<a href="https://kyzylorda-news.kz/">Kyzylorda-news.kz</a>&nbsp; &nbsp;Қорқыт ата атындағы Қызылорда университетінде «Білім беруді интернационалдандыру стратегиялары мен тәжірибелері» тақырыбында халықаралық ғылыми-практикалық онлайн конференция өтті.Конференция «Қазақстандағы жоғары білім беруді интернационалдандыру негізінде білім алушылардың лингвомәдени құзыреттіліктерін дамыту» атты гранттық ғылыми жоба аясында ұйымдастырлыды.&nbsp;Қазақстандағы жоғары оқу орындарының арасында алғашқылардың бірі болып COIL платформасына мүшелікке еніп, ынтымақтастық орнатылған шетелдік университеттермен қазақ-орыс және қазақ-ағылшын тілдерінде бірлескен оқу бағдарламасын әзірлегенімізді қуанышпен жеткізгім келеді.Шетелдік серіктес университеттердің студенттері және оқытушыларымен өзара әрекеттесу студенттердің лингвистикалық, мәдени және мәдениетаралық құзыреттіліктерін қалыптастыруға зор ықпалын тигізді.Конференцияның мақсаты:<ul><li style="text-align:justify;">білім беру бағдарламалары мен ғылыми-зерттеу қызметін интернационалдандырудың озық тәжірибелері мен тәсілдерін талқылау;</li><li style="text-align:justify;">жоғары білімді интернационалдандырудың қазіргі тенденцияларын талқылау;</li><li style="text-align:justify;">жоғары оқу орындарында интернационалдандыруды дамытудың стратегиялық бағыттарын анықтау болды.</li></ul>Өз сөзімде студенттер мен оқытушылардың академиялық ұтқырлығы, халықаралық оқу бағдарламалары мен ғылыми тағылымдамадан өту, ғылыми серіктестіктер мен жаһандық академиялық интеграция сияқты аспектілерді қамтитын жоғары білімді интернационалдандыруды дамытудың қазіргі тенденциялары мен мүмкіндіктерін атап өттім.ҚР Жоғары білім және ғылым министрінің кеңесшісі Фатима Жақыпованың «Жоғары оқу орындарының ұлттық рейтингі: халықаралық тәжірибе және ұсынылатын әдістеме» туралы баяндамасы үлкен қызығушылық тудырды. Ф.Н.Жакыпова жоғары оқу орындарының халықаралық және ұлттық рейтингісінің сапасын жақсарту мақсатында академиялық саралау мен үстемдік бойынша Халықаралық обсерватория (IREG) маңыздылығына тоқталды.Ал М.Тынышбаев атындағы ALT Университетінің ректоры Салтанат Амиргалиева халықаралық серіктестік арқылы «Т ұрпағын» дамытуға, халықаралық серіктестік жұмыстарының тиімділігіне баса назар аударды.Мәскеу мемлекеттік халықаралық қатынастар университетінің (МГИМО) экономика факультетінің деканы Евгений Погребняк білім саласындағы халықаралық ынтымақтастық, цифрлық дағдыларды бәсекеге қабілетті деңгейде қалай дамыту керектігі туралы айтты.Ш.Уәлиханов атындағы Көкшетау университеті, Интернационалдандыру және инфрақұрылымды дамыту жөніндегі проректоры Жайлаугүл Сағындықова тұрақты серіктестік туралы баяндама жасап, шетелдік серіктестерді табуда қажетті ұстанымдарға тоқталды.EdD Бағдарламасының директоры, Ратгерс Жоғары білім беру мектебі, Нью-Брансуик университетінің PhD докторы Таня Кармел Сарджент жаһандық желі бастамасы, виртуалды алмасу бастамасы жайында зерттеулермен бөлісті.Конференцияның басты назары интернационалдандырудың маңыздылығы туралы білім мен түсінікті кеңейту, интернационалдандыру стратегияларын жүзеге асыру бойынша нақты әрекеттерді анықтау мәселелерін жан-жақты талқылауға арналды.Айта кетейік, былтыр Қорқыт ата атындағы Қызылорда университетінде&nbsp;«Жоғары білім беруді интернационалдандыру: тәжірибе, проблемалар және даму перспективалары» атты халықаралық ғылыми-тәжірибелік конференция өтті.Конференция «Қазақстандағы жоғары білім беруді интернационалдандыру негізінде білім алушылардың лингвомәдени құзыреттіліктерін дамыту» атты гранттық&nbsp; жоба аясында ұйымдастырылды.Жиында Қорқыт ата атындағы Қызылорда университетінің Басқарма төрағасы – Ректоры Бейбіткүл Кәрімова «Үйдегі интернационализацияны дамыту: Қорқыт ата атындағы Қызылорда университетінің негізінде» тақырыбында баяндама жасады.Оқу орнының басшысы интернационалдандыру бүгінгі студенттердің білімін, құзыреттілігін және дағдыларын дамытуға үлкен мүмкіндік беретінін атап өтті.<blockquote>- COVID-19 және геосаяси тұрақсыздық студенттердің академиялық білім игеруіне кедергі келтірді. Осылайша үйдегі интернационалдандыру ұғымы пайда болды. «Үйдегі интернационализация» кез-келген азаматтың қозғалу мүмкіндігінің болуына немесе болмауына қарамастан (ұтқырлықты жүзеге асыруға), жаһанданған әлемде өмір сүруге және жұмыс істеуге дайындайтын білім алуға құқығы бар екенін көрсетеді.«Үйдегі интернационалдандыру» тұжырымдамасын іске асыру үшін Қорқыт Ата Университеті «виртуалды ұтқырлық» бағытын дамытуды қолға алуда, бұл біздің студенттерге өз елімізден шықпай-ақ семестр немесе бүкіл академиялық жыл ішінде онлайн білім алуға мүмкіндік береді, – деді Бейбіткүл Сәрсемханқызы.</blockquote>Жиынға Америка құрамы штаты, Джорджия университетінің Фулбрайт бағдарламасының қызметкері Келси Дабровски, Ресей федерациясы Томск қаласы, Томск политехникалық университетінің Табиғи ресурстар инженерлік мектебінің профессоры, биология ғылымдарының докторы Наталья Барановская, Набережные Челны мемлекеттік педагогикалық университетінің халықаралық байланыстар бөлімінің меңгерушісі, социология ғылымдарының кандидаты Ленар Галиев, Өзбекстан республикасы, Гүлістан қаласы, Гулистан мемлекеттік университетінің философия докторы PhD&nbsp; Багдат Уразов, Astana IT University бірінші проректоры, экономика ғылымдарының докторы,&nbsp; профессор Серік Өмірбаев, ҚР ҒЖБМ Жоғары және жоғары оқу орнынан кейінгі білімді интернационалдандыру басқарма меңгерушісі Рауза Мендалиева, ҚР ҒЖБМ Жоғары білім беруді дамыту ұлттық орталығы директорының орынбасары Қарлығаш Сәкенова, Қ.Жұбанов атындағы Ақтөбе өңірлік университетінің Стратегиялық жоспарлау орталығының директоры Қазтаева Адина қатысты.Қорқыт ата атындағы Қызылорда университетінің және облыс көлеміндегі жоғары оқу орындарының ғалымдары, оқытушылары мен білім алушылары, сондай-ақ мемлекеттік және қоғамдық ұйымдар, БАҚ өкілдері онлайн және офлайн форматта қатысты.Жиында ғалымдар халықаралық білім беру, интернационалдандыру тақырыбын талқылап, ұсыныстарын ортаға салған еді.&nbsp;А.ТекебайФото:nifi.ru

Жоғары білім беруді интернационалдандыру

<a href="https://kyzylorda-news.kz/">Kyzylorda-news.kz</a>&nbsp; Астана қаласында ҚР Президентінің ішкі саясат және коммуникация бойынша көмекішісі Руслан Желдібай «Ассамблея жастары» ұйымы төралқасының мүшелерімен кездесті. Іс-шараға Қазақстан халқы Ассамблеясы Төрағасының орынбасары – Президент Әкімшілігі ҚХА Хатшылығының меңгерушісі Марат Әзілханов, Мәдениет және ақпарат вице-министрі Айзада Құрманова, Мәдениет және ақпарат министрлігінің Этносаралық қатынастарды дамыту комитетінің төрағасы Ғалым Шойкин, еліміздің барлық өңірлерінен келген «Ассамблея жастары» басшылығы мен белсенділері қатысты.&nbsp;Кездесуде қатысушалр ҚХА-ның XXXIII сессиясында Мемлекет басшысының тапсырмаларын іске асыру бойынша идеялар мен тәсілдерді талқылап, ортаға салды. Сондай-ақ, Президенттің көмекшісі Ассамблея жастарын Ұлттық құрылтайдың үшінші отырысында Мемлекет басшысы белгілеген құндылықтарды ілгерілету үшін креативті тәсілдер мен құралдарды белсенді пайдалануға шақырды. Сондай-ақ,&nbsp; “Ассамблея жастары” қандай тың бастамаларды қолға алып жатыр? Мемлекеттік тілді меңгеру мен бірлікті нығайтуда қандай бастамалары бар? Секілді сауалдарға “Хабар” арнасы, “Талқы” бағдарламасының тікелей эфирде “Ассамблея жастары” РҚБ төралқа мүшелері мен өңірдегі төрағалары жауап берді. Сыр өңіріндегі жастардың ауқымды жобалары туралы “Ассамблея жастары” ұйымының төрағасы, тілжанашыры Елена Пак тарқатып айтты.Қазақстан – көп ұлтты бауырына басқан мемлекет. Елімізде шоғырланған өзге ұлт өкілдері құшағы кең қазақ елін тек қоныс көрмей, отанындай сыйлайды. Дәлел – мемлекеттік тілде еркін сөйлейтін әрі салт-дәстүрді жетік меңгергендер көбейген. Осы орайда қызылордалық Елена Пакпен сұхбаттасқан едік.Қызылорда облысы, Шиелі ауданы, Ақмая ауылында дүниеге келген Елена Пак №49 орта мектепті үздік аяқтаған соң, Қорқыт ата атындағы Қызылорда университетінде филология мамандығын тәмамдаған. Бүгінде «Қоғамдық даму басқармасына қарасты «Қоғамдық келісім» КММ-де жұмыс істейді.<blockquote>– Қазақ тілін меңгеруде қиындық болмады. Еркін сөйлеуіме ауылдағы қазақ балалары мен мұғалімдердің қосқан үлесі зор. Ата-анам кәріс ұлтының өкілдері. Ол кісілер қазақ тілін жақсы түсінеді, алайда таза қазақша сөйлей алмайды. Әрине, қай қоғамда өмір сүрсек те адамзаттың басты қатынас құралы саналатын тілдің маңызға ие екені белгілі. Бірнеше тілді еркін меңгерген адамның білімі мен дүниетанымы да кеңейе түсетіні рас. Тіл білгендіктен кез келген ортада емін-еркін сөйлеп, ойымды жеткізе аламын, – дейді кейіпкер.</blockquote>Еленаның айтуынша, мектеп қабырғасында дәстүрлі түрде өтетін ақындар оқуларына жиі қатысқан. Поэзияға жақын болған соң қазақ тілінде өлең жаттау жеңіл және өлеңдер есінде мықтап сақталған.<blockquote>– Ұстазым Бибігүл Сұлтанованың арқасында республикалық деңгейге дейін жетіп, жұлдызым жанған сәттер болды. Хакім Абайдың 120 өлеңін жаттағанмын. Сол кездегі басты мақсатым жаттаған өлеңдердің максималды санына жету болды. Есейе келе туындының мағынасына мән беріп оқитын болдым. М.Мақатаев, Ф.Оңғарсынова, Қ.Сарин, А.Елгезек ағаларымыздың да шығармашылығын жақсы көремін.Қазір қазақ тілінде сөйлейтін өзге ұлт өкілдеріне таңғалатын адам жоқ секілді. Себебі мемлекеттік тілді трендке айналдырып жүрген өзге ұлт өкілдері, блогерлер мен тіл жанашырлары көп, – деген еді Е. Владимировна.</blockquote>&nbsp;А.Текебай Фото: Ассамблея жастары

Қызылордадағы ассамблея жастары  республикалық жиынға қатысты

<a href="https://kyzylorda-news.kz/">Kyzylorda-news.kz</a>&nbsp; &nbsp;Қызылорда ашық университетінде 2024-2025 оқу жылына талапкерлердің құжаттарын қабылдау басталды.&nbsp;Қабылдау комиссиясы жұмысының салтанатты ашылу рәсіміне бірінші проректор Абайбек Жүнісов қатысып, оқуға түсушілерге сәттілік тіледі.<blockquote>«Қызылорда ашық университеті талапкерлерді қабылдауға дайын. Қабылдау комиссиясы бүгіннен бастап ресми түрде өз жұмысын бастады. Биыл университетке түсушілер саны артады деп ойлаймыз. Құжат тапсыруға келген талапкерлер мен ата-аналар үшін барлығы жан-жақты қарастырылған», – деді проректор.</blockquote>Қызылорда ашық университеті Сыр еліндегі ең қолжетімді деңгейдегі оқу ақысын ұсынады. Университетте талапкерлердің әлеуметтік жағдайына қарай 10,15,20,30 пайыздық жеңілдіктер қарастырылған. Ал ҰБТ-дан 100 балл жинаған және ата-ана қамқорлығынсыз қалған талапкерлерге «Ректор гранты» тағайындалады. Айта кетейік, биыл әскери борышын өтеп келген он талапкерге тегін білім гранты беріледі. Сонымен қатар, әскери борышын өтеген азаматтардың оқу ақысына 20 пайыз жеңілдік ұсынылады.Академиялық мәселелер жөніндегі проректор, комиссияның жауапты хатшысы Айгүл Әлібекова қабылдау комиссиясының жұмысына тоқталды.«Комиссия құрамына арнайы мамандар мен тәжірибелі оқытушылар енгізілген. Олар кәсіби бағыт-бағдар, кеңес беру және бакалавриат бойынша түсіндіру жұмыстарын жүргізеді. Оған қоса, университеттің ресми парақшаларында да онлайн түсіндірме жұмыстары жүргізіледі. Комиссия мүшелері талапкерлерге онлайн және офлайн форматта сапалы әрі жедел қызмет көрсетеді. Оқу орнында 23 білім беру бағдарламалары бойынша маман даярланады. Биыл оның 20 БББ-на мемлекеттік тапсырыс бойынша грант бөлінеді», – деді Айгүл Әлібекова.Қабылдау комиссиясы демалыссыз 9.00-ден 18.00-ге дейін жұмыс істейді. Түскі үзіліс уақыты 13.00-ден 14.00. Мекен-жайы: Қызылорда қаласы, Ғ.Мұратбаев көшесі №72.Call-орталық: 8 702 842 93 02, 8&nbsp;707&nbsp;307 28 55Айта кетейік, Арал қаласында Қызылорда ашық университетінің өкілдігі талапкерлерді қабылдау жұмысын бастады. Кездесуге Арал ауданы әкімінің орынбасары Кете – Төлеби Бержанов, университеттің бірінші проректоры Абайбек Жүнісов, академиялық мәселелер жөніндегі проректор, комиссия хатшысы Айгүл Әлібекова, оқу процесін тіркеуші офисінің меңгерушісі Ақмарал Омарова және ата-аналар мен талапкерлер қатысты.<blockquote>«Мамыр айында Қызылорда ашық университетінің өкілдігін ашу туралы үш жақты келісім жасалған еді. Бүгін міне, өкілдігіміздің алғашқы талапкерлерін қабылдау жиынына куә болып отырмыз. Біздің мақсатымыз – аймақта ашық және қашықтықтан білім беру мүмкіндіктерін дамыту. Университет өкілдігі – аудан жастары үшін сапалы әрі қолжетімді білім алуға жасалған үлкен жұмыстың нәтижесі»,-деді Абайбек Талғатұлы.</blockquote>Қызылода ашық университетінің қабылдау комиссиясы 20 маусымнан бастап жұмысын бастады. Енді Арал ауданы мен жақын орналасқан елдімекендердегі талапкерлер университет өкілдігіне өтінім бере алады. Комиссия мүшелері талапкерлерге онлайн және офлайн форматта сапалы әрі жедел қызмет көрсетеді. Оқу орнында 23 білім беру бағдарламалары бойынша маман даярланады. Биыл оның 20 БББ-на мемлекеттік тапсырыс бойынша грант бөлінеді.Айта кетейік, Қызылорда ашық университеті Сыр еліндегі ең қолжетімді деңгейдегі оқу ақысын ұсынады. Университетте талапкерлердің әлеуметтік жағдайына қарай 10,15,20,30 пайыздық жеңілдіктер қарастырылған. Ал ҰБТ-дан 100 балл жинаған және ата-ана қамқорлығынсыз қалған талапкерлерге «Ректор гранты» тағайындалады. Биыл әскери борышын өтеп келген он талапкерге тегін білім гранты беріледі. Сонымен қатар, әскери борышын өтеген азаматтардың оқу ақысына 20 пайыз жеңілдік ұсынылады.&nbsp;А.Текебай Фото:Қызылорда ашық университеті

Ашық университеті талапкерлерді қабылдау жұмысын бастады

<a href="https://kyzylorda-news.kz/">Kyzylorda-news.kz</a>&nbsp; &nbsp;Еліміздің барлық өңіріндегі 300-ден астам дәрігер, медбикелер, оқытушылар, ғалымдар, медициналық ұйымдардың басшылары, денсаулық сақтау саласының ардагерлері мен сарапшылар «AMANAT» партиясының «Дәрігер Talks» диалог алаңында бас қосты. Олар медициналық қызмет көрсету жүйесінің қазіргі жай-күйін талқылап, отандық медицинадағы өзекті мәселелерді шешу жолдарын ұсынды. Медицинаның қарқынды дамуына үлес қосып жүрген қызылордалық дәрігерлер марапат төрінде бой көтерді.&nbsp;Жиын басында Мәжіліс Спикері, «AMANAT» партиясының Төрағасы Ерлан Қошанов барша қатысушыны өткен Медицина қызметкері күнімен құттықтап, мемлекет әрқашан денсаулық сақтау саласына ерекше назар аударатынын атап өтті. Ол сондай-ақ партияның 70 мыңға жуық мүшесі – медицина саласының өкілдері екенін және олар «AMANAT»-тың маңызды тірегі саналатынын жеткізді.<blockquote>– Мемлекет басшысының ұсынысымен қайтадан «Қазақстанның еңбек сіңірген дәрігері» мемлекеттік наградасы енгізілді. Қоғам дәрігерлеріміздің ерен еңбегін бағалап қана қоймай, олар туралы егжей-тегжейлі білуі керек деп санаймын. Сол себепті де «AMANAT» партиясы осы «Дәрігер Talks» алаңын ашып отыр. Осы жерде медицина қоғамдастығы депутаттық корпуспен және Денсаулық сақтау министрлігімен бірге ашық диалог форматында өзекті мәселелерді талқылап, оны шешу жолдарын айқындай алады. Біздің міндетіміз – әр дәрігердің үнін естірту, – деді ол.</blockquote>Алқалы жиынға Сыр өңірінен бір топ делегат қатысқан болатын. Олардың қатарында ұлты корей болғанымен дәрігерлік қызмет пен отбасы тәрбиесін қатар ұстап, ырысы мен берекесі тарқамаған қазақ шаңырағының келіні болып жүрген партияның белсенді мүшесі, облыстық онкологиялық орталығының химиотерапевт дәрігері Юн Виктория Викторовна да бар.&nbsp;Виктория елімізде онкологияны емдеудің жаңа әдістері енгізіліп, заманауи құрал-жабдықтар сатып алынып, жаңа онкологиялық орталықтар салынып жатқанын тілге тиек етіп, Аспирантурада және алыс жақын шетелдердегі тағылымдамадан алған тәжірибесімен жоғары дозалы химиотерапия әдісін облысымызға енгізіп келеді.&nbsp;Кездесуге қатысушылар Президент Жолдауы мен оның сайлауалды бағдарламасын, сондай-ақ «AMANAT» партиясының сайлауалды бағдарламасын жүзеге асыру қорытындысы бойынша медицина қызметкерлерін қолдау және жалпы денсаулық сақтау саласын дамыту бойынша бұрын-соңды болмаған оң шаралар қолға алынып жатқанына назар аударды.<blockquote>– Мемлекет басшысының тапсырмасы бойынша 2020-2023 жылдар аралығында медицина қызметкерлерінің жалақысы кезең-кезеңімен өсті. Мәселен, дәрігерлердің еңбекақысы 3 еседен астам жоғарыласа, орта медицина қызметкерлерінің жалақысы 2 еседен астам өсті. Бұл дегеніміз – 270 мыңнан астам отандасымыз бен олардың отбасы мүшелері, – деді Денсаулық сақтау министрі Ақмарал Әлназарова.</blockquote>Жиын барысында қатысушыларға партиялық және ведомстволық наградалар табысталды.Атап айтсақ, «Абзал» бастауыш партия ұйымының төрағасы, партияның облыстық филиалы жанындағы Экология жөніндегі аймақтық кеңес мүшесі Қалиева Фарида Ыдырысқызы партияның ең жоғары наградасы «Белсенді қызметі үшін» төсбелгісімен марапатталса, партия белсендісі Юн Виктория Викторовнаға «AMANAT» партиясы мен Қазақстандық денсаулық сақтау менеджерлері ассоциациясының «Мейірімді жүрекпен» төс белгісі табысталды.&nbsp;&nbsp;Қорлан САРЫ

«AMANAT»: «Дәрігер Talks» диалог алаңындағы қызылордалық дәрігерлер

<a href="https://kyzylorda-news.kz/">Kyzylorda-news.kz</a>&nbsp; &nbsp;Аймақтағы NEET санатындағы жастарға басымдылық бере отырып мемлекеттік бағдарламалар мен жобаларды насихаттау, кәсіпкерлік бастамаларына қолдау көрсету мақсатында «Basta» бизнес лагері ұйымдастырылады. Аталған лагерь 25-26 маусым аралығында өтеді. Шара қоғамдық даму басқармасы, облыстық жастар ресурстық орталығы, «Ай-Қанат» жастар қоғамдық бірлестігінің ұйымдастыруымен жүзеге асырылады.&nbsp;Бизнес-тренер,Қызылорда облысы бойынша кәсіпкер әйелдер қауымдастығының төрайымы − &nbsp;Мишукова Наталья Валентиновна. Шара барысында бизнес жобалар ұсынылып, жүлделі орындарға жастар бақ сынасады. Жүлде қоры − 410 000 теңге.Жастар − ел тұтқасын ұстайтын, ұлт пен мемлекеттің ертеңіне жауапты, жарқын болашақ құрудағы маңызды рөл атқаратын топ. Қазақстанда 6 миллионға жуық жас бар. Бұл санатты 14 пен 35 жас аралығындағы азаматтар құрайды. Ал заңнамадағы өзгеріске дейін бұл құрамға 14 пен 29 жас аралығындағылар жататын. Жас құрамы өзгерді, бұл дегеніміз жастарға берілетін мүмкіндіктердің де көбейгенін көрсетеді.&nbsp;Қызылорда өңірінде 244 мыңнан астам жас бар. Ал республикадағы жастар саны 6 миллионға жуықтады. Айта кетейік, өңірдегі жұмыссыз жастарды ақпараттандыру мақсатында облыстық жұмыспен қамтуды үйлестіру және әлеуметтік бағдарламалар басқармасы, Еңбек мобильділігі мен мансап орталықтары тұрақты түрде бос жұмыс орындарының жәрмеңкесін ұйымдастырады. Биыл төрт айдың ішінде 16 рет бос жұмыс орындар жәрмеңкесі өткізілген. Онда 211 жұмыс берушіден 952 бос жұмыс орны ұсынылып, жәрмеңкеге қатысқан 1002 жұмыссыздың ішінен 316 адам тұрақты, 29 адам уақытша жұмысқа орналастырылды. Жәрмеңке арқылы жұмыспен қамтылғандардың 78,7 пайызы жұмыссыз жастардың үлесінде. Бұған қоса, 2023 жылдың тамыз айынан бастап tanda.enbek.kz платформасында бос жұмыс орындарының онлайн жәрмеңкесі ұйымдастырылған.Жастар мәселесі қоғамдағы өзекті тақырып. Мәселен жуырда жастар мәселесі мен жастарға арналған мүмкіндіктерді талқылау мақсатында «Жалпыұлттық социал-демократиялық партиясының» Қызылорда облыстық филиалы кездесу ұйымдастырды. Бүгін сол жағалауда орналасқан жастар орталығында өткен іс-шараға мектеп оқушылары, студенттер мен сала мамандары қатысты. Жиын барысында «Жалпыұлттық социал-демократиялық партиясы» Қызылорда облыстық филиалының төрағасы Нұрбек Дәуренбеков кездесудің мақсаты мен міндетіне тоқталды. &nbsp;«Бүгінде мемлекет және өзге ұйымдар тарапынан жастар үшін мүмкіндіктер мен қолдаулар көп. Өзіне қажеттінің барлығын меңгерген дұрыс. Өйткені өмірдің өзі сынақтардан тұратын болғандықтан, кез-келген ауыртпашылық пен сынақтарға дайын болу керек. Сондықтан білім мен ізденістерге, кәсіби өсу үшін барлық мүмкіндікті жастар пайдалануы тиіс», — деді.Сондай-ақ, жастардың қоғам өміріне белсене араласуының маңыздылығына, өз дағдыларын дамытуға және табысты мансап құруға ұмтылған жастарға қолжетімді бағдарламалардың сан алуандығына тоқталды.Келесі сөз, облыстық «Жастар ресурстық орталығының» директоры Талғат Тілеске берілді. Спикер жастар мәселесіне, атап айтқанда жұмыссыздық пен лудоманияның қоғам үшін, жастар үшін қауіптілігін айтты. Сондай-ақ, «Сыр жастары» бағдарламасы мен орталықтың нәтижелеріне тоқталды.– Жастар саясатын жүзеге асыру әр мемлекеттің жарқын болашағына жасаған инвестициясы. Қызылорда өңірінде 244 мыңнан астам жас бар.Жастарға байланысты түрлі мәселелер қозғалуда. Бүгінде өзекті және өзгермейтін 2 мәселе бар. Біріншісі – жұмыссыздық, екіншісі – тұрғын үй мәселесі. Біздің орталық түрлі санаттағы жастар арасынан сауалнама жүргізеді. Сауалнама нәтижесінде бұл мәселелер жиі көрсетіледі. Бірақ жастар категориясын ескерген жөн. Себебі 14 жастағы балаға тұрғын үй мәселесі өзекті болмауы мүмкін. Оның рухани дамуы, бос уақытын тиімді пайдалануы өзекті. Ал 25 пен 35 жас аралығындағы азаматтар үй мәселесі мен еңбекке басымдық береді. Сондықтан барлық жастарды жұмыссыз деп айта алмаймыз.Жалпы ресурстық орталықтар барлық өңірде жұмыс істейді. Бірақ ғимараты бар әрі арнайы жабдықталған орталықтар санаулы аймақта бар. Сондықтан біз және жастар осы мүмкіндікті жақсы әрі оңтайлы пайдалануымыз қажет. Облыстық жастар орталығының өткен жылы атқарған ауқымды жұмысы ретінде «Сыр жастары» бағдарламасы. Былтыр аймақ басшысына «Сыр жастары» тұрғын үй бағдарламасын енгізуді ұсындық. Бүгінде жас отбасылар арасында үй мәселе өзекті. Сол себепті бағдарлама әзірлеп, облыстық жастар орталығының ғимаратында құжаттар қабылдауды бастадық. «Сыр жастары» аясында жуырда ғана 60 отбасы пәтерге ие болды. Бұл біз үшін үлкен жеңіс.Келесі мәселе жас кәсіпкерлердің санын көбейту. Сіз студент болсаңыз да, сізде кәсіп бастауға толық мүмкіндік бар. Яғни жастарға дұрыс бағыт-бағдар беру жұмыстарын қолға алдық, − деді Қызылорда облысының «Жастар ресурстық орталығының» директоры Талғат Тілес.Кездесуде қаралған басты мәселелердің бірі – қолда бар гранттар мен шәкіртақыларға қатысты. Спикерлер «Болашақ», «Алтын белгі», «Өрлеу» және «Қазақстан халқына» сияқты студенттерді қолдаудың ағымдағы бағдарламаларын егжей-тегжейлі қарастырды. Сондай-ақ, жастардың шетелде білім алуына мүмкіндік беретін Эразмус+ және Фулбрайт сияқты көптеген халықаралық бағдарламалар бар екені айтылды.Көптеген жас кәсіпкерлердің бастау нүктесіне айналған бизнес-инкубаторларға ерекше көңіл бөлінді. Мысал ретінде қаламыздағы «Kyzylorda Hab» бизнес-инкубаторы келтірілді. Бұл инкубатор жас стартаптарға тегін кеңсе кеңістігін, сарапшылық кеңестерді және инвестицияға қолжетімділікті ұсынады.Өңірімізде жұмыссыз жастарды жұмысқа тарту және ақпараттандыру мақсатында облыстық жұмыспен қамтуды үйлестіру және әлеуметтік бағдарламалар басқармасы, Еңбек мобильділігі мен Мансап орталықтары тұрақты түрде бос жұмыс орындарының жәрмеңкесін ұйымдастырады.Республика бойынша жұмыссыздық деңгейі 4,7 пайызды құрайды. Онда жастардың үлесі 3,1 пайызға жеткен. Жұмыссыздық – қазіргі замандағы ең өзекті мәселелердің бірі. Жастардың жұмыс таба алмауы немесе тұрақты жұмысқа орналасудағы қиындықтары олардың әлеуметтік-экономикалық жағдайын нашарлатады және болашаққа деген сенімін төмендетеді. Бұл туралы кездесуде республикалық «Ақмешіт жастары» газетінің тілшісі Әлия Тәжібай баяндады.Спикердің айтуынша, жастардың еңбек етуге құлқы жоқ. Бұл да жұмыссыздық деңгейінің жоғарылауына әсер етеді. Келесі себеп − жұмыс беруші мекемелер жас әрі тәжірибесі бар маман іздейді. Жұмыссыздық жастардың әлеуметтік оқшаулануына, депрессия секілді басқа да психологиялық мәселелерге әкеледі. Жұмыссыз жастар арасында қылмыс пен құқық бұзушылық деңгейінің өсуі мүмкін екенін айтты.Жұмыссыздық мәселесімен қатар жастардың жаңа дағдыларды игеруі, дамуы туралы айтылды. Әлия Жанәбілқызы ақпараттық технологиялар саласындағы мүмкіндіктерге тоқталды.Қызылорда облысында 2023 жылы жастар арасында 616 қылмыс тіркелген. Оған 699 жас пен жасөспірім қатысқан. Олардың ішінде 23 мектеп оқушысы, 47 студент, 68 әртүрлі мекемеде жұмыс істейтін жастар бар. Қалған 561-і немесе 80,2 пайызы – жұмыссыз, еш жерде оқымайтындар. Бұдан байқағанымыз, жұмыссыздар қылмыс пен бұзақылыққа бейім келеді, − деді спикер.Бүгінде Қызылордада IT сала қарқынды дамуда. Жыл сайын хакатон, инновациялық жобалар фестивалі мен түрлі байқаулар ұйымдастырылып, жастардың да қызығушылығы артуда. Ақпараттық технологиялар саласы тек сала мамандарына ғана емес, басқа да бағыттағы мамандарға қажет. Цифрлық дағдылар мен қабілеттерді үйреніп, өз салаңызбен байланыстыру қажет. Бұл бәсекеге қабілеттілікті арттыруда таптырмас құрал. Ал тәжірибе жинап, білімімді арттырамын десеңіз облыстағы орталықтардың көмегіне жүгіне аласыздар. Мәселен, жастар орталығында орналасқан «IT park» пен «Kyzylorda Hub» бизнес-инкубаторы апта сайын түрлі курстар мен митаптар (meet-up) өткізеді.Жалпыұлттық социал-демократиялық партиясы» Қызылорда облыстық филиалының маманы Жақсыгүл Оразалиева жастар мәселесіндегі психилогиялық бағытқа тоқталды. Сондай-ақ, «Болашақ» бағдарламасының мүмкіндіктерін айтты.– Neet санатының көбеюіне байланысты жастардың психологиясы бүгінде бір қалыпты емес. Құмар ойындар салдарынан қаншама жасөспірімдер өздерін жоғалтуда. Әр адам өз өміріне жауапты, – деді Ж.Оразалиева.Сонымен қатар кездесуде Айнұр Досжанова қатысушылар арасында практикалық ойындар жүргізді. Жастарға мемлекеттен бөлінетін гранттар мен мүмкіндіктер туралы айты.Жиын соңында жастар өз ойларын ортаға салып, алдағы жоспарларымен бөлісті. Қатысушылар ЖСДП-ға жаңа перспективалар туралы білуге ​​және олар үшін маңызды тақырыптарды талқылауға мүмкіндік бергені үшін алғыстарын білдірді.&nbsp;А.ТекебайФото:z-taraz.kz

Neet санатындағы жастарды әлеуметтендіру мақсатында бизнес лагерь өтеді

<a href="https://kyzylorda-news.kz/">Kyzylorda-news.kz</a>&nbsp; &nbsp;2024 жылдың 20 маусымынан бастап Қорқыт Ата Атындағы Қызылорда университетінің қабылдау комиссиясы өз жұмысын бастады. Университет бакалавриаттың 58, &nbsp;магистатураның 32 және &nbsp;докторантураның 13 білім беру бағдарламасы бойынша қабылдау жүргізеді.Талапкерлерді оқуға қабылдау бірнеше кезеңдерді қамтиды, атап айтқанда:Баклавриат бойынша 20 маусым- 07 шілде аралығында шығармашылық дайындықты талап ететін білімнің білім беру бағдарламалары топтарына білім беру гранты конкурсына қатысушылардан шығармашылық емтиханға құжаттар қабылданып, 08-12 шілде аралығында шығармашылық емтихандар өткізіледі.Шығармашылық дайындықты талап ететін білімнің білім беру бағдарламалары топтарына ақылы негізде оқуға түсуші талапкерлерден 20 маусым- 10 тамыз аралығында құжаттар қабылданып, 10-15 тамыз аралығында шығармашылық емтихандар өткізіледі.&nbsp;«Педагогикалық ғылымдар» білім беру саласы бойынша білім беру гранты конкурсына қатысушылар QR код арқылы арнаулы емтиханды 01 – 12 шілде аралығында, ақылы негізде оқуға түсуші талапкерлер 05 -20 тамыз аралығында тапсыра алады.Ағымдағы жылдың 13-20 шілде аралығында Республикалық бюджет қаражаты есебінен білім беру гранты конкурсына қатысушы талапкерлерден құжаттар қабылданып, Ұлттық тестілеу орталығының ақпараттық жүйесіне тіркеледі.Магистратураға түсушілер 01 маусымнан бастап Ұлттық тестілеу орталығының ақпараттық жүйесі арқылы кешенді тестілеуге өтініштер қабылдануда, ол 08- шілдеге дейін жалғасады.20 шілде – 10 тамыз аралығында тестілеу орталықтарында кешенді тест тапсырып, білім беру гранты конкурсына қатыса алады.Техникалық және кәсіптік, орта білімнен кейінгі немесе жоғары білім негізінде қысқартылған оқыту мерзіміне ақылы негізде қабылдау үшін өткізілетін түсу (әңгімелесу) емтиханы 20 маусым – 25 тамыз аралығында болады.Докторантураға түсушілерден 03 шілде-03 тамыз аралығында Ұлттық тестілеу орталығының ақпараттық жүйесі арқылы өтініш қабылдау жүргізіледі, 04-20 тамыз аралығында қабылдау емтихандары өтеді.Университетте білім алушыларды оқуға қабылдауға барлық жағдайлар жасалған, қабылдау барысында автоматтандыру цифрландыру жұмыстарына көңіл бөлінуде.Барлық талапкерлерді Қорқыт ата атындағы Қызылорда универсиетінің қызметін пайдалана алады. Сондай-ақ https://www.talapker-korkyt.kz және instagram @talapker_korkyt парақшасы арқылы қосымша ақпарат ала алады.&nbsp;А.ТекебайФото:Қорқыт ата атындағы ҚУ

Қызылордада қабылдау комиссиясының жұмысы басталды

«Адал еңбекпен мал іздемек арлы адамның ісі» деп бекер айтпаса керек-ті. Еңбек ету қашанда берекенің &nbsp;бастауы саналады. Сонда ғана адам жетістіктерге жете алады. «Бейнет түбі – зейнет» екендігін ертеден ұғынған бабаларымыз барлық игіліктің тек еңбекпен келетіндігін айтқан. «Маңдайы терлемегеннің қазаны қайнамайды» депте айтамыз. Табыстың кілтін тынымсыз тірліктен тапқан Шиелі іргесіндегі «Ақмая» шаруа қожалығының өндіріс бригада жүргізушісі Сайлау Тастанбеков те нағыз еңбек адамының бірі.&nbsp;Күз шаруалардың ала жаздай еңбегінің жемісін көретін кезі. Күрішті шашпай-төкпей уақытында жинап, қамбаны астыққа толтыру үшін ең әуелі техника жүз процент сайланып тұру керек. Ал, соның ішінде көлік айдап, күнде шаруаларды қайнаған тіршілік ортасына дер кезінде жеткізу Сайлау ағаға жүктелген.&nbsp;Кейіпкеріміз Шиелі ауданы, Ақмая ауылында өмірге келген. Ол мектеп қабырғасын аяқтаған уақытта заман ағымымен Шиелі ауданы бойынша үндеу жарияланады. Онда түлектер 8 айлық курс оқып, еңбекке араласу қажеттігі айтылған. Сол үндеу бойынша Сайлау Тастанбеков те механизатор мамандығы бойынша курсты аяқтайды. 1979 жылы алғаш еңбек жолын «Ақмая» шаруа қожалығында комбайн жүргізушісінің көмекшісі болып бастаған ол, алып техниканы әп-сәтте меңгеріп алады. Кейін шаруашылық төрағасы еңбекқор жігіттің ынтасын елеп, механизатор қызметін сеніп тапсырады. Араға 2 жыл салып, 1981-1983 жылдар аралығында Отан алдындағы әскери борышын өтеуге Мәскеуге аттанады. Әскерден елге оралған соң өз жұмысын қайтадан сол шаруа қожалықта жалғастырады. Техникаға құштар болып өскен маман осы шаруашылықта үздіксіз жұмыс істеп келе жатқанына биыл 45 жыл толыпты. Жауапкершілік жүгін сезінген жігіт ағасы одан соң, «Ақмая» шаруа қожалығында звено жеткешісі қызметін де абыроймен атқарады. Ес біліп, ер жеткен сәттен тынбай еңбек еткен кейіпкеріміз бұл күнде 60-ты алқымдаған алдыңғы буын ағалар қатарына қосылды. Бейнетті бір адамдай көрген Сайлау ағаның қай жұмысқа да сайлы екенін аңғарған қожалық төрағасы өндіріс бригада жүргізушісі етіп жаңа жұмысты тапсырады. Осындай түрлі еңбек сатыларынан абыроймен өткен ол осы күнге дейін басшылық тараптан арыз-шағым естіген емес. Тіпті, жары Гүлнар Байжанова да «Ақмая» шаруа қожалығында жолдасымен қатар жұмыс істеп келеді. Ол 1983 жылдан 2009 жылға дейін іс жүргізуші, қазіргі таңда &nbsp;кадр бөлімінің меңгерушсі қызметін атқаруда. &nbsp;– Мен ауылда өстім. Осында ер жеттім. Туған жерімнен қыр асып, басқа жерде еңбек етіп, басқа жақтың ауасымен тыныстап, тұрмыс-тіршілігімді домалату еш ойымда болған емес. Бұл – менің шағын Отаным. Ауыл – қазақтың жаны, рухы, тілі, діні де. Ауылда жұмыс жоқ деп қыр асқандар қаншама. Қалаға кетіп, көптің ортасына сіңіп, білінбей кеткендер де жетерлік. Ал, ауылда бәрі де өзгеше. Мені бәрі де біледі. Мен де ауылдың бар тыныс-тіршілігімен таныспын – дейді темір тұлпарды ерттеп мініп, еңбегінің жемісін көріп жүрген жүргізуші Сайлау.Түздегі тіршілікпен үйдегі берекені қатар ойлап, қарапайым ғана еңбек адамдарына үлгі өнеге болып жүрген Сайлау Қалманбайұлының сайлы да жайлы жұмысы осындай. Әр күн сайын ауылдағы шаруаларды жиып, еңбек майданына аттанатын олар кеш қарая үйлеріне қайтады. Бұл ерте көктемнен қара күзге дейін демалыссыз жалғасатын жұмыс.

Шиелілік  Сайлау Тастанбеков нағыз еңбек адамы

<a href="https://kyzylorda-news.kz/">Kyzylorda-news.kz</a> Адамға абырой да, атақ та, даңқ та тек еңбекпен келеді. Еңбек адамына насихаттың да керегі жоқ, тек олардың өнегелі жолын кейінгі ұрпаққа үлгі тұту – бізге парыз. Қоғамның да тынысы осы еңбеккерлермен ашылады. Сондықтан өздеріне деген елдің құрметін сезіндіру үшін еңбек иелерін дәріптеудің ешқандай артығы жоқ.Ел құрметіне бөленген сондай жандардың бірі – Ақсу ауылында тұратын Мейрамбек Сабырбаев. Жастайынан совхоздың жұмысында жүріп, шаруаға ысылған Мейрамбек &nbsp;ағамыз отыз жылдан астам уақыт жүргізуші болды. Қарақұмда отырған жылқышыларға қажетті заттарын жеткізіп беріп тұру үшін Мейрамбек ағамызға жол талғамайтын көлікпен апта сайын қырдағы малшылар ауылын аралауға тура келіпті. Негізі өлке тарихын шопырлардан артық білетін ешкім жоқ. Тіпті кейбір зерттеушілердің назарына түспей, қаперінен тыс қалып қойған тарихи жерлер мен ондағы оқиғаларды сол өңірді ұзақ жылдар бойы аралаған жүргізушілерден естіп, таңғалып жатамыз. Бұл тұрғыда Мейрамбек ағамыздан да тыңдайтынымыз көп. Қырдағы Қарақұмды көп шарлаған ол кісі жол бойындағы әр ерекше белгіні есіне сақтап алады екен. Ат шалдырып, аялдаған әрбір бұлақ-скважиналардың атаулары және олардың қилы тарихы жайлы мағлұматқа сол маңайды жайлап отырған малшылардан, айналасындағы көнекөздерден қанығады. Әр адамның тарихи жады өз өлкесінің тарихын тануымен қалыптасатыны рас. Өлке тарихынан тамыр тартқан адамның туған жеріне, Отанына, мемлекетіне деген сүйіспеншілігі кеудесіндегі жұмыр етпен бірге соғып тұрады.&nbsp;– Жетпісінші жылдардың бел ортасынан бастап, тоқсаныншы жылдардың ортасына дейін шаруашылықта жүргізуші болдым. Астымда жаңа "Газ-53" көлігі бар. Жас шағың – нағыз туған жеріңе қызмет қылатын кезің. Шаршау-шалдығу дегенді білмедік. Күні-түні жолда жүреміз. Бағытымыз – батыс, мақсатымыз – қырда отырған Ақсу совхозының малшыларын көктем мен күзде Сырдан Қырға, Қырдан Сырға көшіру, қажет кезінде қолғабыс беру, уақытылы азық-түлігін, күнделікті тұрмыстарына қажетті заттарын жеткізу. Міне, осы жұмыстардың барлығы жыл он екі ай толастамайтын. Бұл өңірдің бар тарихы Қарақұм мен Қызылқұмда жазылып жатыр. Оны тек оқи алатын көкіректе көзің, тоқи алатын сергек зердең болуы керек. Жолда көп жүрген жолаушы көп көреді, көп нәрсеге куә болады. Тарихты естіген бөлек те, сол тарихи оқиғалар өткен жерлерде болып, кең даланы кернеген ұлттың рухын сезінудің жөні бір басқа. Мәселен, Қарақұм – менің бабаларымның атақонысы. Ал мен сол бабаларым өмір сүрген өлкенің әр тасын, бір тал өсімдігін сүйіп, энергиясын бойыма дарыту үшін сол жердің тарихын білуге тиіспін ғой. Сондықтан мен Қарақұмдағы әр сапарымнан бойыма күш-қуат алып, ерекше бір әсермен қайтатынмын. Тарихи орындардың өзіне тән тылсым күші болады. Адамды еріксіз тартып тұрады. Мәселен, кешегі қызыл империяның солақай саясатына қарсы шыққан бабаларым Қарақұмды паналапты. Ұлтын сақтап қалу жолында орыстардың зеңбірегіне жалаң қылышпен шабуылдаған бабаларымның қаны төгілген жер де – Қарақұм. Сондықтан Қарақұмның әр шоқысы мен үшін қанмен жазылған қасиетті де, қасіретті тарих. Мен тарихшы емеспін, қарапайым еңбек адамымын. Айтайын деп отырғаным да сол, еңбек адамына рух беріп, құрметтеу арқылы оны қанаттандырып, талпындырып отыратын – халық. Өйткені біз елге, жерге және сол жердің иесі халыққа қызмет қылдық, – дейді еңбекпен шыңдалып өскен Мейрамбек ағамыз.&nbsp;Қазір де Мейрамбек Сабырбаев – "Сәрке батыр" шаруашылығында күрішші. Он жылдан астам уақыттан бері күрішті күтіп, баптаған диқан қазірде егін шаруашылығында да мол тәжірибе жинаған. Жылда озаттар қатарында келеді.&nbsp;– Күріш егу де тынымсыз еңбекті қажет етеді. Тек еңбек қана емес, бұл салада агрономиялық білімің де болуы керек. Сондықтан тәжірибемен бірге қосымша ізденіп отыруға да тура келеді. Жерге тұқым сепкеннен бастап, күрішшіге тыным жоқ. Әсіресе алқаптың алғашқы суын тартып, түптету кезеңіндегі күтім өте маңызды. Мұны "қырқынан шығару" дейді. Қырқынан шыққанша нәрестеге қандай күтім қажет болса, күрішті де осы кезеңде барынша баптап, аялау керек. Әйтпесе, ойыңдағыдай өнім алуың екіталай. Мен былтыр 56 гектар жерге күріштің "Лидер" деген сұрпын ектім. Бұл сұрыптың бір ерекшелігі – салмақты әрі климаттық жағдайларға бейімделгіш, төзімді, азықтық құнары да жоғары. Жаздай егіс басында жүрген еңбегіміздің өтемі қайтты, әр гектарына 63 центнер өнім алып, шаруашылықтың қамбасына 3 500 центнер астық құйдым. Әрине, бұл аянбай төккен тердің нәтижесі. Бізді әкеміз жас кезімізден еңбекке баулыды, еңбекпен тапқан түйір дәннің дәмі кеудеңе әл, көңіліңе хош үйіретінін және де еңбекпен келген даңқтың, еңбеккерге деген халықтың құрметінің мәңгілік болатынын құлағымызға құйып өсірді, – дейді диқан.Расында, былтыр&nbsp;күзгі науқанның қорытындысында Мейрамбек ағамыз еңбек озаттарының қатарына қосылды. Бұдан жер емген диқанның өз шаруасына деген сүйіспеншілігін, жауапкершілігін аңғаруға болады. Әке ақылы құлағында қалған еңбеккер бүгінде халық алғысына бөленіп, артынан ерген жас ұрпаққа үлгі болып келе жатыр.

Еңбек адамының өнегелі жолын кейінгі ұрпаққа үлгі тұту – бізге парыз

<a href="https://kyzylorda-news.kz/">Kyzylorda-news.kz</a> &nbsp; Қызылорда облысы әкімінің 2020 жылғы “Мемлекеттік өртке қарсы қызметі жоқ елді-мекендерде өрт сөндіру бекетін құру туралы” жоспарына сәйкес, Сырдария ауданына қарасты Ақжарма, Шіркейлі ауылдық округінде өрт сөндіру бекетін құру жоспарланды.Еске сала кетейік, осыған дейін Ақжарма ауылдық округінде өрт сөндіру бекеті ашылып, бүгіндее өз жұмысын жүйелі атқарып жатыр.Табиғи және техногенді апаттар кезінде, күнделікті сын сәттер мен сағаттарда құтқарушы мамандарға үлкен жауапкершілік жүктелетіні белгілі. Сол себепті, өрт сөндірушілердің еңбек етуіне қолайлы жағдай жасау мемлекет үшін үлкен маңызға ие болып табылады. Аталған бағытта облыс әкімдігі мен төтенше жағдайлар департаменті бірлесіп, кешенді жұмыс жүргізіліп келеді. Соның бір дәлелі соңғы 3 жылда бюджет есебінен 11 автокөлік сатып алынған болатын. Енді, міне тағы қажетті техника қатары толығып отыр. Сондай-ақ, алдағы уақытта да жаңадан өрт сөндіру депосы салынады деп күтілуде.2024 жылғы 20 маусымда Қызылорда облысы ТЖД “ӨСжАҚЖҚ” РММ-нің есебінен шығарылған өрт сөндіру автокөлігі Шіркейлі ауылдық округіне табысталды. Алдағы уақытта өрт сөндіру бекеті ашылып, өз жұмысын бастайтын болады деп жоспарлануда.

Өрт сөндіру автокөлігі табысталды

<a href="https://kyzylorda-news.kz/">Kyzylorda-news.kz</a> &nbsp; Апта ағымында Шиелі ауданында “Ұлттық жекпе-жек” спорт түрінен Ұлы отан соғысының ардагері Бекетай Елеупановтың 100 жасқа толуына орай еске алуға арналған аудандық ашық турнир өтті.Турнирге Сырдария ауданының спортшылары да қатысып, жүлделі орындардан көрінді. Атап айтар болсақ, 8-9 жас аралығында 35 кг салмақ дәрежесінде Шыңғыс Нұрбекұлы ІІ орын, +40 кг салмақ дәрежесінде Ерасыл Ергалиев І орын иеленді. Ал,&nbsp;10-11 жас аралығында 33 кг салмақ дәрежесінде Эльдар Ақайдаров ІІІ орын, 39 кг салмақ дәрежесінде Аслан Саладин ІІІ орын,12-13 жас аралығында 43 кг салмақ дәрежесінде Ғалымжан Мейрамбек ІІІ орынмен марапатталса, 50 кг салмақ дәрежесінде Нұркелді Нұрғазы 1 орын белбеу иегері атанды. Сонымен қатар, 14-15 жас аралығында 63 кг салмақ дәрежесінде Қуаныш Анапия 3 орын, 16-17 жас аралығында 63 кг салмақ дәрежесінде Мадияр Болатов 1 орын және 70 кг салмақ дәрежесінде 1 орынды жеңіп алды. Жас спортшылардың жаттықтырушысы білікті бапкер Данияр Жүсіпбаев.<blockquote>– Жас спортшыларымыз ауданымыздың атынан көптеген жарыстарға қатысып жақсы жетістікке жетіп жүр. Тыңғылықты дайындықтың арқасында біраз шыңдалып, алдағы жарыстардан биіктерден көрінеді деп мол сенім артамын, – дейді жаттықтырушы Д.Жүсіпбаев.</blockquote>&nbsp;

Сырдариялық спортшылар ұлттық жекпе-жектен жеңімпаз атанды

<a href="https://kyzylorda-news.kz/">Kyzylorda-news.kz</a> Сан түрлі ота жасап, адам жанының инженері саналатын хирург дәрігерлердің еңбегін ел айтпаса да біледі. Ал, «ауырып жазылған жан – олжа, жоғалып табылған мал – олжа» демекші, адам үшін ең басты орында тұратыны, әрине, денсаулық. Осы «олжаны» сізге сыйлайтын, аурудан айықтыратын медицина қызметкерлері. Солардың бірі – Шиелідегі білікті дәрігер, білгір хирург Бақытжан Демеуов.Өз ісінің нағыз шебері бола білген ақ халатты жандар талай адамның жүрегіне үміт отын жағып, өмір гүлін сыйлап келеді. Күнделікті үсті-үстіне ағылып келіп жатқан науқастарға &nbsp;ем-шаралар көрсетуден бөлек, емхананың өзге де күйкі тірлігіне қарамастан кейіпкеріміз әрқашан жайдары мінез танытып жүруден жалыққан емес. «Гиппократ» антын қабылдап, сабырлық пен салмақтылықты серік еткен Б.Ғалымжанұлы адам жанының инженері іспеттес. Осы саладағы әрбір маманның жанкешті еңбегі – талай науқасты аман сақтап қалып, олардың өмірі мен денсаулығы үшін күрес жолында күн-түн демей жүретін нәтижелі қызметінен аңғарылатыны сөзсіз. Дәрігерлерге мың сан адамның алғысы күн сайын жауады. Әлбетте, оңай мамандық емес. Бүкіл уақытыңды сарп етіп, өз ісіңнің кәнігі шебері болуды талап ететін мәртебелі мамандық. Сондай ақ халаттының бірі – Бақытжан Демеуов дер едік.Иә, асылы ықылым заманнан бері қоғамдық өмірде қалыптасқан белгілі бір құбылыс – тұлғалардың жаратылысы ерекше болып, көпшілік ортада Құдай берген қадір-қасиетімен бала кезден-ақ танылатындығында. Сөйтіп, жастайынан көзге ілігіп, қай істе де мақсат қояр мінез-болмысымен дараланып, шоқтығы биік тұратындығын аңғаруға болады. «Шиелі ауданаралық ауруханасы» шаруашылық жүргізу құқығындағы коммуналдық мемлекеттік кәсіпорнының «Емхана» бөлімінің хирург, эндоскаписті Бақытжан Ғалымжанұлы ұлттық дәстүрде тәрбиеленген, өз ісін жан-тәнімен сүйетін, оның мәртебесін өсіріп, халқының үмітін, сенімін ақтап келе жатқан білікті маман. Ол Бәйгеқұм ауылындағы №251 мектебін 2000 жылы бітіріп, сол жылы Ақтөбе қаласындағы «М.Оспанов атындағы Батыс Қазақстан мемлекеттік медицина» академиясының «Емдеу ісі» факультетіне оқуға түседі. Жастайынан адам жанына араша болуды мақсат еткен ол 2009 жылы дәрігер маман атанып шығады. Алғашқы еңбек жолын 2009 жылы Шиелі аудандық ауруханасының «Хирургия» бөлімінде дәрігер хирург болып бастайды. Білікті, тәжірибелі мамандармен қатар жүріп, білімін теория жүзінде шыңдай түседі. Одан әрі 2010 жылдан 2016 жылдар аралығында «Қазатомөнеркәсіп-Демеу Шиелі» филиалының Медициналық санитарлық бөлімінде хирург дәрігер болып жұмыс істейді. 2016 жылдан қазіргі таңға дейін кәсіпорынның «Емхана» бөлімінде жоғары санатты хирург, эндоскопист дәрігері болып абырой биігінен көрініп келеді.– Ота жасау оңай іс емес. Хирург дәрігер болу жұмыста кешкі алтыға дейін ғана жалғасатын кәсіп емес, ол күні-түні жұмыста болу деген сөз. Сырқаты жанына батқан науқастың жанына шипа, көңіліне медет болу да біздің міндет. Бұл дүниедегі басты байлық саналатын денсаулықтың қадір-қасиетін ұғындыратын маман иесі болғандықтан салауатты өмір салтын ұстануды үнемі айтып жүреміз, – дейді Б.Демеуов.Қателесуге болмайтын, адам өмірін алақанына салып, мыңдаған ота жасаған кейіпкерімізге бас дәрігер Нұрлан Әмір «Бақытжан білікті маман. Қызмет атқарып келе жатқан жылдар ішінде өзін жақсы жағынан көрсете білді. Алдын ала жасалынған медициналық жұмыс жоспарын уақытылы орындап отырады. Қосымша ұйымдастыру жұмыстарына белсене араласады. Өзі жұмыс жасап отырған ұжымда және аймақ халқы арасында сыйлы, беделді. Үнемі білімін жетілдіріп жүреді. Алдағы уақытта да өз ісінің маманы ретінде қызметкерлерге және халыққа көрсетер қызметі мол деп сенеміз», – деп баға да берген болатын.&nbsp;

Бақытжан Демеуов: Ота жасау оңай іс емес

<a href="https://kyzylorda-news.kz/">Kyzylorda-news.kz</a> &nbsp; &nbsp;Көктемнің жаймашуақ күнінің бірінде Қызылорда қалалық полиция басқармасының жедел «102» арнасына қала аумағында жеке үйдің бірінде өрт шыққандығы туралы хабарлама түсті. Полицейлер оқиға орнына жеткенде тілсіз жау күш алып, үйдің ішін қою түтін басқан. Осы оқиғада алғашқылардың бірі болып, тілсіз жаудың ортасына кіріп, басын қатерге тіккен Қызылорда қалалық полиция басқармасының жергілікті полиция қызметі бөлімінің ювеналды полиция бөлімшесінің учаскелік полиция инспекторы, полиция аға лейтенанты Жандос Мәлікпен сұхбаттасқан едік.– Өртке оранған үйден зардап шеккендерді эвакуациялау кезінде қандай әрекет еттіңіз?– &nbsp;Хабарлама түскен бойда дереу оқиға орнына аттандық. Жағдайды тез бағалап, құтқару жұмыстарын бастадық. Өртке оранған бөлмелердің бірінен 73 және 69 жастағы қала тұрғындары және 5 шетел азаматтары эвакуацияланып, адамдарды құтқару жұмыстарын шебер ұйымдастырдық. Зардап шеккендердің өмірі мен денсаулығын қорғау үшін барлық қажетті қауіпсіздік шарасын қабылдап, шұғыл әрекет ету арқасында құтқарылған азаматтардың өміріне еш қауіп төнбеді. Өз басым өз іс-әрекеттерімді кәсіби борышымды орындау деп санаймын және атақ-даңққа ұмтылмаймын, өйткені қиын жағдайда қалған адамдарға көмектесу біздің міндетіміз деп есептеймін. Өмірді құтқару мен үшін және менің әріптестерім үшін мақтанатын нәрсе емес, күнделікті ойланбастан орындайтын жауапкершілік. Біздің міндетіміз – азаматтардың қауіпсіздігін қамтамасыз ету.– Полиция қызметкері ретіндегі қызметіңіз туралы айтып берсеңіз, қандай міндеттер мен жауапкершілік бар?Полиция қызметкерінің жұмысы – жоғары жауапкершілік пен кәсібилікті талап ететін қызмет. Күн сайын тек заң білімін ғана емес, адам психологиясын, қоғамдық қатынастарды терең білуді талап ететін міндеттер қойылады. Азаматтардың құқықтарын қорғауға, қоғамдық тәртіп пен қауіпсіздікті қамтамасыз етуге міндеттіміз. Бұған қылмыстың алдын алу, қоғамның сенімі мен құрметін қолдау кіреді. Полиция қызметкерлері адам құқықтарын сақтай отырып, қатаң заң аясында әрекет етуі керек. Өз міндеттерін тиімді атқару үшін өз дағдылары мен білімдерін үнемі жетілдіріп отыруымыз қажет. Басты міндетіміздің бірі – барлық азаматтар үшін қауіпсіз және әділ орта құру.– &nbsp;Тәртіпті сақтау және мәселелерді шешу үшін қандай әдістерді қолданасыз?– &nbsp;Кез келген полиция қызметкерінің жұмысы тәртіпті сақтау мен азаматтардың қауіпсіздігін қамтамасыз етудің негізі болып саналатын заңды қатаң сақтауға негізделген. Полиция проблемаларды шешу үшін профилактикалық әңгімелесулер мен қоғамдық науқандардан бастап жедел-іздестіру шаралары секілді түрлі әдісті қолданылады. Маңызды аспект – халықпен ынтымақтастық, оның ішінде тұрғындармен кездесулер өткізіп, өзекті мәселелерді талқылап, оларды шешу жолдарын қарастыру. Заңды сақтау – полиция қызметкерінің міндеті ғана емес, халықтың сенімінің негізі.– Полиция қызметкері болғысы келетін жастарға қандай кеңес берер едіңіз...– Полиция қызметкері болу – қоғамға қызмет ету, құқық тәртібін қорғау жолын таңдау деген сөз. Полицияда табысты қызмет ету үшін жастардың бойында бірқатар қасиеттер болу қажет. Полиция қызметкері болғысы келетіндер үшін болашақ мансабында көмектесетін бірқатар қасиеттерді дамыту маңызды. Ең бастысы, полиция қызметкерлері халықтың қауіпсіздігіне жауапты болғандықтан, жоғары жауапкершілік пен сенімділік талап етіледі. Әртүрлі жағдайларда тез шешім қабылдау қабілеті, сондай-ақ экстремалды жағдайларда сабырлылық пен жинақылық қабілеті де маңызды. Сондай-ақ физикалық дайындық пен төзімділік, басқалардың проблемалары мен қиындықтарын түсіну, сенімді орнатуға және түрлі жағдайларда адамдармен қарым қатынасты орната алуы маңызды. Бұл қасиеттер жастардың полиция қызметкері болып қана қоймай, осы салада маман болып қалыптасуына септігін тигізеді. Оқуда осы мамандықты таңдамас бұрын, сіздің құндылықтарыңыздың таңдаған мамандығыңызбен үйлесімділігі туралы ойлану маңызды. Көбінесе адамдар мамандық таңдауда қателеседі, жұмыс барысында онымен байланысты қиындықтарды жеңе алмайтынын түсінеді. Сондықтан жеке қабілеттер туралы ойлану және олардың таңдалған мамандыққа сәйкес келетініне көз жеткізу маңызды.– Сұхбатыңызға рахмет.Әңгімелескен С.Темірболат

Қазақстан және Қызылорда облысының жаңалықтары