<a href="https://kyzylorda-news.kz/">Kyzylorda-news.kz.</a> Біріңіз білсеңіздер, ал біріңіз білмейтін де шығарсыздар. Көкшоқы мөлтек ауданында тұрмысқа қажетті бұйымдар тігетін «Мамық» деген тігін цехы бар. Мақаламызға арқау болып отырған цех жайлы кеңірек тарқатып көрелік. Ерекшелігімен көзге көрініп тұратын «Мамық» тігін цехы 2015 жылы ашылған. Бұл цехты өз ісінің шебері, еңбекқор Тамара Асқарқызы басқарып отыр. Мұнда біз көрпе-көрпеше, жайма жапқыштар мен заманауи шоперлер, тоқыма сөмке, жастық тыс секілді түрлі бұйымдарды кездестірдік. Тіпті Петропавлдан арнайы қаздың жүнін алдырып, содан жастық жасайды. Бағалары да қолжетімді. Атап айтсақ, үйіңіздегі ескі құс жастығыңызды тазартқыңыз келсе, дайын күйінде қолыңызға алатын бір жастықтың құны – 2000 теңге, ал қаз жүнінен жастық – 10 мың, синтефон жастықтың бір данасы – 2500 мың, жұбымен алсаңыз 5 мың теңге. Тоқыма сөмкелер – 5-10 мың арасында болса, шелпекке арналған жапқыштар – 3 мың теңге,көрпеше – 8500 теңге, көрпе – 7000 мың теңге, кішкентай балаларға арналған жүннен басылған аяқ киім – 5000 теңге, шоперлер 3 мың теңгеге, сыпыра – 5 мыңға сатылуда.<blockquote>– Жастық тазалау процесі ұзақ уақыт алмайды, небәрі 15-20 минуттық шаруа. Тапсырыс берушілер жұмыс барысын бақылап тұра алады. Шамамен 10 ескі құс жастықтан 6-7 данажаңа жастық шығады. Біткен соң тапсырыс берушіге шыққан қоқысты көрсетеміз. Сонда біздің жұмысымыздың қаншалықты шынайы екенін байқайды, – дейді ол.</blockquote>Ендеше, сіздерге жастықтың қалай тазалайтыны қызық па? Алдымен, өңдеу барысында жастық ішіндегі қауырсындар бактерияны жоятын ультракүлгін сәулесімен тазартылып, кептіру арқылы қоқыстан ажыратылады. Содан кейін тазартылған мамық жаңа жастық қабына, ал жастық ішінен шыққан майда тастар, құм, шыбық сынды қоқыстар қондырғының арнайы бөлігіне жиналады. Қайта өңдеу барысында жастық тек қана тазармайды, өзінің байырғы пайдалы қасиеттерін қалпына келтіреді. Жаңа жастық алсаңыз да, оның ішінде қандай қалдықтар барын білмейсіз.Бүгінде Тамара Ақмағамбетова 3 адамды жұмыспен қамтып отыр. Кейіпкеріміз өмірге деген құлшынысы жоғары, өз ісіне жауапты, тиянақты, арманы шексіз, ерік-жігері мықты, қиындыққа еш мойымайтын өзгеше жан. Аудандағы көптеген қоғамдық іс-шараларға белсене қатысады.Тігін цехын өз көзімізбен көріп, шолу жасағаннан кейін, ерекше әсер алдық. Неге осындай цехтарды халық танып-білмеске деген оймен қолға қалам алдық. Өзімізде өндірілетін, жерлестеріміз өз қолымен жасаған дүниелерді қолдай білсек, шиелілік брендтерді қалыптастыруға жол ашылары сөзсіз.&nbsp;

 Шиеліде «Мамық» цехы мамық өнім ұсынады

&nbsp;<a href="https://kyzylorda-news.kz/">Kyzylorda-news.kz</a>.&nbsp; Мемлекеттік кірістер комитеті көлік иелеріне 1 сәуірге дейін көлік салығын төлеу керектігін ескертті. Бұл туралы Stan.kz ақпарат агенттігі хабарлайды.&nbsp;Салықты есептеу кезінде 2023 жылы қолданыста болған 3 450 теңге көлеміндегі АЕК қолданылады.Соманы kgd.gov.kz веб-порталындағы есептегіштің көмегімен немесе e-Salyq Azamat мобильді қосымшасында дербес есептеуге болады. Сомалар туралы ақпарат 2024 жылдың 15 наурызынан кейін "Kaspi Bank" АҚ және "Халық Банкі" АҚ мобильді қосымшаларын пайдаланушыларға push-хабарламалар түрінде жіберіледі.<blockquote>"2024 жылдың 2 сәуірінен бастап төлемегендерге салық берешегі туралы хабарлама жіберіледі, содан кейін қарыздар мәжбүрлі түрде өндіріледі", - делінген хабарламада.</blockquote>Айта кетейік, бұған дейін Қазақстанда ескі көліктерге салынатын салық қайта қаралатыны туралы жазған едік.&nbsp;Фото: Нұрболат Нұржаубай

Қазақстандық жүргізушілер 1 сәуірге дейін көлік салығын төлеуі керек

<a href="https://kyzylorda-news.kz/">Kyzylorda-news.kz</a> Аралқұм ауылы құт қонған мекен. Мұндағы халық еңбекпен есейіп, әркім әлінше тіршілік етіп, тұрмыс кешіп жатқан жайы бар. Мұндағы халық ысталған балық пен түйе сауып, шұбат ашытуды кәсіптің көзіне айналдырған. Ал мемлекетте жұмыс істей жүріп өмірге 7 бала әкелген Жарас пен Данагүл жас отбасы болса да тәуір тұрмыс кешіп көпке үлгі болып отырған жандар. Жиенбаевтар әулетінің түтінін түзу шығарып, қарашаңырақтың іргесін бекемдеген Жарас пен Данагүл осыдан 15 жыл бұрын отау құрған. Ол кезде Жарас 28 жаста, ал Данагүл небәрі 18 жаста болған екен.<blockquote> – Өзім көпбалалы отбасында өскенмін. 6 ағайындымыз. Менен үлкен әпкелерім әлде қашан тұрмысқа шығып кеткен. Ағам отбасымен Қызылорда қаласында тұрады. Әкем Тұрғанбай менің 5 жасымда өмірден озды. Анам Гүлжаһан &nbsp;бізді жетілдіріп, жеткізді. Ұзақ жылдар ауылдағы мектепте еден жуушы болып еңбек етіп, зейнет демалысына шықты. Анам да келместің кемесімен кеткелі біраз болды. Данагүлмен бір жылдай дос болып араласқан соң, 2009 жылы отбасы болуға бекіндік. Ол жас болды. Бірақ оның мінезі мен тәрбиесі ерекше еді. Сондықтан тұрмыстық өмірге үйренісіп кететініне сенімді болдым, - деп бастады әңгімесін отағасы.</blockquote> Данагүл ол кезде студент болған. Жас келіншектің оқу оқып, диплом алуына енесі мен жары қарсы болған жоқ. Қайта қолдау көрсетіп отырыпты. Данагүлдың балалығы мен шалалығын кешіре білген енесі үй шаруасын үйретіп, шыйратып, епті келін етіп тәрбиелеп алған көрінеді.<blockquote> – Өзім қаланың қызымын. Бәлкім, балалық болар, Жарас «отбасы болайық» дегенде қарсы болған жоқпын. Ол менің арқа сүйер азаматын, отбасының тірегі болатындығына сенімді едім. Өзімнің жастығыма қарамай, келін атандым. Алғашқыда менің де кемшіл тұстарым болды. Оған енем сынап қараған емес. Қайта, жәймен айтып, бәрінің тігісін жатқызып, түсіндіріп беретін. Соның арқасында үй шаруасын ұршықша үйіріп әкететін пысық келіншекке айналдық қой, - дейді Данагүл.</blockquote> Қазір Жарас ауылдағы №61 орта мектептің дене шынықтыру пәнінің мұғалімі. Ал Данагүл әлеуметтік қызметкер. Ерекеш балаларды үйден қарайды. Екеуі де өз саласында абыройлы еңбек етіп отырған жас отбасы. Жарас дайындаған мектептің қыздардан құралған гандбол командасы, жуырда &nbsp;аудандық жарыста оқ бойы оза шауып, облысқа жолдама алған. Данагүл де ерекше күтімді талап ететін балалардың тілін тауып жүрген биязы мінезді қызметкер. Олар еңбегімен елге қызмет ете жүріп, демографияның өсуіне де үлестерін қосуды ұмытқан емес. Өмірге 7 перзент әкеліп, балаларын кішкентайынан ізеттілікке тәрбиелеп отыр.<blockquote> – Көпбалалы отбасында өскедіктен мен о бастан баламның көп болғанын армандадым. Данагүл де мұнымды құптады. Өйткені ол 3 ағайынды болатын. Ал менің жан-жақтан бауырларын келіп, бір-бірімізге көмектесіп жатқанымызды көріп риза болып отыратын. Содан Алланың бергеніне шүкір етіп 7 баланың ата-анасы атандық. Құдайдың берген 4 ұлы мен 3 қызы бар, - деген отағасы Жарас көпбалалы болудың жақсы екендігін түсіндіріп берді.</blockquote> Данагүл үшін де ұрпағының көп болғаны қиындық емес қуаныш.<blockquote> – Марқұм енем көпбалалы отбасы болғанымызды қатты қалады. Үлкен немерелерін өзі бағып өсіргендіктен маған қиындығы білінген жоқ. Қазақ «Бір қозы өмірге келсе, бір түп жусан артық шығады» дейді ғой. Әр баланың өзінің несібесі бар екенін ұқтым. 30 жасымда жетінші баламды дүниеге әкелдім. &nbsp;Қазір үлкендерім ержетіп қалды. Өзіме қолғанат. Ұлдарым даланың жұмысына көмектессе, қыздар үй тірлігін тындырып жатады. Сабақтары да жақсы. Бәрі үздік оқиды. Оларға бауырмал болуды, қандай жағдай болса да бір-бірін қолдауды үнемі құлақтарына құйып отырамыз. Мысалы, екі келі алма адып келсек тек, екеуін жеті балаға теңдей бөліп береміз. Бұл дегеніміз жоқтықтан емес, бөлісіп жеу, қамқор болудың кішкентай баспалдақтары, - дейді Данагүл.</blockquote> Данагүлдің бір күнін зерделеп көргенбіз. Мемлекеттік қызметіне барып, үйге келген соң үй шаруасын жайлы етіп, жеті баланың тамағы мен сабағын қамдайды. Бұған қоса, қорадағы екі түйесін сауып, шұбат дайындауды да ұмыт қалдырмайтын, істің көзін тапқан келіншек.<blockquote> – Шұбатты табыс табу мақсатында ашытпаймсын. Қазіргідей ауру, сырқау көп кезде балаларға табиғи таза өнім бергім келеді. Бұл шұбаттың құрамында адам ағзасына керекті небір дәрумендер шоғырланған. Сондықтан пайдасы мол, - дейді. Ал ашыту жолын: - бір шикі, бір піске түйе сүтін таза ыдысқа араластырып, қайта- қайта сапыру арқылы бабын келтіреміз. Кейін аз уақыттың ішінде ашып шыға келеді. Осылай балалар да, өзіміз де күнделікті бір уақыт шұбат ішіп тұрамыз, - деп түсіндірді.</blockquote> Он бес жылда 7 баланы өмірге әкеліп, ауылдың қарбалас тіршілігімен біте қайнасып кеткен келіншек уақыттың қадірін жақсы біледі. Ол «өзіңізді қалай демалдырасыз» деген сауалға: - Менің ең сүйікті ісім - тігін тігу. Қолым қалт ете қалса, өзім бір бөлмеге кіріп алып, оңашаланып тігін машинаммен түрлі құрақ көрпелерді тіккенді жақсы көремін. Бұл маған демалыс пен рахаттану сезімін сыйлайды, - деді Данагүл. Міне, бұл жас отбасы бейнеті көп ауылда өмір сүріп жатса да, ешкімге өкпе артпай, өздерінің сүйікті кәсібінде, балаларына жарасымды шаңарақтың үлгісін көрсетіп, бақытты ғұмыр кешіп жатқан жайы бар. Жарастың бойындағы отбасына деген қамқорлық, Данагүлдегі қазақ әйеліне тән ізеттілік пен жайдарылық берекелі жанұяның жарасымын көрсетіп-ақ тұр. Осындай отбасыларды көргенде көңілің жылып, жүрек қуанып қалады екен.

Аралқұмдағы жас отбасы шұбат дайындаудың ерекше технологиясымен ата кәсіпті жандандырып отыр

<a href="https://kyzylorda-news.kz/">Kyzylorda-news.kz.</a> Жалағаш ауданындағы «Алтын-Арай» халық ән-би ансамблінің бишілері әдемі би ырғағымен, талғамы биік, ерекше би қозғалысымен халықтың ықыласына бөленіп келеді. Бүгінге дейін де талай байқаулар мен фестивальдерде топ жарған ансамбль өкілдері жуырда маңғаз Маңғыстауда өткен «Біз – күн перзентіміз» атты халықаралық балалар шығармашылығы фестиваліне қатысып, ІІ орынды қанжығасына байлап қайтты.Би дегеніміз жәй ғана әуен мен ырғаққа ілесе қозғалу емес. Бұл – тұтастай бір ұлттың мәдениеті мен дәстүрі. Осы салада шәкірт тәрбиелегеніне 20 жылдан асқан ұстазымыз Үміт Айтқұлова да халық үшін би өнерінің орны ерекше екенін айтып өтті.&nbsp;Халқымызда бұрыннан қошеметке ие би өнері – сезім мен нәзіктікті жеткізуші өнер. Көрерменге айтар ақпаратты би тілімен көрсету үшін өнерпаздың тума дарыны, ерекше табиғи қабілеті болуы шарт. Музыкалық ырғаққа сай &nbsp;қозғалыстар арқылы мың бұралған сантүрлі образдарды бейнелеуге тырысады.&nbsp;Жалпы бұл өнерде әдемі би мен әуезді музыканың негізі – шабыт пен импровизация. Осы екеуін қатар алып жүрген, би өнерінде 25 жылдық тәжірибесі бар, 200-ге жуық оқушы тәрбиелеген «Алтын-Арай» ән-би ансамблінің жетекшісі &nbsp;Үміт Әшімқызымен &nbsp;Маңғыстауда өткен байқау жайында сұхбаттасқан болатынбыз. Бұндай халықаралық деңгейдегі жарыстар оңай болмайды екен.&nbsp;Бұл байқауға алдымен шақырту жіберіледі. Халықаралық байқауға алған шақыртуды ансамбль жетекшісі түрлі облыстық, республикалық, халықаралық жарыстардағы алған жүлделерімен байланыстырады. Себебі шақырту тек халықаралық байқауларда өнер көрсетіп жүрген өнерпаздарға ғана жіберіледі екен.&nbsp;Атап айтар болсақ, «Алтын-Арай» &nbsp;би ансамблі осыған дейін облыстық «Таңшолпан», «Дельфий ойындары», «Ұлы дала өрнектері», «Биле-биле», &nbsp;«Ботақан» &nbsp;байқауларында бас жүлде, І орын иеленген. Республикалық, &nbsp;халықаралық «Аманат», &nbsp;«Жеті өнер», байқауларында &nbsp;І орын алған. Сонымен қатар Алматы қаласында өткен «Бозторғай» халықаралық балалар шығармашылығы байқауында І орын иеленген. &nbsp;Ташкент қаласында өткен халықаралық «Ташкентті сүйеміз» атты байқауда шәкірті Әсел Айдосқызы бас жүлдені жеңіп алды. Осы жүлделердің арқасында Маңғаз Маңғыстауда өткен байқауға жолдама алған.&nbsp;<blockquote>– 2023 жылдың 7-11 қыркүйек аралығында Ақтау қаласында балалар шығармашылығына арналған «Біз – күн перзентіміз» атты халықаралық фестиваль-конкурсы өткізіліп, оған Армения, Азербайжан, Болгария, Грузия және Қазақстаннан балалар қатысып, түрлі жанрда өнер көрсетті. Қатысатын би ансамбльдер өте мықты дайындықпен келді. Ансамбльдерді көргенде шамалы көңіліміз түсіп, уайымдап қалдық, қаншама жерден жол тартып келгенде қалай болар екен деп уайымдағанымыз тағы бар. Конкурс болардан бір күн бұрын байқау ұйымдастырушылары бізге дайындалатын би залына көмектесті. Қыздар күні бойы дайындалып, нақтылап, биді қайта қоюға тура келді. Өйткені екі күн жолда жүргенде ұмытылып қалған, қанша дегенмен балалар ғой. Әр қимылын тазалап, қыздарды орнына қойдық. Қыздар жаз бойы демалмай, &nbsp;қыдырмай күнделікті дайындық жасағанының арқасында осы жоғары нәтижеге жетіп отыр. Өнерпаздарға Ақтау қаласына облыстық халық шығармашылығын дамыту және мәдени-продюсерлік орталығының Музыка және балалар бөлімінің меңгерушісі Бағдагүл Есмұрзаева жетекшілік етті. Осы байқауға баруыма қолдау білдірген бишілердің ата-аналарына, аудандық мәдениет және спорт &nbsp;бөлімінің басшысы Ш.Қалыбаевқа, сектор меңгерушісі Б.Дүйсенбиеваға, Қ.Қазантаев атындағы мәдениет үйінің басшысы Е.Әбуовке алғыс білдіремін, – деді Үміт Әшімқызы. &nbsp;&nbsp;</blockquote>Қазіргі уақытта ұстаздың қарамағында биге қатысатын 50-ге жуық &nbsp;оқушы бар. Осыған дейінгі тәрбиелеген шәкірттердің ішінен ұстаздық етіп жүргендер де бар. Мысалы, Жалағаш музыкалық мектебінде Үсейін Айбарша хореограф би ұстазы қызметін атқарады. Руханият орталығында хореограф қызметін Алтынбек Манзура атқарады. №202 орта мектеп хореографы Әбділахат Назым, Қызылорда қаласындағы «Томирис би» ансамблінде Досманова Айдана мен Алматы қаласында «Балалар» би ансамблінің жетекшісі Сабытова Айда сияқты Үміт Әшімқызының шәкірттері қазіргі таңда ұстаздың жолын қуып, &nbsp;хареограф қызметінде өздері де шәкірт тәрбиелеп жүр.&nbsp;Алдағы уақытта ансамбль қыздары &nbsp;Қырғызстан еліндегі халықаралық байқауға шақырту алған. Сол байқауға қызу дайындық үстінде. Сондай-ақ облыс, аудан көлеміндегі мәдени шараларға қатысуды да жоспарлап отыр.Би өнері жас баланың бойына әр &nbsp;ұлттың төл рухани мәдениетін, салт-дәстүрін, әдет-ғұрпын дарытады. Осындай игі қасиеттерді бойға сіңірген тұлғаның өз елінің ғана патриоты емес, өзге елдің де қазынасын құрметтей алатын әрі өркениеттің көшіне ілесе алатыны сөзсіз. Ұлы өнерді дәріптеп жүрген жерлестеріміздің әлі алар асуы алда.

«Алтын-Арай» халық ән-би ансамблі халықаралық байқауда өнер көрсетті

<a href="https://kyzylorda-news.kz/">Kyzylorda-news.kz.</a> Балабақша барлық тәрбие мен білімнің ең алғашқы баспалдағы іспеттес. Мұндағы тәрбие мен білім балалардың табиғи мінезін, қабілетін ерте жастан дамытады. Бала – болашағымыз, қуанышымыз. Балабақша – келешек ел басқарар, жер-суына иелік етер, ел жерін гүлдендірер, мерейін өсіріп, мәртебесін биіктетер жасампаз жандарды шындап, өмірдің ең басты сатысын қалайтын киелі ұя. &nbsp;Жалағаш ауданындағы «Зейнеп» балабақшасы келер ұрпақты еңбекке, өнер-білімге, елінің ар-намысын қорғауға және ізгі адамгершілік ниеттерге баулиды. Сондай талаптарға сай үздік балабақшалардың бірі Әрбір тәрбиешінің тынымсыз, адал еңбегінің, біліктілігі мен білімдерінің арқасында «Зейнеп» балабақшасы бүгінде жоғары жетістіктерге жетіп жүр.&nbsp;Аталған балабақша 2015 жылы құрылған. Қазіргі таңда онда 2 топ жұмыс жасап, 50 бүлдіршін тәрбиеленуде. Балабақшада 12 қызметкер жұмыс жасайды. Әдіскер, екі тәрбиеші және олардың көмекшілері, медбике, шаруашылық меңгерушісі, аспазшы және оның көмекшісі, тазалықшы мен қарауыл, бәрі-бәрі балалардың ертеңіне, қауіпсіздігіне қызмет етеді.Балабақша ұжымы келешек ұрпақтың тәрбиелі болып өсу жолында аянбай еңбек етуде. «Үйренер нәрсең – білім мен мейірімділік» деп Жүсіп Баласағұн айтқандай, тәрбиешілер ұжымы әрбір күнін үнемі шығармашылық ізденіс жолында өткізеді. Балабақша меңгерушісі Бақыт Сағидатованың айтуынша, мұнда мектепке дейінгі тәрбие мен оқытудың үлгілік оқу бағдарламасы аясында оқу-тәрбие жұмыстары қазақ тілінде жүргізіледі.&nbsp;– Балаларға үш мезгіл ас беріледі. Қазіргі таңда балалар күнделікті толығымен келіп жатыр. Мұндағы тәрбиешілер – жоғары білімді мамандар. Басқа балабақшадан ауысып келіп жатқан балалар да жетерлік. Бұл ұжымның нәтижелі жұмысының жемісі деп білемін. Осы уақытқа дейін ата-аналар тарапынан ешқандай теріс пікір болған емес. Тәрбиешілеріміз жылдан-жылға өз білімдерін шындап,біліктіліктерін арттыруда. Жалпы стандартқа сай жұмыс толық өз деңгейінде атқарылып жатыр. Өздеріңіз білетіндей, балабақшамызда 2 топ бар. 3 жаспен 4 жас аралығындағы ортаңғы топ «Балдырған» тобы деп аталса, 4 жас пен 5 жас аралығындағы ересек топ «Көгершін» тобы деп аталады. Әр топта 25 баладан бар. Жыл сайын жас ерекшеліктеріне қарай «Көгершін» тобынан 15-16 баланы мектеп жасына толуына байланысты арнайы «Қош бол, балабақшам» атты ертеңгілік ұйымдастырып, мектепке шығарып саламыз. Барлық тәлім-тәрбие, достық, сыйластық, мейірімділік, жылулық осы балабақшадан бастау алады. Сондай-ақ айта кететін жайт, алдағы уақытта осы балабақшаның филиалын Ақсу ауылынан ашамыз деген үлкен жоспарымыз бар, – дейді, Бақыт Сағидатова.Балалар – адамзаттың ертеңі, еліміздің үміті мен болашағы. Балабақша тәрбиешілері балаларға үздіксіз тәрбие мен білім беруде жаңартылған педагогикалық технологияларды кеңінен қолданып, сапалы білім беруде барлық жағдай жасауға тырысады.&nbsp;Жарық пен үйлесімділікке толы балабақша ұжымы өз тәрбиеленушілеріне тәлім беру жолында, балабақшаны жайлы және жылы үйге айналдыру үшін аянбай еңбек етіп, көп күш, тәжірибе жұмсайды. Әріптесім екеуміз балабақша ауласына кіргеннен таза аула, ерекше ойын алаңдары мен көктемгі әрекет, күздегі берекет тақырыбы аясында өткізіп жатқан «Қош бол, Жаз» атты ертеңгіліктің куәсі болдық. Мұнда балалар жаз мезгілімен қоштасып, жеміс-жидектерден дайындалған шырындарды ажырату арқылы көңілді ойындар ойнап, бойларын сергітіп, жеміс-жидектің түрлерімен таныс болды. Осындай көңілді шараларды көптеп ұйымдастыратын тәрбиеленушілерді мамандығына ғашық тәрбиешілер қарсы алады.Бұл – білім мен ортаға бейімделудің тірегі. Мұндағы тәрбиешілер ұжымының бүгінде жеткен жетістіктері көп. Атап айтар болсақ, Қазақстан халқының бірлігі күніне орай өткізілген «Достық бекеті» облыстық байқауының аудандық кезеңінде балабақша тәрбиеленушісі Әмина Бибітжан жүлделі ІІІ орын иеленген. Сондай-ақ «Жеті Өнер» VI Халықаралық шығармашылық фестиваль-конкурсының 2021-2022 оқу жылындағы іріктеу кезеңінен сүрінбей өтіп, еліміздің барлық өңірінен жиналған кіл мықтылар арасында сайысқа түскен. Бақытты балалар мекені Жаңа Қазақстанды өркендетуге өнері мен білімін арнайтын дара талант иесі, «Зейнеп» балабақшасының тәрбиеленушісі Ақниет Досбол арнайы «Эстрадалық ән салу өнері» номинациясын иеленген.&nbsp;Бұдан бөлек мектепке дейінгі білім беру ұйымдарының тәрбиеленушілері арасында «Бақытты балалық шақ» қашықтан аудандық бейнеролик байқауында Алуа Ғабит «Дарынды бала» номинациясымен марапатталған. Сондай-ақ «Ата Заңым – айбарым» атты аудандық патриоттық әндер байқауында Еркеназ Союзбек арнайы марапатталған.«Зейнеп» балабақшасының құрылтайшысы, ізденімпаз, іскер басшы Еркебұлан Мүшелбаев балалардың жан-жақты, үйлесімді тұлға болып қалыптасуларына барынша жағдай жасауға тырысатынын айтады. Балабақшадан ұшқан түлектердің алды бүгінгі таңда мектепте білім алуда. Тәуелсіз еліміздің бақытты балдырғандарына білім мен тәрбие беру жолында балабақша ұжымы жас та болса қажырлы еңбек етіп, біршама жетістіктерге қол жеткізген. Балалардың саялы да сиқырлы мекеніне айналған мекеме балалар үшін қашан да қымбат әрі жақын болары анық.&nbsp;

Жалағаш ауданындағы «Зейнеп» балабақшасы қарқынды жұмыс істеуде

&nbsp;<a href="https://kyzylorda-news.kz/">Kyzylorda-news.kz</a>. Алдағы екі тәулікте Қазақстан аумағында атмосфералық фронталды бөлімдердің өтуіне байланысты тұрақсыз ауа райы сақталады, - деп хабарлайды “Қазгидрометке”.Синоптиктердің болжамынша, &nbsp;12 наурыз күні Павлодар және Қарағанды облыстарында қар аралас жаңбыр жауады. 12-13 наурыз күндері Жетісу, Абай, Шығыс Қазақстан, Түркістан, Жамбыл сондай-ақ Алматы облыстарында да қар аралас жаңбыр жауады деп болжанып отыр.&nbsp;Республика бойынша жел күшейіп, тұман шөгеді, көктайғақ болады деген болжам бар.&nbsp;Еліміздің кейбір өңірлерінде түнде ауа температурасы -10-20 градус аяз көрсетсе, күндіз -2-10 аяз болуы мүмкін. Қазақстанның оңтүстік аймағында түнде термометр бағаны -2-12 градусқа төмендесе, күндіз 6 градус аяз болады деп болжанған. &nbsp;Фото: freepik

Алдағы күндері ауа райы қандай болады?

&nbsp;<a href="https://kyzylorda-news.kz/">Kyzylorda-news.kz</a>.&nbsp;Алматы прокуратурасы 7 жасар Карина Закураеваны өлтірді деп айыпталған өгей ананы 20 жылға бас бостандығынан айыруды сұрады, - деп хабарлайды <a href="https://massaget.kz/basty-zhaalytar-438/102916/">Massaget.kz</a>.7 жасар қыздың өліміне қатысты іс бойынша тараптар арасындағы пікірталас кезінде прокурор күдікке ілінген әкесінің серіктесі, қоғам қайраткері Балжан Тұрлыбекке 99-баптың 3-бөлімі "Адам өлтіру" бойынша жазалауды сұрады.<blockquote>"Жауапты жеңілдететін мән-жайлар анықталмады. Кінәсін ауырлататын мән-жайлар да анықталған жоқ. Мүлікті тәркілеуге негіз жоқ. Қылмыстың ауырлығын аса ауыр санат ретінде ескере отырып, жаза тағайындауды сұраймыз. Айыптаушы тарап бап бойынша жаза тағайындауды орынды деп санайды және соттан қылмыстық кодекстің 99-бабы, 3-бөлігі бойынша сотталушыны кінәлі деп тануды және орташа қауіпсіздік мекемесінде 20 жылға бас бостандығынан айыруды тағайындауды сұрайды. Қамауда ұстау уақытын есепке алу, сондай-ақ, сотталушыдан іс жүргізу шығындарын және Жәбірленушілерге өтемақы қорына 30 АЕК мөлшерінде төлемді өндіріп алу керек", - деді прокурор сот отырысында.</blockquote>Өз кезегінде жәбірленушілердің, қаза тапқан қыздың туыстарының адвокаттары өмір бойына бас бостандығынан айыру түріндегі жазаны және сотталушыдан қыздың әжесінің пайдасына 20 миллион теңге моральдық залал өндіруді сұрады.Фото: Видеодан алынған кадр

7 жасар қыздың өлімі: прокурор өгей анасын 20 жылға бас бостандығынан айыруды сұрады 

<a href="https://kyzylorda-news.kz/">Kyzylorda-news.kz.</a> «Қуанышты бөліссең, көбейеді» деген саналы сөз санамызда сайрап тұрғандықтан болар, бізге жеткен қуанышпен өздеріңізбен бөліскенді жөн санадық. Мереке қарсаңында аудан тұрғыны Ботакөз Арқашбаева республикалық «Ару ана» конкурсының жеңімпазы атанып, Мемлекет басшысы Қасым-Жомарт Тоқаевтың қолынан марапат алды.Шиеліліктер жеңімпаз атанған жас кәсіпкерді жылы лебізбен күтіп алып, ыстық ықыластарын білдірді. Ал дүйсенбі күні аудан әкімі Нұржан Ахатов жерлесімізді қабылдап, жеңісімен құттықтады.Естеріңізге салсақ, ҚР Президенті жанындағы әйелдер істері және отбасылықдемографиялық саясат жөніндегі Ұлттық комиссияның ұйымдастыруымен өткен «Ару ана» республикалық конкурсының қорытындысымен Қазақстан бойынша 20 қыз-келіншек іріктелген болатын. Соның ішінде алты нәзікжандар оза шауып, үлкен конгресс-холда мерекелік шарада марапатталды. Ал Ботакөздің жобасы «Агробизнес саласындағы үздік жоба» номинациясы бойынша жеңімпаз деп танылды.<blockquote>– Негізгі мамандығым хореограф болғанымен, 2017 жылдан бері «Оразбек» отбасылық шаруа қожалығын ашып, мал шаруашылығымен айналысуды бастағанмын. Қазір ешкі саны 100-ден асты, Австралия және Германиядан ешкі төлін әкеліп, жергілікті тұқымдармен будандастыру тәжірибесін қолға алдым. Алдағы уақытта будандастырылған жаңа тұқымды халықаралық сатылымға шығару жоспарда бар, – деді.</blockquote>Жерлесіміздің жобасы «Ешкі сүтін терең өңдеу» деп аталады. Тәулігіне 50 литр ешкі сүтін өңдеуге бағытталған. Сондай-ақ ол ешкі сүтінен ірімшіктің 4 түрін, құрт, май, брынза, сүзбе жасап сатады. Өнімдерінің сұранысы да өте жоғары.&nbsp;

Шиелілік ару "Ару ана" жеңімпазы атанды

<a href="https://kyzylorda-news.kz/">Kyzylorda-news.kz.</a> Алтын күздің нағыз берекелі шағы – егін жинау науқаны. Екі мәрте Социалистік Еңбек Ері атанған Ыбырай Жақаев егінші жастарға «Егінді өсіре білуің – ең алғашқы асуды алуың, ал өнімді ысырапсыз жинап алуың – халыққа тартқан асылың» деп айтқан болатын. Осы қағиданы қатаң ұстанған жалағаштық диқандар былтыр жылды толайым табыспен қорытындылады. 25 жылдан бері дала төсінде тер төгіп, күрішпен сырласып, мол өнім жинаудың қыр-сырын білетін диқан Пернебай Қарамендиев әлі де ауданда күріштің күтімін жасап келеді.Ата-бабаларымыз ертеден таңның атысы, кештің батысына қарамай, алқап басындағы бейнетке ат салысып, егін егіп, суарып, баптап, оны төкпей-шашпай жинап алуға қамданған. Осы жолда өзінің берекелі ісімен танылған, жұмыстың барлық қиын сатыларынан өткен, қызметте ысылған, еңбегі еселенген, күріш саласын толықтай меңгерген маман – «Ақ Бостай» шаруа қожалығының күрішшісі Пернебай Қарамендиев.25 жылдан бері диқан болған кейіпкеріміз Пернебай Қарамендиев – бүгінде егіннің қыр-сырын жетік білетін күрішші. Ол 1956 жылы Ақсу ауылында дүниеге келген. 1963-1971 жылдары ауылдағы сегіз жылдық мектепті бітіріп, 1971-1973 жылдары №202 мектептен білім алған. 1974-1976 жылдары Германияда әскери борышын өтеп, «Гвардия» медалімен марапатталған. Еңбек жолын ең алғаш 1976 жылдың маусым айында Ақсу совхозында күрішші, механизатор болып бастаған.&nbsp;Кейіпкеріміздің ауыл шаруашылығына қосқан еңбегі елеусіз емес. Бүгінге дейін бірнеше мәрте ауылдық, аудандық, облыстық «Алтын күз» шараларында марапат төрінен көрініп жүр. «Диқан жерін анасындай сүйеді, жер диқанға баласындай иеді» демекші, алты ай бойы егіс алқабында тер төккен күрішшінің бейнеті мол.&nbsp;Осындай шаруаның шырайын кіргізіп, өнім алуда рекорд орнатқан Пернебай Қарамендиев 1983 жылы 50 гектар күріш егіп, әр гектардан 70 центнер өнім алып, озат күрішші атанса, 1984 жылы әр гектардан 65 центнер, 1987 жылы әр гектардан 80 центнер өнім алып, ауданның, ауылдың үздігі атанған. 1990 жылы әр гектардан 63 центнер өнім алып, ауыл диқандарының алды болды, 2009 жылы облыста көш бастап, Алматы қаласындағы «Алтын күз» салтанатты шарасына қатысып, жүлделі орынға ие болды.&nbsp;Кейіпкеріміз қажырлы еңбектің арқасында 2013-2017 жылдары да ауылда үздік атанған, 2019 жылы «Озат бригадир» номинациясына ие болды.Бала жасынан ауыл шаруасына &nbsp;ерте араласқан ел ағасы – бүгінде егістік &nbsp;алқабында өнімі бітік &nbsp;майталман күрішші. Өз ісіне мығым диқан жерді мәпелеп, алтын дәннің бабын табуда қажырлы еңбек пен үлкен ізденіс қажет екенін айтады.Күрішші былтыр өзінің қарамағындағы 41 гектар жерге Сыр салысының «Лидер» сұрпын сеуіп, гектарынан 80 центнер өнім алды.&nbsp;<blockquote>– Көктем келісімен егіс даласына Сырдың басты дақылын егіп, мәпеледік. Күріш те бала секілді. Қалай баптап өсірсең, солай өнімін береді. «Күріш – суымен ырыс» демекші, күрішті егіп болған сон, суға бастырамыз. Оны егінжайға орақ түскенше уақытылы суарып, күтіммен қараймыз. Күріш дұрыс шығуы үшін дұрыс суара білу керек. Себебі мол өнімге қол жеткізуде судың маңызы зор. Яғни күріштің шығымы берілген суына байланысты болады. Аяқ су былтырғыға қарағанда биыл тапшы болды, десек те шаруашылық жігіттерінің арқасында арнайы насоспен суарып, уақытылы тыңайтқыштарын беріп, күтім жасадық. Ыстық күндері күріштің күтімін күшейтіп, көзіміздің қарашығындай қарадық. Нәтижесінде Жер ана ырыс-несібемізді молынан берді. Оған өздеріңіз көріп тұрған жайқалған егістік дәлел. Өздеріңіз білетіндей «Ақ бостай» шаруа қожалығы жыл сайын мол өнім алып, өңірдің экономикасын арттыруға өз үлесін қосып келеді. Баптай білгенге жер жомарт қой, – дейді дала еңбеккері Пернебай Қарамендиев. &nbsp;</blockquote>Күз – береке мен мерекенің, ырыс пен несібенің айы. Егінжай мен қырман басында қызу жұмыстың қайнайтын кезі, тау-тау астықтың ел қамбасына құйылар шағы. Еңбек майталмандарының күн-түн демей тіршілік қылатын уақыты. Бір сөзбен айтқанда, бұл – еліміз үшін жауапты да шешуші кезең. Осынау кезеңде күріштен шашау шығармай жинап алып, жауапты науқанға белсенділік таныту – әрбір азаматтың парызы.&nbsp;Кейіпкеріміз «еңбек етпесең, елге өкпелеме, егін екпесең, жерге өкпелеме» деген тәмсілді үнемі қаперде ұстайды. Таң бозарғаннан егістікке қарай бет алып, тынымсыз еңбек етуден шаршамайтын шаруа адамы, тәжірибелі маман. Арда азаматтың бойындағы қайтпас қайсарлығы мен байсалдылығы, жұмысқа деген құлшынысы жастарға үлгі.&nbsp;Бастысы, жасы алпыстың асқарынан асса да бейнеттің бел ортасында жүргені қуантты. Ол – тек іскер азамат қана емес, отбасында жары Аманкүл апай екеуі 2 ұл, 3 қыз өсіріп, олардан 12 немере сүйіп отырған үлкен бір әулеттің алтын қазығы. Ауыл шаруашылығы саласын өркендетуде тынбай еңбек еткен еңбек адамы Пернебай Қарамендиев қашанда құрметке лайық. Оның егіс даласындағы елеулі еңбегі кейінгі ұрпаққа үлгі болып қала бермек.&nbsp;

25 жыл күріш еккен жалағаштық Пернебай Қарамендиев

&nbsp; <a href="https://kyzylorda-news.kz/">Kyzylorda-news.kz</a>.&nbsp;Кәсіпкер болуды армандайтын адам кемде-кем. Дегенмен істі неден, қалай бастау керегін білетіндер көп емес. Жалпы кәсіпкерлікті бастау үшін ең алдымен жоспар, қаржы саласының тілімен айтқанда бизнес жоба керек. Қолға алғалы отырған кәсіп саласында тәжірибенің болуы да аса маңызды. Себебі білімсіз, біліксіз, тәжірибесіз, әрі ол кәсіп туралы ешқандай көзқарас болмаса істің алға басуы қиын. Осы орайда тәжірибелі кәсіпкер Жамбыл Қожахметовпен әңгімелесуді жөн көрдік. Ол – Шиелі ауданының тумасы. Бүгінде пластик қасықтың орнына жеуге жарамды ас үй құралдарын шығаруда. Яғни тамақ ішіп болған соң қасықты жеп қоюыңызға болады. Бұл идеяны ол кәсіпкерлікті қолдаудың мемлекеттік бағдарламасы аясындағы қайтарымсыз гранттың арқасында жүзеге асырды.<blockquote>– Бүгінде бизнестің түр-түрі бар. Әркім әр түрлі кәсіппен айналысады. Бірақ қай істің болсын өзіндік қыры, ерекшелігі болады. Мәселен, бір кәсіппен барлығы да айналысады. Ол ауыл шаруалығы болсын, сұлулық салоны болсын. Ал тың идеяны ойлап табу екінің бірінің қолынан келе бермейді. Мен ерекше кәсіппен айналысуды біраздан бері жоспарладым. Жоспарымды сан рет өзгерттім. Достарымның, ата-анамның кеңесіне жүгіндім. Осылайша ерекше кәсіпті қолға алдым. Қиындығы да көп, жеңіл тұстары да жетерлік. Қолы үйреніп, істеп жүрген адам тез-ақ меңгеріп кетеді. Біз көбіне тамақ ішкенде бір реттік ыдыстар пайдаланамыз, оны қоқысқа тастаймыз. Ал біздегі ыдыс-аяқтар арнайы дәмнен әзірленіп, тәтті қоспалармен дайындалады, – дейді кәсіпкер.</blockquote><blockquote>Цех айына 10 мың шыныаяқ, 2000 табақша, 3000 сорпа ыдысын шығарады. Оны дайындауда кәдімгі ұн мен жұмыртқа қолданады. Дәмін келтіру үшін әртүрлі қоспалар да қосылады екен. Кәсіпкер тек осымен шектеліп қалмақ емес. Алдағы уақытта жеуге жарамды қасықтар, шанышқылар шығармақ. – Жеуге жарамды ыдыс – бұл табиғи ингредиенттерден жасалған өнім: жұмыртқа, ұн және түрлі қоспалар. Біздің ыдыспен сіз кез-келген жұмсақ тағамды (мысалы, сорпа немесе ботқа) шамамен он минут жей аласыз, содан кейін оның өзін жей аласыз. Бірінші партияда стандартты шыныаяқтар болды. Рецепт пен пісіруге арналған дұрыс пішінді табу алты айдан астам уақытты қажет етті. Рецепт ұзақ уақыт бойы сынақ пен қателік арқылы дүниеге келді: қамыры майлы емес, бірақ өте құрғақ та емес. Шыныаяқ әдемі және дәмді ғана емес, сонымен қатар берік болуы керек, бірнеше күннен кейін нан сияқты ыдырамау керек, – деді Ж.Қожахметов.</blockquote>Жеуге жарамды ыдыс сұйықтықтар мен жылудың әсеріне төзімді. Суық тағамдармен түйісуде өзінің қасиеттерін одан да ұзақ сақтайды. Еу­ро­па­лық өндіру­шілер мұндай өнім­дерді түрлі дәмімен ұсынады. Десертке арналған шоколад, ваниль немесе құлпынай, ыстық тағамдарға арналған дәмдеуіш қосуға болады. Жеңіл тамақтар мен десерттер үшін жеуге жарамды стақандар қолдануға болады.<blockquote>– Қомақты қаражатты бірнеше жыл жинақтап, бизнес жобаларды зерттедім. Өңірімізде саудамен айналысатындар көп. Осыдан-ақ өндіріске бет бұру керегін түсіндім. Содан бері тың жобаны қолға алу керек деген ой маза бермеді. Сан түрлі бизнесті интернет же­лі­сінен қарадым. Көңілімнен шықпады. Бүгінде бұл бизнеске сұраныс жоғары. Бәсекелес аз, тіптен өңірде жоқтың қасы. Сондықтан қиындықсыз жұмыс істеуге болады, – дейді жас кәсіпкер.</blockquote>Жастар­дың дені кәсіп бастауға бет бұрды. Осы уақытқа дейін қаншама бағдарлама жүзеге асып, жастар игілігіне берілді. Қайтарымсыз қаржымен кәсібін дөңгелетіп отыр­ғандардың көптігі де көңілге демеу. – 2021 жылы «Бизнестің жол картасы» мемлекеттік бағдарламасына қатысып, 5 млн теңге көлемінде қайтарымсыз грант ұтып алдым. Осы қаражаттың арқасында идеямды жүзеге асырдым. Мұндай өнімдер сұранысқа ие, Ресейде өндірушілер арасында бәсекелестік бар болғанымен, бағасы қымбат. Сондықтан, бұрын Ресейден тапсырыс бергендер, қазір тікелей бізден алады. Цех автоматтандырылған, тәулігіне 24 сағат, жыл бойы ыдыс-аяқ шығаруға мүмкіндік бар. Көп жұмыс күшін қажет етпейді. Ресей Федерациясында серіктестерімен бірге арнайы оқу-семинарларға қатыстық. Цех іске қосылды. Көптеген жоспарлар бар, өндірісті кеңейту, шығарылатын өнімнің түрін арттыру, сондай-ақ болашақта эко-ыдыстарды (жеуге жарамсыз) іске қосу, – дейді кәсіпкер. Кәсіппен айналысу үлкен тәуекелді талап етеді. Қай істі болмасын бастау үшін де адамның ынта-ықыласы жеткіліксіз, оның біліміне қоса қарым-қабілеті мен тәжірибесінің болуы маңызды. Мемлекет кәсіп бастаймын дегенге мол мүмкіндік беріп отыр. Тек ойдағы істі бастап, соны ұршықша иіру қажет.Мөлдір САБЫРЖАН

Шиелілік кәсіпкер бағдарлама игілігін сезінді

<a href="https://kyzylorda-news.kz/">Kyzylorda-news.kz</a>&nbsp; Бойдағы талантты жасыру мүмкін емес. Сыр өңірі шайырлар мекені десек, осы өлеңді өміріне серік еткендер легі бүгін де бар. Әрі жас есімдермен толығып келеді. Осындай ойы озық, бойы талантқа толы жас өреннің бірі – Ердәулет Орынбасаров. Ол бөлек бітімді жырларымен талғампаз оқырманның көзайымына айналып үлгерген жас ақын.Талапты жас Тәйімбет Көмекбаев атындағы №250 мектеп-лицейінің 10-сынып оқушысы. Өлеңге деген қызығушылығы бастауыш сыныптан басталыпты. Жазба ақындығымен қатар Ердәулет жас айтыскер ақын. 2021 жылдан бері Берік Аққалиев пен Сырым Әділбековтен тәлім алады. Мектептегі қоғамдық жұмыстардың да белсенді қатысушысы. 3 жылдан бері аудандық «Жас Ұлан» ББЖ ұйымының ұланбасы. Өлеңді де, айтысты да, қоғамдық жұмыс пен сабақты тең алып жүрген жас талант мінезге де бай. Қазақы қарапайымдылық, ер азаматқа тән сабырлылық, кішіпейілділік те бір бойына тоғысқан.Өлеңге іңкәр өрен ел көлемінде өткізілген жыр дүлділдерінің бәсекелерінде ортаға олжа салып, даралығын дәйекті түрде дәлелдеп келеді. Нақтылай түссек, 2021 жылы «Ғасыр ғұмырлы ғажап ақын» атты облыстық оқушылар айтысында ІІ орын иеленсе, былтыр «Арда туған Алаштың арыстары» атты облыстық ақындар мүшәйрасында І орын, осы жылы республикалық Абай оқулары байқауының «Мен жазбаймын өлеңді ермек үшін» номинациясы бойынша ІІІ орын алған. Кезең-кезең болып өткізілетін Ілияс Жансүгіров оқуларының «Ілияс Жансүгіровке арнау» номинациясы бойынша аудандық, облыстық кезеңнен І орын иеленіп оза шапқан өрен республикалық кезеңде де бас жүлдені қанжығасына байлаған. Осы ретте айта кеткен жөн, жас ақынның Ілияс Жансүгіровке арнаған «Мұң» және «Құлагердің қайғысы» деген екі поэмасы бар.Қаламы қуатты жас дарын суырыпсалмалықты талап ететін айтыс додаларында да жас айтыскер ретінде біршама белесті бағындыруда. 2018 жылы облыстық деңгейдегі дарынды оқушылардың «Сыр үміті» энциклопедиясына есімі енсе, 2021 жылы жас ақын ретінде сол уақыттағы аудан әкімі Қайрат Нұртайдың «Жас дарын – 2021» атты марапатын иеленген.<blockquote>Негізі өлеңге деген қызығушылығым 4-сыныпта басталған. Алғаш рет ұстазыма арнап қалам тербегенмін. Ата-анамның ақындық өнерге қатысы жоқ. Десе де атамның қарындасы Мырзакүл Тілеумұратқызы журналист әрі ақын болған деседі. Үйдегілер бұл өнер қанымызда бар деп топшылайды. Ата-анам әрбір қадамыма қолдау, адымыма серпін беріп отырады. Ал ұстаздарым бағыт-бағдар көрсетіп, өнер әлеміне терең бойлауды санама сіңіруде. Солардың арқасында жыл сайын шыңдалып, бой түзеп келемін. Өзім білім алып жүрген Т.Көмекбаев атындағы №250 мектеп-лицейінің ұжымы да әрдайым өнерімді қолдап, қолпаштап отырады. Алдағы уақытта жеке шығармашылық кешімді өткізіп беруге де ниетті. Алға қойған жоспарларым – нық, мақсатым – айқын. Болашақта қазақ тілі мен әдебиеті пәнінен ұстаз болуды таңдап отырмын, – дейді жас өрен.&nbsp;</blockquote>&nbsp;Ердәулеттің ел сыйлар азамат болып өсіп келе жатқаны көз қуантады. Айналасындағылар да оның мінезін көпке үлгі етеді. Шығармашылығын шыңдауда әдеби кітаптар оқуды да әдетке айналдырған ол «Кітап – менің айнымас серігім» деп әңгімесін әрі қарай жалғады.<blockquote>– Әсіресе, поэзиядан Қадыр Мырза Әлі мен Ұлықбек Есдәулетті, прозадан Әбіш Кекілбаев пен Шерхан Мұртазаны және Ілияс Есенберлиннің шығармашылығын сүйсіне оқимын. Ал шабыт – ішкі сезім. Ішкі сезімге байланысты өлең туады. Жалпы мына зат шабыт сыйлайды деп дөп басып айта алмаймын. Десе де, көңілденген кезде не мұңайған мезетте жақсы жыр жазылып, өрнекті өлең өріледі. Бұйырса проза және поэзия бағытындағы шығармаларымнан кітапша шығарсам деген ниет бар, – дейді Ердәулет.</blockquote>Жырларынан жасын жарқылының ұшқыны аңғарылып, Сырдың самалы есіп тұратын, шығармашылық келбеті шырайлы ұланның бағындырар биіктері әлі алда. Ердәулет есімін абыройлы арқалап жүрген жас ақынның келешегі кемел болары күмәнсіз.

Қаламы қуатты қармақшылық жас ақын

<a href="https://kyzylorda-news.kz/">Kyzylorda-news.kz.</a> Баланы ұрпақ жалғастырушы, елдің болашағы деп айтамыз. Ал бүгінгі балдырғандардың денсаулығы қалай? Және балалар бөлімінің тыныс-тіршілігі қандай қалыпта? Осы сан сауалдарға жауап іздеп көрген едік.Түнеукүні Шиелі аудандық көпбейінді аурухананың балалар бөлімшесіне табан тіредік. Әуелі бөлімше меңгерушісі, тәжірибелі мамандардың бірі Сәуле Исмайлова өз жұмысына тоқтала кетті.<blockquote>– Шиелі аудандық көпбейінді орталық ауруханасының аудандық аурухана бөлім ғимараты 2019 жылы жаңадан берілді. Ғимарат типтік нысанда салынған, барлық жаңа медициналық аппараттар және құрал-жабдықтармен толықтай қамтылған. Жаңа аурухана 150 төсек орыннан, 14 бөлімнен құралған. Соның бірі біздің – балалар бөлімі. Балалар бөлімшесі арнайы жабдықталған 25 төсек орнынан, 2 бекеттен тұрады. Бөлім ішінде 2емшара бөлмесі, 3 интенсивті палатасы, 2 ординаторлық бөлме, ойын бөлмесі, демалу бөлмесі, асхана, мүгедек балаларға арналған арнайы жабдықталған дәретхана және себезгі бөлмелерден құралған.Мұнда барлығы 37 адам еңбек етеді. Білікті дәрігерлер, медбикелер, кіші қызметкерлер және техникалық қызметкерлер жұмыс істейді. Кадрлардың ауысуы жоқ, әркім өз жұмысын бағалап, қатаң тәртіп сақтайды. Балалардың денсаулығы үшін бәрін жасаймыз. Кішкентайлардың өмірін арашалап қалуда мамандарымыз қолдан келгенді аямайтыны анық. Оған қызметкерлердің біліктілігі де, мекеменің техникалық базасының қуаты да жетеді, – деп сөз өрбітті.</blockquote>Балалар бөлімшесі 14 жасқа дейінгі балаларды жоспарлы және шұғыл түрде емдейді. Бөлімшеге бүлдіршіндер тыныс алу жолдары, қан айналымы жүйесі, орталық жүйке жүйесі, асқазан-ішек жолдары сынды әртүрлі диагноздармен келеді. Әрине, балаларды диагностикалау және емдеу ересектерге қарағанда әлдеқайда қиын. Бірақ, Шиелі аудандық көпсалалы ауруханасының балалар бөлімі қызметкерлерінің кәсіби шеберлігі мен сүйікті ісіне деген сүйіспеншілігінің арқасында мыңдаған бала сапалы әрі дер кезінде ем-дом алуда.Кішкентай сәбидің, естияр баланың саулығын білу үшін сезімталдық қасиет керек. Ал өмір үшін күреске толы мамандықты игеруге екінің бірі келмейтіні анық.&nbsp;

Қазақстан және Қызылорда облысының жаңалықтары