемлекетте кәсіби білім алған мамандардың жетіспеушілігі сезіледі. Сол себепті деосындай жүйенің жандануына ел үлкен үміт артады. "Серпін – 2050" әлеуметтік жобасы еңбек нарығындағыөңірлік үйлеспеушілікті теңдестіруге және жастарға кәсіби білім алуға қолжетімділікті қамтамасыз етуге мүмкіндік береді.Қабылданған жоба бірінші кезектемыңдаған жас бойжеткен мен бозбалалар үшін сапалы тегін білім алуымен ерекшеленеді. Бұл жұмыс берушілермен талап етілген кәсіпті игеруге мүмкіндік беретін білім және түлектерді міндетті түрде жұмысқа орналастыру да негізгі шарттарынан саналады."Серпін – 2050" жобасын іске асыру 2014-2015 оқу жылы республиканың 25 колледжінде 37 мамандық бойынша басталды. Мемлекеттік тапсырыс шеңберінде солтүстік өңір колледждерінде 1000 түлек оқытылды.Келесі оқу жылындааталған тапсырыс арттырылып, 1200 орынды құрады. Сонымен қатар жұмыс берушілердің белгілі бір кәсіби салалардағы мамандарға мүдделі болуына сәйкес бағдарлама бағыттары кеңейтіледі. Талапкерлер "Тігін өнеркәсібі және киімді модельдеу", "Темір жолдарының құрылысы, жол және жол шаруашылығы", "Мұнай және газ кен орындарын пайдалану", "Жол қозғалысын ұйымдастыру", "Өрт қауіпсіздігі" сияқты қызықты әрі талап етілген мамандықтар бойынша білімін шыңдай алады.Әрбір өңірде талапкерлер қажетті ақпаратты ала алатын "Серпін – 2050" штабтары ашылған. Жастардың кәсіби және мобильділілігін арттыру мәселелерін жедел және уақытылы басқару үшін Үйлестіру кеңесі құрылған.Оңтүстіктен солтүстікке қарайБағдарламаға бай тәжірибесі және тарихы бар колледждер қатысады. Сондай оқу мекемелерінің бірі – Қостанайға қарасты Жітіқара қаласындағы политехникалық колледжін бітірген Сыр өңірінің тумасы Дастан Рысбеков өз таңдауына өкінбейді. Үздік материалдық-техникалық қоры мен педагогикалық қызметкерлерінің білікті құрамының арқасында колледж «Серпін – 2050» жобасына қатысқан. Мұнда бірінші курстан бастап оқуды бітіргенге дейін өндірістік жағдайларға бейімделген мамандарды мақсатты дайындау жүргізілді. Таңдаған мамандық бойынша білім берудің дуальді жүйесі енгізілген. Оқу жоспарлары мен бағдарламаларында уақыттың басым бөлігі кәсіпорындардағы тәжірибелік оқытуға бөлінген. Колледжде студенттерді зерттеу және ғылыми-тәжірибелік жұмысқа жобаларды дайындау, конференцияларда сөз сөйлеу, зияткерлік ойындар, пікір-талас сияқты оқыту нысандары арқылы тарту үшін жағдай жасалған. Студенттер конкурстар мен жарыстарға белсенді атсалысты.Дастанның айтуынша, колледжде бағдарламаға қатысатын оңтүстік өңірлердің студенттерімен кездесуге асқан жауаптылықпен және ынтамен дайындалды. Барлық грант иегерлері тұрмысқа жайлы жатақханаға жайластырылды. Бөлмелер жаңа жиһазбен жабдықталып, онда қолайлы тұру үшін қажеттінің бәрі: теледидар және төсек-орын тысынан бастап ас-үй заттарына дейін орналастырылды. Жатақханада студенттердің өзекті мәселелерін шешу үшін күнделікті әкімшілік кезекшілік белгіленді.<blockquote>– Біздің кезде «Серпін – 2050» бағдарламасында әлеуметтік жақтың мұқият ойластырылғанын атап өтуге болады. Соның арқасында студенттерге арналған асханада 3 реттік тегін тамақтану ұйымдастырылды. Әрбір студентке сыртқы қысқы киімді сатып алу үшін 64 820 теңге мөлшерінде ақшалай қаржы аударылды. Оқушылар үшін демалыс уақытында екі жаққа қарай жол жүру ақысы бөлінді. Ай сайын шәкіртақымызды да уақытылы алып тұрдық. Шүкір, жаман болмадым. 2 курста жүріп, Мәдениет сарайында жарты ставкамен жұмыс істедім. Қазір осында көркемдік жетекшімін. Шаңырақ көтердім. Жан жарым Жанеркемен екі ұл тәрбиелеудеміз. Қызмет орнымның ықпалымен екі бөлмелі пәтерге қол жеткіздім. Бұл бағдарламаның берері көп. Жастар қорықпай, солтүстікке келіп, қазақыландыруға үлес қосса, нұр үстіне нұр. Жұмысқа да орналасуға еш кедергі жоқ, – дейді жас маман.&nbsp;</blockquote>«Серпін – 2050» бағдарламасының игілігін көрген қатысушылар қатарында қазалылық әпкелі-сіңлілі Жансая мен Ақмарал Асановалар да бар. Ақмарал ұзақ күткен жоғары білімін растайтын дипломын қолына алды. Ол Шәкәрім атындағы Семей мемлекеттік университетінің филология факультетін қызыл дипломмен тәмамдады.&nbsp;<blockquote>– «Серпін – 2050» бағдарламасы менің бағымды ашты десем артық айтқандық емес. Осыдан төрт жыл бұрын ҰБТ-ғы көрсеткішім Алматы, Астана қалаларындағы жоғары оқу орындарына қабылдануға жетпей қалды. Сол кезде ата-анам «Серпін – 2050» бағдарламасымен білім алуға кеңес берді. Дереу шешім қабылдап, оқуға аттандым. Бұйыртса, 4 жыл алған білімді Қызылордада жалғастырып, магистратураға құжат тапсыруды ойластырудамын, – деді Ақмарал Асылбекқызы.</blockquote>Бағдарламаның берері көп&nbsp;«Серпін – 2050» жобасы оңтүстік өңірлерден шыққан студенттерге өзінің әлеуетін жүзеге асыру үшін қолға алынды. Бағдарламаны әзірлеудің мақсаты – демографиялық және көші-қон үдерістерінің ықпалына бейім Қазақстанның еңбек нарығын дамыту болды. Қазіргі таңда Алматы, Жамбыл, Қызылорда, Маңғыстау, Оңтүстік Қазақстан облыстарында бүгінгі күні бала туу деңгейі жоғары, көшіп келушілер көп. Мұның барлығы жұмыссыздық мәселесін тудырады. Әлеуметтік нысандар, үй, мектеп, балабақша, жетпейді. Қанша адам оқу бітірсе де жұмыссыз жүр. Мектеп бітіргендер коллдеждерге оқуға түсе алмайды – себебі үміткерлер көп болғасын, орын жетіспейді. Еңбек күші артқан соң кадрлық сұраныс аз болады. Бұл – нарық экономикасының заңдылығы. Оқуды бұрын бітіргендер жұмыссыз жүргендіктен грант та аз бөлінеді. Керісінше еліміздің кейбір өңірлерінде қадр тапшылығы өте өзекті болып тұр.&nbsp;Өз кезегінде еліміздің солтүстік өңірлерінде, керісінше еңбек мамандарының жетіспеушілігі бар. Мұның себебі – туудың төмендігі және сыртқы көші-қон. Демек өңірлер болашақта да еңбек ресурстарының жетсіпеушілігін сезінетін болады. Осындай үдерістер кезінде өңірлік теңгерімсіздік, бірінші кезекте адамдардың республика аумағында біртекті қоныстанбауы күшейеді. 2021 жылға дейін еңбек нарығына жаңа қызметкерлер ағынының өткен ғасырдың тоқсаныншы жылдары туудың төмен болуына орай төмендеуі күтіледі. Көші-қон ағындарын тиімді басқару есебінен ғана демографиялық құлдырауды өтеу және еңбек ресурстарының орнын толтыру мүмкін. Бұдан басқа, жыл сайын елдегі мектептерден 11-сыныпты бітірген қаншама түлек оқумен қамтылмай, еңбек нарығына біліктіліксіз шығады. Солардың көбі оңтүстік өңірлерден. Ал бүгінгі міндет – оқушыларды кәсіби білім алуға ынталандыру.Бүгінде жастарға мемлекеттің әлеуметтік-экономикалық дамуы үшін зор жауапкершілік артылуда. Сол үшін кешегі студенттерге дипломын алған соң біліктілігі жоғары жұмысшылар қатарын толықтыру бағытында барлық қажетті мүмкіндік қарастырылуда. Ал "Серпін – 2050" жастарға оқу және жұмысқа орналасу үшін бірден-бір мүмкіндік.

Ел жастары – индустрияға

Ауыл – ел бесігі, өркениет өлшемі, жылдар жемісі

<a href="https://kyzylorda-news.kz/">Kyzylorda-news.kz.</a> Ауылдың таза ауасын, тыныс-тіршілігін, құрт-майын сағынбайтын жан бар ма? Біз де ауыл өмірімен тыныстап, танысып қайту үшін жақында Ақжар ауылына ат басын бұрған едік.&nbsp;Ақжар ауылына жаңа әкім келді дегеннен жұмыссыз жүргендер әкімдікке қарай ағыла бастады. Бәрінің тілегі біреу. Үміті одан да көп. Іскер әйел Нұржамал Бектайқызының жоқтан бар жасайтынын білсе керек. Күніне бірнеше адам есік қағып, өтініш айтып келгені ойландырған Ақжар ауылының жаңа әкімі білек сыбанып, іске кірісті. Қалайда керек кәсіптің көзін тауып жұмыс көзін ұсыну керек. Алдына келген адамның өтінішін жауапсыз қалдырмады. Қадір-қарекетінше жәрдемдесіп келеді. Тіпті өзі отырған ғимараттың бос тұрған үлкен бөлмесін тігін шеберханасы етіп жасақтауды ұйғарады.Ол үшін ауыл, аудан емес, қала, даладан тапсырыс алып, бірі – перде, енді бірі – қыз жасауын дайындайтын қос кәсіпкер келіншекпен келісті. Келісті де қолынан іс келетін шеберлердің басын біріктірді. Осылайша аз уақыттың ішінде ауылда «Ақжар» тігін цехы ашылды. Төсек жабдықтарын дайындауға негізделіп құрылған цехтың алғашқы үлкен тапсырысы шаруашылықтан түседі. Егіншілерге арнап 200 дана жұмыс киімін тігуге тапсырыс алып содан қарқынды жұмысын бастайды. &nbsp;Тігіншілерге ай сайын төленетін жалақы бекітілген. Тапсырыс алып, жұмыстың жүруін қадағайтын әлгінде айтқан қос кәсіпкер келіншек Нұргүл Әбішева мен Сәуле Сатыбалдиева.Бұған дейін де қармақшылықтарға соңғы үлгідегі пердесімен белгілі Нұргүл Ғалымжанқызы 3 жыл бұрын «Еңбек» бағдарламасы арқылы қайтарымсыз несие алып, кәсібін бастаған. Үйінің бір бөлмесіндегі шеберханада екі адамды жұмыспен қамтып отырды. Бала кезден сурет салуға машықтанып, қолөнермен айналысуды көксеген қала қызы Ақжар ауылындағы берекелі отбасының келіні. 3 баланың анасы. «Ауылда мүмкіндік жоқ» демей өзінің қолынан шыққан дүниелерді, сәнді перделер мен көрпе-жастықты жарнамалай білетін ол әлеуметтік желі арқылы танымал.Қызылордалық Сәуле Тұрсынбекқызы да осы ауылға келін. Құрақ көрпені дүкен сөресіндегідей мінсіз жасайтын оның қолынан қанша арудың жасауы шықты. «Ауылшаруашылығын қаржылай қолдау қорынан» 1 млн теңге несие алып, құрылғы, қажетті заттарын түгендеген тігіншінің тұрақты тұтынушылары көп. Тапсырыс жиі түскен соң бір өзі үлгермейді. «Жұмыла көтерген жүк жеңіл» деген. Енді шеберханада барлығы бірлесіп істейтін болады. Ауыл тұрғындары да үй-үйді аралап тігінші іздемей, бәрін бір орталықтан табады.Он саусағынан өнер тамған келіншектерді әңгімеге тартқанда ә дегеннен сүйікті кәсібін дөңгелетіп, алаңсыз жұмыс істеуге мүмкіндік сыйлаған, үнемі қолдау білдіретін отбасыларына разылықтарын жеткізді.<blockquote>«Қолдан іс келгенімен тұрақты жұмыс болмады. Біраз жылдан бері үйде отырып қалдық. Қазір шеберханада сүйікті ісімізбен айналысамыз. Білмегенімізді үйреніп жатырмыз. Біз – бір ұжымбыз. Осындай мүмкіндік сыйлаған ауыл әкіміне алғысымыз шексіз», – дейді Салтанат Ермаханова.</blockquote>Тігін шеберханасы әр ауылға керек-ақ. Осылайша ауылдың бірқатар қыз-келіншектерің тігіншілікпен табыс тауып отырған жайы бар. Тігіннің тілін түсінетін мамандар бұл уақытқа дейін де үй жағдайында тігіншілікпен айналысып, көптің көңілінен шығып жүрген. Тірлігі тиянақты тігіншілердің ұқыптылығына тәнті болдық. Олар тұрғынның кез келген тапсырысын орындауға, олардың риза болған көңілді жүзін көруге асық екенін жеткізді. Жылы жүздері мен ақжарма әңгімелерінен олардың жұмысына деген ыстық ықыласы мен сүйіспеншілігі анық байқалады. Жұмысыңды шынайы беріліп сүйсең ғана берекелі табыс болатыны белгілі. Қолыңнан келетін іс кәдеңе жараса тіпті керемет емес пе?<blockquote>«Тігін цехы ашылғалы 3 жылдан асты. Осы уақыт ішінде халық сұранысына сай қолжетімді бағадақызмет көрсетіп келеміз. Қазір тапсырыс түрленуде. Қолдан келгенше тұрғынның сұраған дүниесін үдесінен шыға орындап беруге тырысамыз. Қолжетімді бағада әрі сапалы өнім дайындау үшін барымызды саламыз. Бүгінде төсек-орын тысы, көрпе жамылғысын, жастық тыстарын тігу үстіндеміз. Өз ауылымызбен қатар, іргелес елді мекендерден де тапсырыс аламыз. &nbsp;Сондай-ақ, шаруашылық жұмысшыларына арналған арнайы форма дайындайтынымыз бар», – дейді тігінші Нұргүл Әбішова.</blockquote>Тапсырыс берушінің талғамынан шығу үшін цех жақында түрлі матамен толықтырылған. Сүйікті ісіне білек сыбана кіріскен тігіншілердің ауыл әкіміне деген алғысы шексіз. Сонымен қатар, бұл кісінің жайсаң мінезі мен жомарт жүрегіне гүлденген ауыл тұрғындарының ризалығы бір бөлек. Қажетті затын алыстан іздемей ауылдан табуға болатын, жаңа бастамаларға, жағымды жаңалыққа толы ауылдан бой көтерген мақсаты айқын тігін цехының тасы өрге домалайтынына сенім мол.

Ауылдағы шағын шеберхана

<a href="https://kyzylorda-news.kz/">Kyzylorda-news.kz.</a> Бүгін Қазалы ауданының әкімі Мұхтар Оразбаевтың төрағалығымен әкімдік және аппарат мәжілісі өтті. Мәжілісте бірқатар маңызды мәселелер талқыланып, олардың орындалуы сөз болды.Жиында ең бірінші аудандық маңыздағы автомобиль және елді мекен ішілік жолдардың жай-күйі талқыланды.&nbsp;Бұл мәселе жөнінде аудандық тұрғын үй коммуналдық шаруашылығы, жолаушылар көлігі және автомобиль жолдары бөлімінің басшысы Мұрат Әбсұлтанов баяндама жасап, атқарылып жатқан жұмыстар жөнінде айтып берді.<blockquote>«Биыл ауданымызда жол жөндеу жұмыстары қарқынды жүріп жатыр. Өткен жылдан келе жатқан өтпелі нысандардың да құрылыс жұмыстары жүргізілуде. Одан бөлек жаңадан басталып жатқан жолдар да жетерлік. Осы жұмыстардың барлығы сапалы, әрі мерзімінде аяқталуы тиіс. Халық ең алдымен жолдың сапасына қарай жұмысымызға баға беретін болады», - деді аудан басшысы.&nbsp;</blockquote>Сондай-ақ, аудандық тұрғын үй коммуналдық шаруашылығы, жолаушылар көлігі және автомобиль жолдары бөлімінің басшысы Мұрат Әбсұлтановқа аудан көлемінде жүргізіліп жатқан барлық жол құрылысын бақылауға алуды тапсырды. Оған қоса Әйтеке би кентінің әкімі Қайрақбай Орынбасаровқа кент ішіндегі асфальтталған көшелердің күтіп ұсталуы назарда болуын айтты.&nbsp;Ал аппарат мәжілісіндегі алғашқы мәселе бойынша аудан әкімінің орынбасары Жалғас Сүйеубаев хабарлама жасады. Жалғас Оңғарұлы аудандағы әлеуметтік-мәдени нысандардың жай-күйі туралы айтып берді.&nbsp;Баяндамадан соң Мұхтар Әуесұлы аудандағы кейбір нысандардың жағдайы көңіл көншітпейтінін тілге тиек етті. Оған қоса тазалық және абаттандыру жұмыстары бойынша қала, кент және ауылдық округ әкімдерін қатаң сынға алды. Сондай-ақ, кеткен кемшіліктер бойынша тиісті жұмыстарды күшейтуді тапсырып, барлығы бақылауда болатынын жеткізді. &nbsp;Аппарат мәжілісіндегі екінші мәселе - 2023 жылдың 1 шілдесіне қаржы иегеру болжамы болды. Бұл жөнінде аудандық экономика және қаржы бөлімінің басшысы Әліби Әбиев хабарлама жасады.Аудан басшысы бірқатар бөлім басшылары, кент пен ауылдық округ әкімдеріне қаржының мақсатты игерілуі жөнінде сауал жолдап, Әліби Берікұлына болжамның орындалуын қатаң бақылауға алуды тапсырды.Мәжілісті қорытындылаған аудан әкімі Мұхтар Оразбаев тиісті жұмыстарды жасауға әлі де мүмкіндік беріліп отырғанын сөз етіп,&nbsp; 6 ай қорытындысымен жыл басынан бері берілген тапсырмалар бойынша тиісті шешімдер қабылданатын айтып өтті.&nbsp;

Қазақстан және Қызылорда облысының жаңалықтары