<a href="https://kyzylorda-news.kz/">Kyzylorda-news.kz</a>&nbsp; Интернет үстемдік құрып тұрған уақытқа қарамастан бүгінгі оқырман үшін ақпарат көзі, жаңалықтың тынысы болып отырған газеттің рөлі жоғары. Онда еңбек ететін ұжымның артында қаншама жұмыс жатқанын қарапайым оқырманның бірі білсе, бірі біле бермесе керек-ті.Иә, газет шығару тек тілшілердің ғана жұмысымен шектелмейді. Бір басылымның артында бірнеше сала мамандарының еселі еңбегі жатыр. Баспадан шыққан газеттің оқырман қолына дер кезінде жетуі – таратушыларға жүктелген міндет. Оқырман мен журналистер арасында алтын көпір орнатып, газеттің уақытылы жетуін қамтамасыз етіп жүрген қызметкерлердің еңбегін ескеру қажет.Жаңалықтың жаршысына айналған басылымнан қай саланың маманы болса да, өзіне керектіні табады. Сол себепті оқырманға газет дер кезінде қолына түсуі керек. Ол оңай дүние емес.&nbsp;Ауа-райының қолайсыздығына қарамай газет-журналдарды үйді-үйге жеткізуде таратушылардың жұмысы тіптен ерек.Газет таратудағы тиянақты маманның бірі қармақшылық – Гүлжанат Сәрсенбаева.&nbsp;Ол 1985 жылы мектепті бітірген соң медициналық училищеге оқуға түседі. Оны аяқтаған соң сол кездегі Ленинск қаласындағы госпитальда балалар хирургия бөлімінде медбике болып еңбек етеді. 1990 жылы Рүстембек есімді азаматқа тұрмысқа шығады. Жолдасы да осы салада еңбек етеді. Екеуінің Айсұлу, Ринат есімді ұл-қыздары бар. Бүгінде немере қызығын көріп отырған бақытты отбасылардың қатарында.2015 жылы медбикелік қызметінде қысқарту болып, жұмыссыз қалады. Араға бір жыл уақыт салып газетке таратушы болып жұмысқа қабылданады. Содан бері 8 жыл уақыт өтіпті. Осылайша Гүлжанат Ертілеуқызы тарату қызметінде тәжірибесі мол маманға айналады.Бір қарағанда, газетті таратып шығу оңай деп ойларсыз. Әсілі, қай жұмыстың да жеңілі жоқ. Өзіне тән қызығы мен қиындығы бар. Шынтуайынтында газет таратушының кезігер кедергісі көп. Жұмысы да қым-қуыт қамасқан қарбаласқа толы. Кейде иесіз иттер олардың жұмысына кері әсерін тигізеді. Сондай-ақ абоненттің газет салатын жәшігі жоқ болса да, соның салдарынан газеті желге ұшып, жерге түсіп қалса да газетті алмадым деп шағым айтатындар да кездеседі.Қаламгерлер мен оқырмандар арасына көпір орнатып, редакция жұмысының жандануына сүбелі үлес қосатын таратушылардың еңбегін ел елеп, бұқара бағасын бере жатар. Ал біз &nbsp;Г.Сәрсенбаеваның алғыс арқалап, ізгі тілектерді иеленіп жүрген, ырғақты тіршілігі көзге іліне бермейтін, жауапкершілігі мол, ісі тыңғылықты, көпке үлгі, таратушының еңбегіне тәнті болдық.«Өзі – бір күндік, сөзі – мың күндік» болатын газет түсінген адамға ақпараттың қайнар көзі және таусылмас құнды қазына. Сондай-ақ халықты сауаттандырып, көзін ашатын ақпарат құралы. Әсіресе, қазіргідей қазақы сөздің қаймағы бұзылып бара жатқан заманда газет оқу өте қажет-ақ. Өйткені, газет бар жерде сауаттылық әрі білім мен ғылым болады. Ал, ғылымы бар елдер міндетті түрде дамиды.

Тиянақты таратушы

<a href="https://kyzylorda-news.kz/">Kyzylorda-news.kz</a> Жалағаш ауданындағы индустриалды-аграрлық колледжі 7 жылдан бері жылыжай ісін жандандырып келеді.&nbsp;Бастапқыда қызанақ пен қияр өсіруді қолға алған колледж ұжымы соңғы 3 жылдан бері тек қияр егіп отыр. Себебі көкөністің екеуін бір аулада күтіп-баптау тиімсіз екен, бұған осындағы ұстаздар тәжірибе арқылы көз жеткізген.&nbsp;Кәсіптің бұл түрі айтарлықтай шығынды қажет етпейтін сыңайлы, мұндағы мұғалімдер қиярды тамшылатып сурау арқылы өсіріп отыр. Жылыжай ісіне жауапты маман Берік Жүсіпбеков алдағы уақытта басқа да өнімдерді күтіп-баптау жоспарда барын жасырмады.Колледж директоры Нұрхан Әбдіхалықов әріптесінің бұл сөзін жоққа шығармады. Яғни оқу орнына тиесілі жерлерді игеріп, оны аяқсумен қамтамасыз етсе, тағы да жылыжай ашып, көкөністің басқа да түрлерін өсіруді қолға алатынын жеткізді.&nbsp;– Біз өзіміз кәсіптік білімді жетік білетін мамандар дайындайтын болғандықтан мұндағы ұстаздар үнемі ізденіс үстінде жүреді. Бірінші кезекте әріптестерімнен осыны талап етемін. Нәтиже де жоқ емес, қазіргі таңда колледж ұжымы бәсекеге қабілетті, білікті мамандар дайындап келеді. Бұл жылыжайдың да жұмыс жасап тұрғанына жеті жыл болды. Содан бері тоқтатқан емеспіз. Оқу орнына тиесілі сыртта тағы жеріміз бар, алдағы уақытта оны да игеруге жұмыс жасаймыз. Егер аяқсу алып барсақ, сол жерде де тағы бір жылыжай ашу жоспарда бар. Онда құлпынай, бүлдірген өсіруді жоспарлап отырмыз. Қазіргі таңда біз зерттеу жұмыстарының арқасында бұл өнімдердің бізге жерсінетініне көз жеткіздік. Бұл жобаны алдағы жылдары қолға аламыз, – дейді колледж директоры Нұрхан Әбдіхалықов.Нұрекең бұл бір жағынан осындағы мамандық игеріп жатқан балалардың тәжірибе жинауына да айтарлықтай қолғабыс болғанын айтады. Мәселен, осыған дейін оқу орнында жеміс, көкөніс мамандығы бойынша 10 айлық крус болған. Бұл салада колледж қабырғасында білім алушылардың көп уақыты жылыжайда өтеді екен.&nbsp;– Негізінен кез келген көкөністің бір аулада тек бір ғана түрін өсірген дұрыс. Ал екі түрін бір аулада баптасаңыз, олардың толық пісіп-жетілуіне кері әсері болады. Мәселен, қияр мен қызанақты алайық, бұл екі өнімді бір аулада күтуге мүлде болмайды. Егер осындай қадамға барсаңыз, өнім міндетті түрде ауруға ұшырайды. Әсіресе мұндайда қызанақ бейім болып келеді. Оның түбі қарайып, сырты шіри бастайды. Ал өнім сапалы әрі толық пісіп-жетілуі үшін міндетті түрде бір аулада біреуін ғана баптаған абзал. Бірақ біз бастапқыда көкөністің бірнеше түрін осы жылыжайда баптадық. Себебі мұндағы балалар олардың қалай пісіп-жетілуін, күтімін толық білуі керек. Сондықтан олардың тәжірибе жинауы үшін осындай қадамға бардық. Бірақ негізінен екеуін бір жылыжайда ұстауға болмайтынын түсіндіреміз, – дейді Берік Жүсіпбеков.Колледж жанынан ашылған жылыжайдың ені 7, ұзындығы 27 метрді құрайды. Биыл мұнда қиярдың «Хойрат» сұрпы егілген. Колледж ұжымы бүгінде бірінші түйнекті сабағынан үзді. Жылыжайға көкөніс орналастыру жұмыстары сәуір айының аяғында қолға алынған. Жылыжай қыста көмірмен жылытылады.&nbsp;Бүгінгі білім беру жүйесінің басты мақсаты – бәсекеге қабілетті маман даярлау. Аудандағы Жалағаш индустриалды-аграрлық колледжі де осы мақсатта заман талабына сай жұмыс жасап, балалардан кәсіби маман шығаруда қажырлы еңбек етіп келеді. 60 жылдан астам тарихы бар оқу орнынан 25 мыңнан астам адам түрлі мамандық меңгерген. Бүгінде олар еліміздің ауыл шаруашылығы және басқа да салаларында серпін қалыптастыруға өз үлесін қосуда.Қазіргі таңда колледждің материалдық базасы нығайып, елдің экономикасын нығайтуға қажетті жаңадан мамандықтар ашылған. 450 орынға арнап салынған оқу орнында 186 студент ауыл шаруашылығын механикаландыру, дәнекерлеу, ғимараттар мен құрылыстарды салу және пайдалану, электр жабдықтары мен тамақтандыру ісін ұйымдастыру мамандықтары бойынша білім алуда. Былтыр 129 талапкер бұл оқу орнының студенті атанса, биыл 50-ге жуық студент оқуды тәмамдайды.Елімізде 2019 жыл «Жастар жылы» болып жариялануына байланысты колледж мемлекеттік «Жас маман» бағдарламасына қатысып, 2020 жылы облыс бойынша 9 колледждің ішінен мемлекеттік грант жеңіп алған. Бұл жоба аясында колледж еңбек нарығында сұранысқа ие болған екі мамандық бойынша 439 млн теңге қаржыға ауыл шаруашылығын механикаландыру және тамақтандыруды ұйымдастыру мамандығы бойынша қажетті құрал-жабдықтар сатып алған. Мәселен, ауыл шаруашалығын механикаландыруға қажетті мұнда «John Deere» тракторы бар.– Студенттер трактор тізгіндемес бұрын сабақ барысында осы техникаларды іс жүзінде айдап үйренеді. Бұл трактор 60 операцияны орындай алады. Яғни дән себу, жер жырту, тракторға өнім тиеу, соқаны тіркеу секілді қызметтер атқарады. Сонымен қатар экскаватор құрылғысы да бар. Ол жер қазып, тегістейді. Студенттерге тракторды қалай айдау керектігі, толық жұмыс жасау барысы үйретіледі. Осы жерден толық трактор айдауды меңгерген бала қоймада тұрған техниканы емін-еркін меңгереді, – дейді оқу орнының директоры.Мұнда бұдан бөлек айналмалы соқа, тыңайтқыш сепкіш, «Claas» комбайн, экскаватор, «Landini» тракторы сынды қажетті басқа да заманауи техникалар бар. Олар колледждің материалдық-техникалық базасын нығайтуда. Қазіргі таңда бұл техникалар жаңартылған білім бағдарламасына енгізіліп, күнделікті оқу-үйрену процесіне пайдаланылуда. Соның арқасында түлектердің жыл сайын 82 пайыздан астамы жұмыспен қамтылуда.Айта кетейік, оқу орны білім алушылардың ауданның ірі шаруа қожалықтарында тәжірибеден өтуіне барлық жағдай жасаған. Мұндағы жастар 2 ай іс жүзінде тәжірибе алмасу арқылы өздерін шыңдап, мамандығына машықтанады. Ал тамақтандыруды ұйымдастыру мамандығы бойынша көкөніс ұсақтағыш, ет турағыш, қамыр илеп, оны жайып кесетін арнайы құрылғылар оқу процесі кезінде қолданылып, студенттердің сапалы білім алып, білікті маман болып даярлануына пайдаланылады. Балалар виртуалды әлемді көру арқылы теория түрінде техника қауіпсіздігін үйренеді. Мұнан кейін арнайы тест арқылы сынақтан өтеді. Колледжде 23 пән кабинеті мен шеберхана қарастырылған.– Студенттердің сұранысына сай 50 орындық жатақханада 18 студент бар. Сондай-ақ барлық білім алушыға шәкіртақы тағайындалған. Бізде студенттерге ыстық тамақ қарастырылмаған, бірақ толық емес отбасылар мен көпбалалы отбасылардан шыққан жүзге жуық студентке 14 508 теңге беріледі. Кітапхана қорында арнайы 10 234 кітап бар. «Оқуға құштар колледж» жобасы аясында студенттердің қатысуымен түрлі шаралар, әдеби танымдық кештер өткізіліп тұрады.&nbsp;Coworkinq&nbsp;орталығы да керекті құрал-жабдықтармен қамтылды. Мұнда білім алушыларға сабақтан тыс уақытта кітап оқып, дойбы, шахмат сынды ойын ойнауға мүмкіндік қарастырылған, – дейді Нұрхан Боранбайұлы.Біліктілік пен жаңашылдықты басты назарда ұстайтын оқу орнында қырыққа жуық инженер-педагог сапалы білім беруде. Келешегі кемел білім ордасының алдағы уақытта да кәсіби білім иелерін шыңдайтыны анық.&nbsp;

Жалағашта жылыжай ісі жанданған

<a href="https://kyzylorda-news.kz/">Kyzylorda-news.kz</a> Жазғы маусымда кент және ауыл тұрғындары күннің ыстық кезінде өзен жағасында күндіз және кешкілік көпшілік болып жиналып от жағуды ұйымдастырады. Сол жаққан оттың көбін толығымен сөндірмей кете береді. Аяғында жаққан оттан дала өрті пайда болып жатады. Салдарынан табиғатқа қаншама шығын келеді.&nbsp;Суға шомылуға барғанда да өзен жағасын ластамауды, шыны бөтелкелерді қалдырмауды, жаққан отты толығымен сөндіріп кетуді әдетке айналдыруымыз керек. Мұның бәрі әлгіндей келеңсіз жағдайлардың алдын алуда маңызды екенін қаперден шығармаған жөн. Сонымен қатар адамдар өзен-көлдерге шомылуға жиі барады. Сол себепті әркім өз өмірі үшін қауіпсіздік ережелерін сақтауы тиіс.Арнайы шомылуға арналған жерге суға түсуі қажет. Суға түсуге шығарда міндетті түрде жүзу құралдары техникалық жағынан түзу болуы тиіс, сондай-ақ жеке құтқару құралдарымен &nbsp;жабдықталуы қажет, яғни құтқару желеті, суға батырмайтын дөңгелек камера болуы тиіс.Егер жүзу білмеген жағдайда &nbsp;арнайы құтқару желетін кию керек. Сондай-ақ міндетті түрде қайық үстіндегі тәртіп ережелерін білу қажет. Қайық үстінде тұруға және жүруге болмайды, қайықты бірден қатты қозғалту немесе шайқау, борт сыртына еңкею де аса қауіпті екенін қаперден шығармаңыз.Ересек адамдарсыз кәмелет жасқа толмаған балаларға жүзу құралдарын пайдалануға тыйым салынады. Кәмелет жасқа толмаған балаларға үлкендердің қарауынсыз суға шомылуға болмайды.Аудан тұрғындарына айтарымыз, су айдынына шығарда өз қауіпсіздігіңіз туралы ұмытпағаныңыз жөн. Қоршаған ортаны қорғауға және қауіпсіздік шараларын сақтап, орындауларыңыз керек. Сонда ғана қауіптің алдыг алуға болады. Бір сөзбен айтқанда, сақтансақ, сақтайтынын назарда ұстайық.&nbsp;Төтенше жағдай орын алған жағдайда 101 немесе 112 телефондарына хабарласыңыздар!

 Су  айдындарында қауіпсіздік ережелерін сақтайық

<a href="https://kyzylorda-news.kz/">Kyzylorda-news.kz</a> Діни әдебиеттерге сүйенсек, алманың Адам ата заманынан бері адам өмірінен алар орны бөлек екенін аңғарамыз. Бұрындағы басына алма құлап, бүкіләлемдік тартылыс заңын ашқан Ньютонның да, бүгінгі әлемдік брендке айналған айфонның да тағдыры осы жеміспен байланысты. Елімізде алманың алғашқы отаны – Алматы болса, одан кейінгі көп өсірелетін аймақ ретінде Түлкібас ауданы тұр. Кәсіпкерлердің ізденісі мен мемлекеттің оларды қолдауға арналған мақсатты жоспарының аясында көп ұзамай Шиелі ауданы осы қатарға қосылуы әбден мүмкін.Еңбек – түбі береке. Қай істі болмасын бар күш-жігеріңмен, ынта-ықыласыңмен жасасаң, бүгін болмаса да ертең міндетті түрде нәтижесін беретін болады. Қазіргі таңда, талмай еңбек етіп, жемісін көріп отырған жандар қаншама. Солардың бірі - Талаптан ауылының тумасы Көбей Дәулетов адал еңбектің наны тәтті екенін жақсы біледі. &nbsp;Ол ізденісі мен қажыр-қайратының арқасында өзге ауылдастарына да өнеге болып жүр. &nbsp;&nbsp;&nbsp;&nbsp;&nbsp;&nbsp;&nbsp;&nbsp;«Жатқанға жан жуымас» деген қағиданы ұстанған Көбей мемлекет берген зор мүмкіндіктің аясында өзін кәсіптің әр қырынан көрсетіп жүр. Бұған дейін ауылдан ашқан балабақшасына бірнеше тұрғынды тұрақты жұмыспен қамтып, ел алғысын арқалап ендігі кезекте алма бағын өсірмек. Жуырда «Батыс Еуропа – Батыс Қытай» халықаралық автожолы бойында Оқшы ата кесенісіне қарсы беттен аумағы 10 гектар жерге 20 мың түп алма көшетін отырғызуды қолға алды. Алма бақ тамшылатып суару арқылы өсіріледі.&nbsp;Шиелі ауданында кәсіпкерлерді қолдау шаралары жүйелі түрде іске асып келеді. Әсіресе, «Жастар жылы» аясында жас кәсіп иелері мен енді жеке шаруасын бастауға ниетті жастарға тиісті мекемелер қол ұшын беруге даяр. Осы тұста бизнестен береке тапқан жас бағбанға еңбегің жемісті болсын деген тілек жүректің төрінде.&nbsp;Қазіргі заман жалқаулықты көтермейді. «Ең бақытты адам – бос уақыты жоқ адам» деген сөз бар. Мемлекет не берер екен деп қарап жатпай, қолынан келген істің көзін тауып, кәсіпке айналдыра білетін азаматтардың осындай ісі қашанда өзгелерге үлгі болмақ. Бұған дейін «Күрішті мекенге» айналған Шиелінің алмасымен танылатын уақыты да алыс емес.

Шиелілік бағбанның берекелі бастамасы

<a href="https://kyzylorda-news.kz/">Kyzylorda-news.kz</a> Хаттаманың маңызы тараптарға азаматтық іс қозғалғанға дейін дәлелдемелер алмасуға, сол арқылы даудың болжамды нәтижесін болжауға өз шығыстары мен уақытын және моральдық шығындарын азайтуға, өзара достық қарым-қатынасты сақтауға, сондай-ақ &nbsp;дауларды соттан тыс реттеуге халықтың қызығушылығын арттыруға жол ашады.Сотқа талап қою келіп түскен кезде татуластырушы судья тараптарға келесі күннен кешіктірмей татуластыру рәсіміне қатысу үшін шақыру мен сотқа дейінгі хаттаманың үлгісін жібереді. Онда тараптар талаптарының немесе қарсылықтарының негізі ретінде сілтеме жасағысы келетін тараптардың және іске қатысатын басқа да тұлғалардың ашу, ұсыну және дәлелдермен алмасу жөніндегі іс-әрекеттерін көрсетуге және іс сотта қаралған жағдайда оларды пайдалануға құқылы.Талапты қамтамасыз ету шараларын қабылдау кезінде шақыру тиіс ұйғарым шығарылғаннан кейін жіберіледі. Татуластыру рәсімдерін жүргізу барысында татуластырушы судья тараптарға татуласудың артықшылықтары туралы түсіндіреді, тараптардың әрқайсысына өздері сілтеме жасағысы келетін өз дәлелдерін өзара ашып, ұсынуға кеңес береді. Егер тараптар талап қоюды қабылдау сатысында татуласа алмаса, сот ісі татуластырушы судьяның сотқа дейінгі хаттамасымен бірге істің мәні бойынша қарау үшін басқа судьяға қайта бөлінеді.&nbsp;Дәлелдемелерді ұсыған адамдар істі сот &nbsp;талқылауына дайындау сатысында ұсынудың мүмкін емесін негіздесе, дәлелдемелер сот талқылауы сатысында ұсынылуы мүмкін. Істі дұрыс шешу үшін маңызы бар мән-жайларды сот тараптардың және іске қатысатын басқа да адамдардың талаптары мен қарсылықтары негізінде, қолданылуға жататын материалдық және процестік құқық нормаларын ескере отырып айқындайды. Азамат істі сот талқылауына дайындау барысында не осы баптың бірінші бөлігінде белгіленген жағдайларда сот талқылауы барысында ашылған сотқа дейінгі хаттамада көрсетілген дәлелдемелерге ғана сілтеме жасауға құқылы. Осыған байланысты тараптарға сотқа дейінгі хаттама жасау арқылы татуластыру рәсімдерін жүргізу барысында өздерінің талаптары мен қарсылықтарын негіздейтін дәлелдемелер ұсынған жөн, бұл оларға қарым-қатынасты сақтауға, моральдық және материалдық шығындарды азайтуға, дәлелдемелер мен дәлелдер алмасуға, сот талқылауының болжамды қорытындысын болжауға, ымыраға келуге, жанжалды сот дауларынсыз аяқтауға мүмкіндік береді.Тараптар сотқа дейінгі хаттаманы жасамай, он жұмыс күні ішінде татуластыру рәсімдері шеңберінде келісімді бекіту туралы өтініш жолдаса, судья азаматтық іс қозғау және оны сот талқылауына дайындау туралы ұйғарым шығарады. Сотқа дейінгі хаттаманы жасай отырып татуласқан жағдайда мұндай ұйғарым он бес күннен кешіктірілмей шығарылады. &nbsp;

Сотқа дейінгі хаттаманың маңызы зор

Жаңашылдығымен ерек білім ордасы 

<a href="https://kyzylorda-news.kz/">Kyzylorda-news.kz</a> Еліміздің алдағы басты мақсаты – өркениетті елдердің қатарынан көріну. Ол үшін әрине, ең маңызды мәселенің бірі – қоршаған ортаның тазалығы. Тіпті шет елдерден келетін саяхатшылардың өзі бірінші тазалыққа мән береді. Өзіміз де тысқа шықсақ, тазалықты салыстыратынымыз да өтірік емес. Тазалықтың артында мәдениет жатқанын ескерсек, келген мейман біз өмір сүретін өңірдің көркіне қарап, сынап не сүйсініп кетерін де санаға түйген абзал. Қысқасы, көшелері күл-қоқыстан көз ашпаған елдің өркениетке қадам баспайтыны анық. Бұл тұста нардың жүгі тек мамандарға ғана емес, барлығымызға түсері сөзсіз. Сондықтан абырой ортақ.&nbsp;Тазалыққа тек мемлекет тарапынан ғана көңіл бөлінеді дей алмаймыз. Жергілікті тұрғындар да тазалыққа тастай талап керек екенін түсініп, қоршаған ортаның көгалдануына, көркеюіне атсалысып, дағдыланып келеді.Осы ретте өткен сенбіде аудан орталығында және ауданға қарасты кент, ауылдық округтерде жаппай санатарлық тазарту іс-шарасы өтті. Сенбілікке мекеме қызметкерлері мен аудан тұрғындары бір кісідей атсалысып, әрбір ұжым бөлінген аумақтарда, көшелерде тазалық жұмыстарын жүргізді. Өңірдің өркендеуін, елді мекеннің мұнтаздай таза болуын ортақ абырой деп білетін аудандағы барлық мекеме ұжымы жол жиегіндегі арықтарды күл-қоқыстан арылтып, сенбілік жұмыстарының қар-қын алуына өз үлесін қосты. &nbsp;Сондай-ақ сенбілік барысында жабайы шөптер шабылып, қураған талдар кесіліп, аяқсу жүретін арықтар қураған жапырақтардан тазартылып, 13 тоннаға жуық күл-қоқыс белгіленген орындарға шығарылды. Жалағаш кенті және ауылдық округтердегі талдар мен бордюрларды әктеу, парктер мен аллеяларды тазалау жұмыстары қарқынды жүргізіліп, жалпы 145 мекемеден 1800-ге жуық адам қатысып, 24 техника жұмылдырылды.Қазір аудандағы әрбір мекеме ұжымы тазалық маусымында табандылық танытып жатқанын көріп отырмыз. Енді әрбір сенбілікке жергілікті тұрғындар да өз үлесін қосуда аянып қалмауы керек. Әрбір адам өзі тұратын үйдің ауласы мен көшелердің көркеюіне және тазалығына мән берсе, күл-қоқыстармен келетін түрлі инфекциялық аурудың болмасы анық. Әсіресе көше бойына қойылған қоқыс жәшігіне салынатын қалдықтардың тиісінше салынуы, жәшік толған жағдайда жауапты мекеменің уақытында тазартып отыруы да үлкен септігін тигізеді.Айта кетейік, ауданда айдың басынан бері «Жасыл ел» еңбек жасақтарының жұмысы бастау алды. Оның мақсаты – әрине, аудан жастарының басын біріктіріп, тазалыққа үндеу.&nbsp;Өңірдің өркендеуіне, мұнтаздай таза болуына атсалысу – әрбірімізге азаматтық парыз. Кенттің көркейіп-көгалдануы тек қаражатқа келіп тірелмейтінін түсінуіміз керек. Яғни өңірдің күл-қоқысын тазарту – қолкөмекпен жасалатын іс. Біле білсек, сол күл-қоқысты тастайтын өзіміз, әр ауланың айналасына тұрмыстық қалдықтарды жинап қоятын да тағы біз, қалаберді адам аяғы басуға болмайтын кір суын да төге салатын тұрғындар бар.&nbsp;Адам баласы ақыл айтуға шебер ғой, бірақ сол өзгеге айтқанын өзі де істесе, дұрыс-ақ. Елмен бірге тазалық айлығында сол өзіміз тастаған күл-қоқыстан көшелерді тазартуға, арықтарды қалдықтардан арылтуға атсалыссақ, бірлігіміздің артқаны, берекеміздің тасығаны болар еді. Осы ретте жұмыла көтерген жүктің жеңіл боларын түсінетін уақыт жетті.

Тазалық бәрінен маңызды

<a href="https://kyzylorda-news.kz/">Kyzylorda-news.kz</a> Биыл&nbsp;Жалағаш&nbsp;ауданында 37 365 гектар алқапқа егін егілді. Оның ішінде Сырдың басты дақылы 18 500 гектар болып межеленген еді. Аудандық ауыл шаруашылығы мен жер бөлімі кейін судың көп келуіне байланысты 19 300 гектар алқапқа күріш егілгенін айтады. Биыл күріш көлемінің қысқаруына басты себеп аяқсу болғаны айтпаса да түсінікті. Мұнан бөлек 770 гектар жаздық, 129 гектар күздік бидай, 40 гектар арпа, 700 гектар сүрлемдік жүгері, 530 гектар мақсары, 90 гектар қант құмайы, 65 гектар соя, 5 гектар сұлы, 650 гектар картоп, 1115 гектар көкөніс, 1296 гектар бақша дақылы, 650 гектар картоп, 4850 гектар жаңа жоңышқа егіліп, 7825 гектар ескі жоңышқа күтімге алынды.Аудандық ауыл шаруашылығы мен жер бөлімінің мәліметіне сүйенсек, 199 шаруашылық егін егу жұмыстарын тәмамдаған. Оның ішінде 152 шаруашылық күріш еккен. Нақтыланған 19 300 гектар күріштің 19 173 гектарына шаруашылық құрылымдары су жеткізіп беру қызметіне келісім-шартқа отырса, 127 гектар күрішті сумен қамтамасыз ету үшін механикалық су беру арқылы қашыртқыдан су алынады.&nbsp;Қазіргі таңда 19300 гектар Сырдың басты дақылына толық тұқым себіліп, суға бастырылған. Шаруашылықтар тарапынан көктемгі егін орналастыру жұмыстарына «ГосАгро» порталы арқылы 2 335 тонна жеңілдетілген дизель жанармайына өтінім берілген. Бүгінде 49 шаруашылық 1 735 тонна дизель жанармайын алып, егін орналастыру жұмыстарына пайдалануда. Дизель жанармайының 1 литрі 248 теңгеден жеткізіліп берілуде.Биыл егін орналастыру жұмыстарына шаруашылық құрылымдарына қажетті 6 500 млн теңге бүгінде 100 пайыз дайын, яғни қаражаттан мәселе болмайды.Аталған бөлім 2024 жылы егінді күтіп-баптау барысында 32 сутартқыш насос қондырғысын пайдалану жоспарлануда. Оның ішінде 13 насос «Қазсушар» өндірістік учаскесі тарапынан шаруашылықтарға берілсе, қалған 19 насос шаруашылықтардың өз қаржысына алынған. Қазіргі таңда 2 насос қондырғысын аудандағы «Ер-Әлі» шаруа қожалығы оңтүстік коллекторға, «Ақниет» шаруа қожалығы Жаңашайхы каналына күріш дақылын сумен қамтамасыз ету мақсатында пайдалануда.&nbsp;Ауданда аймақ басшысының тапсырмасымен бақша салуға ниетті тұрғындарға жер ашып беру дәстүрге айналды. Бұл бір жағынан ауданда бақша дақылдары бағасының тұрақтауына, тіпті арзандауына айтарлықтай сеп болды. Биыл да ауданда жеке тұрғындар тарапынан 500 гектар жерге картоп, көкөніс, бақша дақылдарын егу жоспарлануда. Қазіргі таңда 265 гектар жер дайындалып, 110 гектар жерге картоп, бақша дақылдары егілді. Шаруашылықтардың демеушілігімен картоп, көкөніс, бақша дақылдарын орналастырылатын жерлер дайындау әлі де жалғасуда.Тиісті сала мамандары аудандағы суармалы жерде дақылдарды егу тәртібіне тұрақты бақылау жұмыстарын жүргізуде. Бүгінгі күнге дейін күріш дақылын артық егіп, ауыспалы егіс тәртібін өрескел бұзған 21 шаруашылық анықталған. Заңға сәйкес тиісті шаралар қабылдау үшін облыстық жер ресурстарын басқару департаментіне жолданған. Қазіргі таңда көктемгі егін егу жұмыстары толығымен бақылауға алынып, қадағалануда.&nbsp;– Суармалы жерлерге ауыл шаруашылығы дақылдарын межеге сай егу бойынша мониторинг жұмыстары жалғасады. Жергілікті шаруашылықтар «одан артық табысқа кенелемін» деген түсініктен арылуы керек. Себебі артық өнім еккеннен өнім сапасы жоғалады. Екіншіден, аяқсудан тапшылық болады. Біз осындай олқылыққа жол бермеу үшін мониторинг жұмыстарын жалғастыра береміз. Ауыл шаруашылығы жерлері өз мақсатына игерілуі керек және артық өнім егуге жол берілмейді, – дейді бөлім басшысы Алтынбек Дәрібаев.&nbsp;Иә, жалағаштық диқандар саланы жыл сайын табысты қорытындылап келеді. Биыл да дәстүр жалғасатын сияқты. Себебі мамандар жоспардан артық су келгенін айтады. Оның үстіне егінді әртараптандыруға жергілікті шаруашылықтар басымдық берген. Яғни Сыр салысының көлемі қысқарып, керісінше суды аз қажет ететін дақылдарға басымдық берілген. Демек, биыл диқандар аяқсудан айтарлықтай қысылмайтын секілді.

Күріш толық суға бастырылды

<a href="https://kyzylorda-news.kz/">Kyzylorda-news.kz</a> Әлемдегі барлық елдердің даму жолында мемлекеттік қызметтің қосар үлес салмағы ерекше. Хакім Абай «Тегінде адам баласы адам баласынан ақыл, ғылым, ар, мінез деген нәрселермен озады» десе, Алаш көсемі Әлихан Бөкейхан «Ұлтқа қызмет білімнен емес, мінезден» деген болатын. Өз кезегінде кәсіби мемлекеттік қызметші, білімді, білікті, заман талабына сай талаптарға жауап беретін, ең бастысы, биязы мінезді, әдепті маманы болуы қажет. Бүгінде елімізде мемлекеттік қызметшінің жағымды бейнесін қалыптастыру және мемлекет дамуына сапалы үлес қосу бағытында кешенді жұмыстар жасалынуда.Өткен аптада Қазалы ауданында екі бірдей кәсіби мереке, Мемлекеттік қызметшілер және Қазақстан Республикасының Полициясы күні аталып өтті. Кең көлемдегі мерекелік шара Роза Бағланова атындағы Қазалы &nbsp;аудандық мәдениет үйінде тойланды.Аталған кеште Қазалы ауданы әкімі Мейрамбек Шермағанбет ел үшін ерен еңбектің үлгісін көрсетіп жүрген қос саланың қызметкерлерін кәсіби мерекелерімен құттықтап, ізгі лебізін жеткізді.<blockquote>– Дамыған мемлекеттің негізгі қозғаушы тетігі – жоспарлы саясаты мен нақты қадамдарын жүзеге асырушы мемлекеттік қызметші болып табылады. Сондықтан да, ұлт мәртебесін көтеретін, ел абыройын асқақтататын мемлекеттік қызметші болу – жауапты іс. Мемлекеттік қызметші – іскерлік дағды қалыптастырған еліміздің ең маңызды идеяларының бастаушысы. Ел тыныштығы мен бейбіт өмірі – бәрінен қымбат. Бұл тұрғыда мемлекеттік биліктің қоғамдағы құқықтық тәртібін, азаматтардың қауіпсіздігін қамтамасыз ететін маңызды құрылымдардың бірі – Ішкі істер органдарының алар орны ерекше.</blockquote>Тәртіп сақшыларының кәсіби қызметі – зор жауапкершілігімен, тәуекелшілдігімен, қиындыққа төтеп беретін төзімділігімен ерекше құнды. Сіздер ширек ғасырдан астам уақыт ішінде, ел іргесінің сөгілмей, бүтіндігіміздің сақталуына барынша тынымсыз еңбек етіп келесіздер, – деді Қазалы ауданы басшысы Мейрамбек Зинабдинұлы.Мұнан соң, мерекеге орай туған жердің дамуы мен қоғамның тыныштығы жолында аянбай қызмет етіп жүрген бірқатар азаматтарға Қазақстан Республикасы ішкі істер министрінің бұйрығымен I дәрежелі «Мінсіз қызметі үшін» 10 жылдық, 15 және 20 жылдық төсбелгілері, облыс және аудан әкімінің, Қазақстан Республикасы Мемлекеттік қызмет істері агенттігінің Қызылорда облысы бойынша департаменті басшысының Алғыс хаты және «Қызмет» салалық кәсіподағының «Мемлекеттік қызметтің дамуына қосқан үлесі үшін» төсбелгілерін табыстады.Мемлекеттік қызметшілердің жұмыс барысындағы басты құралы – Әдеп кодексі, ол – жауапкершілік жүгін арттыратын, талаптар ауқымын белгілейтін маңызды құжат. Мемлекеттік қызметшілердің моральдық-этикалық келбетін ғана емес, сондай-ақ олардың өзін-өзі ұстау мәнерінің базалық стандарттарын бекітеді. Мемлекеттік қызметшілер өздерінің күнделікті жұмысында қарапайымдылық, әділдік, адалдық секілді принциптерді ұстануы керек. Азаматтармен қарым-қатынас жасау кезінде сөйлеп отырған адамның сөзін бұзбай, азаматтың сұрақтарын мұқият тыңдау, әңгімелесушіге ізгі ниеттілік пен құрмет білдіру, толық консультация беру және болуы мүмкін тәуекелдер туралы азаматтарды хабарландыру, жасы үлкен адамдарға, ардагерлерге, мүгедектерге ізгі ниетпен қарау, оларға қажетті көмекті көрсету сынды қағидаларды сақтау керек. Жұмыстан тыс уақытта да, жалпы, қабылданған моральдық әдептілік нормаларын ұстануға, қоғамдық жат мінез құлық, оның ішінде қоғамдық орындарда адамның қадір-қасиетін және қоғамдағы адамгершілікке нұқсан күйде болу жағдайларына жол бермеуге тиіс.Сонымен қатар, жас мемлекеттік қызметшілердің ант беру рәсімі өтті. Салтанатты шара соңында аудан өнерпаздарымен қатар мемлекеттік қызметшілер мен полиция қызметкерлері де өнер көрсетіп, жиылғандарға ерекше, мерекелік көңіл-күй сыйлады. Сондай-ақ, сала ардагерлеріне аудан әкімінің мерекелік сый-сияпаты табысталды.Мемлекеттік қызметшілер алдына келген адамның мәселесіне жете мән беріп, шешіп беруге ұмтылуы тиіс. Кез келген адамды тыңдай білу және кеңдік көрсету ең алдымен, адамның саналылығын білдіреді. Жүректерге жол табу, кісінің көңілінен шығу – қазаққа тән қасиет десек, халқымыз кең де, көркем мінезімен көп нәрсені оңтайлы шешіп отырған. Сондықтан, халыққа қызмет етудегі басты ұстаным – қарапайымдылық, әділдік пен адалдық болуы керек.

Мемлекеттік қызметшілер қызмет төрінде

Соңғы жылдары елімізде алаяқтық қылмыстар көбейген. Жалағаш аудандық полиция бөлімі онымен күресте жүйелі шараларды қолға алуда. Бірақ оның нәтижесі бар ма? Ауданда басқа да қылмыстармен күресуде нендей шаралар қолға алынуда? Осы және өзге де бірқатар сауалымызға жауап алу үшін Жалағаш аудандық полиция бөлімі бастығының міндетін атқарушы Мәулен Өсермен сұхбаттасқан едік…– Мәулен Жайшылықұлы, жалпы ауданда қылмыспен күресте нендей шараларды қолға алдыңыздар және оның нәтижесі қалай?&nbsp;– Ішкі істер органдарының қылмыспен күресте басым-бағыттарының бірі кезекші тәулікте қылмыстарды ізін суытпай ашу &nbsp;және қылмыстың алдын алу профилактикасы болып табылады. Біз осы мақсатта жұмыс жасап, неқұрлым ауданда қылмыспен күресіп келеміз. Негізінен онымен күрескеннен алдын алған әлдеқайда тиімді. Сондықтан бүгінгі таңда біздің ұжым қылмыстың алдын алуда бірқатар жобаларды қолға алуда. Бүгінде оның барлығы өз жемісін беруде. Осы бағытта біршама жұмыстар атқарылып, &nbsp;2024 жылдың 5 ай 10 күнінде тіркелген қылмыстардың саны өткен жылмен салыстырғанда 48-ден 45-ке, &nbsp;яғни &nbsp;6,3 пайызға төмендеді, ал ашылу көрсеткіші 72,2 пайызды құрап отыр. Алдағы уақытта бұл көрсеткішті әлі де төмендетуге жұмыс жасаймыз. Әзірге ауданда ахуал тұрақты. Бірақ оған тоқмейілсуге тағы болмайды. Сондықтан әлі де жұмысты ширатамыз. &nbsp;– Осы күнге дейін тіркелген қылмыстарға талдау жасасаңыз. Жалпы оның қай түрінде өсім байқалады?&nbsp;– Тіркелген қылмыстардың &nbsp;ішінде алаяқтық қылмыстар өткен жылмен салыстырғанда 3-тен 7-ге, яғни 133,3 пайызға өскен. Ашылу көрсеткіші өткен жылмен салыстырғанда 50 пайыздан 83,3 пайызға жоғарылады.Өздеріңіз көріп отырғандай, бұл жерде алаяқтық қылмыстар артып отыр. Бүгінгі таңда тіркелген 7 алаяқтық қылмыстың 5 дерегі ашылып, 1 дерек бойынша күдікті анықталып отыр. Аудандық полиция бөліміне күдікті тұлғаны жеткізу мақсатында жеке тапсырма жіберілді.&nbsp;Қалған 1 дерек бойынша тексеру жұмыстары жүргізіліп жатыр. Тіркеліп жатқан барлық алаяқтық қылмыстарына талдау жасалып, мәселенің алдын алу мақсатында нақты жұмыстар атқарылды.&nbsp;– Қазіргі таңда алаяқтық қылмыстың ішінде қайсысы көп тіркелген?&nbsp;– Қазіргі уақытта, ең көп тіркеліп жатқан алаяқтық қылмыстардың ішінде әлеуметтік желі арқылы көп пайда табу немесе азаматтардың сыртынан онлайн несие алу, оңай жолмен табыс табу болып отыр. Сондықтан тұрғындар банк қызметкері болып немесе жақындары болып хабарласқан алаяқтардың құрбанына айналмауы тиіс. Қазіргі таңда осындай қылмыстардың алдын алу бойынша түсіндірме жұмыстарын жүргізудеміз. Бұл қарапайым шара секілді көрінгенімен қылмыстың алдын алуда үлкен көмек болатынын білуіміз керек.Алаяқтық әрекеттердің құрбаны болудан &nbsp;сақтану үшін тұрғындар назарына орын алған алаяқтық қылмыстарына &nbsp;сәйкес, соңғы уақыттардағы байланыс жүйесі арқылы жасалатын &nbsp;&nbsp;алаяқтық түрлерін түсіндіру жұмыстары және халық көп шоғырланатын &nbsp;орындарда ескертпе қағаздары ілініп, бұқаралық ақпарат құралдарына және интернет ресурстарға мақалалар жарияланды. &nbsp;Алдағы уақытта аудан көлемінде алаяқтық қылмыстардың &nbsp;алдын алу бағытында жеке құрам қызметкерлеріне тапсырмалар беріліп, сұраныс жасалып, профилактикалық жұмыстар жүргізу жалғасын табады.Одан бөлек халықты құлақтандыру мақсатында фейзбук, инстаграм әлеуметтік желілеріне күнара алаяқтықтың түрлеріне қатысты үздіксіз материалдар шығып жатыр. Сонымен бірге бейнеролик жасалып, аудандық полиция бөлімінің ресми парақшасына жариялануда.&nbsp;– Жалпы ауданда қылмыстық ахуалды күрделендірмеуде профилактикалық шаралардың маңызы бар ма?&nbsp;– Жаңа сөз басында айттым, тағы да қайталап айтамын. Кез келген профилактикалық шараның қылмыстың алдын алуда маңызы жоғары. Тек ол мақсатты әрі жүйелі түрде жүргізілуі керек. Мәселен, жыл басынан бері ауданда 2 рет «Антифрауд» жедел профилактикалық іс-шарасы өткізіліп, қызметтік көлікпен арнайы жарнама парақтарын іліп, халық көп шоғырланған жерлерде дауыс күшейткіш арқылы түсіндірме жұмыстары жүргізіліп, әлеуметтік желілерге бейнероликтер көрсетілді. Қазіргі таңда Қазақстан Республикасы Ішкі істер министрлігінің киберқылмысқа, оның ішінде телефон және интернет-алаяқтыққа қарсы іс-қимыл жөніндегі 2023-2025 жылдарға арналған бағдарламасына сәйкес жоспар құрылып, сол бойынша тиісті жұмыстар атқарылуда.&nbsp;– Жалпы бұл бағыттағы әріптестеріңіздің жұмысына көңіліңіз тола ма?&nbsp;– Аудандық полиция бөлімі басшылықтан бастап қарапайым қызметкерлеріне дейін қазіргі таңда қылмыспен күресуде және оның алдын алуда нәтижелі еңбек етіп жатыр. Сондықтан мен олардың жұмысын жоғары бағалаймын. Себебі уақытпен санаспай тәулік бойы тұрғындардың қауіпсіздігін қамтамасыз етеміз. Әлбетте ол біздің негізгі міндетіміз екенін де жақсы білемін. Сондықтан алдағы уақытта да қылмыспен күресте, оның алдын алуда нәтижелі жобаларды қолға алып, жұмысты жандандырамыз.&nbsp;– Алаяқтардан сақтану үшін қарапайым халыққа қайтпек керек?&nbsp;– Тұрғындар біз айтқан ескертпелерге, түсіндірме жұмыстарына немқұрайлы қарамаса деймін. Сонда біздің жұмыс та жеңілдер еді. Себебі алаяқтар соңғы жылдары небір айла-тәсілмен қарапайым халықтың қалтасын қағуды әдетке айналдырған. Біз олармен мейлінше күресеміз. Бірақ халық та біздің түсіндірме жұмыстарымызға селқос қарамаса дейміз.&nbsp;– Сұхбатыңызға рақмет!

Мәулен Өсер: Қылмыспен күрескеннен алдын алған тиімді

<a href="https://kyzylorda-news.kz/">Kyzylorda-news.kz</a> 25-28 мамыр аралығында Тайвань мемлекетінің Тайбэй қаласында өткен гір спортынан Азия чемпионатында жалағаштық төлеген Қайсар топ жарған болатын. Жалағаш ауданының әкімі Ардақ Ибраимов аймақ мақтанышына құрмет көрсетіліп, алдағы жарыстарға сәттілік тіледі.–&nbsp;Соңғы&nbsp;жылдары&nbsp;жалағаштық&nbsp;спортшылар&nbsp;байрағымызды&nbsp;биіктен&nbsp;желбіретер&nbsp;үлкен&nbsp;додаларда&nbsp;топ&nbsp;жарып,&nbsp;аудан,&nbsp;аймақ,&nbsp;қалаберді&nbsp;ел&nbsp;мерейін үстем&nbsp;етуде.&nbsp;Бұл&nbsp;аудан&nbsp;спортында соңғы&nbsp;жылдары&nbsp;серпін&nbsp;қалыптасқанын&nbsp;аңғартса&nbsp;керек.&nbsp;Жуырда&nbsp;өткен&nbsp;Азия&nbsp;чемпионатында&nbsp;жерлесіміз&nbsp;Төлеген&nbsp;Қайсардың&nbsp;жеңісі&nbsp;бұл&nbsp;сөзімізді&nbsp;қуаттайды.&nbsp;Алдағы&nbsp;уақытта&nbsp;ел&nbsp;мақтанышының&nbsp;мұнан&nbsp;да&nbsp;биік&nbsp;белестерді&nbsp;бағындыратынына&nbsp;сенемін.&nbsp;Жеңісті&nbsp;күндер&nbsp;көп&nbsp;болсын,&nbsp;үлкен&nbsp;додаларда&nbsp;байрағымыз&nbsp;биіктен&nbsp;түспей,&nbsp;әнұранымыз&nbsp;шырқала&nbsp;берсін.&nbsp;Осы жолда жалағаштық спортшылар да талмай еңбек етіп жатыр. Сіздер – ауданның, аймақтың, еліміздің мақтанышысыздар. Сондықтан үкілеген үмітімізді ақтап, салада біраз белесті бағындырған жалағаштық спортшыларға қандай құрмет көрсетсек те артық болмайды, – деді Ардақ Әбдіғаппарұлы. &nbsp;14 мемлекеттің спортшылары бақ сынаған тартысты бәсекеде Жалағаштық Қайсар Төлеген жастар арасында 78 келі салмақ дәрежесінде өткен серпе көтеру жаттығуынан алтыннан алқа тағып І орынға, ұзын айналым жаттығуында ІІ орынға тұрақтаған. Бойындағы күш жігерін әлем алдында елдің абыройы үшін дәлелдей білген чемпионға Ардақ Ибраимов құрмет көрсетті. Жеңімпазға 200 мың теңге қаржылай сыйақы мен аудан әкімінің алғыс хатын табыстаған ол спорт саласы бойынша атқарылып жатқан жаңа бастамаларға сәттілік тілеп, қашанда қолдау көрсетуге дайын екенін жеткізді.Айта кетейік, 2016 жылы ауданда «Наркескен» спорт клубында арнайы гір спорты бойынша үйірме ашылған. Азия чемпионы Төлеген Қайсар – осы үйірменің мүшесі. Аудан құрама командасын дайындап, олардың спорттық деңгейін жақсартуға бұл бастама сеп болғанын жақсы білеміз. Сол жұмыстар бүгінде өз жемісін беріп, аталған спорт түрі дамып, онымен айналысқысы келетін жастар қатары артқан.&nbsp;– Аудан әкімдігінің қолдауымен, демеушілердің көмегімен гір спорты үйірмесі талапқа сай қажетті құралдармен қамтамасыз етілді.&nbsp;Спортшылардың сайыстарға қатысуына жағдай жасалды. Гір тасын алақанда ойнататын Абдулхасан Сейтеновтің шәкіртттері, «наркескендіктер» намысты қолдан бермей, еліміздің, облыстың, ауданның абыройын асқақтатуда. Бүгін аудан әкімі Ардақ Әбдіғаппарұлы спортшымызды қабылдап, құрмет көрсетті. Бұл спортшымыз үшін, біз үшін үлкен шабыт болды, – дейді аудандық дене тәрбиесі, спорт және туризм бөлімінің басшысы Еркебұлан Жамалатов.Иә, «Наркескен» спорт клубындағы гір спортының үлкен жетістіктерге жетуінде үйірме жаттықтырушысы Абдулхасан Сейтеновтың де еңбегі зор. Ол күні-түні шәкірттерін шыңдауда қажырлы еңбек етті, бүгінде оның жемісін аудан жұрты көріп отыр. Олай дейтініміз, шәкірттері қазіргі таңда тек аудан, облыс көлемінде ғана емес, көк байрағымызды биіктен желбіретіп, әлемді бағындыруда. Міне, осының бәрі – білікті бапкердің тыңғылықты жұмысының жемісі. Қайсар да Азияны бағындыруда бапкерінің үлесі зор дейді.– Мен бұл үйірмеге 8 сыныпта келдім, бапкерім Абдулхасан Сейтеновпен аудан орталығындағы алаңда өтіп жатқан спорттық сайыста таныстым.&nbsp;Содан бері гір спортымен айналысып келемін. Аптасына 3 рет спорт залда дайындаламын. Үздіксіз дайындықтың арқасында бапкеріммен бірге үлкен жетістіктерге жетіп жатырмын. Қазақстанды әлемге танытып, көк байрағымызды әлемдік додаларда желбірету үшін қолымнан келгенше еңбек етемін. Қазіргі таңда Қорқыт ата атындағы Қызылорда университетінде дене шынықтыру пәнінің мұғалімі мамандығы бойынша білім алып жатырмын. Азия чемпионатына 14 мемлекеттен үміткерлер келді. Соның ішінде топ жарып, артылған сенімді ақтадым. Ендігі мақсат – оза шауып, Әлем чемпионы атану, – дейді Қайсар Төлегенұлы.Айта кетейік, Қайсар Төлеген – Дәуімбай елді мекенінде орналасқан З.Жарқынбаев атындағы №202 орта мектептің түлегі. Ол бүгінде облыс орталығындағы Қорқыт ата атындағы Қызылорда университетінің «Дене шынықтыру» факультетінде облыс әкімінің грантымен білім алып жатыр. Бұған дейін салада жеткен жетістігін тарқатып айтсақ, Қайсардың атына заты сай азамат екеніне көз жеткізесіз. Жалағаштық спортшы осыған дейін Қазалы қаласында өткен «Алтын күз» ауыл спартакиадасында да 73 келі салмақта қарсылас шақ келтірмеді.&nbsp;Аталған үйірменің ауыз толтырып айтатындай мақтан тұтар басқа шәкірттері де жетерлік. Себебі онда өз ісінің білікті маманы, нағыз шебер жаттықтырушы Абдулхасан Сейтенов чемпиондарды шыңдап, аудан спортының дамуына өзіндік үлесін қосып жүр.– Үйірмеге аудан, ауыл білім ошақтарынан аптасына 4 күн 60-тан аса оқушы келеді. Спортшыдан керегі бір пайыз талант, тоқсан тоғыз пайызы еңбек. Жігіттер сондай еңбекқорлығының арқасында спортта талай сыналды. Олар спорт шеберіне үміткер атағын алу үшін де біраз тер төкті. Мәселен, Қайсар Төлеген осындай тынымсыз жаттығудың арқасында спорт шебері атанды, – дейді гір спорты үйірмесінің бапкері Абдулхасан Сейтенов.Айта кетейік, үйірме қатысушылары ауыл спортшылары бас қосатын «Алтын күз» спартакиадасынан соңғы 3 жылда командалық есеп бойынша алғашқы үштіктен түспеген. Аудан жұртының &nbsp;үмітін ақтаған спортшылар алдағы уақытта Қазақстан ұлттық құрамасына кіріп, ел абыройын Азия және Әлем чемпионатында қорғап, мемлекет мерейін үстем етеді деп сенеміз.

Азия чемпионы құрмет төрінде

<a href="https://kyzylorda-news.kz/">Kyzylorda-news.kz</a> Соңғы жылдары Жалағаш ауданында&nbsp;кәсіпкерлік саласы&nbsp;бойынша&nbsp;түрлі жобалар&nbsp;жүзеге асырылуда.&nbsp;Мәселен, бұрын кәсіп тек егін мен мал басын көбейтуге бағытталса, қазір түрлі инновациялық жобалар&nbsp;бар. Соның ішінде қап шығару кәсібі&nbsp;бүгінде қарқынды дамып, тұрғындарды тұрақты жұмыспен қамтуда.Иә, Жалағаштықта қайтарымсыз грант алып, кәсібінің көкжиегін кеңейткен іскер азаматтардың үлкен шоғыры қалыптасқан. Соның бірі – аудандағы қалдықсыз өнім шығаратын «Нұр» қап зауытының иесі Асылхан Нұрасылов. Өндіріс ошағынан бір демде күріш, жем, қоқыс салуға арналған 10 мың қап шығарылады. Бүгінде зауыттың жұмысын жүйелеуге 4 адам жұмылдырылған. Сол арқылы аудандағы жұмыссыздық мәселесін шешуге де септігін тигізіп отыр.&nbsp;Кәсіп иесі Асылхан Нұрасыловтың айтуынша, шикізат көршілес Өзбекстан елінен келеді. Бұл кәсіп түрі Өзбекстанда қарқынды дамыған. Нақтырақ тоқталсақ, ала тақиялы ағайындарда 50-ден аса қап өндіретін зауыт бар көрінеді. Ал зауыттың басты техникасы Қытайдан арнайы жеткізілген.– Қаптар бізге Қытайдан келеді. Сосын осы қаптарды өзімізде де шығаруға болады ғой. «Неге шағын зауыт ашпасқа?» деген ой келді. Жобасын жасап, ғимаратқа жер іздей бастадым. Жобаны дайындап, мемлекеттен қаржылай қолдау таптым. Қытайдан құрылғылар сатып әкелдік. Сөйтіп шағын зауытты іске қостық, – дейді кәсіпкер.Алдымен полимер шикізатынан жіп иіріледі. Дайын жіптен қап тоқылады. Одан әрі қапты өлшеміне қарай кесу, тігу, тапсырыс берушінің логотипімен басып шығару жұмыстары жүргізіледі. Барлық жұмыс тапсырыс берушінің қалауы бойынша жасалады. Зауытта түрлі-түсті логотипті басып-шығару цехы да іске қосылған. Одан бөлек бұл жерде қаптың ішіне целофан қосып тігетін цех жұмыс жасайды.Іскер азамат бұл кәсіпті бастауды көптен бері ойға түйіп жүрген. Ойға алған жұмысынан өнім алып отырған ол алдағы уақытта өнімін тек облыс көлемінен ғана шектелмей, шетелге экспорттауды мақсат етіп отыр. Бұл игілікті істің барлығы «Ауыл аманаты» жобасы аясында алған несиенің арқасында жүргізіліп отыр.&nbsp;Айта кетейік, бүгінде «Ауыл аманаты» жобасы аясында ауданға қарасты кент пен 8 ауылдық округ бойынша «Байқоңыр ӘКК» АҚ арқылы өндіріс, асыл тұқымды мал шаруашылығы, қызмет көрсету, өсімдік шаруашылығы бағытында 179,7 млн теңгені құрайтын 22 жоба қаржыландырылған.

Қазақстан және Қызылорда облысының жаңалықтары