<a href="https://kyzylorda-news.kz/">Kyzylorda-news.kz</a> &nbsp;Еңбек пен бақыт – егіз ұғым. Еңбектің көзін тапқандар ғана бақытқа қарай жақындай түседі. Айтуға оңай шығар, бұл істе екінің бірінің жолы бола бермейді. Өмірде бірі бастаған ісін аяғына жеткізбей, әрі-сәрі күй кешсе, бірі қиыннан қиыстырып, дөңгелетіп әкетуде.«Қалауын тапса, қар жанады» демекші, кісілік келбет пен кәсіпкерлік қызметті қатар алып жүргендер арамызда аз емес. Олардың бұл әрекеті ауыз толтырып мақтауға тұрарлық дүние. Себебі, мақсатына жету үшін асқан қажырлық пен темірдей табандылық талап етіледі. Ал, айтылған жолдан сүрінбей өткендер ғана түбінде татқан бейнетінің зейнетін көреді. «Тәуекел түбі – желқайық, өтесің де кетесің, қайғы түбі – тұңғиық, батасың да кетесің» демекші, батылдық пен сенімді серік етіп, кәсіп бастап, оның несібесін көріп отырған жандар қаншама.<blockquote>«Еңбектің көзін тапқан, бақыттың өзін табады» деген. Нарық қоғамында бәсекелестер қатарынан бәсі озып, өз өнеркәсібін өрістетіп отырған Қазалы ауданының жас кәсіпкері Руслан Бөлекбайды көпшілік таниды. Бүгінгі әңгіме Президент Қасым-Жомарт Тоқаевтың өзі марапаттап жатып: «Қазақтың келешегі өздеріңдей жалынды жастар қолында» деген сенімді аманаттаған азаматқа арқа сүйеп, абыройын асқақтауға атсалысқан асыл жан, ардақты әке туралы болмақ.</blockquote>Тау баласы тауға қарап өседі. Тегінде қазақтың тамырына бойлап, шежіресін тарқатуы текке қалыптаспаған түсінік. Кейінгі ғалымдар жылдар бойы генетикалық сараптама жасап, жеткен тұжырымды, халқымыз бір ғана дәстүрге сыйғызғанына таң қаласың. Психологтар айтып жүрген әр адамның бойындағы қабілетін ояту, ашу, дамытуға келгенде көбіміз кешеуілдік танытатынымыз бар. Біздің оқиға балаға қажеттілікті материалдық құндылықпен өлшейтін үлкендердің «ананын баласы» дегенді айтпас бұрын, ойлануға жетелейді.Жаңалық Бөлекбаев – теміржолшы. Өмір бойы мамандығын мақтанышына айналдырып, абыройды алыстан іздемей, қарапайымдылықпен күй кешкен жан. Қызығы, ол туралы туындыны қазақтың бәрі біледі. Өзі шыққан аудан орталығында, бір салада табаны күректей – 35 жыл талмай төр төгіп келе жатқан азаматтың әнге арқау болуына не себеп болды екен? Жауап бізді де қызықтырды.Қазалының Бекарыстан би ауылында дүниеге келген Жаңалық туған жерін түлетуге аянбай атсалысқан Қаман пен Күнжәмила Бөлекбаевтар отбасының кенжесі.Германияда әскери борышын өтеген соң, Ақтөбедегі теміржолшылар даярлайтын институтты вагон шаруашылығы мамандығы бойынша бітіреді. Жоғары білімді жас маман 1989 жылы Қазалы вагон депосына жұмысқа орналасады. Аталмыш мекемеде сол кезден бері слесарь, бригадир, цех шебері болып жұмыс істеп келеді.Жары – Нәйлә Әбдімұратқызы «Алпамыс» бөбекжай-балабақшасында әдіскер. Отбасында алтын асықтай ұл-қызды бірге тәрбиелеп отыр. Сөз басында айтқан үйдің тұңғышы Руслан – «Ақмешіт» университетінің түлегі. Еңбек жолын мемлекеттік қызметте бастаған ол облыс, ауданда жауапты істер атқарды. Қазалы агроколледжінен жол басқару мамандығын алған Жасұлан бүгінде мұнай саласында. Ақгүл Қорқыт ата атындағы Қызылорда мемлекеттік университетін, магистратурасын қызыл дипоммен тәмамдаған. Мамандығы бойынша су шаруашылығында еңбек етуде.Баларының қай-қайсысы да елгезек, көмек сұраған жанға қолындағы соңғы дүниесін қиып беруге даяр болып өскенін бағамдадық. Руслан жасаған қайырымдылық әркеттерді қазалылықтар жыр қылып айтады. Кәсіпкерден көмек сұрайтындар, тұрақты хабарласып, хал-жағдайын жеткізетіндер барын білдік. Бизнесменнен бұл туралы сұрағанымызда, қысқа ғана: «Ол біздің отбасылық ұстанымымыз. Ұяда алған тәлім-тәрбиеміз» , – деді. Ата-анасы туралы айтып беруін өтінгенімізде: «Анам – тілекшім, әкем – ең үлкен қамқоршым. Басқалардың қандай екенін білмеймін, олардың отбасында бір-біріне дауыс көтеріп ұрысқанын, не кемсітіп, төмендеткенін көрмеппін. Атам әкеме: «Ала жіпті аттама. Қолыңда бармен бөліс. Алла келер жерін кеңітеді» дегенді аманаттапты. Әкемнің өміріне арқау болған сөз біздің отбасының бұлжымас қағидасы, берік ұстанымына айналды», – деді. Төрелі сөздің төркінін кейін ұғындық. Жақсы адамдар туралы айтылғанда ойға оралатын Төреғали Төреәлі айтатын «Менің ағам» деген әдемі ән бар ғой. Сол туындыны авторы Жаңалық ағамызға арнап шығарған екен.«Сыйласу үшін екі адам, Бір тусын деген бос ұғым» деген екі адамның риясыз араластығын осынау жолға сыйдырған әннің кейіпкеріне өлмес өнер мұраны не үшін қалдырғаны туралы білгіміз келгенде, Жәке жақындық жөнінде айттып, тума талант туралы жақсы пікірімен бөлісті.«Қазақтың маңдайына біткен біртуар өнер иесі еді. Ғұмыры қысқа болды. Екеуіміз танысқан аз уақыт бізге көп дүниені ұғындырды»,– деді. Ініге аға, кішіге пана болу алмағайып заманда, расында, үлгі болар іс. Туғанына есеппен араласатындар көбейген тұста «аға» деген алғаусыз көңілге лайық болып, Дархан Оразымбетовке қамқорлық танытып, баспана салып, енші беру кез-келгеннің қолынан келе бермесі анық. Сүйсіндік, сүйіншілеп, оқырманға жеткізуге асықтық.Бізді қызықтырған бизнес те, Жаңалық әкенің ұсынысынан басталыпты. Байыптадық.<blockquote>– Аудандағы жетекші бөлімде қызмет етіп жүрген кезім. Ертемен кетеміз, кеш бата келеміз. Кейде отбасы мүшелерін көріп те үлгермейміз. Жұмыс талабы сондай. Демалыссыз, үзіліссіз, үздіксіз қозғалыс. Осындай күндердің бірінде шаршаңқы түрімді көріп, әкем жанына шақырып алып: «Мына жұмысыңды қойсаң қалай болады. Қазіргі уақыт мүмкіндіктер кезеңі ғой. Басқа салада өзіңді сынап көр», – деді. «Қалай болады екен?» деген ойда қалдым, – деп еске алады сол кезді.</blockquote>Алғашында абдыраған Русланға жергілікті өнім өндіру туралы ойды да әке салыпты.Бұрын-соңды ауданда дамымаған істі ілгерілету оңай шаруа емес. Алдымен оған деген толық түсінік, істі зерттеп-зерделеу, бәсекелестерді байыпты бақылау, білім алу, тәжірибе жинау, қажетті құрал жабдықтар мен шикізатты табу қажеттілігі туындайды.Ойға келген бастама оңай орындала қойсын ба, ізденіс үстінде жүрген жігіт 6 айдан астам уақытын, көлемді шығынын кетіреді. Баласының қабағындағы кіреукені көргенде айтқан пікірі перзентінің тауы шағылмай, биікке ұмтылуына түріткі болады.<blockquote>– Ұлым, қиындық болмаған жерде қуаныш ұяламайды. Сен бидай ексең, жерін өңдейсің, тұқымын себесің, суарасың, күтіп-баптайсың. Солай еткенде ғана өнім өсіп, бидай жеміс беріп, басын иеді. Бизнес те сондай. Бір ағам айтып еді, кәсіп – арбаның дөңгелегі сияқты. Кейде жай, кейде қатты айналады. Діттеген жерге жету үшін тек үнемі қозғалысын тоқтатпау керек. Іс бастадың ба, тастама. Махаббатыңды төк, бала-шағаңнан артық көр. Артыңда сені қолдайтын қуатты күш – отбасың бар». Тарқатудың да қажеті жоқ. Әр әке перзентінің үмітін осылай ұштаса, қиындық та, тосқауыл да еш нәрсеге кедергі келтіре алмас еді-ау.</blockquote>Кәсіпкерлікті оның ішінде, жастар кәсіпкерлігін дамытуға бағытталған жоба – «Бизнестің жол картасы – 2025» бизнесті қолдау мен дамытудың мемлекеттік бағдарламасы болып табылады. Қазіргі таңда бұл бастама жас кәсіпкерлерге біршама бағыт-бағдар беруде. Қазақстан әлемдік өркениет көшінен өз орнын алуы үшін отандық өнімдеріміз барлық жағынан талапқа сай болуы қажет. Ол үшін отандық кәсіпкерлерді барынша қолдау қажет. Жас кәсіпкер – ертеңгі аяғынан тұрған, әлеуеті күшті, халықаралық деңгейде жұмыс істейтін кәсіпкер қалыптастырушы орта. Барлық салада жас кәсіпкерлер қызметін дамытуға мән беріп, мемлекет тарапынан көрсетіліп отырған мемлекеттік қолдаудың белгілі бір үлесін мақсатты түрде олардың қызметін дамытуға және қолдауға бағыттау қажет. Себебі, жастар кәсіппен айналысу кезінде қаржылық, ақпараттық, білім, инфрақұрылым және осы секілді басқа да көптеген қиындықтарға кезігіп отырады. Бүгінгі таңда назар аударатын мәселе ауылдық өңірлерде жастардың кәсіпкерлік белсенділігін арттыру және жас кәсіпкерлерді мемлекеттік қолдау өзекті болып отыр. Оның ішінде, ең басты жайт – кәсіппен айналысу ережесінің қарапайым әрі түсінікті болуы. Яғни, қоғам тарапынан кәсіпкерлерге оң көзқарастың болуы.Нарық қалайтын өнімдерді шығару арқылы тиімді бизнес саласын құру отандық және шетелдік сату алаңында сүбелі орын еншілейтіні анық. Тіпті, қолыңыздағы ұялы телефон арқылы да жарнамалауды жолға қоюға болады. Өз ісін жақсы көру, уақыт пен қаражатты өз пайдасына жұмсай білу, жетістікте өмір сүру, биік мақсаттарды бағындыру – сәтті құрылған бизнестің жемісі.Адамды еңбекке баулып, алға қарай ынталандыру қашанда пайдалы. Жастарға кәсібінің нағыз маманы болуға және өз бастамасын жүзеге асыруға мүмкіндік пен жағдай жасасақ болғаны. Ал, табысты болу кәсіпкердің еншісінде.

 Қазалылық кәсіпкер сабын шығаруда

<a href="https://kyzylorda-news.kz/">Kyzylorda-news.kz</a> Қоғамдық сананың қалыптасу үшін де, уақыт талабына сай өзгеру үшінде оған ықпалды күш болады. Олар – өмірлік тәжірибесі мол аға буын. Қай қоғамда да &nbsp;алдыңғы буын өзінен кейінгілерге жол көрсетіп, бағыт береді. Дала заңы бойынша ел ішіндегі екеуара немесе руаралық дауларды әділ шешіп, жанжалдасқан екі тарапты мәмілеге келтіріп, татуластырыпты. Бұл дегеніміз қандай жағдайда да ақсақалдарымыз ел ішінің бірлігін сақтап қалуды көздеген.&nbsp;Бүгінде &nbsp;ел ісінде ақсақалдардың үлес салмағы басым. Тәуелсіздіктен соң қоғамдық институттар қалыптасты. Солардың бірі – ақсақалдар кеңесі. Бұл кеңес түрлі деңгейде нәтижелі жұмыс істеп келеді. Мұнда жиналған қауым &nbsp;сан-алуан мәселелерді талқылап, ұйғарымға келеді. Деректерге сүйенсек, ақсақалдар кеңесінің &nbsp;тарихы көне дәуірден басталған.&nbsp;Қазақ елінде тарихи рөл атқарған «<a href="https://kk.wikipedia.org/wiki/%D0%A5%D0%B0%D0%BD_%D0%BA%D0%B5%D2%A3%D0%B5%D1%81%D1%96">Хан кеңесі</a>», «<a href="https://kk.wikipedia.org/wiki/%D0%91%D0%B8%D0%BB%D0%B5%D1%80_%D0%BA%D0%B5%D2%A3%D0%B5%D1%81%D1%96">Билер кеңесі</a>» де өз бастауын осы ақсақалдар кеңесінен алады, бірақ айырмашылығы елеулі. «Хан кеңесі» мен «Билер кеңесі» аса шұғыл, ел басына қатер туған шақтарда болмаса, басқа кезде келісім бойынша белгіленген мерзімде өткізіліп отырған. Ақсақалдар кеңесі ауыл-аймақтың тұрмыстық, шаруашылық қажеттеріне орай кез келген уақытта өткізіле берген.Жақында Шиелі аудан әкімдігінің мәжіліс залында Шиелі аудандық ҚХА Ақсақалдар кеңесінің кезекті отырысы өтті. Кеңес отырысын Ақсақалдар кеңесінің төрағасы Исабек Байкенжеев ашып беріп, жүргізді. Әрмен қарай жиында жылдық жоспарға сәйкес маңызды мәселелер қаралды.Жиынға Шиелі аудандық Ақсақалдар кеңесінің мүшелері, Шиелі аудандық қоғамдық даму бөлімінің басшысы К.Есенбаев және бөлім әдіскері Г.Сейтова, Шиелі аудандық «Өскен өңір» газетінің бас редакторы Н.Пірімбет, облыстық «Қоғамдық келісім» КММ-нің Шиелі аудандық этносаралық сарапшысы Б.Өтебаев, жергілікті БАҚ өкілдері қатысты.Алдымен жиында Шиелі аудандық құрылыс, сәулет және қала құрылысы бөлімінің басшысы Дана Аман құрылыс саласындағы атқарылған жұмыстары мен алдағы міндеттері жайлы хабарламасын айтты.&nbsp;– Өздеріңізге мәлім, 2023 жылы бөлім бойынша 27 нысанға 2 млрд 808 млн 576 мың теңге қаржы бөлінді. Атап айтсақ, Еңбекші, Жиделіарық, Тәжібаев елді мекендерінің газ құбыры және орамішілік газ тарату желілерінің құрылысы пайдалануға берілді. Еңбекші елді мекені бойынша 3,9 км орташа, 13,4 км төменгі қысымды газ желілері және 9 дана ШГРП (шкафты газ реттегіш пункті) орнатылды. Сондай-ақ Жиделіарық ауылы бойынша 3,7 км орташа, 11,2 км төменгі қысымды газ желілері және 8 дана ШГРП құрылды.&nbsp;Айта кетейік, Шиелі ауданындағы халықтың әлеуметтік жағынан әлсіз топтарына арналған 50 тұрғын үйлерді сатып алуға 480,0 млн теңге қаралды. Ал биыл аудан бойынша құрылыс жұмыстарының жалпы көлемі 2023 жылы 4 млрд 100 млн теңге құраса, 2024 жылы 6 млрд 539 млн болып отыр. Бүгінде бөлім бойынша 2024 жылы 23 нысан бойынша 2 млрд 771 млн қаржы игерілуде, – деді Д.Смаханұлы.&nbsp;Баяндамадан соң, кеңес мүшелері өзекті деген Қарғалы ауылына баратын дарияның үстінен салынатын көпір құрылысы жайлы және 9 қабатты үйдің жай-күйі, қай мектептерде күрделі жөндеу жұмыстары жүргізіледі, клубтар құрылысы, 900 орындық «Жайлы мектеп» құрылысы қашан басталады, алдағы уақытта құрылыс саласында жобалар бар ма, электр желілерін жаңғырту жөнінде сұрақтар қойылды. Әрі оған тиісті бөлім басшысы нақты жауабын &nbsp;беріп, жан-жақты түсіндірді.&nbsp;Қатысушылар тарапынан қаңғыбас иттерден халықты қорғау жолдары және Конго-Қырым безгегі кенеден қорғану туралы да ұсыныс-пікірлер айтылды. Сонымен келелі кездесуді кеңес төрағасы Исабек Сәрсенбайұлы қорытындылап, ауданның құрылыс саласында атқарылған жұмыстар жөнінде тыңғылықты дайындалып, слайдтың көмегі арқылы ауқымды атқарылып жатқан жұмыстарды баяндаған Дана Смаханұлына ризашылығын білдірді. Кеңес отырысы нәтижесінде хаттама рәсімделіп, тиісті мемлекеттік органға мерзімінде орындау үшін ұсыныстар жолданатын болады.

Шиелілік ақсақалдардың айтары бар

<a href="https://kyzylorda-news.kz/">Kyzylorda-news.kz</a> Алыс-жақын ағайынын көргенде «Мал-жаның аман ба?» деп сұрайтын қазақ халқы үшін төрт түліктің мән-маңызын ашып айтудың қажеті шамалы шығар. Мінсе – көлік, ішсе – сусын, жесе – тамақ. Ата-бабаларымыздың атакәсібі осы – мал шаруашылығы. Төрт түліктің қадірін тең ұққан шаруалар әуелі бабын, жем-суын, керек десең ауруын жазбай танып, қоңды етуде бар күш-жігерін салды. Әке жолын жалғастырып, ел игілігі үшін тірлік еткен еңбек адамының бірі – Мұқамедияр Қожаев. Бүгінде тоқсанның тұғырына жақындаған қария әлі де малдың бабын жасап, қолынан таяғын тастаған емес.&nbsp;Мұқамедияр Қожаев 1935 жылы 22 тамызда Қызылорда облысы, Шиелі ауданы, Бала би ауылында дүниеге келген. Бүгінде – ауылдың үлкені, үлгі тұтары. Ақсақал Абай мектебін 1955-1956 жылдары бітіреді. Сол жылдары мектеп түлектерін мал шаруашылығына шақыру басталған-ды. Осылайша, ол да көштен қалмай, шаруаға белсене кіріседі. Әке көрген әлбетте оқ жонады. Өйткені, әкесі Қожай мен анасы Қатира екеуі Қаратау, Қарашоқы тауының етегінде, Талдық өзенінің жағалауында мал баққан. Қожай ақсақалдың 1945 жылы Бәйгеқұм станциясында пойызбен келген 90 тоқтыны бағымына алып, бір атар қой қылғанын көпшілік аңыз етіп айтады. Тіпті, 100 аналықтан 120-130 қозы алған. Еңбегі бағаланып, «Қызыл ту» орденін алған. Мәскеу көрмесіне де екі рет барыпты.&nbsp;«Төбел туар қасқадан» дейді дана халық. Кейіпкеріміз Мұқамедияр Қожаев та абырой-атақтан кенде емес. Әрине, атақты адам береді, ал абыройды Алла береді.&nbsp;– Облыстық пленум мүшесі кезінде Нұржан Әуелбековтың жеке қабылдауында болдым. Еңбегім еленіп, О.Бәйімбетовтың «Шиелі Шынарлары» кітабына шықтым. Одан бөлек Комсомол кезінде орталық комитетінің мақтау қағазымен, 3-ші дәрежелі «Еңбек даңқы» орденімен марапатталдым. Облыстық Кәсіподақ комитетінің грамотасын алып, облыстың «Үздік шопаны» атандым, – дейді ақсақал.Мұқамедияр Қожаев әдепкі тұсақ туғанда 100 аналықтан 101 төл алғанын айтады. Содан жыл сайын әр 100 аналықтан 110-160-қа дейін төл өрбіткен. Ондаған жыл аралығында жыл көрсеткіші 140-150-ден төл малын аман сақтап, мал басын көбейтіп отырған. Осы еңбегі ескеріліп, «Бес жылдықтар озаты» деген төсбелгі тағады. Облыстық пленум мүшесі болып, екі жыл фермада чехтық партия ұйымын басқарады. 1980 жылы Дінмұхамед Қонаевтың кезінде бүкіл Қазақстан бойынша мал шаруашылығы қызметкерлерінің кеңесіне қатысқанын ауылдастары әлі күнге мақтанышпен айтады.&nbsp;– Марқұм Сейілбек Шаухамановтың өзі көктем мезгілінде біз жаққа атбасын бұрып, еңбегімізді көзбен көріп, таңданысын білдіріп, ақ тілегін жаудырған. 1957 жылы ауылдың қызымен отау құрып, 10 ұл-қыз өсірдім. Олардан 20 немере, 39 шөберем бар. Жұбайым мені қолдап, үнемі жанымда жүрді. Ол кісі де ардақты ана атанды. Бүгінде өмірде жоқ, - дейді кейіпкеріміз.Ұлдың үлкені Мұқамедияр ақсақал – артындағы барлық бауырына қамқор болған азамат. 1963 жылдан бастап мал бағуға ат салысқан. 60 жылдан аса уақыттан бері малдың жайын жазбай танитын еңбек адамы ұрпағын да еңбекке, игі іске баулып жүр.Қожаевтар әулетінің ақылшысы, абызы Мұқамедияр ақсақал ұлы Досбол мен келіні Сәуленің қолында бақуатты өмір сүруде.Шыны керек, бүгінде «Құрметті азамат» деген атақты екінің бірі алып жатыр. Ақсақал атаққа зәру емес, шүкір, ел ішінда абыройы бар. Тыл еңбеккері ретінде демалыс орындарына, шипажайларға жіберіп, денсаулығына көңіл бөлуді жергілікті билік өз қолына алуы тиіс. Қайта соңғы кездері ел президенті Қасым-Жомарт Тоқаевтың «Еңбек адамы еліміздегі ең сыйлы адам болуы тиіс» деген сөзі шаруалардың, диқандардың, сол секілді еңбекпен ер жеткен көпшіліктің жанына медеу болғандай. Қалай десек те, абыз адамдар қандай атаққа болса да лайық!

Мұқамедияр Қожаев: Атақты адам, абыройды Алла береді

<a href="https://kyzylorda-news.kz/">Kyzylorda-news.kz</a> &nbsp;Медицинаның ең күрделі саласының бірі – травматология екені даусыз. Әркез адамның денсаулығын қатты зақымдайтын дене жарақаты, сынық секілді бірнеше дертке ем-шара жүргізетін дәрігер үнемі біліктілігін арттырып отырады. 2004 жылдан бері Сырдария аудандық ауруханасының травматолог-дәрігері қызметін абыроймен атқарып келе жатқан Аман Аманкелдіұлының есімі көпшілікке таныс.Білікті дәрігер әрқашан жүйелі жұмысымен даралана білген. Тынымсыз еңбектің арқасында орасан зор жетістіктерге қол жеткізген. Ол – Қарағанды қаласындағы медициналық акадамияда білім алған. Сәкен Сейфуллин ауылының тумасы науқастарды емдеп-жазуға күш-жігерін салып келеді. Әрине, кәсіби тұрғыдан науқастарды емдеп жазуға күш-жігерін жұмсауда.<blockquote>– Күн сайын жанына шипа іздеген жандарға қолғабыс ету – басты парызымыз. Әрине, травматология саласы нағыз асқан ыждағаттылықты қажет етеді. Аудан тұрғындарына кәсіби тұрғыдан ем-шара тағайындап, сырқатынан айықтыруға үле қоса береміз, – деді тәжірибелі дәрігер.</blockquote>20 жылдық жұмыс өтілінде Аман Самалықов бірнеше марапат иесі атанған. Алдағы уақытта ел-халықтың сенім үдесінен шығып, аянбай еңбек ете бермек.

Күрделі салада шыңдалған маман

Көрнекті қоғам қайраткері, белгілі шығыстанушы, филология ғылымдарының кандидаты Мұрат Мұхтарұлы Әуезов өмірден өтті.&nbsp;Қайғылы хабарды жазушы-журналист, Қазақстан ПЕН клубының президенті Бигелді Ғабдуллин жеткізді."Қаралы хабар келді. Ұзаққа созылған ауыр науқастан ұлтымыздың мақтанышы, көрнекті ойшыл Мұрат Әуезов жантәсілім етіпті. Қош бол, қымбатты Мұрат Мұхтарұлы!" – деп жазды ол парақшасында.Қазақстандық қоғам қайраткері, белгілі шығыстанушы, түркітанушы, мәдениеттанушы, эссеист, дипломат және филология ғылымдарының кандидаты былтыр ғана 80 жылдық мерейтойын атап өткен еді.Мұрат Мұхтарұлы 1943 жылғы 1 қаңтарда Жамбыл облысы Меркі ауылында дүниеге келген.Қазақ әдебиетінің көрнекті жазушысы, драматург, ғалым, қазақтың тұңғыш "Абай жолы" роман-эпопеясының авторы Мұхтар Әуезовтің отбасында туған Мұрат әкесінің өсиеті арқасында туған тіліне, халқына, мәдени мұрасына деген сүйіспеншілік пен құрметті бойына сіңіріп өсті.1965 жылы М. В. Ломоносов атындағы Мәскеу мемлекеттік университетінің Шығыс тілдері институтын филолог-шығыстанушы мамандығы бойынша бітірді.КСРО Ғылым академиясының Әлем әдебиеті институтында диссертация қорғап, әдебиет теориясы бойынша филология ғылымдарының кандидаты атанды.Қазақстан Журналистика Академиясының толық мүшесі.Мұрат Әуезов "Қазақфильм" киностудиясында бас редактор (1981-1987), Қазақстан Жазушылар одағының көркем аударма және әдеби өзара байланыстар жөніндегі алқасының басшысы (1988-1990), Қазақстандағы "Мир" телерадиокомпаниясының көркемдік жетекшісі (1990), Қазақ КСР Жоғарғы Кеңесінің депутаты болып сайланып, Кеңес президиумының мүшесі, парламентаралық байланыстар жөніндегі комитеттің төрағасы (1990), Ұлттық кітапхана директоры (2003-2006) секілді жоғары қызметтерді атқарған. Қазақстан өз тәуелсіздігін жариялаған кезде елді өзгертуге белсене атсалысты.Парламент депутаты болды, сонымен қатар әдеби зерттеулермен айналысты, Қазақстан Республикасының Қытай Халық Республикасындағы тұңғыш елшісі қызметін атқарды.Көркемдік процестің теориясы мен практикасы бойынша 200-ден астам жарияланымның, сондай-ақ "Уақытты байланыстырушы жіп" (1972), "Иппокрена. Уақыт құдықтарын аралау" (1997) және "Қайта оралу үшін кету" (2002) сияқты танымал монографиялардың авторы. &nbsp;М.Әуезов 2007 жылдан бері Мұхтар Әуезов атындағы қорды басқарып келді.

Мұрат Әуезов 81 жасында дүниеден өтті

Бүгін облыс әкімі Нұрлыбек Нәлібаевтың төрағалығымен Жаңақорған ауданында әлеуметтік-экономикалық көрсеткіштерге, кадрлық өзгерістерге байланысты актив отырысы өтті.Жиында аймақ басшысы Жаңақорған ауданының әкімі қызметін атқарған Тілеуімбетов Мұрат Жолкелдіұлына қажырлы еңбегі үшін облыстың ең жоғары марапаты – Қызылорда облысының «Құрмет грамотасын» табыстап, ауданның жаңа әкімі Самитов Мажит Самитұлын таныстырды.<blockquote>«Бүгін кадрлық өзгерістерге байланысты жиналдық. Жаңа ғана аудандық мәслихаттың кезектен тыс сессиясы өтіп, тиісті шешім қабылданды. Өздеріңізге белгілі, бұған дейін Жаңақорған ауданының әкімі қызметін атқарған Тілеуімбетов Мұрат Жолкелдіұлы ел мүддесі жолындағы қызметін Қызылорда облыстық мәслихатының төрағасы ретінде жалғастыруда. &nbsp;Мұрат Жолкелдіұлы мұнда 2 жылдан астам қызмет жасады. Жаңақорғанда кейінгі жылдары құрылыс қарқын алып, тұрғындардың тұрмыс сапасын жақсартуға бағытталған нақты істер жүзеге асырылды. Маңызды жобаларды жоғары деңгейде үйлестіріп, нәтижелі жұмыс атқарған Мұрат Жолкелдіұлының елеулі еңбегін атап өту қажет.Ендігі кезекте ауданның жаңа әкімін таныстыруға рұқсат етіңіздер. Қазақстан Республикасы Президенті Әкімшілігі және Жаңақорған аудандық мәслихатының келісімдері негізінде, облыс әкімінің өкімімен Жаңақорған ауданының әкімі лауазымына Самитов Мажит Самитұлы тағайындалды.Мажит Самитұлы – білікті маман, тәжірибелі басшы. &nbsp;Ауданның әлеуметтік-экономикалық ахуалымен етене таныс, мемлекеттік қызметтің барлық сатысынан өткен. Аудан әкімі ретінде Мемлекет басшысының тапсырмалары мен алға қойған міндеттерді орындап, игі бастамаларды одан әрі жалғастыру жолында аянбай жұмыс жасайды деп сенемін. Жаңа қызметіңізге сәттілік тілеймін!», – деді Нұрлыбек Нәлібаев.</blockquote>Самитов Мажит Самитұлы 1985 жылы Жаңақорған ауданында дүниеге келген. Әл Фараби атындағы Қазақ Ұлттық университетін «Заңтану», Қорқыт Ата атындағы Қызылорда мемлекеттік университетін «Экономика» мамандықтары бойынша бітірген. Еңбек жолын 2007 жылы Қызылорда қаласы прокурорының көмекшісі болып бастаған. 2010-2015 жылдары Қызылорда облыстық прокуратурасының басқарма прокуроры, аға прокуроры қызметтерін атқарған. 2015-2017 жылдары ҚР Бас прокуратурасының бірінші департаментінің прокуроры, аға прокуроры болған. 2017-2019 жылдары Қармақшы ауданы әкімінің орынбасары, Қызылорда облысы әкімінің көмекшісі қызметтерін атқарған. 2019-2022 жылдары Президент Әкімшілігі басшысының хатшылығы меңгерушісінің орынбасары, ҚР Мемлекеттік хатшысы хатшылығының меңгерушісі қызметтерін абыроймен атқарған. 2022 жылдың маусым айынан ҚР Мемлекеттік кеңесшісі хатшылығының меңгерушісі саяси қызметін атқарып келді.<img src="https://knadmin.beoblood.kz/uploads/FB_IMG_1718381879257_65417651f2.jpg" alt="FB_IMG_1718381879257.jpg">

Жаңақорған ауданының әкімі тағайындалды 

Бүгін облыс әкімі Нұрлыбек Нәлібаевтың төрағалығымен кадрлық өзгерістерге байланысты актив мәжілісі өтті.Қазақстан Республикасы Президенті Әкімшілігінің келісімімен, облыс әкімінің өкімі негізінде Байманов Шахмардан Асқарұлы облыс әкімінің орынбасары лауазымына тағайындалды.<blockquote>«Өздеріңіз білетіндей, Мемлекет басшысының мемлекеттік аппарат қызметін оңтайландыру туралы тапсырмасына сәйкес, өткен жылы аппарат басшыларына жергілікті бюджеттен қаржыландырылатын атқарушы органдарға жетекшілік жасау бойынша өкілеттік берілді. Осыған сәйкес облыс әкімі аппаратының басшысы Байманов Шахмардан Асқарұлы мемлекеттік саяси лауазымына тағайындалып, екі жылдан астам уақыт аппаратқа, оған қоса өңірдің қоғамдық-саяси саласына, қоғамдық даму, мәдениет және спорт, дін мәселелеріне жетекшілік жасап келді. Ел экономикасын дамытып, әлеуметтік мәселелердің оң шешімін табуда қоғамдық-саяси ахуалдың тұрақтылығы аса маңызды. Мемлекет басшысының тапсырмасына сәйкес, өңірлердегі идеологиялық жұмыстарды күшейту мақсатында идеологиялық блок және ішкі саясат мәселелеріне жетекшілік етуді әкім орынбасарына бекіту практикасы қайта енгізілді. Бұл өз кезегінде өңірлердегі қоғамдық-саяси ахуалдың, әлеуметтік шиеленістер мен тәуекелдердің алдын алып, тұрақтылықты қамтамасыз етеді», – деді аймақ басшысы.</blockquote>Облыс әкімінің орынбасары ретінде Шахмардан Байманов қоғамдық даму, мәдениет, дене шынықтыру және спорт, білім, дін және жастар ісі мәселелеріне жетекшілік жасайтын болады. Ш.Байманов Қорқыт Ата атындағы Қызылорда мемлекеттік университетін «Қаржы және қаржылық құқық» мамандығы бойынша бітірген. ҚР Президенті жанындағы Мемлекеттік басқару академиясы Мемлекеттік саясаттың ұлттық мектебінің «Саясаттану» мамандығы бойынша түлегі, әлеуметтік білім магистрі. Ш. Байманов әр жылдары үкіметтік емес ұйымдар мен жастар бірлестіктерінде жоғары басшылық лауазымға дейінгі жолдан өтті. 2012-2017 жылдары Ақмола облысының жастар саясаты мәселелері басқармасының басшысы, республикалық «Жас Отан» жастар қанатының &nbsp;төрағасы болған. 2017-2022 жылдары Қызылорда қаласы әкімінің орынбасары, Ақпарат және қоғамдық даму министрлігі Жастар және отбасы істері комитеті төрағасының орынбасары, комитет төрағасы лауазымдарын абыроймен атқарған. 2022 жылдың сәуір айынан Қызылорда облысы әкімі аппаратының басшысы қызметін атқарып келеді.<img src="https://knadmin.beoblood.kz/uploads/FB_IMG_1718381585890_164d55f665.jpg" alt="FB_IMG_1718381585890.jpg">

Шахмардан Байманов облыс әкімінің орынбасары лауазымына тағайындалды

<a href="https://kyzylorda-news.kz/">Kyzylorda-news.kz</a> Маусым айының үшінші жексенбісі &nbsp;медицина қызметкерлерінің төл мерекесі. Асқан шеберліктің иесі ақ халатты абзал жандар &nbsp;құрмет пен алғысқа лайық. Мереке қарсаңында &nbsp;“AMANAT” партиясы Байқоңыр филиалының Атқарушы хатшысы М.Есбенбетов Байқоңыр қаласының көпбейінді ауруханасының қызметкерлерін Халықаралық медицина қызметкерлері күнімен құттықтады.<blockquote>Ақ халатты абзал жандармен кездесу барысында Байқоңыр партия филиалының Атқарушы хатшысы М.Есбенбетов: "Денсаулығымыз сыр беріп, жанымыз қысылғанда көмек қолын созуға қашанда дайын тұратын дəрігерлерді əрдайым дəріптеуіміз керек. Медицина саласының мамандары қандай мəртебеге, марапатқа болсын əбден лайық. Сондықтан да, ақ халатты абзал жандарға құрмет көрсету – əрбіріміздің азаматтық борышымыз", - деп атап өтті.</blockquote>Бүгінгі мерекелік кездесу барысында "Денсаулық" бастауыш партия ұйымның төрағасы, Байқоңыр қаласының көпбейінді ауруханасы бас дәрігерінің орынбасары Е.Игенбаев, аймақтық қызмет көрсету бөлімінің меңгерушісі Г.Тенелбаева "AMANAT" партиясының Атқарушы хатшысы Д.Кәрібектің Алғыс хаттарымен марапатталды.Бiлiм мен мейiрiмдiлiктi ұштастыра бiлген барлық медицина қызметкерлерін төл мерекесімен құттықтап, дендеріне саулық, еңбекте табыс, отбасыларына бірлік, береке тілейміз.&nbsp;

Байқоңырлық ақ халаттылар марапат төрінен көрінді

<a href="https://kyzylorda-news.kz/">Kyzylorda-news.kz</a> Бүгін облыс прокуратурасының алқа мәжілісінде облыс прокурорының төрағалығымен жергілікті атқарушы органдардың қызметінде жүргізілген тексеру нәтижелері сараланды.Жиынға облыс әкімінің орынбасары, Қызылорда облысының жер ресурстарын басқару департаментінің басшылары мен жауапты тұлғалары, қала, аудан әкімдері, жергілікті атқарушы органдардың жер қатынастары саласындағы басқарма, бөлім басшылары қатысты.Қоғамдағы өзекті мәселелердің бірі жер дауы. Осы орайда еліміздің жер саласында құқықтық қатынастарды реттейтін негізгі нормативтік құқықтық акт - Жер кодексі 2003 жылы қабылданып, осы уақытқа дейін оған 149 өзгерістер мен толықтырулар енгізілген.Өз кезегінде мемлекеттік органдардың құзыреті мен бақылау функциялары жыл сайын күшейтіліп келеді. Алайда, бұл бағыттағы жүргізілген тексерулер жергілікті атқарушы органдар тарапынан жүйелі заңдылықты бұзушылықтарға жол берілгенін, олармен белгіленген міндеттерін орындамайтынын көрсетті.Тексерулер нәтижесімен бірқатар заң бұзушылықтар анықталды.&nbsp;Жер учаскесін табыстауда кезектілік тәртібі сақталмауынан бастап жерді жеке меншікке беру, кәсіпкерлік, ауыл шаруашылық мақсаттағы және бағбандық үшін жер учаскелерін табыстау барысындағы бұзушылықтар, мерзімі аяқталған жер учаскелерінің пайдалану мерзімін негізсіз ұзарту және басқа да заңсыздықтар. Одан бөлек қала, аудан әкімдіктерінде құрылған жер комиссияларының қызметіне де сын айтылды.Алқа мәжілісі қорытындысымен облыс әкімдігіне заңдылықтың бұзылуын жою туралы ұсыну енгізіліп, жергілікті атқарушы және уәкілетті органдармен бірлесіп іс-шара жоспары бекітілетін болады.Сонымен қатар мәжіліс қорытындысы бойынша облыс прокуроры қала, аудан әкімдері мен уәкілетті органдарға нақты шаралар қабылдау жөнінде тапсырмалар берді.

 Алқа мәжілісінде жер қатынастары саласындағы заңсыздықтар талқыланды

<a href="https://kyzylorda-news.kz/">Kyzylorda-news.kz</a> Гүлдана Әбдіғаниқызы 1981 жылы Арал ауданына қарасты Аралқұм ауылында туған. №61 орта мектепті бітірген ол 2002 жылы болашақ жарын кездестіреді. Екі жас арадағы таныстықтан соң көп ұзамай, шаңырақ көтеруге шешім қабылдайды. Сөйтіп, Төретам кентінде Садықовтар әулетіне ақ келін түсіп, ағайын-туыс мәресәре болады.<blockquote>– Отағасым Ұзақбай Әлдебайұлымен менің ауылыма келгенде таныстық. Сол таныстығымыз терең бойлап, сезімге ұласты. Қазақы дәстүрмен сөз салды. Кейіннен отбасыма құда жіберіліп, ұзатылу, үйлену тойымыздың күні белгіленді. Содан бері бірге келеміз. Келін болып ақ босаға аттағанымда отбасында ата-енем, қайынінім мен қайынсіңлілерім болды. Қарашаңырақта сегіз жыл тату-тәтті тұрдық. Алғашында бала сүйе алмай жүрдік. Бірақ «Алланың беремін десе, баласы көп» дегендей, ұл-қыздарымыз бірінен соң бірі өмірге келіп жатты. 2010 жылы атамыздың батасымен еншімізді алып бөлек шықтық, – дейді бүгінде жеті баланың анасы атанып, Күміс алқа таққан Гүлдана.</blockquote>Жанұяның мұнан соңғы тарихына үңілсек, үбірлішүбірлі ұл-қыздар дүниеге келе бастаған. 2006 жылы өмір есігін ашқан Айсара қазір Қызылордадағы «Орда» жоғары колледжінің 3 курс студенті. «Бастауыш сынып мұғалімі» мамандығына түскен. Айдос 9 сынып, Елдос 7 сынып, Нұрсұлтан 5 сынып, Нұрасыл 3 сынып оқушылары. Кенттегі №85 мектептің шәкірттері. Айзере балабақша тәрбиеленушісі болса, Алинұр 1 жаста.Садықовтар жанұясында әкенің рөлі жоғары тұрады.&nbsp;Ол әу бастан солай қалыптасқан. Әсіресе, ер балаларды өмірге лайықты етіп тәрбиелеу – отбасының мызғымас ұстанымы.<blockquote>– Мен бақытты әкемін. Отанамыз үй шаруасымен айналысса, қыздарым анасына бәйек болып көмектеседі. Ал ұл баланы ер мінезді етіп өсіру – кез келген әкенің арманы деп ойлаймын. Біздің үйдің ұл балалары да спортпен тұрақты түрде айналысады. Зіл темір көтеруден Елдосымыз облыстық, аудандық жарыстардың жеңімпазы. Басқаларының да жүлдесі бар, – дейді жүргізуші болып жұмыс істейтін отбасының қамқор әкесі Ұзақбай Садықов.</blockquote>Күміс алқалы ана тұрмыс құрғалы жұмыс істемегенін және әйел үшін отбасынан артық ештеңе жоқ екенін күлімдей жеткізеді. Баланы бақытына санаған ол жан жарының жағдайын жасау, жанұяның берекесін келтіріп, мерекесін арттыру – басты қызметім деп есептейді. «Жұмыссыз отырғаныма өкінген емеспін. Себебі, үйдің де шаруасы жетіп артылады. Балалардың сабағын оқытамын, үйірмеге баруын қадағалаймын. Үлкен отбасы болғасын олардың ас-суы бар, қонақ күту секілді жұмыстарды бар ынтаммен атқарамын» дейді жанұя ұйытқысы.<blockquote>– Бос уақыт болып жатса, көрпе көктеп, іс қыламын. Қысқа әзірлік ретінде жүн шұлық тоқимын. Жалпы тігу мен тоқуды жаным қалайды. Салауатты өмір салтын ұстанамыз. Қыздарым – көмекшілерім. Ұлдарымыз – ер бала болған соң әкесінің жанынан табылады. Үйде ұйымшылмыз. Не нәрсені де бәріміз бірге атқарамыз. Қолымыз қалт етсе, ата-әжеміздің қасында болғанды жақсы көреміз. Сол кісілердің және отбасының басқа да мүшелерінің қызыққуанышын бөлісіп жүреміз. Сый-құрмет көрсетеміз. Оның өзі қандай керемет. Туған күн, отбасылық және ұлттық мерекеміз Ұлыстың ұлы күнін атап өту қалыпқа айналған. Тұрақты түрде атап өтеміз. Бақытты отбасы дегеніміз – татулық пен ауызбірлік болса керек. Үлкенді сыйлап, кішіге қамқор болу, ұйымшылдық таныту. Әулет болып басымызды жиі қосуға тырысамыз. Өйткені одан жас ұрпақтың алар тәлімі өте мол. Дастарқан басында қариялардың есті әңгімесін тыңдап өскен бала ешқашан жаманшылыққа бармайды, – дейді төретамдық батыр ана сөзін қорыта келе.</blockquote>

 Гүлдана Әбдіғаниқызы: Қариялардың есті әңгімесін тыңдап өскен бала жамандыққа бармайды

<a href="https://kyzylorda-news.kz/">Kyzylorda-news.kz</a> &nbsp;Маусым айының үшінші жексенбісі – медицина саласы қызметкерлерінің кәсіби мерекесі. Бүгінде өңірде 150-ден астам медицина ұйымы бар болса, онда 3000-ға жуық дәрігер мен 11 мыңнан астам орта буынды маман қажырлы еңбек етіп келеді. Бұдан бөлек, Сыр медицинасын серпінді дамыту мақсатында аймақ басшысының қолдауымен өткен жылы 21 денсаулық сақтау нысанының құрылысы жүргізілсе, биыл 17 медицина ұйымының іргетасы қаланды. Сонымен қатар, облыс орталығында бір ауысымда 100 келушіге арналған емханасы және онкологиялық бөлімшесі бар 300 орындық көпбейінді аурухананың құрылысы жүргізілуде. Осы және өзгеде саладағы жағымды жаңалықтар туралы Өңірлік коммуникациялар қызметінің ақпарат алаңында облыстық денсаулық сақтау басқармасының басшысы Олжас Искаков БАҚ өкілдеріне баяндап берді.<blockquote>– Сыр медицинасы уақыт өткен сайын серпінді дамып келеді. Мәселен, жыл көлемінде тәжірбиелі мамандардың шақыртуымен шеберлік сағаттары өткізіліп, 21 түрлі ота жаңадан енгізілді. Сондай-ақ, осы жылы араға 9 жыл салып бүйрек трансплантациясы жасалды. Бұл біздің сала үшін үлкен жетістік деп айтуымызға болады. Соңғы жылдары өңірімізде денсаулық сақтау ұйымдарының саны едәуір артып келеді. Атап айтсақ, жақын арада 5 мыңнан 10 мыңға адамға дейін қызмет көрсетуге қауқарлы, соңғы үлгідегі қан орталығы ел игілігіне пайдалануға беріледі. Сонымен қатар, Мемлекет басшысының бастамасымен қолға алынған «Ауылдық денсаулық сақтауды жаңғырту» ұлттық жобасы аясында аймағымызда 27 медициналық нысанды салу көзделген болатын. Былтыр аталған жоба бойынша елді мекендерде 15 жаңа дәрігерлік амбулатория, 1 медициналық бекет пайдалануға берілді. Қалған нысандар Арал, Қазалы, Шиелі, Жаңақорған ауданаралық көпбейінді ауруханалары жанынан қосымша нысан ретінде салынатын болады. Алдағы уақытта Жаңақорған ауданындағы көпбейінді аудандық аурухана базасында «Қамқорлық» оңалту орталығы ашылмақ. Сондай-ақ, биыл өңірдегі барлық елді мекендердегі денсаулық сақтау ұйымдарына 200 санитарлық автокөлік табысталды. Осылайша, биыл елді мекендердегі жедел жәрдем көлігінің жетіспеушілігі түбегейлі шешілмек. Бұдан бөлек, денсаулық сақтау ұйымдарына 560 дана қажетті медициналық құрал-жабдық сатып алынып, қамтылу көрсеткіші 87,10 пайызға дейін артты, - деді Олжас Ермекұлы.</blockquote>Сыр медицинасының әлеуетін арттыру мақсатында 2018 жылдан бүгінге дейін сұранысқа ие мамандықтар бойынша 155 резидентке, 162 жалпытәжірибелік дәрігерді даяулау мақсатында облыс әкімінің арнайы гранты бөлінген болатын. Осының нәтижесінде, 2023 жылы 590 дәрігер, 738 орта буынды медицина қызметкері біліктіліктерін арттырып, тәжірибе жинады. Ал биыл облыстаға 10 реаниматолог, 5 кардиолог маман Түркия елінде өз білімдерін жетілдірді.Фото: Қызылорда облысының Өңірлік коммуникациялар қызметі

Денсаулық сақтау саласы дамып келеді

<a href="https://kyzylorda-news.kz/">Kyzylorda-news.kz</a> Медицина саласы&nbsp;деп&nbsp;айтқанымызбен, ол бірнеше&nbsp;саладан&nbsp;тұрады.&nbsp;Мысалға дәрігерлер – науқастың&nbsp;қандай&nbsp;аурумен&nbsp;ауыратынын&nbsp;анықтап, диагнозын қояды, медбикелер – дәрігерлердің берген нұсқаулығымен ем-дом шарасымен&nbsp;айналысады. Ал енді тағы бірі – &nbsp;ауруханада шаруашылық бикелері&nbsp;науқастарға&nbsp;қызмет&nbsp;көрсетеді.&nbsp;Бүгінгі біздің кейіпкеріміз осы саланың білікті маманы Күлпаршын Оспанова Қармақшы аудандық аурухананың терапия бөлімінің шаруашылық бикесі болып еңбек етеді.&nbsp; Ол Қармақшы ауылының тумасы. 1966 жылы дүниеге келген. №113 орта мектебінен білім алған. Мектеп қабырғасында жүргенде өте белсенді болады. Білім ұясын бітіріп, арман қуып Қызылорда техникумына оқуға түсіп,одан бухгалтер мамандығын алып шығады.&nbsp;Өзі ақ халатты мейірбике болуды армандаған бойжеткен медициналық училищеде оқымасада, 1988 жылы аудандық аурухананың терапия бөліміне шаруашылық бикесі болып жұмысқа орналасады. Ол кезде аудандық аурухананың бас дәрігері Асқар Омаров, ал терапия бөлімінің меңгеруші дәрігері Садродин Нәбиев болатын.&nbsp;Сырт көзге қарағанда шаруашылық бикесінің жұмысы елеусіздеу көрінетіні рас. Бірақ оның атқаратын жұмысы аз емес. Бөлімге келген төсек-жабдықтары, ас-ауқаттар, іштің тазалығына керекті жабдықтар, &nbsp;бәрі-бәріне шаруашылық бикесі жауапты. Бастысы – өз ісіне адал және махаббатпен жұмыс жасайды.&nbsp; Өзі 36 жылдан бері еңбек етіп келе жатқан білікті маманның қазіргі таңда атқарып жүрген шаруасы, елге көрсететін қызметі жайлы өз аузынан сұрап білген едік.<blockquote>&nbsp; – Әр жұмыстың өз қызығы мен қиыншылығы қатар жүретіні рас. Емделуге келген науқастың көңілінен шыға білу керек. Ауырып ем іздеп келіп тұрған науқасқа жылы шырай танытып, қал-жағдайын сұрап, жылы сөйлейміз. Менің негізгі міндетім – келген әрбір емделушіге төсек-орнын салып, 3 мезгіл мемлекеттен берілетін тегін ас-ауқатпен қамтамасыз ету. Кей уақыттарда болады күндізгі ауысымнан шығып, кешке отбасыммен отырған уақытта науқас түсіп жұмысқа шақыратын кездер. Ондай кезде үйдің барлық шаруасын тастай сала жұмысқа келемін,– дейді ол.</blockquote>&nbsp; &nbsp;Қай жұмыста да аға буынның өзінен кейінгі жастарға өз білгенін, жұмыстың қыр-сырын үйреткен жақсы ғой.<blockquote>&nbsp; – Біздің де Күлпаршын апайымыз ұжымдағы жастарға осы кезге дейінгі қызметінен жинаған тәжірибесін іспен көрсетуден де, ауызбен насихаттаудан да шаршаған емес. Бүгінде ұжымның аға буынының алды. Жастардыңоған қарап бой түзейтін, жақсы көріп, сыйлайтын, құрметтейтін әпкесі, кейбіреулеріне екінші анасы сияқты. Ақылын беріп, басу айтып отыратын сондай қарапайым кісі. «Жақсы адамдар өзіне байлық жинамайды» деген әдемі нақыл сөз біздің Күлпаршын апайымызға арналғандай. Ол әркез ертеңгі өмірі үшін аянбай еңбек етіп, өз уақытын аямай, өзгенің дененің саулығын аялап, жылы шыраймен қарсы алып, құрақ ұшып ауырған жанның жанынан табылатын ізгі мамандық иесі. Науқас алып жатқан емінің шипалы,ол орналасқан бөлме оған жайлы, таза әрі ыңғайлы болуы керек.Апайдың еңбек жолы, шынайы болмысы, сіңірген еңбегі көпке үлгі. Көпшіліктен алған алғыс пен ризашылық, ілтипаты еңбекпен келген жемістің абыройы. Кент тұрғындарының ыстық ықыласына бөленіп, өз ұжымының ортасында сыйлы бөлімше ішінің береке-бірлігін жарастырып, кез-келген істі ұйымдастыра білген өз ісінің шебері, – дейді терапия бөлімінің меңгеруші дәрігері Айгерім Шүлтікова.</blockquote>&nbsp; Күлпаршын ұжымында сыйлы әріптес болса, жанұясында ардақты жар, аяулы ана. Жұбайы Әділ ағамызбен бірге отбасында 3 ер бала тәрбиелеп өсіріп, ұлдарын ұяға қондырып, бүгінде шаңырақта көз қуанышы болған 6 немеренің асыл әжесі.&nbsp;

Қазақстан және Қызылорда облысының жаңалықтары