<a href="https://kyzylorda-news.kz/">Kyzylorda-news.kz</a>&nbsp; &nbsp;Қазақтың батыр қолбасшысы Бауыржан Момышұлы «Өнер – адамның рухани азығы, ол халықтың бүгіні мен келешегі, арманы мен қиялы, жалпы болмысы» деген екен өнер жайында. Ұлттық салт-дәстүрімізді, рухани құндылығымызды, әдет-ғұрпымызды, мәдениетімізді ұрпақтан-ұрпаққа жеткізіп, дәріптейтін бірден бір тұлға – өнер адамы. Ал өнер жолы – қиындығы мен қызығы қатар жүретін ауыр саланың бірі екені бәсенеден белгілі. Сырдария ауданының орталығынан шалғайда орналасқан Жетікөл ауылының түлегі Дильназ Кеңесова – өмірін өнерімен өрнектеген талантты жас өнерпаз.&nbsp;Талантымен талайды тамсандырған жас өнерпаз Дильназ Батырханқызы бала күнінен өнерге құштар болып өскен. Ол өнерімен ғана емес, сонымен қоса оқуда да озат, білімге құштар болған. Мектеп қабырғасында оқып жүргенде-ақ талай жетістікке жетіп, көпке үлгі болған ол Жетікөл ауылындағы №174 орта мектебінде білім алған. Мектепті «Алтын белгіге» бітіріп, бала күнгі арманына қол созып, Алматы қаласындағы Т.Жүргенов атындағы Қазақ Ұлттық Өнер академиясының «Драма театр режиссері және драма театры мен кино әртісі» мамандығына грантқа оқуға түседі. Үлкен қалада, оның үстіне аты дүркіреп тұрған мықты академияға грантқа түсу екінің бірінің қолынан келе бермейтін биік белес. Жас өнерпаз бүгінде қазақ өнерінің талай саңлақтары шыққан өнердің қарашаңырағында білім алуда.<blockquote>&nbsp;– Мен өнерге 6 жасымнан бастап қызыға бастадым. Аяулы әжем бойымдағы талантым мен талабымды байқап, үнемі қазақи әндер мен өлеңдерді үйретіп, жатқа айтқызушы еді. Бастауыш сыныпта оқып жүрген уақытта ауылдық мәдениет үйіндегі үйірмелерге қатыса бастадым. «Көркем сөз», «Ән» үйірмелеріне белсене қатысып, түрлі сайыстардан жүлделі орын иелендім. Жетекшім Құндызай Бажиева апайыммен бірге аудандық, облыстық, республикалық сайыстар мен байқауларға барып, жүлделі орынсыз қайтпайтын едік. Осы тұста маған дұрыс бағыт-бағдар көрсетіп, қолдау білдіріп, өнерімді шыңдай түскен жетекшіме үлкен алғысымды айтқым келеді. Ән айту өзіме ерекше ұнайды. Бала күнімде кішкентай болсам да әнді сезініп, жүрекпен айтатын едім. Алғаш ән айту қабілетімді байқаған Ерлан Білманов пен Алмат Өтеуов ағайларым бойымдағы өнерімді одан әрі дамытып, мені шыңдай түсті. Өнердегі алғашқы ұстаздарымның қолдауы мен берген білімінің арқасында өнерге деген құлшынысым есейген сайын арта бастады. Болашағыма арман-мақсаттар қоя бастадым. Кейіннен театр және кино саласына деген қызығушылығым оянды. Жоғары сыныптарда өз мамандығымызды нақтылап таңдау кезінде өнер саласын таңдайтыныма нық сенімді болдым. Себебі бұл менің бала күннен келе жатқан арманым еді. Менің таңдауыма ата-анам ешқашан қарсылық білдірмей, барынша өз қолдауын беріп, маған үлкен үміт пен сенім артты, – дейді талантты өнерпаз.</blockquote>&nbsp; &nbsp; &nbsp; Өнерлі жанның жарқын жетістіктері де аз емес. Талай халықаралық, республикалық байқауларда топ жарып, үздіктер қатарынан көрінген ол 2022 жылы «Сыр аруы» облыстық байқауына қатысып, Қызылорда облысының қаншама ақылы көркіне сай сұлу бойжеткендерінің арасынан оза шауып, жүлделі І орынды иеленіп, ауданның мерейін асырды. Одан бөлек Астана қаласында өткен халықаралық «Ақ көгершін» балалар шығармашылық байқауына қатысып, І орынды иеленген. Талантты да талапты жас өнерпазды өнерге баулыған ұстаздары шәкіртінің болашағынан үлкен үміт күтетінін айтады. Қарапайым ауылдан шыққан кейіпкеріміз бүгінде өзі оқып жүрген білім ордасында белсенділігімен көзге түсіп, үздік студенттер қатарынан табылып жүр.<blockquote>&nbsp; &nbsp;– Өнер академиясына оқуға түскелі таза өнерді түсініп, саланың қаншама қиындықты талап ететінін анық білдім. Шам театрының «Иран Конференциясы» спектаклінде ойнап, сонымен қоса М.Әуезов атындағы Қазақ Ұлттық театр сахнасында, одан бөлек Ғ.Мүсірепов атындағы балалар және жасөспірімдер театр сахнасында өнер көрсетіп үлгердім. Бұл мен үшін үлкен тәжірибе болды. Бүгінде академиядағы Молдағали Фархад деген ұстазыммен Талдықорған, Тараз қалаларында спектакль қойып, гастрольдік сапарда жүрміз. Менің қазіргі уақыттағы басты арманым – Қазақстандағы театр саласының дамуына, қоғамның жақсы жаққа бет алуына өз үлесімді қосатын, атаққа емес елімнің пайдасына жұмыс жасар театр режиссері болу. Театр – ол көрерменнің айнасы. Мен театрға келген әр көрерменге жақсы эмоция мен өмірдің жеңісі мен жеңілісін, қаталдығы мен мейірімділігін, қоғамдағы болып жатқан ащы шындықты қалай қабылдау керек екендігіне ой салуым керек. Көрерменнің ойында жүрген сұрақтарының шешімін спектакльде көрсете білу – менің міндетім. Бұл, әрине, өте жауапты әрі қиын іс, ол көп еңбек пен жан-жақты ізденісті талап етеді, – дейді Дильназ Кеңесова.</blockquote>&nbsp; &nbsp;Дильназ үлкен қалада білім алып жүрсе де, өзінің туып-өскен жерін, достарын, ұстаздарын бір сәтке ұмытқан емес. Ол бойындағы өнерге деген адалдық пен шынайылық қасиеттерді, өмірдегі арман-мақсаттарының бастауын осы ауылдан алғанын мақтанышпен айтады. Жас өнерпаз білім мен тәрбие берген ұстаздарына, ауыл кітапханасына және өнердегі ұстаздарына шексіз алғысын білдіреді. Егеменді еліміздің кемел келешегі мен жарқын болашағы – &nbsp;талантты жастар екені сөзсіз. Ал осы талабы таудай талантты жастарға қолдау көрсету мен дұрыс бағыт-бағдар беру мына сіз бен біздің міндетіміз.

Сырдариялық талантты өнерпаз

<a href="https://kyzylorda-news.kz/">Kyzylorda-news.kz</a> Облыс әкімінің орынбасары С.Қожаниязовтың 2024 жылғы 01 наурызымен 31 мамыр аралығында «Таза су айдындары» акциясын&nbsp;өткізудің іс- шара жоспары бекітілді. Осыған байланысты аудан (қала) әкімдіктері мен бірлесе отырып, іс-шара жоспары белгіленген тапсырмаларды &nbsp;уақытылы ұйымдастыруды және іс-шараның орындалуын міндеттелген.Осы іс-шараға байланысты Балық шаруашылығының маңызы бар су айдындарында табиғат пайдаланушылар мен бірлесе отырып жұмыстар атқарылды. Іс-шараға «Қазалы орман және жануарлар дүниесін қорғау жөніндегі мемлекеттік мекемесі» коммуналдық мемлекеттік мекемесі қызметкерлері табиғат пайдаланушылармен бірлесіп, балық шаруашылығының маңызы бар су айдындарында және Сырдария өзенінің жағасындағы қоқыстардан тазаланды, – дейді «Қазалы орман және жануарлар дүниесін қорғау жөніндегі мемлекеттік мекеме» КММ-нің ихтиологы Б.Нұғыман.Сонымен қатар, «Қазалы орман және жануарлар дүниесін қорғау жөніндегі ММ» КММ-нің ихтиологы Б.Нұғыман және Арал Сырдария облыс аралық бассейіндік балық шаруашылығы инспекциясының қызметкерлері Е.Кушкенбаев, Р.Сейтмуратовтардың қатысуымен су айдындарында «Таза су» акциясы өткізілді.Фото: kazaknews.kz

"Таза су айдындары"  табиғатты қорғау акциясы өтті

<a href="https://kyzylorda-news.kz/">Kyzylorda-news.kz</a> Мемлекет басшысының тапсырмасымен еліміз бойынша жарияланған «Таза Қазақстан» экологиялық акциясын Сыр елі үлкен жауапкершілікпен қабыл алды. Ағаш отырғызу маусымында белең алған шара туған жерімізді әрқашан таза ұстап, гүлдендіру мақсатында жыл бойы жалғасатын болады. Осы мақсатта өңір кәсіпкерлері бұл игі істен шет қалмай келеді.&nbsp;Аймағымызда түрлі кәсіпкерлік нысандар аз емес, сол мекемелердің аумағын таза ұстап, ағаштар мен гүлдер егуді жаппай қолға алса, қала, ауылдарымыз таза, жасыл өлкеге айналары сөзсіз.&nbsp;Бастаманы алғашқылардың бірі болып “Райым” ЖШС басшысы, Өңірлік кеңес төрағасы Раимов Ерлан Қаниұлы қолдады. Осыған орай, Атамекендіктер “Райым” ЖШС-не қарасты орталық мешіттің аумағын тазартуға үлес қосты. Акцияға Палата және “Райым” ЖШС қызметкерлері мен өңір кәсіпкерлері атсалысты. Сонымен бірге, қаламызға “Zebra coffee” атауымен танымал “Сая” ЖК бастаманы қолдау мақсатында барша акцияға қатысушыларға кофе ұсынды.&nbsp;<blockquote>«Мемлекет басшысы Қасым-Жомарт Кемелұлы Тоқаевтың бастамасымен қолға алынған «Таза Қазақстан» акциясына Сыр жұртшылығы аса белсенділік танытты. Аймақ басшысы Нұрлыбек Нәлібаевтың қолдауымен жалпы қалалық сенбіліктер, ауқымды шаралар, оның ішінде ағаш отырғызу, әктеу, арықтарды, айналаны тазалау сияқты түрлі қоғамдық жұмыстарда халық ауызбіршілігі бекем болды. Бұл қоғамдық жұмыстардың басы-қасынан Атамекен кәсіпкерлер палатасының ұжымы да табылған болатын. Енді міне, кәсіпкерлер бастаманы қолдап, өздерінің өндіріс аймақтары, жұмыс орындарының айналасын абаттарндыруды қолға алуда. Біз әр сенбіде бизнес ғимараттарының ауласының тазалығы мен көгалдануына аса назар аударатын боламыз. Таза қалада тұрып, оны жасыл аймаққа айналдыру әрқайсымыздың қолымызда» деді Палата директоры Пірмұхаммед Сыздық.</blockquote>Осы орайда, Қызылорда облысы кәсіпкерлер палатасы барша бизнес қоғамдастық өкілдерін “Таза Қазақстан” акциясына белсене қатысуға шақырады.

Сырбойылық кәсіпкерлер «Таза Қазақстан» акциясына өз үлесін қосты

<a href="https://kyzylorda-news.kz/">Kyzylorda-news.kz</a> Білім ордасының қабырғасында нәзікжанды студент қыздарға ақыл-кеңес айтып, дұрыс бағыт-бағдар мақсатында «Ақжүніс» қыздар ұйымы жұмыс жасайды. Қыздар ұйымының төрайымы, жас та болса, көпбалалы ана атанған, «Күміс алқа» иегері Салтанат Тәжібекованың &nbsp;бастамасымен &nbsp;әрбір атаулы мерекелерде «Ақжүніс» қыздар ұйымы қазақи, рухани тағылымды &nbsp;тәрбие &nbsp;жұмыстарымен ерекшеленеді. &nbsp;Сондай әсерлі шараның бірі – Қазалы аграрлы-техникалық колледжінде болып өтті.Қос мереке қарсаңында «Ақжүніс» қыздар ұйымының жетекшісі, арнайы пән оқытушысы Салтанат Ғабиденқызының ұйымдастыруымен «Ана – мәңгі асыл бейне ардақты» атты «Алтын алқа» және «Күміс алқа» иегері атанған көпбалалы аналармен кездесу кеші өткізілді. Көпбалалы аналар «Алтын алқа» иегері Рима Піржанова, «Алтын алқа» иегері Бақытгүл Кеулімжаева, «Күміс алқа» иегері Ольга Тайгараева сынды аяулы аналарымыз салтанатты шарамыздың құрметті меймандары болды.Кездесу кешін директордың тәрбие ісі жөніндегі орынбасары Гүлазат Жаңылова ашып, көпбалалы аналарға өзінің ыстық лебізін, алғысын жеткізді.«Көп балалы отбасы – береке-бірліктің үйлескен жері. Адамзат тарихында есімі елге танылған тұлғалардың көпшілігі көпбалалы отбасында дүниеге келген» деп, өзінің сөзін жалғаған «Ақжүніс» қыздар ұйымының жетекшісі Салтанат Тәжібекова көпбалалы аналарымызға отбасындағы тәрбие, қыз бен ұл тәрбиесі туралы өзінің сұрақтарын қойды. Аналарымыз қойылған сұрақтарға жан-жақты жауап беріп, өздерінің өмірлік тәжірибелерімен де бөлісті. Отбасы құндылығы туралы келелі ойларын ортаға салды.Рухани басқосуда белсенді білім алушылар да, ардақты аналарға &nbsp;балаң көңілмен көкейлеріндегі сауалдарын жолдады. Колледждің бір топ өнерлі студенттері аналарға арналған әсерлі әндерін шырқаса, мың бұралған биші қыздарымыз әсем биімен мерекелік көңіл-күй сыйлады.Кеш соңында аналарымызға құрмет ретінде сыйлықтар табысталды.

Қазалыда: Көпбалалы  аналармен  кездесу өткізілді

<a href="https://kyzylorda-news.kz/">Kyzylorda-news.kz</a>&nbsp; Қаржылық сауаттылық бүгінде жас пен жасамысқа үнемі қажет ететіндігін қоғамдағы қыруар тіршіліктің өзі дәлелдеп берген болатын. Тұрмыс сапасын жақсарту мақсатында қаржылық қиындыққа тап болатын жандар қаншама екені мәлім. Үнемі тығырыққа тіреліп, несие мен өсімпұлға борышкер атанатын көпшілік өз табысын дұрыс жоспарлауға мән бермей жататыны сөзсіз. Өз кезегінде 2024 жылдың ақпан айынан бастап «Қарызсыз қоғам» жобасы Сырдария ауданында жүзеге асқанын көпшілік жақсы біледі. «AMANAT» партиясының негізгі жобасының қаржы сарапшысы Балдырған Мәменмен аудан көлемінде жүргізілген оқу барысы жөнінде сұхбаттасқан болатынбыз.– Балдырған Нұртуғанқызы, «Қарызсыз қоғам» жобасының негізгі мақсаты мен атқаратын қызметі жөнінде айтып бересіз бе?– «Қарызсыз қоғам» жобасы өткен жылы бастау алғаны белгілі. Пилоттық жоба аясында еліміздің 8 өңірінде 65 мың адам қаржылық сауаттылық бойынша оқытылған еді. Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына Жолдауында аталған жобаның ел тұрғындары үшін тиімділігін атап айтқан еді. Биыл ел Президентінің пәрмені бойынша барлық облыста жергілікті халықты оқыту сәтті жүргізілуде. Биыл 750 мың адамды оқыту жоспарланған. Оның ішінде, 150 мың жұмыс жасайтын жандар мен зейнеткерлер, 100 мың студент, 500 мың мектеп және колледжде білім алушы қамтылған еді. Жалпы республика аумағында 150 қаржы жөніндегі сарапшы болса, олардың қатарында 5 қызылордалық бар. Есепті мерзімде Жаңақорған, Шиелі, Сырдария, Жалағаш ауданы мен Қызылорда қаласында оқыту курсын жүргізген едік.– Сырдария ауданында үш ай бойы жүзеге асқан оқыту курсында қанша адам қамтылды, оқыту қалай жүргізілді?– Сырдария ауданында оқыту курсына толық қатысқаны үшін 505 азаматқа сертификат беріл¬гені аян. Оқу бес күн бойы жүргізіліп, жан-жақты дәріс берілді. Түске дейін жиналған көп¬шілікке дәріс берілсе, түстен кейінгі уақытта жеке мәселесі бойынша жекелеген азаматты қабылдадық. Жобаға кез келген адам қа-тысуға өтініш біл¬діре алады. Оған жергілікті әкімдік немесе «AMANAT» партиясы филиалы арқылы арнайы сайттың көмегімен тіркеле алатындығын айта кетейік. Жоба тегін жүргізілетіндігін айта кетейік. Қаржылық қиындыққа ұшыраған, несие қарызын өтей алмай жүрген жандарға қайта құрылымдауға қатысты кеңес беріледі. Банкроттыққа тапсыруға құжат дайындау барысы жөнінде заңгер жол көрсетеді. Биыл аудан көлемінде 740 азаматты оқыту жоспарланған. Алдағы күз мезгілінде оқыту курсы жалғасын табады. Есепті мерзімде ауданға қарасты бірнеше елді мекен мен Тереңөзек кентінің тұрғындары дәріс алды.– Жобаның әрбір қатысушысының қаржылық қиындығы бойынша жан-жақты талдау жүргізілді ме?– Көпшіліктің басты мазалайтын сауалы – несиені қалай алмауға болатындығы және оны өтеу жолдарына байланысты еді. Дәріс барысында несие қандай мақсатта алынғанына қатысты талдау жасалады. Мойындау керек, несие алушының көбісі – көпбалалы отбасы. Қарыздануға азаматтардың табысының төмендігі қатты әсер етеді. Сонымен бірге жеке қаржыны басқаруда тәжірибенің болмауы қиындық әкеледі. Отбасылық бюджетті жүргізе алмаудың салдары орасан. Бастапқыда жоба не берер екен деген күмәнмен келетін жандар қатары аз емес. Бірінші күннен жылдық кіріс-шығысын талдап, жол көрсете бастаған сәттен қатысушысының көзқарасы өзгере бастайды. Ең бастысы, оқу кезінде несиенің барлық түрі пайызы қарастырылады. Несие алғанда жіберілетін қателікте толықтай мысалмен көрсетіледі. Пайдалы және пайдасыз несиенің ара-жігін ашып көрсету әрбір адамға тиімдірек. Жинақ жасау, қаржылық мақсат бойынша негізгі құралдарды үйретеміз. Инвестиция туралы ақпарат береміз. Жалғыз табыс көзіне иек артпай, қаржыны еселеуге қатысты қосымша жұмыс жасау, кәсіп ашу бойынша маңызды ақпар беруге мүдделіміз. Бағдарламаның артықшылығы да түсіндіріледі.– Сарапшы ретінде қаржылық сауаттылық бойынша қандай кеңес бересіз?– Жеке қаржыны басқаруда, қаржылық сауаттылықты арттыруда кіріс пен шығысқа ұдайы талдау жасалуы керек. Барлық мәселені қағаз бетіне түсіріп отырмайынша, қаржыны басқаруға мүмкіндігі аз. Ашығын айтқанда, әрбір отбасының мүшесі бір айда қанша қаржы керегін білмейтін болса, қаржымен жұмыс жасаудың келесі кезеңіне өту қиын болады. Өз кезегінде ақшаның қай бағытта көп жұмсалып жатқаны анықталып отырады. Оқыту курсына қатысқан азаматтардың ішінде тек 4-5 адам ғана ақша жинайтындығын аңғарып жатамыз. Себебін сұрағанда көпшілік қолында қаржы қалмайтындығын алға тартады. Мұндайда біз бір күнге толықтай қажет ететін отбасының азық-түлік тұтыну тауарына ақша жұмсауын талдаймыз. Бұл ретте, бір күнде бір адам 900-1800 теңге өз қажеттілігі үшін жұмсайтынын анықтадық. Әр адам 365 күнде 328 және 657 мың теңге қаржы жұмсауға мүдделі. Мұндай талдаудан кейін жоба қатысушылары өз қаражатының тиімсіз мақсатта жұмсалып жат¬қанын байқайды. Бұның барлығы шығыс пен кіріске талдау жүргізілмегендіктен болатындығын оқырман назарын аударғым келеді.– Сұхбатыңызға рақмет!

Сырдарияда 505 азаматқа сертификат берілген

<a href="https://kyzylorda-news.kz/">Kyzylorda-news.kz</a> Осыдан тура 32 жыл бұрын егемендіктің белгісі – Ту, Елтаңба және Әнұран бекітілді. Мемлекеттік рәміздер ел рухын асқақтатып, ұлттың бітім-болмысын айшықтай түсті. Аспаннан сәулесін төккен шұғылалы күні, еркіндікте қалықтап ұшқан қыраны бар көк туымыз көкте желбіреді. Әсем өрнектелген шаңырақ, қос қапталында қанат жайған пырақ – Елтаңба, ал, «Менің Қазақстаным» әні – тәуелсіздіктің теңдессіз нышаны. Осындай ұлт айбынын қалай қастерлесек те жарасады емес пе?Олар тәуелсіздіктің басты белгілері екені айтпаса да белгілі. Бейбіт елдің рәмізін жасап, оны халық талқысына салу, арнайы құрылған мемлекеттік комиссияның сараптамасынан өткізу маңызды міндет еді. «Туымыздың бейнесі қандай болады?», «Елтаңбаның ерекшелігі ше?», «Әнұранымыз бойға қуат, ұлтқа рух беріп тұра ма?» деп талай жан егемендіктің елең-алаңында ұйқы қашырған болатын. Көне түркі дәуірінен бергі ХV ғасырдағы Қазақ хандығының өз байрағы болған.2007 жыл, 4 маусым. Астана қаласы. Дәл осы күні рәміздердің 15 жылдығына арналған «Менің Қазақстаным» республикалық жастар форумы өтті. Осы күннен бастап «Қазақстан Республикасының мемлекеттік Рәміздері туралы» Конституциялық Заң қабылданып, еліміздегі Мемлекеттік мерекелер саны тағы да көбейген-ді. Бұл күн – Ұлы даланың тарих беттерінде өзіндік орны қалған күн. Ал, мерекелік датаны атап өту жыл сайын дәстүрлі үрдіске айналды.Бала күнімізде үлкендер осы үш нышанды ерекше қастерлеуге, қадірлеуге тәрбиеледі. Бойымызға сіңіріп өсірді. Елтаңба бейнеленген 1 теңгелік монетаның өзін жерден көрсек, биікке қоюға асығатынбыз. Бұл да, киелі дүниенің бірі болды. Қазірдің өзінде жерге тастамай қастерлей ұстаймыз. Туымыздың желбіреп тұрғанынан қуат аламыз. Әнұран орындала кетсе, бейсана түрде оң қолымызды жүрекке қойып, рухымызды асқақтатамыз. Ал, түрлі сайыста орындалған әнұран әрбір қазақтың құлағынан кіріп, бойын алары сөзсіз. Тек, белгілі бір мерекеде емес, оқу ошақтарында сабақ басталмай оқушылар бойын тіктеп, қолын жүрегіне қойып әуелете таңын атыратын-ды. Тіпті, кей мектепте үзіліс қоңырауының орнына әнұранның дауысы сыңғырлады. Керемет емес пе? Қазір ауыл болсын, қала болсын туымыз түстес мектеп формасын арнайы тіктіреді. Қазақы оюын да, жейдесінің бір бөлігіне жабыстырады. Соңғы үлгіде шыққан сәнді қазақи киімдерге қарап, еріксіз қуанамыз. Қай жерде болмасын ұлттық нақышымызды көргенде бойдағы қанымыз еріксіз тулайды. Мақтаныш, қуаныш, сүйіспеншілік сезімі Отанға деген құрметті одан әрі тасытатындай. Қай кезде болмасын, қазекемнің менталитеті шекарадан аспаған. Жерден нанды жолай көтермей кетпейтін қазақ жоқ. Сол секілді туымыз да жерде жатпайды, әнұран да ескі таспада қалмайды. Отанын қалай сүйсе, құндылығын да солай дәріптейтін Ұлы даланың халқымыз. «Ел» дегенде ең алдымен рәміздер көз алдымызға оралатыны да осыдан.Біз Тәуелсіздігімізді алып, бейбіт елде марқаятын күнді армандадық емес пе? Рәміздер – ұлт тұтастығының беделбедері, тәуелсіздігіміздің басты құжаты. Көкке қалықтаған туы, айдары айшық Елтаңбасы, құлақтан кіріп бойды алған Әнұраны бар Тәуелсіз елдің ынтымағы жарасқан халқымыз. Еліміздің өз алдына дербес мемлекет екенін айғақтайтын, қазақ халқының дарқандығы мен кеңдігін бейнелейтін төл нышандарды құрметтеу – Отанға деген сүйіспеншіліктің, жоғары азаматтығымыздың көрінісі болып қала бермек.Айнұр Қазмағанбетова

Егемендіктің белгісі – рәміздерді мақтан етемін

<a href="https://kyzylorda-news.kz/">Kyzylorda-news.kz</a>&nbsp; Қызылордалық «Қайсар» кейінгі алты ойынды нәтижелі өткізді. Үшеуінде жеңіске жетсе, қалғанында тең түсті. Нәтижесінде турнир кестесінде тоғызыншы орынға көтерілді. Алғашқы бестікте келе жатқан командаларға жақындап, жанкүйерлерді де рухтандырып келеді.Өткен сенбіде қызылордалық клуб Қазақстан Премьер-лигасының оныншы турында Қостанайда жергілікті «Тобыл» командасымен ойнады. Қарсылас ұжым биыл бас жүлдеге үмітті. Десе де кешегі ойында олардың тым белсенділігі байқала қойған жоқ.Кездесуде қарсылас командалар толассыз шабуылдар ұйымдастырды. Кейбірінде сәттілік жетіспей жатса, енді бірінде қақпашылар әбжілдік танытты. Осылайша бірінші кезеңде таблодағы есеп өзгеріссіз қалды. Екінші кезеңің алғашқы минуттарында «Қайсардың» белсенділігі айқын аңғарылды. Ойыншылар қос қанаттан шабуыл жасап, гол соғатын мүмкіндікті іздеді. Осындай сәттердің бірінде &nbsp;Валерий Громыко өзіне берілген мүмкіндікті мүлт жібермеді. Бұл – Беларусь футболшысының қызылордалық клуб сапындағы үшінші голы.Ойынның 76-минутында қостанайлық командадан Ислам Чесноков таразы басын теңестірсе, 92-минутта «Қайсар» шабуылшысы Шохназар Норбеков жеңіс голын соғып кетті. Осылайша қызылордалық клуб қарсыласын 2:1 есебімен тізе бүктірді.Айта кетсек, ел біріншілігінде «Тобылмен» өткен кейінгі үш ойында «Қайсар» бірде-бір ұпай жоғалтқан жоқ.Аталған турдағы өзге ойын нәтижелері төмендегіше: «Ордабасы» – «Жетісу» 3:1, «Тұран» – «Ақтөбе» 0:1, «Елімай» – «Қызылжар» 1:1, «Қайрат» – «Шахтер» 4:2, «Жеңіс» – «Атырау» 0:1.Енді алдағы он бірінші тур ойындары 15 және 16 маусым күндері өткізіледі.Әділжан Үмбет

«Қайсар» жеңіс төрінде

<a href="https://kyzylorda-news.kz/">Kyzylorda-news.kz</a> «Адамның бір қызығы – бала деген» деп хакім Абай айтқандай, бала – өмірдің жалғасы һәм ата-ананың көз қуанышы. Тектілігі тегінен тараған қазақ ұлты баланың тәлім-тәрбиесін, қауіпсіздігін салт-дәстүрімен ұштастыра отырып, ықылым заманнан ерекше көңіл бөлген. Себебі, ұлттың болашағы, бақыты мен бағы, ертеңге деген сенімінің кепілі де – бала екенін әубастан ұққан. Сан-мың жылдар өтсе де, нық ұстанымынан тайқымаған халқымыз бала бақытының бостан болашағына байыппен бағдар жасап, баса мән беріп келеді. Жуырда еліміздің түкпір-түкпірінде балаларды қорғау күні аталып өтті. Бүлдіршіндерге бақыт сыйлаған мереке Қазалы ауданында да ерекше тойланды.1 маусым – Халықаралық балаларды қорғау күніне орай Қазалы ауданындағы Оқушылар үйінің ауласында өткен ауданның басты шарасына жиналған жұрттың қарасы қалың болды. Шарада Әйтеке би кентінің өнерлі де, озық балалары өнер көрсетіп, қолдан жасаған түрлі бұйымдардан көрме ұйымдастырылды.Кеш қонағы болған Қазалы ауданы әкімінің орынбасары Дәурен Тлеумбетов пен аудандық мәслихат төрағасы Ғазиз Әліш бастаған бірқатар азамат балалардың шығармашылығына оң бағасын беріп, болашақта елдің үмітін ақтайтын азамат болып өсулеріне тілектестігін жеткізді.Мұнан соң Дәурен Оңғарбайұлы сахна төрінен орын алып, 1 маусым – Халықаралық балаларды қорғау күнімен құттықтады.<blockquote>– Бүгінде баршамыздың алдымызда тұрған зор міндет – ұрпаққа заманауи білім беріп, салауатты өмір салтын ұстануға жағдай жасау. Сол себепті де, біздер барынша балабақшада, мектепте, мектептен тыс уақытта балалардың тиісті күтім мен қамқорлық көруіне жұмыс жасап келеміз. Бұл бағытта елімізде жеткіншектердің білім алуына, шығармашылығын шыңдауына барлық жағдай жасалған. Біздің көңіліміздің гүлі, көзіміздің нұры, болашағымыз – Сіздерсіздер! Сондықтан да, сапалы білім алып, еліміздің дәулетті, жеріміздің сәулетті болуы үшін белсенділік танытып, еліміздің одан әрі гүлденуіне өз үлестеріңізді қосуларыңыз керек, – деген аудан әкімінің орынбасары жас өскіндерге деген қамқорлық алдағы уақытта да, жалғасын таба беретіндігін жеткізді.</blockquote>Салтанатты шарада өнерпаздар бүлдіршіндер әуелете ән шырқап, мың бұрала би биледі. Бұдан бөлек, оқушылар үйінің алаңында аудан кәсіпкерлері бүлдіршіндерге көтеріңкі көңіл-күй сыйлап, тегін балмұздақ таратты.Әлем – балалармен мейірімдіАталмыш мереке қарсаңында ерекше балалар да ескерусіз қалмады. Қазалы ауданына сыйлы, әрі белді кәсіпкерлерінің бірі – Сәкен Құлпыбайұлы аудандағы балғындарға арнап, «Әлем – балалармен мейірімді» атты қайырымдылық шара өткізді.Игі шараға арнайы барған Қазалы ауданы әкімінің орынбасары Дәурен Оңғарбайұлы бүлдіршіндерді мерекемен құттықтап, мерекелік шараға ұйытқы болған кәсіпкерге аудан әкімі Мейрамбек Шермағанбеттің «Алғыс хатын» табыстап, шынайы ризашылығын жеткізді.Өз кезегінде бар баланы бақытқа бөлеген шарада ата-аналарда жылы лебізін жеткізіп, Сәкен Құлпыбайұлына және С.Бабанаев бастаған әлеуметтік қызметкерлерге ризашылықтарын білдірді.<blockquote>– Бүгін ерекше күн болды. Балаларымыз қуанып қалды. Керемет көңіл-күй сыйлаған кәсіпкерге алғысымыз шексіз. Несібесі молайып, кәсібі өркендей берсін деген тілек білдіреміз. Барлық бала дәл осылай бақытты болуға лайықты. Барша балғынды, ата-ананы балалар мерекесімен шын жүректен құттықтаймын», – дейді олар.</blockquote>Мерекелік кеште балалар ән айтып, би билеп, көңіл көтерді. Сондай-ақ, тегін таратылған балмұздақтан дәм татып, үйлестірілген ойыншықтарды алып, ерекше әсерге бөленді.Айта кетейік, мерекелік дастарханға Әйтеке би кенті, Қазалы қаласы және барлық ауылдық округтерден мүмкіндігі шектеулі балалар, үйде арнаулы әлеуметтік қызмет көрсету бөлімшесінен қызмет алушы 112 бала қатысты.Балақайларға көңіл бөліндіБүлдіршіндерге бақыт сыйлаған шаралардың бірі Р.Бағланова атындағы аудандық мәдениет орталығында, «Бар жақсылық балаларға» тақырыпта өтті. Мерекелік шараны аудандық мәдениет және тілдерді дамыту бөлімінің басшысы Болат Әбенұлы құттықтау сөз сөйлеп, ашып берді.Р.Бағланова атындағы аудандық мәдениет орталығы жанындағы «Ақжелең» би, «Ән», «Жыраулар», «Домбыра» үйірмелерінің өнерпаздары өнер көрсетіп, ата-аналарға, балаларға көтеріңкі көңіл күй сыйлады.Шара мәдениет орталығының ғимараты алдында «Асфальтқа сурет салу» бойынша балалар өз қиялдарындағы суреттерін асфальтқа салса, «Балақай» қуыршақ үйірмесі балаларға арналған ертеңгілік ұсынды. Бұдан бөлек, «Кино TIME» бағыты бойынша бүлдіршіндерге Led экраннан қазақ ертегілерінің топтамасы көрсетілді.Кеш соңында өнер көрсеткен өнерпаздарға кәсіпорын басшысының Алғыс хаты мен сыйлықтар табысталды.Р.Бағланова атындағы аудандық мәдениет орталығы жанындағы «Шабыт» еріктілер тобының ұйымдастыруымен аз қамтылған отбасы балаларына мерекелік көңіл күй сыйлау мақсатында «Агро өркен» жауапкершілігі шектеулі серіктестігі басшысы Мерей Бердібайұлы және жеке кәсіпкер Мақпал Назарқанқызының демеушілігімен сыйлықтар табыстады. Балаларға тегін тәттілер, сусындар таратылды.Жас суретшілер байқауыОсы уақытта Әйтеке би кенті орталығында «Бақытты отбасы» партиялық жобасы аясында аудандық «Amanat» партиясы филиалы мен «Жастар рухы» ЖҚ аудандық филиалының ұйымдастыруымен «Бақытты балалық шақ» атты жас суретшілер байқауы өтіп жатты.Мереке қарсаңында өткен байқаудың мақсаты – балалардың шығармашылық қырларын ашып, танымдық қызығушылықтарға ынталандыру және туындыларын көпшілікке жария ету арқылы жас суретшілердің белсенділігін арттыру болды.Сурет салуға қабілеті бар мектеп оқушылар бақ сынаған сайыста жас суретшілерге Жанқожа батырдың 250 жылдық мерейтойына байланысты тақырып берілді. Суретшілер шығармашылық қабілеттерін пайдалана отырып, бірі батырдың портретін салса, енді бірі кесенесін салды.Нәтижесінде бірінші орынды№25 мектептің 10 сынып оқушысы, қылқалам шебері Нұрдина Қуантаева жеңіп алды. Екінші орынға №249 лицейдің 8 сынып оқушысы, Дильназ Жанназар жайғасса, үшінші орынды №17 мектептің 6 сынып оқушысы Ақтоты Кеңесбай місе тұтты.Жеңімпаздар жүлделі дипломмен және арнайы сыйлықтармен марапатталды. Сондай-ақ бірқатар қатысушыларға түрлі тақырыптағы номинациялар бойынша дипломдар мен сыйлықтар табысталды.

Бүлдіршіндер – ұлттың болашағы 

<a href="https://kyzylorda-news.kz/">Kyzylorda-news.kz</a>&nbsp; Бүгін аудан әкімі Берік Сәрменбаевтың қатысуымен Мемлекеттік рәміздер күніне орай салтанатты іс-шара өтті.Мемлекеттік Гимн орындалғаннан кейін аудан басшысы жиналған жұртшылықты мерекемен құттықтады.<blockquote>– Мемлекет басшысы Қасым-Жомарт Кемелұлы Тоқаев «Еліміз үшін Көк байрағымыздың, Елтаңбамыз бен Әнұранымыздың мән-маңызы айрықша. Бұл құндылықтар бойымызға зор мақтаныш және жауапкершілік сезімін ұялатады. Мемлекеттік рәміздерді қадірлеу – әр азаматтың қастерлі парызы» деп атап өтті. Қасиетті нышандарымызда қазақтың мың жылдық арман-тілегі, мақсат-мұраты түгел топтасқан. Көк байрағымыз – мызғымас мемлекеттіліктің белгісі. Елтаңбамыз – азаттықтың айшықты көрінісі. Ал, Гимн – еркіндік пен елдіктің үні. Тәуелсіздіктің осы үш символы халқымызға ерекше рух береді және кеудемізге мақтаныш сезімін ұялатады. Мемлекеттік рәміздер халықтың рухы мен айбатын білдіріп қана қоймай, сол мемлекеттің әлемдік өркениет көшіндегі орны мен деңгейін де белгілейді. Сол себепті, Елтаңба мен Көк Туға, Гимнге тағзым – тарихқа тағзым, оларға құрмет – елге құрмет. Тәуелсіз еліміздің Рәміздерін қадірлеу – Қазақстанды Отаным деп есептейтін әрбір азаматтың асыл парызы, – деді Берік Әбдіғаппарұлы.</blockquote>Салтанатты іс-шарада аудан дамуына үлес қосып жүрген азаматтар мен жастар облыс және аудан әкімінің «Алғыс хатымен» марапатталды.Мемлекеттік рәміздер күніне арналған іс-шара жастар арасында жүгіру марафонына жалғасты.

Мемлекеттік рәміздер күніне орай салтанатты іс-шара өтті

<a href="https://kyzylorda-news.kz/">Kyzylorda-news.kz</a> &nbsp; Сырдария ауданы әкімдігінің қолдауымен, аудандық мәдениет және тілдерді дамыту бөлімінің ұйымдастыруымен композитор, ҚР еңбек сіңірген қайраткері, «Құрмет» орденінің, «Шапағат» медалінің иегері, Қызылорда облысының, Сырдария ауданының Құрметті азаматы, Қазақстан Композиторлар Одағының мүшесі &nbsp;Рамазан Таймановтың 70 жасқа &nbsp;толу мерейтойына арналған ІІ облыстық «Сыр әуендері» атты сазгерлердің жабық ән конкурсының гала концертті өтті.&nbsp;Талай дарын иелерінің бесігін тербеткен дархан даламыз қасиет пен тектіліктің мекені саналған Сыр елі өшпестің отын маздатқан өнер жұлдыздарын дүниеге әкелді. Өнер саңлақтарының ордасына айналған осынау киелі топырақтан елге танымал қаншама тұлғалар шықты. Соның бірі де бірегейі қазақ музыкасының ірі тұлғаларының бірі Рамазан Тайманов. Қазақ музыка өнеріне өзіндік қолтаңбасымен, сазды әуенімен келген талант иесінің есімі республика жұртшылығына «Қазақ қызы» әнімен танымал.&nbsp;Сахна төріне көрермендердің ыстық қошеметіне бөленген композитор Рамазан Сағындықұлы мен ІІ облыстық «Сыр әуендері» атты сазгерлердің жабық ән конкурсына қатысып, жүлделі орындарға ие болған талапкерлер шақырылып, марапаттау рәсімі жасалды. Үздік композиторлардың қатарында қызылордалық Талғат Нағашыбаев, қазалылық Сәкен Кермеш, қызылордалық Жарылқасын Оразғұлов, Ғайния Дауылбаева, қазалылық Жібекәлі Бектұрғанов, жаңақорғандық Оразғали Бидашев, қызылордалық Нұрсәуле Калмаханова, қармақшылық Қанат Туребеков, қызылордалық Еркебұлан Молдажанұлы болды.Сазгерлерді байқаудың қазылар алқасының төрағасы Рамазан Тайманов құттықтап, қазақ өнеріне қолдау білдіріп, музыка кешін ұйымдастырған аудан әкіміне алғысын білдірді. Өз кезегінде аудан әкімі Берік Сәрсенбаев мерейтой иесін құттықтады.– Рамазан Сағындықұлы – еліміздің мәдениет және өнер саласында жүріп адами асқақ қасиеттерді бойына сіңіріп, халықтың ыстық ықыласына бөленген азамат. Алматыдағы П.И.Чайковский атындағы музыкалық училищеде, Қорқыт ата атындағы Қызылорда мемлекеттік университетінде білім алып, туған жерде еңбек жолын бастады. Тереңөзек кентіндегі кәсіптік-техникалық училищеде «Гүлдерайым» ансамблін құрып, облыстық, аудандық байқауларға қатысып, жүлделі орындар иеленді. Аудандық мәдениет бөлімінде автоклуб меңгерушісі болып, сала жұмысын жандандыруға үлес қосты. «Қазақ қызы» әнімен елге танылды. 1996 жылы Эстонияда өткен дүниежүзілік балалар шығармашылығы фестивалінде «Қызылорда жастарының әні» таңдаулы деп бағаланып, «Алтын қорға» жазылып алынды.&nbsp;1999, 2000 жылдары республикалық «Жас қанат» байқауы мен «Азия даусы» фестивалінде «Қазағым-ай», «Қорқыт-қобыз» әндері бірінші орын алып, «Ең үздік композитор» атағын иеленді. Еліміздің рухани-мәдени саласының дамуына ерекше үлес қосып, 40-қа жуық әні, оның ішінде «Қазақ қызы», «Сен мені кінәлама», «Махаббат көктемі», «Қазағым-ай», «Жаңбырлы түн», «Боздақтар», «Салтанат», «Қорқыт-қобыз», «Қызылорда жастар әні», «Айналайын» тағы басқа лирикалық әндері жұрттың жүрегіне жете білді. &nbsp;Биыл Қызылордадағы «Өнер» орталығының ашылуында облыс әкімі Нұрлыбек Машбекұлы Нәлібаев «Қызылорда облысының Құрметті азаматы» атағымен марапаттап, сый-құрмет көрсетті. Мәдениет пен өнер саласындағы қажырлы еңбегіңізбен «Құрмет» ордені, «Шапағат» медалімен марапатталып, ҚР Еңбек сіңірген қайраткері, Қорқыт ата атындағы Қызылорда университетінің «Құрметті Профессоры» атандыңыз. Сізді 70 жасқа толған мерейтойыңызбен шын жүректен құттықтаймын, – деген аудан әкімі, &nbsp;мерейтой иесіне аудан халқы атынан тұлпар мінгізді.&nbsp;Гала концертте байқауда жеңімпаз атанғандарды композиторлар Рамазан Тайманов пен Сәбит Ұлықпанұлы марапаттады. Нәтижесінде балалар тақырыбы бойынша жүлделі үшінші орынмен және 50 мың қаржылай сыйлықпен Еркебұлан Молдажанұлы, Қанат Туребеков және Нұрсәуле Қалмаханова марапатталды. Екінші орын және 100 мың сыйлықты &nbsp;Талғат Нағашыбаев алса, бірінші орын және 150 мың теңге Бақыт Бидашқа бұйырды. Еркін тақырып бойынша жүлделі үшінші орынмен Оразғали Бидашев және Жібекәлі Бектұрғанов, екінші орынмен Ғайния Дауылбаева, бірінші орынмен Сәкен Кермеш марапатталса, бас жүлдені Талғат Нағашыбаев иеленді. Композиторларға тиісінше қаржылай сыйлық берілді. Гала концертте жеңімпаз композиторлардың үздік әндері орындалды.&nbsp;Бибісара ЖАНӘЛІ

"Сыр әуендері" байқауының үздіктері марапатталды 

<a href="https://kyzylorda-news.kz/">Kyzylorda-news.kz</a> Математика нақты ғылымдар саласында алатын орны орасан зор. Оны ғылымдардың іргетасы деп бағалайды. Ғылымның бұл саласы физика, химия, биологияны дамытуға жол ашады. Математика кез келген ғылым саласына жан бітіріп, бойына қан жүгіртеді. Осы саланы тереңнен меңгеріп, шәкірт тәрбиелеп, түрлі байқаулардың төрінен көрініп жүрген ұстаздардың бірі –Сәбит Бәймен. Ол Қызылорда &nbsp;қаласындағы Назарбаев Зияткерлік мектебінің мұғалімі.&nbsp;Педагогика саласында 6 жылдан бері қызмет атқарып келеді.Үнемі ізденістің үстінде жүретін ұстаз жыл сайын түрлі байқауларда бақ сынайды. Бұл оның білімі мен біліктілігін шыңдауға септігін тигізеді екен. Мәселен, биыл Сәбит Бәймен халықаралық математика, физика және информатика мұғалімдері арасында өткен IMPACT Olympiad ашық шығармашылық байқауында екінші орын алды.Өткен жылы аталған байқауда бірінші орын алған едім. Биыл екіншіорын бұйырды. Сондай-ақ, мен былтыр А.Жұмаділдаев атындағы халықаралық байқауда екінші орын алған едім. Одан басқа көптеген олимпиадаларда алдыңғы орындардан көріндім.Математикалық есептеулердің арқасында қазір технология қарыштап дамып келеді. Адамдар қауіпсіз үйлер салып, ғарышты зерттеуге мүмкіндік алды. Ол адамның жалпылау, анализ жасау, заңдылықтарды анықтау, тез ойлау, шешім қабылдау, жоспарлау, абстракты ойлау қабілеттері және логикасы, интеллектін дамытады.Математиканың шығу тегі және даму барысы ұзақ мерзімге созылды. Арифметиканың өзі дербес ғылым ретінде бірітіндеп қалыптасты. Оның негізгі сұғымы өте ертеде пайда болды. Геометрияның бастапқы қарапайым ұғымдары табиғатты бақылау, тікелей практикалық өлшеу тәжірибесінен алынған. Оған байланысты бастапқы мағлұматт барлық халықта бар, − дейді жеңімпаз ұстаз.Жалпы, математиканың дамуы ерте кезден басталады. Ол біздің заманымыздан бұрынғы 7-6 ғасырларға дейін созылды. Ол уақытта математика адамзат практикасы мен тәжірибесіне тікелей тәуелді еді. Нәтижесінде сол дүниелерден қорытылған ережелер жинағынан тұрды. Келесі сатысы математиканың өз алдына дербес теориялық ғылым болып туу, қалыптасу кезеңін қамтиды. Онда арифметика, геометрия, алгебра, тригонометрия айрықша теориялық пән болып қалыптасты.Ғалымдар аталған уақытта тұрақты шамалар математикасының, кейде элементар математика кезеңі деп бағалайды. Ол екі мың жылға жуық мерзімге созылып, шамамен ХІІ ғасырда аяқталды. Айнымалы шамалар математикасы немесе жоғары математиканың туу, қалыптасу кезеңін оның келесі сатысы ретінде саналады. Бұл ХІІ ғасырда басталып, ІХ ғасырдың екінші жартысына дейін созылды. Жиындар теориясына байланысты анализдің, геометрияның және алгебраның жаңа сападағы салалары шыққаннан кейін, математиканың негізгі мәселелерін жалпы қарастыру кезеңін төртінші кезеңге жатқызуға болады.Сәбиттің математикаға деген қызығушылығы бала кезден басталған. Оған анасының ықпалы да зор болған екен.<blockquote>−Анам математика пәнінің мұғалімі, өте шығармашыл адам. Үйімізде екі қабырғаға салынған сөрелер кітапқа толы. Олардың арасында математикаға байланысты кітаптар өте көп. Алғашқыда аталған кітаптардың суретін қарайтын едім. Кейіннен ішіндегі есептерін шығара бастадым. Сыныпта алдыңғы қатардан көріндім. Осылайша математика мені өзіне баурап алып кетті. Жаңа айтқанымдай, математика химия, физика секілді жаратылыстану пәндеріне әсерін тигізеді. Одан қалды қазақ тілі пәніне де әсері бар деп ойлаймын. Мәселен, сөздің, сөйлемнің құрылымы, фонетикалық талдаулар секілді талаптарға әсері бар. Яғни, математиканы барлық жерде қолдануға болады, оның пайдасы көп. Менің математиканы терең білуіме анам мен ұстаздарым әсер етті, − дейді ол.</blockquote>Жер шарында қызықты қаншама ғылым саласы бар.&nbsp;Оған қатысты қызықты болжамдар, деректер айтылады. Солардың арасында математика саласы ерте ғасырдан бері адамзат баласымен бірге жасап келеді. Осы мақсатта қаншама атақты ғалымдар жемісті еңбек етті.Оны білу үшін ғылым, технология дамыған елдерді білу керек. Менің ойымша, математикасы дамыған ел өркениет шыңына шыға алады. Олардың қатарында Қытай, Сингапур, Оңтүстік Корея, Ресей, АҚШ секілді алдыңғы қатарлы мемлекеттер бар. Бүгінде бұл салаға деген жастардың қызығушылығы артып келеді.Оған бір жақты баға беруге болмайды.&nbsp;Қазір көптеген халықаралық байқауларда топ жарып жүрген қазақстандық өрендер аз емес. Олардың қабілет деңгейі әлемде жоғары бағаланып жатады. Жалпы, математика әрбір жастың білімін жетілдіруіне оң ықпалын тигізеді деген ойдамын. Дегенмен кейбір оқушылар оған қызыға бермейтінін жасыра алмаймыз. Мен өзім сабақты бастар алдында оған ерекше құрметпен қараймын. Оған өзімнің қызығушылығым зор. Айта кетсем, адам білмейтінінен қорқады, сондықтан оны жек көреді. Сол себепті оқушыларға есептің оңай екенін, қолынан келетінін, өмірдегі қолданысын көрсету арқылы қызықтыруға тырысамын, − дейді.Мейрамгүл ДАУЫЛБАЙҚЫЗЫ&nbsp;&nbsp;

Математика - ғылымдардың іргетасы 

<a href="https://kyzylorda-news.kz/">Kyzylorda-news.kz</a> Қызылорда ашық университетінің кітапхана қоры жаңа кітаптармен толықты. Бағалы сыйлықты Халықаралық туризм және меймандостық университетінің профессоры Жандос Есіркепов тапсырды.<blockquote>– Ғалым Жандос Мергенбайұлы кітапханамызға авторлық үш кітабын сыйға тартты. Атап айтсақ, «Дене тәрбиесінің теориясы және әдістемесі», «Дене шынықтыру», Оқу орындарында спорт секцияларын ұйымдастыру негіздері» және «Әбдісалан Нұрмаханов: спортшы,ғалым,бапкер» кітаптары. Өз еңбегінде дене тәрбиесі мен спорттың ғылыми бағыттарына теориялық негіздеме берген. Әбдісалан Нұрмаханов туралы тың деректерді жинақтап, Қазақстан боксының тарихынан мәлімет жинақтаған. Оқулықтар колледж, университет студенттері мен оқытушыларға құнды ақпарат беретініне сенімдімін. Университет кітапханасының есігі оқырмандарға әрдайым ашық,– деді кітапхана меңгерушісі Ақзира Сейіл.</blockquote>Қызылорда ашық университетінің кітапханасында әдебиеттер саны 214525 дананы құрайды. Кітапхана қоры жалпы білім беру, гуманитарлық, әлеуметтік-экономикалық, арнайы, жалпы кәсіптік пәндер бойынша оқулықтар, оқу- әдістемелік және ғылыми әдебиеттер, көркем әдеби шығармалар, анықтамалықтар және энциклопедиялармен қамтылған.

Қазақстан және Қызылорда облысының жаңалықтары