<a href="https://kyzylorda-news.kz/">Kyzylorda-news.kz.</a> Ғасырға жуық тарихы бар аудандық газет бүгінгі күнге дейін сан алуан соқпақты жолдарды басынан өткерді. Алынбас асуларды бағындырды, биікке ұмтылды. Әсіресе, кеңестік кезеңде баспасөз беделі айрықша мәртебеге ие болды. Мұның барлығы шығармашылық ұжым мен баспа қызметкерлерінің еселі еңбегінің жемісі еді. Сол кеңестік жылдарға дейін, одан кейін де газет өндірісінде еңбек еткен жандардың көбі қазір ортамызда жоқ. Десе де, олардан қалған сара жол кейінгі ұрпаққа өнеге болып қала береді. Бүгін біз еңбектің нағыз ортасында жүріп, уақытпен санаспай қызмет еткен Шәркүл Дүйсенбаеваның баспаханда өрілген өмірі жайында сөз өрбітпекбіз.Тарихы тереңнен сыр шертетін «Өскен өңір» газетінде қаншама адамның қолтаңбасы сақталды. Осынау қиыр-шиыры мол жолда редакциядан небір «мүйізі қарағайдай» қаламгерлер, түпсіз тереңнен сөз маржанын терген ақын-жазушылар шыққаны белгілі. Солардың ішінде көзге көріне бермейтін баспа ісінің білгірлерлерінің еңбегін елемей кету мүмкін емес. Бүгінде аудандық газет редакциясы жанындағы баспахананың болғанын көзі көргендер болмаса, кейінгі толқын жастар біле бермейді. Сондықтан да баспахана ішінде әр газеттің сапалы шығуына бар ғұмырын арнаған Шәркүл апайдың еңбек жолына аз-кем шолу жасағанды жөн көрдік.Шәркүл Дүйсенбаева 1947 жылы 15 қарашада дүние дидарына келген. Ол барлық саналы ғұмырын отбасылық өмірі мен қызметіне арнаған жан еді. 1964 жылдан бастап 2006 жылға дейін 42 жыл бойы қызметте жүріп, зейнетке шыққан Шәркүл апайдың мақтауға тұрарлық тұстары көп болатын. «Типография» саласында ұзақ жылдар бойы қызмет еткен апайымыз дос-бауырға сыйлы, ортасына жайлы, әріптестеріне құрметті кісі болды. Ол – редакциядағы жұмыстың қиындығына қарамастан, өз ісін адал атқарып, тынымды тірлігінің арқасында баспахананың қыр-сырын жетік меңгерді. Соның нәтижесінде үздік баспагер атанған еді. Ет-жүрегі мейірімге, жаны жылылыққа толы жанның еткен ерен еңбегі де елеусіз қалған жоқ. Нақтырақ айтар болсақ, әріптесіміз баспаханада жүріп, басқалардан озық болды. Елеулі еңбегі үшін «Ел ардақтысы», «Жылдың үздік баспагері» «Үздік бет жасаушы» медальдарымен марапатталды. Сондай-ақ Қызылорда облысының еңбекшілер депутаттарының Шиелі аудандық советінің депутаты болды. Одан бөлек түрлі наградалармен, мақтау қағаздарымен, төсбелгілерімен марапатталды.Әрине, өткенсіз бүгін жоқ. Бүгінсіз ертеңді көз алдыңа елестете алмайсың. Демек, өткенді бірге бағындырған әріптестерді кейінгілерге айту, есімін еске алу тірілердің парызы. Ауданның дамуына өз үлесін қосқан, баспахананың білігірі болған жанның өмір жолы өскелең ұрпаққа өнеге деп білеміз.

Шиелі: Үздік баспагер болған жан

<a href="https://kyzylorda-news.kz/">Kyzylorda-news.kz.</a> 21 маусым күні «АMANAT» партиясының аудандық филиалы жанындағы партиялық бақылау комиссиясының отырысы өтті. Оған партиялық бақылау комитетінің мүшелері Нұрлан Бақтияров, Мырзаш Бекбаев, Әсем Мерекова, Гүлжауһар Раева, Ғалым Ержанов, Бұлақ Сағымбаевтар қатысты.Отырысқа «АMANAT» партиясы аудандық филиалының атқарушы хатшысы Дастан Буханов төрағалық етіп, жиынды жүргізіп отырды. Күн тәртібіне сай үш мәселе қаралды. Алғашқысы – біршама жасқа жігер беріп, материалдық жағынан қолдау болған «Дипломмен ауылға» жобасының жүргізілу барысы. Бұл мәселе бойынша аудандық ауыл шаруашылық, жер қатынастары бөлімінің сектор меңгерушісі Сәрсенкүл Есқалиева баяндама жасап, қазіргі таңда атқарылып жатқан жұмыстарды тізбектеді.&nbsp;Күн тәртібіндегі екінші мәселе – «Ауыл аманаты» жобасы. Айта кеткен жөн, Мемлекет басшысы Қасым-Жомарт Тоқаевтың тапсырмасына сәйкес, 2022 жылы сәуірде «Халықтың табысын арттырудың 2025 жылға дейінгі бағдарламасы» бекітілген еді. Ауыл тұрғындары жылдық 2,5% жеңілдікпен қарыз алу, кооператив құру және техниканы лизингке ресімдеу кезінде көмек ала алады. Осы бағдарлама аясында «AMANAT» партиясы Үкіметпен бірге «Ауыл аманаты» жобасын жүзеге асыруда. Аталған жоба осыдан төрт жыл бұрын Жамбыл облысында қанатқақты режимде жүзеге асырыла бастаған еді. Бұл жобаның ауданда жүргізілу барысы жайында аудандық ауыл шаруашылық, жер қатынастары бөлімінің сектор меңгерушісі Сәрсенкүл Есқалиева мен аудандық кәсіпкерлік және туризм бөлімінің басшысы Біржан Өмірзақов мәлімет берді.Ал отырыста қаралған соңғы мәселе азық-түлік бағасының мониторингі болды. Бұл үнемі күн тәртібінен түспейтін тақырыптың бірі. Халық көп тұтынатын 19 түрлі тауардың шекті бағасы мен аудан дүкендеріндегі бағалар салыстырмалы түрде бағаланып, сарапқа салынды. Дүкендерді аралау барысында байқалған артықшылықтар мен кемшіліктер жайлы аудандық ауыл шаруашылық, жер қатынастары бөлімінің сектор меңгерушісі айтып өтті.&nbsp;Жиын соңында хабарламаларға байланысты бірқатар ұсыныс-пікір айтылып, хаттамаға енді. Мұндай берері мол жобалар тиімді жүзеге асса, еліміздің әл-ауқаты жақсарып, ауыл ажарлана бермек.

«АMANAT» партиясының Қармақшы аудандық филиалында тиімді жобалар жүзеге асуда

<a href="https://kyzylorda-news.kz/">Kyzylorda-news.kz.</a> Қазалы ауданында 2022 жылы алғаш рет қолданысқа енгізілген «QAZALY» сабынын шығаратын цех жұмысын кеңейтуде. Бүгінгі таңда, сабын шығаратын цех жанынан хош иісті сұйық сабын және ыдыс жууға арналған сұйықтық өнімдері қоса шығарылуда.Бұл күнделікті тұрмысқа қажетті өнімдерді өндіріп жатқан ауданымыздағы жас кәсіпкер Руслан Жаңалықұлы.Ауданда сабын өндіру кәсібінің негізін қалаушы қазалылық – Руслан Бөлекбаев. Ол біраз уақыт арнайы курстарды оқып, оны тек теориялық тұрғыда емес, тәжірибе жүзінде де іске асырып көрген. Сонан соң, Орал қаласынан Ресейде жасалған ең сапалы құрылғыны ауданға алып келді. Одан бөлек «кір сабынның» бұл түрі пайдалану адамға зиянсыз екендігін айқындау үшін арнайы орыннан сертификат алған. Себебі «Қазалы сабыны» 7 түрлі табиғи заттан жасалады. Яғни, ешбір химиялық қоспа жоқ.Жоғарыда айтқандай сабынның құрамы 100 процент экологиялық таза өнімдерден тұрады. Құрамының басым бөлігі ірі қара малдың сүйегінен жасалады. Міндетті түрде жілік майы қосылады. Қазіргі таңда шикізатты Орал қаласындағы консервіленген ет шығаратын «Кублей» компаниясымен арнайы келісім-шарт жасасып, алып отыр. Кәсіпкердің айтуынша, алдағы уақытта керекті шикізатты жергілікті жердің ірі қараларынан алу жолдарын қарастырып жатыр. Ал әзірге 80 мың дана сабын шығаруға жететін шикізаты бар.Қазіргі таңда 170, 200, 250, 300 және 350 грамдық сабыннан тәулігіне 3 мың дана шығарып жатыр. Сабынның бағасы да тұрғындар үшін әлдеқайда қолжетімді. Ал сабын сұранысына келер болсақ, бүгінде Қазалының түкпір-түкпірінен және ауданнан тыс аймақтардан да кең көлемді тапсырыстар түсіп жатқан көрінеді.Жас кәсіпкер Руслан мұнымен шектеліп қалғысы келмейтіндігін айтып, көздеген мақсат-мұратымен бөлісті.<blockquote>«Ең алдымен кәсіп жолын бастарда қол ұшын созған барша аға-бауырларыма алғысымды айтамын. Келер жылға құрған біраз жоспарым бар. Дәретхана қағазы, қағаз майлық және қағаз сүлгі шығаруды мақсат етіп отырмын. Ол үшін арнайы құрылғылар алдырып, құрастырып жатырмыз. Ісіміз оңынан басса, бұл құрылғымен жұмыс жасауға нәпақа іздеген 10-15 жанды жұмыспен қамтуға болады. Онан кейін қала сыртынан жер телімін қарастырып, барлық құрылғыны сонда көшірсек дейміз. Себебі қала ішінде құрылғылар артық дыбыстан, көрші-көлемнің, жалпы тұрғындар мазасын қашырмағанын қаперге алуымыз қажет», – деді Руслан Жаңалықұлы.</blockquote>Кәсіпкер жақында аудан әкімінің қабылдауында болып, өнімін таныстырған еді. Онда аудан басшысы кәсіпкерге жылы лебізін білдіріп, әрдайым қолдау көрсетуге әзір екенін жеткізгенін айта кетейік.Жас кәсіпкердің цех жұмысына сәттілік тілей отырып, кәсібіне табыс және береке берсін. Осындай кәсібінен береке дарыған кәсіпкерлерімізді қолдауға шақырамыз. Өнімдерді 8 702 722 22 39 байланыс нөмірі арқылы тапсырыстарды қабылдайды. Инстаграм желісіндегі парақшасы @kazaly_sabyn.

«Qazaly» сабыны өндірістік цехы кеңейтілуде

<a href="https://kyzylorda-news.kz/">Kyzylorda-news.kz.</a>&nbsp; Өңірде денсаулық сақтау саласының көкжиегі кеңейіп, жыл өткен сайын медициналық мүмкіндіктер молайып келеді. Қазіргі таңда ауданда 3 аурухана, 1 аудандық көп бейінді орталық аурухана, 3 ауылдық емхана, 11 дәрігерлік амбулатория, 36 медициналық бекет, 1 фельдшерлік амбулатория жұмыс жасайды. Солардың қатары бүгін тағы екі медициналық нысанға артып, Тастүбек пен Жалғызағым елді мекендерінде жаңа медициналық бекет бой көтеріп, пайдалануға берілді.Мергенсай ауылдық округіне қарасты Тастүбек елді мекенінде 200-ге жуық тұрғын бар. Аудан орталығынан шалғай орналасқан ауылда бұған дейін медициналық қызмет көрсету орталығы болмаған. Жаңадан бой көтерген бекетке тұрғындар ризашылықтарын білдірді. Нысанның ашылу салтанатында облыс әкімінің орынбасары Нұрымбет Сақтағанов сөз алып, тұрғындарды жаңа ғимараттың ашылуымен құттықтады.<blockquote>«Денсаулық зор байлық деген халқымызда аталы сөз бар. Осынау байлығымызды сақтау жолында жұмыс жасайтын мейіргерлерімізге жаңа нысанда сапалы қызмет көрсетіп, ел игілігіне қызмет жасай беріңіздер деймін. Бүгінгі жаңадан бой көтерген нысан ауыл тұрғындарының дертіне шипа табатын құтты орынға айналуына шын жүректен тілектеспін!»-деп ақжарма тілегін жеткізді.</blockquote>Мұнан соң, дәл осындай ғимарат Сексеуіл кентіне қарасты Жалғызағым ауылында да халық игілігіне берілді. Заман талабына сай жабдықталған мекеменің ашылғанына жергілікті жұртшылық алғаусыз алғысын айтып, іргелі істерге ұйытқы болып жүрген ел азаматтарына ізгі лебіздерін білдірді. Әлеуметтік нысанның ашылу салтанатына қатысқан облыс әкімінің орынбасары жиналған қауымды бүгінгі қуанышпен құттықтап, медициналық бекеттің лентасын қиды.Айта кетейік, бүгінде айдынды өлкеде денсаулық саласында қарқынды жұмыстар жүргізілуде. Мәселен, «Ауылдық денсаулық сақтауды жаңғырту» ұлттық жобасы аясында биылғы жылы Бөген, Қызылжар ауылдарында дәрігерлік амбулаторияның және Көктем елдімекенінде медициналық бекет құрылысы басталатын болса, Сексеуіл кентіндегі 40 төсектік аурухана құрылысы қайта жандануда.<figure class="image"><img src="https://knadmin.beoblood.kz/uploads/354664105_3578935169101510_6456541556669907326_n_680ea9ea49.jpg" alt="354664105_3578935169101510_6456541556669907326_n.jpg"></figure>

Аралда екі медициналық бекет пайдалануға берілді

<a href="https://kyzylorda-news.kz/">Kyzylorda-news.kz.</a> Өнерлі өлкенің өрісін ашқан бұл жағымды жаңалық көпшіліктің көзайымына айналып үлгерді. Жалаңтөс Баһадүр ескерткіші орнатылған бұл аумаққа абаттандыру мен қайта жаңғырту жұмыстары жүргізіліп, тұрғындар саялайтын демалыс аймағына айналды.Аллеяның ашылуында облыс әкімінің орынбасары Нұрымбет Сақтағанов, республикалық «Жалаңтөс баһадүр» қорының төрағасы Нәжмадин Мұсабаев құттықтау сөз сөйледі. Одан соң, ауданның абыз ақсақалы Шәкірат Дәрмағамбетов жиылған қауымды қала көркіне айшық берген алаңның ашылуымен құттықтап, бата берді. Мұнан соң, жұртшылық жаңадан ашылған алаңды аралап, көркіне тәнті болды.Айта кетейік, «Жалаңтөс баһадүр» аллеясы көгалдандыру жұмыстарына өткен жылы облыстық бюджеттен қаржы бөлініп, 2859 шаршы метрге құрылыс жұмыстары жүргізілді. Алаңның жоғарғы басының қақ ортасында батырдың ескерткіші орналасқан. Одан бері аллеяның көркем келбетін келтірген 25 заманауи үлгідегі орындықтар мен субұрқақ, сондай-ақ 34 түнгі жарық шамдары орналасқан. Ал, жанында балаларға арнап салынған жаңа талапқа сай шағын футбол алаңы мен балалар ойын алаңы бар. Алаңның кіреберісіне батыр есімі жазылған арнайы қақпа орнатылған.<figure class="image"><img src="https://knadmin.beoblood.kz/uploads/350526801_3579028095758884_1691257848745280483_n_a41f21f403.jpg" alt="350526801_3579028095758884_1691257848745280483_n.jpg"></figure>&nbsp;<figure class="image"><img src="https://knadmin.beoblood.kz/uploads/355885792_3579028119092215_3892929787689692558_n_8f96e0dcb5.jpg" alt="355885792_3579028119092215_3892929787689692558_n.jpg"></figure>

Арал қаласында «Жалаңтөс баһадүр» аллеясы ашылды

<a href="https://kyzylorda-news.kz/">Kyzylorda-news.kz.</a> «Сыбайлас жемқорлыққа қарсы іс-қимыл туралы» Заң талабының аясында жемқорлыққа қарсы іс-әрекеттер әр салада жүзеге асырылуда. Себебі, қоғамда халық парақорлық дертімен жиі бетпе-бет келуде. Сондықтан жемқорлық қатерін төмендету, оған қарсы іс-қимыл жасау мемлекет пен қоғамға міндеттелген.Жақында Қармақшы аудан әкімдігінде сыбайлас жемқорлыққа қарсы іс-қимыл жөніндегі ведомствоаралық комиссия отырысы өтті. Оған бөлім басшылары мен ауылдық округ әкімдері қатысты. Жиынды аудан әкімі Жандос Еркінбек жүргізіп отырды. Комиссияның күн тәртібінде екі мәселе қаралды. Біріншісі – «Аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің сыбайлас жемқорлыққа қарсы іс-қимыл бағытында атқарған шаралары туралы» бөлім басшысы Ғалымжан Ақжігітов баяндаса, екіншісі – «Аудандық ауыл шаруашылығы мен жер қатынастары бөлімінің сыбайлас жемқорлыққа қарсы іс-қимыл бағытында атқарған шаралары туралы» бөлім басшысы Әсет Омаров хабарлама жасады.Жыл басында Мемлекет басшысы «Қазақстан Республикасының кейбір заңнамалық актілеріне сыбайлас жемқорлыққа қарсы іс-қимыл және мемлекеттік қорғауға жататын адамдардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы» Заңға қол қойды. Қабылданған түзетулер сыбайлас жемқорлыққа қарсы заңнаманы одан әрі жетілдіруге, оның ішінде сыбайлас жемқорлықтың алдын алудың жаңа құралдарын енгізу, құқықтық олқылықтарды жою және мемлекеттік қызметшілердің негізсіз баю фактілерін болдырмауға бағытталған.Жиында комиссия мүшелері хабарламашыларға сауал жолдап, ұсыныс-пікірлер айтса, аудан әкімі Жандос Еркінбек кент, ауылдық округ әкімдері мен бөлім басшыларына сыбайлас жемқорлыққа қарсы ақпараттық, құқықтық насихаттық шараларды жүзеге асыру мақсатында құқық қорғау органдарымен, үкіметтік емес ұйым өкілдерімен бірлесе отырып нақты жұмыстарды орындауды тапсырды.

Қармақшыда жемқорлыққа қарсы жұмыс сараланды

<a href="https://kyzylorda-news.kz/">Kyzylorda-news.kz.</a> Қазақстан Республикасының Қаржы нарығын реттеу және дамыту агенттігі фишингтік сайттар арқылы азаматтардың жеке деректерін ұрлаумен, алаяқтарды банктердің қауіпсіздігі қызметі ретінде немесе кредит алу үшін сатып алушы ретінде жасырумен, бастапқы биометриялық сәйкестендіруді қолдан жасау әрекеттерімен байланысты интернет-алаяқтықтың жиілеп кеткен фактілері туралы ескертеді.Интернеттегі алаяқтықтың мынадай схемалары шамалы нұсқаларымен кең таралған:&nbsp;1. Фишингтік сайттардағы деректерді ұрлауАлаяқтар фишингтік ресурстар (конкурстар, сауалнамалар мен сыйлықтар бар жалған сайттар) арқылы азаматтардың интернет-банкингтен логинін (телефон нөмірін) және құпиясөзін ұрлайды. Қаскүнемдер байланыс операторларының осалдығын пайдаланып, жәбірленушінің нөмірінен қоңыраулар мен SMS-ті өздеріне бағыттауға тырысады. Содан кейін интернет-банкинг арқылы олардан барлық ақша қаражатын алады.Тәуекелдерді айналып өтудің ең сенімді жолы – мұндай ұсыныстарды мүлдем елемеу. Тегін ірімшік тек тышқан қақпанында&nbsp;болатыны&nbsp;белгілі. Егер сіз сілтемені ашып, фишингтік сайтқа кірсеңіз,&nbsp;браузердің&nbsp;тарихын тазалап, мұндай қателерді қайталамауыңыз керек.2. Банктің қауіпсіздік қызметінің қызметкері ретінде&nbsp;жасырыну№ 1- схема: Алаяқтар қазақстандық қаржы институттарының абоненттік нөмірлерін банктің қауіпсіздік қызметі деген атпен қайталауға мүмкіндік беретін SIP-телефонияны пайдалана отырып, жәбірленушіге қоңырау шалып, салымға төнген қауіп туралы хабарлайды. Алаяқтар ақшаны алаяқтық шотқа аудару процесін сүйемелдеу арқылы барлық ақшаны «қауіпсіз» шотқа аударуға сендіреді.№ 2 - схема: Банктің қауіпсіздік қызметінің атын жамылған алаяқтар жәбірленушіге кредиттің ресімделгені туралы хабарлайды. Кредиттің күшін жою үшін сол сомаға басқа кредит алып, барлық ақшаны «қауіпсіз» шотқа аударуыңыз керек.№ 3 - схема: Алаяқтар жәбірленушіге оны ұрламақ болғанын хабарлайды және телефонға арнайы «қауіпсіздік» бағдарламасын (AnyDesk бағдарламасы немесе қашықтан кіру үшін кез келген басқа бағдарламалық қамтылым) орнатуды ұсынады. Алаяқ жәбірленушінің телефонына қашықтан қол жеткізе алады және интернет-банкинг арқылы жәбірленушінің қаражатын өз шоттарына аудара алады.Егер сізге банктің қауіпсіздік қызметкері қоңырау шалып, сіздің шотыңызға алаяқтық шабуылдармен қорқытса, «қарсы» кредит алуды немесе банкомат арқылы ақша алуды сұраса, әңгімені дереу аяқтаңыз.Ақпаратты бірнеше рет тексеру және банк картасын бұғаттау үшін банктің call-орталығына өз бетіңізше қоңырау шалыңыз.3. Кредит алу үшін сатып алушы ретінде жасырыну&nbsp;Сатып алушының атын жамылған алаяқтар электрондық сауда алаңының сатушысына қоңырау шалып, төлем жасау сылтауымен дербес деректер мен төлем деректемелерін сұрайды. Алынған дербес және төлем деректері бойынша алаяқтар сатушының банктік картасына аудара отырып, сатушының атына ірі сомаға кредит ресімдейді. Әрі қарай олар сатушыдан алаяқтың картасына «артық» аударылған ақшаны қайтаруды сұрайды немесе сатып алудан мүлдем бас тартады және барлық ақшаны қайтаруды сұрайды.WhatsApp, Telegram және басқа мессенджерлер арқылы ешқашан жеке деректер мен төлем деректемелерін үшінші тұлғаларға бермеңіз. Сіздің деректеріңізді алаяқтар пайдалануы мүмкін.4. Бастапқы биометриялық сәйкестендіру мен биометриялық өлшемдерді қолдан жасау№ 1-схема. Алаяқтар Интернетке немесе әлеуметтік желілерге жеке куәліктер мен жеке фотосуреттердің суреттерін орналастыратын азаматтардың деректерін жинайды. Алаяқ арнайы бағдарламалық қамтылым арқылы биометриялық сәйкестендіру жүйелерінің жеткіліксіз сенімділігін пайдаланып, жәбірленушінің бейнелерін қолдан жасайды және оны бастапқы биометриялық сәйкестендіруден өту үшін пайдаланады. Әрі қарай, алаяқтар жәбірленушінің атына кредит ресімдеп, арнайы шотқа ақша аударады. Мұндай қылмыстың құрбандары берешек туралы кейінірек, әдетте кредит бойынша төлем мерзімі кешіктірілгеннен кейін біледі.№ 2-схема. Алаяқ арнайы бағдарламалық қамтылымды пайдалана отырып, жәбірленушінің бейнесін қолдан жасайды және оны интернет-банкингке қосылу үшін пайдаланады. Жәбірленушінің интернет-банкингіне қол жеткізгеннен кейін алаяқтар өз шоттарына қолма-қол ақша аудара алады.Жеке басын куәландыратын құжатты ешкімге бермеңіз немесе кепілге қоймаңыз және құжаттарыңыздың фотосуреттерін әлеуметтік желілерде жарияламаңыз. Сондай-ақ, әлеуметтік желілерде өз мекенжайларын, телефон нөмірлерін және өзге де дербес ақпаратты қалдыруға болмайды.Өзіңіздің қауіпсіздігіңізге өзіңіз қамқор болу қажеттілігін әрдайым есте сақтаңыз. Манипуляцияға берілмеңіз. Алаяқтар әр түрлі әдістерді қолданады, біреуді қорқытады, біреудің сеніміне кіреді. Олардың міндеті – сіздерді өз талаптарына қарай бағыттау. Сіздің міндетіңіз – бастаманы өз қолыңызға алу және өз талаптарыңызды қою. Егер сізді қорқытса, бұл шынымен де қорқынышты болуы мүмкін, егер сізден көмек сұралса, бұл ыңғайсыз болуы мүмкін. Бірақ кейіннен, ақшаны жоғалтқаннан гөрі алаяқтарды жеңгеніңізді еске түсірудің өзі қандай жағымды болады.&nbsp;

Сақ болыңыз: азаматтарды алдау үшін алаяқтардың негізгі схемалары

<a href="https://kyzylorda-news.kz/">Kyzylorda-news.kz.</a> Қазақстан Республикасы ІІМ-нің нұсқауына және Қызылорда облыстық полиция департаменті ЖПҚБ ювеналды полиция тобының &nbsp;2023 жылдың 2-тоқсанына арналған жұмыс жоспарына сәйкес ағымдағы жылдың 7-9 маусым аралығында Қазалы аудан көлемінде «Жасөспірім» жедел-профилактикалық іс-шарасы өткізуде.&nbsp;Іс-шараның басты мақсаты – жасөспірімдер арасындағы қылмысты ескерту және оның алдын алу, оның ішінде білім беру ұйымдарының оқушылары арасындағы құқық бұзушылықтардың жолын кесу, кәмелетке толмағандардың құқықтарын қорғау саласындағы әкімшілік құқық бұзушылықтарды анықтау, олардың құқықтық сауаттылығын арттыру, сондай-ақ балаларға қатысты қылмыстық қол сұғушылықтардың алдын алу болып табылады.&nbsp;Аудан көлемінде ювеналды полиция қызметкерлері, аудандық «Жастар ресурстық орталығы» қызметкерлері және білім бөлімінің мамандарымен аудан көлемінде жасөспірімдер арасындағы қылмыстардың алдын алу, түнгі уақыттары заңды өкілдерінсіз жүрген кәмелетке толмағандарды анықтау мақсатында рейдтік шара ұйымдастырылып және кент орталығындағы ойын-сауық орталығы, дүкендер, орталық алаң және тағы да басқа көңіл-көтеру орындары бойынша аралау жұмыстары жүргізіледі.

«Жасөспірім» жедел профилактикалық іс-шарасы басталды

<a href="https://kyzylorda-news.kz/">Kyzylorda-news.kz.</a> Қызылорда облыс әкімдігінде «Айбын – 2023» IX Халықаралық әскери-патриоттық жастар жиынының I орын иегерлері «Сыр айбындары» командасының мүшелерімен арнайы кездесу өтті.Кездесуге ардагерлер мен аймақта мемлекеттік жастар саясатын жүзеге асыруға мүдделі мемлекеттік органдар өкілдері, жеңімпаздардың ата-аналары қатысты. &nbsp;Шара барысында облыс әкімінің орынбасары Б. Сансызбайұлы жас жеңімпаздарды жетістіктерімен құттықтап, команда мүшелері мен жетекшілеріне, дайындық жұмыстарын үйлестіруге үлес қосқан бірқатар азаматтарға аймақ басшысының Алғыс хатын табыстады. Айта кету керек, Халықаралық деңгейде өткен доданың жекелей сайыстарында да Сыр жастары үздіктер қатарынан көрінді.&nbsp;Командалық әскерилендірілген эстафетада І орын және «Айбын дарыны» шығармашылық байқауында ІІІ орын иеленсе, Қайырлаев Берекет жалпы әскери қорғаныс жиынтығын кию сайысынан ІІ орын, Сайдбаттал Мұхаммедхан тоғызқұмалақ спорт түрінен ІІІ орын, Аманқұлов Мейірбек АК-74 қаруын бөлшектеп жинақтаудан ІІІ орын иеленген болатын.Алдағы уақытта да Сыр жастарының жеңісті күндері мол боларына сенім білдіреміз.

Қызылордада «Сыр айбындары» командасымен кездесу өтті

<a href="https://kyzylorda-news.kz/">Kyzylorda-news.kz.</a> Сыр елінде бұқаралық ақпарат құралдары қызметкерлері күніне арналған «Қанатты қалам-2023» мерекелік салтанатты шарасы өтті. Қызылорда облысының әкімі Нұрлыбек Нәлібаев журналистерді төл мерекемен құттықтап, ақжарма тілегін арнады.Аймақ басшысы ақпарат ағынынан қалмай, өз көрермендері мен оқырмандарына адал қызмет етіп, мамандығын қадір тұтқан журналистердің қоғамдағы алар орнына тоқталды.<blockquote>«Еліміздің Президенті Қасым-Жомарт Кемелұлы Тоқаев «Әділетті Қазақстан – Адал азамат» тақырыбында Түркістанда өткен Ұлттық құрылтайдың екінші отырысында: «Масс-медиа – елімізді жаңғырту ісіне ерекше ықпал ететін сала. Сондай-ақ билік пен қоғам арасындағы пәрменді байланыс құралы. Ақпарат құралдарында түрлі көзқарастар тоғысады. Оны қоғам тынысының барометрі деуге болады. Осы саладағы өзекті мәселелерді шешу үшін ақпарат саясатын түбегейлі қайта қарау қажет», - деп айтқанын білесіздер. &nbsp;Бүгінде «Масс-медиа» деп аталатын жаңа заң қоғамда кеңінен талқылануда. Бұл жобаның БАҚ өкілдері үшін маңызы зор болмақ. Сыр өңірінен шыққан жүздеген журналист әлемнің түкпір - түкпірінде, еліміздің әр өңірінде, өз өлкемізде абыройлы қызмет етуде. Олар ел өміріндегі әр жетістікті өз жетістігіндей көреді. Қиындықты жүрегімен қабылдап, әр сәтті қалт жібермеуге тырысады.Барша баспасөз, теледидар, радио, интернет басылымдары қызметкерлерінің еңбегіне шығармашылық табыс, дендеріңізге саулық, шаңырақтарыңызға құт-береке, амандық тілейміз», - деді Нұрлыбек Машбекұлы.</blockquote>Аймақтың ақпарат саласының дамуына елеулі үлес қосқан бірқатар БАҚ өкілі облыс әкімінің арнайы марапатына ие болып, құрмет төрінен көрінді. Қызылорда қоғамдық телеарнасының құрылтайшысы, ақын Шәһизада Әбдікәрімов Қызылорда облысының құрметті азаматы атанды. Бірқатар БАҚ қызметкеріне облыс әкімінің, ҚР Ақпарат және қоғамдық даму министрлігінің марапаттары табысталды. Мұнан бөлек, 20 БАҚ &nbsp;өкіліне түрлі номинация, 10 сала ардагеріне шипажайға жолдама берілді. С.Бермағанбетов атындағы жас журналистер байқауының жеңімпаздары да арнайы марапат алды.Бүгінде облыстың медиа кеңістігінде 148 бұқаралық ақпарат құралы жұмыс жасауда. Оның 13-і мемлекеттік болса, 135-і тәуелсіз. Олардың ішінде 120-сы газет, 25-і интернет-сайт пен ақпараттық агенттіктер, 3-еуі телеарна, 137-сі облыстық, 2-еуі қалалық, 9-ы аудандық деңгейде ақпарат таратады.

Қызылордалық журналистер құрмет төрінен көрінді

<a href="https://kyzylorda-news.kz/">Kyzylorda-news.kz.</a> Халықтың әл-ауқаты мен қоғам тынысынан хабар тарататын тілшілердің күнделікті қызметі күйбең. Өйткені, әрбір ақпаратты сүзгіден өткізіп, дәйекті сөзбен елге жеткізетін журналистердің қоғамдағы жауапкершілігі өте жоғары. Бүгінде Сыр өңірінің медиа кеңістігінде 148 бұқаралық ақпарат құралдары қызмет етеді. Оның 13-і мемлекеттік БАҚ болса, 135-і тәуелсіз БАҚ. 28 маусым – Бұқаралық ақпарат құралдары қызметкерлері күніне орай Өңірлік коммуникациялар қызметінің баспасөз алаңында облыстық қоғамдық даму басқармасының басшысы Алмасбек Есмаханов ақпарат саласында абыройлы еңбек етіп келе жатқан журналистердің кәсіби мерекесімен құттықтап, осы салада атқарылып жатқан ауқымды жұмыстарға тоқталып өтті.<blockquote>«Сыр өңіріндегі бұқаралық ақпарат құралдары - мемлекеттік билік пен қалың бұқараның арасындағы алтын көпір ғана емес, еліміздің толағай табыстары мен зор жетістіктерінің жаршысы болып келеді. Ақпараттар ағыны &nbsp;сағат сайын емес, минут сайын ағылып жатқанда қоғамды журналистерсіз елестету мүмкін емес. Сондықтан да біз барша БАҚ өкілдерін ерекше бағалаймыз, елге жасаған қызметтерін құрметтейміз. Жылдан жылға біздің медиа кеңістік кеңейіп, ақпарат саласы серпінді дамып келеді. Жалпы біздің облыста 148 бұқаралық ақпарат құралдары тіркелген. Оның 120-ы газет, 26-ы интернет сайттар мен ақпараттық агенттіктер, 2 телеарна және аудандық басылымдар бар. Аймағымыздағы жағымды жаңалықтарды жұртшылыққа жеткізуде бұл бұқаралық ақпарат құралдарының орны ерекше. Осыған орай, тілшілердің төл мерекесінде өңірімізде түрлі іс-шаралар өткізілуде. Сондай-ақ, 24 маусым күні Қызылорда қаласы әкімінің кубогі үшін қаламгерлер арасында шағын футболдан республикалық турнир өтті. Бүгін облыс әкімі Н.Нәлібаевтың қатысуымен салтанатты іс-шара өткізілді. Осы ретте барша журналистерді кәсіби мерекесімен құттықтай отырып, шығармашылық табыс тілеймін», - деді басқарма басшысы Алмасбек Есмаханов.</blockquote>БАҚ саласының маңызды тұтқасы ретінде телеарна қызметінің жұмысы өте жауапты. Бұл ретте тәулігіне 15 сағат хабар тарататын «Qyzylorda» телеарнасы маңызды жаңалықтары мен қызықты хабарлары арқылы &nbsp;көрермен көзайымына айналды. Жаңалық жаршысы ретінде 32 жыл үздіксіз қызмет етіп келе жатқан төл арнаның ақпарат саласындағы рөлі ерекше маңызға ие.&nbsp;<blockquote>«Аймақтың айнасы болған төл арнамыз - 1991 жылдың 30 сәуірінде 30 минуттық хабармен тұңғыш рет эфирге шықты. Сол уақытта бері қалың көрерменге үздіксіз ақпарат таратып келеді. Біздің телеарнада өз кәсібіне адал 75-ке жуық маман қызмет етеді. Олардың түсірілім дайындаудағы атқаратын рөлі әртүрлі болғанымен қызметтері үлкен жауапкершілікті талап етеді. Бүгінде біздің арнаны облыстың 98 пайызы тамашалай алады. 2025 жылға дейін бұл көрсеткішті 100 пайызға жеткізу жоспарлануда. Сондай-ақ, 1 маусымнан бастап Байқоңыр қаласы мен Төретам,Ақай елді мекендеріне 15 сағат хабар тарата бастадық. Бұл да біздің телеарна үшін үлкен жетістік. Бұдан бөлек, телеарнамыз соңғы үлгідегі техникалармен жабдықталып, жаңа студиялар орнатылды. Алдағы уақытта көрерменге жол тартатын үздік хабарларымыз көп болады деген үміттеміз», - деді «Qyzylorda» телеарнасы директорының орынбасары Айсұлу Қасымова.&nbsp;</blockquote>

Сыр өңірінің медиа кеңістігінде 148 БАҚ қызмет етеді

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың тапсырмасымен 2025 жылға дейінгі халықтың табысын арттыру бағдарламасы аясында «Ауыл аманаты» жобасы іске асырылуда. «AMANAT» партиясы, ҚР Ауыл шаруашылығы министрлігімен, жергілікті атқарушы органдармен бірлесіп, аталмыш жобаны бүкіл ел аумағында іске асыру жоспарлануда.«Ауыл Аманаты» жобасы халықты тұрақты жұмыспен қамтамасыз ету, ауыл әлеуетін тиімді пайдалану арқылы ауыл экономикасын және халықтың өмір сүру деңгейін көтеруге үлкен мүмкіндіктер беретін жоба. Осы мақсатта мемлекет азаматтарға жылдық мөлшерлемесі 2,5%-ды құрайтын жеңілдетілген несие ұсынады.Осы мақсатта бүгін, аудандық партия филиалында «Ауыл Аманаты» жобасы бойынша «Ақпараттық қолдау» орталығы өз жұмысын бастап, «Ауыл Аманаты» жобасы аясында «Ашық есік» күні өткізілді.Ашық есік күніне Қазалы ауданының кәсіпкерлік, өнеркәсіп және туризм, аудандық ауыл шаруашылығы және жер қатынастары бөлімдерінің, аудандық кәсіпкерлік палатасының өкілдері қатысып, Қазалы ауданы бойынша пилоттық жобаға таңдап алынған Қарашеңгел, Құмжиек, Ақжона, Аранды, Арықбалық ауылдық округтерінен жобаға қатысуға ниет білдірген ауыл тұрғындарына мал шаруашылығын дамыту, бау-бақша өсіру және шағын бизнес нысандарын ашу арқылы табысты арттыру бойынша кеңестер беріп, өз ісін дамытудың жолдары жөнінде жобаның мақсатын кеңінен түсіндіріп, ақпараттар ұсынды.«Ауыл аманаты» жобасын ауыл тұрғындарына толық ақпараттандыру бағытындағы жұмыстар алдағы уақытта да өз жалғасын табатын болады.

Қазақстан және Қызылорда облысының жаңалықтары