<a href="https://kyzylorda-news.kz/">Kyzylorda-news.kz</a> Қызылордадағы «Aray City Mall» сауда, ойын-сауық орталығының ашылғанына – 5 жыл. Шаһардың сәулетіне сән қосқан ғимараттың басқа сауда орындарынан ерекшелігі неде? Кәсіпкерлік нысан саланың дамуына қаншалықты ықпал етті?<h2 style="text-align:justify;">Әлемдік брендтердің «басын қосты»</h2>«Aray City Mall» ойын-сауық орталығының құрылысы 2016 жылы басталып, 2018 жылы ел игілігіне берілді. Орталықтың аумағы – 30 мың шаршы метр. Осы кезге дейін сауда орны 15 миллионға жуық адамға қызмет көрсетті. Сауда жасауға әрі демалуға арналған орталықтың ашылуы қала тұрғындарын қуантқан елеулі жаңалық болды. Осылайша брендтік өнімді ұнататындар үшін Қызылордада таңдау жасау мүмкіндігі туындады. Бұрын Алматы, Астана, Шымкент секілді мегаполистерге қызығудың бір себебі ірі сауда орындарының болуында еді. «Aray City Mall»-да еліміздегі ең ірі гипермаркет сауда желісінің бірі «Magnum Cash&amp;Carry» 2018 жылы ашылды. 2019 жылы ғана «Aray City Mall» толықтай жұмысын бастады. Тәулік бойы қызмет ететін «Magnum» сауда желісінің ең үлкені Алматы қаласында, көлемі 11 мың шаршы метр болса, одан кейінгісі (8 мың шаршы метр) Қызылордадағы филиалы. Мұндағы дәріхана да келушілерге 24 сағат бойы қызмет көрсетеді. Ал, екінші қабатта соңғы үлгідегі заманауи технологиямен жабдықталған 8 залы бар Қазақстандағы кино желісінің бірінші нөмірлі операторы Kinoplexx орналасқан. Кинотеатрдың кең залы, жайлы орындықтар, қызықты кино тізімі жастардың «Aray City Mall»-ға жол тартуына негізгі себеп болып тұр. Сондай-ақ орталықта әлемдік деңгейдегі «LC Waikiki», «Flo», «Детский Мир», «Спорт Мастер», «O’stin», «Kari» брендтерінің дүкендері бар. «Бургерлердің атасы» делінетін америкалық Burger King-те осында орналасқан. Иә, екінші қабаттың көп бөлігін, фуд-корт тамақтану алаңы алып жатыр. Мұнда еліміздегі әйгілі фудбрендтер дәмді және тез дайындалатын тағамдар ұсынады. Ал отбасылы жандардың да мұнда жиі келуінің басты себебі – кішкентайларға қызық ойын алаңы «Funky town» болып тұр. Сонымен, «Aray City Mall» – бірқатар әлемдік брендті бір нысанға жинаған Қызылордадағы ең ауқымды сауда орны.<h2 style="text-align:justify;">Жергілікті кәсіпкерлерге қолдау бар</h2>Орталық 2019 жылы жұмысын 50-ге жуық кәсіпкермен бастады. Бүгінде олардың саны 120-дан асты.<blockquote>– Бұл көрсеткіш кәсіпкерлерге жайлы орталық болғанымыздың дәлелі. Сауда орнын сұрап, Ресейден, Астана, Алматы қалаларынан хабарласатын кәсіпкерлер бар. Бірақ біз бірінші кезекте жергілікті кәсіпкерлердің сұранысына басымдық береміз. Өйткені бизнес бастаған қызылордалықтар кәсібін дамытса екен деген ниетіміз бар. Жалпы серіктестерімізге уақытылы қызмет көрсету, халықпен мәдениетті жұмыс істеу, имиджге нұқсан келтірмеу турасында талап қоямыз, – деді орталықтағы «Қоғаммен байланыс» бөлімінің басшысы Ерболат Тұрсынқожа.</blockquote>Бізге әсіресе «жергілікті кәсіпкерлердің ұсынысына бейқам қарамаймыз» дегені ұнады. Себебі, қызылордалықтар кәсібін «Aray City Mall»-да бастап, әрі қарай танылып, жеке орталық ашып жатса, қаладағы кәсіпкерліктің дамуына бұл да бір қолдау болмақ.<h2 style="text-align:justify;">Қоғамдық орын мәдениетті қалыптастыруда</h2>Мұндай ауқымды сауда, ойын-сауық орталықтарының әр қалада болуы маңызды. Адамдар жиі бас қосатын қоғамдық орын қала мәдениетіне де едәуір ықпал етеді. Әртүрлі әлеуметтік топтағы тұрғындар мен қала қонақтары жиналатындықтан, бір-біріне қарап ой түйетіні, талғам қалыптастыратыны рас. Айта кетерлігі, мұнда мезгіл сайын атриумдағы декорация өзгереді.<blockquote>– Әр мерекеге сай интерьерді ғана емес, ішкі музыканы да өзгертіп қоямыз. Әдемілікпен қатар мағыналы әуен де адамдарға рухани тұрғыда әсер етеді. Әсіресе, жанымызға жақыны – 22 наурыз мерекесі. Ұлыстың ұлы күнінде бауырсақ пісіріп, концерт ұйымдастырып, барлық қызметкер қазақы нақыштағы киім киіп, күллі Шығыс жұртына ортақ мерекені ерекше атап өтеміз. Көпшілік жиналатын орын болғасын әр мерекенің өзгеше форматта өтуін алдын-ала ойластырамыз. Сондай-ақ қала әкімдігі, «Қоғамдық келісім» КММ, орталық музей, оқу орындарымен тығыз байланыс орнатып, бірлескен жұмыстар атқарудамыз. Қала тұрғындары үшін пайдалы әрі қызықты іс-шаралардың ұйымдастырылуына, көпшіліктің жиналуына қолдау білдіру маңызды, – деді Ерболат Тұрсынқожа.</blockquote>Бір қарағанда, тек сауда-саттыққа бағытталған нысан көрінгенімен, мұндай орталықтардың экономикалық жағдайға, тұрғындардың мәдени дамуына қосар үлесі зор. «Aray City Mall» туралы жазу барысында осындай ойға келдік. Сондықтан сауда орны басшылығының санды ғана емес, ұлттық сана мен сапаны алдыңғы орынға қоятыны қуантты. &nbsp;

Қызылордадағы ең ауқымды сауда орны

<a href="https://kyzylorda-news.kz/">Kyzylorda-news.kz</a> Жас өреннің өркениет биігіне өрлеуі үшін сапалы білім керегі айдан анық. Бұл мақсатта том-том кітапта толған теорияның емес, тақырыпқа сай тәжірибе жүргізу мен практиканың да маңызы зор. Әлбетте, мұндайда мектептің заман талабына сай жабдықталғаны ләзім. Оқушының ынтасы мен ықыласын білімге бұру үшін қабілетін танып, зейінін зерделеген дұрыс. Сайып келгенде, кіл талантты мен дарындының кіндік қаны ауылда тамады. Демек шалғай орналасқан аудан мен ауыл мектебіне тиісті деңгейде көңіл бөлу толымды істің айғағы. Осы ретте Жаңақорған жағымды жаңалығымен қуантты. Жабдықталған тірек мектебіне ата-ана мен оқушы да дән риза. Біз де қуанышты күннің куәгері болып қайттық.Аудандағы №286 мектеп Білім беру саласын тұрақты дамыту қоры, Назарбев зияткерлік мектептері мен «Қазақстан халқына» қоры қолдауымен 26 жаңа негізгі пәндік және 10 қосымша білім беруге арналған кабинетімен жаңартылды. Бұл нағыз мүмкіндік мекені іспетті. Баланың бейіміне қарай түрлі техника орнатылған. Яғни, STEM-лабораториялар, робототехника мен арнайы арт-студия, киностудия да бар. Ал, қолға түсе бермейтін кітаптар мен жаза мазмұндағы шетел аудармалары жайлы әңгіме бөлек. Жалпы мектепте 535 оқушы білім алуда. Сондай-ақ, 42 педагог бар. Әрбір мұғалім біліктілік санатынан өткен.Бала жанының бағбанына айналған ұстаздар қауымы да тың тәсілмен сабақ беруде. Физика және химия пәніндегі эксперименттік жұмыстар соған дәлел. Оқушының шеберлігін шыңдап, ой-ақылын нығайта түсетін тиімді тетік деуге әбден болады. Әсте, оқушының қағиданы қаперде сақтап, ережені ескеруі екіталай. Сондықтан тақырыпты түйсіну үшін теорияны практикамен ұштастыру пайдалы.<blockquote>– Физика пәнінің кабинетіне жабдықтарды тапсырыс беруге қатыстым. Енді мектеп бағдарламасына енген барлық тәжірибелерді жасауға мүмкіндігіміз бар. Мәселен, Roqed панельдер мен Энштейн лабораториясымен математикалық маятник тербелісі мен формуласын іс-жүзінде көрсете аламыз. Бұл – бір ғана мысал. Яғни, балаларға түсіндіруіміз де жеңілдеді, оқушылар да жылдам қағып алады, – дейді Ақмарал Садырқызы.</blockquote>Кейде миды тынықтырып, сананы серпілтудің де оң әсері бар. Өйткені оқуға деген құлшыныс төмендеп, зер салуда зерігу пайда болуы бек мүмкін. Осы орайда шығармашылыққа көп көңіл бөлінгендігі қуантты. Яғни қолөнер, сурет, музыка шығармашылығымен еркін айналысуға мұрсат та, мүмкіндік те қарастырылған. Үйірмеден үйренері көп оқушылар өз әлемінде жүргендей сезілді. Аса тиянақты салынған бейне, жасалған құмыра, аспаптармен ойналған орындау соны аңғартты. – Қыш құмыра жасағанды ұнататыным рас. Ауданда құмыра жасайтын орталық болмаған соң, қалаға барғым келіп жүрген. Мектебімізде осындай жағдай жасалып, құмыраға арналған құрылғы келгеніне қуаныштымын. Бүгінде үш құмыра жасап үлгердім. Негізі мұғалім мамандығын таңдаймын. Бірақ қыш құмыраны екінші кәсіп ретінде қатар алып жүру ойымда бар, – деді 11-сынып оқушысы Жібек Келдіғұлова.<blockquote>– Мектеп жанынан құрылған «Балбырауын» домбыра үйірмесінің жұмысы жандануда. Өскелең ұрпақтың өнерін қолдап, үйірме ісіне өң берген мектеп басшылығының үлесі зор. Бүгінде үйірмеде 10-15 жас аралығындағы балалар қатысуда. Сондай-ақ, жоба аясында үйірме 12 домбыра аспабымен қамтамасыз етілді. Балаларға «Балбырауын», «Халық», «Тепеңкөк», «Келіншек» күйі үйретілді. Бұл көрсетілген қолдаудың нәтижесі деп білемін, – деді үйірме жетекшісі Гүлжан Шерубаева.</blockquote>Сонымен, мектептің материалдық-техникалық базасын жаңартуға қолдау көрсеткен «Қазақстан халқына» қоры. Кемел келешектің кепілі мен кілті білімде болғандықтан игі істердің басы-қасында жүр.<blockquote>– «Ауылдық аймақтардағы тірек мектептердің әлеуетін дамыту» жобасы білім беру кеңестігі мен үдерісіне жаңа әдістерді әкеліп, ауыл баласының жоғары деңгейде білім алып, біліктілігін қалыптастыруға бағытталған. Былтыр Аралдағы мектепті жаңарттық. Жаңақорған – Қызылорда облысындағы екінші тұрағымыз. Жосалы ауылында да жақын арада толыққанды тірек мектебі пайда болады», – деді Лаззат Шыңғысбаева.</blockquote>Сайып келгенде, балаға білім беретін мұғалімнің де білікті болуы маңызды. Бүгінде сабақ берудің жоспары мен тәсілі түрліше қалыптасқан. Заман ағымына сай бәрін игеру үшін оқуға барып, білімін жетілдіру артық етпейді. Мұндайда «мұғалім үздіксіз ізденіп, жетіліп отырғанда ғана мұғалім» деген қанатты сөз қапысыз ойға оралады. Аталмыш қор да мұғалімнің жаңа бағдарламамен оқуын бірінші орынға қойған. Бұл жөнінде Білім беру саласын тұрақты дамыту қорының жетекшісі Данияр Тоқтарбаев баяндады.<blockquote>– Ауылдық аймақтардағы тірек мектептердің әлеуетін дамыту» жобасы – білім сапасын арттырып, қала мен ауыл мектебінің алшақтығын азайтуға негіз. 2019 жылы жобаға Ақмола және Шығыс Қазақстан облысынан 5 мектеп алынды. Жұмыс барысында оң өзгеріс барын, мектеп жақсы нәтиже көрсетіп жатқанын түсіндік. Үш жылдың ішінде мектептердегі оқу сапасы жалпы алғанда 10-12 пайызға артты. Сөйтіп «Қазақстан Халқына» қорымен бірлесіп, мұны жалпыұлттық жобаға айналдырдық. Серіктестеріміздің қолдауымен әр мектепке шамамен 250 млн теңге қаржы бөлінуде. Бұл қаражатқа мектептің материалдық-техникалық базасы жаңартылады. AITAS холдингі жобаның операциялық, мұғалімдерді оқытуға кеткен, тренерлердің жолға кететін шығынын өтейді. «Назарбаев Зияткерлік Мектептері» мұғалімдерді оқытып, қайта даярлауда қолдау білдіреді, – деді ол.</blockquote>Демек, жоба аясында арнайы курстар өткізілмек. Жаңарқорған мектебі алдағы 3 жыл көлемінде Назарбаев зияткерлік мектептерімен тығыз жұмыс жасайды. НЗМ педагогикалық шеберлік орталығы ауыл ұстаздарына арнап арнайы оқыту бағдарламасын өткізеді. Сондай-ақ, жыл сайын мектепте білім деңгейінің мониторингі жүргізілмек. &nbsp;

Жаңақорғандағы жаңарған мектеп

<a href="https://kyzylorda-news.kz/">Kyzylorda-news.kz</a>&nbsp; «Ұстазы жақсының, ұстамы жақсы» деген тәмсілді берік ұстанған мұғалімнің еңбегі қашанда еш кетпесі анық. Сырдария ауданында білімнің қарашаңырағы саналатын №35 Иса Тоқтыбаев атындағы мектеп-лицейдегі болашақ жас ғалымдардың жол бастаушысына айналған ұлағатты ұстаздың бірі – Жанар Жаңабаева. Әркез білім сапасын арттырып, оқушының өмірден өзіндік орнын табуына себепкер атанатын аяулы жан – физика пәнінің мұғалімі.Бүгінде мектеп бітіруші түлектердің басым бөлігі физика пәнін таңдауында үлкен мән жатыр. Себебі, қоғам өмірінде кездесетін мамандықтар атласында физика пәнімен байланысты қызметтің түрі жеткілікті. Ғылыми тұрғыдан зерттеуді қажет ететін аталған саланың қыр-сырына қанығып келе жатқан зейінді шәкіртінің сүйікті ұстазы нақты ғылымға негізделген білімге сүйенеді. Осы уақытқа дейін оның жекелеген бірнеше оқушысы үлкенді-кішілі білім бәсекесінде топ жарып келеді. Үнемі білім алушысына ерекше шабытпен сабақ беретін Жанар Алтынбекқызы тынбай ізденудің арқасында педагог-сарапшы біліктілігін сәтті қорғаған. Жанар Жаңабаева 10 жылдан аса уақытта іргелі білім ошағында қызмет етіп келеді.<blockquote>– Менің физика пәнінің мұғалімі атануыма ұстазым Нұрбек Қожамжаровтың ықпалы мен ықыласы зор болды. Өзім Қазалы ауданының тумасымын. Туған жердегі №70 Жанқожа батыр атындағы орта мектептің табалдырығын аттадым. Негізгі мамандығым бойынша Арқалық қаласындағы Ыбырай Алтынсарин атындағы мемлекеттік педагогикалық институтында білімімді жетілдірдім. 2013 жылы жолдасым Айбек Сәдуақасовпен отау құрып, Тереңөзектегі өсіп-өнген әулеттің келіні атандым. Отбасымда 4 ағайындымыз. Інім Қонысбек те білім саласының маманы. Бүгінде шағын мемлекетімізде үш перзент тәрбиелеп отырмыз, – дейді аяулы жан.</blockquote>Күн сайын көптеген өзгеріске ұшырайтын білім саласында ізденіссіз бір орында тоқтап қалу – ұстаз үшін кешірілмейтін дүние. Педагогикалық этикадан бастап, білім деңгейін жоғарылатып отыруға әрбір мұғалім мүдделі. Осы кезге дейін бірнеше бітіруші түлекке бағыт-бағдар берген Жанар Алтынбекқызының шәкірттері жоғары оқу орындарының грант иесі атануда. Тәжірибесі толысқан, аға буын өкілдерінен тәлім алған білімі жоғары маман көптеген байқаулардың жеңімпазы. Ол – өткен жылы аудандық «Үздік физика пәні мұғалімі – 2023» байқауынан ІІІ орын, «Рухани жаңғыру» ақпараттық-сараптамалық орталығы» «Үздік педагогикалық мақала» республикалық байқауының «Үздік сабақ жоспары» номинациясы бойынша I дәрежелі, Қызылорда облысы бойынша физика пәні ұстаздары арасындағы «UST.KZ» олимпиадасының I дәрежелі дип­лом иегері атанды. Сонымен қатар оның жемісті еңбегінің өлшемі оқушыларының республикалық деңгейдегі біршама білім бәсекесінен топ жаруы болып табылады.<blockquote>– Физика – табиғат туралы ғылым. Осы күні соңғы 10 жылдықта қалыптасқан білім жүйесін салыстыруға келмейді. Баланың қабілетін дамыту үшін сан алуан жаңалық орын алуда. Заман ағымына ілесу үшін барынша еңбектеніп келеміз. Әр жылдары 1 сыныптан 8-9 бала физика пәнін таңдайды. Өткен жылы ҰБТ-да физика пәні бойынша 45 балл болса, алдағы сынақта оқушылар таңдау пәнінен 50 сұраққа жауап беруі тиіс болады. Әріптесім Әлия Жүсіпова екеуміз оқушыларға физика пәнінен дәріс береміз. Кез келген мұғалімнің білім деңгейі қол жеткізген жетістігімен сараланатындығы сөзсіз. Сондықтан біз тынбай балаларды ғылыми жобаларға, олимпиадаларға дайындаймыз. Мықты, сауаттылығы басым оқушылар қай жерде болсын өз шеберлігін байқата біледі. «Ұлы өнертапқыштыққа алғашқы қадам» атты инновациялық идеялар байқауының кезеңінен Нұрбек Әбіласан І орынды иеленді. Жалпы білім беретін пәндер бойынша республикалық олимпиаданың ІІ кезеңінде бірнеше оқушым бақ сынап, жүлделі орындардан көрінді. «JAS DARYN» зияткерлік байқауының физика пәні бойынша Элеонора Нұрланқызы жеңімпаз атанды. Сонымен қатар республикалық «Зерде» ғылыми жобасының аудандық кезеңінен Ақерке Шерімқожа ІІ орын, жалпы білім беретін пәндер бойынша республикалық зерттеу жобалар конкурсы бойынша аудандық және облыстық кезеңде Зере Мұхтар І орынды еншіледі. Мұндай жетістіктер шығармашыл ұстаздың жұмысына серпін беретіні анық, – дейді білікті ұстаз.</blockquote>№35 Иса Тоқтыбаев атындағы мектеп-лицейінде нар тұлғалы қаншама дарабоз еңбек еткен.&nbsp;Жанар секілді жас ұстаздар олардың нақ ізбасары екені даусыз.&nbsp;

Сырдариялық ұстаздың шәкірттері ауқымды жобалардың жеңімпазы атануда

<a href="https://kyzylorda-news.kz/">Kyzylorda-news.kz</a>&nbsp; &nbsp;Бүгінде Қазалы ауданы спорт саласында жақсы көрсеткіштерге қол жеткізіп келеді. Себебі, спорттың адам өмірінде алатын орны ерек. Денешынықтырумен шұғылданғандардың денсаулығы мықты, шыдамды, әрі шымыр болады. Бұл орайда Қазалы ауданының мәдениет және спорт бөлімі басшысының орынбасары Орысбек Жамшейітовпен сұқбаттасу сәті түскен болатын.– Қазалы ауданында дене шынықтыру мен спортты дамытудың негізгі көрсеткіші ол тұрақты дене шынықтыру және спортпен шұғылданушылар санын ұлғайту болып табылады.Қазір Қазалы ауданы бойынша дене шынықтыру және спортпен жүйелі түрде шұғылданушылар қатары көп пе?– Негізінде, денешынықтыру және спортпен үзбей айналысатындар баршылық. Дегенмен, күнделікті қимыл-қозғалысты серік еткендердің арасында 39,0 процентке көтеріліп, 30069 адамға жетіп отыр. Бұқаралық спортты дамытудың негізгі жолы жарыстарды көптеп өткізіп, халықты спортқа тарту. Бұл мақсатта аудан аумағында осы кезге дейін халықаралық, республикалық, облыстық, аудандық 139 бұқаралық спорттық іс-шара өткізілді. Оған 10000-ға жуық адам қатысты. Оның ішінде, халықаралық турнир – 1, облыстық турнир – 24 және 114-і аудандық турнир мен жарыс болып ұйымдастырылды.Бүгінде мемлекеттік-әлеуметтік тапсырыс шеңберінде бюджеттен 10,565,3 теңге бөлінді. Сала мамандары 29 спорт нұсқаушысы кент, қала және 19 елді мекенді қамтып, 5220 адамды тұрақты дене шынықтырумен шұғылдануға баулып келеді.– Өткен жыл аудан спортшылары үшін жемісті болды деуге әбден болады. Қанша жүлдегер Қазалының атын асқақтатты?– Әрине, ауыз толтырып, кеудеміз мақтаныш сезіміне кенелетіндей-ақ себеп бар. Бангок қаласында өткен бокстан Азия чемпионатында Гүлсая Ержан чемпион атанса, Таисия Алексеева ауыр атлетикадан Әлем чемпионатында күміс жүлдегер атанды.Алматы қаласында ауыр атлетикадан ерлер мен әйелдер арасында Қазақстан Республикасының VІ жазғы Спартакидасында қазалылық Алтынай Тәңірбергенова 59 келі салмақта жеңіс тұғырынан көрінді. Астанада грэпплинг күресінен өткен Азия чемпионатында екі споршы алтын иеленсе, үш спортшы күміс жүлдеге қол жеткізді.Қытай елінің Ханчжоу қаласында ХІХ Жазғы Азия ойындарында қазалылық Абылайхан Жұбаназар дзюдодан қола жүлдені иемденді.Греция елінің Лутраки қаласында өткен грэпплинг және грэпплинг гиден өткен Әлем чемпионатында Қазалы ауданының спортшылары Аружан Алматбаева және Айкүнім Русланқызы жеңімпаз болса, Греция елінің Лутраки қаласында өткен грек-рим және еркін күрестен ардагерлер арасында Әлем чемпионатында ардагер спортшы Самат Оспан жүлделі үшінші орынды қанжығасына байлады.Былтыр Шиелі ауданында өткен ауыл спортшыларының «Алтын күз – 2023» ХХХVІ облыстық спартакиадасында Қазалы ауданының құрама командасы 98 ұпаймен жалпы командалық есепте төртінші орынға шықты.Сонымен бірге, 2023 жылдың 29 мамыр – 10 маусым күндері мемлекеттік қызметшілер күні мерекесіне орай облыс әкімінің жүлдесіне арналған жиырма сегізінші дәстүрлі спартакиада ойындарында Қазалы ауданының құрама командасы жалпы командалық есепте екінші орын иеленіп, күміс жүлдені жеңіп алды.Жалпы, 2023 жылы Қазалы ауданының спортшылары Әлем чемпионатында үш алтын, тоғыз күміс, бір қола, Азия чемпионатында алты алтын, тоғыз күміс медаль жеңіп алды. Халықаралық турнирлерде үш алтын, он үш күміс, он екі қола медаль иеленді. Әр спорт түрінен Қазақстан Республикасының чемпионаттарында 23 алтын, 32 күміс, 36 қола медаль дорбаға түсті.Бұдан бөлек 1 спортшы Халықаралық дәрежедегі спорт шебері атанды. Ал 4 спортшы Қазақстан Республикасының спорт шебері нормативін орындаса, Қазақстан Республикасының спорт шеберіне үміткер 96 спортшы атанып, 10 спортшы спорт түрлері бойынша Қазақстан құрама командасына енді.– Қазір қандай жұмыстар атқарылуда?– Бұл күні бұқаралық спортты дамытумен қатар бәсекеге қабілетті біліктілігі жоғары спортшыларды әзірлеу жұмыстары жүргізілуде. Жоғарғы білікті спортшылар және спорт резервін әзірлеу бағытында №17 Қазалы ауданының олимпиадалық резервтің мамандандырылған балалар-жасөспірімдер мектебінде 1484 оқушы 13 спорт түрімен жаттығады.№18 Қазалы ауданының балалар-жасөспірімдер спорт мектебінде 758 оқушы 9 спорт түрімен жаттығады. Қазалы спорт клубы бойынша 554 оқушы 8 спорт түрі бойынша тұрақты жаттығады.– Біздің аудан көлемі ауқымды, әрі халық саны да артып келеді. Денешынықтырумен айналысатындар үшін спорт алаңдары көптеп салынуда. Осы ретте халықты спорттық инфрақұрылымымен қамтамасыз ету қалай іске асуда?– Жылда жоспарға сай бекітілген ереже төңірегінде атқарылатын жұмыстарды нақтылап отырамыз. Осыған орай халықты спорттық инфрақұрылымымен қамтамасыз ету бағытында 2022 жылдың өзінде Әйтеке би кенті, Қазалы қаласы, Байқожа елді мекенінен 6 спорт алаңы ашылды. Сонымен бірге, Қашақбай Пірімов ауылында спорт кешені пайдалануға берілді.2023 жылы Жанқожа батыр, Майдакөл, Бекарыстан би, Қашақбай Пірімов, Басықара, Ақсуат, Жанкент ауылдарындағы спорт алаңдары жөндеуден өткізілді. Барлығы – 47 жасанды алаң бар. Үрмәш Түктібаев ауылында спорт кешені халық игілігіне ұсынылды.Әйтеке би кенті, Қазалы қаласы, Жалаңтөс батыр, Бекарыстан би, Ғ.Мұратбаев, Қожабақы ауылдарынан да, спорт кешендерінің құрылысына жоба-сметалық құжаттамасын әзірлеп, облыстық бюджетке ұсынғанбыз. Әйтеке би кентіндегі Жеңіс саябағындағы, Бекарыстан би және Қожабақы ауылдарындағы спорт кешендерінің құрылысына қаржысы бөлінді. Амандық болса, 2024 жылы құрылыстары басталатын болады.– Ұлу жылының да басталғанына көп болмады. Жалпы, бұл жылға қандай жоспарларыңыз бар?– Биыл жоспарымыз өте көп. Жоғарыда атап өткендей, 10 спортшымыз спорт түрлері бойынша Қазақстан Республикасының құрама командаларында өнер көрсетіп жүр. Осы спортшыларды 2024 жылдың 26 шілде – 11 тамыз күндері Париж қаласында өтетін ХХХІІІ Жазғы Олимпиада ойындарына қатысуға мүмкіндігінше қолдау білдіру. Оған қоса, Әлем Кубогіне және Азия ойындарына спортшыларды тыңғылықты дайындықпен жолдау. Волейболдан аудан құрамасын Қазақстан Республикасының чемпионаттарына, гандболдан (қол добы) &nbsp;аудан құрамасын Қазақстан Республикасының Бірінші Лигасының ойындарына жіберу. Кіші футболдан Әуесқойлар футбол лигасының аудан жеңімпаздарын Қазақстан Республикасының ХІІ Чемпионатына қатыстыруды көздейміз.Одан бөлек, кенжелеп қалған ұлттық спорт түрлерін дамытуды ойлап отырмыз. Оның ішінде, 2023 жылы демеушілердің қолдауымен ат спортына қызығушы жастардың қатысуымен бес рет жаппай көкпар ұйымдастырылды. Биыл да, Қазақ күресінен, ат спортынан және тоғызқұмалақ спорт түрлерінен аудандық, облыстық жарыстар өткізуді қолға алмақпыз.№18 Қазалы ауданының балалар-жасөспірімдер спорт мектебіне ішкі жөндеу жұмыстары жүргізілді. Атап айтқанда, ішкі сыртқы есіктер толықтай ауыстырылды. Еден толығымен кафельденді, төбесі толықтай жаңартылды. Спорттық құрал жабдықтар толығымен алынды. Жаттығу аппараты үш дана алынды. Гир тасынан әртүрлі салмақта қырық данасына қол жеткіздік. Штанга және гантельмен жабдықталды. Татами – 72, үстел теннисі – 1, грек-рим күресінің кілемі – 1, канат – 1 дана иемдендік.– Сүбелі сұхбатыңызға рахмет.

Орысбек Жамшейітов: Спортпен үзбей айналысатындар қатары көбеюде

<a href="https://kyzylorda-news.kz/">Kyzylorda-news.kz</a>&nbsp; Өз еңбегімен, іс-тәжірибесімен, адалдығымен абырой биігіне өрлеген азаматтар бар болса, соның бірі – Қазалы ауданының тұрғыны Қуаныш Елубаев десек әбден жарасады. Қарапайым отбасында тәрбиеленген ол еңбекке ерте араласып, бір салада қырық жылға жуық уақыт тынбай тер төккен. Алғаш еңбек жолын депода слесарь болып бастап, кейін машинист көмекшісі қызметіне көтерілді.&nbsp;1985 жылы арнайы курстан өтіп, біліктілігін арттырып, машинист болды. 1988 жылы қызмет бабымен Қазалыдан Байқоңырға ауысып, кейін ауданға оралады. Сол уақыттан бастап, 2016 жылға дейін "ТД-23" Қазалы депосында машинист қызметін абыроймен атқарды.&nbsp;Бүгінгі таңда еңбегінің зейнетін көріп, ырысқа кенеліп отырған жайы бар. Өмірдегі орнын еңбектен тапқан жан маңдай терімен дәулет құрап, отбасын құрып, бала тәрбиелеп, қазір ардақты атаға айналды.&nbsp;Жуырда еңбек жолын теміржол саласына арнап, техниканың тілін жетік меңгерген азаматтың шаңырағына барып, әңгіме өрбітіп, ой бөлісудің сәті түсті. Өткен өмірі туралы сөз еткен ол, машинист болуды бала кезден армандағанын айтады. Тіпті, бұл мамандықты таңдауына әкесінің сөзі түрткі болған екен.&nbsp;– Әкем марқұм Әбдраман Елубаев та, мен жүрген жолмен жүріп өткен жан. Ол теміржол саласында қызмет еткен. Жастайымнан темірдей тәртіпке үйреніп, әкем киген формаға қызыққан соң, осы салада жұмыс жасасам деп армандайтынмын, – деп бастады әңгімесін Қуаныш Әбдраманұлы.Оның айтуынша, әкесі Әбдраман Елубаев Ұлы Отан соғысының ардагері. Тар заманның&nbsp;ауыртпалықтарын басынан өткерген ол, ұлының да, жұмысқа етене араласуын қалап, ерте жастан еңбекке баулыған көрінеді. Әкесінің бұл қадамы басында қиын соққанымен, бұл Қуаныш ағаның кейінгі еңбек жолындағы кедергілерін оңай еңсеруіне көмегін тигізіпті.&nbsp;– Әкем "Еңбектен қашпа, ырысыңды шашпа" дегенді жиі айтатын. Сол сөзі жадымда мықтап жатталыпты. Содан бері бүгінге дейін жұмыстан қашқан адам емеспін. Қазір зейнетте болсам да, құр қарап отыруды жөн көрмеймін. Ел ісіне, қоғамдық шараларға белсене қатысуды әдетке айналдырдым, – дейді&nbsp;Қуаныш Елубаев.&nbsp;Жасы алпыс беске таяған Қуаныш аға өзі айтқандай, қай істен де, тысқары қалған емес. Ол елдік мәселе болсын, ол қоғамдық болсын. Барлығына да, белсене араласуда. Кейбір мәселелерге өзіндік үнін қосып қоймай, олардың шешімін табуына да ықпал етіп жүр. Мұнысы, өзінен кейінгі толқынға айтарлықтай үлгі. Қуаныш ағаның кей ісіне куә болмасам да, жұрт айтып жүрген жақсылығына&nbsp;қанықпыз. Өзінен солардың бірін айтып беруін сұрағанбыз. Аға біраз уақыт ойланып, жауап беруге тосырқап қалды. "Мұны өзім айтқаным орынсыз. Мақтанғандай болып көрінермін. Жұрт айтып жүрсе, соның өзі жетіп жатыр, – деді Қуаныш аға жымиып.&nbsp;Еселі еңбек еткен ардақты азамат алғысқа кенде емес. Еңбегі де еш жерде елеусіз қалмаған. Оған аудан, облыс басшылығынан алған біршама мадақтамалары мен марапаттары дәлел болса керек. Өз саласында әр жылдары үздік қызметкер атанып, төсбелгіге ие болғаны жоғарыдағы сөзіміздің дұрыстығын айғақтайды.&nbsp;Қуаныш аға бұған дейін өз жетістіктерін айтып, еш жерде жар салмады. Оны жаны да сүймейді. Оның түсінігінше, жетістікке темірдей тәртіп қана жеткізеді. Осы ұстанымнан айнымаған азаматтың кейінгілерге айтар ақылы да осы. "Егер темірдей тәртіп болмаса, болашақ бұлыңғыр болмақ. Әрине, бұл қатып қалған қағида емес. Әйтсе де, тәртіп бар жерде тірлік те, тиянақты болатынын ескеру керек. Жастар осыны қаперден шығармай, санасына мықтап сіңірсе, биік белестерді бағындырып, табысқа да кенеледі, – дейді ол.&nbsp;Қуаныш Әбдраманұлы тәжірибелі де, тәлімді азамат. Қажырлы қызметінің арқасында еңбек биігіне жеткен кейіпкермен әңгімеміз таяу қалған еді.&nbsp;Қуаныш Елубаевпен тілдескен соң, оның бүгінге дейін жеткен жетістігінің астарында "Бала Қуаныштың" асқақ арманы жатқандығын аңғару қиын болған жоқ. Өйткені, Қуаныш Әбдраманұлының жанары соны айтып тұрды. Тіпті, көз жанарындағы жалын ап-айқын көрінді. Арманға жеттім деп тайсалуға болмайтынын осыдан-ақ ұғынуға болатындай.&nbsp;

Абырой биігінен көрінген азамат 

<a href="https://kyzylorda-news.kz/">Kyzylorda-news.kz</a> Ел дамуын ілгерілетуге жол ашатын экономика ғылымының басты секторы – ауыл шаруашылығы. Бұл салада Қызылорда облысы жыл сайын жоғары көрсеткіштерге жетуде. Себебі орданың халқы ерте кезден бастап шаруашылық пен егінге етене жақын.Облыстағы агроөнеркәсіпті қолдау 2003 жылдан басталған. Қолдау аясында суармалы егіншілікте жетістіктер көбейді. Мәселен, Сыр өңірінің брендіне айналған күріш өсімдігі облыс халқының негізгі табыс көзіне айналды.Сандарды сөйлетсек, 2022 жылы қызылордалық ауыл шаруашылығының еңбеккерлері 550 мың тоннадан астам күріш өнімін жинап, орташа өнімділік гектарына 61,8 центнерге жетті. Өткен жылдың сәуір айына дейін Сыр диқандары 21,5 мың тонна күріш, 1782 тонна бидай, 30 тонна арпа, 116,3 тонна мақсары, 4,5 тонна соя, 51,8 тонна жүгері, 278 тонна жоңышқа тұқымын дайындаған. Өткен жылдың қорытындысы бойынша облыстан 30,7 млн долларды құрайтын ауыл шаруашылығы өнімдері әлемнің 21 еліне экспортталған. Барлық экспортталған өнімнің 86%-ы яғни 49 510,7 тонна күріш өніміне тиесілі.<h2 style="text-align:justify;">Егін егудің озық тәжірибесі</h2>Облыс әкімі Нұрлыбек Нәлібаевтың төрағалығымен өткен ауыл шаруашылығы құрылымдары өкілдерімен кездесуде болжамды су көлеміне сәйкестендіріп егін егу мәселесі талқыланғаны есімізде. Жиын барысында күріш алқабындағы суды үнемдеуде лазерлік тегістеу әдісін қолдану туралы айтылды.<blockquote>– Мемлекет басшысы Үкіметтің кеңейтілген отырысында көрші елдердің тәжірибесін зерттеп, су үнемдеу технологияларын кеңінен енгізуді тапсырған болатын. Өзбекстан Республикасында ЮНЕСКО-ның «ZEF/UNESCO» жобасы шеңберінде іске асқан ғылыми зерттеулерге талдау жүргізілді. Нәтижесінде суармалы суды 20 пайызға дейін үнемдеуге және өнімділікті 30 пайызға дейін арттыруға болатыны дәлелденді. Бұл әдісті аймағымыздың диқандары 2013 жылдан бері инженерлік жүйеге келтірілген ауыспалы күріш егістігінің 55 пайызына енгізді. Алдағы уақытта бұл жұмыстарды әрі қарай жалғастырамыз, – деді аймақ басшысы.</blockquote>Нұрлыбек Машбекұлы ҚР Су ресурстары және ирригация министрі Нұржан Нұржігітовтен лазерлік тегістеу әдісін су үнемдеу технологияларының қатарына қосу жөніндегі ұсынысты қолдауды сұрады.<h2 style="text-align:justify;">Инвестициялық жобалар</h2>Қызылорда облысының ауыл шаруашылығы және жер қатынастары басқармасы инвестиция тартуды тұрақты қамтамасыз ету мақсатында Қазақстан Республикасы Ауыл шаруашылығы министрлігімен бірлесіп агроөнеркәсіптік кешен саласындағы 2024-2026 жылдары іске асырылатын инвестициялық жобалардың жол картасын әзірлеуде.Жол картасында облыс бойынша құны 47,7 млрд теңгені құрайтын 27 инвестициялық жоба қамтылған. Бұл жобалардың жүзеге асырылуы 270 жаңа жұмыс орнын ашуға мүмкіндік береді.Биыл жалпы құны 3,2 млрд теңгені құрайтын 10 инвестициялық жоба жүзеге асыру жоспарлануда. Оның ішінде, Солтүстік Қазақстан облысының тәжірибесі негізінде жеңілдетілген қаржыландыру бойынша 5 жобаға республикалық бюджеттен 5 млрд теңге қаражат бөлінуде.&nbsp;Фото: Нұрболат Нұржаубай

Ауыл шаруашылығы өнімдері әлемнің 21 еліне экспортталған

<a href="https://kyzylorda-news.kz/">Kyzylorda-news.kz</a>&nbsp; Ғасырдан аса тарихы бар «Қамқор Локомотив» жауапкершілігі шектеулі серіктестігі &nbsp;филиалы Қазалы локомотив жөндеу зауыты ұжымы Ұлыстың ұлы күні – Әз Наурыз мерекесін тойлады. Береке мен бірлік мейрамын зор қуанышпен қарсы алған көпшілікке ақ дастархан жайылып, ән мен жырдан шашу шашылды. Мекеме ауласына шат-шадыман көңіл күйде жиналған ұжымдастар бір-бірімен төс қағыстыра амандасып, ақ жарма тілектерін арнап жатты. &nbsp; Бұл іргелі мекеме алғашында Орынбор-Ташкент темір жолының Қазалы паровоз депосы деген атауда болған. Одан кейін, Орынбор-Ташкент қазыналық темір жолы Қазалы паровоз-вагон негізгі депосы, паровоз депосы, кейін локомотивтердің-тепловоздардың жаңа типтері шығуына байланысты локомотив депосы болып аталды. Осындай, уақыт сынынан өткеннен кейін, «Қазақстан темір жолы» республикалық мемлекеттік кәсіпорнында мекемелерде қосымша жұмыс орнын ашып-жөндеуді, өндірісті шоғырландыру, тепловоздарды жөндеуге өндірістік қуатты дамыту мақсатында «Қазақстан» темір жолы» бұйрығымен Қазалы локомотив депосы «ТЭМ-2» сериялы маневрлі тепловоз жөндеу зауыты болып қайта құрылды. Ал, 2009 жылдың қараша айынан бастап, «Қамқор Локомотив» ЖШС-нің «Қазалы локомотив жөндеу зауыты» филиалы болып қайта құрылды. Мекеме атауы сан мәрте өзгергенімен бұндағы тәртіп пен талап күшінде. Талай толқын алмасса да, ұжымдастардың ауызбіршілігі мен ынтымақтастығы бүгінгі мерекелік іс-шара кезінде де, айқын көрініс тапты.&nbsp; Әріптестерін айтулы күнмен құттықтаған мекеме басшысы – Нұрлан Алмағамбетов: «Құрметті ұжымдастар! Баршаңызды халқымыздың ең ұлы мейрамы, адам баласы мен табиғат ана қайта жаңғырып, түлейтін әз-Наурызбен шын жүректен құттықтаймын. Наурыз – жылдың басы, күн мен түннің теңелер шағы. Тамырын тереңнен тартқан осынау мейрам береке мен бірліктің, тазалық пен татулықтың тұғырын нығайтып, риясыз шаттық пен қуанышқа кенелтер ұлы мереке.&nbsp; Әр жыл сайын жасампаздығы мен қуаты артып келе жатқан еліміздің ажары мен айбыны да осындай игі дәстүрлермен асқақтай бермек. Баршаңыздың деніңізге саулық, шаңырақтарыңызға шаттық, амандық, ырыс пен ынтымақ тілеймін. Наурыз – айрықша мейрам. Бұл күн қыс аяқталып, барша еліміз жаңаша кейіпке енетін көгілдір көктемнің келгенін білдіреді. Жаңару мен жасару күні Сіздерге бақ-береке, ырыс-ынтымақ әкелсін. Дастарқандарыңыз мол болсын», – деген ізгі тілегін білдірді.&nbsp; Бұдан соң, мерекеге орай өндірістің дамуы мен өркендеуіне қосқан үлесі мен мінсіз қызметі үшін зауыттың бірқатар жұмысшысы Қазалы локоматив жөндеу зауыты директорының және «Amanat» партиясы Қазалы аудандық филиалының төрағасы Ғазиз Әліштің алғыс хаты және мекеменің кәсіподақ ұйымының ақшалай сыйлығымен марапатталды. Мерекеде мерейі үстем болған жандар қатарында, дизель жөндеу цехының жөндеушісі – Шат Әбубәкіров, дизель бөлшектерін дайындау цехының жөндеушісі – Ержан Ерназар, автоматтты тежегіш жөндеу цехының жөндеушісі – Амангелді Ахметбаев, доңғалақ жөндеу цехының жөндеушісі – Амантай Төлеуов және дизель жөндеу цехының жылжымалы құрама тазалаушысы – Гүлнара Төлебаева бар.&nbsp; Мерекелік шара кезінде әріптестер бір-біріне деген ыстық ықыласын, кең пейілін, дархан көңілін тілектерімен жеткізді. Ұйымдастырушылар бақ дарыған бата алып, алғаусыз алғыс арқалады. Дастарқан басына жиналған көпшілік Наурыз көжеден дәм татып, еліміз тыныш, жұртымыз аман болғай деген тілекпен тарқасты.&nbsp;

Қазалыдағы «Қамқор Локомотив» ұжымы берекелі мерекені бірлікте қарсы алды

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Тоқаев «Бақытты әрі берік шаңырақ – берекелі қоғамның және мемлекеттің мызғымас тірегі. Отаншылдық пен жауапкершілік, парасаттылық пен ізеттілік, еңбекқорлық пен жасампаздық сияқты асыл қасиеттер ең жақын жандардың үлгі-өнегесі мен ықпалының арқасында қалыптасады. Ізгілік идеалдары мен қағидаларына негізделген тұлға дүниетанымы ата-ана тәрбиесінен бастау алады. Халқымыз қашанда шыққан тегіңді білуге және отбасы құндылықтарын ұлықтауға айрықша мән берген. Бүгінде бұл қасиеттер ұлттың жаңа сапасын қалыптастыру ісінде маңызды рөл атқарады» деген болатын. Осыған орай біз Сексеуіл кентінде тұратын теміржолшылар отбасы туралы сөз қозғамақпыз.&nbsp;Тоғыз жолдың торабы Сексеуіл кентіндегі теміржол бекетінде талай адам қызмет етті. Тіпті бір отбасының шежіресі ата дан балаға жалғасқан теміржолшылар денастиясынан тұрады. Олар ұрпағымен сабақтастқан салада абыройлы қызмет етті. Сондай өнегелі отбасының бірі Ибрагиовтар жанұясы. Сексеуіл локоматив пайдалану депосында 1977 жылдан бастап қызмет жолын бастаған Жақсат ағамыз бүгінде құрметті зейнет демалысына шыққан. Ол өзінің қызмет еткен жылдарында әр түрлі сатыға көтеріліп, «Құрметті теміржолшы» атағын алды. Бүгінде қогс бірдей үлы да әке жолын жалғап теміржолда жұмыс жасап жүр.Арал ауданына қарасты Тастүбек елді мекеінде балықшылықты кәсіп еткен отбасында дүниеге келген Жақсат ағамыз ол кезде пойыз жүргіземін де деп әсте ойламаса керек. Тек мектеп қабырғасында жүрген 4-сыныпта ғана ол теміржол мен пойыз ды өз көзімен көрді. Сол шақтан бастап бала көңілде осы салаға деген ерекше қызығушылық туды. Мектеп &nbsp;бітіріп, әскерей борышын өтеп келген Жақсат Ибрагимов 1977 жылы локоматив пайдалану депосы жанындағы машенист көмекшілерін дайындайтын курсты бітірген соң бірден жұмысқа орналасады. &nbsp;<blockquote>– Мені алғаш келген күнен бастап ұжымдастарым құшақ ашып қарсы алды. Соның арқасында өз жұмысыма бірден керісіп, тез үйреніп кеттім. Машенистің көмекшісі болып жүріп екі жылдан соң Қазалыдағы техникалық мектепке тепловоз машенисті курысын оқып алдым. Сүйтіп 1982 жылдан бастап машенист болып еңбек ете бастадым.&nbsp;</blockquote>Мамандығына адал Жақсат Ибрагимов жерге қаратқан жоқ, өндірістік көрсеткіштерін үнемі жоғары ұстап, салалық жарыстардың бірнеше рет жеңімпазы атанды. Басшылар тарапынан еңбегіне лайықты мақтаулар мен марапатқа да ие болды. Марапаттың ең үлкенін бертін келе, ширек ғасырдай уақыт өткенде алды. 2007 жылы «Қазақстан темір жолы» ҰК» АҚ басшылығының ұйғарымымен «Құрметті теміржолшы» төсбелгісін кеудесіне тақты.<blockquote>– Жұбайым Сұлушаш екеуміз бес бала өмірге алып келдік. Балаларым да менің ізімді қуып, темір жол саласына жұмысқа тұрып, бүгінде өздеріне ұнаған мамандықтары бойынша еңбек етуде, – дейді машинист Жақсат Ибрагимов.</blockquote>Үлкен ұлы Асылбек пен екінші ұлы Асылхан машинист болып жұмыс жасауда. &nbsp;Әке жолын жалғаған қос ұлдың да бүгін мерейі үстем.&nbsp;<blockquote>– Біз бала кезден әкеміздің жұмысының қыр-сырымен қанық болып өстік. Кейінен мектеп бітірген соң біздің алдымызда бір ғана мақсат тұрды ол әкеміз сияқты теміржолшы болу еді. Осылай ең бірінші ағам Асылбек машенист көмекшісі болып қызметке орналасты. Одан соң мен депоның инженері болып қызмет жолымды бастап машенистке дейін сатылап көтерілдім, - дейді Асылхан.</blockquote>Абырой биігінен алшақтамай еңбек етіп жүрген жанұя бинеттің зинетін көріп, бір салада тұрақты қызмет етіп келе жатқан үлгілі жандар. Ұрпақтар сабақтастығы деген осы болар.Бала күнінде «шопыр» болып машина жүргізуді армандамайтын бала болмайды. Ал Жақсат кішкентайынан «өскенде кім боласың?» десе, «пойыз айдаймын» деп жауап береді екен. Темір жолдың бойында, Қызылорданың Арал ауданына қарасты Сексеуіл станциясында дүниеге келген бала үшін мұның еш ерекшелігі болмаса керек.Айтқанындай, Қазалыдағы машинистер даярлайтын училищені тәмәмдаған соң Сексеуіл локомотив пайдалану депосына машинист көмекшісі болып қабылданады. Табаны күректей бес жыл көмекші машинист болып әбден тәжірибе жинаған соң ғана машинист тізгініне ие болды. Бұл 1982 жыл болатын. Міне, содан бері қол үзбестен өзі сүйген мамандығы бойынша жұмыс істеп келеді.Мамандығына адал Жақсат Ибрагимов жерге қаратқан жоқ, өндірістік көрсеткіштерін үнемі жоғары ұстап, салалық жарыстардың бірнеше рет жеңімпазы атанды. Басшылар тарапынан еңбегіне лайықты мақтаулар мен марапатқа да ие болды. Марапаттың ең үлкенін бертін келе, ширек ғасырдай уақыт өткенде алды. 2007 жылы «Қазақстан темір жолы» ҰК» АҚ басшылығының ұйғарымымен «Құрметті теміржолшы» төсбелгісін кеудесіне тақты.<blockquote>-Балаларым да менің ізімді қуып, темір жол саласына жұмысқа тұрып, бүгінде өздеріне ұнаған мамандықтары бойынша еңбек етуде, – дейді машинист Жақсат Ибрагимов.</blockquote>Үлкен ұлы Асылбек бүгінде өзімен үзеңгі қағыстырып дегендей жұмыс істейтін мынау деген машинист. Ал екінші ұлы Асылхан депода сапа инженері болып жұмыс істейді. Бүгінде әкелі-балалы машинистер күзгі комиссиялық байқауды өз дәрежесінде өткізуде. Қозғалыс және еңбек қауіпсіздігі жөнінде өткізілген аттестация қорытындысымен «жақсы» деген баға алған олар жыл басынан бері ешбір апат-ақауға жол берген емес. Жылжымалы құрамды Сексеуілден Ақтөбе жол бөлімшесінің Тоғыз станциясына дейін, бергі жағы Қазалы станциясына дейін ешбір кедергісіз, уақытылы жеткізіп жүрген әкелі балалы машинистер депо ұжымының қазіргі жетістіктеріне сүбелі үлестерін қосып жүр деуге толық негіз бар.Депода жүргізіліп жатқан қысқа әзірлік жұмыстары да көңілден шығады. Ағымдық жөндеуден шыққан тепловоздар түгелімен сырланып, қосалқы бөлшектері ауыстырылған. Енді жақын күндері қысқы жанар-жағар майлары ауыстырылып, мотор тұстары жабылғымен қапталмақ. Мұндай негізгі, қажетті заттардың уақытылы қамтылуы кешегі өткен байқаудағы комиссия құрамының есертулерінде де нақтылай айтылды.<blockquote>-Локомотив паркіндегі тепловоздардың барлығы осындай ірілі-ұсақты сынақтардан өткен, – дейді депо директоры Бөрі Суханұлы.</blockquote>Алдағы күндердің еншісінде әлі де атқарылуға тиісті біршама жұмыстарымыз бар. Мақсат, темір тұлпарларды қысқа сақадай сай шығару.

Мерейлі отбасы: Сексеуілдегі теміржолшылар түлеген отбасы

   Жаңақорған жұрты наурыз мерекесін тойлады

<a href="https://kyzylorda-news.kz/">Kyzylorda-news.kz</a>&nbsp; &nbsp;Қазалы ауданына қарасты Қазалы қаласының халқы Ұлыстың ұлы күні – әз-Наурыз мерекесін жоғары деңгейде тойлады. Мұндағы жұртшылық орталық алаңға ерте бастан жиналып, ұлттық тағам қатарындағы бауырсақ пен наурыз көжеден дәм татты. Түрлі тақырыптағы киіз үйлер тігіліп, ұлттық спорттан жарыстар ұйымдастырылды. Сондай-ақ, қала өнерпаздары мерекелік көрініс қойып, ән шырқап, би биледі.Салтанатты шараға Қазалы ауданының әкімі Мейрамбек Шермағанбет арнайы келді.– Ардақты ағайын, қадірлі жерлестер! Баршаңызды тіршілік атаулыны тірілтіп, табиғатты түлеткен, сан түрлі ұлттардың бауырластығына арқау болған Ұлыстың Ұлы күні – әз-Наурыз мерекесімен шын жүректен құттықтаймын!«Наурыз» сөзі біріншіден, «жаңа күн» дегенді білдірсе, екіншіден, күн мен түн теңеледі, сондықтан, барлық бастама, ұлы істі ырымдап, халық осы күні бастаған. Сол себепті, бұл күнді «Ұлы істің ұлы күні, яғни Ұлыстың ұлы күні» деп атаған.Тарих тамыры тереңге бойлаған әз-Наурыз дана халқымызда ерекше сән-салтанатпен аталып өтеді. Бұл бір жағынан өткенді саралап, болашағымызды болжайтын айрықша маңызға ие.Бүкіл ғаламда күн мен түннің теңеліп, дастарханымыз аққа толатын, елге бақ қонатын бұл шақтың – қазақылықтың қаймағы саналатын біздің аудан үшін алар орны ерекше.Қадірлі ағайын, халқымызды ғасырлар бойы нұр шуағына бөлеген Ұлыстың Ұлы күнімен құттықтай отырып, шаңырақтарыңызға шаттық, отбасыларыңызға бақ-береке тілеймін. Әз-Наурыз бар жақсылығын ала келсін. Лайым бірлігіміз бен берекеміз арта берсін. Ұлыс оң болсын. Ақ мол болсын! – деп Қазалы ауданының әкімі Мейрамбек Зинабдинұлы қазалылықтарды мерекемен құттықтап, жылы лебізін білдірді.Сонымен қатар, Қазалы қаласының өсіп-өркендеуіне үлес қосып жүрген бірқатар азамат пен ұжымдарды «Алғыс хатпен» марапаттап, шынайы ризашылығын жеткізді.Мерекелік шаралар барысында аудан әкімі мен бірқатар зиялы қауым өкілі және ардагерлер кішкентай бүлдіршіндердің тұсау кесу рәсіміне қатысып, бүлдіршіндерге ақ жол тіледі.Ұлыс ұлы күніне арналған шара соңы қала өнерпаздарының концерттік бағдарламасына ұласып, жиылған көпшілік мерекелік көңіл-күйді сезінді.

Қазалылықтарды шаттыққа бөлеген күн

Қазалыда Наурызнама күндеріне орай Ұлыстың ұлы күні мереке аясында Қазалы аудандық мәдениет бөлімі мен Әйтеке би кенттік мәдениет үйінің ұйымдастыруымен Бекарыстан би ауылында "Отанды сүю – иманнан" атты қайырымдылық кеші өтті.&nbsp; Көңілді кештің алғы сөзін алған Майдакөл ауылдық округінің әкімі Қонысбек Кітабияұлы алдымен жанашырлық танытып, жақсылық жасап жарысқан Қазалы ауданының өнерпаздарына жүрекжарды лебізін білдірді.&nbsp; – Бұл күн еліміздің халқын мейірімділік пен тату көршілікке шақырады. Мұқтаж жандарға қол ұшын созу, кімге болсын құшағын жайып, қонақжайлылық көрсету – қазақтың қанында бар қасиет. Наурызды мерекелеу кезінде бұл қасиеттерді барынша кеңінен насихаттау, оның қадірін арттыру аса маңызды. Өйткені, көшпенділер мәдениетінде өзара көмек, жанашырлық пен қамқорлық кез келген қиындықты жеңіп, мақсат-мұратқа жетудің тетігі болған. Әйтеке би кенттік мәдениет Үйінің атынан қайырымдылық концертте өнер көрсеткен өнерпаздарға шынайы алғысымызды білдіреміз. Өнер айдынында талаптарыңыз талмасын, игі іске ортақ болған ниеттеріңіз қабыл болсын, оң болсын! Көздеген мақсаттарыңызға жетіңіздер, өнерлі жандар. Қазалы аудандық мәдениет орталығының, Әйтеке би кенттік мәдениет үйі және "Айнұр" тобының өнерпаздарына көптен көп рахмет. Өнерлеріңіз өрге жүзсін, – деді ауыл әкімі Қонысбек Кітабияұлы.&nbsp; Мұнан соң, мәдениет орталығы мен кенттік мәдениет үйі өнерпаздары ән шашу арнап, күмбірлете күй ойнап, шыр көбелек айнала биледі. Бұған дән риза болған ауыл тұрғындары қос қолдап, шапалақ соғумен ыстық ықыласын жеткізді.&nbsp; Жалпы, кештің ұйымдастырылуына тағы бір себеп болып отырған Бекарыстан би ауылындағы "Аманбай ахун" мешіті жанынан тұрғындар асарлатып салып жатқан асхана құрылысына қаржылай көмек беру еді.&nbsp; Шара соңында, өнерпаздар жиналған қаржыны аталмыш мешіттің имамы Ерболат Қалиевке табыстады.

Қазалыда өнерпаздар қайырымдылық кешін өткізді 

<a href="https://kyzylorda-news.kz/">Kyzylorda-news.kz</a>&nbsp;&nbsp; Наурыз – көктем мен жаңару мерекесі. Әлемдегі ең көне мейрамдардың бірі. Орта Азия елдері оны бес мың жылдан аса уақыт атап өтіп келеді. Наурыз мейрамы заманауи діндер мен көптеген мемлекеттер пайда болғанға дейін шамамен бес мың жыл бұрын пайда болған деседі дереккөздерде.&nbsp;Бұл мереке – күнәдан тазару, киім-кешектерді тазарту, үйді тазарту, жамандықтан және өшпенділіктен тазару мерекесі ретінде атап өтіледі. Ол адамдарды басқалардың күнәлары мен жамандықтарын кешіруге шақырады. Сондай-ақ, бұл күні шығыс елдері екі арадағы кез келген соғысты тоқтатқан. Ал, қазақ ақсақалдары мерекеде араздасқан ру-тайпалармен татуласатын болған.&nbsp;Ауқымды мерекені өзге елдер де асыға күтеді, әрі жоғары деңгейде тойлайтын көрінеді. Осы орайда, шет елде жүрген қазалылық жастарға «Шет елде наурыз мерекесі қалай өтеді?» деген сауал жолдап, пікір алысқан едік.Бағым ЖОМАРТҚЫЗЫ:&nbsp;<img src="https://knadmin.beoblood.kz/uploads/a74f71da_9e00_48ec_a877_75433855751b_d4688155a7.jpg" alt="a74f71da-9e00-48ec-a877-75433855751b.jpg">– Мен қазіргі уақытта Шанхайда магистратура оқып жатырмын.&nbsp;Халқымыз қашанда Әз Наурыз мерекесін ұлықтап ерекше тойлайды. Шет елде білім алып жүрген қазақ студенттері үшін де, бұл мерекенің орны бөлек. Ел асып, мейрамды ескерусіз қалдырған кезіміз болған емес, керісінше, біз шет елдік достарымызға, оқытушыларымызға бұл мерекені дәріптеп, ұлтымыздың ғасырлар бойы жалғасын тапқан салт-дәстүрлерімізбен таныстырамыз. Қыздар жағы ұлттық тағамдарды дайындасақ, жігіттер жағы, өз қолдарымен безендіру жұмыстарын жасап, мерекелік атмосфераны одан сайын сезіндіруге белсене атсалысты.&nbsp;Наурыз мерекесінде қара жорға биін билеп, ұлттық тағамдарымыздан дәм татып, ұлттық аспабымыз домбыраның үнін сүйсіне тыңдаған, Қытай студенттері мен оқытушылары ризашылығын білдірді. Елімізге қонақ болып келуге қызығушылықтары артты. Осылайша, Наурыз мейрамын тойлау арқылы теңізге құйған тамшыдай мәдениетіміз бен тарихымызды өзге елде, өзге ұлт өкілдеріне дәріптеу бақыты бұйырып жүр. Туған елден жырақта жүріп, жат бауыр болмай, керісінше, әр қазақ менің жалғызым деп,&nbsp;ұлттық құндылықтарға деген махаббатымыз ерекше артты.&nbsp;Ернар Мақсұтұлы:&nbsp;<img src="https://knadmin.beoblood.kz/uploads/cc427418_1f5f_4826_a850_2a5eb6169283_a05bd9393e.jpg" alt="cc427418-1f5f-4826-a850-2a5eb6169283.jpg">– Адам дұрыс армандап, алдына анық мақсат қойса, діттегеніне жетеді. Оқушы кезімнен физика саласына, яғни, ядролық физика бағытында жоғары білім алуды көздедім. Әсіресе, шексіз энергия және оны алудың жолдары сутегі энергиясына деген қызығушылығым басым болатын. Мен бағытымнан жаңылмадым. Осы сала бойынша бірнеше білім сатыларынан өттім. Әлі де жетілдіру үстіндемін.&nbsp;Қазіргі таңда, Нью-Йорк қаласындағы Колумбия университетінде білім аламын. Қысқаша айтар болсам, бұл америкалық жекеменшік иелігіндегі Айви Лигасына кіретін зерттеу университеті. Колумбия университеті Нью-Йорк штатындағы алғаш жоғарғы оқу орны, ал, барлық АҚШ университеттерінің арасында бесінші болып, құрылған және тоғыз Американың колониялды жоғарғы оқу орындарының біреуі. Бүгін бұл университеттің әлем бойынша Амман, Бейжің, Стамбұл, Париж, Мумбай, Сантьяго және Найроби қалаларында орталығы бар. Университеттен 104 нобел лауреаты, 30 президент шыққан. Осындай оқу орнында білім алу – мен үшін үлкен жетістік.&nbsp;Ал, шет елдегі наурыз мерекесіне келер болсақ, иә, қазақтар тойлайды. Мен өткен жыл Калифорнияда болдым, биыл Нью-Йорктамын. Өкінішке қарай, былтыр тойламадым, сабақтан бос уақытым аз. Ал, биыл тойласам деген ниеттемін. Жалпы, бұл жақта қазақтар бір мейрамхананы жалға алып, сол жерге қонақтарды шақырады. Қазақтармен бірге қырғыз, өзбек ұлтының да өкілдері болады. Кіру билеті – 50-100 доллар арасында. Десе де, Қазақстандағыдай ерекше атмосфера сезілмейді.&nbsp;Парасат ӨМІРЗАҚ:&nbsp;<img src="https://knadmin.beoblood.kz/uploads/67aee73f_ec34_4941_adf7_31d473c20f91_3f03f76822.jpg" alt="67aee73f-ec34-4941-adf7-31d473c20f91.jpg">– Мен, 2014 жылы Қазалы ауданындағы Б.Әбдіразақов атындағы 88 орта мектепті үздік аяқтап, сол жылы Л.Н.Гумилев атындағы Еуразия ұттық университетіне түстім. 2019 жылы «Ядролық физика» мамандығы бойынша жаратылыстану ғылымдары бакалавры дәрежесін алып, сол жылы Мәскеу қаласындағы «Мәскеу болат және қорытындылар» ұлттық технологиялық зерттеу университетіне магистратураға түсіп, 2022 жылы «Техникалық физика» мамандығы бойынша магистр дәрежесін алдым.&nbsp;2023 жылы Л.Н.Гумилев атындағы Еуразия ұлттық университетінің «Наноматериалдар және нанотехнологиялар» мамандығы бойынша докторантураға (ғылыми-педагогикалық бағыт) қабылдандым.&nbsp;2017 жылы Томск мемлекеттік университетінде (Ресей Федерациясы), 2018 жылы Беларусь мемлекеттік университетінде (Минск қаласы) Академиялық ұтқырлық бағдарламасы бойынша білім алдым.&nbsp;Қазіргі уақытта, Қазақстан Республикасының Ғылым және жоғары білім Вице-министрінің көмекшісі қызметін атқарамын.&nbsp;Мәскеудегі қазақтар да, Наурыз мерекесін ерекше тойлайды. Күні бұрын дайындалып, қазақтың ұлттық тағамы ет асып, бауырсақ пісіреді. Ұлттық үлгідегі киімдерді киіп, әсем әшекейлерді де тағынады. Қазақша әндер орындап, бір-біріне бата-тілек айтады.

Қазақстан және Қызылорда облысының жаңалықтары