<a href="https://kyzylorda-news.kz/ru">Kyzylorda-news.kz.</a> Мемлекеттің басты байлығы – адам десек, ұлт ұрпағының дені сау болуы қажет. Әсіресе, ана мен бала денсаулығы көп көңіл бөлуді керек етеді. Егеменді елдің еңселі болуы жарық дүние есігін ашатын әр сәбиге байланысты. Сондықтан ана мен бала өлімі көбеймей, денсаулық діңгегінің басты назарда болғаны абзал. Ақ халаттылар ананың жағдайын оңалтуға тырысып, сәбиге өмір сыйлауда қолынан келгенше күресіп бағады. Тиісінше, аналар да өз саулығына сақтықпен қарағаны жөн. Не дегенмен баланың өміріне қауіп төнбей, денсаулығында кінәрат болмай, жетіліп дүниеге келуіне ана саулығы маңызды рөл атқарады. Сайып келгенде, жүктілікке дейінгі кезеңде жағдайдың жақсы болуы және құрсаққа бала біткеннен кейін де тексерілуді үздіксіз жалғастыру өлім өкінішіне ұрындырмайды. Шарананың шетінеп кетуі, сәбидің саулығында қандай да бір ақау болуы, дәрігерге дер кезінде қаралмау, дәл уақытында ем қабылдамау бәрі-бәрі қиындыққа душар етеді.Ана мен бала денсаулығы демографиялық көрсеткішке де ықпал ететіні анық. Оның үстіне аталған жағдай медицина саласында әлі де өзегін жоймаған, көкейтесті мәселелердің бірі. Иә, медицина жағдайы ауырлаған ананы, науқастанған нәрестені далаға лақтырудан аулақ. Керісінше, көмек көрсетіп, күтіммен шығарып салуға сақ дайын тұр. Сондай-ақ, өлім көрсеткіші күрт көбеюінің алдын алуға тиісті шараларды қарастыру керек. Әйел адам босанғаннан кейін нәресте екеуіне ауруханаларда жағдай жасалса, арнайы бақылауда болса құба-құп. Ана мен баланың ажалына араша болуда қадамдар нақтыланса, алаңдаушылық болмайтыны сөзсіз. Елімізде балалар денсаулығын сақтау басты назардағы мәселенің бірі. Өйткені, ежелден бала дегенде безінген халық емеспіз. Баланы бақытқа балап, болашағымыз деп бекемдейтіндіктен де алғашқы орында денсаулығының мықты, аурудан ада, аяқ-қолының балғадай болғанын қалайды. Асылында, ана аман болса, баланы да бақытты деуге болады. Облысымызда да ана мен бала денсаулығына бей-жай қарамайтын, денсаулығын қадағалауда қарқынды қызмет көрсететін перинаталдық орталықта барлық мүмкіндіктер бар. Жаңа туған нәрестелерге көмек көрсету кезінде қамтылатын жабдықтармен де толықтырылған.Өңірімізде нәрестелер жағдайы әрдайым бақылауда болатыны қуантады. Облыстық перинаталдық орталығында заманауи реанимациялық көмек көрсетіліп, жедел түрде жәрдем беріледі. Сондай-ақ, бөлімшеде сәбидің қарқынды емі мен жағдайына мониторинг жүргізу үшін мүмкіндіктер бар. Мәселен, білікті медициналық персонал, заманауи мониторлар, қарқынды күтім инкубаторлары, өкпені жасанды желдету аппараттары, гипотермиялық аппарат, зертханалық жабдықтар, жылжымалы рентген, ультрадыбыстық қондырғыларды атап айтуға болады. Кей аппараттардың негізінде денсаулыққа жағымды әсері мол, залалсыз емдік қоспалар дайындалатын көрінеді. Мұның өзі ұлт саулығы мен салауатты өмірді қалыпта ұстаудың тетігі іспеттес. Аталған орталықта жаңа туған нәрестелерге арналған инфузиялық ерітінділерді дайындау кезінде шаңсыз бактерияға қарсы ауа ортасын құруға арналған ламинарлық шкаф бар. Ол жұмыс аймағында орналасқан инфузиялық ерітінділерді сыртқы және айқас ластанудан қорғайды. Осылайша жаңа туған нәрестелерге жұқпаларды парентеральды жолмен беруді болдырмайды. Зарарсыздандыру кезінде дозалау аппаратының көмегімен емдік қоспаларды дайындау жүзеге асырылады. Ана мен шала туған нәрестенің дене және психологиялық байланысын қолдау үшін «кенгуру» әдісімен күту сеанстары өткізіледі.Ел мен халық – егіз ұғым. Елді халық құрайтынын ескерсек, әрқайсысының өміріне төнер қауіптен қорғап, денінің саулығын лайым назарда ұстаған ләзім. Әсіресе, ана мен бала өлімінің көрсеткіш деңгейі төмендеуі үшін қолдан келгенді жасап бағу керек. Бұл тұста ақ халаттылар да аянбай, ауруханалар, арнайы орталықтар емге қатысты қадамдардан қалыс қалмақ емес.

Нәресте саулығы аймақ дәрігерлерінің назарында

<a href="https://kyzylorda-news.kz/ru">Kyzylorda-news.kz.</a> Заман талабы – жаңашылдықты қажет етеді. Сондықтан жаңғыру мен жаңарудың көштен қалмай, ілгері жылжуға жәрдем берер тетігі жетіп артылады. Әсте, әсіре сілтеушілікке бармай-ақ, орынды жүйелердің негізінде ілкімді істердің іргесін қалауға әбден болады. Тек салғырттықтың әсерінен сан соғып, кейін «бүйту керек еді» деген түсінікке тірелмесек болғаны. Бұл ел дамуына тікелей қатысы бар бүкіл саланың алдына қою керек міндеті болуы тиіс. Өйткені, халықтың тұрмыс тіршілігі мен әл-ауқаты, өмір сүру сапасының жақсаруы – ел дамуымен сабақтасты себептер. Қазіргі таңда өңірімізде өткір мәселелердің шешімі табылып, жаңашылдықпен жаңа бастамалар қолға алынды. Солардың бірі һәм бірегей жобасы деп халықты отандық телеарналармен қамту мақсатында «Отау ТВ» ұлттық спутниктік және эфирлік цифрлы хабар тарату жүйелерінің енгізілуі десек артық айтқандық емес.Себебі, облыс тұрғындары көгілдір экраннан туындайтын келеңсіздіктерден арылып, сапалылыққа қол жеткізді. Иә, өткен жылы облысымыз цифрлық эфирлік телевизияға көшіп, облыстың 174 елді мекені қамтылған болатын.Цифрлық хабар таратудың енгізілуімен отандық телеарналардың дамуында да серпіліс сезілетін секілді.<blockquote>– Бүгінгі цифрландыру бағдарламасы 2010 жылы Қазақстан Республикасы Президентінің «2010-2014 жылдарға арналған мемлекеттік бағдарлама аясында өндірістік инновациялық дамыту» туралы жарлығына сәйкес басталып, информатикалық және жаңашыл қоғам, жаңашыл экономикаға өтуі үшін цифрлық телебағдарлама тарату жүйесі Қазақстан аймағына 100% таралуы көзделді. Осы ретте «Қазтелерадио» АҚ ұлттық оператор болып танылды. Сонымен қатар, 2010 жылдың желтоқсан айында республика тұрғындарына 44 отандық теле-радиоарнаны тегін қабылдауға мүмкіндік беретін «OTAU TV» ұлттық жерсеріктік теле-радиохабар тарату желісі пайдалануға енгізілді.2012 жылы желінің екінші модернизациясы – цифрлық эфилік телехабарға көшуге дайындық басталды. Алғашқы болып Қызылорда қаласы және оған жақын орналасқан 36 елді мекенді қамтыған Цифрлық эфирлік телевизия жүйесі – Қызылорда радиотелевизиялық стансасында 2013 жылы іске қосылды. Ал, облыс көлемінде 16 РТС 2020 жылдың маусым айында пайдалануға берілді. Нәтижесінде, бүгінгі таңда облысымызды цифрлық теледидармен қамтуға 17 РТС қызмет көрсетуде. Бұл дегеніңіз өңіріміздің 174 елді мекенінің 550 мыңнан астам тұрғыны, былай айтқанда, 80 %-ы аталған қызметпен қамтылды. Облыста барлығы 30 РТС жоспарланған. Оның қалған 13-інің құрылысы келесі жылы басталады деп жоспарланып отыр,- деді «Қазтелерадио» АҚ Қызылорда облыстық радио телехабар тарату дирекциясының директоры Тасболат Абдикаримұлы.</blockquote>Айта кетейік, халықты және ұйымдарды Ұлттық цифрлық телевизия қызметтеріне қосу үшін, облыс көлемінде 10 дилер жұмыс жасайды. Олардан жабдықты алуға және бірден орнатуға болады. Өздігінен цифрлық жабдық құрылғыны сатып алу және орнату үшін облыс аумағында 30 сауда нүктесі жұмыс жасайды.Аналогты телевизияның ішінара өшіріліп, цифрлық жүйенің орнауы жаңа мүмкіндіктерге жол ашатыны жасырын емес. Оның үстіне көк жәшіктің тұрақты көрермендері үшін кемшілігінен гөрі артықшылығы айқын, сапасы әлдеқайда жақсы болады. Сондай-ақ, кескінде кедергілер кездеспей, бейнелер бұрмаланып һәм бұлдыраусыз анық көрсетіледі. Міне, аналогтық хабар таратудан бас тартудың басымдығы да осында. Яғни, түрлі ақаулардан ада болып, цифрлық хабар тарату негізінде шалғай мекендегі халық та тың өзгерістерден тыс қалмайды. Тіпті, ауыз толтырып айтарлық артықшылықтың бәрін сала мамандары да тілге тиек етуде.<blockquote>– Бұрын аналогты телевизия цифрлық телехабар тарату пайда болғанға дейін телевизиялық кескін мен дыбысты таратудың жалғыз әдісі болатын. Цифрлық хабар тарату аналогқа қарағанда әлдеқайда ұзақ қашықтыққа қабылданатын қорғаныс пен сигналдың жоғары деңгейіне ие. Цифрлық сигнал кедергіге төзімді және көрермендерге өзінің бастапқы түрінде, шу мен бұрмаланусыз, тіпті ең қашық елді мекендерге де жете алады.Цифрлық телевизиялық хабар таратуды дамыту қолжетімді бағдарламалардың санын көбейтеді, интерактивті хабар таратуды енгізеді және халыққа қосымша қызметтер ұсынады. Бұл, сонымен қатар, тұрғындарды көп бағдарламалық ТВ хабар таратумен қамтудағы сәйкессіздіктерді жоюға, елдің барлық тұрғындарына ақпараттық ресурстарға қолжетімділікті қамтамасыз етуге, телебағдарламалардың кескіні мен дыбысының сапасын жақсартуға көмектеседі,- деді «Қазтелерадио» АҚ филиалы Қызылорда облыстық радио телехабар тарату дирекциясы сату орталығының басшысы Ұлықбек Құтышев.</blockquote>Иә, бүгінгіге қарағанда бұрын теледидар көретіндер көп болатын. Әсіресе, сүйікті сериалдарын асыға көретін көрермен көгілдір экранның алдына жайғасып, жаңалықтарды да уақытында қосып үлгеретін. Ал, қазір интернет пен қалта телефонның дәуірі басталып, жұрт жапатармағай сонда үдере көшкен тәрізді. Әйтпесе, бұрын сериалдың қызығына түскенде кескін кедергісі, дауыста да әлдебір шу секілді келеңсіздік туа қалса, сол мезетте-ақ үйдің балалары шатырға шығып, терезеден «былай бұр, жоқ былай» деп әбігерге түсуші еді. Хош. Енді ондай дегбірсіздікті ешкім таныта қоймас. Интернеттің дамуын былай қойғанда, жаңашылдықпен қатарласа жүріп жаңғыру, жоғарыда айтылғандай өзгерістердің енуі тыныштықпен тыным тауып, тыңғылықты көруге мүмкіндік береді. Осы ретте, «Отау Тв» да халыққа сапалы қызмет көрсетті және тұрғындарға қолайлы деп айта аламыз.<blockquote>— «Отау Тв» брендімен тікелей спутниктік хабар тарату қызметі 2011 жылы енгізілген. Отау Тв-ге қосылған кезде абоненттер 66-дан астам отандық теле-радио арналарды тегін пакетте, 140-тан астамы ақылы Premium пакетте көре алады. Сонымен қатар, бұл қызметтің басты артықшылығы – қосылудың қарапайымдылығы және ата-ана бақылауын орнату мүмкіндігі бар үш тілдегі ыңғайлы пайдаланушы мәзірі бар. Бүгінгі таңда абоненттер саны 1,5 миллионнан асады, бұл Отау Тв қызметінің сапасы мен қолжетімділігін растайды,- деді Ұ.Иманбердіұлы.</blockquote>Қорыта келгенде, қойылған мақсаттың қаз-қалпында қалмай, жүйелі жүзеге асқаны жағымды жаңалықтар легін толықтыра түспек. Әрі халықтың жағдайы үшін жасалған істердің нанымды нәтижесі көп ұзамай жемісін беретініне шүбә жоқ. Сондықтан сапалы дүниеге келгенде сырт қалмай, жақсыға ұмтылған жөн.

Өңірде атқарылған ілкімді істер нәтижелі

<a href="https://kyzylorda-news.kz/ru">Kyzylorda-news.kz.</a> Бүгінде Қызылорда облысының тұрақтандыру қорында 1317,5 тонна өнім бар. Сондай-ақ өнімдер аймақтың 36 әлеуметтік дүкені және 20 сауда орындарында және жәрмеңкелерде 1619 тонна көкөніс төмен бағада сатылуда. Бұл туралы Өңірлік коммуникациялар қызметінің ақпараттық алаңында өткен брифингте облыстық ауыл шаруашылығы және жер қатынастары басқармасы басшысының міндетін атқарушы Айнұр Тлеулеева мәлімдеді.<blockquote>«Бүгінгі таңда азық-түлік бағасы басты назарда. Жыл басынан бері бағаны тұрақтандыру үшін өңірлердің әлеуметтік-кәсіпкерлік корпорациялары ауыл шаруашылығы тауар өндірушілерімен күзгі және көктемгі кезеңде көкөніс өнімдеріне келіссөздер жүргізді. Сәйкесінше, тұрақтандыру қорындағы өнімдер әлеуметтік дүкендер мен сауда орталықтарына төменгі бағамен берілуде. Сонымен қатар, Тәжікстаннан 20 тонна пияз сатып алу келісіміне қол қойылды және көршілес Өзбекстан елінен 30 тонна картоп алу жоспарланып отыр. Сондай-ақ Жетісай тауар өндірушісімен 48 тонна қырыққабат әкеліну келісіліп, оның 24 тоннасы әкелінді. Мұнан өзге, қант тапшылығын болдырмау үшін Мерке қант зауытынан 2,3 мың тонна қант алу жоспарлануда. Бүгінде оның 204 тоннасы жеткізілді. Бұдан бөлек, нан бағасының тұрақталығын қамтамасыз етуде әкімдігімен «Азық-түлік келісім шарт корпорациясы» ҰК» АҚ-ның ресурстарынан 5 649,0 тонна азықтық астық бөлу жөнінде меморандумға қол қойылды», - деді Айнұр Маратқызы.</blockquote>&nbsp;«Байқоңыр» ӘКК» АҚ басқарма төрағасы Самат Ерниязовтың айтуынша, аймақта 36 әлеуметтік дүкен бар екенін айтты.<blockquote>«Биыл «Байқоңыр» ӘКК» АҚ корпорациясы шаһарда 18 жәрмеңке ұйымдастырды және Байқоңыр қаласында 1 жәрмеңке өтті. Сондай-ақ азық-түлік бағасын тұрақтандыруда облыста 36 әлеуметтік дүкен жұмыс жасап тұр. Бұдан бөлек, нан бағасын арзандатуда қаланың 14 наубайханасымен облыстың 7 наубайханасына бірінші сортты ұн берілді. Жұмыстар алдағы уақытта өз жалғасын табады», - деді Самат Ерниязов.</blockquote><figure class="image"><img src="https://knadmin.beoblood.kz/uploads/brifing_10b86072e7.jpg" alt="брифинг.jpg"></figure>

Қызылорда облысының тұрақтандыру қорында 1317,5 тонна өнім бар

<a href="https://kyzylorda-news.kz/ru">Kyzylorda-news.kz.</a> Әр адамның бойында білімге бейімділік, ғылымға қызығушылық, жаңаны танып білуге деген талпыныс, ұлы мұраттарға ұмтылыс болады. Тек құлшынысты оятып, қабілетті жетілдіріп, шыншылдықпен шыңға шығудың жолын қарастырған ләзім. Оқуды ой азығы десек, білімнің қайнар көзін де таусылмайтын кен ретінде қарастырамыз. Өйткені, адам өмір бойы ғылым жолына түсіп, жаңа білім алуын тіпті тоқтатпауы мүмкін. Асылында, адамзат ізденімпаздықтың ізгілікке жетелейтінін, білімді болумен бағы жанатынын жақсы біледі. Өйткені, алтын ұя аталған мектеп қабырғасында 11 жыл уақытын өткізсе, кейін таңдауына сай, қалауына сәйкес университет, колледжде оқуын жалғастырып, әрі қарай еркіне байланысты магистратура, докторантураға тапсырады. Білім алудан қашқақтамайтын, жаңашылдықтан жалтақтамайтын жандар түйсік-танымын түгендеп, қоғамнан, жалпы өмірден өз орнын таба алатыны ақиқат. Әсте, сауықшылдыққа ғана емес, сауатты болуға сарп еткен уақыттың текке кетпесі тағы рас. Білімді болу жетістікке жөн сілтеп, мақсатқа қол жеткізуге негізгі үлкен мүмкіндік. Сондықтан балаға ақылды айнымас серігі етіп, озық ойлы болу керектігін жиі қаперге салатынымыз да сол.Бүгінде білім саласына көп көңіл бөлініп, оқушылардың сапалы білім алуына жағдай жасалуда. Бюджеттен бөлінген есепсіз қаржы да есебін тауып, қажетті деген құрылысқа құйылып, берекелі һәм нәтижелі бастамалардың негізі болып отыр. Бала келешегіне күдікпен емес, үмітпен қарайтын ата-ана да білім саласындағы бірқатар жаңалықтарды назардан тыс қалдырмайды. Тиісінше, өскелең ұрпақтың ертеңгі ел сенімін ақтайтынын білетін мемлекет пен басқармалар кез келген түйткілді мәселенің түйінін тарқатуға бек әзір. Әсте, бір жылда атқарылған ауқымды жұмыстар соның айғағы. Осы орайда, баспасөз қалалық білім бөлімінің басшысы Ерлан Боданов білім саласында 2022 жылы атқарылған жұмыстардың қорытындысы мен алдағы міндеттер туралы баяндаған болатын.Мұғалім – мектептің жүрегі. Ұлағатты ұстаздар барда сапалы білімді сіңірген саналы оқушылар қалыптасары анық. Оқуға ынтасы зор ықтиятты шәкірттерді қанат қақтырып, білім беруден жалықпайтын мұғалімдердің біліктілігі басты орында. Осы ретте, білім бөліміне қарасты мектептерде жоғары санатты мұғалімдердің бары әрі көптігі көңіл қуантты.Мектеп бітірген түлектер ҰБТ сынағынан сүрінбес үшін дайындықты күшейтіп, күні-түні оқудан бас алмайды. 11 жыл алған білімін құрдымға жібермей, ата-ана мен ұстаздың үмітін, мектептің сенімін ақтау үшін, болашақтағы арман-мақсаттарының негізін қалау үшін тырысып бағады. Әр оқушының ұлттық бірыңғай тестілеуде ұнжырғасы түспесін деп шыр-пыр болатын мектеп ұжымы да, білім бөлімі де қажетті көмек көрсетуге, ынталандыруға әрекет етеді. Өткен оқу жылында ҰБТ қорытындысы бойынша алдыңғы қатардан көрініп, ең жоғары көрсеткіш көрсеткен де қала мектебінің оқушысы. Әлбетте, бұл қол соғып қошеметтерлік қуаныш.Талаптылар білімнің қуатты күш екенін қаперде ұстап, жан-жақты болудың кілтін тапқанда ілгерілеуде меселі қайтпай, талпынғанда аяғына тұсау ілікпейтіні белгілі. Әсте, оқумен ғана шектелмеген жас өскін әлденені зерттеп, беймәлімді білуге, ғылымға бетбұрыс жасауда да жасықтық пен жасқаншақтыққа жол берген емес. Осы ретте, баланың бетін қақпай, белін буа білген, талантты танып, дамылсыз ізденетін дарындыны қолдау мақсатында үйірмелермен қамтыды. Мәселен, робототехника, бастапқы техникалық модельдеу, авиамодельдеу, мотомодельдеу, 3D және ІТ модельдеу үйірмелеріне жазылып, өз жұмыстарын жүргізіп, республикалық және облыстық байқауларда жүлделі орындарға ие болып келеді. Әрқашан озық һәм озат болуға ұмтылған оқушылардың мұндай жетістігі де мақтануға тұрарлық.<blockquote>– Бүгінде білім бөліміне қарасты 55 мектепте 68268 бала білім алуда. Онда 7336 мұғалім дәріс береді. 2021-2022 оқу жылында 2480 оқушы бітіріп, оның ішінде 1259 мектеп бітіруші грант иегері атанды.Қазірде қалалық білім бөліміне қарасты 5 қосымша білім беру ошақтарында 5766 бала заманауи техникалық үйірмелермен қамтылып, республикалық және облыстық байқауларда жүлделі орындарға ие болып келеді. Сонымен қатар, мектеп жанындағы спорттық секциялар, үйірмелер, аула клубтары жұмысы да жүйелі жолға қойылған. Мектептер жанынан 640 спорт секциялары жұмыс жасап, оған барлығы 17325 бала, ал мектептердегі 521 үйірмеге барлығы 14372 оқушы қамтылды,- деді білім бөлімінің басшысы Ерлан Теңізбайұлы.</blockquote>Бүгінде қала мектептерінде ыстық тамақпен 34457 оқушы қамтылып отыр. Оның ішінде 28363 оқушы 9 қаңтардан бастап барлық мемлекеттік білім беру мекемелеріндегі 1-4 сынып оқушыларына әлеуметтік статусына қарамастан бір реттік ыстық тамақ берілуде.Бүгінде білім саласындағы өзекті мәселелердің бірі – ерекше білім беруге қажеттілігі бар балаларға жағдай жасау. Өйткені, әрбір бала денсаулығына немесе қандай да бір кемістігіне байланысты қоғамнан шет, ортадан бөлектеніп қала алмайды. Бәрінің бірдей білім алуға құқығы бар. Мәселенің мәнісін тауып, шешім шығаруға дайын білім бөлімі аталған санаттағы балалардың емін-еркін қажетті білім алуы үшін түрлі тәсілдерді қарастырып, қуантарлық қорытынды жасауға тырысып келеді. Зерек балалардың жағдайына зер салып, үміт отын сөндірмей, зейінін ашуға бағытталған жұмыстар жүйелі болатынына сенім мол.<blockquote>– Бүгінде барлық әлем жұртшылығының назарын аударып отырған мәселе балалардың жеке сұраныстары мен ерекшеліктеріне ортаның, отбасының қатысуымен білім беру үрдісіне толық қосуды қарастыратын инклюзивті білім беру жүйесі. Бүгінгі күні психологиялық-дәрігерлік-педагогикалық консультациялар есебі бойынша қалада ерекше қажеттілігі бар балалар саны 3715 баланы құрайды. Оның ішінде 0-6 жас аралығында 1189, 6-18 жас аралығында 1712, мүгедектігі бары 1741 бала.Білім мен ғылымды дамытудың 2020-2025 жылдарға арналған мемлекеттік бағдарламасына сәйкес, инклюзивті білім алуға жағдай жасаған мектептердің үлесін арттыру мақсатында Қызылорда қаласы бойынша жалпы білім беретін 55 мектептің ішінен 42 мектепте арнайы мамандар жұмыс жасауда. Қала бойынша 39 мектепте инклюзивті білім беруге жағдай жасалынған, бұл барлық мектептердің 71 пайызын құрайды,- деді Ерлан Боданов.</blockquote>Білімге қатысты қандай да бір бағдарламаның бастауы, жобаның жүйелілігі жаман емес. Өйткені, біразында қамығып, қапаланатын жағдайдан гөрі нақты нәтижелер басым. Содан болар, білім саласында айтып ауыз толтыратын өзгерістер мен жетістіктер жетіп артылады. Әсте, білімнің қара шаңырақтарының тапшы болмағаны игі. Білімге қатысты игілікті іс көбейсе, оқу ордаларынан таудай талапты шәкірттер қанат қағатыны сөзсіз. Қызылорда қаласында мектеп құрылысының қарқын алатыны көпті қуантып қойды. Ерлан Теңізбайұлы мектеп құрылысы жөнінде де тілге тиек етті.<blockquote>– Өткен жылы №10 Ы.Алтынсарин атындағы мектепке күрделі жөндеу жұмыстары жүргізіліп, Айнакөл ауылындағы №175 орта мектеп ішінде орналасқан автономды бу қазандығын сыртқа шығарылды. Сондай-ақ, №261 мектеп пен «Күнекей» балабақшасы ғимараты көгілдір отынға қосылды. Бұл жұмыстардың жалғасы ретінде үстіміздегі жылы 4 мектепке, яғни №15, №212, №211, 222 мектептеріне толық күрделі жөндеу жұмыстары жүргізілетін болады.Биыл Қызылорда қаласында мектеп құрылысы қарқын алмақ. «Жайлы мектеп» ұлттық жобасы аясында облыс орталығынан заманауи үлгідегі 8 мектеп салу жоспарланған. Оның бесеуінің құрылысы биылғы жылы басталады. Атап айтқанда, «СПМК-70» мөлтек ауданынан 2000 орындық және «Арай-3» мөлтек ауданы бойынша 2000 орындық, Сырдария өзенінің сол жағалауынан 900 орындық, КБИ мөлтек ауданынан 600 орындық, Қызылжарма елді мекеннен 900 орындық мектеп құрылысы басталады. Сонымен қатар, Қызылорда-Жезқазған трассасы бойындағы 600 орындық мектептің құрылысын биыл аяқтап, маусым айында пайдалануға беруді жоспарлап отырмыз,- деді ол өз сөзінде.</blockquote>Білімнің кірпіші қалана берсе, ілгерілеудің де іргетасы қалыптасады. Бүгінде бәсекеде бүгілмейтін, олимпиадада орға жығылмайтын, сайыста сүрінбейтін кіл мықтылар көп. Түрлі деңгейдегі байқауларда бағын сынаудан қорықпайтын білімпаздардың құлшынысын көргенде, көздегі жалынды ешкім сөндірмейтініне де соншалықты сенімді боласың. Ал, сапалы білім беруде сан жолды қарастырып отыратын басшылықтың жұмысы көтермелеуге лайық. Өйткені, өткен жылда атқарылған ілкімді істерге айтатын наз да, тағатын айып та жоқтың қасы. Алдағы уақытта жүргізілер жұмыстар тінін тарқатпай, жүйесін жоғалтпаса айтулы сала талай белесті бағындырмақ.

Аймақтағы білім саласының көрсеткіші қуантады

Қызылордалық дәрігер денсаулыққа салғырт қарамау керегін айтты

<a href="https://kyzylorda-news.kz/ru">Kyzylorda-news.kz.</a>&nbsp; Егер сіз ұзақ мерзімді демалыста болсаңыз, жұмыс беруші МӘМС жүйесіне жарна төлеуге міндетті ме, еңбек мигрантының балалары медициналық сақтандыруда мәртебесін ала ала ма? Осы және өзге де сауалдарға Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов жауап берді.Ай сайын БЖТ төлеймін, сонда да «сақтандырылмаған» деген мәртебе беріледі, неге?Сірә, өтініш берген сәтте ағымдағы ай үшін БЖТ төленбеген немесе алдыңғы үш ай ішінде олқылықтарға жол берілген. «Міндетті әлеуметтік медициналық сақтандыру туралы» Заңына сәйкес, сақтандыру мәртебесін алу үшін БЖТ-ны үш ай қатарынан төлеу қажет. Сонымен бірге, егер ол төртінші айда медициналық көмек алуға ниет білдірсе, онда ол ары қарай БЖТ төлеуі керек.Мүмкін, адам техникалық себептермен жүйеден «шығып &nbsp;қалған» шығар. Ол үшін &nbsp;әлеуметтік медициналық сақтандыру қорына жүгіну қажет. Егер мамандар барлық жарналардың бар екеніне көз жеткізсе, мәртебесін қалпына келтіреді.&nbsp;Еңбек мигрантының отбасы мүшелері жеңілдік санатын ала ала ма?МӘМС жүйесіне қазақстандықтармен қатар Ресей, Беларусь, Армения және Қырғызстан азаматтары, яғни Еуразиялық экономикалық одаққа кіретін елдер қатыса алады.Егер еңбек мигрантының балалары Қазақстанда тіркелген болса, олар ұлттық білім беру деректер базасы жүйесіне енгізілсе, онда олар үшін жарналарды мемлекет төлейтін болады. Жүкті немесе бала күтімі бойынша демалыста жүрген әйелі де жеңілдік санатына жатады, бірақ ол әлеуметтік қамсыздандыру жүйесіне тартылған жағдайда ғана. Егер &nbsp;әлеуметтік қамсыздандыру жүйесіне тартылмаған &nbsp; болса, ол дербес төлеуші ретінде жарна төлей алады, сондай-ақ МӘМС-тің барлық қолжетімді қызметтерін пайдалана алады. Егер шетелдік, мысалы, Италиядан болса, оған тек ақылы медициналық көмек көрсетіледі.&nbsp;Ресми түрде жұмыс істейтін адам 56 күндік ұзақ демалысқа шықты. «Сақтандыру» мәртебесін сақтап қалу үшін МӘМС-ке жарнаныі қалай төлейді?&nbsp;Сіздің жұмыс берушіңіз міндетті медициналық сақтандыру төлемдерін дұрыс бөлуі қажет. Егер демалыс бірнеше кезеңді (бір айдан астам) қамтитын болса, онда міндетті медициналық сақтандыру төлемдерін кезеңдерге бөлуі тиіс. Мысалы, сіз тамыз және қыркүйек айларында демалыста болды делік. &nbsp;Бұл жағдайда есепші төлемдерді бір сомада емес, екі түрлі кезеңге (тамыз және қыркүйек) есептеуі керек.&nbsp; Егер сізде қосымша сұрақтар туындаған жағдайда, сіз емхананың анықтама қызметіне немесе өзіңізге ыңғайлы байланыс арнасы арқылы Әлеуметтік медициналық сақтандыру қорына жүгіне аласыз: fms.kz ресми сайты, 1414 байланыс орталығы, Qoldau 24/7 мобильді қосымшасы және Telegram-дағы SaqtandyryBot.&nbsp;&nbsp;&nbsp;

МӘМС мүмкіндіктері: Тұтынушыларды не мазалайды?

<a href="https://kyzylorda-news.kz/ru">Kyzylorda-news.kz.</a> Қазалы ауданы Әйтеке би кентінің тұрғыны жеке кәсіпкер Талғат Ембергенов бүгінде мемлекет қолдауымен 6 пайыздық несие алып, өндірісін өркендетіп отырған азаматтың бірі.&nbsp;Ол 2018 жылдан бастап кәсібін дамыту мақсатында «Бизнес Кеңесші» жобасы бойынша кәсіпкерлік негізіндегі оқу курсына қатысып, мемлекеттік бағдарлама шеңберінде Қызылорда Өңірлік инвестициялық орталық арқылы несие қаражатын алған.&nbsp;<blockquote>«Осыдан 5 жыл бұрын жас кәсіпкерлерді қолдау мақсатында осы цехты аштым. Одан кейін Өңірлік инвестициялық орталық арқылы 6 пайызбен жеңілдетілген несие алып, кәсібімді дамыттым. Сонымен қатар биылғы жылы да мемлекеттің қолдауына ие болып орталық арқылы 6 пайызбен несие алып, жұмысқа қажетті құрал-жабдықтар алдым. Алдағы уақытта ерекше балаларға арналған ағаштан экологиялық таза ойыншық шығаратын боламын», - дейді кәсіпкер Талғат Ембергенов.</blockquote>Бүгінде жеке кәсіпкер өзінің шағын цехында 4 адамды жұмыспен қамтып отыр. Кәсіпкер халықтың сұранысына сай ағаштан есіктер, үй жиһаздарын, баспалдақтар, астаулар және түрлі бұйымдар жасап шығарады.&nbsp;Қазіргі таңда кәсіпкердің цехынан шыққан ағаш бұйымдар облыстың бірнеше аудандарында сатылымға шығуда.Айта кетейік, Талғат Ембергенов алдағы уақытта өз кәсібін кеңейте түсіп, ерекше балалардың дамуына әсер ететін табиғи, таза ойыншық түрлерін шығаруды қолға алмақ.

Қазалылық кәсіпкер 4 адамды жұмыспен қамтып отыр

Қармақшының әлеуеті артып келеді

<a href="https://kyzylorda-news.kz/">Kyzylorda-news.kz.</a> Сырдария аудандық мәслихаттың кезектен тыс 5 сессиясы өтіп, оған аудандық мәслихат төрағасы Е.Әжікенов төрағалық етті. Сессия жұмысына аудан әкімі Б.Сәрменбаев, аудан әкімінің орынбасарлары, кент және ауылдық округ әкімдері, барлық бөлім басшылары мен БАҚ өкiлдерi, аудан әкімдігі мен мәслихаттың жауапты қызметкерлері қатысты.Сессияның күн тәртібінде 5 мәселе қаралды. Оның біріншісі – «Сырдария ауданының кент және ауылдық округтерінің 2023 – 2025 жылдарға арналған бюджеттері туралы» Сырдария аудандық мәслихатының 2022 жылғы 22 желтоқсандағы №185 шешіміне өзгерістер енгізу туралы болып, аудандық экономика және қаржы бөлімінің басшысы Е.Ахетов хабарлама жасады. Сондай-ақ екінші және үшінші мәселе – адамдарды заңсыз әкетуге, әкелуге және сатуға қарсы күрес мәселелері жөніндегі аудандық комиссия құрамын бекіту туралы және қылмыстық жазаларды және өзге де қылмыстық-құқықтық ықпал ету шараларын орындайтын мекемелер мен органдардың қызметіне жәрдемдесу, сондай-ақ қылмыстық жазаларын өтеген адамдарға әлеуметтік және өзге де көмекті ұйымдастыру бойынша жергілікті атқарушы органдардың жанындағы консультациялық-кеңесші орган құрамын бекіту туралы. Бұған қатысты аудандық жұмыспен қамту, әлеуметтік бағдарламалар және хал актілерін тіркеу бөлімінің басшысы М.Қаратаев баяндады.Ал кезектен тыс сессияда күн тәртібіндегі төртінші және бесінші мәселеге қатысты негізгі басымдық берілді. Ол ауданда «Ауыл – ел бесігі» бағдарламасының орындалуы және ауданда «Ауыл аманаты» жобасының іске асырылу барысы туралы болды. Осы жұмыстардың атқарылуына қатысты аудан әкімінің орынбасары Т.Нұртазаев хабарлама жасады.Аудан әкімінің орынбасары алдымен «Ауыл – ел бесігі» бағдарламасының жүзеге асуына тоқталды. Бұл бағдарлама шеңберінде ауылдық елді мекендердегі әлеуметтік және инженерлік инфрақұрылымдарды дамыту, ол бойынша іс-шараларды іске асыру бағытында жыл сайын біршама жұмыстар атқарылып жатқанын тілге тиек етті. Мәселен, 2021 жылы бюджеттен 812,5 млнтеңге қаржы бөлініп (республикалық бюджет қаражаты есебінен 739,9 млнтеңге, жергілікті бюджет қаражаты есебінен 72,6 млн теңге), 8 нысан бойынша Тереңөзек кентінде, Ақжарма және А.Тоқмағамбетов ауылдарында жұмыстар жүргізілген. Сонымен қатар 2022 жылы бюджеттен 850,2 млнтеңге қаржы бөлініп (ҚР-ның Ұлттық қор қаражаты есебінен 836,4 млнтеңге, облыстық бюджет қаражаты есебінен 13,8 млн теңге) 11 нысан бойынша Тереңөзек кентінде, Ақжарма және Н.Ілиясов ауылдарында тиісті жұмыстар атқарылып, халыққа қолайлы жағдай жасалды.Ал биыл «Ауыл – ел бесігі» бағдарламасымен ауданда 22 нысан бойынша бюджеттен барлығы 2037,0 млн теңге қаржы бөлінген. Атап айтқанда, құны 666,9 млнтеңгені құрайтын 2 жоба бойынша Аманкелді ауылдық округіндегі Жанкина, Жалмурзава, Ағайдаров, Баймағанбетов, Қалымбетов көшелерінің автомобиль жолдарын орташа жөндеу және елді мекенді электрмен жабдықтау жұмыстарына жүргізілетін болады. Сонымен бірге құны 134,6 млн теңгені құрайтын 3 жоба – Қоғалыкөл ауылдық округіндегі М.Шоқай көшесі мен тұйығында орташа жөндеу және М.Есмаханов, А.Тілеулиева көшелерінің бойындағы су құбыры мен көру құдықтарының құрылыс жұмыстары атқарылады. Шіркейлі елді мекеніндеқұны 51,0 млн теңгені құрайтын 2 жоба – Қ.Қожамжаров және Бейбітшілік көшелерін орташа жөндеу жұмыстары іске асады. Сондай-ақ, Шаған ауылдық округінде құны 1363,0 млн теңгені құрайтын 3 жобаға 305,9 млнтеңге бөлінген. Оған Шағандағы тұрғын аймақтарды электрмен қамту жұмысын бастауға 150,0 млнтеңге(өтпелі жоба), А.Құнанбаев, Р.Оразғалиева көшелеріне 48,8 млн теңге, Ғ.Мұратбаев, А.Иманов және А.Иманов жолақ көшелері бойындағы су құбыры мен көру құдықтарының құрылысын бастауға 107,1 млн теңге (өтпелі жоба) қаралып отыр.Бұдан бөлек, құны 330,6 млнтеңгені құрайтын 1 жоба бойынша Қалжан ахун елді мекенінде жүргізілетін газ құбырлары және кварталішілік газ құбырлары желісінің құрылысына жүзеге асырылуда. Ал аудан орталығы саналатын Тереңөзек кенті бойынша 11 жобаға 548,3 млн теңге бөлініпті. Тереңөзек кентінде бағдарлама аясындаҚ.Бөдеев, Д.Қонаев, Ә.Тоқмағанбетов, Ә.Тәжібаев, А.Әлиакбаров, Б.Өтепов, Т.Қозыбаев көшелерінің автомобиль жолдарына орташа жөндеу, «Сырдария спорт клубы» КММ-сінің ғимаратына күрделі жөндеу, «Ботакөз №6 бөбекжай» ғимаратының бу қазандықтарын газ отынына қайта жабдықтау, сонымен қатар Сырдария ауданының орталық аудандық ауруханасы оңалту бөлімшесінің қазандығы ғимаратын реконструкциялау жұмыстарына &nbsp;қаражаттар қаралған. Бүгінде 22 нысанның 14-і бойынша мердігерлер анықталып, жұмыстары басталуда.<blockquote>&nbsp;Жалпы айта кету керек, аудан бойынша 14 елді мекеннің 5-і (Тереңөзек кенті, Н.Ілиясов, Шаған, Ақжарма, Шіркейлі) тіректі, 5 елдімекен (Амангелді, Қоғалыкөл, Қалжан ахун, С.Сейфуллин, А.Тоқмағамбетов) спутникті, ал қалған 4 ауылдық округ (Айдарлы, Жетікөл, Бесарық, Іңкәрдария) тіректі мен спутникті елдімекенге жатпайды. Бұған қатысты жылына бір рет ҚР Ұлттық экономика министрлігінің мониторингіне сәйкес қорытынды шығады. Онда тіректі мен спутникті елді мекендер нақталанады, – деді аудан әкімінің орынбасары.</blockquote>Осы мәселеге қатысты депутаттар тарапынан сауалдар туындады. Аудандық мәслихат төрағасы Е.Әжікенов «Ауыл – ел бесігі» бағдарламасының халыққа жағдай жасауға берілген жақсы мүмкіндік екенін жеткізді. Үкімет тарапынан елді мекендерді көркейтіп, гүлдендіруге қомақты қаржы бөлінгенде оларды игеруге, түрлі жобаларды жүзеге асыруға келгенде бірқатар ауылдарда жұмыстар тиісті деңгейде жүргізілмеуде. Бұған қатысты жақында ауданға жасаған жұмыс сапарында облыс әкімі Н.Нәлібаев ауыл әкімдеріне арнайы ескерту жасап, шекті уақыт берген болатын. Осыны назарға салған аудандық мәслихат төрағасы Іңкәрдария, Айдарлы, Жетікөл, Бесарық, А.Тоқмағамбетов, С.Сейфуллин ауылдарының әкімдерін тұрғызып, мемлекеттік бағдарлама бойынша жобаларды ұсынып, ауылдардан сайланған депутаттармен бірге бірлесе жұмыс жасау керектігін айтты.<blockquote>Біз ауыл әкімдерінің мәселесін қарап жатқан жоқпыз. Біз осы ауданды дамытуға қатысты ортақ мүддені талқыға салып жатырмыз. Бұған атқарушы билікпен бірге аудандық мәслихат депутаттары да тікелей жауапты. Бұл – біздің бірлесе атқаратын жұмысымыз. Өйткені, ауданды дамыту, елді мекендерді көркейту – баршамызға ортақ жұмыс. Сондықтан депутаттар мен ауыл әкімдері бірлесе жұмыс жасап, инфрақұрылымдық жұмыстарға қатысты, халықтың мәселелерін шешуге қатысты жұмыстарды бастапқы орынға қойып, сол бойынша жобалар әзірлеп, «Ауыл – ел бесігі» бағдарламасының игілігін көруіміз керек, – деді Ержан Ертарғынұлы.</blockquote>Мұнан соң аудан әкімінің орынбасары Т.Нұртазаев 2,5 пайыздық несиемен берілетін «Ауыл аманаты» жобасына қатысты да ақпарат берді. &nbsp;<blockquote>Мемлекет басшысыҚасым-Жомарт Тоқаевтың тапсырмасына сәйкес2025 жылға дейінгі халық табысын арттыру бағдарламасына сәйкес«Ауыл халқының табысын арттыру жөніндегі жобаны масштабтау бойынша шағын кредиттер беру» жөнінде облыстық бюджеттен 3 млрд қаржы бөлініп,облыстық ауыл шаруашылығы және жер қатынастары басқармасы арқылы Ауыл тұрғындарының табысын арттыру жөніндегі жобаны ауқымдау шеңберінде берілетін микрокредиттер сенім білдірілген өкіл (агент) анықтау мақсатында мемлекеттік сатып алу жұмыстары жүргізілуде. &nbsp;Сонымен қатар облыс әкімінің тапсырмасына сәйкес жобаны кенейту мақсатында кент және ауыл округтеріне түсіндірме жұмыстары жүргізіліп қосымша 2,4 млрд &nbsp;қаржы бөлуге ұсыныс берілді. Бүгінгі күнге Сырдария ауданының кент және ауыл округтерінің жобаларды қалыптастыру мақсатында 2 млрд 330 млн теңгеге жоспар жинақталды (344 жоба 1млрд 971млн теңге, 13 кооператив 359 млн теңге) – деді Талғат Мейрамханұлы.</blockquote>Жобаларды тарқатып айтар болсақ, Тереңөзек кентінде 52 жоба, құны – 357,1 млнтеңге, Қалжан ахун ауылдық округінде 10 жоба құны – 65,6 млн теңге, С.Сейфуллин ауылдық округінде 13 жоба, құны – 98,3 млн теңге, Қоғалыкөл ауылдық округінде 22 жоба, құны – 148,6 млнтеңге, Іңкәрдария ауылдық округінде 14 жоба, құны – 102,4 млнтеңге, Бесарық ауылдық округінде 45 жоба, құны – 370,6 млн теңге, Н.Ілиясов ауылдық округінде 30 жоба, құны – 186,6 млнтеңге, Ақжарма ауылдық округінде 16 жоба, құны – 106,3 млнтеңге, Шіркейлі ауылдық округінде 12 жоба, құны – 35,0 млнтеңге, Айдарлы ауылдық округінде 39 жоба, құны274,4 млн теңге, Шаған ауылдық округінде 40 жоба, құны – 219,6 млнтеңге, Аманкелді ауылдық округінде 37 жоба, құны 215,6 млн теңге және Жетікөл ауылдық округінде13 жоба, құны – 63,0 млнтеңге. &nbsp;«Ауыл аманаты» жобасын іске асыру және қызығушылық танытқан кәсіпкерлерді сүйемелдеу мақсатында аудан әкімінің өкімімен жұмысшы тобы құрылған. Аталған топ қызығушылық танытқан кәсіпкерлерді құжаттарын сүйемелдеу үшін «Атамекен» кәсіпкерлер палатасының аудандық филиал ғимаратында жүзеге асырылуда. Сонымен бірге &nbsp;«Ауыл аманаты, Ауыл халқының табысын арттыру» жөніндегі жобаны аудан тұрғындарына ақпараттандыру мақсатында аудандық «Тіршілік тынысы» газетіне және аудандық ауыл шаруашылығы және жер қатынастары бөлімінің «Фейсбук»парақшасында мақалалар жарияланған.Бұған қатысты да аудандық мәслихат төрағасы жұмысты жандандыру керектігін, тұрғындарға «Ауыл аманаты» жобасының тиімділігі мол екенін түсіндіріп, ақпараттандыру қажеттігін атады. Яғни, кент және ауылдық округтерден көптеген жобалар ұсынылып, мемлекеттен бөлініп жатқан қаражат арқылы тұрғындар табысының артуына мол мүмкіндік жасау керектігін жеткізді.Сессияның күн тәртібінде осы екі мәселе – «Ауыл – ел бесігі» бағдарламасы мен «Ауыл аманаты» жобасына негізгі басымдық берілді. Күн тәртібіндегі мәселелер қаралғаннан кейін аудан әкімі Б.Сәрменбаев сөз сөйлеп, халық қалаулылары мен бөлімдер және ауыл әкімдері бірлесе жұмыс жасау керектігін айтты. Бірлесе атқарған жұмыс нәтижелі болатынын атап, қазіргідей мүмкіндік барда мемлекеттік бағдарламалар арқылы барлық мәселені шешіп алу қажеттігін жеткізді.Сессияның күн тәртібіндегі барлық мәселе қаралып, тиісті шешімдер шығарылды. &nbsp;

Сырдарияда мәслихаттың кезектен тыс 5 сессиясы өтті

<a href="https://kyzylorda-news.kz/">Kyzylorda-news.kz.</a> Өз жанынан өзгенің денсаулығын артық қойып, күн-түн демей тікесінен тік тұрып қызмет атқарған медицина қызметкерінің бірі – Анфиса Семенова екенін тереңөзектіктер жақсы біледі.Білікті маман Анфиса Петровна Тереңөзек кентінде дүниеге келіп, ауданымыздағы №36 Ә.Тәжібаев атындағы мектепті тәмамдаған екен. 2001 жылы Қызылорда медициналық колледжін қызыл дипломға бітірген маманды көпшілік ерекше құрмет тұтады. Бүгінде Сырдария аудандық жедел-жәрдем қызметінде фельдшер болып қызмет атқаратын ақ халатты абзал жанның қолы алтын. Бала күнінен әжесінің тәрбиесінде өскен Анфиса, ол кісінің көп ауырғандығын көріп өскеннен соң дәрігер болып, адамдарға көмек беремін деп армандаған екен.Осы күні 19 жылдық тәжірибесі бар маман артериалдық гипертензия, инфаркт, инсульт алған ауыр жағдайдағы науқастарға бірнеше мәрте алғашқы медициналық жәрдем көрсеткен. Жұмыс тәжірибиесінде осыдан 5 жыл бұрын үй жағдайында жүкті әйелді аман-есен босандырып &nbsp;алған &nbsp;Анфиса Петровна өз сөзінде:<blockquote>Мен әрбір емделуші үшін қатты алаңдаймын, науқастың жағдайы жақсарып кеткенше дәрігерден халін біліп отыратыным рас. Ауыр жағдайдағы науқастар оңалып келе жатқанын естісем жүрегімде тыныштық орнап, ерекше қуанышты көңіл-күйде боламын. Шын мәнінде, денсаулықтың қадірін білген дұрыс. Қашанда көпшілік созылмалы дертіне мән беріп, емделіп тұрғаны маңызды рөл ойнайды. Көз алдымызда сырқат адам қиналғанда жанымызды шүберекке түйіп тұрамыз, – деді.</blockquote>Осы сөздердің өзі Анфисаның өз ісін ерекше ықыласпен жасайтындығын көрсетіп тұрғаны мәлім. Маман ретінде елдегі қиын жағдай ке¬зінде аянбай қызмет етіп, адам жанын арашалап қалуға көмек бере отырып, өз мамандығына деген махаббатын тағы бір дәлелдей түскендей. Өткен жылдары ел көлемінде вирусты инфекция тарап жатқан шақта араға күн салып кезекшілік атқарып, 30-40 шақырту қабылдап, тәулік ішінде бірнеше адамның жанын ажалдан арашалап қалуға тырысқан Анфиса Петровна бұл жағдайдың өзі үшін де оңай болмағандығын жеткізді.<blockquote>&nbsp;Үй шаруасымен қатар халықтың мұң-мұқтажын арқалап жүру оңай болмағаны анық. Өзім де сол кезде вирустың жеңіл түрімен ауырған едім. Дегенмен, тұрғындардың өмірі маңызды екенін білгендіктен өзімді тез жинап алған жайым бар. Тәулік бойы тікемізден тік тұрып, жаздың ыстығына қарамастан ауа өткізбейтін сырт киімдер киіп, әрбір науқастың өмірі үшін күрескен едік. Жұмысқа жағдайдың жақсаруынан үміттеніп келетінмін. Мен үшін ең ауыры әріптесім Жанар Қостаевадан айрылып қалағандығымыз болды. Алайда соңына дейін үміт үзбей, мықты болу керек екендігін түсініп, жақсылықтың боларына сендім. Елімізде қазіргі уақытта вирус қарқыны сейіліп, жұмыс ауаны қалыпқа түсті – дейді Анфиса Петровна.</blockquote>Анфиса ауданымыздың денсаулық сақтау саласына айтарлықтай үлес қосып келе жатқан маман, сонымен қатар жары Петрмен екі бала тәрбиелеп отырған ардақты ана. Тұңғышы Анастасия тоғызыншы сынып оқыса, кішісі Даниил алтыншы сыныпта оқиды. Осындай өз ісінің маманы Анфиса Петровнаға аудан тұрғындарының да айтар алғысы бар екен.<blockquote>&nbsp;Менің қан қысымым 200-ге көтеріліп, жедел-жәрдем қызметін шақырған болатынмын. Сонда Анфиса Семенова маған алғашқы медициналық көмек көрсетіп, нәзікжанды болғанына қарамастан зембілдің бір жағын өзі ұстаған болатын. Өз ісінің маманы болуымен қатар, мамандығын сүйіп жасайтын мықты медицина қызметкері деп сеніммен айта аламын және шын жүректен алғысымды білдіремін, – дейді Жанар Тұрсынбайқызы.</blockquote>Науқасқа алғашқы көмектің дұрыс көрсетілуі өмірін қауіптен аман алып қалуға ықпал етері анық. Анфиса секілді халық алғысын алып, жанына араша түсіп, дертіне шипа тауып жүрген осындай қызметкердің ауданымызда болғаны біз үшін ғанибет. &nbsp;

Жүкті әйелді үй жағдайында босандырған фельдшер

<a href="https://kyzylorda-news.kz/">Kyzylorda-news.kz.</a> Қызылорда облысы бойынша Қылмыстық атқару жүйесі департаментінің № 37 мекемесі сотталғандарды жұмыспен қамтуды басты назарда ұстайды.Жуырда жұмысқа орналасқан бес сотталған азамат қала ішіндегі жеке кәсіпкерде келісім шарт арқылы жұмыс жасауды бастады. Олар ағаштан үй жиһаздарын &nbsp;жасаумен айналысады. &nbsp;Осы мекемедегі сотталғандардың еңбегін ұйымдастыру бөлімінің инспекторы Естай Шаметтің айтуынша, жазасын өтеушілердің еңбекке жарамдылары толықтай жұмыспен қамтылған.<blockquote>«Қала ішінде жеке кәсіпкерлерде жұмыс жасайтын сотталғандарды жұмыс орындарынан &nbsp;күнделікті &nbsp;мекеменің сотталғандардың еңбегін ұйымдастыру бөлімінің қызметкерлері тексеру жұмыстарын жүргізеді. Сондай-ақ таңертең жұмысқа шығар уақытта да &nbsp;жұмыс кезіндегі техникалық ережелерді сақтау керектігі де түсіндіріледі. &nbsp;Сотталғандарды жұмыспен қамту оларды қылмыстық ортадан алшақтатуға және бостандыққа шыққаннан кейінгі өмірде бейімдеуге мүмкіндік береді. Мекеме әкімшілігі сотталғандарды толық жұмыспен қамту арқылы олардың мемлекет, жеке тұлға &nbsp;алдындағы шығынын өтеуге көмектеседі», - дейді әділет лейтенанты Естай Шамет.</blockquote>Ағаштан түйін түйген сотталғандар арасында бұрын ағаш ұстасы болған А. есімді азамат бар екен. Оның айтуынша, абайсызда жол-көлік оқиғасын жасап сот үкімімен 3 жылға бас бостандығынан айырылған. Жақында ғана жұмысқа орналасқан сотталған үй жиһаздарын бір кісідей жасап жатыр.«Барлығы тапсырыспен жасалады. Жиһазға қажетті заттарды жеке кәсіпкер алып береді. Біз уақытылы тапсырысын орындап дайындап қоямыз. Уақытымды бос өткізгенше, қолымнан келетін іспен айналысқан жақсы. Мұны мекеме әкімшілігіне айтқан едім, олар жұмысқа орналастырды. Ойым да бөлініп, отбасыма да жалақымнан жіберіп тұратын болдым. Мекеме әкімшілігіне алғысым шексіз», - дейді соталған азамат.

Қызылордалық жазасын өтеуші жұмыспен қамтылды

<a href="https://kyzylorda-news.kz/ru">Kyzylorda-news.kz.</a> Бүгін облыстық қоғамдық даму басқармасы мен Қорқыт ата атындағы Қызылорда университетінің ұйымдастыруымен Қорқыт ата атындағы Қызылорда университетінде «Қазақ-жоңғар соғыстары: батырлар институтының ролі» тақырыбында дөңгелек үстел өтті.Іс-шараның мақсаты ұлттық тарихи жадыны жаңғыртумен қатар, жастарды тарихымызды білуге, әскери-патриоттық тәрбелеу жұмыстарын одан әрі жетілдіруге, өскелең ұрпақтың бойында өз Отанын қорғауға дайын ел азаматтарының өнегелік қасиеттерін қалыптастыруды көздейді.Жиынды облыстық қоғамдық даму басқармасының басшысы Алмасбек Есмаханов жүргізді.<blockquote>«1723 жылдың көктемінде басталған жоңғарлардың жаулап алу жорығы қазақ халқының тарихына «Ұлы апат жылдары» - «Ақтабан шұбырынды, Алқакөл сұлама» атауымен енгенін және де Ұлы дала төрін жоңғар басқыншыларынан азат ету оқиғалары халықтың тарихи жадында мәңгіге қалды. Ақтастыдағы, Бұланты жеріндегі «Қалмақ қырылған» шайқастары, Аңырақай шайқасы қазақ халқының тарихи өткен кезінің қаһармандық символына айналды. Ел басына күн туған сәтте батырлардың қоғамдық-саяси рөлі артты. Сыртқы жаудан қорғану, елдің ішкі бірлігін сақтау сияқты күрделі мәселелерде батырлар елдік мүдде тұрғысынан бірікті. Ел басына күн туған сәтте халқымыз «бір жағадан бас, бір жеңнен қол шығарып», ортақ жауға қарсы отан соғысында тәуелсіздік туын жықпады» - деді Алмасбек Әбілқасымұлы өз сөзінде.</blockquote>XVII-XVIII ғасырлардағы қоғамдық-саяси оқиғалар мен күрестер Тәуелсіз еліміздің ұлттық тарихи жадында ерлік пен өрліктің ерен үлгісі болып қалады.Шараға Қорқыт ата университетінің профессор - ғалымдары Сәтбай Тастанбек Яхияұлы, Әбілов Алдажар Әбдресуллаұлы, Ахметбек Бақытжан Мұхарамұлы және ҚР ҒЖБМ Мемлекет тарихы институтының жетекші ғылыми қызметкері, қауымдастырылған профессор, тарих ғылымдарының кандидаты Еңсенов Қанат Әлібекқлы мен С.Сейфуллин атындағы Қазақ агротехникалық зерттеу университеті Қазақстан тарихы кафедрасының қауымдастырылған профессоры, тарих ғылымдарының кандидаты Еңсепов Бауыржан Бердіқожаұлы қатысып, баяндамаларын жасады. &nbsp;<figure class="image"><img src="https://knadmin.beoblood.kz/uploads/7cd38861_cacb_45bb_9e75_e4241a22b638_69e32b8f96.jpg" alt="7cd38861-cacb-45bb-9e75-e4241a22b638.jpg"></figure>&nbsp;<figure class="image"><img src="https://knadmin.beoblood.kz/uploads/d57a0d19_52b5_4970_88e2_63d54ddd82ff_85d0581aaa.jpg" alt="d57a0d19-52b5-4970-88e2-63d54ddd82ff.jpg"></figure>&nbsp;<figure class="image"><img src="https://knadmin.beoblood.kz/uploads/a1ff53d4_4c52_407d_8bd3_bf3252db176c_9923e18de0.jpg" alt="a1ff53d4-4c52-407d-8bd3-bf3252db176c.jpg"></figure>

Қазақстан және Қызылорда облысының жаңалықтары