<a href="https://kyzylorda-news.kz/">Kyzylorda-news.kz.</a> 12 сәуір- Ғылым қызметкерлерінің күні. Осы датаға байланысты бүгін Өңірлік коммуникациялар қызметінің ақпараттық алаңында өткен брифингте экономика ғылымдарының кандидаты Алмакүл Әбдімомынова ғылым саласындағы жаңалықтармен бөлісті.<blockquote>«Бүгінде облыста 500-ге жуық ғылыми қызметкер бар. Айтулы күнге байланысты университетте «Әлемді ғылым құтқарады» тақырыбында ғылым декадасы басталды. 1-29 сәуір аралығында ғылымды дамытуға байланысты іс-шаралар, халықаралық конференциялар, кездесулер өткізіледі. Айта кетейін, «500 ғалым» жобасы аясында Мәскеу мемлекеттік университетінен біржылдық тағылымдамадан өттім. Бүгінде ауыл шаруашылығын цифрландыруға байланысты ғылыми жоба дайындалуда. Жобаға қаржылық қолдау болса, алдағы уақытта жүзеге асатын болады», - деді Алмакүл Шәкірбекқызы.</blockquote>Археология және этнография ғылыми орталығының жетекшісі Әзілхан Тәжікеев бүгінде отандық ғылыми мекемелермен қатар шетелдік ғалымдармен де әріптестік орнатылып жатқанын айтты.<blockquote>«Болашақ» бағдарламасы бойынша Германияның Тюбинген университетінен ғылыми тағылымдамадан өттім. Қазіргі уақытта отандық ғылыми мекемелермен қатар шетелдік ғалымдармен де әріптестік орнатылуда. Мәселен, Тюбинген университетімен қатар Германия археология институтының Берлин қаласындағы филиалымен де әріптестік байланысты нығайттық. Сондай-ақ, Батыс Еуропа археологиясы туралы мағұлматтар алып, археология ғылымында жартылыстану ғылымдарының әдістерін қолдану, елімізде енді дамып жатқан «ландшафты археология» туралы қажетті ақпарттар алдым. Алдағы уақытта ғылыми зерттеу әдістерін өзіміздегі зерттеу жұмыстарында қолданылатын болады. Университет жанындағы «Археология және этнография» орталығының бекітілген жоспарына сәйкес жұмыстар жүргізетін болады. Жанкент қалашығындағы археологиялық қазба жұмыстары енді Халықаралық Түркі Академиясының қызметкерлерімен бірлесіп өткізіледі. Одан бөлек, облыстық бюджеттің есебінен Жанкент, Бәбіш Мола, Сығанақ қалашықтарына жылдағыдай дәстүрмен жалғасатын болады. Алдағы жоспарларымыз легі ауқымды», - деді Археология және этнография ғылыми орталығының жетекшісі Әзілхан Тәжікеев.</blockquote><img src="https://knadmin.beoblood.kz/uploads/Bezymyannyj_4f099f60eb.jpg" alt="Безымянный.jpg">

Қызылорда облысында 500-ге жуық ғылыми қызметкер бар

<a href="https://kyzylorda-news.kz/">Kyzylorda-news.kz.</a> Жаңақорған аудандық «КазСушар» өндірістік учаскесімен бірлесе отырып ағымдағы жылдың 27 наурыз-10 сәуір аралығында ауылдық округтер бойынша ақ егістерді суару (жоңышқа, бидай) графигі бекітілген. Негізгі дақыл күріш егу жұмыстарын сәуір айының 18-нен мамыр айының 22-не дейін, суға бастыру жұмыстарын 25-ші мамырға дейін толық аяқтау бойынша күріш егу және суға бастырудың 5 күндік графигі бекітілген.2023 жылы су нысандарын тазалау жұмыстары бойынша атқарылатын шаралары қандай? Облыстық табиғи ресурстар және табиғат пайдалануды реттеу басқармасы арқылы атқарылып жатқан іс-шаралар Қыркеңсе ауылдық округіндегі «ОК-1-3» су қашыртқысына 59,5 млн теңге және Байкенже ауылдық округінен «Дөңбай» каналына 23,7 млн теңге тазалау жұмыстарына бөлінген. Бүгінде осы каналдарға «Табиғат» МКК-мен мемлекеттік сатып алу заңдылығы бойынша тазалау жұмыстарын жүргізу үшін келісім шарттар жасалуда.<blockquote>«Су шаруашылығы жұмыстарын жүргізудің жобалық-сметалық құжаттамасын әзірлеуге облыстық бюджеттен М.Нәлібаев ауылдық ок-ругіндегі «К-2-6-1» су қашыртқысына 1,134 млн теңге, «К-2-6-2-1» су қашыртқысына 0,96 млн теңге, Аққорған ауылдық округіндегі «Р-16-2-1» каналына 1,2 млн теңге, «Р-16-2» каналына 1,16 млн теңге қаражат бөлінді. Бүгінде аудан бойынша 195 км құрайтын жалпы су каналдарынан 115 шақырымы тазаланып 59 пайызға орындалса, ал биылғы егілетін 8346 гектар күріштік алқаптарға баратын каналдардың тазалану барысын зерделеу кезінде ең қажетті деп табылатын 51 шақырым ұзындықтағы каналдарға тазалау жұмыстары жүргізілмеуде. Бұл атқарылмаған жұмыстардың негізінде өз кезегінде тиісті округтер бойынша күріш дақылының көлемі қысқартылатын болады» дейді бас аграном.</blockquote>Жауапты маман атап айтқандай, Аққорған ауылдық округіндегі Р-11 каналы бойынан 41 шақырым және Қожакент ауылдық округіндегі Р-13, Р-18, Р-15 каналдарынан 4,7 шақырым, Өзгент және М. Нәлібаев ауылдық округтерінен Р-21-ден 1, Р-26-дан 2,5 және Р-24-тен 3,2 ша-қырымы тазаланбаған. Бұл ауылдық округтерге ішкі каналдарды тазалау жөнінде аудан әкімінің орынбасары Д.Тұрсынбаевтың қолымен бірнеше рет хат жолданғанымен ауыл әкімдері өз дәрежесінде орындамаған. Сонымен қатар аудандық су шаруашылығымен бірлесіп биылғы Сырдария өзенінің төменгі ағысына түсіп жатқан мол суды тиімді пайдалану жөнінде ауылдық округтерге түсіндірме жұмыстары наурыз айының басынан жүргізілгенімен осы каналдарды тазалау жұмыстарының салғырттығынан ақ егіске су алу науқаны кешеуілдеді. Егер алдағы 10 күндікте 15-сәуірге дейінгі мерзімде канал тазалау жұмыстарындағы олқылықтар орнына келтірілмесе күріш дақылын суға бастыру кезеңін кешіктіретін болады дейді сала маманы.&nbsp; &nbsp;

Жаңақорғанда канал тазалау жұмыстары назарға алынды

<a href="https://kyzylorda-news.kz/">Kyzylorda-news.kz.</a>&nbsp;&nbsp; Еліміздің экономикалық дамуына мемлекеттік құрылымдардың бірі саналатын салық қызметі екені мәлім. Мемлекеттегі қаржы тұрақтылығының ахуалы салық саласының қызметіне тікелей қатысты. Салық жүйесінің қалыптасуы тәуелсіз мемлекетіміздің қысқа мерзім ішінде әлеуметтік-экономикалық табысқа қол жеткізуге және халықаралық деңгейге жеткізуге мүмкіндік берді. Қаржылық қиындықтар кезеңінде ауданда салықшы қызметкерлері өз міндеттерін абыроймен атқарып, өздерін кәсіби маман ретінде көрсете білген. Сала жұмысын ілгерілетуде аудандық Кірістер басқармасының бас маманы Жанар Қошқарбаеваның да қосқан үлесі зор екенін айта кетейік. Білікті қызметкер салада 18 жылдан бері қызмет етіп келеді.Тәуелсіздігіміздің алғашқы жылдары құрылған салық жүйесі бүгінде заман, қоғам талабына сай өзіндік орны бар органға айналды. Мемлекеттік кірістер органдарының негізгі міндеті – мемлекет қазынасын толтыру, көлеңкелі экономикамен күресу және мемлекетіміздің экономикалық қауіпсіздігін қамтамасыз ету екені баршаға мәлім.Туған ауылның төл перзенті аудан орталығындағы №36 орта мектепті бітіріп, алтын ұя мектепте білім нәрімен сусындатқан алғашқы ұстазы Гүлзада Ермағанбетқызы мен сынып жетекшісі Айя Әбдиеваның шәкірті үшін ең жақын, тілекші жандар болғанын ешқашан естен шығарған емес. Мамандық таңдауда ата-анасының қолдауымен, үлкен әпкесі Айгүлдің қамқорлығымен қаржы-экономика саласына оқуға түсуге шешім қабылдаған. Таңдауы да бекерден бекер болмады. Бала кезінен есепке жүйрік Жанар мектепте сабағын жақсы оқыды. Әсіресе математика пәніне ерекше зейін қойып, алғырлығымен көзге түсті. Талапты қыз алдымен Тараз қаласындағы қазақ-түрік экономикалық колледжде арнаулы білім алып, есепші мамандығын меңгерді. Колледжді бітірісімен жоғарғы білім алу мақсатында Қызылорда қаласындағы Қорқыт ата атындағы мемлекеттік университеттен қаржы-экономист мамандығын алды.Қолында қос бірдей дипломы бар маман көңіл жарастырып, тереңөзектік азамат Ерлан Әбдіхалықовпен бас қосып, отау құрған. Отбасылық өмірде бірінен соң бірі дүниеге келген ұлдары Бекарыс пен Думанды өсірсе, бауырларының соңынан Айшат та дүниеге келіп ата-анасының көз қуанышына айналды. Жас маман араға бес жыл уақыт салып, еңбек жолын бастап, қызметке орналасуына 2005 жылы сәті түсті.Алдымен Жанар Өтепбергенқызы аудандық салық комитетіне жетекші маман болып қызметке тағайындалды. Еңбек жолын мемлекеттік қызметтен бастаған маман қызметтің жауапкершілігін сезініп, ауданның салық түсімін қамтамасыз етуде белсенді жұмыс істеді. Әсіресе жүктелген міндет – жеке кәсіпкерлердің, мемлекеттік мекемелердің түсімін қадағалап, талдау және есеп бөлімінде салық түсімі бойынша тынбай қызмет етете білді.<blockquote>– Алғашқы қызметке келген жылдары барлық жұмыс қағазбастылықпен байланысатын. Барлық есептілік бет есебіне қолдап түсіріледі. Көз майымызды тауысып, қате жібермеу үшін қайта-қайта қарап, мұқият болып саланың жұмысына төселдім. Сол кездегі бөлімдегі мамандар басшымыздың жетекшілігімен бөлім қызметкерлері ауданның салық саласын алға сүйреді. Өкілетті органның мәліметіне сәйкес бюджетті түсіммен қамтамасыз еттік. Жылдық жоспардың орындалуы 100 пайыздан асты. Ол жылдары аудан бюджетінің түсімі 3 млрд теңгеге жуық болса, қазіргі таңда бұл көрсеткіш екі есеге артты, – дейді өз саласының мақтаулы маманы Жанар Өтепбергенқызы.</blockquote>Негізінен, салық төлеу мемлекеттің әлеуметтік құрылыма қосылған үлес екені белгілі. Бұл деген сөз халық игілігі үшін салынатын көптеген әлеуметтік нысандардың құрылысын жүргізілуі салық түсіміне байланысты. Сондықтан әрбір салық төлеуші ең алдымен осыны дұрыс түсініп, ел экономикасына үлесін қосуы қажет.Жалпы салық саласында жетекші маманнан бастап бас маманға дейінгі сатыдан өткен Жанар Қошқарбаева салық басқармасында өндіріп алу бөлімінде, қабылдау және тіркеу орталығында қызмет етсе, қазіргі уақытта соңғы 13 жылдан бері салық төлеушілермен жұмыс бөлімінде абыройлы қызмет атқарады. Бөлім басшысы Айнұр Тоқшылыққызымен қатар бөлімдегі 5 маман аудан бойынша 331 заңды тұлғалар мен 2804 жеке кәсіпкерлер мен шаруа қожалықтарының түсімдері мен тапсырған есептіліктері бойынша камералдық бақылау жұмыстарын жүргізеді. «Камералдық бақылау – сыбайлас жемқорлықтың алдын алу әдістерінің бірі» дейді бас маман. Камералдық тексеруден өткен салық төлеушілердің есебіне салық қызметкерлері түсіністікпен қараса, қателіктер жіберілген есептер ерекше назарда болады.Өз ісінің маманы бүгінде Кірістер басқармасында салық төлеушілерге 18 мемлекеттік қызмет көрсетілетінін атап өтті.<blockquote>– Салық қызметкері үнемі ізденіп, жетіліп отыруы тиіс. Қиындығы мен жауапкершілігі мол салада еңбек ету оңай шарауа емес. Еліміз егемендікке қадам басқан алғашқы жылдарында аудан бюджетін толтыру көздерін іздестірудегі қиындықтар мен қол жеткізген жетістіктерімізді қуанышпен еске түсеремін. Мемлекеттік кірістер органдары үшін мемлекет қазынасын толтыру – бірінші кезектегі мін-дет. Салықшы қызметкерлер салықтарды әкімшіліктендіріп, аудан бюджетін толтырумен қатар қоғамдық жұмыстарға да белсене араласып, ауданымыздың көркеюіне өз үлестерін қосуда. Ұжымға жас маман болып келіп, салықшы болып қалыптасуыма сол кездегі бөлім бас¬шылары болған А.Тұрғанбаев, Е.Төлеш, салықшы мамандар Б.Салиева, А.Досығұлова сынды аға буын өкілдерін өмірлік ұстаздарым деп мақтан етемін, – дейді бас маман Жанар Қошқарбаева.</blockquote>Негізінен кәсіби маман атануына байырғы әріптестері Айнұр Маханбетәлиева, Айнұр Жаппасбаева, Эльмира Байманова, Айнұр Есмағанбетова, Мұрат Сейдахметов, Ғани Нұртазаевтың мол тәжірибесінен үйренгені көп болғанын айтады. Жанар салық саласындағы қызметі үшін Қазақстан Республикасы Қаржы Министрлігі мемлекеттік кірістер комитетінің алғысымен, облыстық Мемлекеттік кірістер департаменті басшысының «Құрмет грамотасымен» марапатталды. Кәсіби мерекелерде басшылық тарапынан мерекелік құттықтауларға ие болып, мерейі үстем болып келеді.Келін болып түскен шаңырағы да берекесі мен татулығы жарасқан отбасы. Енесі Қалдыгүл Ембергенова ұзақ жыл поштада бас есепші болып қызмет атқарса, атасы Бақытбек Әбдіхалықов мұнай саласының ардагері.Жанар Қошқарбаева жауапты қызметін адал атқаруына ата-анасынан алған тәрбиесі деп біледі. Бала кезінен тура жолдан таймауды, кісінің ала жібін аттамауды үйретіп, үлгі болған әкесі Өтепберген қарапайым жұмысшы болған азамат, ал анасы Роза аудандық санитарлық эпидемиологиялық сараптама орталығында зертханашы болып еңбек еткен, бүгінде екеуі де зейнеткерлікке жеткен жандар. Ұядан ұшырып, қанаттандырған 6 перзентіне жақсы тәрбие беріп, бір-бір мамандық иесі атануына қамқор болды. Қазір барлық баласы бір-бір шаңырақтың түтінін түтетіп отырған азаматтар.&nbsp;&nbsp;

Салық салысының майталманы

<a href="https://kyzylorda-news.kz/">Kyzylorda-news.kz.</a> Жаңақорған аудандық қоғамдық даму бөлімінің «Жастар ресурстық орталығы» КММ шығармашыл жастардың ордасына айналған Жайдарман ойындарын өткізуде тұрақты түрде қолдау білдіріп келеді. М. Көкенов атындағы мәдениет үйінде «Жаңақорған КВН» филиалының ұйымдастыруымен Жаңақорған Жайдарман 2023 финалдық ойыны өтті.2023 жылдың Маусымашар ойындарына 10 команда қатысып, финалдық кезеңге дейін үздік өнер көрсеткен 5 команда жолдама алған болатын. Финалдық ақтық ойында әрбір команда Республикалық Жайдарман жұлдыздарын шақырып бірге ойын көрсетті. Финалдық сайыста барлық командалар өз өнерлерін ортаға салып, тартысты ойын өрнегін көрсетті.Төрелік етуге әділ қазылар алқасында Жастар ресурстық орталығы директоры Н. Орынбасаров, Халық театрының жетекшісі Т. Әжімұратов, Ало такси тасымалының басшысы Б. Қалжан, жеке кәсіпкер Ғ., Жаңақорған құрамасының капитаны Е.Бейбітов болды.Жастарды тәрбиелеп қана қоймай, қоғамдағы келелі мәселелерді астарлы әзілмен жектізіп жүрген «Жайдарман» қанатын кең жайып келеді. Оның айқын бір дәлелі – өткен жылдың соңында аудандық «Жастар ресурстық орталығы» мекемесінің қолдауымен «Жаңақорған Жайдарман» лигасының ұйымдастыруымен Жайдарманның маусымашар ойындары бастау алды. Бірінші кезеңді сәтті еңсерген көңілді тапқыр командалары ақтық сынға жолдама алды.Финалдық ойынға сақадай сай келген «ЖАТК», «Кейден», «Екпінді», «Шалқия» құрамалары өзіндік ерекше әзілдерімен көрерменнің көзайымына айналды. Аудандық мәдениет үйінде өткен Жайдарманды «Қазақстан КВН одағы» республикалық жастар қоғамдық бірлестігінің Жаңақорған ауданы бойынша филиал жетекшісі Асхат Құлтас жүргізді. Ол «Жаңақорған» көңілді тапқырлар клубы құрамасының қазіргі таңдағы көшбасшысы.Жүргізуші ойынды бастамас бұрын әділ қазылар алқасының мүшелерімен таныстырды. Олардың қатарында: аудандық «Жастар ресурстық орталығы» мекемесінің директоры Наурызбай Орынбасаров, орталықтың аға маманы Мақсат Құлмырзаев, асаба Тохтар Әжімұратов, «Нұр-Сәуле» той ұйымдастыру орталығының жетекшісі Мұхтар Шаханов, «Ардақ» сұлулық салонының қызметкері Самат Айдаров бар.Екі кезеңнен тұрған сайыста жайдарманшылар «Сәлемдесу» және «Жұлдызды қонақпен көрініс» тақырыбында өз өнерлерін ортаға салды. Ә дегеннен «Кейден» құра¬масының жайдарманшылары көрерменді күлкіге қарық қалды. Нағыз ауылдың иісі аңқып тұрған қазақы қалжыңдары көптің көңілінен шықты. Ал аграрлы техникалық-техникалық коллджінің намысын қорғаған «ЖАТК» құрамасы жоғары лигада ойнаған аға буын ретінде сахнада өздерін өте еркін ұстады. Әрбір әзілінің астарында қоғамдағы түйдек-түйдек мәселелердің ізі көрінді. Әсіресе «Жұлдызды» қонақпен жүргізген екінші айналымның қалжыңдары көптің көңілінен шықты. Себебі, барлық команданың ойынына залдағы көрерменнің ықыласы ерекше болды. Ендігі кезекте, командарлардың «жұлдызды» қонақтарын айтап өтсек. «ЖАТК» құрамасына Қызылорда облысы бойынша «Жайдарман» академиясының басшысы Әліби Басаров, «Екпінді» командасына мәдениет майталманы Талап Тотаев, «Кейден» құрамасына мәдениет саласының үздіктері Кенже Әкімбаева мен Балмұхаммед Әбжаппаров жетекшілік етті. Ал «Шалқия» құрамасы нағыз жұлдыздарды жинады. «Жаңақорған» құрамасының жарық жұлдызы, асаба Есқара Бейбіт және Бекұлан Жолдықожаев, асаба, «ТТТ» әзіл-ысқақ театрының әртісі Бекмаханбет Байтұрсынов бар.Екі сағатқа созылған Жайдарман ойыны әдемі қалжыңмен әзілдің астарына қоғамдағы келеңсіз жайттарын ұтымды айтып, өрелі өнер көрсете білді. Қазылар алқасының шешімімен Жайдарман лигасының жеңімпазы болып «ЖАТК» құрамасы танылды. Бұған дейін бұл команда Нұр-Сұлтан төрінде өткен Жайдарманның жоғары лигасына қатысып қайтқан болатын. Ал екінші орныды кейдендік «Кейден» құрамасына, қола «Екпінді» командасына бұйырды. Барлық командалар арнайы кубок пен «Дипломға» ие болды. Айта кету керек, аудандық лиганың өтуіне жаңақорғандық бір топ жас кәсіпкерлер демеушілік жасаған. Олар: «QFS» фаст-фуд өнімдері орталығы жетекшісі Қадыржан Қыдырбаев, «Doner King» орталығы басшысы Дәулет Алиханов және Ғабит Дүйсебаев, Мұсабек Нұр, Самат Айдаров сынды кәсіпкерлер жастар шығармашылығына қаржылай қолдау көрсеткенОйын қорытындысы бойынша:І орын - Екпінді құрамасы (Екпінді ауылдық округі); ІІ орын - Кейден құрамасы (Кейден ауылдық округі); ІІІ орын - «Қыран» мектебі (Жаңақорған кенті)Ойын соңында өнер көрсеткен барлық командаларға алғыс хат беріліп, жеңімпаздарға кубок, қаржылай сыйақылар табысталды.Барша Жайдарман жанашырларына алғыс білдіреміз!

Жайдарманның биылғы финалдық ойыны өтті

<a href="https://kyzylorda-news.kz/">Kyzylorda-news.kz.</a> Жалағаш ауданында кәмелетке толмағандар арасындағы құқық бұзушылықтың алдын алу үшін іс-шаралар ұйымдастырылуда.Кәмелетке толмаған білім алушылар арасында құқықтық мәдениет пен құқықтық сананы қалыптастырып, құқық бұзушылықтың алдын алу мақсатында Жалағаш ауданы әкімінің орынбасары Ғ.Сүлейменов, білім бөлімінің басшысы Т.Садықов, жергілікті полиция бөлімінің бастығы Е.Асылханұлы секілді сала мамандары Жалағаш кентіндегі 5 мектепте, 4 ауылдық округте жоғарғы сынып оқушылары мен олардың ата-аналарына түсіндірме жұмыстарын өткізді.<img src="https://knadmin.beoblood.kz/uploads/uuuuuuuuuuuu_9aa06d6f04.jpg" alt="уууууууууууу.jpg">Профилактикалық іс-шаралар Жалағаш ауданы бойынша тұрақты түрде жүргізілуде. Бүгінгі күнге дейін кәмелетке толмағандардың арасындағы басты мәселелердің бірі түнгі уақытта ата-анасыз жүрген балаларды болдырмау мақсатында Жалағаш аудандық полиция департаментімен бірлесіп, 51 рейдтік шаралар өткізілді.<blockquote>«Бала біздің болашағымыз дейтін болсақ, елдің ертеңі жарқын болу үшін барлығымыз бір кісідей ұрпақ тәрбиелеу жолында аянбай еңбек ете білу керекпіз. Олардың түзу жолда жүріп, тек біліммен сусындап, болашағы үшін оқуын оқып, түрлі жат нәрседен аулақ болса дейміз. Мектепте ұстаз білім нәрімен сусындатса, ата-ана үйде тәрбие мен тәлім берсе. Ал баршамыз қоғам болып жақсылыққа атсалыссақ» дейді мамандар.</blockquote>

Жалағаш ауданында кәмелетке толмағандарға түсіндірме жұмысы жүргізілуде

<a href="https://kyzylorda-news.kz/">Kyzylorda-news.kz.</a> Жаңақорған аудандық ішкі саясат бөлімінің «Жастар ресурстық орталығы» КММ-нің қолдауымен, «Жастар одақтары» ҚБ ұйымдастыруымен "Әдепті келін - әдемі" жас келіндер байқауы өтті. Кент, ауылдық округтерден 7 әулеттің жас келіндері қатысып, бақ сынасты.Ауыл – әулетінің бет-ажары қыз-келіншектің әдебімен әдемі. Шаңырақ көтерген әрбір отбасының түтіні түзу шығып, берекесі мен бірлігі жарасқан жылы ұяға айналуы да алдымен ерге серік, елге көрік отанасының қолында. Келіні жақсының керегесі алтын. Себебі шаңырақтың беріктігі мен ынтымағы, отбасындағы ұл-қыздың ұлағатты тәрбиесі келіннің бойындағы жақсы да жағымды қасиеттермен астасып жатады. Демек ибалы келін ортасында сыйлы болуымен қатар ағайын-туыс арасындағы алтын көпір. Міне, осы ұлық дәстүрді насихаттау бағытында ауылда өркен жайып, ата-ене алдында өсіп-өніп жатқан жас келіндер алғашқы сайыста өздерін таныстырып, ұмыт қалып бара жатқан салт-дәстүрді жандандырып, қазақтың &nbsp;бай дастарханын айшықтауға барын салды.Онлайн бағытта тартысты өткен сайыс барысында инабаттылық пен парасаттылық қасиеттерді бойына сіңіріп, үлгілі келін, ақылды ана, сүйікті жар атанған, қазақы қалпынан танбаған аяулы келіндерді көрдік. Ақылына көркі сай әр іс-әрекеттерінен ізеттілік байқалатын келіндер сайыс ережесіне сай өнер көрсетумен қатар өздері таңдаған дәстүрдің қыр-сыры мен бағыт-бағдарынан сыр шертіп, жіліктеп, жіктеп айтып өтті. Бейнебаян ретінде түсірілген көріністен жас келіндердің ұлттық үрдісімізден хабардар екенін көріп қуанған жайымыз бар. Осындай тұла бойы сан мың өнерге бай, зейінді келіндер барда қазақтың ұлт ретінде қалыптасуы ғасырдан ғасырға, ұрпақтан ұрпаққа жалғаса беретіні анық.– Келешек ұрпаққа ата-бабамыздан қалған бай мұрамызды насихаттап, құнды өмірлік дағдыларымызды жастар санасында жаңғырту мақсатында ұйымдастырылған онлайн жарыстың өзіндік ерекшелігі бар. Мемлекетті шағын отбасы құраса, осы шаңырақтың ұйытқысы нәзік жандылар. Ал жарыстың басты мақсаты қазақтың келіндері қандай болған, қандай болуы керектігін өскелең ұрпақ &nbsp;санасына сіңіру. Сонымен қатар ата-енеге аянбай қызмет етіп жүрген тәрбиелі келінді үлгі ету, – дейді клуб үйінің меңгерушісі Өмірсерік Бейсенбиев.Қатысушылар байқаудың әр кезеңінде тапқырлығы мен біліктілігіне, көрсеткен өнеріне қарай әділ бағасын алып, марапат төрінен көрінді. Нәтижесінде Сүттіқұдық ауылы атынан бағын сынаған Жанат Ниязова бас жүлдені жеңіп алды. Бірінші орынды Екпінді &nbsp;ауылынан қатысқан Бақтыгүл Әзімбаева, екінші орынды байкенжелік Сымбат Дәуренова мен әбдіғаппарлық Ақнұр Дайрабаева лайықты болса, үшінші орынды Сұттықұдықтан қатысқан Бота Байымбетова мен машбектік Жансая Дүкенбаева иеленді. Жеңімпаздарға ұйымдастырушылар тарапынан дайындалған «Алғыс хаттар» мен бағалы сыйлықтар үлестірілді.– Ұйымдастырылған байқау қазақ келіндерінің мәртебесін көтеріп, абыройын асырып, одан әрі биіктете түскеніне сенімдімін. Өйткені қай қатысушы болмасын өз ауылының үздік келіні екенін дәлелдеп, топ жаруда аянып қалмады.Бірі би билеп, бірі ұлы ақын хакім Абайдың өлең жолдарын оқыса, енді бірі ән айтып, қолдарынан не келетінін дәлелдеп, әділқазылар алқасының көңілінен шығуға мейлінше тырысқан. &nbsp;Онлайн форматта өткен сайыс болған соң ой-пікірімізді сұрап-білуде әділқазылардың басын қосып, ұйымдастырған клуб үйінің сүйемелдеушісі &nbsp;Назгүл Оразбековаға да алғыс айтамыз, &nbsp;– деді «Арман» кенттік үйінің директоры Күлән Әбілтанова.Жалпы отбасының ынтымағы жайлы көп айтқаннан осындай ел жүрегінен орын алатын тағылымды іс-шаралардың жиі өтуі анағұрлым тиімді екеніне тағы бір көз жеткіздік.Байқаудың ережесі бойынша қаты¬сушылар бірінші кезеңде «Әдеп¬тілік белгісі, иіліп сәлем бергені» тақырыбында өз отбасын, барған жерін таныстырса, екінші кезеңде «Дана әйел-дамыған ел негізі» атты сұрақ-жауап кезеңі өтіп, салт-дәстүр бойынша білімдерін ортаға салды. Үшінші кезеңде «Қол өнері-кілемде, сөз өнері-өлеңде» шартымен бойда бар өнерлерін ортаға салды. Соңғы қорытынды кезеңде «Әйелдің астанасы – асхана» қамыр жаю бойынша сынға түсті.Алғашқы таныстыру кезеңінде қарасөзбен келістіріп жеткізген Манап ауылынан келген Ақбота мен Құттықожалық Жансаяның жыр жолдары мазмұнды, мәнді өрілсе, Айдана мен Ақниет бұл ережені әнмен әрлеп жеткізуге күш салды. «Дана әйел – дамыған ел негізі» сайысында қатысушылар ұлттық салт-дәстүрді насихаттайтын сұрақтарға жауап іздеді. Оның ішінде әлі де қолданыста жүрген, ұғымға жақын, құлаққа таныс жөн-жоралғылармен қатар мүлдем естімеген көне заманмен бірге көміліп кеткен салт түрлері де кездесті. Көңіл көкжиегі кеңдігімен танылған келіндеріміз бұл сыннан да мүдірмей өтті. Соңғы сайыс қамыр жаю қарапайым болғанымен, үй шаруасының қазығы болуға тиіс қаракөздеріміз үшін әжептеуір сын болды.Байқау қорытындысы бойынша, Құттықожа ауылынан қатысқан Қалды¬бекова Жансая «Инабатты келін» номинациясы, Ақүйік ауылдық округінен Ғалымдоллақызы Ақниет «Дәстүрлі келін» номинациясы, Машбек ауылдық округінен Нұрлыбай Гүлзат «Өнерлі келін» номинациясы, Қыраш ауылдық округінен Хияшова Гүлдана «Парасатты келін» номинациялары бойынша марапатталды. Ал III орынды Машбек ауылының келіні Тасболатова Айдана иеленсе, II орынға Манап ауылының келіні Асанхан Ақбота лайық деп танылды. Үздік атанып, I орынды Төменарық ауылының келіні Тасболат Гүлшырын иеленді. А.Д.Романов атындағы 53-орта мектептің орыс тілі және әдебиеті пәнінің мұғалімі Гүлшырын өнерімен, салт-дәстүрді жетік меңгергендігімен, үй шаруасына бейімділігімен қарсыластарын басып озып, жеңіс тұғырынан көрінді.Әділқазылар құрамы төрайымы «Жаңақорған тынысы» газетінің қаламгері Баян Үсейінова сөз алып, жүрексінбей байқауға қатысып, бар өнерін ортаға салған келіндерге шын жүректен ризашылығын жеткізді.– «Адам ұрпағымен мың жасайды», – деп халық тегін айтпаған. Осындай ұрпақ жалғастығы ақ жаулықты аналарымыз аман болсын. Әрбір ұлттың сан ғасырдан бері ұрпақтан-ұрпаққа мирас болып келе жатқан ізгі мұраларын және ұлттық салт-дәстүрлердің құндылықтарын, ұлттың бойындағы ұлттық үрдіс пен ұлттық рухты жас келіндердің бойына сіңіру, жас келіндерге адамгершілік, ұлттық, ізеттілік, имандылық тәрбие беру мақсатында ұйымдастырылған іс шараны ұйымдастырушыларға ел атынан үлкен алғысымызды білдіреміз, – деп жүлдегерлерді арнайы дипломмен және ақшалай сый-сыяпатпен марапаттады

Жаңақорғанда жас келіндер байқауы өтті

<a href="https://kyzylorda-news.kz/">Kyzylorda-news.kz.</a> Бұл – Қаратаудың қайнар бұлағынан нәр алған, Сырдың сұлу сөзінен жаралған, қазақтың айтулы ақынының бірі – Манап Көкеновтің соңғы айтысынан үзінді. Иә, айтыс – қазақтың қанына сіңген бекзат өнері. Бабалардан қалған осы өнерге елеңдемейтін қазақ жоқ. Еңсе тіктеген баласынан еңкейген қариясына дейін суырып салма ақындарды тыңдаудан жалыққан емес. Топырағы киелі Жаңақорған жерінде жыл сайын жас ақындар айтысы өткізіліп келеді. Осыған жуырда тағы да куә болдық.Манап Көкенов атындағы аудандық мәдениет үйінде «Жаңақорған ауданының 95 жылдығы», халық ақыны «Манап Көкеновтің туғанына 95 жыл толуына» және «Жаңақорған тынысы» газетінің 90 жылдығына орай «Айтыс – battle» жобасы аясында «Біз – Манаптың ұрпағымыз» атты жас ақындар айтысы ұйымдастырылды.Айтыс – қазақтың бекзада, болмысы биік өнері. Ұлттық өнерді дәріптеп, кейінгі ұрпаққа жалғастыру мақсатында «Айтыс – battle» атты жас ақындар айтысы өтті. Әдебиеттің әйгілі классигі Мұхтар Әуезовтың өзі «Сөз барымтасы» деп баға берген осы өнердің қадірін білетін көрерменнің басын қосқан шараға 12 жас ақын қатысты. Əр ақын өзінің туған жерін қанша жырласа да, оған деген махаббатының сарқылмасы анық. Өлең додасына өз өңірін, туған жерін жырлау үшін өз ортасында танылып, көрермен көзайымына айналып үлгерген дүлдүл ақындардың қатысып отырғанын айтты.&nbsp;Ақындарамыз үлкен аламанда бір емес, үш бірдей тақырыпты ұлықтады. Жоғарыда айтқандай Манап Көкенов пен ауданның 95 жылдық төл мерекесі мен тарихи газет «Жаңақорған тынысының» 90 жылдық мерейтойына арналды. Айтысқа шөлдеген көрермендерге керемет көңіл-күй сыйлап, жалынды жырларымен жаңақорғандықтарды желпіндіріп алған жастардың болашағы білініп-ақ тұрды.Айтысты мәдениет саласының үздігі, Манап Көкенов атындағы шығармашылық ұжымының жетекші маманы Уәли Ибрагимов жургізді. Ақындардың өнеріне «Жаңақорған тынысы» газетінің бас редакторы, қазылар алқасының төрайымы Баян Үсейінова, айтыскер ақын Ержан Әміров пен Нұрлан Жәпеков қазылық етіп, жеңімпаздарды анықтады.– Ұлттық құндылығымызды тілге тиек еткенде Манап Көкеновтің есімі бірге жырланады. Артында өшпейтұғын із қалдырған ақынның асыл мұрасы бүгінде сіз бен бізге өнеге ретінде қалыптасты. Осы ұлттық құндылықты сақтап қалу үшін өткенді саралап, бүгінгіні бағалап отыру – басты мақсат. «Жаңақорған тынысы» газетіне биыл 90 жыл толып отыр. Аудан айнасы келе жатқан төл басылымның мәртебесі жоғары деп санаймын. Газет дүниеге келген сәттен бастап 90 жыл бойы елдің сөзін сөйлеп, жоғын жоқтап, мұңын мұңдап келеді. Солай жалғаса да береді. Осынау айтулы шараға қатысып отырған, жас ақындар сіздер тәуелсіз елдің ұланысыздар, бүгінгі заманның еркесі мен еліміздің ертеңісіздер. Сіздердей жалынды жастар барда ұлттық өнеріміз тек қарыштап дами береді, – деді «Жаңақорған тынысы» газетінің редакторы Баян Алаудинқызы айтыстың ашылу салтанатында.Ақындар еліміздің бүгінгі күнге дейінгі тарихы мен даму белестерін, жетістіктерін өлеңмен өрнектеді. Бала болса да олар қоғамдағы кейбір мәселелерді де қамтып кетті.Жалпы айтыс жоғары деңгейде өтті деуге болады. Қара өлеңге қанат бітіріп, Тәуелсіздігіміздің жетістіктерін жырға қосты. Сөзден сойыл соққан 5 жұп екінші айналымда да әдемі айтыс ұсынды. Өнер бәйгелерінде топ жарып, шашасына шаң тимеген ақындардың сөз сайысын көрермен тапжылмай отырып тамашалады.Жас болған соң оларға қателесу де тән, кейбірі қобалжуға бой алдырып, кібіртіктеп, айтатын ойларын жұптай алмай жатты. Әрине, кейбірінің алғашқы жыр додасы бол¬ған соң кешіріммен қарау да дұрыс. Алдағы аламандарда ысылып, қиыннан қиыстырып, сөз тауып кететіндей тәжірибе жинары анық. Айтыс үш тақырыптан тұрған соң, бірі тарихтан қаузап, ұзақтан сілтесе, енді бірі бүгінгі қоғамда болып жатқан кемшіліктері тілге тиек етуге тырысты.– Жас айтыскерлердің алғашқы адымы қуантты. Көптен бері айтыстың атқамінерлері шықпай қалған еді. Сол жылдардың орнын толтыруға жеткіншектер келіпті. Келешегінен көп үміт күттіретін олардың биігіне ел сүйсінді, – деді кеш көрермені Серік ағамыз.Сонымен айтыс қортындысы бойынша бас жүлдені Шиелі ауданынан келген Шыңғыс Құдайбергенов еншіледі. Бірінші және екінші орын қос жаңақорғандық Мұхаммедәлі Абдуллаев пен Айдос Бидашевке бұйырды. Шиелілік Мақсат Қалиев пен Олжас Азатханұлы және Келінтөбеден келген Жарқынбек үшінші орын алды. Қатысушыларға арнай дипломдар мен сыйлықтар табысталды.Шараның мақсаты – жастардың бәсекелік қабілетін арттыру, ұлттық бірегейлікті сақтай отырып, өскелең ұрпақты ұлттық өнерге баулу. Сананың ашықтығын қалыптастыруға бағытталып ұйымдастырылған бұл айтыс өскелең ұрпақты отансүйгіштікке тәрбиелеп, олардың таным-талғамын ұлт руханиятына бағыттайды, қазақтың төл өнері, құдыретті сөзі арқылы мемлекеттік тілдің мерейін арттырады.Азаттықтың ақ таңы атқалы айтыс өнері ұлттық мәдениетіміздің баға жетпес асыл мұрасы ретінде кеңінен насихатталып келеді. Осы орайда киелі өнердің дамуына мемлекеттік деңгейде қолдау көрсетіліп отырғанын айта кеткеніміз жөн. Әр жұпқа 10 минуттан уақыт берілді. Сәлемдесуден кейін-ақ бауырын жаза шапқан сөз саңлақтары маңызды тақырыптарға ойысты. Ел-жер тағдырына байланысты кесімді пікірлерін білдіріп, халықтың ықыласына бөленді. Еліміз бағындырған биік белестерді де атап өтті. Сондай-ақ, зорлық-зомбылықты сынап, тату-тәтті өмірді насихаттады.Осы тұста айта кетейік, айтысты тамашалаған көрермендер мұндай өнер додаларын тұрақты түрде өткізіп тұруды да ұсынды. Әрине, орынды да. Өйткені мұндай аламандар жас ақындардың сөз саптауларын түзеп, қанатын қатайтатыны сөзсіз. Әрине, жастардың өнерін шыңдау үшін, келешекте облыстық, республикалық, тіпті халықаралық айтыстарда ауданымыздың мерейі үстем болуы үшін мұндай айтыс додалары жиі өткізіліп тұрса құба-құп. Бұл айтыс бастамасы жыл соңына дейін 4 кезеңді қамтиды. Ендеше, айтысты сағынған ағайын жыл бойы жастардың жігерін қамшылап тұруға зор мүмкіндік ала алады.Дүбірлі айтыста ақындарамыз ел егемендегінің қадір-қасиеті аясында жырдан шашу-шашып, бір-біріне өткір сұрақтар қойып, ұтымды жауаптар қайтарып, айтыс сүйер қауымның көңілінен шығып, көрермендерді желпіндіріп отырды.

Жаңақорғанда «Айтыс – battle» өтті

<a href="https://kyzylorda-news.kz/">Kyzylorda-news.kz.</a> Қармақшы ауданының әкімі Жандос Еркінбек он екі айдың сұлтаны, қасиетті Рамазан айының кешінде «Қармақшы ата» мешітінде ауызашар &nbsp;берді.Мешітте жасалған ауыз ашу уақытында, жайылған ақ дастарқанға &nbsp;алпыстан аса Қармақшы ауданының &nbsp;ақсақалдары мен ақжаулықты аналары, Қармақшы аудандық мәслихат хатшысы, мекеме басшылары, қоғам белсенділері және арнайы мешіт жамағаттары шақырылған. Дастарқан басына жиналған қауымға Қармақшы ауданының әкімі Жандос Еркінбек сөз сөйлеп, жиналған жұртшылыққа тілегін білдірді.<blockquote>«Қасиетті Рамазан айында ұстаған оразаларыңыз қабыл болсын! Бұл ай қасиетті ай, береке бірлігімізді нығайтатын ерекше ай. Әр шаңыраққа құт-береке, амандық тілеймін! Бірлігіміз бекем болып, ырысымыз арта берсін!» деді Қармақшы ауданының әкімі Жандос Еркінбек.</blockquote>Қармақшы Ардагерлер &nbsp;кеңесінің төрағасы Асқар Ермағамбетұлы Мереков ауыз бекіткен жандарды құттықтап, ел ішінде ауызбіршілікті сақтап, ел тыныштығын мықты, татулығы берік болуын тіледі. Ал «Қармақшы ата» мешітінің бас имамы Өміржан Тобжанов &nbsp;жиналған қауымға уағыз айтып, Құран бағыштады.Одан соң қармақшылық Қаршыға Есдәулетов ақсақал &nbsp;Қармақшы ауданы әкімі Жандос Еркінбекке алғысын айтып, тілегін білдіріп, барша жанға батасын берді. &nbsp; &nbsp;

Қармақшы ауданы әкімі ауызашар берді

<a href="https://kyzylorda-news.kz/ru/">Kyzylorda-news.kz</a>. Әдетте халық ішінде «тоғыз жолдың торабы» деген тіркес сақталып қалған ғой. Қатынастың қай түріне болмасын мүмкіндік жасалған мұндай өңірлерде дамудың жаңаша бір деңгейі қалыптасқан. Тамыр жайған саламен өзектес болғандықтан бұл жақтағы негізгі тіршілікті темір жолмен байланыстырмау мүмкін емес. Жасы мен жасамысынан сыр суыртпақтасаңыз өзінің немесе тегінің темір жолмен байланысы барын білесіз. Сондықтан да болар, кейде мұндағыларды «теміржолшылар елі» деп жатады.Хош... 12 мыңдай тұрғыны бар тіректі елді мекенге де келдік. Тоқ ішекше созылған темір жолдың қос тіні тізбектей тартылып Сексеуіл кентіне еніп кетті. Мұнда депо болғандықтан шойын жолмен жүйтки келген тепловоз біткеннің бәрі осы Сексеуілге келіп бір дамылдайды. Локомотивтердің барлығы түгелдей тексеруден өткен соң сапарды қайта жалғастырады, жарамсызы сонда қалады. Мұның барлығы біз айтпасақ та жалпақ жұртқа белгілі жайт шығар. Алайда тіршілігі қайнаған мұндағы мекемелердің ішкі жұмыс кестесіне еніп, жұмысты көзбен көру бөлек әсер қалдыратындай. Сонымен «Қамқор Локомотив» ЖШС Сексеуіл локомотив жөндеу депосына табан тіредік.Ғимарат маңы абаттандырылып, сыртқы көрінісі жақсы үйлестірілген. Салмағы 130 тоннадан асатын темір жол патшасы іннен шыққан аюдай баяу қозғалып, ғимарат маңынан кері бұрылуда. Ғимарат ішіне енген сәтте мұндағы тіршіліктің қайнап жатқанын байқау қиын емес еді. Біздің «мұнда кім бар» деген сұраулы үнімізді естіген бір қызметкер жанымызға жақындап, мән-жайды сұрастыра жөнелді. Есімі – Жаңабай, тегі – Ниязбаев. Осы депоның автотежегіш цехының жөндеушісі болып қызмет істейді. Келген шаруамызды білген соң басшылыққа жол сілтеді. Қаз-қатар тізілген есіктер бойын жағалап, ғимарат ішімен жүріп келеміз. Депо басшысы Мұхтар Кеулімжаев іссапарда жүргендіктен, директордың өндіріс жөніндегі орынбасары Хангелді Төрединовпен жолығудың сәті түсті. Аз-кем сұрағымызға жауап алған соң «жақсыны көрмекке» деп мекеме ішін аралап, мұндағы жұмысты өз көзімізбен көруге оқталдық. Жанымда «Қамқор Локомотив» ЖШС Сексеуіл локомотив жөндеу депосының оқу инженері Қайрат Құлмырзаев бар. Қырықты алқымдаған азаматтың өз ісіне жетік, мекеме жұмысына қанық екені байқалып-ақ тұр. Кез келген сұрағымызға тосылмай жауап беріп, әр бөлімше бойынша жүріп жатқан жұмыстарды таныстырып келеді. Мұнда барлығы 250-дей адам қызмет атқарады екен. Әркім өз ісіне жауапты мамандар. Локомотивтердің құрылымдық ерекшеліктеріне қарай СО1-ден СО5-ке дейінгі сервистік қызметтер көрсетіледі мұнда. ТЭ33А, ТЭП33А, ТЭП33АС тепловоздарына сервистік қызметтің 5 деңгейі бойынша қызмет көрсетілсе, МК, ВК тепловоздарға 4 деңгейлі сервистік қызметтер жасалады. Осылайша мұнда айына 25-28 локомотив қайта жөндеуден өтіп, экономиканың күретамырына айналған шойын жол бетімен жүйткіп жүр.Ғасырға жуық тарихы бар мекеменің алдымен колесо ауыстыру бөліміне бас сұқтық. Мұнда тепловоздардың доңғалақтары тексерістен өткізіледі. Салмағы жол талғамайтын автокөліктермен пара-пар болатын (3300 тонна) колесоның әрқайсысында қосымша қозғалтқышы болады. Сол арқылы тепловозға қозғалу мүмкіндігі беріледі. Ал оның дөңгелегі жүздеген тоннаны көтергендіктен кей жағдайларда жарылып немесе қатты темірдің морт сынып кететін кездері де кездеседі екен. Темір жолға тиетін беті көп жағдайда жарақат алатындықтан колесо қайта жонылып, қосымша қолданысқа беріледі. Мұндай жұмыстардың барлығы осы бөлімде атқарылып жатыр.Мұнда жалқаулыққа жол жоқ, еріншекке орын жоқ. Еңбек майданында кездесе бермейтін көмескі тіркестер жұмысшылардың ұранына айналғалы қашан?! «Еңбек – қуаныш, жалқаулық – азап» деп келетін ұранды сөздер мекеме ішіндегі әр қызметкерге күш беретіндей.Мұнда тепловоздың әр қосалқы бөлшегі маңызды рөл атқарады. Мәселен, біз «компрессор» деп атайтын ауа беретін құрылғы істен шықса, мыңдаған тонна болатын көлік қозғалысын реттеу мүмкін емес еді. Ал ондай сәттерде машинистке электрмен жұмыс істейтін тетіктер де көмекке келеді. Бұл мекемедегі ұстахана бөлімі болмаса, жер қайыстырар ауыр салмақтан майысқан сом темірлер мен білектей металдарды қайта қалпына келтіру қиын шаруа. Мұндағылардың басты ұраны – «темірді қызған кезде соғу». Жабық пеште жанған от пен қызған темірдің ыстық лебіне шыдас беру мүмкін еместей. Бірақ жұмысшылар оның барлығын қалыпты жағдайда атқарып жатыр.Автотежегіш бөлімшесіне бас сұқтық. Тепловоздың ішкі көрінісі мен панельдік құрылғылар жайғасқан бұрышта барлық қосалқы тетіктер орналасқан. Автотежегіш цехының жөндеушісі Жаңабай Ниязбаев тежегішті іске қосатын тетіктің қозғалыста маңызды рөл атқаратынын айтты. Шұғыл жағдайларда тартылатын тетіктің артында үлкен жауапкершілік тұр. Ондай сәттердің соңында төтенше жағдай орын аламағанмен, темір жолдағы қоғалыс кестесі бұзылып жатады. Ал темір жол бойында әр минут есептеулі болғандықтан, еліміз бойынша барлық темір жол қозғалысы бұзылуы мүмкін. Мұның жауапкершілігі ауыр болатыны да сондықтан.Тепловоз жүрегі қозғалтқыш десек, сол жүректің құрамдас бөлшектерінің өзі ерекше маңызға ие. Оған қосалқы бөлшектер орналасқан бөлімге енгенде көз жеткіздік. Адам бойындай гильзалар мен поршень, шатундар қаз-қатар тізіліп тұр. Салмағы да зіл батпан. Бір адам қозғай алмас, сірә. Мұндай қосалқы бөлшектерге бұрыннан қанық болғандықтан бір сәт алыптар әлеміне еніп кеткендей болғанымыз жасырын емес. Алайда бәрін де көзбен көргендіктен әсері де айрықша болады екен.Осылайша бөлімшелерді аралай жүріп алып тепловоз тұрған ашық алаңқайға келдік. Жөндеуде тұрған тепловозды құдды бір қозғалатын үй дерсіз. Шұбыла тізілген вагондарды қиналмай сүйрейтін мұндай күш бұл техникаға сірә адам баласы арқылы беріліп тұрғандай. Жұмыс бір сәтке тоқтаса алып күшке ие екендігіне қарамастан локомотивтен де жан кетеді. Біз бір сәттік жұмыс кестесінен осыны аңғардық.Иә, мұндағы қайнаған тірлік біз барда дамылдаған емес. Біз кеткен соң да тоқтамасы анық. Өйткені бұл мекемеде өмірмен өзектес істер атқарылып жатыр. Және ол бір сәтке болсын тоқтамауға тиіс. Біз мақтайтын маңызды саланың сонда ғана сәні кіріп, тынысы ашыла түспек.

Теміржолшылардың табанды еңбегі

<a href="https://kyzylorda-news.kz/">Kyzylorda-news.kz.</a> Пандемия басталғаннан бері Қызылорда облысы бойынша коронавирус инфекциясының 26019 жағдайы тіркелді. Оның ішінде 17 079 жағдай ауру симптомдарымен болса, 8940 дерегі клиникалық белгілерінсіз анықталды. Облыстағы коронавирус инфекциясының бүгінгі эпидемиологиялық ахуалы тұрақты деп бағаланады.&nbsp;2023 жыл басынан бері 70 адам коронавирус індетіне шалдыққан, &nbsp;оның ішінде 27 жағдай 14 жасқа дейінгі балалар арасында анықталды. Ағымдағы жылдың сәуір айының 11 күнінде 7 жағдай есепке алынды. 2023 жылдың ай көрсеткіштері бойынша аурушаңдық динамикасында төмендеу тенденциясы байқалады, қаңтарда-34, ақпанда-14, наурызда-15 дерек есепке алынды.&nbsp;Инфекциядан қорғанудың тиімді жолы – COVID-19-ға қарсы вакцинацияның аяқталған курсы және ревакцинация. Облыс бойынша вирусқа қарсы вакцинаның бірінші компонентімен тиісті контингенттің 94,2%, екіншікомпонентімен 93,2% егілген. Сонымен қатар 275852 тұрғын ревакцинациядан өткен болса, қайта ревакцинация жасатқандар саны – 77880 адам. Бүгінгі күні облыс емханаларында коронавирус инфекциясына қарсы екпе жалғасуда. Иммундау жүргізу үшін Sinopharm вакцинасының 1700 дозасы және ревакцинациялау үшін Pfizer вакцинасының 21000 дозасы бар.&nbsp;<blockquote>«Вакцинациялауға қосымша жеке бас гигиенасын сақтауды, қолды сабындап жууды, антисептик қолдануды ұмытпау керек, адам көп жиналатын орындарға баруды мүмкіндігінше шектеген артық болмайды, қоғамдық көлікке мінгенде, халық көп болатын орындарда маска киюге кеңес береміз. Бұл сақтық шаралары ауа тамшылары арқылы таралатын инфекциялық аурулардан қорғайды. Әсіресе, бүгінгідей қызылша ауруының эпидахуалы тұрақсыз кезінде екпе жасатумен бірге осы шараларды қосымша орындау аса маңызды», − Қызылорда облысының санитариялық-эпидемиологиялық бақылау департаменті басшысының орынбасары Әлия Әбдіқайымова.</blockquote>

Қызылордада жыл басынан бері 70 адам коронавирус инфекциясын жұқтырған

<a href="https://kyzylorda-news.kz/">Kyzylorda-news.kz.</a>&nbsp;Сырдария аудандық партия филиалы жанындағы Партиялық бақылау комиссиясының мүшесі, аудандық мәслихаттағы «AMANAT» партиясы депутаттық фракциясының мүшелері Анар Қалдыбаева мен Нұрман Абдрасилов «Қызылорда-Айдарлы-Тартоғай» облыстық маңызы бар автомобиль жолын жөндеу жұмыстарына партиялық бақылау жұмыстарын жүргізді.Партиялық бақылау жұмыстарына облыстық жолаушылар көлігі және автомобиль жолдары басқармасының бас маманы Өмірбек Мұсаев пен аудандық тұрғын үй, коммуналдық шаруашылық, жолаушылар көлігі және автомобиль жолдары бөлімінің сектор меңгерушісі Нұржан Омаров және мердігер мекеменің өндіріс саласы бойынша директордың орынбасары Жәнібек Сыздықов қатысты.Мұнан бөлек, Аманкелді ауылдық округі әкімі аппаратының бас маманы Бауыржан Ермағанбетов, ауылдық ардагерлер кеңесінің төрағасы Нұрмағанбет Құдайбергенов, ауылдық әйелдер кеңесінің төрайымы Ғалия Арынова, белсенді жас Абай Абсаттаров, Жетікөл ауылдық округінің әкімі Өмірбек Токманбетов, ауылдық ардагерлер кеңесінің төрағасы Жарылқасын Камалов, Айдарлы ауылдық округінің әкімі Айбол Ержанов, ауылдық әйелдер кеңесінің төрайымы Гүлжахан Есенбекова, ауыл тұрғыны Тиыштық Әбсадықов жол жөндеу жұмыстарының сапалы болуына бірқатар ескертпелер жасап, алдағы жұмыстарға сәттілік тіледі.Аталған облыстық маңызы бар автомобиль жолының қиындықтары Аманкелді, Жетікөл, Айдарлы ауылдық округтерінің тұрғындары көптен көтеріп жүрген мәселесі еді, сол себепті тұрғындардың жол сапасының жоғары болуын уайымдайтын реті бар. Мердігер мекеме өкілдері мен жиналған тұрғындарға бұл жұмыстар алдағы уақытта партия бақылауында болатындығы айтылды.Партиялық бақылау барысында жолдың талапқа сай болуы туралы айтылып, тиісті сала мамандары арқылы зерттеу жұмыстары жүргізілді. Жоба-сметалық құжаттарға сәйкес екендігін айтты.Барлық жұмыстар ел мүддесі үшін екендігі айтылып, жұмыстарды нәтижелі жасау бірауыздан келісіліп, үлкендердің ақ батасы берілді.<figure class="image"><img src="https://knadmin.beoblood.kz/uploads/340932258_150752644614149_328732867539651500_n_82279f8475.jpg" alt="340932258_150752644614149_328732867539651500_n.jpg"></figure>

Жол сапасына партиялық бақылау жасалды

<a href="https://kyzylorda-news.kz/">Kyzylorda-news.kz.</a> Қазалы ауданының әкімі Мұхтар Оразбаев бастаған топтың оқушылар және олардың ата-аналарымен кездесуі Қазалы қаласындағы М.Горький атындағы №16 мектеп-лицейде жалғасып жатыр. Жиынды аудан басшысы ашып, қоғамдағы жасөспірімдердің тәрбиесіне тоқталды.&nbsp;<blockquote>«Қазір Қазалы ауданы туралы тұтас Қазақстан шулап жатыр. Әлеуметтік желіде алуан түрлі пікірлер айтылып, ауданның атына кір келіп жатыр. Бүгінгі күні аудандағы өзекті мәселенің бірі - әрбір баланың отбасындағы тәрбиесі. Ата-ана ұл-қызына қаншалықты дұрыс тәрбие беріп жатыр? Несіне жасырамыз, кешегі жағдайда ел ішінде ұстаздарды қараушылар көбейді. Бірақ кінә бір жақтан болмайды», - деді аудан басшысы.&nbsp;</blockquote>Басқосуда сөз алған аудан прокуроры Дарын Әбіш қазіргі мұғалім оқушыға қарсы қарап жақ ашудан қалды дейді. Өйткені, ата-ана барлығын осы жағдайға жеткізген. Қорыта келе, жастарды ойнап жүріп, от баспауға және қылмысқа &nbsp;бармауға шақырды.&nbsp;Ата-аналар мен оқушыларға қатысты ауқымды мәселелер қозғалған жиында Қазалы қаласының әкімі Рахметулла Ізтілеу, аудандық білім бөлімінің басшысы Әділхан Жөлекешов, білім қызметкерлері, дербес бөлімдер және зиялы қауым өкілдері болды.Кездесу соңында қатысушылар тарапынан түрлі ұсыныстар айтылып, тыңдаушылар барлығын қағазға түртіп алды.&nbsp;<figure class="image"><img src="https://knadmin.beoblood.kz/uploads/336674972_2279713462217991_7397342259920183827_n_e3ed631011.jpg" alt="336674972_2279713462217991_7397342259920183827_n.jpg"></figure>

Қазақстан және Қызылорда облысының жаңалықтары