<a href="https://kyzylorda-news.kz/">Kyzylorda-news.kz</a> Қазір елдің барлық аумағында құрылыс қарқынды жүруде. Осы тұста, Шиелі ауданында құрылыс саласында жүйелі түрде атқарылған жұмыстарды саралап көрейік. 2022 жылы құрылыс саласының жалпы көлемі 7 млрд 691 млн теңге болса, 2023 жылы 53 млрд 187 млн теңге болып отыр. Яғни бұл көрсеткіш өткен жылмен салыстырғанда 6,9 есе өскен.&nbsp;Халықтың қажеттілігіне жарайтын нысандардың бой көтеріп, ел мүддесіне жұмыс істеп жатқандығы көңіл қуантады. Сәні мен салтанаты жарасқан құрылыс нысандары өңірдің де ажарын аша түсуде. Әріге бармай-ақ, кейінгі бірнеше жылға шегініс жасайық. Шиелі аудан орталығында бой көтерген әлеуметтік-тұрмыстық нысандарды қоспағанда, Көкшоқы мөлтек ауданында орналасқан көпқабатты тұрғын үйлердің өзі сала әлеуетінің артқанын айшықтап тұр. Оның үстіне денсаулық сақтау, білім беру нысандары салынып, ауданның дамуына оң өзгеріс алып келді. Ауыл-аймақты жалғайтын көпір құрылысы шалғайдағы елді мекен тұрғындарын қуанышқа бөлеп, ауылдардың қайта жаңарып, жандануына үлкен сеп болды.Өткен жылы Шиелі ауданы көлемінде 27 нысанға 2 млд 808 млн 576 мың теңге қаржы бөлініп, игерілуде. Бөлінген қаржының 2 млд 357 млн 914 мың теңгесі республикалық, 450 млн 662 мың теңгесі жергілікті және облыстық бюджеттен бөлінген. Қазіргі таңда республикалық бюджеттің 81,9 пайызы жергілікті бюджеттің 44,7 пайызы толықтай игерілген. Қазіргі уақытта кент және Ы.Жақаев, Бидайкөл, Байсын, Н.Бекежанов, Ақмая, Алғабас және Ш.Қодаманов сынды ауыл тұрғындары көмір тасып, пеш жағып, күл шығару секілді күйбең тұрмыстың күнделікті бейнетінен арылды. Ендігі кезекте Еңбекші, Жиделіарық елді мекендеріне газ жүйесін тарту үшін 442 млн 513 мың қаржы бөлініп, газ тарту жұмыстары толықтай аяқталған. Ал Телікөл, Алмалы, Ақтоған, Бестам ауылдық округтерінің жоба-сметалық құжаттары тиісті министрлікке жолданып, оң қорытынды жауап алынып, бүгінде газ тарту жұмыстары толықтай аяқталып келеді. Сонымен қатар Тартоғай елді мекенінің тұсынан Мұстафа Шоқай автоматтандырылған газ бөлу стансасы құрылысын жүргізуге республикалық бюджеттен 2,1 млрд теңге бөлініп, құрылыс жұмыстары жүріп жатыр. Иә, заман талабына сай халыққа қажеттісі көгілдір отын екені даусыз. Газдандыру жұмысы осы қарқынынан таймаса, алдағы 5 жылда Шиелі ауданы толық газбен қамтылады деген үміттеміз.Одан бөлек әлі ауыз су жетпеген Қосүйеңкі, Қызылқайың елді мекендеріне ауыз су тартылып, көптің көңілін күпті еткен мәселелер кезең-кезеңімен шешімін табуда. Қос ауылды ауыз сумен қамту үшін мемлекеттік сатып алу нәтижесінде «Дәнекер» ЖШС жеңімпаз атанды. Қос нысан ел игілігіне пайдалануға беруге дайын тұр.Сондай-ақ Шиелі кентіндегі электр желілерін ауыстыру үшін жоба-сметалық құжаттама әзірленіп, жоба құны – 808 млн теңгені құрап отыр. Шиелі кентінде тозығы жеткен қолданыстағы КТПГ-10/0,4 кВ – 10 дана және ВЛЗ-10 КВ ұзындығы – 16,05 шақырым, ВЛИ-0,4 кВ ұзындығы – 12,68 шақырым электр желілері жаңадан ауыстырылатын болады. Қазір электр желілерін реконструкциялау жобасы бойынша өтпелі нысан ретінде биыл ҚР Ұлттық қорынан бөлінетін нысаналы трансферт есебінен 100 млн теңге қаржы игеріліп, 6 учаскеге электр бағаналары орнатылып, 3,5 км СИП желісі жүргізілді. Бас мердігер компания «Энергомера» ЖШС-і.Осы мерзімге дейін бірқатар нысандар пайдалануға да берілді. Нақты айтқанда, Шиелі кентіндегі 18 пәтерлік 4 тұрғын үй құрылысы 2020 жылдың мамыр айында басталып, биыл тамыз айында құрылысы толықтай аяқталған. Бас мердігер компания «Жабдықтау» ЖШС-і. Бұл жоба бойынша әр тұрғын үйде 2 бөлмелі 12 пәтер, 3 бөлмелі 6 пәтер бар. Аталған тұрғын үй кезегінде тұрған жандарға берілген. Сонымен қатар «Ауыл – ел бесігі» мемлекеттік бағдарламасы аясында «Шиелі кентінде салынған дене шынықтыру-сауықтыру кешенінің құрылысы» бас мердігер компания «Промстройсервис.Е» ЖШС-і өткен жылы ҚР Ұлттық қорынан берілетін кепілдендірілген трансферт есебінен 497 млн теңге, облыстық бюджеттен 55,2 млн теңге қаржы игеріліп, құрылыс жұмыстарын толық аяқтап, дене шынықтыру-сауықтыру кешенін ел тұрғындарына пайдалануға берілді. Қазіргі таңда облыстық экономика және қаржы басқармасы арқылы облыстық мәдениет және спорт басқармасына теңгерімге тапсыру жұмыстары жүргізіліп жатыр.Шиелі аудандық құрылыс-сәулет бөлімінің басшысы Дана Смаханұлының айтуынша, ҚР индустрия және инфрақұрылымдық даму министрлігінің тапсырмасына сәйкес, 2025 жылға дейін елді мекендердің даму және құрылыс салу сызбаларын әзірлеудің жол картасы негізінде биыл Ақмая, Алғабас, Бәйтерек, Ы.Жақаев, Бәйгеқұм, Алмалы, Еңбекші ауылдарының даму сызбаларына түзету жұмыстарына аудандық экономика және қаржы бөлімі КММ мекемесі тарапынан 70 мың теңге бөлініп, мемлекеттік сатып алу конкурсы аяқталып, жеңімпаздары анықталды. Облыстық құрылыс, сәулет және қала құрылысы басқармасына 51 млн теңгеге бюджеттік өтінім тапсырылды. Шиелі кенті, Береке мөлтек ауданына тартылатын газ құбыры мен орамішілік газ тарату желілерін салу бойынша жоба-сметалық құжаты әзірленіп, ведомстводан тыс кешенді сараптаманың оң қорытындысын алғанға дейін сүйемелдеуді даярлауға аудандық бюджеттен 9,5 млн теңге бөлінді. Мемлекеттік сатып алу конкурсы нәтижесінде «MS Industrial» ЖШС-мен келісім шарт жасалып, жоба-сметалық құжаттары дайындалды, – деді.Шиелі ауданында атқарылған ауқымды тірліктің бір парасын баяндап өттік. Негізгі жұмыстың бірі – Шиелі ауданындағы кәріз жүйесі. Бұл бағытта жобалау-сметалық құжаттамасы әзірленіп, ведомстводан тыс кешенді сараптаманың оң қорытындысын алғанға дейін сүйемелдеуді әзірлеуге аудандық бюджеттен 15 млн теңге бөлінген. Мемлекеттік сатып алу конкурсы нәтижесінде «Батыс Гранд» ЖШС-мен келісім шарт жасалып, жоба-сметалық құжаттары дайындалып жатыр. Өткен жылы Шиелі ауданында 11 айлық қорытынды бойынша меншік иесінің салынған объектіні пайдалануға 354 дербес қабылдау актісі тіркелген. Пайдалануға берілген ғимараттардың жалпы ауданы 60 896 шаршы метрді құрап отыр. Осы атқарылған жүйелі жұмыстар бекітілген жоспарға сәйкес артығымен орындалған. Сонымен бірге облыс әкімі Нұрлыбек Нәлібаевтың тапсырмасына сәйкес Досбол би, Бала би, Бұланбай бауы ауылдарында жобалық құны 1 млрд 178,4 млн теңгені құрайтын 25 орындық 3 дәрігерлік амбулатория құрылысы жүргізіліп, ел игілігіне толықтай пайдалануға берілді. Сонымен қатар өткен жылы Байсын елді мекеніндегі 250 орындық мектеп ғимаратының құрылысы толықтай аяқталып, нысан ел игілігіне берілген болатын. Міне, көңіл қуантарлық толымды тірліктің бір парасын жазып өттік.&nbsp;

Шиелідегі құрылыста қарқын бар

&nbsp;<a href="https://kyzylorda-news.kz/">Kyzylorda-news.kz</a> &nbsp;Қаламыздағы «Сырдария» мөлтек ауданы №9 үйдің тұрғындары көпке үлгілі. Оған себепте жоқ емес. Негізі «Сырдариядағы» осы үйге барсаңыз, сіздің де сол үйдің тұрғыны атанғыңыз келетіні хақ. Сырты әппақ болып әктелген көпқабатты үй көптің көзіне бірден түседі. Ал подъездерінен бірінші подъездің тазалығы, ішінің сырланғаны тіпті ерекше.Кіргеннен бастап есік жанына үйге кірердегі, үйден шығардағы тұсқа дұға жазылған. Әр қабатқа ақырындап көтерілсеңіз, терезе алдындағы бөлме гүлдерін көре аласыз. Иә-иә, бұл подъездің тұрғындары бөлме гүлдерін үйлеріне емес, сыртқа сән беру үшін қойған. Ал қабырғасында әдемі картиналар ілулі тұр. Әдемілікпен үйлескен подъездің тазалығында мін жоқ. Осы подъездге қонаққа келген адамдардың барлығы қызыға қарап кетеді екен. Тіпті мұндай жанға жайлы үйді көргендер берекеге балап, «сататындар болса аламыз» дейтіндер қатары көп көрінеді. Расында, бұл үйге кірсеңіз шыққыңыз келмейді. Көршілердің татулығы Бұл бастаманы бастау, қолға алу, оны ұйымдастыру оңай шаруа емес. Осының бәрін айналасына түсіндіріп, тазалық мен әдемілікті, тәртіпті қалаған тұрғын – Сәнімжан Үмбеталива. Сексен жасқа келген ақжаулықты апамыздың еңбегі зор. Үш тілде еркін сөйлейтін, көпті көрген, жан-жақты белсенділігі бар апамызды іздеп бардық.<blockquote>– Бұл үйде алпыс отбасы тұрады. Кем дегенде үш жүз адам кіріп шығады. Жүз ойын баласы бар. Ал өзімнің тұрып жатқаныма 13 жыл болды. Осыншама уақыт ішінде үйге қарамасақ, ол азып-тозып кетеді емес пе... Негізі көршілеріме алғыс айтқым келеді. Үйдің сыртын әктету, өзіміз тұратын подъезд тазалығын ұқыпты ұстау тек менің ғана емес, бәріміздің міндетіміз. Осы міндетті түсініп, «жұмыла көтерген жүк жеңіл» дегендей, жан-жақтан көмектескен, қаржысы жағынан бірлесе ұйымдасып кіріскен көпшіліктің арқасы деп білемін. Осы кезде үй толық жөндеуден өтіп, жаңарып қалды. Үйдің кішкентай тұрғындарына дейін «таза ұстаңдар, қабырғаны сызбаңдар, қағаз тастамаңдар» деп жиі айтып отырамын. Балалар да сол тәртіпке үйренді, – деді Сәнімжан апа.</blockquote>Әңгіме арасында кейіпкерімізден байқағанымыз, тазалықты, тәртіпті жаны сүйеді.<blockquote>– Көпшілік болған соң бәрінің бірдей тәртіпке бағына беруі қиындау. Әр адам әртүрлі. Бірақ сабырмен түсіндіріп, жылы сөйлесе білсең, жақсы нәтижеге қол жеткізуге болады. Қазір көршілерім жақсы жандар, – деді ақжаулықты ана, әзиз әже.</blockquote>Тағы бір байқағанымыз, осы тоғызыншы үйдегі ерекшесі осы подъезд екен.– Үйді толықтай жөндеуден өткізген соң енді әркім өз подъезін таза ұстау керектігін айтқан болатынмын. Бірақ осы ұстанымды біз ғана ұстанып қалған секілдіміз. Шынымды айтсам, подъездің таза болғаны тек өзімізге ғана емес, сырттан келгендерге де қатты ұнайды. Бізді мақтап кетеді, – деп күлімдеп үн қатты Сәнімжан апамыз.Апамызбен әңгімелесіп тұрған сәтте көршілері де ол кісінің өте еңбекқор, белсенді жан екенін тілге тиек етті.– Біздің апамыз өте белсенді. Егер осы қабырғаны біреу сызып кетсе, бірден суретке түсіріп, көршілердің чатына жіберіп отырады. Бәрімізді қадағалап отыр. Жалпы көршілердің арасында осындай үлкеніміздің болғаны дұрыс, – деп күліп алды құдайы көршісі. Ойланып қарасақ, әлгі көршісінің айтқаны жөн-ақ. Расында, әр үйде Сәнімжан апамыздай айналасына ақылшы, жақсылыққа ұйыстырушы жан табылса, қаламыздағы барлық үйлер таза, ұқыпты болар еді. Иә, үлгі боларлық іс. Бұл – берекелі үй Көршілері осылай деді. Тіпті бір қызығы, осы тоғызыншы үйде бір пәтер сатылатын болса, бірден сатылып кетеді екен.<blockquote>– Өткенде бесінші қабаттан бір бөлмелі пәтер сатылып кетті. Сенесіздер ме, үш адам таласып қалды. Біздің үйде пәтер сату ешқандай қиын емес. Сатуға қойсақ болғаны, сатып алушылар көптеп келеді. «Осы берекелі үйден алғымыз келеді, көршілері де жақсы, үй де таза» деп сырттай қызығып жұргендер көп-ақ, – деп тұрғындар үйлерін мақтан тұтты.</blockquote>Бізде жыл сайын қала күні аталып өтеді. Сол мереке күндері «Үздік аула» байқауы жарияланып, соңында үздіктер марапатталып жүр. Шаһарды жасыл-желекке айналдыру бағытындағы жұмыстарға өз үлестерін аянбай қосып келе жатқан қала тұрғындарын ынталандыруды мақсат еткен бұл байқау 2018 жылдан бастап ұйымдастырылып келеді. Ал олардың қатарында «Үздік подъезд» деген байқау жоқ екенін білдік. Енді кім біледі? Бәлкім, осыдан кейін үздіктердің қатарына Сәнімжан апамыз бастаған көршілер, бірінші подъезд тұрғындары кіріп қалар... Себебі көпшілікке нағыз үлгі боларлықтай берекелі үй екенін байқадық. Лайым, қалада осындай жанашыр, тазалықты, әдемілікті қалайтын тұрғындар көбейе берсе екен дейміз.

Қызылордада бір үй бар әсемдікке үндейтін 

<a href="https://kyzylorda-news.kz/">Kyzylorda-news.kz</a> Түнеукүні «Amanat» партиясы Шиелі аудандық филиалының мәжіліс залында аудан әкімдігі жанындағы Қазақстан халқы Ассамблеясы Ақсақалдар кеңесінің кезекті I отырысы өтті. Жиында күн тәртібіндегі мәселе бойынша интернет алаяқтықтың алдын алу, болдырмау шараларына қатысты баяндама жасалып, ұсыныс-пікірлер айтылды. Жиынды кеңес төрағасы Исабек Сәрсенбайұлы жүргізді.Қазіргі уақытта интернет пен цифрлы технологиялардың кеңінен таралуы жаһандану құрылымын ғана емес, қылмыс түрінің жаңа бір сипатын көрсетті. Рас, бәріміздің өмірімізде цифрлы технология маңызды рөл атқарып тұр. Әлеуметтік желі арқылы ақпарат алмасып, тіпті сауда-саттық жасап, онлайн тапсырыс беруге көштік. Полиция мен банк қызметкерлерінің айтқан ескертулеріне қарамастан, кейбір адамдар адал ақшасынан күн сайын айырылып қалып жүр. Әлеуметтік желілер мен бұқаралық ақпарат құралдары арқылы жүргізіліп жатқан профилактикалық іс-шараларға қарамай, есепті кезеңде алаяқтық қылмыстар саны артып отыр. Осы тақырып бойынша баяндама жасаған Шиелі ауданының полиция бөлімі бастығының орынбасары, полиция подполковнигі Талғат Жүсупов қазіргі уақытта Қызылорда облысының Полиция департаментінде киберқылмыстармен ауқымды күресетін «Киберпол» бөлімі ашылып, бірлесіп жұмыстар жүргізіп отырғанын жеткізді.&nbsp;<blockquote>– Ақпараттық технологиялар мен интернет мүмкіндіктерін мықты меңгерген алаяқтардың құрығы ұзарып, күн сайын мың құбылған алдап-арбау тәсілдеріне тыйым болмауда. Бұндай қылмыстарға жол бермеу, алдын алу жұмыстары елімізде ғана емес, бүгінде бүкіл әлем елдерінің өзекті мәселелерінің біріне айналып отыр. Интернеталаяқтардың айырмашылығы – оларды анықтап, жауапкершілікке тартудың әлдеқайда қиындығында, себебі олардың кім екені, қайда екені белгісіз, ал шетелде жұмыс істейтін қылмыскерлерді табу тіпті қиын. Өткен жылы алаяқтық қылмыстардың 38 дерегі тіркеліп, олардың 18-і интернет алаяқтық санатындағы қылмыс екені анықталды, – дейді Талғат Алпамышұлы.&nbsp;</blockquote>Интернет-алаяқтар адамдарды алдау үшін «Instagram», «Facebook», «Telegram», «Вконтакте» «TikTok» әлеуметтік желілері, «OLX.kz», «MARKET.KZ», «KOLESA.KZ», «KRISHA.KZ» сайттарын және «WhatsApp» мессенджерлерінде жалған интернет-дүкендер, «фейк» парақшалар мен сайттар ашып, түрлі тәсілдермен адамдарды алдап, сенімдеріне кіріп, алаяқтық жолмен қаражаттарын жымқырады екен. Өзін банк қызметкері ретінде таныстырып, есепшоттағы ақшаңызға шабуыл жасап, несие рәсімдеп жатқанын айтады. Сізді есепшоттағы қаржыны резерв шотқа салуға сендіріп, әртүрлі халықаралық банк карталарына аудару арқылы иемденіп алуда.Сонымен қатар сала маманы аудан көлемінде алаяқтық қылмыстарға қарсы іс-қимыл шараларының тиімділігін арттыру мақсатында «Хай-Теч» және «Антифраут» жедел профилактикалық іс-шаралары өткізіліп, нәтижесінде 38 алаяқтықтың 27 дерегі ашылып, қылмысты жасаған 7 тұлға қамауға алынып, қазіргі уақытта түзеу мекемесінде жазасын өтеп жатқанын тілге тиек етті.&nbsp;Кеңес отырысында аудандық криминалдық полиция бөлімшесінің бастығы Б.Мамбеталиев аталған алаяқтық қылмыстардың алдын алу жолын айтып, сақтық шаралары ретінде жеке куәлік деректерін, төлем карточкаларының мәліметтерін, құпия сөздерді және sмs кодтарды ешкімге хабарламауға, белгісіз әрі тексерілмеген сайттар мен күмәнді сілтемелер арқылы төлем жүргізбеуге, ұялы телефон мен компьютерге белгісіз қосымшаларды жүктеп орнатпауға шақырды.&nbsp;Жиын соңында Ақсақалдар кеңесінің төрағасы Исабек Сәрсенбайұлы қорытынды сөз сөйлеп, кеңес отырысына қатысқан ардагерлер мен сала мамандарын және БАҚ өкілдерін осы қылмыстық істің алдын алу үшін бірігіп жұмыстар атқаруға шақырды.Фото: Нұрболат Нұржаубай

Шиелі: Алаяқтық қылмыстың 38 дерегі тіркелген

<a href="https://kyzylorda-news.kz/">Kyzylorda-news.kz</a> Өнер адам, қызмет таңдамайды. Өнерге білектің күші де қажет емес. Тек оны жан тәнімен ұғыну, сезіну керек. Өнердің әлеміне ене алу керек. Құдай жаратқан пендесін өнерден алыс етпесе, ол өрге жүзеді. Бойында таланты бар жан қандай қызметте жүрсе де өнері оны алға жетелейді. Ән шырқау маған ұнайды. Әншілік табиғаттың адамның бойына дарытқан ерекше бір сыйы деп білемін.Иә, «полицей мен әншінің не қатысы бар?» деп ойлаған шығарсыздар. Өнер адам таңдамайтыны рас екен, бұған &nbsp;аудандық полиция бөлімінің қызметкері, полиция майоры Жасұлан Әбдуайтовтың шығармашылығымен танысқанда көз жеткіздік. Антқа адал Жасұлан Сәрсенбайұлы бүгінде жауапкершілігі мол қызметі мен бойына дарыған өнерін абыроймен арқалап жүр. Иығына погон таққан офицер қызметтің ауырлығына қарамастан қазақтың қара домбырасынан, өнерінен алыстаған емес.&nbsp;Жақында талантты әнші Жандос Қаржаубай жалағаштықтарға «Көзмоншағым» атты ән кешін берген болатын. Сол кеште кейіпкеріміз сахнаға көтеріліп, дүйім жұртқа өз репертуарынан керемет ән шырқап, көрерменнің құрметіне бөленді. Міне, «бұл полицей жігіттің әншілік өнері де бар екен ғой» деген халықтың таңқаларлық сөзі осы мақаламызға арқау болып отыр.Басынан бастайық... Полиция қалайша әнші болды? Полиция майоры Жасұлан Әбдуайтов – Жалағаш ауданының тумасы. Өнерді ғұрыптаған қарапайым отбасында өскен. Өзінің айтуынша, бұл талант әкесінен де, нағашы жұртынан да дарыған. Нағашылары аймаққа белгілі жырау, ақын, термеші болыпты. Ол кісілердің музыкалық сауаты болмаса да, естіген әуенін домбыра немесе түрлі аспаптарға салып ойнай алады екен. Осылайша полицейдің өнерге құштарлығы бала кезден өнерлі ортада қалыптасса керек.Жәкең әншіліктен бөлек, ән жазады, яғни композиторлық таланты бар. Бүгінде оның репертуары бірнеше туындымен толыққан. Нақтырақ айтсам, «Жалағашым», «Рахмет саған, дәрігер», «Қазақ жігіті», «Тыныштық сақшысы», «Мама», «Мен сені сүйемін өмір», «Әкешім», «Алыстағы махаббат» секілді бас-аяғы 13 туындысы бар. Бұйыртса, аудан жұртына арнап кең көлемде ән кешін ұйымдастыру да ойында. «Әрине кештің билеті тегін» деп бір күліп алды кейіпкеріміз.&nbsp;Оның ең алғашқы орындаған туындысы «Жалағашым» әні екен, әдеттегі бір концерттік шарада жүрген Жәкеңнің өнеріне тамсанған композитор Сақыпжан Аймаханқызы «Жалағашым» әнін сыйға тартыпты. Бұл туындыны киелі Жалағаш топырағында өскен азамат орындаса дегені болса керек. Сондай-ақ жақында жарық көрген туындысы «Нәзеркем» атты әні бүгінде әнсүйер қауымның жүрегінен орын тауып үлгерген. Бір қызығы, бұл әннің сөзін де Жәкең өзі жазған.– Иә, өнер мен үшін бала қиялыммен ұштасқан жеке хоббиім десем болады. Өнерді жаным сүйеді. «Жігітке жеті өнер де аз» демекші, спортпен де кәсіби шұғылданамын. Күрестен спорт шеберімін. Азды-көпті жетістігім де бар. Жалпы бүгінгі қызметім құқық қорғау саласына үлкен қызығушылықпен келдім. Қызметтегі міндетімді адал атқарудамын. Бұл салада қызмет еткеніме 12 жылдан асты. Әр мамандықтың өзіне тән ерекшелігі мен қиындығы болады. Мен өз ісімді жақсы көремін, сондықтан маған өнерде де, құқық қорғау саласында да қызмет атқарған қиын емес. Жан дүнием, ойым, болмысым шығармашылыққа жақын болғандықтан болар, адаммен тіл табысуға бейіммін, – дейді өнерлі полицей.«Нағыз қазақ – қазақ емес,&nbsp;Нағыз қазақ домбыра» деп Қадыр Мырза-Әлі жырлағандай, кейіпкеріміз ұлттық аспабымыз домбыраны жетік меңгерген. Одан басқа гитара аспабын өз бетінше үйренген.&nbsp;Жәкең балалық, студенттік кезден бастап әртүрлі деңгейдегі байқауларда бой көрсеткен. Бірқатар үлкен конкурстан жүлделі орын да бұйырған. Сөзіме дәлел, қызметте жүріп, сала мамандары арасында өтетін республикалық «Парасатты полицей» атты өнер байқауына қатысып, жүлделі 3 орынды еншілеген. Сондай-ақ қызметтен тыс ауданның басқа да мәдени-танымдық іс-шараларына тұрақты қатысып тұрады.Кейіпкеріміз өнердегі жоспарымен де бөлісті. Іштегі өнердің сәулесін тұншықтырмайтын секілді. Бүгінде жаңа туындының жарық көруіне жұмыс жасап жатыр. Өзінің айтуынша, ән патриоттық тұрғыда, жастарды рухтандыратын, салмағы басым керемет дүние болмақ. Жәкең сахна төрінде жүрген басқа да эстрада жұлдыздарымен шығармашылық байланыста, бойындағы өнерін дамытуда солармен ақылдасып, тәжірибе алмасып отырады.&nbsp;– Мен жайлы Жалағаш жұрты қандай ойда екенін білмеймін. Бірақ жақындарым, ұжымым маған әрдайым қолдау көрсетуге дайын. Концерттік іс-шараларда көрсеткен өнеріме қызығатындардың қатары аз емес. Кісі бойында білім мен біліктілік, өнерге деген құштарлық қатар жүрсе, қызметтің жанға қуаныш сыйлайтыны, еңбектің еленетіні де сөзсіз, – дейді ол.

Жалағаштық полицей композитор болып танылды

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы бойынша қылмыстық-атқару жүйесі департаментінің №60 мекемесі мен 5547 ҰҰ әскери бөлімінің кинолог бақылаушылары бірігіп, 5547 әскери ротасында оқу-жаттығу өткізді.Оқу-жаттығуда қызметтік иттердің тарихы, түрлері және үйрету тәсілдері түсіндіріліп, жаттығу жұмыстары жүргізілді. Жаттығуға қатысушылардың бірі №60 мекеменің кинолог бақылаушысы Рахат Маратұлы бұл салаға келгеніне жыл толмады. Оқуын аяқтай сала, кинолог маман ретінде қызметке қабылданып, Мартин есімді серігімен бірге түрлі оқу-жаттығуға қатысып келеді.<blockquote>Оқу-жаттығу кезінде қызметтік иттерді тыйым салынған аймақтағы негізгі жолақтарда із іздеу, сотталғандардың қашу кезіндегі жасырынған орындарын анықтау, мекемеге кірген және шыққан автокөліктерден тыйым салынған заттарды анықтау бойынша, сонымен қатар, қашуға әрекеттенген жағдайда сотталғанды ұстау және күзету кезіндегі іс-әрекеттерге шолу жасалды. Бұл әрекет ауызша түсіндіріліп, іс жүзінде әр маманнан қайталап көрсету талап етілді. Қазір 7 жастағы Мартин есімді көмекшіммен бірге жоспарға сай жаттығу алаңындамыз. Ерекше қасиетке ие көмекшім екеуміз аз уақытта тіл табысып, тыйым салынған заттардың мекеменің ішкі аумағына енуінің алдын аламыз. Бұл салада олармен жұмыс істеу қиын. Күшік кезінде мінезін әбден зерттеу қажет. Тінтуші жануарды осы мамандыққа үйрету – жас баланы тәрбиелеумен бірдей. Оны да алдайсың, еркелетесің, тіпті ұрысып та аласың. Оларды күтіп, баптау біздің міндетіміз. Қызметке қырағылық осындай жаттығу кезінде байқалып, шыңдала түсеміз. Алдағы уақытта 5547 ҰҰ кинолог бақылаушыларымен бірігіп, мардымды іс тындырарымыз анық, - деді кинолог бақылаушы Рахат Маратұлы.</blockquote>&nbsp;Бөлім қызметкерлері осы иттердің көмегімен тоқсан сайын бір рет тінту жұмыстарын жүргізеді.

Қызметтік иттер оқу-жаттығудан өтті

<a href="https://kyzylorda-news.kz/">Kyzylorda-news.kz.</a> Әр баланың дені сау болып дүниеге келуіне ата-ана тікелей жауапты. Дені сау бала дені сау анадан туылады. Қазіргі таңда баланың мерзімінен бұрын дүниеге келуі, бір жасқа дейінгі балалар да бұлшық ет тонусының бұзылуы, мойынның қисық бітуі, дисплазия, гипоксия сынды сырқаттар белең алуда. Бұларды емдеу тәсілдерінің бірі – массаж.Бүгінде бір жасқа дейінгі сәбилердің басым көпшілігіне дәрігерлер массаж алу керектігін айтады. Себебі массаж – баланың бұлшық еттерін қатайтып, қан айналымын қалыпқа келтіріп, түрлі аурудың алдын алуға көмектеседі. Сондай-ақ моториканы дамытып, жүйке жүйесіне жақсы әсер қалдырып, оның дұрыс дамуына да мүмкіндік береді. Баламен жұмыс жасауды ұнататын Ж.Қыстаубаева бұл мамандыққа медицина саласында оқып жүрген сәттен бері қызыққан. Бір жағынан өз баласы дисплазия диагнозымен ауырып, сол диагнозды толық әрі терең білу үшін осы саланы үйренемін деп шешім қабылдаған.&nbsp;– Бұл салада 6 жылдан бері қызмет етіп келемін. Арнайы білікті мамандардан балалар массажына арналған курс оқып, аудандық жедел жәрдем бөлімінде фельдшер болып қызмет ете жүріп, балаларға массаж жасай бастадым. Қазіргі таңда тек массажбен ғана айналысамын. Себебі маған тұрақты келушілер қатары көп. Аналар маған гипоксия, жауырын жабысу, майтабан, дисплазия, қисық мойын, кіндік грижасы бойынша балаларына массаж алуға келеді. Дисплазия – жамбас сүйек ұршығының дұрыс дамымай қалуы. Ал оны емдеу шарасына массаж және физиотерапия (парафин, электрофарез) емдік жаттығуы жатады. Гипоксия ауруы балаға оттегі жетіспеушілік салдарынан болады. Егер емханада дәрігер массаж тағайындаса, оны міндетті түрде балаға жасау керек. Аналардың басым бөлігі массажға атүсті қарайды. Өз денсаулығымен қатар баласының саулығына да бейжай қарайтын аналарды көріп жүрмін. Ананың дені сау болса, бала да сау. Жас аналар жүктілікті жоспарлап, қаназдық ауруының алдын алса, бала да ешқандай ауру болмайды. Дисплазияны дер кезінде емдемесе, соңы баланың өмір бойы зардап шегуіне әкеліп соғады. Сондықтан уақытылы дәрігерлердің қабылдауына барған жөн. Алғаш ана атанғандар баланың басын оң мен солға ауыстырып отыру керектігіне де көп мән бермейді, – дейді кейіпкеріміз.&nbsp;Үйінің бір бөлмесін массаж жасау орталығы етіп құрал-жабдықпен жасақтап қойған маманның жұмысы тығыз. Ол жазда күніне 20-ға жуық балаға ем-дом жүргізсе, қыс мезгілінде 10-12 баланың денсаулығы үшін арнайы бекітілген уақытпен массаж жасайды. Жадыраға келетін ем алушылардың ең кішкентайы 10-15 күндік нәресте болса, үлкені 8 жасар. Ауа райының салқын болуына байланысты ол қазіргі таңда балаларға үйлеріне барып массаж жасайды. Ал кей аналар уақыт тапшылығына байланысты маманның түскі үзілісін де тиімді пайдалануға тырысады. Жадыра Алдабергенқызымен тілдесуге барғанымызда оның жұмыс үстінен дөп түстік. Сол сәтте Ханкелді есімді кішкентай батырға ем жүргізіп жатыр екен. Анасының айтуынша, баласына босанғанына 40 күн толғаннан бері Жадырадан ем алуға бел буған.– Баламның шымыр әрі дені сау болуы үшін Жадырадан массаж алудамыз. Балам қырқынан шыққанша өте мазасыз, жылауық болды. Бірде Жадыра туралы көршілерімнен естіп, баламды алып келдім. Содан бері тұрақты ем алушымыз. Массаждың арқасында балам өз қатарластарынан ерте еңбектеп, тіпті ерте тәй-тәй басты десем де болады. Кейде салқын тиіп, жөтеліп тұрған кезде қақырық түсіру үшін арнайы &nbsp;Жадыраға келіп дренажды массаж аламыз, – дейді жас ана Зәуре Тұрсынбаева.&nbsp;– &nbsp;Негізі массажды дені сау балаға, оны шынықтырып, ерте дамыту, нық әрі тез жүріп кету мақсатында жасайды. Алайда біз бала жаны ауырып, дәрігерлер қандай да бір диагноз қойғанда ғана қажетті маманның көмегіне жүгінеміз. Өткенде бір жас келіншек хабарласты. Айтуынша, ішінде 6 айлық баласы бар. Ол кісі маған босанбай тұрып баласының денесі шымыр болуы үшін жазылып қойғысы келетінін жеткізді. Қазіргі қоғамда «ауырып ем іздегенше, ауырмайтын жол ізде» деген қағиданы ұстанатын осы келіншек секілді аналардың көптеп болғаны жөн. Себебі әдетте аналар баласының диагнозы бойынша қолында рентген суреті мен дәрігер нұсқамасы арқылы хабарласып, ем алуға жазылады. Арнайы тағайындалған емдік шара уақытылы жүргізіледі. Уақыты 1 немесе 3 курс болуы баланың денсаулығына байланысты. Осынша уақытта толыққанды жазылады деген арнайы қағида жоқ,– дейді білікті маман. &nbsp;Жадыра Алдабергенқызы алдағы уақытта кәсібінің көкжиегін кеңейтіп, арнайы орталық ашуды көздеп отыр. Айтуынша, ауданда гидромассаж дамымаған.– Жалпы бұл емдік шараның баланың жақсы жетілуіне септігі мол. Ол адам денесіне су ағынымен массаж жасау арқылы жасалатын емдік шара десе де болады. Гидромассаж су ағындары балалардың денесіне жұмсақ әрі денелерін мойыннан өкшесіне дейін уқалайды. Гидрованна қабылдағанда баланың бұлшық еті жақсарады. Осының әсерінен бұлшық ет тонусы қалыпқа келеді. Сондықтан гидромассаж гипоксия, гипотонус ауруларын емдеуге және гипертонустың алдын алуда ең тиімді шешім. Одан кейін массаж жасағанда бала тыныш әрі жақсы ұйықтайды. Иммунитеті көтеріліп, мазасыздығы кетеді. Балалардың дені сау болуы үшін осы массажды қолға алып, дамыту жоспарда бар, – дейді ол.&nbsp;Бала денсаулығы үшін білімін жетілдіріп, түрлі диагнозбен ауыратын балалардың сап-сау жүгіріп кетуіне септігін тигізіп жүрген маманды аудан тұрғындары «емші» деп атап кеткен.&nbsp;– Әр күнде әртүрлі жағдайлар орын алып жатады. Бірде дисплазияның күрделі түрімен ауыратын баланың үйіне барғанымда алдымнан үлкен апа шығып «қош келдің, емші қызым» деді. Өзімді «емші» деп атаған апаға қарап, біраз таңырқап қалдым. Сөйтсем әлгі апа «Бірнеше баланың өшкен үмітін қайта жағып, қатарластарымен теңдей шауып, жүгіріп кетуіне көп көмегің тиіп жатыр. Сенің арқаңда шөберем ауруынан айығып, алғашқы қадамын басуда, өмір жасың ұзақ болсын» деп тілегін жаудырды. Ата-аналардың алғысы жұмысымның алға жылжуына сеп болып, еңбегімнің нәтижесін растай түседі, – дейді білікті маман.&nbsp;&nbsp;

Жалағаштық Жадыра – бала саулығының сақшысы

<a href="https://kyzylorda-news.kz/">Kyzylorda-news.kz</a> Данышпан халқымыздың «өткен күнде белгі жоқ» деп айтқан өсиетті сөзіне жас шағымызда мән бермеуші едік. Өмір өте көңілді жастық, дастарқандас, дәм-тұздас болған, теңдессіз татулық, ауызбіршілік пен адамгершілік, қимастық сәттерді аңсайсың, сағынасың. Өмірден өтсе де көңілден кетпейтін кейбір асыл азаматтарды әлі де арамызда жүргендей сезінесің. Асқар таудай ағалар уақыт өте сыйластықтың арқасында бір туған бауырдай болып кетеді екен. Халық даналығында «мың досың көптік етпейді, бір дұшпаның аздық етпейді» деген сөз бар. Ағалы-інілі болудың жолы да көп, түрі де көп. Сыйластық – адамзатқа ортақ баға жетпес байлық. Алдында арқа сүйер ағасы бар адам – тынымсыз тіршілікте бақытты, басына бақ қонған, баянды өмір сүрудің шарттары мен қағидаларына сәйкес келетін азамат.&nbsp;Қасиетті де киелі Сыр бойында адал ісімен ел есінде мәңгі сақталатын жақсылар мен жайсаңдар, асылдар мен ардақтылар, арыстар мен алыптар, кемеңгер қаһармандар, баршылық. Солардың бірі – Сақы Қалыбаев ағамыз. Сәкең саналы ғұмырын елге қызмет етуге арнады. Жарықтық, көбіне асып-таспайтын, асылық әңгіме айтпайтын, қандай жағдай болса да ешкімнің сыртынан әңгіме айтпайтын, ешкімге ретсіз, жөнсіз әңгіме айтқызбайтын. Қазақы түрде бағаласақ, «бар болса, тасымаған, жоқ болса, жасымаған» ерекше қасиетке ие болған азамат.&nbsp;Сәкеңді аудан дәрігерлерінің атасы деуге болады. Аудандық аурухананың бас дәрігері болып қырық жылдай еңбек етіп, қайраткерлік дәрежеге дейін жеткен. Абырой-атақтың ешқайсысынан кенде емес. Еткен еңбегі ерекше бағаланып, көптеген орден, медальмен, құрметті атақтармен марапатталды. Бірнеше рет Қазақстан компартиясы аудандық комитетінің пленум, бюро мүшесі, аудандық кеңес атқару комитетінің мүшесі, аудандық, поселкелік кеңестердің депутаты болып сайланды.&nbsp;Ол қандай ортада болсын өзін ерекше мәдениетті ұстайтын. Өте қарапайым, не айтса да тауып айтатын. Барынша кішіпейіл, дауыс көтеріп, дөрекі сөйлемейтін, сыпайы, салмақты, сындарлы, салиқалы, мәнді әңгіме айтып отыратын. Түрлі мақсаттарға арнап жайылатын дастарқан мен жиын-кеңестер Сәкеңсіз басталмайтын. Қорытынды сөзді өзі айтатын. Дастарқан басында бейсауат, келеңсіз, ретсіз, жөнсіз әңгіме айтылып жатса, көзінің қиығымен-ақ сабасына түсіретін. Көпшілік бас қосқан алқалы жиында ешкімді алаламай, ағалық ақылын айтып, артық әңгіме айтуды онша жақтыра бермейтін. Ананың ақ сүтімен келген ізгі қасиеттерінің арқасында адами, азаматтық қасиеттері де жоғары болды.&nbsp;Бас дәрігер ретінде дәрігерлермен, қызметкерлермен қарым-қатынас жасау, түсінісу, сыйласу, ауыз жетер, аяқ жетер жердегі ағайынның, жора-жолдастың қайғырғанында, қуанғанында қасынан дер кезінде табылу, тарыдай куанышын таудай етуге, түйедей қайғысын түймедей етуге өзінің күш-жігерін, ынта-ықыласын аямады. Ақыл сұрағанға сая болды, көмек сұрағанға пана болды, бата сұрағанға дана болды. Тіршілікте біздің Сәкең төңірегіндегілерге қателеспеген, қателестірмеген, барынша қанағатшыл, ынсапшыл, қамқоршы ағаларымыздың бірі болды. Ол – тіршілікте, қызметте, өмірде жолы болған, еңбегі жанған, бақ қарап, қыдыр дарыған, туған халқынан, елден, жұрттан, ағайыннан, достарынан, қызметтестерінен, мемлекеттен кезінде тиісті бағасын алған бақытты азамат.&nbsp;Сәкең туралы айтқанда, құдай қосқан қосағы, әулеттің берекесі мен беделін асқақтатқан отанасы, шаңырақтың шаттығы болған Зағира Сейтенқызының өлшеусіз еңбегін айтпасқа тағы болмайды. Зағира жеңгеміз текті әулеттің қызы ретінде Сақы ағамыздың табалдырығын аттағаннан бастап ырыс-несібе молая түсті. Өмірге ұл-қыз келді, сөйтіп Қалыбаевтар өмірінде бұрын-соңды болмаған мамыражай өмір басталды.&nbsp;Сәкең «Мына Зағира жеңгелеріңмен алпыс жылдың үстінде тату-тәтті өмір сүрдік, біздің жолымызды берсін, көрген жақсылығымызды жұғысты етсін» деп, батасын беріп отырушы еді, жарықтық. Зейнеткерлікке шыққан соң аудан өміріндегі берекелі тірлікке етене араласты. Елдегі шешімін таппаған кейбір мәселелерді тиісті жеріне жеткізіп, жоғары жақтан басшылар келсе, өтініш ретінде айтып отыратын. Әсіресе аудандық аурухананың жағдайы қатты мазалайтын. Сәкеңнің отбасы, ұрпақтары шүкір, «Әке көрген оқ жонар, шеше көрген тон пішер» дегендей, әке аманаты орындалып, өнегелі өмір сүруде. Біз де, соңынан ерген інілері, туған-туыс бауырлары «тәуба» дейміз, қуанамыз, қолдаймыз, марқаямыз. Бір шаңырақ астында Зағира әжесінің бауырында кенжесі Төлеген мен келіні Алма, немересі Меруерт, Дәулет пен Нұрайлым, шөберелері Данияр, Көркем, Айзия, Алдияр төрт ұрпақ өкілі жадырап-жайнап, тату-тәтті өмір сүріп келеді. Бұл да Қалыбаевтар әулетінің ерекшелігі, береке-бірлігі, татымды тірлігі, шаңырақтың абыройы шығар.&nbsp;Сақы ағамыз аудан тарихында медицина саласында өзіндік із қалдырып, оның дамуына сүбелі үлес қосқан, шебер ұйымдастырушысы, елдің жанашыры болды. Атасының жолын қуған немерелері Дәурен Сәкенұлы Алматыдағы С.Асфендияров атындағы медицина университетінде, немере қыздары Аружан Ақтөбе медицина университетінде, Меруерті Оңтүстік медицина академиясында оқып жатыр. Әрбір ата-ана «ұрпағым әке жолын куса екен, әкеден артық туса екен» деп тілейді. Сәкең мен Зағира жеңгеміздің ақ тілегі кабыл болғандай.&nbsp;Сала ардагері өмірден өткенмен ұрпақтары атасының сара жолын жалғастыруда. Қалайша риза болмайсың, тіл-көзіміз тасқа. «Жаксы әке балаға 40 жыл азық, жаман әке 40 жыл қазық болады» деген дана халқымыз. Ұрпақтарына өнегелі өмірімен 40 жыл азық болса, қадір-қасиетін білетін туған-туыс, бауырларына, жора-жолдастарына да бағалы азамат болды. Атам қазақ «жүгіріп шығар төбе көп, асу бермес шың қиын, қартайған шал елде көп, ақсақал болу тым қиын» деп бекер айтпаған. Сәкең көргені, көңілге түйгені, білгені көп, аудан тарихында өзіндік орны бар, сүйекті сөз айта алатын салмағы бар, өз орнын білетін абыз ақсақалымыз еді. Ағамыз еліміздің бірлігіне, тәуелсіздігіміздің тұғырлы да берік болуына рухани дем беріп, батасын беріп кетті деп есептейміз.

Сақы Қалыбаев – Жалағаш ауданы дәрігерлерінің атасы іспетті

<a href="https://kyzylorda-news.kz/">Kyzylorda-news.kz</a>&nbsp; Сырдария аудандық ауруханасының&nbsp;мамандары 1 ай көлемінде дүниежүзілік туберкулезге қарсы күніне орай жүзеге асқан айлыққа өз үлестерін қоса білді.&nbsp;Күн сайын әрбір елді мекенде медицина мамандары арнайы акция, семинар өткізіп,&nbsp; дерттің алдын алу жолдарын қарастырды. Өз кезегінде бүгін Шіркейлі ауылында «Біз туберкулезді жеңе аламыз!» атты ұранымен Сырдария аудандық санитариялық-эпидемиологиялық бақылау басқармасымен бірлесіп, ауқымды акция ұйымдастырылды.&nbsp;Акцияның шымылдығын ашу үшін сөз алған Сырдария аудандық санитариялық-эпидемиологиялық бақылау басқармасының басшысы Самалбек Өмірбаев жыл бойы және айлық барасында атқарылған жұмыстарға тоқталды. Сонымен қатар Сырдария аудандық ауруханасының фтизиатр-дәрігерлері Ләззат Ибраймова, Анар Ибраймова және Шіркейлі дәрігерлік амбулатория дәрігері Бақыткүл Қайбылда туберкулез дертіне байланысты маңызды ақпараттармен бөлісті.&nbsp;<blockquote>– Негізінен, туберкулез дертімен күреске арналған іс-шаралар аясында жүйелі жұмыстар жүргізілді. Мектеп оқушылары арасында шығармалашылық байқаулар өткізіліп, жеңімпаздар анықталды. Ал сала мамандарының біліктілігін арттыру мақсатында арнайы оқытулар жүргізілді. Медицина мамандары әрбір елді мекенде болып, аталған дертке қатысты мониторингтік талдау жасалды. Науқастармен кездесіп, ем алу шараларын қатаң бақылауға алды. Аудан тұрғындарына арнайы үнпарақтар таратылып, туберкулезге қарсы тұрудың негізгі амалдары түсіндірілді. Айта кетейік, тұрмысы төмен отбасыларға арнайы азық түлік себеті табысталды, – деді фтизиатр-дәрігер&nbsp; Ләззат Ибраймова.</blockquote>Аудандық акция барасында ауыл өнерпаздары өнер көрсетті. Шығармашылық байқаулардың жеңімпаздары анықталып, бағалы сыйлықтар табысталды.

Шіркейліде ауқымды акция өтті

<a href="https://kyzylorda-news.kz/">Kyzylorda-news.kz</a>&nbsp; &nbsp;Бүгін наурызнаманың «18 наурыз – ұлттық киім күні» мерекесі аясында аудандық &nbsp;аурухана ұжымы &nbsp;«Наурыз – берекем, наурыз – мерекем» тақырыбында &nbsp;мерекелік іс-шара ұйымдастырды. Аталған іс-шара Сырдария аудандық ауруханасының бас дәрігері Жалғасбек Үсенов, салалық орынбасарлар, дәрігерлер, медицина мамандары қатысты.Аудандық емхананың авто тұрағына үлкен киіз үй тігіліп, мерекелік іс-шарасы жарасым тапты. Өз кезегінде Сырдария аудандық ауруханасының бас дәрігері Жалғасбек Үсенов жиналған жұртшылықты мерекемен құттықтады.– Бүгін Ұлыстың ұлы күнін шад-шадыман көңіл-күйде тойлаған барша аудан жұртшылығын мерекемен шын жүректен құттықтаймын! Адам жанының арашасы бола білген медицина мамандары &nbsp;жаңару мен жаңғырудың мерекесін ерекше атап өтуде. «18 наурыз – ұлттық киім күні» мерекесі ел көлемінде ауқымды түрде аталып өтілуде. Біздің мамандарымыз қазақы әдет-ғұрыпты берік сақтап, ұлттық киімдерді киіп, дәстүр сабақтастығын жаңғыртуда. Барша сала мамандары мен ардагерлердің отбасына береке-бірлік, зор табыс, ынтымақ тілеймін, – деді бас дәрігер.Іс-шара барасында талай жыл медицина саласында өзіндік қолтаңбаларын қалдырған сала ардагерлері Сейітхан Дәужанов,&nbsp;Рүстем Садықұлы, &nbsp;Шынтай Зетов, &nbsp;Абдулла Арғынбаев көпшілікке ақжарама тілегін жеткізді. Мереке қарсаңында ардагерлерге «Сырдария аудандық ауруханасының ардагері» куәлігі табысталды.– Аудан медицинасы қашанда алдыңғы қатарда тұруы – білікті мамандардың еңбегінің жемісі деп білемін. &nbsp;Көгінен нұр төгілген, жеріне гүл егілген елімізде&nbsp;Ұлыстың ұлы күні – Наурыз мерекесі ерекше форматта тойланып жатқанына бек қуаныштымыз. Сала мамандары қашанда халық денсаулығын жақсарту үшін аянбай еңбек етуде. Барша ізімізден ерген жастарды, білікті де білгір дәрігерлерді, аудан тұрғындарын мерекемен құттықтаймын, – деді сала ардагері Сейітхан Дәужанов.Аудандық мәдениет үйінің өнерпаздары &nbsp;әннен шашу шашып, &nbsp;көпшілікке көтеріңкі көңіл-күй сыйлады. Бұл ретте &nbsp;сала мамандары арасында &nbsp;сәнді, жарасымды ұлттық киіммен келген жандар марапат төрінен көрінді. Ал аудандық спорт клубының мамандарының ұйымдастыруымен &nbsp;қол күрес, арқан тартыс, кір тасын көтеруден жарыс өткізілді. Барлық жеңімпаздар мен жүлдегерлерге Сырдария аудандық ауруханасының кәсіподақ ұйымының бағалы сыйлықтары тапсырылды.

Медицина мамандары жаңару мен жаңғыру күнің атап өтті 

&nbsp;<a href="https://kyzylorda-news.kz/">Kyzylorda-news.kz</a>&nbsp; Ауыл – біз үшін алтын бесік! Қаншама жыл, қаншама ғасыр өтсе де, бұл қағида ешқашан өзгермейді. Халқымыз үшін ұлттық құндылықтардың алтын тамыры іспетті болған ауыл береке мен байлықтың, ырыстың да бастауы еді. Сондықтан ауылды көркейту, ауыл кәсіпкерлігін дамыту мәселесі сөз болғанда елең ете түспейтін адам жоқ. Өйткені әрқайсымыздың көңіл түкпірімізде бір кездері шаруашылығы қыз-қыз қайнаған ауылдың тірлігі қайта оралса деген арман жатқаны анық қой.Мемлекет басшысы Қасым-Жомарт Кемелұлы Тоқаев Қазақстан халқына Жол¬дауларының бірінде: «Ауыл шаруашылығын дамытпай, бәсекеге қабі-летті экономика құру мүмкін емес» деген еді. Шындығында, әртүрлі табиғи-климаттық аймақтарда орналасқан біздің ұлан-байтақ жер ресурстарымыз – бәсекеге қабілетті табиғи артықшылығымыз. Қазірде ауылдық жерлердің бүгінгі ахуалы қандай? Онда тұратын халықтың тұрмыс-тіршілігі, әлеуметтік жағдайы қандай деңгейде? Қармақшы ауданына қарасты Ақтөбе ауылдық округінің жағдайымен танысып көрдік.Бүгінде Ақтөбе ауылдық округінде барлығы – 11 616 бас ауылшаруашылығы жануарлары тіркелген. &nbsp;Атап айтқанда, мүйізді ірі қара – 2155 бас, жылқы – 1854 бас, ұсақ мал – 5476 бас, түйе – 101 бас, құс – 2030 басты құрайды.&nbsp;Егілген егіс көлемі барлығы – 5459 гектар. Оның ішінде, күріш &nbsp;– 3801 гектар, жаңа жоңышқа – 703 гектар, ескі жоңышқа – 859 гектар, картоп – 32 гектар, бақша – 32 гектар, көкөніс – 32 гектар.&nbsp;Ауылдағы кәсіпкерлікті дамыту – ел игілігін еселеу. Иә, қазірде ауыл кәсіпкерлігін дамыту бағытында мемлекеттік деңгейде түрлі бағдарламалар қабылданды. Ақтөбе ауылдық округінде бүгінде 76 кәсіпкер бар. Кәсіпкерлікті қолдау мақсатында несие мен грант бойынша – 16 &nbsp;жоба қаржыландырылған (306,5 мың теңге). Оның ішінде, аграрлық несие бойынша – 1 жоба, құны 220,0 мың теңге, аграрлық несие 2,5% – 8 жоба, құны 38,8 мың теңге, Байқоңыр ӘКК несие бойынша – 5 жоба, құны 39,9 мың теңге, гранттық қаржыландыру бойынша – 2 жоба, құны 2,8 мың теңге иеленді. Ал кәсіпкерлік негіздеріне 18 адам оқытылды. &nbsp;<blockquote>Ауылдық округте атқарылып жатқан ілкімді істер көп. Айталық, «Оңталап» шаруа қожалығының демеушілігімен былтырғы жылы құрылысы басталған ойын алаңының құрылысы аяқталып, пайдалануға берілді. Жалпы құны – 30 000, мың теңгені құрайды. Сонымен қатар Т.Салқынбайұлы көшесіне 49 867,7 мың теңгеге орташа жөндеу жұмыстары жүргізілді. Мұнан өзге балалар ойын алаңына 12 350,1мың теңге қаражат қаралып, құрылысы аяқталды. Ы.Сейтенов көшесіне 2,0 мың &nbsp;теңгеге жарықтандыру жұмыстары жүргізілді. &nbsp;Кеңсе көшесінің бойындағы жарық шамдарына қайта жөндеу жұмыстары жүргізілді.Өткен жылғы атқарылған жұмыстардың бір парасын тілге тиек еттік. Ендігі кезекте биылғы жылы атқарылатын ауқымды жобаларға тоқталсақ. &nbsp;– Биыл ауылымызда бірнеше көшені жөндеуден өткізуді жоспарлап отырмыз. 2024 жылға бюджет қаражаты есебінен І.Мүсірбаев, Б.Қасқырбаев көшелерін қайта жаңғыру және Ы.Сейтенов көшесін орташа жөндеуге жалпы құны 272 187,1мың теңге бюджеттік өтінім тапсырылды. Алдағы уақытта осы жұмыстар негізінде іске кірісеміз – дейді ауылдық округ әкімі Қанат Аралбаев.&nbsp;</blockquote>Сондай-ақ ауылдық клуб үйінде есептік кезеңде 44 іс-шара өткізілді, 4 үйірме және 91 мүше бар. Ауылдық кітапхана тарапынан есепті кезеңге 21 рухани танымдық іс-шара атқарылып, 24 кітап көрмесі өткізілді. Спорттық үйірмелер бойынша қазақша күрес түрінен 42, ұлттық асық ату үйірмесіне 42 бала қатысады.Ауылдық округте – 39 жұмыссыздар қатарында. «Қармақшы-Құс» ЖШС ашылуына байланысты – 35 адам тұрақты жұмыспен қамтылды. Қоғамдық жұмыспен қамтылғандар – 37 адам, жастар тәжірибесі бойынша – 8 адам қамтылған.

Қармақшы: Ақтөбе ауылында 35 адам тұрақты жұмыспен қамтылған

<a href="https://kyzylorda-news.kz/">Kyzylorda-news.kz</a> Аманқосовтар әулетінің жылыжай ісін қолға алғанына бірнеше жыл болған. Аудан жұртын көкөніс көшеттерімен қамтамасыз етіп отырған отбасы кәсіптің бұл түрінде пайда көп екенін айтады. Алайда бейнеті де аз емес көрінеді. Сондықтан Айдана Бағдатқызы салаға тыңғылықты дайындықпен келген дұрыс дейді.&nbsp;Бастапқыда бұл отбасы қызанақ пен қиярды ақпан айының аяғында жылыжайда баптап, ерте көктемде сатылымға шығара бастаған. Кейін сұраныстың артуына байланысты олар мұндағы өнім көлемінде өсіп қалыптастырған. Яғни көкөністен бөлек басқа да түрлі гүлдердің көшетін сатуға кіріскен.&nbsp;Шындығында «олар кәсіптің бұл түрін дамытып жатыр» десе де болады. Оған себеп те жоқ емес, қай өнімнің шығымына қандай күтім қажет екенін жетік білетін Аманқосовтар алдағы уақытта тек өнім сатуға бел буып отыр. Бұл жобаны осыған дейін жүзеге асыруға қолбайлау болған қаражат тапшылығын мемлекет шешіп беріпті.&nbsp;Биыл Айдана Пұсырманова қолда бар қаражатқа жылыжайға қажетті материалдар сатып алған, басқа да қажетті құрал-саймандар алу үшін мемлекеттік бағдарлама көмегіне жүгінеді. Осылайша ол 1 млн 380 мың теңге қайтарымсыз қаржылай қолдауға ие болған. Қазіргі таңда Аманқосовтар отбасы жылыжай құрылысын бастап кетті. Егер бұл жобасы сәтімен жүзеге асса, келер жылы маусымында жалғаштықтарды көкөніспен қамтамасыз етпек.&nbsp;– Інім әскери салада жұмыс жасайды. Мен қаладан көкөніс тұқымдарын әкеліп, әкеммен бірге оны жылыжайға егеміз. Ерте көктемде көшеттерді халық таласып алып кетеді. Тұтынушымыз жетерлік, оның барлығын қамтамасыз етуге шыны керек, соңғы жылдары шамамыз келмеді. Сондықтан тек халықтың тапсырысымен ғана көшет дайындауға көштік. Тіпті бір жылдары оның өзін отырғызатын жер таппадық. Осыдан-ақ ауданда көшетке сұраныстың қандай екенін бағамдай беріңіз. Биыл мемлекеттік бағдарлама көмегіне жүгініп, қайтарымсыз қаржыға ие болдым. Оған жылыжайға қажетті басқа да құрал-саймандарға тапсырыс бердім, алдағы айдың аяғында затымыз келсе, жылыжай жұмысын ерте бастауға бел буып отырмыз, – дейді кәсіпкер.&nbsp;Кейіпкеріміз Мөрәлі Шәменов ауылында тұрады. Аядай ауылда кәсібін жандандырып, өзінің тұрақты тұтынушыларын да қалыптастырып алған. Бір жағынан ауылдың аудан орталығына жақын орналасқаны да тиімді дейді. Себебі өнім көп болған жағдайда қалғанын аудан орталығына барып, сатылымға шығармақ.&nbsp;– Біздің ауыл кенттің іргесінде ғой, сондықтан «жылыжай өнімі алдағы уақытта ысырап болады» деген бізде уайым жоқ. Бір жылдары көптеп көшет сатқанда да аудан орталығындағы тұтынушыларымыз таласып алған. Негізінен бізге келіп те басқа ауылдардан көшет алып кететіндер бар. Бірақ аудан орталығына көптеп көшет алып кетсек, бір күнде 25-30 мың теңгедей табыс табатын күндер болады. Ал алдағы жылы өнім сатсақ, табыс еселене түседі, – дейді ол.Жалпы ауылдағы Аманқосовтарды «бағбандар отбасы» десе де болады. Себебі оларға қай өнімге қандай күтім қажет, қай өнімді қай уақытта суару керек, мұның бәрі таңсық емес. Жылыжай өніміне сұраныстың артуына бұл да себеп шығар.&nbsp;Алдағы уақытта кәсіпкер жылыжайда қызанақ пен қиярдан бөлек басқа да өнімдер егуді жоспарлап отыр. Кешегі аптада 100 мың теңгеге жуық қаражатқа қажетті тұқымдарды да алдырып қойған. Демек, жылыжай жуырда іске қосылады деген сөз.&nbsp;Айта кетейік, қазіргі таңда қызанақ пен қиярдың нарықтағы бағасы мың теңгеге жуықтайды. Ал жазға дейін бұл баға көтерілмесе, арзандамайтыны анық. Кейіпкеріміздің «келер жылы табысымыз еселенеді» дегенін осыдан-ақ аңғаруға болады.

Жалағаштықтар үшін мол өнімді жылыжай

<a href="https://kyzylorda-news.kz/">Kyzylorda-news.kz</a> &nbsp;Моңғолияның Баян-Өлгий қаласында өткен ақын-жазушы, белгілі қоғам қайраткері Мұрат Пұшатайұлының 70 жас мерейтойына арналған «Бай өлкем – бай бесігім» атты халықаралық ақындар айтысында жерлесіміз, айтыскер ақын Мөлдір Айтбай бас бәйгені қанжығасына байлаған болатын. Сұлу сөзден жыр кестелеген сөз зергерлерінің додасында аламанның алдын бермеген қазақтың ару қызымен сұқбаттасудың сәті түскен еді.– Баян-Өлгейден шалқар шабытпен қанжығаңыз майланып келіпті. Әңгіменің әлқиссасын осы айтыстан бастасақ. Қалай болды? Кімдер қатысты?<blockquote>– Айтыс өте тартысты өтті. Баян-Өлгийдің аспанын жырмен әуелеттік. Бұл айтыстың бірнеше ерекшелігі бар. Ең әуелгісі туған күнімде өткені. Айтыс басталатын кезде Моңғолияның әнұранымен басталды. Ондай нәрсені бұрын-соңды көрмегенмін. Қазақтың ұлттық киімі мен үкілі домбыраны ұстап отырып, өзге елдің әнұранын тыңдап отыру деген енді… Оны сөзбен айтып жеткізе алмайсыз. Төрт мемлекеттің туы тұрған соң, төрт елдің әнұраны қатар шырқалады деп ойлаған едім, қателесіппін. Олай болмады. Солай айтыс басталды, әуелі жергілікті ақын Ақтілеу Кеңшілікпен айтыстым. Сонан соң алматылық Шұғаев Сезімханмен сайысқа түстік. Финалда мен сөз соңын әнұранмен аяқтадым. Олай етпеске болмады. Сол жерде жүрегі қазақ деп соққан қанша жанның еңсесі көтерілді, мақтанышы оянды. Бір ауыз әнұран туралы әдепкі жайды айтып өттім де «Сіздерге азаттықтың таңы атқандай етіп, мен бір әнұранның әніне салып айтайын» дедім де әуелете жөнелдім. Халықтың ыстық ықыласы шабыттандырды. Осылайша әрі туған күнім, әрі бас бәйгем қуаныш сыйлағаны былай тұрсын, атажұртты аңсаған, қазақылықты сағынған бір қауым елді көріп, Отан деген төрт әріптен құралған ұлы сөздің қадір-қасиетін тағы бір түсініп келдім.</blockquote>– Өзге елге барып, ұлттық өнерді айшықтау – үлкен жауапкершілік. Әнұранды әуелеткендегі сезім қалай болды?<blockquote>– Бұған дейін алыс-жақын елдерге көп бармайтынмын. Бірақ енді түбі бір түркіміз ғой, өзіміздің салт-дәстүр, әдет-ғұрып, тілімізге, ділімізге жақын елдер. Ал Баян-Өлгий – сан ғасырлар бойы қазақтар қоныстанған жер. Халықтың 95 проценті – қазақ. Қалған көлемі кейіннен көшіп келген моңғолдар. Қанша жерден қазақтар тұрғанмен Моңғолия мемлекетінің шекарасында тұр. Бәрібір, ауыр екен. Тәуелсіз еліміздің төсінде, көк тудың астында, қалың қазақтың ортасында өмір сүріп жүрген біз бақытты екенбіз. Бұл айтыста мен өнердің алдындағы жауапкершіліктен гөрі Отан алдындағы жауапкершілікті қатты сезіндім. Халық өте ыстық қабылдады, тоқтамай қол созып, қошемет көрсетіп, ерекше көңіл аударды. Оның үстіне әнұранды әнге салып айтқаннан кейін мені әлеуметтік желіден тауып, жазып жатқандар көп. Ақжолтай тілегін жаудырып жатыр әлі. Иә, қазақ қай жерде де қазақ. Біздің ұлттың рухы биік. Ол – дәлелдеуді қажет етпейтін аксиома.</blockquote>– Алда қандай жоспар бар? Айтыскер ақын Мөлдір Айтбайдан қандай жақсы жаңалықтар күтейік?<blockquote>– Бұған дейін 2015 жылы «Мөлдір өлең», 2017 жылы «Сыйлық» атты кітаптарым жарық көрді. Байқап отырсам, арада біраз үзіліс болыпты. Көптеген өлеңдерім жиналып қалды. Алла амандық берсе, алдағы көктемде үшінші кітабымды жарыққа шығарғым келіп отыр. Әрі бұл кітаптың тұсаукесері ретінде тәуелсіз қазақ елінің барлық облысын аралап шығамын деген жоспар да бар.</blockquote>– Әңгімеңізге рақмет! Шығармашылық табыс тілейміз!&nbsp;

Қазақстан және Қызылорда облысының жаңалықтары