<a href="https://kyzylorda-news.kz/">Kyzylorda-news.kz.</a> &nbsp;Жаңақорған ауданы, Әбдіғаппар ауылының тұрғындары Кенжебаевтар әулеті туралы сөз қозғағанда осы мәтелдің шынайылығы еске түседі. Неге десеңіз, бұл әулеттің егесі Шерубай Кенжебаев кезінде осы ауылдың іргесін қалаған, ашаршылық кезінде өзге елдерге ауып кеткен ағайынның басын атамекенге қайта жинап, жаңа шаруашылықтың күнкөрісін тіктеп, соған өзі басшылық жасаған кісі.&nbsp;Бұл кісінің көзін көрген кісілердің аузынан басқарма Шерубайдың өте іскер, кісінің бетіне тура қарамайтын, бірақ елдің өтініш-тілегін көңілімен құп алып, тап-тұйнақтай атқаруға тырысатын ұқыпты адам болғанын талай естіп те жүрміз. Бүгіндері осы кісінің қарашаңырақтағы ұлы Серік Шерубайұлының да әке жолымен елге бас болған, өзінің қысқа ғұмырында қараша ел бетке тұтарлықтай азамат болып өткенін дәріптейтін кітап ел қолына тиіп отыр. Кітапта еңбек адамы туралы өзінің замандастары, жолдастарының естеліктері қамтылған. Сондаяқ, перзенттері де туған әкеге деген өз сағыныштарын бөлісіпті.Серік Шерубайұлы 28 наурыз 1953 жылы Жаңақорған ауданы Қыраш елді мекенінде дүниеге келген. Орта мектептен соң кеңес армиясы қатарында қызмет етіп, одан оралған соң шаруашылықта еңбек еткен. Шымкент облысы, Ванновка ауданындағы гидромелиорация техникумын су мамандығы бойынша бітіріп шығады. Еңбек жолын Задарья совхозында егіс бригадирі болып бастайды. Осы жұмысты атқара жүріп, Алматыдағы ауыл шаруашылығы институтын бітіреді. Совхозда қырман меңгерушісі, одан әрі бас агроном болып істейді. Совхоз тараған соң шаруа қожалығын құрып, соның төрағасы болды. Ол өмірінің соңғы күндеріне дейін Әбдіғаппар ауылы аталып кеткен «Қыркеңсе» елді мекенінде қызмет жасады. Қырдың басында орын тепкен Шерубай басқарма отыратын ауылдың кеңсесін кезінде жұрт осылай атап кеткен екен.Кеңестік шаруашылық жүйесі бойынша совхозда жұмыс атқарып, мамандығын жетік меңгеруі арқасында үздік орыннан танылып, социалистік міндеттемелерін асыра орындағаны үшін ауыспалы вымпелді қолдан бермей келген Серік Шерубай ұлының бригадасы ел ырыздығының еселеп артуына көп үлесін қосты.Елде тұлғалық болмысы бай, сөзі өтімді, кісілік қарымқабілетімен ерекшеленетін Серік Шерубайұлының жоқ-жұқанаға көмек қолын созып, ауыл мешітіне жүйелі қамқорлық әрекеттері жөнінде әркім-ақ айтып бере алады.Кеңестік жүйе күйреп, шаруашылықтар жекешеленген соң нарық талабына икемделуге тура келді. Серік Кенжебаев 2007 жылы «Бұқарбай» жеке шаруашылығын ашып, соның жұмысын басқарды. 2011 жылы ауылдық қоғамдастық кеңесі төрағасы қызметін атқарды. Ол ел ағасы ретінде көп мәселеге бас-көз болып, елге ортақ игіліктердің иесіз қалмауына да қамқорлығын аямаған екен. Жастар арасында өтетін түрлі жарыстардың жалғасын тауып отыруына, елді мекенде дәстүрлі түрде мерекелік шаралардың ұйымдастырылуына да қолдау көрсетіп отырыпты. Жылына екі рет «Мектепке жол» акциясына белсене қатысып, ауылдағы жағдайы төмен отбасыларына өз атынан да, өзі басқаратын шаруашылық атынан да қолұшын беруден алыс тұрмапты.Сенбі күні Серік Шерубайұлының бауырлары, балалары болып, әке атын жаңғыртып, Әбдіғаппар ауылындағы №213 мектеп базасында жаңа кітаптың тұсауын кесті. Әке атында футболдан турнир өткізді.Аталмыш шараға аудан әкімінің орынбасары Дархан Тұрсынбаев, аудандық мәслихат хатшысы Ғалымжан Сопбеков, ауылдағы зиялылар қауымы, шара иесінің перзенттері мен туған-туыс, бауырлары қатысты.Шараны ашқан Дархан Есалыұлы кезінде өз балалық шағы өткен өзінің де ауылы туралы жарқын естеліктерін айта келе, ауыл тұрғыны Серік және Алмагүл апайы туралы лебізін бөлісті. «Алмагүл апай бізге сабақ берген аяулы ұстазымыз. Өмірден өткеніне он жылдан аса уақыт өтіпті. Бірақ жарқын бейнесі біздің жүрегімізде ұзақ сақталады» – деді ол.Шара барысында Серік Шерубайұлының бауырлары Әріп және Тотыгүл, Серік пен Алмагүлдің ұл-қыздары: сәкен, Айнұр, Рүстем, Айгүл, Мұратқалидың естеліктері көптің көңілін толқытты.Жүректегі қос шырақОсы күні тұсауы кесілген «Жүректегі қос шырақ» деп аталатын кітаптың авторы осы отбасының ортаншы перзенті – Айгүл Серікқызы екен. Кітаптың мазмұны отбасы іргетасын мықты сақтау үшін қажет қағидалармен бекітіліпті. Мәселен: Балаға жақсы тәрбие берудің үш бағыты. Әулетте беделді иеленудің басты шарты. Отбасындағы қамқорлықтың жемісі деген тараулар бір ғана жанұя емес, қазақ отбасындағы құндылықтарды дәріптеуімен көпшілік көңіоінен жылы орын алды деуге болады.Осы күні ұйымдастырылған турнирде үздік ойынын көрсеткен жеңімпаздарға Шерубаевтар отбасы атынан ақшалай сыйлықтар табыс етті.

Жаңақорғанда кітаптың тұсауы кесілді

<a href="https://kyzylorda-news.kz/">Kyzylorda-news.kz.</a> &nbsp;Рок музыканың алғашқы тынысын елімізге алып келген эстрадалық әуендер ВИА вокалды эстрадалық ансамбль арқылы халықтың арасына кең тарады. Ал оның бастау бұлағына келсек, әлем музыкасын алпысыншы жылдары жаулай бастаған битломанияның әр елде болмысы бөлек болғанымен жанға жағымды, жүрекке жақын гитара аспабының жүрек қылын тербеткен сыйқырлы үні тұла бойыңды кернегенде керемет күш құйылғандай жан дүниеңді жадыратар ерекшелігі оған жаһандық қуат дарытты. Мәңгілік жастықтың жарқылындай эстрадалық жанрдың жасты да, кәріні де еріксіз елітер, құлағының құрышын қандырып, бойға қайрат пен жігер құйып, қымбат өмірге құлшындырып, көңілді көлдей тасытып, шалқытып, шабыттандырар рухани құдіреті қазақ даласында алғаш «Дос-Мұқасанмен» түлеп, тамырын кеңге жайды.Ансамбль алғаш 1972 жылы Минскіде өткен Бұкілолақтық студенттер байқауында Бас жүлдені жеңіп алды. Одан әрі Берлинде өткен Бүкілдүниежүзілік байқауда жеңімпаз атанды. Сол кездегі мықты ансамбльдер – «Песняры», «Самоцветы», «Веселые ребята» сынды өнерлі ұжымнан бірде-бір кем емес деңгейде атағын шығарып үлгерді.Тақырыбымызды ВИА-ның өз өңірімізге келу тарихынан тарқатайық. Аудан мәдениет саласының саңлағы Махмұд Әуезов ағамыз Ленинград мәдениет институты жанындағы эстрадалық студияда оқи жүріп, батыс үлгісіндегі вокалды аспаптар ансамблі құрамында тәжірибе жинақтап, елге келген соң Жаңақорғанда жаңғыртуды жоспарлайды. Ең алғаш 1972 жылы Жаңақорған кенті орталығында Тұтқабай Сабырханов ағамыз басқаратын автобаза жанынан эстрадалық ансамбль жасақталады, қажетті аппаратураларды мекеме басшылығы сатып алып береді.Ансамбль құрамында ағайынды Мұхтар, Асқар Исмайловтар, Юрий Пак, Қалжан Байзақов, Болат Асанов, Бекен Төребаев, Нурдин Қойшыбаев, Серік Мелдебеков, Бексұлтан Байкенжеев, Ермек Құланбаевтар болды. Ансамбль 1981 жылы аудандық мәдениет үйі қарамағына берілді. Сол жылдары «Экспресс» ансамблінің ән қоржынында халық әуендері, қазақ-кеңес композиторларының және жергілікті сазгер¬лердің әндері болды.1985 жылы мамыр айында ансамбльді басқару кәсіби маман Дүйсенхан Сыздықовқа жүктелді.«Экспресс» тобының бас гитарисі Серік Жаңабековтен басқасы толығымен жаңартылды. Топқа Уәлихан, Кенжебек Ибрагимовтар, Ғалымжан Исмайлов, клавиштік аспапқа Орынбасар Синаев келді. Топтың музыкалық бағыты, стилі өзгерді. Сол жылдары әлемде атышулы «Хард-Рок» тыңдаушы көрерменнің назарын жаулап алды. Айта кету керек, сол кездердегі Дүйсенханның жаңашылдық еңбектері арқасында ансамбльдің аты республикаға мәлім болды. Ансамбль өнерін дамытуда кейінгі толқын ішінде Дүйсенхан Сыздықов, Әбдірейім Өміров, Қалтай Арқабаевтар құлшына еңбек етті.Ансамбль 1987 жылы Қарағандыда өткен байқауда жүлделі 1 орынды жеңіп алды. Осы жылы Алматыда өткен телебайқауға қатысты.1994 жылы «Экспресс» тобы республикалық «Жас қанат» байқауына қатысып, арнайы сыйлыққа ие болды «Көтеріңкі көңіл күй», «Кеш жарық» бағдарламсына қатысты. 2005 жылдан бастап бүгінгі күнге дейін ансамбльдің басшысы Серік Жаңабековты әңгімеге тарттық.«Ансамбль дәстүрлі бағытынан танбай, тынбай еңбектенумен көрерменнің зор ықыласына бөленіп келеді. Өзім ансамбльде бас гитарист, Сайран Ділманов кпавиште, Уәли Ибрагимов дауылпазшы, Талап Тотаев әнші, хит топ-шоу бағдарламасының авторы, Роллан Бақтыбаев әнші, Кенжебек Ибрагимов, Нұржан Ержігітов музыкалық көркемдеуші ретінде ізденісті жұмыс жасап келеміз. Жетістіктеріміз аз емес.Байқоңырда өткен халықаралық «Рок-миссия» фестивалінде Роллан мен Талап үздік әнші номинациясын иеленді. 2012 жылы Дүйсенхан Сыздықовтың «Бақ құсы», 2014 жылы Алматыда республикалық сарайда өткен Бексұлтан Байкенжеевтің «Сағынып жүрші» деп аталатын шығармашылық кешінде ән салған Қазақстанның бергілі әншілерін вокалды аспапта сүйемелдеп, жоғары баға алды. Астана қаласында өткен «Еңсесі биік Астана» мерекелік концертіне қатыстық. Жанды дауысты насихаттау мақсатында Ақтөбеде өткен байқауда Бас жүлдені жеңіп алдық.– Экспресстің ел арасындағы беделін кешегісінен кемітпеу үшін не істеу керек? Қандай жоспарларыңыз бар?– Эстрадамыздың даму қарқыны батыстың деңгейінен кем емес. Ол үшін үнемі ізденіп, замана ырғағына бейімделіп отыруға тырысамыз. Эстрада жанрының ритмі өзгеше, әсері де бөлек. Сондықтан сырлы лирикаға толы дәстүрлі әндерді де эстрадалық үлгіде әрлеп, тыңдарман жүрегіне жеткізуге тырысамыз. Алайда әннің негізгі әуенін, бастысы сөзін бұзып айтуға болмайды. Әннің бояуы сақталуы тиіс.– ВИА-лардың өміршеңдігіне сенуге бола ма?– Сенуге болады. Эстраданың шын жанашырлары аман тұрғанда ол ескірмейді.ТҮЙІН: Жетпісінші жылдардан бастап эстраданың желкенін желбіретіп, жалауын тік көтерген өнер өкілдерінің жанкешті еңбегі жанып, алдағы уақытта да шыңдарды бағындыра берсін дегіміз еледі.

Жаңақорған ауданында рок музыка кеші

<a href="https://kyzylorda-news.kz/">Kyzylorda-news.kz.</a> Синоптиктер республиканың 6 өңірінде қолайсыз ауа райына байланысты ескерту жасады.&nbsp;Қызылорда облысында жел солтүстік-шығыстан соғады, облыстың орталығында, шығысында күндіз күші - 15-20 м/с.Сонымен қатар 24-26 наурыз аралығында ауаның оң мәнді температурасының сақталуы мен ары қарай жоғарылау болжамына байланысты Ақтөбе (Қобда, Мартөк, Қарғалы, Хромтау, Әйтеке би, Ойыл, Алға, Ақтөбе қ. ауданы) және Қарағанды (Шет, Ақтоғай аудандары) облыстарында қарқынды қар еруі, еріген қар ағындысының қалыптасуы, мұздық құбылыстардың әлсіреуі жалғасады, бұл ретте өзендерде су деңгейлерінің кенеттен көтерілуі және судың жайылуы мүмкін.

Ауа райы: 6 өңірде ескерту жарияланды

<a href="https://kyzylorda-news.kz/">Kyzylorda-news.kz.</a> Жаңақорған ауданында мүмкіндігі шектеулі жандар арасында «Ордакент» ардагерлер, жастар ресурстық орталығы және ерекше жандарды қолдау және оларды спортқа баулу мақсатында &nbsp;спорттық сайыс өткізілді.Шараны аудан әкімінің орынбасары Бектас Балғабайұлы мүмкіндігі шектеулі азаматтарды айтулы күнімен құттықтай отырып, жарысқа қатысушыларға сәттілік тіледі.– Расында, спорттық жарыс тек қана бәсеке емес, ұлттық намыс сынға түсетін сәт. Жыл өткен сайын осы жарысқа қатысушылар саны едәуір артып келе жатқаны бізді қуантады, – деп ыстық лебізін білдірді. Атаулы шараға ауылдық округтерден 40-қа жуық мүмкіндігі шектеулі жандар қатысты. «Жебеуші» қоғамдық қорының төрағасы Нурдин Исмайлов:<blockquote>«Мүгедектігі бар адамдарға әлеуметтік көмек көрсетуден бөлек оларды түрлі шараларға қатыстырып, қоғамдық ортаға бейімдеу, белсенділіктерін арттыру, психологиялық тренингтер өткізу арқылы позитивті ойлау дағдыларын дамыту, спорттық, мәдени, қоғамдық іс-шараларға қатыстыруды кенже қалдырмауымыз керек. Олардың бірі үстел теннисін ойнағысы келеді, бірі мылтық атуды немесе дартц ойнағанды ұнатады, әр баланы қабілетіне қарай спортқа бейімдеп, түрлі жарыстар ұйымдастырып тұрамыз, мұндай шараларды алдағы уақытта да жалғастыру жоспарда бар. Спортпен шұғылданғандары денсаулықтарына да жақсы», – дейді ол.</blockquote>Бұл күні спорттың бес түрінен сайыс өтті. Жарыс соңында жеңімпаздар мен жүлдегерлер мадақтама грамоталары және ынталандыру сыйлықтарымен марапатталды. Атап айтсақ, «Дартц» бойынша бірінші орынды Қанат Қайбуллаев, екінші орынды Даулетхан Темірханов, үшінші орынды Балнұр Әдилбековтер иеленсе, «Қол күрестен» бірінші орын Абусейт Реметовке, екінші орын Бауыржан Оразбаевқа, үшінші орын Шынғыс Молдахметке бұйырды. «Үстел теннисінен» бірінші орын Ердауыт Түлебаевқа, екінші орын Сейдахмет Дүйсеевке, үшінші орын Иген Құдайбергеннің қанжығасына байланды. Ал, «Мылтық атудан» бірінші орын Алимжан Мамбетовке, екінші орын Иген Құдайбергенге, үшінші орын Ердауыт Түлеубаевқа, «Дойбыдан» бірінші орын Нұрлан Тұрабаевқа, екінші орын Асылбек Бектұрғановке, үшінші орын Қасиет Оралға бұйырса, Сүлеймен Асылжан мен Орал Қасиет үздік спортшы атанды.Осы ретте бірінші орын иегері Абусейіт Реметовтың де өз айтары бар екен. – Мен мұндай жарысқа үзбей қатысып отырамын. Әрдайым жүлделі орындарға ие болып отырамын, өте қуаныштымыз. Ұйымдастырушыларға, бізді назардан тыс қалдырмай шақырғаны үшін ерекше рахметімді айтамын және алдағы уақытта да осындай жарыстар болып тұрса деген тілегіміз бар, – дейді жарысқа қатысушы. Міне, бұндай іс шаралар мүмкіндігі шектеулі жандардың жүрегіне өшпес із қалдырып, спортқа деген қызығушылығын арттыра түсетіні анық. «Кедергісіз келешекке» жасалған қадам деген осы. Жігері жасымаған қайсар жандардың алдағы уақытта да тамаша табыстарға жететіне біздің сеніміміз зор.

Жаңақорғанда ерекше жандар арасындағы спорттық сайыс өтті

<a href="https://kyzylorda-news.kz/">Kyzylorda-news.kz.</a> Жаңақорған ауданында мүмкіндігі шектеулі 60 бала және 39 әлеуметтік қызметкер, барлығы, 100 адамға Түркістан облысындағы «Арыстан баб» кесенесі, «Керуен Сарай» кешеніне және «Қожа Ахмет Яссауи» мавзолейіне өлкетану максатында тарихи-мәдени орындарға экскурсия жоспарланып, саяхаттап қайтты.&nbsp;Аудан әкімінің қолдауы және Жаңақорған ауданының жұмыспен қамту, әлеуметтік бағдарламалар және АХАТ бөлімінің ұйымдастыруымен өткен саяхат жайында аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Аягөз Нұржанқызынан сұрап білген едік.<blockquote>«Адам өмірінің мәні мен сәні де – бала. Бала – отбасының мызғымас тірегі, ертеңге деген сенімінің кепілі. Ауданда тағдыр тауқыметіне түсіп, туа бітті кемтарлыққа ұшыраған және жол көлік апатынан мүгедек болған балалар аз емес. Жастайынан тағдыр тауқыметіне тап келген мүмкіндігі шектеулі балалардың өмірге бейімделуі, білім алуы, еңбек етуі, кәсіп игеріп шығуы сынды дүнеиелерді қамтамасыз ете алсақ, үлкен көмек болары сөзсіз. Мұның барлығы үлкен қамқорлықтың, зор қолдаудың, тынымсыз баулудың арқасында ғана іске асады. Мүгедектер мәселесі бүгін ғана пайда болған жоқ, бұрыннан өзекті. Жүйелі жұмыстың нәтижесінде бүгінде мүмкіндігі шектеулі жандар өзгелермен тең дәрежеде қызмет етіп, білім алу құқықтарына ие болып отыр. Осы мақсатта мүмкіндігі шектеулі, есепте тұрған балалардың басын қосып, аудан әкімінің қолдауымен тарихи орындарға саяхат жасауларына мүмкіндік бергенді жөн көрдік. Мақсат, төрт қабырғаның ішінде отырған балаға үміт сыйлап, көңіл күйлерін көтеру. Балалардың қуаныштары кеудесіне сыймай қайтты», – дейді сала басшысы.</blockquote>Тарихи өлкені аралап, мәзмейрам оралған жандарды күтіп алып қуаныштарымен бөлістік. Расында, бөбектердің көзіндегі жарқылды байқамау мүмкін емес. Үйден ұзап шығып, жаңадан салынған зәулім ғимараттарды тамашалап келген Әбіш Рамазан атты баламен әңгімелескен едік.«Маған анам екі күн бұрын Түркістан қаласына барасын дегенде, минуттарым өтпей кетті. Үлкен автобусқа отырып, жанымызда апайларымызбен жақсы сергіп қайттық. Жаңадан ашылған ғимараттарды теледидардан көріп, барғым келіп жүрген. Енді өзім барып көрдім. Құдды шетелге саяхатқа шыққандай әсер алдым. Осындай саяхаттар жиі болса қуана-қуана баратын едік, – дейді тәптәтті балапан.Жолға шығуға жарамайтын, жағдайы ауырлау жандарға Түркістаннан тарту-таралғы ретінде ескерткіш сыйлыққа берілді. Балалар саяхаттау барысында біршама тарихи орындармен танысып, зиярат етіп, түрлі ойындарын ойнап, жанындағы логопед, психолог мамандары көмекке зәру балаларға қызмет көрсетті. Бір байқағанымыз, балаға бір күн ғана назар аударған жеткіліксіз. Оның болашағының жарқын болуы үшін ұдайы ұтымды шаралар ұйымдастырылып жатса игі. Саяхатты «Альтаир – бөбек» қоғамдық қоры сүйемелдеп, атаулы шараға салмақты үлес қосты. Бүгінгідей мүмкіндігі шектеулі балалардың көбейіп жатқан уақытында бұндай ізгі сабақтастық өз жалғасын табуы тиіс.

Жаңақорғанда мүмкіндігі шектеулі балалар киелі мекенге саяхат жасады

<a href="https://kyzylorda-news.kz/ru/">Kyzylorda-news.kz</a>. Бесік – қазақ ұғымында киелі зат. Оның жасалу жолынан бөлек, сақталу түрінде де тағылым бар. Бесік атадан-балаға табысталса, оның мән-маңызы үстеле береді деген сенім де жоқ емес. Сондықтан қазақ бесікті сақтап, ұрпақтан-ұрпаққа жеткізуге талпынған. Осындай өнегелі жолды ұстанған отбасы Қызылорда қаласында да бар. Шаһарға қарасты Тасбөгет кентінде жүз жыл сақталған бесік бар деген жаңалық бізге де жеткеннен кейін, құнды жәдігерді көруге асықтық. Үй иесі Ахметжан Аманов бізге ата-бабасынан қалған, осы уақытқа дейін қаншама сәби тербелген бесікті көрсетті. Ұсыныс болса, мұражайға тапсыратынын да жасырмады.<blockquote>– Әжем ырымдап, бұл бесікті тығып қойып жүрді. Бастапқыда көрші-көлем сұрап алып кететін. Сосын сәби сүйе алмаған отбасылар келіп, ырымдап жүретін. Әкемнің өзі 1925 жылы дүниеге келген. Байқасам, бесікті әулетімізден төрт ұрпақ пайдаланған. Қазақта бесік әкелу ырымы бар ғой, келіннің төркіні, яғни ата-анасы бесік алып келеді. “Атасының бесігіне жатады” деп жоғарыдан түсіріп, бір жұмадан кейін қайта орап, алып қоямыз. Артынан ерер ұрпақ көп болсын дейміз. Шүкір, Алла берерін тоқтатқан емес. Еш жері сынбасын, бүлінбесін деп сақтап келеміз. Аты-жөнімізді жазып, музейге тапсыруға қарсылығымыз жоқ. Ел көрсін, қарасын, бесіктің құндылығын білсін, – дейді Ахметжан Аманов.</blockquote>Қазақ үшін бесіктен киелі, бесіктен құнды нәрсе жоқ. Бесіктің біз үшін қасиеті ерекше. Тіпті бесікті ашық қалдырмай, қастерлеп жүретініміз де содан. Ата-бабамыз ас қайырғанда айтатын “бесігің тарылмасын, бесігің тербелсін” деген сөздің де өзіндік мағынасы бар.<blockquote>– Бұл бесік ұрпақтан-ұрпаққа сақталып ке¬ле жатыр. Аталарымыз келіндері бала кө¬тере алмаған соң арнайы &nbsp;жасаған екен. Осы бесіктен соң ұрпақтары кеңейіп, егізден босанып, бізге жетті. Жол-дасымның әкесінің өзі осы бесікте жатқан екен. Содан бері қарай есептесек, 107 жыл болған. Енем: “Сенің күйеуің жатқан бесік” деп айтып отыратын. Ерекше ықылас танытып, сақтап отырмыз. Көріп тұрғандарыңыздай, сырлап қойдық. Ұл-қыздарым тербелген бесік қой. Соның арқасы ма, әлде тылсым күш пе, ата-бабамыздың бізге берген батасы болар, өсіп-өніп, ұрпақ тәрбиелеп отырған отбасымыз десек артық болмайды. Немерелерімізді бағып, бесік тербетіп, әже болған жайымыз бар, – дейді Бибігүл Маратова.</blockquote>Биыл Ахметжан Аманов пен Бибігүл Маратованың отасқандарына – 32 жыл. Бүгінде 3 ұл, 4 немересі бар. 2017 жылы “Мерейлі отбасы” байқауында “Өнегелі отбасы” номинациясымен марапатталған.

Жүз жылды сақталған бесік туралы білесіз бе?

<a href="https://kyzylorda-news.kz/ru/">Kyzylorda-news.kz</a>. Білім беру саласы жыл санап дамуда. Әсіресе, әдістемелік, шығармашылық әлеуетті арттыру ұстаздар алдындағы негізгі міндеттің біріне айналды. Осы орайда Назарбаев зияткерлік мектебінде педагогикалық шеберлік орталығының тренерімен тілдесіп, саладағы тәжірибе туралы ой бөліскен болатынбыз.‒ &nbsp;Гүлнәр Тәңірбергенқызы, білім беру саласындағы соңғы өзгерістерге қатысты қандай жаңаша ой, тың идеямен бөлісер едіңіз?‒ Иә, білім саласы заман талабына сай өзгерістер мен дамуды талап етеді. Сол талаптар ішінде мұғалімнің кәсіби құзыреттілігін дамыту аса маңызды. Оның жолдары көп, мәселен әдістемелік, шығармашылық бірлестіктердегі жұмыс, кәсіби конкурстарға, шеберлік сыныптарына, форумдарға, фестивальдарға қатысу, инновациялық қызметпен айналысу, зерттеу қызметін белсенді жүргізу. Былтырдан бастап «осы құзыреттілігіміздің деңгейі қаншалықты жоғары, өз &nbsp;тәжірибемізге қандай өзгеріс енгізу керек» деген ой туындады. Осы тұрғыда мұғалімнің шығармашылықпен жұмыс жасап, кәсіби дамуы үшін жан-жақты әдістемелік қолдау қажет. Бүгінде білім шекаралары кеңейіп, білім беру онлайн форматта қолжетімді болды. Ендеше тың идея, жаңа серпіліске ынталанып, оқушыларға терең білім беріп, адами құндылықтарды дәріптейтін онлайн алаңның болуы заңды. Осы бағытта «Назарбаев зияткерлік мектептері» ДББҰ Педагогикалық шеберлік орталығының facebook парақшасында &nbsp;«Шамшырақ» онлайн-алаңы ашылды. Бүгінде осы алаңға 35000 педагог тіркеліп, тәжірибе алмасуда. Кәсіби қоғамдастықтар кез-келген өзгеріс пен &nbsp;жаңа бастамаларды іске асыруда таптырмас құрал екенін білесіздер. Сондықтан &nbsp;мектеп мұғалімдеріне қолдау көрсету және онлайн-алаңды танымал ету ‒ біздің мақсатымыз. Осы орайда, «Мектеп тренері» парақшасы да жұмыс істейді. Бұл парақша ҚР мектептерінің әдістемелік активі мүшелерінің және оқу ұйымның өзекті мәселелері бойынша тәжірибесін тарату және диалогты ұйымдастыруға арналған.‒ &nbsp;«Шамшырақ» онлайн-алаңы кәсіби дамуға қалай ықпал етеді? Бұл қаншалықты пайдалы деп есептейсіз?‒ &nbsp;Қазақтың тұңғыш педагогі, ұлы ағартушы Ыбырай Алтынсариннің 180 жылдық мерейтойы қарсаңында ашылған алаң мектеп тәжірибесін дамыту үшін жаңа білім іздеушілерге интерактивті тәсілдерді, тұшымды ойларды ұсынады. Педагогикалық тәжірибені тарату «Қазақ зиялыларының ағартушылық қызметтері», «Сабақты қалай ұмытылмастай өткізу керек?», «Мұғалімнің цифрлық зертханасы», «Мектептегі зерттеу: біздің тәжірибеміз – біздің нәтижеміз», «Білім беру жобалары: digital-ұрпақтың жүрегіне жол табу», «Ата-аналармен диалог» сынды өзекті тақырыптарды қамтиды. Жалпы парақшада сабақтардың бейнежазбалары, шеберлік-сыныптар, шағын дәрісті және авторларымен жүргізген сұхбаттарды көруге болады. Сондай-ақ “Дала қоңырауы” подкастымен тақырыптық сұхбаттарды тыңдауға мүмкіндік бар. Мысалы, &nbsp;Серғали Толыбеков атындағы №3 IT мектеп-лицейінің физика пәні мұғалімі, «Ы.Алтынсарин» медалінің иегері Шолпан Сүйеуова парақшада өз тәжірибесімен бөлісіп, бейнежазбасын ұсынды. «Геометриялық оптика заңдарын қолданып есеп шығару жолдарын үйрету» тақырыбындағы &nbsp;шеберлік сыныбында Шолпан физика пәнін оқытудағы белсенді оқыту тәсілдерінің тиімділігін практикамен ұштастыра отырып, &nbsp;ұтымды жеткізді.‒ &nbsp;Интернетте мұндай сайттар көп. “Шамшырақтың” артықшылығы неде?‒ Мұғалімдер өзіне қажетті өзекті тақырыптар төңірегінде бейнежазбалар мен посттарды көру арқылы көкейіндегі сұрақтарға жауап алып, өз пікірін білдіре алады. Кез-келген тың идеяны жариялап, жаңаша инновациялық әдіс-тәсілдермен танысу, өз тәжірибеңізде пайдалану мүмкіндігі бар. Жаңа идея немесе инновациясы бар мұғалімдер өз сұхбаттарын ПШО-ның Youtube-арнасында немесе филиалдардың FB-беттерінде, баспа БАҚ-та жариялауына болады.‒ Келешекте осы жұмысты жандандыру мақсатында қандай жоспарларыңыз бар?‒ «Шамшырақ» &nbsp;парақшасында облыстың үздік мұғалімдері өз тәжірибесімен бөліседі. Сонымен қатар алаңда &nbsp;кәсіби жобалармен танысып, үздік шеберлік сыныптар, ашық сабақтар мен дәрістерді тыңдауға болады. &nbsp;Ted-мұғалімдердің сөйлеуін ПШО-ның Youtube-арнасында, филиалдардың FB-беттерінде жариялап, &nbsp;жазылушылар арасында «Үздік хабарлама», «Үздік пікір», «Ең белсенді абонент» конкурстар өткізуді жоспарлап отырмыз.‒ Сұхбаттасқаныңызға рақмет!

Гүлнәр Жақсылықова: Тәжірибе үздіксіз ізденісті қажет етеді

<a href="https://kyzylorda-news.kz/">Kyzylorda-news.kz.</a> Соңғы екі жылдың көлемінде Шиелі ауданы айналасында көптеген шағын асханалар мен ауқаттанатын орындар, кішігірім дәмханалар бой көтерді. Қолжетімді бағада түскі ас ішуге қолайлы орындардың бағасы аудан халқы үшін тиімді. Эстетикаға толы, әдемі орындар да жетерлік. Француздық стильдегі кофеханалардың да бірнешеуін кезіктіресіз. Асқазанды аспен толтырамын дегендерге жанға жайлы, көңілге қонымды мұндай орындардың жан баласына керемет әсер сыйлайтыны сөзсіз. Дизайыны адам баласын магнитше тартатын орындардың сырты да дәмі тіл үйірер тағамдары да тұрғындардың көңілінен шығатыны рас. Дегенмен, тұрғындардың күнделікті кафелер мен ресторандардан тамақтана бермейтіні бесенеден белгілі. Себебі, элиталық асханаларға күн сайын баруға көбісінің қалтасы көтере бермейді. Әсіресе, қарапайым саудагерлер түскі уақытта базар ішіндегі асханалардан немесе дүңгіршектерден ас ішетіні жасырын емес. Ал сондай орындардың санитарлық ахуалы қалай?Түстік уақытта Әбдіманап Шорабаев базарына жол тарттық. Біздің бұл жолғы мақсатымыз – базар ішіндегі асханалардың қазіргі ахуалын бақылау болды. Сондықтан, базар ішіндегі шағын асханалар мен дүңгіршектерді көзбен көрмекке бекіндік. Ең әуелі кішігірім дүңгіршектерді сырттай шолып шығып, тез дайындалатын тағамдарды қалай әзірлейтіндерін сырттай бақыладық. Көзбен көргеніміздей, әлгі дүңгіршектегілердің дені фаст фуд әзірлегенде санитарлық-гигиеналық талаптарды сақтамайтын болып шықты. Мәселен, сол уақыт аралығында «Арзан» сауда орталығындағы түстік сатып алатын мұндай орындардың қызметкерлері арнайы қолғапты мүлде киген жоқ. Яғни, сатушылар ашық тұрған орында бір реттік қолғапты пайдаланбай келушілерге гамбургер, самса, шауырма сияқты талғажау болатын дәмділерді ұсынып жатты. Тазалық, гигиена үшін кереғар көрініс әрине. Бірақ тұрғындар мұндай дүңгіршектерден арзан ауқат сатып алуға машықтанып алғандығын байқаймыз. Себебі, бағасы да қолайлы. Дәмі де тәтті. Сондықтан да болар, тұтынушылар бұл жердегі санитарлық талаптарға аса назар аудара қоймайды. Айналадағы көліктердің түтіні жүректі айнытып, шаңы шығып жатса да, терезесі ашық тұратын фаст фуд орындарының саудасы қызып тұр. Ал кішігірім асханалар ше?Иә, базар маңында да саудагерлер мен тұтынушыларға арналған кішігірім асханалар көп. Бірақ мұндай орындарда да жағдай мәз емес. Бірі санитарлық талаптарға сай келмесе, енді бірінде ас ішу қолайсыз. Өйткені, асханалардың іші тым тар. Интерерін айтпаған күннің өзінде, біразының ұсқыны қашқан. Тіпті, кейбір асханалардан қол жуатын сұйықтық пен киім ілгішті мүлде кездестірмедік. Демек, базар ішіндегі асханалардың қазіргі хәлін көңіл көншітеді деп айту қиын…Қазіргі кезде дімкәс емес адам табу – қиын. Елімізде пандемея басталғалы бері жағдай тұрақталғанымен, ел ішінде эпидахуал қайта өршиді деген сыбыс тарап жатыр. Вирус жұқтырып аламыз ба деп алаңдаған тұрғындардың бүгінгі хәлі тіпті қуантпайды. Расында осындай кезде бактериялар тез таралып, ауру лезде жұғып кетуі бек мүмкін. Мәселе неде?Мәселе – алдымыздағы аста…«Байдың асын байғұс қызғанады» деп жүрмеңіздер. Бұдан «байғұсқа» келіп-кетер ештеңе жоқ. Кәсіпкердің нәсібін тоқтату да ойымызда жоқ. Біздікі тек санитарлық талаптардың дұрыс сақталғанын баса назарда ұстау. Себебі, елімізде «тәж вирус» тағы да басталып кету қаупі бар. Ал вирус һәм бактерия тамақтану орындарында көп болатынын айтпасақ та білесіздер. Санитарлық талаптар сақталмаса, індеттің елге қайта келмесіне кім кепіл? Ауру – астан. Әрбір адам тазалықты өзінен бастауы керек десек те, базардағы дүңгіршектер мен асханалардың бұл істе тиянақты болғаны жөн. Мұндай орындарға тұрғындар күні-түні ағылып келетін болғандықтан, сатушылар тазалықты сақтап, санитарлық талаптарды орындаса деген ұсыныс біздікі. «Көрген көзде жазық жоқ» дегендей, көріп тұрып жазбай, сатушыға айтпай кету бізге де сын болар дедік...

Шиелі: Асханаларда санитарлық-гигиеналық талаптар сақталмай отыр

<a href="https://kyzylorda-news.kz/">Kyzylorda-news.kz.</a> Relativity Space өзінің 3D-Terran R зымыранын ұшырудың үшінші әрекетін жасады деп хабарлайды Ixbt.com сайты.Америкалық relativity Space аэроғарыштық компаниясы 3D басып шығарылған зымыранның ұшырылғаны туралы хабарлады, бірақ ол орбитаға жете алмады. Бірінші кезең тұрақты жұмыс істеді, бірақ екіншісі қысқа уақытқа ғана қосылды.Terran R-дің алғашқы ұшырылымы 8 наурызға жоспарланған, бірақ жанармай температурасына байланысты кейінге қалдырылды. 11 наурызда екінші іске қосу отын қысымына байланысты болған жоқ.Terran R ұзындығы – 33,5 метр, диаметрі – 2,2 метр. Оның көп бөлігі 3D басып шығарылған және өндіріске шамамен 2 ай кетеді. Зымыран сұйық оттегімен және сұйық табиғи газбен жұмыс істейді.Өндірісте ол дәстүрлі зымырандарға қарағанда едәуір арзан болғандықтан, Terran R спутниктерді ұшыруды айтарлықтай арзандатады деп болжануда.

Әлемдегі алғаш рет 3D басып шығарылған зымыран ұшырылды

<a href="https://kyzylorda-news.kz/">Kyzylorda-news.kz.</a> Баланың жайлы да сапалы білім алуы үшін білім ордасының талапқа сай болғаны қандай жақсы. Заман көшіне ілесу, тың идеяларды дамыту, іске асыру бүгінгі күннің басты талабы. Қаладағы Ы.Алтынсарин атындағы №10 мектеплицейін заманауи үлгіде жабдықталған білім ошағы ретінде айтуға болады. 1700 оқушы оқитын алтын ұя кірген бойдан өзіне тартады. Білім беруден бөлек әдемілікке, мәдениеттілікке баулуды мақсат еткен мектеп ұжымының бұған басымдық бергенін байқау қиын емес.Жайлы жағдай&nbsp;Білім ордасына 5 жылдан бері басшылық жасап келе жатқан Асылбек Мақашев тәртіпсіз білім болмайтынын, баланы оқуға қызықтыра білу керектігін жақсы біледі. Сондықтан алдымен оларға қолайлы жағдай жасауға ден қойған. Бұған дейін тозығы жеткен ғимаратқа былтыр күрделі жөндеу жұмыстары жүргізілді. Іші, сырты толықтай қайта жаңғыртылып жаңа ғимараттың кейпіне енген. Білім ордасының іші де заманауи көрнекіліктермен әсемделіпті. Есіктен кірген бойда ұлы ұстаз Ы.Алтынсаринның бейнесі салынған стенд айналасы нақыл сөздермен безендірілген. Одан әрі сыныптар орналасқан. Әр сыныптың жанында танымдық ақпарат тақтасы ілінген. Сондай-ақ өрендердің оқу құралдарын, киімдерін қоюға арналған арнайы сөре тұр. Мектептің ажарын ашып, қалаға қарасты өзге білім ұяларынан ерекшелеп тұрғаны да осы. Биылғы оқу жылында алынған сөрелер бүгінде оқушылардың қажеттілігіне жарауда.<blockquote> «Бұған дейін оқушылар ағаштан жасалған киім ілгішті пайдаланып келді. Шыны керек бірінің үстіне бірі ілінген киім салмағынан ілгіштер жиі сынатын. Оны қайта-қайта жөндегеннен гөрі осы тиімді. Шетел мектептерінде мұндай сөрелерді бұрыннан пайдаланады. Осыны өзімізге де орнатсақ қалай болар екен деген ой келді. Осылайша мектептің өз қаржысы есебінен 425 сөре алынды. Мұнда оқушылар кітап, дәптерін, қаламсап сынды жазу құралдарын қояды. Киімдерін іледі. Бұрынғыдай сырт киімі жерге түсіп, бүлініп жатпайды. Бұл бір жағынан оқушыны ұқыптылыққа тәрбиелейді. Одан бөлек сабақ барысында қолданбайтын смартфонында осы сөреге қалдырады», – дейді мектеп директоры Асылбек Мақашев.</blockquote>Сөренің тиімді тұсы осы. Әсіресе бастауыш сынып оқушылары үшін ең қажетті құрал. Себебі оқулықтарын үйге арқалап қайтқаннан гөрі тек үйде сабаққа дайындалуға қажетті кітабын алып қалғанын сөресінде қалдырса болады. Сөре құлыпталады. Ал кілті оқушылардың өзінде болады. Оның ұқыпты ұсталуы, бүлінбеуі оқушылардың жауапкершілігінде. Егер құлпы бұзылған жағдайда оны жөндету ата-анаға жүктеледі.<blockquote>«Қазіргі таңда барлық оқу құралдарым осы сөреде тұр. Сонымен бірге денешынықтыру пәніне арналған спорттық киімімді де салып қойдым. Қазір үзіліс уақытында алдыңғы сабақтың оқулығын қойып, келесі сабаққа қажетті оқу құралымды алып жатырмын. Смартфонды сабақта ұстауға рұқсат жоқ. Сондықтан осы жерде қалдырамыз. Үзілісте ғана пайдаланамыз. Қала бойынша мұндай жабдық тек біздің мектепте ғана бар. Бұл бізге ұнайды, – дейді 11 сынып оқушысы Құралай Амангелді. Түрлі түске боялып, арнайы нөмірленген сөрелер мектепке шырай беріп тұр. Оқушылар да бұған қуануда. Мектеп басшысының айтуынша, бұл бір жағынан оқушылар арасындағы ұрлықты болдырмауға да септігін тигізеді. Сөредегі заттардың сақталуы бейнебақылау арқылы бақыланады. Әр баланың өз сөресін ғана ашуы қадағаланады. – Бұл сөрелер жеке басын қаржыландыру есебінен алынған дүние. Бұл жобаның тиімділігі мектепке қажетті дүниені өзің алдыра аласың. Алдағы уақытта тағы бірнеше сөре алдыру жоспарда бар. Сол кезде оқушылар түгел қамтылмақ», – дейді мектеп директоры.</blockquote>Оқушы үні мектеп басшысының әр оқушының ішкі жай-күйін, қажеттіліктерін білу мақсатында «Оқушы үні» деп аталатын арнайы жәшік бар. Мұнда мектеп оқушылары анонимді түрде өзінің жағдайын немесе мектептегі мәселені қозғай алады.<blockquote> «Арыз-шағым жәшігі барлық мектепте, басқа да мекемелерде бар ғой. Балалардың мұғалімдерге айта алмайтын сыры болуы мүмкін. Не болмаса мектептегі бір жағдай оны алаңдатса, ол оны бізге айта алмайды дегендей. Осындай жағдайдан шығудың әрі оқушылармен байланыс орнатудың бірден-бір жолы ретінде «Оқушы үнін» айтуға болады. Осының арқасында мектепте небір жобалар жүзеге асып, өзгеріс енгізілген кездер болған. Себебі оқушылар мұнда ішкі сырын, мектептің кемшін тұсын, мұғалімдерге, олардың сабақ беру әдісіне қатысты ойларын қағазға түсіріп, жібере алады. Хатта аты-жөні көрсетілмейді, оның жазуы кімге тиесілі деп біз де іздемейміз. Осы мектептің өрені болғандықтан оның кез келген ой-пікірін маңызды деп қабылдаймыз. Сондай-ақ мұнда тек оқушылар емес, ұстаздар да хат жаза алады. Оқушы үні жәшігі іске қосылғалы бері оқушылар мен ұстаздардың бірқатар талап-тілектері орындалған. Осы арқылы оларға қажетті әрі маңызды дүниелердің бар екенін, көбіне оған мән бермейтінімізді түсіндік», – дейді білікті басшы.</blockquote>Тәжірибе құралы бәріне орта Барлық білім ордасында биология, химия пәндерінің тәжірибелік бөлмесі болатыны белгілі. Ондағы құрылғылармен тәжірибе жасау арқылы оқушылар бұрын-соңды білмегенін үйреніп, көз жеткізеді. Мектеп ұжымы бұл құралдарды да көрнекіліктер қатарына қосыпты. Әйнектен жасалып, құлып орнатылған сөреде биология, химия пәніне керекті тәжірибе құралдары орналастырылған. Үзіліс уақытында оқушылардың оны тамашалауына мүмкіндігі бар. Сонымен бірге сабақ барысында ұстаздарда қажетті құралды сол сөреден алып, пайдаланаалады.Жүзеге асқан жобаларБілім ордасында өрендер үшін де, ұжым үшін де пайдалы жобалар жетерлік. Мектеп директоры алғаш осы алтын ұяға басшылыққа келер тұста 6 жобаны жүзеге асыруды көздепті. Сәтін салып ол жоспары жүзеге асқан. Соның бірі – «Бәрін таста, кітап оқуды баста» деп аталған. Бұл оқушылармен бірге ұстаздардың, мектептегі басқа да қызметкерлердің бос уақытын тиімді пайдалану мақсатында кітап оқуға дағдыландыру үшін қолға алынған. Бастапқы уақытта ұжым арасында түрлі пікірлер туындаса да, уақыт өте келе кітап оқуды әдетке айналдырған. Сонымен бірге белгілі бір уақыт аралығында кітап акциясы ұйымдастырылып, кітап алмасу үрдісі жүргізіледі. Осылайша оқушы да, ұстаз да қолы қалт еткенде кітап оқуға асығады. Бұл жоба бүгінде барлық білім ошақтарында «Оқуға құштар мектеп» атауымен жүзеге асырылуда. Сондай-ақ талантты оқушылардың шығармашылығын шыңдау, сахнада өзін-өзі ұстауға үйрету, өнерге баулу мақсатындағы «Ән мен әнші» жобасы жүргізілсе, тарих, география пәнін сүйіп оқитын өрендер үшін «Тарихи өлкеге Марғұлан ізімен» жобасында оқушылар музейге, тарихи орындарға, қалаларға экскурсия жасайды. Мектепте ең сәтті жүзеге асқан «Жас бітімгер» жобасы.&nbsp;Мұнда заң саласының маманы болғысы келетін оқушылар медиация жүргізуді үйреніп, ашық сот процестеріне қатты салады. Бұл мақсатта заңгер Ләззат Бақтыбаевамен екіжақты меморандумға қол қойған. Медиация жүргізуді үйренуде қазір мектептен арнайы Гагарин шағын ауданының халқы үшін бөлме ашылған. Онда даулы мәселені бітімгерлік жолмен шешуде кәсіби мамандар жұмыс істейді. Ал өрендер процеске қатысып, тәжірибе жинақтайды. Расымен, бұл білім ордасында сапалы білім алуға жағдай жасалып, бар мүмкіндік қарастырылған. Оқушылардың икемі, қызығушылығы да ескеріліп соның аясында жоғарыда аталған жобалар жүзеге асқан. Жас өрендерді білімді, мәдениетті тұлға етіп қалыптастыруда бұл ең тиімді тәсілге айналған. Оқушыға жайлы жағдай жасалған оқу ордасында білім көрсеткіші де жоғары. Мұны мектеп директоры бізге мақтанышпен жеткізді. Жуырда республикадағы барлық мектептерге қойылатын критерийлер бойынша Ы.Алтынсарин атындағы № 10 мектеп-лицейі үздік үштікке енген. Жүйелі жүргізілген жұмыстың нәтижесі осы болса керек.<img src="https://knadmin.beoblood.kz/uploads/Bezymyannyj_e36cc73cb0.jpg" alt="Безымянный.jpg">

Қызылордадағы мектепте оқушыларға оқу құралын, киімін қоюға арналған арнайы сөре бар

<a href="https://kyzylorda-news.kz/">Kyzylorda-news.kz.</a> Қазақстанның жасөспірімдер құрамасы Малайзия қаласы Кучингте өткен World Junior tennis Competition 14&amp;under Азия/Океания аймағының әлемдік біріншілігі біліктілігінің жартылай финалына өтті деп хабарлайды Stan.kz ақпарат агенттігі. Ширек финал кезеңінде жас қазақстандықтар Үндістан өкілдерін жеңді. Алдымен Ева Корышева қарсыласын 6:1, 6:1 есебімен жеңді, содан кейін Еркежан Жанатаева қарсыласын 6:4,6:7, 6:2 есебімен басып озды. Бұл екі жеңіс қазақстандық топтың жартылай финалға шығуына мүмкіндік берді. 24 наурызда қазақстандықтар Жапония құрамасымен бақ сынасады.Алдын ала топтық раундта қазақстандық жасөспірімдер Қытай мен Жаңа Зеландияның теннисшілерін 2:0 есебімен жеңді.Биыл Чехияның Простеев қаласында жазда өтетін әлем чемпионатының финалдық бөлігіне тек үздік үш команда барады. Іріктеуде 1-2 орын алғандар барады, сонымен қатар финалға шықпаған командалар бір-бірімен тағы бір жолдамаға бақ сынасады.

Қазақстандық жасөспірім теннисшілер Малайзияда өтіп жатқан әлем чемпионатының жартылай финалына өтті

<a href="https://kyzylorda-news.kz/">Kyzylorda-news.kz.</a> Экономиканың негізгі тірегі саналатын кәсіпкерлік саласына қолдау жылдан-жылға артып келеді. Былтыр соңғы айда 34995 шағын кәсіпкерлік нысан тіркеліп, жұмысын бастаған. Оның 26304 жеке кәсіпкер, 6303 заңды тұлға және 2386 шаруа қожалығын құрайды. Бұл көрсеткіш 2021 жылмен салыстырғанда 29,4 пайызға артқан. Десе де аталған кәсіпкерлік нысанның бүгінде 31869-ы ғана нақты жұмыс істейді. Бүгінде жеке ісін ашып, кәсібін дөңгелеткісі келетіндер қатары көбейген. Көзі қарақты тұрғындар бұл ретте мемлекет тарапынан көптеген мүмкіндіктер барын біледі. Сондықтан тиімді тірлікті игілікке жаратқысы келетіндер көп. Мәселен, жыл басында қала бойынша шағын кәсіпкерлік саласында 900-ге жуық жаңа жұмыс орны ашылған. Оның барлығы да тұрақты жұмыс істеп, 614-і сауда саласын, 20- сы өнеркәсіп, 51-і білім және денсаулық сақтау саласын құраса, өзге де қызмет түрлері бойынша 178 нысан бар.Жалпы кәсіпкерлік саласы қалада тек сауда емес түрлі бағытта өркен жайып келеді. Білім, медицина, өнім өндіру ісін жетілдіріп отырған кәсіпкерлер баршылық. Әсіресе соңғы уақытта медицина саласы қарқын алып келеді. Саланы қолдауда мемлекеттің кәсіпті жаңадан бастаушы жастарды да ескергені құптарлық іс. Бұл бағытта «Бастау бизнес» бағдарламасының тиімділігі зор. Іс бастауды, оның бизнесжоспарын жасауды, әрі қарай дамытуды үйретіп қана қоймай, білім алушылардың тегін грант ұтып алуына да мүмкіндік қарастырылған. Бұдан өзге кәсіпкерлікті дамытуға бағытталған бірнеше мемекеттік бағдарлама бар. Халықты жұмыспен қамту, шағын кәсіпкерлікті дамыту, экономика саласын әртараптандыру мақсатында «2021 – 2025 жылдарға арналған кәсіпкерлікті дамыту жөніндегі» ұлттық жоба іске асырылуда. Бірнеше бағыттан тұратын бағдарламаның субсидиялау бағыты бойынша қалада 756 жоба қолдау тапқан. Бұл жобалардың қаржы көлемі 11 млрд 700 млн теңгені құрайды. Сондай-ақ осы бағдарлама аясында жаңа бизнесидеяларды іске асыруда жалпы құны 56 млн 681 мың теңге болатын 16 жоба мемлекеттік грантты жеңіп алған. Бұдан бөлек 814 жобаға көлемі 1 млн 225 200 теңгені құрайтын мемлекеттік грант беріліп, оның жалпы сомасы 997 млн 312 мың 800 теңге болған.Кәсіпкерлікті өркендетуге бағытталған тағы бір бағдарлама «Қарапайым заттар экономикасы». Ішкі нарықты отандық өнімдермен қамтамасыз ету, халықтың қажеттіліктерін қанағаттандыра алатындай бәсекеге қабілетті өндіріс орындарын құру, өңдеу өнеркәсібін дамыту мақсатындағы жоба бойынша облыс орталығында жалпы құны 4 млрд 730 млн теңгені құрайтын 42 жоба қолдау тапқан. Ал ағымдағы жылдың басынан бері тағы 2 жоба мақұлданған. Оның құны 716,1 млн теңгені құрайды. «Нәтижелі жұмыспен қамту және жаппай кәсіпкерлікті дамытудың 2017- 2021 жылдарға арналған «Еңбек» бағдарламасы аясында қайтарылған қаражат есебінен және «Іскер» бағдарламасы бойынша 286 млн теңгені құрайтын 56 жоба жүзеге асқан. Ал жыл басынан бері «Қызылорда» өңірлік инвестициялық орталығы арқылы құны 387,6 млн теңге болатын 43 жоба қаржыландырылған. Былтыр облыс көлемінде кәсіпкерлікті қолдау мақсатында 19,9 млрд теңгеге 373 жоба қаржыландырылған. Атап айтсақ, «Кәсіпкерлікті дамыту жөніндегі ұлттық жоба» шеңберінде 5,2 млрд теңге бөлініп, 171 жоба субсидияланған. Ал ауыл кәсіпкерлеріне несие беруде «Қызылорда» өңірлік инвестициялық орталығы арқылы 1,2 млрд теңге қаражат қаралса, оның 360,7 млн теңгесіне 64 жоба қаржыландырылған. Сондай-ақ Аграрлық несие корпорациясы 4,5 млрд теңгенің 138 жобасын мақұлдаған. Бұл жлбалардың жүзеге асуында облыс орталығының үлесі басым. Жалпы мемлекеттік бағдарламалар игілігін көріп жатқан кәсіпкерлер күн санап артып келеді. Бұл ретте жыл сайын мемлекеттік бюджеттен бөлінетін қаражат көлемі де ұлғаюда. Оған жоғарыда аталған көрсеткіштер дәлел болмақ

Қазақстан және Қызылорда облысының жаңалықтары