<a href="https://kyzylorda-news.kz/">Kyzylorda-news.kz</a> &nbsp;Соңғы 42 жылдан бері ерекше аталып өтілетін «29 сәуір – халықаралық би күні» мерекесі аясында аудандық мәдениет үйінде «Сырлы сезім толқыны» бишілер фестивалі өткізілген болатын. Аталған іс-шара барысында «Сұлу-ай» шығармашылық өнер орталығының бишілері өнер көрсетті. Атап айтқанда, аудан бойынша 14 би ұжымының ішінен ақжармалық «Сұлу-ай», асқарлық «Айтұмар», бесарықтық «Гүлсара», айдарлылық «Нұрай» би ұжымы көпшіліктің ыстық ықыласына бөленді.&nbsp; «Сұлу-ай» шығармашылық өнер орталығының ұлағатты ұстаздары мен шәкірттері аудан әкімі Берік Сәрменбаевтың арнайы «Алғыс хатын» иеленді. Өз кезегінде орталық құрылтайшысы ұжым мүшелерін мерекемен құттықтады.&nbsp; – Бүгінде орталық құрамындағы би ұжымдары жоғарғы жетістікке қол жеткізіп келеді. Сенім артып, би үйірмесіне әкелген ата-ана үмітін ақтау – басты мақсатымыз. Үнемі бишілердің қабілетін шыңдау арқылы деңгейі биік байқауларға дайындай береміз. Әрбір ауылда би үйірмесінің жолға қойылғаны – мәдениет саласындағы серпінді жұмыстарды арттырады. Өз кезегінде ұстаздар мен бишілерді кәсіби мерекемен құттықтаймын. Барлық аяулы жандарға шығармашылық табыс тілеймін, – деді орталық құрылтайшысы, аудандық мәслихат депутаты Анар Қалдыбаева.

«Сырлы сезім толқыны» бишілер фестивалі би ұжымдары өнер көрсетті

<a href="https://kyzylorda-news.kz/">Kyzylorda-news.kz</a> &nbsp;Бүгінде «Сұлу-ай» шығармашылық өнер орталығының өнерпаздары республикалық дәрежедегі байқауларда топ жаруда. Мәселен, кеше «JasSTAR» республикалық балалар, жасөспірімдер және жастар фестиваль-конкурсында бірнеше өнерлі өрен жеңімпаз тұғырынан көрінді.&nbsp;Бұл ретте, «Ұлттық би» жанры бойынша «Айтұмар» би тобы І орын иегері атанды. Сонымен қатар республика көлемінде үздік ауыл қатарына жататын Нағи Ілиясов ауылының «Наз-Ару» би тобы жүлделі ІІ орынды жеңіп алды. Ал «Эстрадалық ән» жанры бойынша жас әнші Ерсұлтан Тәуекелов ІІ орынға қол жеткізді.&nbsp; – «Сұлу-ай шығармашылық өнер орталығында талантты өрендер қатары жеткілікті. Апта ағымында біренеше байқауда бақ сынаған шәкірттеріміз мерейімізді тасытты. Әрине, жүйелі жұмыс пен сапалы білімнің арқасында біздің балаларымыз киелі сахнаның төріне шығуда. Ұстаздардың еңбегіне дән ризамын. Жыл көлемінде көптеген байқауға қатысуға ниетті өнерпаздарымыз баршылық. Оларға әрқашан қолдау көрсетеміз, – деді орталық құрылтайшысы Анар Қалдыбаева.&nbsp; «JasSTAR» республикалық балалар, жасөспірімдер және жастар фестиваль-конкурсында даралана білген шәкірттердің аяулы ұстаздары – Жанат Шайзадаева, Аружан Әлішерова, Аяулым Бекболатова екенін айта кетейік.

Сырдариялық өнерпаздар республикалық байқауда топ жарды

<a href="https://kyzylorda-news.kz/">Kyzylorda-news.kz</a> Қазір бәрі несиеге беріледі. Ішер ас, киер киімнің бәрін жұрт несиеге алуды әдетке айналдырғаны қашан. Қалтаңыз жұқара қалса бұрынғыдай дүкеншінің қас-қабағын бағып, қарыз сұрамайсыз. Несиеге кез келген дүниені алуға болады. Қарызын қайтара алмай аузы күйген кәсіпкерлер де бұл ретте пайыздық мөлшерлемесін қосып, сізге бөліп төлеуге беруге қуана келісе кетеді. Қазір несиесіз адам кем де кем. Бұл ретте банктер тарапынан да тиімді ұсыныстар әзірленген. Қазір екінші деңгейлі банктердің кез келгені бөліп төлеуге арналған түрлі төлем карталарын әзірлеп қойған. Ол сіздің айлық табысыңыз бен төлеу мүмкіндігіңізді ескерместен беріледі. Ендеше бүгінде мінсіз өмірін несиемен өрнектеп, тапқан табысы несие төлеуден артылмайтын жандарға назар аудармақпыз.2022 жылы Жетісу облысына іссапармен барған Қасым-Жомарт Тоқаев елдегі несие мәселесіне тоқталған болатын. "Шын мәнінде, әділдік болмаса, ешбір сала дамымайды. Халқымыз "Әділ істің – бәрі игі" деп бекер айтпаған. Құзырлы органдар, лауазымды тұлғалар шешім қабылдағанда осыны әрдайым есте ұстауға тиіс. Әділетсіз қабылданған шешім биліктің беделін түсіреді. Қоғамға іріткі салып, халықтың наразылығын тудырады. Сондықтан, ешқашан әділдіктен аттауға болмайды. Барлық мемлекеттік қызметшіден әділ болуды талап етемін. Сонда ғана біз берекелі қоғам, мықты мемлекет боламыз. Мен тағы бір күрделі мәселеге тоқталғым келіп отыр. Елімізде көп адам несие алып, қарызға батып жүр. Бұл мәселе мені де қатты толғандырады. Таяу арада мен осы мәселе бойынша ұсынысымды халыққа жариялаймын", - деді Президент.Қазақстанда 21 жастан асқан адам несиеге қол жеткізе алады. Психологтың айтуынша, қарызға тәуелділік адам санасында аяқ астынан қалыптасқан жоқ, ол ертеден бар құбылыс. Несиеге, қарызға тәуелділік адамның түрлі психологиялық күйіне тән. «Көп жағдайда бұл симптомға шалдыққандар қаржылық жағдайын түзетуді емес, белгілі бір эмоцияны сезінгісі келеді.&nbsp;Жеке бюджетін&nbsp;сауатты жоспарлауды білмейтін, қызыққан нәрсенің бәрін алғысы кеп тұрудан да туындайды.&nbsp;Бұл қатардағы адамдар «бүгін жолым болмаса, ертең сәті түсер, қарыздан құтылармын» деген жеңіл оймен өмір сүреді. Бірақ қаржылық жағдайы жақсармаса, уақыт өте келе қарызды қарызбен жамайды. Бұл – бір жағынан белгілі бір эмоцияны қайта сезінгісі келу немесе оңай жолмен мәселені шешу. Несиеге алудың өзі жұмыс істемей-ақ, қалаған нәрсеге ерте қол жеткізуге мүмкіндік береді. Сондықтан кейбір адамдар осы жақсы сезімді сезінуден бас тартпайды» деген уәждер келтіреді мамандар.Қазіргі күні миллиондап несие алып, қарызға батқандардың бірі – Гүлжанат. Ол түрлі сайттар мен интернет магазиндерден қызықтырған затын алу үшін несие карталарын пайдаланған. Ақырында тапқан табысы қарызын жабуға жетпеген соң қомақты кредит алуға мәжбүр болған.&nbsp;– Өзімнің тұрақты жұмысым бар. Бірақ айлығым анау айтқандай аз болмаса да орта топқа жатады. Әлі тұрмысқа шыққан жоқпын. Ата-анам ауылда тұрады. Мен жұмыстың ыңғайына қарай қалада пәтер жалдап тұрып жатырмын. Тұрақты жұмысым болған соң маған кез келген банк несиені оңай рәсімдей салады. Олардың көбі айлық табысқа жіті назар сала бермейтін болған соң бірнеше банктің бөліп төлеуге қолайлы карталарын аштырып алдым. Түрлі сайттар мен интернет магазиндерден өзіме ұнаған киімдер, косметика, әшекей-бұйымдар, басқа да тұрмысқа қажетті заттарды сатып алып отырдым. Ол жерде бізден едәуір арзан бағада ұсынылғандықтан, ойланбастан карта арқылы төлем жасап тапсырыс бере бердім. Бірақ өкінішке орай алған кейбір заттарым сапасыз, сыртындағы суретінен тым басқа болып келді. Оны кері қайтара алмадым. Осылай бірін пайдалансам, бірі іске алғысыз болып қалды. Ал мындағы қарыздарым шаш етектен асты. Айлығым тек несие мен пәтер ақысын төлеуге ғана жететін болған соң әр жердегі майда-шүйде берешектерімді біріктіріп, қомақты несие алуыма тура келді, – деген бойжеткен өзінің көрсеқызарлығына өкінеді.Ұлттық банктің мәліметінше, 2023 жылы 7 миллионнан астам қазақстандықтың банк алдында берешегі бары анықталған. Несиенің жалпы сомасы 15 триллионнан астам теңгені құрап отыр.&nbsp;Ұялы телефон, тұрмысқа қажетті техникалар, автокөлік, қомақты қаражаттан бөлек, қазір, тіпті киім мен азық-түлікті несиеге алу қиын емес. Қазақтардың үйленгеннен бастап, үй болғанға дейінгі әрекеті несиеге байланған. Мамандар мұны қаржылық сауаттық жоқтығынан деген уәж айтады. Себебі елдегі халықтың тең жартысы депозиттік салымдар емес, алған қаржысының жартысындай өсімді қоса қайтаратын банктердің бірнешеуіне несие төлеп, әлек болуда.Бірнеше жыл екінші деңгейлі банктің Арал аудандық &nbsp;бөлімшесінде жұмыс істеген Жеңісбек Аралбекұлы несие алуға ниетті аралдықтардың көп екендігін айтады.&nbsp;– Банк тарапынан несие ұсыну бізге қолайлы. Өйткені қосымша сыйақы төленеді. 5 жылда байқағаным тұрғындар кез келген қажеттілікті несиенің көмегімен шешкісі келеді. Біз алдымызға келген тұтынушыдан несиені не мақсатта алып жатқандығын сұраймыз. Сонда олардың көбі баласын үйлендіру үшін, үй салу, көлік алу сияқты қажеттіліктен бастап майда-шүйде дүниелер үшін де несиеге бас қояды. Келісімшартқа да мұқият назар аударатындар некен-саяқ. Сұраған қаржысын мақұлдағанда ол адамнан бақытты жан жоқтай көрінеді, – дейді ол.Қазір нарық пен маркетингтің дәуірі. Бірақ, дей тұрғанмен халық әлі де айлықтан айлыққа әзер жетіп өмір сүруге үйреніп қалған. Айдың соңы айлыққа жетпей тұралаған халық жаппай банктің түрлі карталары арқылы қажетін өтеуге асығады. Сарапшылардың зерттеуіне мән берсек, адамдар материалдық, қаржылық жетіспеушіліктен қарызбен жабуға мәжбүр болады екен.Әрине, несие төңірегінде айтылар әңгіме аз емес. Кірісін жүйелі есептей білмей банкердің бірнешеуіне қарыз болып соттың алдын тоздырғандар да бар. Соңғы жылдары халықтың осындай қаржылық қиындыққа тап болғанын ескерген президент банкроттық туралы да заңды бекіткен еді. Бұл белгілі бір себеппен банк алдында берешегін өтей алмай жүргендерге рақымшылық жасауға бағытталған. Арал ауданында заң күшіне енгелі бері өтініш берген 12 тұлға банкрот деп танылған көрінеді.Бізге көрсеқызарлықтан арылып, көрпеге қарай көсілуді үйрену керек сияқты. Қаржыны мақсатты пайдаланып, үнемді жұмсауды үйренбесек, несиеден бас көтермей өтуіміз бек мүмкін. Бұрындары несие болмаған кезде де адамдар жаман өмір сүрген жоқ. Қазіргі жаппай қарызға батумыздың жалғыз себебі – өзіміздің қаржылық сауатымыздың төмендігі мен қажетті де қажетсіз дүниені несиеге алуды дағдыға айналдырып алғанымыз. Айына шаққанда болмашы сумманы көрсеткенге мәз болып «қайда қалмай жатыр. Одан да алып қойсам бір дүние болып қалады» деп өзімізді жұбатамыз. Ал сол ай сайынғы төлейтін болмашы теңгеңіз жылдармен есептелгенде қалтаңызды опырып түсер қомақты қаражат шықпай ма?!&nbsp;Осындайда қарыз күліп кіріп, жылап шығатынын әркез есте ұстаған жөн.&nbsp;Фото: Нұрболат Нұржаубай

Халықтың қаржылық мәселесінің оң шешілуі мемлекет назарында

<a href="https://kyzylorda-news.kz/">Kyzylorda-news.kz</a>&nbsp; Халықтың алтын мұрасы, қымбат қазынасы – архив қоры. Уақыт өтеді, ескі көнереді, бірақ рухани мұраның келешек ұрпаққа берер тағылымы мен тәлімі мәңгілік жалғасады.9 мамыр мерекесі жақындап келеді. Тұтқиылдан Кеңестер Одағына басқыншылықпен шабуыл жасаған неміс фашизмінің адамзат баласына жасаған қайғысы мен қасіретіне қанша жыл өткенімен, соғыстың барлық ауыртпалығын басынан өткізген бұрынғы көпұлтты Кеңес халқы ешқашан ұмытпайды. «Ер есімі – ел есінде» демекші, мақалаға арқау еткелі отырған батырларымыздың бірі – қармақшылық Махамбетжан Ермаханов.Майдангер 1919 жылдың қыркүйегінде Қармақшы ауданына қарасты №6 ауылында кедей шаруа отбасында дүниеге келген. Ата-анадан жастайынан жетім қалған ол жұмысқа ерте жегіліп, өзінен кейінгі інісі мен қарындасы Садық пен Күлпашты асырайды. Інісі мен қарындасын немере ағасы, жырау Молдахмет Дабылұлына аманат етіп, 1939 жылдың 19 қыркүйегінде Совет Армиясы қатарына алынады. Махамбетжан армия қатарында жүріп Финляндия соғысына қатысады. 1941-1945 жылдары Ұлы Отан соғысының ауыртпалығын бастан өткізіп, Беларус, Калинин, Батыс майдандарында және Украина, Прибалтика, Москва үшін шайқастарда жауға қарсы жан аянбай шайқасқан.1941 жылы ол ІІ-ші Украина мергені, мергендер бөлімінің командирі, танкіге қарсы ататын ПТР мылтығының бірінші нөмірлі атқышы, барлаушылар тобының жетекшісі болып, Харьков қаласы түбіндегі қиян-кесті ұрысқа, Сталинград майданына, Ленинград блокадасына, Днепр өзенінен өтетін сұрапыл шабуылға қатысып, Курск доғасындағы шешуші шайқасқа белсене араласқан. Бір жылдан кейін Кривой-Рог қаласын азат етуде оң қолынан, одан кейін де төрт рет ауыр жарақаттанып, талай рет ажалға бетпе-бет келген. Майдан даласында жүріп, партия қатарына өткен.Жауынгер 1944 жылдың жазында үшінші топтағы мүгедек болып туған еліне оралады. Сол кезде ол небәрі жиырма бес жаста болыпты. Елге аман-есен келгеннен кейін Ақжар ауылының қызы Гүлжаһан Байсаловамен отбасын құрып, жеті бала тәрбиелеп өсіреді. 1945 жылы туып-өскен ауылы Аманкелді ұжшар Қашқансу байланыс бөлімшесі ашылып, ол соның бастығы болып тағайындалып, 37 жыл бойы абыройлы еңбек етеді. Аудан экономикасының өсіп-өркендеуіне зор үлесін қосып, құрметке бөленген. Еңбегі жоғары бағаланып ІІ-дәрежелі Отан соғысы орденімен, 1941-1945 жылдардағы Ұлы Отан соғысы жеңісінің 20, 30 жылдығы, «Еңбек ардагері», «Еңбектегі ерлігі үшін» медальдарымен марапатталады. 1982 жылы тағдырдың жазуымен 63 жасында дүниеден озған.Халқымызда «Еңбек ерлікке жеткізер, ерлік елдікке жеткізер» деген дана сөз бар. Иә, жалындаған жастық шағында оқ пен оттың ортасында болып, Жеңіс күнін жақындатуға үлесін қосқан, бүкіл ғұмырын ел дәулетін арттыруға арнаған ардақты жандар ешқашанда ұмытылмайды. Осындай майдангер аталарымыздың өмір жолын зерттеп, ұлағатты істерін кейінгі өскелең ұрпаққа жеткізу – біздің міндетіміз.Архив қорында Ұлы Отан соғысы майдангерлерінің өмірлері және қызметтері жайлы құжаттар сақталуда. Келешек ұрпаққа, зерттеушілерге, мектеп оқушыларына насихаттау мақсатында мәліметтер беріліп, тақырыптық көрмелер өткізіліп отырылады. &nbsp;

Қармақшылық Махамбетжан Ермахановтың майдандағы ерлігі 

<a href="https://kyzylorda-news.kz/">Kyzylorda-news.kz</a> Күдікті қамауға алынды. Алматыдағы мәйітханада өлген адамдарға зорлық жасаған күзетші туралы әріптестері айтып берді,&nbsp;–деп жазады <a href="https://kyn.kz/34422/balalar-a-tiisken-almatyda-m-yittermen-zhynysty-atynas-a-t-sken-k-zetshi-turaly-riptesi-s-mdy-zhaytty-aytty?fbclid=IwZXh0bgNhZW0CMTEAAR0mLsILcuj0pqQJMEtdfJpNTjPDAs7olUz39F4PeieIrnFXC7L2LES48_o_aem_ARq-VLHHMbhHtadIjwxi_1yLsdvhFUMF-HxqRQWP60Xuoywaczv3zCsCYYsIpnDeSleA9n6-1H5IrexuRsV8HUsR">KYN.KZ</a> тілшісі.Адам мүрделерімен жыныстық қатысқа түскен күзетші дау шыққан мекемеде 2023 жылы жұмыс істеген екен. Әріптестерінің айтуынша, психикалық ауытқуы болуы мүмкін.<blockquote>"Ол кісі біздің алдымызда осы жерде жұмыс істеген. Бала-шағасы бар-жоғын білмеймін. Естуімше, жалғыз тұрады, үш бөлмелі пәтері бар. Әпке-жездесі бар екен, бірақ олар бөлек тұрады екен. Әке-шешесі жоқ. Бізге мәйітхананың ішіне кіруге рұқсат жоқ. Біз сырта қақпаның есігін ашамыз, жабамыз. Бірақ ол кісі сол кезде жұмыста болған, сол сәтте ғимаратқа кірген шығар. Бәлкім сол кезде өзінің әрекетін іске асырған. Мен кеше ғана естідім де таңғалдым. Ол кісі психикалық ауытқуы бар адамдардың есебінде тұрған дейді. Өйткені кішкентай балаларды жыныстық қатынасқа тартқан деп естідім. Сіздерге беретін ақпарат осы ғана", – дейді мәйітханадағы күзетші әйел.</blockquote>Қоғамды дүр сілкіндірген бұл оқиғаға қатысты Алматы қалалық Полиция департаменті баспасөз қызметі дереу ресми пікір білдірген еді."Аталған дерек бойынша қылмыстық іс қозғалды. Күдікті ұсталып, уақытша ұстау изоляторына қамалды. Тергеу жалғасуда", – деді Салтанат Әзірбек.Күдікті қамауға алынды. Ал мәйіттерді қорлаған ер адамды қандай жаза күтіп тұр? Осы орайда заңгердің де пікірін білген едік.<blockquote>"Кейбір мемлекетте бұл азғындық, адамгершілікке қарсы қылмыс деп саналса, кейбір мемлекетте психологиялық ауытқу болып саналады. Оны әр мемлекет әртүрлі емдейді. Бірі оны психиатриялық емдеуге жіберсе, кейбір мемлекеттерде ол үшін қатаң жаза, тіпті өлім жазасына дейін бар. Ол туралы біздің ҚР Қылмыстық кодексінде бар. Бұл бірнеше бап болуы мүмкін. Қазақстанда бұл аса ауыр қылмыстың санатына жатпайды. Қазақстанда қылмыстардың төрт санаты болса, бұл ауырлығы бойынша орташа қылмыс санатына жатады. Бірақ біз мұны жазасын беруді ғана емес, қоғам ешқандай қылмысқа төзбейтінін көрсетуіміз керек. Яғни тірі адамға жасалған қылмыс болсын, өлі адамның мәйітіне жасалған қылмыс болсын біз зорлық-зомбылықтың барлық түрімен күресуіміз керек. Бұл азғындық екенін, адамгершілікке жатпайтын, адамшылыққа қарсы қылмыс екенін үнемі айтуымыз керек", – дейді заңгер Айгерім Құсайынқызы. &nbsp;</blockquote>Медицина саласындағы мамандар мұндай адам шошырлық әрекетке барған адамдардың психикалық ауытқуы барын айтады. &nbsp;<blockquote>"Некрофилия – мәйітке құмарлық, өлі тәнге құмарлық. Бұл жас таңдамайды, әртүрлі жастағыларда бола береді. Мысалы, жасөспірімдерде болуы мүмкін, қартайған адамда болуы мүмкін. Мәселен, кейбір отбасыларда алға ұмтылу жоқ, бір-бірімен байланысы жоқ, бір-бірімен араласпайтын, сөйлеспейтін, мейірімі мен махаббаты жоқ отбасылардың кейбір балалары да осындай "некрофилия" деп аталатын дертке шалдығуы мүмкін. Бір сөзбен айтқанда, бұл психикалық ауытқу, психикалық ауыру. Педофилияның тағы бір түрі. Некрофилияның әйелі де, еркегі де болады", – дейді танымал психиатр Санжар Тұрсынметов.</blockquote>Еске сала кетсек, мәйітхана күзетшісі өлген адамдарға жасаған азғындық әрекетін бейнекамераға түсіріп, кейін ұялы телефонын ломбардқа өткізген. Сол сәтте оның адам шошырлық қылмысы әшкере болады.&nbsp;Фото: Stan.kz

"Балаларға тиіскен": Алматыда мәйіттермен жыныстық қатынасқа түскен күзетші туралы әріптесі сұмдық жайтты айтты

<a href="https://kyzylorda-news.kz/">Kyzylorda-news.kz</a> Ұлтымыздың ұрпақ қамына келгендегі ұстанымы әсте ұсақталған емес. Ал тумысынан тағдырдың теперішіне ұшыраған балалардың қоғамнан екі есе қолдау күтетіні анық. Ерекше бала тәрбиелеп отырған әрбір ата-ананың асыл арманы&nbsp;– ұрпағын оңалтып, аяққа тұрғызу, мына өмірге бейімдеу. Бүгінде осы санатты отбасыларға демеу болып, жан-жақты қолдау көрсететін оңалту бөлімі біздің ауданда да жүйелі жұмыс атқарып келеді.&nbsp;Шиелі аудандық жұмыспен қамту және әлеуметтік бағдарламалар бөлімі, балаларға және 18 жастан асқан адамдарға үйден әлеуметтік қызмет көрсету бөлімшесінің&nbsp;ерекше балалардың мүмкіндіктерін дамытуға қосып жатқан үлесі зор екенін айтпай кетуге болмайды. Бөлімнің әлеуметтік қызметкерлері бала тәрбиесін басты байлық санап,&nbsp;ата-анаға артылған жауапкершілік жүгін жеңілдетіп жүр. Мұнда тәрбиеленіп жатқан жандардың болашақтан күтері көп. Балдырғандардың ілім үйренуге ықыласы жоғары. Олар білгенін ортаға салады, әуелете ән шырқап, мың бұрала билей де алады. Балалармен өткен сондай жылы жиынның біріне түнеукүні куә болдық.&nbsp;Шиеліге қарасты Көкшоқы мөлтек ауданында орын тепкеп "Арман" мәдениет үйінде аталған бөлімнің&nbsp;әлеуметтік жұмыскерлерінің ұйымдастыруымен&nbsp;"Бірлікке ұласқан – Жеңіс" тақырыбында мерекелік іс-шара өткен болатын. Шараға Шиелі аудандық жұмыспен қамту және әлеуметтік бағдарламалар бөлімінің орынбасары Бақытжан Бәйділдаев, балаларға және 18 жастан асқан адамдарға үйден әлеуметтік қызмет көрсету бөлімінің меңгерушісі Сара Көшкінбаева, "Арман мәдениет үйі" КМҚК-нің директоры Нұргүл Шалекеева, психологиялық-педагогикалық түзету кабинетінің педагог-психологы Жансая Асанқызы, айқындаушы Ануза Шамұратова қонақ болды.&nbsp;Жас ұрпақты елдің ұйытқысына айналған ынтымақ пен бірлікке үйретіп, ата-баба аңсаған Ұлы Жеңістің маңызын ұқтыруды мақсат еткен жиын барысында балалар мамыр айындағы мерекелер жайында әңгіме өрбітті. Олар Бірлік және ынтымақ күні, Жеңіс күніне қатысты сұрақтарға жауап беріп, маңызды даталар туралы ақпаратқа қанықты. Бұдан кейін арнайы даярланған күн бейнесіне шуақтар жабыстырып, татулыққа һәм тыныштыққа үндейтін бірліктің символын жасап шықты. Сондай-ақ шара кезінде әлеуметтік қызметкерлер мен оқушылардың жеңіс күніне арналған көрінісіне кезек беріліп, балаларға сұрапыл соғыста батырлық көрсеткен қаһармандардың есімі, ерлік істері түсіндірілді. Қонақтар майданда қан кешіп, кеудесін оққа тосқан боздақтарды бір сәт үнсіздікпен еске алды. "Бейбітшілік жасасын! Жеңіс туы мәңгі желбіресін!" деген сарында жалғасқан іс-шарада оқушылар бар өнерін ортаға салды. Әртүрлі халықтың ұлттық биін билеп, көк туды желбірете ән шырқап, патриоттық рухты хормен тәмамдады.&nbsp;Мерекелік кеш соңында балаларға марапат қағаздары үлестіріліп, арнайы сыйлықтар тарту етілді. Қорытынды сөзді Сара Көшкінбаева алып, осындай игі шаралардың мол болуына тілек білдірді.<blockquote>– Бүгінгі іс-шара жоғары деңгейде өз мәресіне жетті. Балалардың бәрі жақсы атсалысты. Оқушыларымыздың дені сау болып, бізді түрлі жетістіктермен қуанта берсін. Келе жатқан мереке баршамызға құтты болсын, – деді ол.</blockquote>Шынында, ерекше балалардың ерекше дарынын ашуға жағдай жасап, қоғамнан шеттемей, мейірім мен қамқорлықты жүрегіне түйіп, оларға жан-жақты қолдау көрсеткен шараның көпшілікке тигізген шарапаты мол болды. Жиылған қауым мамандарға алғысын білдіріп, ерекше кешті ыстық ықыласпен қорытындылады.

Шиелі: Жасөспірімдерге жеңіс күні ұлықталды

<a href="https://kyzylorda-news.kz/">Kyzylorda-news.kz</a> Көрнекті қоғам қайраткері, ұлтты ұйыстыру бағытындағы іргелі істердің ұйытқысы болған алты Алашқа ортақ тұлға Иса Тоқтыбаевтың 130 жылдығына орай ауданда бірқатар мәдени-көпшілік, рухани-танымдық іс-шаралар ұйымдастырылған болатын. Аудан әкімдігінің, аудандық білім бөлімі мен білім және ғылым қызметкерлері кәсіподақ комитетінің қолдауымен №35 Иса Тоқтыбаев атындағы мектеп-лицейінде «Иса Тоқтыбаев: өмірі – өнеге, ғұмыры – ғибрат» тақырыбында ғылыми-танымдық конференция жүзеге асты.Негізі қайраткер-тұлғаның есімі берілген білім ордасында арнайы апталық өткізіліп, оған аудан педагогтары мен оқушылар белсене қатысты. Апталық аясында мақалалар мен әлеуметтік желідегі «Үздік пост» байқауы, жазба ақындар мүшәйрасы, шахмат турнирі ұйымдастырылған болатын. Ал ғылыми-танымдық конференция осы апталықтың қорытындысы ретінде өткізіліп, оған аудан әкімінің орынбасары Димаш Байдушев, аудандық деңгейдегі тиісті мекеме басшылары мен мамандары, тыл және еңбек ардагерлері, білім, мәдениет саласының көрнекті өкілдері, облысымызға, ауданымызға белгілі тарихшылар, өлкетанушылар және аудан мектептерінің директорлары мен мұғалімдері, қоғам қайраткері И.Тоқтыбаевтың аты берілген қасиетті қарашаңырақта ұзақ жыл еңбек еткен ардагер-ұстаздар мен жергілікті БАҚ өкілдері, сондай-ақ 130 жылдығы аталып өтіліп жатқан тұлғаның ұрпақтары қатысты. Конференцияны Қазақстан Жазушылар және Журналистер одағының мүшесі, Сырдария аудандық мәслихатының депутаты Ақтөре Ибрагимұлы ашып, жүргізіп отырды. &nbsp;– Дана халқымызда «Тарихты тұлғалар жасайды» деген тағылымы мол даналық сөз бар. Ал, тарихтың өзекті арнасы – жеке тұлға болса, жиынтығы – халық. Халықтан асқан әділ сыншы да, биік ұғым да жоқ. Ел есінде, халық жадында, тарих бетінде аты да, қызметі де сақталған, ел үшін еткен еңбегі бүгінгі ұрпақтың рухани қазынасына айналған ұлтымыздың біртуар перзенттері көп деп біз әркез зор мақтанышпен айтамыз. Сол мақтаныш сөздің астарында адам сенгісіз қиындықпен келген қажырлы еңбектің бар екені де даусыз. Бүгінгі конференция жұмысына арқау болып отырған көрнекті қоғам қайраткері Иса Тоқтыбаевтың да өмірі мен еңбек жолы қиындықтармен бетпе-бет келген сындарлы сәттерге толы десек артық айтқандық емес және оны уақыт та, тарих та әділ бағалағаны ақиқат. Сондықтан бүгінгі конференцияның ұйымдастырылуы мен өткізілуі бәріміз үшін, түптеп келгенде өткеніміз үшін де, бүгініміз үшін де, болашағымыз үшін де аса маңызды. Ең алдымен, «Иса Тоқтыбаев: өмірі – өнеге, ғұмыры – ғибрат» тақырыбындағы аудандық ғылыми-танымдық конференцияға қатысып отырған көпшілік қауымға шынайы ризашылығымызды білдіреміз, – деп бастады модератор.Мұнан кейін аудан әкімінің орынбасары Д.Байдушев ұлтымыздың біртуар перзенттеріне құрмет көрсету, олардың еселі еңбегін, ерлікке толы өмір шежіресін насихаттау, сол арқылы қоғамдық сананы жаңғыртуға үлес қосу ортақ міндет екенін айтып өтті. – Өздеріңізге белгілі, ұлтымыздың біртуар перзенттеріне құрмет көрсету, олардың еңбегі мен ерлігін насихаттау жұмыстарына Мемлекет басшысы Қ.Тоқаев әркез баса назар аударып, нақты тапсырмалар беріп келеді. Президенттің төрағалығымен өткен Ұлттық құрылтай отырыстарының барлығында ұлтты ұйыстыруға айтулы үлес қосқан тұлғалар тағдырынан тағылым алу жұмыстарын жүйелі ұйымдастыру міндеті жүктелді. Осы ретте көрнекті қоғам қайраткері Иса Тоқтыбаевтың алатын орны ерекше. «Мәдени-рухани, қоғамдық-саяси тарихымыздың қадір-қасиетін тереңнен пайымдап, елі мен жері үшін тер төккен тұлғаларымыздың болмысын жаңылмай танып отыру – ортақ парыз» дейтін болсақ, Иса Тоқтыбаевтың қиын да күрделі, сынақты да сындарлы өмір жолы нағыз қайраткерлік істерге толы болғанын аңғарамыз. Бүгінгі конференцияда көрнекті тұлғаның өмірі мен еңбек жолы тереңнен зерделеніп, тың мағлұматтар айтылады, өлкентанушылар мен тарихшылар мазмұнды баяндама жасайды деп сенеміз. Мұның бәрі бір мектептің тарихында ғана емес, бүтін бір ауданның тарихында қатталуы қажет дүние. Конференцияның И.Тоқтыбаевтың есімі берілген білім ордасында өткізілуі мен ұйымдастырылуы, оған еңбек ардагерлерінің, зиялы қауым өкілдерінің, ұстаздардың қатысуы – өте құптарлық іс. Жалпы, қайраткер-тұлғаның 130 жылдығы облыстық маңызы бар саяси іс-шаралар жоспарына енгізілген. Ол жоспарды облыс әкімі бекіткен және жыл көлемінде бірқатар іс-шаралар ұйымдастырылатын болады. Бүгінгі конференция сол іс-шаралардың ең маңыздысы деп есептейміз. Аудан әкімі Берік Әбдіғаппарұлының атынан конференция қатысушыларына шынайы ризашылығымды білдіріп, жұмыстарыңызға сәттілік тілеймін, – деген Димаш Серікбайұлы «Сыр елі – жыр елі» атанған қасиетті өңірде «Руханият жылы» жарияланғанын да айтып, бұл кезең айшықты жобалар мен жағымды жаңалыққа толы болатынын жеткізді. Конференция барысында арнай әзірленген бейне фильм көрсетіліп, кітап және сурет көрмесі таныстырылды. Сондай-ақ тыл және еңбек ардагері, Сырдария ауданының Құрметті азаматы Рақымжан қажы Бәйменов, ҚР Мәдениет саласының үздігі, өлкетанушы Жәнібек Маханбет, №35 И.Тоқтыбаев атындағы мектеп-лицейінің тарих пәнінің мұғалімі Кенже Тұрғанбекова, №35 И.Тоқтыбаев атындағы мектеп-лицейінің директоры Үміткүл Жұмабаева түрлі тақырыпта баяндама жасады. Баяндамашылар И.Тоқтыбаевтың өмір жолына, ұлт үшін атқарған қызметіне, қиындықпен бетпе-бет келсе де елге адал қызмет еткеніне кеңінен тоқталды. Сонымен қатар И.Тоқтыбаевтың ұрпақтарының атынан облыстық полиция департаменті ардагерлер кеңесінің төрағасы Серікбол Тұңғышбаев сөз сөйлеп, ұйымдастырушыларға, мектеп ұжымына ризашылығын білдірді. Ғылыми-танымдық конференция соңында апталық аясында ұйымдастырылған мақалалар мен әлеуметтік желідегі «Үздік пост» байқауының, жазба ақындар мүшәйрасы мен шахмат турнирінің жеңімпаздары марапатталды. Жеңімпаздар мен жүлдегерлерді аудандық ардагерлер кеңесінің төрағасы Мұса Келдібаев, спорт саласының ардагері Мектепхан Елеусінов, Сырдария ауданының Құрметті азаматы Сандыбай Сәдуақасов марапаттады. Жеңімпаздарға аудандық білім бөлімі басшысының алғыс хаты мен И.Тоқтыбаевтың ұрпақтарының атынан дайындалған қаржылай сыйлықтар табысталды. Марапаттау салтанатынан кейін арнайы қонақ асы беріліп, қайраткер-тұлғаның рухына Құран бағышталды. Қонақ асында ардагер ұстаздар Анар Ізбасарова, Сұлупан Шамшадинова, Патыма Алданова, Бағдаш Сағындық, аудандық тарихи-өлкетану музейінің директоры Салтанат Қуандықова сөз сөйлеп, пікір білдірді. Осылайша көрнекті қоғам қайраткері, ұлтты ұйыстыру бағытындағы іргелі істердің ұйытқысы болған алты Алашқа ортақ тұлға И.Тоқтыбаевтың 130 жылдығы аясындағы іс-шаралар нәтижелі қорытындыланды. Конференциядан кейін И.Тоқтыбаевтың ұрпақтары аудандық тарихи-өлкетану музейінде болып, аудан тарихымен, жетістіктерімен танысты.

«Иса Тоқтыбаев: Өмірі – өнеге, ғұмыры – ғибрат» тақырыбында конференция өтті

<a href="https://kyzylorda-news.kz/">Kyzylorda-news.kz</a> Әлемдегі ең қауіпті мамандықтардың бірі–<a href="https://massaget.kz/laws/kaz/docs/Z960000048_/">өрт сөндіруші</a>&nbsp;қызметі. Нағыз ер азаматтарға тән мамандық жүректілік пен батылдықты талап етеді. Диспетчер жауап берген соң дереу жолға шығып, өмірін бәйгеге тігіп өрт сөндірген қызметкердің еңбегі еселі. Күнде өлім мен өмірдің арасында арпалысып жүрген батырлардың құрал-саймандары сақадай сай, дайындықтары жоғары болуы керек. Себебі бұл іс сәл мүлт кетуді кешірмеуі мүмкін. Бұл бағытта елімізде арнаулы мекемелер жұмыс жасайды. Және бағымызға қарай, облыс бойынша мамандандырылған өрт сөндіру мекемесі біздің Арал ауданында орналасқан.&nbsp;Жалпы облыс бойынша алғашқы болып 1921 жылы Арал қаласында «Қауіпсіздікті қорғау орталығы өрт сөндірушілер командасы» құрылған болатын. Сол уақыттан бастап-ақ кеңестік қоғам өрт сөндіру ісіне айрықша мән берген болатын.Сонау 100 жылға жуық тарихы бар салада бастапқы кезде ерікті өрт командасы су жүйесіне бағынышты болды. Өрт сөндірушілерге әрқайсысы сыйымдылығы 300-350 литр болатын бөшке орнатылған екі ат арба беріліп отырған. Сол жағдайларға қарамастан, Аралдан шыққан алғашқы өрт сөндірушілер тобы өртке қарлығаштың қанатымен су сепкендей дабыл қағылған сәттен бастап өз жұмыстарын мүлтіксіз орындап, ерекше серпінмен қиын кезеңдерді еңсерді.&nbsp;Мұның өзі аудан үшін үлкен абырой әрі ерлердің ерен еңбегінің жемісі еді. Сол кезде басшылық қызметте Жуков Мефодий Иванович айналысқан еліміздің экономикасы мен әлеуметтік-тұрмыстық ахуалы өте қарқынды дамыды, қала көлемі ұлғайып, өндіріс пен кәсіпорын күн сайын қос қолдың саясындай дамып отырды. Соған сәйкес, қаладағы өрт сөндірушілердің міндеті дараланып, жұмыстары айқын көріне бастады. Осылайша 1933 жылы су жүйесін бақылаушы мекемеден бөлініп шықты да, қалалық өрт сөндіру командасының иелігіне сол уақытта 43 өрт сөндіруші қызмет етіп, олар қажетті құрал-жабдықтармен жабдықталды.Дүрбелеңге толы кезеңде өрт сөндірушілер командасының облыс орталығында емес, Арал қаласында құрылуының да өзіндік мәні бар еді. Қаланың жедел өсіп-өркендеуі, Волга қаласындағы аштан қырылудың аз-ақ алдында тұрған Ресей халқын сақтап қалуы, теңіз маржандары мен оған жан-жақтан түскен сұраныс оның болашағынан үлкен үміт күттіретін еді.Одан кейінгі мәліметтерге сүйенсек, 1934 жылы өрт командасының тұрақжайы ретінде қала орталығындағы &nbsp;бұрынғы атақта татар байының үйі берілген.&nbsp;1939 жылы сол кездегі талапқа сай өрт командасы күллі еліміздегі мекеме секілді ішкі істер министрлігінің қарамағына өтті. Сол тұста Арал өрт сөндірушілері Газ-АА автонасосына, цистернаның сыйымдылығы 2200 литр қол насосымен жарақтандырылған ЗИС-5 автокөлігіне ие болды. Және өрт сөндірушілердің жеке құрамы 41 жанға көбейді.&nbsp;Бұл жыл өрт сөндіру тарихында ең атаулы кезең ретінде есте қалған еді. Себебі бұрынғы ат арбаның орнын тілсіз жауды әп-сәтте сөндіре алатын техникалық құралдар бөлінген болатын, сонымен бірге өртке оранған үйлер мен қора жайларды сөндіруде бөшкелеп су таситын қиыншылықтар артта қалды. Қандай да бір тарих бетін ақтарсаңыз да тілсіз жаудың адам баласы үшін қаншалықты қайғы-қасірет екенін қапысыз ұғуға болады. Сондықтан бұл оқиғалар тізімі аудандағы үлкен қуанышты жаңалық болды.Бастапқыда Серекешов Тілек Бисенұлы, Мұсаев Алтынбек Жұмахметұлы, Жансеріков Сайлаубай Жансерікұлы және кейін Күмісов Мұрат Кеулімжайұлы басшылық еткен мекеме қиын сәттерді еңсеріп, Тлеулиев Құрманбек Кемалұлы бөлім басшысы болған уақытта, яғни 2017 жылы Арал аудандық «№3 мамандандырылған өрт сөндіру бөлімі» болып, соңғы үлгіде салынып қайта құрылған болатын.&nbsp;Бүгінде азаматтық қорғау подполковнигі Қалжанов Заур Ауезханұлы басшылық ететін өрт сөндіру бөлімінде 104 бірлік штат саны қарастырылған. Және 4 өрт сөндіруге арналған автокөлікпен, 1 жеке құрамды тасуға арналған «Урал» автокөлігімен,1 авариялық құтқару аспаптарымен жарақталған АСА-20 автокөлігімен қамтамасыз етілген. Мекеменің қазіргі қызметі туралы сұрағанымда:– Жалпы біздің өрт сөндіру қызметкерлері кезекшілік уақытында өрт сөндірумен қатар авариялық құтқару жұмыстарына да қатыстырылады. Оның ішінде жол-көлік оқиғасы кезінде автокөлік ішінде қалып, көмек қажет адамды көліктен шығару, алғашқы дәрігерлік көмек көрсету және жоғалған адамды іздеу, септікке түсіп, шыға алмай қалған үй жануарын құтқару сынды жұмыстар бар.2024 жылдың І тоқсаны бойынша қызметкерлер 4 рет өртке, 7 рет жану оқиғасына және 3 рет авариялық құтқару жұмыстарына қатысып, құтқару жұмыстарын жүргізді. Ал алдын алу шаралары бойынша қысқы уақыттағы от жағу мерзіміндеаудан көлеміндегітұрғындарға өрт қауіпсіздігі жөнінде нұсқаулықтар жүргізіліп келеді. Жыл сайын жаз айларында адамдардың көп шоғырланатын Қамбаш ауылындағы «Аққұмшық» жағалауында демалушыларға түсіндірме жұмыстарын жүргізу де назардан тыс қалған емес. Биылғы жылы да ол жұмыстар жалғасын таппақ, – деді Бөлім бастығының орынбасары, азаматтық қорғау капитаны Тоғысов Нұрбол Өтемұратұлы.Өрт сөндіруші азаматтар өзінің адал жұмыстарынан бөлек қоғамдық жұмыстардан да тыс қалған емес. Олардың ішінде арнайы мамандандырылған спорттық &nbsp;сайыстар мен қарапайым спорт түрлерін атап айтуға болады. Атап айтсақ, Қызылорда облысы бойынша Төтенше жағдайлар департаменті «Өрт сөндіру және авариялық құтқару жұмыстары қызметі» РММ қызметкерлері арасында жауынгерлік қанат жаю, оқу мұнарасының 4-ші қабатына көтерілу, 3 буынды саты арқылы оқу мұнарасының 3-ші қабатына көтерілу жарыстары бойынша 2023 жылы командалық есепте ІІ орын жеңіп алған болатын. Ал спорттық жарыстарда 2019, 2021 жылдары футболдан І орын, 2023 жылы ІІ орын алды. И.Д.Шульга атындағы дәстүрлі жеңіл атлетикадан өтетін эстафетада 2018, 2022, 2023 жылдары ІІ орын, 2019 жылы І орын алып, мекеме мерейін өсірген еді.&nbsp;Бүгінде еліміздің Батыс аумағын су басуына байланысты, Қызылорда облысы Төтенше жағдайлар департаментінің «Өрт сөндіру және авариялық құтқару жұмыстары қызметі» РММ бастығының орынбасары азаматтық қорғау подполковнигі Оспанов Бауыржан Айдарбекұлының бастауымен Арал аудандық өрт сөндіру бөлімінің 21 қызметкері Кунг вахтовка «Урал» автокөлігімен наурыз айының 29-нан беріАқтөбе облысына барып мотопомпамен су тарту және қала тұрғындарын қауіпсіз жерге көшіру жұмыстарымен айналысуда. Аталған аумақта 10 күнге жуық жұмыс жасап, Қостанай облысына қарай бет алған қызметкерлер негізгі жолдың екі жағына құм толтырылған қаптармен дамба жасап, елдімекендерді су шайып кетудің алдын алу жұмыстарын жасады. Сәуір айының 12-сінен бастап Батыс Қазақстан облысы, Орал қаласындағы су тасқынынан халықты эвакуациялау жұмыстарына бөлімнен тағы 21 қызметкер Қызылорда қаласынан келе жатқан құтқарушылармен бірге көмекке кетті. Бірнеше күн бұрын Арал қаласынан барған барлық 43 қызметкер Атырау қаласына көмекке аттанды.Әрбір өрт сөндіруші – қаһарман. Өмір мен өлім арасында жүрген, елі үшін ерен еңбек етіп жүрген азаматтар қашанда мақтан етуге тұрарлық.&nbsp;

Арал аудандық өрт сөндіру мекемесінің ахуалы қандай?

<a href="https://kyzylorda-news.kz/">Kyzylorda-news.kz</a> Халықтың медициналық қызметтердің сапасына шағымдарын төмендету мәселелері облыстық денсаулық сақтау басқармасының және Әлеуметтік медициналық сақтандыру қорының Қызылорда облысы бойынша филиалының бірлескен селекторлық отырысында қаралды.Талқылауға Қормен шарт жасасқан аймақтың медициналық ұйымдарының басшылары қатысты.ӘМСҚ облыстық филиалының директоры Бақыт Исмаханбетовтың ақпараты бойынша, азаматтардан өтініштер келесі байланыс арналары арқылы келіп түседі: Qoldau 24/7 мобильдік қосымшасы, 1414 байланыс орталығы, Е – Өтініш ақпараттық жүйесі. Ағымдағы жылдың бірінші тоқсанында Қызылорда облысының тұрғындарынан 200-жүзден астам шағым қабылданды. Көбіне медициналық көмектің сапасына қанағаттанбау, медициналық көмек көрсетуден бас тарту, медициналық қызметтерді ұзақ күту және т.б. Медициналық қызметтердің сапасын, медициналық ұйымдардың менеджмент деңгейін арттыру үшін өзекті мәселелерді шешуде өзара іс-қимыл жасау қажеттігі атап өтілді.Мәселен, медициналық ұйымдар басшыларының рейтингін енгізу, олардың функционалдық міндеттеріне шағымданған пациенттер үшін жауапкершілікті енгізу ұсынылды. Сондай-ақ медициналық ұйымдарда халықтың барлық шағымдарын жедел шешу бойынша тиімді шаралар қабылдайтын жұмыс топтарын қалыптастыру. &nbsp;

Медициналық қызметтердің сапасына шағымдарды азайту шаралары талқыланды

<a href="https://kyzylorda-news.kz/">Kyzylorda-news.kz</a> Осы жылдан бастап Сырдария аудандық мәдениет үйінде өзгеше, тың форматтағы «Сұхбат ТІМЕ» жобасы бастау алғаны мәлім. Осыған сәйкес, жақында Сырдария аудандық мәдениет үйінің ұйымдастыруымен «Адал адам» мәдени-тәрбие орталығы тұжырымдамасының «Сұхбат ТІМЕ» жобасы аясындағы сұхбаттың кезекті қонағы облыстық, республикалық байқаулардың жеңімпазы «Сырдария» квартетінің мүшелерімен сыр-сұхбат жүзе асты. «Сұхбат TIME» жобасының басты мақсаты – ауданға белгілі түрлі саладағы білікті мамандар мен танымал тұлғалардың еңбегін, өмір жолын халыққа, бүгінгі жас ұрпаққа насихаттау екені даусыз.Сыр мәдениетін өркендету жолында өнер әлемінде өзіндік орнын қалыптастыра білген, ерекше дауысты жігіттерден құралған «Сырдария» квартетін тек аудан көлемінде ғана емес, республикалық концерттерде де өнер көрсетіп жүргенін көпшілік жақсы біледі. Бүгінде дүйім жұртқа белгілі, өнер әлемінде бір үйдің баласындай өнер көрсетіп келе жатқан «Сырдария» квартетіне – 10 жыл. Аудандағы мерекелік іс-шара, әрбір концерт квартет жігіттерінің қатысуынсыз өтпейді десек артық айтқандық емес. Ауданымыздың мақтанышына айналған квартет мүшелері бүгінде эстрада жұлдыздарымен бір сахнада өнер көрсетіп, түрлі телевизиялық жобаларға қатысып жүрген жайы бар.Көңілді кеш өте өзгеше әрі қызықты бастаған еді. Олай деуге себеп кеш жүргізушісі Толғанай Мұратқызы жиналған көрермен қауымға белгілі-бір себептерге байланысты квартет жігіттерінің аяқ-асты сұхбатқа келе алмайтындығын жеткізіп, «алдау операциясын» ұйымдастырғаны көрерменге ерекше әсер етті. Алдымен жігіттермен сұхбатқа тікелей эфир арқылы байланысқа шығып, артынша студия төріне шақырғанда жүргізушінің сөзіне қатты сеніп қалған көрермен қауым таңғалып қалғаны көрінді. Ең алдымен, кеш жүргізушісі «Сырдария» квартетін 10 жылдық мерейтойымен құттықтады. Одан кейін арнайы дайындалған бейнеролик көрермен назарына ұсынылды. Көрсетілген бейне¬роликке байланысты жүргізуші тарапынан сұхбат қонақтарына бала күнгі қызығушылықтары, сахнаға алғаш шыққан кездері туралы сұрақтар қойылды.Өз кезегінде «Сырдария» квартетінің мүшелері өмірбаяндарын таныстырып, құрылғанына 10 жыл болған топтың шығармашылық тарихы жөнінде баяндады. Көрермен қауым «Сырдария» квартетін жаңа қырынан танып, қойылған сұрақтарға берген мазмұнды жауаптарына риза болды. Сұхбат барысында «Сырдария» квартетіндегі ағаларының жолын қуған ізбасарлары Дінмұхамед, Аян, Мерлан, Ғазиз атты әнші балақайлар ән айтып, өнерлерін көрсетті. Одан бөлек сұхбат барысында сергіту ойыны ойнатылды. «Сұраққа тез жауап» айдары бойынша «Кім топта үнемі кешігіп жүреді?», «Кім тамақты көп жейді?», «Кім сырды сақтай алмайды?», «Кім сәнқой?», «Кімнің тәбеті өте жақсы?», «Кім әзілге жақын?» секілді түрлі сұрақтар қойылды. Кеш қонақтары тұщымды әрі тез жауап беріп, көрермен квартет жігіттері туралы тың мағлұматтармен танысты. Сонымен қоса квартет жігіттерінің жақында ғана түсірілген бейнебаяны көрсетіліп, «Еркін микрофон» айдары бойынша көрермендер тарапынан сұрақтар қойылды. Бұдан бөлек кештің көңілді өтуі үшін ұйымдастырылған ойындар ойнатылып, сұхбаттың басты қонағы квартет жігіттері әсем ән шырқап, көрерменге жақсы көңіл-күй сыйлады. Ерекше жоба аясындағы сұхбат соңы ақжаулықты аналардың алғысымен, ардақты қариялардың жігіттерге айтылған жылы лебіздерімен қорытындыланды.<blockquote>– Жергілікті өнерпаздарды қолдау, олардың шығармашылығын насихаттау – ортақ міндетіміз. «Адал адам» мәдени-тәрбие орталығы тұжырымдамасының «Сұхбат ТІМЕ» жобасы аясында алдағы уақытта да түрлі бағытта іс-шаралар ұйымдастырамыз. «Сырдария» квартетінің жігіттеріне біздің шақыруымызды қабыл алып, көрерменмен кездесуге келгені үшін ризашылығымызды білдіреміз. Облысқа, республикаға танылған жігіттердің шығармашылық жетіс-тікке жетуіне тілектеспіз, – деп қорытындылады кеш жүргізушісі Толғанай Мұратқызы.</blockquote>

«Сұхбат тіме» жобасында «Сырдария» квартеті қонақ болды 

<a href="https://kyzylorda-news.kz/">Kyzylorda-news.kz</a> &nbsp;Айтыс саласының дүлдүлі, ақын, психолог Айнұр Тұрсынбаева туған күнін тойлап, жақындарының басын қосты. Бұл туралы <a href="https://stan.kz/kyni-2-million-tenge-aynyr-tyrsinbaeva-tugan-kunine-kel-399634/">Stan.kz</a> ақпарат агенттігі хабарлайды.Өнер иесі 44 жасқа толып жатса да, туған күн&nbsp;тойлауды онша ұнатпайтынын жасырмады.“Барлық ыстық ықыласқа, жылы лебізіңізге көп рақмет. Негізі туған күнді шулатып тойлатқанды жақсы көрмеймін. Түнгі 12.00-де&nbsp;Қайша Керей "Қазақстаннан сіз үшін арнайы келдік" деп Сartier&nbsp;сыйлап, қуантып қойды... "Жеген ас кешке жетпес, ықылас естен кетпес деген осы... Барлық гүл жіберіп жатқан алтындарыма Алла разы болсын!”&nbsp;–&nbsp;деп жазды айтыскер ақын.Желі қолданушылары түрлі пікір білдіріп, ақжарма тілектерін жаудырып жатыр.<blockquote>“Біз Айнұр әпкенің туған күніне сыйлық алуға шықтық. Таңдауымыз Сartier брендіне түсіп тұр. Құны 2 миллион тұратын білезік пен жүзік сыйламақпыз. Бізді қиын сәтте қолдап, көмек берген адам.&nbsp;Барлық бақытты тілеймін асыл әпке!&nbsp;Ағаммен осылай махаббатқа шомылып, бір жастықта қартайып, бала-шағаның қызығын бірге көріп, халықтың ықласына бөлене беріңіз”, – деп жазды бизнесвумен Қайша Керей.</blockquote>Еске салайық,&nbsp;Айнұр Тұрсынбаева күйеуінің тосынсыйын көрсетіп, “Мұндай сыйлық алған тарихтағы жалғыз әйелмін" деп әзілдеген еді.&nbsp;Фото:&nbsp;https://www.instagram.com/aidyn_nury/

"Құны – 2 миллион теңге": Айнұр Тұрсынбаева туған күніне келген сыйлықтарды көрсетті

<a href="https://kyzylorda-news.kz/">Kyzylorda-news.kz</a> Кәсіпкерлік саласының өркендеуі халықтың әлеуметтік әлеуетінің артуына ықпал етеді. Елдегі бұл саланың кеңінен қанат жайып, өркендеуіне жеке кәсіпкерлердің қосып келе жатқан үлесі зор. Әсіресе киелі Шиелі өңірінде дәл осы бағыт қарқынды дамуда. Оны кәсіпкерлер жеткен жетістіктерден аңғаруға болады. Ал дәйек ретінде Шиелі ауданының тұрғындары ағалы-інілі Нұрбол мен Еркебұлан Есеновтерді айтуға болады.&nbsp;Өздерінің еңбектерімен берекелі кәсіп түрін табысқа айналдырып отырған кәсіпкерлер қағаз майлықтар өндірісімен айналысады. Істі бастамас бұрын кейіпкерлеріміз ішкі нарықты егжей-тегжейлі зерттеп, өз мүмкіншілігін бағалап алған. Енді олар өндіретін өнімге сұраныс бар екенін де жақсы біледі. Қондырғылар күніне 3000 мың майлық шығаруға қауқарлы. Қытайдан жеткізілген бұл құрылғыны ағайынды бауырлар өз қаражаттарына сатып алған.<blockquote>– Негізі қағаз майлықтар – қоғамдық тамақтану кәсіпорындарда және үй тұрмысында кеңінен қолданылатын өтімді гигиеналық тауардың бір түрі. Жалпы, бұл кәсіп жайлы көп іздендік. Қалаларға барып талдау жасап, саралай бастадык. Содан бір күні «Шиеліге осындай ерекше өндіріс керек-ау» деген оймен тәуекел жасап жұмысты бастап кеттік. Нәтижесінде ойға алған кәсібіміз қазір жүзеге асуда, – дейді Нұрбол Есенов.&nbsp;</blockquote>Інісі Еркебұлан Есеновтың айтуынша, «Ordа» деп аталатын Қызылорда қағазы өте ыңғайлы. Өзінің ерекшеліктері де бар. Біріншіден, қолға жабыспайды әрі жұмсақ. Қағаз майлықтың 100 данасы – 140 теңгеден, ал 80 данасы – 110 теңгеден сатылады. Бүгінде аудандағы біршама қоғамдық тамақтану орындарынан сұраныс бар. Атап айтсақ, «Дәмді», «BBQ Fastfood», «Lime», «Төрлет», «Chery», «Maki Maki», «Зухра» және «Urbo», «Сlobal», «Honey mood», «Bake донер», «Тандыр самса», «Нұркелді» секілді мейрамханалар мен кафелерге таратылады екен.Кәсіпкерлікте адал еңбегімен өз замандастарына үлгі болып жүрген бұл азаматтардың кәсіптік идеясы өңір тұрғындарының көңілінен шығуда. Кәсіптің түбі нәсіп болатынын, жақсы бастама тек ғана биіктерге жетелейтінін олар әсте естерінен шығармақ емес.

Қазақстан және Қызылорда облысының жаңалықтары