Kyzylorda-news.kz. 14 наурыз күні еліміздің батыс өңірлерінде Амал мерекесі атап өтіледі. Ал &nbsp;өзге өңір жұртшылығы үшін бұл мереке таңсықтау. Десе де бұл мерекенің қазақ тарихында ертеден бар екені мәлім.
“Амал күні”, “Көрісу күні” деп аталатын бұл мереке жайлы түрлі деректер мен аңыз-әпсаналар бар. Негізінен “Амал мерекесі” тек батыста ғана емес, бұрындары еліміздің көп жерде болғанға ұқсайды. Шәкәрімнің ұлы Ахаттың жазбаларында: “14-март — ескіше 1-март. Әкей айтты: “Бүгін ескіше 1-март, қазақша жаңа жыл, ұлыстың ұлы күні дейді. Ал жаңа жылдың бұрынғы аты — Наурыз, бұл фарсы тілі. Жаңа күн деген сөз. Қожа-молдалар ескі әдетті қалдырамыз деп, құрбан, ораза айттарын ұлыс күні дегізіп жіберген. Ескі қазақша, ескі түрікше жаңа жыл күнінің аты — ұлыс. Жаңа жыл басының ұлыс екеніне мынадай дәлел бар. “Ұлыс күні қазан толса, ол жылы ақ мол болар. Ұлы кісіден бата алса, сонда олжалы жол болар” — деген. Осыған қарап, ХІХ аяғы мен ХХ ғасырдың басына дейін қазақ даласында көрісу дәстүрі болған деген пікірмен келісуге болады. Кеңес үкіметінің саясатына байланысты, еліміздің көптеген аймағында Амал мерекесін тойлау ұмытылып, батыс өңірлерде ғана сақталып қалған секілді. Тіпті кей археологтар Амал мерекесінің түп-төркінін Адай тайпасының пайда болуымен де байланыстырады.
Неге 14 наурыз күні тойланады?
Тарихқа көз салсақ, Амал мерекесінің 14 наурызда тойлануының бір себебі күнтізбенің алмасуында жатыр. Әлем жұртшылығы шаруаның жайына қарай, қардың еруі, өзендердің тасуы, құстардың көктемде келіп, күзде қайтуын ескеріп, осы құбылыстардың қайталануын жыл деп есептеп, табиғи күнтізбелер жасаған.
1918 жылдың 24 қаңтарында “Батыс Еуропа күнтізбесінің Ресей мемлекетіне енгізілуі туралы” В.И.Ленин қол қойған декрет қабылданды. Бұл кезде юлиан және григорий күнтізбелерінің арасындағы алшақтық 13 күнге жеткен еді. Декретте көрсетілгендей, 1918 жылдың 31 қаңтарынан кейінгі күн 1 ақпан емес, 14 ақпан болып есептелді. Соның әсерінен бұрын 1 наурызда Жаңа жыл — Ұлыс күнін тойлайтын қазақ елі 1918 жылдан бері қарай 14 наурызда көрісіп келеді деуге болатын сияқты.
14 наурыз күні Ай мен Үркердің қиылыса өтуін қазақ халқы тоғыс деп атаған. Тоғыс осы 14-15 наурызға сәйкес келеді екен. Халық осы уақытты қыс жұлдызы бiтiп, жаз жұлдызы туды деп есептеген.
Шығыс елдеріндегі күн (шәмси) күнтізбесі&nbsp;бойынша, наурыздың басталуы хамал (амал)&nbsp;айының 1 жұлдызы болып есептеледі. Хамал — Тоқты шоқжұлдызының ескі парсыша атауы&nbsp;болып табылады. Күн мен түн теңеліп, амал&nbsp;кірген сәтте Тоқты шоқжұлдызы туады. “Наурыз” сөзі парсының “жаңа күн” дегенінен шыққан. Ертеде біздің қазақ бұл күнді “наурыз” демей “амал” деген. Бұл қазіргі күнтізбе бойынша 14 наурызға сәйкес келеді.
Қар еріп, көктем шыға бастағанда, шыбын-шіркей, құрт-құмырсқа, жан-жануар, тіршілік атаулы ұйқыларынан оянатыны белгілі. Ел аузындағы әңгімелерге сүйенсек, қыс бойы ұйқыда жатқан балпақ оянып, інінің аузына шығып, басын қылтитып далаға қарайтын көрінеді. Осы кез 14 наурызбен тұспа-тұс келеді екен. Бұл көріністі далалықта, құмдауыт жерлерде бақылауға болады.
Көрісу – дәстүрдің озығы
Амал мерекесі немесе көрісу – ағайын-туыс татулығы, ел бірлігінің бір көрінісі іспетті. Өйткені, бұл дәстүр ағайын арасындағы түсінбеушілікті жойып, татуластырып, табыстырады. Арадағы өкпе-ренішін кешіріп, араздықты ұмыттырады. Тек бір-біріне жақсылылық тілеп, алғыс айтылады.
Көрісуде ер мен әйелге шектеу қойылмайды. Ер адамдар қос қолын ұсынып көріссе, әйелдер жағы бір-біріне алақанын тосып, әуелі оң иығын, сосын сол иығын түйістіреді. Ал атасы немесе қайынағалары келіндерімен қол алысып көрісуге болмайды. Жатжұрттық деп саналатын, ұзатылған қызға ағайын-тумасы үлкен болсын, кіші болсын артынан іздеп барып, арнайы көріскен.
Амал мерекесінің бүгінгі қоғамдағы маңызы жоғары. Бірлік пен татулықты ту еткен мереке – қазақ халқының бауырмалдық салтының бір көрінісі екені анық. Біз де сіздерге “Бір жасқа келуіңізбен!”, “Жасыңызға жас қосылсын!”, “Ғұмырлы болыңыз” деп тілек білдіреміз.
<a href="https://massaget.kz/mangilik_el/shanyirak/salt-dastur/37060/">Massaget</a>

Амал мерекесі неге батыста ғана тойланады?

Kyzylorda-news.kz. Мемлекет басшысының «Жаңа Қазақстан: Жаңару мен жаңғыру жолы» атты халыққа Жолдаумен толықтай танысып болған соң, жастардың білім алуымен, өзін дамытуына бағытталған жұмыстар одан әрі қолдау табатынына үлкен сенім пайда болды. Жолдауда айтылған міндеттер мен жоспарларды әрбір Отанын сүйетін жас, ой елегіне өткізіп, жауапкершілікпен қараса деймін.
Егемендік алған алғашқы күнінен бастап жастар мемлекеттік саясаттың басым бағытына ие болды. Кешегі жолдау сол ізгі жолдың жалғасы деп сезіндім. Оның ең үлкен себебі Тәуелсіздіктің маған берген ең үлкен сыйы және мүмкіндігі – болашақ бағдарламасы арқылы менің Ұлыбританияның Борнмут университетінде «Халықаралық туризм менеджменті» магистрі дәрежесін алғаным.
Оқуымды ойдағыдай тәмәмдаған соң еліме оралып, туған жеріме және өз салама келіп қызмет жасау ең бірінші мақсаттарымның бірі болды. 
Еліміздің болашағы – жастар. Жастарды білімге, ғылымға баулып, алған тәжірибелеріммен бөлісу ел алдындағы парызым деп білемін. Сондықтанда қазіргі таңда Қорқыт ата атындағы Қызылорда университетінде өзімнен кейінгі жастарға ұстаздық етіп, оған қоса докторантурада ғылыми жолымды жалғастырудамын.
Аймағымыздың туристік әлеуеті өте жоғары. Алайда, оны толыққанды халықаралық деңгейді ілгерілету әліде тұралап келеді. Осы орайда, облысымыздың тарихи-мәдени ескерткіштерін таныстыру мақсатында оффлайн аудио-гид жобасын іске асырылды. Нәтежиесінде облысымыздағы жиырмадан астам мәдени мұра нысандары туралы толыққанды ақпаратты үш тілде кез-келген турист ашық ресурстардан жүктеп ала алады. Бұл жұмыс партияның «Жаңа Қазақстанға арналған 30 инновациялық идея» жобасы аясында жалғасын табады.
Қазіргі таңда көп жастар шет ел асып, «Қазақстанның болашағы жоқ» деген алып қашпа әңгімелер айтуда. Олай деп айтуға еш себеп жоқ. Өйткені барлық мемлекеттік бағдарламалардың 60%-ы жастарға бағытталған. Оның ішінде жас отбасыларды баспана мен қамтамасыз ету, жас мамандарды жұмыспен қамту(жастар практикасының бір жылға ұзартылуы), мектеп бітіруші түлектерге білім гранттарының санының жылдан жылға артуы, ғылым жолында өзін табамын деген жастарға магистратура және докторантураға түсіп, оқуға үлкен мүмкіндіктер пайда болды. Президентіміз соңғы кездері техникалық және IT саласындағы мамандықтарға үлкен көңіл бөлуде. Оның бірден бір дәлелі – қазақстандық жастар әлемдегі үлкен компанияларда жұмыс жасауда. (Apple, Yandex, google).
Жастарды қолдау саяси ортада да қолдауын тауып келеді. Оның бір айқын дәлелі былтырғы праймеризде партияның 35 жасқа дейінгі жастарға 30 пайыздық квота бөлінуі.Осындай нақты қадамдар, нәтиже бермеуі мүмкін емес деп ойлаймын.
Бекзат Ырза, 
Қорқыт ата атындағы Қызылорда университетінің оқытушысы, «Болашақ» бағдарламасының түлегі

Бекзат Ырза: Нақты қадамдар, нәтиже бермеуі мүмкін емес

Kyzylorda-news.kz. Ауа-райының қолайсыздығына байланысты бірнеше облыста көлік қозғалысына шектеу енгізілді.
“Ақтөбе-Атырау-Ресей шекарасы” тасжолының 12-90 шақырымында – “Ақтөбе-Қандыағаш” учаскесі толығымен жабылды.
Бұдан бөлек, “Жезқазған-Петропавл” тасжолының 65-252 шақырымында – “Жезді – Қостанай облысының шекарасы” учаскесінде көз қозғалысы тоқталыды.
Ал екі тасжол бойынша шектеулер енгізілді. Олар:
“Екатеринбург-Алматы” жолының 1353-1426 шақырымы – “Ақмола облысы – Теміртау ПВП” учаскесі;
“Қызылорда-Павлодар” тас жолының 970-1066 шақырымы – “Қарағанды – Молодежный кенті” учаскесі (жүк және қоғамдық көлік үшін).

&#8220;Қызылорда-Павлодар&#8221; тас жолы   жабылды

Kyzylorda-news.kz. 23 наурызда белсенді солтүстік-батыс циклоны Қазақстанның барлық дерлік аумағына жауын-шашын әкеледі. Оңтүстік өңірлерде қар және жаңбыр жауады деп болжанып отыр.
Республикада жел күшейіп, солтүстік пен шығыста бұрқасын соғады, оңтүстікте тұман түсіп, көктайғақ болады.

Сәрсенбіге арналған ауа райы болжамы

Kyzylorda-news.kz. Қызылорда гарнизоны әскери бөлімінің жеке құрамы Наурыз мерекесін атап өтті.
Тамыры тереңге бойлаған әз-Наурыз қай кезде де іргесі сөгілмес бірліктің, ырыс пен ынтымақтың мерекесі болып келген. Ызғарлы қыстың кетіп, көктемнің келгенін білдіретін Ұлыстың ұлы күнін ұлықтауға Қарулы күштер ардагерлері, бөлімдегі әскери қызметшілердің отбасы мүшелері және қонақтар қатысты.
Басты мақсат – әскери қызметшілердің отбасы мүшелері арасында ұлттық салт-дәстүрлерімізді ұлықтау. Жауынгерлердің бойында мәдени-тынығу және спорттық шаралар арқылы жауынгерлік рухты көтеріп, Ұлыстың ұлы күнін дәріптеу.
Іс-шара басында Қызылорда гарнизонының бастығы подполковник Ербол Әбдірайым әскери бөлімнің жеке құрамын және қонақтарын Наурыз мерекесімен құттықтап, қызмет үздіктерін марапаттады.
<blockquote>
 “Ұлыстың ұлы күні Қарулы күштерімізде жыл сайын кең көлемде аталып келеді. Осындай іс-шаралар әскери қызметшілердің арасында ынтымақтастық пен бауырмашылықты арттырып, ұжымды біріктіре түседі. Баршаңызды Наурыз мерекесімен құттықтаймын”, – деді ҚР ҚК Құрметті ардагері, запастағы подполковник Мыңділда Ршауов.
</blockquote>
Мерекелік іс-шара жоспарына сай бөлім аумағында алтыбақан құрылып, түрлі спорттық шаралар ұйымдастырылды. Қазақша күрес, арқан тартыс, гір тасын көтеру және кол күресінен сайыстар өтіп, жеңімпаздар анықталды. Әуенді күймен шашу шашылып, тұсау кесу дәстүрі сахналанды. Бөлім әскери қызметшілерінің отбасы мүшелерімен жұмысты ұйымдастыру қызметі айналаны тазарту жұмыстары, көшеттер отырғызу және отбасылық ойын-сауық жарыстарын ұйымдастырды. Меймандарға мерекелік дастархан жайылып, ұлттық тағамдар мен Наурыз көже тарту етілді.
<img src="https://kyzylorda-news.kz/wp-content/uploads/2022/03/img-20220322-wa0033.jpg" alt="" />
<img src="https://kyzylorda-news.kz/wp-content/uploads/2022/03/img-20220322-wa0036.jpg" alt="" />
<img src="https://kyzylorda-news.kz/wp-content/uploads/2022/03/img-20220322-wa0035.jpg" alt="" />

Қызылордада әскерилер Наурыз мерекесін атап өтті

<a href="https://kyzylorda-news.kz/">Kyzylorda-news.kz</a>. Наурыз – Орта Азия мен Таяу Шығыс елдеріне, осы аумақта жатқан бүкіл мұсылмандарға тән көнеден келе жатқан мейрам. Мұны көбінесе мұсылман қауым атап өтетіндіктен, бір жағынан діни мейрам екен деп те қаламыз. Сондықтан болса керек, наурыз бен діни мейрамдарды шатастыратын жұрт баршылық. Кезінде бұл мерекеде құрбандық шалынған екен деген сыбыс та бар. Ендеше мұның анық-қанығын білуге тырысып көрелік.
Ұлттық мейрам наурыз бен оның дінге қатысы бар деген ой ХХ ғасырдың басында айтыла бастады. Бұған 1925 жылы Алаш қайраткері Сұлтанбек Қожановтың «Еңбекші қазақ» газетіне берген мақаласы дәлел болады. Мұнда публицист наурыз мейрамының ислам діні тарағанға дейін шыққан, тұрмыс тудырған шаруалар мейрамы дегенді айтады.
<blockquote>
 «Наурыз мұсылмандықтан бұрын шыққан мейрам. Наурыз ел шаруасымен күн көріп, табиғат шарттарына тұрмысы көбірек байланысқан елдің тұрмысы тудырып отырған мейрам. Жұрт қысқы қысымшылықтан құтылып, малы жұт қаупінен құтылып, оның қалған малы балалап, қарасы көбейіп жатқан, өздері егін шаруасына қам қылып, қасиетті жаз маусымында байлығын молайтудың, табиғаттың иіп тұрған кезінде қолынан келгенінше көп өндіріп қалудың шарасын істеп, абыр-сабыр болып жатқан ел шаруаларының талабы қозған ең көңілді уақыты – көктем. Сол көктемнің басы – Наурыз…» – деп жазады Сұлтанбек Қожанов.
</blockquote>
Дәл 22 наурыз күні шыққан сол мақаласында Қожанов мына бір мәселені айта кетеді:
<blockquote>
 «22-ші март – Наурыз мейрамы. Күншығыс халқына тегіс мейрам қылып өткізу салт болған күн. Мұны көп білгіштер дін мейрамы деп жиреніп, лажы болса, құртып жіберу керек деп сопышылсынып, аңқау елге арамза молдалық соғатын қазақ коммунист жолдастардан бар екен. Наурызға арналған намаз жоқ. Наурызда құрбан шалынып, құран оқылмайды. Наурыз – жыл басы. Наурыз – күн мен түннің теңеліп, күннің асып кетіп бара жатқан уағына дәл келетін мейрам», – деп жазады қоғам қайраткері.
</blockquote>
Бұл үзіндіден сол уақытта Наурызды қаралауға тырысып, оған жасырын діни сарын қоспақшы болғандар шыққанын байқаймыз. Құрбандық шалып, намаз мен Құранды оқуды да солар шығарғанға ұқсайды.
Бұдан кейін публицист Наурыздың неге шаруаның, халықтың салтынан туған мейрам екенін дәлделдеуге тырысады.
Қоғам қайраткері, жазушы, Бауыржан Момышұлының келіні Зейнеп Ахметованың «Бабалар аманаты» атты кітабында жазғандай, әсіресеқызыл коммунистердің «арқасында» 1927 жылдан бастап Наурыз мерекесі тойлауға арнайы тыйым салынды. Содан ұзақ үзілістен кейін 1988 жылы халықтық мейрам ретінде алғаш рет Алматыда тойланды.
Қазақ елінің ардақтап асыға күтетін жыл мерекесі, шаруа тойы, табиғат мейрамы осы – Наурыз. Бұл күнге әрбір отбасы қыстан бастап дайындық жасаған. Қысқы соғымның, айтайық, шеке, жамбас, жілік, қазы дегендей, қадірлі мүшелерінен әдейі арнап сүрі сақтайды. «Наурызда ашамын» деп әжелер қарындағы майын, жент, құрт, ірімшік деген секілді тағамдарды алдын ала үнемдеп, қамданып жүреді.
<blockquote>
 «Шешелеріміз наурыздағы дәмдерді «ұзынсарының сыбағасы» деп те атайтын. «Ұзынсары келетін шақ» деп қазақтар көктемнің көкөзек кезін айтады. Қысқы соғым таусылып, мал әлі төлдемей, айран-сүт, уызға жарымайтын малдың арық уағы. Адамның да өңі өзгеріп, қуқылданып, көзі қарығып, жылы жазды сарыла күтетін кезең. Сондықтан аналарымыз Наурызға деп жоғарыдағы тағамдарды көзден таса жерлерге ықтияттап, тығып жүруші еді», – деп жазады Зейнеп апамыз.
</blockquote>
Зейнеп апамыз тағы бір сөзінде «наурыз мейрамында мал соймайды, жалпы қан шығармайды. Өсер төлге, көбейер малға кесірі тиеді, мал басы кемиді деген тыйым бар» дегені де бар.
Қазақта наурыз кезінде құрбандық шалу әдеті болмағанын имамдар да айтады. Халифа Алтай мешітінің наиб имамы Дәулет қажы Қабидолдиннің айтуынша, қазақтың наурыз келгенде қой сойып, ет асатын, наурыз көженің қамын жасайтын әдеті бар. Алайда мұның құрбандық шалуға қатысы жоқ.&nbsp;
<blockquote>
 «Мұсылмандарда тек екі мейрам ғана бар. Бірі – ораза айт, екіншісі – құрбан айт. Екеуінің уақыты григориан күнтізбесіне сәйкес, жыл сайын бірнеше күн алдыға жылжып отырады. Егер құрбан айт алдағы жылдары наурыз айына дөп түссе, сол кезде ғана құрбандық шалынады», – деп түсіндірді имам.
</blockquote>
<a href="https://massaget.kz/22_nauryiz/64711/">massaget.kz</a>

Наурызда құрбандық шала ма?

Kyzylorda-news.kz. Табиғат ананың бусанып, тіршілік тірілетін жаңару айын сырбойылықтар бар сән-салтанатымен қарсы алды.
Орталық алаңда қаз-қатар ақшаңқан 18 киіз үй тігіліп, ұлттық салт-дәстүрді дәріптейтін шаралар, спорт түрлерінен жарыстар ұйымдастырылып, мереке нышаны саналатын наурыз көже әзірленіп, әсерлі ән мен жыр төгілді.
Күн мен түннің теңеліп, қытымыр қыстың ызғарынан құтылып, көктемнің шуақты күндерінен үміт күттіретін Ұлыстың ұлы күнінде облыс әкімі Гүлшара Әбдіқалықова сырбойылықтарды әз-Наурыз мейрамымен құттықтап, ақжарма тілегін жеткізді.
<blockquote>
 “Күн менен түн теңеліп, тіршілік атаулы оянып, айнала мәре-сәре болатын Ұлыстың ұлы күні – жыл бастауы әз-Наурыз баршаңызға құтты болсын! Ақ боз үйлер тігіліп, дастарханымыз кеңінен жайылып, жиналған жұрт ән мен күйге бөленіп, абыр-сабыр болатын осы мерекені біраздан бері сағына күткеніміз де рас. Екі жылдан бері әлемді жаулаған пандемия індеті салдарынан Наурыз мейрамын кең ауқымда атай алмадық. Міне, биыл індеттің беті қайтып, бәріміз емен-жарқын атап өтуге мүмкіндік алдық. Мемлекет басшысы Қасым-Жомарт Кемелұлы Тоқаевтың наурыз айында Қазақстан халқына Жолдауын арнауы еліміздің жаңа тарихи кезеңі төл жаңа жылымыздан басталатынын көрсетті. Наурыз әр отбасына құт болып енсін, ырыс-несібеміз мол болсын, шаңырақтарды шаттыққа кенелтіп, қуанышқа толтырсын деп тілеймін! Ұлыс оң болсын, ақ мол болсын”, – деді Гүлшара Әбдіқалықова.
</blockquote>
Думанды шарада мәртебелі қонақ болған ҚР Парламенті Сенатының депутаттары Мұрат Бақтиярұлы мен Ақмарал Әлназарова Наурыз тойын тойлап, Сыр халқына бақ-береке тіледі.
Өңір басшысы алаңда тігілген киіз үйлерге кіріп, астан ауыз тиді.
Мерекеге жиналған тұрғындар да тағамдар мен наурыз көжеден дәм татты.
Мерекелік шара жергілік өнерпаздардың концерттік бағдарламасымен жалғасты.

Қызылордалықтар Ұлыстың ұлы күнін сән-салтанатпен қарсы алды

Kyzylorda-news.kz. Қызылорда облысының әкімі Гүлшара Әбдіқалықова сырбойылықтарды Наурыз мерекесімен құттықтады.
Қадірлі жерлестер! Жер-Ана бусанып, тіршілік атаулы жанданып, адамзат баласы қуанып қарсы алатын Ұлыстың ұлы күні – жыл бастауы әз-Наурыз баршаңызға құтты болсын!
Бұл – ойымызды таза арнаға бұрып, ізгілікке жетелейтін ауызбіршілік пен ынтымақтың, кешірім мен мейірімнің, үміт пен сенімнің, жаңару мен жаңғырудың мерекесі.
Дамудың жаңа жолына түскен тәуелсіз еліміздің бүгіні берекелі, ертеңі еңселі, келешегі кемел болсын деп тілеймін!
Ұлттық құндылықтарымызды ұлықтайтын Наурыз мейрамы тәуелсіз елімізге, туған жерімізге, әрбір отбасына бақ-береке, ырыс-құт, молшылық әкелсін! Ұлыс оң болсын, ақ мол болсын! Наурыз құтты болсын!

Аймақ басшысы сырбойылықтарды құттықтады

<a href="https://kyzylorda-news.kz/">Kyzylorda-news.kz.</a>&nbsp;ҚР Тұңғыш Президенті – Елбасы Нұрсұлтан Назарбаев қазақстандықтарды Наурыз мерекесімен&nbsp;<a href="https://elbasy.kz/kk/kazakstan-respublikasynyn-tungysh-prezidenti-elbasy-nursultan-nazarbaevtyn-nauryz-merekesimen-kuttyktauy-2222239">құттықтады</a>.
Қымбатты қазақстандықтар!
“Баршаңызды Ұлыстың ұлы күнімен шын жүректен құттықтаймын!
Сан ғасырлық тарихы бар Наурыз мейрамы бүгінде ел бірлігінің, келісім мен тұрақтылықтың жарқын символына айналып отыр.
Қазақ халқының ұлы мәдениеті мен бай салт-дәстүрінен бастау алған мереке ізгілік пен ынтымақ, татулық пен сыйластық сынды мәңгілік құндылықтардың жаршысы саналады.
Бүгінгі таңда әлемнің әр түкпірінде болып жатқан оқиғалар бұл мейрамның маңыздылығын одан әрі арттыра түскені сөзсіз. Ол бізге қоғамдағы келісімнің, көпұлтты еліміздегі тыныштық пен мамыражай өмірдің қадірін түсінуге көмектеседі.
Тіршілікті түлеткен көктем мерекесі жанымызды жадыратып, Отанымыздың игілігі жолында жаңа жетістіктерге жету үшін бойымызға күш-қуат пен сарқылмас жігер береді.
Ұлыстың ұлы күнінде баршаңызға мықты денсаулық, бақ-береке тілеймін! Әз-Наурыз шаңырақтарыңызға ырыс пен молшылық әкелсін”, – деп жазады Нұрсұлтан Назарбаев.

Нұрсұлтан Назарбаев қазақстандықтарды Наурыз мерекесімен құттықтады

<a href="https://kyzylorda-news.kz/">Kyzylorda-news.kz.</a>&nbsp;22 наурызда атмосфералық фронталды бөліктердің өтуіне байланысты Қазақстанның басым бөлігінде күн құбылмалы болады, деп хабарлайды Қазгидромет.
Еліміздің батысында, солтүстігінде, шығыс аймақтарында қар жауып, жаяу бұрқасын болады, оңтүстік жартысында жауын-шашын қар және жаңбыр жауады.
Қазақстан бойынша тұман түсіп, жел күшейеді, оңтүстікте, оңтүстік-шығыста көктайғақ болып, солтүстікте, батыста және шығыста жаяу бұрқасын соғады.
Қызылорда облысының солтүстігінде көктайғақ болып, облыстың солтүстігінде, орталығында жел 15-20 м/с-қа дейін күшеюі мүмкін.

22 наурызға арналған ауа райы болжамы

Kyzylorda-news.kz. Наурыз думан аясында бүгін А.Тоқмағамбетов атындағы мәдениет үйінде «Атадан балаға мұра» атты облыстық қолөнер байқауының көрмесі ұйымдастырылып, шеберлердің өнімдері көптің назарына ұсынылды.
Облыс әкімі Гүлшара Әбдіқалықова жас қолөнершілердің қолынан шыққан бұйымдарды көріп, жергілікті ісмерлердің туындыларын жоғары бағалады.
Қолөнершілер бисерден тоқылған, оюлы кестемен өрнектелген туындылар мен ұлттық аспаптар, ағаш бұйымдарының бірнеше түрін әзірлеген. Мектеп оқушылары түрлі стильдегі бейнелер негізінде әр өнімге ұлттық нақыш беруді мақсат тұтқан.
Байқауға 60-тан астам шебер қатысып, 21 қолөнерші үздік деп танылды. Бас жүлде “Бегім ай” өнер орталығындағы қолөнер үйірмесінің оқушысы Толысбай Нұрайға бұйырды.
<img src="https://kyzylorda-news.kz/wp-content/uploads/2022/03/fb_img_1647861969476.jpg" alt="" />
<img src="https://kyzylorda-news.kz/wp-content/uploads/2022/03/fb_img_1647861965908.jpg" alt="" />
<img src="https://kyzylorda-news.kz/wp-content/uploads/2022/03/fb_img_1647861960796.jpg" alt="" />

Қызылордалық оқушылардың қолөнер бұйымдары арнайы көрмеге қойылды

Kyzylorda-news.kz. Балалар жылына тарту ретінде Сыр төрінде республикалық оқушылар айтысы ұйымдастырылды. «Көктем нұры» атауымен айшықталған дода әз-Наурыз мерекесінің ажарын ашты.
Айтысқа еліміздің 5 өңірі мен Қызылорда қаласы және Сырдария, Шиелі аудандарынан келген 10 айтысқер бақ сынады. Айтысқа сусап келген тұрғандар сөзден қамшы өрген арқалы жас ақындардың өнеріне тәнті болды.
Облыс әкімі Гүлшара Әбдіқалықова айтыстың алқасын қыздырып, сөз додасына түскен жас ақындарды қолдап, Балалар жылы аясында оқушылар арасындағы айтыстың Қызылордада басталуының өзіндік мәнін атап өтіп, өңірде айтыстың орнына тоқталды.
<blockquote>
 Ойлы сөзді айта білген айтыс ақындарын халық қашан да құрмет тұтқан. Облыста айтыс дәстүрлі түрде үздіксіз өтіп келеді. 
 Сыр елі өзінің әрідегі Нартай, Манап, кешегі Маханбетқали, Замаддин, берідегі Серік, Елена, Әбілқайыр, бүгінгі Мұхтар, Нұрмат, Мейірбектей аймақ айтысын асқақтатып жүрген ақындарымен мақтанады. Соның ішінде айтыстың Ақтаңгері Мұхтар Ниязовтың үш мәрте «Алтын домбыра» иегері атанып, мәңгілікке сыйға тартуы – ұлттық өнеріміздің Сыр еліндегі мәртебесінің көрсеткіші секілді. 
 Бүгін, міне, ұрпақтар сабақтастығының белгісіндей республикамыздың түкпір-түкпірінен дарынды, ойы зерек, темірқанат жас түлек ақындарымыз Сыр өңіріне жиналып отыр,-деді Гүлшара Әбдіқалықова.
</blockquote>
Сөздің құны жоғары қойған жас ақындардың сөз додасына белгілі айтыскер ақын, мемлекеттік «Дарын» сыйлығының иегері Бекарыс Шойбеков, үш дүркін «Алтын домбыра» иегері, Сыр сүлейі Мұхтар Ниязов және белгілі жыршы-термеші, халықаралық конкурстарының лауреаты, халықаралық ақын-жыраулар Одағының мүшесі Амандық Бүрлібаев төрелік етті.
Байқау қорытындысымен халық ақыны Манап Көкенов атындағы бас жүлде мен ақшалай сыйлық қызылордалық Мейіржан Қартбайға табысталды.
І орын алған маңғыстаулық Ерсұлтан Аушановқа, ІІ орын шиелілік Әмірхан Эльдарға бұйырды. Сондай-ақ, Тараз қаласының тумасы Алихан Яшар мен ақтөбелік Нұрадин Арай ІІІ орынды өзара бөлісті.
Мұнан бөлек, арнайы номинация жеңімпаздарына 100 мың теңгеден 5 жүлде табысталды.
<img src="https://kyzylorda-news.kz/wp-content/uploads/2022/03/fb_img_1647855535210.jpg" alt="" />
<img src="https://kyzylorda-news.kz/wp-content/uploads/2022/03/fb_img_1647855537881.jpg" alt="" />
<img src="https://kyzylorda-news.kz/wp-content/uploads/2022/03/fb_img_1647855542157.jpg" alt="" />

Қазақстан және Қызылорда облысының жаңалықтары

Амал мерекесі неге батыста ғана тойланады?

Бекзат Ырза: Нақты қадамдар, нәтиже бермеуі мүмкін емес

“Қызылорда-Павлодар” тас жолы жабылды

Сәрсенбіге арналған ауа райы болжамы

Қызылордада әскерилер Наурыз мерекесін атап өтті

Наурызда құрбандық шала ма?

Қызылордалықтар Ұлыстың ұлы күнін сән-салтанатпен қарсы алды

Аймақ басшысы сырбойылықтарды құттықтады

Нұрсұлтан Назарбаев қазақстандықтарды Наурыз мерекесімен құттықтады

22 наурызға арналған ауа райы болжамы

Қызылордалық оқушылардың қолөнер бұйымдары арнайы көрмеге қойылды

Сыр елінде республикалық оқушылар айтысы өтті

Қазақстан және Қызылорда облысының жаңалықтары

Амал мерекесі неге батыста ғана тойланады?

Бекзат Ырза: Нақты қадамдар, нәтиже бермеуі мүмкін емес

&#8220;Қызылорда-Павлодар&#8221; тас жолы жабылды

Сәрсенбіге арналған ауа райы болжамы

Қызылордада әскерилер Наурыз мерекесін атап өтті

Наурызда құрбандық шала ма?

Қызылордалықтар Ұлыстың ұлы күнін сән-салтанатпен қарсы алды

Аймақ басшысы сырбойылықтарды құттықтады

Нұрсұлтан Назарбаев қазақстандықтарды Наурыз мерекесімен құттықтады

22 наурызға арналған ауа райы болжамы

Қызылордалық оқушылардың қолөнер бұйымдары арнайы көрмеге қойылды

Сыр елінде республикалық оқушылар айтысы өтті

“Қызылорда-Павлодар” тас жолы жабылды