<a href="https://kyzylorda-news.kz/">Kyzylorda-news.kz</a> &nbsp; &nbsp;«Жақсы мұғалім – мектептің жүрегі» деген Ы.Алтынсариннің осынау қанантты сөзі ұстаздың &nbsp;мектепте, оқушылар өмірінде қандай маңызға ие екенін аңғартып тұрғандай. &nbsp; Бұл – бұлжымас қағида. Себебі мектепке керегі – білімді, өз мамандығын жетік меңгерген шебер мұғалім. Ұстаз Ержан Жанбосынов еңбек жолын №131 орта мектепте бастап, 21 жылдан бері дене тәрбиесі пәнінен сабақ беріп келеді. Тәжірибелі ұстаз әрбір сабағын ұлттық құндылықтармен толықтырып, ерекше әдіс пайдалануды дәстүрге айналдырған.Білім ошағында оқушыларға эстетикалық тәрбиенің негізі – дене тәрбиесі сабағында қаланады. Бұл сабақты бас­тауыш сыныптан бастап жоғарғы сынып оқушыларының барлығы дерлік жақсы көретіні анық. Өйткені еркіндікті, қозғалысты қалайтын жас буын 45 минуттың ішінде соның бәрінен өтеді десек артық айтқандық болмас. Сондықтан әрбір сабағына жіті дайындықпен келуді мақсат еткен ұстаз оқушымен өткізетін әрбір минутын тиімді әрі бала денсаулығына пайдалы етуге күш салады.<blockquote>– Дене тәрбиесі сабағында өсіп ке­ле жатқан жеткіншектердің қимыл-қозға­лысын дамытумен қатар, еңбекке деген жұмыс істеу қабілетін арттыруға көңіл бөлеміз. Негізінен дене тәрбиесі ұғымы – дене мәдениеті дегенді білдіреді. Біз­дің де мақсатымыз – мәдениетті, еңбек­сүйгіш ұрпақты тәрбиелеу. Күнұзақ компьютерге немесе ұялы телефонға байланып отыруға бейім келетін оқушыларды сабақ кезінде серпілтіп, спортқа деген қызығушылығын арттыруға тырысамыз. Ауыл балалары ұлттық ойын десе ішкен асын жерге қояды. Ұлдар асық ойнаса, қыздар бесасықты шебер ойнауға машықтанып келеді. Арқан тартысты да қызыға ойнайды. Қазір осы бірнеше ұлттық ойын түрлері сабақ бағдарламасына енген. Үздік оқушыларды түрлі жарыстарға шығарамыз. Ал спортқа жақын баланың бойын­да патриоттық сезім, эстетикалық тал­ғам болады. Мұғалім ретінде дене жаттығу­ларын жасауды, күн тәртібіне бағынуды, спорттық үйірмелерге қатысуды талап етеміз, – дейді тәжірибелі ұстаз Ержан Жанбосынов.</blockquote>Ұлағатты ұстаз дене тәрбиесі мен спорттың маңызын арттыруда қазақтың ұлттық ойындарындағы қимылдарды пайдалану арқылы баланың дене қимыл сапасын және қабілетін жан-жақты дамытуды көздейді. Бұл оқушылардың шыдамдылық, төзімділік, бір топта жұмыс істеу дағдысын қалыптастырады.Мұғалім мамандығын жүрек қалауы­мен таңдап, оқушыларға білім мен тәрбие беруде жетістіктерге жеткен ұлағатты ұстазды әріптестері мақтаудан гөрі онымен мақтануды жөн көреді. Мектеп басшылығы жас та болса кәсіби шеберлігі мықты ұстаздың ізденімпаздығына дән риза.<blockquote>– Еліміздің болашағы бүгінгі мектеп қабырғасындағы ұрпақ екені даусыз. Бүгінде білім саласындағы өзгерістерге ілесу – ұстаздарымыздың біліміне, кәсіби шеберлігіне көп байланысты. Жас та болса тәжірибелі ұстаз атанған Ержан мектепте оқып жүрген кезінде-ақ өзінің білімге құштар екенін дәлелдеген. Үздік аттестат иегері ретінде педагогикалық мамандықты таңдап, жоғарғы білімді маман ретінде біздің мектепте алғашқы еңбек жолын бастады. Ізденімпаз мұғалім түрлі сайыстарда, халықаралық турнирде, спартакиадаларда жүлдегер атанып, біліктілігі мен тәжірибесі артты. Қазіргі кезде оқушыларды ұлттық спортқа баулуда жетістіктерге жетіп келеді, – дейді мектеп директоры А.Әлиева.</blockquote>Спорт шеберлігіне үміткер дәрежесі бар ұстаз соңғы 3-4 жылдың көлемінде көптеген жетістікке жетті. Мәселен, 2019 жылы асық ату спортынан Қазақстан Респуб­ликасы чемпионатында, 2021 жылы халықаралық турнирде үшінші орын, 2023 жылы Тараз қаласында ұстаз­дар арасында өткен спартакиадада асық атудан екінші орын, 2024 жылы Атырау қаласында осы спорт түрінен өткен турнирде бірінші орын алып, ұстаз мерейі үстем болды. Білікті педагог 2023 жылы облыстық білім басқармасының «Құрмет грамотасын» алды. Өз пәнінің үздігі атанған ұстаз оқушыларды спортқа баулып, облыстық, аудандық сайыстарға қатыстырып, жүлделі орын алғаны үшін диплом, алғыс хатпен марапатталды. Оқушысы Ғибрат Зайдағали облыстық спартакиадада асық ату спортынан екінші орын алып, мектеп, ұстаз абыройын асқақтатты.<blockquote>– Бала кезімізде күнұзақ асық ойнап, ләңгі тебетінбіз. Футболды да ойнаймыз. Сол дағдымыздан әлі күнге дейін алшақтаған емеспіз. Қазір оқу бағ­дарламасына ұлттық ойындар енгі­зілуде. Қазақтың баласы асық атпаса, қыздар бесасық ойнамаса ұлттық құндылығымыздың дәрежесі қандай бол­мақ?! Жалпы балалардың арасында ұлттық ойынға деген қызығушылық бар. Сондықтан ұлттық спортқа баулуды дене тәрбиесі сабағы кезінде тиімді пайдаланамыз, – дейді Ержан Жанбосынов.</blockquote>Шебер мұғалімнің бүгінгі ізденісіне көз сүйсінеді. Ол кәсіби шеберлігін арттыруда қазіргі заман талабына сай жаңашылдыққа ұлттық құндылықты дәріп­теу арқылы келді. Оның талпынысы мен үздіксіз ізденісі дәрежесін арттырды.Ержан Самыратұлы ұлағатты ұстаз болумен қатар жұбайы Нұргүлмен бірге бес бала тәрбиелеп отырған бақытты отбасы.&nbsp;

Ержан Жанбосынов: Ұлттық спортқа баулуды дене тәрбиесі сабағы кезінде тиімді пайдаланамыз 

<a href="https://kyzylorda-news.kz/">Kyzylorda-news.kz</a> Ұлттық бұйымдарды заманауи стильмен сәйкестендіріп ұсынуға, күнделікті образдарға қоса білуге де ептілік пен талғам керек. Он саусағынан өнері тамған қазалылық Нұрбану Сағырбек – кәсіби білім алмаса да, тәжірибе мен талғамы арқылы түрлі ұлттық әшекейлер мен тақияға тапсырыс қабылдап жүрген қолөнер шебері.Қыз баласын ерекше қадірлеген қазақ халқы бойжеткеннің бұрымына тағатын әшекейіне де көңіл бөлгені белгілі. Әсіресе, екі үзбелі етіп, күмістен соғылған шолпы қазақ қызының қадірі мен құрметін одан әрі арттыра түскен. Ұлттық әшекейге бүгінгі қоғамның да сұранысы жоғары.<blockquote>– Зергерлер бұдан басқа да шаш салпыншағын – шашбауды, сондай-ақ білезік, жүзік, сырға, қапсырма, ілгек, сәукеле әшекейін, түйме мен түрлі түйреуіш жасаған. Қазір де көптің талғамы мен сұранысына ие болған шашбау – қыз-келіншектер тағатын сәндік әшекей бұйымның бірі. Әйел шашының ажарын аша түсіп, өрілген бұрымның ұшын бекіту үшін алтын, күміс тиындар, кейде маржан қадалған бұйым таққан. Оны түркі халықтары ежелден қолданып келеді. Бір жағынан бұл бұйым шаштың өсуіне ықпал етеді.Ал сырға тағу барлық елдің дәстүрінде бар. Қазақы нақыштағы сырғада ою-өрнек пен ұлттық бояу қанық. Сондай-ақ ұзатылатын қызға алдымен сырға салу дәстүрі де қазірге дейін жалғасып келеді. Ассортиментте шашбау, шекелік, тақия, шолпы, алқа, сырға бар, – дейді кәсіпкер.</blockquote>Әйтеке би кенті «Арзан» базарында орналасқан қолөнершінің жұмыстарын Instagram әлеуметтік желісінде @kazaly_ruchnaya.rabota парақшасынан да көріп, танысуға, онлайн тапсырыс беруге болады. Тұрақты тапсырыс берушілері мен өз аудиториясын жинай білген қолөнершінің айтуынша, әшекей бұйымдарды жасау аса қиындық тудырып, ұзақ уақыт алмайды.<blockquote>– Дайын фурнитураларды біріктіріп, ұлттық әшекейлерді құрастырамын. Атадан балаға жалғасқан өнер десек болатын шығар. Анам – қолөнерге жақын адам. «Шеше көрген тон пішер» дейді қазақ. Менің қолымнан шыққан ұлттық әшекейлерге қызығып, үйренгісі келетін қыздар да көп. Олардың да дайын фурнитураларды арнайы алдырып, қиялына қарай қанат бітіруіне болады. Әрине, қолдың ептілігі мен шыдамдылық қажет. Әшекей жасау емес, тігін бойынша курс өткізу ойымда бар. Алдағы уақытта жақсылап жоспарлап алып кіріссем деймін.Ұлттық әшекей бұйымдарға Қазалы қаласының өзінен, ауылдарынан, тіпті, өзге қалалардан тапсырыс берушілер де бар. Онлайн тапсырыс қабылдау арқылы осы жылы көбіне өзге қалаларға әдеттегіден де мол сырға мен шашбау дайындадым. Мен секілді қолөнермен айналысатын, қазақы әшекейлерді ұсынатын кәсіпкерлер көп. Тіптен, жыл сайын саны артуда. Сондықтан бағаны арзан, халықтың қалтасына қонымды етіп ұсындым. Ең арзан баға деп танылып, адамдар бір-бірінен естіп білді ме, биыл тапсырыс бірнеше есе артты. Наурыз мерекесі мен Ұлттық киім күні қарсаңында тақия мен қазақша корсеттер де сатылымнан түспеді. Кәсіпте береке бар деп жатады. Ал мен маңдай тердің мерейі дер едім, – дейді ол. &nbsp;</blockquote>

Қолөнер – ұлт қазынасы

&nbsp;<a href="https://kyzylorda-news.kz/">Kyzylorda-news.kz</a>&nbsp;Қазақстанда болып жатқан су тасқыны – табиғаттың өзгеруімен тікелей байланысты. Бұл бізде ғана емес, бүкіл әлемде болып жатқан құбылыс. Мысалға &nbsp;Сауд Арабиясында, Қытайда бұрын-сонды болмаған бұршақ жауып, қар түсті. Еуропа елдерінде де АҚШ-та да су тасқыны болып, табиғи катаклизмдер жиілеуде.&nbsp;Күннің күрт жылынуы мен құрғақшылыққа әкелетін аптап ыстық осымен де байланысты. Сондай-ақ, өткен күзде еліміздің солтүстік, батыс, шығыс аймақтарында жаңбыр көп жауған. Осыған байланысы топырақтағы ылғал сіңіп үлгермеген. Еліміздің солтүстк аймақтарында жердің беті &nbsp;2,5 метрге дейін қатқан. Салдарынан еріген қар суы жерге сіңбей, жердің бетімен кетіп жатыр. Бұл табиғи апат. Тосыннан келген табиғи апатты тоқтатуға барлығымыз бірдей атсалыссақ, бұл күндер де артта қалар, уайымымыз жоғалар. Бастысы - адамдарымыз аман болсын. Қалғаны орнына келер.&nbsp;Сондай-ақ, ел басында отырған азаматтарымыз барлығын бақылауда ұстап отыр және суға кеткен үйлердің шығынын өтеп беруге жұмыстар жасайтынын мәлімдеді. Арнайы комиссия құрылды. Ендігі жерде бір жағадан бас, бір жеңнен қол шығарып бірлігімізді көрсетуіміз керек. Сонда ғана барлық қиындықтың артта қалатыны сөзсіз. Бірлігі бекем елдің болашағы жарқын деген. Алла халқымызға сабырлық берсін!Ғани Бұрханов, Қызылорда облыстық ҚХА жанындағы&nbsp; Кәсіпкерлер қауымдастығының мүшесі. &nbsp;

Ел болып біріксек бұл қиындықты да еңсереміз

<a href="https://kyzylorda-news.kz/">Kyzylorda-news.kz</a> 7 сәуір – Дүниежүзілік денсаулық күніне орайластырылған кең көлемдегі акция барысында жастар денсаулық орталығы және салауатты өмір сүру салтын қалыптастыру мамандары аудан көлемінде салауатты өмірді қалыптастыруда біршама іс-шаралар атқарды. Атап айтар болсақ, Фейсбук әлеуметтік желісіндегі мекеменің және Жастар денсаулығы орталығының ресми парақшалары тақырыпқа сай көркемделіп, пайдалы ақпараттар легі орналастырылды.Қармақшы аудандық аурухананың, Бастауыш Кәсіподақ Ұйымының, Жастар денсаулығы орталығының фейсбуктегі ресми парақшаларында профилактикалық ақпараттық бағыттағы (скринингтік тексерулерге, басқа да профилактикалық іс-шараларға) «Ашық есік» күніне шақырулар хабарланды.Жосалы кентіндегі Ү.Томанов атындағы №183 орта мектеп оқушылары арасында «Біз біргеміз!» спорттық эстафеталық сайыс өткізілсе, басқа мектептерде тақырып аясында оқушылармен семинар-тренингтер өтті. Ал ІІІ Интернационал ауылындағы №108 орта мектептің мәжіліс залында ата-аналар арасында тақырып барысында сала мамандарымен семинар өтті.Денсаулық мектептерінде «Темекі шегудің алдын алу, темекі шегуден бас тарту тәсілдері», «Дене белсенділігін арттыру» тақырыптарында семинар-сабақтар өткізіліп, тренингтер жасалды. Орта медицина қызметкерлері арасында семинар-сабақ өтіп, эпидемиолог дәрігердің, ПӘК кабинеті дәрігерінің дәрісі оқылды, тренингтер жасалды.Медициналық мамандардың қатысуымен аудандық емхана ауласында «Менің денсаулығым – менің құқығым» атты флешмоб өтті. Қармақшы аудандық емхана дәрігер-мамандары Денсаулық күні қарсаңында Диагностикалық медициналық кешені автобусымен ауылдарға барып, тұрғындарды &nbsp;медициналық тексерулерден өткізді.Сондай-ақ, «Салауатты өмір салтын ұстанатын Қазақстан азаматтарының үлесін» анықтауда адамдардан электронды сауалнамалар алынды. Ақпараттық танымдық материалдар, (инфографикалар, парақшалар, буклеттер) таратылып, ілінді, пайдалы кеңестер берілді.Ауыл тұрғындарына, өз денсаулығын нығайтуда салауатты өмір салтын ұстанудың маңызы, зиянды әдеттерден арылу жолдары насихатталып, ер азаматтар арасында «Темекісіз өмір» тренингтері жасалды. Келушілермен спорттық жаттығулар мен ойындар, жарыстар &nbsp;ұйымдастырылды.«Салауатты қала» жобасына сай аудандық емхананың орта буын медицина қызметкерлері(ерікті жастары) &nbsp;емхана ауласына 65 түп ағаш көшеттерін отырғызып, экологияның жақсаруына, жасыл желектің көбеюіне үлкен үлес қосты.6-сәуірде Қармақшы Аудандық Орталық Аурухана қызметкерлері жаппай сенбілікке шығып, ауданды көркейтуде, көшелердің тазалығын сақтауда белсенділік танытты.Денсаулық күні акциясына байланысты аудандық орталық &nbsp;алаңдағы және емхана дәлізіндегі LED-мониторларда «Денсаулық аралы», &nbsp;салауатты өмір салты туралы бейнероликтер апта көлемінде &nbsp;үздіксіз халық назарына ұсынылды.Халықты өз денсаулықтарына жауаптылықпен қарап,нығайтып, салауатты өмірді таңдаудың пайдасымен сауаттандыру, ақпараттандыруда жастар денсаулық орталығы, салауатты өмір салтын қалыптастыру мамандарының жұмысы алдағы уақытта да тоқтамақ емес. &nbsp;

Қармақшылық ақ халаттылар Дүниежүзілік денсаулық күнін атап өтті

<a href="https://kyzylorda-news.kz/">Kyzylorda-news.kz</a> &nbsp; ҚР халық әртісі, әнші Димаш Құдайбергеннің сахналық костюмі аукционға шығарылды. Бұл туралы<a href="https://stan.kz/kyni-2-million-tenge-dimash-kydaybergennin-kostyumi-auk-398129/"> Stan.kz</a> ақпарат агенттігі хабарлайды.Әншінің костюмі Dauletten қайырымдылық қоры ұйымдастырған ауызашарда сатылған. Сатылымнан түскен қаражат су тасқынынан зардап шеккен халыққа көмек ретінде жіберіледі.“Димаштың костюмін үйге алып кеттім. Еліміздің мақтанышы Димаш Құдайбергеннің концертке киген костюмін сатып алуға мүмкіндік болады деп ойламаппын. Бірақ менің қолымда сол костюм тұр. Осыдан бірнеше күн бұрын Дәулет Мұқаевтың қайырымдылық шарасына шақырту алдым. Он жылдан бері таныс болғандықтан, қайырымдылық шарасынан қалмайын деп шештім. Қорға 1 млн теңге аударамын деп бардым. Себебі, бар ақша Батыс Қазақстанда су тасқынынан зардап шеккен халыққа кетеді. Ауызашарда қайырымдылық іс-шара болды. Сонымен қатар Батыс Қазақстандағы халыққа ақша жинау мақсатында, аукцион өтті. Аукционда басты экспонат – Димаш Құдайбергеннің костюмі. 1 млн теңге жоспарлап барғанымен, аукцион басталған сәтте баға одан асып кетті. Соңында осы костюмді 2 млн теңгеге сатып алдым" , – деді Еркебұлан Әріпбай есімді азамат.Желі қолданушылары кәсіпкер жігітке ризашылығын білдіріп, жарыса пікір жазып жатыр.“Димаштай ұлдың әкесі болыңыз!”, “Керемет іс-шара екен”, “Ұлыма сіздер жолмен жүруді нәсіп етсін!”, “Ниеттерің қабыл болсын!”, “Дүниежүзіне танымал Димаштай дарынды тұлғаның елі суға кетіп жатқаны өкінішті”, “Біз батыспен біргеміз”, – жазды оқырман қауым.Еске салайық, еліміздің суға кеткен өңірлеріне танымал тұлғалар көмек қолын созып жатқанын жазған едік.&nbsp;Фото: Видеодан скриншот

"Құны – 2 миллион теңге": Димаш Құдайбергеннің костюмі аукционда сатылды

<a href="https://kyzylorda-news.kz/">Kyzylorda-news.kz</a> &nbsp;Бүгін Сырдария аудандық мәслихатының мәжіліс залында ҚР Парламенті Сенатының депутаттығына кандидаттар Н.Байқадамов, А.Есмаханов, А.Жүнісов сырдариялықтармен кездесті. Кездесуге аудандық мәслихат депутаттары, ардагерлер, ауданның зиялы қауым өкілдері мен жастар қатысты. Басқосуды аудандық мәслихат төрағасы Е.Әжікенов ашып, жүргізіп отырды.<blockquote>– 2024 жылғы 6 наурызда ҚР Орталық сайлау комиссиясының отырысы өтті, онда 2024 жылғы 25 сәуірге Қазақстан Республикасы Парламенті Сенатының Қызылорда облысынан шығып қалған депутатының орнына сайлауды тағайындау туралы мәселе қаралды. Сондай-ақ осы Сайлауды дайындау және өткізу жөніндегі негізгі іс-шаралардың күнтізбелік жоспары бекітілді. Сайлау заңнамасына сәйкес, Сенат депутаттары жасырын дауыс беру арқылы жанама сайлау құқығы негізінде сайланады. Жанама сайлау құқығы Парламент Сенатының депутатын сайлауға дауыс беруге тек сайлаушылар – мәслихат депутаттары ғана қатысатынын білдіреді. Кандидаттарды ұсыну мәслихаттардың сессияларында, сондай-ақ өзін-өзі ұсыну тәртібімен жүзеге асырылады. Өз өкілдері арқылы мәслихаттарда кандидаттарды саяси партиялар мен қоғамдық бірлестіктер ұсынуға мүмкіндігі бар екендігі туралы өздеріңіз де хабардарсыздар. Бүгінде өзін-өзі ұсыну тәртібімен облыс бойынша үш азамат тіркелді. Бүгін кандидаттар ауданымызға келіп, арнайы кездесу ұйымдастыруда, – деген Ержан Ертарғынұлы елдің әлеуметтік-экономикалық дамуындағы Сенаттың, Сенат депутатының рөлі мен маңызы туралы айтып, кандидаттардың өмірбаянымен таныстырды. Мұнан соң кандидаттар кезектілікпен сөз сөйлеп, бағдарламаларының басым бағыттарына тоқталды.</blockquote>Сенат депутаттығына кандидат Н.Байқадамов елдің дамуына үлес қосу – әр азаматтың абыройлы борышы екеніне назар аударып, саяси маңызы бар реформалардың жүйелі жүзеге асуына атсалысу мен Сыр өңірінің өсіп-өркендеуіне лайықты үлес қосуды азаматтық міндеті санайтынын айтты. Ал Сенат депутаттығына кандидат А.Есмаханов елдің әлеуметтік-экономикалық дамуындағызаң шығару билігін жүзеге асыратын ең жоғары өкілді орган Сенаттың маңызы туралы кеңінен айтып өтті. Бағдарламасының басым бағыттарын түсіндіріп, осы уақытқа дейін жинақтаған білімі мен тәжірибесін елге қызмет етуге арнайтынын жеткізді. Өз кезегінде Сенат депутаттығына кандидат А.Жүнісов бағдарламасының өңірдегі өзекті мәселелерді шешуге бағытталғанын айтып, ел дамуының өзекті мәселелеріне тоқталды.Кездесуде аудандық ардагерлер кеңесінің төрағасы М.Келдібаев, аудандық әйелдер кеңесінің төрайымы Ұ.Жаналиева, аудандық қоғамдық кеңес төрағасы М.Еспенбетов, аудандық мәслихат депутаты Е.Жақып сөз сөйлеп, кандидаттарға сәттілік тілеп, өз пікірлерін білдірді.Кездесуді қорытындылаған Е.Әжікенов депутаттық қызметтің жауапкершілігі жоғары екенін тілге тиек етіп, аймақ үшін өзекті мәселелердің байыпты шешілуіне үлес қосуға шақырды. Кездесуден кейін Сенат депутаттығына кандидаттар аудан орталығында салынып жатқан «Руханият» орталығының құрылысымен танысты.Айта кету керек, ҚР Парламенті Республиканың заң шығару билігін жүзеге асыратын ең жоғары өкілді органы болып табылады. Парламенттің өкілеттігі оның бірінші сессиясы ашылған сәттен басталады және жаңа сайланған Парламенттің бірінші сессиясының жұмысы басталғанда аяқталады. Парламент тұрақты негізде жұмыс істейтін екі Палатадан, яғни Сенат пен Мәжілістен тұрады.&nbsp;

«Руханият» орталығының құрылысымен танысты 

<a href="https://kyzylorda-news.kz/">Kyzylorda-news.kz</a> Бүгін аудан әкімі Берік Сәрменбаевтың төрағалығымен әкімдік отырысы өтіп, 2 мәселе қаралды.Күн тәртібіндегі мәселелер қаралмас бұрын Берік Әбдіғаппарұлы аудан әкімі аппаратының ұйымдастыру және инспекторлық жұмыс бөлімінің басшысы міндетін атқарып келген Азамат Жұмабековтың басқа қызметке ауысуына байланысты аудан дамуына қосқан үлесі үшін ризашылығын білдіріп, «Алғыс хат» табыс етті.Сондай-ақ, отырыс басында аудан әкімінің 2024 жылғы 1 сәуірдегі №56 өкімімен аудан әкімі аппаратының персоналды басқару қызметі (кадр қызметі) бөлімінің басшысы лауазымына тағайындалған Ербол Бөлебаев таныстырылды.Әкімдік отырысында бірінші мәселе – «Аудан бюджетінің кіріс көздерін ұлғайту» туралы аудан бойынша мемлекеттік кірістер басқармасы басшысының орынбасары Бақытжан Ордабаев хабарлама жасады.Аудан бойынша ағымдағы жылдың 1 сәуірдегі жағдайы бойынша мемлекеттік бюджет болжамы 1664,9 млн. теңге болып бекітілсе, 1 тоқсанда бюджетке 2076,8 млн. теңге түсім қамтамасыз етіліп, 124,7%-ға артығымен орындалған. Ал жергілікті бюджет жоспары 123,6%-ға орындалып отыр. Б.Ордабаев салық базасын ұлғайту бойынша жасалған талдау жұмыстары нәтижесін атап көрсетті.Аудан әкімі салық базасын ұлғайтуға жауапкершілікпен қарау керек екенін жеткізді.<blockquote>– Бюджетті тиімді жоспарлау арқылы экономикамызды ілгерілетеміз. Осыған байланысты аймақ басшысы Нұрлыбек Машбекұлы Нәлібаев салық базасын ұлғайтудың барлық көздерін қарастыруды қатаң тапсырды. Осы ретте, бюджет түсімінің өсімі бірінші кезекте жеке бизнес қызметін заңдастыру, инвестиция тарту, нақты салықтық базаны анықтау арқылы қамтамасыз етіледі. Сондықтан қосымша кірс көздерін іздестіріп, межелі түсімдерге қол жеткізу қажет. Ол үшін кент және ауыл әкімдері, жауапты мамандар өз құзыреті шегінде аудан бюджетінің кіріс бөлігін толықтыруға аса жауапкершілікпен қарауы қажет, – деді Берік Әбдіғаппарұлы.</blockquote>«Тереңөзек кенті әкімдігінің атқарған жұмыстары және алдағы міндеттері туралы» екінші мәселе бойынша Тереңөзек кентінің әкімі Ержан Бахтияров хабарлады. Өткен жылы аудан орталығында «Майжарма» каналын, «Сыр сұлуы» монументін абаттандыру, А.Иманов көшесіндегі көпкабатты үйлердің қасбеттерін жаңарту, көшелерді жөндеу, жарықтандыру және басқа да ауқымды жұмыстар атқарылған. Ал бүгінде аяқ сумен қамту үшін «Айтбай арық» каналын қазу, «Тереңөзек тазалығы» мекемесі құрылып, санитарлық тазалық жұмыстары жүргізілуде. Биыл да ауқымды жобалар жүзеге асырылмақ.Аудан басшысы Тереңөзек кентін көркейту бағытында жоспарланған жұмыстарды уақытылы атқаруды, жастарды мемлекеттік бағдарламалар арқылы жұмыспен қамтуды тапсырды.Мұнан соң отырыста көктем мезгіліндегі жыл сайын Конго-Қырым геморрагиялық қызбасына қарсы залалсыздандыру және мерзімді әскери қызметке шақыру жұмыстарын ұйымдастыру бойынша тапсырмалар берілді.Сондай-ақ, көгалдандыру және санитарлық тазалыққа бағытталған «Таза Қазақстан» акциясына белсенді қатысу керектігі айтылды.Күн тәртібіндегі мәселелер бойынша хаттамалық тапсырмалар берілді.

Берік Сәрменбаев: Бюджетті тиімді жоспарлау арқылы экономикамызды ілгерілетеміз

<a href="https://kyzylorda-news.kz/">Kyzylorda-news.kz</a> &nbsp;Бүгін «AMANAT» партиясының «Қарызсыз қоғам» жобасы аясында ЖОО мен колледж студенттері және жас мамандар қаржылық сауаттылықты арттыру курсының кезекті аптасын бастады.Мемлекет басшысы Қасым-Жомарт Тоқаев Қазақстан халқына Жолдауында азаматтардың қаржылық сауатын арттырудың маңызын атап өткен еді. Соған байланысты «AMANAT» партиясына Үкіметпен бірлесіп «Қарызсыз қоғам» жобасының ауқымын кеңейтуді тапсырған болатын. Бұл жоба қазақстандықтардың қаржылық сауатын ашуына мүмкіндік береді. Бұған дейін жоба аясында қаржылық сабақа алығы келген біршама қызылордалықтар арнайы курстан өткен. Жалпы биыл еліміздің барлық 20 өңірінде 200 мың адамды оқыту жоспарлануда. Сондай-ақ мектеп, колледж және жоғары оқу орнына арналған әдістемелік құралдар әзірленеді. Бұл шамамен 100 мың студент пен 450 мың оқушыны қаражатқа неғұрлым жауапты қарауға үйретуге мүмкіндік бермек.Ал өткен аптада Қызылорда қаласында жоба бойынша кезекті оқу курстарынан өткен азаматтарға сертификат табысталды. Онда аталған жоба шеңберінде ЖОО мен колледж студенттері, жұмыссыз жастар қаржылық сауаттылығын арттыру курсынан өткен болатын.Жалпы жоба бойынша Қызылорда қаласынан жыл соңына дейін 1620 азаматты оқудан өткізу жоспарланған.

«Қарызсыз қоғам» жобасының кезекті оқу аптасы басталды

<a href="https://kyzylorda-news.kz/">Kyzylorda-news.kz</a> &nbsp;Қазіргі таңда Сырдария өзеніндегі су деңгейі тұрақты. Сала мамандарының айтуынша, облыс аумағында су тасқынынан қауіп жоқ. Дегенмен, қазіргі су жағдайы салаға жауаптылардың күнделікті бақылауында. Бүгін Өңірлік коммуникациялар қызметінің ақпарат алаңында Сырдария өзеніндегі су деңгейі туралы айтылып, облыстағы су тасқынының алдын алу шаралары сөз болды.<blockquote>– Бүгінде Шардарадан жоғары орналасқан су қоймаларындағы жинақталған судың көлемі - 12,205 млрд текше метрді құрап отыр. Бұл өткен жылмен салыстырғанда - 812 млн метр кубқа кем. Шардара су қоймасындағы су көлемі 4 749 млн метр куб болса, қоймаға түсіп жатқан су көлемі секундына - 414 метр куб, ал төменге тасталып жатқан су көлемі секундына - 300 метр куб болып отыр. Сонымен қатар, Көксарай су реттегішіндегі су көлемі - 1 497,11 млн метр кубты құрап отыр. &nbsp;Жергілікті атқарушы органдар мен су шаруашылық ұйымдары бірлесіп, Сырдария өзеніндегі су деңгейіне күнделікті мониторинг жұмыстарын жүргізуде, - деді Арал-Сырдария бассейндік инспекциясының басшысы Қайратбек Сәрсенбаев.</blockquote>Қазіргі таңда Шардара су қоймасы мен Көксарай су реттегішінің жұмыс кестесі бақылауға алынды.<blockquote>– Облыс аумағында 6 су қоймасы бар. Оның бесеуі Жаңақорған ауданында болса, біреуі Аралда орналасқан. Бұл су қоймаларының екеуі, яғни Бесарық пен Жиделі су қоймасы республикалық меншікке тиесілі болса, үшеуі (Қыраш, Манап, Көлтоған) облыстық коммуналдық меншікте, ал, Құмсай су қоймасы Арал аудандық коммуналдық меншігіне кіреді. &nbsp;Барлық су қоймайларында су тасу қаупі жоқ. Біз су жағдайын күнделікті бақылауда ұстайтын боламыз,- деді облыстық табиғи ресурстар және табиғат пайдалануды реттеу басқармасы басшысының орынбасары Қайрат Жансұлтанұлы.</blockquote>Бүгінде су қоймалары жеткілікті түрде сумен толтырылған.<blockquote>– Облыс аумағындағы Сырдария өзенінде мұз толық ұстасты. Мұздың орташа қалыңдығы 15-30 см аралығын құрады. Ал, биыл облыс ауағында ауа райының жылы болуы себебінен 1 наурыздан 20 наурыз дейін Сырдария өзені мұздан толық тазарды. Өзенде сең жүру кезінде су деңгейінің төмендігі, ұстасқан мұздың қалыңдығы өткен жылмен салыстырғанда 1,5-2,0 есеге дейін жұқа болды. Сол себепті де су шаруашылығы нысандарына және елді мекендерге қауіп төнген жоқ. Қазіргі таңда Қызылорда облысы аумағында су тасқынынан қауіп жоқ. Ахуал тұрақты. Бүгінгі күні егістікке су алу науқанының жақындауына байланысты филиал тарапынан жерге дән себілгенге дейін шабындық жайылымдықтарды суландыру жұмыстары қарқынды жүргізіліп жатыр, - деді «Қазсушар» РМК Қызылорда облысы филиалы директорының орынбасары Айдос Асанбаев.</blockquote>

 Сырдария өзеніндегі су деңгейі бірқалыпты

<a href="https://kyzylorda-news.kz/">Kyzylorda-news.kz</a> &nbsp;Өндірістік және қайта өңдеу компанияларының кешені болып табылатын Қазақстандағы ірі агроөнеркәсіптік холдингтің бірі – Olzha Agro.&nbsp;Жалпы жер көлемі 960 000 гектарды құрайтын өндірісте өсімдік, ауыл, мал шаруашылығы жұмыстары жүргізіледі. Тақырыпқа арқау болсын деп Olzha Agro холдингінің бас агроном маманы Бағдат Талғатұлымен сұхбаттастық.–&nbsp;Бағдат&nbsp;мырза,&nbsp;қоғам&nbsp;арасында&nbsp;ауыл&nbsp;шаруашылығын&nbsp;тек&nbsp;трактор&nbsp;жұмысымен&nbsp;теңестіретін&nbsp;пікір&nbsp;қалыптасқан.&nbsp;Сіз үшін ауыл шаруашылығы нені білдіреді?<blockquote>– Ауыл шаруашылығында жұмыс істейтін маман немесе кәсіпкер жауапкершілікті сезінеді. Бұл салада тек ақша табу емес, елдің астық бөлігін қамтамасыз ету мақсатында үлкен жұмыстар атқарылуда. Иә, дұрыс айтасыз. Шаруашылықтан алыс жандар саланы тек трактормен байланыстырады. Бұл – қате пікір. Мысалы, Olzha Agro холдингінде техникадан бөлек жеті мың қызметкер бар. Егіннің топыраққа егіліп, өнім ретінде толыққанды өсуі, қайта өңделуіне дейін арнайы мамандар атсалысады. Трактор – ол техника, ауыр жұмыс жасайтын құрал. Ал техниканың әр бөлшегін жинайтын, жұмыс барысында трактордың алқапқа кіруі, дұрыс бағытта жүргізілуі, жылдамдығы – адамның жауапкершілігінде. Жауапкершілік дегенім, егер алқап аумағында трактордың жылдамдығы сағатына 8 шақырым емес, 11-12 шақырымды құраса сапасыз өнімнің өсуіне алып келеді. Ауыл шаруашылығы – үлкен білім, еңбек және тәжірибе.</blockquote>– Olzha Agro холдингінің негізгі бағыты – өсімдік шаруашылығы. Сапалы дәнді дақыл алу үшін қандай инновациялық әдіс немесе технология қолданылады?<blockquote>– Компанияда «үздіксіз даму» қағидасы қалыптасқан. Жылдан жылға, айдан айға даму жолдарын іздейтін, жұмыс сапасын жақсарту бағытында құрылған арнайы бөлімдер бар. Біріккен жұмыстың нәтижесінде біздің әр қадамымыз цифрландырумен байланыстырылған. Жоғарыда айтқан тракторды алайық. Әр тракторға gps орнатылған. Ұялы телефон немесе компьютердің көмегімен техниканың қай алқапқа барып, қандай жолмен жүргенін бақылай аламыз. Жұмыс 1C бағдарламасымен жүргізіледі Дәнді дақылдарға келсек, ауыл шаруашылығында қандай инновациялық өзгерістер бар, холдингта барлығы қолданылады. Бүгінде егілген егіннен бастап, себу, жинау барысында жаңа жобалар қолданылуда.</blockquote>– Сыр өңірінде су тапшылығы мәселесі жиі кездеседі. Қостанай облысында су жағдайы қандай?<blockquote>– Иә, Қызылорда облысында су тапшылығы мәселесі бар. Бізде егін саласы болғандықтан дәнді, майлы дақылдар үлкен аумаққа егіледі. Егін өсіру кезінде біз табиғи жолды қолданамыз. Яғни, жауын-шашынның көмегімен өседі. Алайда соңғы 3 жылда жаңбыр мөлшерінің азаюы салдарынан құрғақшылық мәселесімен бетпе-бет келдік. Жауынның пайдасы мен зияны қатар жүреді. Әр өсімдіктің фазасы бар. Сол кезеңде жауған жаңбыр өсімдіктің өсуіне ықпал етсе, артық ылғал немесе басқа фаза кезіндегі су дақылды жоюы мүмкін. Компания 10 жыл бұрын 30-40 центнер өнім алса, бүгінде өнімнің орташа көлемі 15 центнерді құрайды. Бұл мәселемен күресу мақсатында жаңа тәсілдерді жүзеге асыруымыз қажет. Қар тоқтату техникасы арқылы жағдайды жақсартуға болады. Қыс мезгілінде жауған қарды толығымен алқаптың басында ұстап қалу жұмысы дұрыс жасалса, топырақтың ылғалдануына мүмкіндік беріледі.</blockquote>– Өнім сапасының жоғары болуы жер құнарлылығына тікелей байланысты. Егіске берілген нысан қанша мәрте қолданылады?<blockquote>– Холдингтегі алқаптар үш мәрте қолданылады. Үш-төрт жыл жерге егін егіледі және бір жыл демалады. Егін саласында нысанды қолдануға байланысты ұғымдар бар. Біз 3 жылдық әдісті қолданудамыз. Алдағы уақытқа 7 жылдық әдісті қарастырудамыз.</blockquote>–&nbsp;Егін егу мен егін жинау процесінің арасы қанша уақыт? Өнім жинауға қандай техника ұжымдастырылған?<blockquote>– Егу мен жинауда көптеген фактор әсер етеді. Теория жағынан бидайдың жетілуі 92-93 күнде жүзеге асады, майлы дақылдарға келетін болсақ, зығырдың жетілуіне 70-100, жасымыққа 80-100 күн қажет болады. Практика барысындағы басты фактор – ауа-райы. Жазда егілетін бір жылдық дақылдарға температура маңызды рөл атқарады. Мамыр айында егін басталса, шілде айында ауа-райы ысиды. Ондай жағдайда кей дақыл ерте піседі. Теория мен практикада айырмашылық бар.</blockquote>–&nbsp;Ауыл шаруашылығы маусымдық жұмыс. Әр мезгілде атқарылатын жұмыстарды сипаттап берсеңіз.<blockquote>– Маусымдық жұмыс ол қате пікір. Мамыр айының бесінен бастап күнбағыс, ал он бесінен бастап барлық дақылдар егіледі. Егіннен кейін химиялық жұмыстарға кезек келеді. Сол уақытта жерді демалдыру процесі жүреді. Бұл жұмыстар қатарынан жасалып, тамыз-қыркүйек айына дейін жалғасады. Бір жақта трактор жұмысы, екінші бөлікте “авагро” бүріккіштердің жұмысы жүреді. Алқаптың көлемі ауқымды болғандықтан химиялық процесс үздіксіз атқарылады. Әр “авагро” күніне 300 гектар жерде жұмыс істейді. Жер жырту процесі кезеңдер бойынша өтеді. Жерді дискілеу, культивациялау, терең қопсыту, арамшөптерден тазарту және тағы басқалары. Егін жинау тамыз- қыркүйек айының соңына дейін жүреді. Әр дақыл түрлі уақытта жиналады. Қазан айында келесі жылдық жоспар құрылады. Қыс мезгілінде қар тоқтату жүреді. Осылайша көктем айының басында ылғалды жабу жұмыстары атқарылады. Сондықтан шаруашылықты мезгілдік жұмыс деуге келмейді. Жұмыс циклі үздіксіз, жыл бойы жүреді.</blockquote>–&nbsp;Ауыл шаруашылығында қандай үлкен мәселе кездеседі?<blockquote>– Бұл саладағы еңбек өтілім – 5 жыл. Әр жылдың мәселесі келесіге ұқсамайды. 5 жылда 5 түрлі жағдайға жолықтым. Алғашқы мәселені шешіп, тиімді жолдарын қарастырғанда, келесі жылы мүлдем басқа қиындық келеді. Бір жағынан бұл жақсы. Себебі мәселелердің шегі тоқтағанда біз барлық шешімге дайын боламыз. Негізгі қиындықтар қатарына жауынның мөлшері, құрғақшылық, 2023 жылы көбейген шегіртке мен алқапты таптап өтетін сайғақтарды айтуға болады.</blockquote>–&nbsp;Бүгінде қандай агрономды жақсы маман деп санауға болады? Бұл салаға жастарды көбірек қызықтыру үшін не істеу керек?<blockquote>– Агрономия саласында білім мен практика қатар жүруі тиіс. Химияның мөлшерін қате есептеудің өзі миллиондаған шығынға әкеледі. Сондықтан әр қадамыңды соңғы шешім секілді қабылдаған абзал. Жақсы агроном жерді сезе білуі және мамандығын құлшыныспен жасай алуы қажет. Олжа Агро – өз саласында көшбасшы компаниялардың бірі. Ұдайы дамудың нәтижесінде холдинг жылдам өсуде. Сол себепті мамандар тапшылығы да бар. Бірақ агро саладағы бүгінгі жастардың мәселесі ауылдық аймақта жүргенді қаламауы. Компанияда жас мамандардың тәжірибе жинауы үшін қарастырылған жастар практикасы бағдарламасы бар. Бағдарлама арқылы практикалық дағдысын арттыруды қалайтын жастарды күтеміз!</blockquote>– Сұхбатыңызға рақмет!

Сырбойылық жас агроном: білім мен практика қатар жүруі тиіс

<a href="https://kyzylorda-news.kz/">Kyzylorda-news.kz</a> &nbsp;Бүгін қала әкімдігінің баспасөз орталығында Қызылорда қаласы бойынша Мемлекеттік кірістер басқармасы басшысының орынбасары Ашраф Жүсіпов жалпыға бірдей декларациялау туралы баяндады.2024 жылдың 1 қаңтарынан бастап жалпыға бірдей декларациялаудың 3-ші кезеңі басталды. Үшінші кезеңде заңды тұлғалардың басшылары мен құрылтайшылары және олардың жұбайлары, сондай-ақ дара кәсіпкерлер және олардың жұбайлары 2024 жылдың 15 қыркүйегіне дейін декларация ұсынуға міндеттелген. Декларацияларды «Салық төлеушінің кабинеті», «Электрондық үкімет» порталы, сондай-ақ «App Store» немесе «Play Market»-тен арқылы «e-Salyq Azamat» және «eGov mobile» мобильді қосымшаларын жүктеу арқылы тапсыруға болады.<blockquote>– «Жеке тұлғаның активтері мен міндеттемелері туралы декларациясы» (250.00-нысан) жеке тұлғалардың ҚР-ның шегінен тыс жерлерде жылжитын, жылжымайтын мүліктердің, банктік шоттардың, ҚР-дағы немесе одан тыс жерлердегі тұрғын үй құрылысына үлестік қатысу туралы келісім, заңды тұлғаның жарғылық капиталына қатысу үлесі, туынды қаржы құралдары, инвестициялық алтын, зияткерлік меншік объектілері, авторлық құқық, жеке тұлғаның екінші деңгейлі банктен бөлек дебиторлық және кредиторлық берешектерін көрсетуге және бағалау құны айлық есептік көрсеткіштің 1000 еселенген мөлшерінен асып кеткен жағдайда жеке тұлғаның қалауы бойынша басқа мүлік көрсетілуі мүмкін. Жеке тұлға активтер мен міндеттемелер туралы декларацияны табыс еткен жылдан кейінгі жылдан бастап жыл сайын кірістер мен мүлік туралы декларацияны (270.00-нысан) табыс етеді», – деді Ашраф Шағдатұлы.</blockquote>ҚР-сының Салық кодексінде белгіленген мерзімде жеке тұлғаның активтері мен міндеттемелері туралы және жеке тұлғаның кірістері мен мүлкі туралы декларациясын ұсынбаған жағдайда алдын ала ескерту беріледі. 1 жыл ішінде қайталап жасалған әрекеттер 15 айлық есептік көрсеткіш мөлшерінде айыппұл салуға әкеп соғады.Айта кету керек, 2025 жылдан бастап азаматтардың барлық санаттары декларация тапсыратын болады. Жалпыға бірдей декларациялау бойынша сұрақтар туындаған жағдайда жеке тұлғалар 1414 нөмірі бойынша бірыңғай байланыс орталығынан кеңес ала алады.

Қызылордада жалпыға бірдей декларациялаудың үшінші кезеңі басталды

<a href="https://kyzylorda-news.kz/">Kyzylorda-news.kz</a> Астрономдар 8 сәуірде Астана уақытымен сағат 23:17 шамасында Күннің толық тұтылатынын мәлімдеді. Бұл туралы Stan.kz ақпарат агенттігі “Московский планетарий” басылымына сілтеме жасап хабарлайды.Мамандардың мәліметінше, Ай мен Күннің тұтылуы – екі апта уақыт айырмашылығымен жарты жылда бір рет болатын құбылыс. Ай толғанда ай тұтылады, жаңа ай туғанда күн тұтылады. Мұндай құбылыс кезінде Ай, Күн мен Жер бір қатарға тұрады. Егер ортада Жер тұрса, Ай тұтылады. Ал ортада Ай тұрса, Күн тұтылады.8 сәуірдегі Күн тұтылуы кезіндегі Жерден Айға дейінгі арақашықтық – 353 321 шақырым. Ал Ай көлеңкесінің орташа ұзындығы 373 320 шақырым болады. Айдың көрінетін диаметрі Күн дискісінің көрінетін диаметрінен 1,0566 есе үлкен болғандықтан Ай Күн бетін толығымен жабады.Тұтылу координаталары солтүстік ендік 25,3° және батыс бойлық 104,1° болатын нүктеде максималды мәніне жетеді. Әсерлі сәтті Жер тұрғындары 4 минут 28 секунд тамашалай алады. Айдың жер бетіндегі көлеңкесінің ені 198 шақырымға дейін жетеді.Күн тұтылған сәтте адамдар Күннің “тәжін” көре алады. Тәж Күн дискісінің, жұлдыздардың және Күнге жақын орналасқан, Аймен толығымен жабылған планеталардың айналасында сәулелі ореол сияқты жарқырайды.Аталмыш құбылысты көбіне “Америкалық тұтылу” деп атайды. Себебі тұтылудың әр түрлі фазаларын АҚШ-та жиі байқалады.Айта кетейік, Күннің толық тұтылуына АҚШ пен Канадада, Тынық мұхиты мен Атлант мұхитындағы кейбір арал тұрғындары куә болады. Бұған дейін жеке фазалар Солтүстік және Оңтүстік Америка, Орталық Америка, сонымен қатар Тынық және Атлант мұхиттарынан және Батыс Еуропадан да көрінетіні туралы жазған едік. Күннің тұтылуын көзі нашар көретіндер де, зағиптар да бақылай алады.&nbsp;Фото: pixabay.com

Қазақстан және Қызылорда облысының жаңалықтары