<a href="https://kyzylorda-news.kz/">Kyzylorda-news.kz.</a> Дені сау адам – табиғаттың ең қымбат жемісі. Көп жасау – деннің саулығы,бақытты болу – адамның өз қолындағы ісі депті ғұламалар. Денсаулықты зор байлыққа теңеген халқымыз ағзаның саулығын бақытқа балаған. Осы ретте адам денсаулығын сауықтыруда ақ халатты абзал жандардың еңбегі өлшеусіз. Ал өңірдің медицина саласын басқару үлкен жауапкершілік пен тынымсыз ізденіс пен ерекше еңбекті қажет етеді.&nbsp;Аймақтың бас дәрігері қызметіне тағайындалған сәттен Олжас Искаков әр сала бойынша облыстың штаттан тыс бас мамандарын жеке қабылдап, мәселесін тыңдағанын айтады. Нәтижесінде тұрғындардың медициналық көмекке арыз-шағымы азайған. &nbsp;Нефрология қызметін дамыту жөніндегі жол картасы шеңберінде «Облыстық қан орталығы» ШЖҚ КМК-дағы қандағы такролимус концентрациясын анықтайтын аппаратқа реагент жеткізіліп, облыстағы бүйрегі ауыстырылған тұрғындарға талдау жұмысы басталған. Сонымен қатар, «Орталық қалалық емханасы» ШЖҚ КМК-на иммунохимиялық анализатор аппараты сатып алынып, қондырғы іске қосылған.Одан бөлек аймақтағы хирургия саласын дамытудың «Жол картасы» әзірлеу игілікті істің бірі.Барлық медицина ұйымдарының бас дәрігерлерін 2022 жылы атқарылған жұмысы, 2023 жылға қойған міндеттерін талқылау мақсатында жеке қабылдау өткізген. Қабылдау нәтижесінде аймақ медицинасының 2023-2028 жылдарға арналған стратегиялық даму жоспары дайындалуда.Ағымдағы жылы облыс әкімінің орынбасары Нұрымбет Сақтағановтың төрағалығымен, медицина ұйымдары бас дәрігерлерінің қатысуымен 2023 жылдың І тоқсанын қорытындылау бойынша алқа отырысын өткізіп, нақты тапсырма берген. Бүгінде «Ауылда денсаулық сақтауды жаңғырту» пилоттық ұлттық жобасы аясында 2023-2024 жылдары жалпы құны - 11,2 миллиард теңгеге 27 денсаулық сақтау нысан құрылысы, 2025 жылға дейін Арал, Қазалы, Шиелі, Жаңақорған ауданаралық ауруханасын «Көпбейінді аудандық аурухана» деңгейіне жеткізу бойынша жұмыстар жүргізілуде.Қызылорда қаласының сол жағалауында 2,9 миллиард теңгеге облыстық қан орталығының құрылысы жүргізіліп жатса, &nbsp;қалада бір ауысымда 100 келушіге арналған емханасы бар 300 төсек орынға арналған көпбейінді ауруханасының құрылысы басталған. Аталған денсаулық сақтау нысаны құрылысы бойынша б министрлікпен тиісті жұмыс жүргізілуде. Еліміздің Премьер-министрінің орынбасары Алтай &nbsp;Көлгіновтің облысқа жұмыс сапары барысында Шиелі аудандық көпбейінді орталық ауруханасында аймақта атқарып жатқан жұмысым туралы баяндадым.Премьер министр облыстық фтизиопульмонология орталығы және облыстық психикалық денсаулық орталығы ғимаратының күрделі жөндеу жұмысымен танысып, бөлінген қаржының мақсатты игеріп, жұмысты сапалы жүргізуді &nbsp;тапсырды. Әріптестеріме ана мен бала денсаулығын &nbsp;басты назарда ұстауды арнайы ескертіп отырамын. Көп бейінді облыстық балалар ауруханасы 200 төсек орынға арналғанымен 360 төсек болып үстемемен жұмыс жасап жатқанына ерекше назар аударып, &nbsp;облыс әкіміне мән жайды түсіндіріп, мәселе қолдау тапты. Осылайша, бұрын-соңды облыста болмаған 150 төсекке арналған көп бейінді қалалық балалар ауруханасын жергілікті бюджет қаражаты есебінен ашу жұмысы жүргізілуде.Жағымды жаңалықтың бірі – жас аналарға жоғары мамандандырылған медициналық көмектің қолжетімділігін арттыру мақсатында жыл соңына дейін көпбейінді облыстық аурухана жанынан 70 төсектік босану бөлімшесін ашу жұмысы қолға алынуда.Сонымен қатар, мемлекет басшысының тапсырмасына сәйкес халықаралық стандартқа сай 200 төсектік перинаталдық орталық салу мәселесі &nbsp;пысықталып, жер учаскесі бөлінген. Ағымдағы жылы медицина ұйымдарын техникамен қамтамасыз етуге қомақты қаржы қарастырылған.&nbsp;2023 жылға &nbsp;облыс бойынша жергілікті бюджет есебінен орфандық – сирек кездесетін ауруы бар науқастарға 345 986 мың теңге қаржы қаралды. Былтырғы жылмен салыстырғанда 150 миллион теңгеге көбейіп отыр.&nbsp;<blockquote>«Медицина қызметкерлерінің біліктілігін арттыруға жергілікті бюджет қаражаты есебінен 88 160 мың теңге бөлінді. Аталған қаржының барлығы ана мен бала денсаулығын сақтау саласының игілігіне жұмсалмақ. Қажеттілікке қарай, мамандарды шет елде оқыту мәселесі пысықталуда. Республикалық мамандармен байланыс нығая түсуде. Астана қаласы ұлттық ғылыми медицина орталығының кардиохирург дәрігері Марат Мыңбаевпен облыстағы туабітті ақаумен туған есепте тұратын 62 балаға кеңес беріліп, 18 бала ота жасауға ел астанасына жолданды. Акушерлік-гинекология саласы бойынша республикалық куратор, «Акушерия-гинекология және перинатология ғылыми орталығының» дәрігері Б.Туленова облысымызға іс-сапармен келіп, медицина ұйымдарына тәжірибелік көмек көрсетті. Астана қаласындағы Ұлттық балаларды оңалту орталығының психоневрология бөлімінің меңгерушісі, невролог дәрігері А.Алимжанова көпбейінді облыстық ауруханасына келіп, «Церебральды параличте күтім ерекшелігі», «1 жасқа дейінгі балалардың жүйке-психикалық дамуы» тақырыбында дөңгелек үстел өткізілді», – дейді өңірдің бас дәрігері.</blockquote>Басқарма басшысының айтуынша, ағымдағы жылдың 24 сәуірінде өткізілген кезекті сессияда орфанды сирек кездесетін ауру түрімен сырқаттанатын облыс тұрғындарына жергілікті бюджеттен қосымша 100 миллион теңге &nbsp;бөлінген. Одан бөлек басқарма ұсынысы «Қазақстан Халқына» қорына жолданып, нәтижесінде 34 миллион теңгеге 3 науқас «Цинрайз», «Рисдиплам» препаратымен қамтамасыз етіліпті.Сондай-ақ биылғы жылы 15 төсекке арналған «Лор» бөлімшесі көп бейінді облыстық балалар ауруханасында ашылған. Лор бөлімшесінің ашылуы балалардың денсаулығын одан әрі жақсартуға жасалып отырған игілікті шара екені анық.Сонымен қатар, республика бойынша оңалтудың брендіне айналған «Қамқорлық» оңалту орталығын Арал, Қазалы, Жаңақорған, Шиелі аудандарында ауданаралық оңалту орталығын ашу жоспарланыпты. Бұл бастама өз кезегінде 5000-ға жуық ерекше балалардың тиісті оңалту шарасын тұрғылықты жерде қабылдауға мүмкіндік беретінін айтты.Басқарма басшысы Байқоңыр қаласы, Арал және Жаңақорған аудандарына жұмыс сапарымен барып, медициналық ұйым жұмысымен танысқан. &nbsp;Тұрғындармен жеке қабылдау өткізіп, ашық диалог ұйымдастырып, алыстағы ағайынның арыз-шағымын тыңдаған. Алматы және Жамбыл облыстарындағы үздік тәжірибені енгізу мақсатында Шиелі аудандық көп бейінді орталық &nbsp;ауруханасы және №6 қалалық емханасы мамандары тәжірибе алмасу және озық тәжірибені &nbsp;жүзеге асыруға жолданған.Облыс тұрғындарына травматологиялық және ортопедиялық көмек көрсетуді жақсарту мақсатында Астана қаласының №2 көпбейінді қалалық ауруханасының травматология бөлімшесінің аға дәрігері А. Кузнецовтың қатысуымен «Полижарақат» тақырыбында семинар өткізіліп, облыстың травматолог мамандары тәжірибе алмасқан.Бүгінде облыс тұрғындарына жоғары мамандандырылған медициналық көмек көрсететін ұйымдардың қажетті бағыты анықталып, «Қазақстан халқына» қорына сұраныс хат жолданған.&nbsp;Еліміздің бірқатар өңірінде медицина саласының қызметкерлеріне, оның ішінде орта буын медицина мамандарына тапшылық әлі де бар. Әсіресе, еліміздің солтүстік өңірінде медицина маманына тапшылық жоғары. Осы мәселені шешу мақсатында облыстық денсаулық сақтау басқармасының басшысының шақыртуымен 10-11 мамыр күндері аймағымызға Қостанай және Солтүстік Қазақстан облысынан арнайы құрылған жұмыс тобы келіп, медициналық жоғары колледжінің мәжіліс залында бітіруші түлектермен кездесу өткізідген.&nbsp; Басқарма басшысының төрағалығымен наурыз айының соңынан бүгінгі күнге дейін медициналық ұйымның бас дәрігерлерімен 5 облыстық штаб отырысы, 9 апталық лездеме &nbsp;өткізілген.Осы уақытқа дейін басқарма басшысының жеке қабылдауында 94 азаматтың мәселесі қаралып, алпысы оң шешімін тауып, 24-не заң аясында түсінік берілген. Қазақтың «жас келсе іске» деген ұлағатты сөзі бар. &nbsp;Халықтың денсаулығын сауықтыру мақсатында қаншама жұмыстар атқарылған. Алда атқарылар шаруа да шаш етектен дейді басқарма басшысы.&nbsp;Әрине дәрігер мамандығы – мамандық атаулы ішіндегі ең қасиеттісі, әрі абыройлысы. Дәрігерлік – аса жауапкершілікті, шыдамдылықты, өз ісіне деген сүйіспеншілікті қажет ететін ұлы мамандық. Ал аймақтың денсаулық саласының жұмысын үйлестіру басшының шеберлігін дәлелдейді.

Қызылорданың бас дәрігері денсаулық саласының стратегиялық даму жоспарын дайындауда

<a href="https://kyzylorda-news.kz/">Kyzylorda-news.kz.</a>&nbsp;Қазалы аудан орталығы – Әйтеке би кентіндегі М.Шоқай, О.Сүлейменов, Б.Бәймішев, Біржан сал көшелері тұрғындарының ұйымдастыруымен «Бірлігі бекем ел тату» атты тағылымы мол іс-шара өтті.&nbsp;Жиынға арнайы барған аудан әкімінің орынбасары Дәурен Тілеумбетов мазмұнды шараның өтуіне мұрындық болған азаматтарға ризашылығын білдірді. Сондай-ақ, аудан әкімі Мұхтар Оразбаевтың құттықтауын жеткізіп, бірқатар азаматтарды аудан әкімінің Алғыс хатымен марапаттады.&nbsp;Мұнан соң арнайы қонақ болып сырт қалалардан келген бұрынғы көше тұрғындары сөз алып, бірлігі бекем ағайынға алғысын айтты. Артынша бақилық болған жандардың рухына құран бағышталып, дұға жасалды.&nbsp;Бұдан кейін қалың көпшілік көше тұрғындарының арасында өткен гір көтеру, қол күрес және қой көтеру сынды спорттық сайыстарды тамашалады.Айта кетейік, тағылымды шарада бүлдіршіндерге тегін балмұздақ таратылды.<blockquote>«Ауызбіршілік болса, алынбайтын қамал жоқ. Бүгінгі шара осының дәлелі. Үлкен-кіші жиылып, ұйымшылдықтың үлгісін танытты. Жасөспірімдерге бұл үлгі-өнеге болды деп сенемін. Алдағы уақытта бұндай игілікті іс-шаралар жалғасын тауып, көпшіліктің есінде қалары сөзсіз», – дейді Мұстафа Шоқай көшесінің бір топ тұрғыны.</blockquote>

Қазалылықтар татулықтың үлгісін тағы бір мәрте танытты

<a href="https://kyzylorda-news.kz/">Kyzylorda-news.kz.</a>&nbsp;Барша адамзат дамуының шамшырақ тұлғасы және ел мен елдіктің, білім мен біліктің ұйытқысы – ұстаз. Әлемдік деңгейде – педагог, өз ұстанымызда ұстаз ұғымының сипаты, мән-мағынасы қашанда айқын. Ол – мазмұны бірыңғай ізгіліктен ғана тұратын кәсіп, ұрпақ пен ұлтқа, адамзат пен болашаққа арналған өмір сүру салты. Тіпті дүниенің асылын іздеп тауып, соны өзгеге үйретпекке ұмтылған жан қалауы десек те болады.Иә, оқушының оң мен солын ажыратып, әр әріптің мәнін үйретіп, тәлімді тәрбие беруде ұстаздар қауымының орны ерек. Осындай ел алдындағы жауапкершілікті сезініп, талай шәкірттің сауатын ашып, талабын шыңдап, үлкен өмірге аттандырған ұстаз Сәуле Жолдиеваның ізденіс жолын бүгін біз мақалаға арқау етпекпіз.1962 жылы Кередлі ауылында қарапайым &nbsp;отбасында дүние дидарына келген Сәуле Қалиқызы ес біліп, оң солын таныған сәттен бастап, әке жолын жалғауды мақсат тұтады. Әкесі Қали Жолдиев Кеңестер Одағы оқу ісінің озық қызметкері, қазақ тілі мен әдебиетінен жарты ғасыр білім берген ұстаз, соғыс ардагері болатын. Әке жолын жалғаған Сәуле де ғұмырнамасының 40 жылын шәкірт тәрбиелеп, білім беру ісіне арнады. Қазіргі таңда Сәуле Қалиқызы №219 Ы.Алтынсарин атындағы мектептің белді де беделді ұстазы.«Ұстазы жақсының ұстамы жақсы» деген сөз бекер айтылмаса керек-ті. Ата-анадан кейінгі балаға тәлім-тәрбие беруші ұстаз. Сәуле апайдың еңбекқорлығы мен білімділігі алдында отырған әр оқушыны тек биікке жетеледі. Өзіне зор жауапкершілік жүктелгенін сезінген маман «тәрбиесіз берілген білім нәтижесіз болады» деген принциппен жұмыс істеп, шәкірттеріне сапалы білім алуымен қатар, адамдық пен адалдықтың рухын сіңіре білді.<blockquote>«Ұстаз атанып шәкірт тәрбиелеу оңай іс емес. Өзім ұстаздық қызметке келу үшін көп талпындым. Н.В.Гоголь атындағы Қызылорда педогогика-филология факултетіне барып, қатарынан конкурстан 2 жыл құладым. &nbsp;Сөйтіп жүргенде &nbsp;аудандық комсомол комитетінің бірінші хатшысы Анафа Ақпанбетова апай &nbsp;жолдамамен №45 мектепке аға пионер вожатый етіп жіберді. Сол мектеп директоры Күлжан Жаукебаева, тәрбие ісі жөніндегі орынбасары Қали Дүйсеманов ағай мені шыңдай түсті. Яғни ұстаздық жолдың алғашқы сатысына мені тәжірибелі мамандар даярлады», – дейді кейіпкеріміз.</blockquote>Дана бабаларымыз балаға білімнен бұрын тәрбие берілуі керек екенін мұнан мың жыл бұрын айтып кеткен. Отбасы тәлімі мен елдік тәрбие – білім жүйесінің әрі өзегі, әрі айнасы. Қазақстанның отаншыл ұл-қызын оқытудың мақсаты мен мазмұны жылдан-жылға айқындалып келеді. Атап айтсақ, мақсат – бәсекеге қабілетті білімді ұрпақ қалыптастыру. &nbsp;Осы үдеден табылып, сан мыңдаан шәкірттің талабын танып, қанатын қатайтқан С.Жолдиеваның жетістіктерінің өзі бір төбе.Ұстаз еңбегі бағаланып 2016 жылы республикалық «Ұлт ұстазы» төсбелгісін кеудесіне қадады. Ізденімпаз ұстаз әр жылда жаңашылдығымен көзге түсіп, түрлі байқауларда жүлделі орындардан көрінеді. Атап айтар болсақ, 2013 жылы Республикалық «Үздік педагог-зерттеуші» ғылыми әдістемелік байқауында І орын, 2014 жылы «Менің үздік презентациялық сабағым» атты республикалық сайысында І орын, 2015 және 2017 жылы республикалық «Мәртебе.kz» білім сайты мен «Ізденіс жолы» қоғамдық қорының ұйымдастыруымен республика мұғалімдері арасында өткізілген «Менің жаңа сабағым» атты байқауға қатысып бас жүлдені иемденеді.2020 жылы Республикалық қазақ тілі пәнінен ұстаздар арасындағы олимпиадада І дәрежелі диплом алып, осы жылы Абай Құнанбайұлының 175 жылдық &nbsp;мерейтойына арналған «Ұлттың ұлы мұрасы» халықаралық &nbsp;өнер және білім фестивалінде шәкірттері жоғары нәтиже көрсеткені үшін «Үздік жетекші» атанады. Сондай-ақ, 2020 жылы &nbsp;«Ең білімді ұстаз – 2020» V &nbsp;Халықаралық пән олимпиадасының бас жүлдесін алып, төс белгісімен марапатталған. Тіпті, осы күнге дейін мыңдаған шәкірттері республикалық, халықаралық олимпиадаларда алдыңғы орындардан қара көрсетіп келеді. Мұның бәрі ұстаздың жұмысының жемісі, білім білігінің көрінісі десек те болады.Биыл 60 жасты алқымдаған ұстаз заман талабына сай өзгерістердің бәріне де бейімделіп, озық технологияның да қыр-сырын жетік меңгерген. Оған жыл сайынғы өткізген сабақтарының үздік атануы дәлел. Шәкірттері сыйлайтын, тек жақсылық ойлайтын, бедел биігінен түспеген Сәуле Жолдиеваның ұстаздық жолы осындай әдемі өрнекпен өріліп келеді. Бұл ретте Президент Қ.Тоқаевтың: «Мұғалімнің еңбегі – адамзат игілігімен астасқан өлшеусіз еңбек» деп берген бағасынан артық теңеу жоқ деп білеміз.

Білімді ұрпақ – білікті ұстаз бейнесі

Қызылордадағы қарбалас тірлік, нәтижелі жұмыс

Жаңақорғанда білікті мамандармен бірге әртараптардыру мәселелері талқыланды

<a href="https://kyzylorda-news.kz/">Kyzylorda-news.kz.</a> Бүгін, 12 маусым Қазақстанда Жалпыұлттық аза тұту күні. &nbsp;&nbsp;Президент Қасым-Жомарт Тоқаев өңірге сапарында Семейдегі орман өртінен қаза тапқан азаматтардың құрметіне 12 маусымды елімізде қаралы күн деп жариялайтынын жеткізді.<blockquote>Осы қайғылы жағдайға кінәлілердің бәрі заң бойынша жауапқа тартылады. Дүйсенбі күнін еліміз бойынша Жалпыұлттық аза тұту күні деп жарияладым. Біз қаза тапқан азаматтарды еске аламыз. Сабыр сақтап, бекем болыңыздар. Құқық қорғау органдары мен министрліктер тарапынан болсын, барлық сала бойынша тиісті шаралар қабылданады. Қазір кеңес өткіземін. Бұл жағдайдан міндетті түрде тиісті қорытынды шығарамыз, – деді мемлекет басшысы сапар барысында.</blockquote>Сондай-ақ Президент Абай облысындағы орман өртінің салдарынан адамдардың қазаға ұшырауына байланысты 2023 жылғы 12 маусымды <a href="https://el.kz/memleket-basshysy-zhalpyulttyq-aza-tutu-kuni-dep-zhariyalau-turaly-okimge-qol-qoydy_78203/">Қазақстан Республикасында жалпыұлттық аза тұту күні</a> деп жариялау туралы өкімге қол қойдыҰлттық аза тұту күні ел аумағы бойынша мемлекеттік ту төмен түсіріліп, телерадиода ойын-сауық бағдарламалар мен жарнама беру тоқтатылады.

Бүгін – жалпыұлттық аза тұту күні

<a href="https://turkystan.kz/article/184331-aldagy-kunderi-aptap-ystyk-bolady-kazgidromet/">ФОТО</a><a href="https://kyzylorda-news.kz/">Kyzylorda-news.kz.</a> Қазгидромет ел аумағында 12 маусымда болатын қауіпті метеорологиялық құбылыстарға болжам жасады.Жоғары қысым аумағы ықпалының әсерінен еліміздің басым бөлігінде жауын-шашынсыз ауа райы күтіледі, еліміздің солтүстігінде, қиыр шығысында, оңтүстік-шығысында және оңтүстігінде фронтальды бөлімдердің өтуіне байланысты, найзағай ойнап, өткінші жаңбыр жауады, бұршақ түсіп, дауыл болуы ықтимал. Республика бойынша желдің күшеюі сақталуда, оңтүстікте, батыста, орталықта шаңды дауыл, солтүстікте – тұман күтіледі.<blockquote>«Атырау, Ақтөбе облыстарының басым бөлігінде, Маңғыстау, Қостанай облыстарының оңтүстігінде қатты ыстық болады. Түркістан, Ақтөбе, Қызылорда, Маңғыстау, Жамбыл, Абай, Шығыс Қазақстан, Ақмола және Жетісу облыстарында, Атырау облысының шығысында, оңтүстігінде, Батыс Қазақстан облысының оңтүстігінде, Қостанай облысының оңтүстік жартысында, Павлодар облысының солтүстігінде, Ұлытау облысының орталығында, Қарағанды облысының оңтүстігінде, Алматы облысының солтүстігінде және орталығында төтенше өрт қауіпі күтіледі», - деп жазды синоптиктер.</blockquote>

Бірқатар облыстарда қатты ыстық болады

<a href="https://kyzylorda-news.kz/">Kyzylorda-news.kz.</a>&nbsp;Әдетте түрлі жиын-кездесулерде ауыл әкімдері мен бөлім басшылары қай ауылда қандай шара атқарылып жатқанын жіпке тізгендей баяндап береді. Бірақ бұл ауданда күрмеулі мәселенің жоқ екенін білдірмейді. Еліміз егемендік алып, еңсесін тіктеп, алтын бесігімізге қайта бақ қонған уақытта, әлі де болса көпшіліктің көкейінде келе жатқан шешілмеген шаруалар бар. Әсіресе, ауданның теріскей бетіндегі тұрғындардың түйткілді мәселесі құлағы қылтиып, шығып тұрады. Осы орайда аудан адамдарының талап-тілегін тыңдап, қаламға салмақ салдық.Жаз басталса болды ауыл баласының үйге кіруі қиын екені баршамызға аян. Әлбетте, әр баланың бақытты сәті ата-ана мейірімінен соң, осылай асыр салып ойнау. Өзінің қатарластарымен доп қуып, асық атып, еш уайымсыз жүгіру – бала үшін маңызды іс іспеттес. Алайда қараша халық «Шанхай» атап кеткен ауданның теріскей бөлігіндегі кейбір балалар ойнайтын алаң көңіл көншітпейді. Бұл туралы редакциямызға жетпісті еңсерген, газетіміздің тұрақты оқырманы &nbsp;Г.Жолдасова келіп айтқаннан соң үнсіз қала алмадық. &nbsp;Несін жасырамыз, редакцияға «Журналистика – төртінші билік» немесе «Халық пен билік арасындағы алтын көпір» деп базынасын айтып келетін тұрғындар аз емес. Оның ішінде күрмеуі шешілетін де, болмаса шешілмей тосылып қалатын мәселелер де бар. Ал осы жолы біздің назарымызға іліккен – Боранов көшесіндегі балалар алаңы. Нақтырақ айтсақ, футбол ойнауға арналған жасыл желек. Осы құрылған жалғыз доп тебер алаңға сол көшенің бар баласы келіп ойнайды. Бірі футбол, бірі волейбол ойнап жанталасып жатады. Бірақ қазір жаз мезгілі болған соң баланың бәрін бір жерде ұстап отыру мүмкін емес. Ата-аналар қанша жерден «Алаңнан шықпаңдар» десе де, сыйыспай сыртқа қарай жүгіретіндері де бар. Ал сыртқа шықса, табанына тікен кіріп, ес білмейтіндері қоқыс аралап кететін көрінеді. Себебі футбол алаңының айналасы тікенге толған. Ал қоқыс тастайтын жәшік сайлау кезінде ұшты-күйлі жоқ болған көрінеді. Сайлаудан бері қанша уақыт өтсе де, қоқыс жәшігі кімге керек болғанын ешкім түсіне алар емес.&nbsp;<blockquote>«Айтпаса сөздің атасы өледі» демей ме? Осы уақытқа дейін қолдан келгенше айтып да, істеп те жатырмыз. Бірақ ешқандай нәтиже болмай жатыр. Керісінше, өзім қойдырған қоқыс жәшігінен өзім айырылып отырмын. Айдың-күннің аманында ол кімге керек болды? Қазір балалар ойнайтын жер шашылып жатыр. Баланың иммунитеті – өте әлсіз. Жаз мезгілі инфекциялық аурулардың өршіп тұратын кезі. Ертең &nbsp;тазалық сақталмағанның кесірінен бір бала ауырса, барлық бөбекке жұғады деген сөз. Сондықтан ең біріншіден балалар ойнайтын жер таза болуы керек», – дейді Гүлнар есімді тұрғын.&nbsp;</blockquote>Осындайда «Баламның табанына кірген тікен, маңдайыма қадалсын» деген әр ата-ана баласын құшақтап, бірге далаға шығуға мәжбүр. Шықпайын десе, жаздың аптап ыстығы да күйдіріп барады. Мұндай ми қайнатар ыстықта бір мезгіл сыртқа шығып, барлығының бой жазғысы келетіні анық. Ал балаларын емін-еркін жіберейін десе табанына тікен кіріп, яки добы жарылып, ең болмағанда қоқыс шашылып әбігерге түседі екен. «Біз айналамызды жинап отыруға тырысамыз. Қоқысты ешкім әдейілеп шашпайды ғой. Кезінде қоқыс жәшігі тұрғанда барлығымыз сонда тастайтынбыз. Қазір сол баяғы орнына үйіп кетеміз. Оны кейде алып кетсе, кейде қараусыз қалып қояды» дейді есімін жасыруды өтінген теріскей тұрғыны.&nbsp;Рас, таным-түйсігі қалыптаса қоймаған бала үшін барлығы бір. Олар тіпті қоқыстың лас екенін, тікенектің табанға кірсе ашытарын білмейді. Білмеген соң барып ұрынады. Ал ересектер мұндай шарасыздықтың соңын сезіп отырып, әлден әрекетке көшкен. Ең бастысы тілегі – тазалық пен ұқыптылық. Бірақ мұның соңы «Айта, айта Алтайды, Жамал апам қартайдының» кейпін киіп қалмаса екен дейді Боранов көшесінің тұрғындары.

Тұрғындардың басты тілегі – тазалық пен ұқыптылық

<a href="https://kyzylorda-news.kz/">Kyzylorda-news.kz.</a> Бүгінде &nbsp;америкалық IT индустриядағы Мicrosoft, Apple, Amazon, Facebook, Google &nbsp;сынды алыптардың аты бүкіл әлемге мәлім. Бұл компаниялар жаһандық бизнесте үздіктердің қатарында тұр. Экономикалық дағдарысқа қарамастан, Microsoft, Apple және Amazon нарықтық капитализациясы әр компанияда 1 триллион доллардан жоғары. Салыстырмалы түрде ең ірі Уолл-стрит Банкі JPMorgan Chase-тің нарықтық капитализациясы шамамен үш есе аз, тіпті 300 миллиард долларға жетпейді. Ал&nbsp; ең ірі&nbsp;&nbsp; АҚШ-тың мұнай компаниясы&nbsp; Exxon Mobil Corporation 186 млрд долларды құрайды.&nbsp; Жоғарыда аталған екі компанияның табыс көзі IT компаниялардан шамамен 5 есе төмен, деп хабарлайды <a href="https://egemen.kz/article/343879-alemdegi-alyp-it-korporatsiyalar-kimge-qyzmet-etedi">Еgemen.kz.</a>IT-компаниялар миллиардтаған адамдармен тікелей байланыс орната отырып, бизнес, ақпарат,&nbsp; жарнама сынды әр түрлі тапсырыстармен жұмыс істеген. Сонымен қатар АҚШ құқық қорғау органдары мен барлау агенттіктері де олардың қызметіне жүгінген.Атап айтсақ, АҚШ IT-корпорациялармен тығыз байланысты 2001 жылы 11 қыркүйекте терроризмге қарсы заңнама қабылданғаннан кейін бастады. Осы өзгерістерден &nbsp;кейін америкалық мемлекеттік ведомстволар мен ұйымдардың IT-корпорациялардың дерекқорларынан жеке құпия ақпаратқа қол жеткізуінің жеңілдетілген тәртібі енгізілді. Нақтырақ айтқанда, Федералды тергеу бюросы, Орталық барлау басқармасы, басқа да барлау агенттіктері талап-хаттың негізінде сот бұйрығынсыз кез-келген ақпаратқа қол жеткізуге мүмкіндігіне ие болды.11 қыркүйекте болған &nbsp;теракттан&nbsp; 20 жылдай уақыт &nbsp;өтсе де АҚШ-тың құзыретті органдары ай сайын мыңдаған америкалықтың жеке басына қатысты мәліметтерін тексеріп отырған. &nbsp;Осылайша, 2011 жылдың бірінші жарты жылдығында билік Google компаниясына 11 057 пайдаланушы туралы 5 950 өтінім жіберді. Компания қажетті деректердің 93%-ын берген.«Халықаралық терроризмге қарсы жалпы күрес» ұранымен Вашингтон АҚШ-тың IT корпорацияларына және басқа мемлекеттерге, соның ішінде Ресей Федерациясына өтінім беруге рұқсат берді. Алайда бұл тек қағаз жүзінде ғана іске асырылды.2011 жылдың бірінші жарты жылдығында Ресейден 47 пайдаланушының деректері туралы 42 өтінім түсті. Бірақ олардың ешқайсысы қабылданбады.Бұл ретте &nbsp;Googlе компаниясына жіберілген сұраныстар туралы бес жылдық деректерді ұсынуды жөн көрдік. АҚШ мемлекеттік органдары 27 157 есептік жазбаның құпия деректеріне қатысты 12 523 өтініш жіберген, олардың 79%-ына билік қанағаттанарлық ақпарат алған.Ресей билігі 433 пайдаланушыға қатысты тек 257 өтінім жіберген, бірақ өтініштерінің&nbsp; тек 7%-ы ғана мақұлданған.Ескеретін жағдай, америкалық IT корпорациялар мен АҚШ-тың құзырлы органдары арасындағы қарым-қатынас тек бір реттік ақпарат берумен шектелмейді. &nbsp;Мемлекеттік органдардың талабы бойынша IT-корпорация объектіні ұзақ уақыт бойы тұрақты бақылауда ұстайды. Құзырлы органдар ақпаратты бір реттік алуға арналған сұрау-хатта, әдетте объектінің жазбаларын парақшасын бұғаттаудың қажеті жоқ екенін ескертіп, бақылауды жалғастыру керектігін айтады.2015 жылдың басында Wikileaks басшылығы Google-ге сайттың кейбір қызметкерлерінің бірнеше жылдық жазбалары, федералды тергеу бюросының қолына қалай түскендігін түсіндіруді талап еткен.Шетелдік баспасөз құралдарына сүйенсек, үш жылда сайттың&nbsp; үш қызметкерінің мәліметтері бақылауда болып, тексеріліп келген. WikiLeaks басшысы Джулиан Ассанж 2014 жылдың күзінде Google, &nbsp;федералды тергеу бюросы&nbsp; және басқа да америкалық ведомстволардың талабы бойынша тыңшылық &nbsp;жасағандын көпшілікке жариялады.Айта кетейік, Google, Amazon, Facebook және Apple 2019 жылдың ортасынан 2020 жылдың ортасына дейін Вашингтонның мүддесін&nbsp; қорғау&nbsp; үшін барлығы 54,5 миллион доллар жұмсады, бұл 2015 жылмен салыстырғанда 35%-ға және 2010 жылмен салыстырғанда 500%-ға жоғары.Ал Еуропаға келетін болсақ, 2011 жылы Еуропалық комиссия корпорацияны нарықтағы үстем жағдайды теріс пайдаланды деп айыптады. Атап айтқанда, ЕО-ның онлайн Google іздеу жүйесінің үлесі 90%-ды құрайды. Сондай-ақ мобильді қосымшаларды әзірлейтін еуропалық компаниялар тек Google-ге тиесілі Android жүйесін қолданады. Шетелдік ақпарат құралдарына сенсек, ЕО айыптауларын жою үшін компания Еуропалық шенеуніктерді жоғары жалақы алатын лауазымдарға жалдау арқылы сатып алу жолына түсті. Осылайша, 2011 жылы IT алыптары 18 еуропалық шенеунікпен ауыз жаласты. Бұл 2010 жылмен салыстырғанда екі есе көп. Сондай-ақ Еуропадағы Google Ұлыбританияға ерекше назар аударады. 2005 жылдан бастап алып IT компанияларға жалданған &nbsp; британдық шенеуніктердің саны кем дегенде 26 адамды құраған.&nbsp;

Әлемдегі алып IT корпорациялар кімге қызмет етеді?

<a href="https://kyzylorda-news.kz/">Kyzylorda-news.kz.</a>&nbsp;Шиелі аудандық жергілікті полиция қызметі, «Жастар ресурстық» орталығы мен аудандық білім бөлімі үшжақты келісімге келіп, кенттегі ойын-сауық отауларын аралап шығуды ұйғарған екен.&nbsp;Мақсат – жастар арасындағы құқықбұзушылықты анықтау, алдын алу және болдырмау. Тәртіп сақшыларының қолында бір парақ әлгіндей мекемелердің тізімі бар. Күн бейсенбі. Сағат тілі 23:00-ді көрсетіп тұр.Әуелі кенттің қақ ортасындағы Мұстафа Шоқай орталық алаңына аялдады. Содан соң орталық көшелердің маңына қарай жол тартты. Нәтижесінде, 23:00-ден кейін көшеде жүрген 29 жасөспірімнің ата-анасына хаттама толтырылған. Ал 3 ата-анаға толтырылған хаттама тікелей сотқа жолданып үлгерген.«Жасөспірім» жедел профилактикалық іс-шарасында түнгі көңіл көтеру орталықтарынан жас жеткіншектер табылмаған. Орталық алаңда рейдтік топтың өкілдерін көргеннен бастап тұрғындар тексеріс жүріп жатқандығы туралы таныстарына жедел хабар тарата бастағанын айтып еді… Я болмаса, бұл шынымен де, қуантарлық жағдай болып тұр.Жастар жасырынып қалды немесе жылыстап кетті деп нық сеніммен айтудан аулақпыз. Дегенменде, кейбір дәмханаларда кәмелеттік жасқа толмағандардың қызмет істейтіндігі туралы құлақ шалып қалғанымыз бар. Оның үстіне қазір мектеп оқушылары жазғы демалысқа шыққан жоқ па? &nbsp;Мұнымен қоса қоғамдық ортаны ластағаны үшін 4 баланың ата-анасына шара көрілген. Сондай-ақ қаңғыбастыққа салынып жүргені үшін 1 жасөспірім Қызылорда қаласындағы бейімдеу-оңалту орталығына жеткізілген. Қолайсыз отбасы санатындағы 4 ата-ана және 1 жасөспірім қылмыс бойынша есепке алынған.

Шиелі: Түнгі тексерулер нені көрсетті?

<a href="https://egemen.kz/article/280010-almatyda-aptap-ystyq-bolady">ФОТО</a><a href="https://kyzylorda-news.kz/">Kyzylorda-news.kz.</a> Жаз басталғалы ауа температурасы күрт жоғарылай бастайды. Мұндайда сыртқа шығудан бөлек, желдеткіші жоқ пәтерде отыру мүмкін емес. Пәтерді салқындатудың түрлі амалы бар, - деп хабарлайды&nbsp;Almaty.tv.&nbsp;Бөлмеге күн сәулесі түспеуі үшін перде іліп қойыңыз. Күндіз де пердені ашпаған дұрыс. Егер бөлмені тым қараңғы еткіңіз келмесе, сондай-ақ, кондиционерді қосқыңыз келмесе, терезелердің үстіне күннен қорғайтын жапсырма іліп қоюға болады. Бұл пәтерді қараңғы етпей, бөлменің ысып кетуінен қорғайды.Бөлмені желдетіп тұрған жөн. Бұл үшін терезені таңғы не түнгі уақытта ашқан дұрыс. Одан басқа, түнде терезе ашып ұйықтасаңыз, таң ата жауып қоюды ұмытпаңыз.&nbsp;Бөлмедегі ауаны ылғалдандырып қойған дұыс. Салқын су немесе пәтерге арналған себетін иісшығарғышты әр жарты сағат сайын шашып қойсаңыз болады.Күндіз компьютер, теледидарды пайдаланбауға тырысыңыз. Олар ауаны қыздырады.&nbsp;Тамақ істеп жатқанда ауа сорғышты пайдаланыңыз.&nbsp;Қарапайым желдеткіш алдында салқын су қойсаңыз, салқын ауа соғады.&nbsp;

Ауа желдеткішіңіз болмаса: аптаптан сақтану жолдары  

<a href="https://kyzylorda-news.kz/">Kyzylorda-news.kz.</a>&nbsp;Егін жайын айтқанда хәкім Абайдың «Әуелі Құдайға сыйынып, екінші өз қайратыңа сүйеніп, еңбегіңді сау, еңбек қылсаң, қара жер де береді, құр тастамайды» деген қанатты сөзі ойға оралады. Иә, ерте көктемнен бастап гектарлап жер жыртып, күріш егіп, оны баптап отыру да оңай іс емес. Оған қоса елімізде орын алып жатқан су тапшылығы тағы бар. Осы тұста біз шаруасы ширақ, ісі мығым «Әшірбеков» шаруа қожалығы туралы айтуға бекіндік.Ең алдымен шаруа қожалықтың тарихи құрылымын тілге тиек етсек. Бағлан Әміреұлы 1997 жылы «Әшірбеков» шаруа қожалығын құрып, азын-аулақ жерге жоңышқа егіп, үй жағдайындағы малдың азығын дайындаудан бастайды. Азын-аулақ жерге Сыр маржанын егіп бастаған қожалық бүгінде 300 гектар жерге күріш, 300 гектарға жоңышқа, 50 гектарға бидай егеді. Жыл сайын Сыр салысын өсіруде тәжірибе жинақтап, егіс көлемін де жылдан-жылға ұлғайтуда. Өткен жылы шаруа қожалық маңдай тердің арқасында күріштен 50-60 центнерден өнім жинаған.Ерте көктемнен басталатын тірлік қара күзге дейін тынымсыз бейнетпен жалғасады. Шаруа қожалықтың жұмысына Бағлан Әміреұлы басшылық етеді. Ол 30 адамды тұрақты жұмыспен қамтып отыр. Диқандыққа бет бұрған қожалықтың жұмысшылары түрлі ауыл шаруашылық техникаларын тізгіндейді. Қазіргі уақытта «Әшірбеков» шаруа қожалығында 30-ға жуық техника бар. Биыл егіс алқабына күріштің «Маршал» сорты егіліп, көктемгі дала жұмыстарын толықтай бітірген. Тағы бір айта кетерлігі, шаруашылық иелігінде 2018 жылы салынған құны 250 млн теңге болатын күріш ақтау цехы жұмыс істеуде. Цех тәулігіне 60 тонна күріш өңдейді. Ал, зауытта 12 адам тұрақты жұмыс істейді.Бүгінде «Әшірбеков» шаруа қожалығы күріш егумен қатар мал асылдандырумен де айналысады. Жалпы қожалық иелігінде 3500 қой, 124 сиыр бар. Мұнда малды асылдандыру бағытында жүйелі жұмыс атқарылуда. 125 бас ақбас сиыры бар. Сондай-ақ, қожалықта 100 басқа арналған мал бордақылау алаңы жұмыс істейді. Онда 50 шақты малды, ет бағытындағы қазақтың ақбас бұқаларын бағып, асылдандырумен айналысады.«Еңбегімен ер сыйлы, өнбегімен жер сыйлы» демекші, Бағлан Әміреұлы тынымсыз тірліктің, ақ пейілді, жомарт жүректігімен ауданға аты шыққан азамат. Ауданда тұрмысы төмен отбасыларға және мүмкіндігі шектеулі жандарға азық-түлік пен күріш тарту етіп, әр уақытта көмек қолын созып келеді. Міне, Бағлан Әміреұлының азаматтық мәрттігі оның үнемі қайырымдылық шаралардың басынан табылуы жеңісті де, жемісті іс деп білеміз. Осындай игілікті істерімен 2012 жылы ауданның мәслихат депутаты, «Ерен еңбегі үшін» медалі, «Құрмет белгісі» орденінің иегері, «Тәуелсіздіктің 10 жылдығы» төсбелгісімен қатар Ауыл шаруашылығы министрінің «Құрмет» грамотасымен марапатталған арда азамат. Бұл құрметтің бәрі – игілікті істердің нәтижесі.Иә, еңбектену қашанда береке мен ризықтың бастауы. Ал адал кәсіп жасау – адам болмысының туған жер, өсіп-өнген өлкесіне деген азаматтық ұстанымын қалыптастырады. Қашанда елім деген азаматтың ертеңі жарқын, болашағы айқын болары сөзсіз. Біз жазып отырған сөздің мағынасын өмірдің өзі дәлелдеуде. Елінің үмітін, халқының сенімін арқалаған арда азамат қана тығырықтан тарықпай шығып, тындырымды тірлігімен биік белесті бағындырады.

Қазақстан және Қызылорда облысының жаңалықтары