<a href="https://kyzylorda-news.kz/">Kyzylorda-news.kz</a> &nbsp;Аудан орталығынан шалғайда орналасқан Іңкәрдария ауылындағы клуб үйі жанынан ашылған «Ұлттық би» үйірмесінің мүшелері Шымкент қаласынан ақжолтай жаңалықпен оралды. Өнерімен көпшілікті тәнті еткен би ұжымы республикалық балар өнер байқауында топ жарды. «Сұлу-ай» шығармашылық өнер орталығының шәкірттері бірнеше би ұжымы арасында үнді биімен І орынды жеңіп алды.Аталған байқауда даралана білген іңкәрдариялықтар Өзбекстан елінде өтетін халықаралық өнер байқауына жолдама алды.<blockquote>– Біздің шәкірттеріміз сенім үдесіне шыға білді. Біз Шымкент қаласында өткізілген байқауға ұзақ уақыт дайындық жүргізген болатынбыз. Күнделікті балалардың қабілетін шыңдау арқылы жоғарғы жетістікке қол жеткізгеніме дән ризамын. Ортақ абырой жолында аянбай еңбек ете береміз. Алдағы уақытта Ташкент қаласында жүзеге асатын өнер байқауына қатысып, жүлделі атану үшін дайындықты күшейтеміз. Әрине, шалғайдағы ауыл балалары мемлекет тарапынан көрсетілген қолдауды ерекше сезініп келеді. Осы уақытта шығармашылық шыңына шығу үшін барымызды сала береміз. Қашанда орталық басшысы мен ата-аналардың қолдауын ерекше сезінеміз, – деді «Ұлттық би» үйірмесінің жетекшісі Әйкерім Жұмабекова.</blockquote>Бұл ретте, үйірме жетекшісі Әйкерім Жұмабекова арнайы «Алғыс хатқа» ие болды.

Халықаралық байқауға жолдама алды

<a href="https://kyzylorda-news.kz/">Kyzylorda-news.kz</a> «AMANAT» партиясының қалалық филиалының «Халық» бастауыш партия ұйымына қарасты «Атамекен» балалар ауылында 1 мамыр – Қазақстан халқының бірлігі күніне арналған мерекелік іс шара өтті.Отбасылық үлгісіндегі балалар ауылы жетім және ата-ананың қамқорлығынсыз қалған балаларға сапалы біліммен қатар саналы тәрбие беруге бағытталған мекеме. Бүгінде қалашықта 3 пен 18 жас аралығындағы 54 бала тәрбиеленуде. Сонымен қатар мұнда түрлі ұлт өкілдерінің балалары да мекен етеді. Олар орыс тілімен қатар қазақ тілін де жетік меңгерген.Шара барысында тәрбиеленушілерге профориентолог Сағынова Жазира «Жаңа әлемдегі жаңа мамандықтар» тақырыбы туралы айтып берді. сондай-ақ 8-11 сынып оқушыларына осы бағытта тренинг ұйымдастарды. Ал «Болашақ» бағдарламасының түлегі, магистр Ердібек Маржан шетелде білім алу бойынша кәсіби кеңес берді.Кеш қонақтары оқушылардың сұрақтарына жауап беріп, пікір алмасты. Сондай-ақ профориентолог Сағынова Жазира мамандық таңдау бойынша кеңес қажет ететін оқушымен тегін жеке жұмыс жасайтынын жеткізді.Бұдан бөлек шара барысында тәрбиеленушілер әннен шашу шашып, мың бұрала билеп, көпшілікке көтеріңкі көңіл күй сыйлады.

«Атамекен» балалар ауылында 1 мамыр мерекесі тойланды

<a href="https://kyzylorda-news.kz/">Kyzylorda-news.kz</a> Сүйіншілейтін жаңалық, Шиелі ауданында кәсіпкерлік саласы күннен күнге ұлғайып, даму көрсеткіші еселеніп келеді. Соңғы уақытта тұрғындар жеке бизнес ашып, өз кәсібін өрлетуге жан-жақты күш салуда. Бұл бағыттағы шағын және орта кәсіпкерлік саласының даму барысы мен алдағы міндеттері туралы Шиелі аудандық кәсіпкерлік, өнеркәсіп бөліміне байланысқа шығып, қажетті мағлұматтарды алдық.Шиелі аудандық кәсіпкерлік бөлімі берген мәліметтерге сүйенсек, 2023 жылдың 1 қыркүйекте тіркелген шағын және орта кәсіпкерлік субъектілерінің саны – 7 340 бірлікті құрапты. Ашып айтқанда, оның ішінде 563 заңды тұлға болса, 4697 жеке кәсіпкер, 2042 шаруа қожалығы болып табылады. Жұмыс жасап тұрған шағын орта кәсіпкерлік субъектілерінің саны 7040 бірлікті құрап, 2022 жылмен салыстырғанда 129,6 пайызды құрады. Белсенділік көрсеткіші 132,6 процентке жеткені тағы бар. Бұл шежірелі өлке үшін қуанарлық көрсеткіш десек те болады.&nbsp;Шағын және орта кәсіпкерлікте өсім бар ма?Иә, жоғарыдағы көрсеткіш бойынша өткен жылы Шиелі ауданының бюджеті айтарлықтай толықты деуге негіз бар. Аудандағы табыскер жандардың еңбекқорлығының арқасында шағын кәсіпкерлік субъектілерінің өнім шығарылымы 50 миллард 350 миллион теңгені құраса, жұмыспен қамтылғандар жандардың саны да өскен. «Бизнестің жол картасы – 2025» мемлекеттік бағдарламасы – бұл бұрын беймәлім болып келген бизнес әлемінің қыр-сырын толыққанды меңгертуге септігін тигізетін бағдарлама. Жұмыс істеймін деп талпынған жандарға кәсіптің аз емес екені белгілі. Әсіресе, табиғаты тамылжыған Шиелі ауданында ауыл шаруашылығы саласында мүмкіндік аз емес. Ата кәсіп мал бағып, алтын дән тербетуге әбден болады. Халыққа қызмет көрсету саласында да сұраныс жетіп артылады. Осы ретте, мемлекет тарапынан зор көмек көрсетіліп отырғанын айта өткен жөн. Шиелі ауданында аталған бағдарлама аясында өткен жылы 247 жобаға 3 миллард 739 миллион теңге қаржы қаралған.Тарқатып айтар болсақ, «Ұлттық жоба аясында» бизнесті дамыту және қолдау мемлекеттік бағдарламасы аясында субсидиялау бағыты бойынша – 55 жобаға 1 млрд 981 млн теңге көлемінде несие қаражат бөлінген. Ал &nbsp;«Наурыз-Дем» НС» ЖШС арқылы 22 жоба – 661 млн теңге, Қызылорда Өңірлік инвестиция орталығы арқылы 42 жоба – 243 млн теңге, Ауыл шаруашылығын қаржылай қолдау қоры 33 жоба – 649 млн теңге, «Ұлттық жоба» аясында грант қаражаты – 74 жоба 102 млн теңге, Жастарға 2,5 пайызбен шағын несие қаражатын беруге – 21 жоба 93,5 млн теңге, «Ауыл аманаты» жобасы бойынша ауданнан 479 жоба қаралып, оның 409 жобасы бақылау кеңесіне дайын, құны 1 млрд 687 млн теңге, сонымен бірге 9 жобаға 69,7 млн теңге көлемінде қаржылай қолдау алыпты.Сауда-саттықтың жайы қалай?Өткен жылы Шиелі ауданында бөлшек сауда көлемі 7 млрд 097 млн теңге өсіп, 2022 жылмен салыстырғанда 105,5 пайызды құрап отыр. Ауданда сауда-саттық және туризм саласы бойынша жобалық құны – 2 млрд теңгені құрайтын 10 жобаның құрылыс жұмыстары бастау алған. Аталған 10 жобаның құрылысын тарқатып айтар болсақ, «Әбдіманап базары» ЖШС-ның сауда дүкенінің құрылысына жалпы құны – 70 млн теңге бөлініп, алдағы уақытта 10 жаңа жұмыс орны ашылатын болады. Дәл осындай сауда «Ерас» ЖК-ның көлік жуу орталығына құны – 70 млн теңге, «Асия» ЖК-ның көлік жуу орталығына құны – 50 млн теңге, Жантаев Нұржан сауда орталығына құны – 200 млн теңге қаржы бөлінген. Ал, «Болашақ &nbsp;комфорт» ЖШС-ның «Тұран» қонақ үйінің қосымша құрылысына – 50 млн теңге, «Мирас» ЖК-нің жол бойы сервистік қызмет көрсету кешеніне құны – 400 млн теңге, «Даму» ЖК-нің бизнес орталығына құны – 150 млн теңге, «Керимова» ЖК-нің «Мята» тамақтану орнына құны – 110 млн теңге, «Халықберді» ЖШС-ның «Халықберді» клиникасының құрылысына құны – 200 млн теңге, «Әбдіманап базары» ЖШС-ның 3 қабатты сауда үйінің құрылысына жалпы құны – 700 млн теңге қаржы бөлінген. Осы аталған жобалар іске қосылғанда жағдайда жаңадан 270 адам тұрақты жұмыспен қамтылатын болады.&nbsp;Осындай мемлекеттік бағдарламалар талабы бар жанның табысын еселеп, өз кәсібін дөңгелетуге мүмкіндік берсе, екінші жағынан ел ішіндегі жұмыссыздықтың азаюына септігін тигізбек. Алдағы уақытта да ілкімді іске ұйытқы болатын шаруалар өз кезегімен жалғаса бермек.

Шиелі ауданының кәсіпкерлік саласында өсім бар

<a href="https://kyzylorda-news.kz/">Kyzylorda-news.kz</a>&nbsp; Қармақшы аудандық білім бөліміне қарасты жалпы білім беру ұйымдарының 8-11 сынып оқушылары арасында әкім кубогы үшін «Жаңа күн – жаңа Қазақстан» тақырыбындағы аудандық пікірсайыс турнирі өткізілді.&nbsp;Оқушылар арасындағы пікірсайыстың негізгі мақсаты – білім алушылардың бойында азаматтық ұстанымды, өзінің және қоғам алдында өз іс-әрекеттері үшін жауапкершілікті қалыптастыру, елде байқалатын өзекті жағдайларды талдау, аудандық пікірсайыс қозғалысын дамыту, насихаттау және қолдау, пікірсайысшылардың өзара ынтымақтастығын қалыптастыруға бағытталды. Тартысты өткізілген дебат турнирінің нәтижесінде: 1-орынды №121 мектеп «Фаворит» фракциясы иеленсе, 2-орынға №250 мектеп-лицейі «Жақсы пікір» фракциясы жайғасты. Ал эжүлделі 3-орынды №85 мектеп «Азимат» фракциясы еншіледі. Сонымен қатар, «Үздік фракция» номинациясын Шоқан Уәлиханов атындлағы №26 орта мектеп, «Үздік спикер» номинациясы Зарина Исақай иеленді. №27 мектептің оқушысы Диля Мирамбекқызы «Үздік оратор» номинациясы алса, №277 мектеп-лицейі «Дебаттық креатив» номинациясы, №113 мектеп «Дебат болашағы» номинациясын № 79 мектеп-лицейі иеленді.Пікірсайыс соңында Қармақшы аудандық Жастар ресурсық орталығының директоры Нұржұман Пірназаров жеңімпаз атанған оқушыларға аудан әкімінің арнайы кубогын табыстап, бағалы сыйлықтар берді.&nbsp; &nbsp;

Қармақшыда әкімінің кубогы үшін  аудандық пікірсайыс турнирі өткізілді

<a href="https://kyzylorda-news.kz/">Kyzylorda-news.kz</a> Алтай мен Атыраудың арасын жайлаған ұланғайыр жерімізге тағдырдың айдауымен сан ұлт өкілдері қоныс теуіп, алмағайып кезеңде бақытын қазақ даласынан тапты. Олар жергілікті халықпен біте қайнасып тіршілік етіп, тілі мен дінін, дәстүрін бойға сіңірді. Досқа құшақ ашқан дархан жүрек қазақтың аялы алақанының арқасында өзгелік көрмей өмір кешті. Теңізбен тағдырлас біздің өлкеге бір кездері теңізден маржан сүзуге жан-жақтан сан ұлт өкілі ағылған еді. Ал қазір тағдыры аралдық азаматпен тоғысқан өзге ұлттың арулары Аралға келін болып бақытты күн кешуде. Солардың бірі – Жақсықылыш кентінің тұрғыны Айнұр Эдилбаева.Айнұрдың жолдасы Темірхан Сүйеуовпен жарасымды шаңырақ болғанына жиырма жылға тарта уақыт болды. Айнұр қырғыз ұлтының өкілі. Жақсықылыштық жігіт Темірханмен Алматы қаласында жұмыс істеп жүріп танысқан. Жарасым тапқан екі жас көп ұзамай шаңырақ көтереді. Осылай 2005 жылы Жақсықылыш кентіне келін болып түскен Айнұр қазірде елге сіңісіп кеткен. Ағайын-туыспен, көршімен тату тірлік кешіп алты баланы өмірге әкелді.&nbsp;<blockquote>– Бұрынан «Қырғыз, қазақ бір туған» деген халық санасында қалыптасқан жақсы мәтел бар. Екі ел тіліміз бен дәстүріміз жағынан да алыс емеспіз. Алматыда еңбек етіп жүргенде қазақ тілін жетік меңгеріп алғанмын. Келін болып алған табалдырық аттаған кезімнен бастап мені қайын жұртым жылы қабыл алды. Ауылдастар да өз қамқорлықтарын танытып жатты. Әрине мұнда жаныма жақын туысым мен бауырымның жоқтығы, төркінімнің алыстығы алғашқы жылдары сезілді. Бірақ жанымдағы жақсы адамдардың арқасында мен қазақтардың ортасына сіңіп кеттім. Қазір ауылдастардың бірімен әпкем, бірімен сіңілім, енді бірімен туған бауырымдай араласып тұрамын, – дейді Айнұр.&nbsp;</blockquote>Бұл отбасы ел ішінде қажырлы еңбегімен танылып жүрген жандар. Алты баланы адам етіп жеткізу жолында олар адал еңбек етіп, өз кәсіптерін дөңгелетіп отыр. Отағасы Темірхан 15 жылдан бері шаштараздық кәсіпті меңгеріп, кенттегі тұрғындарға қалтқысыз қызмет атқарып келеді.&nbsp;Ер азаматтың табысқа кенелуінің артында әйелдің алып күші мен ақылы жататындығы белгілі. Темірханның жары Айнұр да өмірге перзент әкеліп, оларды тәрбиелеу ісімен айналысып, ерінің бабын келістіре білді. Сонан соң өзі де кәсіп ашып, жолдасына болысуды ойлады. Себебі қазіргі күні алты бала да есейіп, мектепке барып әжептәуір қолғанат болып қалған. Сондықтан да ол жақында көлік жуу орнын ашқан.&nbsp;<blockquote>– Ауылда жоқ, халыққа қажет деген кәсіпті қолға алуды ойладым. Солай көлік жуу орнын ашсам деген ой келді. Себебі қазір ауылдағы әрбір үйде жеңіл көлік бар. Оларды арнайы орында жуғанды бәрі қалайды. Осылай «Атамекен» кәсіпкерлер палатасында арнайы курстан өтіп, кәсіп ашудың, жоспар жасаудың қыр-сырын меңгердім. Өткен жылы қайтарымсыз грант негізінде қаржы алуға құжаттарымды тапсырып көргенмін. Мемлекет менің жобамды қолдады. Осылайша гранттық қаржыға қол жеткізіп кәсібімді бастап кеттім, – дейді Айнұр.&nbsp;</blockquote>Шаруа әйелінен кәсіпкер ханымға айналған Айнұр мұның бәрі балаларымның несібесі деп Тәңірге шүкіршілік айтады. &nbsp;Қазірде тірлігі түзу отбасын ел құрметтейді. Жаңа кәсіптерінің де тасы өрге домалай бастаған.&nbsp;Тірліктің көзін тауып, адал еңбекпен ұрпағын өсіріп отырған отбасы мұнымен тоқтап қалмай енді кілем жуу орталығын ашсақ деген жоспарларының да бар екендігін айтып қалды. &nbsp;Міне, қыз баласын жат жұрттыққа жаратқан Тәңірдің жазуымен Арал топырағына келін болып келіп, «өзге елдің қызы едім» &nbsp;деп өгейсімей, қазақ балалардың ардақты анасына айналып отырған Айнұр &nbsp;Эдилбаева қазір өнген жерін жердің жәннатына балайды. Әйел бақытын тапқан мекенді ең құтты қонысым деп санайды.

Аралға келін атанған қырғыз қызы

<a href="https://kyzylorda-news.kz/">Kyzylorda-news.kz</a> &nbsp; Мемлекет басшысы Қасым-Жомарт Тоқаев 2020 жылы 1 қыркүйектегі «Жаңа жағдайдағы Қазақстан: іс-қимыл кезеңі» атты Жолдауында отбасылық-демографиялық ахуал &nbsp;зор алаңдаушылық тудырып отырған мәселе екенін айтып, нақты міндеттер жүктеген еді.«Өкінішке қарай, Қазақстанда әрбір алтыншы отбасы бала сүйе алмай отыр. Сауалнама көрсеткендей, отандастарымыздың 20 пайызға жуығы мұны ажырасуға негіз болатын елеулі себеп деп санайды. Біріккен Ұлттар Ұйымының еліміздегі халық санының өсіміне қатысты болжамы Орталық Азиядағы көршілес мемлекеттермен салыстырғанда көңіл көншітпейді. Үкіметке 2021 жылдан бастап «Аңсаған сәби» арнаулы бағдарламасын жүзеге асыруды тапсырамын. Экстракорпоральды ұрықтандыру бағдарламалары бойынша бөлінетін квота санын 7 мыңға дейін, яғни 7 есе көбейту қажет» деп нақты тапсырма берді.Осылайша 2021 жылдан елімізде қосалқы репродуктивті технологиялардың көмегімен отбасылық-демографиялық проблемаларды шешуге жәрдемдесу мақсатында «Аңсаған сәби» арнаулы бағдарламасы іске қосылды.Облыстық денсаулық сақтау басқармасының мәліметіне сүйенсек, 2021 жылы аймаққа 281 квота бөлініп, толық игерілді. Сол жылы ЭКҰ арқылы 119 бала туып, 3 отбасында егіздер дүниеге келді. Ал 2022 жылы бағдарлама бойынша 277 квота бөлінсе, былтыр &nbsp;274 квота берілген. Биыл бөлінген квота саны – 270.Ал бағдарлама әзірленгенге дейін аймаққа бөлінетін квота саны тым төмен болған. Мәселен, &nbsp;2015 жылы &nbsp;34, 2016 жылы &nbsp;35, 2017 жылы 38, 2018 жылы 38, 2019 жылы &nbsp;36, 2020 жылы 44-ті құраған. Нақтырақ айтқанда, 2015 жылдан бері берілген квота саны &nbsp;8 есе өсіп отыр.Жоғарыда айтып өткеніміздей, былтыр 274 квота бөлініп, &nbsp;игерілген. Оның ішінде жүктілік 49,6%, яғни, 136 жағдайда тіркеліп, 11,6%-да &nbsp;түсікпен аяқталған. Өкінішке қарай 31 %-да &nbsp;жүктілік нәтиже бермеген. &nbsp;Есепті кезеңде ЭКҰ арқылы 86 бала туып, 1 отбасында егіз сәби дүниеге келген. Ал &nbsp;51 әйел қазіргі кезде жүкті. Биыл бөлінген 270 квота бойынша бүгінде &nbsp;76 әйел жолданып, орындалу үлесі &nbsp;28,1% құрады.Жалпы облыста ұрпақ өрбіту жасындағы әйелдер саны – &nbsp; 174 931. Қазіргі кезде &nbsp;6320 бедеу отбасы бар. Оларды бедеулігіне сәйкес саралағанда 60,4%-ын &nbsp;әйел (3819), 39,6%-ын ерлер (2501) құрап отыр. Бүгінгі күні &nbsp;750 отбасы квота кезегін күтуде.<blockquote>– Кезекте тұрған отбасылардың барлығы өңірлік комиссия арқылы қаралып, қолданыстағы бұйрықтарға сәйкес жолданады. «Аңсаған сәби» арнайы бағдарламасы шеңберінде жүргізілген ЭКҰ циклдеріне мониторингті, пациенттердің құжаттарын қабылдау және құрылған комиссияға ұсыну жұмыстарын басқарма жүргізеді. Облыстық денсаулық сақтау басқармасының &nbsp;бұйрығына сәйкес пациенттерді емдеу үшін квоталарды бөлуді талдау және ұрықтандыруға жолдама беруді шешу бойынша комиссия құрылған. Комиссия құрамында облыс әкімі жанындағы әйелдер істері және отбасылық-демографиялық саясат жөніндегі комиссия хатшысы, қоғамдық қорлардың үйлестірушілері, білікті акушер-гинеколог, уролог мамандар бекітілген, – дейді облыстық денсаулық сақтау басқармасы басшысының ана мен бала жөніндегі орынбасары Айгүл Асылбекқызы.</blockquote>Айта кету керек, &nbsp;бағдарлама МӘМС аясында қаржыландырылады. Әлеуметтік медициналық сақтандыру қоры 2018 жылдан бастап тегін медициналық көмектің кепілдік берілген көлемі шеңберінде ЭКҰ бағдарламасын қаржыландырады. ЭКҰ-ға жолдама алу үшін тіркелген жері бойынша емханаға жүгіну қажет. Мамандар пациентті бедеулігі бар диспансерлік пациенттердің электрондық тіркеліміне қосады және бірқатар тексерулер тағайындайды. 12 ай ішінде емхананың бейінді маманның қорытындысы негізінде пациенттің құжаттарын жоғары технологиялық медициналық қызметтер жөніндегі жергілікті комиссияға жібереді. Оң шешім қабылданған жағдайда, әйел «Емдеуге жатқызу бюросы» порталына тіркеліп, рәсімге дайындала бастайды. Пациент экстракорпоралдық ұрықтандыру үшін клиниканы өз бетінше таңдауға құқылы.ЭКҰ процедурасы терапевтік жолмен емдеуге келмейтін бедеулік диагнозы қойылғандарға арналған. &nbsp;Оған отбасылық жұптар да, жеке адам да қатыса алады. Міндетті түрде үміткердің ерікті жазбаша &nbsp;келісімі болуы керек. Сонымен қатар, Қазақстан азаматы болуы және Денсаулық сақтау министрлігі белгілеген медициналық параметрлерге сәйкес келуі қажет. Бұл – репродуктивті жас, яғни, 18-ден 42 жасқа дейін, қалыпты соматикалық және эндокриндік мәртебе, жоғары фолликулярлық резерв. МӘМС бойынша ЭКҰ процедурасынан жылына бір рет тегін өтуге болады. Талпынысы сәтсіз аяқталған жағдайда қайтадан кезекке тұра алады.Қандай жағдайда квота берілмеуі мүмкін дегенге келсек, науқасты ұрықтандырудан бас тартудың бірнеше жағдайы болуы мүмкін. Мәселен, жатырдың туа біткен немесе жүре біткен ауытқулары, соматикалық және психикалық бұзылулар, аналық без ісіктері, жедел қабыну және кез келген локализацияның онкологиясы.Айнұр БАТТАЛОВА &nbsp;Фото: Нұрболат Нұржаубай

«Аңсаған сәби» бағдарламасы жалғасуда

<a href="https://kyzylorda-news.kz/">Kyzylorda-news.kz</a> Ала жаздай қолынан кетпені түспейтін, ризық несібесін жерден терген диқан қауымы егінін жинап, көңілін бір демдейтін қоңыр күздің берекелі шағы өткен жылы шырайлы Шиеліде мерейлі мерекеге, ұлан-асыр ел тойына ұласқан-ды.Сол шаққа сәл шегініс жасасақ. 2023 жылы Шиелі ауданы, Көкшоқы мөлтек ауданындағы спорт кешенінде ауыл спортшыларының «Алтын күз – 2023» XXХҮІІІ облыстық спартакиадасы өткен болатын.Спартакиаданың ашылуына Қызылорда облысының мәдениет және спорт басқармасы басшысының орынбасары Ж.Айекешов және облыстық мәслихат депутаты, спорт жанашыры, облыстық «Қайсар» СК директоры С.Мұстафа, Шиелі аудандық әйелдер кеңесінің төрайымы Нәйла Палымбет, Шиелі аудандық білім бөлімінің басшысы Жібек Баймұратова, зиялы қауым өкілдері, аудан спортшылары бой көрсетті.Салтанатты шараны Шиелі ауданының әкімі Нұржан Ахатов ашып, ауыл спортын дамыту мемлекеттің жіті назарында екендігін, бүгінгі жас спортшы ертең ел намысын қорғайтын нағыз патриот болуы жолында осы сынды спартакиадалар өткізудің маңыздылығына тоқталып:<blockquote>– Тәуелсіздік жылдары Сыр спортшылары халықаралық ірі жарыстарда топ жарып, көк байрағымыз асқақтай түсуде. Әлемдік аренада көк туымызды желбіретіп жүрген даңқты спортшылардың арасында шиеліліктер де бар. Атап айтар болсам, 2023 жылдың өзінде аудан спортшылары республикалық жарыстарда 18 алтын, 11 күміс, 33 қола, Әлем біріншілігінде 1 алтын, 1 күміс, Азия біріншілігінде 1 алтын медаль иеленді. Бүгінгі таңда бұл спортшылар тек біздің ғана емес, бүкіл Қазақ елінің мақтанышы десек, артық айтқандық емес. Сондай-ақ, бұқаралық спортты қолдау мақсатында жыл басынан бері ауданымызда 38 аудандық, 9 облыстық, 2 республикалық додалар өткізілді. Мұнан бөлек, 2022 жылы Көкшоқы спорт клубының жабық ғимаратын 482 миллион теңгеге қайта жөндеуден өткізсек, бүгін сіздер доп тепкелі отырған ашық спорт алаңын жуырда 224 миллион теңге қаражатқа күрделі жөндеуден өткіздік. Тіпті, жуырда кент орталығынан жаңа спорт кешенінің тұсауын кестік. Бүгін шымылдығы ашылып, Шиеліде 4 күн бойы өтетін спартакиадада барлық аудандардан келген 1000-нан астам адам спорттың 16 түрінен (футбол, волейбол, баскетбол, қол күресі, шахмат, асық ату, бес асық, гір спорты, қазақ күресі, тоғызқұмалақ, үстел теннисі, көкпар, теңге ілу, аударыспақ, гандбол, турникке тартылу және президенттік көпсайыс) бақ сынайды. Спартакиадада жеңіске жеткендер еліміздің даңқын асқақтатар, әлемдік аренада көк туымызды желбіретер спортшы болуына тілектеспін. Құрметті спортшылар мен қонақтар! Ендеше, «Алтын күз – 2023» 36-шы облыстық спартакиадасын ашық деп жариялаймын, – деген болатын.</blockquote>Жарыс барысында жағылған &nbsp;спартакиада алауы барша қатысушы көрермендер мен спортышларға ерекше көңіл-күй сыйлағаны қоса бар.&nbsp;Иә, ел намысын қорғап, абыройын асқақтатып жүрген әйгілі спортшылардың бір қатары ауылдан шыққаны белгілі. Шаңға аунап, доп теуіп, пішен үстінде күресіп жүрген қара домалақ балалар әлемнің дамыған елдер қатарындағы мемлекеттерде өтетін Олимпиада төрінен топ жарып шықпасы анық. Ендеше, бүгінгідей спартакиадалар кеудесінде төзімділік пен қайсарлық, жеңіске деген ұмтылысы бар, чемпион болуды армандап, алдына үлкен мақсат қойған талай жеткіншектің «трамплині» десек те болады. Сонымен бірге жыл бойы ең мықты шәкірт тәрбиелеу жолында аянбай еңбек еткен жаттықтырушылар үшін көптен күткен мереке.Спартакиаданың ашылуына алыстан ат терлетіп келген Арал ауданының мәдениет және спорт бөлімінің басшысы Махатов Бауыржан Ібрашұлы, №19 Арал ауданының олимпиадалық резервтің мамандандырылған балалар-жасөспірімдер мектебінің директоры, Алмағамбетов Серік Алдажарұлы, №20 Арал ауданының балалар-жасөспірімдер спорт мектебінің директоры, Қорғанбаев Жетпісбай Алпысбайұлы сынды азаматтар бастап шықты.Келесі кезекте таныстыру алаңында Қазалы ауданының мәдениет және спорт бөлімі &nbsp;басшысының орынбасары, бокстан КСРО спорт шеберіне үміткер, волейболдан І разраядтағы ойыншысы Жамшейітов Орысбек Қаниұлы, Қазалы спорт клубының директоры Өтеген Нұртуған Сәдірханұлы, № 17 Қазалы ауданының олимпиадалық резервтің мамандандырылған балалар-жасөспірімдер мектебінің директоры Мамбетжан Бақытбек Қасқырбекұлы, №18 Қазалы ауданының балалар-жасөспірімдер спорт мектебінің директоры Абиев Нұрболат Бауыржанұлы және ауданның абыройын асқақтатқан спортшылар, жеңімпаз жүлдегерлер бастаған спорт саласының мақтаныштары бой көрсетті.&nbsp;Одан кейінгі кезекте Қармақшы ауданының құрама командасын, аудандық мәдениет&nbsp;және спорт бөлімінің басшысы Ержанов Дәурен Дауылбекұлы,аудандық «Спорт клубының» директоры Асылов Марат Мұқанғалиұлы, №15 Қармақшы аудандық олимпиадалық резервтің мамандандырылған балалар-жасөспірімдер мектебінің директоры&nbsp;Алиев Артур Айытбайұлы, №16 Қармақшы аудандық балалар-жасөспірімдер спорт мектебінің директоры, «Қазақстан&nbsp;Республикасының спорт шебері», Ұлттық дәрежедегі төреші Ержанов&nbsp;Ғалым Серікұлы бастаған жетекшілер келді.Спартакиаданың жасыл алаңында Жалағаштан келген Облыстық «Алтын күз – 2023» ауыл спортшыларының спартакиадасын Жалағаш ауданынан Жалағаш ауданының мәдениет және спорт бөлімінің басшысы Қалыбаев Шарабан Мақсатұлы, мәдениет және спорт бөлімі басшысының орынбасары Жамалатов Еркебұлан Сырмағамбетұлы, Жалағаш аудандық «Наркескен» спорт клубының директоры Ержанов Ғалымжан Дастанұлы, Жалағаш аудандық «Жабық бассейн» директоры Құтболдиев Мұхтар Тоқтарұлы, облыстық мәдениет және спорт басқармасының №13 Жалағаш ауданының олимпиадалық резервтің мамандандырылған балалар-жасөспірімдер мектебінің директоры Баймаханов Данабек, облыстық мәдениет және спорт басқармасының №14 Жалағаш ауданының балалар-жасөспірімдер спорт мектебі директоры Асылбеков Аян Асылбекұлы бастап келген азаматтар қатары да жасыл алаңда бой көрсетті.Спартакиадаға Сырдария ауданының құрама командасын аудандық мәдениет және спорт бөлімі басшысының міндетін атқарушы Төрәлиев Жеңісбек Үсенұлы және ауданның абыройын асқақтатып жүрген спорт саласының мақтаныштары да команда қатарын толықтырды.Ал одан кейін Жаңақорған ауданының мәдениет және спорт бөлімінің басшысы&nbsp;Сыздықов Әбілқайыр Әбілпаттаұлы бастаған, Жаңақорған спорт клубының директоры Сабырханов Болат Тұтқабайұлы, &nbsp;Қызылорда облысының ұлттық ат спорты түрлерінің жетекшісі, ҚР «Құрметті спорт қызметкері», №7 олимпиадалық резервтің мамандандырылған балалар жасөспірімдер спорт мектебінің директоры Боранбаев Сламхан Өміртайұлы және Қазақстан Республикасының еңбегі сіңірген жаттықтырушысы, Қазақстан республикасының еңбегі сіңген қызметкері №8 олимпиадалық резервтің мамандандырылған балалар жасөспірімдер спорт мектебінің директоры Садықов Әбдісаттар Алдабергенұлы Жаңақорған ауданының құрама командасының туын желбіретіп, жасыл алаңнан табылды.Шырайын шашып, шартарапқа танылған ауданның құрама командасын Шиелі аудандық мәдениет және спорт бөлімінің басшысы Әзімхан Аруна Өркенқызы, №9 Шиелі ауданының олимпиадалық резервтің мамандандырылған балалар-жасөспірімдер мектебінің директоры Тажбенов Ғабит Рантайұлы, №10 аудандық балалар мен жасөспірімдер спорт мектебінің директоры Айтуаров Ардақ Жанайдарұлы, Шиелі спорт клубының директоры Зермұхамедов Нұрлан Жағыппарұлы шеруді бастап келді. Ал, ауыр атлетикадан Айзада Мүптілда, Бектай Асылжан, Сансызбаева Айсамал Әлем, Азия біріншіліктернің жеңімпазы. Таеквондодан Қапанова Ботакөз, Торғын ӘлімханАзия біріншілігінің жүлдегерлері. Жекпе-жек спортынан Шәкірбек Абылай жастар арасындағы әлем біріншілігінің жеңімпазы. Белбеу күресінен Әбубәкір Жандос әлем біріншілігінің күміс жүлдегері, волейболдан жасөспірімдер арасында Қойлыбаева Балайым азия біріншілігінің жеңімпазы, Қазақ күресінен әлем кубогінің жеңімпазы Төлепов Бекжан сияқты Шиелі ауданының абыройын асқақтатқан сайыпқыран спортшылар сап түзеп тұрды.Спартакиадаға өңіріміздің барлық ауданынан спортшылар қатысатын болатын. Онда 16 спорт түрі қамтылған: футбол, баскетбол, волейбол, қол күрес, шахмат, асық ату/бес асық, гір спорты, қазақ күресі, тоғызқұмалақ, үстел теннисі, президенттік көпсайыс, көкпар, теңге ілу, аударыспақ, гандбол және турникке тартылу. Айта кетейік, жасыл алаңда бастау алған дүбірлі жарыс алдын ала бекітілген кестеге сәйкес, өткен жылы 1 қазанға дейін жалғасып, өз деңгейінде өтті.

Шиеліде өткен спартакиадаға шолу

<a href="https://kyzylorda-news.kz/">Kyzylorda-news.kz</a> &nbsp;2024 жылғы 20 сәуірде Беларусь мемлекеттік педагогикалық университетінің оқу ісі жөніндегі проректоры Маковчик Александр Васильевич Қызылорда ашық университетінің академиялық мәселелер жөніндегі басқарма басшысы, физика-математика ғылымдарының кандидаты Мұхамбетжан Айсұлу Мұхамбетжанқызы бастаған делегацияны қабылдады.Қабылдау университеттің Беларусь-Қазақстан мәдени-білім беру орталығында жүргізілді, оған БМПУ-дің Біліктілікті арттыру және қайта даярлау институтының директоры Шеститко Ирина Владимировна, Беларусь-Қазақстан мәдени-білім беру орталығының басшысы Гардукевич Марина Чеславовна қатысты.Қызылорда ашық университетінің делегация құрамында ғылыми зерттеулерді ұйымдастыру бөлімінің меңгерушісі, техника ғылымдарының кандидаты Сайлаубекова Нұржамал Сайлаубекқызы және бірінші курс студенттері Жүсіпов Мұрат, Оралбай Рысдәулет болды.Кездесу педагогикалық бағыт бойынша тәжірибе алмасу форматында өткізілді. Профессор-оқытушылар құрамын дәріс оқуға шақыру. Профессор-оқытушылар құрамы мен білім алушылар үшін академиялық ұтқырлық бағдарламалардың, тағылымдамалардың білім беру бағдарламаларын жасау және оларды ұйымдастыру.Педагогикалық ғылымдар бағыты бойынша бірлескен білім беру бағдарламаларын әзірлеу. Беларусь Республикасы мен Қазақстан Республикасының ғылыми басылымдарында бірлескен жарияланымдар шығару. Профессор-оқытушылар құрамының БМПУ және Қызылорда ашық университеті ұйымдастыратын ғылыми конференцияларға қатысу. Бірлескен халықаралық ғылыми гранттық қаржыландыру жобаларына қатысу. Кездесу соңында құрметті қонақтарға арналған кітапта ізгі тілектерін жазып қалдырды. Университет тарихымен таныстырып, музейлерге экскурссия жасалды.Сондай-ақ, Қызылорда ашық университетінің студенттері сыртқы академиялық ұтқырлық бағдарламасымен Белорусь елінде білім алуа.Бүгінде Қызылорда ашық университетінің Құқықтану (қылмыстық құқық) білім беру бағдарламасының 1 курс студенті Оралбай Рысдаулет Оралбайұлы 2023-2024 оқу жылының 2-ші академиялық кезеңінде сыртқы академиялық ұтқырлық бағдарламасымен Беларусь Республикасындағы Евфросиния Полоцкая атындағы Полоцкий мемлекеттік университетінде білім алуда.<blockquote>− Бұл бағдарлама арқылы мен білім көкжиегін кеңейтумен қатар Беларусь Республикасының табиғаты мен мәдениетімен танысып жатырмын. Университет қабырғасындағы тарихи орындарды көріп тарихты оқып та, тыңдап та, оған қол тигізіп те көрдім. Көптеген жерлерді аралап, студенттермен тәжірибе алмасып, жан-жақты дамып, уақытты барынша тиімді пайдаланудамын. Осы бағдарламаның көмегімен барынша сапалы білім алу барысында еңбектеніп келемін. Осындай мүмкіндік туғызған екі жақтың басшыларына үлкен алғыс білдіргім келеді, − деп өз қуанышын жеткізді.</blockquote>2023 жылдың қараша айында Қызылорда ашық университеті мен Евфросиния Полоцкая атындағы Полоцкий мемлекеттік университеті (Беларусь Республикасы, Полоцк қаласы) арасында халықаралық ынтымақтастық орнаған болатын.Полоцкий мемлекеттік университетінің бірінші проректоры Голубева Оксана Валерьевна аппарат басшыларымен бірге университетке 15-21 сәуір аралығына, 1 аптаға арнайы шақыртумен келген Академиялық мәселелер жөніндегі басқарма басшысы, физика-математика ғылымдарының кандидаты, қауымд.профессор Мұхамбетжан Айсұлу Мұхамбетжанқызын және Ғылыми зерттеулерді ұйымдастыру бөлімінің меңгерушісі, техника ғылымдарының кандидаты Сайлаубекова Нұржамал Сайлаубекқызын қабылдады.Академиялық ұтқырлық бағдарламасымен осы университетте білім алып жатырған «Құқықтану (Қылмыстық құқық)» білім беру бағдарламасының студенті Оралбай Рысдәулет пен «Дене шынықтыру және спорт» білім беру бағдарламасының студенті Жүсіпов Мұрат қабылдауда болды.Кездесуде Айсұлу Мұхамбетжанқызы Қызылорда ашық университетін таныстыру барысында Қазақстан Республикасынның Мемлекет басшысы Қасым-Жомарт Тоқаевтың отандық білімнің, ғылымның дамуына, оның әлеуетін көтеруде, ғылыми жобалардың гранттық қаржыландыруға бөлінетін қаржының жылдан жылға өсуіне, жас ғалымдарды қолдауға үлкен мән беріп жатқанын айтты.Екі жоғары оқу орнының өкілдері кездесу барысында білім беру процесі мен ғылыми қызмет аясындағы ынтымақтастықты кеңейту мәселелерін талқылады. Бакалавриат даярлық деңгейі бойынша қос дипломды білім беру бағдарламаларын жасауға келісім жасалды, Ұзақ мерзімді ғылыми ынтымақтастық туралы келісімдерге қол жеткізілді. Осылайша, Қызылорда ашық университеті дамудың жаңа кезеңіне қадам басып, шетелдік мықты университеттермен байланысты нығайта бермек.

Беларусь мемлекеттік педагогикалық университетімен келіссөз жүргізілді

<a href="https://kyzylorda-news.kz/">Kyzylorda-news.kz</a> Қармақшы аудандық білім бөлімі бойынша әдістемелік кабинеттің жұмыс жоспарына сәйкес №107 орта мектебінде жуырда «Жаңа форматтағы кәсіби бағдар беру жұмысының тиімділігі» тақырыбында аудандық семинар болып өтті.&nbsp;Оқушылардың келешек мамандық таңдаудағы дұрыс көзқарастарын қалыптастыруда кәсіби бағдар беру жұмыстарын тиімді ұйымдастыру мақсатындағы өткізілген семинарға Қармақшы аудандық білім бөлімінің әдіскері Аяшева Мираш Әбдіхалыққызы және мектеп директорларының бейінді бағдарлары орынбасарлары қатысты.Іс-шара барысында семинарға қатысушылар «ҰБТ-ға сеніммен барайық» тақырыбында тренинг сабақ, «Мамандық таңдау – болашақты таңдау» атты тәрбие сағаты, «Мың мамандық бәрі бар, Таңдап, талғап бірін ал!» атты сыныптан тыс жұмыс, 11 сынып жетекшілерінің ұйымдастыруымен «Мамандық таңдау – өміріміздің бір кірпішін дұрыс қалау» атты қорытынды кездесу кешін тамашалады. Кездесу кешіне ауылымыздан шыққан әр түрлі салада түрлі мамандық бойынша қызмет етіп жүрген мамандар, талай жыл өз мамандығының игілігін көріп, халқына қызмет етіп жүрген Нәзікбаев Дастан Мырзабекұлы, Тілеубергенов Достық Жақсыбайұлы, Ералиев Төлеу Айманұлы, Байменов Нұрлыбек Ештайұлы, Жақсыбаев Сәкен Асхатұлы ағаларымыз келіп, оқушыларға тың пікірлермен ақыл-кеңестерін айтып, жас түлектерге болашақта мамандықты дұрыс таңдап, жақсы маман иелері болуға шақырды. &nbsp;

Қармақшылық ұстаздар жаңа форматтағы кәсіби бағдар беру жұмысының тиімділігін талқылады

<a href="https://kyzylorda-news.kz/">Kyzylorda-news.kz</a> &nbsp;Облыс әкімі Нұрлыбек Нәлібаев Қызылорда қаласындағы нысандарды аралап, демеушілер қолға алған жұмыстармен танысты.Алдымен аймақ басшысы Тасбөгет кенті А.Иманов көшесіндегі №1 үйдің қасбетін сырлау жұмыстарын көрді. Өткен жылы Қызылорда облысының 85 жылдығы және қала күніне орай шаһардағы 30-дан астам көпқабатты тұрғын үйдің қасбеті заманауи панельмен қапталған болатын. Бұл жұмыстар жергілікті демеушілердің, атап айтқанда қала құрылысшылары мен кәсіпкерлердің қолдауымен атқарылды. Биыл игі бастама жалғасын таппақ.Облыс әкімі Ә.Мүсілімов атындағы №101 мектеп-лицейінің қасбетін қаптау жұмыстарымен де танысты. Осыдан 20 жыл бұрын салынған мектеп 624 орындық, мекемеде 286 педагог пен 51 қызметкер жұмыс істейді. Өткен жылы мектеп жанынан 550 оқушыға арналған қосымша ғимарат салынды.Облыстық білім басқармасының басшысы Асқарбек Есжанов аймақтағы күрделі жөндеуді қажет ететін мектептер жөнінде айтты. Биыл жергілікті бюджет есебінен 2,8 млрд теңгеге 7 мектеп ғимараты күрделі жөндеуден өтеді. Оның ішінде, облыс орталығындағы №№211, 212, 217, 222, 253 мектептер бар.Мұнан әрі облыс әкімі №3 мектеп-лицейінің қасбетін қаптау жұмыстарын көрді. С.Толыбеков атындағы оқу ғимараты 750 орынға арналған, мұнда 183 ұстаз және 44 кіші қызметкер еңбек етуде. Өткен жылы бұл оқу ордасына да 375 орындық қосымша ғимарат салынды. Жаңа ғимаратта оқу кабинеттері, шығармашылық бөлмелер талапқа сай жасақталған. Оқушыларға ыңғайлы болу үшін оқу құралдарын сақтауға, балалардың шығармашылық дамуы мен демалуына толық жағдай қарастырылған. Бейнебақылау, дыбыстық хабарлау және басқа да күшейтілген қауіпсіздік жабдықтары орнатылған.Айта кетейік, білім мазмұнын арттыру мақсатында мектептерді заманауи пәндік кабинеттермен жабдықтауға, бала қауіпсіздігін қамтамасыз ету үшін соңғы үлгідегі бейнекамералар алуға биыл жергілікті бюджеттен 1 млрд 500 млн теңгеге жуық қаржы бөлінді. Құрылғылар жаңа оқу жылына дейін білім беру ұйымдарына орналастырылады.Облыс әкімі аппараты цифрлық технологиялар бөлімінің басшысы Сәбит Ибадулла Қызылорда қаласындағы бейнебақылау жүйелерін дамыту жобасын таныстырды. Қазір қала бойынша 272 бейнебақылау камерасы, 20 «Аркан» жылдамдық өлшегіш құралы мен 5 интеллектуалды қиылыс болса, жоба іске асқан соң 1400 камера, 19 интеллектуалды қиылыс пен 58 жылдамдық өлшегіш, сондай-ақ, 20 Sergek Qorgau мобильді жұмыс орны орнатылмақ. Бүгінде жобалық құжаттар сарапталуда, жүйе 2029 жылы толық пайдалануға берілмек. Бұл халық көп шоғырланатын орындардағы бақылауды күшейтеді, қоғамдық тәртіп және қауіпсіздікті қамтамасыз етеді.Қаладағы нысандарды аралау кезінде облыс әкімі Қ.Ажаров көшесіндегі Агробиологиялық орталықты қайта жаңғырту жобасымен танысты.Қызылорда қаласының әкімдігі мен Қорқыт ата атындағы Қызылорда университеті бірлесіп жүзеге асырған жоба аясында нысан аумағы абаттандырылып, көпшіліктің демалыс орнына айналмақ.Университет ротонда, жартышар күмбезі, дөңгелек шатыр, аркалар салады. Оған қоса, тамшылатып суару жүйесін жүргізіп, жеміс ағаштарын отырғызады. Ал қала әкімдігі кеспетастарды төсеп, газон егуге, аяқсу тартуға жауапты болмақ.Әрі қарай аймақ басшысы Абай аллеясынан Астана даңғылына дейінгі абаттандыру жұмыстарын көрді. Жобаның жалпы құны – 262,9 млн теңге, мердігер мекеме «ДаренСтрой» ЖШС кеспетас төсеп, шағын сәулет нысандары мен орындықтар орнатады, газон егіп, гүл отырғызады. Абаттандыру шілде айында аяқталады деп жоспарлануда.Нысан басында Нұрлыбек Машбекұлы Қызылорда қаласын абаттандыру және жол-көлік инфрақұрылымын дамыту жобаларымен танысты. Қазір облыс орталығында абаттандыру бойынша 213 жоба жүзеге асуда, оған барлығы 12,7 млрд теңге жұмсалмақ. Сондай-ақ 160 көше 31,7 млрд теңгеге жөнделеді.Облыс әкімі Жанқожа батыр көшесінен теміржол арқылы өтетін жерасты автокөлік өткелі құрылысын көрді. Аталған нысан – халықтың ұзақ күткен игілігі. Бұл маңдағы қауіпсіздік мәселесін тұрғындар бірнеше жылдан бері көтеріп келеді. Биыл Мемлекет басшысының, Үкіметтің қолдауымен 4,7 млрд теңгеге төрт жолақты, ұзындығы 734 метр өткел құрылысы қолға алынды. Осылайша халықтың тілегі ескеріліп, көлік нөпіріне есептелген, қауіпсіздік талаптары сақталған өткел салынады.Айта кетейік, Сыр өңірінде халықтың өмір сүру сапасын арттыру мақсатында жол инфрақұрылымын, көлік қатынасын дамыту саласында ауқымды жобалар қолға алынуда. Оның ішінде, аймақ тұрғындарының сұранысына орай авто және теміржол үстінен өтетін көпір өткелдері құрылысы қарқын алған.Өткен жылы республикалық және облыстық бюджет есебінен 5,7 млрд теңгеге «Батыс Еуропа – Батыс Қытай» автодәлізі бойындағы жол айырығына салынған жаңа көпір пайдалануға берілді. Сонымен қатар 1 млрд теңгеге жуық қаржыға Қызылорда қаласының Белкөл кенті мен Яссауи көшесі тұсында, Жалағаш ауданы орталығында теміржол үстінен өтетін жаяу жүргіншілер көпірі ел игілігіне табысталды. Арал ауданында 3,1 млрд теңгеге автожол көпірінің құрылысы қарқынды жүргізілуде. Қаланың «Шанхай» шағын ауданы тұрғындарының көптен бері көтерген мәселесі де оң шешімін тапты.Өткен жылы «Қазақстан Темір Жолы» компаниясы мен жергілікті кәсіпкерлердің демеушілігімен 600 млн теңгеге жуық қаржыға теміржол вокзалы күрделі жөндеуден өтсе, жақында ғана «Қызылорда-Семей» бағытындағы жолаушылар пойызына 44 жаңа заманауи вагон алынып, толығымен жаңаланды.Болат Өтемұратов қорының қолдауымен 17 млрд теңгеге жуық қаржыға «Қорқыт Ата» әуежайының жаңа терминалы халықаралық талаптарға сай етіп салынды. Нысан жақын арада пайдалануға берілмек.Фото: Облыс әкімінің баспасөз қызметі

Облыс әкімі Қызылорда қаласындағы нысандарды аралады

<a href="https://kyzylorda-news.kz/">Kyzylorda-news.kz.</a> Қызылорда облысында полицейлер 11 жыл іздеуде болған қылмыскерді қолға түсірді. Қызылорда облысы Полиция департаменті Криминалдық полиция басқармасы және Қазалы аудандық полиция бөлімінің қызметкерлері тергеуден бой тасалап жүрген <a href="https://kaz.inform.kz/news/kizilorda-oblisinda-11-zhil-zdeude-bolgan-kilmisker-kolga-tust-2e5507/">қылмыскерді қолға түсірді</a>.<blockquote>«ҚР Қылмыстық кодексінің 300-бабының 2-бөлігімен (Құрамында есiрткi заттар бар, өсiруге тыйым салынған өсiмдiктердi заңсыз егіп-өсіру) күдікті қатарында танылған қылмыскер 11 жыл іздеуде жүрген болатын. Оған қатысты қамауда ұстау түріндегі бұлтартпау шарасы қолданылды», – деп мәлім етті Қызылорда облыстық полиция департаментінен.</blockquote>Ведомство мәліметінше, Қызылорда қалалық полиция басқармасының жедел уәкілдері қарақшылық жасап, іздеуде жүрген 39 жастағы азаматты Жетісу облысында ұстады. Қазіргі уақытта ол уақытша ұстау изоляторына қамалды.Республика көлемінде өткізілген «Іздестіру» жедел профилактикалық іс-шарасы кезінде 4 қылмыскер және хабар-ошарсыз кеткен 3 азамат анықталған.Еске салсақ, биыл Қызылорда облысында 50-ден астам интернет-алаяқтық қылмысы тіркелген.Фото: polisia.kz

Қызылорда облысында 11 жыл іздеуде болған қылмыскер қолға түсті

<a href="https://kyzylorda-news.kz/ru">Kyzylorda-news.kz</a> «Мектепке дейінгі педагогика» ПЦК-ның «Жаңа формация педагогы – кәсіби маман даярлаудың алғышарты» атты апталығы аясында техникалық және кәсіптік білім беру ұйымдарының білім алушылары арасында «Мен зерттеушімін» тақырыбындағы қалалық жобалау-зерттеу байқауы өтті.&nbsp;Мақсаты – Студенттердің тұрақты және тиімді ғылыми-зерттеу қызметін жасау, ғылыми-зерттеу жұмыстарына қатысуға студенттерді баулу;Ғылыми зерттеу жұмысы - жобаның мәлімделген тақырыпқа сәйкестігі, мақсат, міндеттері мен нәтижені қалыптастырудың бар болуы және сауаттылығы, материалды ұсынудың қисындылығы мен дәйектілігі және жұмыстың жүйелілігі мен жоба нәтижесінің тақырыпқа сәйкестігі бойынша бағаланды.&nbsp;Жас зерттеушілер еңбегіне «Шұғыла» жеке мектепке дейінгі мекемесінің тәрбиешісі – Жұлдызай Бекжанова, «Алпамыс» бөбекжай бақшасының тәрбиешісі – Калдан Туякбаева және №2 Нұр Шұғыла жеке мектепке дейінгі мекемесінің тәрбиешісі – Ерғали Меруерт Қайратқызы әділқазылық етіп, назарға ұсынылған жұмыстарды сарапқа салды.&nbsp;Қалалық жобалау-зерттеу байқауы нәтижесінде «М.Мәметова атындағы Қызылорда педагогикалық жоғары колледжі студенті Алдиярова Айдана – І орын, «ORDA» жоғары колледжі мемлекеттік емес білім беру мекемесі студенті Дамира Алпысбай – ІІ орын, «М.Мәметова атындағы Қызылорда педагогикалық жоғары колледжі студенті Меруерт Сайлауова – ІІІ орын иеленді.&nbsp;Сонымен қатар бірқатар қатысушыларға зерттеу жұмысы нәтижесіне сай номинациялар табысталды. Атап айтсақ, М.Мәметова атындағы Қызылорда педагогикалық жоғары колледжі студенті Раушан Нурдаулетова &nbsp;– «Жаңа инновациялық жоба»; М.Мәметова атындағы Қызылорда педагогикалық жоғары колледжі студенті Айжан Айназарова – «Жаңашыл идея» номинациясы; «М.Мәметова атындағы Қызылорда педагогикалық жоғары колледжі студенті Жаннұр Құрманәлиева – «Үздік зерттеуші» номинациясы; «ORDA» жоғары колледжі мемлекеттік емес білім беру мекемесі студенті Динара Орынбаева – «Алғыр ой» номинациясы;&nbsp; «М.Мәметова атындағы Қызылорда педагогикалық жоғары колледжі студенті Нұрай Шымбергенова – «Креативті жоба» номинациясы; «М.Мәметова атындағы Қызылорда педагогикалық жоғары колледжі студенті Сандуғаш Әуесбай – «Ойшыл жоба» номинациясын иеленді.&nbsp;Қорлан САРЫ

Қазақстан және Қызылорда облысының жаңалықтары