<a href="https://kyzylorda-news.kz/">Kyzylorda-news.kz.</a>&nbsp; Ұлттық қауіпсіздік комитеті Алматыда ұйымдасқан қылмыстық топты ұстады.<blockquote>"2023 жылғы 24 маусымда ҰҚК жедел қызметкерлері арнаулы мақсаттағы бөлімшені жұмылдырып, Алматы қаласында қоғамға қауіпті ұйымдасқан қылмыстық топтың жолын кесті. Арнайы операция барысында қылмыстық топтың 5 белсенді мүшесі ұсталды", - делінген ҰҚК хабарламасында.</blockquote>Күдіктілерден Калашников автоматы, Макаров тапаншасы, жауынгерлік граната, тегіс ұңғылы "шолақ" мылтық және синтетикалық есірткі тәркіленді.Топ мүшелері денсаулыққа ауыр зиян келтіру, сату мақсатында аса ірі көлемде есірткі сақтау, қару мен оқ-дәріні заңсыз тасымалдау және сақтау қылмыстарын жасады деген күдікке ілінген.Үш күдікті тергеу сотының санкциясымен қамауға алынды, қалғандарына қатысты қажетті тергеу шаралары жүргізілуде.<blockquote>"Қолданылған шаралар Алматы қаласының қылмыстық ахуалын жақсартуға және қылмыстық ортаның қоғамға әсерін әлсіретуге бағытталған", - деп мәлімдеді ҰҚК-дағылар.</blockquote>Жедел-тергеу шаралары жалғасып жатыр.Қылмыстық-процессуалдық кодекстің 201-бабына сәйкес өзге ақпарат жария етілмейді.

ҰҚК қоғамға қауіпті қылмыстық топты ұстады

<a href="https://kyzylorda-news.kz/">Kyzylorda-news.kz.</a>&nbsp; Бүгінде облыста Конго-Қырым геморрагиялық қызбасына қолайсыз деп танылған 106 елді мекен анықталды. Осыған орай, өңірде кенеге қарсы залалсыздандыру жұмыстары үздіксіз жүргізілуде. Жауапты сала мамандары тұрғындарды барынша сақ болуға және үй аумақтарын жиі тазалап тұруға шақырды.&nbsp;<blockquote>Осыған орай жыл сайын облыстық бюджет есебінен тиісті қаражат бөлініп келеді. Биыл да кенеге қарсы күрес шаралары жоспарға сәйкес орындалуда. Қазіргі таңда қолайсыз елді мекендердегі тұрғын үй аумақтары мен мал қораларына кенеге қарсы «Креолин Х» ерітіндісі қолданылуда. Облыс бойынша көктемгі залалсыздандыру жұмыстарының орташа тиімділік көрсеткіші 97,2 пайызды құрады, – деді Қызылорда облысы әкімі аппаратының «Жұмылдыру және шұғыл жұмыстар орталығы» КММ директорының міндетін атқарушы Бауыржан Садықов.&nbsp;</blockquote>Қызылорда облысы Конго-Қырым геморрагиялық қызбасының табиғи ошағында орналасқан. Сол себепті қала және барлық ауданда кенеге қарсы көктемгі жұмыстар 2 кезеңмен жүргізілуде.&nbsp;<blockquote>Өздеріңіз білетіндей, Конго-Қырым геморрагиялық қызбасы өте қауіпті аурулардың біріне жатады. Аталмыш аурудың ең алғашқы белгілері: адамның басы айналады, жүрегі айниды, дене температурасы көтеріледі, әлсіздік пайда болады, іші ауырады. Егер адам өзінен осындай белгілерді байқаса міндетті түрде медициналық көмекке жүгінуі керек. Сондай-ақ, жаз мезгілінде табиғат аясына шыққанда және далалық жерлерде кенеден сақтанып, үй аумағында тазалық жұмыстарын жиі жүргізіп тұрған абзал, – деді облыстық санитариялық-эпидемиологиялық бақылау департаменті басшысының орынбасары Әлия Әбдіқайымова.</blockquote>Биыл залалсыздандыру жұмыстарына жұмсалатын препараттар көлемін жоспарға сәйкес алдыртып, кезең-кезеңімен аудандарға жөнелтіліп жатыр.&nbsp;<blockquote>Жалпы қолайсыз елді мекендерде 556 мың мал басы бар. Оның 117 мың мал басына арнайы препараттар егіліп, қауіпті ауруға қарсы залалсыздандыру жұмыстары жүргізілді. Бүгінде ауру ошақтары анықталған елді мекендер қатаң бақылануда, – деді облыстық ветеринария басқармасы басшысының орынбасары Әнуарбек Дәрмағамбетов.&nbsp;</blockquote>&nbsp;Бүгінде облыста Конго-Қырым геморрагиялық қызбасына күдікті 29 науқас тіркелген. Оның ішінде 10 жағдай нақтыланып, өкінішке орай 3 адам қаза тапты.&nbsp;<blockquote>Қазіргі сәтте қолайсыз деп танылған елді мекендерден бөлек, басқа аумақтарда да қауіпті аурудың алдын алу шаралары тұрақты түрде жүргізілуде. Адамның ауруды жұқтыруы кене шаққан жағдайларда және қанында вирусы бар жануарларды сою кезінде, сондай-ақ науқас адамға күтім жасау кезінде немесе мәйіттің қанымен, ластанған медициналық құралдар арқылы да жұғуы мүмкін. Сондықтан облыс тұрғындарын барынша сақтануға шақырамыз, – деді облыстық денсаулық сақтау басқармасы басшысының орынбасары Жангелді Шайымбетов.</blockquote>Жалпы, кенеден келетін кеселдің күшті екені бесенеден белгілі. Мамандардың ескертуі сондықтан.

Кенеге қарсы күрес шаралары жоспарға сәйкес орындалуда

<a href="https://kyzylorda-news.kz/">Kyzylorda-news.kz.</a>&nbsp; Аймақта шағын және орта кәсіпкерлердің саны 37,5 пайызға ұлғайып, 72 685 бірлікке жеткен. Жалпы осы секторда жұмыспен қамтылғандардың саны 18 пайызға артты. Қазіргі таңда экономикадағы барлық жұмыспен қамтылғандардың шамамен 35 пайызы шағын және орта кәсіпкерлік саласында жұмыс істейді. Бұл туралы Өңірлік коммуникациялар қызметінің ақпараттық алаңында өткен баспасөз конференциясында облыстық кәсіпкерлік және өнеркәсіп басқармасы басшысының орынбасары Азамат Каюпов мәлімдеді.Сондай-ақ, кәсіпкерлікті дамыту жөніндегі ұлттық жоба жүзеге асырылып,ауыл тұрғындары мен жастардың кәсіпкерлік бастамаларын жеңілдікпен несиелендіру жұмыстары басталды.<blockquote>– Облыста кәсіпкерлікті мемлекттік қолдау және оны дамыту бағытында жұмыстар жүйелі атқарылуда. Мәселен, биыл кәсіпкерлікті қаржылай қолдауға әртүрлі көздерден шамамен 23 млрд. теңгеге жуық қаржы қарастырылып, жыл басынан бері 2 мыңға жуық жобаға қаржылай қолдау көрсетілді. Одан бөлек, кәсіпкерлікті дамыту жөніндегі ұлттық жоба аясында бизнестің жалпы несие портфелі 12,9 млрд. теңгені құрайтын 484 жобасы субсидияланды. Қаржы ұйымдары арқылы шағын бизнестің 723 жобасы 9,3 млрд. теңгеге несиелендіріліп, жас кәсіпкерлердің 316 жобасын 2 млрд. теңге шамасында қаржыландыру мақұлданды. Мұнан өзге, 400 айлық есептік көрсеткішке дейінгі мемлекеттік гранттар жұмыссыз азаматтардың 722 жобасына табысталды. Бұдан өзге, өңірде шағын өнеркәсіп парктерін құру қолға алынды. Ол үшін республикалық бюджеттен 1 млрд. теңге, ал жергілікті бюджеттен 100 млн. теңге қаражат қарастырылуда, – деді Азамат Биғалиұлы.&nbsp;</blockquote>Айта кететін жайт, кәсіпкерлік саласын мемлекеттік қолдаудан бөлек, салықтық ынталандыру шаралары да қоса атқарылуда. Биыл бөлшек сауда және халыққа қызмет көрсету саласындағы кәсіпкерлерге бөлшек салық режимін қолдану мүмкіндігі берілді. Режим қосымша құн салығы мен әлеуметтік салықтан босатуды, айналымнан 4 пайыз табыс салығын төлеуді қамтиды.

Қызылорда облысында кәсіпкерлерге қолдау көрсетілуде

<a href="https://kyzylorda-news.kz/">Kyzylorda-news.kz.</a>&nbsp;11 шілдеде республиканың басым бөлігінде антициклон жотасына байланысты жауын-шашынсыз күн райы қалыптасады. Елдің тек батысында атмосфералық фронталды бөліктердің өтуімен найзағай ойнап, жаңбыр жауады. Өңірлерде жел күшейіп, батыста, оңтүстік-батыс пен оңтүстікте шаңды дауыл тұрады, деп хабарлайды Қазгидромет.Батыс Қазақстан, Атырау, Маңғыстау, Түркістан, Алматы, Ақмола, Қостанай, Солтүстік Қазақстан, Павлодар, Қарағанды, Қызылорда, Жамбыл, Ұлытау облыстарының басым бөлігінде қатты ыстық сақталады.Ал Ақтөбе облысының – басым бөлігінде, Ақмола облысының – батысында, Маңғыстау облысының – солтүстік-шығысында, Қостанай, Солтүстік Қазақстан облыстарының – батысы мен оңтүстігінде, Ұлытау облысының оңтүстігінде өте қатты ыстық күтіледі.Жамбыл, Қызылорда, Маңғыстау облыстарының басым бөлігінде, Түркістан облысының оңтүстігінде, батысы мен солтүстігінде, шөлді аудандарында, Атырау облысының оңтүстігі мен солтүстігінде, Қостанай, Жетісу облыстарының оңтүстігінде, Ақтөбе облысының оңтүстігі мен оңтүстік-шығысында өрт тұтанудың төтенше қаупі сақталады.Солтүстік Қазақстан, Ақмола, Алматы, Қарағанды, Ұлытау облыстарында, Павлодар облысының солтүстік-батысында, шығысында, оңтүстігінде, Шығыс Қазақстан облысының оңтүстігінде, батысында, Абай облысының оңтүстігінде өрт тұтану ықтималдығы жоғары. &nbsp;

11 шілдеде ел өңірлерінде қатты ыстық болады

<a href="https://kyzylorda-news.kz/">Kyzylorda-news.kz.</a> Қызылорда қаласы әкімінің орынбасары Жанмұрат Сейіловтің төрағалығымен Қызылорда қаласы әкімдігі жанынан құрылған қалалық ономастика жұмысшы тобының отырысы өтті.Күн тәртібінде қалалық ономастикаға келіп түскен көше атауын беру жөніндегі 19 ұсыныс, сондай-ақ Қызылорда қаласы, Арай-Шұғыла мөлтек ауданындағы шартты атаудағы 5 көшесіне жер, су атауларымен қайта атау және Қарауылтөбе ауылдық округінің ауылдық мәдениет Үйіне атау беру мәселелері қаралды.Қалалық мәдениет және спорт бөлімінің басшысы Жағыпар Тажмаханов күн тәртібіндегі бірінші мәселе - «Қызылорда қалалық ономастика жұмысшы тобына Қызылорда қаласындағы әкімшілік-аумақтық бірліктердің құрамдас бөліктерін қайта атау және атау беру туралы келіп түскен ұсыныстар мен өтініштерін талқылау» бойынша хабарлама жасады.Күн тәртібіндегі екінші мәселе «Қызылорда қалалық ономастика жұмысшы тобына Қызылорда қаласына қарасты Қарауылтөбе ауылдық округінің ауылдық мәдениет Үйіне атау беру мәселесі бойынша Қарауылтөбе ауылдық округінің әкімі Еркін Ахетов тоқталып өтті. Жанмұрат Жақсымұратұылы жиынды қорытындылай келе, отырыста қолдау тапқан ұсыныстарды тиісті заңдылықтарға сәйкес үйлестіруді қамтамасыз етуді тапсырды.&nbsp;Айта кету керек, көше атауын анықтауға байланысты ономастика жұмысшы топ отырысы «Қазақстан Республикасының әкімшілік-аумақтық құрылысы туралы» Қазақстан Республикасының Заңы және «Әкімшілік-аумақтық бірліктерге, елді-мекендердің құрамдас бөліктеріне атау беру, оларды қайта атау, сондай-ақ олардың атауларының транскрипциясын нақтылау мен өзгерту кезінде тиісті аумақ халқының пікірін ескеру қағидаларын бекіту туралы» ҚР Үкіметінің (2014 жылғы 4 ақпандағы №138) қаулысымен бекітілген қағидасына сәйкес өткізілді.

Қызылорда қалалық ономастика жұмысшы тобының отырысы өтті

<a href="https://kyzylorda-news.kz/">Kyzylorda-news.kz.</a>&nbsp; Сырдария аудандық Қоғамдық кеңесінің мүшелері аудан орталығындағы мемлекеттік балабақшалардың жұмысына мониторинг жүргізген болатын. Мониторингқа Кеңес төрағасы Марат Еспенбетов, кеңес мүшелері Сансызбай Сәдуақасов, Жұмаділда Нарымбетов, Қайрат Сүлейменов, Ақтөре Ибрагимұлы және кеңес хатшысы Жандос Әбубәкіров қатысты.Кеңес мүшелері ең алдымен Азатбақыт Әлиакбаров көшесіндегі №2 «Балдәурен» бөбекжай балабақшасын аралап көрді. Балабақша ұжымымен кездесіп, ғимарат ішіндегі топтармен танысты. Балабақша ауласына жаңадан ойын алаңын салу қажеттілігі жөнінде ұсыныстар айтылды. Бұл бағытта бюджеттік өітінім әзірленген екен. Қаржы бөлу жұмыстары Қоғамдық кеңес құрамындағы депутаттар тарапынан көтерілетін болады.<blockquote>– Қазіргі уақытта бала тәрбиесіне жіті көңіл бөлінуі тиіс. Балабақша тәрбиешілерінің жұмысын жандыру – күн тәртібінен түспеу керек. Сонымен қатар балабақша мамандарының кәсіби біліктілігін арттыру жолға қойылса дейміз. Негізінен, бала тәрбиесінің бастауы балабақшада басталатындығын жақсы білеміз. Сол себепті ата-аналардың сын ескертпелеріне оңды нәтиже шығару керектігі назарда болу керек. Сырдария аудандық қоғамдық кеңесінің мүшелері кейбір отырыс барысында балабақша мәселесін көтеретін боламыз, – деді Сырдария аудандық Қоғамдық кеңесінің төрағасы Марат Еспенбетов.</blockquote>Мұнан кейін Кеңес мүшелері №13 «Нұр бөбек – Тереңөзек», №6 «Ботагөз» санаториялық бөбекжай балабақшасында болды. Мұнда да балабақшаның ішін аралап, балаларға қаншалықты қолайлы жағдай жасалғанын бағамдады. Балабақша меңгерушілері атқарылып жатқан жұмыстармен таныстырып, алдағы жоспарларымен бөлісті. Кеңес мүшелері тарапынан бірқатар ұсыныстар айтылып, олардың басым көпшілігі орындалатын болды.Мониторинг жұмыстары №1 «Қызғалдақ» бөбекжай балабақшасында жалғасты. Мұнда 130 бала тәрбиеленіп жатыр екен. Балабақшаның меңгерушісі ойын алаңын жаңалау және ғимараттың кейбір тұстарын кеңейту қажет екенін айтты. Кеңес мүшелері тарапынан да ұсыныстар айтылды.<blockquote>– Мониторинг жұмыстары тұрақты түрде жалғасын тапса, сала мамандары жұмысы сапа бола түспек. Өзге қалаларда балабақша жұмысының сын көтермейтіндігін байқап жүрміз. Сондықтан барлық мүмкіндіктерді қарастырып, халық баласын тәрбиелеуде ерекше мән берілетін мәселелер көп. Өзіміз бала тәрбиелеп отырғаннан кейін балабақша жұмысы таразылап, балаға қолайлы орта қалыптастыра алатын мамандарды іздейміз. Біз бүгін бірнеше балабақшаны аралап көрдік. Балабақша меңгерушілеріне әріптестік байланыс орнатып, баланың болашағы үшін тікелей жұмыс жасау керектігімізді ескерттік. Себебі, көпшілік әлеуметтік желі арқылы өзге өңірлердегі олқылықтарды болдырмау мақсатында жоғары талап қояды. Расында, балабақша жұмысы ұдайы бақыланып отырады, – деді аудандық мәслихати депутаты Ақтөре Ибрагимұлы.&nbsp;</blockquote>Мониторинг барысында Кеңес мүшелерінің назарына ұсынылған мәселелер алдағы уақытта Кеңестің кезекті отырыстарында көтерілетін, талқыланатын болады. Кеңес мүшелері алдағы уақытта да өз құзіреті шегінде мониторинг жұмыстарын ұйымдастыратын болады. &nbsp;

Қоғамдық кеңес мүшелері балабақшаларға мониторинг жүргізді 

Сырдария ауданында ауқымды жобаларға инвестиция тартылды

<a href="https://kyzylorda-news.kz/">Kyzylorda-news.kz.</a> Бүгінде ел экономикасының дамуына бағытталған басты қозғаушы факторлардың бір бағыты – кәсіпкерлік саласы екені жасырын емес. Елдің қазынасын толтырып қана қоймай жұмыссыздықпен күресті оңтайландыруда да осы саланың беріп отырған серпіні тым ерекше. Сондықтан мемлекеттің де назарынан тыс қалмай, ұдайы қолдауға ие болып келе жатқан кәсіпкерлердің табысты еңбегі еселі десек қателеспейміз. Әсіресе бұл ретте жастардың өз ісін бастап, оны жандандыру, ары қарай дамытуға деген жоспарлары, сол жоспарды жүзеге асырудағы шаралары көңіл қуантады. Олардың кәсіпкерлікке деген көзқарасы мен тың идеялары тек өздерін емес, өзгелерді де шабыттандырып, осы бағытта еңбек етуге үлкен көмек болып отыр.Расында тәуелсіздікке қол жеткізгелі бері кәсіпкерлік бағытындағы түрлі қиындықтарды бастан өткердік. Ол жасырын емес. Бастайтын істі толықтай зерделеп, жоспарлап алмай қолға алынғандықтан кәсіптің өміршеңдігі де ұзаққа созылмағанын көріп, біліп жүрдік. Ал бүгінде жүйелі жұмыс пен жетістікке жетуге бағытталған бағдардың нәтижесінде ауданымыздың өзінде бірнеше мыңдаған азамат кәсіппен айналып отыр. Мемлекет басшысы Қасым-Жомарт Тоқаев "2030 жылға қарай жұмыс күшінің үштен бір бөлігіне жуығы цифрлық дағдыларды меңгерген және ерекше қабілеттері бар жастар болады. Оларды тиімді пайдаланған жөн. Үкімет "Атамекен" Ұлттық кәсіпкерлер палатасымен бірлесе отырып, кадрларды әзірлеу үшін ұзақмерзімді бағыттарды айқындауға тиіс. Яғни алдағы 10-12 жылға арналған құзыреттер болжамын жасау қажет" деген болатын. Міне, кәсіпкерлер палатасының жұмысы қазірдің өзінде өз жемісін беріп отыр.&nbsp;Мемлекеттің толағай қолдауының нәтижесінде кәсібінің көкжиегін кеңітуге, арманындағы адал ісін жүзеге асыруға мүмкіндік алған жандардың қарасы ауданымызда да өте көп. Қазірде аудан көлемінде 6000-нан аса кәсіпкер тіркелсе, биыл қайтарымсыз гранттың жемісін көруге 300-ден аса адам өтініш қалдырып, бақ сынаса, соның алғашқы екі легі бойынша 70 адам қайтарымсыз грантқа қол жеткізді. Міне, табысты еңбектің тура жолын тапқан жандардың қатарында қазірдің өзінде қарқынды еңбек етіп, кәсіпкерліктің тілін меңгерген жандар да бар. Кәсіпкерлік бағытта барынша табысты еңбек етуді меңгерген Арсена Күшжанова өзінің ерекше жұмысымен тұтынушыларын таңдандырып келеді.1988 жылы көршілес Қырғызстанның Ыстықкөл облысында дүниеге кейіпкеріміз бүгінде Аралдың келіні, төрт баланың анасы. Отбасылық қызмет пен келіндік міндетін адал атқарып келе жатқан Арсена бүгінде кәсіпкерлік саласында жан-жақты бағын сынап, табысты еңбек етуде. Қазіргі уақытта касметикалық дүкеннің иесі тағы бір ерекше жұмысымен жұртшылықтың сұранысын қамтамасыз етіп келеді. Нақтырақ тоқталар болсақ көздің жауын алатын түрлі пішіндегі сувинерлік сабындар жасап, өнімі кеңінен таралып үлгерген. Осы жайында сұрағанымызда кәсіп иесі:<blockquote>– Кез келген жұмысты бастауға бір себеп табылады ғой. Менің де өз себебім бар. Алғашында бұл тек хобби болатын. Бірақ декреттік демалыста отырған уақытымда 2017 жылы қызымның үстіне майда бөртпелер шықты. Ана баласы үшін қандай нәрсеге де дайын тұрады емес пе?! Мен де қызымның денсаулығына қатты алаңдадым. Сол уақытта эфир майы арқылы, басқа да қоспалар қосып оның оң әсер беретінін білдім. Сосын осындай емдік қасиеті бар сабынды жасауды қолға алып, бірнеше данасын жасадым. Алғашында жақындарым және сабынның падасын естіген бірнеше адам сатып алды. Бірақ ол уақытта қазіргідей жарнамалауға мүмкіндік аздау болды. Сондықтан сұраныс та аздау болғандықтан, ол кәсіптен қол үзіп кеттім. Және дәл сол уақытта оны кәсіп қыламын деп ойламаған да болатынмын, – дейді.</blockquote>Бірақ қазіргі уақытта жарнамаға да мүмкіндік бар, халықтың да талғамы бөлек уақыт. Бүгінгі уақытта сәндік сабындарға да сұраныс өте жоғары. Тойтабаққа, өзге де тарту жасауға әсемдігі мен ерекшелігіне қарап сәндік сабындарға тапсырыс берушілер өте көп. Сондықтан сабын жасауға ден қойдым. Алдағы уақытта қолдан келер дүниені дамыту мақсатында жан-жақты жұмыс істеп, мемлекеттің қолдауын да пайдаланғысы келеді.– Жақында ауданға арнайы келген Қызылорда облысы кәсіпкерлер палатасының директоры Пирмұхаммед Сыздықовтар көрмеге қойылған өнімімді көріп, ерекше қызығушылық танытты. Мұндай тың жаңалықты қолдауда облыстан да ерекше көмек болатынын айтты. Себебі мұндай сәндік сабын жасап отырған өзге кәсіпкер болмағандықтан, бәсекелстік те аз. Сол себепті әрі қарай дамытуға жағдай жасаймыз деді, – деп қуанышты жаңалығымен де бөлісті Арсена.Расында кәсіпкерлік саласында тың бастама мен жаңашылдық өте маңызды. Ендеше заман талабына сай өнім дайындап отырған Арсенаға біз де табыс тілейміз.Грантқа қол жеткізген келесі кейіпкеріміз Қазақстан Республикасының Президенті Қасым-Жомарт Тоқаевтың «Мемлекет кәсіпкерлікті жан-жақты қолдау үшін тиімді тәсілдер қолданып жатыр. Атап айтқанда, гранттар, шағын және жеңілдетілген несиелер беріледі. Қазірде еңбекке жарамды халықтың арасында бизнес саласына бет бұрғандар көп. Аймақтағы кәсіпкерлердің санын айтарлықтай көбейту үшін мемлекет тарапынан қолдау шараларын әлі де күшейту қажет. Осы мақсатта арнайы ұлттық жоба жүзеге асырылып жатыр. Бірақ, бұл туралы халықтың көбі білмей жатады. Сондықтан, ел ішінде бизнесті қолдау саясаты туралы ақпараттық-түсіндіру жұмысын жүргізу қажет» деген сөзінен қанаттанған көп балалы ана Гүлсара Айтпақова да осы салада жұмыс істеп келе жатқан жеке кәсіпкерлердің бірі. Биыл наурызда мемлекеттің қолдауына ие болып, 1 380 000 теңге қайтарымсыз грантқа ие болған Гүлсара қалада отырып құс өсіруді кәсіп кеткен.Алғашында қызығушылықпен бастаған жұмысы кейіннен өзінің кәсібіне айналады деп ойламаса керек. Осыдан 5 жыл уақыт бұрын оншақты тауық бағып бастаған кәсіпкер бүгінгі таңда құстың осы түрінің өзінен бірнеше түрін өсіріп отыр. Нақтырақ тоқталсақ адлер, кучин, голощекин парадоларын көбейтіп отыр.<blockquote>– Адам қай жұмысты болса да сүйіп істеуі керек. Басында тауықпен басталған бизнесімнің бүгінде көкжиегі кеңейіп отырғаны да содан болар деп ойлаймын. Өйткені ерекше ықылас қойып, күтім жасамасаң оларды көбейту де қиынға соғады. Қазіргі уақытта тауықтың бірнеше түрімен қатар қаз, үйрек, күркетауық та бағып жатырмын. Тіпті өте сирек кездесетін тауыс та бағып отыр. Олардың өзін, жұмыртқасын сатып қана қоймай, басын көбейтуді де мақсат қылдым. Осы орайда аудандық кәсіпкерлер палатасының директоры Нұрсауле Ембергенова мен Атамекен палатасының қызметкері Нұрлан Бердібекұлына алғысым шексіз. Бастаған істі үйлестіріп, қолға алған жұмыстың ауқымын арттыруда орынды кеңес беріп, таптырмас мүмкіндік жасады. Солардың кеңесінің арқасында мемлекеттік грантқа ие болып, Түркістан қаласынан жұмыртқа алдырып инкубатор аппаратын алдым. Құстардың жұмыртқасын салып, соңғы күндері алғашқы балапандар шығып жатыр, - дейді Гүлсара Айтпақова.</blockquote>Өз кезегінде осындай бастаманы қолға алған тұста тілекші болып, көмек беріп келе жатқан отбасына алғыс айтты. Жолдасы Асанхан Тишев екеуі үш ұл, үш қыз тәрбиелеп отыр. Қыз ұзатып, құдандалы болған шаңырақ. Асанхан аудандық мәдениет орталығында жұмыс жасайды. Мұнан бөлек оның да жеке кәсібі бар. Балдарымның барлығы өнер жолында. Ұлдары Рамазан музыка маманы ретінде баян аспабын игерсе, Аслан – барабаншы. Қазір 1 курс студенті. Инабат Сырдың бойында қалыптасқан жыраулық өнерді жанына серік етіп, осы жолда дәріс алып, аудандық, облыстық, республикалық байқауларда марапат төрінен көрініп жүр. Ал кенжесі Айкөркем 1 жасқа толады.Кәсіп иесі алдағы жоспарларымен де бөлісіп өтті. Кәсібін ұлғайтуды көздеп отырған Гүлсара жанына адам алып, жұмыспен қамтуғысы келеді. Сонымен қатар жер беріліп жатса құс өсіруді одан әрі дамытпақ. Арнайы бассейн жасап, олардың көбеюіне барынша жағдай жасауды көздеп отыр.Ерекше кәсіптің көзін тапқан кәсіпкер Аралдық бренд қалыптастырып, табысты жұмысы мен жағымды жаңалықтарын әлі талай ақпараттандырамыз деген сенім бізде де мол.Сексеуіл кентінде жасалып жатқан шұжықтың иесі Шарбану Мамытова да гранттың игілгін көрген жандардың бірі. Шарбану бүгінде бір шаңырақтың келіні, 4 баланың анасы. Мектеп бітірген соң Ақтөбе қаласындағы Темір жол колледжін бітіріп, кәсіби мамандық алып шығады. Бірақ мамандық бойынша қызмет жасамағанымен, үй шаруасында жүріп жаңа жұмыстың көзін табады. Осылайша бүгінгі уақытта ол шұжық жасаумен айналысып, өз тұтынушыларының көңілін шығып отыр.&nbsp;<blockquote>Кез келген дүниені бастау үшін белгілі бір себеп болады екен. Бірде дүкеннен сатып алған колбасаның ішінен шыққан нәрсені көріп, оның таза еместігіне күмән туды. Осылайша отбасымызбен үзілді кесілді шұжық тұтынудан бас тарттық. Бірақ қазір барлығы дамыған уақыт қой. Іnstagram желісінде отырып, шұжық, ет, сүт өнімдерін табиғи жолмен жасайтын әдісті көзім шалып қалды. Осылайша Ақтөбе қаласынан соны үйреніп қайттым. Десе де мұны кәсіп көзіне айналдырам деген ой мүлде болмады. Бірақ үй жағдайында өзім дайындап, тұтынып жүрдік. Одан дәм татқан туыстар, жақындар, достар оң бағасын беріп, "Керемет дүние жасапсың. Неге осыны кәсіпке айналдырмайсың. Қолдан келетін жұмысты жақсы кәсіп етуге болады ғой" деген пікірлерін білдірді. Осылайша қызығушылығым артып, талап қылдым. Оның үстіне мемлекеттің кәсіпкерлерге жасап жатқан жағдайы, қолдауы да ерекше емес пе?! Кәсіпкерлер палатасы арқылы "Бастау Бизнес" жобасы арқылы оқып, арнайы сертификат алып, қайтарымсыз грантқа қол жеткіздім. Соның нәтижесінде өз жұмысымды ары қарай дөңгелетіп алып кетуге зор мүмкіндік туды, – дейді Шарбану Тәуекелқызы.</blockquote>Иә, бүгінде тыс кәсіптің көзін тауып, соны дамыту жолында тынымсыз еңбек етіп жүрген Шарбану өз тұтынушыларының да қарасы көбейіп келе жатқанын айтты. Жылқы мен сиыр етінен жасалатын шұжықтың құрамы да табиғи тазалығымен ерекшеленеді. Тұз бен бұрыштың қоспасынан әзірленетін өнімнің сұранысқа енуінің өзі сол табиғи тазалығынан екені сөзсіз.Алдағы уақытта өз өнімін нарықтық ауқымын кеңейтуді ойлаған кәсіпкер шұжықтардың барынша тез арада қолданылғанын қамтамасыз етуді қалайды. Себебі арнайы химиялық құрамның болмауына байланысты, ұзақ уақыт сақтауға қолайсыздығын да жасырмады. Тағы айта кететін жағдай Шарбану Мамытова бұл бағыттағы жұмыстармен тоқтап қалуды көздемейді. Алдағы уақытта орталықтан ет, сүт, қойдың құйрығынан жасалатын өзге де өнімдерді әзірлейтін арнайы цех ашуды көздейді.Иә, қазірде кәсіпкердің өзі айтқандай мемлекет тарапынан қолдау өте жоғары. Осы мүмкіндікті пайдаланып, бренд қалыптастырып жатса, ауданнан тек балық пен тұздан да өзге өнімнің шығатынын жаһан жұртшылығы да жақсы танып, білер еді дейміз.

Арал өңірінде кәсіпкерлік саласы біршама дамыған

<a href="https://kyzylorda-news.kz/">Kyzylorda-news.kz.</a>&nbsp; Жүкті, жұмыс істемейтін әйелге «сақтандырылған» мәртебесін қалай алуға болады? МӘМС жүйесінде «сақтандырылған» мәртебесі неше ай қолжетімді? Осы және басқа да сұрақтарға біздің тілшімізге «Әлеуметтік медициналық сақтандыру қоры» КЕАҚ Қызылорда облысы бойынша филиалының бас сарапшысы Айгүл Аханова жауап берді.Біздің жұмысымызда барлық міндетті төлемдер кешіктіріліп төленеді. Мысалы, наурыз айы үшін тек сәуірде түседі. Сұрайын дегенім ай сайын уақытында төленбесе, мәртебем сақтала ма? &nbsp;Сіз бірыңғай жиынтық төлем туралы естіген шығарсыз. Иә, өзін-өзі жұмыспен қамтыған азаматтар БЖТ-ны уақтылы төлеуі керек. Себебі келесі айға төлем жасалмаған жағдайда мәртебесінен айрылады. Азаматтар бұл төлем түрін өткен айларға төлей алмайды.&nbsp;Қызметкерлерге арналған жарналарға келетін болсақ, олар (БЖТ-ны қоспағанда, төлеушілердің басқа санаттары сияқты) соңғы төлем күнінен бастап 3 ай бойы сақталады. Егер жұмыс беруші ақпан айына жарна төлеген болса, онда сіздің МӘМС жүйесіндегі мәртебеңіз шартты түрде мамырға дейін сақталады. Осы уақыт аралығында жұмыс беруші ҚР заңнамасында көзделген төлемдерді жүзеге асыра алады. Осылайша, сәуір айында наурыз айындағы жарналарды төлеген кезде мәртебеге әсер етпейді.Мен жүктімін, есепте тұрмын. Жеңілдік санатына кіретін адам ретінде сақтандырылғанмын. Бірақ декреттік төлемдерді алу үшін БЖТ төледім, қазір жүйедегі мәртебем «сақтандырылмаған». Неліктен бұл орын алды және мәртебені қайтадан алу үшін не істеу керек?» МӘМС жүүйесінде жеңілдік санаты «Жұмыс істемейтін жүкті әйел» деп аталады. Олар үшін МӘМС жарналарын мемлекет төлейді. Бұл санатқа ресми түрде жұмыс істемейтін және соңғы 2 айда зейнетақы жарналары мен әлеуметтік аударымдар түспеген әйел кіре алады. Егер әйел ресми түрде жұмыс істесе, онда декреттік демалысқа шыққаннан кейін жұмыс беруші ол үшін жарналар мен аударымдарды төлеуді тоқтатады. Және ол «Жүктілікке және босануға, жаңа туған баланы (балаларды) асырап алуға байланысты, бала (балалар) үш жасқа толғанға дейін оның (олардың) күтіміне байланысты демалыстағы адамдар» жеңілдікті санатына енгізіледі. Бұдан әрі ол мемлекет есебінен сақтандырылған болып табылады.&nbsp;БЖТ-ға келетін болсақ, салық заңнамасы бойынша оны ресми жұмысқа орналаспаған, тіркелген ЖК-сі жоқ, бірақ кәсіпкерлік қызметті жүзеге асыратындар төлейді. Бірыңғай жиынтық төлем бірнеше төлемдерді қамтиды: БЖТ – ның 10% – ы жеке табыс салығын, 20% - ы Мемлекеттік әлеуметтік сақтандыру қорына әлеуметтік аударымдарды, 30% - ы Бірыңғай жинақтаушы зейнетақы қорына міндетті зейнетақы жарналарын, 40 % – ы Әлеуметтік медициналық сақтандыру қорына міндетті әлеуметтік медициналық сақтандыруға аударымдарды құрайды. БЖТ-ны қандай да бір табыс алатын азаматтар төлейді. Яғни, егер жүкті әйел БЖТ төлесе, онда ол жұмыс істейді деп саналады.Жеңілдік санатына қайта оралу үшін екі ай бойы БЖТ төлемеу керек. Содан кейін ғана &nbsp;жүкті әйел жұмыссыз ретінде сақтандырылған мәртебесін алады.&nbsp;Мысалы, егер БЖТ наурыз айында төленген болса, жеңілдік мәртебесін алу үшін сәуір және мамыр айларына төлемдер болмауы тиіс. Жеңілдік мәртебесі маусым айында беріледі. Бала туылғаннан кейін жұмыс істемейтін әйел басқа жеңілдік санатына енеді-үш жасқа дейінгі балаларға күтім жасайтын жұмыс істемейтін адамдар.Екінші нұсқа бар. БЖТ төлемін ай сайын жалғастыруға болады, сонда әйел жеңілдікті санатқа енбейді, бірақ өзін-өзі жұмыспен қамтушы ретінде сақтандырылған мәртебесін алады.Өзін өзі жұмыспен қамтыған азамат 6 ай бойы бірыңғай жиынтық төлем төлеген соң, келесі айды төлеуді ұмытып кетті делік. Ол өткен ай мен ағымдағы айды төлеп, сақтандырылған мәртебесін сақтап қала ала ма? &nbsp; Бірыңғай жиынтық төлем төлеушілер өткен айларға төлем жасай алмайды. Себебі салық кодексінің 774-бабына сәйкес БЖТ төленген кезеңнің соңғы күніне дейін қолданылады. БЖТ төлеушілерге сақтандырылған мәртебесі &nbsp;3-ші айда беріледі. Мысалы, егер азамат БЖТ-ны төлеуді 2023 жылдың шілдесінде бастаса, онда ол 2023 жылдың шілде, тамыз және қыркүйек айлары үшін БЖТ төлеп, қыркүйек айында мәртебе алады. Қазан айында төлем жасамаса, мәртебесін жоғалтады. Сол себепті БЖТ-ны алдын ала төлеп отырған абзал.Егер сіздің тағы да сұрақтарыңыз болса немесе медициналық көмек алуда қиындықтар туындаса, өз емханаңыздағы «Пациенттерді қолдау қызметіне» жүгіне аласыз. Ал ол жерде мардымды жауап ала алмасаңыз, Қордың өзіңізге ыңғайлы арналары бойынша өтініш-шағымдарыңызды қалдыра аласыз: 1414 байланыс орталығы, fms.kz ресми сайты, Qoldau 24/7 мобильді қосымшасы, Telegramдағы SaqtandyryBot.&nbsp;

МӘМС-ке уақытында төленбесе, «сақтандырылған» мәртебе сақтала ма?  

<a href="https://kyzylorda-news.kz/">Kyzylorda-news.kz.</a>&nbsp;&nbsp; Сырдария ауданына қарасты Ақжарма ауылында аудандық мәдениет және спорт бөлімі және Ақжарма ауылдық округі әкімдігінің қолдауымен, Ақжарма ауылдық мәдениет үйінің ұйымдастыруымен "Алтын балық –2023" облыстық әуесқой балық аулаушылар арасында командалық жарыс өткізілген болатын. Аталған жарысқа облыс көлеміндегі аудандардан және Қызылорда қаласынан барлығы 10 командаға бөлінген 20 талапкер қатысты.&nbsp;Негізінен, облыстық жастырың &nbsp; ережесі бойынша қатысушылар 1 қармақпен ғана аулау керек болды. Спорттық бәсекеге облыстық спорттық балық аулау федерациясының мүшелері, білікті мамандар Ш Женсикбаев. пен &nbsp;А.Қобылан төрелік етті. &nbsp;2 кезеңнен тұратын балық аулау жарысы әр кезең 4 сағаттан, барлығы 8 сағатқа созылды. Жарысқа қатысушыларға Ақжарма ауылдық мәдениет үйі қызметкерлерінің ұйымдастыруымен табиғат аясында түскі ас берілді. Облыстық жарыс &nbsp;нәтижесінде, І орынды Қызылорда қаласынан келген "Ема фишин-2" командасы, ІІ орынды Ақжарма ауылынан қатысқан "Фартовые" командасы, ІІІ орынды Сырдария ауданынан қатысқан "Ема фишинг-3" командасы иеленді. Ал &nbsp;"Ең үлкен балық" номинациясын Жаңақорған ауданың балық аулаушысы Сұлтан Байхожаев қанжығасына байлады. Жарыс жеңімпаздары бағалы сыйлықтармен және дипломдармен марапатталды.<blockquote>– Біз спорттық жарыс түрі саналатын балық аулаудан &nbsp;жыл сайын облыс біріншілік өткізуді қолға алғанбыз. Табиғат аясында әуесқой балықшылар бар өнерлерін салды. Көпшіліктің қызығушылығын жарыста балықтыереже бойынша аулай білген әуесқойлар жеңімпаз атанды, – дейді жарыс ұйымдастырушысы Айтмағанбет Темірханов.</blockquote><figure class="image"><img src="https://knadmin.beoblood.kz/uploads/742d4a9c_8649_40b8_ad7b_16bd7d66f47c_af3fb48940.jpg" alt="742d4a9c-8649-40b8-ad7b-16bd7d66f47c.jpg"></figure>

Сырдарияда балық аулаудан облыстық жарыс өткізілді

<a href="https://kyzylorda-news.kz/">Kyzylorda-news.kz.</a>&nbsp; &nbsp;Сырдария аудандық құқық қорғау органдары, аудандық пробация қызметі, аудандық жұмыспен қамту бөлімі, аудандық денсаулық сақтау органдары өкілдерінің қатысуымен пробациялық есепте тұрған азаматтармен кездесу ұйымдастырылды.&nbsp;Кездесудің негізгі мақсаты – пробация қызметінің есебінде тұрған азаматтарға медициналық, жұмыспен қамту, әлеуметтік және құқықтық көмектер көрсету болып табылады. Мұнан соң, тиісті сала мамандары тарапынан қайта қылмыс пен әкімшілік құқықбұзушылық жасамау керектігі турасында жан-жақты түсіндірме жұмыстары жүргізілді.<blockquote>– Жыл сайын пробоция есебінде тұрған жастармен жұмыс тұрақты түрде жүргізілуде. Жалпы, пробоция есебінде тұрған азаматтарды қоғам өміріне бейімдеу – маңызды рөл ойнайды. Негізінен, жастар арасында пробоция есебінде азаматтарды барынша қоғамдық іс-шараларға тарту жүргізіледі. Аталған азаматтар арасында қайта қылмыс жасауға бейім жастарға Заңның қатаңдығын ескертіп келеміз. Көбіне қолайсыз &nbsp;отбасылардан шыққан жастар тәртіп бұзушылықтарға барады, – деді аудандық жастар ресустық орталығының директоры Нұрман Абдарасилов.&nbsp;</blockquote>Кездесу соңында азаматтарға әлеуметтік, тұрмыстық, сонымен қатар кәсіпкерлік қызметін жүзеге асыруға қайтарымсыз грант алу, жұмысқа орналасу және өзге де мәселелерге байланысты анықтамалар берілді.&nbsp;

Нұрман Абдарасилов:  Жаза басқандарды қоғамға бейімдеу - маңызды мақсаттардың бірі

<a href="https://kyzylorda-news.kz/">Kyzylorda-news.kz.</a>&nbsp; Саналы ғұмырларын ішкі істер саласына, оның ішінде саптық бөлініске арнаған, әр жылдары патрульді полиция және жол-патрульді полиция батальондарын басқарған үш командир Құлдықов Айдарбек Әбжалиұлы, Әденов Қайрат Зиятбекұлы және Гудратов Сулейман Махмудұлын еске алуға арналған Ішкі істер органдарының зейнеткерлері арасында шағын футболдан турнир өтті. Жарысқа 6 команда қатысты. Оның ішінде патрульдік полиция, жедел қызмет, жол полиция, Байқоңыр қаласы Ішкі істер саласы, мамандандырылған күзет қызметінің және қылмыстық атқару жүйесі ардагерлерінің командалары бақ сынасты.Байрақты бәсекенің ашылу салтанатына Департамент бастығының орынбасары полиция полковнигі Утегенов Әміржан, Ардагерлер кеңесінің төрағасы Серікбол Тұңғышбай, ішкі істер органдарының ардагерлері Қасымбек Байкенжиев, Әмірбек Шаймағамбетов , Пазылбек Нәлібаев, марқұм комбаттардың жұбайлары, ұл-қыздары мен ағайындары қатысты.&nbsp;Құлдықов Айдарбек Әбжалиұлы ішкі істер органдарында 25 жыл саптық бөліністе қызмет атқарған, қызметін 1978 жылы Қызылорда қаласы ішкі істер бөлімінің патрульді полиция ротасының қатардағы милиционерінен бастап қызметтің бар сатысынан өтіп, 1990-1997 жылдары осы ротаны басқарған, подполковник шенінде 2003 жылы зейнетке шыққан.Әденов Қайрат Зиятбекұлы ішкі істер органдарында 32 жыл қызмет атқарған, қызметін 1986 жылы Қызылорда қаласы ішкі істер бөлімінің патрульдік полиция ротасының милиционері болып бастап, жол полиция саласында қызметін жалғастырып, Қызылорда облысы ішкі істер департаментінің жол полиция басқармасының жол полиция батальонын 2006-2011 жылдары басқарған, полковник шенінде 2018 жылы құрметті демалысқа шықты.Гудратов Сулейман Махмудұлы ішкі істер органдарында 25 жыл саптық бөліністе қызмет атқарған, қызметін 1991 жылы Қызылорда қаласы ішкі істер бөлімінің патрульді полиция ротасының қатардағы милиционерінен бастап, жылдам қимылдайтын арнайы жасақты, 2004-2009 жылдары Қызылорда қаласы ішкі істер басқармасының патрульдік полиция батальонын басқарған, подполковник шенінде 2015 жылы құрметті демалысқа шыққан.Еске алу турнирінің қорытындысы бойынша бірінші орынды жол полиция ардагерлерінің командасы қанжығасына байласа, екінші орынды жедел қызмет саласының ардагерлер командасы, үшінші орынды Байқоңыр қаласы ПБ ардагерлері жеңіп алды.&nbsp; Үздік ойыншылар мен жеңімпаз командаларға кубок, медаль және сыйлықтар табыс етілді.<figure class="image"><img src="https://knadmin.beoblood.kz/uploads/f8a8f0da_b64d_40c6_9dde_e91fd78ec274_be098bc9c0.jpg" alt="f8a8f0da-b64d-40c6-9dde-e91fd78ec274.jpg"></figure>

Қазақстан және Қызылорда облысының жаңалықтары