<a href="https://kyzylorda-news.kz/">Kyzylorda-news.kz</a> Бүгінде «Грэпплинг» спорт түрі елімізде кеңінен танылуда. Оған дәлел барлық облыс, аудан орталықтарында грэпплинг үйірмесі жұмыс істеп, жасөспірімдерді аталған спорт түріне баулу қарқынды дамып келеді. Шиелі ауданында білікті бапкер Ербол Ермағанбетұлы арнайы грэпплингтен үйірме ашып, 3 жыл көлемінде тынымсыз еңбек етіп келеді. Нәтижесі де жаман емес. Әсіресе, мектеп жасындағы балалардың қызығушылығы артып, боз кілемде белдесудің қыр-сырын меңгерген жас өрендеріміз біршама белестерді де бағындырып үлгерді.Жуырда Алматы қаласында грэпплинг - тен «TURKIC WORLD CHAMPIONSHIP 2024» халықаралық турнирі өтті. Білектілер белдесетін жарысқа Өзбекстан, Қырғызстан, Тәжікстан, Беларус, Түркия, Бразилия елінен келген 1700-ге жуық спортшы өзара бақ сынап, жеңімпаздар анықталды. Көпшілік көз тіккен турнир бәсекесінде арнайы «SHIELI FIGHTERS TOP TEAM» командасының спортшылары да өнер көрсетті.&nbsp;3 күнге созылған байрақты бәсеке тартысқа толы болғанын айтқан жаттықтырушы, олжасыз оралмағанын жеткізді. Нәтижесінде, Нуриддин Ахметжан, Асылжан Әбіласқар, Дамир Рахымжан, Ерсаин Нариман, Алижан Әбіласқар, Диас Мұрат жауырыны жер иіскемей І орынды жеңіп алса, Ирина Павловұлы, Нұрдос Бақыт, Саят Рысбек, Заңғар Рысбек, Нұрсұлтан Ғайниев жүлделі ІІ орынды қанжығаласа, Мағжан Қайрат, Нұрислам Ғайниев халықаралық додада ІІІ орынды місе тұтты. Ерінбей еткен еңбек пен төгілген адал маңдай тердің босқа кетпегенін дәлелдеген жас спортшылар Алматының төрінде, Шиелі ауданының намысын абыроймен қорғап қайтты.

Шиелілік балуандар жүлдемен оралды

<a href="https://kyzylorda-news.kz/">Kyzylorda-news.kz</a>&nbsp; Өткен күнді айғақтайтын құжаттарды жинақтау, сақтау және жариялау архив қызметінің әрқашанда маңызды шараларының бірі. Өткенімізді білуді, оның анық-қанығына көз жеткізуді тек архив құжаттары ғана айғақтайды.Қармақшы аудандық архивте Ұлттық архив қорын тарихи маңызды жеке тектік құжаттармен толықтыру мақсатында тыл және еңбек ардагері, Қармақшы ауданының құрметті азаматы Жазықбай Нұржановтың жеке тектік құжаттары архив қорында сақталуда.Ол 1936 жылы Қармақшы ауданына қарасты Жамбыл колхозында шаруа отбасында дүниеге келді. Ұлы Отан соғысы аяқталғаннан кейін 1945 жылы №26 ( сол кездегі В.Молотов атындағы) қазақ орта мектебінің 1 сыныбына барып, оны 1955 жылы бітірген. Сол жылы күзде кеңес әскері қатарына алынып, 1959 жылға дейін әскери міндетін өтейді. Осы жылы Алматы зоотехникалық-малдәрігерлік институтына оқуға түсіп, оны 1964 жылы ғалым зоотехник мамандығы бойынша үздік бітіріп шығады.Еңбек жолын Қармақшы өндірістік басқармасының 1 август, 1964 жылғы 21/18 санды жолдамасына сәйкес, ауданда жаңа ұйымдастырылып жатқан Жаңақала совхозына №2 фермаға зоотехник болып қабылданады. Ауданнан шалғай орналасқан Жаңақала кеңшары жаңа құрылып жатқандықтан, жаңадан құрылған шаруашылықтардың, фермалардың &nbsp;құрылысын жүргізуге қыс қатты болғандықтан, ауылшаруашылық еңбеккерлеріне үлкен сын&nbsp;болды. Ай бойы қалың қар жауып, қатынас жолдарын басып қалды. Алайда жас зоотехник ұйымшылдықтың үлгісін танытып, табиғат қиындығын қажырлылықпен жеңіп шықты. Малдың аман сақталуы қамтамасыз етілді. Даладағы еңбек қаһармандарымен уақытпен санаспай бірге жүрді.Ж.Нұржанов өзіне жүктелген міндеттемелер мен жоспарды орындауда ұжымды жұмылдыра білді. Соның нәтижесінде ұжым бүкілодақтық және республикалық социалистік жарыстың бірнеше дүркін жеңімпазы атанды. СОКП Орталық комитетінің, КСРО министрлер кабинеті кеңесінің, ВЦСПС және БЛКЖО-ның ауыспалы Қызыл туларын, құрмет грамоталары мен дипломдарына ие болды. Сонымен қатар, бүкілодақтық халық шаруашылығы жетістіктері көрмесі мен республикалық құрмет тақтасына ілінді.1966 жылы аудандық ауылшаруашылық басқармасына шақыртылып, онда 1973 жылға дейін зоотехник-экономист болып жұмыс жасап, 1973 жылдан 1977 жылға дейін ауылшаруашылық өнімдерін дайындау және сапасы жөніндегі мемлекеттік инспекцияда инспектор, 1977 жылдан 1986 жылға дейін аудандық партия комитетінде нұсқаушы қызметін атқарса, 1986-1990 жылдары аудандық халықтық бақылау комитетінің төрағасы, 1991-1992 жылдар аралығында аудандық шаруалар одағының төрағасы, одан соң &nbsp;аудандық кеңес төрағасының орынбасары, 1994-2002 жылға дейін (сол кездегі шаруашылық есептегі) аудандық архивінің директоры қызметін абыроймен атқарған. Бірнеше рет аудандық кеңестің депутаты болып сайланды.&nbsp; &nbsp;Ауданның әлеуметтік-экономикалық, мәдени дамуына қосқан елеулі үлесі үшін 1958 жылы «Тың жерлерді игергені үшін» медалімен, 2010 жылы Тыл ардагері, 2015 жылы «1941-1945 жылдардағы Ұлы Отан соғысы жеңісінің 70 жылдығы» мерекелік медалімен, 2020 жылы «Қармақшы ауданының құрметті азаматы» медалімен марапатталған. Бүкілодақтық халық шаруашылығы жетістіктері көрмесінің жүлдегері атанды. Халық шаруашылығын дамытуда қай салада болсын үлкен жетістіктерге қол жеткізіп, жемісті еңбек етіп, жауапкершілікпен қиындығы қатар келетін жұмыстарды атқарып келді. Қазіргі таңда Жазықбай Нұржанов құрметті еңбек демалысында.Гүлжанат ӘБИЕВА,&nbsp; «Қызылорда облысының мемлекеттік архиві» КММ-нің Қармақшы аудандық филиалының &nbsp; &nbsp; &nbsp; архивисі<img src="https://knadmin.beoblood.kz/uploads/6e5c69dc_b232_4572_827d_1f0652aebf19_66a4a39959.jpg" alt="6e5c69dc-b232-4572-827d-1f0652aebf19.jpg">

Архив қорындағы құндылық

<a href="https://kyzylorda-news.kz/">Kyzylorda-news.kz</a> Өткен аптада Қармақшы ауданы әкімдігінде аудан әкімінің орынбасары Самат Смағұловтың төрағалығымен аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссиясының отырысы өтті. Оған комиссия мүшелері, құқық қорғау органдарының басшылары, мектеп директорлары, кент, ауылдық округ әкімдері қатысты.Отырыста күн тәртібіне сай «Бала еңбегін қанауға қарсы 12 күн» Ұлттық ақпараттық науқаны аясында атқарылған жұмыстар туралы» аудандық білім бөлімінің басшысы Гүлзира Абдазиева, «Демалыс кезінде балалар арасында су, өрт қауіпсіздігінің алдын алу шаралары туралы» аудандық төтенше жағдайлар бөлімінің бастығы Өмірбек Жаңабайұлының хабарламалары тыңдалды.Комиссияда 8-9 сынып оқушыларының жазғы демалысын тиімді ұйымдастырып, еңбекке баулуда мектепте көгалдандыру жұмыстарын жүргізу, ауылдық жерлерде шөп жұлу, келісім негізінде шаруашылық жұмысына атсалысу игі шаралары жүзеге асуда. Сондай-ақ кейбір мектепте ата-ана мен баланың бірге сенбілікке шығып, қоршаған ортаның тазалығына үлес қосу бастамалары да &nbsp;оң нәтижесін беруде. &nbsp;Жиында бала қауіпсіздігіне байланысты бірқатар ұсыныс-пікір айтылды. Жаз мезгілінде балалардың жол-көлік оқиғасына тап болмасы үшін, ата-аналардың мұқият болулары тапсырылды. Әсіресе электромопедтердің көптігі кімді болсын алаңдатуда. Жасөспірімдер мен балалардың жолда жүру ережелерін білмейтінін ескерсек, әлбетте бұл өте қауіпті әрі болмақ.Мәжіліс қорытындысында комиссия төрағасы жасөспірімдер арасындағы құқықбұзушылықтардың алдын алу және балаларды өрт, су, басқа да сәтсіздік оқиғалары, тосын жағдайлардан сақтандыру қауіпсіздігіне байланысты профилактикалық жұмыстарды күшейту мақсатында сала басшыларына үнемі назарда ұстап, нақты тапсырмалар жүктеді.

Қармақшыда маңызды мәселелер талқыланды

<a href="https://kyzylorda-news.kz/">Kyzylorda-news.kz</a> &nbsp; Қай мамандық, кәсіп болсын қоғамға өз пайдасын тигізетіні хақ. Заман ілгері дамып, уақыт көшімен дамудың сатыларынан өткен журналистика саласы да қазіргі күні қоғамда ерекше маңызға ие мамандықтардың бірі. Журналистика маңызды әлеуметтік құбылыстардың бірі болып табылатындығын ескерсек, онсыз қоғам өмірін көзге елестету мүмкін емес. Сондай-ақ бұл салада талапты жастардың қатары аз емес.&nbsp; Аудан айнасына мақала ұсынатын оқушылар көп болмаса да, талаптылар бар. Солардың бірі – жаңажолдағы мектептің жас түлегі Маржан Қылышбек. Жуырда мектепті тәмамдаған ол журналист болуды мақсат тұтқан. Осы мамандық иесі болуды бала кезінен армандапты.<blockquote>– Бұл мамандықты бала күнімнен қаладым.&nbsp;Сол сәттен бастап журналистика мамандығын зерттеп келемін. Кейде басқа мамандыққа ауысуды ойлағаныммен бала күнгі арманымнан бас тарта алмадым. Жалпы журналист деген ұғымды мен ақпарат деп түсінемін. Кейде маған бұл мамандықтың болашағы жоқ деп айтып жатады. Неге болашағы жоқ деп ойлайды? Керісінше болашағынан көп үміт күттірер мамандықтың бірі. Себебі, әлемді ақпаратпен қамтамасыз етіп отырған журналистер. Осы мамандық арқылы жарық жұлдыз болсам деймін. Таңдаған мамандығыма байланысты шығармашылық&nbsp;ҰБТ-ның І кезеңін тапсырдым, 30 ұпайдың 25 ұпайын жинадым. Енді ІІ кезең бар. Одан&nbsp;30 ұпай жинасам деп отырмын. Содан кейін шығармашылық емтихан бар. Емтиханды университетке барып тапсырамын. Таңдап отырған білім ордам – Алматы қаласындағы Тұран университеті. Бұл жеке оқу ордасы болғандықтан грантқа көптеген мүмкіндік ашып отыр. Мен білетін мықты тұлғалар осы университетті тәмамдаған. Сондықтан таңдауым осы білім ордасына түсті. Мен де осы өзім үлгі тұтатын жандар секілді журналистиканың, еліміздің дамуына үлес қоссам деймін, – дейді талапты жас.</blockquote>&nbsp; Иә, жас болса да толғамды тақырыптарға қалам тербеп &nbsp;жүрген Маржанның талабы таудай. Жазуды жаны қалап тұрған ол мамандығын тереңірек түсінгісі келеді. Редакция қорына мақаласын ұсынып, ол газет бетіне шыққанынша тағатсыздана күтетін жас енді өзі де осы саланың маманы атанбақ. Осы ретте қалам тербеуіне қарымды үлес қосып, шабыт сыйлай білген ұстаздарына да алғысы шексіз.<blockquote>&nbsp; – Қоғамның түрлі өзгерістеріне назар салып, мақалалар жазатын да – тілшілер. Оны әр оқырманның жүрегіне ұялата білудің өзі таптырмас өнер. Мамандық атаулының қай-қайсысында болсын артық не кем тұстары кездесіп тұратыны баршаға мәлім. Сол секілді мен де таңдаған мамандығымның &nbsp;әлі де болса&nbsp;толық ашылмай қалған сырларын ашып, болашақта ғылым саласына үлес қоссам деймін. Тілшілердің қоғамдағы маңызы, алатын орны зор деп ойлаймын. Себебі, олар әрдайым жаңалықтар төңірегінен табылып, өмірінің жартысын күнделікті өз жұмысына адал қызмет етіп, назарынан еш нәрсені құр қалдырмауға тырысатын мамандық иелері. &nbsp;Олар халықпен тығыз байланыста бола отырып, ақпараттың нақты дереккөз &nbsp;арқылы жетуіне ден қояды. Олар тынымсыз еңбек пен ерінбейтін жанкештіліктері арқасында халқын хабардар етеді. Халықтың күнделікті қолданатын қарапайым жиһазына айналып кеткен теледидардың сәні мен мағынасын да тілшілер ашып, шырайын келтіріп тұрады. Олар болмаса халықтың тыныс-тіршілігінің өзі қандай боларын кім білсін? Бұл мамандыққа үйір болуымның басты себебі – &nbsp;мінезіммен ұштасуы. Жанымдағы құрбы-құрдастарым, ата-анам мінезімнің осы мамандыққа сай екендігін жиі айтады. Осы сөздер маған ой салады, ой елегінен өткізе келе келешегімді осындай, өзім жаныммен жақсы көретін мамандық – тілшілікке арнаймын деп шештім. Осы уақытқа дейін бірнеше мақалам баспасөз беттерінде жарық көрді. Алдағы уақытта да аудан айнасымен байланысымды үзбеймін. Менің таңдаған мамандығым мені адастырмайтынына сенемін, – дейді талапты жас.</blockquote>

Тілшілікке талапты жас

Тұранның жер бесігі Барсакелмес

<a href="https://kyzylorda-news.kz/">Kyzylorda-news.kz</a> &nbsp;Сырдария ауданына қарасты Ақжарма ауылдық округінде 2800 адам 519 отбасында тұрады. Ауыл тұрғындарына &nbsp;мектеп, балабақша, емхана, мәдениет үйі, спорт кешені өз дәрежесінде тиісті қызметін көрсетуде. Ақжарма ауылдық округінің әкімі Е.Ешмұратовтың айтуынша өткен жылы бюджет 117,602, 7 млн теңге болып бекітілген. Жыл соңында қаржы 100 пайыз игерілген. Салық бойынша түсімдер – мүлік, жер, көлік, біріңғай жер салығы, табыс, заңды тұлғалардың көлік салығы, мүлікті жалға беру, жер пайдаланған жалдау ақысы 9 233400,0 млн теңге болып, 103,8 пайыз болып орындалған.Елдімекен бойынша 11 отбасына&nbsp;мемлекеттік жәрдем ақы тағайындалған. Жұмыссыздық есебінде тұрған 61 адам қоғамдық жұмысқа, "Күміс жас" бойынша 1 адам, жастар практикасымен 13 адам тартылған. Ауылға жалпы құны 3,9 млн теңгеге тұрмыстық қатты қалдықтар полигоны салынып, көлемі 2 гектар жер темір қоршаумен қоршалған. Жеке үй шаруашылықтарында мал саны: мүйізді ірі қара – 2280бас, уақ мал – 2087 бас, жылқы – 2008 бас, құс&nbsp;– 1653 бас.Мемлекеттік бағдарламалар аясында "Іскер" Аграрлық несие корпорациясы арқылы "Нұрсерік" ш/қ, "Ызакөл" ш/қ мал шаруашылығын дамытуға және "Ақжарма және К" фермерлік қожалығы егін шаруашылығы жобасы бойынша қаржыланған. Сонымен қатар, "Өңірлік инвестициялық орталығы" МҚҰ арқылы жеке кәсіпкерлер "Нұрым", "Аябек" және "Ахмедияров" жылқы малын бордақылау және көбейту жобасымен қаржыланған.Ауыл тұрғындары А.Советов, Г.Тәуекелова, Э.Ахметова, Г.Иманбай, Н.Сатанова, А.Сейілханова бұзаулы сиыр алу үшін және А.Сүлейменова кондитерлік өнім өндіруге қайтарымсыз 1 млн 380 мың теңге грант алған. Мұнан басқа, "Іскер" бағдарламасымен "Аграрлық несие корпорациясы"АҚ &nbsp;бірнеше кәсіпкер мал шаруашылығына несие алған. Ауылда 21-35 жас аралығындағы жастарға арналған 2,5 пайыз несие бойынша 10 жоба мақұлданып жастардың өз бизнесін бастауына мүмкіндік алған. Сонымен қатар, "Ауыл аманаты" және "ҚазАгроҚаржы"Ақ арқылы ауылшаруашылығы техникалары мен құрал-жабдықтарын алуға 6 кәсіпкердің жобасы мақұлданған.Ауылдық округте тұрғындардың таза ауызсу тұтынуы үшін 2015 жылы су құбырлары түгел тұрғын үйлеріне кіргізілген. Ауылдағы электр желілері 2017 жылы толығымен бағаналар мен трансформаторлар ауыстырылған. Соңғы 3-4 жылдың көлемінде "Ауыл ел бесігі" бағдарламасы арқылы республикалық бюджеттен ауыл ішінің көшелері жөнделіп, жарық шамдар орнатылған. Аяқсу мәселесі бойынша өткен жылы 1 дана СНП-500 электрлі насос "Дәулетарық" каналына, 1 дана дизельді насос "Ақжарма" каналына қойылып, ауылға аяқсу толығымен берілуде.Елдімекенде ұрлықтың және оқыс оқиғалардың алдын алу үшін ауылға кіре беріс жолмен, көшелерге 9 дана бақылау камералары орнатылған.Ақжарма ауылын газдандыруға байланысты "Ақжарма-2" шаруа қожалығының демеушілігімен жобалық-сметалық құжаты дайындалған. Ауыл орталығында орналасқан тозығы жеткен спорт алаңын осы шаруа қожалығының демеушілігімен жасанды төсенішін жаңалау жұмыстары жүргізілген. Бүгінде орталық көшелерге жаяу жүргінші жолдарын салу жұмыстары жоспарланған.

Сырдарияда бақылау камерасы орнатылған ауыл

<a href="https://kyzylorda-news.kz/">Kyzylorda-news.kz</a>&nbsp; «Тазалық – табалдырықтан басталады», демекші қоршаған ортаның тазалығына жауапкершілікпен қарау – әрбір азаматтың басты міндеті.&nbsp;Сенбіде Қармақшыда Мемлекет басшысының тапсырмасына сәйкес, «Таза Қазақстан» республикалық экологиялық акциясы аясында санитарлық-тазалық жұмыстары барлық кент, ауылдық округ аумағында жалғасты.Сенбілік жұмыстарына бір кісідей қатысқан барлық мекеме қызметкерлері өздеріне бөлінген аймақтардағы көшелер мен жол жиектерін, арықтар мен әлеуметтік нысандардың айналасын күл-қоқыстан тазартып, абаттандыру жұмыстарын жүргізді.Тазалық жұмыстарына 14 елді мекеннен 120 мекеме қызметкерлері жұмылдырылып, барлығы 1230 адам және 16 техника қатысып, 9,3 тонна күл – қоқыспен, тұрмыстық қалдықтар арнайы орындарға шығарылды.Табиғат тазалығы – халық саулығы екенін ескерсек, айнала қоршаған ортамызды, табиғатты таза ұстау – баршамыздың азаматтық парызымыз.&nbsp;Тазалығымен ерекшеленген қандайда бір көрініс жанға жылу берері анық.&nbsp;Осы ретте, аудан тұрғындары айналамызды, өз аумағымызды таза ұстап, туған жерімізді көркейту-көгалдандыру жұмыстарына немқұрайлы қарамаса екен дейміз.&nbsp;Туған өлкенің тазалығын қадағалау әрбір тұрғынның азаматтық парызы екенін естен шығармайық.<img src="https://knadmin.beoblood.kz/uploads/a4329edb_bbab_4da6_877a_56b16c23ffd6_29f34fd1fb.jpg" alt="a4329edb-bbab-4da6-877a-56b16c23ffd6.jpg">

Қармақшыда «Таза Қазақстан» экологиялық акциясы жалғасуда

<a href="https://kyzylorda-news.kz/">Kyzylorda-news.kz</a> Бүгін&nbsp;Сырдария аудандық қоғамдық даму бөлімінің тапсырысы аясында "Алғыр ой" коммерциялық емес жеке қорының ұйымдастыруымен мүмкіндігі шектеулі жастар арасында зіл темір көтеру және 100 метрге жүгіру бойынша спорттық сайыстар өтті.Спорттық&nbsp;іс-шараның негізгі мақсаты&nbsp;– мүмкіндігі шектеулі жастардың өмірге деген құлшынысын арттыру, спортпен айналысуға шақыру болып табылады.<blockquote>–&nbsp;Сайыс өз дәрежесінде&nbsp;тартысты өтті.&nbsp;Барлық спортшылар жақсы дайындықпен келген. Қызықты өткен сайыстың қорытындысы бойынша бірнеше спортшы жүлделі орындардан көрінді. Атап айтқанда, 100 метрге жүгіру сайысында Ақнұр Қазтаева жүлделі III орын, Айдос Сейтжанов жүлделі II орынды иеленсе, Нұржан Қаратаев жүлделі I орынды еншіледі. Сонымен қатар, &nbsp;зіл темір көтеру сайысында Асқар Тілектесов жүлделі III орынды, Нұрлан Кәлекеев жүлделі II орын және Бауыржан Пірманов жүлделі I орынорынға ие болды. Мұндай сайыстар алдағы уақытта да өз жалғасын табатын болады. Барлық марапат иелерін құттықтаймын!,&nbsp;– дейді Сырдария аудандық жастар ресурстық орталығының маманы Нұржан Сейтжан.</blockquote>Жарыс соңында сайысқа қатысушыларға арнайы дипломдар мен қаржылай сыйлықтарымен марапатталды.

Сырдарияда спорттық сайыс өтті

<a href="https://kyzylorda-news.kz/">Kyzylorda-news.kz</a> Сырдария ауданына қарасты Қалжан ахун ауылдық округі бүгінде қарқынды дамып келе жатыр. &nbsp;Ауылдық округ бойынша 210 отбасында 1135 халық тұрады. Оның ішінде 2 тыл ардагері, 120 зейнеткер, 48 мүгедек, &nbsp;21«Алтын алқа» және 23«Күміс алқа» иелері бар. &nbsp; Берекелі ауылдың 5 айында атқарылған ілкімді істер мен жүйелі жұыстар жайлы бойынша ауылдық округі әкімі Ғалымжан Әкбаров айтып берді.Биыл облыстық бюджеттен бөлінген –&nbsp;153 млн теңгеге Қайқы батыр көшесі күрделі жөнделіп, жаяу жүргіншілер жолы салынды7 Мердігер "Орда автодор" ЖШС. &nbsp;«Ауыл – Ел бесігі» бағдарламасы аясында ауылдың электр желілерін қайта жаңғырту жұмыстары басталды. Жоба құны 485,9 млн теңге. Мердігер «ҚЭТТК» АҚ. Мұнан бөлек, елді мекенде тұтыну қалдықтарын қоршаған ортаға зиянды әсерін тигізбеу мақсатында өндіріс және тұтыну қалдықтарын орналастыру мен жою жөніндегі объектілерді (полигон) салу үшін жалпы көлемі 2 га болатын жер учаскесі таңдалған. Ауылда орналасқан шаруашылықтардың демеушілік есебінен жерді тегістеу жұмыстарын жүргізуде.Биылғы жылға арналған қаржыландыру жоспары бойынша 250 млн 841 мың теңге болып нақтыланды, 2024 жылдың 5 айына жоспарланған 179 млн 322 мың теңге 100 пайызға игерілді. Сонымен қатар, жеке тұлғалардан алынатын мүлік салығы жоспары 12,0 мың теңге болса, орындалуы 17,3 мың теңге 145 пайызға, көлік құралдары салығы жоспары 1 млн 600 мың теңге орындалуы 1 млн 583 мың теңге &nbsp;98,9 пайызға болып орындалды.Білім саласы бойынша&nbsp;биылғы 2023-2024 оқу жылында мектептегі 2 даярлық сыныбында 24 бала тәрбиеленуде. Оқу жылында мектептегі сыныптар саны – 16, оқушылар саны – &nbsp;224. Оқушылар екі ауысымда оқиды. Бірінші ауысымда – 134 оқушы, екінші ауысымда – 90 оқушы білім алды.&nbsp; Биылғы оқу жылында 16 оқушы мектеп бітіріп, 12 оқушы Ұлттық бірыңғай тестілеуге қатысуда.&nbsp; Мектептегі жалпы мұғалімдердің саны – 50. Оның ішінде &nbsp;54 мұғалім жоғары білімді, 6-уы арнаулы орта білімді. Мектеп толық педагог мамандармен қамтылған. Мұғалімдердің біліктілік санаттары бойынша 8 мұғалімде педагог-зерттеуші, 15 мұғалімде педагог-сарапшы, 17 мұғалімде &nbsp;педагог-модератор біліктілік санаты бар.«Гүлдер» бөбекжай балабақшасы» коммуналдық мемлекеттік қазыналық кәсіпорны барлығы 2-5 жас аралығында 3 топпен 70 бала қабылданып, тәрбиеленуде. Балабақшаның штат бірлігі 17,5. Қызметкерлер саны -23 &nbsp;Педагогтар саны-12 оның &nbsp;ішінде жоғары білімді мамандар саны-10, Модератор санатында 3 педагог, сарапшы санатында 4 педагог жұмыс жасайды.12 техникалық қызметкер жұмыс істейді.Денсаулық саласы бойынша&nbsp;Қалжан ахун фельдшерлік акушерлік пунктінде 3 орта буын қызметкері халыққа қызмет көрсетеді. Қаралған науқас саны – 1165, үйде қаралған науқас саны – 551.&nbsp; Ал, мәдениет саласына келетін болсақ,&nbsp;клубта 5 үйірме жұмыс жасайды, оған 56 өнерпаз тартылған. 2024 жылдың 5 айында 17 шара өткізілді, жалпы көрермен саны – 1348.&nbsp;Кітапханада 22840 кітап қоры, 677 оқырманы &nbsp;бар және 8 орындық оқу залы бар. Жыл көлемінде көркем әдебиеттер мен балалар әдебиеттерін насихаттау тақырыптары бойынша 15 мәдени шара өткізілді.Ауыл шаруашылығы саласында&nbsp;ауылдық округ бойынша осы жылдың 1 қаңтарына ауыл тұрғындары мен шаруа қожалықтарының есебінде 781бас ірі қара, 797 бас уақ мал, 636 бас жылқы және 432 бас құс тіркелген.Ауылда 475 экономикалық белсенді халық тіркелген. Жұмыссыз ретінде тіркеуге алынған 64 адамның 11-ы тұрақты жұмысқа, 23-ы ақылы қоғамдық жұмысқа, 2-і жастар тәжірибесіне, 1-і алғашқы жұмыс орнына, 3-і Күміс жас &nbsp;жобасына жолданды. Сонымен бірге 8 отбасының 40 мүшесіне атаулы әлеуметтік көмек алуға құжат тапсырып, қаржылай және азық-түлік пакеттері көмегін алды.&nbsp;Кәсіпкерлік саласы бойынша&nbsp;кәсіпкерлер субъектілерінің саны – 109, оның ішінде: жеке кәсіпкерлер – 92, шаруа қожалықтары – 17. Жұмыс жасап тұрғаны – 96. «Бизнестің жол картасы» бағдарламасымен11 млн.теңгені құрайтын «Сауда қызметін кеңейту» қаржыландырылды. Жоба үйлестіруші ЖК «Жакенова».2021-2025 жылдарға арналған кәсіпкерлікті қолдаудың ұлттық жобасы аясында &nbsp;жаңа бизнес-идеяларды іске асыруға арналған мемлекеттік грант бойынша 2 жоба 2,6 млн теңгеге қаржыландырылды.

Қалжан ахун ауылында электр желілерін қайта жаңғырту жұмыстары басталды

<a href="https://kyzylorda-news.kz/">Kyzylorda-news.kz</a>&nbsp; Сырдария аудандық кәсіпкерлік және өнеркәсіп бөлімінің басшысы Алмат Сәдуақасов өңірімізде бизнес-климатты жақсарту, кәсіпкерлердің заңды мүдделерін қорғау, бизнес ортада әкімшілік кедергілерді және сыбайлас жемқорлық қауіптерін жою мақсатында атқарылған іс-шаралар барысын хабарлады.<blockquote>– Бұл бағытта және өңірлік бизнестің қарқынды даму үдерісіне мемлекеттік және өңірлік бағдарламаларының ықпалы сөзсіз, – деді бөлім басшысы.</blockquote>&nbsp; Қазіргі таңда жеңілдікпен несиелендіру құралдары едәуір нығайтылып, қаржыландыру тетіктері барынша жеңілдетілді.2024 &nbsp;жылдың &nbsp;1 маусымына&nbsp;Сырдария &nbsp;ауданы бойынша 2730 кәсіпкерлік субъектілері &nbsp;тіркеліп, жұмыс &nbsp;жасап &nbsp;тұрған ШОБ&nbsp;субъектілерінің &nbsp;саны 2645 құрады. Жұмыс &nbsp;жасап тұрған &nbsp;кәсіпкерлік&nbsp;субъектілерінің &nbsp;саны &nbsp;тіркелгендердің &nbsp;96,9 пайызын құрауда. &nbsp; &nbsp;Жалпы 2024 жылдың 5 айында Сырдария ауданында мемлекеттік және өңірлік бағдарламалар аясында құны 1172,0 млн. теңгені құрайтын 63 жобаға қаржылай қолдау көрсетілді.Атап айтқанда, «Бірыңғай кешенді бағдарламасы» аясында несиелендіру бойынша құны 675,9 млн.теңгенің 13 жобасы екінші деңгейлі банкттер тарапынан қаржыландырылды. «Микробизнес-Қызылорда» бағдарламасы бойынша құны 28,0 млн. теңгенің 7 жобасы кеңестің оң шешімін алып, қаржыландырылды. Аграрлық несие корпорациясы арқылы «Іскер» бағдарламалары бойынша 198,5 млн.теңгенің 25 жобасы және «Кең дала» бағдарламасы бойынша 18,0 млн.теңгенің 3 жобасы қаржыландырылды.«ҚазАгроҚаржы» АҚ-ның Қызылорда филиалы арқылы аудандағы құны 251,6 млн. теңгеге 15 ауылшаруашылық техникалары мен құрал-жабдықтары алынды.Одан әрі бөлім басшысы 2024 жылға арналған сыбайлас жемқорлыққа қарсы күрес іс-шараларының жоспарының орындалуын айтты.<blockquote>– 2024 жылдың 8 қаңтарда бекітілген іс-шаралар жоспары 8-тармақтан тұрады. Іс-шаралар жоспарына сәйкес аудандық «Тіршілік тынысы» газетінің 2024 жылдың 13 сәуірдегі №29 (9249) шығарылымында «Сыбайлас жемқорлыққа төзбеушілік – қоғам қажеттілігі» авторлық мақала жарияланды. Ағымдағы жылдың маусым айында «Аманат» партиясының ғимаратында «Ашық есік»&nbsp;қоғамдық қабылдау акциясы өткізіліп,аудан тұрғындарына несие, грант мәселесі бойынша түсіндірме жұмыстары жүргізілді.</blockquote>Сонымен қатар, жыл басынан бері бөлімде 24 жеке қабылдау өткізілді. Оның ішінде 13-і несие алу, 2-і көрмеге қатысуға, 8-і қайтарымсыз грантқа қатысуға және 1-і әлеуметтік кәсіпкердің мәртебесін алу мәселесі бойынша жүгінді. Нәтижесінде осы жеке қабылдауға келген азаматтың 5-і қаржылай қолдауға ие болды.2024 жылы «Сыбайлас жемқорлыққа қарсы күрес туралы» Заңына түсіндірме жүргізу мақсатында бөлім қызметкерлері арасында ай сайын құқықтық оқыту жұмыстары өткізіліп, бөлімнің Facebook парақшаларына тұрақты жариялануда.2024 жылдың 01-29 ақпаны аралығында сыбайлас жемқорлық тәуекелдерін ішкі талдау нәтижелері бойынша анықталған сыбайлас жемқорлық құқық бұзушылықтар жасауға ықпал ететін себептер мен жағдайларды жою жөніндегі іс-шаралар жоспарына сәйкес 3 (үш) ұсыным жасақталды.1. Мекеменің Ережесіне өзгерістер енгізу арқылы Бөлімнің құзыреттілігіне кірмейтін функцияларды алып тастау туралы ұсынымға сәйкес тиісті жұмыстар жүргізіліп, нәтижесінде ағымдағы жылдың 8-сәуірде Ереже қайта бекітілді. (Ережеден сараптаманы, туризм салаларын алып астау);2. 2024 жылдың 10 сәуірінде ҚР мемлекеттік қызмет істері агенттігінің Қызылорда облысы бойынша департаменті басшысына ҚР Президентінің 2015 жылғы 29 желтоқсандағы №152 Жарлығының&nbsp;82-тармағына өзгерістер енгізу жөнінде. (Мемлекеттік қызметші тәртіптік жаза қолданылған күннен бастап кем дегенде үш ай ішінде күшінде болуы)3. Облыстық кәсіпкерлік және өнеркәсіп &nbsp;басқармасының басшысына «Мемлекеттік қолдауға жататын жеке кәсіпкерлік субъектілері қызметін жүзеге асыратын экономика салаларын мемлекеттік қаржылай қолдау қағидаларын, нысандарын бекіту туралы» бірлескен бұйрығына өзгерістер мен толықтырулардың енгізілуіне ықпал етулері туралы &nbsp;ұсыныс хатр жолданды.Әлеуметтік кәсіпкерлік тізіліміне еңгізілген кәсіпкерлік субъектілері мен "Бір ауыл – бір өнім" бағдарламасының финалистерімен қатар, шағын кәсіпкерлік субъектілерінің, оның ішінде әлеуметтік осал топтарына жатқызылатын санатын қоса алғанда грант іріктеуіне қатысу мүмкіндігін қосу арқылы талаптарына өзгерістер мен толықтырулардың енгізілуі;2024 жылдың 30 мамыр күні "Халық заңгері" республикалық акциясы аясында Тереңөзек кентінің мәдениет үйінде қоғамдық қабылдауға қатысып, аудан кәсіпкерлері мен тұрғындары тарапынан жеңілдетілген несие, қайтарымсыз гранттар және нысандарды заңдастыру туралы сауалдар қойылып, 8 азаматқа түсіндірме жұмыстары жүргізілді, – деді Алмат Сәдуақасов.Бөлімде жеке және заңды тұлғалардың арызы мен шағым хаттарына арналған пошта жәшіктерімен сенім телефонына жауапты маман бекітілген.Сондай-ақ, мекеменің кіреберіс алдына және сауда орындарында «Пара беру бостандықтан айырады және бұлыңғыр болашақ» және «Антикор онлайн режимінің» QR код &nbsp;парақшалары ілінген.Фото: egemen.kz

Сырдария ауданында мемлекеттік бағдарлама аясында 63 жоба қолдау тапты

<a href="https://kyzylorda-news.kz/">Kyzylorda-news.kz</a> Әділдіктің ақ туын көтеріп, заң алдында адамның бәрі бірдей екенін ұқтырып жүрген білікті мамандар көп. Солардың бірі – Забира Абылайқызы. Бүгінде Қызылорда облысының кәмелетке толмағандардың істері жөніндегі мамандандырылған ауданаралық сотының судьясы болып қызмет атқаратын оның бойында адамдық пен мамандыққа адалдық әр кез көрініс тауып тұрады.Кішкентайынан заңгерлік салада еңбек етуді армандаған Забира Абылайқызы – Қорқыт ата атындағы Қызылорда педагогикалық институтының құқықтану және заңгер оқытушы мамандығы бойынша үздік түлектерінің бірі. Сонымен қатар қазақ мемлекеттік заң университетінің «Сот-прокурорлық» факультетінің сырттай бөліміне түсіп, 2011 жылы қазақ мемлектеттік заң академиясының «заңгер» мамандығын аяқтады. Бүгінде аталған салада 1998 жылдан бері жұмыс істеуде. Алдымен Қызылорда қалалық Тасбөгет аумақтық сотының сот хатшысы қызметіне қабылданса, кейіннен Қызылорда қалалық сотының сот хатшысы болды. Ал 2000 жылдың қараша айында бас маман қызметін атқарды. 2014 жылы 29 тамыздағы Қазақстан Республикасы Президентінің жарлығымен Қызылорда қалалық сотының судьясы болып еңбек етті. Бүгінде ол – кәмелетке толмағандардың істері жөніндегі мамандандырылған ауданаралық сотының судьясы.<blockquote>– Осы тұста балаларды тәрбиелеуге байланысты істердің санаттары бойынша жай-күйді тексеру актісінің қандай да бір әзірленген бірыңғай нысаны жоқтығын атап өту қажет. Негізі, тәрбиелеуге қатысты мәселелердің бар-жоғын анықтайтын зерттеу қорғаншы органмен тексеруді жүргізетін тұлғалар, оның мерзімдері, нақты сұрақтардың көлемі мен мазмұны көрсетіліп белгіленген нысанда жүзеге асырылуы тиіс. Осылайша, қамқоршылық органдары қызметінің белгілі бір критерийлерінің және шешім қабылдауда, қорытынды беруде бірыңғай тәсілдердің болмауы түйткілді мәселелердің бірі болып отыр. Егер ювеналды әділет саласы проблемаларды о бастан, яғни туындау кезеңінде шешіп, ең бастысы баланы сотқа дейін жеткізбеу мақсатында кешенді жұмыс істесе, нәтиже шынымен де қанағаттанарлық болар еді деп ойлаймыз. Кәмелетке толмағандар үшін сот төрелігі тұлғаның одан әрі криминализациялауына жол бермеуі, баланың әлеуметтен алыстауына емес, әлеуметтік сауықтыруына ықпал етуі тиіс. Мұндай тәсіл қылмыскерді емес, толыққанды азаматты қажет ететін қоғамға тиімді. Бұл ретте құқық бұзушылыққа қарағанда құқық бұзушы тұлғаның өзі маңызды деген ұғым ювеналдық әділеттің негізгі қағидасы болғаны абзал. Әрине, шынайы ювеналды әділет құру – оңай шару емес. Қазіргі кезеңде ювеналды әділет жүйесін одан әрі нығайту үшін жүйелі түрде судьяларды, прокурорларды, адвокаттарды оқыту сапасын жақсарту, әлеуметтік, психологиялық қолдау және пробация қызметтерін дамыту қажет. Кәмелетке толмағандардың құқықарына қол сұғатын құқық бұзушылықтар көбінесе ата-аналар тарапынан тәрбиенің тиісті түрде берілмеуінен туындайды, – дейді саладағы мәселелерге пікірін білдірген тәжірибелі маман.</blockquote>«Ел болам десең, бесігіңді түзе» деген батыр Баукеңнің сөзін қаперде алатын Забира Абылайқызы осы күні қызметте абыройлы, отбасында адал жар, аяулы ана. Ал өмірде мамандық таңдауда жаңылыспағанын айтқан ол жетістікке жетуі де соның арқасы екенін жеткізді.<blockquote>– Алдыңа мақсат қойып, сол биікке жетемін деп талпынсаң, ниет қылсаң, барлық кедергілер өздігінен жоғалады. Қызмет жолымда да балалардың болашағына алаңдаймын. Солардың әрбір сәтте дұрыс жолда жүріп, тағдырына балта шабылмағанын қалаймын. Өмір болған соң бәрін де көресің. Бірақ біз балалардың шалыс қадам баспауын ойласақ, түбінде соған бағытты жөндеп беруіміз керек, – дейді судья.</blockquote>Кейіпкеріміз кабинетінен шығып, сот отырысына жылдам басып барады. Иә, ол жаққа барғанша оның ойында тек бір ғана нәрсе: қаралатын істің бала тағдырына теріс ықпал етпесе екен дейді. Темірдей тәртіпке негізделген салада жүрегі жұмсақ, жаны жайсаң жандар көп. Тек оларды көре білу керек. Забира Абылайқызы – осындай жан…Аян СПАНДИЯР

Забира Абылайқызы: Балалардың тағдырына алаңдаймын

<a href="https://kyzylorda-news.kz/">Kyzylorda-news.kz</a>&nbsp; Мемлекет тарапынан агроөнеркәсіп кешеніне көрсетіліп жатырған қолдаудың нәтижесінде Сырдария ауданының ауыл шаруашылығы саласы тұрақты даму үрдісіне ие болып отыр. Бұл жайында Сырдария аудандық ауыл шаруашылығы және жер қатынастары бөлімінің басшысы Қанат Нұрсейіт айтып берді.Агроөнеркәсіп кешені мен жер қатынастары саласында барлығы 15 мемлекеттік қызмет көрсетіледі. Ауыл шаруашылығы және жер қатынастары саласы аясындағы мемлекеттік қызмет көрсетудің бизнес-үдерістері оңтайландырылып және белгілі бір автоматтандыру бағытына көшіп, Е-лицензия жүйесі арқылы электронды түрде қабылдануы басты назарда және электронды түрде көрсетілуде.Қазақстан Республикасы Ауыл шаруашылығы министрінің 2020 жылғы 1 қазандағы № 301 бұйрығына сәйкес, жергілікті атқарушы органдар көрсететін 15 мемлекеттік қызметтің 13-ы электрондық форматқа көшті.ҚР «Мемлекеттік қызмет көрсету» Заңына сәйкес 2023 жылдың қорытындысы бойынша бөлім тарапынан 922 астам мемлекеттік қызметтер көрсетілген болса, 2024 жылдың 5 айында 372 қызмет көрсетілді. Мысалы: Е-лицензия арқылы «Жер учаскелерін қалыптастыру жөнінде жерге орналастыру жобаларын бекiту» бойынша – 133 өтініш өнделсе, «Iздестіру жұмыстарын жүргізу үшiн жер учаскелерін пайдалануға рұқсат беру» &nbsp;бойынша 10 өтініш электронды нұсқада өнделіп, мемлекеттік қызмет көрсетілген.Қазіргі таңда ауданның жер қоры 4 260 635 гектарды құрап отыр, оның ішінде ауданның негізгі әкімшілік аумағының көлемі – 2 904 533 гектар болса, 1 356 102 гектарын Ұлытау облысы, Ұлытау ауданынан ұзақ мерзімді пайдалануға алынған жер құрайды.Аудан бойынша жер учаскелерін ауыл шаруашылығы мақсатында айналымына енгізу жұмыстары бойынша 2024 жылы жалпы көлемі – 7600,77 гектар болатын 14 жайылымдық жер учаскесі шалғайдағы маусымдық жайылымдар мал шаруашылығы үшін 5 жыл мерзімге уақытша өтеусіз жер пайдалану құқығымен азаматтарға табысталып, ауданның босалқы жерлері санатынан ауыл шаруашылығы айналымына енгізілді.Сыбайлас жемқорлыққа қарсы мәдениетті қалыптастыру бойынша бөліммен Сыбайлас жемқорлыққа қарсы іс-қимыл шараларының жоспары бекітілген. Жоспарға сәйкес сыбайлас жемқорлық санатындағы қылмыстар мен құқық бұзушылықтардың алдын алу мақсатында құқықтық оқытулар өткізіліп, бөлім қызметкерлері арасында қызмет барысында және қызметтен тыс кезде сыбайлас жемқорлық фактілерін болдырмау мақсатында сыбайлас жемқорлыққа қарсы іс-қимыл заңнамасында белгіленген нормалар мен талаптар жазбаша түрде таныстырылды.&nbsp;Сыбайлас жемқорлық тәуекелдеріне ішкі талдау Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігі Төрағасының 2016 жылғы 19 қазандағы №12 бұйрығына және Қазақстан Республикасы Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) Төрағасының 2023 жылғы 16 қаңтардағы №21 бұйрығымен бекітілген (өзгерістер енгізу туралы)Сыбайлас жемқорлық тәуекелдеріне ішкі талдау жүргізудің үлгілік қағидаларына сәйкес жүргізілген талдау нәтижесінде бөлімнің қызметінде қолданылатын нормативтік-құқықтық актілерде және ұйымдастырушылық-басқарушылық қызметіндегі сыбайлас жемқорлық тәуекелдерін тудыратын олқылықтар анықталып, сәйкестіктерді жою бойынша ұсыныс енгізілді. Енгізілген ұсыныс бойынша екеуі орындалып, қателіктер қалпына келтірілсе, бір нормативтік құжат аудандық қоғамдық кеңеспен келісу үстінде.&nbsp;Бұған қоса, 2024 жылдың маусым айында бөлімде бір мемлекеттік қызметкері ҚР Президентінің жанындағы мемлекеттік басқару академиясының Қызылорда облысы бойынша филиалынан «Сыбайлас жемқорлыққа қарсы менеджмент және комплаенс» тақырыбы бойынша біліктілігін арттыру семинарының бағдарламасын 40 академиялық сағат көлемінде аяқтап, сыбайлас жемқорлыққа қарсы күрес жолында өз білімін шыңдады. 2024 жылдың маусым айында бір мемлекеттік қызметші «Кәсіби әдеп және сыбайлас жемқорлыққа қарсы мінез-құлық» тақырыбындағы семинарға қатысып, Академия филиалында өз біліктілігін арттырды. &nbsp;Алдағы уақытта белгіленген мақсат-міндеттерді орындауға бар күш-жігерімізді жұмылдырамыз. Ауыл шаруашылығы және жер қатынастары саласы аясындағы жемқорлыққа қарсы жүргізіліп жатқан жұмыстарды пәрменді түрде жалғасатын болады.

Қазақстан және Қызылорда облысының жаңалықтары