<a href="https://kyzylorda-news.kz/">Kyzylorda-news.kz</a>&nbsp; &nbsp;Орман – еліміздің баға жетпес байлығы, халықтың дәулеті, экономикалық және экологиялық қорымыз. Қазақстанның шөлді аймағында орналасқан Қазалы ауданы үшін орман шаруашылығының орны ерекше.Мемлекет басшысы Қасым-Жомарт Тоқаев өзінің Жолдауында еліміздегі экология мәселесі басты назарда болу қажеттігін атап өтті. Президенттің тапсырмасына орай экологиялық ахуалды жақсартуға бағыттылған жұмыстарды жоғары деңгейде атқару үшін қазалылық орманшыларға қолдау көрсетіліп келеді.<blockquote>Қазалы орман және жануарлар дүниесін қорғау жөніндегі комуналдық мемлекеттік мекемесінде көктемдік жұмыстары сексеуіл тұқымынан жиырма гектар егілген уақытша тұқым бағында екі миллион төрт жүз мың көшет қазылып, Арал теңізінің ұлтанына он бес мың гектар жерге сексеуіл егу жұмыстарын жоспарланған тасмалдап егу жұмыстары жүреді. Сондай-ақ, тұқым бақ егу мектеп бөлімшесі бар бір гектар қарағаш, үйіңкі, каталпі, сумах, айлант деген тал түрлері егіледі, бір гектар саялы ағаш тұқым бағын және мектеп бөлімшесі құрылып соған қырық мың дана үйіңкі талынан қаламша егіледі. Ағаш егу маусымы сәуір айынан басталады. Сәуір айында тұқым егіп бастап, мамыр айында қаламша тігіледі. Қаламша сыр талынан және терек, жидеден жасап, тігеміз. Бір гектар жерге қырық мың дана қаламша егіледі. Қазалы ауданы бойынша көгалдандыруға он бес мыңға жуық көшеттер босатып отырмыз дейді, – орман молықтыру инженері Айгүл Башен.</blockquote>Жыл көлемінде, атқарылатын жұмыстардың легі толастамайды. Мысалы, Арал теңізінің құрғаған ұлтанына көктем айында он бес мың гектар жеріне сексеуіл көшетін отырғызу жоспарлануда. Сонымен қатар, екі миллион үш жүз мың дана көшетін қазу, көктем айында қаламшадан егілетін мектеп бөлім отырғызуға бір гектар жерін дайындау, жырту, қарықтау және қырық мың дана сыр талы қаламшаларын дайындап егу жұмыстары. Сонымен бірге, жаз айларында екпелерді күтіп-баптау жұмысы – бір жүз он гектар, қолмен отау жиырма гектар, бір мың отыз шақырым жерге минералды жолақтарды жаңғырту және алпыс бес шақырым минералды жолақтарды жаңадан жүргізіледі. Арал теңізінің құрғаған ұлтанына күз айында он сегіз мың келі қарабарақ тұқымын және төрт мың сегіз жүз келі сексеуіл тұқымын жинау, он жеті мың гектар жерге қарабарақ, сексеуіл тұқымын себу, Арал теңізінің құрғаған ұлтанына күз айында төрт мың төрт жүз он алты гектар жеріне толықтыру жұмыстарына, төрт жүз тоқсан бес мың дана көшеттен отырғызу жұмыстарына ден қойылуда. Орман тұқымбағына жиырма гектар жер дайындау, қара сексеуіл ағашының тұқымын себуге бір мың екі жүз келі сексеуіл тұқымын жинау, ағаштарды орман патологиялық зерттеу жұмысы сексен тоғыз мың тоқсан бір гектар жерге жүргізіліп келеді. 2024 жылға көктем айына жетпіс алты мың дана көшетін босатуға (клен), көктем, күз айларында шолып тексеру жұмыстары жоспарланып отыр.&nbsp;

Қазалылық орманшылардың тынымсыз тіршілігі

&nbsp;<a href="https://kyzylorda-news.kz/">Kyzylorda-news.kz</a>&nbsp; &nbsp;Наурыз – жаңа күннің бастауы. Табиғаттың жаңарып, тіршіліктің жанданып, ниеттің тазарып, жақсылықтың, ізгіліктің оянатын шағы. Көктемнің көңілге шаттық ұялатар бұл мерекесін қазақ халқы "ұлы іс, қысқаша ұлыс" атаған. "Ұлыстың ұлы күні" тіркесі де осыдан шықса керек. Бұл күні еліміздің түкпір-түкпірінде алты қанат қар үй тігіліп, қазан ішінде наурыз көже қыж-быж қайнап, ерекше аталып өтеді. Жақында наурыз мерекесі әрбір балғынға салт-дәстүр мен білімді ұштастыра отырып, тәлім берген №266 мектеп-лицейде кең көлемде тойланды.Әсем шараның шымылдығын мектеп шәкірттері "Ерке сылқым" күйімен ашты. Мұнан соң, мектеп ауласындағы әз-Наурыз мерекесінің ашылу салтанатына қатысқан Қазалы аудандық білім бөлімінің басшысы Әділхан Жөлекешов сөз сөйлеп, жиналған жұртты жаңа жылмен құттықтады.– Наурыз – ұлыстың ұлы күні, тіршілік атаулы жанданып, жер дүние жаңаратын кезең. Барша түркі халқы асыға күтіп, тойлайтын ұлы мереке. Халқымыз қашанда жыл басын ізгі ниет, ақжарма тілекпен қарсы алған. Ендеше, осындай керемет мерекенің куәсі болып отырған барлығыңызды Наурыз мерекесімен құттықтаймын.Бүгінгідей, бір іске жұмылып, қазақы салт-дәстүр, әдет-ғұрыпты үлкенді-кішілі болып насихаттауларыңыз ұжымның ауызбірлігінің биіктігін аңғартса керек. Ұстаздар мен оқушылар арасындағы мұндай тандем, көңіл биігіндегі үйлесімділік сіздерді білім бәйгесінде болсын, басқа да, байрақты додаларда асықтарыңызды алшысынан түсіретіні даусыз. Ендеше, жыл сайын осындай көтеріңкі көңіл күйде дендеріңіз сау, жан-жақтарыңыз түгел Наурыз мерекесіне аман-есен жете беріңіздер, – деді Әділхан Оңдасынұлы.Бұдан кейін, мектеп шәкірттері ұлттық ойын түрлерінен сынға түсіп, өзара мықтыларды анықтады. Наурыз мерекесіне жиылған ата-ана, ұстаздар лицей ауласында батыр, би бабалардың атымен аталған алты бірдей шаңыраққа бас сұғып, ондағы қазақы қонақжайлылыққа тәнті болды.Мәселен, «Жанқожа батыр» этно-ауылында меймандар теріден, жүннен жасалған ұлттық заттарға куә болып, ұннан жасалған ұлттық тағамнан дәм татса, «Жалаңтөс батыр» шатырында ұлттық тұрмыстық заттармен танысып, сүттен жасалған ауқаттан алдырды.Ал, бірлестік ұжымдары әзірлеген «Ақтан батыр», «Әйтеке би», «Үрмаш Түктібаев», «Ғани Мұратбаев» этно-ауылдарында өнерпаздар көпшілікті тәнті етті.Бұдан бөлек, мектеп ауласында ата-ана, мұғалімдер арасында күбі пісу, ұлттық ойын, сөз шеберлігінен сайыстар өтті. Ақ жаулықты әжелер қазылығымен өткен сайыс нәтижесінде, "Ең үздік күбі пісуші" бағамын аналар мектебінің мүшесі Баян Матығұлова иемденді. Ал, "Ең үздік ойыншы" бағамы Гүлнар Жалбыроваға бұйырса, "Үздік сөз шеберін" Ғалия Ахметова алды. Тағы "Ең белсенді қатысушы" бағамын Марина Аманжолға табыстады. Мерекелік шара соңы әсем ән мен тәтті күйге ұласты.&nbsp;

«Ерке сылқым» күйімен ашылған мектепішілік шара

Қалаға шыға қалсаңыз қазақтың қаракөздері мен қара домалақтарының шет тілінде қиналмай сайрап тұрғанын аңғару жат емес. Тіпті ағылшын тілін еркін меңгерген мұндай жастардың қатары күн санап көбейіп келеді. Расында бұл бүгінгі уақыттың талабы. Ілгері озамын деушілер үшін тіл өнерін терең меңгеру маңызды. Жаһандану үшін де шет тілін меңгеру қажеттігін жастар жақсы біледі. Себібі «көз – жанның айнасы, тіл – қоғамның айнасы» деген сөз бекер айтылмаса керек. Бұл ана тілін ұмытып, өзге тілде еркін сөйлеу қажет деген пікіріміз емес. Қазақтың біртуар қайраткері, поэзия әлемінде өзгеше орыны бар Қадыр ақынның: Ана тілің – арың бұл, Ұятың боп тұр бетте. Өзге тілдің бәрін біл, Өз тіліңді құрметте! – деген сөзі іспеттес дүние. Расында қала қазақтарының осы бір тілді меңгеруіне қызыға қарайтын кездер аз емес. Тілді меңгеру арқылы қалаған жерде, қалаған адаммен тез тіл табысып, одан қалды шет елдердің мәдениетінің озығын, әдебиетінің азығын, бізге қажетті құндылықтарын үйренуге мүмкіндік ашыла түседі. Мұны ешкім жоққа шығара алмайды. Әсіресе халықаралық байланыс құралына айналған ағылшын тілін терең түсінген адам үшін келешекте жетістікке жету үшін тағы бір қақпа артық ашылғандай болады. Ал осы мүмкіндік ауыл жастары үшін жасалған ба? Оның қандай жолы бар деген сауал баршамыздың көкейімізде тұрары анық. Шынымен санасы аппақ парақтай бүгінгі жастарға осы бастан ағылшын тілін үйретсек, болашақта балаларымыз бізге алғыс айтпайды ма?! Тез қабылдауға бейім тұратын олар мұны да жетік меңгерсе, күні ертең-ақ жемісін жейтінін ойласақ, бұл ұрпағымызға жасаған жақсылық сияқты көрінеді өзімізге. Иә, мұндай жағдай бізде де жасалған. Аралда қазірге дейін талай баланың тілін икемдеп, ағылшын тілін тереңірек түсіндірген жан қазірде арамызда жүр. Ол – Үміт Қазыбайқызы. Осы уақытқа дейін де әлеуметтік желідегі парақшалардан жарнамасымен жақын таныс жанның өзімен тілдесіп, жұмысы жайлы сөйлесудің сәті түсті. Ағылшын тілін ана тіліндей меңгерген Үміт өз кәсібі жайлы егжей-тегжейлі айтып, тіл меңгерсем деген адамның арманын тіпті асқақтататындай әсер қалдырды. Қазақ тілінен бөлек орыс, ағылшын, тіпті неміс тілінде де еркін сөйлейтін кейіпкеріміз осыдан тура бір жыл бұрын, нақтырақ 2022 жылдың тамызында ағылшын тілін үйрететін курсты бастап қолға алған. Қазірде аудандық мәдениет орталығына қарсы орналасқан тілдер орталығында өз кәсібін дөңгелетіп отырған Үміттің үйренушілерінің ең кішісі 5 жаста. – Жалпы тілді меңгеруде адамның жасы ешқашан кедергі болған емес. Тек оның қызығушылығын оята алсаңыз болғаны. Дегенмен бала кезден жаттап, бейімделетін болса, есте сақталып қалады. Әрі ары қарай алып кетуіне де өте оңай. Бүгінгі уақытта 5 жастан бастап бала қабылдап жатырмын. Бірақ бұл шамадағы оқушыларға бірден ағылшын алфавитін жаттатып, тереңірек үйренуіне ықпал жасау қателік болады. Себебі мектеп қабырғасында қазақ әліпбиін жаңа үйреніп жүрген бүлдіршіндер екі тілдің әріптерін қатар меңгеруінде кедергілер болуы әбден мүмкін. Өйткені жазылуы бірдей болғанымен, дыбысталуы әр түрлі болатын әріптер бар. Бірақ 5 жастағы бала сөздерді, шағын өлеңдерді жаттауға бейімделеді. Тіл сындырады. Өзіміз де жазудан бұрын мектеп қабырғасына бармай-ақ сөйлеп үйренеміз ғой. Бұл цикл де дәл сол сияқты өтеді. Сөйлеу білген бала әрі қарай оңай алып кете алады, – дейді Үміт. Иә, дегенмен біз үшін бірінші кезекте ең керегі – нәтиже. Ал Үміттің сабағын тыңдаған үйренушілерінің нәтижесі қандай? Осы жайлы сөз етер болсақ, тіпті сенбейтін боларсыз. Бірақ бұл ақиқат дүние. Еткен еңбегінің жемісін көріп, үйреткен білімінің далаға кетпегеніне қуанған кейіпкеріміз: – Болашақ білімді жастарды, үздіктерді нақтырақ лидерлікке сай жастардың тәжірибе алмасуына таптырмас мүмкіндік сыйлайтын халықаралық FLEX бағдарламасы бар. Міне, осы бағдарлама аясында 4 шәкіртім өз бағын сынап көрді. Қазіргі білімін жетілдіріп, шет елдерден тәжірибе жинаймын, олардың озық дүниелерін меңгеремін деген ниеттегі 4 шәкіртімнің екеуі соңғы шешуші кезеңіне дейін сүрінбей өтті. 40 мың талапкердің арасынан мұндай көрсеткіш көрсету олардың өзі үшін де, мен үшін де үлкен мақтаныш. Тағы бір айта кетерлігі, бұл тек бір жылда алған білімінің нәтижесі. Бірақ үйренушілерімнің сағы сынбады. Керісінше жігерленіп, алдағы уақытта тағы талап қылуды көздеп отыр, – деген ол, – мұнан бөлек менен ағылшын тілін үйреніп жүрген жастардың бір тобы IELTS халықаралық тестін тапсырды. Бұл бағдарлама да оларға шет елдерде оқып, сол жақта жұмыс жасап, тәжірибе жинақтауына ашылған жол. Сол тесттен сүрінбей өткен 2 оқушы қазір Англияда білім алып жатыр. Алдағы тестте тағы 3 қыз өз болашағы үшін IELTS тестін тапсыруды жоспарлап отыр, – деді. Иә, орталықта оқушылар үшін мұнан бөлек те түрлі дайындық жұмыстарын жүргізу жағы қарастырылған. Зияткерлік мектепке, Ұлттық бірыңғай тестілеуге даярлайтын орталықта ІТ мамандары да ағылшын тілін меңгеріп жатыр. Технология тіліне баланған бұл тілді меңгеру арқылы программалау тілін толықтай түсінуге болатынын білген жандар бүгінде жұмыстың жемісін көруде. Бұл жерде 5-6 айдың көлемінде ағылшынның барлық сөздігін жатқа білмесе де, ауызекі пікірлесуге, сұхбаттасушымен түсінісіп, сөйлесуге әбден болады. Мынаны қараңыз. Үміт тек Арал халқымен ғана жұмыс жасамайды. «UMKA» тіл үйрету орталығының арнайы парақшасы арқылы онлайн форматта да жұмыс жүргізеді. Уақыт талабына сай өз кәсібін бейімдей білген жерлесіміздің бұл еңбегі тіпті мақтауға тұрарлық. Өзінің қолында барды қоғамның қажетіне бағыттай алған Үміт тілді меңгеру тек біздің елде ғана емес, әлем халқы үшін өзекті нәрсе екенін анық байқаған. Оған төмендегі өзінің айтқан сөздері айқын дәлел бола алады. – Кәсіпті алғаш бастаған тұста оқушыларыммен жұмыс жасап, оларды нәтижеге жеткізуді ойладым. Ойға алған мақсатым орындалып, бұл кәсіпті одан әрі дамытуды көздедім. Бүгінде ғылым мен техниканың дамыған кезі. Сондықтан қай бағытта жұмыс жасаймын десеңізде еш кедергі жоқ. Міне, интернеттің көмегін пайдаланып, алға жылжуды көздедім. Бұл қадамым да өте сәтті шықты. Осылайша онлайн форматта жұмысты бастадым. Бірден нәтижеге жету оңай емес деп ойлағам. Оның үстіне үйренушілердің қызығушылығы да алаңдатты. Бірақ «көз – қорқақ, қол – батыр» екеніне тағы көзім жетті. Себебі бір ғана REELS(шағын көлемдегі видео сабақ) әп-сәтте 500 мыңнан аса қаралым жинап, тек Қазақстан ғана емес, өзге шет елдерден онлайн курсқа жазылушылар көптеп тіркелді. Бүгінгі уақытта 100-ден адам адам онлайн курстан тіл меңгеріп жатыр. Олар Қытай, Моңғолия, Корея, Албания елдерінде тұрғанымен барлығы дерлік қазақ тілін біледі. Сол жақта қоныстанып жатқан қазақтар. Бірінші кезекте өз ортасына тез бейімделіп, өздеріне ыңғайлы жұмыс табу үшін ағылшын тілінің қажеттігін сезініп жүргендер. Мұнан бөлек әншілер мен актерлер, тележүргізушілер мен эстрадада жүрген жандардың арасынан да ағылшын тілін үйреніп жүрген жандар бар, – дейді. Сондай-ақ кәсіпкердің айтуынша өзге елдегі бауырластардың онлайн форматта білім алуына мұндағы бағаның төмендігі өте қолайлы болып келуі. Кішісі 6 жасар, үлкені 61 жастағы тіл үйренушілердің барлығы «Сіздің ұсынып отырған бағаңыз қолжетімді. Бұл жақта тіл үйрену үшін өтетін курстар өте қымбат» деп пікірін айтып, батасын беріп жататын көрінеді. Иә, Үміт Қазыбаева мұнымен шектеліп қалғысы келмейді. Алдағы уақытта өзінің нәтижесімен бізді де, үйренушілерін де қуанта бермек. Ағылшын тілін өзі ғана жетік біліп қоймай, білгенін көппен бөлісіп жүрген жанға біз де сәттілік тілейміз. Және қолдау жасалар болса қолдан келері көп Үміттің бұл бастамасына дем берсек, әлем елдерімен бәсекелесуге қабілетті жастар Аралдан да көптеп шығары сөзсіз.

Аралдық жас маман ағылшын тілін үйретудің бағдарламасын жасады

<a href="https://kyzylorda-news.kz/">Kyzylorda-news.kz</a>&nbsp; Қызылорда облыстық Қазақстан халқы ассамблеясы жанындағы Ақсақалдар кеңесінің бірінші отырысы өтті.Отырыстың модераторы – ақсақалдар кеңесінің төрағасы, қоғам қайраткері Нұрмұрат Ерманов болды. Іс-шараға облыстық, қалалық, аудандық Ақсақалдар кеңестерінің төрағалары мен мүшелері, «Қоғамдық келісім» КММ қызметкерлері қатысты.Кеңес отырысында өңір мектептеріндегі оқушылардың қауіпсіздігін қамтамасыз ету, жалпы тамақтандыруды ұйымдастыру маңызды мәселесі қаралды.– Соңғы жылдары еліміздің орта білім беретін ұйымдарында білім мен тәрбиенің сапасымен қоса оқушылардың оқу процессіндегі қауіпсіздігі, оның ішінде тамақтану мәселесі аса назарда екені белгілі. Оған, ақпарат құралдарынан белгілі болғандай, мектеп ішіндегі құрылыс сапасынан оқушылардың жапа шегуі, мектеп алдындағы жол өткелдердің қауіпті болуы, жылу науқанының дұрыс ұйымдастырылмауы, тамақтан улану және осындай көптеген мәселелер себеп болды. Әрине, бүгінгі оқушы - бала еліміздің келешектегі азаматы болғандықтан, бұл мәселеге бей-жай қарамай, олқылықтарды шешуге барша қоғам мүшелері міндетті болуы тиіс, - деді Нұрмұрат Наятұлы.Күн тәртібіндегі мәселе бойынша бірінші облыстық білім басқармасы&nbsp; басшысының орынбасары Бектұр Қали өз есебін беріп өтті. «Тамақтандырудың сапасына бақылау ай сайын жүргізілуде. Жеткізілетін тамақ өнімдерінің сапасына, тағамдарды дайындау технологиясына, өнімдердің және дайын тағамдардың сақтау мерзімдері мен жағдайларының сақталуына және т.б. мониторинг жасалады. Тағамдар сапалары туралы құжаттарымен беріліп, дайындау технологиясымен сәйкес дайындалып отыр. Мектеп оқушылары арасында санитариялық ағарту жұмыстарын үздіксіз жүргізу де бақылауда. Сапалы тамақтандыруды ұйымдастыру бойынша мектеп әкімшілігі және көрсететін қызмет көрсетушіге қойылатын талаптар бойынша жұмыстар жүргізілуде. Мектептерде буфеттерде газды сусындар, чипсылар, тез бұзылатын тағамдарды, т.б. өнімдерді сатуға тыйым салынған»,-дей келе мектеп оқушыларының отбасылық–тұрмыстық және жеке басына қатысты зорлық-зомбылықтан қорғау, олардың қауіпсіздігі мен құқықтарын қамтамасыз ету бағытындағы атқарылған жұмыстарды атап өтті.Мұнан соң Қызылорда облысының санитариялық-эпидемиологиялық бақылау департаменті басшысының орынбасары Ерлан Ұзақбаев сөз сөйледі.«Қызылорда облысының санитариялық - эпидемиологиялық бақылау департаментінің аумақтық басқармалар бақылауында 317 жалпы білім беретін мектеп бар, оның 29 жеке мектептер. Облыста 282 мемлекеттік мектеп жанында жалға берілген асханалар жұмыс жасайды, ал 8 мектепте буфеттік тамақ&nbsp; ұйымдастырылған. Облыстағы жалпы 290 мемлекеттік мектеп асхана, буфетін&nbsp;74 жеке кәсіпкер жалға алып жұмыс жасауда.&nbsp; &nbsp; &nbsp; &nbsp; &nbsp; Мектеп асханаларына зерделеу жұмыстарын жүргізу барысында біршама санитариялық қағидалар талаптарының сақталмауы орын алды, заң бұзушылықтар бойынша шұғыл түрде оны жою мақсатында түсіндірме жұмыстары жүргізіліп, ұсыныстар берілді», - деп атап өтті.&nbsp;&nbsp;&nbsp;

Қызылордада ақсақалдар кеңесінің бірінші отырысы өтті

<a href="https://kyzylorda-news.kz/">Kyzylorda-news.kz</a> Наурыз – қазақы болмысымызды &nbsp;танып, ұлттық ұстанымызды ұлықтайтын мереке. Бұл &nbsp;мейрам қазақ халқы үшін жаңару мен жасарудың нышаны. &nbsp;&nbsp;Қазақ халқы &nbsp;төл мерекені шырайлы жыл басы деп құрметтеп, береке-бірліктің, қайта түлеудің тойы ретінде дәріптеп келеді. Міне, осындай ұлы күнді Шиелі аудандық орталықтандырылған кітапхана жүйесі де ерекше тойлап өтті.Біте қайнасқан тірлікке жұмыла кіріскен кітапхана ұжымы мейрамға жақсы дайындалған. Көз көріп, көңіл марқайған соң кітапханашылардың ұйымшылдығы ерекше әсер қалдырды. Жайылған дастарқан мен ұлттық ойындар бәрі де үйлесім тапты. Бозбала мен бойжеткеннің шат-шадыман күлкісі мен білек сыбана күш сынасқан балуандарды да тамашаладық. Асық ойнаған балалар да өзгеше көрініс тапты. &nbsp;«Қонақжайлық – қазаққа тән қасиет» демекші, кітапхана қызметкерлерінің қонақжайлығына тәнті болдық. Неге десеңіз? Келген қонақтарды төрге шығарып, сыйлап, құрметпен қарағаны көңілге қуаныш ұялатты.Мерекелік шараның барысы кітапхана оқырмандарының өнерімен бастау алды. Атап айтсақ, &nbsp;Алғабас ауылдық кітапханасының тұрақты оқырманы Еламан Кенжеш наурыз мерекесіне арналған арнауын арнаса, &nbsp;«Ұлттық халықтық билер» үйірмесінің «Дидар» кіші би тобы мың бұрала биледі. Сондай-ақ Диана Қалдыбай, Жанар Ақшалова және Ботакөз Орынбасар тамылжыта ән шырқады. Қазақ биін өз нақышына келтіре орындаған Рабиға Махсұтханова мен Ранай Тойбекова да ыстық ықыласқа бөленді. Бір сөзбен айтқанда, өнерпаздар той қызығын арттырды. Айта кету керек, іс-шараға ауылдық кітапханалары да атсалысты. Бестам, Алғабас, Еңбекші, Шеген Қодаманов ауылдық кітапханаларының қызметкерлері шашу шашып, келген қонақтарға ерекше көңіл-күй сыйлады.Осылайша кітапхана ұжымы ежелден табиғатпен етене араласқан, айдың амалын, күннің қабағын ұлы даланың ұлық мейрамын жоғары деңгейде атап өтті.

Шиелі: Кітапханадағы әз-наурыз

<a href="https://kyzylorda-news.kz/">Kyzylorda-news.kz</a>&nbsp; Ақсуатта бұрыннан жұмыс істеп келе жатқан «ҚазАгроМир» ЖШС мекемесінің жылыжайы бұған дейін де аймақ халқын жыл бойы көкөніспен қамтамасыз етуде үлгі болып келеді. Жылыжай бес жылға жуық уақыт ішінде үздіксіз жұмыс істеуде. Екі гектардан аса жер көлеміне орналасқан жылыжай биылғы алғашқы өнімді жинай бастады.&nbsp;– Мына өздеріңіз көріп тұрған қияр – желтоқсан айында еккен дәніміздің жемісі. Биылғы өнім, Аллаға шүкір жақсы шықты. Бір айдың шамасы болды, терім жұмыстары қарқынды жүруде. Қала аумағындағы көп дүкенді қамтамасыз етіп отырмыз. Осы күні отыз шақты адам жұмыс істейді. Олардың дені – жергілікті тұрғындар, – дейді жылыжай бригадирі Ерлан Орынбаев.&nbsp;Айта кетейік, бұл нысан аймақтағы алғашқы өндірістік жылыжай саналады. Испан технологиясы бойынша жұмыс істейді. Барлық жұмыс автоматтандырылған. Бұл – елді мекендегі жалғыз жылыжай емес. Жыл басынан бері «Ауыл аманаты» бағдарламасы арқылы Ақсуаттан тағы екі жылыжай бой көтерді. Бұл бағыттағы кәсіпкерлер алғашқы өнімін тұтынушыларға ұсынып үлгерді. Солардың бірі – Алма Смаилова.&nbsp;– Ашқанымызға бір айдан енді ғана асып жатыр. Өнімімізді өткізіп жатырмыз. Кәсіп бастап жатқанымызда Құдайдың да қарасқаны шығар, «көгілдір отынға» қосылып, көп бейнеттен арылдық. Бұрын от жағып, ерте көктемнен көшет шығарып бастайтынбыз. Қазақ «қолы қимылдағанның аузы жыбырлайды» деп, бекер айтпаса керек-ті. Бейнеттенсең, жемісін жейсің. Әрі демаласың, әрі өнімін көрген сайын еңбектенуге ықыласың да арта түседі. «Көз – қорқақ, қол – батыр» дедік те, білек түре кірісіп кеттік қой. Балам Нұрғазының бастамасы, мен – көмекшімін. Енді берекесін берсін деп әрекет етіп жатырмыз, – дейді Алма Смаилова.&nbsp;«Елде болса, ерінге тиеді» деп, ақсуаттықтар осылай ақ қарлы маусымда сабағынан жаңа үзілген қиярдың дәмін татуда. Бұл бағыттағы жұмыстар әлі де жалғасын таба түсетіні анық.

Қызылорда: Жылыжайдың жемісі 

<a href="https://kyzylorda-news.kz/">Kyzylorda-news.kz</a>&nbsp; Жапсырма қағазында «Ақсуат» деп жазылған шұлықтарды бұл күнде халық тұтына бастады. Иә, «қай Ақсуат?» деп жүрмеңіз, біздің Ақмешіттің іргесінен қоныс тепкен Ақсуат ауылдық округі. Жақында шұлық шығаратын шағын цех ашып, отбасылық кәсіптің шымылдығын түрді. Шағын үйдің ауласында кісі айналарлық қана бөлменің өзінен күніге 200-300 жұп шұлық шығып жатыр. Иә, қазіргі өндіріс дамыған. Шынашақтай нәрседен шыңға бастар даңғылға тап боласыз. Осы аядай бөлменің ішінде Сәрсенкүл Аралбаеваның жақында ғана ашқан кәсібі дөңгеленуде. Баласы мен жолдасы – көмекшілері.&nbsp;– Келіншегім аяқастынан жұлдыз болып кетті. Бұлай боларын кім ойлаған? – дейді бізді қарсы алған отағасы күліп.&nbsp;Ұлы мен жолдасы станоктардың тілін біледі. Сырттан келген мамандар бір ай арнайылап оқытыпты. Бүгінде техниканы бір адамдай меңгеріп алған олар жұмысты жүйелі жүргізуде.&nbsp;– Шұлық шығарамыз деп ойлаған жоқпыз. Әдепкіде ауыл әкімдігінің қызметкерлері халыққа «Ауыл аманаты» бағдарламасы жайлы түсіндірді. Жеңілдетілген несие болған соң әкімшіліктегі жиынға мал шаруашылығымен айналысамыз деп барғанбыз. «Бақсақ бақа екен» демекші, ол несие өндірісті дамытуға беріледі екен. Отбасымызбен ойласа келе, шұлық шығарамыз деп шештік. Құдайға шүкір, жұмыс жүріп жатыр, өнім сатылуда. Зерттеп көргенімізде Қазақстан бойынша шұлық шығаратын бірнеше кәсіпорын ғана бар екен. Үшеуі болса, төртіншісі – біз. Бұл нарықта әлі де бос орын бар деген сөз. Білекті түрдік те, іске кірісіп кеттік, – дейді Сәрсенкүл Аралбаева. Бүгінде Ақсуаттан шыққан шұлық «Сұлтан» сауда орталығында сатылуда. Өткізу жағын жолға қойған кәсіпкер шикізатты да өзі барып әкелмекші. Әрине, біреуден алып, екіншіге сатуды үйренген қоғамда өнім өндірудің қаншалықты қиын екенін білетіндер аз. Тәуекел деген жел қайыққа міне кетуге көбінің жігері жете бермейді.&nbsp;– Шикізатты сырттан тапсырыс беріп, алдырып жүргенбіз. Енді өзіміз барсақ деп отырмыз. Өйткені әрбір заттың сапасы ерекше рөл ойнайды, оған баса мән береміз. Ал сапалы дүние шығару үшін шикізатыңыз да талай сыннан сүрінбей өту керек. Біздің өңірге өндірісті дамыту керегіне көз жеткіздік. Тіпті мына жапсырма қағазды да Алматыдан істетіп алдырдым. Енді шұлықты қаптайтын өндіріс бізде болмай тұр. Алдағы уақытта оны да іске қосу ойда бар, – дейді кәсіпкер.&nbsp;

«Ақсуат» шұлығы – өзіміздің өнім

<a href="https://kyzylorda-news.kz/">Kyzylorda-news.kz</a>&nbsp; Дүкен сөрелеріндегі «Меруерт» тортын жеген боларсыз. Осы тәттілердің Ақсуаттан шығатынын білетін бе едіңіз?! Біз білмеппіз. Дәмі тіл үйірер осы тәттілерді талай дастарханнан көрдік. Тамсана айтып жүргендердің де қарасы қалың. «Меруерт» тәттілері 2020 жылы нарыққа енді. Міне, содан бері ауқымын кеңейткен кәсіпорын бүгінде күніге 700-800, ал мереке күндері тіпті мыңнан аса тортты дайындап, тұтынушыға ұсынады.&nbsp;Көкжиегі кеңейген кәсіп иелері осы күні Жаңақорған мен Қармақшы аудандарының аралығын тәттімен қамтамасыз етіп отыр. Қазір нарықтан өз орнын тауып, танымал болған «Меруерт» тәтті тортына басқа облыстардан да қызығушылық танытатындар қатары аз емес.&nbsp;– Біз жұмысымызды 2020 жылы наурыз айында болған бастадық. Алдымен ауладағы кішкене сарайда торт пісірдік. Келіншегімнің хоббиі еді. Меруерт – үлкен қызымның есімі, – дейді Нұрғали Келдібайұлы тіл үйірер тәттілер жайлы айтып.&nbsp;– Карантин басталып кеткенде көп кәсіп тоқтады ғой, енді бірі бағытын ауыстырды. Біз ауылдың «Whatsapp» топтарына жарнамамызды таратып, тұтынушы тауып отырдық. Жұмыстан кейін келіншегім екеуміз аралап жүріп, таратамыз. Кейін осы аумақтағы Жақыпбек Махамбетов, Наурыз елді мекендерінің дүкендерінен тапсырыс келе бастады. Тапсырыс көлемі артты. Кейін қалаға шықтық, әрі қарай аудандарға танылдық, - дейді кәсіпкер.Бүгінде ісі оңға басқан кәсіпорын қызметкерлеріне жайлы жағдай жасап қойған. Бір үйдің баласындай болып, мұнда 30 шақты адам тұрақты жұмыспен қамтылған. Оның барлығы дерлік – ақсуаттықтар. Осыдан 2 жыл бұрын «Еңбек» бағдарламасымен 585 мың теңге грант ұтып алып, оған құрал-жабдықтар алған меруерттіктер қазір үлкен ауқымда жұмыс істеп жатыр. Нұрғали Келдібайұлы ғимаратты жалға алып отырғанын жеткізді. Алдағы уақытта өз алдына жеке ғимаратқа көшуді ойлап жүр. Алдағы уақытта кәсіпті дамытпақ ниетте.&nbsp;&nbsp;

Ақсуатта «Меруерт» торты жасалады

<a href="https://kyzylorda-news.kz/">Kyzylorda-news.kz</a> Ауыл тұрғыны Асылхан Исмаилов бірнеше жылдан бері жылқы бордақылау ісімен айналысады.&nbsp;Жерлестерін табиғи, таза жылқы етімен қамтамасыз етіп келеді. Біз барғанда мал қораны тазалап, маңдайы терлеп, еңбектеніп жатыр екен. Қолын кеудесіне қойып, «ассалаумағалейкүм» деді де, жөн сұрады.&nbsp;– Негізі бір уақыттары мұнай компаниясында жұмыс істеп жүріп, қысқартуға іліктім.&nbsp;Жаңа қадам бастау керек болды. Көп ойланбадым. Ет бағытында жылқы бағып, халыққа табиғи таза өнім ұсынсам, ол да бір үлкен сауап әрі кәсіп боларын ойладым. Мемлекеттік бағдарлама арқылы несие алып, несібемді арттырып келемін, – деп сөз бастаған кәсіпкер малдың жайын айтып, әңгімесін қайта жалғады.<blockquote>&nbsp;– Шынымды айтсам, қазір жергілікті жылқыдан гөрі солтүстіктің және батыстың малы салмаққа жақсы.&nbsp;Сондықтан сол жақтан алдыруға тырысамыз. Қазір жем бағасы түсті, оған сай ет бағасы да қалтаға қонымды. Асылхан бүгінде елге мал бағумен танылып үлгерді. Жылқы етін іздегендер өздері хабарласып, таза, әрі шаруаның өзінен тікелей алуды үйренді. Кәсіпті ашып, өнімді өткізу жағын реттей алмай жатқандардың қасында кәсіпті дөңгелетіп әкеткен оның өзіндік ұстанымы бар.&nbsp;Біздің өнімдер ауыл халқынан ауыспайды. Халықтың ойынан шығатын сапаға қол жеткізіп, жылқыны уақытылы семіртіп отырамыз. Бұл – ғылым. Әр күнің ізденіспен өтеді. Жем-шөбінің көлемі, құрамы, бордақыда тұратын уақыты, егер ауыра қалса, оны қалай емдеу керегі – мұның барлығы үлкен ғылым. Еңбектенсең, жемісін жейсің. Жалқаулық танытсаң, омақаса құлайсың. Сондықтан жылқы бағу – еңбекқордың кәсібі, – дейді Асылхан өз тәжірибесімен бөлісіп.</blockquote>&nbsp;Ол таң азаннан қара кешке дейін қорада жүріп, тірлігін реттеуде.&nbsp;Жылқы жануарының тілін тауып, бабын таба білген кәсіпкер алдағы уақытта да кәсібін одан әрі дамытуды мақсат еткен. Қаланың қызы ауылға қалай үйренді? Дүйсеновтер әулетінің шаңырағынан ақ үзілмейді. Мал шаруашылығын қолға алған отбасы Қамбар ата төлін көбейтумен айналысады. Мемлекеттік бағдарлама аясында несие алып, жылқы шаруашылығын өркендетіп келеді. Аядай ғана шаңырақ. Басына орамал таққан келін Жібек Сәдуақасова үйінен жүгіре шығып, сәлем салып жатыр. Қазақы қалпын сақтаған, берекелі отбасы екені көрініп-ақ тұр. Қолына шелегін ұстаған күйі:&nbsp;– Үйге кіре беріңіздер, үлкендер үйде.&nbsp;Сиыр сауатын уақыт болып еді, – деп, мал қораға беттеді. Біз үйге кірмес бұрын ауылдағы қайнаған тіршілік қазанындағы берекелі кәсіпті көргіміз келген. Келіннің ізінен ере сауынға беттедік.&nbsp;<blockquote>– Абайлаңыздар, – біздің сиырлар менен басқа адамды қораға кіргізбейді.&nbsp;Бұзауларын қызғанғаны шығар, – деді біздің таңданысымызға мән берместен. Кәдімгі албар. Ноқталанған қос бұзау құйрығын аспанға көтере шапқылап жүр. Бір кезде қара сиыр бас көтерді. Алдындағы астауға салынған жемнен басын алып, бізге қарай бір-екі қадам басып еді, ауылда малдың ортасында өскен біз де состиып тұрып қалдық. Апырмай, мұндай да болады екен. Мал екеш малдың өзі иесінен басқаны қораға аттап бастырмағанына аң-таң боп қалдық. Бір уақытта сиырын сауып болып, сары күшігі соңынан қалмай ере шыққан келін сыртта күтіп тұрған бізге қарай беттеді. Үрпиісіп қалғанымызға ұялып қалса керек.&nbsp;</blockquote>– Үйде сиырды тек мен ғана сауамын. Басқаларды қораның есігінен сығалатпайды. Ана екіншісі мүлдем асау. Сондықтан оны арғы қораға байлап қойғанмын. Тұрмысқа шыққан соң жолдасыма сиыр әперуін өтінген едім, көктем шыға он сиырға дейін сауамын, – дейді өзінің де шағын кәсібінен хабардар етіп.&nbsp;Ауылдың жігітіне тұрмысқа шығып алып, оны мұрнынан сүйреп қалаға тартатын келіндер ойға оралды.&nbsp;Ауылда қалып, еңбек ететіндер санаулы-ақ. Бірақ осы тілегімізді де жасырмай айтқанымызда ол да үнсіз қалмады.&nbsp;<blockquote>– Ауыл – береке мен молшылықтың мекені. Қазақтың қарашаңырағы деп ерекше бағалаймыз. Ауылда тұрып, мал ұстамайтындар да болады ғой. Әйтеуір, азықтүлігің табиғи, ешқандай қоспасыз. Балалардан артылған ағарғанды жұмысқа ала барамын. Қазір сүтке де, құртқа да, қатыққа да сұраныс жоғары. Жұртшылық қазір дәріленген химикаттарға қарағанда табиғи тағамдарды іздеп жүріп алады. Рас, мал ұстаған соң бейнеті де бар. Бірақ сол қиындығына қарамастан еңбек етсеңіз, Құдай несібені маңдай теріңе сай бұйыртады, – дейді ауылдың келіні. Қазақтың әрбір қызы да, келіні де осындай болсыншы дедік іштей. Туған жерге туын тігетін әрбір қазақ баласына осындай жар бұйырсын. Қазақтың «Келіннің аяғынан, қойшының таяғынан» деген керемет сөзі ойға оралып, бір сәт серпіліп қалдық.&nbsp;</blockquote>

Атакәсіпті түлеткен Асылхан

<a href="https://kyzylorda-news.kz/">Kyzylorda-news.kz</a> Сыр елінде Ұлыстың ұлы күні кең көлемде тойлануда. Аймақтың әр ауданы мен ауылдарында киіз үйлер тігіліп, тұрғындар үшін мерекелік концерттер ұйымдастырылды. Бүгін Қызылорда қаласында облыс әкімі Нұрлыбек Нәлібаевтың қатысуымен «Наурыз - береке бастауы» атты мерекелік шара өтті. Мерекеге арналып «Руханият ауылы», «Ұстаздар ауылы», «Ардагерлер ауылы», «Ақындар ауылы» «Денсаулық ауылы», «Ынтымақ ауылы», «Еңбекшілер ауылы», «Кәсіпкерлер ауылы», «Құрылысшылар ауылы» деп аталатын киіз үйлер тігілді. Киіз үйлерде жарапазан айтылды, қыз бен жігіт айтысып,&nbsp; қазанжаппай&nbsp; жабылды. Ұлттық спорт сайыстары, қолөнершілер фестивалі өтіп, театрландырылған қойылым қойылды. Қазақтың дәстүрлі «Сырға салу» рәсімі көрсетіліп, ата-әжелер ансамблі халық әндерін шырқады. Облыс әкімі мен ел ағалары кішкентай бүлдіршіндердің тұсауын кесіп, алғашқы қадамдарына ақ батасын берді. Жаңадан бой көтерген “Өнер орталығының” алдында ұлттық&nbsp; киімдегі өнерпаздар шеруі өтті.&nbsp; Аймақ басшысы жиналған қауымды Наурыз мейрамымен құттықтап, облыс көлемінде атқарылған жұмыстарға тоқталды, жетістіктерді атап өтті.&nbsp; «Сіздерді Әз-Наурыз мейрамымен шын жүректен құттықтаймын! Бүгінде Ұлыстың ұлы күні Қазақстан халқына ортақ&nbsp; бүкілхалықтық мерекеге айналды. Сыр елі Наурыз мерекесіне Мемлекет басшысының және Үкіметтің қамқорлығы мен қолдауының арқасында толымды табыстармен жетті. Тамыры терең, тарихы кенен Алаштың анасы - қасиетті Сыр өңірінде соңғы жылдары мақсатты бастамалар қолға алынып, аймағымыз қарқынды даму жолына түсті. Қаңтар-ақпан айларындағы әлеуметтік-экономикалық даму көрсеткіштері бойынша өңірлер арасында алғашқы орынды иелендік. Биылғы&nbsp; бюджетіміз 650 млрд теңге болып бекітілді. Бұл ауқымды қаражат халықтың ең өзекті деген мәселелерін шешуге, өмір сүру сапасын арттыруға бағытталуда. Сырбойылықтардың 98,4 пайызы орталықтандырылған ауыз сумен қамтылған. Биыл осы бағытта 14 жоба жүзеге асырылады.&nbsp; Өңіріміз күн санап көркейіп, қала мен ауылдардың ажарын айшықтайтын зәулім ғимараттар, тұрғын үйлер бой көтеруде. Алдымызда айқын міндеттер, оларды жүзеге асыруға құрылған жүйелі жоспарымыз бар. Халықтың игілігі, тұрғындардың жайлы тұрмыс-тіршілігі үшін ауқымды жобаларды өздеріңізбен бірге жасаймыз. Ұлттық құндылықтарымызды ұлықтаған Наурыз мейрамы Тәуелсіз елімізге, туған жерімізге, әрбір отбасына ырыс-құт, молшылық пен тоқшылық әкелсін!», - деді Нұрлыбек Нәлібаев.&nbsp; Аймақта халықтың тұрмыс-тіршілігін жақсарту, инфроқұрылымды дамыту мақсатында кең көлемді жобалар жүзеге асырылуда. Облыс бойынша 225 шақырым электр желісі мен 50 қосалқы станция орнатылады деп жоспарлануда. Оған қоса 247 шақырым жолдар жөндеуден өтіп, жыл соңына дейін жақсы жағдайдағы жолдардың үлесі 90 пайыздан асады. Биыл 1890 пәтерлік 70 тұрғын үй (аудандарда - 346, Қызылорда қаласында - 544 пәтер) салынады. Мереке қарсаңында 220-ға жуық отбасы жаңа баспанаға ие болды. Жақын күндері Қызылорда қаласының сол жағалауындағы заманауи үлгідегі автовокзал&nbsp; пайдалануға беріледі. Бүгінде 300 орындық жатақханасы бар 400 орындық физика-математика мектеп-интернатының құрылысы қарқын алды. «Жайлы мектеп» ұлттық жобасы аясында өңірде биыл 10 мектеп ел игілігіне табысталады. Тағы 11 мектептің құрылысы басталады. Облыс орталығында «Шығармашылық академиясы», екі ауданда Оқушылар үйі мен Өнер мектептерінің құрылысы жүргізіледі деп күтілуде.&nbsp; Демеушілердің қолдауымен де өңірде 37 млрд 600 млн. теңгенің&nbsp; ауқымды жобалары іске асуда.&nbsp; Қорқыт ата әуежайының жаңа терминалы жақында пайдалануға беріледі. «ҚазГерМұнай» компаниясының 350 орындық заманауи үлгідегі Оқушылар сарайының құрылысы қарқынды жүруде. «Саутс Ойл» компаниясының демеушілігімен 650 орындық заманауи үлгідегі жаңа музыкалық колледж құрылысы басталды. Наурыз мейрамына арналған мерекелік шара ҚР Еңбек сіңірген әртісі Күлән Қалымбетова, эстрада әншілері Жанболат пен Жазира, Айгүл Қосанова және Сыр өнерпаздарының қатысуымен ұйымдастырылған концертке ұласты.

Қызылордада «Наурыз - береке бастауы» атты мерекелік шара өтті

Әр адамның өмірде өз жолы бар. Соған қарай тұлғасы қалыптасып, бейнесі бекемделе түседі. Адамды өсіретін де, өшіретін де оның істеген ісі. Адал еңбекпен табысқа жеткен жанның әркез мерейі үстем, еңсесі биік болмақ. Рас, ол ешкімнің ақысын жеп, ала жібін аттаған емес. Ұрпағына да сондай қасиетті сіңірді. Талай белестен өтті. Өмірдің тәттісін де, кермегін де татты. Жоққа болысты. Сүрінгенді сүйеді. Бүгін ел танитын, құрмет тұтатын азаматқа айналды. Біз кәсіпкер Жансерік Ұзақов туралы айтып отырмыз. Бүгінгі мақаламыз да осы азаматтың өмір жолына бағытталмақ. Жансерік Ұзақов – кәсіпкерлік саласында ғана емес, ауданның даму жолында да айшықты бейнесін қалыптастырған жандардың бірі. Ол 1961 жылы Арал ауданында қарапайым отбасында өмірге келеді. Мектеп қабырғасында жүргенде-ақ өзінің жан-жақтылығымен танылған шәкірт ұстаздарының назарына ілікті. Жастар кеңесінің мүшесі болады. 1979 жылы қаладағы №14 орта мектепті бітірген соң, ұрпақ тәрбиесіне үлес қосты. Бір жылға жуық уақыт №64 мектепте жастармен жұмыс жасап, оларды қоғамдық жұмыстарға баулыған.Ердің даңқын еңбек шығарады – &nbsp;Ол кезде қазіргідей жоғары оқу орнына бірден түсіп кету сирек кездесетін еді. 1980 жылы Алматы халық шаруашылығы институтына оқуға түстім. 1984 жылы оқу орнын экономист мамандығы бойынша бітіріп шықтым. Оқуды бітіріп келген соң Арал ұн тарту мекемесіне есепші болып жұмысқа тұрдым. Бұдан соң қызмет жолым сабақтасып кетті. Нан шығаратын зауытта аға есепші болып жұмыс істедім. Бірде аудандық комсомол комитетінің бірінші хатшысы Өмірзақ Айтжановпен кездесіп қалдым. Ол кісі мені оқушы кезімнен жақсы танитын еді. Сөйлесе келе мені жұмысқа шақырды. Осылайша аудандық комсомол комитетіне нұсқаушы болып жұмысқа орналастым. Ауданның жастарымен жұмыс істедім. &nbsp;Сонан кейін қызметім өсіп, ұйымдастыру бөлімі басшысының орынбасары болдым. Кейіннен Арал аудандық балықшылар тұтыну одағына кадр басшысының орынбасары болып қызметке келдім. Осы еңбек еткен жылдарымда мен ізгі жанды басшылардан өнеге алдым. Олар Өмірзақ Айтжанов, Тілес Бохаев ағаларым еді. Өмірзақ аға өте мәдениетті, сауатты, жұмысты үйлестіре білетін іскер жан еді. Ал Тілес ағамыз жұмысқа адал берілген адам. Өте шыншыл болды. Таза жұмыс жасағанды жақсы көретін. Осы кісілерден тәрбие алдым. Бұл жандардың алған өнегем кейін өзімнің басшылық қызметімде қолданып, жетістікке жеттім, &nbsp;– деді ол. Тоқырау жылдары басталып, халық басынан ауыртпашылық жылдарын өткеріп жатқанда Жансерік Ұзақов елге болысты. Еңбекақысыз &nbsp;қызмет еткен кездері де болды. Ал ел егемендік алып, еңсе тіктеген шақта барлық сала жаңа бетбұрыс жасады. Сол кезде аудан әкімдігінің экономика бөлімінің бас маманы болып қызмет жасайды. Осыдан соң көп қызметті өткеріп, әр салада өзінің іскерлігін дәлелдей бірген &nbsp;қызметкерге аудандағы тоқырау құрсауынан шыға алмай жатқан өнер мектебінің басшысы болу тапсырылады. – Бұл кезде өнер мектебінің халі тым мүшкіл еді. Қызметкерлері көптен айлық алмаған, ғимарат азып-тозған. Өзіме үлкен жауапкершілік жүктегенін сездім. Сөйттім де, іске кірісіп кеттім. Ең алдымен, кабинеттерді ретке келтіру керек болды. Қызметкерлермен бірлесіп демалыс күндерге жөндеу жүргіздік. Ішін жылытып, жайлы етіп қойдық. Мұнан соң біртіндеп келетін оқушылардың қатары 20-дан 120-ға дейін көбейді. Бірақ мен бұл жұмысты ұзақ жасай алмадым. Себебі менің дипломым мектеп басқаруға сәйкес келмейтін еді.Кәсіптен тапқан нәсіп Өнер мектебінің басшылық кызметінен кеткен соң, Жансерік Ұзақов кәсіпкерлікке ден қойды. «БатырТұран-Транс» ЖШС құрып, &nbsp;мұнай, газ құбырларын жүргізуге үлес қосты. 2014 жылы Қазақстан экономикасының дамуына үлес қосқаны үшін берілетін «Еңбек жұлдызы» орденімен марапатталады. Одан бөлек, табанды еңбегі үшін бірнеше мәрте төсбелгі тақты.– Өзіңіз жақсы білесіз, біздің аудан күре жолдың бойында орналасқан. Осы жол бойында бір кездері жолаушылар тамақтанатын асхана сирек кездесетін. Содан алғаш Арал қаласына кіреберіс тұстағы өткелдің бойынан тамақтану орнын аштық. Бұл отбасылық кәсібіміз еді. Мұның бәрінде марқұм әйелім Мариям үйлестіріп жүргізді. Кейіннен ел экономикасы көтеріліп, халықтың әл-ауқаты жақсара түскен шақта кәсіпкерлік нысанды заман талабына сай кеңейту керек болды. Осыдан кейін «Шымкент комплекс» сервистік қызмет көрсету орталығын аштық. Қазіргі таңда мұнда 30 адам жұмыс істейді, – деген кәсіпкер өзінің кәсіп ашудағы тәжірибесімен бөлісті. Әрине қай салада болмасын бәсекелестік орнаса, даму байқалады. «Шымкент» сервистік орталығында жолаушыларға қажеттінің бәрі қамтылған. Көлік жөндеу орны, май құю бекеті, тамақтанатын асхана, жатын орындар, тіпті намазхана мен жуынуға да жағдай жасалған. Кәсіпкердің сөзінше, аспаздар арнайы мамандығы бар, сырттан келген жандар. Ал қалған қызметкерлердің бәрі жергілікті жердің тұрғындары екен.Бір өкініш, бір жұбаныш Жансерік Ұзақовтың бүгінгі жеткен жетістіктерінің бәрінің басында әркез қолдау көрсетіп отырған өмірлік жолдасы Мариям болды. Бір өкініштісі, 37 жыл оттасқан жарынан осыдан тура бір жыл бұрын қапыда ажырап қалған ағамыздың жүрек жарасы әлі де жазылмаған. – Мариям менің өміріме нұр болып келген жан еді. Ол жанымда болғанда, көңілім тыныш болды. Бірақ тағдырдың осы бір сынағы мені бір сәт есеңгіретіп тастады. Оның қазасынан кейін мен өзімді жоғалтып алдым. Қазір тура бір жыл өтті. Бірақ мен әлі күнге оның мәңгілікке кеткеніне көндіге алмай жүрмін. Ол менің қолдаушым болды. Қазіргі жеткен жетістіктеріміздің бәрінде Мариямның еңбегі көп. &nbsp;Ол өзінің ерекше талғамымен кез келген нәрсені жайнатып жіберетін. Жүрегі жомарт еді. Бәріне көмектесіп отыратын. Не қажет екендігін айтқызбай түсінетін. Бір өкінішім, жан жарымның өмірден ерте кеткені. Шынымды айтсам, қанатым қайырылып қалғандай болды, – деген Жансерік Ұзақов жүрек түкпіріндегі сырымен бөлісті. Олар жарасымды жанұя болды. Өмірге 3 перзент әкеліп, бәрін де азамат етіп өсірді. "Ағаш жапырағымен, адам ұрпағымен мың жасайды" демекші, бүгінде балалары үмітін ақтаған. Бәрі де отбасын құрып, өздерінің кәсіптерін дамытып отыр. – Біз балаларды алдымен адалдыққа үйреттік. Онан соң еңбекқорлыққа баулыдық. Олар кішкентай күнінен Мариям екеуміздің қалай еңбектеніп, нан тапқанымызды көріп өсті. Негізі, баланың ең бірінші үлгі алатын адамы ол – ата-анасы. Жаман өнеге көрсеткен жоқпыз деп ойлаймын. Қазір балаларым – қанатым. Бәрі де бізге жаман атын келтірмей, өздерінің еңбек жолдарын қалыптастырып отыр. Үлкен ұлым Батыржан аудандық мәслихат депутаты болып сайланды. Өзінің жеке кәсібі бар. Онан соң кіші ұлым Батырхан ол сервистік қызмет көрсету орнының жұмысын жүргізіп отыр. Атырау қаласында тұратын қызым Әйкерім де жеке кәсіпкер. Қазір үш баладан өрбіген 7 немеренің атасы болып отырмын, – деді. Қайырымдылық – ізгі қасиет Кәсіпкер отбасы қайырымды істен де алшақ емес. Бірақ онысын көпке жариялап жатпайды. Кешегі карантин кезінде біршама отбасын өз қамқорлығына алған. Одан бөлек, аудан спортшыларына да қаржылық жағынан демеушілік жасап отырады. Футболға құмар аудан жастарынан құралған өздерінің командалары да бар. Бұл команданың да барлық қажеттіліктерін қамтамасыз етіп отыр. &nbsp;Қайырымдылықпен айналысатын қорларға да тұрақты түрде қаражат бөліп отырады. Және жақында ғана медресенің құрылысына да үлес қосқан. – Бар болып тұрса, мұқтаж жанға болысқанға не жетсін! Біз де қайырымды істі тұрақты жасауды әдетке айналдырғанбыз. Көбіне балаларым ел арасынан естіген көмекке зәру адамдарды тауып, соларға көмектесіп жатады. Кейде өздері қоңырау шалып, көмек сұрайды. Мұндайда ешқашан бас тартып көрген емеспіз. Бұл – әрбір азаматтың парызы, – деді Жансерік Ұзақов. Талай жылдарға шегініс жасап, өткенін салмақтап, бүгінгі күнді бағамдап, болашақтан тек жақсылық күткен Жансерік Ұзақов бүгінгі жеткен жетістіктерінің бәрін таразылады. Адам баласы адамгершілік, жомарттық, табандылық сынды ізгі қасиеттерден айнымайтын болса, өмірі нұрлы болмақ. Ол барлық салада өзін сынап көрді. Талай адаммен жүздесті. Бірімен шын дос болды. Досы қасқа айналды. Адамдардың алауыздығын да көрді. Десе де мойыған жоқ. Алға қойған мақсатына жету жолында ең жақын жандары қолдау көрсетті. Сұхбат барысында ішкі ойын бүкпесіз айтқан жан шынайы келбетін анық аңғартты.

Аралдан жол бойы сервистік қызмет көрсету орталығын ашқан кәсіпкер

Бүгінде мемлекет тарапынан жастардың білім алуына барлық жағдай жасалған. Тіпті шетелде оқып, тәжірбие жинақтауына да жол ашық. Бұл да Тәуелсіздіктің жемісі. Елімізде «Болашақ» бағдарламасы жүзеге асырыла бастаған шақтан бері қаншама білімді жастар мұхит асып, әлемнің түкпір-түкпірінде білімдерін шыңдады. Кейін елге оралып, мемлекет дамуына үлестерін қосуда. Шетелде оқу бақыты бұйырған жанның бірі жерлесіміз Дәурен Жүсіпов. Ол АҚШ-тың Массачусетс штаты, Бостон қаласында оқып жатыр.Дәурен Әлиұлы Арал қаласында қарапайым отбасында дүниеге келген. Ата-анасының тұңғышы. Әкесі Әли Жүсіпов пен анам Куляйша Үсенқызы &nbsp;кеңес &nbsp;одағы ыдырағанға дейін Аралдағы балық өңдеу зауытында қызмет атқарған. Ал қазір анасы – сауда-саттық саласында, әкесі қала ішінде такси қызметін кәсіп етіп жүрген еңбекқор жандар. Дәуреннің қос қарындасы Ақтоты мен Ақтолқын &nbsp;медицина саласында қызмет жасайды.Ата-анам біздің білім алып, жақсы жұмыс жасағанымызды қалады. Сол үшін бар күштерін салды. Отбасында бойымызға жақсы тәрбие сіңіре білдік. Соның арқасында жетістіктерге жеттік. Осының бәрі ата-анамның адал еңбек етіп, адал ас ішкізіп, ешкімнің көңіліне кір шалдырмай өсіргендігінің арқасы деп ойлаймын. Қазір өзім де отбасын құрып екі қыз тәрбиелеп отырғандықтан, ата-анамның қабірін жіті түсіне бастағандаймын, – дейді Дәурен.Алғаш рет 1998 жылы Н.К.Крупская атындағы №14 орта мектептің табалдырығын аттаған Дәурен кейін &nbsp;№260 мектепке ауысып, сол мектепті «Алтын белгімен» бітіріп шығады. Мектеп қабырғасында жүргенде &nbsp;физика пәніне деген қызығушылығы жоғары болады. Физика пәні бойынша өткен түрлі білім жарыстарға қатысып, республикалық олимпиададан ІІІ орын алғаны бар. Дәурен спорттан да осал емес. Соның ішінде жеңіл атлетика және баскетболмен шұғылданады. Жыл сайын 9 мамыр күні болатын Шульга атындағы эстафетадан жүлделі І орынды бермей келеді. Ал &nbsp;баскетболдан &nbsp;аудандық құраманың мүшесі. Жан-жақты жігіт мектеп бітірген соң қаржыгер болуды армандайды.Арманым инвестиция саласын бағындыру болатын. Маған акция, облигация сияқты құнды қағаздардың қыр-сырын меңгеру мақсат болды. Сондықтан мектеп бітірген соң бағымды сынап Қаржы мамандығы бойынша университетке құжат тапсырдым. Сәтін салып Л.Н.Гумилев атындағы Еуразия Ұлттық Университетіне «Қаржы» мамандығына мемлекеттік грант негізінде оқуға түстім. Оқумен қатар университеттің қоғамдық өміріне де араластым, 2010 жылы Астана (Қазіргі Нұр-Сұлтан) қаласында болған ЕҚЫҰ саммитін ұйымдастыруға белсене қатысқаным үшін, сол кездегі ҚР Президенті Н.Ә.Назарбаевтың алғыс хатымен марапатталдым,- дейді ол.Университет қабырғасында жүргенде Дәуреннің өз білімін шетелде жалғастыруға деген қызығушылығы пайда болады. &nbsp;Осылайша ол сабақтан тыс уақытта өздігімнен ағылшын тілінің курстанына қатыса бастайды. 2013 жылы университеттің &nbsp;қызыл дипломын қолға алған ол бірден &nbsp;университет бітіруші түлек санаты бойынша «Болашақ» бағдарламасына тапсырады. Бірақ ол кезде түсініксіз жағдайлардың салдарынан соңғы әңгімелесу сатысынан өте алмаған. Сондықтан ендігі кезекте, тәжірибе жинақтап барып қайта тапсыру қажет деп шешеді.Астанадан туған жерге оралдым. Көптеген жерлерге түйіндеме тастадым. Алғашқы кезде кейбір мекемелерде тегін есепшінің көмекшісі болып қызмет жасап жүрдім. Кейіннен Арал аудандық мәслихатына бас маман есепші ретінде жұмысқа қабылданып, мемлекеттік қызметші ретінде іскерлік жолымды бастадым. 2018 жылдың сәуір айында Арал ауданы әкімі аппаратының бас есепшісі болдым. Жұмыста табысқа жетсем де, шетелге магистратураға түсу деген арманым әлі жоғалмаған болатын. Сондықтан сол жылы «Болашақ» бағдарламасына магистратура бағдарламасы бойынша АҚШ-та оқу үшін қайта құжат тапсырдым. Оқуға қабылданғандардың тізімде өзімнің аты-жөнімді көргенде қуанышымда шек болмады. Одан соң керекті құжаттарымды дайындап, АҚШ-тың Калифорния штаты, Лос-Анджелес қаласына тілдік курсқа аттандым. Себебі, «Болашақ» стипендиясының иегері болу бір бөлек, университетке түсу бір бөлек. Оған қажетті тілдік деңгей керек. Америка немесе Ұлыбритания сияқты ағылшын тілді елдерге жоғары оқу орнына түсу үшін міндетті түрде IELTS немесе TOEFL сияқты емтихандар тапсыру керек. Сондықтан дайындықты бастап кеттім, – деп Дәурен шетелдеге алғашқы оқу жайлы айтып берді.Бала кезде фильмдердан көріп өскен Лос-Анджелестегі Голливудқа бару кім кімің де арманы. Дәурен де дәл осылай армандаған. Тынық мұхитының жағалауында жүрудің рахатын сезініп, &nbsp;көршілес штаттарды аралап, Лас Вегас қаласынада болады. Дегенмен туған жерге деген сағыныш елге қайта әкелді. Лос-Анджелестен тілдік курсты бітіріп келген соң университеттерге тапсыра бастайды. Дәуренге АҚШ-тың алдыңғы қатарлы 5 университетінен шақырту келеді.Таңдауым әйгілі Бостон Университетіне түсті. Оқуды енді бастаймын &nbsp;деп жүргенде пандемия басталды. Сондықтан оқуды 1 жылға шегеріп, аудандық әкімдікте жұмысымды жалғастырдым. Жұмыс барысында өте жақсы жетістікке жетіп, аудан әкімі аппаратының цифрлық технологиялар және мемлекеттік қызметтердің мониторингі бөлімінің басшысы қызметіне тағайындалдым. Елдегі ахуал тұрақталған соң АҚШ-қа оқуға аттандым. Қазір Бостон қаласына жанұяммен көшіп келгенімен 2 жыл қаржылық менеджмент мамандығы бойынша оқуды бітіретін күн де жақын қалды. Алла сәтін салып бәрі ойлағыдай болса, елге оралып, қызмет атқаруға ниеттімін, - деді Дәурен.Әлемді аралау – кім-кімнің де арманы. Дәурен секілді білімін шыңдау жолында талмай еңбектеніп, ақырында ойға алған мақсатына жеткен қарапайым аралдық бала осындай арман арқалаған жастарға үлгі болса дейміз. Ол білім жолында ерінбей еңбектенді, қызыметте тәжірбие жинақтап, біліктілігін ұштады. Осылайша көптің ішінен дараланып Әлемнің әйгілі оқу орынында білім алуға мүмкіндік алды.Қазіргі күні Дәурен оқуын ойдағыдай аяқтап тәжірибесін жетілдіру үстінде. Болашақта елге оралып, халыққа қызмет ету басы арманы.

Қазақстан және Қызылорда облысының жаңалықтары