<a href="https://kyzylorda-news.kz/">Kyzylorda-news.kz</a> Қазіргі таңда қоғамның өзекті тақырыптарының бірі – жастар мен жасөспірімдер арасында құқықбұзушылықтың өсуі. Осы маңызды мәселенің себебін анықтап, алдын алу үшін 28 наурыз күні Шиелі аудандық ардагерлер үйінде қоғамдық кеңес отырысы өтті. Жиынды кеңес төрағасы Қабілеш Бекішов жүргізіп, күн тәртібіндегі мәселе аудандық қоғамдық кеңес мүшелерінің бақылауынан тыс қалмайтынын және ұсыныс-пікірлердің маңызды рөл атқаратынын жеткізді.Алғаш сөз алған Шиелі аудандық білім бөлімі басшысының орынбасары Марат Ақпанбетов аудан бойынша ересектер мен кәмелетке толмаған балалар арасында орын алған құқықбұзушылық фактілерінің туындау себептері мен олардың алдын алу шаралары туралы баяндама жасады.&nbsp;Бүгінде Шиелі ауданында 2023-2024 оқу жылында жалпы білім беретін 41 білім ордасы, оның ішінде 34 орта, 3 негізгі, 1 бастауыш, 1 кешкі мектеп және «Samgau School» және «Ziyatker School» жеке мектептері жұмыс істейді. Білім беру мекемелерінде кәмелетке толмағандар арасында қылмыс пен құқықбұзушылықтың алдын алу мақсатында жергілікті полиция қызметкерлері, емхана және қоғамдық даму бөлімінен құралған жұмысшы топтар кездесулер өткізген. Сонымен қатар беймезгіл уақытта компьютерлік клубтар мен көңіл көтеру орындарында жасөспірімдердің заңды өкілсіз жүруін болдырмау, құқықбұзушылық пен қылмысқа барудың алдын алу бойынша аптаның әр сенбі, жексенбі күндері бірлескен 167-ден астам білім қызметкерінен жасақталған мобильді топ құрамы рейд жұмыстарын жүргізіп, ескертпе хаттамалар толтырған.&nbsp;<blockquote>– Қазіргі таңда білім беру мекемелерінен арнайы топ құрылып, рейд жұмыстары кезінде кафе, мейрамханалар, азық-түлік дүкендерінің иелері мен кәсіпкерлерге Қазақстан Республикасының Әкімшілік құқықбұзушылық туралы кодексінің 133 және 200-баптарына сәйкес жауапкершілік көзделгені туралы және Қазақстан Республикасының Қылмыстық кодексінің 132-бабына сәйкес шара көрілетіндігі жайлы ескертулер берілді.</blockquote><blockquote>Себебі түнгі мезгіл уақытында жұмыс істеп жүріп, түрлі оқиғаларға тап болған оқушылар бар. 2023 оқу жылында 4 оқушы жол-көлік оқиғасынан жарақат алса, өкінішке қарай, 3 жасөспірім қайтыс болды. Сондай-ақ өткен оқу жылында 1 оқушының суицидке талпыну фактісі анықталса, 1 оқушы суицид бойынша, 2 жасөспірім газдан уланып қайтыс болды. Кешкі мектепте аудан аумағынан тыс жерде 2 оқушы қылмысқа барып, 2 оқушы Тараз қаласындағы девиантты мектеп-интернатқа орналастырылды, – деді М.Ақпанбетов.&nbsp;</blockquote>Әрине мектеп жасындағы балалардың қылмыстық іске баруы және суицид жасауы – алаңдарлық жағдай. Сондықтан қоғамдық кеңес мүшелері жауапты мамандарды аталған қылмыстардың алдын алу шараларына бір кісідей атсалысуға шақырды. Жиында сөз алған Шиелі кенті ардагерлер кеңесінің төрағасы Болат Күлімбет:&nbsp;<blockquote>– Бала – біздің болашағымыз. Сондықтан бала тәрбиесіне бейжай қарамаған жөн. Мектеп мұғаліміне қоса, ең бірінші, жауапкершілік үйдегі ата-анаға жүктелетіндіктен, оған күнделікті ақылын айтып, қадағалап отыру керек. Мектеп директоры психологтардың жұмысын жүйеге келтіріп, «Тәуекел» және «Психологиялық қолдау» тобындағы оқушыларға әрдайым диагностикалау, сұхбаттасу, бақылау жүргізіп отыруға тиіс. Алдағы уақытта кездесулер ұйымдастырылса, мен баруға дайынмын, – деді.&nbsp;</blockquote>Бүгінде оқушы мен персонал саны 300-ден жоғары 30 мектептің 18-інің бейнебақылау камерасы Шиелі аудандық полиция бөліміне интеграцияланған. Қоғамдық орындар, мектептер мен көшелерде орнатылған бейнебақылау камераларының құқық бұзушылық пен қылмыстардың алдын алуда көмегі көп екенін айтқан жергілікті полиция бөлімінің басшысы Н.Үсенбеков:&nbsp;<blockquote>– Аудан көлемінде жол-көлік оқиғаларының алдын алу, болдырмау мақсатында жыл басынан бері «қауіпсіз жол», «автобус», «құқық тәртібі» секілді жедел профилактикалық іс-шаралар республика, облыс және аудан көлемінде 5 мәрте өткізілді. Алдағы кезеңде орнатуға жоспарланған бейнебақылау камераларын мемлекеттік сатып алу жұмыстарын жүргізу барысында, ең алдымен, сапасы жоғары, талшықты оптикалық сым арқылы жұмыс істейтін камералармен ауыстыруға аудан әкіміне хат жолданған. Жуық арада өз шешімін табады деп сенеміз, – деді.&nbsp;</blockquote>Кеңес қорытындысы бойынша жауапты мамандарға ұсыныстар айтылып, тұшымды жауаптар алынды. Бала тәрбиесі мен оның қауіпсіздігінің алдын алу тек үйдегі ата-ана мен мектептегі ұстаздың ғана емес, қоғамның басты міндеті екенін ұмытпағанымыз жөн.

Шиелі ауданында түнгі рейд тұрақты өткізілуде

&nbsp;<a href="https://kyzylorda-news.kz/">Kyzylorda-news.kz</a>&nbsp;2017 жылы Қармақшы ауданы, Дүр Оңғар ауылындағы білікті сала маманы, облыстық мәслихат депутаты Орынбасар Төлепов басшылық жасайтын «Жаңажол» жауапкершілігі шектеулі серіктестігінің қолдауымен ауыл маңындағы «Ғали көлі» мекенінде орналасқан 5 гектар алқапқа алма, алмұрт, сары өрік, шабдалы сынды жеміс ағаштарын орналастырып, оны күтімге алған болатын.Міне, осы аралықта серіктестіктің Әділбек Алтынбаев, ерлі-зайыпты Молшыбек Ерәлиев пен Тиышкүл Кәукеновадай тәжірибелі бағбандарының қажырлы еңбегінің арқасында бүгінде жайқалған алма бақта 525 түп «Семеренко», 177 түп «Бесжұлдыз», 105 түп «Толдинк», 276 түп «Белый налив», сондай-ақ 138 түп алмұрт, 205 түп сары өрік, 112 түп шабдалы, жалпы алғанда 1538 түп жеміс ағашы өнім беріп тұр.<blockquote>– 2017 шаруашылық басшысы Орынбасар Төлеповтей жомарт жанның ұйымдастыруымен егілген алмабақ шаруашылық еңбеккерлерінің үлкен еңбегінің арқасында осындай жоғары нәтижеге қол жеткізді. Одан кейін шаруашылық басшысы болып сайланып, туған ауылымыздың гүлденуіне ерекше үлесін қосып келе жатқан Орынбасар ағамыздың күш салуы нәтижесінде алмабақтан жоғары өнім алып отырған жайымыз бар. Тындырымды тірліктің арқасында өткен жылы шаруашылыққа қарасты ауылдағы сауда орталығына 867 келі алма өткіздік. Сонымен бірге өрік, шабдалы, алмұрттан да мол өнім алып, ауыл тұрғындарына нарық бағасынан едәуір төмен бағаға саттық. Міне, бүгінде бригада мүшелері, яғни ерлі-зайыпты Молшыбек пен Тиышкүл үшеуміз осы бақты күтімге алудамыз. Мен бригадир болсам, олар бағбан. Бақты суару, күту барлығымыздың міндетіміз. Шаруашылық басшысы бас агроном Төлеу Ералиевпен бірге жиі келіп, ақыл-кеңесін беріп тұрады. Бағымызды күтуге арналған барлық дәрі-дәрмек, құрал-жабдық жеткілікті. Өрігіміз пісіп болды, ендігі кезекте алма, алмұрт, шабдалымыз пісіп, ол да елдің ауызына тиеді деп күтудеміз, – дейді бас бағбан.</blockquote>Айта кету керек, Әділбек Арыстанбекұлы бұған дейін ұзақ жыл шаруашылықтың бақша бригадасын басқарып, ауылдастары арасында құрметке бөленген азамат. Былтыр оның басқаруымен шаруашылықтың бақша бригадасы 5 гектар егістік алқапқа орналастырған картоптан 33 тонна өнім алса, 1 тонна қызанақ, 1,5 тонна қияр, 800 келі сәбіз және 1 тоннадан астам қауын-қарбыз өндірді. Осындай ілкімді істердің нәтижесінде бригада мүшелері Ғани Қошқаров пен Бауыржан Алпысбаев шаруашылық бойынша үздіктер қатарынан орын алған. Осы ретте, серіктестіктің бас гидротехнигі Балтабай Сәметовтен алма бақ бригадасы жайлы айтып беруін сұрадық.<blockquote>– Әділбек Алтынбеков, Молшыбек Ерәлиев, Тиышкүл Кәукенова сынды майталман мамандардың еселі еңбектерінің арқасында алма бағымыздағы жеміс ағаштары биыл да мол өнім берсе екен деп отырмыз. Әсіресе алмадан жоғары өнім аламыз деген ой бар. &nbsp;Шабдалыдан да, алмұрттан да жақсы өнім күтеміз. Тек мына қарға деген құстар оған кедергі келтіріп тұрғаны болмаса, қалғаны ретімен боа жатар. Алма бақтағы жеміс ағаштарымыздан өндірілген өнім дүроңғарлықтардың ырзық-несібесі. Ауыл орталығында шаруашылыққа қарасты сауда орталығы бар. Жемістерді соған өткіземіз.Серіктестікте өндірілген барлық өнім нарық бағасынан арзанға сатылады. Халық та риза, біз де ризамыз. Айтпақшы, былтыр ауыл маңынан 5 гектар жерге Меркеден тамшыламалы суару әдісі арқылы 860 түп, атап айтқанда «Голден делишес», «Старкримсон», «Мельба», «Столовка», «Қызылай» сынды алма сортын орналастырған болатынбыз. Құдай қаласа, 2-3 жылда оның да өнімін көреміз деп отырмыз. Сонымен бірге, 35 гектар егістік алқапқа орналастырған жүгеріні бүгінде силосқа басып, оны алдағы уақытта малға жем ретінде пайдаланамыз, – деді ол.</blockquote>Фото: Нұрболат Нұржаубай

Жаңажол ауылында жайқалған алма бақ бар

<a href="https://kyzylorda-news.kz/">Kyzylorda-news.kz</a> Жаңақорған аудандық Манап Көкенов атындағы аудандық мәдениет үйінде 1 сәуір - күлкі күніне орай режиссер Тохтар Әжімұратов дайындаған жазушы, драматург Баққожа Мұқайдың "Сергелдең болған серілер" атты спектакльін (комедия) "Жаңақорған" халық театры сахналады.1 сәуір – күлкі, әзіл - қалжыңға толы сонымен қоса өзгелерді алдау күні деп есептеледі. Бұл күні алданғаны үшін ешкім қабақ шытпайды. Күлкі адамды емдейді және жағымсыз қасиеттерден тазартады деп түсінген. Бұны «рухани тазару» (катарсис) яғни күлкі арқылы тазару деп атаған. Қысқа әзілдер мен сықақ өлең, өткір тілмен жазылған қысқа сөйлемдер ең алғаш осы кезеңде пайда болған делінеді. Әзіл әңгімелер алғашында қабір тастарында жазылған, сонан соң әдеби шығарма болып енген.Қазіргі кезде 1 сәуір күні ешкім демалмайды, бір - біріне сыйлық ұсынып, мерекелік дастарқан жайылмайды. Тек ел бір - бірімен қалжыңдасып, көңіл көтереді.Осы атаулы күні мәдениет майталмандары көпшіліктің көңілін көтеретін ерекше қойылымды сахналады. Ондағы әрбір іс-қимыл, көңіл шаттыңы, сезім дірілі, шаттық-күлкі, қуаныш пен қайғы тікелей көрерменге әсер етіп, түрлі күйге түсіреді. Осыдан көрерменнің өмірге, коғамның тыныс-тіршілігіне деген өзгеше көзқарасы қалыптасады. Осыны сезіну үшін жан дүниемізді күнделікті күйбең тіршіліктен бір сәтке болса да арашалап, рухани демалыс сыйлады.Аудан тұрғындарының танымы мен талғамына сай жұмыс істейтін өнер ұжымының әрбір сахналаған көрінісі ерекшелікке толы. Сомдаған рөлдерінен сол кезеңнің әділетсіздік жаулаған түйткілді мәселелері мен әлеуметтік шындықты көрдік. Оқиғаға арқау болған жан тебірентерлік көріністен қасіретке толы қазақ тарихын көріп, режиссердың зерделеу жұмысына, &nbsp;артистердің ойнау шеберлігіне тәнті болдық. Рухани кешке жи¬налған қауым да кейіпкерлермен бірге мұңайып, қосыла күліп, сахнадағы көріністі жан-жүрегі¬мен жылы қабылдап отырды.Сахна өнерінің негізгі мақсаты – қоғам мен әлеумет өмірінің көркем бейнесін өз уақытымен үндестіре алу болса керек. Бүгінгі күнмен үңдестік тапқан «Сергелдең болған серілер» осы мақсат үдесінен шықты. Қойылымда режиссердің, сондай-ақ, актерлердің де ой-толғамы, берілген тапсырманы шынайы орындағаны айшықталды. Ханшайым рөлін халықты өзінің өнерімен тәнті еткен актриса Кенже Әкімбаева сомдаса, актерлік құрамда өнер көрсеткен Сайрам Ділманов, Абай Камалов, Балмұхаммед Әбжаппаров, Жасдәурен Сабырхановтар да &nbsp;көрерменнің ыстық ықыласына бөленді.Осы ретте аудан жұртшылығы өнер ұжы¬мының кезекті қойылымын алдағы уақытта да &nbsp;асыға күтетінін айтқымыз келеді.&nbsp;

Жаңақорған халық театры көрерменді қуантты

<a href="https://kyzylorda-news.kz/">Kyzylorda-news.kz</a> Бүгінде ауданда Табиғат-Ана оянып, күн күлімдеген кезеңде айналаны тазалап, сенбіліктер ұйымдастыру, ағаштардың түбін әктеп, жерге жас шыбықтар отырғызу жыл сайынғы үрдіске айналған. Ауа райының бірнеше күнгі өзгерістерінен кейін қазір көктемнің туғанын сездіргендей, жылы леп есіп тұр. «Сәуір болмай, тәуір болмас» деуші еді қазақта. Бәлкім бұған дейінгі күн райынан қыс ызғары кетпей, әлі де жылылық сезіле қоймайтындықтан болар.Көктен күлімдеген күн қызу тіршілікке кірісетін уақытты көрсетіп тұр. Көктемнің сәні – көшет егу екені анық. Соған сәйкес аудандағы сауда орындары мен жергілікті дүкендерде де жас көшеттер мен жеміс ағаштарының саудасы қызып тұр. Оқырманға пайдалы болсын деген ниетте біз де жас өскіндердің бағасын білмекке орталық базарға бет алдық.&nbsp;Межелі орынға жеткенде, саудасын қызу жүргізіп тұрған саудагерлерді байқадық. Жыл сайынғы көшет саудасына машықтанып үлгерген олар алдарына жасыл желектің түр-түрін үйіп қойған. Іздегеніңіздің бәрі бар. Сұрастыра жүріп, өрік, шие, черешня, алмұрт пен алманың әртүрлі сорттарын, хош иісті гүлдердің түрлерін, керек десеңіз, мәңгі жасыл күйін сақтайтын шыршаны да кездестірдік. Аталған тұқымдардың көбі ауданға Түркістан облысынан жеткізіледі. Балғын әрі жерге отырғызуға дап-дайын күйде келген көшеттерге сұраныс көп. Олардың сапасы да жақсы деңгейде. Сатушылардың айтуына қарағанда, көшеттерді жиі суғару мәселе емес, олар тек шілде айында ғана судың көп мөлшерін қажет етеді. Табиғат жаршысына айналған осынау өсінділерді халыққа ұсына отырып, жинаған тәжірибесінен ағаш көшетін сатып алып, одан өнім жиып, қазірде жемісінің дәмін көріп отырған тұрғындардың да бар екенін айтады.&nbsp;Шыбықтардың шетіне қыстырылған дайын өнімді ағаштың суретін көріп, қызығушылық танытып, бағасын сұрап көрдік. Жеміс беретін ағаш көшеттерінің құны 1 000-1 500 теңгені құрайды екен. Ал кербез көркімен жер жауһарына айналған гүлдердің бағасы – 1 000 теңге. Көзге ерекше ілінген бояуы қанық, келбеті ерек шырша ағаштары жайында да сұрап білдік. Жылдың барлық мезгілінде өзіне тән ерекшеліктен танбай, сұлулығымен өзіне тартып тұратын бұл ағаш шыбықтары 2 000 теңгеден сатылып жатыр екен.&nbsp;Хош иісімен тынысыңды ашатын осындай кішігірім бақ арасында жүріп, оларға қызықпау мүмкін емес еді. Есік алдына өң беріп, көктемгі көшет егу науқанына өз үлесін қосқалы жатқан ағаш сатып алушы жанды көріп тағы қуандық. Тұрғындардың аз уақыттың ішінде бірнеше мәрте кішкентай талдарға сұраныспен келуі көшет сатып алушылардың жылдағыға қарағанда молая түскенін аңғартты. Шынында, бұл жағымды үрдіс бәріміздің айналысар ісімізге айналса игі. Себебі атадан мал қалғанша, тал қалғаны мың есе артық емес пе?&nbsp;

Шиеліге көшет қайдан келеді?

<a href="https://kyzylorda-news.kz/">Kyzylorda-news.kz</a> Жаңақорған ауданында рамазан айының құрметіне орай, жас өрендер арасында құран оқудан жарыс өтті. «Алланың өзі де рас, сөзі де рас. Рас сөз ешуақытта жалған болмас». Абай атамыздың бұл өлеңі әлі де өз өміршеңдігін көрсетуде. Асыл дініміз Исламның қайталанбас құндылығы, екі дүние бақытына жеткізетін Алланың кәләмі Құран екені баршаға аян. Қаншама ғасыр өтсе де бірде-бір әрпі өзгермеген Құран адамзаттың игілігі үшін қызмет етіп келеді. Жаңақорған аудандық мешітінің қолдауымен әрі «Жаңарған Жаңақорған жастары» қоғамдық қорының ұйытқы болуымен жылдағы дәстүрден жаңылмай, Құранның 30-шы парасы мен Азан шақырудан өткен аудандық жарысқа отызға жуық бала қатысты. Ерікті жастардың ізгі бастамасымен бастау алған имандылық жарысы бірнеше жылдан бері өткізіліп келеді. ҚМДБ-ның Қызылорда облысы бойынша өкілдігі мен Жаңақорған ауданы имамдары қазылар алқасының құрамынан табылды.&nbsp;Құран мен Азан жарысы екі мешітте бөліп өткізілді. &nbsp;Оның ішінде, Құранды мәнерлеп оқу сайысына 23, ал &nbsp;қасиетті Құранның соңғы 30-шы парасын жатқа оқуға 10, Азан сайысына 26 шәкірт қатысты. Қатысушыларға сәттілік тілеген ауданның бас имамы Әбдіхалық қажы Махмұтүлы рухани шара ел Ал қазылар алқасының төрағасы облыстық «Ақмешіт-Сырдария» мешітінің наиб имамы Шыңғыс қари Садуов және облыстық «Ақмешіт-Сырдария» мешітінің наиб имамы Мағжан Өмірбеков және Шалқия кентінің имамы Дәуітбек Әлімбеков болды. Қазылар баға беру барысында үміткердің барлық қырына: оқу мәнерінен бастап, дыбыстарды шығаруы мен тәжуид ережелерін сақтауына баса мән берді.Түс ауа аяқталған сайыстың қорытындысын білуге барлық қатысушы асыққаны анық. Өйткені, бас жүлде иегері қасиетті Мекке қаласына кіші қажылық сапарға тегін жолдамаға ие болады. Қазылар алқасының шешімін тағатсыздана күткен үміткерлер ішінен үздігінің атын атауға һәм марапаттауға Шыңғыс қари, Мағжан қари, ауданның бас имамы Әбдіхалық қажы Махмұтұлы, «Жаңарған Жаңақорған жастары» қоғамдық қорының төрағасы Еркінбек Айнақожаев, «Қум сахаба» мешітінің имамы Ержан Сейтжаппаров, «Хисамиддин Сығанақи» мешітінің имамы Жеңіс Ашимов &nbsp;ортаға шықты. Қазылар алқасының шешімімен Құранның 30-шы парасын жатқа айту жарысының бас жүлдесі яғни, умра қажылыққа жолдама Сүттіқұдық ауылынан келген шәкірт Жаңабай Жапековке бұйырды. Қасиетті мекенге жолдаманың сертификатына демеушілік жасаған «Заңғар» сауда үйінің басшылары Ерлан, Нұржан Палмановтар табыстады.Бес жылдан бері үрдіске айналған бұл сайысқа аудан мешіттерінен жетпістен астам шәкірттері бақ сынады.&nbsp; Жарыстың нәтижесінде келесі шәкірттер жеңімпаз атанды:Құранды жатқа оқу жарысы&nbsp; 1 орын Малкаждар Әлихан (80000 теңге) 2 орын Омар Шерхан (60000 теңге) 3 орын Жақсыбек Нұрсұлтан (40000 теңге) Құранды мәнерлеп оқу жарысы 1 орын Нұрбеков Даниял (60000 теңге) 2 орын Тұрсынқожа Зайдулла (60000 теңге) 3 орын Асайын Раян (60000 теңге) Азан шақыру жарысы&nbsp; 1 орын Әділбек Айжігіт (30000 теңге) 2 орын Файзулов Ясин (20000 теңге) 3 орын Дәулетиярұлы Аллаяр (10000 теңге) Айта кетейік, барлық қаржылай сыйлықтар ауданымызда түрлі салада өз кәсіптерін жүргізіп отырған азаматтарымыздың демеушілігімен жасалды.Сонымен қатар, құранның соңғы отызыншы парасын жатқа оқудан 1-орын Ернар Алғабас (120 000теңге), 2-орын Сунатулла Исмаилов (100 000теңге), 3-орын Ерасыл Ақжігіт (70 000теңге), ал Құранды мәнерлеп оқудан 1-орын Данат Әбен (100 000теңге), 2-орын Ержан Зәйдин (70 000теңге), 3-орын Мұхамеджан Сұлтан (50 000теңге), Азан шақыру сайысында 1-орын Қожахмет Талғатұлы (70 000теңге), 2-орын Болат Нұрсұлтан (50 000теңге), 3-орын Айжігіт Әділбек (30 000теңге) алды. Айта кету керек, дәстүрлі түрде аудандық деңгейде ұйымдастырылған Құран жарысына жаңақорғандық жомарт жандар мен мешіт жамағаты қаржылай демеушілік жасады. Сондай-ақ ауылдардан ең көп шәкірт жарысқа қатыстырған Бесарық, Сүттіқұдық ауылының имамдарына Қоғамдық қор тарапынан арнайы бағалы сыйлықтар табысталды.Рухани шара соңында ерікті жастар аудандық мешіт ауласында имамдар мен шәкірттер арасында Ұлттық спорт түрлерінен жарыс өткізді. Қатысушылар спорттың гір тасын көтеру, қол күрес, асық ату, садақ ату, арқан тартыс, қаппен ұру түрлерінен кім мықтыны анықтады. Танымал жаттықтырушы Шыңғыс Азнабаев үйлестірген спорт шара жүлдегерлеріне Диплом мен бағалы сыйлықтар табысталды.Иә, қорыта айтқанда, имандылық – ұрпақ тәрбиесінің ең басты қайнар бұлағы. Бүгінгідей жаһандану заманында қоғамдағы кейбір жеткіншектердің әдепсіз әдеттері, мұсылманға жат қылыққа бой алдыруы, ата-анасын тыңдамауы, ертелі-кеш телефонға телміруі, сөз жоқ осы имандылық дәнінің бойға дұрыс дарымағанынан. Атам заманнан қазақ үшін бала қымбат болса, оның тәрбиесі одан да қымбат.&nbsp;

Жас өрендер Құран оқудан жарысқа түсті 

«10 мың адамға 100 жұмыс орны»: Қызылордада Президент пәрмені қалай орындалып жатыр?

<a href="https://kyzylorda-news.kz/">Kyzylorda-news.kz</a> Павлодардағы мектептердің бірінде жыл басында балалар арасында жанжал шықты. Жақында Павлодар облысының кәмелетке толмағандардың істері жөніндегі мамандандырылған ауданаралық соты зардап шеккен қыздың анасына айыппұл салды, - деп хабарлайды Tengrinews.kz.Куәгерлердің – оқиға болған мектеп қызметкерлерінің, кәмелетке толмағандардың өздері, олардың заңды өкілдерінің айғақтарын, сондай-ақ бейнебақылау камерасынан алынған бейнені зерделей келе, сот қыздың тарапынан баланы қорлап, арандату болғаны, салдарынан агрессия туғаны туралы қорытындыға келген.Сот үкімі бойынша, сол күні алтыншы сынып оқушысы физика сабағына бара жатқанда, оны жетінші сыныпта оқитын оқушы қыз бен оның құрбысы дәлізде күтіп алған. Қыз оның түрі, киген киімдері туралы кемсітетін сөздер айтып, оны өткізбей қойған, сонымен қатар сөмкесіндегі сусынын тартып алып, қайтармаған. Осыдан біраз уақыт бұрын ол сол мектептің төменгі сыныбында оқитын қарындасын "коротышка" деп мазақ қылған.Нәтижесінде сот қыздың әрекетінде ұсақ бұзақылық болды деген қорытындыға келген. Анасы қызын тәрбиелеу бойынша өз міндеттерін орындамағаны үшін кінәлі деп танылып, оған 51 688 теңге көлемінде әкімшілік айыппұл салынды.Еске салайық, бұған дейін интернетте Павлодар облысында аудан әкімінің ұлы оқушы қызды соққыға жыққаны туралы ақпарат пайда болған еді. Ақпаратты Оқу-ағарту министрлігі растады.Фото: Нұрболат Нұржаубай

Әкімнің ұлы соққыға жыққан оқушы қыздың анасына айыппұл салынды

<a href="https://kyzylorda-news.kz/">Kyzylorda-news.kz</a>&nbsp; &nbsp;Қолөнер – қолданбалы өнер. Дәстүрлі тұтыну және сәндік бұйымдарын жасайтын ұсақ өндіріс. Қолөнершілер негізінен табиғи шикізаттарды пайдаланып, қарапайым еңбек құралдарының көмегімен көркем композицияның шешімімен тұрмысқа қажетті мүліктер, музыкалық аспаптар, қару-жарақ, құрал-саймандар жасайды.&nbsp; Әрбір қолөнер туындысы өз заманының материалдық мәдениетінің үлгісі және халық талғамының, әлеуметтік қоғамдық жағдайының, діни сенімінің, салт-дәстүрінің нақтылы көрінісі.&nbsp; Шыны керек, соңғы уақытта эностильге мойын бұра бастадық. Ұл-қыздарымыз халқымыздың қайталанбас ұлттық киімдері мен бұйымдарын күнделікті өмірде тұтынуға көшті. Ұлттық нақыштағы киім үлгілері мен әшекейлер заманауи дизайнда көрініс тауып, сән әлемінде ғана емес, тіпті тұрмыста да трендке айналды. Сәнгерлер мен шеберлер осы трендті қазіргі сәтпен сабақтастырып, одан табыс тауып жүр. Солардың бірі қазалылық – Нұрбану Сағырбек.&nbsp; Он саусағынан өнер тамған талантты жан табандылығының арқасында, қазіргі таңда, трендке айналған қазақы бұйымдарды, яғни, қыз-келіншектерге арналға әшекейлерді дайындап, сатуда. Қазірдің өзінде тұрақты тұтынушыларын тауып үлгерген оның бұйымдары, бүгінгі заманға лайық етіп жасалғандығымен ерекше. Осы ретте, қазақи стильде әшекей бұйымдар дайындап жүрген жанға арнайы жолығып, жасап жүрген жұмысымен танысып қайтуды жөн көрдік.&nbsp; Шеберханадағы тірлік күндегіше тынымсыз жүріп жатыр. Нұрбану әдеттегідей қыз-келіншектерге арналған тағы бір жаңа бұйымды әзірлеп әлек. Жанына жақындағанымызды байқаған ол: "соңғы штрихтар" деп бізге сәл күте тұрыңыз деген сыңай танытты. Біз қолындағы әсемдікке анадайдан көз тастап, тамашалап тұрдық. Әдеттегі ісін сөреге қойған ол жанымызға келіп, жасаған жұмыстарын таныстырып, бұл кәсіпке қалай бет бұрғандығын әңгімелеп берді.&nbsp; – Жалпы, менің бұл кәсіпке келуім тегін емес. Кішкентайымнан қолөнерге қатты қызықтым. Оның үстіне, анам да қолы алтын, шебер кісі. Анам іс тігіп, тоқыма тоқитын. Оның бойындағы асыл қасиет менің де бойымнан табылды. Ал, қазір әшекейлер мен бұйымдарды кәсіпке айналдырған болсам, кішкентайымнан тігінге икемім болғандығынан шығар. Жалпы, мен жасап жүрген қай ісімді де тігіншілікпен ұштастырамын. Егер тігінді білмесем, бұл кәсіпке бет бұрмас та едім, – дейді қолөнер шебері.&nbsp; Нұрбану, әрбір әшекейді заманауи үлгімен ұштастырып жасауға тырысады. Себебі, тапсырыс берушілер жасалған бұйымдардың қайталанбас ерекше әрі күнделікті өмірде тағып жүруге ыңғайлы болуын сұрайтын көрінеді. Тұрақты тұтынушыларының ұсыныстарын ескеріп, соларға лайық қызмет көрсетуді басты ұстанымы санайтын Нұрбану этностильдегі киім, тақия, шекелік, шашбау, сырға, білезік, сақина сынды заттарды қолдан жасап, оны жергілікті тұрғындарға ғана емес, сырт қаладан тапсырыс берген сатып алушыларға жөнелтіп жүр.&nbsp; – Расын айту керек, бұрын көбі ұлттық болмысымызға сай келетін қазақы киімдер мен бұйымдарды тек той-томалақта не мерекеде ғана тұтынатын. Ал, қазір қазақша стиль трендке айналды. Жұртшылықтың, әсіресе, жастардың да талғамы заманауи заттардан қазақи дүниелерге ауысып жатыр. Өйткені, қазіргі буын индивидуал әрі эксклюзив заттарға құмар. Сондықтан, мен де сол талғамға сай болу үшін трендтен қалмай, төл өнерімізді төрге сүйреп жүрген жайым бар, – дейді Нұрбану Сағырбекқызы.&nbsp; Төл өнерді түлетіп жүрген кейіпкеріміз бұл кәсіпті алғашында желі арқылы бастаған. Кейін жұмыстарын желіде ғана жарнамалап қоймай, кәдуілгі дүкен сөрелеріне қойып, кәсібін кеңейтуді жөн көріпті.&nbsp; – Студент кезімде тасбих, білезікті қолдан жасап сататын Жадыра деген апайдың қасында көмекші болдым. Жанында жүріп, біраз дүниені жасап үйрендім. Қызығушылығым кейін кәсіпке ұласып, 2019 жылы тәуекелге бел буып,осы істі бастап кеттім. Қазір, шүкір, тынымсыз еңбегімнің арқасында табыс тауып, тірлігімді тіктеп келемін, – дейді ол.&nbsp; Қазақ халқының ұлттық киімдері мен бұйымдары мәдениетіміз бен салт-дәстүріміздің айқын көрінісі. Оның заманауи сән нарығына сай түрленіп, жаңашыл көрініске ие болып жатқандығы көпті қуантады. Әрине, олардың осылай қайта жаңғырып жатқандығы оған жан бітіріп жатқан қолөнер шеберлерінің арқасы. Өз кәсібі арқылы ұлт мәдениетіне өзіндік үн қосып жүрген қазалылық қолөнер шебері Нұрбану Сағырбекқызының да еңбегі ерен десек жарасатындай. Өйткені, ол болмашы әрекеттер арқылы қазақилықты әрдайым трендке айналдыруды көздеді. Біз де сол секілді мүмкіндіктерге ұмтылып, ұлттық мүддеге қарай жұмылсақ, қазақи құндылықтарға деген қоғамдық көзқарастың тұғырын биіктетіп қоймай, табысқа да кенелген болар едік.

Нұрбану Сағырбек: Тігін – тұнып тұрған математика

<a href="https://kyzylorda-news.kz/">Kyzylorda-news.kz</a>&nbsp; &nbsp;Қазалы ауданының әкімі Мейрамбек Шермағанбеттің төрағалығымен бірқатар өзекті мәселелерге қатысты мәжіліс өтті. Мәжілістің күн тәртібінде 2024 жылға арналған салық түсімдерін арттыру, Қазалы ауданында шағын және орта кәсіпкерлік субектілерінің тіркелімі мәселелері қозғалды.Алдымен, Қазалы ауданының басшысы салық салу базасын ұлғайтуға байланысты бекітілген жоспарға сәйкес атқарылып жатқан жұмыстарға тоқталды. Бұл бойынша, Қазалы &nbsp;аудандық экономика және қаржы бөлімінің басшысы Әліби Әбиев пен оған қосымша Қазалы аудандық мемлекеттік кірістер басқармасының басшысы Темірлан Қожаназаров қосымша баяндама жасап, атқарылып жатқан жұмыстарға тоқталды.Осы ретте, Қазалы ауданының әкімі Әйтеке би кенті, Қазалы қаласы және ауылдық округ әкімдеріне басты міндеттердің бірі – салық салу базасын ұлғайту және бюджетке қосымша кіріс көздерін қалыптастыру екенін айтып, осы бойынша жұмысты күшейтуді қатаң тапсырды.Мәжілістегі екінші мәселе Қазалы ауданындағы шағын және орта кәсіпкерлік субьектілердің тіркелімі бойынша Қазалы аудандық кәсіпкерлік және өнеркәсіп бөлімінің басшысы Ақтілеу Бөріқұлақов хабарлама жасады. Бөлім басшысына бұл бойынша жыл соңына дейін кәсіпкерлік субъектілердің белсенділігін жоспарланған межеге жеткізу керектігін айтып, ауыл әкімдерімен бірлесіп, жұмыстарды жүйелі ұйымдастыру қажеттігін ескертті. Сонымен қатар, мәжілісте кент, қала және ауыл әкімдері мен кәсіпкерлік бөлімінің басшысына Қазалы ауданында шағын өндіріс орындарын көптеп ашу, кәсіп ашамын деген жандарға жан-жақты қолдау көрсету жөнінде тапсырмалар берілді.Айта кетейік, мәжілісте мұнан бөлек бау-бақша егу жұмыстары, көлдермен жайылымдық жерлерді суландыру, мал басының есебін нақтылау мәселелері қозғалып, жауапты сала басшыларына нақты тапсырмалар жүктелді.&nbsp;

Мәжілісте өзекті мәселелер талқыланды

<a href="https://kyzylorda-news.kz/">Kyzylorda-news.kz</a>&nbsp; Қоршаған ортаның тазалығына жауапкершілікпен қарау – әрбір адамның міндетті. Бүгін, тазалықты жанына серік еткен қазалылықтар сенбілікке шығып, Қазалы ауданы аумағындағы бей-берекетсіз шашылған қоқыстарды жинастырды.Соның ішінде, Қазалы ауданы Әйтеке би кенті мен Қазалы қаласының аралығы, қазақ қорымы – Арзан сити аралығы, Мектепбай каналы және Тесік көпір мен 5 квартал аумағы, Водокачка елді мекеніне барар жол, қоқыстан тазартылды.Қазалы ауданы орталығындағы жүргізілген сенбілік жұмыстарын Қазалы ауданының әкімі Мейрамбек Шермағанбет аралап көріп, Қазалы ауданы Әйтеке би кентінің әкімі Мұрат Әбсұлтановқа әрбір аймақтағы жүргізіліп жатқан тазалық жұмыстарына байланысты тапсырмалар берді.Тазалық жұмыстары барысында Қазалы ауданы орталығындағы ғимараттар мен кәсіпкерлік нысандардың сырт келбетіне әктеу, сырлау жұмыстарыда жүргізілді.Сенбілік жұмыстарына Қазалы аудандық мәслихат депутаттары Талғат Әліпбаев пен Нұркен Ботабаевта атсалысып, арнайы техникалармен қамтамасыз етті.Жергілікті жердің тазалық жұмыстарына барлық мекеме қызметкерлері қатысып, әрбір ұжым бөлінген аумақтарда тазалық жұмыстарын қарқынды жүргізді.Айта кетейік, жалпы Қазалы ауданы көлемінде ұйымдастырылған тазалық жұмыстарына 2300-ден астам адам, 39 техника жұмылдырылып, 34,7 тонна қоқыстар тазартылды және 30,3 тонна тұрмыстық қатты қалдықтар арнайы орынға шығарылды.&nbsp;

Қазалыда сенбілік өтті

<a href="https://kyzylorda-news.kz/">Kyzylorda-news.kz</a> Өңірлердегі әкімдіктерге су тасқыны болатынын қыста ескерткен. Бұл туралы үкіметте "Қазгидромет" РМК бас директоры Данара Әлімбаева мәлім етті, - деп хабарлайды Tengrinews.kz.Әлімбаеваның айтуынша, бүгінде Ақтөбе облысында су тасқынының шарықтау шегі төмендеп келеді.<blockquote>"Солтүстік Қазақстан, Ақмола, Қарағанды, Шығыс Қазақстан, Ақтөбе, Қостанай облыстарында су деңгейінің көтерілгені байқалады. Батыс Қазақстан облысында су деңгейі көтеріледі деп күтіледі. Трансшекаралық өзендер бойында су деңгейі көтеріледі. Қазір су деңгейі көтеріліп жатыр, жақын арада, апта аяғында, жұмадан бастап болады деп күтеміз", - деді "Қазгидромет" директоры.</blockquote>Данара Әлімбаеваның айтуынша, синоптиктер су тасқыны болуы мүмкін аймақтар туралы ақпаратты қыста берген.<blockquote>"Желтоқсаннан бастап су басу қаупі бар өңірлер болатынын айтып жатырмыз, бұл Ақтөбе, Атырау, Қостанай, Қарағанды, Шығыс Қазақстан облыстары мен Абай облысында. Бұл аймақтарда су тасқыны қаупі жоғары болды. Бұл ақпарат жергілікті атқарушы органдарға жолданды. Оның үстіне, наурыздан бері 100-ден аса ауа райы туралы ескерту жасалды", - деді ол.</blockquote>&nbsp;

«Әкімдіктерге су тасқыны болатынын қыста ескерткенбіз» - Қазгидромет директоры

<a href="https://kyzylorda-news.kz/">Kyzylorda-news.kz</a>&nbsp; &nbsp;Жуырда, Роза Бағланова атындағы Қазалы аудандық мәдениет орталығында халық әртісі, актриса Әмина Өмірзақованың 105 жылдығы, талантты тұлға КСРО Халық әртісі Сәбира Майқанованың 110 жылдығына орай «Қазалы аруы – 2024» атты Қазалы аудандық арулар байқауы өтті.Қыз балалардың жан дүниесіндегі көркемдік талғамын қалыптастыру, қазақ халқының қыз тәрбиелеу салт-дәстүріне байланысты әдептілік, инабаттылық, ізеттілік қасиеттерін бойларына сіңіру. Бойына ақылдылықты, дарындылықты, білімділікті жинаған Қазалы ауданындағы ару қыздарды анықтау мақсатында ұйымдастырылды.Байқауға бойы 1,65 см-ден жоғары және 18-25 жас аралығындағы алты өнерлі де сұлу арулар қатысты. Байқауға арулар – «Сымбатпен сыры жарасқан» таныстыру, «Қыз өссе, елдің көркі» өз өнері, «Қыздарға әсемдік жарасады» сән үлгісін, «Сұлу қыз дәмді асымен сүйкімді» ас мәзірін дайындау шарттары бойынша ару-қыздар сынға түсті.Қазылар алқасының төрайымы – Гүлбану Досан, қазылар алқасының мүшелері Ақмарал Жауынбаева және Айнұр Найпованың шешімдері бойынша, дәрежелі үшінші орынды – Бейбіт Айгүл 234 мектептің қызметкері, дәрежелі екінші орын – Тиышбай Сымбат 249 мектеп-лицейінің қызметкері, жүлделі бірінші орынды Бақыт Әмина Лақалы ауылының аруы иемденді.Сонымен, байқаудың Бас жүлдесін Төлепберген Мәдина Майдакөл ауылының аруы иемденді. Тәжіні облыстық "Бұрымды ару" конкурсының Лауреаты Әнел табыстады.Сонымен қатар, "Жанбота" сән салонының меңгерушісі Айнұр Найпова жүз мың теңге тұратын макияж курсы сертификатын тапсырса "Асылым мед" шығыс медицина орталығының директоры Болат Айда ханым байқаудың бірінші орын иегері Бақыт Әмина аруымызға отыз мың теңге қаржылай сыйлығын табыстады. Байқауға қатысып өнер көрсеткені үшін Шәкіман Ғалия және Қойшыбай Айғаным арнайы номинацияларымен марапатталды.Байқау барысында, Қазалы аудандық мәдениет орталығының өнерпаздары өнер көрсетіп көрерменге көтеріңкі көңіл-күй сыйлайды.Байқауға демеушілік жасаған "Жанбота" сән салонының меңгерушісі Айнұр Найпова және "Асыл мед" шығыс медициналық орталығының директоры Болат Айдаға Қазалы аудандық мәдениет орталығы атынан Алғыс білдіреміз.&nbsp;

Қазақстан және Қызылорда облысының жаңалықтары