<a href="https://kyzylorda-news.kz/">Kyzylorda-news.kz</a>&nbsp; &nbsp;Білімнің қара шаңырағы №210 Оспан Әбілпаттаев атындағы орта мектебінде ағартушылық саланың бүге-шүгесіне қаныққан талай марқасқа ұстаз өз қолтаңбасын қалдырды. Бүгінде шәкірттеріне сапалы білім мен мағыналы тәрбие беруге ұмтылған білім ошағының ұжымы ұстанған бағыт айқын. Өз кезегінде жыл көлемінде атқарылған жұмыстарды саралау мақсатында&nbsp;мектеп директорымен сұхбаттасқан едік.– Света Мұхтарқызы, қайырлы күн! Аудан орталығындағы №210 Оспан Әбілпаттаев атындағы мектептің жетістіктері мен талантты оқушылары туралы күнделікті жаңалықтардан оқып, біліп жүрміз. Мектептен небір талантты, білімді оқушылар тәрбиеленіп, бүгінде тіпті облыстың атын республикалық дәрежеде шығарып жүрген оқушылар да бар. Дәстүрлі сұрақ, сұхбатымызды мектеп тарихынан бастасақ.– Рахмет, тарихы терең білім ордасының бетке ұстар, мақтан тұтар шәкірттері баршылық. Бүгінде ауданда абыройлы еңбек етіп жүрген жас мамандарымызбен мақтанамыз. Одан бөлек, үлкен қалаларда ел дамуы жолында аянбай қызмет етіп жүрген түлектеріміз өз алдына. Ал мектеп тарихына келетін болсақ, алғашында орыс орталау мектебі болып іргетасы қаланған. Ол 1968 жыл еді. Одан кейін 1990 жылы аралас мектеп болып, 1998 жылдан бастап қазақ орта мектебі болып жасақталған. Сол жылдан бастап білім ордасына Қазақстан Республикасына еңбегі сіңген мұғалім, еңбек және соғыс ардагері, ұлағатты ұстаз Оспан Әбілпаттаевтың есімі берілді. Қазірге дейін осы кісінің рухы қолдап, мектебіміздің аты, шүкір, әуелеп келеді. 2002 жылдан бастап мектеп жаңа, яғни қазіргі ғимаратқа көшті. Әрине құтты орда екені рас, десек те белгілі себептерге орай жаңа ғимараттың қажеттілігі туындады. Өздеріңіз де хабардарсыздар, алдағы уақытта «Жайлы мектеп» жобасы аясында мектебімізге жаңа ғимарат беріледі. Қазіргі таңда тиісті жұмыстар жүргізіліп жатыр.– «Білікті басшы – білікті маман» деп жатамыз. Мектеп тарихында есімі алтын әріппен қалған директорлар туралы айтып өтсеңіз.– Сөзіңіздің жаны бар. Әр кезеңдегі басшылық еткен директорлар мектепке өзіндік қолтаңбасын қалдырып, бүгінгі деңгейге жетуіне үлесін қосқан. Тарихты сөйлетсек, ең алғашқы директор – Надежда Николаевна, одан кейін Николай Константинович, Александра Венециевна, Гүлнара Ақайдарқызының есімдерін айта аламыз. Бақытбек Әбдуов ағайдың 1995 жылдан бастап 12 жыл мектепті басқарған кезеңін ерекше айтып өтуге болады. Ол кісі нағыз тәртіп пен талаптың адамы еді. Сол кезде мектеп оқыған түлектер ағайдың қаталдығын, есесіне нағыз тәрбиені алып шыққанын әлі күнге дейін айтып жүреді. Одан кейін Гүлмира Байдушева білікті басшылық етті. 2012 жылы Қалихан Омаров мектеп директоры қызметін атқарды. 2013 жылдан бастап зейнет демалысына шыққанға дейін басшылық еткен Әсем Мәлікқызының елеулі еңбегін ерекше айтып өту орынды. 2021 жылдан бастап мектеп директоры қызметін атқарып келемін. Қазіргі кезең – білімдінің заманы. Жаңалықтан, жаңашылдықтан бір күн де қалыс қалуға болмайды. Тәрбие мәселесі де күн тәртібінде. Әркез мектеп беделін биік ету жолында еңбегімізді аямаймыз, білім ордасының қасиетті шаңырағын биіктен түсірмейміз.– Өзіңізді қандай басшымын деп ойлайсыз?– Талапшылмын. Әр істің жауапкершілікпен атқарылуын басты орынға қоямын. Қаталдық керек жерде қаталмын, әріптестермен дос ретінде сырласу керек болса, оны да жасай аламын. Өзімді тек мектеп ұжымы мен 400-ден аса оқушыға басшы ретінде емес, түгел еліміздің ертеңі алдында жауапты сезінемін.– Нақты қанша оқушы бар қазір?– Мектепте қазіргі таңда 411 оқушы білім алуда. 71 дәріс беруші мұғалім бар, оның ішінде 6 зерттеуші, 36 сарапшы, 14 модератор бар. Сондай-ақ 22 сынып бөлмесі, 15 оқу кабинеті, компьютер сыныптары, мультимедиялық, мобильді сынып, электронды кітапхана, кеңсе, спорт зал, асхана, медициналық кабинет жұмысы да жандандырылғанын айта кету орынды.– Оқушыларға білім алу үшін жан-жақты жағдай жасалған дейсіз ғой?– Иә, мектепте білікті, білімді, тәжірибелі ұстаздар еңбек етеді. Жас мамандармен де қатарымыз толығуда. Алдыңғы буын әркез жас мамандарға үйретіп, көрсетіп, тәжірибе алмасып отырады. Мұғалімдер біліктілігін арттырып, түрлі курсқа қатысып, байқаулардан да жүлдегер атанып жүр. Республикалық деңгейде бақ сынап, жетістікке жетіп жүрген оқушыларымыз да жетерлік. Дарынды жас, ІТ саласында жаңашыл жоба жасап, бағы мен бабы қатар шауып келе жатқан Асылжан Абдуллаевты өздеріңіз білесіздер. Енді ғана түрлі жобаларға қатысып жүрген кезде-ақ алғашқылардың бірі болып аудандық газет Асылжан туралы мақала жазып жариялады. Асылжан – мектептің ғана емес, бүгінде облыстың мақтанышына айналып, көпке үлгі болып келеді. Сондай-ақ биыл ауыл балаларына арналған олимпиада өтіп, республикалық кезеңге Дәулет Асылбеков пен Гүлімай Мергенбай есімді екі оқушымыз қатысты. Талабы мол оқушыларды білікті мұғалімдер Айгүл Тәжібаева мен Мақпал Қалымбетовалар дайындады. Дәулет осы олимпиададан 2-орын иеленіп, Қожа Ахмет Яссауи атындағы халықаралық қазақ-түрік университетінің ішкі грантын иеленді. Ал Асылжан бұл күнде бірнеше беделді жоғарғы оқу орнына грант жеңіп алған.– Тәрбие мен білім – егіз. Бұл мәселе төңірегінде қандай жұмыстар атқарылуда?– «Тәрбиесіз берілген білім – адамзаттың қас жауы» деген. Білім мен тәрбиені қатар ұстау жағы әркез ескеріледі. Оқушылардың бос уақытын тиімді пайдалану үшін түрлі іс-шаралар ұйымдастырылады. Сондай-ақ мектеп оқушыларынан «Жайдарман» командасы жасақталған. Жетекшісі – Өркен Арықов. Жуырда команда республикалық фестивальге қатысып, Алматы қаласында өтетін балалар лигасына жолдама ұтып қайтты. Сондай-ақ «Мектеп театры» жобасы жақсы жолға қойылып келеді. «Жас толқын» мектеп театрының қатысушылары білікті әртістерден кем түспейді. Оқушылар облыстық театр өнері фестивалінен жүлделі орын иеленіп келді. Ғылыми, әлеуметтік жобаларға, спорттық үйірмелерге қатысып, түрлі білім мен тәрбиелік мәні зор іс-шаралар бойынша жақсы жетістіктерге жетіп келеміз. Бұл мектептің жаны болған ұстаздар мен оқушылардың бірлескен еңбегінің арқасы екені даусыз.– Сұхбатыңызға рақмет!&nbsp;

Света Сақтапова: Әркез мектеп беделін биік ету жолында еңбегімізді аямаймыз 

<a href="https://kyzylorda-news.kz/">Kyzylorda-news.kz</a>&nbsp;Қызылорда қаласында полицейлер көшеге жалғыз шығып, үйінен адасып алған 4 жастағы баланы аман-есен тапты.&nbsp;Оқиға, 31 наурызда сағат 14:30 шамасында болған. Жергілікті тұрғын Қызылорда қалалық Полиция басқармасына 4 жасар ұлының жоғалып кеткені туралы арызданған.<blockquote>«Аталған дерек бойынша іздеу шаралары дереу ұйымдастырылды. Қызылорда қалалық Полиция басқармасының барлық жеке құрамы дабыл бойынша көтеріліп, баланы іздеуге бағытталды. Баланы барлық жерден іздеген полицейлер, үй маңайындағы барлық жерді тінтіп шыққан. Отбасының жақында тұрғылықты мекен-жайын өзгерткені белгілі болды. Ювеналдық және криминалдық полиция қызметкерлері, учаскелік полиция инспекторлары мен патрульдік полиция батальоны қызметкерлерінің іс-әрекетінің нәтижесінде кәмелетке толмаған бала табылды. Ол анасына аман-есен тапсырылды», - деп мәлім етті Қызылорда облыстық полиция департаментінен.</blockquote>Фото: Нұрболат Нұржаубай

Қызылордада үйінен адасып қалған 4 жасар бала аман-есен табылды

<a href="https://kyzylorda-news.kz/">Kyzylorda-news.kz</a> Облыстың кәсіпкерлік және өнеркәсіп саласында көңіл көншітерлік көрсеткіштер аз емес. Мемлекеттік қолдаудың арқасында ісі өрге басып, өңірдің экономикалық жағдайын жақсартуға бір кісідей үлес қосып жатқандардың қарасы көбеюде.Өндіріс жақсарса, өмір де жақсарадыЖалпы былтыр өңірде кәсіпкерлердің саны 12,6 пайызға артқан. Мемлекеттік қаржылай қолдаудың көмегімен облыста бірнеше шағын өндіріс пен қызмет көрсету орындары ашылды. Аймақта кәсіпкерлік бойынша жұмыспен қамтылғандар саны 124 376 адамға жетіп, экономикалық жағынан белсенді азаматтардың 35,8 пайызын құрады. Сондықтан кәсіпкерлікті бір істі бастаған адамның ғана емес, халықтың қамын күйттеуге бағытталған негізгі сала ретінде қарастырсақ болады.&nbsp;Өндіріс жағынан кәсіпкерлер қалыс қалып жатқан жоқ. Өткен жылы алғашқы 6 айдың өзінде шағын және орта кәсіпкерлік саласында 300,6 млрд теңгенің өнімі өндірілген. Бұған қоса 42 млрд теңгеге 3,5 мыңнан аса жоба қаржыландырылған. Ал өңдеу өнеркәсібіне бағытталған инвестициялық жобалар пулына 1,1 трлн теңгені құрайтын 45 жоба енгізіліп отыр.Жасыратыны жоқ, облыс көп уақыттан бері мұнай өндірісіне арқа сүйеп келген болатын. Алайда кейінгі жылдары бұл өндіріс біршама қысқарды. Есесіне жаңа бағыттарға жол ашылды. 2023 жылы жалпы құны 7,6 млрд теңгені құрайтын 310 жұмыс орны ашылатын 6 жобаны іске қосу жоспарланған. Оның 4,3 млрд теңгеге бағаланған 2 жобасы іске қосылып үлгерді. Бұдан бөлек, 3,5 млрд теңгені құрайтын темірбетон бұйымдарын шығаратын зауыт өнім шығаруды бастады. Зауыттың қуаттылығы күніне 200 текше метр темірбетон бұйымдарын шығаруға қауқарлы. Былтыр іске қосылған шыны зауыты қазір үздіксіз өнім шығарып келеді. Зауыт іске қосылғаннан бері 167 мың тонна өнім берген.Инвестиция – игілік көзіКез келген аймақтың экономикалық дамуына инвестицияның ықпалы зор. Бұл тұрғыда облыс оқ бойы озық. Былтыр өңірге 386,4 млрд теңге инвестиция тартылған. Бұл өткен жылмен салыстырғанда 95,5 млрд теңгеге, яғни 27,7 пайызға артық. Жалпы биыл облысқа 424,2 млрд теңге инвестиция тарту индикаторы бекітілген. Инвесторлар мен демеушілер есебінен жүзеге асырылатын жобалардан 45 млрд теңгедей қосымша резерв тартылды. Соның арқасында алдағы уақытта 472 млрд теңге инвестиция тарту жоспарлануда.Енді неміс тарапымен бірлескен жоба аясында фиброцемент, газобетон және құрғақ құрылыс материалдарын өндіретін парк құру жоспарлануда. Жоба арқылы өңірге 150 млн АҚШ доллары болатын инвестиция тарту және 500-ге жуық жұмыс орнын ашу көзделген. Бұның бәрі өз кезегінде аймақ инфрақұрылымының дамып, халықтың әлеуметтік-экономикалық жағдайының жақсаруына әсер етпек.&nbsp;

Қызылордада кәсіпкерлік әлеуеті артып келеді

<a href="https://kyzylorda-news.kz/">Kyzylorda-news.kz</a>&nbsp; Жастар саясатын жаңғырту – Мемлекет басшысы Қасым-Жомарт Тоқаевтың бастамасымен елімізде жүзеге асып жатқан саяси реформаның негізгі бағыттарының бірі. Бұл бастама көпшілік қолдауына ие болып отыр. Өйткені болашаққа алаңдайтын әрбір саналы адам жастар саясатына бейжай қарамауы керек. Сыр жастарының арасында да дарынды әрі талантты, қабілетті әрі шығармашыл ұл-қыздарымыз көп. Сол әлеуетті орнымен ұтымды пайдаланып, халыққа паш ету үшін ең алдымен қажетті жағдай жасау қажет.Жақында ғана өткен XI облыстық азаматтық форумда «Кітап құрттары» қозғалысының лидері Талғат Меңдібаев жергілікті атқарушы билік пен азаматтық қоғамды жастардың тіркелмеген азаматтық бастамаларын назарға алуға, зияткерлік және ғылыми бағыттағы жобаларға көңіл бөлуге шақырған болатын. Осы бағыттағы бірқатар жобаларға бастамашы болып жүрген қоғам белсендісімен жастар саясатының жай-жапсары туралы пікірлескен едік.<blockquote>– Жастар саясаты негізінен азаматтық қоғам арқылы іске асады. Сондықтан, азаматтық қоғамның даму индексін арттыру – елдің тұрақты дамуының кепілі. Қазіргі таңда елімізде азаматтық қоғамның белсенділігі арқасында көптеген мәселе шешімін тез табуда. Бірақ азаматтық қоғам деген түсінікті көбінесе белгілі бір жобаларды жүзеге асырушы ұйымдармен байланыстырады. Мысалы, қоғамдық бірлестіктер мен қоғамдық қорлар. Үкіметтік емес ұйымдардың мемлекеттік тіркеуден өтіп, құжатын алуы оны қоғамдық ұйым етпейді. Сонымен қатар көп қоғамдық бірлестіктер өздеріне қаражат бөліп немесе басқаша қолдау білдірген мемлекеттік мекемелермен және бизнес өкілдерімен жақсы қарым-қатынас құрып, азаматтық қоғамның негізгі мақсатына қарама-қарсы әрекет жасауда. Осы орайда азаматтық қоғамның өкілі ретінде форумда жастар арасында зияткерлік жобаларға көңіл бөлінуі керек екені туралы ұсыныс айттым.Жалпы салада көңіл көншітпейтін нәрселер баршылық. Мысалы, былтыр елімізде жастар ресурстық орталықтарының құрылғанына 10 жыл. Осы уақыт ішінде жастар ресурстық орталықтары мемлекеттік жастар саясатын іске асырудың негізгі институционалдық бөлігіне айналды. Дегенмен қазір жастар орталығының қызметкерлерге жалақы төлейтін бюджеті ғана бар.Оған қоса, жастар саясатын іс-шаралар өткізу деп түсінетіндер бар. Бірақ жастар саясаты мақсатты түрде индикаторларға бөлінуі керек. Облыста 70 мыңдай жас бар. Барлығымен жастар орталығы жұмыс жүргізе алмайды. Қызметкерлерінің айлығы да төмен. Мемлекет басшысы Қасым-Жомарт Кемелұлы Тоқаев ҚР Мемлекеттік жастар саясаты туралы Заңындағы тұжырымдамалық өзгерістерге қол қойды. Өткен жылы 28 ақпаннан бастап аталған Заң өз күшіне енді. Енгізілген өзгерістер аясында жастар категориясы 29-дан 35 жасқа дейін ұлғайтылды. Осылайша мемлекеттік жастарды қолдауға бағытталған бағдарламаларды пайдаланатын жастар саны 3,4 млн-нан 6 млн-ға дейін көтерілді. Осы шаралар аясында жастар орталығы қызметкерлерінің айлығын көтерсе де жақсы болар еді. Сондай-ақ жастар басқармасын қайтару керек деп ойлаймын. Жастар саясатымен қазіргідей қоғамдық даму басқармасының бір бөлімі емес, дербес мемлекеттік мекеме айналысқаны жақсы.Ал жастардың өзіне келер болсақ, жұмыссыздық мәселесі түбегейлі шешімін таппай отыр. Күрмеуі қиын түйткілдің түбін қазбаласақ, мектепте кәсіби бағдардың дұрыс болмауы шығады. Көбіне мамандықты ата-ана таңдайды, болмаса ҰБТ-дан алған балы шешіп кетеді.Қарапайым ғана мысал. Бір жылдары Қорқыт ата атындағы Қызылорда университетіне Қазақстан тарихы пәнінің мұғалімі мамандығына түсетін адам болмай қалды. Сол кезде келесі жылы бір бала түссе де группа ашып оқытамыз деді. Сондай-ақ профицит мамандықтар да бар. Мысалы, облыста төрт бірдей медицина колледжі бар. Жылына орта есеппен 2 мың адам бітіреді. Барлығы фельдшер немесе медбике. Оның бәріне мамандығы бойынша жұмыс табылмайды. Сондықтан осы мамандық профициттерімен, кәсіби бағдар берумен жұмыс істеу керек деп ойлаймын.Жалпылама алғанда, мемлекет көлемінде жастар саясаты қанағаттанарлық емес. Дегенмен белсенді жастарға мүмкіндік көп. Талантты жастарымыз түрлі жобаларға қатысып, өз бастамасын жоба ретінде қорғап, қолдау табуда. Республика көлемінде «Тәуелсіздік ұрпақтары», басқа да ауқымды жобалар бар. Облысымызда бұрын мектеп жасындағы балаларды ғылымға ынталандыруға бағытталған «Жас ғалымдар» деген жоба бар еді. Кейін өзгеріп кетті. Өзгешелігі көп, форматы мүлдем басқаша HACKATHON IT жобалар байқауы, цифрлық салаға қызығушылық танытқан жастардың басын қосқан «Innofest» инновациялық идеялар фестивалі, білім, ғылым, кәсіпкерлік, ішкі туризмге қатысты түрлі тақырыптар бойынша жастарды еркін пікір алмасу аймағына шоғырландырған «Pecha-Kucha» жобаларын айтуға болады. Олар қатысқан әрбір жасқа мотивация бере білді деп ойлаймын. Осындай игі шаралардың ауқымын кеңейткен дұрыс.&nbsp;Себебі, жастарымыздың Жайдарман ойнап, дебат өткізуінің кемі жоқ. Би билеп, ән айтып та болдық. Бұл бағыттағы іс-шаралар әбден жолға қойылған, ендігі өз жалғасын таба береді. Бізге зияткерлік бағыттағы жобалар жетіспейді. Үлкен қалаларда ондай жобалар өте көп. Сенбі-жексенбі сайын кафе-барда жастар жағалай топтасып, өздері де өткізе береді. Мысалы, жуырда ғана тұңғыш рет 1000 жас қатысқан «Quiz» ойыны өтті. Талайды таңдандырған сайыс Қазақстанның рекордтар кітабына енді. Астананың өзінде 2 қазақша, 3 ағылшын, 6 орыс тілінде «Quiz» ойындары тұрақты ұйымдастырылады екен. Бәрінің мақсаты бір – жастардың ой-өрісін, білімін жетілдіру, бос уақытын тиімді өткізуге жәрдемдесу.Бізде ғана ондай нәрсе жоқтың қасы. Үш жыл бұрын өзіміз бастамашы болып, белгілі кәсіпкер Мағжан Ералиевтің демеушілігімен «AQYL-BATTLE» республикалық сайысын өткізгенбіз. Кейін ол тренд болып кетті. Ауылдарда, аудандарда, мектептер арасында әртүрлі форматта өтті. Сондай-ақ, былтыр басқарма тарапынан қолдау көрсетіліп, еліміздің түкпір-түкпірінен 20 команда қатысқан «IQ-orda» республикалық зияткерлер сайысы өтті. Қазіргі таңда білім басқармасы, облыстық телеарна, жастар орталығы мен Қорқыт ата атындағы университет бірлесіп «Зияткер» деген жоба бастадық. «Қызылорда» телеарнасында әр сенбі сайын 11 сынып оқушылары арасында өтеді. Жеңімпазға университет гранты беріледі.Бір сөзбен, осындай зияткерлік жобаларды көбейту керек деп ойлаймын. Себебі, ақылды адамдардың басын қосқаннан ұтарымыз көп. Мысалы, қазір біз жоғарыда атап өткен IT-стартап жобалардың өз қауымдастығы, ортасы бар. Бір-бірін айтқызбай түсінеді. Бірлесіп өз жобаларын одан әрі дамытуда, – дейді Талғат Меңдібаев.</blockquote>&nbsp;

Талғат Меңдібаев: Жастар саясаты – азаматтық  қоғам арқылы іске асады

<a href="https://kyzylorda-news.kz/">Kyzylorda-news.kz</a> Қазгидромет ел аумағында 2 сәуірде болатын қауіпті метеорологиялық құбылыстарға болжам жасады.Синоптиктер мәлімдегендей, Қазақстанның басым бөлігінде антициклонның әсерінен жауын-шашынсыз ауа райы күтілетін болады.<blockquote>«Тек солтүстік, солтүстік-шығыс аймақтарда жаңбыр мен қар түрінде жауын-шашын түседі, оңтүстік аймақтарда найзағай ойнап, жаңбыр жауады.ҚР бойынша тұман, солтүстікте, солтүстік-шығыста&nbsp;— көктайғақ, солтүстікте, оңтүстікте, шығыста&nbsp;— жел күшейюі мүмкін»,&nbsp;— делінген ақпаратта.</blockquote>Фото: Нұрболат Нұржаубай

Бүгін найзағай ойнап, жаңбыр жауады

<a href="https://kyzylorda-news.kz/">Kyzylorda-news.kz</a> Жалағаш ауданына қарасты Т.Жүргенов атындағы ауылда көп жылдан бері еңбек етіп келе жатқан «Ер-Әлі» және «Құрманбай ата» шаруашылық ұжымдары бар. &nbsp;Заман талабына сай кәсіпке бейімделген &nbsp;ауыл азаматтары елге болсын деп егін егіп, бақ өсіріп, туған жерінің көркейіп- көгалдануына да барынша үлес қосып келеді.&nbsp;Сыр өңірінің табиғатына төзімді, жергілікті тұрғындар көп тұтынатын күріш дақылы әлемдік сауда алаңында да сұранысқа ие. Сондай-ақ жаңа технологияны пайдаланудың нәтижесінде кейінгі жылдары күріштің сапасы да, өнімділігі де арта түскен. Дегенмен жылдан-жылға егінге су тапшылығы туындап отырғаны белгілі. Осыған орай шаруашылық суды аз пайдаланатын өнім түрлерін егуді қолға алды.&nbsp;Айталық, кейінгі жылдары бақша егіп, ауыл, аудан тұрғындарын картоп, сәбіз, қызылша секілді күнделікті тұтынатын көкөністермен қамтамасыз етіп келеді.Ал 2018 жылы көршілес оңтүстік өңірден бірнеше сортты алма ағаштарын әкеліп, алғашқы көшеттерін отырғызды. Рас, бастапқыда «қалай болар екен» деген уайым басымдау болды. Өйткені Шымкент өңірінің шұрайлы жерінде өскен жеміс ағаштары Сырдың тұзды топырағына бейімделуі оңай емес еді.&nbsp;Бірақ ерекше күтімнің арқасында жас көшеттер жайқалып шықты. Алма ағашының алғашқы өнімінен дәм татқан ауылдастары бағбанға алғысын жаудырып жатты.Иә, айта кеткеніміз артық болмас, біздің бала күнімізде осы ауылдың тұрғыны Әшен қарттың алма бағы туралы әңгіме ел аузында жүретін. Әшен бағының алмасы ала жаздай ауыл, аудан тұрғындарының сұранысын өтейтін. Ал бүгінде егін егіп, бақ өсіріп, еліне адал қызмет етіп жүрген Бекжановтар аудан, облыс аумағынан бөлек, еліміздің бірнеше өңірлерінен тапсырыс алып, табиғи өнімін ұсынып отыр.Алма бағының көлемі 6 гектар, 12600 түп ағаш. Соған сәйкес бақтың күтіміне қарайтын тұрақты жұмысшылар бар. Айталық, бүгінде «Гала М-9», «Голден М-9», «Гранни смидт М-9», «Фуджи М-9», «Конфетка ММ-106» деп аталатын бес түрлі алма сорты сатылымда. Тұрғындар сұранысы да жоғары. Өйткені күздік алма сорты сақтауға да қолайлы. Мысалы, дәл осы кезде жұрт жәшіктеп сатып алып, Жаңа жылға дейін сақтауға қам жасап жатыр. Алыстағы ағайынға сәлемдеме ретінде жіберсеңіз де, қуанып қалары сөзсіз!<blockquote>– Шындығында өз жерімізде өскен экологиялық таза өнімнің орны бөлек! Ал базардан іздесең мұндай табиғи дәмі ерекше, тәтті алманы табу қиын. Есесіне, сырты жалтыраған дәмі, сөлі жоқ жасанды жемістердің түр-түрі толып тұр. Сондықтан сапалы алманың бір жәшігін сатып алдым. Отандық тауар өнімдерге, оның ішінде жергілікті кәсіп иелерінің өндірген өніміне тұрақты қолдау көрсетуіміз керек, – дейді қала тұрғыны Айсәуле Сағатбекқызы.</blockquote>«Ер-Әлі» шаруашылығының төрағасы Әліби Бекжановты әңгімеге тартып едік.<blockquote>– Негізгі кәсібіміз күріш өндірісі болған соң алғашқыда алма бағын өсіруге хобби ретінде қараған едім. Бірақ еңбегіміз ақталып, жақсы жеміс беріп, ә дегеннен-ақ сұранысқа ие болды. Жан-жақтан тапсырыстар түсе бастады. Өйткені өнімге химиялық тыңайтқыштар қосылмаған.&nbsp;Табиғи қалпында, күн көзінде, тамшылатып суару әдісімен өсірілген. Бағасы да базардағы басқа алмалардың бағасымен шамалас. Мәселе тек табыста емес, ең бастысы – елдің алғысы. Отандық өндіріске тамшыдай болсын, үлесімізді қосып, өнімнің өңірдегі бағасын тұрақтандыруға ықпал етсек деп ойлаймын, – дейді ол.</blockquote>Ә.Бекжанов тәжірибелі кәсіпкер ретінде ауыл шаруашылығы саласындағы күрделі мәселелерді көтеріп, кәсіпкерлікті қолдауға бағытталған мемлекеттік бағдарламаларды тиімді іске асыруға байланысты ұсыныстарын ортаға салып, қоғам алдындағы жауапкершілігін де белсенді атқарып келеді.&nbsp;&nbsp;

Жалағаш: Алмаға сұраныс жоғары

<a href="https://kyzylorda-news.kz/">Kyzylorda-news.kz</a> Бақдәулет Абатұлы &nbsp;«Бақдәулет-57» шаруа қожалағының түйекеші. Шаруашылықтағы 100 бас аналықтан 50 төл алып, мал басын аман сақтаған.&nbsp;Ол Жалағашқа қарасты Аққұм ауылында дүниеге келген. Осындағы №38 орта мектептің 9-сыныбын бітірген соң қалаға оқуға аттанады. «Ақмешіт» колледжінің студенті атанып, «Мал дәрігері» мамандығын игереді.<blockquote>– Әкемнің есімі – Абат, ал анам – Мейрамгүл. Жеті ағайындымыз. Көпбалалы үйде өстім. Ата-анамыз жасымыздан еңбекке баулып өсірді. Адал нан тауып жеуді үйретті. Міне, енді ауылдағы ірі шаруашылық – «Бақдәулет-57» &nbsp;қожалығында жұмыс істеймін. Бір жарым жылдан бері түйе бағып келемін, – дейді ол.</blockquote>Көп сөзге жоқ, ұяңдау мінезді Бақдәулеттің қарамағында 100 бас түйе бар екен. Әрі ботасы мен тайлағы, інгені мен атаны аралас жайылатын түлікті бағуда түрлі қиындық кездесетін көрінеді.<blockquote>– Жазда аса қиын емес. Ұзаққа жайылмайды. Ауыл маңындағы шаңдаққа иіріліп, сонда аунап жата береді. Ал қыста мүлде бөлек. Күнделікті түгендеп, алдын қайырмалап, бөлінгендерді қосып тұрмасаң өзіңе қиын. Қашыққа ұзап кетіп, екі-үш күн әуре-сарсаңға салатыны бар. Ең жаманы – атан, яғни, аталық түйелердің адамға қарап, айбат қылып шабатыны болады. Ең қауіптісі де осы. Түйенің еті де, шұбаты да адам баласына пайдалы екені бұрыннан белгілі. Ата-бабаларымыз осы түліктің шудасына дейін емге жаратты емес пе? – дейді ол.</blockquote>Расымен, көшпелі қазақ ертеден киелі санаған төрт түліктің төресі бұл. Бар жақсыны бойына жиған жануардың біріншіден, етін қорек етсек, шұбаты мен шудасының денсаулыққа шипасы екібастан белгілі. Әсіресе, шуданы емдік мақсатқахалық жиі пайдаланған. Шыққан не сынған сүйектің бітуіне тез әсер етеді. Оның буын, құяң, бүйрек аурулары, радиация сәулелеріне қарсы қасиетін ғалымдар мойындап отыр. Жалпы түйе жүнінен істелген қай өнімнің де бағасы тым жоғары екені белгілі.Содан шығар, ілгері заманда қазақ байлары үш мың басқа дейін түйе айдаған. Қазір де өсіретіндер бар. Әсіресе, кейінгі жылдары облыста өсім артты. Ауыл шаруашылығы және жер қатынастары басқармасы берген мәліметке сүйенсек, қазір аймақта 64 мың басқа жуық түйе тіркелген.Президент Қасым-Жомарт Тоқаев «Әділетті мемлекет. Біртұтас ұлт. Берекелі қоғам» атты Жолдауында кәсіби маманның қадірін білу керек екенін, еңбекқор адам мемлекетті дамытатынын баса айтқан еді. «…Біз қарапайым еңбек адамына құрмет көрсетуіміз керек. Қандай кәсіппен айналыссаң да, оны сапалы атқару маңызды. Жастар нақты бір мамандықтың қыр-сырын жетік білуге ұмтылғаны жөн. Өз саласының шеберіне әрдайым сұраныс болады. Өскелең ұрпақ Қазақстанда ғана емес, өзге елдерде бәсекеге қабілетті болуы керек. Көрші мемлекеттің азаматтары шетелге барып, жұмыс талғамай еңбек етіп жатыр. Олар біздің елде де өте жақсы табыс тауып жүр. Дәл осындай жандардан үлгі алу керек. Шын мәнінде, ең бастысы – адал еңбек. Біз мұны жете түсінетін ұрпақ тәрбиелеуге тиіспіз. Идеология жұмысында осыған баса мән берген жөн» деген еді Мемлекет басшысы. Ата-бабадан келе жатқан кәсіптің маңынан ұзамай, түйе баққан Бақдәулеттің бұл ісі өз қатарластарына үлгі.&nbsp;

Түйе баққан Бақдәулет

<a href="https://kyzylorda-news.kz/">Kyzylorda-news.kz</a> Еліміз бойынша өңірлік университеттердің ғылым саласындағы жаңалықтары артып, шетелдік ЖОО-лармен халықаралық байланысы нығаюда.Осы орайда Алаштың анасы атанған Сыр еліндегі іргелі білім ордасы – Қорқыт ата атындағы Қызылорда университетінің даму деңгейі туралы оқу орнының Басқарма төрағасы – Ректоры Бейбіткүл Кәрімовамен сұхбаттастық.– Бейбіткүл Сәрсемханқызы, биыл Қорқыт ата атындағы Қызылорда университеті білім, ғылым саласы бойынша қандай межені бағындырды?– 2023 жылы университетте нәтижелі жұмыстар атқарылды деуге толық негіз бар. Алғаш рет университет QS Word University Rankings – 2024 халықаралық рейтинг агенттігінің талдауы бойынша ТОП-1200-1400 орынды иемденді. UI GreenMetric әлемдік рейтингіне қатысып, беделді тізімде 1015 орынға тұрақтады. Аккредиттеу және рейтингтің тәуелсіз агенттігі өткізетін «Сұранысқа ие жоғары оқу орындарының ұлттық рейтингі» қорытындысы бойынша 7-орынды иелене отырып, ҚР ТОП-10 үздік жоғары оқу орнының қатарына кірді. 2019-2020 оқу жылымен салыстырғанда білім алушылар контингенті 5300-ден 10200-ге, яғни 2 есеге, ал мемлекеттік білім гранты негізінде оқитындар саны 3,7 есеге өсті.− Ғалымдардың зерттеу жұмыстарының нәтиже беруі, ел игілігіне жарауы, ғылымды коммерцияландыру қазір өте өзекті. Қорқыт ата университетінде ғылымнан түскен қаржының көлемі қандай?– Университет ғалымдары адамзат игілігіне жарайтын зерттеу жұмыстарымен айналысуда деп толық айта аламыз. Соның бірнешеуін атап өтейін. Күріш экспортымен танымал Қызылорда өңірінде топырақ құнарлылығының төмендеуі, тұздануы байқалады, сондай-ақ, күріш қалдықтарын (қауызы) қайта өңдеу, ағынды суды тазарту технологиясы өте өзекті болып отыр. Университеттегі Инженерлік бейіндегі зертхана қызметкерлері күріштің қауызынан биочар, целлюлоза алу технологиясын әзірледі. Сонымен қатар, Нова Лиссабон университетінің (Португалия) ғалымдарымен бірге Альцгеймер және Паркинсон ауруларының алдын алу үшін дәрі-дәрмек әзірлеуде. Бұдан бөлек, құрамында мұнай бар қалдықтарды қайта өңдеудің инновациялық технологиясын әзірледі. Университет ғалымдары облыстағы «Сығанақ», «Жанкент», «Сортөбе», «Қышқала», «Бәбіш мола», «Асанас» қалашықтарында археологиялық қазба жұмыстарын жүргізуде. Ғалымдар алғаш рет африкалық тары сорттарының перспективалық үлгілерін Арал өңіріне егіп, тұзды топырақта құмай өсіру технологиясын ғылымға енгізгенін айта кету керек. Ғылымнан түскен қаржы да жыл сайын артып келеді. 2022 жылы 17 жоба орындалған болса, 2023 жылы жалпы 26 ғылыми жоба орындалуда. 2020 жылмен салыстырғанда ғылымнан түскен қаржы 5,4 есеге өсті. Тек 2023 жылы ұтып алған гранттық жобалардың құны 1 250 000 000 теңгені құрады. Университет ғалымдары бағдарламалы-нысаналы қаржыландыру жобасы аясында Қызылорда облысында су тапшылығы жағдайында мал азықтық дақылдары мен ағаш екпелерін суару үшін сарқынды суларды қауіпсіз утилизациялау технологиясын әзірлейтін болады. Жобаның жалпы құны – 750 млн теңге. Бұл көрсеткіштер – әрине, ҚР Ғылым және жоғары білім министрлігінің жоғары оқу орындарын жүйелі қолдауының нәтижесі.– Жас ғалымдарды қолдау жұмыстары қалай жүзеге асуда?– Университетте жас ғалымдардың ғылыми-зерттеу жұмысын жүргізуге арналған ректор гранты конкурсы 3 жылдан бері ұйымдастырылап келеді. Биыл үздік деп танылған 8 жобаның авторына 1 250 000 теңгеден грант сертификаты табысталды. Олардың ішінде 5 жаратылыстану-техникалық бағыттағы зерттеу, 3 әлеуметтік-гуманитарлық бағыттағы зерттеу бар. Мысалы, жас ғалымдарға арналган ішкі грантымыз 2021 жылы – 4, 2022 жылы 6 жас ғалымға берілді. Ал енді конкурсқа қатысушылардың саны жылдан жылға көбейіп келе жатқан соң келесі жылдан бастап грант қаржысын 20 миллионға дейін көтеруді жөн көріп отырмыз. Себебі ғылым – дамудың басты кілті.– Жуырда университет базасында Сеултех Жасанды интеллект және информатика жоғары мектебі ашылды. Мектептің мақсаты, жұмысы туралы толығырақ айтып берсеңіз…– Қорқыт ата атындағы Қызылорда университетінде Оңтүстік Корея Республикасы Үкіметінің қолдауымен Сеул ұлттық ғылым және технологиялар университетімен (SeoulTech) ынтымақтастық аясында Жасанды интеллект және информатика жоғары мектебі ашылды. Жоғары мектеп жасанды интеллект, киберқауіпсіздік және информатика саласында кадрлар даярлайтын болады. Студенттер Сеултехпен бірлескен бағдарламалар бойынша білім алады, бұл әлемдік IT технологияларға қолжетімділікті қамтамасыз етеді. Жоба аясында оқу орны Кореяның заманауи зертханалық құрылғыларымен жабдықталады, ал студенттер бірнеше тілді меңгеріп, орыс және қазақ тілдерінен бөлек, ағылшын, корей тілдерінде білім алады. Биылдан бастап Сеултех базасында университеттің жас мамандары магистратура мен докторантурада тегін оқуға мүмкіндік алып отыр.– Университеттің өзге елдермен халықаралық байланысы қандай?– ЖОО-ның өзге де шетелдік оқу орындарымен ынтымақтастық байланысы артты. Каннам университетімен (Корей Республикасы), Қытай мұнай университетімен (КХР), Томск политехникалық ұлттық зерттеу университеті, Дубна университеті (Ресей Федерациясы), «Ташкент ирригация және ауылшаруашылығын механикаландыру инженерлері институты» Ұлттық зерттеу университетімен (Өзбекстан Республикасы) бірлескен білім беру бағдарламалары жүзеге асырылуда. Сонымен қатар, алдағы уақытта шетелдік университеттер базасында өкілдік ашып рекрутинг жұмысын, отандастарға грант бөлу және сол университетпен бірлесіп әр түрлі білім беру, ғылыми бағыттағы іс-шаралар өткізбекпіз.&nbsp;– Академиялық ұтқырлық бағдарламасы бойынша оқытушылар мен студенттерге қандай мүмкіндіктер қарастырылған?– Қазір Академиялық ұтқырлық бағдарламасы аясында 70-ке жуық студент шетелдік ЖОО-ларда білім алуда. Оның ішінде, Қытайдағы Хубэй университеті, Польшадағы Лодзь университеті, Түркияның Селджук университеті, Өзбекстандағы «Ташкент ирригация және ауылшаруашылығын механикаландыру инженерлері институты» Ұлттық зерттеу университеті, Оңтүстік Кореядағы Каннам университеті бар. Бұл оқу орындарына студенттерді министрліктен бөлінген қаржымен де, университет өз қаржысы есебінен де жіберуде.– Сұхбат үшін рақмет! Алдағы жұмыстарыңызға табыс тілейміз!&nbsp;

Бейбіткүл Кәрімова: Ғылым – дамудың басты кілті

<a href="https://kyzylorda-news.kz/">Kyzylorda-news.kz</a> &nbsp;Қазақстан Республикасы Қылмыстық Кодексінің 189-бабының 4-бөлігінің 2-тармағымен «сеніп тапсырылған бөтен мүлікті иемденіп алу немесе талан-таражға салу» дерегі бойынша 27.11.1973 жылы туған Султанов Сейткамал Абзалович іздестірілуде.«Мади-Қажы» жауапкершілігі шектеулі серіктестігінің бұрынғы директоры. Іздеуде жүрген күдіктіге қатысты қандай да бір мәлімет берген жағдайда анонимдік сақталып, ақшалай сыйақы қарастырылғандығы хабарланды.Бас шарасы:«қамауға алу» Байланыс телефондар «102» 8-(7242) 29-57-07, 29-50-08, 29-70-10, сенім телефондар 8-(7242)-29-57-07, 8-701-369-55-35.

Қызылордада серіктестіктің бұрынғы директоры іздестірілуде 

<a href="https://kyzylorda-news.kz/">Kyzylorda-news.kz</a> Бүгінде ұлттық дәстүр мен қазақтың қанына сіңген асыл қасиеттерді дәріптеуге мұрындық болып жүрген «Қазақ аналары – дәстүрге жол»&nbsp;республикалық қоғамдық бірлестігі негізінде еліміздің түкпір-түкпірінде қызу жұмыстар атқарылып жүр. Берекелі бірлестіктің негізгі мақсаты – қазақы салт-дәстүр мен әдет-ғұрыпты дәріптеп, келешек ұрпаққа насихаттау. Былтыр Сыр елінде жұмысын бастаған бұл шара облыстық филиал төрайымы Алтынай Мырқықызының бастауымен Шиелі ауданында да жүйелі түрде жүргізіліп келеді. Бүгінгі кейіпкеріміз – аталған қоғамдық бірлестіктің Шиелі ауданы бойынша төрайымы&nbsp;Тұрсынай Сейтпенбетқызы осынау ізгі бастаманың төңірегінде қызмет атқарып, аудан және ауыл тұрғындары арасында дәстүріміздің қайта жаңғырып, кеңінен өріс алуына сеп болып жүр.Қазіргі таңда ұмыт болып бара жатқан салт-дәстүрлеріміз бен ырым-тыйымдарымыздың ұрпақ тәрбиесіндегі рөлі айрықша. Осы секілді қазақ әйелінің ұлттық киімі, қыз бала тәрбиесі, отбасы сыйластығы тақырыптары қалың жұртшылық арасында қайта маңыз алу үшін еңбек етіп жүрген жан – Тұрсынай Әбдісадық. Ол – шаңырағын шаттыққа бөлеп, дүниеге парасатты перзент әкеліп, отбасы тынысын кеңейтіп, отын маздатып отырған аяулы жар, ақ желеңді абзал жан. Бүгінде құрметті зейнет демалысында болса да, халыққа қызмет етуден шаршаған емес. Өңірде кеңінен қолға алынған «Қазақ аналары – дәстүрге жол» бірлестігі негізінде аудан арасында жүйелі жұмыстар жүргізіп, түрлі тақырыпта іс-шаралар ұйымдастырып, қазақылықтың қасиетті жігін жалғап келеді.Тұрсынай Сейтпенбетқызы 1959 жылдың 8 ақпанында Өзбекстан Республикасы, Бұхара облысы, Кенимех ауданында дүние жарығына келген. Он жылдық мектепті үздік бітірген соң, 1982 жылы Ташкент мемлекеттік медициналық институтының емдеу ісі факультетінде білім алып шығады. Өмір ағысымен Шиелі ауданының азаматы Болат Күлімбетке тұрмысқа шығып, аудандық денсаулық саласының жедел жәрдем бөліміне линиялық терапевт-дәрігер болып орналасады. Сол уақыттан бері Тұрсынай ханым медицина саласында үздіксіз әрі нәтижелі жұмыс атқарып келеді. Бұған оның түрлі оқыс жағдайларға тап болған аудан тұрғындарына көрсеткен көмегі, кенеттен қысылған науқастарды дер кезінде шешім қабылдау арқылы өлімнен арашалап қалғаны дәлел. Білікті маман алған білімі мен жинаған тәжірибесінің арқасында халыққа адал қызмет етті.1993 жылы аудандық емханаға терапия бөлімінің меңгерушісі қызметіне ауысып, жұмыста ұйымдастыру қабілетінің жоғарылығын көрсетті. Бұдан соң 1999 жылғы денсаулық саласындағы жаңа реформаға байланысты «Болашақ» дәрігерлік амбулаториясының аға дәрігері қызметіне көтерілді. Ақ халатты абзал жан өзінің еңбекқорлығы мен ізденімпаздығының, біліктілігі мен іскерлігінің арқасында жай терапевт дәрігерден БМСКО «Болашақ» директоры қызметіне дейін өседі. Дәрігердің халық игілігіне атқарған адал қызметі ел арасында абыройының артуына сеп болды. Қарамағындағы қызметкерлерге тұрақты талап қойып, оның орындалуын қатаң қадағалағанының нәтижесінде «Болашақ» ұжымы облыстағы алдыңғы қатарлы медициналық ұйым дәрежесіне көтерілді.Тұрсынай Әбдісадықтың отбасын дәрігерлер династиясы деуге болады. Жолдасы Болат Күлімбет білікті, ұйымдастырушы дәрігер ретінде елге танылған. Бүгінде құрметті зейнет демалысында. Олар – жанұясында 2 ұл, 1 қыз, 6 немере тәрбиелеп отырған бақытты ата-ана.Тұрсынай Сейтпенбетқызы қабілетті ұйымдастырушы болудан бөлек көп іске қызығушылық танытады. Әлі күнге дейін спортпен, жүгірумен айналысады, қазақтың қара домбырасын тартып, ән айтып, күй шертеді, ұлттық ою-өрнекті баптап, тігіс те тігеді. Өзінің біліктілігін арттыру мақсатында Астана, Алматы, Ақмола қалаларына бірнеше рет оқуға да барған. Ел анасына айналған жанның түрлі бағытта жеткен жетістіктерінің бәрі де тынымсыз еңбек пен ізденуінің нәтижесінде екені анық.Абзал ардагердің осынау өнегелі өмір жолында еткен ерен еңбегі мен төккен тері еленіп, аудандық, облыстық, республикалық деңгейдегі алғыс хаттармен, төсбелгілер мен құрмет грамоталарымен марапатталған. Елдің ыстық ықыласы мен халықтың алғаусыз алғысына бөленген. Олардың бірқатары – 2008 жылы облыстық денсаулық сақтау басқармасының Алғыс хаты, 2009 жылы облыстық денсаулық сақтау басқармасының Құрмет грамотасы, 2010 жылы «ҚР Денсаулық сақтау ісінің үздігі» төсбелгісі, 2012 жылы «ҚР Денсаулық сақтау ісіне қосқан үлесі үшін» медалі, 2017 жылы ҚР Дәрігерлер Ассоциациясының «Алтын дәрігер» медалі, 2020 жылы «Ел ардақтысы» төсбелгісі.Тұрсынай Әбдісадық 2017 жылы зейнет демалысына шыққанға дейін «Жалпы тәжірибелік дәрігерлік бөлімінің» меңгерушілік қызметін мінсіз атқарып, өзінен кейінгі жастарға өнеге болды. Ол тәрбиелеген жас дәрігерлер қазірде халық игілігі үшін жұмыс істеп, меңгерушілік, орынбасарлық қызметтің тізгінін ұстап отыр. Ал денсаулық саласының ардагері Тұрсынай ханым қазір зейнетте болса да, халыққа қызмет қылудан жалыққан емес. Аудандық емхананың күндізгі бөлімінде меңгеруші, сұраныспен келген науқастардың жанына араша болып жүр.Осыдан бірнеше жыл бұрын ел арасында дүрбелең тудырған індет кімге болсын оңай соққан жоқ. Сол жылдары Тұрсынай ханымның аудан үшін атқарған жүйелі жұмыстарын айтпай кетуге болмайды. Індет басталған уақытта жылы жүрек дәрігер кезекті еңбек демалысында болса да, уақытты бос жібермей, ел басына күн туған кезеңде науқастарға дәрі-дәрмек, бетперде мен қорғаныш киімдері жетпей, қиналып жатқанда, бұл кемшіліктің орнын толтыруға кірісті. Күн-түн демей, бетперделер мен қорғаныш костюмдерін тігіп, сол кезде індет өршіп тұрған Бала би, Ш.Қодаманов, Ы.Жақаев ауылдарына, өзі қызмет етіп жатқан емхана қызметкерлеріне тегін таратты. Ел қамын бәрінен жоғары қойып, қолынан келгенін аямаған ел анасының ізгілікті істері мақтау мен мадаққа тұрарлық.Фото: Нұрболат Нұржаубай

Тұрсынай Сейтпенбетқызы: Ұлттық дәстүр ұмытылмауы керек

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласы прокуратурасының қадағалау актілері негізінде мемлекеттік қызметке кір келтіретін тәртіптік теріс қылық жасау фактілерімен лауазымды тұлғалар жауаптылыққа тартылды. Бұл туралы&nbsp;Қызылорда қаласының прокуратурасы&nbsp;хабарлады.Нақтылағанда, жауапты органның дерегінше &nbsp;Қызылорда қаласы білім бөлімінің басшысымен лауазымдық өкілеттіктерін асыра пайдалану арқылы 2022-2023 жылдар аралығында 5 қызметкерді конкурссыз білім беру ұйымдарына педагог ретінде жұмысқа қабылдау туралы заңсыз бұйрық қабылданған.<blockquote>«Қызылорда қаласы тұрғын үй-коммуналдық шаруашылығы, жолаушылар көлігі және автомобиль жолдары бөлімі басшысының орынбасарымен қала аумағында 40 жаяу жүргіншілер проекторларын орнату бойынша орындалмаған жұмыстар қабылданып, 27 миллион &nbsp;қаражат негізсіз аударылған.Қадағалау актілерін қарау нәтижесінде білім бөлімінің басшысы лауазымынан босатылса, бөлім басшысының орынбасары «қызметке толық сәйкес еместігі туралы ескерту» түріндегі тәртіптік жауаптылыққа тартылды», - делінген Қызылорда қаласы прокуратурасының хабарламасында.&nbsp;&nbsp;</blockquote>Фото: Нұрболат Нұржаубай

 Қызылорда қаласы білім бөлімінің басшысы қызметінен босатылды 

<a href="https://kyzylorda-news.kz/">Kyzylorda-news.kz</a> &nbsp;Жазғытұры жаңғырса, жер бусанып, күн райы түрленіп, табиғи өзгерістердің болары белгілі. Ал биылғы көктем Шиелі өңірі үшін нөсерлі болып тұр. Ауадағы жауын-шашын мөлшері бұрынғыдан бірнеше есеге көп. Бұған дейін өткінші жаңбырдың өбіне алданып үйренген жұртшылық ауа райындағы жауын пайызының күрт жоғарылауына таңғалысып-ақ жатыр. Иә, табиғатқа жаңа тыныс беретін көктемгі жауынның орны бөлек. Ол мол болса, егін еккен диқан да, мал баққан шаруа да табысқа кенелетіні анық. Дегенмен, таяқтың екінші ұшы тағы бар. Бұл – күн күрт өзгерсе, жаңбыр суымен толып, көлшікке айнала кететін аудан көшелері.«Өскен өңірдің» осыдан бір жыл бұрынғы санында тілші Сұлушаш Мадиярованың «Көлшікке айналған көшелер» тақырыбындағы мақаласы жарық көрген болатын. Ол аталған тақырып аясында аудандағы күн тәртібінен түспей тұрған осы мәселені кеңінен көтерді. Өзіміз күнде көріп жүрген Рысқұлов, Абылай хан, әл-Фараби, Байтұрсынов, Дәулеткерей көшелері 1 сағатқа жетер-жетпес жауған жауынның салдарынан көлшікке айналып үлгеретінін тілге тиек етті. «Тұрғындар, әсіресе, жауынды күндері қиналады. Жаяу жүрмек түгілі, көлікпен өтудің өзі мұңға айналған. Бұл проблема жаңбыр жауған сайын қайталанады» – деп жазған болатын.Өткен аптада толассыз жауған жаңбырдан кейін осы мәселенің қайталануы анық еді. Себебі нөсерден кейін шаһарда кептеліс пайда болып, көлік қозғалысының қиындауы, жаяу жүргіншілер жолын су басып, тұрғындардың көшелерден әзер өтуі белгілі жайт. Дегенмен, таңғы уақытта редакция алдына жиналған жауын суын тартып жатқан су тартқыш машиналарын байқадық. Арнайы техникалардың көмегімен кент ортасында орналасқан Рысқұлов пен Абылай хан көшелерінің қиылысы көзді ашып жұмғанша судан тазара кетті. Бұл аталған көше тұрғындарына да, сол маңайда орналасқан мектептің білім алушыларына да қолжалғау болды. Себебі былтыр нөсер кезінде оқушылардың көлшік судан өтуі мұң болатын.&nbsp;Кент және аудан әкімдігінің дер кезінде әрекет етуінің нәтижесінде жүзеге асырылып жатқан бұл іс аудан халқына судан келетін кедергінің алдын алғаны рас. Бүгінде аудан бойынша көшелерді көлшікке айналдырған жаңбыр суын тазарту үшін арнайы техникалар жұмылдырылған. Бұл жөнінде:<blockquote>– Көшелерді жиналып қалған жаңбыр суынан арылту мақсатында кент ішінде негізгі 3 машина, қосымша 2 машина жұмыс істеп жатыр. Қазіргі таңда суға толған барлық көшелер мен ғимараттардың айналасы тазартылып үлгерді. Әсіресе, ең көп су жиналатын Дүйсенбі Смайылов көшесі, РУ-6 шағын ауданында орналасқан жаңа көпқабатты үйлердің маңы мен орталық базар толық тазартылды. Бұндай жұмыстар кент ішінде жаңбыр жауған сайын тұрақты түрде жүргізіліп жатыр. Әрине, техникалық қауіпсіздіктерге байланысты көшелер күндізгі уақытта тазартылады, – деді жауапты сала маманы Ербол Жеңсікбаев.&nbsp;</blockquote>Әкімдік өкілдері бұл жұмыстарды әрі қарай кеңейту шаралары да жүргізіліп жатқанын айтады.Бір жыл бұрын таспаланған Рысқұлов және Абылай хан көшелерінің қиылысындағы көлік және жаяу жүргіншілер жолының жағдайы бүгінде біршама өзгерген. Бұл жаңбыр жауса, әбігерге түсетін халықтың да сұрауына сеп болды. Десе де, көшелердегі суағарлар санының аздығы бұл мәселенің жиі қайталануына алып келеді. Кәріз жүйесі жүргізіліп үлгермеген жаңадан салынған жолдардың мәселесі тағы бар. Бұдан кейін қалпына келтірілмеген асфальт пен ойдым-ойдым жөнделген жолдың беті жаңбыр тамса, көлге айналатыны белгілі. Бұл аудан игілігіне атқарылып жатқан жұмыстардың бетін жылы жауып қана қоя бермек. Мәселен, аудан әкімінің бастауымен өткен жылы ғана жөнделген 49 көшенің құрылысы аталған мәселенің салдарынан зардап шегіп жатса, жұрт игілігіне жөнделген жердің қаржысы көкке ұшпай ма? Бұның барлығы қалыпты жағдайға айналмас үшін дер кезінде ескерілсе, нұр үстіне нұр болар еді.

Қазақстан және Қызылорда облысының жаңалықтары