<a href="https://kyzylorda-news.kz/">Kyzylorda-news.kz.</a> 6 наурызда Испанияның Planeta de Agostini атты беделді баспасы Димаш Құдайбергеннің туындысынан алған шабытының нәтижесінде "Ғарыш дауыстары" атты жаңа мангасын басып шығарды, деп хабарлайды <a href="https://kaz.zakon.kz/madeniet-shou-biznes/6039541-ispaniyada-dimashty-shyarmashylyynan-shabyt-alan-suretsh-zhaa-mangasyn-basyp-shyardy.html">Zakon.kz.</a>"Voices of space" ("Ғарыш дауыстары") – 25 беттен тұратын фантастика жанрында жазылған туынды. Бұл – туабітті таңғажайып қабілеті – бірегей даусымен ғаламды өзіне еліктіріп, айналасына бақыт пен қуаныш сыйлайтын ерекше өнерлі адамдарға арналған туынды. Бұл туралы әншінің сайты хабарлады.Сурет: dimashnews.com

Испанияда Димаштың шығармашылығынан шабыт алған суретші жаңа мангасын басып шығарды

<a href="https://kyzylorda-news.kz/">Kyzylorda-news.kz.</a> Көктем айының шуаққа толы мерекесі – 8 наурыз Халықаралық әйелдер күніненде аудан әкімі Аманжол Оңғарбаев аудан ардагерлерімен бірге бірқатар асыл жанды арулардың отбасыларына барып, мерекемен құттықтады.Аудан басшысы алдымен 39 жастағы мүгедектігі бар бала күтуші Гүлмира Байменованың шаңырағын ат басын бұрды. Өз кезегінде аяулы ана құрмет көрсеткен аудан басшысына шынайы ризашылығын білдірді.Одан әрі, 82 жастағы жалғызбасты қарт әже Назду Керімованы төл мерекемен құттықтады. Аудан әкімі А.Оңғарбаев өз сөзінде «Қарттарымыз қазынамыз. Біз әрдайым сіздердің еткен еңбектеріңіз бен ел үшін жасаған қызметтеріңізді жадымыздан шығармаймыз. Бүгінгі өздеріңіз арқылы барша ауданның ақжаулықты аналары мен қыз-келіншектерді мерекемен құттықтаудамыз»,- деді. Арнайы құттықтай келген азаматтарға ризашылығын білдірген ардагер ана елдің амандығын тілеп, ақ батасын берді.Мұнан соң, І топ мүгедектігі бар Несіпбике Жақсыбаеваның үйіне барған аудан басшысы ардақты жанға ыстық ықыласы мен жылы лебізін білдірді.Фото: Арал ауданының әкімдігі

Арал ауданының әкімі аналарды төл мерекемен құттықтады

<a href="https://kyzylorda-news.kz/">Kyzylorda-news.kz.</a> 8 наурыз – Халықаралық әйелдер күні мерекесінде аудан әкімі Аманжол Оңғарбаев аудандық мәдениет үйінде өткен салтанатты шарада Арал өңірінің нәзік жандыларын мерекемен құттықтады.Алдымен мерекелік кештің шымылдығы әйел-ананың қадір-қасиетін ұлықтайтын сахналық қойылыммен түрілді.Мұнан соң, аудан басшысы сөз алып, барша әйелдер қауымына ақжарма лебізін арнады.<blockquote>«Шын мәнінде адамзат баласы үшін анадан құдіретті, анадан ардақты, анадан аяулы ешкім жоқ. Сондықтан әлемдегі ең жоғары мадақ та, құрмет те ару-аналарға арналады. Бүгінде ауданымызда 2 мыңнан аса алтын құрсақты аналарымыз болса, оның 113-і батыр ана. Ал 640-і Алтын алқа, 1226-і Күміс алқа иегерлері. «Әйел – бір қолымен бесікті, екінші қолымен әлемді тербейді» деген тәмсілдің астарында әйел адамның кез келген ауқымды істерге араласып, үлкен нәтижеге қол жеткізе алатынын дәлелдейтін терең мағына жатыр. Қазақ әйелі – елдіктің, қазақ әйелі – биіктіктің, қазақ әйелі – мәңгіліктің өлшемі. Әйел – өмір тірегі ғана емес, әйел – өмірдің өзі. Ауданымыздағы мемлекеттік қызмет саласындағы 36 пайызын, білім беру саласындағы 65 пайызын, медицина саласының 83 пайызын, мәдениет саласындағы 80 пайызын, өңірдегі кәсіпкерлердің 47 пайызын әйел азаматшалар құрап отыр. Сонымен қатар Аралдың ақ алтыны атанған ас тұзы мен су маржаны балық өндірісінде, темір жол мен ауылшаруашылығы, құқық қорғау саласында және бұқаралық ақпарат құралдарында еңбек етіп жүрген асыл апа-қарындастарымыз аз емес. Аяулы асыл жандар! Сіздер арқылы Арал халқының барша аруларын әсем мерекемен құттықтап, ыстық ықыласым мен ақжарма лебізімді білдіргім келеді. Сіздер барда сәбилеріміздің жүзінен күлкі кетпей, ер-азаматтарымыз еңсесін тік көтеріп жүре бермек!» – деді, аудан басшысы.</blockquote>Салтанатты кеште түрлі салада елеулі қызмет етіп, белсенділігімен ерекшеленіп, үздік деп танылған бірқатар аяулы аруларға Облыс және аудан әкімінің құттықтауы табысталды.Мерекелік шара көрерменге шат-шадыман көңіл-күй сыйлайтын концертпен жалғасты. Жергілікті аудан өнерпаздары мен мерекелік кешке арнайы келген эстрада жұлдызы Алмасхан Насыров әсем ән шырқады. Мың бұралған бишілердің өнері де көктем мерекесінің ажарын аша түсті.Фото: Арал ауданының әкімдігі

Аралдық арулар марапатталды

<a href="https://kyzylorda-news.kz/">Kyzylorda-news.kz.</a> &nbsp;Қарағанды ​​облысындағы Ғабиден Мұстафин атындағы ауылдың әкімі мас күйінде көлік жүргізгені үшін ұсталған соң көп ұзамай&nbsp;қызметінен босатылды. Бұл туралы <a href="https://stan.kz/mas-kuyde-kolik-zhurgizgen-karagandi-oblisinda-15-tauli-396736/">Stan.k</a>z ақпарат агенттігі хабарлайды.Қызметтік тексеру қорытындысы бойынша мұндай шешімді Бұқар жырау ауданының әкімдігі қабылдаған.“Қолданыстағы заңнама нормаларына сәйкес, әдеп жөніндегі кеңестің шешімі негізінде Бұқар жырау ауданының әкімдігі 7 наурызда ауыл әкімі Ғабиден Мұстафинаны мемлекеттік қызметінен босату туралы шешім қабылдады”, – деп мәлімдеді аудан әкімдігі.Қарағанды ​​облысы бойынша мемлекеттік қызмет істері департаментінің баспасөз қызметі әкімнің қызметтік тергеу барысында қызметтік этика нормаларының бұзылғанын мойындағанын қосып өтті.“Жүргізілген қызметтік тексеру нәтижелері бойынша Бұқар жырау ауданының әкіміне мемлекеттік қызметшілердің этикасы туралы кодекстің 6 және 10-тармақтарының 4, 5 және 8 тармақшаларын орындамағаны үшін ауыл әкімі Ғабиден Мұстафинді қызметінен босату ұсынылды”, – деп атап өтті ведомство өкілдері.Еске сала кетейік, бұған дейін Қарағанды ​​облысында Бұқар жырау ауданындағы бір ауылдың әкімі 15 тәулікке қамауға алынып, жүргізуші куәлігінен де айырылғаны хабарланған болатын. 2024 жылдың 3 ақпанына қараған түні жол полициясының қызметкерлері қызметтік көлігімен ұстаған. Әкім мас күйде болған.Бұрынғы әкімнің мұндай заңбұзушылық бірінші рет емес екені бұған дейін хабарланған болатын. Бірнеше жыл бұрын ол қызметтік көлікті мас күйінде басқарғаны үшін ұсталып, жүргізуші куәлігінен айырылған болып шықты.Фото: Нұрболат Нұржаубай

Мас күйде көлік жүргізген әкім қызметінен босатылды

&nbsp;<a href="https://kyzylorda-news.kz/">Kyzylorda-news.kz.</a>&nbsp;&nbsp; Жаңақорған ауданында ауыл шаруашылығымен айналысатын 781 шаруашылық құрылымы бол¬са, соның 460-ы егіннен несібесін тауып отыр. Әсіресе, Сыр беткейде қоныстанған ауылдардың барлығы Жер Анадан нәпақасын теріп жүр. Бізде күрішке басымдық беріледі. Былтыр аудан бойынша 35 715 гектарға дән тасталса, биыл 36 026 гектарға ұлғайды.<blockquote>– Биыл күріш 6 035 гектарға, күздік бидай 2 700 га, жаздық бидай 250 га, жаздық арпа 30 га, тары 276 га, дәндік жүгері 1 100 га, мақсары 1 600 га, күнбағыс 46 гектарға егілді. Сондай-ақ жаңа жоңышқа 4 450 га, ескі жоңышқа 16 296 га, сүрлемдік жүгері 22 га, судан шөбі 8 гектарды құрайды. Картоп 497 га, көкөнiс 646 га, бақша 2 100 гектарға жетті. 2024 жылы 1825 тонна күріш тұқымы егілетін болса, оның 600 тоннасы тазаланды. Атап айтқанда, 1330 тоннасы Лидер, 495 тоннасы Сыр Сұлуы, АйКерім, Маржан сорттары егілетін болады, – деді бас аграном Даурен Абибуллаев.</blockquote>Минералды тыңайтқыштар мен гербицидтерге тоқталсақ. 2024 жылдың егісі үшін 4567 тонна минералды тыңайтқыштар қажет болса, оның 3085 тоннасы алыныпты. Арам шөптерге қарсы қолданатын гербицидтердің 2213 л/кг сатып алу жоспарлануда екен. Ең маңыздысы, аяқ су, сондықтан су жүйелерін тазалау бойынша білдік.<blockquote>– 2023 жылы облыстық бюджеттен бөлін¬ген 66,5 млн теңге қаражатқа 2 каналдың 18,8 шақырымы тазаланды. Аудандық шұғыл шығындарға арналған резервінен 2024 жылы күріш егісімен айналысатын 8 ауылдық округтен 52,6 шақырымды құрайтын 12 каналға 28,930 млн теңге бөлініп, бүгінгі күнге Аққорған, Қожакент, М.Нәлібаев ауылдық округіндегі каналдар толығымен тазаланды. Қазір бұл жұмыстар Жаңарық Қыркеңсе ауылдық округтерінде жалғасуда. Қалған жұмыстар көктемгі егіс науқанына дейін, яғни 15 наурызға толық аяқталатын болады.Биыл республикалық бюджеттен 488 млн қаржы бөлініп, Келінтөбе магистралды каналын қосымша сумен қамту үшін ұзындығы 6,1 шақырымды құрайтын жаңа канал қазы¬лу үстінде. Мердігер мекеме – «Мұрат тех сервис» ЖШС. Ал су шаруашылығы мекемесі арқылы Тайпақкөл каналынан 3 шақырым, Келінтөбе магистралды каналының 1,4 шақырымы қожым тазалануда, – деді жауапты сала маманы.</blockquote>Тағы айта кетерлігі аудан бойынша барлығы 37 насос қондырғысы бар екен. Белгілі болғандай Қожакент, Жайылма ауылдық округтерінде шамамен 100 гектар егістік алқаптарындағы мал азықтық дақылдарға жаңбырлатып суару және бақша көкөніс дақылдары үшін 35 гектар көлемге тамшылатып суару технологияларын қолдану жоспарлануда. Күріш егілетін талаптар бойынша 1000 гектарға жуық көлем лазерлі тегістеуден өтетін болады. Бұл атқарылатын шаралардың барлығы вегетациялық кезеңде су үнемдеу процестеріне негіз болатындығы анық.Облыс әкімінің тапсырмасына сәйкес 2023 жылы 295 гектар жерлер жаңадан ашылып, отбасылық егістіктерге берілсе биыл бұл көлем 320 гектарға артқалы отыр. Нәтижесінде ауылдық округтер бөлінісінде 805 адам дайындалған егістік жерлермен қамтамасыз етілетін болады. Әртараптандыру егістіктерін суаруға қажетті дизельді және электрлі су насостары жеткілікті деңгейде.Техника және жанар-жағар май2024 жылдың қаңтар айындағы есеп бойынша ауыл шаруашылығы тауарын өндірушілердің қолында көктемгі дала жұмыстарына қатысатын 207 трактор, 82 соқа, 42дән сепкіш, 21 жүк көлігі және 101 трактор тіркемесі бар. Өткен жылы ауданның шаруашылық құрылымдары 2 комбайн, 16 трактор, 7 жүк тиегіш, 10 пресс подборщик ауылшаруашылығы техникаларын алды. Биыл шаруашылықтар өз қаржылары есебінен және «ҚазАгроҚаржы» АҚ арқылы 43,9 млн теңгеге 3 техника алса, 306 млн теңгеге 26 дана ауыл шаруашылығы техникаларын жаңадан алу жоспарлануда.Көктемгі егіс және дала жұмыстарын жүргізу үшін, арзандатылған дизель отынына 173 шаруашылық құрылымдары өтініш берген, оның 97-сі «ЖаңақорғанОil» ЖШС, 75-сі «Жібек Жолы LTD» ЖШС-гін, ал 1 қожалық «РК-Мұнай» ЖШС-гын таңдап, көктемгі егіс үшін жалпы 1422 тонна дизель отынына электронды жүйеде өтінімдер берілген.Нақты мәліметтерге сүйеніп, дала жұмысына дайын екенімізді білдік. Қалғанын уақыт көрсете жатады.

  Жаңақорған диқандары дала жұмысына дайын

&nbsp;<a href="https://kyzylorda-news.kz/">Kyzylorda-news.kz.</a>&nbsp; Қызылорда облысы прокуратурасында Халықаралық әйелдер мерекесіне орай салтанатты шара өтті. Облыс прокуроры Ризабек Ожаров ұжымдағы қыз келіншектерді және сала ардагерлерін құттықтап, жылы лебізін білдірді.<blockquote>«Бүгінгі күні нәзік жандылар сан түрлі саланың қыр – сырын меңгерген. Әсіресе, денсаулық сақтау, білім, мәдениет, қаржы, құқық қорғау сынды халқымыз үшін ең маңызды салаларда қызмет етіп жүр. &nbsp;Олардың қатарында ел аумағында заңдылықтың сақталуына, азаматтарымыздың конституциялық құқықтарының қорғалуына құзырлы органның абыройлы атына сын келтірмей қызмет етіп жүрген өздеріңіз де барсыздар. Прокуратура органдарында жыл өткен сайын нәзік жандылардың қатары артып келеді. Олармен атқарылған жұмыстың өнімділігі мен сапасына еш мін жоқ. &nbsp;Бұл дегеніміз - әйел прокурорларға деген қоғамның сенімі және жауапкершілік жүгін көтере алатын беделі мен мәртебесінің көрінісі», - деп түйіндеді, өз сөзін облыс прокуроры.</blockquote>Биылғы жылдың ерекшелігі өз еңбегімен көзге түскен, белсенді қызметкердің анасына «Офицердің Анасы» медальі табысталды. Оған Қызылорда облыстық прокуратурасының прокуроры Мағрипа Әлиеваның анасы Бисенбаева Әйгерім Ибрашқызы лайықты, деп танылды.Марапаттау рәсімінен соң игі шара облыстық өнерпаздардың қолдауымен мерекелік концертке ұласты.

«Офицердің Анасы» медальі табысталды

<a href="https://kyzylorda-news.kz/">Kyzylorda-news.kz.</a> Гүлдана Ержанқызы – үш жылдан бері балалардың көңіл-күйін шаттыққа бөлеп жүр. Негізгі мамандығы биология пәнінің мұғалімі болса да, өзін басқа қырынан танытып кәсіп бастаған. Ең алғашқы кәсібі сұлулық салоны болса, кейіннен өзінің қызығушылығымен Шиеліде аниматор орталығын ашады.<blockquote>– Мектептен қанша алыстасам да, маған балалармен жұмыс істеген ұнайтын. Сол мақсатпен аниматор болғым келді. Ауданда жоқ нәрсені ашқым келетін. Жаңашылдықты ұнатамын. Әрине, бұл кәсіп бірден бастала қоймады. Түбегейлі жан-жақты зерттедім. Басқа да аниматорлардың жұмысын көрдім. Бастапқыда екі аниматор болып мерекелік кештерге шығатынбыз. Алайда, одан белсенділік болмады. Не себепті дейсіз ғой? Адамдардың аздығынан. Әйтсе де, мен жұмысты тоқтатпадым. Алға қарай жылжып, орталыққа адамдарды тартуға тырыстым. Осылайша, ұжым саны да артты. Бағдарламалар ұйымдастырып, сұраныс та көбейе бастады. Шынымды айтсам, бұл кәсібім менің бағымды ашты десем, артық айтқаным емес, – дейді кейіпкеріміз.</blockquote>Расында үйде, кафеде, тойханада болсын балалардың көңілін тауып жүргендерді көресіз.Тіпті үйлену тойының өзінде аниматорларды кездестіресіз. Кішкентай бүлдіршіндермен бірге ән айтады, ойын ойнайды. Мұның өзі бала үшін үлкен мейрам. Әсіресе, теледидар мен ғаламторға байланған балақайлар үшін. Ал Гүлдананың өзіндік ерекшелігі әр тапсырысқа арнайы сценарий жазып, неше түрлі кейіпкерлердің дауысын салуға тырысады. Демек әр тойды ұмытылмастай еткенін қалайды.Бүгінде ұжымда 4 aдам қызмет етеді. Кәсіпкердің айтуынша, жүргізушілік пен ұйымдастырушылықты өзі басқарып отырады.<blockquote>– Мен өз жұмысымды ұнатамын. Бала жаны өте нәзік келеді. Балаларымыз болашағымыз емес пе? Сол себептен оларды телефонмен достастырмай, адамдармен байланыстыру қажет, – деді кәсіпкер.</blockquote>Оның айтуынша, аниматор кейіпкерлеріне 2 ай бұрын тапсырыс беріп қояды. Мәселен, бір аниматордың бағасы 270 мың теңгені құрайды. Сондай-ақ орталыққа тек аудан ғана емес, жан-жақтан хабарламалар келіп, сұраныстар түседі. Атап айтсақ, Қызылорда қаласы мен Жаңақорған ауданына барып, кештердің сәнін келтіреді.Мінекей, жас кәсіпкердің аниматорлық күні осылай өтуде. Қызықты әрі қиын. Неге қиын? Себебі күндіз-түні жұмыс істеу, адамдарға жауап беру, баланың көңілін табу – бұның барлығы қажырлы еңбектің нәтижесі. Біздің кейіпкеріміз тек ғана аниматорлықпен ғана емес, сұлулық салонын да басқарып отыр. Осы тұрғыда жолдасы Ерболат Мұхтаровтың көмегі ерекше болғанын айтып кетейік. Өйткені әйел адам үшін отбасының, жан-жарының қолдауы өте маңызды. Қазіргі таңда бір әулеттің үлгілі келіні. Жұбайының сүйікті жары әрі балаларының аяулы анасы.

Шиеліде "Үздік аниматор" орталығы бар

Қасиет тұнған Қарақұмның құмына ойнап өскен Еңбек деген палуан жігіт жайлы ол мектепте оқып жүріп-ақ топ жарып, еліміздің көк байрағын көкте желбіреткенде ақжолтай жаңалық етіп газетіміздің алғашқы бетінде жариялағанымыз бар еді. Одан бері де бес жылға жуық уақыт сырғып өте шығыпты. Жақында ержетіп, еңбекке араласқан Еңбектің «Дала қыраны» атты республикалық турнирде топ жарып, жеңіс тұғырынан көрінгенін естіп өзімен тілдескен едік.Еңбек Сақтағанов 2001 жылы Қарақұм ауылында қоныс тепкен Жалырасы Сақтағанов пен Шыныгүл Кенжалиеваның шаңырағында кенжесі болып дүние есігін ашады. Еңбектің есімін есітіп «Қандай ерекше есім» деген ойда болдыңыз ба? Мен де де сондай қызығушылық оянып өзінен сұрағанымда, әкесі Еңбек есімді қимас досынан айырылып қалып қиналып жүрген шақта, өмірге келген ұлын досының құрметіне, соның есімімен атаған екен. Ал жастайынан Қарақұмнан шыққан палуан, күрескер алдынғы буын ағаларының өміріне қанығып өскен Еңбектің күреске деген қызығушылығы ерте жастан оянады.<blockquote>– Ауылда күрес спорты жақсы дамығанын атап айтар болсам, КСРО-ның спорт шебері атанған ауданға белгілі азамат Көлбай Данабаев, «Қазақстан барысы» атанған Нұрым Сәлімгерей менің жерлестерім. Біз бала болып ойнасақ та, теледидар көрсек те күрестің айналасынан асып кетпеуші едік. Осылай шыңдала түстім. Ең алғаш ауылдағы жаттықтырушы ағайым Елеулі Досжанов менің бағым мен бабымның қатар шабуына септігін тигізді. Ең алғашқы жеңісім облыстық «Алтын белбеу» жарысында бірінші орын алған болатынмын. Осы дода менің спорттағы жетістіктерімнің бастауы болды. Әрі қарай алдымнан тек даңғыл жол ашыла түсті, – деп бастады жас спортшы әңгімесін.</blockquote>Талантты, дарынды жасөспірімге қырағы көз талай бапкердің көзі түспей қоймады. Жан-жақтан ұсыныс түседі. Бір жағы жас спортшы үшін үлкен қалада мүмкіндік те көп. Осыны ойлаған ол 2015 жылы Қызылорда қаласындағы Жалаңтөс баһадүр атындағы спорт колледж интернатына қазақ күресі бөліміне оқуға түседі. Бұл спортшы саңлақтар мекенінде бапкер Болатпек Кенеевтың темірдей тәртібімен жүрген Еңбектің еңбегі ақталды. Ол қазақ күресі, самбо күресінен Қазақстан республикасы чемпионатының бірнеше дүркін жеңімпазы болып, спорт шебері атағын алды. Халықаралық жарыстарға қатысып, өзіне сенім артақан жандарға селкеу салмай жеңіс тұғырынан көріне білді.<blockquote>– Биылғы жылы Шымкент қаласындағы жоғары оқу орнын дене шынықтыру пәнінің мұғалімі мамандығы бойынша бітірдім. Қазіргі таңда ішкі істер саласында еңбек етудемін. Бала кезден елімді әлемге танытатын спортшы болуды армандаған соң қандай жағдай болса да спорттан қол үзген емеспін. Қазіргі таңда елімізде жас спортшыларға деген қолдау көп. Жайлы спорттық мектептер, үйірмелер кез-келген өңірде жұмыс істеп тұр. Мұның өзі бір бақыт қой. Бізге тек жаттығуға тыңғылықты қарап, жарыста топ жару ғана керек, – дейді Еңбек.</blockquote>Еңбек үшін спорт өмірінің бір бөлшегі іспетті. Тіпті бірде дәрігерлер оның спортпен шұғылдануына мүлдем болмайтынын айтып тыйым салған. Бірақ жас жігіт олардың бірін де құлаққа ілмеген.<blockquote>– Спорт тартыстан тұратын дода болған соң бөз кілемде жеңіс үшін жан алысып, жан берісу – спортшы үшін де, оған қолдау көрсетіп отырған жанкүйер үшін де ең қызықты сәт. Сондықтан бізде жеңіл жарақаттану жиі болып тұрады. Бірде кезекті жарыстан соң тізем қатты жарақаттанып, ауруханадан бір-ақ шықтым. Тіпті аяққа ота жасалуы керек болған еді. Бірақ мен отадан бас тарттым. Алматы қаласына барып тыңғылықты емделе бастадым. Дәрігерлер маған спортты қою керектігі туралы айтқанда, ол сөзге аса мән берген жоқпын. Өйткені ішімде қалайда күресті тастамаймын деген ұстаным болды. Осылай кейін жарыс жолына қайта шыққан едім, – деді Еңбек.</blockquote>Еңбек Жадырасынұлы жуырда Астана қаласында өткен «Дала қыраны» республикалық турнирде топ жарғаны туралы жоғарыда атап өткен болатынбыз. Қазақстанның бас палуанын аталған додаға ол 90 келі салмақ дәрежесі бойынша қатысып жеңіс тұғырынан көрінді. Және 4500000 қаржылай сыйақыға қолжеткізді.Алдына айқын мақсат қойып, соған жету жолында табанды еңбек ете білген жас палуан Еңбектің атына заты сай азамат екендігіне көзіміз жете түскендей. Сөзі мығым, арманы асқақ, жеңіске құштар спортшыдан әлі де күтеріміз көп. Алдағы уақытта Еңбектің атымен, атағымен мақтанатын күн келсін.

Дала қыраны атанған аралдық жас спортшы 

<a href="https://kyzylorda-news.kz/">Kyzylorda-news.kz.</a> Қазіргі нарық заманында, жасыратыны жоқ, &nbsp;әуелгі орында ақша тұрады. Оны әркім әрқалай жолмен табады. Әсіресе, орта білім беру саласында да ақша табудың амалын іздегендер қатары көбейді. Ол қалай дейсіздер ғой?Педагогтерден құралған арнайы мекемелер ұстаздарға төсбелгілер мен сертификаттар береді. Тек мұғалімнің санаты мен еңбек өтілі жетсе болғаны. Кейбірінің арнайы журналдары бар. Оған жазылып, материалдарын ұсынып отырады. Бірақ марапат тегін берілмейді. Өз қалталарынан қаржы шығарып, талаптарын орындауы керек. Сол кезде ғана түрлі номинация мен төсбелгі иегері боласыз да шығасыз.«Ғасыр ұстазы», «Ұлт ұстазы», «Ұлы дала ұстазы», «Алаш ұстазы» және басқа қаптаған медаль, алғыс хат сияқты марапаттар да &nbsp;бар. «Ұлт ұстазы» деп Ахмет Байтұрсыновты айтушы едік, қазір ақшаңыз жетіп тұрса, сіз де осы атаққа ие бола аласыз.Жалпы алғыс хат, төсбелгі, сертификаттар мен медальдар мұғалімдердің категория алуына әсерін тигізеді. Қаптаған мұндай орталықтардың атынан шатасасың. Берген сертификаттары мен орталықтың атаулары да әжептәуір, кейбірінің атынан ат үркитіндей.Өкінішке қарай, саудадағы сертификат оқушыларды да айналып өтпеді. Қазір оқушылар арасындағы байқаулардың бірсыпырасы ақылы. Қандай да бір сайысқа қатысқыңыз келсе, бұрынғыдай жол жүріп шаршамайсыз. Себебі, олардың көпшілігі электронды түрде жүргізіліп келеді. Алдымен ақысын төлеп, қатысатын оқушы жайлы және байқауға қатысты мәліметтерді дайындап, пошта арқылы жіберсе, жетіп жатыр. Нәтижесінде жүлделі орын алмаған жағдайдың өзінде, әйтеуір бір номинациямен марапатталады. Ал жүлделі орындардың бірі қажет болса, қосымша ақы төлетеді. Бұл ретте, бір тапсырыс көлемінде бірден &nbsp;5 немесе одан көп оқушы дайындаған пән мұғалімдері де алғыс хатсыз қалмайды. Байқау ақылы болғандықтан, ынтаңыз зор болса да, қалтаңыз көтермесе қатыса алмайсыз. &nbsp;Ең ұнамсыз тұсы – ақша жүрген жерде орындар да саудаға түсетіні анық. Бір таңғаларлығы, бүгінгі күні мұндай &nbsp;жарыстарға деген оқушылардың ынтасы басым. Бірақ айналып келгенде, барлық салмақ ата-анаға келіп түседі. Қарызданып-қауғаланса да, баласының жұрттан қалмай қатысқанын жақсы көріп, соңғы тиынына дейін беретіні – бәріне шындық. Баласының қалауын орындағанды қай ата-ана жек көрсін?!Бұл жайында бұрын да айтылған…Иә, бұрын министр болып тұрған кезінде Асхат Аймағамбетов білім саласындағы жалған әрі ақылы олимпиадалар мен конкурстардың марапаттарына шектеу қою керектігін министрліктің аппарат отырысында баса айтқан болатын.<blockquote>− Осы мәселе бойынша түсіндіру жұмысын жүргізу қажет. Сатып алатын марапат – марапат емес. Біз әрине, кейбір жағдайда әртүрлі қоғамдық марапаттар болатынын түсінеміз. Бірақ олар ақылы болмауы керек. Егер қоғамдық марапат ақылы болса, оның еш қасиеті, құндылығы жоқ. Кейбір әріптестеріміз түсінбей, осындай әрекеттерге барып жатқандар бар. Өйткені, бұл мәселені көтермесек болмайды. Мектептерде әртүрлі ақылы конкурстар мен олимпиадалар болмауы керек. Ол түсінікті шығар. Біз тегін конкурстардың санын көбейтеміз, − деген еді А. Аймағамбетов.&nbsp;</blockquote>Содан бері бірнеше жыл өтті. Байқаулар әлі де жалғасуда, дизайны да, аты да ресми бекітілген марапаттарға әбден жақындатылған әртүрлі ақылы сертификаттардың саны артпаса азаймады.Десе де жуырда Оқу-ағарту министрлігі ресми аккаунтында мұғалімдерді марапаттауға қатысты маңызды мәлімдеме жариялады. Министрлік білім беру саласының педагогтері мен қызметкерлерін көтермелеу жүйесіне «Оқу-ағарту министрінің Алғысы», «Оқу-ағарту министрінің Құрмет грамотасы», «Мектепке дейінгі тәрбие мен оқытудың үздігі», «Орта білім беру ісінің үздігі», «Қосымша білім берудің үздігі», «Техникалық және кәсіптік білім беру ісінің үздігі», &nbsp;«Оқу-ағарту министрлігінің еңбек сіңірген қызметкері» &nbsp;құрметті дипломдары, «Ы.Алтынсарин» және «Білім беру ісінің құрметті қызметкері» &nbsp;төсбелгілері мен «Мейірім – әлемге махаббат», «Еңбек ардагері» медальдары кіретінін айтты.<blockquote>− Көтермелеуге кандидаттардың құжаттары салалық көтермелеу жүйесінің 6-қосымшасына, жұмыс көрсеткіштеріне сәйкес қаралады: жұмыс тәжірибесі, біліктілігі, педагог пен оның оқушыларының жетістіктері және т.б. марапаттау балдарды есептеу негізінде жүзеге асырылады. Материалдарды қарау нәтижелері бойынша министрлік комиссиясы ашық дауыс беру арқылы шешім қабылдайды. Әрбір көтермелеудің сәйкестендіру нөмірі болады. ҚР Оқу-ағарту министрінің мөрімен және қолымен бекітіледі. Осылайша, көтермелеудің өзге түрлері ҚР Оқу-ағарту министрлігінің ведомстволық наградаларына жатпайды, − делінген хабарламада.</blockquote>Бұл дегеніңіз, өзге марапаттардың ендігі жерде салмағы жоқ екенін көрсетеді.Марапат мұғалімді табуы керекҚазіргі күні елімізде ақылы байқауларды ұйымдастырып жүрген орталықтардың бірі − «MediaBilim» және республикалық «Өрлеу» педагогикалық шеберлікті дамыту орталығы. Бұл орталықтармен байланысқа шығып, сұрастырып көрдік. Сертификат жөнінде ақпарат берсе де, төсбелгінің тек 15000 теңгеден басталатынын ғана айтты. Орталықтардың өткізуімен болатын әдеби-шығармашылық байқаулар әрбір атаулы күндерге қарсы өткізіледі. Мәселен, «Үш бәйтерек», «Мұқағали – мұзбалақ ақын», «Абай оқулары» сияқты тақырыптары жер жарады. Қатысушылар міндетті түрде диплом алады. Ал жетекшілері 5 қатысушыдан жоғары қатыстыратын болса, «Үздік педагог», «Үздік тәрбиеші», «М.Жұмабаев – 130 жыл» төсбелгісімен марапатталады. Егер де қатысушының видеосы әлеуметтік желіде көп қаралым жинайтын болса, «Жас дарын» атағын алады. Сондай-ақ жоғарыда аталған орталықтың әлеуметтік желісіне 10 адам тіркетсеңіз, «Құрмет грамотасын» иеленіп шыға келесіз.Бір қызығы, күмәнді ақылы конкурстарға қатысу нәтижесінде алынған наградалар мен дипломдар педагогтерді аттестаттаудан өткізу кезінде ескерілмейтіні осы уақытқа дейін де айтылды. Тіпті 2019 жылдан бастап мұндай құжаттар автоматты түрде жетістіктер қатарынан алынып қалды. Себебі, лицензиясы бар ұйымдар берсе де, ол қағаздың заңды күші жоқ. Соның өзінде ұстаздардың ақылы дүниеге қызығушылығы жоғары.<blockquote>− ҚР Оқу-ағарту министрлігі тарапынан мұғалімдерді аттестациядан өткізу ережелері дайындалып жатыр. Әлі толық бекітілмеді. Дегенмен мұғалім марапаттың артынан жүгірмеуі керек, керісінше марапат мұғалімді іздеуі тиіс. Бізде өкінішке қарай көрсеткішке жетсін-жетпесін ондай дүниелер портфолиомызда толып тұрады. Ендігі жерде үздік нәтиже көрсеткен ұстаздарға ғана баға беретін боламыз. Ал жеке байқауларды жеке кәсіпкерлер ұйымдастырады. Оларға заңмен ешқандай тыйым салынбаған. Әрине, ол ата-ананың қалтасына ауыр тиюі мүмкін. Бірақ екінші жағын да ұмытпауымыз керек. Өйткені мұндай конкурстар баланың ашылуына, дамуына себеп болады. Қазіргі күні білім беру ұйымдарына түсіндірме жұмыстарын жасап жатырмыз. Жылтыр дүниеден мейлінше аулақ болуға, жалған атаққа әуес болмауға… Қайдан не алсаңыз да, ол жоғары көрсеткіш болмайды. Мұғалімнің басты көрсеткіші – шәкіртінің жетістігі, − деді облыстық білім басқармасының басшысы Асқарбек Есжанов.</blockquote>Осы ретте әңгімемізге тұздық ретінде мектеп директоры және мұғаліммен сөйлескен болатынбыз. Қ.Баймағанбетов атындағы №42 мектеп-лицей директоры Зейнұр Жаманқұлов заңда көрсетілген байқауларға қатысқаннан абзалы жоқ екенін тілге тиек етті.<blockquote>– Білім орталықтарынан қатынас қағазы келеді. Барлығына бірдей қатысуға міндетті емес. Біздің тараптан ешқандай мәжбүрлік жоқ. Мұғалімдердің де, оқушылардың да өз еркі. Жеке басым ақылы түрде болатын байқауларға қарсымын. Себебі, мұндай білім бәйгесінің қорытындысы бойынша бірнеше бірінші және &nbsp;екінші орындардың берілгенін көргенмін. Бұл дұрыс емес, бірі өзі еңбектеніп алса, енді бір оқушы ата-ана көмегімен жетеді. Соған сәйкес өзіме келген қоғамдық қорларды көбіне саралаймын. Қазіргі уақытта өзіңіз айтқандай, сертификат пен медальға бай орталық көп. Олардан алғанды өзіңіз бен сатқан адам ғана біледі. Егер өзгелер сенің еңбегіңнің еленгенін көрмесе, ұжымыңыз куә болмаса, оның қажеті қанша? Одан ұстаздың мәртебесі көтерілмейді. Ондай дүниеге маңдай теріңмен, қажырлы еңбегіңмен жету керек. Сондай-ақ ҚР &nbsp;«Білім туралы» Заңының №514 бұйрығында көрсетілген тізім бойынша байқауларға қатысқан дұрыс, − дейді ол.</blockquote>Ал қазақ тілі &nbsp;мен әдебиеті пәнінің мұғалімі (Аты-жөні және қай мектепте жұмыс істейтіні өз сұрауы бойынша жазылмады):<blockquote>– Түрлі бағыттағы байқау өте көп. Өздері қолдан медаль мен төсбелгі жасайды. Бұл да − табыс табудың бір көзі. Десе де кейбір ақылы байқаулар бар, білім бөлімімен арнайы меморандумға отырады. Одан алынған сертификаттар мұғалім категориясына &nbsp;пайдалы. Заңды толық білмейтіндіктен болар, көбіне ұстаздар төсбелгі дегенге қызығып қатысады. Айналып келгенде, ол байқаулардың еш &nbsp;салмағы болмайды, − деді.</blockquote>Түйін сөз. Иә, түрлі сертификат пен медаль бергіш мекемелер өздерінің алған қаржысын жарнапұлға жатқызады, яғни, мекеменің өзін-өзі қаржыландыруы деп түсіндіреді. Дегенмен, бұл көңілге қонымсыз. Өйткені қашықтан оқыту бойынша ұйымдастырылатын байқаулар 1000 теңгеден басталса, шығармашылық бағыттағы сайыстарға 1000-5000 теңге көлемінде ақы төлейсіз. Ал біліктілігін арттыруға қатысып, тиісті білімді игерген &nbsp;ұстаздар сертификатты 10000 теңгеге алады. Төсбелгі алғың келсе, 15000-70000 теңгедей қаржың болуы керек екен.Білім мен біліктілікті пұлдау арқылы өсіп келе жатқан жастардың санасына «білімді сатып алуға болады» деген қасаң пікір қалыптастыратынымыз сөзсіз. Бізді алаңдататын да осы мәселе. Сондықтан қу құлқынның қамы үшін бір күндік өмірді ойлайтын мұндай мекемелерге тоқтам жасайтын уақыт келген секілді. Сіз қалай ойлайсыз? &nbsp;Фото: Нұрболат Нұржаубай

Білім мен біліктілік қалай бағаланады?

Қайрат Нұртайұлы: Жас мамандардың жоғарылауын жолға қойдым

&nbsp; <a href="https://kyzylorda-news.kz/">Kyzylorda-news.kz</a>&nbsp; Биыл 11 сыныпты тәмәмдайтын Асылжан еліміздегі екі бірдей еңселі жоғарғы оқу орнының грантын жеңіп алған. Оның бірі – Қорқыт ата атындағы Қызылорда университетінің 50 пайыздық гранты болса, ал екіншісі – Астанадағы ІТ университетінің толық гранты.&nbsp; &nbsp; &nbsp;Мектеп табалдырығында оқып жүріп жоғарғы оқу орнының грантын жеңіп алу үшін оқушыдан жан-жақты дарын, талап, ізденіс, терең ой талап етіледі. Асылжан да сондай оқушылардың бірі де бірегейі. Ол жас та болса бірнеше жобада қатар жұмыс жасап, өз замандастарынан оза шауып келеді. Бұндай озат оқушылар университетті емес, керісінше, жоғарғы оқу орны осындай дарынды оқушыларды таңдайды. Бұл екінің біріне бұйыра бермейтін жетістік.&nbsp; &nbsp; &nbsp;Асылжан Абдуллаев кішкентай кезінен тіл үйренуге, жаңаша дүниелер ойлап табуға әуес. Білімін №210 Оспан Әбілпаттаев атындағы мектепте жетілдіріп жүрген ол – биылғы жас түлек. Асылжан мектеп бағдарламасымен ғана шектеліп қалмайды. Түрлі бағыттарда ізденіп, соның арқасында бүгінде талай шыңды бағындырып үлгерген. Нақтылап айтатын болсақ, Асылжан – «Kyzylorda Hub» алғашқы Қызылордалық бизнес инкубатор, Қызылорда өңірінің стартап жобалар мен инновациялық технологияларды дамытушы орталығының резиденті. Ол өзінің «Тарихнама» жобасымен көпшілік арасында өте жақсы танылып үлгерген.&nbsp; &nbsp; &nbsp;– Жобаның негізгі мақсаты – Сыр жастарына ғана емес, республика, әлем деңгейінде тарихты насихаттау. Жобада тек Қазақстан тарихы ғана емес, сонымен қоса әлем тарихы қамтылады. Себебі, аудиторияның сұранысына орай барлығын қамтуға тырыстық. Қазіргі таңда медиа саласы өте танымал. Адамдар кітап оқуға уақыт таппаса да, ұялы телефон арқылы ақпараттануға әуес. «Заманына қарай адамы» дегендей, «кітап оқылмайды» деп қарап отыруға болмайды. Заман адамы үшін не сұраныста, сол нәрсені жандандыру қажет. «Тарихнама» – медиа алаң. Біз жоба аясында әлеуметтік желілерде арнайы парақшалар жүргізіп, халық арасында тарихымызды насихаттаймыз, – дейді дарынды оқушы.&nbsp; &nbsp; &nbsp;Асылжанның жұмыстарымен танысу барысында біз де әлеуметтік парақшаларға тіркелдік. Шынында, жобаның тиімділігін аталған парақшаларға тіркелушілер санынан-ақ аңғаруға болады. Асылжанның айтуынша, ТікТок желісіндегі аккаунтқа бір жылдың ішінде екі жүз мыңға жуық тіркелуші тіркеліп, 50 миллионға жуық қаралым жиналған екен. Бір айта кетерлігі, жоба тек Қазақстанда емес, Орталық Азия, Еуропа, Батыс Еуропа мемлекеттерін қызықтырып, сұраныс артуда. Тіпті Түркия елінен бірлесіп жұмыс жасауға ұсыныс та түскен екен. «Алдағы уақытта халықаралық деңгейде бейнеконтент жасау ойда бар» дейді жас талапкер. Жобаның негізгі мақсаты – қысқа дерек пен фото, видео арқылы көп мағлұмат беру. Ал негізгі дереккөз – тарихи кітаптар мен еңбектер.&nbsp; &nbsp; &nbsp;Асылжанның бұл бір ғана қыры. «Жігітке жеті өнер де аз» дегенді талапты өренге қарап айтуымызға толық негіз бар. Мектеп өмірінен бөлек, қоғамдық іс-шаралар мен түрлі сайыстарда бақ сынап жүрген ол қай бағытта жұмыс жасаса да үлкен жетістікке жетіп келеді. Ол ең алдымен Асылжанның мұқияттылығы мен қай іске де үлкен ынтамен, жауапкершілікпен, тиянақтылықпен кірісетіндігінен. Асылжан Абдуллаев тарих пәнінен түрлі деңгейдегі ғылыми жобаларға қатысып, жүлделі орындарға ие болып келеді. Сонымен қоса «Қазақстан балалары – шексіз әлемде» балалар киносы бойынша республикалық фестивалінің облыстық кезең жеңімпазы. Осы ретте айта кету керек. Асылжан «Orda studio» студиясымен бірлесе жұмыс жасап, әлемдік деңгейдегі мультфильмдерді қазақшаға аударады.&nbsp; &nbsp; &nbsp;Тек мектептің ғана емес, аудан, облыстың мақтанышына айналып үлгерген дарынды оқушы инновациялық идеялар фестивалінің «Контент және медиа» секциясы бойынша жоба қорғап 300 000 теңге жеңіп алса, «Digital Almaty – 2023» халықаралық цифрлық форумында өзінің «Тарихнама» жобасын таныс­тырып, «Тик Токтың» Батыс Европа «Head of Global Business Solutions» директоры Анастасия Панинамен кездесу мәртебесіне ие болған. Сондай-ақ «Enactus Kazakhstan» студенттер мен оқушылар арасындағы халықаралық жарысында жүлделі II орынды жеңіп алғаны және бар. «ЖасStar» халықаралық фестиваліне қатысып, «Маралсай» демалыс орнына бес күндік демалысқа жолдама ұтып алған жан-жақты талапкер облыстық «Тәуелсіздік ұрпақтары» байқауында «Media» бағыты бойынша жеңімпаз атанып, үш жүз мың теңге сыйақы алған. Жас түлек «Іnnofest Qyzylorda» облыстық инновациялық жобалар фестивалінде де жүлделі орын мен қомақты қаржылай сыйақыға ие болған. Айта кетейік, Асылжан Абдуллаев аудан әкімінің «Өрлеу» жастар сыйлығының ІТ саласы бойынша жеңімпазы атанды. Бұл да бір үлкен жетістік.&nbsp; &nbsp; &nbsp; Жеті қырлы бір сырлы дарынды жаспен білім ордасы мен ата-анасы ғана емес, түгел аудан, тіпті облыс мақтанады. «Бүгінгі өскелең ұрпақ нағыз білімді, жан-жақты дамыған, бірнеше тілді меңгерген, өз елін сүйетін, ұлтжанды азамат болуы тиіс». Иә, солай болуы шартты да.

Жас түлек екі жоғарғы оқу орнының грантын жеңіп алды

<a href="https://kyzylorda-news.kz/">Kyzylorda-news.kz.</a> Денсаулық сақтау министрлігінде «Қазақстан халқына» қоғамдық қорының Басқарма төрағасы Болат Жәмішевпен және «University Medical Center» КҚ басқарма басшысы Юрий Пямен орфандық аурулары бар балаларға медициналық көмекті жетілдіру мәселелері бойынша кездесу өтті.Кеңестің шеңберінде сирек кездесетін аурулары бар балаларға медициналық көмек көрсетуді жақсартудың өзекті мәселелері талқыланды.Министрлік соңғы 3 жылдың ішінде денсаулық сақтау саласындағы «Қазақстан халқына» қоғамдық қорымен белсенді ынтымақтастықта болды және орфандық, онкологиялық, онкогематологиялық аурулары бар азаматтарды қымбат дәрілік заттармен қамтамасыз ету, онкологиялық қызметті, балалар нейрохирургиялық қызметін, трансплантаттауды, инфрақұрылымды және оңалту орталықтарын дамыту және т. б. бойынша 12 жоба мен бағдарламаны бірлесіп іске асыруда.Денсаулық сақтау министрі Ақмарал Әлназарова «Қазақстан халқына» қоғамдық қорының басшысына өмірлік маңызды жобаларды іске асыруға көмектескені үшін алғыс айтып, ынтымақтастықты одан әрі дамытудың негізгі бағыттарын белгіледі. Ол Педиатрия және балалар хирургиясы ғылыми орталығымен және «Ақсай» университеттік балалар клиникасымен бірлесіп, «University Medical Center»КҚ базасында орфандық аурулары бар балаларды емдеуге бірыңғай кешенді тәсілді қалыптастырудың маңыздылығын атап өтті.Кездесудің қорытындысы бойынша Қазақстанда қымбат тұратын медициналық қызметтер мен науқастардың осы санаты үшін дәрі-дәрмекпен қамтамасыз етудің қолжетімділігін арттыруға мүмкіндік беретін орфандық орталық құру туралы шешім қабылданды.Қызылорда облысы бойынша орфандық аурулары бар балалар саны алдыңғы жылдан 17 пайызға дейін салыстырмалы өсуі байқалады, бұл балалар санының артуына және диагностикалық мүмкіндіктердің жақсаруымен байланысты.Бүгінгі таңда, өңірімізде сирек кездесетін ауру түрлерімен 278 бала тіркелген. Орфандық аурулардың мәртебесі айқындалып, пациенттерді диагностикалық және дәрілік көмекпен қамтамасыз ету жолдары белгіленді.2022 жылы 16 орфандық аурулары бар науқастарды емдеу үшін жергілікті бюджет есебінен 317 987,0 мың теңгеге дәрі-дәрмек пен медициналық бұйымдармен қамтамасыз етілген. 2023 жылы нозология саны 18 ауруға артып, жергілікті бюджет есебінен 432 646,0 мың теңге қаржы бөлінді. Сонымен қатар, «Қазақстан халқына» қоғамдық қорымен Қызылорда облысы тұрғындарына жалпы сомасы 726,6 млн теңгеге 13 науқас дәрі-дәрмекпен қамтамасыз етілді.

Қазақстан және Қызылорда облысының жаңалықтары