<a href="https://kyzylorda-news.kz/">Kyzylorda-news.kz</a> &nbsp;Қырғызстанда балмұздақ тиелген фургонның балаларды қағып кеткен қайғылы оқиғасынан кейін қаза тапқандар саны артты.&nbsp;Бұл&nbsp;туралы&nbsp;<a href="https://stan.kz/kirgizstanda-balmyzdak-tielgen-furgon-okushilardi-kagip-399628/">Stan.kz</a>&nbsp;ақпарат агенттігі 24kg сайтына&nbsp;сілтеме жасап хабарлайды.Зардап шеккендер саны 32 адамға дейін көбейді. Олардың ішінде тек біреуі мұғалім, қалғаны – оқушылар.Созақта мектеп оқушыларын соғып кеткен жүк көлігінің жүргізушісі ұсталды. Ол 48 жастағы жергілікті тұрғын болып шықты.Жүргізуші Hyundai Porter көлігін балалар мерекеге дайындалып жатқан жерге тоқтатқан. Іс-шара кезінде ол балаларға балмұздақ таратуы керек еді. Қойылым кезінде көлік төменге сырғып, көпшіліктің арасына қарай жүріп кетті. Жүргізуші көліктің артынан жүгірді, десе де тоқтата алмады. Апат болып, киіз үйге соқтығысқан соң көлік тоқтады.Порталдың хабарлауынша, оқиға орнына ішкі істер министрі Ұланбек Ниязбеков барған. Бұл іс оның жеке бақылауында.Еске салсақ, бұған дейін&nbsp;Қырғызстанда балмұздақ тиелген фургон 29 оқушыны қағып кеткені айтылды.&nbsp;Видеодан скриншот

Қырғызстанда балмұздақ тиелген фургон оқушыларды қағып кетті: Зардап шеккендер саны артты

<a href="https://kyzylorda-news.kz/">Kyzylorda-news.kz</a> &nbsp;Жамбыл облысында 8-сынып оқушысы жоғарғы сынып оқушысының қолынан қаза тапты. 14 жастағы бала кеуде тұсынан алған соққыдан кейін мектеп дәретханасында жан тапсырған. Ал әлімжеттік көрсетіп, жұдырық жұмсаған 9-сыныптың оқушысы қамауға алынды, деп хабарлайды <a href="https://kaz.zakon.kz/kogam-tynysy/6041910-14-zhastay-bala-mektep-dretkhanasynda-zhan-tapsyrdy-oiany-mnzhayy-belgl-boldy.html">Zakon.kz.</a>Бұл жантүршігірлік жағдайдан кейін ата-аналар баласын мектепке жібермейміз деп шошынып отыр. Өйткені әлімжеттік тоқтамайынша, қайғылы жағдай тағы қайталануы мүмкін дейді. Қанды оқиға 30 сәуір күні мектеп ауласындағы әжетханада болған. Ата-аналардың айтуынша, оқушы әлімжеттіктің кесірінен ажал құшқан. Өйткені бұған дейін мектепте балаларға қысым көрсеткен жағдай жиі кездескенін айтады. Ал ауылдасын ажалға қиған кәмелетке толмаған күдікті уақытша ұстау изоляторында қамауда.Қайғыдан қан жұтқан ата-ана баласын жер қойнына кеше табыстаған. Мектеп маңын торуылдап жүрген олар 14 жастағы Мирасты жабылып ұрған оқушылар жазадан сытылып кетпесін дейді.Ал қайғылы оқиға болған күні мектеп ұжымы болған жағдайды барынша жасыруға тырысқан. Алғашында оқушының ата-анасына "жүрек талмасы ұстап қалды" деп хабарлаған.<blockquote>"Жігіт қой, 14 жасқа келген сап-сау азамат. Алар белесі көп еді, баламның. "Мама, мен дәрігер боламын, екеуіміз бәрін жеңеміз" деп... Кешке бәрі естіді. Бүкіл ауыл шулады. Екі орынбасарын ілестіріп алып, ата-аналардың үйін аралаған ғой. "Айтпайсыңдар, шықпау керек, ауыздарыңнан шықпасын" деп. Ата-аналарға да қысым жасалып жатыр. Жұмыс орнының басшылығына айтып, сол ата-аналарға қысым жасап жатыр".Марқұмның анасы Раушан Құдасова.</blockquote>Сурет: Нұрболат Нұржаубай

14 жастағы бала мектеп дәретханасында жан тапсырды: Оқиғаның мән-жайы белгілі болды

<a href="https://kyzylorda-news.kz/">Kyzylorda-news.kz</a> &nbsp;Құлсарыда су тасқынынан зардап шеккен тұрғындар орталық алаңға жиналып, баспананың әр&nbsp;шаршы метрі үшін 400 мың теңгеден төлем талап етті. Ондаған адам талаптары орындалғанша сол жерде&nbsp;тұруға ниетті.&nbsp;Бұл туралы&nbsp;<a href="https://stan.kz/kylsarida-su-taskininan-uysiz-kalgan-ondagan-tyrgin-ote-399633/">Stan.kz</a>&nbsp;ақпарат агенттігі Ақжайық басылымына сілтеме жасап хабарлайды.Тұрғындардың&nbsp;көпшілігі баспаналарын техникалық байқаудан өткізіп, қорытындысын алып үлгерген. Олардың арасында мамандардың келгенін күтпегендер де бар. Құлсарындықтардың&nbsp;талабы – бағалау мәселесін бір апта ішінде шешіп, &nbsp;төлем алу.Жазира Құлмұханова үш баламен туыстарының үйінде тұрудан шаршағанын айтады. Ол мәселені тез арада шешуді талап етеді. Айтуынша, ол енді Құлсарыдан жаңа үй ала алмайды, өйткені өзі тұрған жерде, қаладағы жаңа шағынаудандардың бірінде үйлердің барлығын су басқан.Оларға берілген жер телімдері үш жылдың ішінде игерілу шартымен берілгені белгілі. Жиналғандар арасында су тасқынына дейін бірнеше күн ғана жаңа үйде тұрғандар болды.Тағы бір тұрғын Толқын Қожахметова&nbsp;369 мың теңге көлеміндегі бір реттік материалдық көмек есебінен қора жалға алғанын айтты.“Біз тым болмаса &nbsp;қартайғанда өзіміз үшін өмір сүреміз деп ойладық, балалардың бәрі үйленді... Бірақ жоқ, тағы да сынақтар бітер емес. &nbsp;"Бұдан әрі қалай өмір сүреміз" деген уайыммен жүруге&nbsp;тура келеді! Біз мұнай өндірілетін жерде тұрамыз! Тұрғын үй алаңына қарай 1 шаршы метрге 400 мың теңге төленсін. Үйлерді қалай салуды және қайда тұруды өзіміз шешеміз", –&nbsp;деді Қожахметова.Тұрғындар алдына аудан әкімі Жұмабек Қаражанов&nbsp;пен оның орынбасарлары Гүлнафиз Айшуақова және Нұрболат Сарманов&nbsp;шықты.“Әкім бағалау 15 мамырдан кейін шығады деп уәде берді, бірақ бұрын 2 мамыр деген. Біз бұдан былай күте алмаймыз!” – деді тұрғындарҚала басшылығы халыққа бағалаушылар тез арада жетеді, баспана үшін барлық өтемақы төленеді деп уәде берді. Дегенмен&nbsp;тұрғындар жиынды тастап кетуге ниетті емес.Фото: Ақжайық

Құлсарыда су тасқынынан үйсіз қалған ондаған тұрғын өтемақы талап етіп, наразылыққа шықты

<a href="https://kyzylorda-news.kz/">Kyzylorda-news.kz</a> Сыр өңірі – белгілі бір дәстүрдің ғана жеке дамыған жері емес, тоғыз жолдың торабы, сан түрлі тарихи оқиғалар мен көзқарастар бір мүддеге тоғысқан топырақ. Бейсенбіде аудандық Шәмшат Төлепова атындағы мәдениет үйінде Қазақстан Республикасының Мәдениет қайраткері, әнші-композитор Сауранбек Елеуовтің «Сырдария-Жырдария» атты кездесу концерті өтті.Халқымыз – ежелден өнер сүйген, өнерпаздарын қадірлеген. Сыр елінің осындай талантты ұлдарының бірі де бірегейі, көкірегіне әуезді ән ұя салған Сыр елінің тума таланты, әлемді әнімен қатар даусымен де таңдай қақтырған Сауранбек Еркінбекұлы туған өлкенің өркендеуіне өздігінен үлкен үлес қосып жүрген азаматтардың бірі. Оның әуезді әнін қармақшылық жырсүйер қауым сүйсіне тыңдады. &nbsp;Концертке қатысқан аудан әкімінің орынбасары Самат Қыдырбекұлы көпшілік қауымға керемет көңіл күй сыйлаған өнер майталманына ұлтымыздың рухани-мәдени дамуы мен өсіп-өркендеуіне қосқан айрықша үлесі үшін ризашылығын білдіріп, аудан әкімінің Алғыс хаты мен сый-сияпатын тапсырды.Қазақ өнерінің саңлағы Сауранбек Еркінбекұлының шығармашылығын сүйетін тыңдарман қауым жанды дауыста ән тыңдап, құлақ құрышын қандырды. Сондай-ақ, кеште өнер қайраткері Сәрсенбек Сәбекұлы мен жергілікті өнерпаздар да өнерін ортаға салды. Осылайша, өнер кешіне қатысқан тыңдарман қауым керемет көңіл күймен тарқасты. &nbsp;

Қармақшылық жұртшылық жырмен сусындады

<a href="https://kyzylorda-news.kz/">Kyzylorda-news.kz</a> Көктем мезгілі басталысымен далалық аймақтарда өрт қаупі күшейетіні рас. Осыған орай, төтенше жағдайлар департаментінің мамандары далалық аймақтарда барынша сақтық ережелерін сақтауды ескертеді. Жалпы, жыл басынан бері облыс аумағындағы 33 гектар жерді құрайтын далалық аймақта 9 өрт оқиғасы тіркелген. Алайда, бұл өткен жылмен салыстырғанда 18 пайызға төмен. Бұл жөнінде Өңірлік коммуникациялар қызметінің ақпарат алаңында облыстық ТЖД Мемлекеттік өрт бақылау басқармасының бастығы Асхат Оразбеков хабарлады.– Жыл басталғалы бері облыс бойынша 118 өрт оқиғасы тіркелді. Осыған сәйкес, қазіргі таңда өрт оқиғаларының алдын алу жұмыстары күшейтілген бағытта жүргізілуде. Сонымен қатар, өрт қаупі кезеңінде жергілікті атқарушы органдар, орман шаруашылығы және полиция департаментінің қызметкерлерімен бірге қала және барлық аудандарда 23 рейдтік шара ұйымдастырылды. Қазіргі таңда облыс бойынша 28 өрт сөндіру бекеті бар. Бұл бекеттер 101 мыңнан астам тұрғыны бар 89 елді мекенді өрт қауіпсіздігімен қамтамасыз етуде. Өрт сөндіру бекетін көбейту мақсатында «2021-2025 жылдарға мемлекеттік өртке қарсы қызметі жоқ елді мекендерде кезең-кезеңімен өрт бекеттерін құру» жоспарына сәйкес биыл Сырдария ауданында 2 өрт сөндіру бекетін салу жоспарлануда, – деді Асхат Оразбеков.Фото:&nbsp;Қызылорда облысының Өңірлік коммуникациялар қызметі

Аймақта өрт сөндіру бекеттері көбеюде

<a href="https://kyzylorda-news.kz/">Kyzylorda-news.kz</a> &nbsp;Сырдария аудандық ауруханасына қарасты «Хирургия» бөлімшесінде науқастарға отадан кейін немесе сан түрлі дертіне байланысты ем-шара жүргізу – қатаң бақылауда болады. Соңғы 20 жылда аталған бөлімшеде қызмет етіп келе жатқан Гүлмира Тоқсейітова бар мақтауға лайық. Қазіргі уақытта аға аяжан ретінде әр іске ыждағаттылық танытатын жанды көпшілік өз ісінің білгірі санайды.Талай жыл хирургия саласының майталман дәрігерлерінің сенім үдесінен шыққан Гүлмира Сәндібекқызы ешқашан салғырттықа жол бермейді. Үлкеннен тәлім алып, емделушінің бабын тауып, өзі ұстанған бағыттан таймайды. Қызылорда медициналық училищесінде 1988-1991 жылдар аралығында білімін жетілдірген маман «Терапия», «Жедел жәрдем», «Транфузиология» кабинетінде өлшеусіз қызмет етеді.<blockquote>– Біздің бөлімшеде кәсіби біліктілігі жоғары мамандардың шоғыры қалыптасқан. Қай кезде де, емделушінің алғаусыз алғысын естігінде ерекше марқайып қаламыз. 30 жылдан аса уақытта медицина саласында жергілікті халықтың ризашылығына бөленіп келеміз. Бөлімшеде ауыр жарақат алған, дене мүшесі зақымдалған жандар жатқызылады. Сондықтан біз ұқыптылықты, тиянақтылықты – басты қағидамыз ретінде санаймыз. Күні-түні науқастың жағдайына бақылау жасаймыз. Отбасымда жолдасым мен балаларым үнемі қолдау көрсетіп отырады, – дейді Гүлмира Сәндібекқызы.</blockquote>Фото: Нұрболат Нұржаубай

Науқас жанының шипагері

«AMANAT» партиясы фракциясының депутаттары отандық сүт өндірісін дамытуға тұсау болып отырған проблемаларды атады, деп хабарлайды Azattyq Ruhy.Депутаттардың өңірлерге сапарында шаруалар отандық өнімге қатысты біршама мәселе көтерген. Солардың бірі – мемлекеттік сатып алуды реттейтін нормативтік-құқықтық актілерде «сүт өнімдерінің» ұлттық режимнен алып қою тізіміне енбеуі. Осының салдарынан сүт өнімдерін өндірмейтін, арада делдал болып жүрген өнім берушілер мемлекеттік сатып алулардың жеңімпазы атанып жатыр.<blockquote>«Басқа елдерден келетін өнімдердің бағасы арзан болғанымен, сапасы отандық сүт өнімдерімен салыстырғанда бірнеше есе төмен. Бұл үдеріс отандық өнімдердің бәсекелестігін төмендетуге және еліміздің азық-түлік қауіпсіздігіне кері әсерін тигізетіні сөзсіз. Бұл өнім берушілер көп жағдайда ЕАЭО-ға мүше елдерден және өзге мемлекеттерден шығарылатын өнімдерді алып келуі мүмкін», - дейді Мархабат Жайымбетов ол премьер-министрдің орынбасары Серік Жұманғаринге жолдаған депутаттық сауалында.</blockquote>Депутаттың айтуынша, президенттің мемлекеттік сатып алу мен квазимемлекеттік сектордың сатып алуларында отандық тауарлардың үлесін арттыру туралы тапсырмасы атқарушы билік тарапынан өз деңгейінде орындалмай келеді.<blockquote>«Сонымен қатар, кейбір саланың мемлекеттік сатып алу жүйесіне кәсіпорынның отандық өндіруші мәртебесін куәландыратын құжат механизмін енгізуіміз қажет. Яғни, бұл құжатты алу үшін кәсіпкер техникалық, технологиялық, ресурстық мүмкіндіктері бар екенін көрсетуі және тауар өндіруге шамасы жететінін дәлелдеуге тиіс», - деген ұсыныс тастады мәжілісмен.</blockquote>Егер, мемлекеттік сатып алу жеңімпазы тек өндірістік сертификатқа ие кәсіпкерлер арасынан анықталса, тапсырыс берушілерге сапалы сүт өнімдері жеткізіледі және нарықтағы делдал мекемелердің саны азаяды.<blockquote>«Байқасаңыз, өнім бар, сапа бар, бірақ неге мемлекет тарапынан қолдауға келгенде келте боламыз? «Отандық өнімді қолдау керек, жергілікті өнімге мән берілсін» деген бастамалар құр жария сөзге айналмауы тиіс. Әр сөз іспен дәлелденсе, құба-құп болар еді», - дейді Жайымбетов.</blockquote>Ол «AMANAT» партиясы ұлттық бизнестің мүддесін үнемі бақылауында ұстап жүргенін атап өтті.Осыған байланысты депутаттар сүт өнімдерін ұлттық режимнен алып қою тізіміне енгізу мәселесін қарастыруды, сондай-ақ жосықсыз импорттаушылар тарапынан демпинг фактілеріне тергеу жүргізіп, қажет болған жағдайда шикі сүт пен оның концентратын әкелуге тыйым салуды ұсынды.

Мархабат Жайымбетов отандық сүт өнімінің проблемаларын атады

<a href="https://kyzylorda-news.kz/">Kyzylorda-news.kz</a> &nbsp;Аудан медицина саласында жас мамандардың біліктілігін арттырып, жан-жақты білімін жетілдіруге толықтай мүмкіндік қарастырылған. Ауыртпалығы мол салада жұмыс көзін үйлестіруге дағдыланған жас мамандар қатары жеткілікті. Соның бірі – Әйгерім Майрашова. Жас маман басшылыққа өзінің қарым-қабілетін көрсете біліп, 24 жасында «Оңалту және паллиативтік көмек» бөлімшесінің аға аяжаны қызметіне бекітілді.Осыдан 6 жыл бұрын Тереңөзектің келіні атанған Әйгерім Жарасқызы Алматы облысында дүниеге келген. Дегенмен оның балалық шағы ауданға іргелес орналасқан, құт қонған Шиеліде өтеді. Сыр күрішімен аты шыққан аудандағы №219 Ыбырай Алтынсарин атындағы орта мектебінде білім алған жас маман Қызылорда көпсалалы колледжінен «Емдеу ісі» мамандығын меңгеріп шығады. Алғашқы жылдары аудандық емханаға қарасты «Күндізгі реабилитация бөлімінде еңбек еткен медбике бүгінде «Оңалту және паллиативтік көмек» бөлімшесінің жұмысына серпін беруде.<blockquote>– Біздің бөлімшеде ауыр жарақат алып, ота жасатқан науқастарға сала мамандары көмектеседі. Өз-өзіне қызмет жасай алмайтын емделушілердің жанынан ақ халатты абзал жандар ұдайы табылуға тырысады. Әрқашан тәжірибесі толысқан аға буын өкілдерінен ақыл-кеңес сұрап отырамын. Олардың әрбір айтқан бағыт-бағдары мен үшін – өмірлік сабақ екені мәлім, – деді Әйгерім Майрашова.</blockquote>

24 жасында аға аяжан атанған жас маман 

&nbsp;<a href="https://kyzylorda-news.kz/">Kyzylorda-news.kz</a> Жаны ізгі, жүзінен тек мейірім шуағы төгіліп тұратын тәжірибелі медбике Роза Сағындық әркез емделушіге шад-шадман көңіл-күй сыйлай біледі. Іргелі ұжымда орнықты ойымен, нақты ұстанымымен қызмет ететін медбикенің медицина саласындағы айтарлықтай қызметін әріптестері ерекше бағалайды.Жалпы, Роза Жаппарқызы осыдан 55 жыл бұрын дүниеге келген. Мектеп қабырғасында жүргеннен денсаулық сақтау саласына қызығушылығы артқан сала маманы 1984-1987 жылдар аралығында Қызылорда медицина училищесінде оқып, мамандық алып шығады. Сырдария аудандық ауруханасының медстатист маманы ретінде 20 жыл қызмет етсе, қазіргі уақытта көз аурулар кабинетінің медбикесі болып жұмыс атқаруда. Күніне көптеген науқастың денсаулығын дәрігер Сәния Оразалиева екеуі жіті тексеріп, арнайы диагноз қойып, сан түрлі ем-шара қолдануға жолдама береді.<blockquote>– Бүгінде медицина саласында сан бағытта реформа жүргізіліп, біршама өзгеріс орын алуда. Сала маманы ретінде заман көшіне ілесіп, жергілікті халық үшін тынымсыз еңбек етіп келеміз. Әрине, адамның көз жанары әркез сау болғанда қалыпты өмір сүруге икемделеді. 20 жыл статистика саласында нақты мәліметті келтіре отырып, ақпарат қорын толықтыруды үйлестірсек, осы күні көз ауруларына шалдыққан азаматтардың жағдайын саралауға мүдделіміз, – деді білікті медбике.</blockquote>Аяулы жан 2 перзенті мен 6 немересіне үнемі өмірден түйгенін, көргенін айтып отырады.

Жаны ізгілікке толы медбике

<a href="https://kyzylorda-news.kz/">Kyzylorda-news.kz</a> Өз ісінің маманы атану үшін Ақмарал Жолекенова бастапқыда медицина мамандығын таңдаған. Күнделікті емделушінің жағдайына зер салып, дәрігер жанындағы сенімді серікке айналған. Ақмарал Қосымқызы 1965 жылы бұрынғы Қызылдихан савхозында дүниеге келген. Үздіксіз 40 жылға жуық емхана мен үйдің ортасын жол қылған медбикенің еңбегі қай кезде де, өлшеусіз.Талай мәрте үздіктер қатарынан көрінген сала маманы айрықша мінезімен көпке үлгі. Сабырлы қалыптан таймайтын алтын жүректі жанның қызметтегі бағындырған белесі орасан зор. Жас буынды тәрбиелеуде Ақмарал Қосымқызы секілді тәжірибелі мамандар аса қажет. Байыппен жүріп, айналасындағы жастарды әрбір іске машықтандыратын оның біліктілігі жоғары екені мәлім. Әрине, аймақтық мейірбике ретінде бекітілген көше тұрғындарымен байланыс орнатып, олардың денсаулығына жіті қадағалау жасайды. Кез келген адамдың денсаулығына қатысты шағымы бола қалған жағдайда уақытпен санаспай өз жұмысын лайықты түрде атқарады.<blockquote>– Сан түрлі сырқаты бар адамның жай-күйіне қанығу мақсатында көше тұрғындарымен пікірлесіміз. Маған медицина саласында 40 жылға жуық еңбек ету бақыты бұйырыпты. Әрине, осыншама уақытта көптеген сала маманымен қатар жүріп, өз ісімізге адалдық таныттық, – дейді Ақмарал Қосымқызы.</blockquote>

Байыппен жүріп, жастарды тәрбиелей білген 

<a href="https://kyzylorda-news.kz/">Kyzylorda-news.kz</a> &nbsp;Аудан орталығынан шалғайда орналасқан Бесарық ауылында ақ жаулықты қарт ана тұратыны естіген едік. Жасы 90-ға келген Ұлжан Айтмұратова өмірден көргені мен түйгені мол кейуана екені даусыз. Оның ғибратты ғұмырын үлгі ету мақсатында қолымызға қалам алып, ізгіліктің дәнін сепкен қарияның өнегелі өмір жолына зер сала білдік.Айдарлы ауылында 1934 жылы әкесі Зікір мен анасы Құрманкүлдің тұңғышы болып жарық дүниеге келген Ұлжан көп жыл ата-анасының қызығы болып жалғыз өскен екен. Әттеген-айы әкесінен небәрі 9 жасында көз жазып қалғандықтан, анасына қолқанат, соңынан ерген бауыры Жарқынға бас-көз болып өседі. Әке-шешесінің көзінің ағы мен қарасы болып өскен Ұлжан мен інісі Жарқын ана­ларының айтқан өнегелі әңгімесін санасына тоқи біледі. Бойжеткен соң Айдарлыдан ұзатылып, бесарықтық азамат Досымбай Айтмұратовқа тұрмысқа шығады. Үлкен әулеттің табалдырығын аттап, жұбайының үйілмелі-сүйелмелі бауырларымен бір шаңырақ астында тұрған екен.<blockquote>– Он сегіз жасымда тұрмысқа шыққан едім. Ата-енеммен, күйеуімнің 5 бауырымен бірге тұрып, берекелі отбасына айнала білдік. Кейін азаматыммен совхоздың малын бағуға кеттік, бөлек шықтық. Дүниеге он бала әкелгеніммен оның бесеуі шетінеп кетті. Қалған бесеуін өсіріп, жеткіздік. Малшының әйелі болып, атқа мініп, мал бағуға бірге бардық. Өмірдің қиындығына ешқашан налыған емеспін. Жұбайым өте момын кісі еді. Оның дауыс көтеріп, қатты сөз айтқанын көрмедім. Үнемі сенім білдіріп, барлық кезде қолдау білдіріп отыратын. Ененің өнегесін де көрдік. Марқұм енемнің сіңлісі біздің үйде тұратын. Ол кісінің жұбайы қайтыс болған соң, әпкесінің қолына келді. Кейін енем дүние салғанда, екі көзі көрмейтін, зағип әйел менің қолымда болғысы келетінін айтты. Қарт кісіні 13 жыл бойы күтіп, бірге тұрдық, арулап жерледік. Әйел адамның бойына сіңірген қасиеті жақсы болса, Алла бар жақсыны үйіп-төгіп береді, – дейді көп жасаған ана.</blockquote>Өмірге өкпелемеу, адал болу, Алланың берген ырзық-несібесіне риза болу – имандылықтың белгісі саналады. Бойында имандылық пен ізгіліктің нұры тұнып тұрған кейуана айналасына жылулық пен адамгершіліктің нәрін септі. Адал еңбектің үлгісін көрсетті. Сондықтан болар, әлі күнге дейін қимылы ширақ, айтар ойы орнықты. Бұл көп адамға бұйыра бермейтін Жаратқанның сыйы. «Бейнетінің зейнетін көру – бұйырған бақыт» деп білетін қарт ананың айтар естелігі өте көп. Соның біріне назар салып, қайсарлығына еріксіз тәнті болдық.<blockquote>– Қырқым кезінде малшылар жиналып, қой қырқатын едік. Ондай кезде үлкен той болушы еді. Қазан-қазан ет асылып, әрбір шаңырақта береке-бірлік орнайтын. Көптен көріспеген малшылар шүйіркелесіп әңгіме-дүкен құрып, домбырамен ән айтылып, жыр тыңдалатын. Әйел, бала-шағаның барлығы науқанға атсалысып, құр қарап отыратын адам болмайтын. Мал-жанның жағдайын жасағанда шаршауды білмедік. Қыр­қымды еске алудың өзі көңілге қуаныш ұялатады. Нағыз мереке, нағыз той деп осындайды айтады.</blockquote>Тағы бір естен кетпейтіні, мына бір оқиға. Бірде мал қайырып келуге атқа қондым. Шіліңгір шілденің аптап ыстығы еді. Бауырымда төртінші 4 айлық балам бар. Маңыраған малды қайырып, суатқа апару керек болды. Баламды шоқ шеңгелдің көлеңкесіне жатқызып, қойды қайыруға кеттім. Арада біраз уақыт өтіп, алыстап кетсем керек, малды суатқа құ­латып келгенімде баламды таппай қал­­дым. Қорыққаннан жүрегім аузыма тығылды. Қайда кетуі мүмкін. Баламды жат­­қызып кеткен орыннан жаңылыстым ба деп, әр шеңгелдің астына үңіліп, әй­теуір тауып алдым. Баламның ауызы кеуіп, қып-қызыл болып, жылағаннан әл­сіреп қалыпты. Баламмен аман-есен қауыш­қаныма қуандым. Осылай жүріп те жұмыстан қалмадық, мал бақтық, бала туғанымызды міндетсінбедік. Өмір бойы жұбайымыздың көмекшісі болып, 4 ұл мен 1 қызды өсірдік, – дейді қарт ана.Иә, ана, ене өнегесін ұрпақтан-ұрпаққа жалғап келе жатқан әулеттің үлкені Ұлжан Зікірқызы ұлы құндылық қазақтың салт-дәстүрін бәрінен де биік қояды. Қазақылық, биязылық оған тән қасиет. «Қыз бала анасынан алған өнегесімен өседі» демекші, отбасында жалғыз қыз болып өскенімен, анасынан үйренгені көп болыпты. Сол дәстүрден әлі күнге дейін жаңылған емес. Тағам әзірлеуді, бау-бақша күтімін жасауды, егін егуді беріге дейін атқарды. Қазір бұл дәстүрді келіндері жалғастыруда. Көнекөз қария іс тігу, көрпе көктеу, мақта салу, ас әзірлеу, малдың жағдайын жасау­дың жайын келіндеріне үйретіп отырады.<blockquote>– Енемнің өнегесін үйреніп, ол кісінің балажандылығын, мейірім­ді­лігін көзіммен көріп келемін. Алғашқы немерелерін бауырына бас­ты. Қос немересі Талап пен Гүлнара әжелерінің тәрбиесін алды, мейіріміне бөленді. Қазір олар өсіп кетсе де әжелерін сағынып, арагідік уақыт тауып құшағына келуге асығып тұрады. Перзенттерінен сүйген 14 немере мен 21 шөбересінің бәрі әжені жақсы көреді. Қарашаңырақтың иесі ретінде жұбайыммен бірге анамызды бағып-қағып отырғанымызға шүкіршілік етеміз. Берекеміз бен мерекеміз саналатын әже­мізді бір сәт көрмесек сағынамыз, – дейді шаңырақтың келіні Салтанат Жұмабаева.</blockquote>Қара жұмыстың қазанында қайнап, адамның, малдың жайын күйттеген Ұлжан апа өмірлік қосағы Досымбай аға небәрі 56 жасында дүниеден өткенде есеңгіреп қалған екен. Уақыт өте жақындарының қолдауымен еңсесін көтеріп, белін бекем буып, қайта аяққа тұрады. Отбасының қазығы өзі болып қалғанын түсініп, бала-шағаны одан әрі жеткізуге қамданады. Жұмыстан да ажырамай, ата кәсіп мал өсірумен, бордақылаумен айналысып, балаларын жеткізеді. Үлкені Жайлаубай, екінші ұл Қыстаубай былтыр марқұм болған, үшінші ұл Дүйсенбай, кенже ұл Ғалым және үйдің кенжесі тұрмыстағы Гүлсара тамырын тереңге жайған әулеттің жал­ғасына, алтын қазығына айналғаны көпшілікке мәлім.<blockquote>– Жұбайыммен жарасымды өмір сүр­дім. Біз жастайымыздан бас қостық. Ер азаматымның арқа сүйері болдым. Біз ешқашан ұрысқан емеспіз. Бірдеңе айтатын болсам, еркелеп сөйлейтін едім. Бір-бірімізге деген сыйластықтың арқасында үйімізде береке болды. Қазіргі жастар шы­дамсыз. Сәл қиындыққа күйінеді. Содан барып отбасының берекесі кетіп, ажырап жатады. Ер азаматты қадірлейтін әйелдің басынан бақ кетпейді. Сондықтан айтарым, әйел адамға көп нәрсе байланысты. Берекелі Бесарықтың түтіні түзу ұшып, ер азаматтарымыз аман болсын, – деп батасын берді тоқсанның төріне шыққан Ұлжан апа.</blockquote>&nbsp;

Еңбекпен шыңдалған кейуана

<a href="https://kyzylorda-news.kz/">Kyzylorda-news.kz</a> Сырдария аудандық мәдениет үйінде «Бюджет қаражатын басқарудың және пайдаланудың тиімділігін арттыру» тақырыбында семинар-кеңес өткізілген болатын. Семинар-кеңеске Қызылорда облысы бойынша тексеру комиссиясының мүшесі Н.Қордабай, облыстық ішкі мемлекеттік аудит департаменті басшысының орынбасары М.Өмірбаева, жоспарлау, есептілік және сапа бақылауы бөлімінің бас инспектор-мемлекеттік аудитордың ассистенті Ә.Иманкұлов бөлім басшылары Ж.Қалиев, С.Ержанұлы, Сырдария аудандық қазынашылық басқармасының басшысы З.Рахымшаева, облыстық мемлекет­тік сатып алу басқар­масының бөлім басшысы Н.Аймаханов, дер­бес бөлім басшылары, ауыл әкімдері мен тиісті сала мамандары қатысқан еді.Келелі жиынды аудан әкімінің орынбасары Талғат Нұртазаев ашып, семинар-кеңестің маңыздылығына тоқталып, бюджет қаражатын басқару бойынша атқарылған жұмыс ауқымды екенін тілге тиек етті.<blockquote>– Қызылорда облысы бойынша тексеру комиссиясының ұйытқы болуымен ауқымы кең кеңесте бас қосып отырған жайымыз бар. Ауданда бюджет қаражатын тиімді басқаруға байланысты маңызды іс-шаралар қабылдануда. Жүйелі жұмыстың жасалуына себепкер атанған сала мамандары тексеру нәтижесін шығарып, мәселенің шешімін табуға қатысты өз ұсыныстарын ортаға салуға ауданымызға арнайы келген еді. Шын мәнінде, сала мамандары сан сала бойынша жүзеге асыралған мәселелерді егжей-тегжей баяндайттын болады. Жалпы, семинар-кеңесті ұйымдастырудың негізгі мақсаты – мемлекеттік және квазимемлекеттік сектор субъектілерінде қаржылық бұзушылықтардың алдын-алу, қаржылық тәртіпті нығайту және бюджет қаражатын пайдаланудың тиімділігін арттыру, – деді аудан әкімінің орынбасары.</blockquote>Өз кезегінде мемлекеттік аудит, қазынашылық органдарының, мемлекеттік сатып алу саласының өкілдері баяндама жасады. Жалпы, сала мамандары келтірген мәліметке сүйенсек, былтыр тексеру комиссиясы 21 аудиторлық іс-шара бойынша 157 аудит объектісін тексерген. Оның ішінде, 60 үстеме тексеру бар. Аудитпен қамтылған қаражат 191,2 млрд теңгені құраған. Атап айтқанда, республикалық бюджет қаражаты – 35,8 млрд теңге, жергілікті бюджет қаражаты – 155,4 млрд теңге екені жан-жақты сараланған. Мемлекеттік аудит нәтижесімен, 37,7 млрд теңгенің бұзушылықтары анықталған. Қаржылық бұзушылықтар – 4,8 млрд теңге, тиімсіз пайдаланылған бюджет қаржысы, мемлекет активтері – 8,1 млрд теңге, тиімсіз жоспарлау – 24,8 млрд теңгені құрады. Тексеру барысында білім, денсаулық, аудандарға қарасты бөлімдер және басқа да бірнеше сала қамтылған. Орын алған заң бұзушылықтар бойынша сот, уәкілетті органдар қарауына 1114 әкімшілік материал жолданып, 313 тұлғаға 32,1 млн теңге әкімшілік айыппұл салынса, 753-іне «Ескерту» түріндегі әкімшілік жаза қолданылған. Орын алған бұзушылықтар мен кемшілікті жою бойынша 90 нұсқама қабылданып, тиісті мемлекеттік мекемелер мен ұйымдарға 207 тапсырма мен ұсынымдар берілген. Биыл 24 аудиторлық іс-шара бойынша 140 аудит объектісін қамтуды жоспарланыпты. Атап айтқанда, білім, денсаулық, спорт салаларын және квазимемлекеттік сектор субъектілерін тексеру жоспарға енгізілген.Семинар-кеңес қорытындысымен есепші мамандарды арнайы курстарға оқытып, біліктілігін арттырып отыру бойынша ұсыныс мемлекеттік мекемелер мен квазимемлекеттік сектор басшыларына ұсынылды. Сонымен қатар жиналған көпшілік жиында көтерілген мәселелерге қатысты сауалдарын жолдап, сала мамандарынан тұщымды жауап алды.

Қазақстан және Қызылорда облысының жаңалықтары