<a href="https://kyzylorda-news.kz/">Kyzylorda-news.kz</a> &nbsp;Бүгін — Дүниежүзілік театр күні. Сахна саңлақтары үшін айрықша мәнге ие айтулы дата. Бұл туралы ҚР Премьер-министрінің орынбасары — Мәдениет және ақпарат министрі Аида Балаева <a href="https://kaz.inform.kz/news/balaeva-kazakstanda-teatr-onerne-degen-kizigushilik-artip-keled-a250a1/">айтты.</a>Оның сөзінше, театр — тәрбие алаңы, талғамды қалыптастыратын, ой мен сезімді тербететін, қоғамға өзін және өз дәуірін тереңірек тануға мүмкіндік беретін бірегей өнер кеңістігі.<blockquote>— Мемлекет басшысы Қасым-Жомарт Тоқаев атап өткендей, театрлардың дамуы — кез келген елдің мәдени деңгейінің маңызды көрсеткіші. Бүгінде Қазақстанда театр өнеріне деген қызығушылықтың артып келе жатқаны анық байқалады. Көрермен сұранысы да барған сайын мазмұнды әрі талапшыл сипатқа ие болуда. Әсіресе, сахна өнеріне құштар жандардың арасында жастардың көп болуы көңілге ерекше қуаныш ұялатады, — деді Балаева.</blockquote>Министр атап өткендей, бүгінде елімізде 70-тен астам театр жұмыс істейді, олардың 57-сі — мемлекеттік.<blockquote>— Тек 2025 жылдың өзінде мемлекеттік театрларда 410 премьера сахналанып, 539 гастрольдік сапар ұйымдастырылды. Былтыр көрермендер саны 2,8 миллионнан асты. Ал, 2026 жылдың алғашқы тоқсанында республикалық театрлар 170 мыңнан астам көрерменге қызмет көрсетті. Бұл көрсеткіштер театрдың елімізде сұранысқа ие, өміршең әрі халыққа жақын өнер екенінің айқын дәлелі, — дейді ол.</blockquote>Аида Балаева осы ретте мәдениет пен тарих мәселелерінің елдің Ата Заңында берік құндылық ретінде бекітілуі де ерекше маңызға ие екенін алға тартты.<blockquote>— Жаңа Халықтық Конституцияда мемлекеттің қызметінің іргелі қағидаттарының қатарында ұлттық мәдениетті қолдау және тарихи-мәдени мұраны сақтау міндеттері айқын көрініс тапқан. Бұл Қазақстан үшін мәдениет қосалқы сала емес, қоғамдық дамудың және ұлттық бірегейліктің негізгі тіректерінің бірі екенін көрсететін маңызды бағдар. Сонымен қатар Конституцияда тарихи-мәдени мұраға ұқыпты қарау, тарих пен мәдениет ескерткіштерін сақтау әр азаматтың міндеті ретінде бекітілген. Бүгінде қазақстандық театрлар жаңа қойылымдарымен көрерменді қуанта отырып, халықаралық сахналарда ел абыройын асқақтатып келеді. Олар түрлі фестивальдерге қатысып, жоғары бағаларға ие болып, мәдени байланыстарды кеңейтуге өз үлесін қосуда. Осы айтулы күні театр өнерінің барлық өкілдерін Дүниежүзілік театр күнімен шын жүректен құттықтаймын! Сіздерге шалқар шабыт, шығармашылық табыс, өнер жолында жаңа жетістіктер тілеймін! — деп түйіндеді ведомство басшысы.</blockquote>Фото: Мәдениет және ақпарат министрлігі

Балаева: Қазақстанда театр өнеріне деген қызығушылық артып келеді

<a href="https://kyzylorda-news.kz/">Kyzylorda-news.kz</a> &nbsp;Бүгін Наурызнама онкүндігі аясында «Ұлттық спорт күні» кең көлемде атап өтіліп, аталған іс-шараға аудан әкімі Берік Сәрменбаев, аудандық мәслихат төрағасы Ержан Әжікенов, аудандық ардагерлер кеңесінің төрағасы Мұса Келдібаев, аудандық Қоғамдық кеңес төрағасы Марат Еспенбетов, аудандық мәслихат депутаты Алмас Есназар және ардагерлер мен спортшылар қатысты.<blockquote>– Мемлекет басшысы Қасым-Жомарт Кемелұлы Тоқаев «Спорт дегеніміз – денсаулық, рухтың күштілігі, отансүйгіштік. Қазақ ұлттық ойындары - қазақ мәдениетінің ажырамас бөлігі. Олар еңбек пен рухани қызметтің жаңғырығын біріктіреді» деп атап өтті. Бүгінгі «Ұлттық спорт күні» – бабадан қалған асыл мұраларымызды жаңғыртуға, бұқаралық спортты дамытуға, сонымен қатар жастарды салауатты өмір салтын ұстануға шақыратын ерекше күн. Біздің атақты спортшыларымыз, ұлттық ойындарда топ жарған жерлестеріміз – ел мерейін асырып, халқымыздың намысын қорғап жүр. Қазақ күресі, көкпар, бәйге, аударыспақ, тоғызқұмалақ, асық ату сынды ұлттық спорт түрлері біздің ұлттық болмысымыздың ажырамас бөлігі. Ел Президентінің тапсырмасымен, Үкіметтің және облыс әкімі Нұрлыбек Машбекұлы Нәлібаевтың қолдауымен аймағымызда спорттың бұқаралық сипатын дамытуға ерекше мән берілуде. Облыс орталығында "Тенниc орталығы" пайдалануға берілді. Заманауи талаптарға сай келетін 11 мың орындық жаңа стадион салтанатты түрде ашылды. Соңғы үш жылда өңірде 20 спорт кешені салынып, «Ауыл – ел бесігі» бағдарламасымен тағы 6 спорт кешені пайдалануға берілді. «Қазақстан халқына» қорының демеушілігімен мүмкіндігі шектеулі жандарға арналған дене шынықтыру-сауықтыру кешені бой көтерді. Ұлттық спортты дамыту, оны өскелең ұрпаққа кеңінен насихаттау – біздің басты міндетіміз. Себебі, ұлттық ойындар – тек спорт қана емес, ол – халқымыздың рухани құндылығы, жастарымызды тәрбие мен тәртіпке баулитын маңызды құрал. Бүгінгі жарыстарда сынға түсетін барлық спортшыларға сәттілік тілеймін! Ұлттық спортымыздың мәртебесі арта берсін! – деді Берік Әбдіғаппарұлы.</blockquote>Мерекелік шарада қазақша күрес, асық ату, тоғызқұмалақ, арқан тартыс, бес тас секілді ұлттық спорт түрлерінен жарыстар ұйымдастырылды. Шараға жасөспірімдерден бастап, кәсіби спортшылар мен ұлттық ойын жанашырлары да қатысып, өз өнерлерін көрсетті. Сондай-ақ, іс-шара барысында ұлттық дәстүр дәріптелді.Фото: Сырдария ауданы әкімінің баспасөз қызметі

Ұлттық спорт – ұлт рухының айнасы

&nbsp;Мемлекет басшысы Қасым-Жомарт Тоқаев қазақстандықтарды Ораза айт мерекесімен құттықтады.Қадірлі отандастар! Ораза айт мерекесі құтты болсын!Бұл – бүкіл мұсылман қауымы үшін мән-маңызы ерекше, қасиетті мереке. Осы мейрамда рухани тазару мен парасаттылық, сабырлық пен қанағатшылдық, өзара сыйластық пен тілектестік, жанашырлық пен жақсылық құндылықтары дәріптеледі. Отыз күн ораза тұтқан жұрт иманын байытып, кемелдікке ұмтылады. Төзімін шыңдап, төңірегіне қамқорлық танытады. Игі істерге ұйытқы болып, мұқтаж жандарға қол ұшын созады. Ата дәстүріміз бен асыл дініміз елдің бірлігін нығайтып, қоғамның берекесін арттыратын игі амалдар жасауға үндейді. Биыл Ораза айт мейрамы Наурыз мерекесімен қатар келіп, ел дамуындағы жаңа тарихи кезеңнің жаршысына айналды. Мұның символдық мәні зор. Қазақстан халқы Жаңа Ата заңды қабылдап, жарқын болашаққа, Әділеттілік пен Өркендеуге бастайтын жолды таңдады. Конституциялық реформаны жаппай қолдау арқылы ұлт тарихының жаңа парағын ашты. Баршаңызға зор денсаулық, бақ-береке, толайым табыс тілеймін!Еліміз аман, жеріміз тыныш болсын! Ораза айт қабыл болсын!, – деді Президент.Фото: Ақорда

Президент Ораза айт мерекесімен құттықтады

Қадірлі жерлестер!Баршаңызды қасиетті Ораза айт мейрамымен құттықтаймын!Татулық пен бауырмалдық, жақсылық пен игілік салтанат құратын осы қастерлі мерекенің барша мұсылман қауымы үшін орны бөлек. Биылғы Ораза айттың Наурызнама онкүндігімен сәйкес келіп, Ұлыстың ұлы күні қарсаңында тойлануы оның мән-маңызын арттыра түсті.Мемлекет басшымыз Қасым-Жомарт Кемелұлы «Рамазан айында имандылыққа, рухани тазаруға ұмтылған жұртымыз Айт күні ақ дастархан жайып, қонақжайлық көрсетеді. Бір-біріне ізгі тілегін арнайды. Мұқтаж жандарға көмек қолын созып, қамқорлық танытады. Сол арқылы адамгершілік құндылықтар қоғамымызда терең орныға түседі», – деп атап өтті.Ұлық мерекеде жасалатын игі амалдар жұртшылықты ізгілікке үндейді, жақсы істерге жұмылдырады. Бұл халқымыздың береке-бірлігін нығайтып, ырыс-ынтымағын арттырады. Ораза айты бүгінде діни ғұрыптармен ғана емес, ұлттық дәстүрлерімізбен де біте қайнасып кеткен.Қасиетті мерекедегі шынайы ниеттеріңіз, дұға-тілектеріңіз қабыл болсын! Әр отбасына амандық, мықты денсаулық пен бақ-береке тілеймін!

Облыс әкімі Н. Нәлібаевтың Ораза айт мейрамымен құттықтауы

<a href="https://kyzylorda-news.kz/">Kyzylorda-news.kz</a> &nbsp;Сыр өңірінде «Наурызнама» онкүндігінің алғашқы шаралары 14 наурыз – Көрісу (Амал) мерекесін атап өтуден басталды.Бүгін Қызылорда қаласындағы Aray City Mall ойын-сауық орталығында Қызылорда облыстық филармониясы ұжымының «Көктеммен келген көрісу» атты мерекелік концерті ұйымдастырылды.&nbsp; Мерекелік бағдарлама барысында филармония өнерпаздары халық әндері мен ұлттық нақыштағы шығармаларды орындап, жиналған көрерменге көтеріңкі көңіл күй сыйлады.Шара аясында қала тұрғындары мен қонақтарына «Бауырсақ пати» ұйымдастырылып, ұлттық дастарқаннан дәм ұсынылды. Көпшілік бір-бірімен көрісіп, ақжарма тілектерін айтып, амал мерекесінің мазмұнын айшықтай түсті.Ұлттық салт-дәстүрді дәріптеген бұл мерекелік басқосу тұрғындардың рухани бірлігін нығайтып, Наурыз мейрамының мән-мағынасын кеңінен насихаттауға бағытталды.

Сыр елінде «Наурызнама» онкүндігі Көрісу күнімен басталды

<a href="https://kyzylorda-news.kz/">Kyzylorda-news.kz</a> Бүгін «Өнер орталығында» Қазақстанның еңбек сіңірген қайраткері, Қазақ ұлттық консерваториясының құрметті профессоры, жырау Алмасбек Алматовтың 70 жас мерейтойына арналған «Жыр керуен» атты шығармашылық кеш өтті.Оған облыс әкімі Нұрлыбек Нәлібаев, жазушы, тарихшы-этнограф, Қазақстанның еңбек сіңірген қайраткері Қойшығара Салғараұлы, Халық жазушысы, Қазақстанның еңбек сіңірген қайраткері, Айтыс ақындары мен жыршы-термешілердің халықаралық одағының төрағасы Жүрсін Ерман, ақын, Парламент Мәжілісінің депутаты Жанарбек Әшімжан, Алмасбек Нұрмаханұлының үзеңгілес әріптестері мен елімізге белгілі шәкірттері, жауапты сала басшылары, зиялы қауым өкілдері қатысты.Аймақ басшысы мерейтой иесінің төл өнерді өркендетуге қосқан үлесін атап өтіп, барша Сыр жұртшылығының атынан сый-құрмет көрсетіп, автокөлік кілтін тарту етті.<img src="https://knadmin.beoblood.kz/uploads/Almasbek_Almatovty_merejtojyna_arnal_an_Zhyr_keruen_atty_shy_armashyly_kesh_tti1_c11efef633.jpg" alt="Алмасбек Алматовтың мерейтойына арналған «Жыр керуен» атты шығармашылық кеш өтті1.jpg">Сондай-ақ кеште Жанарбек Әшімжан өнер қайраткеріне Мәжіліс төрағасы Ерлан Қошановтың құттықтауын табыстады.<blockquote>«Сыр өңірі – талай марғасқа жыраулар мен тума таланттарды өмірге әкелген, жыраулық өнердің түп қазығы, алтын көмбесі, алып тайқазаны саналатын құтты мекен.Мемлекет басшымыз Қасым-Жомарт Кемелұлы Қызылордада өткен Ұлттық құрылтайдың бесінші қорытынды отырысында «Жалпы, «Сыр елі – жыр елі» деп бекер айтылмайды. Қорқыт ата заманынан жалғасып келе жатқан жыраулық-жыршылық және күйшілік өнер бұл аймақта кең қанат жайған. Жиенбай, Нұртуған, Нартай сынды саңлақтар негізін қалаған жыршылық мектептерді бүкіл еліміз біледі», – деп ерекше атап өткен болатын.Сыр бойындағы жыраулық өнердің көрнекті өкілі, Сыр сүлейлерінің ізін жалғаушы, Қазақстанның еңбек сіңірген қайраткері, зерттеуші-ғалым, «Парасат», үшінші дәрежелі «Барыс» ордендерінің иегері, Қызылорда облысының құрметті азаматы Алмасбек Нұрмаханұлы Алматов мерейлі 70 жасқа толды.Алмасбек Нұрмаханұлы – дәуір көшінде дара із қалдырған жыр алыптарының мұрагері, Сыр өңіріне ғана тән жыраулық дәстүрдің сабақтастығына айрықша еңбек сіңірген өнер қайраткері. Ағамыз жастайынан қолына домбыра алып «Алпамыс батыр», «Қобыланды батыр», «Қыз Жібек» сияқты елге кең тараған дастандарды жырлап, «жас жыршы» атанды. «Сыр сұлуы» ансамблі құрамынан басталған шығармашылық жолы белгілі жырау, ұлағатты ұстаз, өнер зерттеушісі, ғалым, қоғам қайраткері ретінде биік белестерге шығарды.Егемендік алған жылдар ішінде ұлттық өнердің бұл түріне ерекше көзқарас қалыптасып, ата-бабаларымыздың асыл қазынасы жарқырай түсті. Алдағы уақытта да ұлттық өнеріміздің шамшырағы болып, келер ұрпаққа рухани мұра сыйлай беріңіз»,– деді Н.Нәлібаев.</blockquote>Өнер кешінде айтыскер ақын Мұхтар Ниязов мерейтой иесіне арнау айтып, Қазақстанның еңбек сіңірген қайраткерлері Елмұра Жаңабергенова, Айгүл Елшібаева және басқа да ақын-жыршылар өнер көрсетті. Жыраудың өзі «Жыр бастауын» орындады.<img src="https://knadmin.beoblood.kz/uploads/Almasbek_Almatovty_merejtojyna_arnal_an_Zhyr_keruen_atty_shy_armashyly_kesh_tti2_9a301bbab6.jpg" alt="Алмасбек Алматовтың мерейтойына арналған «Жыр керуен» атты шығармашылық кеш өтті2.jpg">Алмасбек Алматов Сыр бойында мақам-саз ерекшеліктеріне қарай жыраулық мектептердің қалыптасуына, атадан балаға мирас болған төл өнерімізді жаңа дәуірге жеткізуге ерен еңбек сіңірді. Жыраулық өнер академиялық білім беру жүйесіне енгізіліп, «Дәстүрлі өнер – жыр» мамандығы ашылды. Құрманғазы атындағы Қазақ ұлттық консерваториясындағы, Қазақ ұлттық өнер университетіндегі, Қорқыт ата атындағы Қызылорда университетіндегі кафедраларда жыршы-жыраулар кәсіби тұрғыда қалыптасты. Дәстүрлі жыр орындаушыларды маман етіп даярлау арқылы өткеннің өзегін бүгін мен ертеңге жалғап, жүздеген шәкірт тәрбиелеп, өнер аламанына қосты. АҚШ, Франция, Италия, Швейцария, Ұлыбритания, Египет, Моңғолия және басқа да шет мемлекеттерде ұлттық мұрамызды ұлықтап, ел мерейін асқақтатты. Бүгінде мерейтой иесі тәрбиелеген шәкірттер халықаралық, республикалық байқаулардың жеңімпазы атанып, еліміздің әр өңірінде жыраулық дәстүрдің алтын арқауын жалғастырып келеді.<img src="https://knadmin.beoblood.kz/uploads/Almasbek_Almatovty_merejtojyna_arnal_an_Zhyr_keruen_atty_shy_armashyly_kesh_tti3_0686d4abcb.jpg" alt="Алмасбек Алматовтың мерейтойына арналған «Жыр керуен» атты шығармашылық кеш өтті3.jpg">Айта кету керек, Алмасбек Алматовтың 70 жас мерейтойы аясында Қорқыт ата атындағы университеттің Студенттер сарайында V томдық таңдамалы шығармаларының тұсаукесер рәсімі, Қармақшы ауданында «Асыл жырдың Алмасы» атты республикалық жыршы-жыраулар фестивалі өтуде.Фото: Қызылорда облысы әкімінің баспасөз қызметі

Алмасбек Алматовтың мерейтойына арналған «Жыр керуен» атты шығармашылық кеш өтті

<a href="https://kyzylorda-news.kz/">Kyzylorda-news.kz</a> &nbsp;Сырдария ауданы әкімі Берік Сәрменбаев Қызылорда облысының құрметті ардагері Серік Нұртазаевты қабылдап, 70 жасқа толған мерейтойымен құттықтады.Қабылдауда аудан әкімі ардагердің өңір дамуына қосқан үлесін ерекше атап өтті.<blockquote>– Ел мүддесін бәрінен биік қоятын, өзінен кейінгі ізіне ерген ұрпағына бас-көз бола білген алдыңғы буын ағаларымыздың орны ерекше. Өңіріміздің әлеуметтік-экономикалық, мәдени-рухани дамуына ерекше үлес қосқан азаматтарды ардақтап, бүгінгідей құрмет көрсету игі дәстүрге айналды. Бүгін адал еңбегімен халықтың ыстық ықыласына бөленген, экономика, қаржы саласында өзіндік қолтаңбасы бар Серік Нұзтазаевтың 70 жасқа толған мерейтойына орай жиналып отырмыз. Сізді барша аудан жұртшылығы атынан мерейлі жасыңызбен шын жүректен құттықтаймын! Өзіңіздің іскерлік қабілетіңіз бен кәсіби шеберлігіңіздің арқасында ауданымыздың өсіп-өркендеуіне ерекше үлес қосып, еңбекпен еселенген өнегелі өмір жолыңызда өңіріміздің дамуы үшін аянбай қызмет жасадыңыз. Алдағы уақытта да тәуелсіз қазақ елінің жарқын болашағына куә болып, мағыналы ғұмыр кешіңіз. Әрқашан мерейіңіз үстем, мәртебеңіз биік, абыройыңыз асқақтай берсін! Мерейтойыңыз құтты болсын, – деді Берік Әбдіғаппарұлы.</blockquote>Айта кетейік, Серік Нұзтазаев Ақжарма ауылының тумасы. Еңбек жолын Ақжарма ауылында жұмысшы болып бастап, Далакөл ауылдық кеңесінің хатшысы, «Ильич» совхозында өндіріс бригадирі, кейін совхоздың кәсіподақ комитетінің төрағасы болып қызмет жасады. Ардақты азамат Тәуелсіздік жылдарында білімі мен тәжірибесін қаржы саласына арнап, 1994-2000 жылдары әр түрлі салада бас экономист қызметтерін атқарды. 2001 жылы Ақжарма ауылдық округінің әкімі болып тағайындалды. 2002 жылдың қыркүйек айында Тереңөзек кентінің әкімі болып тағайындалып, аудан орталығының дамуына абыройлы қызмет атқарды. 2007-2011 жылдары Сырдария аудандық ішкі саясат бөлімін, 2011-2012 жылдары Сырдария аудандық жұмыспен қамту және әлеуметтік бағдарламалар бөлімін басқарды. 2022 жылдан бері Қызылорда облысы әкімі аппаратының ұйымдастыру-нұсқау бөлімінде облыстық Қоғамдық кеңес жұмысын үйлестіру жұмыстарын жүргізуде. Қай салада болса да барлығын үлкен жауапкершілікпен атқарып, облыс, аудан жұртшылығының алғысына бөленіп келеді.Салтанатты қабылдауда аудандық ардагерлер кеңесінің төрағасы Мұса Келдібаев, аудандық мәслихат төрағасы Ержан Әжікенов, Сырдария ауданының Құрметті азаматы Ұлмекен Жанәлиева, еңбек ардагерлері Бүркітбай Мұстафаұлы, Марат Омаров сөз сөйлеп, мерейтой иесіне жылы лебіздерін білдірді.Кездесу барысында аудан әкімі мерейтой иесіне ауданының Құрмет грамотасын табыстады. Халқымыздың игі дәстүрі бойынша шапан жауып, сый-құрмет көрсетті.Өз кезегінде Серік Нұртазаев көрсетілген құрметке алғысын білдірді.Фото: Сырдария ауданы әкімінің баспасөз қызметі

Мерейтой иесін қабылдап, құрмет көрсетті

<a href="https://kyzylorda-news.kz/">Kyzylorda-news.kz</a> &nbsp;Қазалы қалалық Мәдениет үйінің жанындағы халық тетарының ұйымдастыруымен жазушы, драматург Қолғанат Мұраттың «Мұғалім» әлеуметтік драмасы көрермен назарына ұсынылды.Жиылғандарға ерекше кеш сыйлаған қойылымды қала тұрғындарымен бірге Қазалы ауданының әкімі Алмасбек Есмахановта тамашалады.Туындыда қазіргі қазақ қоғамындағы мұғалімнің мәртебесі, ішкі жан дүниесі мен әлеуметтік қиындықтары терең әрі шынайы бейнеленген. Бұл шығарма – бір ғана мамандық иесінің тағдыры емес, тұтас қоғамның бет-бейнесін көрсететін мазмұнды қойылым. Сахнада мұғалімнің материалдық жағдайы мен рухани биіктігі арасындағы алшақтық, ұстаз еңбегінің қадірі мен қоғам алдындағы жауапкершілігі әсерлі түрде ашылды.Қойылымнан кейін аудан әкімі шығармашылық ұжымға алғыс білдіріп, ұстаз мәртебесін көтеруге бағытталған, тәрбиелік мәні зор осындай қойылымдардың қоғам үшін маңызы жоғары екенін атап өтті.Қойылым соңында халық театрының өнерпаздары көрермендердің ыстық ықыласы мен қошеметіне бөленді.<img src="https://knadmin.beoblood.kz/uploads/M_alim_leumettik_dramasy_k_rermen_nazaryna_synyldy_dc6530d3cf.jpg" alt="«Мұғалім» әлеуметтік драмасы көрермен назарына ұсынылды.jpg">

«Мұғалім» әлеуметтік драмасы көрермен назарына ұсынылды

<a href="https://kyzylorda-news.kz/">Kyzylorda-news.kz</a> Вашингтонда Президент Қасым-Жомарт Тоқаев Америка Құрама Штаттарында тұратын және білім алып жүрген Қазақстан азаматтарымен кездесті.Әңгімелесу барысында Қасым-Жомарт Тоқаев өскелең ұрпаққа үлкен үміт артатынын айтты. Сондай-ақ мемлекет жастарға ұдайы қолдау көрсетіп, олардың жан-жақты дамуына және қабілет-қарымын ұштауға қолайлы жағдай жасайтынын жеткізді.<img src="https://knadmin.beoblood.kz/uploads/tokaev_44a6d219c8.jpeg" alt="токаев.jpeg">Президент наурыз айында Қазақстан Республикасының жаңа Конституциясы жобасы бойынша өтетін жалпыхалықтық референдумның ел болашағы үшін тарихи маңызы зор екеніне назар аударды.Студенттер мен жас зерттеушілер ғылым және білім саласына жан-жақты қолдау көрсеткені үшін Қасым-Жомарт Тоқаевқа ризашылық білдірді.Фото: Ақорда

Мемлекет басшысы Вашингтонда отандастарымызбен кездесті

<a href="https://kyzylorda-news.kz/">Kyzylorda-news.kz</a> Рамазан - рухани тазару мен ізгі амалдарға бастайтын қасиетті ай. Күллі мұсылман қауымы асыға күтетін рамазан айы 19 ақпанда басталады. Ал, ораза айт мерекесі 20 наурызға тура келсе, қасиетті Қадір түні наурыз айының 16-нан 17-не қараған түні өтеді. Рамазан айы және қасиетті айда атқарылатын игі істер турасында облыстық дін зерттеу орталығының директоры Бекзат Қаппаров пен Ақмешіт-Сырдария мешітінің бас имамы Дастан Құрманбаев айтып берді.<blockquote>- Бұл – қайырымдылық пен жанашырлық, ізгілік пен мейірімнің айы. Қасиетті Рамазан қарсаңында өтетін шаралар Қазақстан мұсылмандары діни басқармасының облыстағы өкілдігімен бірлесе ұйымдастырылады. Ай барысында мұқтаж жандарға көмек көрсету, ауызашар дастархандарын жаю, қайырымдылық акцияларын өткізу жоспарланып отыр. Сондай-ақ, мешіттерде күн сайын тарауық намазы оқылып, жамағатқа рухани насихат айтылатын болады,- деді Бекзат Әбіләшімұлы.</blockquote>Биылғы пітір садақасының мөлшері 735 теңге болып белгіленді.&nbsp;<blockquote>- Баршаңызды мұсылмандар үшін қасиетті болып саналатын Рамазан айының келуімен құттықтаймын! Бұл ай қайырымдылық пен жанашырлық, ізеттілік пен имандылық сияқты қасиеттерді дәріптейтін ерекше кезең. Биыл Рамазан айы 19 ақпанда басталады. Биыл Рамазан айында 29 күн ораза ұстаймыз. Сонымен қатар, Қазақстан мұсылмандары діни басқармасының Төралқа мәжілісінде биылғы пітір садақасының мөлшері 735 теңге болып белгіленді. Пітір садақаның мөлшері еліміз бойынша 2 келі ұнның орташа бағасымен есептелді. Ал ұнның бағасы ҚМДБ-ның қала және облыс өкілдіктерінің берген мәліметі негізінде анықталды. Пітір садақасын құрма, мейіз бағасымен де беруге болады. Сонымен қатар қасиетті айда арнайы “Рамазан тәттісі”, ҚР Тәуелсіздінің 35 жылдығыны орай “Мұқтаждарға 35 мың азық-түлік себет”, “Бір мәселені шешу” сынды қайырымдылық акцияларын және түрлі форматтағы іс-шаралар мен жарыстар өткізу жоспарлануда,-деді Дастан Жанасұлы.</blockquote><img src="https://knadmin.beoblood.kz/uploads/yzylorda_oblysyny_bas_imamy_brifing_tkizdi_c690056b5d.jpg" alt="Қызылорда облысының бас имамы брифинг өткізді.jpg">Фото freepik.com

Рамазан айы 19 ақпанда басталады

<a href="https://kyzylorda-news.kz/">Kyzylorda-news.kz</a>&nbsp; Арал ауданы әкімдігінің мәжіліс залында аудан әкімі Аманжол Оңғарбаевтың төрағалығымен актив отырысы өтті.Жиында статистика саласында ұзақ жылдар бойы қажырлы еңбек еткен, Қазақстан Республикасы Стратегиялық жоспарлау және реформалар агенттігі Ұлттық статистика бюросының Қызылорда облысы бойынша департаментіне қарасты Арал ауданының статистика бөлімін абыроймен басқарған Еламан Сәдібекұлы Қапановты құрметті еңбек демалысына шығарып салу рәсімі өтті.Аудан басшысы өз сөзінде тәжірибелі маман, білікті басшы Еламан Сәдібекұлының саладағы сүбелі еңбегіне жоғары баға беріп, оның еңбек жолына жан-жақты тоқталды. Сондай-ақ ауданның ең жоғары марапаты – Арал ауданының Құрмет грамотасын табыстап, иығына дәстүрлі шапан жапты.Басқосуда білім саласының ардагері, Арал ауданының Құрметті азаматы Ә.Әуезов пен аудандық мәслихат төрағасы Б.Төрахметов пайғамбар жасқа жетіп, ұзақ жылғы еңбегінің жемісін көріп, зейнет демалысына шыққалы отырған Еламан Сәдібекұлын мерейлі жасымен құттықтап, лебіздерін білдірді.Көрсетілген ерекше құрметке ризашылығын білдірген Еламан Сәдібекұлы қызмет атқарған салада жинақтаған мол тәжірибесімен алдағы уақытта да бөлісуге дайын екенін атап өтті.Фото: Арал ауданы әкімдігі

Статистика саласынан зейнеткерлікке шықты

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев жаңадан салынатын кітапхана мен драма театрдың құрылыс алаңына барды.Мемлекет басшысы Ұлттық құрылтайдың бесінші отырысында Қызылорда қаласында жаңа драма театр және тәулік бойы жұмыс істейтін кітапхана салу туралы айтқан болатын.<blockquote>«Қызылордада жаңа драма театр салу жоспарымызда бар, биыл құрылысты бастауымыз керек. Өткен сапарымда облыстың зиялы қауым өкілдерімен кездескен кезде заманауи кітапхана салу керек деп айттым. Енді бұл құрылыс биылдан бастап жүргізіледі», – деді Қасым-Жомарт Кемелұлы өз сөзінде.</blockquote>Заманауи, көпфункционалды кітапхана салуға инвестор есебінен 20 млрд. теңге қаралған. Бұл еліміздегі кітапхана инфрақұрылымын дамытуға, оқырмандарға қолжетімділікті арттыруға және өңірлерде ақпараттық мәдениет деңгейін көтеруге бағытталған.Жоба бойынша ғимараттың аумағы 13 000 шаршы метр, 1 миллионнан астам кітап қорын сақтауға арналған. Жыл сайын 250-300 мың оқырманға қызмет көрсетеді. Каталогтар, заманауи ашық форматтағы оқу залдары, 50 адамның цифрлық ресурстармен жұмыс істеуіне қолайлы электронды бөлме қарастырылады. Инновациялық бағыттағы медиа-лаб бөлмесі мен подкаст студиясы болады. Бұл бастама – халықтың білімге, мәдениетке және заманауи ақпарат көздеріне қолжетімділігін арттыртын маңызды қадам.<img src="https://knadmin.beoblood.kz/uploads/whatsapp_image_2026_02_03_at_19_12_58_d812959e56.webp" alt="whatsapp-image-2026-02-03-at-19.12.58.webp">Ал драма театрдың жаңа ғимаратының салынуы – қазақ театр өнерінің қарашаңырағы саналатын аймақтағы тұрақты көрермендер үшін зор қуаныш, үлкен сый. Н.Бекежанов атындағы облыстық драма театр былтыр бір жылдың ішінде төрт бірдей халықаралық фестивальда топ жарды. Материалдық базасы барынша нығайып, мамандардың кәсіби тұрғыда жетілуіне жағдай жасалды, баспанамен қамтамасыз етілді.Жаңа ғимарат артистердің дайындығына, түрлі сахналық көріністер мен ауқымды декорациялар құруға мүмкіндік береді, кең тынысты дыбыс жүйесі мен соңғы үлгідегі жабдықтар қойылым сапасын арттыра түседі.Фото: Қызылорда облысы әкімінің баспасөз қызметі

Қазақстан және Қызылорда облысының жаңалықтары: Руханият