<a href="https://kyzylorda-news.kz/">Kyzylorda-news.kz.</a> Елдік жолында ерлермен иық тіресіп, ел ертеңі үшін аянбай еңбек етіп жүрген әйелдер бар. Шаруа қожалығын, кәсіпорынды немесе үлкен ауылды басқаратын қыз-келіншектер қаншама?! Әйел табиғатынан нәзік болғанымен, мойнына артылған ауыр жүкті көтеріп, міндеттелген жұмысын бар ықыласымен атқаратын қуатқа ие. Олар отбасының берекесін келтіріп қана қоймай, ер азаматтармен бірге ілесіп, әр салада халыққа қызмет қылып жүр. Тіпті әйел әкім де бола алады. Ал әкімнің жұмысы ер адам, әйел адам деп бөлінбейді. Мойынға түсер салмақ бірдей. Осындай елдің сенімін арқалап жүрген жанның бірі – Нұржамал Тұрсынбаева. Ол 2020 жылдан бері Қармақшы ауданы, Ақжар ауылдық округінің әкімі қызметін атқарып келеді. Жуырда ауылға сапарлап барғанымызда әкіммен тілдесудің де сәті түскен еді.– Ауыл халқының жағдайы қалай? Қандай істер атқарылып жатыр? Ауылдың бүгінгі тыныс-тіршілігі туралы айтсаңыз..– Ауылға әкім болып келгеніме 3 жыл толды. Сол кезде "журналист әкім болды" деген ақпарат та тарап жатты ғой. Әкімдік қызметте білмеген тұстарым да болды. Оны жасырмаймын. Білмегеніңді мойындап, сұрау қажет. Әлгі білместікті бәлки мінездегі қасиетім басып түскен болар. Әкім болған кезде қаламен де, даламен де, ермен де, әйелмен де, тіпті баламен де тілдесе алу керексіз. Осы орайда мен халық алдында ашықпын. Қай кезде болмасын, қандай мәселе болмасын барлығын бірігіп, ақылдасып шешуге тырысамыз. Тіпті ауыл халқының ватсаптағы чатында бармын. Ауыл халқының жағдайына келсек, бүгінде Ақжар ауылдық округінде 386 отбасы, 1784 тұрғын тұрады. Зейнеткерлер саны – 199, оқушылар – 332, мектеп &nbsp;жасына дейінгі балалар – 213 құрайды. Мұндаа барлық әлеуметтік нысандар орналасқан. Сонымен бірге күріш егумен айналысатын «Ораз Ахун», «Ақжар», «Шәкизада» шаруашылықтары, мал шаруашылығымен айналысатын 15 шаруа қожалығы, 113 кәсіпкер ауыл тұрғындарының күнделікті тұрмыстық қажеттілігімен қамтамасыз етіп отырады. Биыл ауыл бойынша мал саны ірі қара – 2996 бас, қой-ешкі – 5805 бас, жылқы – 778 бас болып отыр. Жеке ауыл тұрғындарын бақша өнімдерімен қамту мақсатында 35 гектар жер жасақталып, 95 отбасы бақшалық салуда. Соңғы 2 жылдың көлемінде мал жайылымдықтарға су жіберу, көгалдандыру, аяқ су мәселесін шешімін тауып келеді. Шаруашылықтардың демеушілігімен 67 шақырым каналды ашу ұйымдастырылды. Нәтижесінде көп жылдан бері су бармай тұрған жайылымдықтар табаны суландырылып, өріс кеңейді. Ауылдың кіреберісіне «Жасыл желек» ашылып, тал-теректер көгеріп тұр. Осы жылы ауылдың дендрологиялық есебі жүргізіліп, ауыл аймағында 5962 түп ағаш пен жеміс ағаштары бар екендігі анықталды. Сондай-ақ «Алма бақ» бойынша 887 түп алма ағашы егілсе, биыл қосымша 587 түп басқа да жемістер отырғызылды.Ауылдың инфрастурктурасын жақсарту мақсатында, биыл Жамбыл Жабаев көшесі асфальттанатын болса, дәрігерлік амбулатория, балалар ойын алаңының құрылысы жүргізілмек. Бірнеше көшеге сметалық құжаттамалар әзірленуде. Қазіргі кезеңде сатып алу жұмыстары жүргізіліп, келісім-шартқа отыру шаралары жүргізілуде.– Сіздіңше қоғамдағы әйелдің рөлі қандай?– Қоғамдағы әйелдердің рөлі деген сауал өте ауқымды сұрақ. Оған бір-екі тұжырыммен жауап беру әсте қателік болар еді. Қоғам, ол – халықтың шоғыры, сол шоғырдан ер азамат бол, әйел азаматша бол, алатын орныңызды өзіңіз айқындауыңыз қажет. Қоршаған әлеммен араласқан соң, қоғамда да өз орныңызды сала білуге тиіссіз. Айналаңызға пайдаңыз тиіп, білім мен тәжірибеңізді қоғам үшін жұмсағаныңыз ләзім.&nbsp;– Ауылдағы кәсіпкерлік саланың жұмысы қандай деңгейде?– Сөз басында айтқанымдай, ауылды 100-дің үстінде кәсіпкерлікке тіркелген азаматтар бар. Бірақ сол азаматтың барлығының кәсібі дөңгеленіп тұр деуге келмейді. Дүкен ұстап, халыққа қатынас қызметін ұсынып отырғандар бар. Шаруашылық құрып, мал басын көбейтіп отырғандар да, егіспен айналысып жатқандар да жеткілікті. Ауыл кәсіпкерлігінің ақсап тұрған жері қайсы? Шығатын өнім және оны өткізу жолдары ақсап тұр. Себепті осы жерден іздеу керек. Ауылда мемлекеттік грант алғандардан құралған тігін цехы бар. Өнімдерін әлеуметтік желі арқылы сатуда. Үлкен еңбек жасап отыр. Бірақ бәселекелестік ортаға сіңісе алмайды. Себеп, әлі де болса маркетингтік дамымауы. Сосын тағы бір байқағаным, ауыл халқының өнеркәсіп пен өндіріс ашуға келгенде, тәуекелділігінің осалдығы мен сенімсіздігі, қаржының қол байлауы дер едім.«Ауыл аманаты» деген жақсы жоба қолға алынбақшы. Аты айтып тұрғандай, ауыл халқының тұрмысын сәл де болса, көтеру, кәсіпкерлікке жетелеу, отбасы табысын арттыру ниеті жатыр. Осы жоба бойынша 21 азамат құжат дайындап, 127,1 млн теңгенің қаражатын алсақ деп отырмыз. Бұл – үлкен көмек болар еді.&nbsp;– &nbsp;Мемлекеттік қызметтің әйел адам үшін ауыртпалығы бар ма?– Ешқандай ауыртпалығы бар деп есептемеймін. Ең бастысы қызметке адалдық пен жауапкершілік, сүйіспеншілік болуы тиіс. Әкім болу – қызмет емес, қызмет етуші. Сол себепті бұл қызметте ар алдындағы адалдықты биік қоямын.&nbsp;– &nbsp;Ауыл жастарын қолдауда қандай жұмыстар жүргізілуде?– Жақында ғана аудан әкімінің тікелей басшылығымен, &nbsp; жастардың ортасын дұрыс қалыптастыру мақсатында гранттар бөлінді. Бір қарағанда, бұл іс – әкімшіліктің кезекті бір жұмысындай көрінер. Бірақ мұның астарында үлкен тәрбие жатыр. Осы грант шеңберінде ауылымызға стол теннисін алдық. Жастар айналшықтап қалды, яғни бос уақытын тиімді өткізуде және бұқаралық спорттың бір түрі дамиды деген сөз. Бұл туралы неге басымдық беріп отырмын. Себебі, соңғы жылдары ауылда ат спортына мән бердік. Қазір тай ұстамайтын отбасы қалмады. Көкпарды қолға алғанбыз. Биыл мектеп жасындағы жасөспірімдер келіп, тай жарыстырғысы келетіндерін айтты. Сонымен демеушілердің көмегімен жүлде тағайындап, тай жарыс өткіздік. Қызығушылық деген осы. Ал одан әрі, кәсібилікке ұласады.– &nbsp;Алға қойған жоспар қандай?– &nbsp;Жоспар өте көп. Ауылымызда 20 көше бар, барлығы 16,7 шақырымды құрайды. 4 көше ғана асфальттанған. 8 көше тастақты, 8 көше алаңсыз топырақты. Осы көшелерге жөндеу жұмыстарын жүргізу керек. &nbsp;Өздеріңізге белгілі, ауылымыздан Әлем чемпиондары шығып тұр. Бірақ спорт мектебіміз жоқ. Сол мектепті салдыру арман, әрине жұмыс жасап жатырмын. Арман өте көп. Қалғанын уақыт еншісіне қалдырайық.– Қызметте әкімсіз, ал үйде анасыз. Отбасы, ошақ қасында қандайсыз? Бос уақытыңызды қалай өткізесіз? Ұрпақ тәрбиелеуде қандай қағиданы басшылыққа аласыз?– Әрине, анамын, әжемін. Ұрпақ тәрбиелеуде, ұлттық негізді басшылыққа аламын. «Адамның баласы емес, ұлттың баласы» болғанын қалаймын. Жалпы елімізде әйелдердің зейнет жасын қысқартуды көтеру мәселесі өте орынды. Неге дейсіз ғой. Себебі ұлтты тәрбилейтін ана, әже. Қазір 25-30 жастағы қыз-келіншектер баласының тәрбиесіне жөнді көңіл бөліп жүр деп айта алмаймын. Таңнан кешке дейін жұмыста, балаға бақылау жоқ. Ал зейнетке ерте шыққан әйелдер немере тәрбиесімен айналыса алады. Көпті көрген, түйгені мол, тәжіриесі де бар. Мұны тіпті арнайы заң шеңберінде міндеттеп қойған да артық болмайды деп ойлаймын. Әрі-беріден осң бұл тың бастама болар еді. Бос уақытымды табиғат аясында өткізгенді қалаймын. Жалғыз, себебі, сумен де, өсімдікпен де, тіпті топырақпен де сырласқанды жаным қалап тұрады. Олардың әсемдігіндей сұлулық еш жерде жоқ. &nbsp;Табиғатты суретке түсіріп алу &nbsp;хоббиім.&nbsp;– Сөз соңында ел-жұртқа айтар ақ тілек, ұсынысыңыз, арман-мақсат, ой-пікіріңіз, өкшеңізден ерген жастарға, кейінгі ұрпаққа жеткізер ұлағатты сөзіңіз болса, мархабат.– Еліміз аман, халқымыз бейбітшілікте болсын. Жастарға айтарым, өмір бір орында тұрмайды. Құм сағатты былай ауыстырсаң, арғы бетінде тұрған құмы, төмен түскенде бірінші боп ағады. Сондықтан да, өмір алмасып тұрады. Енді бір 30 жылда, ауыл дамиды, үлесіңді алып қал дер едім. Біз қаласақ та, қаламасақ та, демографиялық өсімнің нәтижесінде, келешекте ауыл дамып, ауылдан жер таба алмайтын деңгейге келеміз. Кеш болмай тұрғанда, ауылға келіп, отбасылық кәсіпке бет бұр дер едім.

«Ауыл аманаты» жобасына 21 ақжарлық өтініш берген

<a href="https://kyzylorda-news.kz/">Kyzylorda-news.kz.</a> Күн тәртібінде оқу жылының аяқталуына байланысты жазғы демалыстың ұйымдастырылуы және оқушылардың өмір қауіпсіздігі мәселесі мен ҰБТ-ге және «Алтын белгіге» үміткерлердің дайындық жұмыстарының жүргізілу барысы, сонымен қатар 2022 -2023 оқу жылын аяқтау, қорытынды аттестаттау, білім бөлімі жанында жұмыс жасайтын тамақтану сапасына бақылау жөніндегі ведомствоаралық сараптамалық топтың жұмысының қорытындысы, мектепке дейінгі білім беру ұйымдарында жүргізілген жұмыстар, білім беру ұйымдарының әлеуметтік желіге жарияланған жұмыстарына талдау жүргізілу барысы, сондай-ақ күн тәртібінен бөлек сын көтермей тұрған мектептер мен балабақшалардың санитарлық тазалықтарының жай-күйі баяндалды.&nbsp;Кезекті алқа отырысына білім бөлімінің қызметкерлерімен мектеп директорлары және мектепке дейінгі білім беру ұйымдарының басшылары қатысты. Білім бөлімі басшысы Гүлзира Абдазиева күн тәртібіндегі көтерілген мәселелерге арнайы тоқталып, мектеп басшыларына оқушылар үшін жазғы демалыстың дұрыс ұйымдастырылуын және олардың басты кезекте өмір қауіпсіздігіне мән беру керектігін қатаң тапсырды.Сонымен қатар ҰБТ және «Алтын белгі» үміткерлерінің дайындық жұмыстарының көрсеткіштеріне тоқталып, мектеп бітірушілер үшін болатын алдағы сын сағатына сәттілік тіледі.&nbsp;Сонымен қатар білім бөлімі жанында жұмыс жасайтын тамақтану сапасын бақылау жөніндегі ведомствоаралық сараптамалық топтың қорытындылары нәтижесінде анықталған кемшіліктерге арнайы тоқталып, аты аталған мектептер аясында бақылауды күшейту тапсырылды.Мәжілісте хабарланған әлеуметтік желілер барысындағы жұмыстармен білім беру ұйымдарының санитарлық тазалық жұмыстарына қатысты өзіндік талдау жасап, ұсыныс ретінде айтылған мәселелерге шешім шығару арқылы тиісті білім беру ұйымының басшылары мен жауапты мамандарына тапсырмаларын жүктеді.

Қармақшыда білім беру ұйымдарының алқа отырысы өтті

<a href="https://kyzylorda-news.kz/">Kyzylorda-news.kz.</a>&nbsp;31 мамыр – саяси қуғын-сүргін құрбандарын еске алу күні. Бүгінгі заманның ұрпақтары бұл күнді еске алу күні деп айта салғанымен, астарында терең мағына һәм ауыр қасірет жатыр. Бірақ осы бір күннің өзі қазақ халқының басынан өткен зобалаң шақты, нәубетті еске түсіреді. Әсіресе, жас ұрпақ 31 мамырда бір үзім нан мен бас бостандығының қаншалықты маңызды екеніне көз жеткізер, бәлкім.Иә, жаңа ғасыр адамдары адамзат тарихындағы ең ауыр кезең ашаршылықты көзбен көрмеді. Лайым көрмесін. Алайда қазақ халқына қасірет алып келген сол бір аумалы-төкпелі жылдарды естен шығаруға болмайды. Елі үшін жанын берген әрбір тұлғаның есімі тарих беттерінде алтын әріппен жазылатыны сөзсіз. Тарихи деректерге сүйенсек, 1927-1953 жылдары аралығында қазақ жерінде 125 мыңнан астам адам қуғын-сүргінге ұшырады. Оның 25 мыңы ату жазасына кесілді. Олардың ішінде Әлихан Бөкейханұлы, Ахмет Байтұрсынұлы, Мағжан Жұмабаев, Сәкен Сейфуллин, Міржақып Дулатұлы, Бейімбет Майлин сынды Алаш арыстары бар. Осыған орай еліміз Тәуелсіздік алғаннан кейін 1993 жылы 14 сәуірде «Жаппай саяси қуғын-сүргін құрбандарын ақтау туралы» ҚР Заңы қабылданды. Ал Нұрсұлтан Назарбаев 1997 жылды «Жалпыұлттық татулық пен саяси қуғын-сүргін құрбандарын еске алу жылы», сондай-ақ 31 мамыр – ¬Саяси қуғын-сүргін және ашаршылық құрбандарын еске алу күні деп жариялады.&nbsp;Қазақ даласының етегіне сор болып жабысқан ашаршылық, нәубет жылдардан қасірет көрген құрбандарды еске алу күніне орай 24 мамыр күні аудандық Жастар ресурстық орталығының ұйымдастыруымен №47 М.В.Ломоносов атындағы мектеп-лицейінің тарих пәнінің мұғалімі, ҚР білім беру ісінің «Құрметті қызметкері» төсбелгісінің иегері, шебер-педагог, Шиелі ауданы бойынша саяси қуғын-сүргін құрбандарын толық ақтау жөніндегі өңірлік комиссияның мүшесі Фатима Қасқабаеваның Шиелі индустриалды-аграрлық колледжінің білім алушыларымен кездесу өтті. Кездесуді кітапханашы Анар Әбдіжапбарова жүргізді.&nbsp;Кездесу барысында алғашқылардың бірі болып сөз алған Фарида Серікбайқызы студенттер мен қатысушыларға тарих бетінде ақтаңдақ болып қалған нәубетті жылдар туралы тың ақпарат берді. Қанқұйлы жылдардың оқиғасын, жазықсыз жазаланған адамдардың есімдерін, олар туралы ақпараттарды да жіпке тізгендей түсіндіріп, қатысушылардың жүрегін тебірентті. Арнайы баяндама дайындап келген &nbsp;Ф.Серікбайқызы жас ұрпаққа тоталитарлық режим, 1937-1938 репрессияға ұшырағандарға тағылған айып түрлері, оларға қолданылған жаза, басқа ұлт өкілдерінің Қазақстанға қоныс аударуы туралы слайд көрсетті. &nbsp;<blockquote>“Туған өлке тарихын насихаттау оқушылардың ой-өрісін, дүниетанымын кеңейтіп, өлкенің тарихын, мәдениетін тануға, білуге үйретеді және сол өлкенің тарихына куә болған қарияларда азайып бара жатқанын ескере отырып, ауылдық жерлердегі тарихи орындарға зерттеулер жүйелі түрде жүргізілсе, «Таштоп» тарихы өлкетану пәніне енгізілсе екен”, – деп ұсыныс тастады Фатима Қасқабаева. &nbsp;</blockquote>Сонымен қатар шара барысында ұйымдастырушылар дайындаған бейнематериал көрсетілді. Онда ашаршылық құрбандары мен нәубетті жылдарда жазықсыз атылып кеткен Алаш ¬арыстары және олардың әйелдері мен балалары қандай қорлық көргені айтылды. Бұдан бөлек атышулы Алжир лагері туралы да ақпарат берілді. Өткен ғасырдың қанқұйлы кезеңдерін бейнероликтен тамашалаған көрермендердің арасында көзіне жас алғандар да болды. Қуғын-сүргін құрбандары туралы толық мәлімет алған соң, сөз кезегі Жастар ресурстық орталығының кеңесші маманы Мейірлан Балабекұлына берілді. Ол бүгінгі шарадан тың ақпарат алғанын айта отырып, студенттерге алдағы өмірлеріне сәттілік тіледі. Ал Шиелі индустриалды-аграрлық колледжі директорының орынбасары Бақтияр Дайрақұлов баяндама жасаған Ф.Серікбайқызына алғыс айтып, ризашылығын білдірді.

Тарих ақиқаты мен ақтаңдағы

<a href="https://kyzylorda-news.kz/">Kyzylorda-news.kz.</a>&nbsp; Арал ауданының әкімі Серік Сермағамбетовтың сапары Жаңақұрылыс, Қаратерең ауылдық округтерінде жалғасты.Алдымен аудан басшысы Жаңақұрылыс елдімекеніндегі «Қуаныш» шаруа қожалығының егістік алқабына барды. Бүгінде 18 отбасы алғаш рет осы жерде бау-бақша, көкөніс өнімдерін орналастырып, егін шаруашылығына бет бұруда. Аудан әкімі диханшылардың мол өнім алуына сәттілік тіледі.Жаңақұрылыс ауылының жергілікті халықпен кездесуі елдімекен кіре-берісіне орнатылған жаңа аркада өтті. Аудан басшысы ауылға келер алдында жол құрылысының барысын бағамдап келе жатқанын айтып, өңірдегі жаңа бастамаларға тоқталды.<blockquote>«Ауылшаруашылығын дамытудың 2022-2024 Жол картасы аясында 2022 жылы 700-ден аса аумаққа егін егілсе, биыл 1500 гектарға жеткізсек, келесі жылға 3000 гектарды игеруді жоспарлап отырмыз. Бұның барлығы өткен жылғы жайылымдық, шабындық және суармалы егістік жерлерді суландыру бойынша атқарылған жұмыстардың нәтижесі. Теңізіміз толып жатыр. Былтыр "Көкарал бөгетін сақтап қалу және Сырдария өзенінің атырауын қалпына келтіру" жұмыстарына жалпы құны 4,5 млрд теңге көзделсе, 2022 жылы 500 млн.ға жуық қаржы қаралып, биыл тағы 1,4 млрд. теңге бөлінбек. Бүгінде теңізге 1 млрд. 300 текше метр су түсуде. Жол мәселесі де кезеңімен шешілуде. «Аманөткел - Жаңақұрылыс» жолының 18 шақырымына құм төселіп, астыңғы қабаты көтеріліп жатса, «Қаратерең – Жаңақұрылыс» бағытындағы жолдың 9,4 шақырымына асфальт жабындысы төселді. Қалған 14,48 шақырымын толықтай аяқтау үшін жұмыстар жүргізілуде. Бұдан бөлек, жақында ғана «Жаңақұрылыс-Бекарыстан би» жолының 14 шақырым бөлігінің құрылысын толық аяқтау үшін тиісті қаржысы бөлінді» - деп, биылғы жылға жоспарланған жаңалықтармен бөлісті.</blockquote>Ауылдықтар ауыл көркін кіргізген қақпаның салынғанына ризашылықтарын білдіріп, жол мәселесінің өз шешімін тауып жатқанына оң бағасын берді. Сондай-ақ, тұрғындар жер жырту үшін селолық тұтыну кооперативіне трактор қажеттігін айтып, аудан басшысы бұл үшін тиісті мүмкіндіктерді қарастыратындығын жеткізді.Қаратерең халқымен жүздесу «Қаратерең 2022» өндірістік кооперативіндегі 15 гектарды қамтитын егістік алқабының маңында болды. Аудан басшысы егінмен айналысып жатқан тұрғындарға сәттілік тілеп, жүзеге асырылып жатқан жұмыстарды баяндады.&nbsp;<blockquote>«Егін шаруашылығының дамуы үшін ауданымызда судың көлемі жақсы жіберілуде. Осындай уақытта былтыр 5 куб су түссе, қазір 16 текше метрге көбеюде. Жолдың құрылысына осы жылы 7 млрдқа жуық қаржы тарттық. Биыл басталған жолдардың барлығы аяқталатын болады. «Қаратерең - Бөген» жолы да биыл халық игіліге берілетін болады»- деді, Серік Сағитжанұлы.</blockquote>Мұнымен қоса, аудан басшысы Қаратерең елдімекенін тірек елдімекендер қатарына енгізу жұмыстары жүргізіліп жатқанын және келесі жылы елдімекендегі барлық электр бағаналарының толық өзгертілетіндігін атап өтті.<img src="https://knadmin.beoblood.kz/uploads/349769166_1623269138157907_493521207389379498_n_2963811f1e.jpg" alt="349769166_1623269138157907_493521207389379498_n.jpg">

Жол картасы: Арал ауданында биыл 1500 гектар жер игеріледі

<a href="https://kyzylorda-news.kz/">Kyzylorda-news.kz.</a> Тұрғындармен өткен кездесуде аудан әкімі Серік Сермағамбетов соңғы 4 ай көлемінде атқарылған жұмыстарды саралап, алдағы жоспарлармен бөлісті.Өз сөзінде аудан басшысы ең ауқымды жұмыстар жол саласында атқарылып жатқанын айтты. Бүгінде «Бөген-Ақлақ» бағытындағы қалған 3,6 шақырым жолының қаражаты бөлінгенін және аяқтау үшін мердігер мекемеге кем-кетік жерлерін қайта қазып, су жиналатын жерлердің астын көтеріп, жолды толықтай сапалы жасауды тапсырғанын жеткізді. Сондай-ақ, «Бөген - Аманөткел» бағытындағы жолға ағымдағы жөндеу жұмыстары бүгін басталғанын, келесі жылы аталған жолға күрделі жөндеу жүргізілетін атап өтті.&nbsp;<blockquote>«Биылғы жағымды жаңалық ауылдарыңызға салынатын дәрігерлік амбулаторияның қаржысы шешіліп, мердігері анықталуда. Жуық күндері құрылысы басталады» - деді. Бұған қоса, елдімекенде бүгінгі таңда ауылішілік көшелерге асфальт жабындысын төсеу жұмыстары жүргізілуде.</blockquote>Аудан басшысы судың жағасындағы жұмыстарға да тоқталып, биыл «Қарашалаң-1», «Қарашалаң-2» каналдарын қазу және Тұщы қөлі арқылы Сарытерең көліне су жіберу үшін 2 көзді тоспа салу жұмыстары басталатындығын жеткізді.Ауыл ақсақалдары барша игі істерге қолдау білдіріп, ақ батасын берді.Сапар соңында аудан әкімі «Бөген 2016» өнідірістік кооперативінің егістік алқабына барды. Тұрғындар бүгінде 30 гектардан астам аумаққа бау-бақша және көкөніс дақылдарын орналастырған. Өткен жылы бұл егістікті суару үшін аудан әкімдігі тарапынан су насосымен қамтамасыз етілді.

Арал: Бөген ауылында дәрігерлік амбулаторияның құрылысы басталады

<a href="https://kyzylorda-news.kz/">Kyzylorda-news.kz.</a> Бүгінде аудан орталығынан шалғайда орналасқан Бесарық ауылының даму қарқыны тұрақты. 70 жылдан &nbsp;аса тарихы бар ауылда 439 отбасында &nbsp;2367 &nbsp;адам тұрады. Негізінен, ауыл &nbsp; аудан орталығынан 87 шақырым, облыс орталығынан 25 шақырым қашықтықта орналасқан. Елді мекенде 2007 жылы салынған 360 орындық № 147 орта мектеп, 2007 жылы қайта жасақталып салынған 120 орындық «Бөбек» балабақшасы, 200 орындық Бесарық ауылдық мәдениет үйі, әкімшілік ғимараты, кітапхана, қазпошта бөлімшесі, вет.станция халыққа қызмет көрсетеді.&nbsp;Ауылдың әлеуметтік жағдайы тиісті деңгейде жүзеге асуда. Мәселен, жұмыспен қамту орталығы арқылы 27 адам жұмысқа орналасты. Оның ішінде 8 адам тұрақты жұмысқа орналасса, 12 адам қоғамдық жұмысқа, 7 адам жастар тәжірибесіне жолданды. Жұмыссыздық деңгейі осы кезеңде 4,9 пайызды құрады. Жалпы ауылдық округі бойынша жұмыссыздар саны 49, Мемлекет тарапынан ұсынылатын бағдарламаларға оның ішінде «Бизнестің Жол картасы &nbsp;– 2025, Жастар тәжірибесі, Мемлекеттік қайтарымсыз грант беру тетігі «Бастау Бизнес» жобасы бойынша оқу курстарына азаматтарды қатыстыру бойынша тиісті жұмыстар жасалынып, қазіргі таңда 32 адам оқуды аяқтады. Олар өз &nbsp;кәсіптерін ашып, жұмыс жасауда.Бесарық ауылы бойынша жұмыссыздық деңгейін төмендету бойынша ауыл тұрғындары елді-мекендегі мекемелерге жастар практикасы мен ақылы негіздегі қоғамдық жұмыстарға тартылуда. Өткен &nbsp;жылы 25 адам қоғамдық жұмыс, &nbsp;7 адам жастар тәжірибесіне жолданады деп жоспарланып, жұмыстар жүргізілуде. Жыл басынан бері тіркелген жұмыссыздардың 30 пайызы (12 адам қоғамдық жұмыстарға) жұмысқа жолданды. Бесарық ауылы бойынша жұмыссыздық деңгейін төмендету бойынша &nbsp;"Абай Даулет" ЖШС-і мен «Бесарық» шаруа қожалығына ұсыныстар жасалып, ауыл азаматтарын жұмысқа орналастыру жұмыстары жүргізілуде. Ауыл тұрғындары елді-мекендегі мекемелерге жастар практикасы мен ақылы негіздегі қоғамдық жұмыстарға тарту жұмыстары қарқынды жүргізілуде. Кәсіпкерлікті қолдау бағдарламалары негізінде қайтарымсыз гранттар мен несие алуға түсіндірме жұмыстары жүргізіліп, тұрғындарға жеке кәсіп аштыру жұмыстары атқарылып келеді. Елді мекеннің экономикалық мамандануының негізгі саласы – ауыл шаруашылығы болып табылады. Бесарық ауылдық округінде 45 шаруа қожалығы жұмыс жасайды.Округ бойынша 2837 ірі қара мал,1762 жылқы,408 түйе, 829 қой,878 ешкі және 377 құс тіркелген. Бір ветеринарлық пункт қызмет көрсетеді. Шаруа қожалығында 45 адам жұмыс жасайды. Ауылдық округ бойынша 7 шаруа қожалығы, және 33жеке кәсіпкер мал бордақылаумен айналысады. Олар өз малдарын жеке тұрғын үй қораларында бордақылауда. Мұнда жылына 370 басқа жуық мал бордақыланады. Осыған сәйкес, алдағы уақытта ет өндіруде жеке сектордағы және шаруа қожалықтарындағы мал басын есептегенде жоқ дегенде 74 тоннаға дейін ет өндіруге мүмкіндік бар.&nbsp;Ауылдық округтің жер қоры 422258 гектар болып табылады. &nbsp;Оның ішінде, жайылымдық – 295338 гектар, шабындық – 978 гектар, егістік жер –1183 гектар. Нәтижесінде, барлық отбасының 50,0 пайызы өз-өзін азық-түлікпен қамтамасыз етеді. &nbsp;Шын мәнінде, Бесарық ауылында &nbsp;кәсіпкерлік саласын өркедетуге ерекше көңіл бөлініп келеді. Жалпы, «Еңбек» нәтижелі жұмыспен қамту және жаппай кәсіпкерлікті дамыту бағдарламалары бойынша Бесарық ауылдық округі бойынша 10 азамат жылқы және сиыр малдарын көбейту және бордақылау үшін құжаттарын тапсырып және мақұлданды. Осы күні 75,1 млн теңге несие алып жұмыстарын жүргізіп отыр. Сонымен бірге «Өңірлік инвестициялық орталығы» МҚҰ арқылы &nbsp; берілетін несие бойынша &nbsp;Бесарық ауылдық округі бойынша жылқы және мүйізді ірі қара мал басын көбейту және бордақылау мен ауыл шаруашылығы техникасын сатып алу үшін &nbsp;11 жоба мақұлданып, 11 азамат 56 млн теңге несие алып жұмыстарын жүргізуде.Ал, «Еңбек» нәтижелі жұмыспен қамту және жаппай кәсіпкерлікті дамыту &nbsp;бағдарламасы бойынша грант беру тетігі бойынша әр саладан 32 азамат өз құжаттарын тапсырып, 39 млн 206 мың 400 теңге қаражат алған азаматтар кәсіптерін &nbsp;жүргізуде.Ауданымыздағы іргелі шаруашылықтардың бірі «Абай-Даулет» ЖШС-нің демеушілігімен елді мекенде. Мәселен, ауыл тұрғыны, жалғызбасты ана Үміт Көлдеева тұрғын үйінің апатты жағдайда болуына байланысты 4 бөлмелі жаңадан үй салып берді. Жалғыз басты ана Мейрамкүлдің Ешназарова үйі оқыс жағдайдан өртеніп кетті. Сол үйдің орнына қайтадан іргетасын құйып жаңадан үй салу үшін ауыл тұрғындары, «Абай-Дәулет» ЖШС мен жеке кәсіпкерлердің көмегімен жаңа үй салып берді. Елді мекендегі Тәуелсіздік көшесіне мәңгілік алаудан емханаға дейін А.Дүйсенбаев көшесі шаруашылықтың ғимаратынан мәңгілік алауға дейін және Тәуелсіздік көшесінің 270 метр жеріне &nbsp;жаяу жүргіншілер жолын салып берді. Ауыл халқының сұранысына байланысты «Мәңгілік алау» жанына Ауған, Тәжікістан соғысына, Чернобыль апатын жоюға және Семей полигонын жоюға қатысқан азаматтарға арнап монумент қойылды. &nbsp;Тұрмысы төмен отбасылар мен ауыл тұрғындарына 224 500 дана кесек пен 144 500 дана күйдірілген кірпіш көмекке берілді. Елді мекендегі 150 отбасына жылда 2 тоннадан көмір беріледі. Бұдан бөлек ауылдағы барлық әлеуметтік нысандар мен мемлекеттік мекемелерде өткізілетін мәдени іс шараларға және олардың абаттандырылуы мен көркейту көгалдандыру жұмыстарына және көмекке мұқтаж ауыл тұрғындарына да демеушілік жасап тұрады. Ауыл тұрғындарының есік алды жерлерінің аяқ су мәселесін шешу жұмыстарына байланысты Жаңадария каналына электр насос қойылып ауылға кіретін әр көшенің шығыс жағына бөлек-бөлек труба салынып ауыл ішіндегі көшелердің қарықтарын жаңадан қазып аяқ су мәселесін түпкілікті шешкен. Көлемі мен қаржысы. 600 метр үлкен арық және ауыл іші шамамен 2000 метр, 2 млн теңге қаражат жұмсалды. Елді мекеннің солтүстік бағытында ауыл іргесінен өтетін "Қосарық" каналының 6 шақырымы тазаланды. Батыс жағына аяқ су өздігінен келуге мүмкіндік жасалып, елді мекен 100 пайыз аяқ сумен қаматамсыз етілген. Елді мекендегі Тәуелсіздік көшесіне мәңгілік алаудан емханаға дейін &nbsp;А.Дүйсенбаев көшесі шаруашылықтың ғимаратынан мәңгілік алауға дейін және Өткен жылы &nbsp;Тәуелсіздік көшесінің 270 метр жеріне &nbsp;жаяу жүргіншілер жолын салу жұмыстары жүргізілді.&nbsp;

Бесарық ауылында кәсіпкерлік саласы даму үстінде

<a href="https://kyzylorda-news.kz/">Kyzylorda-news.kz.</a>&nbsp;Бірер күннен соң оқушылардың көптен күткен жазғы демалысы да басталмақ. Балалардың бір бөлігі үш ай уақытты қайда, қалай өткіземіз деп көңілді демалысын жоспарлап бастаса, өзгесі қазірдің өзінде жұмыс істеп ақша табудың қамына кіріскен.Елімізде 18 жасқа толмағандардың барлығы «бала» санатына кіреді. Заң бойынша ешбір баланы еріксіз жұмысқа тартуға болмайды. Тек бала 14-ке толғаннан кейін ғана заңға сәйкес, ата-аналарының рұқсатымен оқудан бос кезiнде денсаулығына және өсіп-жетiлуiне оңтайлы, баланың дене бiтiмiне, имандылығына және психикалық жай-күйiне зиян келтiрмейтiн қоғамдық пайдалы еңбекке қатысуға, сондай-ақ мамандық алуға құқығы бар. Бұл құқықты халықты еңбекпен қамту қызметi мен жергiлiктi мемлекеттiк басқару органдары қамтамасыз етедi. Ал баланың денсаулығына қауіп төндіруі, білім алуына кедергі келтіруі, ақыл-ойы, рухани, моральдық және әлеуметтік жағынан дамуына нұқсан келтіруі мүмкін кез келген жұмысқа тартуға тыйым салынады. Мұның барлығы заңнамамен реттелген.Баланың жұмыс сағаты қанша болуы керек?«Бала құқығы» туралы заңға сәйкес, кез келген 14 жасқа толған бала ата- анасының рұқсатымен, оқудан тыс уақытта денсаулығы жараса, қоғамдық пайдалы жұмыстармен айналысуына болады.&nbsp;Бірақ бұл үлкендер бала еңбегін өздеріне қажетінше пайдалануға болады деген сөз емес.Сонымен қатар кәмелетке толмаған жұмысшы балаларға жұмыс уақытының қысқартылған нұсқасы белгіленген. Мысалға айтар болсақ, 14-16 жасқа дейінгі балаларға аптасына – 24, күніне – 2,5, 16-18 жасқа дейінгілерге аптасына – 36, күніне – 3,5 сағаттан аспайтын уақыт арнайы бекітілген.Бірақ әдетте мейрамханада даяшы болатын, базарда жұмыс істейтін не жаз бойы егінге жалданатын балалар ресми түрде еш жерде тіркелмейді. Олардың қолдарында арнайы жұмыс беруші тарапымен жасалынған еңбек келісім-шарттары да жоқ. Сол себептен, балалар ауырып немесе еңбек жарақатын алған жағдайда олардың әлеуметтік жағынан қорғалуы екіталай.Кіммен, немен күресу керек?Қазіргідей бәсекелестік заманында кез келген мемлекеттің гүлденуі, ондағы адам ресурстарының сапасына тікелей тәуелді. Рас, баланы еңбеккорлыққа тәрбиелеудің де өз мәні зор. «Балаңды 7 жасқа дейін ханыңдай күт, 14 жасқа дейін құлыңдай жұмса, 14-тен ары қарай досыңдай сыйла» деген қазақта аталы мақал бар. Алайда ата-аналар асыра сілтеп, көбіне өз балаларын балалық шағынан аяусыз айырып жататын жағдайлар да кездеседі. Жас шыбыққа да су құйып баптамаса, жайқалып өспейді. Ендеше, балалар ересектер тарапынан күтім мен сүйіспеншілік күтетінін естен шығармаған жөн.Әрине отбасындағы қаржының жеткіліксіздігі, жоқшылық кейбір балалардың еңбекке ерте араласуына әсер етеді. Жазғы демалыстарын түрлі жұмыстар атқарып, ақша табуға арнайды. Тапқан қаражатын келесі оқу жылына қажетті құрал-жабдықтарына жұмсайды. Егер мемлекет тарапынан бала тәрбиелеп отырған ата-аналар үшін жеткілікті қолдау көрсетілсе, балалар қиын жұмыстарды істеуге мәжбүр болмас еді. Сондықтан баланың жаз бойы жалданып жұмыс істегеніне қарсылық танытпас бұрын алдымен осы мәселе төңірегінде ойланған жөн.Тәрбие негізі – еңбекте&nbsp;<blockquote>«Әрине, баланы еркінен тыс ауыр жұмысқа жеккендерді жазалау керек. Оған еш қарсылығым жоқ. Алайда ата-анасының рұқсатымен денсаулығына нұқсан келтірмейтін, оқуына бөгет болмайтын жұмыстардан баланы алшақтату орынсыз. Мектепте де «еңбек» сабағында балаларға түрлі шаруаға икемді болуды үйретеді ғой. Сондықтан, оқығанын, көргенін іс жүзінде жасап көргені дұрыс. Қазіргі уақытта баласын сабақтан қалдырып, жұмысқа жегіп қоятын ата-аналар мүлдем жоқ десек те болады. Барлық ата-ана баласының заман талабынан қалмай, білімді, сауатты болғанын қалайды. Сондықтан баласы үшін барлық жағдайды жасайды. Мектеп жасындағы балалардың жұмысқа араласуы жазғы демалыс уақытында көбейеді. Қолынан келген жұмысты істеп, бос уақытында жанұясына жәрдемдескенін қылмыс көруге болмас. Қандай жағдай болмасын, баланың еңбекке ерте араласқаны дұрыс деп санаймын», - дейді мұғалім Гүлзира Досанова.</blockquote><blockquote>«Менің үлкен балам биыл 10-сыныпты тәмамдайды. Отбасында жолдасым ғана жұмыс істейді. Төрт балам бар. Өзіміз пәтер жалдап тұрамыз. Сондықтан жолдасымның тапқан табысы айдан-айға әзер жетеді. Үлкен ұлым өткен жылы жазда жұмыс істеп, бізге көмектесті. Биыл да жазғы демалыс уақыты басталса, күндіз-түні жұмыс істемек. Түнде мейрамханаларда даяшы, күндіз көлік жуумен айналысамын дейді. Әрине, жұмысы қиын. Шаршайды. Бірақ, біздің басқа амалымыз жоқ. Алғашында баламыздың жұмыс істеуіне қарсы болғанымызбен, кейін өзге амалымыз қалмады. Күнделікті асымызды тауып келеді ғой. Жаңа оқу жылына да өзі дайындалады. Ал оқу жылы басталғанда күндізгі жұмысын тоқтатады. Біз де балаларымыздың өз қатарынан қалмай білім алғанын қалаймыз. Сондықтан, оны сабақтан қалдырмауға тырысамыз», - дейді ата-ана Баян Қалдыбекова.</blockquote><blockquote>«Менің жұмыс істеп жүргеніме екі аптадан асты. Сабақтан кейін көлік жуамын. Жазғы демалыста былтырдан бері жұмыс істеп жүрмін. Жұмысым қиын болса да, қызық. Достарыммен бірге барамыз, бірге қайтамыз. Сыныптастарым жұмыс істейміз деген соң, мен де ата-анамнан рұқсат сұрағам. Олар жұмыс істеуіме рұқсат бермейтін бұрын. Кейін келісті. Тапқан ақшамды өзіме жаратамын. Жұмыс берушілер бізге «біреу сұраса он алтыдамын» деп айтыңдар дейді. Бірақ, бізден ешкім жасымызды сұраған жоқ. Мұнда кезекпен келеміз жұмысқа. Үйде болғанда да, әке-шешеме үйдің жұмыстары үшін көмектесемін. Жас ұрпақ тәрбиесінде еңбекке баулудың маңызы жоғары. Қазақ ерте кезден-ақ баланы еңбексүйгіштікке, жалқаулықтан ада болуға үйреткен. Ұлы ойшыл әл-Фарабидің өзі «тәрбиенің негізі – еңбекте» дейді. Сондықтан баланың еңбектің тәтті дәмін сезініп өскенінің еш сөкеттегі жоқ. Бір ғана ескеру керек нәрсе – еңбекке баулыған осы екен деп, жасына сай келмейтін ауыр жұмысқа жегіп, үлкендер мойнына алу керек жүкті ерте бастан балаға артпау қажет», - дейді 14 жастағы Әділет.</blockquote>

Баланың еңбекке ерте араласқаны дұрыс па?

<a href="https://kyzylorda-news.kz/">Kyzylorda-news.kz.</a>&nbsp;Шиелі ауданына қарасты Жөлек ауылдық мәдениет үйінде аяулы ана, ардақты әже, жезтаңдай әнші, айтулы ақын, күйші Оразкүл Алтынбекованы еске алу шарасы өтті.Шараға ауыл тұрғындары, аудандық және ауылдық мәдениет үйінің қызметкерлері, облыстан арнайы келген өнер марқасқалары қатысты. Алдымен Оразкүл Шәкірбекқызының ғұмыр жолы мен жеткен жетістіктері «лэд» экраннан берілді.&nbsp;Содан соң Жөлек ауылының әкімі Мейірбек Мейрамбекұлы кейіпкеріміз жайлы естелік айтып, кештің шымылдығын түрді. Еске алу жиынын Шиелі ауданының «Құрметті азаматы», облыстың бас ақыны Кенжебай Жүсіп тізгіндеді.&nbsp;Оразкүл Шәкірбекқызының жүрекжарды жырларын мектеп оқушылары мәнерлеп оқып, көпшіліктің жанарына жас үйірді. Арал мен Қызылордадан ат терлетіп келген Серік Ыдырысов, Қазына Өзденбаева сынды қадірлі меймандар О.Алтынбекова жайлы ескірмес естеліктерімен бөлісті.&nbsp;Үзеңгілес досы, замандасы, Қармақшы ауданының «Құрметті азаматы», ақын, ұстаз Серік Ыдырысов Оразкүл Алтынбековаға арнаған жыр-шумақтарын оқыды. Көршілес жатқан Бәйгеқұм ауылының әжелері кешті әдемі әнмен әрлеп, Ортақшыл ауылдық клуб үйінің директоры Ғ.Нысанбаев жыр айтса, Бала би ауылдық мәдениет үйінің директоры, ақын Талғат Күзембаев өз арнауын арнады.&nbsp;Саналы ғұмырында ел есінде қаларлық тағылымды дүниелер жазып, игілікті іс тындырған Оразкүл апа туралы естеліктер легі таусылар емес, әрі ескірмейді де. Себебі ол елдің «жырын жырлаған» жан. Халықтың жүрегінің төрінен орын алған ғибратты ғұмыр иесі болды. Өресі биік ұрпағы, еңбегін бағалайтын халқы, ойлы оқырманы, «Ұстазым» деп ардақтайтын шәкірттері барда Оразкүл Алтынбекованың есімі мәңгі жасай бермек.

Шиелі: Ақынын ауылы еске алды

<a href="https://kyzylorda-news.kz/">Kyzylorda-news.kz.</a> Қызылорда облысы әкімдігінің қолдауымен, облыстық Қазақстан халқы ассамблеясының ұйымдастыруымен еліміздегі құндылығы жоғары, тарихи-мәдени мұралармен танысу мақсатында Қызылорда мен Түркістан облысының &nbsp;қалаларына саяхат жасалды.Топтың құрамында облыстық Қазақстан халқы ассамблея жанындағы “Ассамблея жастар” ұйымының жетекшісі Елизавета Есмаева, ұйым белсенділері, &nbsp;Волонтерлар орталығының үйлестірушісі Уалихан Жанбатыр, «Қоғамдық келісім» КММ бөлім басшысы Мұхтар Ибраев болды.&nbsp;<blockquote>«Өз еліңді таны» тарихи-танымдық экспедициясының мақсаты Түркістан және Қызылорда облысындағы тарихи-мәдени мұраларға саяхат жасау арқылы Сауран, Сығанақ сияқты орта ғасырлық қалалар, сондай-ақ Қожа Ахмет Яссауи археологиялық кесенелер тарихымен танысу. Қазақстан халқының рухани құндылықтарын насихаттау мен оқып-үйрену негізінде қазақстандықтардың бірегейлігін, ұлттық бірлігін нығайту. Алдағы уақытта өңір жастарына басқа да киелі жерлерді көрсетіп, сол арқылы бүкіл &nbsp;туған өлкенің тарихы мен мол құндылықтары туралы білімдерін арттыру, отансүйгіштік қасиеттерді күшейту болып табылады»,- деді «Ассамблея жастар» ұйымының жетекшісі Елизавета Есмаева.</blockquote>Экспедициясының &nbsp;алғашқы аялдамасы – Сыр өңіріндегі мәдени-тарихи ескерткіштердің бірегейі - Қыпшақ хандығының, Ақ Орданың, Әбілхайыр хандығының, кейін Қазақ хандығының астанасы болған, екі мың жылдық тарихы бар көне қала – Сығанақ болды. Сығанақ қаласының орны қазіргі "Сунақата" елді мекенінен солтүстік-батысқа қарай 2 шақырымдай жерде орналасқан бес бұрышты төбе, аумағы 20 гектардай жерді алып жатыр. Қала өмірі VІ ғасырдан ХVІІІ ғасырға дейін созылған. Моңғол шапқыншылығы кезінде қала толығымен қирап, тек ХІV ғасырдан бастап қайта қалпына келтіріліп, Сығанақ қаласы Ақ Орда мемлекетінің астанасы болды.Тарихи-танымдық экспедициясы Сауран қалашығында да болды. 13 ғасырдың орта шенінде Сауран Ақ Орданың астанасы болған. Бұл қаланы Әмір Темір әскери қамалға айналдырған. Қазіргі кезде Сауран қабырғалары мен мұналарының қалдықтары бар, ауданы 500-880 м дөңгелек алаң. Экспедиция мүшелері қаланың ішіне қақпа арқылы кіріп, қаланы қоршаған дуалдың сырт жағындағы көптеген каналдардың ізін көріп, жеті қатар қорғаныс қабырғалары іздерін тамашалады.Экспедиция өз жұмысын сәулеттің көрнекті ескерткіші, ортағасырлық сәулет өнерінің жарқын үлгісіне айналған Қожа Ахмет Яссауи кесенесіне барып жалғастырды. ЮНЕСКО дүниежүзілік мұра тізіміне қосылған Қазақстандағы бірінші құрылыс. &nbsp;Түркістан қаласында орналасқан. Кесене сопылықтың негізін қалаушы, ойшыл, ақын, уағызшы Қожа Ахмет Хазірет Сұлтан Яссауидің құрметіне тұрғызылған. Яссауи Арыстанбаб пен Юсуф Хамаданидан білім алады, сопылық негіздерін, араб және шағатай тілдерін, поэзия мен Шығыс әдебиетін оқыған. Өз ілімінде ол тақуашылық, төзімділік, мейірбандылық, әділдік пен адалдықты дәріптеді. Яссауи өлімінен 233 жыл өткеннен кейін Орта Азияның қуатты билеушісі Әмір Темірдің бұйрығымен жаңа кесене салынады. Қожа Ахмет Яссауи мешіті бүкіл дүние мұсылмандары үшін қасиетті орынға айналды. Мұнда жастар Қожа Ахмет Яссауидің тарихына байланысты естеліктер, құжаттарды, өмірі туралы сыр шертетін экспонаттарды тамашалады. Бар ынта-ықыластарымен тыңдап, мүмкіндігінше мол ақпарат алуға тырысты. Мұнан соң өңірлік жастар &nbsp;Түркістан облыстық &nbsp;ҚХА жанындағы ассамблея жастарының белсенділерімен кездесіп, түрлі бағыттағы маңызды мәселелерді талқылады. Өзара тәжірибе алмасып, алдағы жоспарларын айтып өтті.&nbsp;Экспедиция соңында саяхаттаушы құрам ұйымдастырушыларға өз алғыстарын жеткізе отырып, алған әсерлерімен бөлісті.<img src="https://knadmin.beoblood.kz/uploads/350338836_616580763835866_7055010948068984957_n_89e901a3d0.jpg" alt="350338836_616580763835866_7055010948068984957_n.jpg"><img src="https://knadmin.beoblood.kz/uploads/350454876_589250439972967_3415508880382588774_n_ee92e781dd.jpg" alt="350454876_589250439972967_3415508880382588774_n.jpg"><img src="https://knadmin.beoblood.kz/uploads/350524699_998282984696870_731346222689296382_n_4657518f33.jpg" alt="350524699_998282984696870_731346222689296382_n.jpg"><img src="https://knadmin.beoblood.kz/uploads/350500452_3059529141020359_6623816978305079088_n_a539c2ff71.jpg" alt="350500452_3059529141020359_6623816978305079088_n.jpg">

Қызылордада жастарға арналған «Өз еліңді таны» экспедициясы өтті

<a href="https://kyzylorda-news.kz/">Kyzylorda-news.kz.</a> Ұлттық статистика бюросы шипажайлардың санын жариялады, деп хабарлайды <a href="https://sputnik.kz/20230528/elde-qansha-shipazhay-bar-35367728.html">Sputnik Қазақстан</a>.2022 жылдың соңында ел аумағында 172 санаторлы-курорттық ұйым болған. Соның ішінде 109 санаторий, 27 оңалту орталығы, 9 профилакторий, 7 мамандандырылған және басқа да шипажай бар.Сауықтыру ұйымдарының басым бөлігі жеке бизнеске тиесілі – 127, мемлекетке – 42, шетелдік меншікте – 3.Шипажайлардың 66-сы қала аумағында орналасса, 106-сы ауылды жерде жұмыс істейді. Курорттық ұйымдардың саны бойынша Түркістан облысы көш бастап тұр. Онда 72 ұйым жұмыс істейді. Одан кейін Ақмола облысы (13), Алматы қаласы мен Қызылорда облысы (11) тұр.Былтыр шипажайларға 380 мың адам барды. Олардың басым бөлігі – әйелдер (60%).

Шипажай саны бойынша қай өңір көш бастап тұр?

<a href="https://kyzylorda-news.kz/">Kyzylorda-news.kz.</a> Қазақстан Республикасының Адам құқықтары жөніндегі уәкілдің Қызылорда облысы бойынша өкілі Үкіметтік емес ұйымдардың жетекшілерімен кездесті.Қызылорда облысының Үкіметтік емес ұйымдар ресурстық орталығы және «Асыл мұра – Орда» қоғамдық қорының бірлесе ұйымдастыруымен, Қазақстан Республикасының адам құқықтары жөніндегі уәкілдің Қызылорда облысы бойынша өкілі Шәріпбаев Дәурен Сақтапбергенұлының Үкіметтік емес ұйым өкілдерімен кездесуі ұйымдастырылып, азаматтық қоғам мүшелерінің бірқатар өзекті сауалдарына жауаптар берілді.&nbsp;Еркін ой-пікір форматында өткен бүгінгі кездесуде Дәурен Сақтапбергенұлы өзінің қызмет барысымен таныстырып, «ҚР Адам құқықтары жөніндегі уәкіл туралы" Конституциялық заңның негізгі ережелері мен өзінің функционалдық міндеттерін айтып өтті.&nbsp;Кездесу барысында «Тұрақты даму агенттігі» қоғамдық қорының төрайымы Майра Боранбаева, «Облыстық тұтынушылар құқығын қорғау қоғамы» қоғамдық бірлестігінің төрағасы Серік Теңізбаев сала басшысына өзін толғандырған сұрақтарын қойып, пікір алмасты.&nbsp;Дәурен Сақтапбергенұлы өз кезегінде, қызмет барысында кездескен заң бұзушылықтар, олардың салдарымен күрес мәселелерін көтеріп, ҮЕҰ өкілдерін бірлесе жұмыс жасауға шақырды.

ҚР Адам құқықтары жөніндегі уәкілдің Қызылорда облысы бойынша өкілі ҮЕҰ жетекшілерімен кездесті

<a href="https://kyzylorda-news.kz/">Kyzylorda-news.kz.</a> 29 мамырда қолайсыз ауа райына байланысты бірнеше өңірде ескерту жасады, деп хабарлайды Қазгидромет.Қызылорда облысының орталығында, шығысында шаңды дауыл болады. Жел солтүстік-шығыстан, шығыстан соғады, облыстың орталығында, шығысында күндіз күші 15-20 м/с-қа жетеді. Облыстың орталығында, шығысында төтенше өрт қаупі әлі де бар.&nbsp;

Қазақстан және Қызылорда облысының жаңалықтары