<a href="https://kyzylorda-news.kz/">Kyzylorda-news.kz</a> &nbsp;Қаншама сала мамандарының ішіндегі ең жауапты да қастерлі маман иесі – дәрігерлер қай уақытта да үлкен зор құрметке лайық. Бас ауырып, балтыр сыздаған сәтте жанға шипа іздеп &nbsp;ақ халатты абзал жандардың көмегіне зәру болып қалатынымыз белгілі. Міндеті мен жауапкершілігі мол медицина саласының қызметкерлеріне артылар жүк те, атқарар жұмысы да ауыр екені сөзсіз. Уақытпен санаспай адам өміріне араша түсіп, науқастың денсаулығына бей-жай қарамай, жазылып кетуіне күн демей түн демей бар көмегін аямайтын дәрігердің еңбегі өлшеусіз, әркез бағалы. Осы тұста медицина қызметкерлерінің кәсіби төл мерекесі аясында игі істің жаршысы болып жүрген ақ желеңді абзал жандарға құрмет көрсетіп, елеулі еңбегін дәріптеуді жөн көрдік.&nbsp; Өмірін медицина саласына арнап, бүгінде жемісті еңбек етіп, халық ықыласына бөленіп жүрген білікті маманның бірі – Сырдария аудандық ауруханасының перзентхана бөлімінің неонатолог дәрігері Алтынай Ижазова. Қызметіне адал маман 1989 жылы Сәкен Сейфуллин ауылында дүние есігін ашқан. Бала кезінен дәрігер болуды армандаған ол №137 қазақ орта мектебінде білім алып, 2006 жылы аяқтап, бұрыннан жоспарлап жүрген медицина саласын таңдауға бекінеді. Бала күнгі арманға қол созып, соған жетуге күні-түні оқудан бас алмай, медицина саласының қыр-сырын меңгеріп, 2012 жылы Ақтөбе қаласындағы М.Оспанов атындағы медициналық университетінің педиатрия факультетін үздік қызыл дипломмен бітіріп шығады. Бір орында тоқтап қалмай, білімін одан әрі жетілдіру мақсатында 2013 АГИУВ деп аталатын жоғарғы оқу орнында неонатология курсынанан өтеді. Осылайша мамандықтардың асылы дәрігер болуды армандаған Алтынай Шаншарқызы алғашқы еңбек жолын 2013 жылы облыстық периниталдық орталықтың нәрестелер жан сақтау бөлімінде реаниматолог-неонатолог маманы болып бастайды. Білікті маман үшін жауапкершілік пен жұмысқа деген адалдық үнемі бірінші орында. Тәжірибесі мен білімі толысқан маман 2020 жылдан бастап Сырдария аудандық ауруханасының перзентхана бөлімінде неонатолог дәрігер қызметіне ауысып, бүгінде халықпен тығыз байланыс орнатып жүйелі жұмыс жасап келеді. Денсаулық сақшысы атанған білікті дәрігер қызметімен қатар білдей бір отбасының отынын түтетіп отырған ибалы келін, аяулы жар.<blockquote>&nbsp; &nbsp;– Неонатология – қызығы мен қиындығы қатар жүретін саланың бірі. Жалпы неонотология – балалардың физиологиялық ерекшеліктері мен ауруларын туғаннан өмірінің 28 күніне дейін зерттейтін бөлім. Біздер, яғни неотанолог маман жаңа туған нәрестенің бірқатар потологияларын емдеумен және оның алдын алумен айланысамыз. Сәбилердің дамуы мен өсу ерекшеліктерін бірнеше айға жуық уақыт бойы мұқият бақылаймыз. Бізге жұмыс барысында мүлдем қателесуге болмайды. Бір ғана қателіктің салдары үлкен қайғылы жағдайға әкеліп соғуы мүмкін. Сондықтан шала туылған шақалақпен жұмыс істеу оңай емес. Адамның тәнін емдеумен қатар білікті дәрігер оның жанын да емдей білу керек және аурудан жазылатынына сенімділік ұялата білу қажет деп ойлаймын. «Дәрігер – арыстандай айбатты, қыздай икемді, анадай мейірімді болуы керек» деген екен Ұлы дәрігер Гиппократ. Расында бұл салада мейірімді жүрек, ептілік, шыдамдылық қажет. Өмірге келген өте ауыр жағдайда туылған сәбиді аман алып қалуға қолымыздан келгеннің барлығын жасап, тырысамыз, үмітімізді үзбейміз. Жұмыс барысында емдеген нәрестелердің ата-аналарымен әлі де байланысымды үзбей, хабарласып отырамын. Біз үшін әр сәбидің денсаулығы маңызды. Бұрын соңды емдеп жазған нәрестелерім бүгінде аттай шауып, балалық шақтың ең қызық сәттерін кешуде. Халықтың алғысы мен ризашылығын алу мен үшін үлкен жетістік, мәртебе. Дәрігер үшін осыдан асқан бақыт бар ма? Өз мамандығын шын сүйетін дәрігер үшін атақтың да, байлықтың да қажеті жоқ. Дәрігерге ең керегі және ең қымбат – адамның денсаулығы, оның өмірі. Аналарға үнемі саламатты өмір сүру қағидасы – дені сау ұрпақ әкелудің кепілі деп айтудан жалыққан емеспін, – дейді білікті маман.</blockquote>&nbsp; &nbsp; &nbsp; Адам денсаулығының сақшысы Алтынай Ижазова өзінің ақ адал еңбегімен-ақ көпшіліктің қошеметіне бөленіп, алғысын арқалап жүрген білікті дәрігер. Әріптестерінің арасында сыйлы Алтынай Ижазова өз ісіне тиянақты, сауатты, білікті, жауапкершілігі мен өзіне жүктелген міндетті абыроймен атқарып жүрген озық дәрігер.&nbsp; &nbsp;Адал еңбекті бағалай білген адамға медицина саласы мамандары тұғыры биік тұлға. Медицина саласының мамандары қандай мəртебе, марапат болсын əбден лайық. Соған сəйкес құрмет көрсету – қайқайсымыздың да азаматтық борышымыз. Қаншама адамның өміріне араша болып, дертіне шипа таба білетін маман иелеріне әрқашан үлкен сенім артамыз.

Неонаталогия саласының білікті маманы

<a href="https://kyzylorda-news.kz/">Kyzylorda-news.kz</a>&nbsp; Нарықтық уақытта медицинада тың өзгерістер орын алуда. Мәселен, технология дамыған тұста көптеген аппарат пайда болып, адам денсаулығындағы кінәратты анықтауға мүмкіндік молая түсті. Бұл ретте, ултрадыбыстық зерттеу аппаратын жетік меңгерген дәрігер Салтанат Қожахметова емдеуші мамандарға бағыт-бағдар беруден шаршамайды.&nbsp;Ақжарма ауылының тумасы Салтанат Асқарқызы елді мекендегі мектептеп түлеп ұшып, Алматы қаласындағы Ж.Асфендияров атындағы Қазақ ұлттық университетінде оқиды. Сүйікті мамандығының иесі атанған дәрігер алғашқы еңбек жолын Жалағаш ауданында бастаған. Ал 2014 жылы Сырдария аудандық ауруханасына профпатолог болып қызметке орналасады. Сонымен қатар 2017 жылы ултрадыбыстық зерттеу дыбыстық дәрігері қызметі ауысады.&nbsp;Осыдан 10 жыл бұрын Шырынхан Сәметовтің аяулы жары атанған дәрігер 3 перзентіне тәлім-тәрбие беруде.&nbsp;<blockquote>– Жалпы, медицинада ултрадыбыстық зерттеу жүргізу – маңызды рөл атқарады. Біз қашанда нақты диагноз қоюға ықпал жасаймыз. Шын мәнінде, жедел шақыртуларға келіп, әріптестер қатарынан табыламыз. Сонымен қатар емханада жолдамамен келген науқастардың денсаулығына тексеру жүргіземіз. Әркез біліктілікті арттырып, жұмысты жетілдіріп отырамыз, – деді дәрігер.</blockquote>

Уақытпен санаспайтын дәрігер

<a href="https://kyzylorda-news.kz/">Kyzylorda-news.kz</a>&nbsp;Апта ағымында Сырдария аудандық сотының ұйымдастыруымен дөңгелек үстел өтті. Сот төрағасы Р.Алдамбергеновтің төрағалығымен өткен жиынға судья Д.Ералиев, билер кеңесінің төрағасы М.Келдібаев, аудан прокуроры А.Кемалов, аудан әкімінің орынбасары Д.Байдушев, жеке сот орындаушы Ж.Тұңғышбаев, медиаторлар, аудандық полиция бөлімінің қызметкерлері, адвокаттар, жер­гі­лікті атқарушы және өкілетті органдардың өкіл­дері қатысты. Күн тәртібінде жаңадан құры­латын кассациялық соттың мәртебесі туралы мәселе қаралып, талқыланды. Көтерілген ауқым­ды мәселе бо­йынша Сырдария аудандық сотының судьясы баяндама жасады.<blockquote>– Мемлекет басшысы Қасым-Жомарт Тоқаев өткен жылдың қыркүйек айында отан­дық бизнес өкілдерімен кездесу барысында азамат­тардың құқықтарын сапалы қорғауды қамтамасыз ету үшін жекелеген кассациялық сот­тар құрудың маңыздылығы туралы атап өтті. Президент­тің айтуынша, бүгінде қылмыстық және азаматтық істердің бес пайызы ғана кас­сацияға беріледі. Бұл аз және азаматтардың қажет­тіліктеріне сәйкес келмейді. Сондықтан дер­бес кассациялық инстанция құру мәселесі бойын­ша заң және кәсіпкерлік қоғамдастықпен консуль­тациялар өткізу қажеттігі пісіп-жетілді. Біз­дің ойымызша, тәуелсіз кассациялық инс­танцияны құру мәселесі өте өзекті. Бұл дау­лар­ды сырттан және объективті қарауға, аза­мат­тардың бостандықтарын сақтауға және олар­дың құқықтарын қорғауға оң әсер етеді. Республиканың әрбір азаматына мемлекеттік орган­дардың, ұйымдардың, лауазымды және өзге де адамдардың Конституцияда және елдің заңын­да көзделген құқықтарына, бостандықтары мен заңды мүдделеріне нұқсан келтіретін немесе шектейтін кез келген заңсыз шешімдері мен әрекеттерінен сот арқылы қорғалуына кепіл­дік беріледі. Азаматтардың құқықтары мен бостандықтарын қорғау мақсатында сот жүйе­сі әділдікті барынша объективті, ашық және жария түрде жүзеге асырады, – деген судья Дәурен Ералиев сот жүйесіндегі барлық оң өзгеріс­тер жалғасып, азаматтардың құқығы мен бос­тандығын қорғаудың тиімділігін арттыруға ық­пал етеді деген үміт бар екенін атап өтті.</blockquote>Сондай-ақ жиын соңында сот төрағасы «Қа­зақстан Респуб­лика­сы­ның кейбір заңнама­лық актілеріне әйелдер құқықтары мен балалардың қауіпсіздігін қам­тамасыз ету мәселелері бойынша өзгер­тулер мен толықтыру енгізу туралы» заңға енгізілген өзгерістерді түсіндіріп өтті. Бұл тұста заңнамадағы өзгерістердің маңыздылығы айтылып, әйелдер құқықтары мен балалардың қауіпсіздігін қамтамасыз ету басты назарда екендігі нақтыланды. Дөңгелек үстелге қатысушылар ойларын ортаға салып, өз сұрақтарына сала мамандары тарапынан жауап алды.<blockquote>– Сот билігінің негізгі мақсаты – азаматтар мен ұйымдардың құқықтарын, бос­тан­дықтары мен заңды мүдделерін қорғауды, рес­публиканың Конституциясының, заң­дарының, өзге де нормативтік-құ­қық­тық актілерінің, халықаралық шарт­тары­ның орындалуын қамтамасыз ету. Президент сот жүйесін реформалау аяқ­талмайтынын, ол соттан тыс маман­дар­дың көмегімен жетілдірілетінін айтты. Сонымен қатар Президент өз Жолдауында кассациялық деңгейде бо­лып жатқан реформалардың маңыздылығын да атап өтті. Мұның бәрі біздің бірлесе жұмыс істеп, заңдылықты сақтауды күшейтуімізге негіз болады, – деп қорытындылады сот төрағасы.</blockquote>Сот жүйесін жетілдіру – қоғамның әділ талабы десек, келер жылдан бастап елімізде дербес кассациялық сот құрылады деп жоспарлануда. Бұл мәселе қазіргі таңда халық арасында кеңінен талқылануда.

Сырдария аудандық сотының ұйымдастыруымен дөңгелек үстел өтті

<a href="https://kyzylorda-news.kz/">Kyzylorda-news.kz</a> Жер жаһанда отбасындай жылы мекен, ата-ананың махаббатындай ыстық құшақ жоқ-ау, сірә? Шаңырақты шаттыққа бөлеп, нұрландыра түсетін ішіндегі балалардың күміс күлкісі, риясыз көңілі. Әкенің қамқорында, ананың аялы алақанында ұғынықты ұл, қызғалдақтай қыз тәрбиелеп отырған ата-ана қатарында Мейрамбек Сисенбаев пен Әсем Хасанова да бар. Биыл олардың отау құрып, отбасылық өмірге қадам басқанына жиырма жыл.Мейрамбек Талғатұлы Әйтеке би кентінің тумасы. Әкесі – Талғат Сисенбаев теміржол саласында талай жыл тер төгіп, зейнет демалысына шыққан. Анасы – Майра Ілиясова үй шаруасында болып, бала тәрбиесімен аналысқан. Мейрамбек төрт ағайынды. Отбасында үш ұл, бір қыз. Ұлдардың барлығы да әкесінің ізін қуған темір шеберлері.Мейрамбектің жары – Әсем Хасанова Қызылорда қаласында дүниеге келген. Ерлі-зайыптылардың таныстығы достарының тойында басталыпты. Бұл туралы Әсем Қажымұратқызы: «2003 жылы құрбым тұрмыс құрып, мен қыз жолдас, Мейрамбек ұл жолдас болды. Сол сәттегі таныстық үлкен махаббатқа ұласып, арада бір жыл уақыт өткенде отбасын құруға бел будық. Міне, содан бері қол ұстасып, өмірдің қызығын да, қиын сәттерін де бірге көріп келеміз. Жолдасым бір сөзбен айтқанда керемет жан. Қолынан бәрі келеді, темір де жонады, машина да жөндейді. Әкесі Талғат Сисенбаев ауданға белгілі токарь болған. Жолдасымның темірден түйін түйген шеберлігі сол кісіге тартқан»,– дейді көп балалы ана. Әсем Қажымұратқызы мұғалім. Әйтеке би кентіндегі №266 мектеп-лицейде ағылшын тілінен сабақ береді. Білім беру саласында жиырма жылға жуық уақыт тәжірибесі бар білікті маман.Сисенбаевтардың шағын мемлекетінде сегіз бала тәрбиеленуде. Отбасының тұңғышы – Әлимұса Мәншүк Мәметова атындағы колледжінің IT саласында оқып жатыр, әрі жұмыс істейді. Әділет Абылайхан атындағы колледжінің бірінші курс студенті. Екеуі де, грант негізінде білім алуда. Ақниет, Нұрсұлтан, Мирас №170 мектепте, Әлішер №266 мектеп- лицейінде оқиды. Досымжан алдағы қыркүйекте мектеп табалдырығын аттайды. Жеті ағасының сүйікті де, сүйкімді қарындасы Айым отбасының еркесі. «Балапан» балабақшасының тәрбиеленушісі.Еңбектен ешқашан қашпайтын Мейрамбек ұлдарында еріншектіктен бойын аулақ ұстауға бейімдейді. Үнемі жанына алып, ер азаматқа тән тіршіліктің барлығын бірге жасайды. Ұлдары әкесінің айтқанын екі етпейді. Үлкеннің алдын кесе көлденең өтпейді. Байсалды, байыпты қалпынан танбайтын Мейрамбек:<blockquote>– Әрбір отбасында сүйіспеншілік пен түсіністік мықты болса, қоғамның діңгегі де, берік болады. Адам ең алғаш шыр етіп, дүниеге келген сәтінен бастап, отбасының тәрбиесін алады. Ата-ана – өмірдегі ең қымбат адамдар. Барынша балаларымызды жақсылыққа әдептілікке, адамгершілікке тәрбиелеуге тырысамыз. Сабақта да, үйде де ұқыпты, тәртіпті, саналы бала болса екен деп тілейміз. Бұл барлық ата-ананың парызы ғой.</blockquote>Әсіресе, «Түп қазығың – Отаның, ар-намысың – тілің, кәусар бұлағың – ұстазың, қамқоршың – әкең, ақылшың – анаң» деген сөздерді жиі айтып, бала күнінен санасына сіңіреміз. Отбасының маңызы мен бауырлардың татулығын, бір-біріне деген сыйластығын сақтауды үйретеміз, – дейді.Он екі жыл ата-ененің қолында тұрып, тәлімді тәрбиесін көрдім деген Әсем Қажымұратқызы: «Ата-анам өте керемет жандар. Үнемі қолдап, жақсылығымызды асырып, қателігімізді жасырып отырады. Үйренгенім көп болды. Балаларымызға да қарайласып, бағып-қағуда да, көп көмек көрсетті. Тәрбиелі сөздері, өнегелі істерімен отбасына сыйлы. Ол кісілерге алғыс айтамын» – деп екінші ата-анасына деген ыстық ықыласын білдірді.Ал, көпбалалы болуға келер болсақ, Мейрамбек те, Әсем де, «Әр баланың өз несібесі бар. Көп балалы болу, біздің маңдайымызға бұйырып тұрған бақ деп білеміз. Балаларымыз байлығымыз, мақтанышымыз. Ендігі мақсатымыз – әрқайсысының өмірден өз орнын тауып, кірпіш болып қалануына бағыт-бағдар беру» –дейді ерлі-зайыптылар.

Көп балалы әке - көпке үлгі

<a href="https://kyzylorda-news.kz/">Kyzylorda-news.kz</a> Біздің кейіпкеріміз Айгүл Тәуекелова аудан медицинасында елеулі еңбегімен дараланған мақтаулы маман санатында. Бүгінде білікті дәрігер әрбір ақжармалықтың денсаулығына жауапты атануда.Негізінен, Айгүл Кемелбайқызы 1971 жылы Арал ауданында дүниеге келген. Сала маманы туған жер топырығындағы №14 Крупская атындағы орыс орта мектебін тәмамдағаннан кейін Семей мемлекеттік медицина институтында «Педиатрия» бөлімінде мамандық алған. 1994-1997 жылдар аралығында Іңкардария ауылдық дәрігерлік емханасында бөлім меңгерушісі болып жұмыс атқарған. Сонымен қатар тәжірибелі дәрігер Ақжарма ауылында 24 жыл бойы жұмыс жасауда. Өз ісінің білгірі осыдан 6 жыл бұрын Денсаулық сақтау жүйесінің үздігі» байқауына қатысып, жүлдегерлер қатарынан көрінген. Бірнеше мәрте жоғарғы марапат иеленген дәрігер көп балалы ана. Қазіргі уақытта 5 перзент тәрбиелеп отырған ардақты жан ауыл адамдарына көмек қолын созудан жалықпайды.<blockquote>– Кез келген дәрігер алдына келген емделушімен емен-жарқын әңгімелесіп, сырқатына тереңнен қанығу қажет. Бұл ретте, ауыл тұрғындарына медициналық көмек көрсете отырып, барынша білім жетілдіруге көңіл бөлеміз. Себебі, заман ағымына ілесіп, жаңалықтан тысқары қалуға болмайды – дейді білікті дәрігер.</blockquote>

Айгүл Тәуекелова: Жаңалықтан тысқары қалуға болмайды

«Елу жылда – ел жаңа, жүз жылда – қазан» деген тәмсіл сөз рас екен. Тікен тірлікте күйбең тіршілікпен өмір сүріп жатқан адамдар көп. Күннің көзі жарқырап, ал өмір-өзен тоқтаусыз ағып, жан-жағын қармап, толқынды тербелісімен алаңсыз алға ұмтылуда. Бір толқынды екінші тоқын басып,ағып келе жатқандай ағалардың ізін кейінгі тоқын інілер басып, тарих ұрпақтар сабақтастығымен жалғасып жатыр.1919 жылдың 19 мамырында Шиелі атанған, кейін шиедей құлпырып, бүгінде көрікті елді мекенге айналған аудан баршамыздың жүрегімізде. Туған жеріміз – бізге сондай ыстық. Қасиетті де саялы өңір бұл. Осы киелі топырақта жаратылдық, туып-өстік, өркендедік. Өлкеге аянбай еңбек еткен тұлғалар жайлы &nbsp;деректерді оқыдық. «Жақсының аты өшпейді» демекші, халық үшін қызмет атқарған абзал жандардың есімі мәңгілік ел жадында. Осы орайда 31 жыл Шиелі аудандық ауруханасының бас дәрігері болған Смайыл Сейітназарұлы жайлы қалам тербемекпіз.&nbsp;Ол Ұлы Отан соғысына қатысып, «Қызыл жұлдыз» орденін алған, бейбіт өмірде қажырлы еңбегімен «Еңбек Қызыл Ту», «Құрмет белгісі» ордендерін кеудесіне қадаған, Шиелі халқының сүйікті де қымбат, құрметті азаматы болған. Көптеген ізбасарын тәрбиелеп, халықтың денсаулығы жолында бар тәжірибесі мен білімін жұмсаған, үлгілі дәрігер еді. Әттең, көзі тірі болса биыл 100 жасқа толар еді... Әйтсе де, өмірден кетсе де, көңілімізден ешқашан кетпейді. Ақ халатындай ақ адал антына дақ түсірмеген дәрігерді жуырда Шиелі жұртшылығы еске алып, әруағына Құран бағыштап, ас берді.СМАЙЫЛ КӘРІМБАЕВҚА ЕСКЕРТКІШ-БЮСТ ОРНАТЫЛДЫ«Елім деген ерді ел құрметтер» дейді халық даналығы. Мұндай бағаға туған халқының болашағы үшін тер төгіп, құрметке бөленген азаматтар ғана лайық. Елеулі еңбегінің арқасында қадірлі болған дәрігердің бюсті көпбейінді аудандық аурухананың ішінде орнатылды. Іс-шараға қатысқан Шиелі ауданының әкімі Нұржан Ахатов медицина майталманының денсаулық сақтау ісіне қосқан үлесін атап өтіп, қойылған бюст-ескерткіш аудандағы медицина саласында еңбек ететін барша мамандарға деген құрметтің белгісі екенін айтты.&nbsp;– Еліне еңбегі сіңген, халқына қамқоршы бола білген, ажал тілі сүйреңдеген от пен оқтың ортасынан аман оралып, соңғы күндеріне дейін өткір скальпелін қолынан түсірмеген, өз кезінің аңыз адамына айналған алып тұлға. Өңірімізге тарихи тұлғаларға ескерткіш орнатылуы өскелең ұрпақ үшін үлгі-өнеге дер едім, – деді аудан басшысы Н.Сәбитұлы.&nbsp;Әрмен қарай сөз кезегі облыстық медицина саласының ардагері Тұрғанбай Маханұлы және тарихшы, Қазақстан журналистер одағының мүшесі, қаламгер Өтеген Абдраманға берілді. Олар дәрігерлік мамандықтан еш уақытта қол үзбеген хирургтың өмір дерегіне тоқталды. Олардың айтуынша, ол хирург ретінде күніне бірнеше рет ота бөлмесінде науқастарға аса шеберлікпен білікті көмек көрсеткен. Барлық Шиелі халқы кент орталығынан бастап шалғайдағы малшыларға дейін бас дәрігердің қамқорлық аясында болды. Алыстағы малшыларға маман-дәрігер керек болып қалған жағдайда өзі де жедел араласып, бірнеше рет ажалға ара тұра білді.&nbsp;Сонымен қатар шара барысында мүсіннің ашылу рәсімі өтіп, дәрігердің ескерткішіне гүл шоқтары қойылды. Салтанатты шараға арнайы парламент депутаты М.Ергешбаев, жазушы-сыншы Б.Сарбалаұлы, Т.Маханов, Ж.Исаева т.б қонақтар қатысты.ӘЛЕУМЕТТІК ДӘРІХАНА АШЫЛДЫЛента қиылып болған соң, біз тілшілік қызметпен Шиелі аудандық аурухана жанында орналасқан «Аптечка» дәріханасына бағыт алдық. Мұнда дәріхананың ашылу салтанатына қатыстық. Бәріңізге мәлім, Шиеліде халықтың әлеуметтік жағдайын жақсарту бойынша көптеген игі жұмыстар атқарылуда. Көп қабатты тұрғын үйлер, нысандар көптеп слаынып, халық игіліне берілуде. Әсіресе, кәсіпкерлікті дамытуға бсымдық беріліп, мемлекет тарапынан осы саланы қолдауға бар мүмкіндіктер жасалуда. Соның нәтижесінде өңірде кәсіпкерлік саласында оң өзгерістер қалыптасты. Міне, бұл дәріхана да жергілікті тұрғындарды қолжетімді, яғни арзан әрі сапалы дәрі-дәрмекпен қамтамасыз етуге кірісті. Жаңа нысанды кәсіпкер Манат Тамабайқызы жүзеге асырып, қарқынды жұмыс істеуде. Бұл дәріхана емханаға қарама-қарсы яғни, кенттегі Жайылбаев №57 көшесінде орналасқан.АТЫ АҢЫЗҒА АЙНАЛҒАН ДӘРІГЕРКелесі бағытымыз Б.Қабылұлы атындағы мәдениет үйінде өткен КСРО Денсаулық сақтау ісінің үздігі Смайыл Кәрімбаевтың 100 жылдығына арналған «Аты аңызға айналған дәрігер» атты ғылыми-тәжірибелік конференция. Ауқымды іс-шараға аудан ардагерлері, медицина саласының ардагерлері мен сол саладағы 250 қызметкер, ағайын-туыстар қатысты.&nbsp;Салтанатты шара басталмас бұрын LED-экранда дәрігердің өмірі туралы бейнеролик көрсетілді. Зал адамдарға лық толы. Жан-жақта жарықтар, әсерлі көріністің куәсі болдық. Конференцияның шымылдығын облыстық денсаулық сақтау басқармасы басшысының орынбасары Жаңыл Абубакирова ашып берді.&nbsp;Содан кейін Шиелі көпбейінді аудандық ауруханасының бас дәрігері Алмас Әбдіғаппарұлы С.Кәрімбаевтың өмірбаянына кеңірек тоқталып, баяндамасын оқып берді. Келесі Бақытбек Жамантаев та «Шиелі хирургиясының кешегісі мен бүгінгісі» атты слайдын көрсетіп, баяндамасын талдап берді. Естелік сөз сөйлеген медицина ардагерлері Раиса Әбдешқызы мен Абдулла Сыздықұлы да микрофон тізгінін ұстап, жылы естеліктерін айтты. Шиелі аудандық ардагерлер кеңесінің төрағасы Өркен Әзімханұлы да өзі шығарған өлеңін оқып, көпшіліктің жүрегін тебірентті. Хирургтың ұлы Мұхитжан Кәрімбаев та сөз алып, келген қатысушыларға алғысын және игі тілегін арнады.&nbsp;– Иә, ол қашан да шындықтың бетіне тура қарай білді. Тайсақтап, жауырды жаба тоқу немесе лауазымы жоғарыларға жағымпазданудлан аулақ болды. Кеңес өкіметі кезінде елінің еңсесін тіктеп, өсіп, өркен жаюына өзінің зор үлесін қосты. Әрдайым әділеттің ақ жолынан айнымай, өзі сүйген кәсібінің шыңына шыққан Сырдың сырбаз мінезіндей сыралғы, қолы алтын, ойы терең әкемізді киелі жері Шиеліде әрі біз де сағынғанымыз рас, – деді ол.&nbsp;Сондай-ақ шараның тағы бір ерекшелігі, Мұрат Күлімбеттің «Аңызға айналған адам» кітабының лентасын шешу салтанатты сәтімен жалғасын тапқандығында дер едік. Лентаны Ж.Абубакирова, Т.Маханов шешті.&nbsp;«Өткенсіз болашақ жоқ» дегендей, кез келген жаңалық бұрынғының өзегінде дамып, кейінгі ұрпақтар аға буынның жақсы ісін одан әрі жалғастырады. Міне, соның бірде-бір дәлелі осындай игі шара дер едік.&nbsp;

Шежірелі өлкедегі игі істер

<a href="https://kyzylorda-news.kz/">Kyzylorda-news.kz</a>&nbsp; «Әкені ұл қадірлемесе асқар таудың аласарғаны, анасын бала аяламаса мөлдір бұлақтың суалғаны,бабаның батасын қажет етпейтін, тобасыз тозған ұрпақ – құрақтың қурағаны болса керек» дейді қазақ. Әкені асқар тауға балап, одан құрметін аямаған ұл-қыздың қашанда бәсі биік, бағы басым. Әр баланың сүйенер тіреуі болар әкелер күні қарсаңында перзенттерінен пікір сұрап, жүрекжарды ықыласын тыңдаған едік.Дүбірлі додаларға бастаған әке үмітіТалай дүбірлі додаларда Қазақстанның жалауын биікте желбіретіп, абыройын асырып жүрген Қазалы ауданына қарасты Абай ауылының тумасы дзюдошыАбылайхан Жұбаназаровпен телефон арқылы тілдесіп, әкесі туралы сұрағанымызда:<blockquote>– Әкем – асқар тауым Кемалбек Аржиков өте қарапайым жан. Бір адамға болмасын демейтін пейілі кең, жүрегі жомарт. Мінезі салқынқанды, дос болғанға әрдайым құшағы ашық, қас қылғанға қылыштай өткір азамат. Кез келген жағдайда асқан сабырлық танытып, оң шешім табудың жолын ойлайды. Бала тәрбиесіндегі басты ұстанымы –ешқашан адалдықтан айнымай, әділ бол дейді. Балалықпен шалалық жасап, қисық мінез көрсетсек, тура жолға салып, тәртібімізді түзейтін. Ешкімнің қақысына кірме деп құлаққа құйып өсірді, – деп ағынан жарылды Абылайхан Кемалбекұлы.</blockquote>«Бір әкенің тәрбиесін жүз мектеп бере алмайды» деген тәмсілді терең ұққандаймын деген Абылайхан «спортқа келуіме әкем себепкер болған жоқ, десе де спортшы болғаныма ешқандай қарсылық танытпады», – дейді.<blockquote>– Спортқа келуіме достарым себепкер болды. Әкеме: «күреске қатысайын» деп рұқсат сұрағанымда: «әрине, балам, мен сенің кез келген таңдауыңды құптаймын» деп, қанат бітірді. Спорт – қажырлықты, табандылықты талап етеді. Бірден чемпион бола қалу екінің бірінің маңдайына жазылмауы мүмкін. Жарыс болған жерде жеңіліс те, жеңіс те болары сөзсіз. Бастапқы кезде бәсекелерде қарсыласқа есе жіберіп, жеңіліс тапқан сәттерімде әкем: «Балам, мүмкін спорттан қол үзіп, сабағыңа ден қоярсың. Өзіңе лайық мамандық таңдарсың» деген болатын. Мен «жоқ қатысамын» деп спортты жарты жолдан қалдырмауға бел будым. Орын алып, чемпион бола бастағаннан кейін әкем ақ батасын беріп, лайым сөзімен де, ісімен де қолдап-қолпаштап отырады. Әкем: «Киіміңнің арқасында атаң Жұбаназардың есімі жазылып тұр. Соны жерге тигізбе, абыроймен алып жүр» деп сенім артты. Әке сенімі биікке жетеледі. Үмітті ақтауға, елді, туған жерді, ата-ананы, мені баптап, додаға қосқан жаттықтырушыларымды жерге қаратпауға бар күш-жігерімді сарп етудемін.</blockquote>Атам туралы айтар болсам, «тектіден текті туады, тектілік тұқым қуады» демей ме?! Атам Жұбаназар еңбекқор, абыройлы, елге сыйлы азамат болған. Ол кісінің үлгі-өнегесін әкеміз үнемі айтып отыратын. Әке туралы қанша сағаттап айтса да артықтық етпейді ғой. Әр баланың жүрегінде ойып тұрып орын алатын жанның бірі де бірегейі осы – әкелер. Оларлың амандығы балаға бақыт. Барлық әкелер аман болсын, – деп әңгімесін аяқтады Абылайхан Жұбаназаров.Жұртшылыққа сыйлы тіс дәрігеріӘке жолын қуып, ізін, ісін жалғап келе жатқан ұлдардың бірі – Ербол Жомартұлы. Бүгінде жас тіс дәрігерінің есімі жұртшылыққа жақсы таныс. Оның қолы жеңіл, емі шипалы деушілер көп. Әкесі Жомарт Бекжанұлы да халыққа қалтқысыз қызмет көрсеткен білікті тіс дәрігері болатын.<blockquote>– Мен отбасындағы кенже баламын. Әке-шешем, ата-әжем барлығымыз тұрдық. Үйдегі үлкен екі бала ата-әжемізге жақын болып өсті. Ал, мен әкемнің қасында жиі жүрдім. Анамның айтуынша, СОЮЗ кезінде аудандағы жалғыз тіс емханасында әкем мен анам бірге жұмыс істеген. Сол кездері шет ауылдарға айлап, іс-сапарға жібереді екен. Әсіресе, әкем ер адам болғандықтан жолы нашар, көлік қатынасы қиын жерлерге жиі шығыпты. Сол кезде мен 5-6 сынып оқитын баламын. Жазғы демалыс уақытына сәйкес келсе, әкем қасына ертіп алатын. Сол сәттен бастап, менің осы мамандыққа деген қызығушылығым оянды десем болады. Әкем жұмыс істегенде әр ісін қызықтап, құрал-жабдықтарын қарап жүретінмін. Сол кезде әкем марқұм әкем анама: «Осы балам стамотолог болады» деп айтып отырады екен, – деп әкесі туралы ақтарылған Ерболдың сөзін анасы Раушан Бекжанова жалғай кетті.</blockquote>Қазір Ербол білікті маман. Он екі жылдық тәжірибесі бар тіс дәрігері. Әке жолын жалғаған Ерболдың мінезі салмақты, сөзі нық. Бұл қасиетін әкемнен дарыды, дейді ол. «Әкем аз сөйлейтін, бір сөзді уәдесіне тұратын адам болды. Атына заты сай жомартжан. Қолындағысын бере салатын. Бала десе, көңілі бөлек еді», – деп естеліктерімен бөлісті Ербол Жомартұлы.<blockquote>– Біз 2006 жылы заман талабына сай Жомарт екеуміз» Ақкербе» тіс емханасынан бөлініп, жеке кабинет аштық. Сол кезде Ербол 10-сыныпты бітіріп, 11-ге өткен кезі. Жеке болған соң, сабақтан бос уақытында кабинетке жиі келетін. Әкесі сол сәттен бастап, барлық құрал-жабдықтың атын айтып, таныстырып отырады екен. Тіпті, тіс жұлған кезде уколды қалай салатынын бәрін көзбен көріп өсті. Мектепті бітірген соң, Алматыдағы медакадемияға грантқа түсті. Ербол екінші, курста практикалық сабақтар басталған сәтте қолы жатық, құрал-жабдықтардың барлығымен таныс, тіс салатын кезде қалып алуды да, біршама біліп қалған еді. Жартылай маман секілді дайын Ерболға мұғалімдері: «Сен бәрін біледі екенсің ғой» деп сүйсінген екен. Соның барлығы әкесінің еңбегі деп білемін», – дейді анасы.</blockquote>

Әке үмітін ақтаған перзент

<a href="https://kyzylorda-news.kz/">Kyzylorda-news.kz</a>&nbsp; Адам өміріне араша түсетін дәрігерлік мамандықты таңдау – адамзат алдындағы үлкен жауапкершілік. Себебі, ақхалаттылар адам анатомиясын өте терең білумен қатар, кез келген жағдайдағы науқастан жиіркенбейтін, қаннан қорықпайтын, алдына келген науқастың жасына, жынысына, тағдырына немқұрайлы қарамайтын, күйзеліске төзімді, жүйкесі мықты жан болуы керек.Ғалымжан Тәжібаев – Қазалы теміржол ауруханасында рентген сәулелік диагностика бөлімінің меңгерушісі қызметін атқарып жүрген үлгілі маман. Ол 1992 жылы Ақтөбеден мединститутты бітіріп, дәрігерлік қызметін бастаған. «Емдеу ісі» мамандығымен білім алғанымен, физиотерапияны да қатар меңгеріп, адам жанын сақтауға барын салып жүрген ол: «Бұл мамандықты таңдауыма анам себеп болды. Сол кісіні өзіме үлгі етіп, дәрігер болғым келді», – дейді.Қарашаңыраққа шаттық сыйлап, тәрбие мен адамдықты ұрпағының бойына сіңірген ана, өз ұлына өмірлік ұстаз да, бола білген Рахиля Ермағамбетова акушер-гинеколог болып, қазалылықтарға талай жыл қызмет етіп, зейнетке шыққан.1993 жылдан бастап, денсаулық сақтау саласына күш-жігерін жұмылдырған. Осы жылдар ішінде тәжірибесі толысқан, жауапты, өз мамандығын қадірлейтін мақтаулы дәрігерге айналған. 2005-2010 жылдары Байқоңырдағы әскери медициналық госпитальға озық маман ретінде арнайы шақырылған. Осында қалыптастырған дағдысы мен қарым-қабілетін туған жеріне арнауға бел шешкен азамат, қазіргі теміржол ауруханасындағы адал қызметін жалғастырады.«Басты мақсат адам болу, бір мамандықты игеріп, елге қызмет етсем» деген ойды арқалаған азаматтың өмірлік жары да, адам жанының арашашысы. Бақыткүл Жалымбет Қазалы аудандық перзентхананың акушері. 1984-1987 жылдары Орал қаласындағы медициналық училищеде білім алып келген жас маман бітірген уақытынан осы күнге дейін бір мекемеде 30 жылдан астам уақыт еңбек етуде. Өзі де, денсаулық сақтау саласында жүрген ол, күні-түні қызметте жүретін жарының жанынан табылып, отбасында да, жарасымды тірлігімен үлгі болып отыр.<blockquote>Бақыткүл Оразғалиқызы «Ұл-қыздарымыздың таңдауына тосқауыл қоймадық. Екі қызым мұғалімдік жолды таңдады. Ұлым, Өркен С.Асфендияров атындағы Қазақ Ұлттық Медицина университетінен білім алды. Қазір Арыс қаласындағы әскери бөлімде дәрігер болып жұмыс істейді. Қашанда ата-ана ретінде оны барлық жағынан қолдаймыз», – дейді.</blockquote>Тәжібаевтар жанұясы салауатты өмір салтын ұстануымен де, көпке таныс. Ерлі-зайыптылардың хоббиі – теннис ойнау. Бір отбасынан шыққан денсаулық сақшыларына енді, тағы бір ұрпақ қосылды. Гиппократтық, адамдық антына адал болып, науқастың жаны мен тәнін емдейтін жандар әлі талай науқастың дертін жеңері сөзсіз.

Дәрігерлікті таңдау – адамзат алдындағы үлкен жауапкершілік

<a href="https://kyzylorda-news.kz/">Kyzylorda-news.kz</a> Бұрынғылар «Отан отбасынан басталады» деп ұрпақтан-ұрпаққа өсиет еткен. Қоғамдағы отбасының құндылығына ерекше назар аударған. Мықты мемлекеттің қалыптасуы үшін әрбір үй мен шаңырақтың береке-бірлігі жарасымды, ынтымағы ырысты болуы керек. Үлкенге ізет көрсету, кішіге құрмет қылу – қазақ тәрбиесінің алтын діңгегі. Ықылым заманнан қазақ ұғымында отбасының орны ерекше. Себебі төскейде малын жайып, түстікте егінін орған қазақ қоғамы отбасы институтының беріктігі мен татулығына мән берген. Осындай шаңырақтың шаттығын ұйыстырып, күнделікті жұмыс барысын да, үйлестіре білетін жандар аз емес. Солардың қатарына – Аманқос Бекеев пен Аманкүл Ақметоваларды қосуға болады. Ерлі-зайыптылардың ерекшелігі – ортақ мамандықты бірге алып жүруінде.Қазір Аманқос пен Аманкүл Қазалы теміржол ауруханасында халыққа қызмет етеді. Аманқос жансақтау бөлімінде анестизеолог қызметін атқарса, Аманкүл емханада күндізгі бөлімде әйелдерге гинекологиялық кеңес береді. Қос дәрігер М.Оспанов атындағы Батыс Қазақстан Мемлекеттік медицина университетінде білім алған.Жалпы, анестезиология мен реаниматологияның негізгі мақсаты – науқастарға операция, диагностика жасау мен емдеу кезеңінде өмірлік қажетті ағзалардың қызметін реттеп, оны қалпына келтіру, медицина қызметкерлеріне жүрек-өкпе-ми реанимациясын, жансақтау әдістерін жүргізуге үйрету болып табылады.<blockquote>– Анестезиология мен реаниматология ең қажетті үш бөлімнен тұрады: реаниматология, үстемелеп емдеу, анестезиология. Анестезиологияның белгіленген әдістері тек қана ота салдарынан болатын ауырсынуды жою үшін, сонымен бірге емдік шараларды жүргізу үшін де қолданылады.</blockquote>Бір сөзбен айтқанда, науқастың операциядан, не болмаса аса қауіпті төтенше жағдайлардан аман-есен шығып, сауығып кетуінде дәрігер анестезиолог-реаниматологтардың үлесі үлкен, – дейді Аманқос Сайлаубайұлы.Аманқос ақхалатты киіп, науқастарға жәрдем беруді жасынан армандап өсті. Бұл күні өз ісінің маманы. Ұжымдастарының арасында абыройлы. Қызметіне адал, әрі тиянақты, дертке шалдыққандарға жанашырлығы зор.Аманкүлдің айтуынша, Аманқос қамқор әке, жан-дүниесі игілікке толы, сенімді сырлас. Әрдайым жұмыс кестеден тыс уақытта пациенттер хабарласып жатқанын көріп, жұмысына деген сүйіспеншілігіне риза болады. Науқастарға дұрыс бағыт-бағдар беріп тұруына кеңес береді.<blockquote>– Қай саланың болмасын өзіндік қиындығы болады. Дегенмен, өзің қалап таңдаған мамандығыңды ерекше ықыласпен атқарасың. Негізінде, гинекология әйелдің организміне ғана, тән аурулар мен репродуктивтік жүйесінің дерттерін зерттейтін медицинаның бір бөлігі саналады. Врач-гинекологтардың көпшілігі, қазіргі кезеңде акушер болып жүр. Гинекология жүктілік пен тууға қатысты, бастапқы кезеңнен соңғы кезеңге дейінгі, әйел организміндегі көріністерді зерттейтін, акушерлікпен тығыз байланысты. Күні бойы қаншама әйел көрінуге келеді. Сол аралықта олардың анатомия-физиологиялық, психикалық ерекшеліктерін қадағалаймын. Кейбіріне шұғыл ем қажет болса, порталға салып, ауруханаға ем алуға жолдама беремін. Тіпті, кей кездері облысқа жібереміз, – дейді Аманкүл.</blockquote>

Науқастарға шаттық сыйлаған отбасы

<a href="https://kyzylorda-news.kz/">Kyzylorda-news.kz</a> Бүгінде бір мамандықта өмірін тоғыстырған жандар аз емес. Бір әулетте төрт дәрігер – екі терапевт пен тіс дәрігері және реаниматолог. Отбасымен денсаулық күзетінде. Балтыр сыздап, бас ауырса, ақ халаттылардың алтын қолына жүгінетіміз жасырын емес. Олар негізгі жұмысымен қатар, шаңырақтың тірегі, балаларына қамқор ата-ана. Солардың бірі – Бақытбек Оңбосынұлы мен Перизат Серікқызы деуге болады. Бұл жұп үлкен жауапкершілікті жүктейтін дәрігерлік мамандықты таңдаған. Олар М.Оспанов атындағы Батыс Қазақстан мемлекеттік университетінде білімін жетілдіріп жүргенде танысқан. Осылайша, ортақ кәсіпті меңгерген екеуі басқосып, шаңырақ көтерген.Қазір бірі – Қазалы теміржол ауруханасының жансақтау бөлімінде анестезиолог-реаниматолог қызметін атқарса, екіншісі халыққа терапевт кеңесін беруде. Нақты айтсақ, Бақытбек М.Оспанов атындағы Батыс Қазақстан мемлекеттік университетін 2014 жылы жалпы тәжірибелік мамандығы бойынша меңгеріп шықты. Еңбек жолын сол жылы Қазалы теміржол емханасында бастады. Ал зайыбы Перизат екі жылдан соң терапевт мамандығын иеленді. Осы күні ересектер және балалардағы жұқпалы аурулар, яғни инфекционист мамандығы бойынша екі жылдық резидентурасын оқуда.Бүгінде ерлі-зайыптылар қаншама науқастың өміріне араша түсіп, адам анатомиясын терең меңгерген. Олар кез келген жағдайда қиындыққа мойымайды. Қос дәрігер күйзеліске төзімді, жүйкесі мықты жандар қатарында. Осы қасиеттерді үш баласына дарытуда.Анестезиология және реанимация мамандығы бойынша даярлық курстан өткен Бақытбек теміржол ауруханасының жансақтау бөлімінде ауыр науқастармен жұмыс істеп келеді. Күн-түн демей, дертке шалдыққандарға барынша, дәрігерлік кеңесін береді. Өнегелі отбасы әріптестері арасында абыройлы, қызметте үлгілі дәрігер. Екеуі де, көптеген аудандык, облыстық марапатты иеленген.<blockquote>– Айығудың ең негізгі шартының бірі – жазылуға деген құлшыныстың болуы. Егер, іс-әрекеттеріңізде емделуге деген құлшыныс болмаса, жалғыз дәрігердің емі нәтиже беруі екіталай деп Сенека Луций айтқаны бар. Жұмыс барысында әртүрлі адамдар кездеседі. Кейбір жандар аяққа тұруына мүмкіндік бола тұра, өздерін -тастап жібереді. Енді бірі – ауыр жағдайда түссе де, өмірге құштарлығы арқылы денесіне дендеген дертінен тез айығады. Ал, дәрігерлер науқасты аман алып қалуда өзінің үш қаруын қолданады. Ол – сөз, дәрі-дәрмек және ота жасап, дертті жеңу болып табылады. Бізге түскен әрбір жанмен жылы сөйлесіп, жанына медеу болуға барымызды саламыз. Оның аз уақытта ем алып, айығып шығатынына сенім артамыз, – дейді Бақытбек Төлегенов.</blockquote>Бақытбектің айтуынша, бала кезден ақхалатты киіп, ауруханада дертке шалдыққандарды емдеуді армандаған. Себебі, ағасы Сахи мен Ғалымжан Төлегеновтер де, осы саланың мамандары. Бірі – дәрігерлік қызметті ұзақ жыл атқарып, құрметті зейнетте болса, екіншісі – тіс дәрігері ісімен көпке сыйлы.<blockquote>– Егер, сен дәрігер болсаң, тек, медицинамен айналыс, ғылымдағы танымыңды арттыр. Қасиетті Құранда: «Алла тағала адамның кеудесіне екі жүрек жасаған емес» дейді. Сондықтан, медицина білгірі бола тұрып, келесі бір мамандықтың да, шебері бола алмайсың. Бизнесте жетістікке жеткен дәрігерлер бар. Олар ем-дом жүргізіп жатқанда, өзге кәсібі кедергі келтіріп, науқас зардап шегуі мүмкін. Немесе, дін шеңберінде білгенін алға тарта беретін де, дәрігерлер кездесіп қалады. Олар үшін ең жақсы, қайырлы нәрсе – өз ісімен айналысу. Сондықтан, бар білік, жігерімізді медицина саласына жұмсауға тырысудамыз. Әркез басшы тарапынан қолдау жасалады. Дәрігерлік білімді жетілдіру курсына сала мамандары жіберіледі, – дейді Перизат Сейдахметова.</blockquote>Біздің тараптан Ибн Синаның: «Дене шынықтыру жаттығуларымен шұғылдансаң, дәрігерге пысқырып та, қарамайсың» деген сөзі ойға келеді. Сондықтан, ауырып ем іздегенше, ауырмайтын жол іздеуге әркез ұмтылайық. Салауатты өмір салтын қалыптастырудан қол үзбейік.

Бір мамандықта өмірін тоғыстырған

<a href="https://kyzylorda-news.kz/">Kyzylorda-news.kz</a> Ата-әжесінің ерке қызы Жұлдыз мектепті беске бітірді. Ол Қазалы ауданының Бозкөл ауылының тумасы. Мектептен соң арман қуып, Алматы қаласына келді. Колледж, университетте білім алып, қызыл дипломмен тәмамдады. Үнемі үйренсем, білсем, білімімді одан әрі жетілдірсем деп алға ұмтылатын ару магистратуралық білімді жалғастырды. Ай артынан жыл келіп, уақыт жылжи берді. Қуанышты сәттер, жетістікке толы бақытты күндердің бірінде Германия елін көруді де, Алла нәсіп етті. Осылайша, жайраң қағып, жадырап жүрген Жұлдыздың жүзін әп-сәтте мұң торлады. Оған себеп – дәрігерлердің «Өкпенің қатерлігі ісігіне шалдыққансыз» деген сөзі.Бұны алғаш анасы Сарбиназ естіді. Емтихан алдында дәрігерлік тексерістен өткен қызының өкпесінен онкологиялық аурудың белгісі табылды дегенде төбесінен жай түскендей болды. Өзі де, медицина саласының қызметкері болғандықтан ауру туралы жете түсінді. Егіле жылап, Алладан ғана, жәрдем сұрай берді. Қызына қалай жеткізерін білмей жүрегі қан жылаған ана уақыт оздырмай дәрігерлермен бірлесе отырып, Жұлдызға мән-жайды айтты. Алайда, қайсар қыз бұл ауруға алғашында көндіге алмады. Тіпті, өзіне хабарласып, хал-жағдай сұраған жақындары әңгіме ауанын сырқатына қарай бұрса, сөйлескісі келмей, телефон тұтқасын тастай салатын еді.Алайда, уақыт өте келе ем-дом алудың керектігі айқын сезілді. Жұлдызды жиі жөтел қысып, бойын әлсіздік биледі. Аяғы домбыға ісіп, көңіл-күйі де пәс еді. Ота жасайтын сәт те жетті. Санасын түрлі ой торлап алды. «Жарық дүниенің сәулесін енді көре алар ма екенмін?» деп іштей сан мыңдаған сұрақпен арпалысты. Үйдің үлкені болған соң, атасы Оңдаш пен әжесі Қалаудың қызы атанып, әке-шеше тілін көп алмағандығы ойына оралды. Анасын атымен атайтын. Еркеліктен болар, кейде ауыр сөздер айтып, ана жүрегін жаралаған кездері де жоқ емес. Балалық, жастық шағы көз алдынан кино лентасындай көлбеңдеп өте берді. Іштей өкініп, қынжылған қыздың жанарына жас үйірілді. Жанына жалау болып, қай кезде де қасынан табылған анасының алақанына басын қойып: «Мен сізді ренжіткен сәтім болса кешіріңізші!», – деп мұңлы жанарын төмен салды.«Алла, баламның жанын аман қалдыр» деп күн-түні дұға тілеген ана: «Алтыным, мен саған ешқашан ренжіген жоқпын. Барлық қылығыңды кешірдім, ештеңе ойлап, уайымға берілме», – деп тұңғышын бауырына қысты.Дәрігерлер тікесінен тік тұрып, тоғыз сағат бойы ауыр сырқаттан өмірін сақтауқаракетімен айналысты. Өкпенің обыр жеген үштен бір бөлігін алып тастады.<blockquote>– Бір кезде біреу бетімнен шапалақпен тартып жібергендей болды. Бір дауыс: «Болды, Жұлдыз тұр!» дейді. Көзімді ашып, жан-жағыма қарадым. Не екенін түсіне алар емеспін. Сәлден соң есімді жидым. Ояу екенімді біліп, «Аллаға шүкір, мен тұрдым» деп қуанғаным есімде, – дейді Жұлдыз Самалбекқызы бізбен әңгімесінде.</blockquote>Бір ай дегенде нәтижесі белгі берді. Алайда оншалықты көңіл қуантпады. Дегенмен аурудың төртінші сатыдан үшінші сатыға түсуі көңілге демеу. Ендігі үміт – химия-терапияда. Алғашқы химиялық емнен кейін, үш күннен соң Жұлдыздың шашы, қас-кірпігі түсе бастады. Тамаққа тәбеті қашып, су ішіудің өзі мұңға айналды. Он келідей салмақ тастады. Осы сәтте Жұлдыздың үміті үзілуге шақ қалды. Жұлдыз: «Айналамдағы жандардың бәрі маған мейірімін төгіп, қамқор қолын созуда. Мен неге өмір үшін күреспеймін. Мен мықтымын, бәрін жеңіп шығамын!», – деп өзін жігерлендірді. Күні-түні ем қабылдап жатса да, қанша қиын тисе де, түнде тұрып, намазын оқып, Алла Тағалаға мінәжат етті. Дұрыс тамақтануға аса мән беріп, санасын сәулелендіруге күш жұмсады. Ауру меңдеп, өңі қурап, көркі тайса да, күнде айна алдында отырып: «Мен әдемімін. Мен жазылған соң, ауруды қалай жеңгендігім туралы әлі-ақ, көпшілікке айтып беремін», – деп өзіне уәде берді.Бүгінде жүрек түкпіріндегі сенімі сырқатын жеңуге жетелеген ару аурудан құлан-таза айығып, қатарға қосылды. Әрқашан күлімсіреп жүретін Жұлдыз Оңдаш:<blockquote>– Өмірдегі ең қиын нәрсе – ол өліммен бетпе-бет келу. Атақ-мансабың, байлығың, барың бәрі-бәрі көмектесе алмайды. Адамдар кішкене қиыншылыққа кезіксе, көтере алмай, сынып кетіп жатады. Аурухана төсегіне таңылып, үміттен күдігі басым аурумен арпалысқан сәтте мен осыны ұқтым. Көп іздендім, жан-жақты мәлімет жинадым. Адамдармен, тіпті әлеуметтік желі арқылы болсын байланысты үзбедім. Ештеңеден, ешкімнен қымсынбай, ауруымды ашық айттым. Адамдардан ақшалай емес, рухани қолдау сұрадым. Аллаға шүкір, қайта қатарға қосылдым. Менің ең басты арманым – қолымнан келгенше, адамдарға жақсылық жасау, көмек қолын созу, – деген Жұлдыздың жігерлілігі мен қайсарлығы тәнті етті.</blockquote>

Жігерлігінің арқасында қауіпті дертті жеңген ару

<a href="https://kyzylorda-news.kz/">Kyzylorda-news.kz</a> Қазалы ауданынының білім бөлімін әр жылдарда қаншама басшы басқарды. Алғашқылардың бірі болып, Серғали Толыбеков, Ермекбай Кудасов, Әбдінәби Ұлманов, Берді Бәймішев, Әбжәли Айбосынов, Досмайыл Бекішев, Мұнарбай Қожахметов, Шарафадин Алтынбаев, Сейілхан Бердібекұлы, Марат Аралбаев Жайылханұлы, Болат Әбенұлы Жолтаев, Күлзипа Пержанқызы Нақан, Ерболат Бекаралұлы Қалнияз, Ақзира Бақтыбайқызы Қасымова, Бектұр Асанханұлы Қали өз қызметтерін мінсіз орындады.2020 жылдың 25 қарашасынан бастап, осы кезге дейін Қызылорда облысының білім басқармасының Қазалы ауданы бойынша білім бөлімінің басшысы қызметін Әділхан Оңдасынұлы Жөлекешов атқарып келеді. Аталған білім бөлімі басшысының тұсында бірқатар жұмыс қолға алынды.2023-2024 оқу жылының І оқу тоқсанын аудан мектептерінде – 16859 оқушымен бастап, оқу жылын – 16833 оқушымен аяқтады. 4 тоқсан барысында аудан мектептеріне 48 оқушы келіп, 67 оқушы мектептер есебінен шығарылды. Олардың – 1620-ы 1 сынып, 1515- 9 сынып, 899-ы&nbsp;11 сынып оқушылары.Төртінші оқу тоқсаны қортындысы бойынша, оқушылардың білім сапасына келетін болсақ, оқу тоқсанын – 3834 оқушы үздіктер /23 пайыз/, 6298 оқушы екпінділер /38 пайыз/, жалпы, барлығы – 10132 оқушы 68 пайыз білім сапасын құрап отыр. ( Былтырғы оқу жылының 4 оқу тоқсанымен салыстырғанда 4 пайызға артып отыр).Жалпы, оқу жылының қорытындысы бойынша, оқушылардың білім сапасы, оқу жылын – 4093 оқушы үздіктер /24 пайыз/, 6404 оқушы екпінділер /38 пайыз/, жалпы барлығы – 10497 оқушы 70 пайыз білім сапасын құрап отыр. ( Былтырғы оқу жылымен салыстырғанда 3 пайызға артып отыр.)1 сыныпқа қабылдану керек - 1572 оқушын қазіргі таңда – 1353 (86%) баланың құжаты қабылданды 1 сыныпқа қабылдауды 100 пайыз аяқтау жоспарлануда.Биыл 892 оқушы мектеп бітіреді, соның – 793-і ҰБТ-ға (89 пайыз) қатысады. Қазіргі таңда, бірінші кезеңнен – 555, екінші кезеңнен – 28 түлек ҰБТ тапсырды. Бүгінде ең жоғары балл – 134 (№234- Мақсұт Қарақат). &nbsp;ҰБТ кезінде әр мектептен кезекші психолог мамандардан кезекші ұйымдастырылды.Бұл күні 66 «Алтын белгі», 81 «Үздік аттестат», 9 сынып бойынша «Үздік аттестат» 217 оқушы бар.

Қазақстан және Қызылорда облысының жаңалықтары