<a href="https://kyzylorda-news.kz/">Kyzylorda-news.kz</a> Кеше&nbsp; қалалық мәслихаттың кезекті 22-сессиясы өтті. Сессия отырысына қалалық мәслихат төрағасы И.Құттықожаев төрағалық етті.Сессияның күн тәртібіне «Қызылорда қаласының тұрғын-үй коммуналдық шаруашылығын дамытудың жай-күйі мен өзекті мәселелері туралы», «Қызылорда қалалық мәслихатының коммуналдық-шаруашылық және қала инфрақұрылымы мәселелері жөніндегі тұрақты комиссиясының есебі туралы» мәселелері шығарылды.Аталған мәселелерге байланысты қала әкімінің орынбасары Ғ.Еркебай, қалалық мәслихаттың коммуналдық-шаруашылық және қала инфрақұрылымы мәселелері жөніндегі тұрақты комиссия төрағасы Д.Абизов хабарлама жасады.&nbsp;Сессияның күн тәртібіндегі қалада тұрғын-үй коммуналдық шаруашылығын дамыту мәселесіне байланысты, қалалық мәслихат депутаты Н.Тұрғанбаев хабарлама жасап, қалалық мәслихат тарапынан ұсыныстар берді. Қалада тұрғын-үй коммуналдық шаруашылығын дамыту бағытында атқарылған жұмыстарды ауқымды. 2024 жылға арналған қала бюджеті 58,2 миллиард теңге болып бекітілсе, бүгінде 93,6 милилард теңгені құрап отыр. Бұл қаражаттардың дені облыс орталығының инженерлік–инфрақұрылымын дамыту, коммуналдық шаруашылық саласын жетілдіруге бағытталған. Яғни, қаржының басым бөлігі халықтың игілігіне, тұрғындардың тұрмыс сапасын жақсартуға арналған.&nbsp;Аймақ басшысының облыс орталығының дамуын маңызды мәселе ретінде қарап, қолдау көрсету нәтижесімен жол-көлік инфрақұрылымы, абаттандыру, тұрғын үй құрылысы, демеушілік есебінен салынып жатқан әлеуметтік маңызды нысандар құрылысы қала дамуына оң серпін беруде.Осы уақытқа дейін, қаладағы ең өзекті мәселелер қатарында көгалдандыру және қоғамдық көлік мәселесі болды. Қазіргі таңда, Қызылорда қаласын көгалдандыру жұмыстарын қамтамасыз етуде «Жасыл-Қызылорда» мекемесі құрылып, қаланы аяқ сумен қамтамасыз ету, көгалдандыру саласындағы өзекті мәселелердің уақытылы шешілуіне оңтайлы қадамдар жасалуда. Биыл бірінші жыл жұмысты бастап жатқандықтан, ішінара іркілістер бар. Келер жылы бұл мекемеде толыққанды жұмыс жасау мүмкіндігі болады.&nbsp;Сонымен қатар, сессияда коммуналдық саланы одан әрі дамытуға кедергі келтіріп отырған өзекті мәселелер де аталды. Мәселен, бірінші кезекте қалада коммуналдық салаға қатысты тұрғындардың арыз-шағымдарының біріңғай тізбесінің жоқтығы, берілген шағымдардың шешімі аяқсыз қалып жатуына әкеледі. Сондықтан, қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі келіп түскен шағымдардың біріңғай тізбесін әзірлеп, реттілігіне сай қаржыландыруды бір жүйеге түсіру қажет.&nbsp;Сонымен қатар, коммуналдық мәселелер бойынша жасалатын кейбір жоба-сметалық құжаттардың толық зерделенбей жасалатындығы байқалуда. Мәселен, биылғы жылы қаламыздың Хорасан ата көшесін жөндеуден өткізу барысында, аталған көшенің 150 метр болатын тұйық жақ тұсы жоба-сметалық құжаттарына енгізілмегендіктен, жөндеуден өткізілмеген.&nbsp;Қаланың Сол жағалауы облыс орталығының айшықты мөлтек ауданына айналып келеді. Алайда, аталған аумақты көгалдандыру, аяқ сумен қамтамасыз ету кемшін түсуде. Жоба-сметалық құжаттарға сәйкес тұрғын үйлер арасына салынған арықтар қазіргі таңда көміліп қалуда.&nbsp;Сессия барысында депутаттар тарапынан ұсыныстар беріліп, оларға сала мамандары жауаптар берді.&nbsp;Сесссияға қатысқан қала әкімі Серік Салауатұлы қала бойынша атқарылып жатқан жұмыстарға тоқталып, депутаттар көтерген мәселелерге назар аударылатындығын жеткізді.&nbsp;Сессияға қала әкімінің орынбасарлары, қала әкімінің және мәслихат аппаратының басшылары, құқық қорғау органдары, қалалық дербес бөлімдер, құрылымдық мекеме басшылары, кент және ауылдық округтердің әкімдері, коммуналдық сала, бұқаралық ақпарат құралдарының өкілдері қатысты.&nbsp;Сессия қарауына шығарылған барлық мәселелер жан-жақты қаралып, тиісті шешімдер қабылданды.

Қызылорда: Қалалық мәслихаттың кезекті ХХІІ сессиясы өтті

<a href="https://kyzylorda-news.kz/">Kyzylorda-news.kz</a>&nbsp; &nbsp;Қызылорда қалалық орталықтандырылған кітапханалар жүйесіне қарасты А.С.Пушкин атындағы орталық кітапханада белсенді оқырмандардың қатысуымен жазушы, драматург Роза Мұқанованың «Мәңгілік бала бейне» әңгіме желісі бойынша әдеби талдау өткізілді.Шараның мақсаты – кітап сүйер қауымға жазушы, драматург Роза Мұқанованың шығармаларын насихаттау. Оқырмандар талдау барысында алдымен «Мәңгілік бала бейне» атты әңгімесінің авторы Роза Мұқанованың шығармасындағы қазіргі қоғамдағы адамгершілік мәселелерін терең түсінуге мүмкіндік бергенін және де оқырман қоғамның қаталдығын, адамдардың бір-біріне деген немқұрайлы қарым-қатынасын, жеке тұлғаның тағдырын жаппай өзіндік стилімен баяндағанын айтып өтті. Сонан соң шараға арнайы сұрақтар бойынша өз ойларын ортаға салды.Кітапхана оқыманы Бекайдарова Сания – шығармадағы оқиға қай жерде орын алғанын және де әңгіменің басты кейіпкері Ләйлә арқылы жазушы қоғамның қатыгездігін айқын көрсеткенін айтса, оқырман Ерланұлы Ержан ядролық сынақтардың зардабынан мүгедек болған Ләйлә қыздың өміріне тоқталды. Жалпы шара барысында оқырмандар әңгімені қызу талқылап, Ләйләның туған жері Қарауылдың ащы болмысы мен әлеуметтік жай-күйін, жас қыздың атомның әсерінен емес, адам баласының ісінен өз өмірімен қоштасқанын, сонымен бірге қоғамның лас әрекетіне шыдамаған Ләйләмен бірге оның Қарауылы, рухы, ұлты жойылғанын айтып, пікірлерімен бөлісті. Оқырмандар әдеби талдауды қорытындылай келе, автор шағын әңгімесінде басты кейіпкер Ләйлә образы арқылы күллі қазақ жұртының ауыр қайғысы мен мұңын баяндаған өте мазмұнды, оқырман жүрегіне ой салатын, мағынасы зор шығарма екенін айтып өтті.

Қызылорда: Кітапхана оқырмандары әдеби талдау өткізді

<a href="https://kyzylorda-news.kz/">Kyzylorda-news.kz</a>&nbsp; Бүгінгі таңда Қызылорда қаласында халықты баспанамен қамту көрсеткіші артып келеді. Бұған себеп жыл сайын облыс орталығынан көпқабатты үйлердің көптеп бой көтеруі.Мәселен, өткен жылы тұрғын үй құрылысын дамыту мақсатында өңірімізде алғаш рет сол жағалау тұрғын ауданынан 504 пәтерді құрайтын 7 қабатты 6 тұрғын үйдің құрылысы басталған болатын. Қазіргі таңда негізгі құрылыс жұмыстары аяқталған. Енді аталған тұрғын үй аумағын абаттандыру, сыртқы және ішкі әрлеу жұмыстары жүргізілуде.Сонымен қатар, сол жағалаудан 470 пәтерді құрайтын 10 көпқабатты тұрғын үйдің де құрылысы аяқталған. Бүгінде аталған аумақта да абаттандыру жұмыстары жалғасуда. Қаланың сол жағалау аумағында соңғы жылдары зәулім ғимараттар бой көтеріп, түрлі әлеуметтік нысандар салынуда. Соның нәтижесінде мұнда қоныстанушылар саны да артып келеді.Шаһардағы баспана салу жайы әлі де жалғасатын болады. Жоспарға сәйкес алдағы уақытта тағы 84 пәтерлі жеті қабатты 10 тұрғын үйдің құрылыс жұмыстарын жүргізуге жоба-сметалық құжаттары әзірленуде. Бұдан бөлек, жыл соңына дейін мыңнан аса пәтердің құрылысын аяқтап, пайдалануға беріледі деп күтілуде.

Қызылордада тұрғын үй құрылысы қарқынды жүргізілуде

<a href="https://kyzylorda-news.kz/">Kyzylorda-news.kz</a> Сыр елі 100 шайыр шыққан қасиетті мекен. Туымды өнердің туын тіккен өлкеде ұлтымыздың төл өнері жыраулық дарыған таланттар шоғыры толастаған емес. Қазақ халқының маңдайына біткен қасиетті өнер екінің біріне бақ болып бұйырмаған. Ол тек бойға біткен талантты біліммен ұштастырып, тер төккен санаулы жанның пешенесіне жазылған.Бүгінгі біздің кейіпкеріміз Қарақат Ғаниқызы бабадан мирас болған дәстүрлік өнерді жалғастырушы &nbsp;жалындап тұрған жас жырау. Саф алтындай жыр жауһарын бойға сіңіріп, ұзақ дастандар мен хиссаларды жаттап, көрерменге ұсыну өнер өлкесімен жаңа қауышқан өнерпазға оңай емес. Десе де 4 жасынан-ақ әнге елтіген балауса қыздың арманы сахнаға шығып өзіне тән қоңыр дауыспен әуелетіп ән салу болатын. Бүгінде өнер әлеміне қанатын жайған Қарақаттың әр қадамы сәттілікке бастап тұрғандай.«Төрде тұрған домбыраға қол созып, оны нәзік саусақтарымен шертуге құмар болды. Ал әуелеген ән айтылса, бесікте жатып бұлқынып, уілдеп жататын. Ол адамға жақын, ашық жарқын, көпшіл болып өсті. Ауылда мектеп қабырғасында жүріп домбыра үйірмесіне қатысты. Шығармашылығын шектеген жоқпыз. Ата-аналық мейірімімізді төгіп қолымыздан келгенше өнерін қолдап, дем беріп отырдық. Өзіміздің де өнер десе ішкен асымызды жерге қоятын әдетіміз бар. Бақытын ұлтымыздың төл өнерінен тауып, тарлан таланттардың ізін жалғап жүрсе біз үшін үлкен бақыт» дейді анасы Айсұлу.Мектепте жүргенде бойымда әнге деген құмарлық болды. Киелі өнер түп нағашым Райкүл әжемнен дарыған. Ол кісі ауылдағы «Асыл әже» ансамблінде әнші болған. Ауылдық клубта домбыра үйірмесінде Қасым Айтпенбетов ұстазымнан тәлім алып, аудандық, облыстық, республикалық байқаулардың бірнеше дүркін жүлдегері атандым. Бұл менің дүбірлі додадағы алғашқы үлкен жеңісім десем де болады. Грузия елінің Зугдиди қаласында өткен халықаралық байқауда І орынды еншілеп, қазақ елінің абыройын асқақтаттым. Байқауда белгілі ақын, майдангер-ұстаз Темірбек Жүргенов ауылының тумасы Асқар Қожахметов атамыздың республикаға белгілі «Қош болып тұр, Қазақстан аймағым» атты термесі мен халық әні «Ақеркені» орындадым. &nbsp;Бұл әрине, жүрек толқытатын жаңалық. Елден тысқары жерде ән айтып, грузиялықтардың қошеметіне бөленіп, жүлдемен оралу мен үшін өмірдегі үлкен сый болды, – дейді Қарақат.Қарақаттың өнеріне жанашырлық танытып жүрген алғашқы ұстазы Бисенбек Төлеубаевтың айтуынша, жас та болса Қарақат Әбдікәрім өнер саласында өз ізін қалдыруда. Еліміздің байрағын желбіретіп, мәдениетімізді әлемнің түк¬пір-түкпіріне жырлары арқылы жеткізуде. Қазір «Жиенбай» жыраулық мек¬тебін қалыптастыруға күш салудамыз. Сол мектептің басы да міне, осы Қарақаттан басталуда. Ол колледжге келген уақыттан бастап еңбекқорлығымен көзге түскен, болашағынан көп үміт күттіретін шәкіртінің бірі екенін айтады.Небары 18 жастағы Қарақаттың армандары көп. Ол қазір «Қазанғап» атын¬дағы Қызылорда музыкалық жоғары колледжінде білім алып жатыр. Бастапқыда оқу қиын болған. Группаластарының көпщілігі музыкалық мектепті тәмамдап, бұл саладан алғашқы тәлім алғандар екен. Көп ұзамай тынымсыз еңбектің арқасында Қарақат та фортопионо, гитара аспабында ойнауды үйреніп алады. ХVІ республикалық студенттік пәндік кіші олимпиадасында «Жыршылар» номи¬нациясы бойынша ІІІ орын, Мәдениет қайраткері, жыршы-термеші Жұмабек Аққұловтың 80 жылдық мерейтойына орай еткен «Жыр ғұмыр» атты облыстык жыршы-термешілер байқауынан ІІ орын, «Текті сөздің төресі – терме» атты облыстық жыршы-термешілер байқауынан І орын иеленген.Бүгінде жас жыраудың репертуарында Тұрмағамбет Ізтілеуовтің термелері, Базар жыраудың «Мақпал сегіз» дастаны, «Көрұғлы» жыры өзге де ұзақ термелер мен толғаулар бар. Болашақта танымал жырау Ұлжан Байбосыновадан дәріс алуды армандап жүрген Қарақаттың қадамына біз де сәттілік тіледік.

Дәстүрлі өнерді дәріптеген қызылордалық

<a href="https://kyzylorda-news.kz/">Kyzylorda-news.kz</a> Жалағашта жұмыссыз адамдарды тек жұмыспен қамту ғана емес, оларды кәсіпке бейімдеу жұмыстары қарқын алды. Әрине бұл ретте кәсіпкерлік саласын дамытуға бағытталған мемлекеттік бағдарламалардың маңызы жоғары болып отыр. Олай дейтініміз, ауданда бірнеше жыл бұрын қоға алынған “Жаппай кәсіпкерлікті дамытудың “Еңбек” мемлекеттік бағдарламасы аясында өз ісін өрістетіп отырғандардың қатары көбейген. Қолға алған жобасын жүзеге асыру үшін мемлекеттік бағдарламаның көмегіне жүгінгендер қатарында кент тұрғыны Асқар Жұмабаев та бар.&nbsp;Кейіпкеріміз осыдан бірнеше жыл бұрын мал шаруашылығында табысқа кенелуді мақсат еткен көрінеді. Алайда қорда қаржысы болмағандықтан салада мол табысқа жету қиындық тудырған. Осылайша Жұмыспен қамту орталығына құжаттар тапсырып және өз жобасын ұсынған ол бүгінде мемлекет тарапынан тағайындалған қайтарымсыз қаржыға ие болып отыр.&nbsp;– Көзін тапқан жанға кәсіпкерліктің қай бағытында да мол табысқа жетуге болады. Ол үшін жоба иесі алдымен алдына нақты мақсат қоюы керек. Неге десеңіз, нақты жоспармен әзірленген жоба салада маңызды рөл атқарады. Ал келешекті ойламай жасалған қадамның қай салада да оң нәтижеге қол жеткізбейтінін жақсы білеміз. Менің қорамда төрт түлік малдың ешқайсысы да жоқ. Сөйте тұра мал шаруашылығында мол табысқа жетуді мақсат етуім біреулер үшін мүмкін емес шығар. Алайда мен өзімнен салада үлкен табысқа жететін кәсіпкер қалыптастыруды мақсат еттім. Осылайша орталыққа нақты жоспармен жасалған жобамды ұсынып, оны қорғап шықтым. Нәтижесінде 555 600 теңге қайтарымсыз қаржыға ие болып отырмын, – дейді Асқар Жұмабаев.Бастапқыда іскер азамат қайтарымсыз грант есебінде қол жеткізген тиісті қаражатқа 2 бас жылқы сатып алды. Кәсіпкер оны бордақылап сатуды емес, мал басын көбейтіп алуды көздегенін айтады. Асқар Жұмабаев мал басын арттырып алғаннан кейін өз өнімін нарыққа шығарғанын айтады.&nbsp;– Негізгі мақсат – қолдағы малды сатып табысқа кенелу. Ал мен бұл жұмыстарды осы кезден бастайын десем, көп ұзамай жұмысым тоқтайды. Себебі қорадағы мал саны шектеулі. Сондықтан әуелі олардың санын көбейтіп барып, негізгі табыс табу жұмыстарын қолға алдым. Бірақ қазірден бастап оларды бағымға қойып сату арқылы да мал басын арттыруға мүмкіндік бар. Мәселен, мен екі бас жылқыны бағып сатсам, оның орнына 3 тай алуыма болады. Бұл бағытта да жоспарлар бар. Қазір нарықта ет бағасы шарықтап тұр. Сондықтан төрт түліктің қай-қайсысын өсіріп, табысқа жетемін десеңіз де мүмкіндік мол. Бұйыртса, ет өнімдерін өндіретін цех ашу да негізгі мақсатыма айналып отыр. Алайда оны жүзеге асыруға менің дәл қазір мүмкіндігім жоқ. Десе де, алдағы уақытта жұмысым алға басып, мал басын арттырсам, бұл мақсатқа да жетіп қалуым ғажап емес, – дейді жас кәсіпкер.Бірнеше жыл бұрын қайтарымсыз қаржыға ие болған Асқар Жұмабаевтың талабы таудай. Шыны керек, қорасында төрт түліктің барлығы бола тұра мұндай жоспарлар құруды ойламай жүргендер қаншама. Бастысы, кейіпкеріміздің шын ниеті мен ауданның кәсіпкерлік саласына серпін беремін деген талабына риза болдық. Ал қалған жоспарды алдағы уақыт көрсетеді. &nbsp;Айта кетейік, соңғы жылдары ауданда кәсіпкерлік саласының алға басқаны анық байқалады. Өңірде жаңадан ашылып жатқан кәсіпорындар қатары артса, бір жағынан жаңа жұмыс орындары құрылып жатыр. Бұл өңір халқы үшін де және аудан экономикасын ілгерілетуде де өз маңызын жоғалтпайтыны анық. Әрине өз кезегінде кәсіпке бет бұрып, қолда бар қаржымен іс бастап жатқан жалағаштықтар да жетерлік. Десе де, өңірде саланы ілгерілетуде мемлекеттік бағдарламалар үлкен қолдау болып отыр. Пайыздық үстемақысы төмен несиеге қол жеткізу арқылы да шағын және орта кәсіпкерлік алға басты. Олардың ішінде үлкен кәсіпорындар да бар. Ал қайтарымсыз грантпен былтырдың өзінде 300-ге жуық жоба қолдау тауып, жұмыссыз азаматтар да саланың алға басуына өз үлесін қосуда.&nbsp;

“Жаппай кәсіпкерлікті дамытудың “Еңбек” мемлекеттік бағдарламасы аясында кәсібін бастаған Асқар Жұмабаев

<a href="https://kyzylorda-news.kz/">Kyzylorda-news.kz</a> 2021 жыл. Нақ осы жылы Шиелі ауданы диқандары мен малшылары елдегі су тапшылығы мен пандемия кедергілеріне қарамай нәтижелі еңбек етті. Балапанды күзде сана деген тәмсілді ту еткен дала дарабоздарының сиыр жылында жеткен жетістіктері мен көрсеткіштері көңіл көншітерлік. Диқандар асыға күтетін «Алтын күз» мерекесі жыл сайын жоғары дәрежеде тойланады. Бұл тұста малшылардың күзге қанша төлмен кіріп, диқандардың қамбаға қанша астық түсіргені баршаны қызықтырады. Осы орайда біз де дала еңбеккерлерінің үш жыл бұрынғы табысын аз-кем есептеп көрдік. Сондай-ақ, мал ұстаған ағайынның жанайқайы жайылымдық жер мәселесін көтеруді жөн санадық.Иә, өңір экономикасының негізгі тірегі – ауыл шарушылығы саласы екендігі ақиқат. Осыдан үш жыл бұрын Шиелі ауданы көлемінде 30 189 гектар жерге ауыл шаруашылығы дақылдары орналастырылды. Соның ішінде сыр салысы күріш дақылын егуге 12 039 гектар жер үлестірілген. Сарапшылар сол жылы шежірелі өлке сыр маржанынан 50-55 центнерден өнім алады деп топшылаған-ды. Сарапшылар сөзі нақ келіп, күріштің 11 950 гектарына орақ түсіп, оның 11720 гектары (97,4%) орылған. Әр гектардан орташа 50-55 центнерден өнім алынған. &nbsp;Диқандардың ала жаздайғы еңбегінің нәтижесі де жаман болмай, шаруашылықтар егін-терімді күзгі жауын-шашын, салқынға ұрындырмай толық жинап үлгерді де. Ашып айтуымыз керек, 2021 жылғы барлық өнім көлемі 2020 жылмен салыстырғанда едәуір төмен болды. Оған бірден бір себеп, аймақта су тапшылығының орын алуы болса керек. Шиелі аудандық ауыл шаруашылығы бөлімінің бізге ұсынған сол жылғы сандарын сөйлетер болсақ, жалпы бидайдан 1590 тонна өнім алынған. 8 915 гектар жерге егілген жоңышқадан 52 499 тонна ескі жоңышқа, 3 467 тонна жаңа жоңышқа жиналған. Арпа дақылы - 20 тонна. Көкөніс, бақша дақылдарында да жиын-терім жұмыстары қарқынды жүрген. Сол жылдары қоржынға түскен көкөністің орташа көрсеткіші 190-200 центнерден болса, бақша өнімдері 200 центнерді құраған.&nbsp;Су тапшылығы демекші, су тапшылығы жыл сайын сезіледі. Ежелден малшылардың жазғы қонысы саналатын Қаратау етегінде 250,0 мың гектар жайылымдық жер бар. Малшылардың жаз жайлауына айналған құтты мекен бұлақтар, шахталы, трубалық, құдықтар арқылы суландырылады. Өңір малшыларының 60 процент қазір осы Қаратауды мекендеп отыр. Еңбекші, Керделі, Бәйтерек, Ақтоған, Ақмая, Телікөл, Алғабас, Бестам, Тұран ауылдық округтерінің шаруашылық құрылымдары төрт түлік мал шығарып отырған жайлау ірі қара, уақ мал, жылқы, түйе малдарын күтіп ұстауға өте тиімді. Жылына 12 мың ірі қара, 14 мың уақ мал, 5-6 мың жылқы, 500 бас түйе жайылымға шығатын жайлауға малшылар наурыз айында көшіп, қазан айының ІІ онкүндігінде төмен түседі.&nbsp;Жайлаудағы су тапшылығы мәселесін Шиелі ауданы малшылары көптен бері айтып жүр. Рас, қазір жайлаудағы көптеген бұлақтардың көзі бітеліп, түрлі себептермен кешегі кеңес кезінде қазылған құдықтар топырақпен көміліп, жарамсыз болып қалған. Соның салдарынан төрт түлік малдың жағдайы болмай, ала жаздай жылқылар сүліктеп, ірі қараға қарасан келіп, уақ мал жүдеу күйде күздеуге көшіп жатыр. Міне, осы мәселеге алдағы уақытта аудан әкімі назар аударып, ден қойса деген өтінішіміз де жоқ емес. Сондай-ақ, бұл түйіткіл аудандық мәслихат депутаттары мен ардагерлеріміздің де қаперінде болуы керек деп есептейміз.&nbsp;Шырайлы Шиелі аграрлы аймақтың бірі болғандықтан жайылымдық жерге баса назар аударған абзал. &nbsp;Соңғы уақытта мал шаруашылығы қарқынды дамып келе жатқан &nbsp;аймақтың қатарындамыз. Елімізді азық-түлікпен толық қамтамасыз ету міндетін орындауда мал шаруашылығын дамыту айрықша орын алатын болса, оның негізі – табиғи жайылымдарды тиімді және ұтымды пайдалану. Жер пайдаланушылар мен меншік иелері үшін жайылымның тозуын болдырмай, жақсарту шараларын жүзеге асыруы керек.

Шиелідегі дала дарабоздары дараланған жыл

<a href="https://kyzylorda-news.kz/">Kyzylorda-news.kz</a> Қазіргі таңда ел дамуына үлес қосып, тіршіліктің түрлі тізгінін ұстап жүрген нәзіжандылар қатары қалың. Солардың бірі – Сәуле Бишекова. Ол ерлермен сапта тізе қосып, бейбіт күннің тыныштығын түзетуге атсалысқандардың бірі.Сырт көз талдырмаш арудың полиция саласында жауаптылығы, парасаттылығы, ыждахаттылығымен дараланып келеді.Қазалы қаласының тумасы, орта мектепті бітірісімен, Алматы қаласындағы Қазақ Ұлттық аграрлық университетінің халықаралық құқық мамандығына құжат тапсырады. Қағілез қыз жоғары оқу орнын 2008 жылы аяқтап, сол жылы «Астана» университетінде магистратураны оқуға талыпанды. Құқық магистранты атанған қыз теориялық білімін практикамен ұштастыруды мақсат тұтады.2017 жылы Сырдария ауданы полиция бөліміне жұмысқа қабылданады. Ол жерде әйелдерді зорлық-зомбылықтан қорғау инспекторлығына орналасады. Антына адал ару 2019 жылы Қазалы ауданындағы бөлімшеге ауысып, қызметін жалғастырады.Қазалы ауданы полиция бөлімі жергілікті полиция қызметінің әйелдерді зорлық-зомбылықтан қорғау тобының инспекторлығы – жауапты жұмыс.«Әйелдерді зорлық-зомбылықтан қорғау саласына саналы түрде келдім. Мұнда түрлі туындаған түйіткілдер анықталып, оны шешу жолында шешімдер қабылданады. Осы қиындыққа тап болған әрбір отбасы азап пен үмітсіздікке толы арпалысты күй кешеді. Түйіннің түйіткілсіз шешілуіне полиция қызметкерлерімен бірге әйелдер, ақсақалдар кеңесі белсенді рөл атқарады», – дейді жұмысы туралы Сәуле Талғатқызы.Отбасылық жанжалды бағамдау оңай іс емес. Ондағы әлеуметтік жағдайы, денсаулығы, қауіптілігі анықталады. «Құрбанға» айналған ана, жақынын қорғаймын деп арызданудан бас тартқан әлсіз топпен психологиялық жұмыс жүргізу де маңызды. Мамандық жан-жақтылықты қажет етеді.Бүгінде тұрмыстық зорлық-зомбылық қоғамдағы өзекті мәселе екендігін айғақтады. Нәтижесінде, заң қайта қаралып, тұрмыстық зорлық-зомбылық үшін жауапкершілік қатаңдатылды.<blockquote>««Ерлі-зайыптының арасына есі кеткен кіреді» деген жаңсақ пікірден арылатын кез келді. Зайырлы, демократиялық қоғамда өмір сүріп жатқан әрбіріміз, оны аңғаруымыз керек. Зәбір көрген ананың артында үлкен қоғам тұр. Өсіп келе жатқан бала әке ісін қайталамасына кім кепіл? Ал, әкесін жек көретін қыз отбасын құруға асықпай, кейде өз туған перзентінен бас тарып жатса, оны екі адамның ісі деу қаншалықты қисынды?.. Өмірге өкпелі адамдар қылмыстылыққа бейім келеді. Бұны да, бағамдау қажет», – дейді ертеңге алаңдаған ару. Қуантатыны, бұрын отбасында орын алған денсаулыққа қасақана жеңіл зиян келтіру, ұрып-соғу әкімшілік құқық бұзушылық болып саналса, соңғы өзгерістерге орай, бұл әрекеттер криминализацияланғаны. Полиция қызметі әрдайым жаңашылдықта болуы тиіс дейді шенді қыз .</blockquote>«Ал, үйде полиция капитаны образынан шығу оңайға соқпайтын болар...» деген көкейдегі сұрақты жайып салдық.«Бұл орайда, өзімді жолы болған жанға балаймын. Алаңсыз жұмыс істеуге отбасы мен туыстардың қолдауы маңызы. Жолдасым әскери қызметкер. Шекарашы. Екеуіміз үш перзентті тәрбиелеп отырмыз. Басқа отбасылар сияқты қажетті жерде қаталдық, қажетті жерде жұмсақтық танытатын кезіміз болады. Балалар үшін біз құқық қорғаушы емес, ата-анамыз. Ең басты миссиямыз осы», – дейді күліп.«Мені өзін жалғыз сезінетін жандар толғандырады. Кез келген қиындықтан, тығырықтан шығатын нұсқа қашан да бар. Ешкім өзін мәжбүрлеуге, қорлауға жол бермеуі тиіс. Ана қорғансыз, бала қамқорсыз қалмасы үшін елімізде нәтижелі жұмыстар жасалып келеді» , – дейді бізбен қоштасарда қоғамның жүгін қаймықпай көтерген қайсар қыз.

Сәуле Бишекова: Әйелдерді зорлық-зомбылықтан қорғау – жауапты жұмыс 

<a href="https://kyzylorda-news.kz/">Kyzylorda-news.kz</a> &nbsp;Қазақ халқының нағыз азаматын тәрбиелеп өсіру негіздерін қалыптастыратын тұңғыш мектеп – балабақша.&nbsp;«Балабақша – тәрбиенің бұлағы. Балабақша – мейірімнің шуағы» демекші, балабақша келер ұрпақты еңбекке, өнер-білімге, елінің ар намысын қорғауға және ізгі адамгершілік ниеттерге баулиды. Сондай балабақшалардың бірі – аудандық «Балбөбек» бөбекжайы. Газетіміздің бүгінгі санында аталған балабақша жөнінде қалам тербетуді жөн көрдік. Аудан орталығындағы бөбекжайға келіп, толықтай танысып шықтық. Іші кішкентай болса да, өте әдемі безендіріліп, толықтай қамтылған. Карантиндік режимді сақтай отырып, күнделікті қызу жұмыс жасауда. Әр кабинет санитарлық нормаларға сай безендірілген. Тәрбиешілерге де, тәрбиеленуші балаларға да барлық жағдай жасалған.- «Адамның адамшылдығы – ақыл, ғылым, жақсы ата, жақсы ана, жақсы құрбы, жақсы ұстаздан болады» дейді Абай атамыз. Еліміздің ертеңгі ұлт тізгінін ұстар жастарымыздың тәрбиесіне аса мән беру – біздің негізгі мақсатымыз.Түрлі білім беру саласы бойынша балалардың жас ерекшеліктеріне сай ұйымдастырылған оқу қызметін тәрбиешінің шығармашылық ізденісі арқылы жүзеге асырып жұмыстанамыз. Мектепке дейінгі жастағы балалармен жұмыс барысында педагогтер әр баланың мінезқұлқын, жас психо-физиологиялық ерекшеліктерін, табиғи дара шығармашылық қабілетін ескереді. Әр баланың өмірі мен денсаулығы біздің жауапкершілігімізде. Балабақшада дұрыс тәлім-тәрбие бере алсақ, ол ертең мектепке барып саналы түрде сапалы білім алуға тырысады. Соның нәтижесінде елін сүйген азамат болып шығады. Біз, тәрбиешілер, түрлі болашақ маман иелерін тәрбиелеп жатырмыз десем, артық айтқандық болмас, - дейді «Балбөбек» бөбекжайының меңгерушісі Фарида Әкімғалиева. Иә, «Баланы тәрбиешінің дәл өзіндей қылып шығармай, келешек заманына лайық қылып шығару керек» деп Мағжан Жұмабаев атамыз текке айтпаған ғой. Бесіктен басталған бала тәрбиесі қарыштап алға дамып келе жатқан ХХІ ғасырда балабақшада жалғасын табады. Күнкөріс қамымен жүрген жұмысбасты ата-аналар үшін баланың балабақшада тәлімтәрбие алуы тиімді жол. Балабақша қазіргі таңда тәлім-тәрбие алатын ортасы ғана емес, сонымен қатар мектепалды даярлық мекені десек қателеспейміз.Осындай тәлім мен тербие тел берілетін «Қызылорда облысының білім басқармасының "Қазалы ауданы бойынша білім бөлімінің №7 «Балдырған» санаториялық бөбекжай-балабақшасы» коммуналдық мемлекеттік мекемесі 1986 жылдың қазан айында ашылған. Балабақша балаларды өкпе ауруына қарсы емдеу, олардың бойындағы туберкулез талшықтарын жою және оның алдын алу шараларымен бірге тәрбие жұмыстарын жүргізеді. Алғашқы кезде балабақшада екі топ жұмыс жасады.1995-1998 жылдарда (оңтайландыру кезінде) Халықаралық «Аралды құтқару» қорынан 2 миллион теңге қаражат бөлініп, 4 топ жұмыс жасады. 1999 жылдан бастап, жергілікті бюджеттен қаржы бөлініп, 6 топқа көбейді. 2013-2015 жылдар аралығында балабақшаға Гүлсім Әзімжанқызы Әліпбаева басшылық жасады. 2015 жылдан бастап, балабақшамызды Жанат Көланова басқарып келді.2021 жылдан бастап, Қызылорда білім басқармасының № 120 нд/1 санды және Қызылорда облыстық денсаулық сақтау басқармасының №252 бб санды «Бірлескен Бұйрығына» сәйкес, балабақша әлсіреген, жиі және ұзақ ауыратын, аймақтық дәрігерде әртүрлі диагнозбен “Д” есепте тұратын балалар, яғни, анемия өкпе-тыныс алу жолдарының, жүрек-қан тамыр жүйесінің, асқазан-ішек жолдарының, эндокриндік жүйенің, аллергиялық және бүйрек-зәр шығару жолдарының ауруларымен есепте тұратын мектеп жасына дейінгі бір жастан алты жастағы балаларға арналған емдеу-алдын алу, сауықтыру жұмыстарын жүргізеді. Балаларға 5 мезгіл тамақ беріледі.Балабақшаға 19 қыркүйек 2022 жылдан бастап, Эльмира Жалпақбайқызы Нұрмағанбетова басшылық етеді.2022 жылдың желтоқсан айынан бастап, 10 балаға толығып, 120 бала тәрбиеленуде.Қазіргі таңда 6 топ жұмыс жасайды. “Бөбек” кіші тобы – &nbsp;15 бала, “Бүлдіршін” &nbsp;кіші тобы –&nbsp;15 бала, “Құлыншақ” ортаңғы тобы – 22 бала, “Алтын кілт” ортаңғы тобы – 23 бала, “Күншуақ” ересек &nbsp;тобы – 23 бала, “Балдәурен” &nbsp;мектепалды даярлық тобы – 22 бала тәрбиеленуде.Балабақшада 20 педагог кадр және 27 техникалық қызметкер жұмыс жасайды. Оның ішінде, жоғары білімді – 14, арнаулы орта&nbsp;– 6, жоғары санатты – 3, Педагог-сарапшы – 4, Педагог-модератор – 4, І-санатты – 1, ІІ-санатты – 4 педагог кадр қызмет етеді. Қазіргі таңда балабақша жаңа инновациялық бағыт бойынша жұмыс жасауда. Педагог кадрлардың 2022-2023 оқу жылындағы жетістіктері жетіп артады. Мәселен, балабақша әдіскері – Клара Тоғамысовна Серикбаева «Үздік ата-аналармен консультативтік пункт» аудандық байқауынан ІІ-орын; тәрбиеші Асель Сахиевна Мамбетова – «Үздік жоба-2022» аудандық байқауынан ІІ-орын; балабақша әдіскері Клара Тоғамысовна &nbsp;Серикбаева «Үздік ата-аналармен консультативтік пункт» облыстық байқауынан ІІ-орын; тәрбиеші Айгуль Амантаевна Душанова – «Қазақ тілі» қоғамдық бірлестігінің ұйымдастыруымен өткізілген «Ана сұлу көрінер қызыменен» атты байқауда – І-орын; тәрбиеші Ерназар Гүлсім Төлегенқызы – аудандық «Мектепке дейінгі білім беру және тәрбиелеу теориясы мен әдістемесі» бағытында педагогикалық оқудан &nbsp;ІІ-орын иемденді. Тәрбиеші Айгуль Амантаевна Душанова – аудандық «Педагогикалық идеялар алаңы» байқауынан І-орын; тәрбиеші Гульмира Кенесовна Беденова – «Балаларға базарлық» атты республикалық байқаудың аудандық кезеңінен І-орын; тәрбиеші Зухра Жеткергеновна Изенова – «Достық бекеті» облыстық бейнеролик байқауында ІІ-орын алды.Тәрбиеші Айгуль Амантаевна – «Қызыққа толы сәттер» республикалық байқауының аудандық кезеңінде І-орын, облыстық кезеңінде ІІ-орын иемденді. Мектепке дейінгі ұйымдар арасында ұйымдастырылған «Қызыққа толы сәттер» республикалық байқауының облыстық кезеңінде №7 «Балдырған» санаториялық бөбекжай-балабақшасы ІІ орынмен марапатталды. Облыстық оқу орталығының жоспарына сәйкес балабақша педагогтерімен «Театр әлеміндегі ғаждайыптар» тақырыбында облыстық вебинар болып өтті. Педагогтер өз тәжірибелерімен бөлісіп, арнайы сертификаттарға ие болды. Кеңес Айсұлтан, Аршат Жәнібекқызы республикалық «Абай оқулары» шығармашылық байқауында «Мәнерлеп оқу» бойынша І орын, жетекшісі Зухра Жеткергенқызы Изенова; Абай Әлинұр «Мың бала» республикалық зияткерлік орталығының «Абай оқулары» шығармашылық байқауы Бас жүлде, жетекшісі Зухра Жеткергенқызы; Нұраш Абай «Менің елім – Қазақстан» патриоттық әндер республикалық фестивалінің ән айтудан «Үздік орындаушы» номинациясы бойынша облыстық кезеңінен 3-орын, жетекшісі Роза Маратқызы; «Құлыншақ» ересек топ балалары «Барлығына рақмет!» республикалық челленджінен ІІІ орынды жеңіп алды. Болат Зиннұр «Әкем – асқар тауым» республикалық байқауының облыстық кезеңінен 2 орын, «Әкем – асқар тауым» республикалық байқауының республикалық кезеңінен 2 орын, жетекшісі Мирамкул Алдамжарқызы Үмертаева; Болат Дінмұхаммед, Бекболат Әлинұр, Ерболұлы Бекзат, Төлеш Расул, Болат Зиннұр «Ханталапай» республикалық ұлттық ойындар байқауының облыстық кезеңінен «Тапқырлар мен ептілер» номинациясымен марапатталды.«Үйренер нәрсең – білім мен мейірімділік» деп Жүсіп Баласағұн айтқандай, балабақша ұжымы әрбір күнін ізденіспен өткізеді. Әр қызметкерімнің өзіндік ерекшеліктері мен қабілеттері бар. Оларды әрдайым мақтан тұтамын.Балабақша – баланың жүйелі түрде білім-тәрбие алатын ең алғашқы қоғамдық ошағы. Балабақшаның балаға беретін тәлім-тәрбиесінің қаншалықты мықты болуы, сол балабақшада қызмет ететін педагогикалық ұжымға, нақтырақ айтар болсақ, ұстазға, тіпті, ондағы қызметкерлерге байланысты. Сол себепті, тәрбиешілер бүгінгі күннің жаңалығынан сырт қалмай, үнемі ізденіс үстінде жүреді.Дана халықымыз «Ағаш түзу өсу үшін оған көшет кезінде көмектесуге болады, ал үлкен ағаш болып өскенде оны түзете алмайсың» деп бекер айтпаған. Балабақша бақыттың ең бірінші баспалдағы, баланың болашағы. Сондықтан, тәрбиенің алтын бесігі саналатын балабақшаның маңызы зор.Фото: basta.kz<img src="https://knadmin.beoblood.kz/uploads/8996e4be_7bbf_4662_af6a_d866a68d027c_3c4db0b09f.jpg" alt="8996e4be-7bbf-4662-af6a-d866a68d027c.jpg">&nbsp;

Қазалы: Балабақша – барлық тәрбие мен білімнің ең алғашқы баспалдағы

<a href="https://kyzylorda-news.kz/">Kyzylorda-news.kz</a> Қыстың&nbsp;қамын&nbsp;жаз&nbsp;ойлайтын&nbsp;қазақпыз&nbsp;ғой,&nbsp;оқушы&nbsp;кезімізде&nbsp;ауылда&nbsp;жаз&nbsp;ортасынан&nbsp;ауа&nbsp;бере&nbsp;қорадағы&nbsp;малдың&nbsp;қыстық&nbsp;азығына&nbsp;кірісетін&nbsp;едік.&nbsp;Түске&nbsp;дейін&nbsp;50&nbsp;бау&nbsp;шөп&nbsp;ору&nbsp;–&nbsp;күнделікті&nbsp;межеміз.&nbsp;Егіннен&nbsp;хабарымыз&nbsp;болмаса&nbsp;да&nbsp;алқап&nbsp;басындағы&nbsp;дәннің&nbsp;шығымын&nbsp;сол&nbsp;жерде&nbsp;жүрген&nbsp;еңбек&nbsp;адамдарының&nbsp;көңіл-күйінен&nbsp;һәм&nbsp;қас-қабағынан&nbsp;аңғарамыз.&nbsp;Сол&nbsp;тұста&nbsp;егістік&nbsp;қоршауынан&nbsp;аса&nbsp;бере&nbsp;бірінші&nbsp;болып&nbsp;көзімізге&nbsp;Абдол&nbsp;ағамыз&nbsp;түсетін. “Әкең&nbsp;қалай&nbsp;бала?”&nbsp;Деген&nbsp;сұрағына&nbsp;жауапты&nbsp;қысқа&nbsp;қайырып,&nbsp;қарсы&nbsp;сауал&nbsp;арқылы&nbsp;әрі&nbsp;қарай&nbsp;еңбеккердің&nbsp;сөзіне&nbsp;құлақ&nbsp;түремін.&nbsp;Одан&nbsp;әрі&nbsp;екеуара&nbsp;диалогтың&nbsp;қалай&nbsp;жалғасатыны&nbsp;белгілі&nbsp;ғой.&nbsp;Кеше&nbsp;Жалағаш&nbsp;ауданына&nbsp;қарасты&nbsp;Есет&nbsp;батыр&nbsp;ауылына&nbsp;табан&nbsp;тіреп,&nbsp;шаруашылықтар&nbsp;жұмысын&nbsp;ақпараттандыру&nbsp;мақсатында&nbsp;“Қарабура”&nbsp;шаруа&nbsp;қожалығына&nbsp;аялдаған&nbsp;едік.&nbsp;Абдолла ағамыз тағы да алдымнан сол сауалымен шықпасы бар ма. Бала күнгі аз-маз ұмытылып қалған егіннің шығымы мен оны күтіп-баптауға қатысты ақпаратты жадыда қайта жаңғырту мақсатында мен де баяғы әдетіме бастым.Әбекең – ауыл шаруашылығы саласында 1994 жылдан бері еңбек етіп келе жатқан білікті маман. Оған ешкімнің дауы жоқ. Салада межелі табысқа қол жеткізіп, кәсібін басқа бағытқа іскер азаматтар талай ауыстырған. Мұндайда білікті кадр үшін жұмыс табу қиын болып па? Бір маусымнан келесі маусымға дейін Абдолла Шалқымаевты жергілікті шаруашылықтардың таласа жұмысқа шақыруы ол туралы жоғарыда айта кеткен мәліметтерді қуаттай түсері анық.&nbsp;Тәжірибелі маман 30 жылға жуық уақытта аталған саланың түрлі бағытында табанды еңбек етті. Бүгінде бейнетінің зейнетін көріп отырған ол “Қарабура” шаруа қожалығында бас есепші болып жұмыс жасайды. Алайда “Бухгалтермін” деп бөлмесін ішінен жауып алған ол жоқ. Керісінше кешегі науқанда еңбеккерлермен етене жүріп, егіс басында жұмыс жасап жүр. “Мамандыққа – адалдық” деген осы шығар сірә.&nbsp;– Былтыр межелі өнімге қол жеткізген шаруашылықтың биыл да жұмысы ширай түсті. Мұның бәрі дала дарабоздарының еселі еңбегінің арқасы деп білемін. Біздің ұжым болып үлкен жетістікке қол жеткізуіміздің басты себебі, мұнда “сен механизаторсың, сен сушысың немесе сен күрішшісің” деген түсінік жоқ. Шаруаның бір жағы ақсап жатса, жұмыла сол олқылықтың алдын алуға күш саламыз. Мәселен, мен мұнда бас есепші болып жұмыс жасаймын. Алайда бұған дейін бірнеше жергілікті шаруашылықтың түрлі бағытында жиған тәжірибемді қазіргі буынмен бөліскім келеді. Мәселен, себілген дән еш кедергісіз бас алуы үшін оған қандай күтім қажет, соның бәрін жас күрішшілерге үйретемін. Мұндағы қажырлы мамандардың жиған тәжірибесін көппен бөлісуге бейім тұрғанынан болар, ауылда өз жұмысын бастаған шаруашылықтың бүгінде шаруасы ширады, – дейді Абдолла Шалқымаев.Кейіпкеріміз науқан қорытындысымен “Қарабураның” биыл да оң нәтижеге қол жеткізгенін айтады. Сөйлетсең, дән сеппес бұрын жердің өзіне қандай күтім қажеттігін жетік білетінін аңғара қоясың. Мәселен, жерді күріш орылғаннан кейін бір сүдігерлеген абзал көрінеді. Көктемгі науқанға дейін екі рет жыртылған жерде келер жылы отақ аз болады. Ал мұндай алқапта жаз бойы бапталған өнімнің шығымы, һәм сапасы да жоғары болатыны сіз бен бізге аян.&nbsp;Әбекеңнің айтуынша, аталған шаруашылық жыл сайын еңбеккерлерге айлығынан бөлек қосымша сыйақы тағайындап жатыр екен. Былтыр ғана ауылда жұмысын бастаған жергілікті шаруашылық төрағасы Дастан Ержанов 2019 жылдың қорытынды науқанында бірнеше су жаңа темір тұлпар мен бірнеше миллион теңгені дала дарабоздарына үлестірген. Содан бері бұл сабақтастық үзілмепті. Бас есепші биыл да игі шара өз жалғасын табатынын айтады. Сондай-ақ ол дәстүрлі шара еңбеккерлер жұмысының жақсаруына оң ықпалын тигізетінін жеткізді.&nbsp;Абдолла Шалқымаевтың салада жеткен жетістігі мен алған марапатын тізе берсек, жазатын дүние көп. Бастысы ол мұндай атаққа емес, абыройға қызмет етті. Сөзінен ісі алда жүретін білікті маманның жастарға берер тағылымы мол. Өзі еңбек ететін шаруашылық жұмысы шираса, кейіпкеріміздің де көңілі тоқ.

Шаруашылық шаруасын ширатқан

<a href="https://kyzylorda-news.kz/">Kyzylorda-news.kz</a> Ғасырға жуық тарихы бар киелі Жалағаш жері бүгінде біршама жетістіктерге қол жеткізіп, дамуға бет алды. Әр салада ауыз толтырып айтарлықтай нәтиже бар. Әсіресе кәсіпкерлік саласы серпін алды деуге болады. Өйткені кәсібін дөңгелентіп, нәпақасын табамын деушілерге мемлекет тарапынан қолдау мен көмек дайын. Бұл үшін арнайы бағдарламалар жұмыс істеп тұр. Оның игілігін көрген кәсіп иелерінің қатарында кент тұрғыны Ғалияш Дастанқызы да бар.Жалпы түйе ертеде таптырмас көлік құралы болды. Тіпті адамзаттың ардақтысы пайғамбарымыздың дәуірінен ойсылқара төлі көлік ретінде қолданылды. Қазірде жүк тасуға мықты, шөлге төзімді түлік түрін көбінесе оңтүстік аймақтарда өсіреді. Түйенің жүні мен терісі табиғилығы жағынан да, сапасы жағынан да әлемдік нарықта жоғары бағаланады. Шет елдерде жеңіл өнеркәсіптің тізгінін қолға алғандар түйе жүнінен жасалған көрпелердің жылуды сақтайтынын о бастан-ақ білген. Нәтижесінде сол аталған «түйе көрпелерге» сұраныс жоғары.&nbsp;Дегенмен айта кететін бір жайт, түйе етіне деген сұраныстың жоғары болмауы. Бұған түйе етін жемейтін мемлекеттер мен сыртқы сауда-саттықтың деңгейін тілге тиек етуге болады. Түйе етін экспорттағаннан гөрі, шұбат пен қымыран өндірісін ұлғайтып, нарыққа шығарған тиімдірек. Сөзімізді түліктің бұл түрін өсірумен айналысатын әңгімеміздің кейіпкері де қолдап отыр.– Негізі ойсылқара төлін көбейту, оған күтім жасау оңай емес. Әйтсе де, түйе шаруашылығына мемлекеттен көрсетілетін көмек бар. Бұл кәсіп түрін дамытып, аудан халқын шұбатпен қамтамасыз етуде барынша сапалы қызмет істеудеміз. Кезінде мемлекеттік бағдарлама аясында алынған 4 бас түйе қазір көбейіп келеді. Жалпы түйе сүті емдік қасиеті жағынан аса жоғары бағаланады. Себебі оның құрамында май, ақуыз, минералдық заттар өте көп. Оның құрамындағы жеке компоненттер өзгермелі болып келеді, яғни түйенің сауылу кезеңіне, жыл мезгілдеріне, жақсы қоректендірілуіне, түр және тұқымдық ерекшеліктеріне қарай үнемі өзгеріп отырады. Ғалымдардың өзі айтады ғой, адам ағзасына қажетті емдік шөптердің дені шөл, құм далада өсетінін. Ал түйенің көбінесе шөлде, құмды жерде жүретінін білеміз. Климаты құрғақ жерде жүретін жануардың денесіне де сол аймақтың қасиеті сіңеді. Сортаң жердің түлігі түйенің шұбаты ми мен жүйке жүйесіне пайдалы, бауыр қабынуының алдын алатын, иммунитет көтеретін дәрумендерге бай. Ағзаны жақсарту мақсатында да саумал секілді түйе сүтін де ішеді. Құрамы макро және микро элементтерге бай шұбатты қазақтың халық емінде өкпе, асқазан аурулары және ағзаны қайта қалпына келтіру үшін де қолданады. Әсіресе шұбат түрлі өкпе дертінің барлық түріне шипа.Міне, шұбаттың да қымыз секілді денсаулыққа берер пайдасы мол. Оны білетін жалағаштықтар тарапынан түйе сүтіне сұраныс көп. Кәсібіміздің аясында халыққа пайдамыз тигеніне, емдік қасиетке толы шұбат өнімін өндіргенімізге және саланың дамуына үлес қосқанымызға қуаныштымыз. Алда әлі мақсат көп. Бұйыртса, кәсіп көкжиегін кеңейту жоспарда бар, – дейді кент тұрғыны Ғалияш Керейтбай.&nbsp;Кейіпкеріміз бұған дейін «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасы» бойынша төмендетілген пайызбен 4 млн теңге несие алған. Оған Арал қаласынан 4 бас ботасымен түйе малын сатып алған. Қазіргі таңда аталған кәсіптің бүге-шігесін үйреніп, түйе сауып, халықты шұбатпен қамтамасыз етуде. Күтімге алынған түйе малының барлығы күніне үш мезгіл сауылады. Сүт өнімі 20 литрді құрайды. Одан өндірілетін шұбат өнімі аудан халқына үлестіріліп, мемлекеттік бағдарлама аясында қолға алынған кәсіп түрінің өркендеуіне жол ашуда. Бағдарлама игілігін көрген Ғалияштың салаға серпін беру мақсатында алдағы жоспары да ауқымды.

Төрт түліктің төресін өсірген

<a href="https://kyzylorda-news.kz/">Kyzylorda-news.kz</a> Осыдан бірнеше жыл бұрын қолға алынған “Жаппай кәсіпкерлікті дамытудың “Еңбек” мемлекеттік бағдарламасы Жалағаш ауданындағы Жанасовтар әулетінің отбасылық бизнесін дамытуға үлкен көмек болған. Ағайынды Асылжан мен Батыржан бүгінде шағын кәсіпкерлікпен айналысып, тез дайындалатын тағамдар әзірлеу жұмысын жандандырып отыр. Қос азамат бір жағынан жеке табысын еселесе, келесі кезекте өңірде кәсіпкерлік саласының дамуына да өз үлесін қосуда.Мұндай өнімдер әзірлеу арқылы кәсібінің көкжиегін кеңейтуді Жанасовтар бұрыннан жоспарлап жүріпті. Десе де іс бастауға қолда бар қаржы жетпеген көрінеді. Осылайша кент орталығындағы жұмыспен қамту орталығының мамандары кеңесіне жүгінген ағайындылар арнайы жоба әзірлеу арқылы қайтарымсыз қаржыға ие болған.&nbsp;– Негізінен кәсіптің бұл түрімен бұған дейін де айналысып көргенбіз. Алайда жұмыстың алға басуына қолда бар қаржы жетіңкіремеді. Бір жағынан біз кәсіпорын орналасқан ғимаратты да жалға алған болатынбыз. Орталыққа құжат тапсырып, әзірлеген жобамызды қорғап шығуымыздың арқасында бүгінде жұмысымыз алға басып жатыр. Тапсырыс әзірге жаман емес. Әсіресе түскі және кешкі астың уақытында бізге көптеп тапсырыс түсіп жатады. Шама-шарқымызша олардың талабына сай өнім әзірлеп, уақытында жеткізіп беруге тырысамыз. Ісіміздің алға басуына мемлекеттік бағдарлама айтарлықтай көмек болды. Сондықтан мұндай бағдарлама әзірлеп, салаға серпін беруді мақсат еткен мемлекетімізге алғысымыз шексіз. Алда басқа да жоспарымыз бар. Бастысы, жұмыс алға басып жатыр, – дейді Жанасовтар әулетінің кенжесі Асылжан.Айта кетейік, осыған дейін аталған бағдарлама арқылы жұмыссыз азаматтардың кәсіп бастауына мемлекет мүмкіндік бергенін, оның қарапайым халық игілігін көргенін айтқан болатынбыз. Бір қуантарлығы, бүгінде оның игілігін жалағаштықтар да көріп отыр. Бір жағынан жұмыссыздықты ауыздықтауға бұл таптырмас мүмкіндік болса, келесі кезекте кәсіпкерлік саласының өңірде дамуына да оң ықпалын тигізуде.&nbsp;555 600 теңгеге ие болған қос кейіпкеріміз аудан орталығынан тез дайындалатын тағамдар әзірлейтін “ZHAN FOD” кәсіпорынын ашқан болатын. Орталықтың бүгінгі жұмысына қарап, іскер азаматтардың мол табысқа кенеліп отырғанын байқауға болады. 35-40 минуттық кәсіпкермен екеуара болған диалог барысында мұнда келушілердің қатары қалың екенін тағы аңғардық. Іскер азаматтар тек тапсырыспен ғана жұмыс жасаумен шектелмейді. Мұнда келіп тамақтанамын деген жандар үшін де жағдай жасалған. Орталық ішінде сыйымдылығы 24 адамдық асхана бар. Түскі астың уақытында мұнда отырған жалағаштықтардың да қатары көп.Бүгінде Жанасовтар мұнда донер, фри, пицца, суши, чикен, бургер сынды тез дайындалатын тағамдар әзірлеп жатыр. Асылжан мен Батыржан тапсырыс артқан сайын жұмысқа деген шабыттың ашылатынын айтады. Яғни олар күн сайын өз өнімдеріне деген тапсырыстың артуын әзірлеген тағамдарының сапасымен байланыстырады.&nbsp;– Тапсырыс артқан сайын біздің жұмыс жасауға деген құлшынысымыз арта түседі. Кәсіпкердің негізгі мақсаты жеке табысты еселеу болса, бұл ретте өз өніміңе деген сұраныс маңызды. Біз жұмыс барысында осыған аса мән береміз. Нәтижесі жаман емес, қазір мұнда әзірленетін өнімдерге сұраныс артпаса, кеміген емес. Бастысы, алға қойған мақсатымыз орындалып жатыр. Біз табысымызды арттыру мақсатында қолға алған жобамыздың жемісін көрсек, тұтынушылар сапалы өнімге қол жеткізуде. Алдағы уақытта кәсіпкерлік саласын қолдауға арналған мемлекеттік бағдарламалар арқылы кәсібіміздің көкжиегін кеңейту ойда бар, – дейді Асылжан Жанасов.Мұнда әзірленген өнімдерді кенттің кез келген елді мекеніне жеткізуге жағдай жасалған. Яғни Батыржан мұнда тағамдар әзірлеу ісін жандандырса, інісі оны астындағы көлігімен тұтынушыларға жеткізіп береді. Осылайша кәсіптің берекесін көріп отырған бір отбасының қос азаматы қолға алған жобасының нәтижелі болғанына қуанады. Әрине, бұл ретте мемлекеттік бағдарламаның іскер азаматтар жұмысының жандануына үлкен көмек болғаны анық.&nbsp;

Қазақстан және Қызылорда облысының жаңалықтары