<a href="https://kyzylorda-news.kz/">Kyzylorda-news.kz</a> «Ауыл аманаты» жобасы – Мемлекет басшысының сайлауалды бағдарламасын жүзеге асыру аясында қолға алынған маңызды бастама және ауыл тұрғындарының тұрмысын жақсартып, табысын арттыруға бағытталған.Осы орайда «AMANAT» партиясы ауыл халқының еңбек табысын арттыру мақсатында Үкіметпен бірлесіп «Ауыл аманаты» жобасын іске қосқан болатын. Бастапқыда пилоттық жоба ретінде қолға алынған жоба бүгінде ел көлімінде жүйелі жүзеге асып келеді. Халықтың жартысынан астамы ауылдық жерде тұратын Сыр өңірі үшін бұл жобаның маңызы зор.Бүгінгі күні өңірімізде жобаның жемісін көре бастаған азаматтар қатары артып келеді. Осы орайда қолынан келетін істі кәсіпке айналдырған жандардың бірі Қармақшы ауданы, Жосалы кентінің тұрғыны Фариза Ахауова.«Ауыл аманаты» жобасы аясында шағын несие алу мүмкіндігін тиімді пайдаланған аудан тұрғыны өз кәсібін бастап, «Фариза» кондитерлік өнімдер өндіру орталығын ашқан. Жоба бастамашысы цехқа құрал-жабдықтар сатып алу үшін «Ауыл Аманаты» жобасы шеңберінде төменгі пайызбен 8,0 млн теңге несие алған.Жаңа орталықта түрлі кондитерлік өнімдер – торттар, бәліштер, тәтті тоқаштар мен мерекелік өнімдер дайындалады. Өнімдер сапалы әрі табиғи шикізаттан әзірленіп, жергілікті тұрғындардың сұранысына сай ұсынылуда. Кәсіп иесі шағын несиенің көмегімен қажетті құрал-жабдықтар сатып алып, өндіріс процесін жолға қойған.Аталған жоба ауыл тұрғындарының кәсіп бастауына, өз ісін дамытуына үлкен мүмкіндік беріп отыр. «Ауыл аманаты» – тек қаржылай қолдау ғана емес, ауылдың экономикалық әлеуетін арттырып, халықтың әл-ауқатын жақсартуға бағытталған маңызды бағдарлама.Алдағы уақытта кондитерлік өнімдер өндіру орталығының жұмыс аясын кеңейтіп, қосымша жұмыс орындарын ашу жоспарлануда. Бұл өз кезегінде ауыл экономикасының дамуына оң әсерін тигізбек.<img src="https://knadmin.beoblood.kz/uploads/K_sipkerlik_nysan_2_7b5623442e.jpg" alt="Кәсіпкерлік нысан 2.jpg">

«Ауыл аманаты»: кәсіпке-тыныс, елге- ырыс 

<a href="https://kyzylorda-news.kz/">Kyzylorda-news.kz</a> Сырдария ауданына қарасты Қоғалыкөл ауылында жыл басынан бері 14 тұрғын қайтарымсыз грант иегері атанды.Қоғалыкөл – жұрт қызығатын ауыл. Егін де, мал да, сауда да – қай-қайсысына да тиімді. Аудан орталығы мен облыс орталығының дәл ортасында орналасқан. Ағарғанын арқалап, қалаға апарып сатып, пұлдап жүргендер көп. Мал бордақылау ісімен айналысып, облыс халқын етпен де қамтамасыз етуде. Бұл кәсіптің әрбірінде жастардың үлес салмағы жоғары. Мемлекеттік бағдарламаларды тиімді пайдаланып, кәсіп ашқандардың да қарасы қалың мұнда. Биылдың өзінде оннан астам кәсіпкер қайтарымсыз грантқа ие болыпты.Грант қаражатына кәсіп бастағандардың бірі – ауылдың жас келіні Мөлдір Бақтыбайқызы. Ол халыққа табиғи, таза сүт өнімдерін ұсыну мақсатында қаражатқа қол жеткізіп, үш бұзаулы сиыр сатып алыпты. Бүгінде қатық, айран, құртты кезек-кезек жасап, тұтынушыға ұсынып жүр.<blockquote>– Ауылда тұрған соң мал ұстасаң, береке ғой. Балаларың қай малдан не өнім алатынын біліп өседі. Ет пен сүттің қайдан пайда болатынын білмей өсіп келе жатқан ұрпақ бар. Біз осыдан қорқуымыз керек. Оның үстіне, ағарғанмен айналыссаң, жолың ашылады. Берекелі кәсіп. Ал кәсіпті таза істесең, елдің батасын аласың. Біздің бағыт – осы. Ата-енем, жолдасым көмектеседі. Алдағы уақытта үлкен бір сүт фермасының иесі болғым келеді. Иә, алдыңа мақсат қойсаң, жетесің, – дейді ол.</blockquote>Мөлдір тәрізді «Бизнес бастау» арқылы білім алып, сертификатқа қол жеткізсеңіз, өзіңізге ыңғайлы, қолайлы бизнес түрін таңдасаңыз жеткілікті. Осылай кәсібін жандандырған жанның бірі – Нұржан Жүнісов. Ол мемлекет тарапынан 1 572 800 теңге қайтарымсыз қаржы иеленген. Осы қаражатқа 6 бас жылқы алған.<blockquote>– Кез келген кәсіппен айналысуға болады. Десе де ауылдық жер болған соң малдан артығы жоқ. Бала кезден мал бағып, соған қарап өстік қой. Қора тазалау, оны күтіп-баптау бала кезгі өзімнен жауапкершілігімде болды. Қорада азын-аулақ ірі қара бар еді. Сосын оны кәсіпке айналдырсам қалай болады деген мақсатпен жүріп, жақында бағдарламаға қатысып, қайтарымсыз қаржыға қол жеткіздім. Жылқы бордақылау мақсатында 6 бас жылқы алдым. Бұл кәсіп түрін отбасылық деп атауға болады. Себебі келіншегім, балаларым көмектеседі. Малды бағу, семірту оңай емес. Оның өзіңе көп уақыт кетеді. Азаннан-кешке дейін «құлап қалмады ма, ауырып қалмады ма» деп уайымдайсың. Малда береке бар деген сөз рас екен, – дейді кәсіпкер.</blockquote>Иә, ауылдық жерде бизнестің ең дамыған түрі – мал бордақылау. Пайда әкелетін де осы іс. Мал бағу үшін уақытылы жем-суын беру жеткіліксіз.<blockquote>– Оның қыр-сырын да меңгеру керек. Бастапқыда қиындықтар кездеседі. Жалпы қай іс болсын жауапкершілікті талап етеді ғой. Ал мал бордақылау жұмысы ауыр, табысы күшті бизнес түрі. Жылқы – ерекше күтімді қажет ететін жануар. Ол кез келген шөпті жемейді. Жылқыны семірту үшін оған жоңышқа мен жем береді. Жүгеріні арнайы машинамен үгітіп беру де тиімді. Жүгеріні бұқтыртып беретіндер де бар. Кез келген малды дұрыс күте алса, уақытында жем, суын берсе, доп-домалақ болып шыға келеді, – дейді Нұржан Жұматайұлы.</blockquote>Нұржанда жоспар көп. Ол әр істің басын шалмай, бір істі терең білу керек деген ұстанымда. Болашақта мал басын көбейтіп, кәсібін өркендетсем дейді. Содан кейін барып, ауылдағы жұмыссыз, жұмыс таппай жүрген жастар санын азайтуға үлес қосқысы келетінін жеткізді.Ал жас кәсіпкер Жасұлан Жамаладдинұлы өзіне өзі қызмет көрсететін көлік жуу орталығын ашты. Орталық заманауи және көлік жууға ыңғайлы. Күніге 15-20 көлікке қызмет көрсетеді. Шағын және орта кәсіпкерлікке ден қойғандардың басым көпшілігі мемлекеттік бағдарламаның көмегіне жүгінеді. Біздің кейіпкеріміз де – қайтарымсыз грант иегері.Қазіргі таңда қала тұрмақ, ауылда да бір үйде қос-қос көліктен бар. Соған сай көлік жуу орталығының да қызметі сұраныста. Қандай кәсіп пайдалы, қайсысы табыс әкеледі деген ізденіс үстінде болған Жасұлан Абибуллаев қате шешім қабылдамағанына сенімді.<blockquote>– Мен біраз зерттеп, зерделедім. Бұл бизнесті бастау ісі бірден туындаған жоқ. Отбасыммен кеңестім, пікірлеріне құлақ астым. Жан-жақтан сұрап, біліп, бұл істе қандай қиындық бар, одан қалай шығуға болады, иегеріп кету үшін не істеу керек соған аса назар аудардым. Содан кейін барып, көлік жуу орталығын ашамын деген шешімге келдім. Ата-анам қолдады. Бұл бизнестің ең тиімді тұсы тұтынушы тарапынан шағым болмайды. Себебі тұтынушы өзіне-өзі қызмет көрсетеді. Керегінше заттарды пайдаланып, қалаған уақытында көлігін жуа алады. Оның үстіне бағасы да қалтаға қонымды, – дейді кәсіпкер.</blockquote>Жас кәсіпкердің көлік жуатын орталығында арнайы 1 орын бар. Автокөлік қорабында сумен жууға, көбікпен жууға және балауызбен жылтыратуға арналған тапанша-шаңсорғыш бар. Өзіне-өзі қызмет көрсету режимі аптаның жеті күнінде жұмыс істейді.Ауылда тың жоба ретінде бағаланып, ел игілігіне жұмыс істей бастаған орталықта көлік жууға толық мүмкіндік бар. Бағасы қалтаға қонымды, жұмысы өнімді көлік жуу орталығы ашылғаны ауыл тұрғындары үшін жақсы жаңалық. Әркім өзі үшін қызмет қылуға дағдыланса, ауылда мұндай орталықтардың маңызы артады.Тың кәсіпті қолға алып, ауқымды қаражатты қажет ететін орталықты ашқан азаматтың бастамасына жанашыр жақындары мен достары тілектестік білдіруде. Биыл Қоғалыкөлде осылайша жаңадан 15 кәсіпкер тіркелген. Ұзын саны 174 кәсіп иесі бар. Қазір оның 97%-ы тұрақты жұмыс істеп тұр.<blockquote>– Әрине ауылдың жастары белсенді. Олардың қатарында мемлекеттік бағдарламаларды тиімді пайдаланып отырғандары жетерлік. Мәселен, биыл Қоғалыкөл ауылында мемлекеттік және өңірлік бағдарламалар аясында «Сырдария – 1» несие серіктестігінен жеке кәсіпкер Сайлау Бахтияр 4 млн 600 мың теңге, Ғафиз Жақыпбекұлы мал басын көбейту (жылқы) мақсатында 11 млн теңге несие алды. Мұнан бөлек, жұмыспен қамту орталығы арқылы «Стартап» жаңа бизнес идеяларды іске асыру мақсатында 1 млн 572 мың 800 теңге көлемінде 14 адам мемлекеттік қайтарымсыз грант алды. Әрине мұның барлығы халықтың жағдайын жақсартып, әлеуетін көтеруге бағытталған қадамдар. Алдағы уақытта мұндай жұмыс жалғасын таба беретін болады. Бір қуанарлығы, біздің ауылдың әрбір кәсіпкері жақсы істің басы-қасында демеушілік танытып жүреді. Бұл ауыл тұрғындарының мақсатының бір болғанын, бағытының айқын екенін көрсетеді, – дейді ауыл әкімі Бақытжан Рахымбеков.</blockquote>Ауыл әкімінің сөзін қуаттауға тағы бір жас кәсіпкердің бастамасын айта кетейік. Қоғалыкөлдік Ерболат Ибадуллаев қайтарымсыз қаржыға үш бас бұзаулы сиыр сатып алған. Ауылда тұрған соң төрт түлікті табысқа айналдыру – кәсіп көзі. Ет, сүт өнімдері сұранысқа ие. Күнделікті өмірден осыны түйген ол жоба дайындап, осы мүмкіндікке қол жеткізді.<blockquote>– Қазір табиғи өнім сұраныста ғой. Кешегі пандемия кезінде ел-жұрт ағарған іздеп кетті. Қанша ауруға ем. Әрине тек саумал ғана емес, төрт түліктің қай-қайсысын зерттесеңіз де, пайдасы шаш етектен болады. Осылай жобаны отбасымызбен ақылдаса келе қолға алдық. Көпшілік үш бас бұзаулы сиырмен не кәсіп ашты деп күлуі мүмкін. Құдай берекесін берсе, бір бас малдан да несібе бұйырады, – дейді ол.</blockquote>Ауыл баласының бойында қазақы болмыс болады. Төрт түліктің қай-қайсысының да жағдайын жасап, бабын таба біледі. Ерболат – осы қатарда. Ол да кішкентайынан атқа қонып, мал бағып көрген жан. Зеңгібаба тұқымын көбейтіп, мал шаруашылығынан нәпақасын айыруды қалайды.<blockquote>– Ауыл жастарының көпшілігі кәсіппен айналысады. Өз қаражатымен қызмет көрсету нысандарын ашып жатқандар да кездеседі. Бір-екі бас мал ұстап, нәпақасын тауып жатқандар да көп. Алдағы уақытта да кәсіп ашу, оны дамыту бағытында ынталы жандарға бағытталған мұндай жұмыстар жалғасын табады, – дейді Қоғалыкөл ауылдық округі әкімдігінің қызметкері Алмат Омаров.</blockquote>Бүгін 2 жарым мың халқы бар елді мекенде кәсіпке білек сыбана кіріскендер саны артып келеді. Биылдың өзінде жаңадан 15 кәсіпкерлік субьектісі тіркелген. Ауылдағы барлығы 174 кәсіпкерлік нысанының 97 пайызы тұрақты жұмыс істеп тұр.Елді мекеннің табалдырығынан аттағаннан бастап жаңа тұрғын үйлердің бой көтергенін көріп қуандық. Өйткені кез келген елдің экономикалық әл-ауқаты алдымен халықтың жағдайынан көрінеді. Елдің еңсесі тік болуы үшін әрбір тұрғынның әлеуеті артқаны ләзім. Қоғалыкөл бұл ретте көп елді мекенге үлгі екенін байқатты.Дәулет ҚЫРДАН

Биыл Қоғалыкөл ауылында 14 тұрғын қайтарымсыз грант иегері атанған

<a href="https://kyzylorda-news.kz/">Kyzylorda-news.kz</a> Қызылорда облысының Арал қаласында «Ауыл аманаты» жобасы аясында ашылған кондитерлік цех тұрғындарға жаңа жұмыс орындарын ұсынып отыр. Жоба арқылы жеңілдетілген несие алған кәсіпкер бүгінде күніне жүздеген тәтті өнім шығарып, ауылдық жерлерді сапалы тағаммен қамтып келеді.«Ауыл аманаты» жобасы – ауыл тұрғындарын аграрлық және шағын бизнеске тарту, азық-түлік қауіпсіздігін қамтамасыз ету және халықтың табысын арттыруға бағытталған. Бағдарлама аясында Арал қаласының тұрғыны Аңсаған Мұхиядинқызы 7 млн 130 мың теңге көлемінде төмен пайыздық несие алып, кондитерлік цех ашты.Бүгінде цехта 7 адам тұрақты жұмыспен қамтылған. Жеке кәсіпкер несие қаражатына арнайы аппараттар мен құрал-жабдықтар, оның ішінде Италияда жасалған Smeg пештерін сатып алған. Қазір мұнда торттың 10 түрі мен 6 түрлі мини-десерт дайындалып, күніне 400-ге жуық өнім аудан орталығы мен ауылдарға сатылымға шығарылуда.«Қазір еңбек етемін деген азаматқа мүмкіндік көп. Соның ішінде «AMANAT» партиясының «Ауыл аманаты» жобасын ерекше атап өтер едім. Бұл – кәсіпкердің аяққа тұрып кетуіне тиімді жағдай жасайтын бағдарлама. Жоба нәтижесінде өз кәсібімді бастадым. Алдағы уақытта алғашқы қарызымды қайтарып, қосымша жаңа кәсіп көзін ашсам деймін», – деді кәсіпкер.Кәсіпкер алдағы уақытта цехты кеңейтіп, нан өнімдерін өндіруді жоспарлап отыр.

Аралда «Ауыл аманаты» жобасымен кондитерлік цех ашқан

<a href="https://kyzylorda-news.kz/">Kyzylorda-news.kz</a>&nbsp; Шиелі ауданының әкімі Айтбай Жандарбеков тиісті сала басшыларымен бірге Шиелі ауданында жүзеге асып жатқан ірі инвестициялық жобалардың құрылыс барысымен танысты.<img class="image_resized" style="width:63.42%;" src="https://knadmin.beoblood.kz/uploads/V_Shielijskom_rajone_realizuyutsya_investiczionnye_proekty_1_de8cdcd53a.png" alt="В Шиелийском районе реализуются инвестиционные проекты 1.png">Атап айтқанда, аудан басшысы алдымен «Тесис» ЖШС-ның 40 МВт қуаттылықтағы күн электр станциясы жобасының жүзеге асу алаңына барды. Жоба құны – 11,5 млрд теңге. Бұл – еліміздің «жасыл энергия» бағытындағы ірі бастамаларының бірі саналады. Қазіргі таңда құрылыс жұмыстары толық аяқталып, станцияны іске қосуға дайындық жүргізілуде. Жоба толық іске қосылған жағдайда 10 адам тұрақты жұмыспен қамтылатын болады.Айта кетейік, бұл жобаға инвестиция Қытайдың China Huadian Corporation Ltd компаниясы тарапынан тартылған. Аталған халықаралық корпорация «Тесис» ЖШС-нің 100% құрылтайшысы болып табылады. Бұл өз кезегінде екі ел арасындағы экономикалық әріптестіктің айқын көрінісі.Сонымен қатар, аудан әкімі «Шиелі Әк» ЖШС-ның жаңа жобасымен танысты. Қытайлық инвесторлардың қатысуымен жүзеге асырылатын бұл өндіріс орны жылына 1 млн тонна әк өндіруді көздейді. Аталған жоба еліміздегі ең ірі әк өндіретін зауыттардың бірі болмақ. Жобаның жалпы құны – 20 млрд теңге.Жоба толық жүзеге асқанда 40 адам тұрақты жұмыспен қамтылатын болады. Қазіргі таңда зауыттың іргетасын қалау жұмыстары жүргізілуде. Сонымен қатар, жобаны өңірлік индустриялық картаға енгізу мақсатында тиісті құжаттар әзірленуде.Аудан басшысы жобалардың экономикалық және әлеуметтік маңызына тоқталып, құрылыс сапасы мен уақытылы аяқталуына жауапты мамандарға нақты тапсырмалар жүктеді.

Шиелі ауданының әкімі инвестициялық жобалардың жүзеге асу барысымен танысты

<a href="https://kyzylorda-news.kz/">Kyzylorda-news.kz</a> Жаңақорғанда шағын және орта бизнестің өрісін кеңейтуге үлес қосып келе жатқан қыз-келіншектер қатары аз емес. Аудандағы кәсіпкерлік нысандардың тең жартысын нәзік-жандар басқарып отыр десек жаңылмаймыз. Солардың қатарында «Ай-Көркем» сұлулық салонының негізін қалаушы Қаракөз Төлегенованың есімі көпке танымал.Бала күнінен сұлулық әлеміне ынтызар жан талант пен талғамы ұштасқан кәсіптің иесі. Оның «Ай-көркем» сұлулық салоны қыз-келіншектер жиі баратын заманауи орталыққа айналған. Салонда жұмыс істейтін 10-ға жуық шебердің әрқайсысы өз ісінің мамандары. Сұраныс та жоғары. Күн сайын келушілер легі толастамайды. Бұл – сапалы қызмет пен жылы қарым-қатынастың жемісі. Сұлулық индустриясы – тоқтамай дамитын, жаңалыққа толы сала. Осыны жақсы түсінген Қаракөз әрдайым біліктілігін жетілдіріп, жаңашылдықты меңгеруге ұмтылады. Түрлі семинарлар, тренингтер, оқыту курстарына қатысып, өз орталығын заманауи бағытқа бейімдеп келеді. Шаштаразға қажетті құрал-жабдықтардың ұсақ-түйегіне дейін үйлесімділікпен орналасқан сән орталығы шаш қию, сәндеу, жуу мен кептіру және түрлі үлгіде шашты бояумен қоса, маникюр, педикюр қызметін көрсетеді.<blockquote>– Мамандардың бәрі өз ісінің шебері. Тәжірибелері мол. Клиенттерді өз уақытысында қабылдап, көңілінен шығу біз үшін бірінші орында тұрады. Жұмысыңды шын ниетіңмен атқарғанда ғана кәсібің берекелі болады. Бастысы, санға емес, сапаға жұмыс істеуге дағдыландық. Әрине, қызмет құны косметиканың сапасына байланысты. Арзан бояулар бет терісін зақымдаса, оны қалпына келтіру қиынға түседі. Сондықтан мен мамандарыма әрдайым сапалы өніммен сапалы қызмет көрсетуді айтып отырамын, – дейді.</blockquote>Қаракөздің шаш қию, сәндеу, күтім жасау, бет әрлеу, визаж бағытында тәжірибесі бай. Алдына келген айнамкөздердің көркіне көрік қосуға күш салады. Бұл бағытта кәсіп құпиясы – өз алдына бөлек қолтаңба. Қаракөздің табысты болуына әсер еткен ең басты фактор – оның адал еңбегі мен адамдарға деген ізгі ниеті. Салонға келген әрбір жанның қалауын түсініп, көңілінен шығатын қызмет көрсету – оның басты қағидасы.<blockquote>– Әркім өзін әдемі сезінгісі келеді. Бұл – адам табиғатына тән ең қарапайым, бірақ ең терең қажеттіліктің бірі. Сұлулық дегеніміз тек бояумен безенген бет-әлпет немесе сәнді киім емес, ол – адамның жүрегіндегі мөлдірлік, жанарындағы мейірім, өмірге деген әр іс-әрекетіндегі үйлесім, – дейді Қаракөз бізбен әңгімесінде.</blockquote>Оның айтуынша, шынайы сұлулық адамның өзіне деген сенімінен басталады. Адам айнаға қарағанда келбетіне сүйсініп, көңілі көтерілсе, жандүниесі жадырайды. Кейде бір жеңіл өзгеріс адамның өмірге деген көзқарасын түбегейлі өзгертіп жібереді. Өзге емес, ең алдымен өзін жақсы көріп, өзін құрметтейтін жан ғана шын мәнінде жарқырай алады. Әсіресе нәзікжандылар өзін табуға, өз қадірін сезінуге ынтық келеді. Сондықтан ол әр адамның ерекшелігін көріп, табиғи сұлулығын айшықтауды басты мақсат санайды. «Сұлулық – адамның ішкі әлемінің айнасы. Іші тыныш, жаны таза, ойы түзу адамның келбеті де өзгеше. Ал біз сол үйлесімді ашуға көмектесеміз», – дейді ол.Қаракөз Төлегенова – тек кәсіпкер емес, талай жасқа үлгі болар жан. Табандылығы, батылдығы, ізденісі – кәсіп бастаймын деген қыздарға шабыт береді. Әлбетте, нәзік жаратылыстың сұлулыққа жаны құмар болатыны жасырын емес. Қиындығы мен қызығы қатар шаштараз маманына сұраныс артпаса кемімейді. Елге қызмет етіп, ел әлеуетімен бірге өсіп-өркендейді. Бүгінгідей талап пен талғампаздық артқан заманда оған қажеттілік те артады. Осыны ұққан кейіпкеріміз соңғы үлгідегі шаш қию мен сәндеу әдістерін меңгеруден жаңылмайды.<blockquote>– Тұтынушылардың талғамы жоғарылап келеді. Олардың талабына сай қызмет көрсету менің басты ұстанымым. Талғам жоғарылаған сайын сұраныс та арта түседі. Мен үшін ең бастысы тұрақты клиент. Сондықтанда әрбір келушіге өз талғамына сай қызмет түрін ұсынамын. Адамның шынайы сұлулығы – оның жан дүниесімен үндескен кезде ғана толық көрінеді. «Әдемілік сезімін сыйлау – біреудің өміріне жарық қосу. Сол үшін біз өз мамандығымызды жүрекпен атқарамыз», – деп аяқтады ол сөзін.</blockquote>Иә, Қаракөз секілді кәсіпкерлердің арқасында аудан тұрғындары сапалы қызметке қол жеткізіп, жергілікті бизнестің өрісі кеңеюде. «Кәсібің – нәсібің» дегендей, қол қусырып қарап отыруды білмейтін, жұбайының көңілін тауып, ұл-қыздарына уақыт бөліп, қызметіне де үлгеріп жүрген Қаракөз өзін әрдайым бақытты сезінеді. Еңбекпен тапқан нан тәтті. Бір қуантарлығы, отағасы өмірлік серігінің кәсібіне құрметпен қарайды. Үлгілі еңбегімен талай қыз- келіншекке өнеге болып жүрген Қаракөздің жұмысына сәттілік, зор табыс тілейміз.Әсел РЗАЕВАФото: автордікі

Қаракөз Төлегенова: "Сапалы қызмет көрсету – басты мақсат"

<a href="https://kyzylorda-news.kz/">Kyzylorda-news.kz</a> Әр кәсіптің өз қадір-қасиеті бар. Оның ұшқыны ұрпақтан ұрпаққа жалғасып &nbsp;жатуы, ол да заңдылық. Жетпісінші жылдардан танымал «Жаңақорған» конфетінің нарық сөресінде сақталып қалуына қажырлы тер төгіп келе жатқан Әмина Бекбосынованың еңбегі көпке үлгі. Ол бұл кәсіпті анасы Гүлсарадан үйренгенін айтады. Бұдан жарты ғасыр бұрын ауданымызда өндіріс комбинатының жанында кәмпит цехы жұмыс істеді. Аудан тұрғындары осы цехтан шыққан өнімдерді молынан тұтынды. Цех жұмысын басқарған Гүлсара Молдағалиқызының (суретте) қарамағында 70-80 жұмысшы екі ауысымда жұмыс атқарған екен. Гүлсара апайдың жұмысына деген жауапкершілігі жөнінде көзін көргендер сүйсіне әңгімелейді.Аудандық халықтың тұрмысын өтеу комбинатының бастығы Ахмадияр Пахырдинов өте қатал жан болғанын айтады көпшілік. Гүлсара апайдың сол талапқа сай тәртіптілік пен адалдықты бірінші орынға қойғаны жөнінде өзінің қызы Әмина апай былай дейді:<blockquote>– Біз ол кезде 5-6 сыныпта оқимыз. Сабақтан шыға сала әжеміз дайындап қойған ыстық тамақты анамызға апарып беретін едік. Цехқа кірген&nbsp;сәтте-ақ тәттінің иісі есімізді алып, қызу еңбектің ортасына кіріп кетеміз. Апаларымыздың қызу тірлігіне сыртынан қызығып қарап тұратынбыз. Есімізді білгеннен кәмпит цехтың ортасында жүргендіктен бе, қызығушылығымыз оянып, &nbsp;уақыт өте келе төл кәсібімізге айналып кетті ғой, – деп еске алады Әмина.</blockquote>Міне, бала күннен бауыр басқан кәсіп Әминаның бүкіл өмірлік бағытын айқындап, оның тағдырындағы басты арнаға айналды. Алайда бұл жолды жалғау жеңіл болған жоқ. Тоқсаныншы жылдар – ел тарихындағы ең күрделі кезеңдердің бірі еді. Экономикалық дағдарыс, жаппай жұмыссыздық, кәсіпорындардың жабылуы – бәрі де халықтың тұрмысын күрт төмендетіп, талай отбасының тіршілігін тығырыққа тіреді. Бұрынғы аудандық өндіріс комбинатына қарасты кәмпит цехы да нарықтың дауылына төтеп бере алмай, біртіндеп әлсіреп, ақыры жұмысын тоқтатуға мәжбүр болды. Бұл жылдар Әмина мен оның бауырлары үшін екі есе ауыр еді. 1994 жылы аналары мәңгілікке озып, отбасы болып дағдарып қалды. Бір кездегі қайнаған өндіріс, тәтті иіс тараған цех бөлмелері иесіз қалғандай күйге түсті.<blockquote>«Анамыздың маңдай тері сіңген орынның осылайша бос қалуы жүрегімізді ауыртты» дейді Әмина сол жылдарды еске алып.&nbsp;</blockquote>Дегенмен, Гүлсара апа көзі тірісінде ұрпаққа қалдырар ең үлкен аманатына алдын-ала қам қылып, 26 бекетте «Ақерке» атты жеке кондитерлік цех ашып, барлық құжаттарын заңды түрде рәсімдеп үлгерген екен. Бұл – оның өмір бойғы еңбегінің жалғасы әрі балаларына қалдырған мұрасы болатын. Перзенттері сол аманатқа қолымыздан келгенше ие болайық деп, Ұлы Мәнсүр мен күйеу баласы Сүлеймен мен қызы Амина берекелі еңбек етті. Күн-түн демей еңбектеніп, кәмпит қайнатып, өнім түрін көбейтіп, анасының ісін өлтірмей өркендетуге тырысты. «Ақерке» цехының өнімдері көп ұзамай аудан асып, Жамбыл, Ақтөбе, Алматы қалаларына дейін жөнелтіле бастады. Өнімі тәтті, еңбегі берекелі бұл отбасы өздері жасаған кәмпит арқылы талай шаңырақтың дастарқанын тәттіге толтырды. Сұраныс артқан сайын үмітте күшейді. Алайда жұмыстың қарқыны өскен сайын жұмыс қолының тапшылығы сезілді. Техниканың да, маманның да жетіспеуі өндірісті тоқтатуға мәжбүр етті.&nbsp;<blockquote>«Қанша талпынып, қанша еңбек етсек те, жұмысшы табылмай, өндіріс тоқтап қала берді», – дейді Әмина өкінішпен.</blockquote>Осылайша, Гүлсара ана тұғырын тіктеген «Ақерке» цехы аудандағы белгілі өндіріс орны болып тұрғанымен, жұмыс күші мен қолдаудың жоқтығынан жабылып қалған. Бірақ отбасының жүрегінде ол цехтың орны бөлек. Олар үшін бұл өндіріс – жай кәсіп емес, ананың аманаты, өткеннің естелігі, еңбектің қадірін ұғындырған өмірлік мектеп сынды. Әйтсе де үйренген кәсіптен қол үзу мүмкін емес екен. Цех жабылғанымен, тәтті жасау өнері бұл отбасы мүшелерінің дағдысынан қалмады. Әмина бастаған бауырлары бұл жұмысты үй жағдайында жалғастырып, кәмпит жасауды күнделікті ісіне айналдырды. Әмина Бекбосынова бүгінде кәмпит жасаудың нағыз шебері. Оның қолынан шыққан кәмпиттің дәмі бөлек, иісі ерекше, бағалы да қымбат емес.<blockquote>– Бұл – анамыздың бізге қалдырған ең үлкен мұрасы. Қолымыздан шыққан әрбір кәмпиттің дәмінде, әр қасық шәрбатында, әрбір қайнатымында анамыздың маңдай тері мен жүрек жылуы бар деп ойлаймын. Өйткені, ол кісінің еңбегі – жай бір кәсіп емес, өмірге деген адалдығының, мейірімі мен төзімінің көрінісі еді. Бала күнімізде анамыз таңмен таласа тұрып, от жағып, шекер қайнатқанда бұл іске ақырына дейін мұқият болмау, істі бүлдіретінін ұқтырудан жалықпайтын, – дейді ол.</blockquote>Кәмпит жасау – сырт көзге жеңіл көрінгенімен, технологиясы өте күрделі, мұқияттылық пен табандылықты талап ететін іс.&nbsp;<blockquote>«Кәмпит жасаудың өзіне тән технологиясы бар. Бір сәтке алаңдасаң, шәрбаттың қоюлығы өзгеріп кетеді. Бір минутқа кеш қимылдасаң, дәмі бұзылады. Яғни оны тек қолмен емес, көңілмен жасамасаң бейнетің бекер. Анамыз бізге осылай дейтін. «Істі жүрекпен істеу керек, сонда ғана оның берекесі болады», деп үйретті – дейді ол.</blockquote>Оның сөзінше, төл кәсібі – өткенге деген құрмет, ананың аманатын абыроймен жалғастыру.&nbsp;<blockquote>«Бұл кәсіп балалық күндерімізді, анамыздың дауысын әкелгендей болады. Сол үшін жанымызға ерекше жақын. Біз анадан қалған осы өнерді жоғалтпай, ұрпағымызға да тап-таза күйінде жеткізуді парыз санаймыз», – дейді ол тебірене.</blockquote>Әмина үйінің бір бөлмесін шағын цехқа айналдырып қойыпты. Күні бойы еңбектеніп жүрген Әмина әпкенің тәттілері бүгін де сұранысқа ие. Сүйікті кәсібі – жай ғана табыс көзі емес, бала күннен бойына сіңген өнер, өмірінің мәні мен қуаты. Әминаның қолынан шыққан өнімдерде адалдықтың, ұқыптылықтың, анасының үйреткен тәртібі мен тағылымының иісі бар. Бүгінде ол үй жағдайында кәмпиттің бірнеше түрін дайындап, ауыл-аймаққа танымал өнімге айналдырып отыр. Күнделікті тірлігін балаларына үлгі етіп, еңбекпен келген ырыстың қадірін ұқтырып келеді.Адам өмірінде мұраның маңызы зор. Еңбекпен келген кәсіп, ананың адал жолы – бүкіл ұрпаққа бағалы қазына. Әмина Бекбосынова жалғап отырған кәмпит өндірісі – тағдырдың талай сынынан өткен, ананың алақан жылуымен басталып, бүгінге дейін сақталған шежіре. Бұл – тағдырдың тәтті жемісі. Бұл – ананың аманаты.<img src="https://knadmin.beoblood.kz/uploads/Whats_App_Image_2025_12_24_at_10_21_35_2dd23d02a5.jpeg" alt="Кәсіп.jpeg">Әсел РЗАЕВАФото: автордікі

Жаңақорғанда кәмпит өндірісі дамып келеді

<a href="https://kyzylorda-news.kz/">Kyzylorda-news.kz</a> Бүгінде гипспен жұмыс істеу сәнге айналып, дамып келе жатқан қолөнер түрі. Халық сұранысына байланысты аталған кәсіптің көзін тапқандар жеткілікті. «Кәсіп нан сұрамайды, ол өзі тамақтандырады» деген түсінік қалыптастырған Бесарық ауылының тұрғыны Айдана Алмасбекқызы гипстен түрлі кәдесый, заманауи үлгідегі тойтабақ, түрлі қобдиша, қыз-келіншектерге арналған жиынтық жасап табыс тауып отыр.Айдананың кәсіптің қыр-сырын үйреніп, дамытып жатқанына бір жыл да толмапты. Десе де, кейіпкеріміздің қолынан шыққан дүниелер тұрғындардың қызығушылығын тудыруда. Бір қызығы, сұраныстағы дүниелер үй жағдайында жасалады. Бұл кәсіп түрін отбасылық бизнес деп атауға да болады. Себебі Айдананың қолынан шыққан дүниелерді қайын атасы жинастырып, балалары сырлап, анасы (енесі) қаптап береді. Ал отағасы тапсырыстарды үйді-үйге дейін жеткізеді.Көздің жауын алатын бұйымдар жоғары сапада, асқан ұқыптылықпен әзірленеді. Сондықтан да тойдың сәнін келтіретін заттарға тұрғындар тарапынан қызығушылық жоғары.<blockquote>– Бала күтімімен үйде отырған кезде «қалай да, бір нәрсемен айналысу керек» деген ой маза бермейді екен. Әйтеуір бір істі қолға аламын деген құлшыныс кәсіпке жетеледі. Бұрын-сонды өзім әр жерден көрдім, қызықтым, жасалу жолдарын, керек заттарын қарап жүрдім. Осылайша, «үйреніп кетемін» деген шешімге келдім. Көп қателіктер жібердім. Алғашқы жасалған заттар сапасыз болды. Көбі сынып қалды, дұрыс қатпады, кеппеді. Қосылу керек деген кей заттардың көлемі кем болады. Ал қазіргі күнде бұл істің маманы болдым. Бұрын таразыға өлшейтінмін, жобамен, көз өлшеммен жасайтын деңгейге жеттім. Кәсіпке бет бұрмай тұрып, шеберлік сабағын алып, қолымды жаттықтырдым. Өзіммен-өзім көп жұмыс істедім. Асықпадым, үйренуіме, қателік жасауыма мүмкіндік бердім. Қателік арқылы сабақ ала білдім. Жасаған дүнием ойдағыдай шықпаса да мойымадым. Икемім болған соң тез үйрендім. Бірақ бастапқы жасағандарым сәтсіз шықты. Бірден тапсырыс алған жоқпын. Әбден қыр-сырын үйреніп, қолым жаттыққанша бос уақытымда жасай бердім. Алғашқы тапсырысым – қыз ұзату тойына 250 даға сандықша (шкатулка). Әр данасын әсемдеп, сыртын тапсырыс иесінің қалаған түсіне бояп беремін. Сыртын арнайы қаптап, иесіне тапсырамын. Тапсырыстардың ішіндегі ең көбі –270 дана ат мүсінді ақша жинайтын қорапша болды, &nbsp;– дейді Айдана Мұхамедирова.</blockquote>Қай кәсіпті де отбасы болып ақылдасып, бірге шешім қабылдаған дұрыс. Жоғарыда атап өткендей, &nbsp;бұл кәсіппен үй іші түгел айналысады. Кәсіптің мәні де осы. Ауызбіршілікпен жасаған дүниенің де сапасы жоғары болмақ.Кейіпкеріміз бала күнінен қолөнер жасауға қызығып, әр түрлі дүниелер жасаған. Уақыт өте келе тапсырыс түрі артты. Қолынан шыққан туындыны бәрін әлеуметтік желіге жүктейді. Жұмыс барысын видеға түсіреді, оны жөндейді. Аяқталған соң да барлығын жариялап отырады. Тапсырыс берген адамның талғамымен санасады. Жауапкершілікті жоғары бағалайды.<blockquote>– Мен жасаған әр дүние тұтынушылардың көңілінен шығуы керек. Той иелері қысылмай-қымтырылмай ұсына білсе болды. Онымен қоса мектеп оқушылары, кішігірім туған күн кештерінде тапсырыстар түседі. Күн-түн болса да, барынша сапалы, әдемі дүние жасауға тырысамын. Үй жағдайында жасағандықтан да, оны үйдегі пешке кептіріп, жақсылап дайындап беремін. Бір тапсырыс берген кісі, екінші қайтара тапсырыс беріп жатады. Қармақшы, Қазалы, Сырдариядан, кей кездері қаладан да сұраныс артты. Бұл кәсіпті кеңейтіп, тойтабаққа ұсынатын өзге де дүниелерді қоссам деген жоспарым бар, – дейді ол.</blockquote>Кәсіп бастау үшін айқын мақсат керек. Бірінші кезекте қалтаны қалыңдату емес, сүйікті ісіңді сапалы жасау. Нарықты зерттеу, сұранысқа талдау жүргізу қажет. Аталған ұстанымның үдесінен шығу табысқа бастар негізгі тетік екенін дәлелдеп келеді. Расында, бастаған істі жан дүниеңмен атқара білгенге табыс көзі келеді. Өнерлі жастың айқын мақсаты мен алға жетелейтінін арманы әлі талай белесті бағындырады деген үміт мол.&nbsp;Жастар кәсіпкерлігін қолдау – тың идеялардың, инновациялардың, жұмыс орындарын құрудың және азаматтардың өмір сүру сапасын жақсартудың қозғаушы күші. Сырдария ауданында кәсіпкерлікке бет бұрып, бағыт-бағдар беретіндер үшін шаралар көп. Бұл кәсіпкерлік белсенділікті арттыруға септігін тигізіп, елдің экономикалық өсуі мен өркендеуіне ықпал етеді.Әлемде түрлі мамандық бар. Ал, оны меңгеру, қолға алған кәсіпті одан әрі дамыту кейбірінің қолынан келе бермейді. Еңбек түбі – береке. Тек сол берекеге жету өз күшіңмен еңбектенгенде ғана іске асады.

Айдана Алмасбекқызы да бала кезгі хоббиын кәсіп түріне айналдырды

<a href="https://kyzylorda-news.kz/">Kyzylorda-news.kz</a>&nbsp; Елімізде кәсіпкерлікті дамыту, оның ішінде шағын және орта бизнеске қолдау көрсетуге басымдық беріп келеді. Соның арқасында бүгінде қолынан іс келетін кез келген азаматтың жеке ісін бастап, кәсібін ашуға мүмкіндігі зор. Бұл ретте кәсіп ашамын деген азаматтарға мемлекет тарапынан көрсетілетін қолдаудың да маңызы зор екені белгілі. Қазір осы мүмкіндікті тиімді пайдалануды көздеген қаншама тұрғын жеке кәсібін дөңгелетіп, нәпақасын тауып отыр.&nbsp;Кәсіпкерлік саласы тек алып-сатудан тұрмайтыны белгілі. Бүгінгідей дамыған заманда қандай да бір істі табыс көзіне айналдыруға мүмкіндік көп. Әсіресе, он саусағынан өнер тамған азаматтардың қолы қашанда алтын. Ал олардың шығарған туындысы сапалы әрі баршаға қажетті дүние. Қазіргі таңда елімізде шағын өндіріс орындарын ашуға да басымдық беріліп келеді. Бұл ретте «Ауыл аманаты» мемлекеттік бағдарламасының игілігін көріп отырғандар баршылық. Соның бірі – Арал ауданының тұрғыны –&nbsp;Бақбергенов Серік Шұхманұлы.&nbsp; Кейіпкеріміз қолөнер шебері. Өмірінің ширек ғасырдан астам уақытын ағаш өңдеу ісіне арнаған ол осы бір қабілетін табыс көзіне айналдырған. Сондықтан ол оны одан әрі жетілдіру мақсатында шағын өндіріс ошағын ашуды көздейді. Солай «Ауыл аманаты» бағдарламасымен 4,5 миллион теңге қаражат алып, ағаш өңдеу шеберханасын ашады. Кәсіпкердің шеберханасы өзіне қажетті барлық құрал-жабдықтармен қамтамасыз етілген. Өндіріс орнында Қытайдың заманауи жаңа&nbsp;үлгідегі 6 аппарат орнатылған. Олардың көмегімен ағашты жону, бұрыштарын өңдеу және бір деңгейлі шығару жұмыстары сапалы әрі тиімді орындай алады. Бұл өз кезегінде кәсіпкердің тапсырысты сапалы әрі тез уақытылы орындауына мүмкіндік береді. Мұндай мүмкіндікке қолөнер шебері бағдарлама көмегімен қол жеткізіп отыр.&nbsp;Жаңа өндіріс ошағы ашылғалы бері тұрғындардан түсетін тиапсырыс көлемі де артқан. Кәсіпкердің айтуынша, көбіне&nbsp;балабақшалар мен мейрамханаларға қажетті жиһаздарға, тұрғын үйлердің баспалдақтарына сұраныс жоғары екен.&nbsp;Кәсіпкер алдағы уақытта өндірісті кеңейтіп, жұмыс орындарын арттыруды жоспарлап отыр. Оның негізгі мақсаты – жергілікті халықты қолжетімді әрі сапалы ағаш бұйымдарымен қамтамасыз етіп, аудан экономикасының дамуына&nbsp;өз&nbsp;үлесін қосу.&nbsp;Мемлекеттік бағдарламалардың қай-қайсысы болсын қолынан іс келетін азаматтарды қолдауға бағытталған. Ауданда «Ауыл аманаты» бағдарламасының игілігін көрген кәсіпкерлер жетерлік. Олар экономиканың әр саласында еңбек етіп, жаңа жұмыс орындарын ашып, халықты тұрақты табыс көзімен қамтамасыз етіп келеді. Бұл да мемлекеттің халыққа жасаған қамқорлығының бірі деуге негіз бар.&nbsp;<img src="https://knadmin.beoblood.kz/uploads/1_Auyl_amanaty_zhobasy_ayasynda_a_ash_sheberhanasy_ashyldy_419b4ac88d_c0bf395481.jpg" alt="1_Auyl_amanaty_zhobasy_ayasynda_a_ash_sheberhanasy_ashyldy_419b4ac88d.jpg">

«Ауыл аманаты» бағдарламасының игілігін көрген аралдық кәсіпкер 

<a href="https://kyzylorda-news.kz/">Kyzylorda-news.kz</a>&nbsp; Қазіргі таңда күнделікті экологиялық ахуалдың нашарлауы, тағам өнімдерінің құнарсыздануы мен сыртқы ортаның түрлі жағымсыз факторлары адам денсаулығына кері әсерін тигізіп отыр. Осындай жағдайда ағзаны табиғи өнімдермен қуаттандырудың маңызы арта түскені белгілі. Солардың ішінде ғасырлар бойы шипалы қасиетімен танылған ара балы – денсаулыққа таптырмас табиғи өнім.Халық арасында балды ас мәзірінің сәні ғана емес, түрлі аурудың алдын алатын емдік құрал ретінде пайдалану дәстүрі ертеден қалыптасқан. Мамыр айынан қыркүйекке дейінгі аралық – аралардың тынымсыз еңбек етіп, бал жинайтын негізгі кезеңі. Бұл уақытта омарташы қауым үшін нағыз қарбалас жұмыс басталады. Соңғы жылдары табиғи өнімге деген сұраныстың артуына байланысты омарташылықпен айналысушылардың қатары да көбейіп келеді.Сырдария ауданына қарасты Шаған ауылының тұрғыны, зейнеткер Мұрат Жартыбаев – осындай тың кәсіпті таңдаған жандардың бірі. Ол омарташылықпен айналысып келе жатқанына шамамен он бес жылға жуықтағанын айтады. Оның сөзінше, бұл кәсіп сырттай қарағанда оңай көрінгенімен, іс жүзінде үлкен жауапкершілік пен төзімділікті талап етеді.<blockquote>– Омарташы болу үшін араны күтіп-баптаудың қыр-сырын жақсы меңгеру қажет. Бұл кәсіп аса ұқыптылықты, сабырлылықты талап етеді, – дейді Мұрат аға.</blockquote>Алғашында омарташылықтың негіздерін Александр есімді танысынан үйренген ол, кейін ойлана келе бал арасын өсіруді толықтай қолға алады. Ең алдымен омарта орналасатын орынды дұрыс таңдаудың маңызы зор. Ол желден қорғалған, құрғақ әрі тыныш аумақта болуы керек. Сонымен қатар айналасында бау-бақша, ағаштар, түрлі гүлдер мен шөптер өсетін, ара бал жинай алатын табиғи орта болуы шарт. Ара ұяларының құрылысы мен орналасу тәртібі де ерекше назар аударуды қажет етеді.<blockquote>– Бастапқыда небәрі екі ара отбасын сатып алдым. Кез келген істің бастауы қиын болатыны рас. Осы кәсіпті жақсы білетін жандардан кеңес алып, арнайы кітаптар оқып, көп іздендім. Қателіктерден сабақ алып, тәжірибе жинақтадым. Уақыт өте келе істің қызығына беріліп кеттім, – дейді омарташы.</blockquote>Табандылық пен еңбектің арқасында бүгінде Мұрат Жартыбаевтың омартасында он жәшікке жуық ара отбасы бар. Ара ұялары көбейген сайын өнім көлемі де арта түседі. Бал жинау маусымында омарташы араларды түрлі өсімдіктер гүлдейтін алқаптарға көшіріп отыруға мәжбүр.Ара – еңбекқорлығымен ерекшеленетін жәндік. Олардың тіршілігі қатаң тәртіпке негізделген. Бір омартада аналық, аталық, жұмысшы және күзетші аралар өз міндеттерін мүлтіксіз орындайды. Бал жинамайтын, жалқау араларды күзетші аралардың ұяға кіргізбейтіні де – табиғаттың өз заңы.Сонымен қатар ара өте сезімтал әрі тазалықты сүйетін жәндік саналады. Сондықтан омартаның таза болуы – сапалы өнім алудың басты кепілі. Ұялар үнемі тазартылып, бақылауда болған жағдайда ғана жоғары сапалы бал алуға мүмкіндік бар.Балдың емдік қасиеті ерекше. Ол адам ағзасын дәрумендермен, ақуызбен, түрлі ферменттермен және қоректік заттармен байытады. Табиғи өнім болғандықтан ара балы медицина мен косметология саласында да кеңінен қолданылады. Сондықтан омарташылық – әрі денсаулыққа пайдалы, әрі табыс әкелетін қайырлы кәсіп.Аралардың денсаулығына да ерекше көңіл бөлінеді. Омарташының айтуынша, бал арасы екі жылда қартаяды. Аптасына кемінде екі рет тексеріс жүргізіледі. Кейде араның бойынан кенелер байқалып, түрлі ауру белгілері анықталады. Жалпы бал арасының қырықтан астам ауруы бар екен.Күз мезгілінде аралар біртіндеп ұяларына жиналып, қыстаққа дайындалады. Олар 5–6 градус суыққа шыдай алмайды, қыста әлсіз болады. Сондықтан қысқы азық ретінде өздері жинаған балды пайдаланады.Омарташылар алғашқы балды мамыр айының соңына қарай, кейін жантақ гүлдеген кезде жинайды. Әр өңірдің балы сол жердің өсімдігі мен табиғатына байланысты ерекшеленеді. Бүгінде экологиялық таза, табиғи өнімге деген сұраныс жоғары. Ауыл мен қала тұрғындарынан бөлек, Алматы мен Астана қалаларынан да тапсырыс көп түсуде. Балдың бағасы да халыққа қолжетімді.Ара бағу көп қаржыны талап етпегенімен, тынымсыз еңбекті қажет ететінін түсінген Мұрат Жартыбаевтың ұлы Дәулет те әке кәсібін жалғастыруды жоспарлап отыр. Бұл – адал еңбекпен береке табудың жарқын үлгісі.

Балмен береке тапқан еңбек

<a href="https://kyzylorda-news.kz/">Kyzylorda-news.kz</a>&nbsp; Сыр өңірінде экономиканың барлық саласында 2022-2024 жылдары 80742 азамат тұрақты жұмысқа орналасты. Ал 2025 жылдың 11 айында 27964 адам тұрақты жұмыспен қамтылды. Бұл туралы облыс әкімі Нұрлыбек Нәлібаев Орталық коммуникациялар қызметіндегі брифингте айтты.<blockquote>«Мемлекет басшысының «10 мың адамға 100 жұмыс орнын құру» тапсырмасы 2022-2024 жылдары 42 пайыз артығымен орындалып, 37 мыңға жуық жаңа жұмыс орны ашылды. Ал, биылғы жылы 12 мыңнан астам жұмыс орны ашылып, жоспар 12,9 пайыз артығымен орындалды.2023-2025 жылдары «Ауыл аманаты» жобасы аясында 100-ден астам елді мекенде 6 млрд. 828 млн. теңгеге 943 жоба жүзеге асырылып, жаңадан 1 303 жұмыс орны құрылды», – деді Н.Нәлібаев.</blockquote>Аймақта жұмыссыздық көрсеткіші жыл сайын төмендеп келеді. Атап айтсақ, 2022 жылы 4,9%, 2023 жылы 4,9%, 2024 жылы 4,8%, 2025 жылдың 3 тоқсанының қорытындысымен 4,6% болды.<img src="https://knadmin.beoblood.kz/uploads/3_tken_11_ajda_28_my_a_zhuy_adam_t_ra_ty_zh_myspen_amtyldy_08ea632e93.jpg" alt="3Өткен 11 айда 28 мыңға жуық адам тұрақты жұмыспен қамтылды.jpg"><img src="https://knadmin.beoblood.kz/uploads/tken_11_ajda_28_my_a_zhuy_adam_t_ra_ty_zh_myspen_amtyldy_1_64657ebce0.jpg" alt="Өткен 11 айда 28 мыңға жуық адам тұрақты жұмыспен қамтылды 1.jpg">Фото: Қызылорда облысы әкімінің баспасөз қызметі

Өткен 11 айда 28 мыңға жуық адам тұрақты жұмыспен қамтылды

<a href="https://kyzylorda-news.kz/">Kyzylorda-news.kz</a> &nbsp;Қазалы ауданының орталығы - Әйтеке би кентінде Жаңа жыл мерекесі қарсаңында «Мұқаш ата» сауда үйі пайдалануға берілді. Жаңа сауда орнының ашылу салтанатына аудан әкімі Алмасбек Есмаханов қатысып, тұрғындарды Жаңа жыл мерекесімен және сауда үйінің ашылуымен құттықтады.Бүгінде киелі Сыр өңірінде Президенттің, Үкіметтің ерекше қолдауымен, аймақ басшысының басшылығымен кәсіпкерлік саласы қарқынды дамып келеді. Қазыналы Қазалы ауданында да өңірге көрсетілген қолдаудың нәтижесінде кәсіпкерлік саласы бойынша жоғары көрсеткіштерге қол жеткізуде. Бүгінде ауданда шағын және орта кәсіпкерлік саласында бүгінге дейін 5371 кәсіпкер тіркеліп, нақты жұмыс жасап тұрғаны 5213 бірлік, белсенділік көрсеткіші – 97,1 пайыз болды. 2025 жылдың 11 айында ауданда тамақтану орындары, мейрамханалар, сауда орындары, көлік жуу орны сынды жаңадан 28 кәсіпкерлік нысан бой көтеріп, онда 80-ге жуық адам жұмыспен қамтылған.<img src="https://knadmin.beoblood.kz/uploads/1_azalyda_zha_a_zhyl_arsa_ynda_sauda_ji_ashyldy_7614392d41.jpg" alt="1Қазалыда жаңа жыл қарсаңында сауда үйі ашылды.jpg">Бүгінгі ашылып жатқан кәсіпкерлік нысан аудан тұрғындарына заманауи талапқа сай қызмет көрсетіп, күнделікті қажетті тауарларға қолжетімділікті арттырады. Сонымен қатар, бірнеше адамды жұмыспен қамтып, ел экономикасының өркендеуіне үлес қосады, - деді аудан әкімі Алмасбек Әбілқасымұлы. Жеке кәсіпкер Әділет Мұқаштың жалпы құны 180,0 млн.теңге құрайтын «Мұқаш ата» сауда үйі 2 қабаттан тұрады. Жалпы аумағы 730 шаршы метрді құрайтын сауда орнында 5 сауда бөлмелері мен халыққа қызмет көрсету орындары орналасқан. 4 адам жаңа жұмыс орнымен қамтылды.

 Қазалыда жаңа жыл қарсаңында сауда үйі ашылды

<a href="https://kyzylorda-news.kz/">Kyzylorda-news.kz</a> Ұзақ жылдардан бері әлеуметтік жобаларды жүзеге асырып жүрген Нуридин ағаның арманы – мүгедек жандарға арналған кішкентай шеберхана ашу еді.&nbsp;Енді сол арман ақиқатқа айналды. «Жебеуші» қорының бастамасымен, аудан әкімі Мажит Самитұлының қолдауымен мүмкіндігі шектеулі азаматтар арнайы ашылған ғимараттың тігін цехында болып, жұмысымен танысып қайттық. Нуридин ағамыздың бұл арманы жайдан- жай пайда болған жоқ. Ол аудан аумағында өмір сүріп жатқан мүмкіндігі шектеулі жандардың тұрмыс-тіршілігіне үнемі назар аударып, олардың қоғамнан шет қалмай, өз еңбегімен күн көруіне жағдай жасалса деп армандап келді. «Егер әр адамға өзіне лайық еңбек ортасы жасалса, олардың өмірге деген құлшынысы артады» деген ой көптен бері көкейінде жүрген. Міне, бүгін сол арманы ақиқатқа айналып отыр. Үлкен бөлмеге қатар-қатар қойылған үш тігін машинасын аудандық жұмыспен қамту және әлеуметтік бағдарламалар бөлімінің басшысы Семсер Асенов орнатып бергенін естіген едік.Аудандық «AMANAT» партиясы филиалының төрағасы Арман Мажитов мүмкіндігі шектеулі азаматтарға барынша қолайлы орта қалыптастыру мақсатында ғимараттың гигиеналық бөлімін жабдықтауды міндетіне алыпты. Сыртқа кіріп-шығуы қиындау саушылығы кемшін жандар үшін мұның өзі үлкен көмек, қажеттілік. Қазіргі таңда шеберханада Ақтоты Тастаева, Нұрсұлу Әбсадықова және Эльмира Искакова сынды тігіншілердің қолынан шыққан тауарлар қажет еткен орындарға жөнелтілуде. Тағдырдың сынағына мойымаған қайсар жандардың еңбекке деген құлшынысы ерекше. Екі айдың ішінде олар өз ісіне икемделіп, төсек жабдықтарын тігу ісін жолға қойып үлгерген. Олардың қолынан шыққан көрпе- жастық, төсек қаптары сапалылығымен, ұқыпты тігісімен көптің көңілінен шығып үлгерген. Әрбір бұйым – олардың төзімі мен еңбектің, өмірге деген жігердің белгісі. Тәжірибелі мамандардың жетелеуімен олар тек тігін ісін меңгеріп қана қоймай, өз кәсібін дамытуға да ниетті. Цехта бүгінде көрпе, жастық, төсек жабындыларын тігу бір жүйеге қойылған. Әр бұйымның сапасы жоғары, тігісі мәнерлі, дизайны үйлесімді. Сүйген кәсібіне ден қойған аруларымыз бәрінен бұрын рухани қолдаудан қуат алып, өздерінің қоғамға қажет екенін сезіне түскендей.Мүгедектігі бар жандарды еңбекке тарту – олардың өмірге деген құлшынысын күшейтіп, өз қабілетін жүзеге асыруға жол ашады. Алдағы уақытта тігін цехы өз өнімдерін аудан көлеміндегі мекемелерге, балабақшалар мен мектептерге ұсыну арқылы жұмысын кеңейтеді деген жоспар бар. Тұрғындар тарапынан да тұрмыстық бұйымдарға тапсырыстар көбейіп келеді. Бұл кәсіптің тұрақты дамуына мүмкіндік береді. Әдетте мүгедектігі бар азаматтарға мемлекет тарапынан жәрдемақы, түрлі оңалту құралдары, санаторийге жолдама беріліп жатады. Бірақ олардың өз кәсіптерін ашып, еңбекке араласуына арналған бөлек мүмкіндік жоқтың қасы. Осы тұста Нуридин Исмайлов бастаған азаматтар игі бастаманы қолға алып, нақты іске көшті. Тігін машинасы мен басқа да құрал-жабдық қайдан келді деген сұрағымызға Нуридин аға былай деп жауап берді:<blockquote>– Игілікті іс аудан басшылығы тарапынан да кең қолдау тапты. Аудан әкімі Мажит Самитұлы бұл бастаманы құп көріп, ғимарат бөлу мен қажетті жағдай жасауда қамқорлығын танытты. Бізге осындай жылы, жайлы орын берілмегенде бұндай істі бастай алмас едік. Сонымен қатар, Семсер Асеновке алғысым шексіз. Шыны керек, біздің айтқызбай-ақ тігін машиналарын әкеліп орнатып, қолынан келгенін аянып жатқан жоқ. Өзім жұмысына жауапкершілікпен қарайтын, қолы ашық азамат деп білемін. Біз тек шүкірлік етіп, жұмысқа кірісіп кеттік, – дейді ол.</blockquote>Расында да, құр тұрған тігін машинасы ештеңе өндірмейді. Ал іс бастау үшін ең бірінші – материал қажет. Осыны жақсы түсінген Нуридин Исмайлов көп ойланбастан, өз қалтасынан қаржы шығарып, қажетті мата, жіп, ине, қосалқы құралдардың барлығын түгендеп берді. Бұл – шынайы жанашырлықтың, шын мәніндегі азаматтық позицияның көрінісі. Қор бұған дейін де көптеген қайырымдылық шараларын жүйелі түрде өткізіп келеді: аз қамтылған отбасыларға көмек, оқушыларға қажетті құрал-жабдықтар, түрлі әлеуметтік жобаларды қолдау – осының барлығы халықтың алғысына бөленген игі бастамалар.Ал мүмкіндігі шектеулі азаматтарға арналған тігін цехының ашылуы – қордың атқарып отырған жұмыстарындағы ең маңызды және ұзақ мерзімді жобалардың бірі. Бұл бастама мүгедектігі бар азаматтардың қоғамнан шет қалмай, еңбекке араласып, өздерін толыққанды сезінуіне үлкен мүмкіндік берді. Шын мәнінде, ашылған арнайы шеберхананың маңызы тек үш азаматшаның жұмыспен қамтылуымен шектелмейді. Бұл – мүмкіндігі шектеулі жандардың өмірге деген сенімін күшейтетін, олардың қоғамнан шет қалмауына жол ашатын әлеуметтік жоба. «Жебеуші» қорының бұл бастамасы алдағы уақытта да жалғасын табары анық. Себебі мұндай шеберханалар – тек еңбек орны емес, адамдардың жүрегіне үміт ұялататын, оларды алға жетелейтін рухани қолдау. Адам баласының жүрегінде жақсылыққа деген сенім сөнбесе, қоғамда қайырымдылық пен мейірімнің де таусылмайтыны анық. Осы сынды ізгі істің бір айғағы – Жаңақорғанда мүмкіндігі шектеулі азаматтарға арналған шағын шеберхананың ашылуы. Бұл – көп жылдан бері әлеуметтік жобаларды жүзеге асырып келе жатқан, жұртқа жанашырлығымен, қамқорлығымен танылған Нуридин ағаның арманынан туған игілікті бастама. Иә, көптің сүйеуі көңілді өсіреді. Бұл шеберхана – мүмкіндігі шектеулі жандар үшін жаңа мүмкіндік, жаңа үміт, жаңа қадам. Қоғам болып жұмылған сайын, игі істер көбейе бермек.Қорытынды, Жаңақорған жұртшылығы үшін бұл бастама – тек шеберхана емес, өмірге жаңа дем, жаңа үміт сыйлаған орда. Мұнда еңбек етіп жүрген үш азаматша – өз тағдырымен күресе білген, жігері мықты жандар. Ал оларға қолдау көрсетіп отырған әкімдік, әлеуметтік бөлім, партия және «Жебеуші» қоры – нағыз азаматтық жауапкершіліктің символы. Осы еңбекқор жандардың төзімі мен талпынысына қарап, «шын ниетпен басталған іс міндетті түрде жемісін береді» деген бек сенімге тағы бір мәрте көз жеткізесің. Осындай игі істер көп болса, қоғамдағы мейірім де, бірлік те арта берері сөзсіз.Асел РзаеваФото: автордікі

Қазақстан және Қызылорда облысының жаңалықтары: Кәсіпкерлік