<a href="https://kyzylorda-news.kz/">Kyzylorda-news.kz.</a> Жаңақорған ауданында әрбір ауылға апарар жолдың жайы жақсарып келеді. Сыр беткей мен тау беткейдегі, Төменарық аймағындағы ауылдарға кіре беріс күретамыр жолдар жыл соңына дейін толық жөндеуден өтеді. Тек көше асфальттары ғана жөндеу күтетіні болмаса, қалған жолдар жүйеленуде. Сол секілді кейбір елді мекен кіретін көпірлер де биыл жөндеуден өткізілуде. Соның ішінде М.Нәлібаев ауылы мен Екпіндіге кіреберіс көпір бар. Енді, барлығы да жаңарып, жөндеуден өтті.&nbsp;Жалпы көпірдің қажеттілігін, әсіресе, өзен-көлдердің жағасындағы жұрт жақсы біледі. Яғни, көпірсіз өрісің тарылады. Біздегі көпірлердің маңызы ауылдан кіріп-шығатын көліктердің қатынауынан туындаған. Қалай десек те, көпірдің маңызы ауылдағы ағайынға аса маңызды. Пайғамбарымыз Мұхаммед (с.ғ.с) хадистерінде «Көпір салу – сауапты істердің ең үлкені» делінген. Міне, бұл біріншіден, жауапты атқамінерлерге міндет болса, екіншіден, өте сауапты іс.Алдымен Екпіндіге барар көпірдің ахуалына тоқталайық. Аудандық тұрғын үй коммуналдық шаруашылығы, жолаушылар көлігі және автомобиль жолдары бөліміне бардық.<blockquote>«Самара-ШымкентЕкпінді» аудандық мәндегі автомобиль жолындағы көпірді реконструкциялауға 2021 жылы республикалық бюджеттен 45000,0 мың теңге қаралып, мемлекеттік сатып алу жұмыстары жүргізілді. Нәтижесінде жұмыстарды орындауға «Ремстрой» ЖШС жеңімпаз деп танылды. Келісім шарт құны 107 348,5 мың теңге. 2021 жылы келісім шартқа сәйкес, айналма жолды салу, ескі көпірді бұзу, темірбетон қазықтарды қағу жұмыстары жүргізілді. 2022 жылы облыстық бюджеттен тиісті 59985,0 мың теңге қаралып, плиталарды орналастыру, арматура тоқып, бетон құю жұмыстары жүргізілді. 2022 жылдың тамыз айында жұмыстарды толық аяқтауға облыстық бюджеттен 6457,1 мың теңге қаралды», – деді жауапты маман Дәулет Оразалыұлы.</blockquote>– Бұл көпір 70-жылдары қашыртқы қазылған кезде салынған болатын. Алайда осыдан бірнеше жыл бұрын тозығы жетіп, жүруге жарамсыз күй кешті. Ауыл ақсақалдары бар, біріге отырып мәселені көтеріп келген едік. Міне, биыл шешімін тауып, көпір ел игілігіне берілді. Ауыл тұрғындары көпір қайта жөнделгеніне қуанышты. Енді көшелерімізді реттеп алсақ болғаны, – деді ауыл әкімі Қайрат Қожамжаров.Сол секілді Ақжол ауылына кіре беріс аудандық мәндегі автомобиль жолындағы көпірді реконструкциялауға 2022 жылы облыстық бюджеттен 32 454,0 мың теңге қаралып, сатып алу жұмыстары бірнеше рет жүргізілген. Нәтижесінде «Дәнекер құрылыс компаниясы» ЖШС-мен келісім шарт жасалынып, осы уақытқа дейін құрылысқа қажетті материалдар жинақталып, темірбетон бағаналарды қағу, айналма жолды жасау, ригель құю жұмыстары жүргізілді. Келісім шарт бойынша 2022 жылға қаралған 31098,1 мың теңге көлеміндегі жұмыстар 2022 жылдың қазан айының 20-сында орындалуына байланысты қосымша қаржы қаралғанша тоқтатылды деді бөлім қызметкерлері. Бұл көпірлер сыр беткейдегі ауылдарды аудан орталығымен байланыстыратын. Сонысымен маңызды-тұғын. Көпір берілгенге дейін айналма жол пайдаланылды. Айналма қара жол уақытты ұстаса, екінші жағынан, ондағы ескі көпір де жарамсыз күйге түсті.1972 жылы салынған көпірдің ұзындығы 20 метр, ені 12 метрді құрайды. Көпірде жарықтар пайда болып, жүк көтергіш қабілетті болмай, жарамсыз күйге түсті. 2018 жылы тәуелсіз сарапшылар «апаттық» деген қорытынды берді. Соның негізінде жоба-сметалық құжаттама әзірленіп, мемлекеттік сараптамадан оң қорытынды алынды. Жалпы сметалық құны – 214 миллион 547 мың теңге. Бұл жөнінде облыстық жолаушылар көлігі және автомобиль жолдары басқармасы мәлім етті.– «Жұмыспен қамту жол картасы» бағдарламасы аясында көпірді күрделі жөндеу жұмысына қаржы қаралып, құрылыс-монтаж жұмыстары басталды. Мердігері – «МСФ Мұнай кұрылыс» ЖШС. Қосалқы мердігері – «Нұрай-Ақжол» ЖШС. Келісім-шарт құны – 183,9 миллион теңге. Техникалық қадағалушысы – «SM ORDA GRUPP» ЖШС. Авторлық қадағалаушысы – «ТЕКА-Проект» ЖШС. Жыл басында Жаңақорған кенті мен ауылдық округтерді байланыстаратын маңызды көпір пайдалануға берліді, – деді сала маманы Жасұлан Мінжанов.Көпір салу – сауапты іс, халыққа берері мол игілікті жұмыс десек, Сыр мен қырды, аудан орталығы мен елді мекендерді жалғайтын көпірдің біткеніне ел дән риза.– Айналма жолмен қыс мезгілінде, жауын-шашын, қолайсыз ауа-райы кезінде қатынау қиын болды. Яғни жаңарықтықтардың ғана емес, Қыркеңсе, М.Нәлібаев, Өзгент, Қожакент, Аққорған, Келінтөбе, Қаратөбе, Қандөз, Көктебе ауылдық округі тұрғындарының ортақ мәселесі еді. Шынында, қатты қуандық. Енді көлік қозғалысы қалпына келіп, аудан орталығымен байланыс реттелді, – деді Жаңарық ауылдық округінің ақсақалдар кеңесінің төрағасы Мәжит Әліпбеков. ХХ ғасырдың 70-80 жылдары пайдалануға берілген көпірлер ескіргені анық. Сондықтан кейбір ауылдарда көпірді жөндеу мәселесі түйінді мәселеге айналған-ды. Аудан басшысы бұл мәселені жетік білгендіктен, кезең-кезеңімен шешімін табатынына сенеміз. Ескі көпірден жаңа көпірдің ерекшелігі жаяу жүргінші жолы қосылды. Әрі сапалы дейді мамандар.Жалпы алғанда, ауыл ішіне апарар жолдағы көпір көп ауылда жоқ. Санаулы ғана елді мекендер көпір қызметіне мұқтаж. Былтыр Сыр беткейдегі Жаңарық ауылының тұсындағы облыстық маңыздағы жол толық ретке келген. Енді биылдың өзінде екі ауылдың көнерген көпірі көгере бастады. Бұл да әлеуметтік мәселенің шешілгенін білдіреді. Тек, сапасы сын көтеруі тиіс. Бұл қадағалауды қажет етеді.

Жаңақорғанда көпірлер қайта жандануда

<a href="https://kyzylorda-news.kz/">Kyzylorda-news.kz.</a> Бірер күн бұрын қаладағы үлкен дүкендер мен супермаркеттердің әдеттегідей электронды төлем емес, бұрынғыдай қолма-қол есеп айырысып жатқанын естідік.&nbsp;Жұмыстан қайтарда күнделікті тұтынатын азық-түлік алу үшін бізде дүкенге бас сұққан едік. Банкоматтар мен кассаның алдында ұзын-сонар кезекке тұрғандар көп. Бұған дейін Kaspi.kz қосымшасы арқылы төлем жасап алып жүрген біз де банкоматқа кезекке тұруға мәжбүр болдық. Сатушыдан сұрағанымызда басшының тапсырмасымен QR код алынып тасталғанын, енді төлем тек қолма-қол жүргізілетінін айтты.Қарап отырсаңыз, өнімі өтімді, жұртшылық жиі келетін үлкен дүкендерде осы көрініс. Оның себебін салық төлемеудің амалы болар деп ойладық. Расында, солай болып шықты. Облыстық мемлекеттік кірістер департаменті өндірістік емес төлемдер басқармасының басшысы Гүлжамал Шортанбаева:<blockquote>– Қазір барлық банктен кәсіпкерлердің есепшотын сұратып жатырмыз. Оларды төтеннен тексеріп баруға құқымыз жоқ. Себебі мораторий жарияланған. Бұл мәселені қарастыратын боламыз,– деді.</blockquote>Бізде салыққа қатысты сан түрлі мәселе барын бұдан бұрын да айтқан едік. Ақпан айының соңында облыс әкімінің төрағалығымен өткен жиналыста көтеріліп, сала басшыларына тапсырма берілген болатын. Салықты төлеуден жалтарып, жанама жол табуға тырысатындарға тексеру күшеймек. Облыс бюджетінің негізгі кіріс көзі осы салықтан екенін ескерсек, онда экономикамыздың дамуына кері әсер етіп отырғанымызды түсіну қиын емес секілді.Қолдағы деректерге зер салайық. Өткен жылы жергілікті бюджеттің болжамы 104,1%-ға орындалып, бюджетке 79,9 млрд теңге түсім түскен. Түсімдердің өсімі байқалады. Десе де түйткілді мәселелер жоқ емес. Айталық, облыстың салықтық түсімі 68 млрд теңгені құраса, халық саны (833 531) біздің өңірмен шамалас Қостанай облысының (832 110) түсімі 144 млрд теңге, яғни 2 есе артық. Оның ішінде жалақыдан төленетін салықтардың сомасы Қостанайда 76 млрд теңге, облыста бар болғаны 44 млрд теңге немесе 32 млрд теңгеге аз. Алайда көрсетілген мәліметтерден тағы бірнәрсені ұғыну керек. Біздегі жалақы мөлшерінің мардымсыз болуы немесе ірі-ірі кәсіпорындардың аздығы да әсер етуі мүмкін.Статистика органдарының былтырғы мәліметінше, жұмыспен қамтылғандар саны 331 мың адам. Ал салық есептілігіне сәйкес жұмысшылар саны 249 мың адам, яғни, айырмасы 82 мыңды құрайды. Тағы да сандар арасындағы алшақтық едәуір. Бұл түрлі себептерге байланысты болуы мүмкін. Мәселен, статистикалық мәліметті өсіріп көрсету немесе өзін-өзі қамтығандар, маусымдық жұмыскерлер деген секілді. Облыстық мемлекеттік кірістер департаменті мамандарының есебінше, 50%-ға тең деп есептегеннің өзінде салық есептеріндегі орташа облыстық жалақы көлеміне сәйкес, 40 мыңнан астам адамнан ай сайын бюджетке 400 млн теңге өндірілмейді. Бұл – жылына 5 млрд теңгеге жуық қаржы түспейді деген сөз.Кәсіпкерлер неліктен табысын жасырады дегенге келейік. Бұл мәселе жайлы біз Қызылорда механикалық зауыты «Квант» ЖШС серіктестігінің директоры, облыстық қоғамдық кеңестің мүшесі Жаңабай Бекішевпен пікірлескен едік.<blockquote>– Өз басым салықтан жалтара алмаймын. Қазір бәрі ашық, көз алдыңда айқын көрініп тұрады. Цифрлық заманда картамен, аударма, QR код арқылы төлем секілді түрі көп. Қолма-қол төлем қабылдаудың кезеңі өтті. Кәсіпкерге қайта сол оңай. Бірақ жаңа шығып жатқан Салық кодексін біздің оқып, танысуға, салық түрлерін зерделеуге уақытымыз жоқ. Бізге неғұрлым тиімді тұсын ұсынса жетіп жатыр. Барлығын электронды түрде бір жүйеге түсіріп, арнайы бағдарлама енгізіп қойса, жеңіл болады. Түскен табысымыздың белгілі бір мөлшерін ғана төлейтіндей етіп ыңғайласа дұрыс. Оны сол банктен бірден ұстап қалса, тіпті тиімді. Жалпы елімізде кәсіпкерліктің дамуы неге өз деңгейінде емес? Бізге қаржы жағынан үлкен қолдау керек. Мемлекеттен берілетін қайтарымсыз грант дегенді тоқтату керек. Бұл – кәсіпкерлікті дамытудың жолы емес. Үкіметтен де ештеңе берілмеу керек. Кәсіпкерлерге ұзақ мерзімге аз пайызбен несие берілгені дұрысырақ. Мәселен, Сингапурда бес миллион ғана халық болса, онда 122 дербес банк бар. Олар ешкімге бағынбайды. Сондай жүйе керек бізге. Әйтпесе қаншама идеясы бар адамдардың қолын қаражат байлап тұр. Әлгіндей шетелдің дербес банктерін бізге көптеп кіргізсе, ұзақ мерзімге төмен пайызбен несие берілсе, кәсіпкерлік дамитын еді.</blockquote>Сонымен бірге кәсіп ашуда кедергілер де жоқ емес. Кәсіп бастау үшін алдымен жер немесе ғимарат керек. Оның барлығы айналып келгенде қаржыға тіреледі. Ғимарат салып, оның рұқсатын алу үшін де қаншама тер төгіледі. Бірінші кезекте осы мәселелерге жеңілдіктер жасалса, содан кейін ғана бізден талап етсе болады, – дейді кәсіпкер.Бір мәселенің шетін тартсаң, осылай тағы бірнешеуі шырмауықша орала береді. Мемлекет басшысы Қасым-Жомарт Тоқаев Парламенттің бірінші сессиясында сөйлеген сөзінде шағын және орта бизнестің бәсекеге қабілетін арттыру мәселесіне баса мән берілетінін айтты. Ол үшін бірыңғай кешенді бағдарлама әзірлеу қажеттігін де алға тартқан еді. Бизнесті дамытудың тың тәсілдерін әзірлеуді де тапсырды. Сондай-ақ, алдағы бесжылдық кәсіпкерлікті дамытуға бағытталатынын да жеткізді. Демек, жаңадан сайланған депутаттарға тағы бір жауапкершілік артылып отыр.Жоғарыда қозғалған тақырыпқа қайта ойысайық. Биылдан бастап кәсіпкерлер тұрмақ, мұғалім мен дәрігерлер де өзінің табысын көрсетуге міндеттелді. Олар жыл басынан декларация тапсыруда. Ендеше қарапайым кәсіп иелері табысы жайлы ақпарат беріп отырса, онда ірі-ірі сауда нүктелері, күнде кіріс көзі бар дүкен иелері табысын қалайша жасырады?Тағы да деректерге назар салыңыз. Салық кодексіне сәйкес, жеке тұлғалардың қарызын мәжбүрлеп өндіруді жеке сот орындаушылары ғана жүзеге асырады. Кірістер органы тарапынан жеке тұлғалардың көлік, мүлік салығынан берешектерін мәжбүрлеп өндіру үшін 22 мың жеке тұлғаның 638 млн теңге берешегі жеке сот орындаушыларға жолданыпты. Алайда, 12 мың адамның 263 млн теңгесі немесе 41% ғана өндіріліп, қалған 10 мыңының 375 млн теңге берешегі бірнеше жылдан бері өндірілмей келеді. Сондай-ақ, 1 млн теңгеден жоғары салық берешегі барлардың меншігінде мүліктер тіркелгенмен, оған шектеу қойылмағанын да айта кетейік.Негізі салық төлеуден жалтарып не жасырып-жабудың қажеті шамалы. Ойланып қарасаңыз, сол қаражат өзімізге қайтып келеді. Түскен сома әлеуметтік жағдайды жақсартуға, үлкен ғимараттар, мектептер, ауруханалар, түрлі мәдени нысандар салу үшін жұмсалады. Өңірдің өркендеп дамуына үлес қосқысы келген әрбір адам, мейлі ол кәсіпкер немесе қарапайым маман болсын, салықтан сырт айналмауы керек секілді.&nbsp;

Салық төлеу - міндет 

​<a href="https://kyzylorda-news.kz/">Kyzylorda-news.kz.</a>&nbsp; Әлеуметтік медициналық сақтандыру қорының Қызылорда облысы бойынша филиалының тұрғындармен есептік кездесулері жалғасуда. Қармақшы ауданы Жосалы ауылында өткен жиынға аудан әкімінің орынбасары Жұлдызхан Ерқосаев, «Әлеуметтік медициналық сақтандыру қоры» КЕАҚ облыстық филиалының директоры Бақыт Исмаханбетов, облыстық денсаулық сақтау басқармасы басшысының орынбасары Жангелді Шаймбетов, Қармақшы аудандық орталық ауруханасының бас дәрігері Бақытжан Нысанбаев қатысты.Қармақшы ауданы, Төретам, Ақай елді мекендерінің 17 мыңға жуық тұрғыны міндетті әлеуметтік медициналық сақтандыру жүйесінде сақтандырылмаған. Көбінесе 12 ай бойы төлемі жоқ белсенді емес халық, сонымен қатар жұмысшылар, жеке кәсіпкерлер. Жалпы аудан халқының шамамен 18 % МӘМС жүйесінен тыс қалды, деп хабарлады Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов.<blockquote>«Егер сізге шұғыл медициналық көмек қажет болса, тегін медициналық көмек қызметтері қолжетімді. Жоспарлы медициналық көмекті, жоғары технологиялық медициналық қызметтерді, оңалту емін, стационарлық көмекті, күндізгі стационарда емделу және тағы басқаларын алу үшін «сақтандырылған» мәртебесіне ие болу қажет. Облыс халқының 60 пайыздан астамы мемлекет жарна төлейтін 15 жеңілдікті санаттағы азаматтардың қатарында», - деп атап өтті Бақыт Исмаханбетов.</blockquote>Кездесуде ауыл тұрғындары спикерге бірқатар сұрақтармен жүгінді.МӘМС жүйесінің жеңілдікті санаттары қатарында Ауғанстандағы соғыс ардагерлері бар ма? Спикердің айтуынша, «МӘМС туралы» Заңның 26-бабына сәйкес зейнетақы төлемдерін алушылар, оның ішінде Ұлы Отан соғысының қатысушылары мен мүгедектері МӘМС жарналарынан босатылған. Егер Ауған соғысына қатысушының мүгедектігі болса, онда ол 15 жеңілдік санатына ие азаматтардың қатарына кіреді.Мен медициналық көмекке жүгінбеймін, бірақ жұмыс беруші жалақыдан МӘМС-ға ай сайын қаражат аударады. Не үшін? Осы сұраққа жауап бере отырып, Бақыт Исмаханбетов барлық қазақстандықтар үшін медициналық сақтандыру жүйесінің маңыздылығын атап өтті. Бірыңғай қазынадан 18 жасқа дейінгі балаларға, студенттерге, мүмкіндігі шектеулі адамдарға, АӘК алушыларға, марапатталған көп балалы аналарға және тағы басқаларға емделуге қаражат бөлінеді. Яғни, медициналық сақтандыру біздің туыстарымыз бен жақындарымызға да қажет.Егер қызметкер ұзақ мерзімді еңбек демалысына немесе жалақысы сақталмайтын демалысқа шықса, сақтандыру мәртебесін қалай жоғалтпауға болады? Спикердің айтуынша, МӘМС жүйесіндегі мәртебе соңғы жарнадан кейін үш ай бойы сақталады. Әрі қарай өзекті болып қалуы үшін жарнаны өткізіп алған кезеңдер үшін дербес төлеуші ретінде төлеу қажет. Биыл ай сайынғы төлем 3 500 теңгені құрайды.Кездесуді қорытындылай келе, ӘМСҚ-ның облыстық филиалының директоры Әлеуметтік медициналық сақтандыру қоры ең алдымен пациенттердің құқықтарын қорғауға бағытталғанын атап өтті. Егер сізде сұрақтар туындаса, өз емханаңыздағы Пациенттерді қолдау қызметіне жүгіне аласыз. Ал ол жерден мардымды жауап ала алмасаңыз, Әлеуметтік медициналық сақтандыру қорының келесі байланыс арналары арқылы өтініш жібере аласыз: fms.kz ресми сайты, 1406 байланыс орталығы, Qoldau 24/7 мобильді қосымшасы және Telegramдағы SaqtandyryBot. Осы құралдар сақтандыру мәртебесін тексеруге мүмкіндік береді.&nbsp;Сондай-ақ, egov.kz ҚР электрондық үкіметінің сайтында "Денсаулық сақтау" бөлімінде медициналық сақтандыру жүйесіндегі өз мәртебеңізді тексеріп, жүргізілген төлемдер туралы "Медициналық қызметтер туралы және МӘМС-ке аударылған сомалар туралы ақпарат" мемлекеттік қызметі арқылы білуге болады. &nbsp;&nbsp; &nbsp;<figure class="image"><img src="https://knadmin.beoblood.kz/uploads/karmakshy_4_0d6687002a.jpeg" alt="кармакшы 4.jpeg"></figure>&nbsp;<figure class="image"><img src="https://knadmin.beoblood.kz/uploads/karmakshy_1_fcbc239692.jpeg" alt="кармакшы 1.jpeg"></figure>

Қармақшы ауданының тұрғындарымен кездесуде МӘМС жүйесінің өзекті сауалдарына жауаптар берілді

​<a href="https://kyzylorda-news.kz/">Kyzylorda-news.kz.</a>&nbsp; Облыс әкімі Нұрлыбек Нәлібаевтың төрағалығымен облыста жанар-жағар май нарығындағы жағдай туралы мәжіліс өтті. Жиынға облыстық басқарма, аумақтық департаменттер мен құқық қорғау органдары басшылары, онлайн режимде қала, аудан әкімдері қатысты.Аймақ басшысы Қазақстан мен көрші елдер арасындағы баға айырмасын төмендету үшін 12 сәуірден бастап жанар-жағар май бағасының көтерілуі жоспарланғанын атап өтті. ҚР Энергетика министрлігі таратқан хабарға қарағанда, литрі 182-187 теңгеден саудаланған АИ-92 және АИ-95 маркалы бензинінің бағасы 205 теңгеге дейін, 230 теңгеден сатылған дизель отынының бағасы 295 теңгеге дейін көтерілуі болжануда.Облыстық кәсіпкерлік және өнеркәсіп басқармасының басшысы Қамбарбек Мүбараков жанар-жағар май бекеттерінің жұмысы мен ондағы қор туралы баяндады. Қазіргі таңда өңірде 32 күнге жететін АИ-92 маркалы бензині және 15 күнге жететін дизель отыны қоры бар.Жауапты мекемелерге жанар-жағармай тапшылығының алдын алуды, оны сыртқа тасымалдап сатуды болдырмау үшін тұрақты мониторинг жасау, бензин мен дизельдің еркін босатылуын қамтамасыз ету тапсырылды.<blockquote>«Компаниялар арасында бағаны арнайылап көтеру келісіміне жол берілмеуі керек. Бағаның жоспарлы өскеніне қарамастан, кәсіпкерлік субъектілері жанар-жағар майды белгіленген баға бойынша уақытылы өткізуге міндетті. Монополияға қарсы заңдылықтар түсіндірілуі тиіс. Мұндай жағдай орын алса, жауапкершілігі қаралатынын ескерту қажет. Көктемгі егін егу науқаны басталатын, тіршілік атаулыға жан бітетін кезде жұмыстың барлығы айналып келгенде жанар-жағар майға тіреледі. Сондықтан қолдан дефицит жасамауымыз керек», – деп ескертті Нұрлыбек Машбекұлы.</blockquote>Жиын барысында облыстық ауыл шаруашылығы басқармасына көктемгі егін жұмыстарына дайындық барысында шаруашылықтармен кері байланыс орнатып, орын алуы ықтимал мәселелерді жедел түрде шешу жүктелді. Облыс әкімінің бірінші орынбасары Серік Қожаниязовтың жетекшiлiгiмен арнайы штаб құрылды. Штаб құрамында облыстық кәсіпкерлік және өнеркәсіп басқармасы, бәсекелестіктi қорғау және дамыту мен мемлекеттік кірістер департаменттері және құзырлы органдардың өкілдері болады. Штаб қала, аудан әкiмдiктерiмен бiрлесiп, жанар-жағармай бағасы мен қажетті қорына күнделікті бақылау жасап, тиісті шараларды қабылдайды.<figure class="image"><img src="https://knadmin.beoblood.kz/uploads/339274046_1546696525856725_5738028905887635013_n_6940d6567b.jpg" alt="339274046_1546696525856725_5738028905887635013_n.jpg"></figure>&nbsp;<figure class="image"><img src="https://knadmin.beoblood.kz/uploads/339272476_1621235165046045_8312866165833303330_n_ab41db3254.jpg" alt="339272476_1621235165046045_8312866165833303330_n.jpg"></figure>&nbsp;<figure class="image"><img src="https://knadmin.beoblood.kz/uploads/339188148_1261792834469477_5574444854825393287_n_97c347544a.jpg" alt="339188148_1261792834469477_5574444854825393287_n.jpg"></figure>&nbsp;<figure class="image"><img src="https://knadmin.beoblood.kz/uploads/339296591_983039099525564_3981911591419532638_n_e9adb02b59.jpg" alt="339296591_983039099525564_3981911591419532638_n.jpg"></figure>

Қызылорда: Жанар-жағармаймен қамту мәселелері талқыланды

Сырдариялықтар базалық зейнетақыны қалай ала алады?

<a href="https://kyzylorda-news.kz/">Kyzylorda-news.kz.</a> Қызылорда қаласына қарасты Қарауылтөбе ауылының негізі 1929 жылы қаланған. Елді мекен 2005 жылдан бастап ауылдық округ статусына ие болған. 2022 жылы ауылдық округ әкімі аппаратының бюджеті 89,2 миллион теңгені құрап толығымен игерілсе, салықтық түсімдер 8 миллион 63 мың теңгені құрап 106 пайызға орындалған. Ауылдық округте өткен 2022 жылы бірқатар жұмыстар да атқырылды«Өңірлерді дамыту» бағдарламасы аясында қалалық бюджеттен 1 миллион 500 мың теңгеге Байсейітов көшесінің соңына 400 метрге 9 дана түнгі жарық шамы бағаналарын орнату жұмыстары жүргізілді. Одан бөлек 150 орындық ауылдық клуб үйінің құрылысын жүргізу үшін «Ауыл ел бесігі» бағдарламасы аясында республикалық бюджеттен бөлінген 274,4 миллион теңгеге мемлекеттік сатып алу конкурсы ұйымдастырылды. Нәтижесінде «Өмірзақ» ЖШС-і жеңімпаз атанып, қазіргі таңда құрылыс жұмыстарын жүргізуде. Округ аумағында орналасқан жалпы көлемі 6800 шаршы метр болатын «Әбдіхалық» бейітін қоршау жұмыстары үшін жергілікті бюджеттен қаражат бөлініп, мемлекеттік сатып алу конкурсы арқылы анықталған «ОрдаМегаСтрой» серіктестігі 10,1 миллион теңгеге қоршау жұмыстарын жүргізді.Ауылдағы жаңадан қоныстанушы аумақтағы жалпы ұзындығы 9 шақырымды құрайтын 12 көшеге қиыршық тас төсеу жұмыстарын жүргізу үшін қазіргі таңда мердігер мекемені анықтау мақсатында мемлекеттік сатып алу конкурсы жарияланған. Сонымен қатар кіре-беріс жолдың бойындағы R-1 каналына жаяу жүргіншілерге арналған көпір құрылысы үшін қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі арқылы жобалық сметалық құжаттар мен мемлекеттік сараптама қортындысы дайындалуда. Одан бөлек, ауылда 8 дана КТПН, электр бағаналарын орнату үшін &nbsp;мемлекеттік сатып алу конкурсының жеңімпазы «Элком» ЖШС 2023 жылға ауыспалы негізде құрылыс жұмыстарын жүргізуде.Қазіргі таңда Қарауылтөбеде «Балалар жылы» аясында «Строй модуль - Астана» серіктестігінің демеушілігімен жалпы құны 17,5 миллион тенгені құрайтын ойын алаңы салынып, қолданысқа берілген. Сонымен қатар тұрғындар сұранысына сай округке кіреберіс аумағына демеушілік есебінен автобус аялдамасы орнатылды. Ал жол-көлік оқиғаларының алдын алу мақсатында, мемлекеттік сатып алу конкурсы нәтижесімен «Алимова Жанар» жеке кәсіпкерлігімен 380 мың теңгеге 21 дана жол белгілері орнатылды. Жаңа қоныстанушы аумаққа республикалық бюджеттен техникалық су тарту ұңғымасын бұрғылауға 14 799,8 мың теңге және А.Иманов көшесінің бойындағы №6-ТС техникалық су тарту ұңғымасын бұрғылауға 14 799,8 мың теңге бөлініп, орналастыру жұмыстары жүргізілуде.&nbsp;Өткен жылдың қыркүйек айында ауыз су жинау қоймасы қолданысқа берілген еді. Қазіргі таңда тұрғындарды ауыз сумен қамтамасыз ету бағытында «Нұра топтық су құбыры» шаруашылық жүргізу құқығындағы республикалық мемлекеттік кәсіпорны салынып жатқан кәсіпорындардың бірлескен дирекциясы филиалымен &nbsp;қызмет көрсетілуде.Қарауылтөбе ауылдық округіндегі түнгі жарықтандыру бағаналарын күтіп ұстау жұмыстарын мемлекеттік сатып алу қорытындысы негізінде 5 миллион 800 мың теңгеге мердігер мекеме «ИнноТех» серіктестігі атқаратын болады. Ал елді мекеннің санитариялық тазалығын қамтамасыз ету мақсатында мемлекеттік сатып алу қорытындысымен жеке кәсіпкер «Бекишов» жеңімпаз ретінде танылып, 1 миллион 200 мың теңгеге тиісті жұмыстарды жүргізді. Округтегі автомобиль жолдарының жұмыс істеуін қамтамасыз ету бағдарламасы аясында мердігер мекеме ЖК «Болат» А. Иманов көшесіндегі 1,4 шақырым болатын асфальт қабаттарына 417 мың теңгеге жөндеу &nbsp;жұмыстарын жүргізді. Ал ауылды көгалдандыру мен абаттандыру жұмыстарына 300 мың теңге, жергілікті деңгейдегі мәдени-демалыс және спорттық іс-шара жұмыстарына 80 мың теңге жұмсалған.Ауылдық округтегі кәсіпкерлік дамыту бағытындағы жұмыстар да қарқынды түрде жүргізіліп келеді. Қазіргі кезде округте 112 шағын кәсіпкерлік субъектілері тіркелген. Оның екеуі заңды тұлға болса, 99-ы дара кәсіпкерлер және 11-і шаруа қожалықтары. Өткен жылы 12 айдың есебі бойынша ауылда 17 шағын кәсіпкерлік субъектілері тіркеліп, &nbsp;17 тұрақты жұмыс орны ашылған.«Іскер» бағдарламасы аясында «Аграрлық несие корпорациясы» арқылы 16,5 миллион теңгеге 3 жоба, «Микробизнес-Қызылорда» бағдарламасы аясында «Өңірлік инвестициялық орталық» микроқаржы ұйымы арқылы 26,5 миллион теңгеге 5 жоба, «Еңбек» бағдарламасы аясында жалпы көлемі 17,2 миллион теңгені құрайтын қайтарымсыз мемлекеттік грантқа 14 ауыл тұрғыны ие болды.Қарауылтөбе ауылдық округінің 6806 гектарды құрайтын жалпы жер көлемінің 4957 гектар аумағында «Ы.Жахаев атындағы Қазақ күріш шаруашылығы ҒЗИ» серіктестігі қазіргі таңда егін шаруашылығымен айналысып келеді. 2022 жылы Институт тарапынан барлығы 1078 гектар жерге 646 гектар күріш, 40 гектар бидай, 5 гектар арпа, 126 гектар сорго, 40 гектар мақсары, 215 гектар жаңа жоңышқа және 3 гектар бақша, 3 гектар қызанақ дақылдары егілген еді. Одан бөлек 365 гектар жерге ескі жоңышқа егілді.Институт және ауылдық округ әкімі аппараты арасында 5000 гектарға жуық жайылымдық және шабындық алқаптарды және егін науқанында орылған бүркемелі егіс пен күріш алқаптарын кезең-кезеңімен ауыл тұрғындарының малдарына жайылымдық үшін босатып беруге өзара меморандум қабылданды. Өткенжылы ҒЗИ-ңа қарасты 2094,4 гектарды құрайтын ауылшаруашылық жерлері мемлекеттік жер қорына қайтарылды.Ауылдық округте тұрмыс деңгейі аз қамтылған 50 отбасына атаулы әлеуметтік көмек тағайындалып, өткен 2022 жылы жалпы сомасы 21 миллион 921 мың теңге қаржылай қолдау көрсетілген. Сондай-ақ қайырымдылық акциялары аясында «Қазақ күріш шаруашылығы ҒЗИ» серістестігі, жеке кәсіпкерлер, ауыл жастарының қатысуымен тұрмысы төмен отбасыларына азық-түлікпен қолдау көрсетілді.Округтегі А. Хангелдин атындағы №179 орта мектепте 505 оқушы, ал мектеп алды даярлық сыныбында 40 бала және мектеп жанындағы «Нұр-бөбек» шағын орталығындағы 2 топта 40 бүлдіршін тәрбиеленуде. 2021-2022 оқу жылында 11 оқушы мектепті бітіріп, 6 оқушы жоғары оқу орнына, 2 оқушы &nbsp;колледжге мемлекеттік грант негізінде, 3 бітіруші түлек жоғары оқу орындарына ақылы негізде оқуға қабылданған. Одан бөлек, ауылдық клубта құрамында 64 өнерпазы бар 5 үйірме жұмыс істейжі. Өнерпаздар өз өнерлерін көптеген сайыста, іс-шара, салтанатты кештер мен мерекелерде көрсете отырып, жүлделі орындарға ие болып келеді.

Қарауылтөбе ауылдық округінде тындырымды тірлік көп

<a href="https://kyzylorda-news.kz/">Kyzylorda-news.kz.</a> Мектеп оқушыларының жоғарғы сыныпқа келген кезінде тағы бір мазалайтын &nbsp;мәселе – болашақ мамандықты таңдау. Осы тұста ересек адамдардың ұсыныс-пікірі маңызды. Сонымен қатар оқушының түрлі сала өкілдерімен тілдесуі де болашақ мамандығын таңдауға септігін тигізері сөзсіз. Қызылорда қаласындағы Әли Мүсілімов атындағы №101 мектеп-лицейі бұл бағыттағы жұмыстарды жүйелі жүргізіп келеді.Бүгінде аталған білім ордасында арнайы «Педагогикалық бейінді сынып» құрылған. Мұндай сынып ашудағы басты мақсат – білім алушыларды педагогикалық мамандықтарға тарту. Яғни, бұл сыныпта оқитын оқушыларды біліммен, іскерлікпен және педагогке тиісті дағдыларды дамытумен жүзеге асырылады. Олардың болашақ педагогтік тұлғасының қалыптасуы мен дамуы жолында кәсіби әдістемелік қолдау көрсету мақсатында қолға алынған «Педагогикалық бейінді сынып» жобасы өз жұмысын қарқынды жүргізе отырып, оқушылар үшін маңызы бар шараларды ұйымдастыруды қолға алды.Арнайы сыныпта білім алатын жоғары сынып оқушылары гуманитарлық пәндерді тереңірек зерттейді. Зерттеулер жүргізе отыра әлеуметтік, педагогикалық, әлеуметтік-мәдени бағыттағы жобаларды қорғайды. Сондай-ақ оқушылар серіктес жоғары оқу орындарының жетекші мамандарының шеберлік сабақтарына, дәрістеріне, семинарларына қатысады.Осы орайда Әли Мүсілімов атындағы №101 мектеп-лицейінде жобаның алғашқы жұмысы басталып, Қазақстан Республикасының профессор-докторлары, Қорқыт Ата университеті ғалымдарының қатысуымен «OPENCONF» өткізілді. Конференцияға Абай атындағы Қазақ ұлттық педагогикалық университетінің профессоры, педагогика ғылымдарының докторы, «Құрмет» орденінің игері Жұмаділ Байділдаұлы Шілдебаев, Педагогика ғылымдарының кандидаты, доцент, біліктілікті арттыру &nbsp;және қайта даярлау институтының директоры, Максим Танк атындағы Беларусь мемлекеттік педагогикалық университеті Шеститко Ирина Владимировна қатысты. Одан бөлек оқушыларға педагогика саласының қыр-сырымен бөлісу үшін Қорқыт ата атындағы Қызылорда университетінің педагог мамандары арнайы келді.«Педагогикалық сынып» жобасы аясында зерттеу жүргізіп, конференцияларға жиі қатысқан оқушылар ел келешегі үшін айрықша маңызға ие болған мұғалімдік мамандықты жүрек қалауымен таңдап, қыр-сырын түсінетініне сенеміз. Сондай-ақ &nbsp;адалдық этикасын ұстанатын, жеке тұлғалық құзіреттілігін дамытатын, уақытты тиімді қолданып, қайырымды іс жасай алатын, ел білімі мен ғылымының дамуына зор үлес қосатын кемел тұлға боларына үміт артамыз», – дейді мектеп ұжымы.

Қызылорда қаласы: OPENCONF: «Педагогикалық бейінді сынып»

​<a href="https://kyzylorda-news.kz/">Kyzylorda-news.kz.</a> Қазалы аудан әкімі Мұхтар Оразбаев жұмыс сапарымен Әйтеке би кентінің іргесінде жатқан бақшалықтарды аралап, мал жайылымдарын және көлдерді суландыру мақсатында келіп тұрған су деңгейін бақылады.Көпшілік арғы бет атап кеткен 5-ші квартал аумағында жыл сайын бақша жұмыстарымен айналысатын бір топ ақсақалдар бар. Жылдағы үрдіспен бақшалық арықтарын тазалауды бастап кеткен зейнеткерлер 21 гектар жердің игілігін биыл да көрсе дейді.<blockquote>«Былтыр су мәселесі қиын болып, аз жеміс алғанбыз. Биыл «вакум» арқылы су жеткізуді қолға алып отырмыз. Сәтін салса, биыл қауын-қарбыздың дәмін татсақ деген ойымыз бар», – дейді зейнеткер Әзірбай Темірхан.</blockquote>Ақсақалдарға риза болған аудан басшысы жұмыстарына сәттілік тіледі.Мұнан соң аудан әкімі Басықара каналының «212 пекетіне» ат басын бұрып, көлдер мен мал жайылымдарына кететін судың деңгейін бақылады.Артынша көпшілік «Абдул аша» атап кеткен Басықара каналының «82 пекетіне» аялдап, тек көлдерге ғана кететін судың жайын көзбен көрді.Айта кетейік, аудан басшысының жанында аудан әкімінің орынбасары Күнтілес Назымбеков, ауыл шаруашылығы мен жер қатынастары бөлімінің басшысы Еркін Сейтов және «Қазалысушар» қызметкерлері болды.

Қазалы: Ауыл ақсақалдары 21 гектар жерді игеруде

<a href="https://kyzylorda-news.kz/">Kyzylorda-news.kz.</a> Көктем басталғандағы маңызды науқанның бірі – ағаш отырғызу. «Бұтақ жайған ағаш қартаймайды, ұрпақ жайған адам қартаймайды» дейді. соңғы кездері ағаш отырғызып, оны көктету еліміздің түкпір-түкпірінде қолға алынып, тиянақты мән берілуде. Көк болған соң оған жеміс ағашы да кіреді. айтпағымыз мынау. Жақында дүр оңғар ауылында игі іс қолға алынды. Ауылдың кіреберіс сыртына жеті жарым мың түп алма ағашы отырғызылды. Таңмен таласа ерте тіршілікке қамданған ауыл жұртының қуанышында шек жоқ. Жүздеріндегі жылылыққа қарап туған жерге деген шынайы жанашырлықты сезесің. Ауылдың гүлдену мен көркею жолында қашанда екі қолын жоғары көтеріп, бек тұрады. Әрі сол қасиетінен ешқашан айныған емес. Мұнда бірліктің бәсі қай кезде жоғары. Оны ауыл сыртында жиналған халықтың қарасына қарап ауызбіршілікті тағы бір байқадық. Былтыр шаруашылық төрағасы Орынбасар Төлепов алмабаққа арнайылап жерді дайындаған-ды. Техникамен жерді жыртып, тегістеді. Жазда жаңбырдың, қыста қар суына әбден бастырды. Осылайша жеміс ағашын отырғызуға жерді баптап, күтті.«Төртеу түгел болса, төбедегі келеді» демекші, игі іске ауыл әкімі, ардагерлер кеңесінің төрағасы, шаруашылық басшысы, ауыл имамы, ардагерлер, алтын құрсақты аналар мен ауыл азаматтары ұйымшылдықпен бір мезетте 5 гектар жерге жеті жарым мың түп алма көшетін екті. Ауылдық ардагерлер кеңесінің төрағасы Бақытбек Тәуекелов жақсы істің бастамасына сәттілік тілесе, ауылдың еңбек анасы Бибігүл Әбішева мен алтын алқа иегері Аманкүл Бекмұрзаева көпшілікке шашу шашып, жеміс ағашын отырғызды. Алмабаққа алманың екі сұрыпынан егіліп, суғарылды. Келешекте бақтың жайқалып өсуіне өзге өңірден арнайы маман да тартылғын. Мұндағы жеміс ағаштары тамшылатып суғару әдісі арқылы жүргізіледі.<blockquote>«Алманың көшеттері Меркеден әкелінген. Ауа райы тұрақтылығына қалыптасқан. Бұлар жылы температурада көктейді. Егер аяқ астынан минус отыз градус аяз тұрып кетсе үсіп кетеді. Ал ауа температурасы біртіндеп төмендесе, оған өлмейді. Бойындағы қажетті дәрумендері біртіндеп алмасады. Алмаға берілетін дәрілер де уақытысымен жүргізіліп отырады. Мысалы кальцийді алма шыққан кезде берсе, мысты алма оянғанда береді. Әрқайсысы өз кестесімен берілу керек. Бұл отырғызылған көшеттер жақсы шығып жатса, екі-үш жылда жемісін беретін болады», дейді Айболат есімді маман.</blockquote>Алмабаққа жерді дайындау үшін де оған екі жыл уақыт жұмсалыпты. Жалпы оңтүстік аймақ, соның ішінде Сыр өңірі Аралға жақын орналасқандықтан жері тұзды сор келеді. Шаруашылық төрағасы жерді өңдеу үшін біраз күш жұмсағанын да жасырмады.<blockquote>«Былтыр күн жылынғаннан жерді жыртып, суғарып бойындағы тұзын шайдық. Биыл фосфогипс тыңайтқышын сеуіп, жерді қайта жырттық. Ауылымыздың сыртында бұдан бөлек те алма бағымыз бар. Оны қарықтап суғарып отырдық. Бірақ ойымыздағыдай дұрыс өнім ала алмадық. Содан кейін үлкен бақ жасауды жоспарлап, бүгін іске асырып отырған жайымыз бар. Бұйырса тағы да мың түп алма көшетін әкелу жоспарда тұр. Еңбегіміз еш кетпей жемісін беріп жатса, ауылымызды өз өнімімізбен қамтамасыз ететін боламыз», дейді шаруашылық төрағасы Орынбасар Төлепов.</blockquote>

Қармақшы: Жеті жарым мың түп алма ағашы отырғызылды

​<a href="https://kyzylorda-news.kz/">Kyzylorda-news.kz.</a> Қолайсыз ауа райына байланысты 7 сәуірде дауылды ескерту жарияланды, деп хабарлайды Қазгидромет.&nbsp;Бұл күні Қызылорда облысының орталығында, шығысында түнде және таңертең найзағай күтіледі.&nbsp; &nbsp;

7 сәуірге арналған ауа райы болжамы

<a href="https://kyzylorda-news.kz/ru/">Kyzylorda-news.kz</a>. Жастар – қоғамның қозғаушы күші, мақсат пен арманның бейнесі. Кез келген ұлттың жастарына қарап, сол елдің болашағын болжауға болады. Осы орайда қызылордалық белсенді жас, «Go Viral», «ЮНИСЕФ», «Кызылорда Волонтерлері» ұйымының мүшесі, ментор-аудармашы, координатор, «Ejaksu» жобасының авторы Аружан Әбдіржанмен сұхбаттасудың сәті түскен еді.– Аружан, ерікті болу – ерік-жігерді талап ету. Бұл салаға қызығушылық танытып, мақсатты түрде айналысуға не түрткі болды?− Қазір Логистика және көлік академиясында «Логистика» мамандығы бойынша білім аламын. Волонтерлер әлемімен танысқаныма 7 жыл болды. Ал қызығушылығым 5 жыл бұрын басталды. Бұл салаға келмес бұрын 4 жыл таэквондомен айналыстым. Спортты тоқтатқаннан кейін жаңа дүние ашқым келді. Өзімнің хобби, қызығушылығымды зерттей бастадым. Соның нәтижесінде Америкалық елшіліктің қолдауымен Қазақстанның әр қаласында ашылған ұйымдармен таныстым. Солардың бірі – «American Сorner Kyzylorda». Ұйымға 2015 жылы келіп, алғаш рет «volonteer» сөзімен таныстым. Ұйымның белсенді қатысушысы болып, акцияларға, іс-шараларға қатысуға жол ашылды. Ағылшын клубы мен сабағын да ұйымдастырдық. Осылайша волонтерлік жұмысым басталды.− «Еріктілер жылына» тоқталсақ. Қандай іс-шараларға қатыстыңыз?− 2020 жылға дейін бұл салаға көпшілік аса бір қызығушылық танытпайтын. Бізді «бөлек ағым» деп ойлайтын. Президент волонтерлер жылын бекіткеннен кейін біршама өзгеріс болды. Халық өмірінде волонтер түсінігі пайда болды. Қызығушылардың саны артты. Көптеген ұйым ашылды. Әлеуметтік мәселелерді шешуге бағытталған жобалар пайда болды. Тек жастар емес, егде жастағы азаматтар волонтерлікке бет бұра бастады.− Әлеуметтік желіні белсенді қолданасыз және маркетинг саласында да тәжірибеңіз бар. Интернетті табыс көзіне жатқыза аласыз ба?− Иә, әлеуметтік желінің белсенді қолданушысымын. Қолданып қана қоймай, табыс көзіне айналдыра алдым. Желілерде SMM және пиар бойынша коммерциялық, коммерциялық емес жобалармен жұмыс істеймін. Ең алғашқы жұмысым волонтерлік парақшаларды тегін жүргізуден басталды. Бұл мен үшін үлкен тәжірибе болды. Саланың қыр-сырымен танысқаннан кейін көлемді ұсыныстар түсе бастады. Бүгінде киім дүкені және үлкен компаниялардың парақшаларын дамытумен айналысамын. Тек пост жариялау емес, дизайн, мәтін жазу, маркетингтік статистика жүргіземін. PR саласындағы үлкен жұмыс – өткен жылы ұйымдастырылған «Күміс волонтер» жобасы. Сол жоба арқылы грант иегері атандық.− «Кызылорда волонтерлері», Америкалық елшіліктің қолдауымен құрылған «Go Viral» және «ЮНИСЕФ» ұйымдарының қызметіне тоқталсаңыз…−«Қызылорда Волонтерлеріне» 2019 жылы қосылдым. Әлі күнге дейін волонтер қызметіндемін. Түрлі жобада координатор боламын. «Birgemiz: UMIT» жобасы бойынша жұмыс атқарылуда. «GO VIRAL» туралы айтсам, негізгі мақсаты – Қазақстандағы медиа, бизнес саласын дамыту. Өткен жылы Қызылорда қаласының амбассадоры болдым. «ЮНИСЕФ» бойынша да жобалар бар. Жыл сайын өтінім беру арқылы басқа қалаға тәжірибе алмасу мақсатында барамыз. «ЮНИСЕФ» буллингке қарсы жоба ұйымдастырған болатын. Яғни, мектепте орын алатын жәбір көрсету тақырыбын қолға алдық. Мектеп оқушылырына онлайн және офлайн форматта сабақ жүргіздік. «Пайдасы бар карантин» жобасы қолға алынды. Карантин уақытында әлеуметтік желіде белсенді болып, түрлі челлендж ұйымдастырдық. Экология бағыты да шетте қалмайды. Алдағы уақытта жобалар ұйымдастырылмақ. Сол жобаларда ментор-аудармашы қызметінде боламын.− Тәжірибелі волонтер ретінде айтыңызшы, халық көбіне қандай жағдай бойынша көмекке жүгінеді?− Халық арасында әлі де біршама түсініспеушілік бар. Мысалы, қайырымдылық пен волонтерлікті шатастырады. Қайырымдылық – көбінде қаржылай &nbsp;көмек болса, волонтерлар ақша жинамайды. Кіші және үлкен гранттарға қатысып, волонтерлік жобаларға атсалысады. «Эко акция» ұйымдастырамыз. Осыны шатастырмаса екен дейміз. Ал халықтың жағдайына келсек, әлеуметтік, азық-түлік бағасының қымбаттауы сынды мәселе көп. Көпбалалалы аналар жиі көмек сұрайды. Қараусыз қалған қарт адамдар да аз емес. Осындайда үй жинау, аула тазалау, қажетті өнімді апару, тамақ пісіру секілді көмек көрсетеміз.− Бүгінде «Ejaksu» атты жеке жобаңыз бар. Оның мақсаты қандай?− Күміс волонтерлікте жұмыс істеп жүрген кезімде осы жоба туралы идея келді. Идеяның пайда болуына өзім бетпе бет келген мәселе себепкер болды. Әжем – қарт адам. Интернет, қосымшаларды қолдана алмайды. Сондықтан зейнетақысын алу үшін банкке барады, құжаттары үшін ХҚКО-да ұзын-сонар кезекте тұрады. Осы тұста егде жастағы адамдардың уақытын үнемдеу мақсатында компьютерлік сауаттылық тақырыбын қолға алуды жөн көрдім. Цифрландыру жүйесі тек жастарға ғана емес, барша азаматқа қолайлы болса екен деймін. 2021 жылы Astana HUB ұйымдастырған конкурсқа осы жобамен қатысып, 200 мың теңгені құрайтын кіші грант иегері атандым. Қызылорда қаласынан қатысушылар жиналып, волонтерлармен бірге сабақ өттік. Әлеуметтік желіні қолдану, банк қосымшаларын және egov.kz пайдалануды үйреттік.− Алдағы уақытта қандай жаңалықтармен қуантасыз?− Дәл қазір басты назарда – «Biz Birgemiz» жобасы. Төтенше жағдайлардың алдын алу, топ құру, көмек көрсету бағытында жұмыс істеудеміз. Келесі кезекте жеке жобамды ары қарай жалғастырсам деймін. Ойда жүрген 2-3 жоба бар, уақыттың еншісіне қарай жүзеге асырамын.− Облыс жастарының ахуалы қандай?− Волонтерлікте жүргеннен кейін жан-жақты жастармен тығыз байланыстамын. Ортамнан білімді, ақылды, көмекке дайын, жақсылық жасауға асығатын жастарды көремін. Тіпті, солардан мотивация аламын. Қоғамды жақсы жаққа өзгертуге тырысатын, тек волонтерлікте емес, кәсіпте де бой көрсетіп жүргені қаншама?! Әрине, волонтерлік кәсіп көзі емес. Егер адам таңдаған саласының нағыз маманы болса, қоғамға жаңа леп әкеледі. Алайда жастарға қарап келер жаңа толқынның мықты болатынын сеземін. Қоғамда жастардың қай әрекетіне болсын сын айтушылар табылады. «Әлеуметтік желіге желімдей жабысқан жастардан не күтеміз?» деген пікір жоқ емес. Бірақ бұл пікірге уәж айтқым келеді. Әлеуметтік желіні қолдану арқылы да пайдасын тигізіп жүрген жастар бар. Барлығы өзімізге байланысты. Қазақстанның болашағы бар деп нақты айта аламын. Егер жастар талпыныстан таймайтын болса, бұдан да жақсы деңгейге жететінімізге сенемін.Қызылордалықтардың арасында талантты, білімді, енді ғана ел назарын аударып келе жатқан ғылыми, техникалық бағыттағы мамандықтарды игеріп, түрлі жетістікке жетіп жүрген жастар көп. Оларға қарап, замандастарымның сондай батыл, шығармашылық идеяға толы, қоғам үшін пайдалы тұлға екендеріне қуанып, мақтанышпен қараймын. Облыста тұрақты ұйымдастырылып жүрген «Innofest» инновациялық идеялар байқауының қатысушылары жыл сайын жасарып, саны да, сапасы да артып келеді. Ал қатысушылардың көбеюі – бәсекеге қабілеттілікті арттырады. Өңір жастарында сан да, сапа да бар. Мен мұны нық сеніммен айта аламын.− Әңгімеңізге рақмет!

Аружан Әбдіржан: Волонтерлік – кәсіп көзі емес

<a href="https://kyzylorda-news.kz/">Kyzylorda-news.kz.</a> Қызылорда қаласы әкімінің тапсырмасына сәйкес түнгі рейд жұмыстары жалғасуда. Бүгін қала әкімдігі мен қалалық полиция басқармасының өкілдері жастар мен жасөспірімдер арасында құқық бұзушылықты болдырмау, оның алдын алу және олардың қауіпсіздігін қамтамасыз ету мақсатында түнгі рейд жұмыстарын жүргізді.&nbsp;Рейд жұмыстарын ұйымдастырудың басты мақсаты қылмыс пен құқық бұзушылықтың алдын алу болып табылады. Қазақстан Республикасының заңына сәйкес кәмелеттік жасқа толмаған жастардың түңгі 23:00 ден кейін заңды өкілінсіз көшеде немесе ойын сауық орталықтарында жүруі бойынша тексеру.Рейд барысында беймезгіл уақытта, яғни тұрғынжайдан тыс жерде сағат 23.00-ден кейін жүрген 10-ға жуық жасөспірім анықталып, әкімшілік құқық бұзушылық туралы заңының 442-бабына сәйкес ескерту берілді. Тексеру жұмыстары шаһардағы саябақтар мен аллеяларда, сонымен ойын-сауық нысандары, соның ішінде компьютерлік ойын клубтарында жүргізілді. Кәмелет жасына толмағандар арасындағы қылмыстардың алдын алу және оны болдырмаудағы бала тәрбиесінде ата-ананың рөлі мен міндеті орасан зор. Қала әкімдігінің хабарлауынша, аталған рейд жұмыстары алдағы уақытта тұрақты түрде жүргізіліп отыратын болады.

Қазақстан және Қызылорда облысының жаңалықтары