<a href="https://kyzylorda-news.kz/">Kyzylorda-news.kz</a> &nbsp;&nbsp;Жүргізуші куәлігін алуға байланысты өзгерістің көп болғаны белгілі. Тіпті тест тапсыру кезінде шикілік шығып, түк білмейтін адамдар да рөлде отыратын болды. Сондықтан куәлік алу жеңіл жолмен келмейді. Алғашқы сыннан өтпесе, меселі қайтпай қайта тапсыратындар бар. Ол үшін талап пен тәртіпке бағыну керек. Осы ретте «Қазақстанның автомектептер қауымдастығы» өңірдегі филиалының менеджері Әйкерім &nbsp;Шәмшімұратовамен сұхбаттасқан едік.–&nbsp;Қазір көбі көлік жүргізуге әуес. Кәмелет жасқа толғандар да бірден куәлік алуға ұмтылады. Айтыңызшы, автомектепті оқуға қай жас аралығындағы адамдар көп келеді?<blockquote>– Расымен де жүргізуші куәлігін алуға құлшынып жүргендер жетерлік. Негізі оқу барысында онлайн, офлайн және жеделдетілген курс қарастырылған. Автомектепті 16 жастан бастап оқуға мүмкіндік бар. Кейін 18-ге толған соң ХҚКО-ға барып, тест тапсырады. Осылайша жүргізуші куәлігін алуға хақылы.Автомектепте оқуға бір айда 25-30 адам тіркеледі. Толық тізім қалыптасқаннан кейін сабақты бастап кетеміз. Бітірген соң келесі топ ашылады. Әсіресе қыз балалар куәлік алу, көлік айдау жөнінде көп сұрап, оқуға да ынта қояды. Бұл 18-30 жас аралығын қамтиды. Тіпті 45-50 ге таяған ересектердің де қызығушылығы басым.</blockquote>– Жол-көлік апаты аз емес. Бұл жүргізушілердің жауапсыздығынан ба?<blockquote>– Қалада автокөлік көп. Қызылорда да Алматыдан кем емес. Яғни бізде де жиі кептеліс болатыны бәріне белгілі. Қазір екінің бірі көлік жүргізеді. Өз қалтасынан немесе несиеге рәсімдеп алып, теміртұлпарды тізгіндейді. Сондықтан тәртіп ортақ, талап қатаң болған жөн. Заң өкілдері де жол ережесіне мұқият қарағаны абзал. Оқыс оқиға орын алғанда ғана көлік толық тексеріледі. Ал қадағалау күнделікті жүргізілсе, апаттың алдын алуға болатын тәрізді. Кейде жүргізуші куәлігінсіз көлік айдайтындар жоқ емес. Оның үстіне жас жеткіншек те албырттықпен сан соғып қалады. Мәселен, «18-ге толып, куәлік алдым» деп жылдамдықты асыру қате ой. Бұл – жол ережесін бұзу, жеке басы мен қоғамға залал келтіру. Рас, көз көрген жердің бәрінде камера орнатылған. Дегенмен жол-көлік апаты азаяр емес. Сол себепті мәселені мұқият зерделеп, жүргізушілер де жауапкершілікті сезінгені дұрыс.</blockquote>– Автомектепте оқымай, жүргізуші куәлігін алу дұрыс па?<blockquote>– Оқымай, куәлік сатып алу дегенге қарсымын. Көлік айдауды бүге-шүгесіне дейін меңгеріп, ережені ескеру керек. Сонда қоғам қауіпсіздігі де қамтамасыз етілмек. Тиісінше бұл жүргізушінің амандығына да кепіл. Градус, жылдамдық шегі, жол ережесі мен белгілерін жадыда сақтау қауіптің алдын алады. Көлік жүргізуге қабілетті болғанмен, теориялық тұрғыда білімсіздік қателікке ұрындырады. Қысқасы тәжірибе жинауда автомектептің орны айрықша. Мұнда жол нұсқайтын, бағыт-бағдар беретін білікті мамандар болады. Тек таңдаудан жаңылыспау керек.Жалпы көлік жүргізудің де әдебі мен мәдениеті бар. Тіпті жолда өзге жүргізушілерге де құрмет көрсету соның айғағы. Мәселен, МАИ қызметкерлерінің алдында кінәлі болмас үшін белбеуді таққандай кейіп танытады. Бұл ережеге қырын қарауды көрсетеді. Әйтпесе қауіпсіздік жеке бастың сақтығы үшін қажет емес пе? Жол апаты кезінде ауыр жарақат алуға да осы себеп. Бастысы автомектепте оқу қорқынышты сейілтіп, дағдыны қаперде ұстауға даярлайды.</blockquote>–&nbsp;Сіздер көрсеткен бағыт бойынша біразы куәлік алған. Бұл –жоғары көрсеткіш. Жалпы, теориялық және практикалық сабақ қанша сағатқа жоспарланған?<blockquote>– Иә, көлік жүргізуді үйретуде кілтипан мен кемшілік жібермес үшін тырысып келеміз. Нәтиже жақсы, оқушылар да осал емес. Сынақтан сүрінбей өтіп, куәлікке ие болып жүр. Осылай жағымды жаңалығын жеткізгенде біз де қуанамыз. Практика барысында автомат пен механиканы меңгеруге мүмкіндік бар. Оқу үдерісінде автодром схемасы арқылы сабақ өткіземіз. Бұдан бөлек теориялық білім де беріледі.Негізі сабақтар оқу алаңында өтеді. Содан кейін автомобильдің минималды ағынымен екінші реттік жолдарға бағыт беріледі. Кейін курсант емін-еркін қимыл-қозғалысқа бейімделгенде қозғалысы көп жолдарға сілтейміз. Практикалық кезеңде кәсіби нұсқаушымен байланысып, бағдар алады. Бұл әлдебір нюанстарды біліп, икемделуге көмектеседі.Әр курсантқа 1 және 1,5 сағат арнаймыз. Ал қазір кешкі 17:00-ге дейін жұмыс істейміз. Өйткені қыс мезгілі болғандықтан жол көктайғақ және қараңғы. Дегенмен бұл білім сапасына әсер етпейтіні анық.</blockquote>– Мектеп бағдарламасына көлікті басқару, жол қауіпсіздігі сабағын қосуды құптайсыз ба? Мұның қоғамға қаншалықты қажеті бар?<blockquote>– Әрине, мұндай бастаманы қолдауға болады. Бастауыш сыныпта балаларға жолда жүру ережесі, бағдаршам жайында ақпараттар беріледі. Бұл баланың көлік алдынан ретсіз шықпай, көше бойында қауіпсіздікті сақтауына негіз. Олар саналы түрде бағдаршамға қарап, тәртіпті сақтайды. Сондықтан жоғары сыныпта да көлік басқару пәнін енгізсе нұр үстіне нұр. Есесіне теориялық білімі артып, ерте бастан белгі мен ережені санасына сіңіреді.Барынша көлік жүргізу мәдениетін қалыптастырған дұрыс. Заңда да қауіпсіздік жөнінде айтылғанмен, ереже бұзатындар табылып жатыр. Иә, статистикалық деректер бойынша жол-көлік оқиғалары төмендеген. Дегенмен күре жолда болатын апатты естен шығармаған жөн. Жақында Алматы қаласында болған апат та көпті ойландырғаны рас. Демек, сақтыққа салғырт қарауға болмайды. Ол үшін көлік жүргізуде сауатты болу қажет.</blockquote>&nbsp;Фото: freepik

Аймақта жүргізуші куәлігін алудың тәртібі қандай?

<a href="https://kyzylorda-news.kz/">Kyzylorda-news.kz</a> Арал ауданы балық шаруашылығы саласының қарқынды дамып, теңіз маржанын жергілікті брендке айналдырған өңір. Аудан аумағында маңызы бар Кіші Арал теңізінің 18 учаскесі, Сырдария өзені және 16 көл бар. Жалпы 21-і табиғат пайдаланушыларға ұзақ мерзімге берілсе, 1 (бір) көл резервте. Жалпы ата кәсіптің көкжиегін кеңітіп, балықшылықты дамыту жолында ауқымды істерді жүзеге асырып келе жатқан өңірде тек балық аулап, оны өңдеп қана қоймай, балық өсіріп, теңіз айдындарына жіберу, санын арттыру бағытындағы жұмыстар да жан-жақты қолға алынған. Солардың бір бағыты болып есептелетін облыс бойынша балық шаруашылығын дамытудың 2021-2030 жылдарға арналған өңірлік бағдарламасы бекітілген болатын. Бекітілген бағдарламада ауданға қатысты тауарлы балық өндірісін ұлғайту үшін 7 тауарлы көліміз тізімге енгізілді. Біздің бүгінгі айтпағымыз да осы тауарлы көлдер төңірегінде болмақ. Бүгінгі таңда сол бағдарлама негізінде 3 тауарлы көлге инфрақұрылым жүргізу үшін жоба-сметалық құжаттамалары әзірленді.&nbsp;ҚР «Жануарлар дүниесін қорғау, өсімін молайту және пайдалану» туралы 2004 жылғы 9 шілдеді No593 Заңның 1 бабының 72 тармағы және ҚР Ауыл шаруашылығы министрінің 2015 жылғы 14 қазандағы «Су айдындарына балық жіберу, су объектілерін балық шаруашылық мелиорациялау жөніндегі жұмыстарды жүргізу қағидаларын бекіту туралы» No18-05/928 бұйрығының 14 тармағында келтірілгендей тауарлы көлдерде қазірде кешенді жұмыстар істеліп жатыр. Нақтырақ айтар болсақ, су айдындарындағы қатты өсімдіктерді шабу, су жануарларының мекендеуіне қолайсыздық тудыратын жағдайларды болдырмау, балықтардың уылдырық шашу жерлеріне өтуін қамтамасыз ету, мұз ою, балықтарды құтқару шаралары жүргізілуде. Расында Ақшатау Сорғақ, Қаракөл, Шөмішкөл, Мақпал көлі мен Тұщы, Алаша, Домалақ көлдері мен резервтегі Ақбілектегі осындай жұмыстар балықтардың өсуіне оңтайлы жағдай тудырып, экономикалық тиімді жағдайға алып келеді. Бүгінде мемлекет тарапынан да балық шаруашылығын қолға аламын деушілерге қолдау көп. Соның бір үлгісі ретінде Қызылорда облысы бойынша жергілікті бюджеттен 2023 жылға балық азығын субсидиялауға 9 млн 114 мың теңге және республикалық бюджеттен инвестициялық субсидиялауға 17 млн 568 мың теңге көлемінде қаржы бөлінді. Субсидиялау акваөсіру және инвестициялық салымдарды субсидиялауға арналған секілді негізгі 2 бағытта жүргізіледі. Алғашқы бағыты бойынша балық азығын сатып алудың 30 пайызын өтеу және биологиялық негіздемені әзірлеу, балық өсіру материалын, дәрілік препараттарды, аналық-толықтыру үйірін сатып алудың 50 пайызын өтеу қарастырылса, бұдан бөлек, балық өсіруші субъектісінің инвестициялық салымдар кезінде шығыстарының бір бөлігін өтеу бойынша субсидияланады. Ал осындай қолдаудан ниетті азаматтар субсидия алуға арналған өтінімдерді «kezekte.kz» субсидиялаудың ақпараттық жүйесі арқылы бере алады. Сонымен қатар тауарлы көлдерде өзге көлдермен салыстырғанда тыйым салу заңдылықтарында да өзгерістер бар. ҚР Ауыл шаруашылығы министрлігі 2015 жылғы 24 шілдедегі Балық ресурстары мен басқа да су жануарларын, олардың бөліктері мен дериваттарын пайдалануға шектеу мен тыйым салу No190 бұйрығының 1 тармағы 3 тармақшасында «Балық аулау қағидаларында айқындалған ғылыми-зерттеу, бақылау, мелиоративтік аулауды, өсімін молайту мақсатында аулауды жүзеге асыруға, сондай-ақ тауарлы балықты жасанды өсіру үшін пайдаланатын су көлдерінде балық аулауға тыйым салу қолданылмайды» делінген. Сондай-ақ халық арасында тарап кеткен қытай ауы атауымен танымал моноталшықтал жасалған синтетикалық аулардың бәріне бірдей тыйым салынбаған. Міне, тауарлы көлдердің тиімділігін осыдан-ақ аңғаруға болады. Демект тауарлы көлдердің жұмысын жүйелендіру арқылы біз балық шаруашылығы саласының тиімді тұстарын одан ары арттыра аламыз.

Аралда тауарлы көлдерге инфрақұрлым жүргізілмек

<a href="https://kyzylorda-news.kz/">Kyzylorda-news.kz.</a> Байдүйсен Мәдиев – жан сарайы бай, елгезек мінезді, кішіпейіл, іскер азамат. Ол Шиеліде көп балалы отбасында туып өскен. Радиотехникаға деген қызығушылығы бесінші сыныптан басталған.Бала күнінен жаңа дүниеге құмар ол өздігінен теледидар, радио және басқа да тұрмыстық техникаларды жөңдеп үйренеді. Ең әуелі үйдегі істен шыққан техникаларға жан бітіре бастайды. Әкесі ұлының талпынысын байқап: «Жарайсың балам, осындай талпыныспен нағыз шебер боласың!» – деп жігерлендіретін көрінеді. Әкесі Қайырбек ұлының өтінішімен «Юный техник», «Моделист-конструктор», «Техника молодежи» және «Радио» журналдарына жазылатын болған. Ал ұлы сол кездегі танымал басылымдардың арқасында кәсіптің көптеген қыр-сырын меңгерген.Одан әрі оның өмірі сәулет-құрылыс техникумында жалғасады. Оқып жүріп әскер қатарына шақыртылған жас азамат Отан алдындағы борышын өтеуден қашпайды. Ауылға оралған соң, отбасына материалдық көмек көрсету мақсатында Шиелі су шаруашылығы кәсіпорнына байланысшы болып жұмысқа орналасады. Бірақ ол жаны қалаған хоббиін ұмытқан емес. Туған-туыс, дос-жаранның теледидарын жөңдеп беретін.Түрлі техниканың ақауын тауып машыққан Байдүйсен Мәдиев нарық заманында өзінің ойында жүрген шеберханасын ашады. Осы уақытқа дейін ол клиенттік базаны құрып та үлгерген. Ол туралы шиеліліктер телерадиоаппаратуралар мен тұрмыстық техникалардағы ақаудың себебін тез анықтап, өз ісінің нағыз шебері екенін айтады. Бұл әрине, білім мен біліктіліктің жемісі.Өз ісінің кәнігі маманына айналған кейіпкеріміз бүгінгі таңда шәкірт баулуды да назардан тыс қалдырмаған. Талаптанған жастарға бар білгенін үйретіп, 10-ға жуық шәкірт тәрбиеледі. Соның нәтижесінде шәкірттері өз шеберханаларын ашып, нәпақасын маңдай терімен айырып жүр екен.Байдүйсен Мәдиевтің пікірінше, бұл мамандыққа сұраныс кеңес заманында болған, қазір де көбеймесе кемімеген. Өйткені жан басына шаққандағы электронды тұрмыстық техниканың саны жылдан жылға артып келеді. Жаһандану дәуіріне қадам басқалы біршама дүние смарт жүйеге енуде. Келешекте саусақпен түртіп, көптеген жұмысты үйде отырып істеуге болады деген болжам да бар. Демек, бұл маман иелері болашақта көп сұранысқа ие болуы бек мүмкін.

Байдүйсен Мәдиев: Техника тілін білу – заман талабы

<a href="https://kyzylorda-news.kz/">Kyzylorda-news.kz.</a>&nbsp; Біздің күнделікті тұрмыс-тіршілігімізге қатысты &nbsp;деректерді жинау, сақтау және өңдеу, оларды талдау және түсіндіру – статистика саласының негізгі міндеті. Дайын деректер жоспарлау мен басқаруда қолданылады. Газет тілшісінің Стратегиялық жоспарлау және реформалар агенттігі Ұлттық статистика бюросының облыс бойынша департаментінің басшысы Қайрат Әбсұлтановпен әңгімесінде түрлі статистикалық мәліметтерге шолу жасалды.– Қайрат Байғабылұлы, қандай да бір елді сипаттағанда, ең алдымен ауызға ілінетін дерек – халық санының көрсеткіші. Қазір облыстағы халық саны қанша және гендерлік аспектідегі қатынасы мен ұлттық құрамына тоқталсаңыз…– Статистика біздің қоғамның бет-бейнесін, бағыт-бағдарын көрсетеді. &nbsp; 2021 жылы өткізілген халық санағының деректері бойынша облыстағы халық саны – 814,9 мың адам. Ал 2024 жылғы 1 қаңтарда &nbsp;841,8 мың адам болды. Оның ішінде қалалықтар – 395,1 мың адам (46,9%), ауылдықтар – 446,7 мың адам (53,1%). Гендерлік аспектіде 1000 ер кісіге 990 әйелден келеді. 2023 жылдың 1 қаңтарындағы деректерге қарағанда, қазақтардың үлес салмағы – 96,1 пайыз, орыстар – 1,5 пайыз, яғни 12,5 мың адам, ал корейлер – 1 пайыз, яғни &nbsp;8,2 мың адам, қалған ұлыстардың үлес салмағы 1,4 пайызды құрады. Ең қызықты мәлімет, &nbsp;ҚР бойынша қазақтардың ең көп шоғырланған жері, яғни 99,8 пайыз қазақ тұратын жер – Арал ауданы.– Қызылорда облысы туу деңгейі бойынша нешінші орында?– АХАТ органдары ұсынған азаматтық хал актілері жазбаларындағы мәліметтерді өңдеу нәтижесінде, 2023 жылғы қаңтар-желтоқсанда 19896 нәресте туғаны көрсетілген. Бұл 2022 жылдың қаңтар-желтоқсанына қарағанда 3,8% &nbsp;аз. Туудың жалпы коэффициенті 1000 адамға 23,75-ті құрады. 1000 тұрғынға шаққандағы туу көрсеткіші бойынша біздің облыс Шымкент қаласы, Маңғыстау, Түркістан облыстарынан кейінгі төртінші орында.– Өңір &nbsp;халқының өмір сүру ұзақтығы жайлы не айтар едіңіз?– 2000 жылдан бері облыста халықтың өмір сүру ұзақтығы көрсеткішінің өсу тенденциясы байқалады. Сонымен бірге гендерлік белгі бойынша бұл көрсеткіштің дифференциациясы сақталады. 2022 жылы күтілетін өмір сүру ұзақтығы 74,21 жас болатын, ерлерде 70,27, ал әйелдерде 78,18 жасты көрсетті.– Қызылордалықтар қай елдерге қоныс аударады?– Көші-қон қызметі органдары ұсынған мәліметтерді өңдегенде, 2023 жылғы қаңтар-желтоқсанда облысымызға тұрғылықты тұруға келіп тіркелгендер саны 25421, облыстан кеткендердің саны 32617 адам болды, көші-қонның айырымы 7196 адам. Алыс-жақын шетелдерден 24 адам, республиканың басқа облыстарынан 7964 адам келген. Облыстан көшкен 15118 адам немесе &nbsp;46,4%-ы көбінесе республиканың басқа облыстарына қоныс аударды. Шетелдерге 66 адам, көбісі Ресейге, Өзбекстанға, Германияға, Израильге, Канадаға, Түркияға көшіп кеткен.– &nbsp;2023 жылдың қорытындысы бойынша облыстың әлеуметтік-экономикалық жағдайы қандай?– Алдын ала деректер бойынша облыстың әлеуметтік-экономикалық дамуының барлық негізгі көрсеткіштерінде оң өсім байқалды. Өнеркәсіп өнімінің көлемі &nbsp;3,6%, құрылыс жұмыстарының көлемі &nbsp;40,4%, негізгі капиталға салынған инвестиция 14,2%, пайдалануға берілген тұрғын үйдің жалпы алаңы 8,4%, көлік &nbsp;7,8%, сауда &nbsp;4,7%. Сыр өңірі республикада өңдеу өнеркәсібі көлемінің өсу қарқыны бойынша (33,5%) бірінші орында, ауыл, орман және балық шаруашылығының жалпы өнімінің көлемі бойынша (3,7%) екінші орында.– Облыста өңдеу өнеркәсібі қалай дамып келеді?– Облыстың өнеркәсіп құрылымында өңдеу өнеркәсібі соңғы 10 жылда өсу процесін көрсетті. 2010 жылы &nbsp;4%, 2023 жылы &nbsp;30%. Өткен жылмен салыстырғанда металлургия өндірісі &nbsp;68,2%, өзге де бейметалл минералдық өнімдер &nbsp;46,6%, резеңке және пластмасса бұйымдар өндіру 17,9%, машина жасау 14,7% ұлғайды.– Облыста құрылыс қарқынды жүріп жатыр, оған қандай жергілікті құрылыс материалдарын пайдалана аламыз?– Тұрғын үй құрылысының қарқынды өсуі құрылыс материалдары өндірісі көлемінің артуына әсер етті. Құрылыс индустриясына облысымыздан силикат және күйдірілген кірпіш, кең көлемдегі темірбетон, қиыршық тастар мен ұсақталған тастар, әк тас, т.б құрылыс материалдары шығарылуда. 2023 жылдың қаңтар-желтоқсанында 385,7 мың текше метр табиғи құм, 2328,7 мың текше метр қиыршық тас, 76,5 мың тонна саз, 879,4 мың текше метр кірпіш, 189 мың тонна бетоннан жасалған құрылыс конструкциялары, 13850 тонна пластмассадан жасалған құбырлар, 157 тонна пластик есік-терезе, 39 мың тонна әк шығарылды.– Қызылорда облысында күріш қанша гектарға егілді?– Күріштің нақтыланған егіс алқабы &nbsp;88862,6 гектар. Аудандар арасында күріштің ең көп егістік алқабы Сырдария (23811 гектар) мен Жалағаш ауданына тиесілі (19800 гектар).– Ақпараттық технология барлық қызмет салаларына енгізілген қарқынды даму кезеңіндеміз. Осы орайда статистикада қандай жаңалық бар?– Алғашқы деректерді жедел және сапалы жинауды қамтамасыз ету және респонденттерге түсетін жүктемені азайту үшін электронды цифрлық қолтаңбаны пайдалана отырып, «Онлайн деректерді жинау» ақпараттық жүйесі әзірленді. Респонденттердің көбісі есептілікті онлайн режимде тапсырады. Олардың (үй шаруашылықтары мен кәсіпорындардың) дәстүрлі қағаз түріндегі сауалнамасынан деректерді жинаудың компьютерлік жүйесіне, сондай-ақ мобильді қосымша арқылы бағаны цифрлық тіркеуге көшу процестері жалғасуда.&nbsp; Пайдаланушылар және респонденттермен әрдайым кері байланыс орнату мақсатында Ұлттық статистика бюросының фронт-офисі құрылды. Фронт-офис келесі арналарды пайдаланады: «1446» Бірыңғай байланыс орталығы, соның ішінде «Бір терезе» қызметі /статистикалық нысандарға қатысты барлық сұрақтарыңыз бойынша/ Telegram-bot @statgovkz_bot/статистикалық есептілік нысандарын жетілдіру бойынша ұсыныстарды жолдау, статистикалық нысандар бойынша қателерді сипаттайтын скриншот жіберу мүмкіндігі/ www.stat.gov.kz интернет-ресурсының «Онлайн-кеңесші» модулі Орталықтандырылған кіру нүктесін құру барлық өтініш көздерін біріктіруге мүмкіндік береді (Бірыңғай байланыс орталығы, онлайн кеңесші, Телеграм-бот, «бір терезе» қызметі). Осылайша бюромен байланысудың ыңғайлы және жылдам әдісі пайдаланылады.– Респонденттер статистикалық есептілікті тапсырмаған жағдайда &nbsp;оларға қандай шара қолданылады?– Алғашқы статистикалық деректерді белгіленген мерзімде ұсынбау, дәйексіз деректерді ұсыну белгіленген тәртіпті бұзу болып саналады және &nbsp;ол үшін ҚР Әкімшілік құқық бұзушылық туралы кодексінің 497-бабына сәйкес әкімшілік жауаптылық көзделген.– Облыс экономикасының салалары бойынша деректерді қайдан көруге болады?– Барлық статистикалық жарияланымдардың электронды нұсқасы www.stat.gov.kz &nbsp;интернет-ресурсында орналасқан. Бұл – &nbsp;ең өзекті статистикалық деректерді тарату үшін ең жылдам және ең жақсы тәсіл. Статистика департаменті жыл сайын статистика салалары бойынша 80-нен астам электронды кесте жасайды. (кезеңділікті есепке алмағанда). Барлық статистикалық жарияланымдар қазақ, орыс және ішінара ағылшын тілінде ұсынылады.&nbsp;Фото: gov.kz

Статистика қоғамның бағыт-бағдарын көрсетеді

<a href="https://kyzylorda-news.kz/">Kyzylorda-news.kz</a> «Тәуелсіздік ұрпақтары» грантын 63 аралдық кәсіпкер еншіледі деп хабарлайды Kyzylorda news ақпарат агенттігі.<blockquote> – 2017 жылы қызымның үстіне майда бөртпелер шықты. Ана баласы үшін қандай нәрсеге де дайын тұрады емес пе?! Мен де қызымның денсаулығына қатты алаңдадым. Сол уақытта эфир майы арқылы, басқа да қоспалар қосып оның оң әсер беретінін білдім. Сосын осындай емдік қасиеті бар сабынды жасауды қолға алып, бірнеше данасын жасадым. Алғашында жақындарым және сабынның пайдасын естіген бірнеше адам сатып алды. Бірақ ол уақытта қазіргідей жарнамалауға мүмкіндік аздау болды. Сондықтан сұраныс та аздау болғандықтан, ол кәсіптен қол үзіп кеттім. Оны кәсіп қыламын деп ойламаған да болатынмын, - депті жергілікті кәсіпкер Арсена Кушжанова.</blockquote> Биыл ауданға арнайы келген Қызылорда облысы кәсіпкерлер палатасының директоры Пірмұхаммед Сыздықов сол кезде көрмеге қойылған Арсенаның өнімдерін көріп, ерекше қызығушылық танытқан. Қолдаудың ерекше болатынын айтқан-ды. Міне, сол жерлесіміз өзінің іскерлік қабілетінің арқасында тағы бір мүмкіндікке ие болды. Анығырақ айта кетейік. Таяуда ғана Астанада бизнес, ғылым, мәдениет, медиа және ақпараттық технологиялар саласындағы үздік 30 жобаның авторына «Тәуелсіздік ұрпақтары» гранты табысталды. Салтанатты шараға Мәдениет және ақпарат министрі Аида Балаева, Парламент Мәжілісінің депутаттары, ҚР Президенті жанындағы жастар саясаты кеңесінің өкілдері, мемлекет және қоғам қайраткерлері қатысты.&nbsp; Атап өту керек, Мемлекет басшысы 2021 жылы «Тәуелсіздік ұрпақтары» грантын жастардың жаңа және қолданыстағы бастамаларын қолдау мақсатында тағайындаған болатын. Грант аясында 63 адам өз жобасын Қазақстанда ғана емес, шетелде де түрлі салаларда табысты жүзеге асыруда. 30 үздік жобаның қатарынан табылған аралдық кәсіпкер Арсена Кушжанова 3 млн. теңгенің грантын иеленді.&nbsp; Үздіктің марапатын Мәдениет және ақпарат министрі Аида Балаева табыстады. «Aral Organic» жеке кәсіпкерлігінің иесі Арсена Кушжанова түрлі өсімдіктің қоспасынан сабын дайындайды. Кәсіпкердің өнімі көп сабынға ұқсамайды. Ол түйе, ешкі сүті, жантақ қосылған емдік қасиеті бар сабын шығаруда. Бұл сабын түрлі тері ауруларына және терінің құрғауына қарсы емдік қасиеті бар екен. Арсенаның емдік әрі хош иісті сабыны «Қазақстанның үздік тауары-2023» өңірлік көрме-байқауында-ақ сұранысқа ие болды. Кәсіпкер қазіргі таңда сабынның 11 түрін шығарып отыр. Соның ішінде 3 сабын емдік қасиетке ие. Өндірілген сабынның құрамында хош иістер, бояғыштар мен консерванттар жоқ, тек табиғи ингредиенттер бар. Судың орнына ешкі мен түйе сүтін қосады, сонымен қатар түйе тікенегі қосылған шөп сабынының рецептін ойлап тапқан.

«Тәуелсіздік ұрпақтары» грантын 63 аралдық кәсіпкер еншіледі

<a href="https://kyzylorda-news.kz/">Kyzylorda-news.kz.</a> &nbsp;Батырбеков Азиз Жұмаділдаұлы «Kyzylorda-news.kz» ақпарат агенттігінің бас редакторы қызметіне тағайындалды.Батырбеков Азиз Жұмаділдаұлы 1983 жылғы 6 желтоқсанда Қызылорда облысы, Шиелі ауданында дүниеге келген. Астана қаласындағы Қазақстан-Ресей университетін филология мамандығы бойынша бітірген. Магистратураны Еуразия ұлттық университетінде оқыған.Еңбек жолын 2006 жылы Қызылорда гуманитарлық заң колледжінде оқытушы болып бастаған.2007-2009 жылдары Шиелі ауданындағы №45 «Ақ Орда» мектеп-гимназиясында мұғалім;2009-2010 жылдары Астана қаласындағы Қазақ технология және бизнес университетінде факультет деканының тәрбие ісі жөніндегі орынбасары;2010-2012 жылдары Қазақстан Республикасының Төтенше жағдайлар министрлігі Астана қаласының төтенше жағдайлар жөніндегі департаменті «Мемлекеттік тілді дамыту және аударма» бөлімінің бастығы;2012-2017 жылдары Шиелі аудандық «Өскен өңір» газетінде тілші, бөлім меңгерушісі;Қызылорда қалалық «Ақмешіт апталығы» және облыстық «Сыр бойы» газеттерінде тілші болып қызмет атқарған.2018 жылдың қаңтарынан қыркүйек айына дейін облыстық «Сыр бойы» газетінің жауапты хатшысы болған. 2018-2020 жылы аудандық «Жалағаш жаршысы» газетінің бас редакторы лауазымын абыроймен атқарып келді.2020-2024 жылы қалалық «Ақмешіт апталығы» газетінің бас редакторы қызметін атқарды.&nbsp;

«Kyzylorda-news.kz» ақпарат агенттігінің бас редакторы тағайындалды

<a href="https://kyzylorda-news.kz/">Kyzylorda-news.kz.</a>&nbsp;Қазалы ауданында қоғам өмірінің қалыпты болуы үшін ерен еңбек етіп келе жатқан сала көп. Сондай салалардың бірі – Ұлттық сараптама орталығының Қазалы аудандық бөлімшесі десек артық айтқанымыз емес. Жақында тұрғындардың санитарлық-эпидемиологиялық салауаттылығын сақтауда көптеген жылдардан бері қалтқысыз қызмет қылып келе жатқан орталық басшысымен сұхбаттасып, мекеменің өткенін өлшеп, алға қойған мақсат-жоспарын біліскен едік.&nbsp;– Азиза Итешқызы, білуімізше, Ұлттық сараптама орталығы – дәл нәтиже алу үшін көптеген процестер мен процедуралар жүргізілетін үлкен зертханалық желі. Жалпы, орталықтың қызметі туралы толыққанды айтып өтсеңіз...&nbsp;– Иә, Ұлттық сараптама орталығы қызмет аясы кең және денсаулық сақтау жүйесінің маңызды бөлігі болып табылады. Біздің басты міндетіміздің бірі – халықтың санитарлық-эпидемиологиялық салауаттылығын қамтамасыз ету. Бір сөзбен айтқанда, бұл – жоғары кәсібилікпен қатар табандылық, шыдамдылықты қажет ететін күрделі іс.&nbsp;«Ұлттық сараптама орталығы» Қазалы аудандық бөлімшесінде Санитарлық-гигиеналық зертханасы, электромагнитті өлшеулер, ұлы заттар анықтау зертханасы, бактериологиялық және паразитологиялық зерттеулер зертханасы, радиологиялық зертханалар, аса қауіпті инфекциялар және ауыр металлдар тұздары, ауадағы зиянды заттарды анықтайтын зерттеулер жасалады. Бұдан бөлек, дезинфекция, дезинсекция және дератизация қызметтері, паразитарлық және аса қауіпті аурулардың тасымалдағыштарына (кене, маса, москит) қарсы энтомологиялық бөлімдері жұмыс жасаймыз.&nbsp;Мұнда мамандар жоғарыда аталған іс бойынша әртүрлі міндет атқарады. Соның ішінде, дезинфекциялық қызметтердің жұмысын ерекше атап өткім келеді. Олар аптасына жеті күн дезинфекциялық өңдеу жүргізеді, ал, төтенше жағдай кезінде жұқпалы ауру аймақтарында тәулік бойы халыққа қызмет етеді. Сонымен қатар, мамандар халықаралық стандарттар мен ережелерге сәйкес азық-түлік және азық-түлік емес тауарлардың сапасын зертханалық талдаудың принциптері мен әдістерін енгізу бойынша жұмыс жүргізіп жатыр.&nbsp;– Түсінуімізше, орталық қалыпты жұмыс жасауы үшін мамандардың біліктілігі мен бөлімшенің халықаралық стандарттарға сай болуы маңызды. Жалпы Халықаралық стандартқа сайсыздар ма?&nbsp;– Ең әуелі, біз аудан көлемінде жоғары санатты, тәжірибесі мол мамандармен жұмыс жасайтын Халықаралық стандарттарға сәйкес аккредиттелген жалғыз зертхана екенімізді мақтанышпен айтқым келеді.&nbsp;Жалпы, «Ұлттық сараптама орталығы» Қызылорда облысы бойынша Қазалы аудандық бөлімшесі Сәйкестікті бағалау саласындағы аккредиттеу туралы Қазақстан Республикасының 2008 жылғы 5 шілдедегі N 61-IV Заңына сәйкес Қазақстан Респуликасының аккедиттеу жүйесінде «Сынақ және калибрлеу зертханаларының құзыреттілігіне қойылатын жалпы талаптарға сәйкес тіркеуден өтіп, аккредиттеу аттестатын алдық.&nbsp;«Қазақстан Республикасының Биологиялық қауіпсіздігі туралы» заңның 31-бабының 1-тармағына сәйкес «Биологиялық қауіпсіздік туралы» 21.05.2022 жылы шыққан 122 –VII бұйрығына сәйкес «ҚР ДСМ Санитариялық-эпидемиологиялық бақылау комитеті Қызылорда облысының санитариялық-эпидемиологиялық бақылау департаменті» республикалық мемлекеттік мекемесінен арнайы құрылған режимдік комиссия рұқсатымен III-IV топтық патогендік биологиялық агенттермен жұмыс жасауға диагностикалық зерттеулерге рұқсат құжаттамамыз да бар.&nbsp;– Өткен жыл Қазалы ауданына қарасты көптеген мекеме орындарына жемісті болды. Ал, сіздер үшін ше?&nbsp;– Әрине, жемісті болды деп айта аламын. Мәселен, өткен жылдың жетістіктерінің бірі – «Ұлттық сараптама орталығы» Қазалы аудандық бөлімшесі (СЭС) ғимараты 2023 жылы арнайы зертханаларға сай келетін санитариялық-эпидемиологиялық талаптарға сәйкес үлкен күрделі жөндеуден өтті.&nbsp;Бөлімше облыстық филиал тарапынан 10 жаңа қондырғылармен жабдықталды. Атап өтсек, атмосфералық ауадағы зиянды, улы заттарды анықтайтын ГАНК-4 қондырғысы берілді. Бұдан бөлек, Қазалы, Арал, Қармақшы аудандары көлемінде мониторингке сәйкес жоспарлы жұмыстар атқарылуда, зерттеу мүмкіндіктері кеңейіп, зерттеу нәтижелері жақсаруда. Қазалы аудандық бөлімшесі ұйымдастыру іс шараларын жоспардағы басым бағыттарға сәйкес 100 пайызға атқарды.&nbsp;– Жоғарыда мекеменің күрделі жөндеуден өткендігіне тоқталдыңыз. Осыған орай «Ұлттық сараптама орталығы» Қазалы аудандық бөлімшесінің қызметінде өзгерістер бар ма? Жалпы, клиникалық-диагностикалық тексерулерді (медосмотр) жүргізіп жатырсыздар ма?&nbsp;– Өте орынды сұрақ. Орталық – Әйтеке би кенті, Жалаңтөс бахадүр 42 мекен-жайы бойынша бұрынғы атауымен (СЭС) екі қабатты ғимараттың бірінші қабатында СЭББ мекемесімен бірлесе орналасқан.&nbsp;«Ұлттық сараптама орталығы» Қазалы аудандық бөлімшесі (СЭС) басқа мекен-жайға көшпегенімізді, өз орнымызда екенімізді айта кетейін, сондай-ақ халыққа көрсететін қызметтер тізіміне де тоқталсақ. Мұнда клиникалық-диогностикалық зерттеулер, медициналық бақылау бактериологиялық және паразитологиялық зертханасында алдын ала бақылап-тексеру (медосмотр), науқаспен қарым-қатынаста болған адамдардан, лагерьге баратын балаларға микробиологиялық зерттеулер жасалуда.&nbsp;Тағы дезинфекция, дезинсекция және дератизация қызметтері, паразитарлық және аса қауіпті аурулардың тасымалдағыштарына (кене, маса, москит) қарсы қызметтерін жүргізу мен мемлекеттік тіркеу кезінде сараптамалық қорытынды, гигиеналық оқыту және өндірістік бақылауға отырғызу қызметтері жүргізіліп жатыр.&nbsp;– Өндірістік бақылауға не жатады? Түсіндіріп өтсеңіз...&nbsp;– Халықтың санитарлық-эпидемиологиялық жағдайын жақсарту мақсатында азық-түлік өндіру, жүзеге асыру, оны сақтау және тасымалдау барысында заңды, жеке тұлғалармен ұйымдастырылып, өткізілетін іс-шараларды орындау кезінде санитариялық-эпидемиологиялық ережелердің қадағалануын бақылауды өндірістік бақылау дейміз. ҚР Денсаулық сақтау министрлігінің 2023 жылғы 7 сәуірдегі 62 бұйрығымен бекітілген «Өндірістік бақылауды жүзеге асыруға қойылатын санитарлық-эпидемиологиялық талаптар» санитариялық қағидасын орындау организацияларға міндеттелген, яғни, бізге де.&nbsp;Жалпы, мақсатына келер болсақ, тамақтан улану, жіті ішек жұқпалары және жұқпалы емес аурушаңдықтардың алдын алу, объектідегі санитарлық заңбұзушылықтарға жол бермеу және заңнамада қарастырылған санитариялық-эпидемиологиялық іс-шараларды орындау жатады. Тағы қоғамдық тамақтану орындарында жүзеге асырылатын азық-түліктердің сапасын және қауіпсіздігін қамтамасыз ету де бар.&nbsp;Осы талаптарды орындауда аудан көлеміндегі барлық мемлекеттік мекемелер және өнеркәсіптік кәсіпорындар (оның ішінде радиациялық объектілер), тамақ өнімдерін өндіру объектілері, коммуналдық нысандар сынды орындар өндірістік бақылаудан өтуі керек. Өндірістік бақылаудың құны зерттеу көлеміне байланысты және тікелей зертхана прейскуранты бойынша қанша тұратыны туралы «Ұлттық сараптама орталығы» Қазалы аудандық бөлімшесінің мамандары толық ақпаратымен қамтамасыз етіледі.&nbsp;– Соңғы уақытта елде ауызсу тапшылығын айтпағанда, оның әр өңірде әртүрлі, ластануы өзекті мәселе болып отыр. Қазір Қазалы аудандық сараптамалық орталық ауызсудың жағдайын қалай зерттеп жатыр? Мұнда қандай мәселелер бар?&nbsp;– Зертхана мамандары ағымдағы соңғы екі жылда ауыз су сапасына мониторинг жүргізу аясында суға санитарлық-химиялық сараптама жүргізді. Сол зерттеулер нәтижесінде 2022 жылы 322 сынаманың 21-і сәйкессіз болса, 2023 жылы 352 сынаманың 2-еуі сәйкессіздік көрсеткен. Судың санитарлық-химиялық зерттеулерінен басқа, ауызсудың қауіпсіздігінің бактериологиялық, вирусологиялық және радиологиялық көрсеткіштеріне мониторинг жүргізіледі. Бактериологиялық зерттеулер зертханасы 2022 жылы 280 сынаманың 28-і сәйкессіздік көрсетсе, 2023 жылы 405 сынамадан сәйкессіздік анықталмаған. Бұл көрсеткіштерге қарасақ, ауданда 2023 жылы су сапасының жақсарғанын байқауға болады.&nbsp;– Орталық басшысы ретінде мекеменің биылғы жылға, алға қойған мақсат-міндеті, жоспарымен бөліссеңіз...&nbsp;– Біз алдағы уақытта да, қоғамдық денсаулық сақтау қызметі бола отырып, азаматтардың денсаулығы мен өмір сүру сапасын жақсарту, сонымен қатар, денсаулық сақтау жүйесін әрі қарай дамыту мақсатында халықаралық стандарттарға сәйкес, сапалы және қажетті қызметтерді ұсынатындығымызды айтқым келеді.&nbsp;– Сұхбатыңыз үшін рахмет!

Қазалы ауданындағы Ұлттық сараптама орталығының бөлімшесі серпінді қызмет етуде

<a href="https://kyzylorda-news.kz/">Kyzylorda-news.kz.</a>&nbsp;Салық − кез келген өркениетті мемлекеттің негізгі кіріс көзі. Әлемнің қандай мемлекетінде болмасын, табысқа не пайдаға салық салынады. Бүгінде елімізде салықтың 76 түрі болса, оны өтейтін 2 млн 300 мың салық төлеуші бар. Мемлекеттік кірістер комитеті салығын уақытылы өтейтін азаматтар аз емес дейді. Десек те, 79 мыңға жуық адам салық төлеуден жалтарып жүрген көрінеді. Олардың мемлекет алдындағы жалпы қарызы 543 млрд теңгеден асқан.Президент Қасым-Жомарт Тоқаев 2022 жылғы Қазақстан халқына жолдауында ҚР «Салық және бюджетке төленетін басқа да міндетті төлемдер туралы» Кодексін халыққа түсінікті, қолдануға оңай, салық есептіліктерін оңтайландыру бағытында қайтадан жазуды тапсырған болатын. Бүгінгі күні Салық кодексі қайтадан әзірленуде. Дегенмен біздің өңірде салық төлеу мәселесі қалай жүруде, қандай жұмыстар атқарылды? Бұл туралы облыс бойынша мемлекеттік кірістер департаментінің басшысы &nbsp;Ғани Амановпен әңгімелескен едік.− Президенттің өткен жылғы Жолдауы салықтың рөлін күшейтті. Ол алдағы уақытта елдегі экономикалық, әлеуметтік салаларды жаңғыртудың негізгі тетігі болмақ. Ғани Мырзағабылұлы, бюджетті тиімді игеруде қандай жұмыстар атқарылды?&nbsp;−Бюджеттің кіріс бөлігін және мемлекеттің экономикалық қауіпсіздігін қамтамасыз ету, &nbsp;салық салу мен оны өндіру жүйесін ұдайы жетілдіріп отыру, сондай-ақ салық төлеушіге қолайлы жағдай жасау арқылы сапалы мемлекеттік қызмет көрсету− кірістер органдарының басты &nbsp;міндеті. Осыған сәйкес былтыр аймақта мемлекеттік бюджетке 59млрд теңге артығымен қамтамасыз етілді. Оның ішінде республикалық бюджетке &nbsp;28 млрд теңге, жергілікті бюджетке 31 млрд теңге. &nbsp;Өткен жылдың сәйкес кезеңімен салыстырғанда жергілікті бюджет түсімінің өсу қарқыны 138% құрап отыр. Бүгінгі күннің басты талаптарының бірі – салықтық және кедендік әкімшілендіруді жетілдіру арқылы салықты сапалы әрі мәдениетті басқару.&nbsp; Осы орайда департамент тарапынан салықтық және кедендік әкімшілендіру бағытында &nbsp;бірнеше мақсатты топтар құрылып, нәтижесінде бюджетке қосымша 19,2 млрд теңге өндірілді. Облыс әкімдігінің қолдауымен салық базасын ұлғайту бағытында &nbsp;уәкілетті органдармен бірлескен түрде біршама жұмыстар жүргізілді. Атқарылған жұмыстардың нәтижесінде өткен жылы бюджетке қосымша 939 млн.теңге өндірілді. Оның ішінде жергілікті бюджетке түсетін жарнама мәліметтері ауыл әкімдіктері тарапынан жүргізілетінін ескере отырып, &nbsp;қосымша &nbsp;визуалды тексеру барысында 15,1 млн теңге, ал &nbsp;коммерциялық мүліктердің қайта бағалануы бойынша 543,8 млн теңге өндірілді. Бұндай жұмыстар алдағы уақытта да жалғасын табады. −Мемлекет қазынасын толықтыратын саланың бірі – кеден. Мұнда салықтың бірқатар түрі бар. Президент «Әділетті мемлекет. Біртұтас ұлт. Берекелі қоғам» Жолдауында салық және кеден саласындағы ақпараттық жүйелерді толық біріктіру, шекараға интеграцияланған кедендік бақылау тәсілін енгізу &nbsp;және Кедендік рәсімдеу орталықтары «бір терезе» қағидаты бойынша жұмыс істеу қажеттігін баса айтты. Қандай оңтайландыру жұмыстары жүрді?−Кеден саласындағы оңтайландыру бойынша бізде жұмыстар бір жүйеге түсті десем болады. Экспорт және импорт үшін ұсынылатын құжаттардың санын және оларды өңдеу уақытын қысқартуға мүмкіндік беретін «Астана-1» ақпараттық жүйесі жұмыс жасайды. Салық саясатының тиімді болуы кеден жұмысының ашықтығына тығыз байланысты. Бұл бойынша салық және кеден саласындағы ақпараттық жүйелерді толық біріктіру, шекараға интеграцияланған кедендік бақылау тәсілін енгізу, Кедендік рәсімдеу орталықтары «бір терезе» қағидаты бойынша жұмыс істеу қажеттілігін және бұл бірінші кезекте еліміздің сыртқы сауда көлемін ұлғайтады әрі инвестиция тартуға зор мүмкіндіктер беретіні сөзсіз.&nbsp;−Былтыр қаңтар айынан бері шетелдік көліктерді заңдастыру жұмыстары жүргені белгілі. Өңірде шетелдік көліктердің мәселесі қалай шешімін тапты?−Үкімет қаулысымен еліміздің аумағына 2022 жылғы 1 қыркүйекке дейін әкелінген көлік құралдарының жекелеген санаттарын бастапқы тіркегені үшін алым мөлшерлемесін қолдану және көлік әкелген жеке тұлғаларды кеңейтілген міндеттемелерінен босату шарттары мен мерзімінің қағидалары бекітілген. Осы орайда облыста жыл көлемінде 16 мың автокөлік құралдары заңдастырылып нәтижесінде 3,7 млрд теңге бюджетке төленді.−Қазір барлық салада цифрлық дамудың қарқыны күшті. Қандай төлем болсын, үйде отырып-ақ төлеуге болады. Сіздерде қалай?&nbsp;−Иә, Мемлекеттік кірістер комитеті тарапынан бизнесті &nbsp;цифрландыру үшін пилоттық &nbsp;жобалар енгізіліп, cалық төлеушілерге кірістер органдарынан өздеріне қажетті қызметтерді алу оңтайлы болуы үшін «E-Salyq Azamat», виртуалды қойма, тауарларды таңбалау, электронды шот фактура, «Астана-1»АЖ,«E-Salyq Business», үш құрамдасты интеграцияланған жүйе секілді цифрлық технологиялары қолданылуда. Бұл − электронды мобилді қосымшалар, салықтарды электронды төлеу форматына көшіру, бюджет алдындағы қарыздарды білу, бақылау касса машиналарын &nbsp;тіркеу, уақытша қызметін тоқтату және т.б. бизнесті оңай жүргізуге бағытталған жобалар. Өзіңіз айтқандай, бұлар кез келген қызметті үйден шықпай-ақ &nbsp;алуға мүмкіндік береді және &nbsp;уақытты үнемдейді.&nbsp; Өңіріміздің мемлекеттік кірістер органдары 2023 жылы көрсеткен мемлекеттік қызметер саны 656 810, &nbsp;өткен жылмен салыстырғанда &nbsp;96000 қызметк &nbsp;артық көрсетілген. Жалпы барлық көрсетілген қызметтердің &nbsp;99,7% -ы электронды көрсетілсе, &nbsp;қағаз түріндегісі &nbsp;0,3% құрап отыр. Департаменттің алдына қойған мақсаттарының бірі − салық төлеушілердің салық мәдениеттілігін көтеру. Оның ішінде &nbsp;салық есептіліктерінінің уақытылы табыс етілуі, жеке тұлғалардың салығының уақытылы төленуі, хабарламалардың уақытылы орындалуы арқылы әкімшілік шараларды азайту.&nbsp; Салық төлеушілерді ақпараттандырудың нәтижесінде салық есептілігін уақытылы тапсыруына келетін болсам, өткен жылмен &nbsp;салыстырғанда 45% -дан 19 %-ға азайды.&nbsp;−Мемлекет басшысы«Қазақстан Республикасы азаматтарының төлем қабілеттілігін қалпына келтіру және банкроттығы туралы» Заңға қол қойды. Өткен жылдың 3 наурызынан бастап жеке тұлғалар банкроттыққа өтініш бере бастады. Осы ретте біздің аймақтағы жағдай қалай?&nbsp;−Бүгінгі күнге дейін (22.01.2024ж.) жеке тұлғаларға соттан тыс банкроттық рәсімін қолдану туралы 6068 арыз түсті. Борышкердің атына тіркелген мүліктің болуы, қарыздың өтеу мерзімі 1 жылдан аспауы, екінші деңгейлі банктер және микроқаржы ұйымдарынан берешекті реттеу туралы құжаттарының жоқтығы арызды қайтаруға негіз болып отыр.&nbsp; Бүгінгі күнге 983 &nbsp;жеке тұлға банкрот деп танылып, 608 жеке тұлғаға банкрот статусы қойылды.&nbsp;&nbsp; −Мүмкіндігі шектеулі жеке тұлғалар үшін мүлік салығын және жер салығын есептеу кезінде қандай салықтық жеңілдіктер көзделген?−Мүмкіндігі шектеулі жандар меншік құқығындағы барлық салық салу объектілерінің жалпы құнының 1500 еселенген мөлшердегі айлық есептік көрсеткіші шегінде мүлік салығын төлемейді. Сондай-ақ олар тұрғын үй қоры, оның iшiнде, оның жанындағы құрылыстар мен ғимараттар алып жатқан жер учаскелерi, үй маңындағы, құрылыс алып жатқан жердi қоса алғанда, жеке (қосалқы) үй шаруашылығын жүргiзу, бағбандық және саяжай құрылысы үшiн берiлген, гараждар орналасқан жер учаскелерi бойынша жер салығын төлеуге жатпайды.&nbsp;− Кірістер департаментінің биылғы жоспары қандай?−Жалпы экономика − әр түрлі бағытта өзгеріп, ел ішінде табыс табудың тәсілдері күннен-күнге қарыштап дамуда. Оған мемлекет тарапынан қолдаулар да аз емес. &nbsp;Салықтық әкімшілендіру жұмыстарын күшейту арқылы салық базасын кеңейту− мемлекеттік кірістер органдарының негізгі міндеті.&nbsp; Сондықтан қазіргі таңда салық төлеушілерге салық заңнамасына енгізілген өзгерістер туралы түсіндірме жұмыстары барлық жаңа технологияларды пайдалана отырып жүргізілуде. Басты мақсат − құқық бұзушылық орын алу қаупі бар тетіктермен салық төлеушіні алдын-ала хабардар ету және әкімшілендірудің барлық шараларын Заңның шеңберінде қолдану, сол арқылы салық төлеушілер тарапынан наразылық деңгейін барынша азайту. Бұл өз кезегінде салық мәдениетін қалыптастыруға, адал салық төлеушілерді көбейтуге және мемлекеттік кірістер органдарына халықтың сенімін арттырарына сенім мол.&nbsp; &nbsp; − Әңгімеңізге рақмет.&nbsp;&nbsp;

Ғани Аманов: Басты міндет − сапалы мемлекеттік қызмет көрсету

&nbsp; Бүгінгі көтеріліп отырған тақырыптың өзектілігін бәріңіз білесіздер. Бүгінде барша әлем елдерінде белең алған тұрмыстық заңбұзушылық біздің елімізде де, өзекті мәселелердің бірі болып табылады. Отбасындағы жанжалдың кесірінен болатын қылмыстардың жиілеп кетуіне қоғам алаңдаулы. Зерттеулер бойынша, оның басты себептерінің біріне – маскүнемдік, жұмыссыздық, соған байланысты тұрмыс жағдайының ауырлығы сияқты әлеуметтік жағдайлар жатады. Тұрмыста жапа шегетіндер негізінен әйел адамдар. Ал, біздің мемлекетіміз үшін әйел-ананы қорғау ерекше мәселе. Өкінішке қарай, қазіргі уақытта қоғамның қарыштап дамуына қарамастан, әйелдерге қатысты отбасылық зорлық-зомбылық әрекеттер тыйылар емес. Оған өзіміз күнде куә болып отырмыз.Негізінен, қай халық та, отбасындағы зорлық-зомбылық туралы айтуды жөн санамаған. «Бас жарылса – бөрік ішінде, қол сынса – жең ішінде» деген жазылмаған «заңдарымен» бекітіп қойған. «Ерлі-зайыптының арасына есі кеткен түседі» деп үй ішіндегі дау-жанжалға араласудың орынсыз екендігін білдіреді. Зорлыққа төзімсіздік отбасында, баланың кішкентай кезінен бастап тәрбиеленуі керек.&nbsp;«Анасын көріп, қызын ал» дейміз. Өмір бойы таяқтан көз ашпай, үреймен күн кешсе де, «балаларым әкесіз өспесін» деген жалған намысты ұстанған ананың қызы зорлыққа қарсы тұра ала ма?! Әкесі шешесін ұрып-соғатынын көріп өскен ұл өзі үйленгенде күйеу болудың жөні осы деп, жұдырығын ала жүгіруге бейім болатыны да рас. Осындайда, шыдамның да шегі бар және оның салдары да қорқынышты екенін айта кетуіміз керек.Қазақстан республикасы Конституциясының 17-бабына сәйкес: «Адамның қадір-қасиетіне қол сұғылмайды. Ешкімді азаптауға, оған зорлық-зомбылық жасауға, басқадай қатыгездік немесе адамдық қадір-қасиетін қорлайтындай жәбір көрсетуге не жазалауға болмайды» делінген.&nbsp; Алайда, шындық бұдан әлдеқайда алыста жатыр. Қазіргі таңда тұрмыстық зорлық-зомбылық белең алған әлеуметтік мәселе болып табылады. «Тұрмыстық зорлық-зомбылық профилактикасы туралы» ҚР Заңының 4-бабына сәйкес, тұрмыстық зорлық-зомбылық тек қана күш көрсетуден емес, сексуалдық, экономикалық және психологиялық түрлерден тұрады, – дейді Қазалы ауданы полиция бөлімі Жергілікті полиция қызметі бөлімшесі әйелдерді зорлық-зомбылықтан қорғау тобының инспекторы полиция капитаны Сәуле Бишекова.&nbsp;Полиция капитаны Сәуле Бишекованың айтуынша, отбасының кейбір мүшелері тұрақты түрде қорлау, ұрып соғу, балағаттаудың құрбаны болып отырады. Тұрмыстық зорлықтың құрбаны үнемі күйеуінен таяқ жейтін әйел; туыс ер азаматтардан жыныстық қысым көретін қыз; анасы ұратын бала; өз балалары бас тартқан қарттар болуы мүмкін. Қоғамда тұрмыстық зорлық-зомбылық туралы үндеместік жағдай орын алған. Көрші үйде орын алып жатқан зорлық-зомбылыққа ол отбасының ері мен әйелінің ішкі мәселесі деп көз жұма қараймыз.Мәселен, әйелі күйеуінің ұрып-соққанын өзгеге айтуды ұят санайды.&nbsp;Себебі, оған өзін кінәлі сезінеді; анасы туған ұлынан қорлық көреді, алайда, өзін кінәлі сезінеді, себебі дұрыс тәрбие бере алмады. Ешкім ешқандай жағдайда тұрмыстық зорлық-зомбылықтың құрбаны болуы тиіс емес, себебі тұрмыстық зорлық-зомбылық ол – қылмыс. Оған төзіп отырудың қажеті жоқ, егер зорлық-зомбылық көшеде орын алып жатса 102 нөміріне қоңырау шалыңыз; көрші үйде орын алса тексеріңіз; егер зорлық-зомбылық болуы мүмкін деп ойласаңыз, бұл да хабарлауды қажет етеді.&nbsp; Тұрмыстық зорлық-зомбылықтың қатысушыларымен профилактикалық әңгімелесу жүргізіліп, жәбір көрсетуші өз іс-әрекетінің қылмысқа апаратынын сезінетін болады.– Тұрмыстық зорлық-зомбылық орын алды деп санасаңыз бұл туралы 102 нөміріне қоңырау шалып хабарлаңыз, сіз орын алуы мүмкін қылмыстың алдын алған болып саналасыз! – дейді Қазалы ауданы полиция бөлімі Жергілікті полиция қызметі бөлімшесі әйелдерді зорлық-зомбылықтан қорғау тобының инспекторы полиция капитаны Сәуле Бишекова.Бүгінде тұрмыстық зорлық-зомбылық қоғамның басты назарында тұрған мәселенің біріне айналды. Қазіргі таңда бұл тақырыпта полиция органдарымен қатар, қоғамның белсенді өкілдері де айналысып, арнайы оқулардың бері алгоритм жүйесін ұсынушылар баршылық. Отбасы тұрмыстық қатынастар аясында орын алған құқық бұзушылықтар заң аясында шешімін табуда. Ағымдағы жыл басынан бастап, Қазалы ауданы бойынша жанұя жанжалының 41 дерегі тіркеліп, өз шешімін тапты.&nbsp;Отбасында құқық бұзушылық жасағаны үшін ҚР ӘҚБтК-нің 73 бабымен 15 азаматқа әкімшілік хаттама рәсімделіп, олардың 12-сі татуласуына байланысты әкімшілік іс өндірістен тоқтатылған, 2 азаматқа «ескерту», 1 азамат «әкімшілік қамау» жазасына тартылды. Сонымен қатар, отбасы тұрмыстық қатынастарда тұратын адамға қатысты ҚР ӘҚБтК-нің 73-1 бабының 1-1 бөлігімен денсаулыққа қасақана жеңіл зиян келтіру бойынша 8 азамат құқық бұзушылық жасағаны үшін әкімшілік жауапкершілікке тартылып, олардың 6-ы жәбірленушімен татуласып, 1 азаматқа «ескерту» әкімшілік шарасы қолданылды. Бір отбасында тұрып ұрып-соғудың ҚР ӘҚБтК-нің 73-2 бабының 1-1 бөлігімен 15 дерегі орын алып, 12 азаматтың ісі татуласуына байланысты өндірістен тоқтатылған, 2 азаматқа «ескерту» беріліп, 1 азамат әкімшілік қамауға алынды.Статистикалық деректер отбасында жанжал орын алғаннан кейін құқық бұзушы мен жәбірленуші татуласып, әкімшілік істің тоқтауына себеп болатынын көрсетті. Алайда, полиция органдарымен отбасында жанжал орын алғаннан кейін әкімшілік іс өндірістен қысқарғанымен профилактикалық&nbsp;бақылау «қорғау нұсқамасы» түрінде 30 тәулік мерзімге дейін жалғасады. Бұл ретте жеті күнде кемінде бір рет учаскелік полиция инспекторымен есепке алынушы тұрғылықты мекен-жайы бойынша немесе қызметтік үй-жайда тексеріліп отырады. Профилактикалық әңгімелесудің негізгі міндеттері тұрмыстық зорлық-зомбылық жасаудың себептері мен жағдайларын анықтау, тұрмыстық зорлық-зомбылықтың әлеуметтік және құқықтық салдарларын түсіндіру және заңға мойынсынушылық мінез-құқықтың қажеттігіне сендіру болып табылады.&nbsp;Тұрмыстық зорлық-зомбылықтың алдын алу салдары ауыр зардаптарға әкелетін оқиғаларға жол бермеу болып табылады. Жанұя жанжалының шешімін полиция көмегінен іздеу ең тиімді жолдың бірі. Сол себепті әрбір өзінің және өзгенің өміріне немқұрайлы қарамайтын адам зорлық-зомбылық деректерін жасырмауға, айтуға көмек беруге және сұрауға міндетті деген мәлімдеме жасады Қазалы ауданы полиция бөлімі Жергілікті полиция қызметі бөлімшесі әйелдерді зорлық-зомбылықтан қорғау тобының инспекторы полиция капитаны Сәуле Бишекова.Зорлық-зомбылық – жалпыға ортақ мәселе және аналардың қасіреті. Бұл – бүлінген тағдырлар. Келешекте өзі құрған шаңырақты шайқалтпасын десек, қыз баланың тәрбиесімен бірге, ұл баланың тәрбиесіне ерте жастан көңіл бөлу қажет. Әр жеткіншек қыз бала мен ананы сыйлауды, әйел затын қадірлеуді бала күнінен бойына сіңіріп өссе, отбасында зорлық-зомбылыққа орын болмас еді. &nbsp;

Сәуле Бишекова: Адамның қадір-қасиетіне қол сұғылмауы тиіс

<a href="https://kyzylorda-news.kz/">Kyzylorda-news.kz.</a> &nbsp;Астанада Қуандық Бишімбаевқа қатысты сот отырысы басталды, деп хабарлайды <a href="https://dauletten.kz/articles/nekeleri-resmi-turde-tirkelmegen-bishimbavqa-qatysty-sot-otyrysy-bastaldy">Dauletten.kz</a>.Сот залына журналистерді&nbsp;кіргізбеді. БАҚ өкілдері үшін хабар тарататын арнайы монитор ұйымдастырылды.Прокурор іске қатысты бірнеше мәлімдеме жасады. Оның сөзінше:Қуандық Бишімбаев пен Салтанат Нүкенованың некелері ресми түрде тіркелмеген. Бишімбаев әйелінің барлық телефон қоңырауын бақылап, оған жұмыс істеуге тыйым салып, қаржылай өзіне тәуелді еткен. Қызғаныштан жүйелі түрде физикалық күш қолданған. 2023 жылдың наурыз айының ортасында Астанада Бишімбаев Нүкенованы соққыға жыққан. Салтанат Нүкенова ағасына бұл туралы айтқан. Ол оны Бишімбаевпен ажырасуға көндірмек болған, бірақ ол көнбеген. 2023 жылдың жазында Бишімбаев Нүкенованы Алматыға көшуге үгіттейді. Ол зорлық-зомбылық тоқтатылады деген үмітпен келіскен. Алайда ол оған физикалық күш көрсетуді жалғастыра берген.Сотқа келген Нүкенованың басқа бөлмедегі туыстары шу&nbsp;шығарып жатқаны мәлім.&nbsp;Cот тыныштық сақтауды сұрады.Фото: kazinform.kz

Қуандық Бишімбаев пен Салтанат Нүкенованың некелері ресми түрде тіркелмеген

<a href="https://kyzylorda-news.kz/">Kyzylorda-news.kz.</a> Бүгін партияның аудандық филиалы жанындағы Партиялық бақылау комиссиясының төрағасы Әділбек Сарабеков, комиссия мүшелері Нұрғиса Жалғасбаев және Арғын Орымбаевпен бірге аудандағы көктемгі су тасқындарының алдын алу бойынша дайындық жұмыстарына партиялық бақылау жүргізді.Басықара ауылындағы «Ә.Тыныбаев» атындағы Қазалы су торабында болған аманаттықтарға аудандық төтенше жағдайлар бөлімінің бастығы Алтынбек Қалиев және тиісті сала өкілдері су тасқыны қауіпін азайту мен алдын алу, елді мекендерді су басу қауіпінен қорғау мақсатындағы жұмыстармен таныстырып, қазіргі таңда су басу қаупі жоқ екендігін жеткізді.Жалпы, Сырдария өзенінің Қазалы ауданы көлемінен өтетін ұзындығы – 191 шақырымды құрайды.&nbsp;Қазіргі таңда Қазалы ауданы, Басықара ауылындағы «Ә.Тыныбаев» атындағы су торабына жоғарыдан секундына 120 м3/сек су келіп, ауданға алынып жатқан 7 м3/сек, сол жағалау каналына 7 м3/сек, Ақсай арнасына толығымен төменге қарай жіберілуде. Осы жылдың 10 наурызында Абай ауылының тұсындағы қалқымалы көпір, сейсенбі күні Қарлаң қалқымалы көпірі уақытша алынып, көлік қатынасы Басықара ауылы және Әлсейіт көпірлері арқылы жүруде. Бүгінде Сырдария өзенінің жағдайы бірқалыпты. &nbsp;Өз кезегінде Әділбек Сербайұлы сала басшыларына дариядағы су деңгейін үнемі бақылауда ұстап, су тасқынына қарсы іс-шараларды сапалы іске асыру өте маңызды мәселелер екендігін айтты. Сондай-ақ, партиялықтар бірқатар сауалдарына сәйкес, ұсыныстарымен бөлісті.

Қазалыда Сырдария өзенінің жағдайы бірқалыпты

<a href="https://kyzylorda-news.kz/">Kyzylorda-news.kz</a> Ғасырға тағы бір қадам жақындаған тарихы мен танымы терең Арал ауданы 95 жылдығын атап өтті. Иә, талай уақыттың, қиын-қыстау кезеңнің куәсі болған Аралдың бүгінгі бет-бейнесі, даму көрсеткіштері тіпті бөлек. Жыл санап жайнап, ажары айшықталып келе жатқан ауданның қазіргі салтанаты жергілікті халықтың мақтанышына айналған. Расында келбеті келісті туған жеріміздің күн санап көріктеніп келе жатқаны жасырын емес. Тек тұрғылықты жұрттың ғана емес, мұнда келген қонақтардың да көзайымына айналған нысандар жетерлік. Әсіресе соңғы жылдары теңізді өлкенің терең тарихынан сыр шертетін орындар көптеп бой көтеруде. Халықтың тынығу орнына айналған осындай алаңдардың қазірде еңкейген қарттан, еңбектеген балаға дейінгі жұртшылықтың жиі жиналатын орнына айналды. Соның ішінде аралдықтардың ауыз толтырып мақтанып айтатын қарағанның көзі тоятын көрікті жеріне айналған "Балықшылар аллеясы" мен "Жалаңтөс Баһадүр аллеясы" көпшіліктің ауызынан түспей, жиі айтылып жүр. Рас, балықшылардың мекенінде, теңізді өлкеде балықшыларға құрмет көрсетілуі тиіс. Бұл өткенді ұлықтау, ұрпаққа солардың есімін, еңбегін жеткізу, тарихты таныту. Балықшылар алаңында осының барлығы бар. Талай ұрпаққа ұмытылмай жеткен теңіз батырларының орасан еңбегін, бүгінгі ұрпақтары кешегі өткен ерлердің бағытынын жаңылмау үшін қойылғандай әсер қалдыратын Маяк та, осы салада есімі елге жатталып қалған жандардың аты жазылған тақта да, олардың ұстап тұтқан бұйымы да осыдан табылады. Ал Жалаңтөс Баһадүр аллеясының әсері тіпті бөлек. Тәй-тәй басқан баладан бастап асыр салған бүлдіршіндер, доп қуалаған болашақ спортшылар, оларды жетектеп, алаңсыз шат күлкісіне куә болған ата- аналары, ата-әжелері бір жасап қалады. Толқыны аспанға ақ көбік шашқан Аралдың орталығындағы әсем субұрқақ та осында.&nbsp; Бірақ осының барлығы Аралдың перзентінің еңбегі екенін осынау кереметтерге шаттанып, көңілдегі қуанышын баса алмаған халықтың бірі білсе, бірі білмейді. Олай болса жергілікті жердің перзентін тани отырыңыздар. Ол жас кәсіпкер, жас та болса құрылыстың қыр-сырын терең меңгерген Әлижан Мағжанұлы. Жоғарыда айтқанымыздай Аралда туып-өскен Әлижан білім қуып Алматыға аттанды. Абылай хан атындағы Қазақ халықаралық қатынастар және әлем тілдері университетінде халықаралық экномист мамандығы бойынша 4 жыл жоғары білім алса, аймақтану мамандығы бойынша магистрант атанған. Иә, өз білімін кәсіпте тиімді пайдалануды көздеген кейіпкеріміз 2009 жылы құрылыс саласына бет бұрып, табысты еңбегінің алғашқы баспалдығын аттады. Содан бері еңдің ықыласына бөленіп жүрген ол өз сөзінде былай дейді.&nbsp;<blockquote> – "Адамды адам еткен – еңбек" демейді ме? Аталы сөз тегін айтылмаса керек. 2009 жылы құрылыс саласына бет бұрғанда "әлде қалай болады?" деген күдік болғаны рас. Бірақ үкіліген үміт күдікті жеңе білді. Ол да еңбекке құштарлықтың арқасында орын алған жетістік. Ерінбесең нәтижеге қол жеткізесің. Менің көзім осыған анық жетті. Дәл қазіргі уақытта Арал қаласынан 5 тұрғын үйдің құрылысын жүргізіп жатырмыз. Алла қаласа жақын уақытта толықтай аяқталып, желтоқсан айында қаншама жанға қуаныш сыйлайтынымызды ойлағанда құлшыныс тіпті арта түседі. Елдің батасы, халықтың ықыласы бірді алға қарай жетелей түседі. Мұнан бөлек аудан көлемінде көптеген құрылыс нысандарын пайдалануға табыстадық. Бүгінде олар елдің игілігі үшін жұмыс жасап тұр. Аудан көлемінде, ауданнан тыс Қазалыда, Ырғызда да мектеп құрылысымен айналыстым. Білім ордаларының құрылысын сапалы салып, мыңдаған баланың қауіпсіз, жайлы жерде білім алуына жағдай жасадық. Көкшетауда да құрылыс нысандарын алып, ойдағыдай нәтижеге қол жеткіздік, – деді.&nbsp;</blockquote><blockquote>Мұнан бөлек: – Осы салада он жылдан аса тәжірибем болса да ең ерекшесі Аралдағы қос аллеяның құрылысы болды десем артық айтқандық емес. Қазақта "табалдырықтан биік тау жоқ" деген тағылымды сөз бар ғой. Міне, осының нағыз куәсі болдым. Барша әлемге балығымен танымал, брендімен танымал өңірде Балықшылар аллеясын салып, туған елдің батасын алдым. Жалаңтөс Баһадүр аллеясының құрылысы да өте сәтті әрі сапалы шықты. Мен үшін одан асқан бақыт жоқ, – дейді Әлижан.</blockquote> Мұнан бөлек мал шаруашылығында да өзіндік қолтаңбасын қалдырып келе жатқан жерлесіміздің алдағы жоспарлары да ауқымды. Ендеше талабы таудай азаматқа біз алдағы уақытта да сеніммен қараймыз.

Қазақстан және Қызылорда облысының жаңалықтары