<a href="https://kyzylorda-news.kz/">Kyzylorda-news.kz.</a> «Мен үшін жақсы мұғалім бәрінен де артық, өйткені мұғалім-мектептің жүрегі» деген еді қазақ ұстаздарының атасы Ыбырай Алтынсарин. Уақыт көші қанша алға жылжығанымен, қай елде де ұрпақ тәрбиесі мен ұстаз біліктілігі қоғамның барометрі екенін байқаймыз.Туған жерден түлеген перзенттердің ішінде ұстаздық жолға түсіп, шәкірттерін өмір мектебіне шыңдап жүргендер аз емес. Соның бірі де бірегейі – Қазақ Ұлттық университетінің қауымдастырылған профессоры, педагогика ғылымдарының кандитаты Сараш Қоңырбаева. Жақында ғана «Аранды жырлары» деген атпен ауыл ақындарының жинағын шығарып, тынымсыз еңбегінің арқасында көптің батасын алған ұстазбен сұқбаттасудың сәті түскен еді.– Арандылық бала Сараштың дана Сарашқа айналу жолына бір көз салсақ... Ұстаздық өмірге қалай келдіңіз?– Есіміме қатысты «дана» деген теңеуді естігенде ыңғайсызданып қалады екенмін. Себебі: даналық сен жақындаған сайын алыстап, зорая беретін адамилықтың биік деңгейі екен. Сократтай данышпанның «мен ештеңе білмейтінімді білемін» дегендігінің өзі осының дәлелі болса керек.Балалық шағым Қазалы ауданы Аранды ауылында өтті. Ол кезде ауылдағы элита мұғалімдер болатын. Ислам мәдениетін құрметтейтін қазақ ілгеріде «Молда бол!» деп бата берсе, бала кезімде «Мұғалім бол!» деп бата беретін. Сондықтан да болар мұғалімдік жақсы адам болудың жолы болып көрінетін.Мектепке бала саны жетпегендіктен алты жасымнан бардым. Содан ба екен, мұғалімдердің қамқорлығы ерекше болды. Әсіресе, алғашқы ұстаз – Рысалды апайым мені жан-жақты дамытуға бағыт беріп отыратын, көп үміт күтетін. Менің сыныптастарым да әзіл-шыны аралас «сені апай жақсы көрді, сондықтан сен жетістікке көбірек жеттің» дейді. Негізі баланың бір бақыты – жақсы мұғалімге жолығуы. Баланың жүрегіне жол тауып, бойындағы жақсы қасиеттерді дамытуға, кемшіліктерінен арылуға жанашырлықпен көмектескен мұғалімді нағыз ұстаз деп атауға болады.Мен музыкаға, өнерге құштар болдым. Сол өнерге деген құштарлық педагогикаға алып келген болса керек. Себебі педагогика ғылым ретінде мойындалмай тұрып, өнер ретінде қарастырылған. Өнерге қабілет керек. Демек, мұғалімдікке де әртістен, әнші немесе суретшіден кем түспейтін қабілет керек. Осы жағынан мен ұстаздықтың ұлы жолы педагогика саласында еңбек етіп жүргенімді мақтан етемін.– Дипломы бар, жұмысы жоқ жастар көбейді. Мамандығымен жұмыс жасамайтындар тағы бар. Қателік қай жерден кетті?– Бір кездері «дипломды адам жерде қалмайды» деген түсінік болды. Сондықтан, ата-ана баланы қамқорлауда «қатты қағаз» (диплом) алып беруге басымдық берді. Бұл болашақ «наны» деп түсіндірілетін. Сондай-ақ мамандық таңдаудан қателесуге болмайды деген қағида болды. Алайда осы ұстанымдар өзін-өзі ақтамайтынына көзіміз жетті. Себебі қанша есептесе де дипломды мамандар жұмыс таба алмайды. Дипломмен жұмыс жасауда жалақысы аз деген де сылтау бар.Сонда да жыл сайын жоғары оқу орындарын жағалап жүрген жастарды көргенде жалпыға міндетті орта білім деген сияқты, жоғары білім барлық мектеп бітірген жастан талап етілгендей болып көрінеді маған. Шындығында, осы жоғары білім еліміздің интеллектуалдық деңгейін көтеруден бұрын, бітірген маманның рухани-материалдық сұранысына жауап бере ала ма?Негізі сұрағыңның бірнеше себептері бар. Соның ішінде көзге анық байқалатыны: ақылы оқу орындарының көбеюі және олардан диплом алудың оңайлығы. Мұндай жағдайда оқу бітіріп, диплом алғанмен, жұмыс жасауға тәуекел ету қиын. Екіншіден, кәсіпкерліктің дамуы: адамдар мамандығымен аз жалақыға еңбек еткенше, жеке бизнесін құруды түсінуі де бағытын өзгертуге түрткі болды. Үшіншіден, мамандықтың мемлекеттік сұранысқа сай болу-болмауын реттеу тетігі де дәл жоспарлай алмаған болуы мүмкін.Өмір шындығынан туатын тұжырым: халық қатардан қалмай «диплом алу» деген науқаншылдықтан құтылғаны дұрыс. Бастысы жанына қуаныш сыйлайтын, өз қабілетіне сай мамандықты таңдауы қажет. Ол тіпті дипломды қажет етпеуі де мүмкін.– Мектеп табалдырығын алғаш аттағандарға 2016 жылдан бастап «Сауат ашу» оқулығы енгізілген еді. Енді Білім және ғылым министрінің шешімімен «Әліппе» қайта оралмақ. Бұл қаншалықты тиімді?– Ежелден «Сауат ашу» – бағдарламаның атауы, ал оқулықтың атауы «Әліппе» болып келген. 2016 жылы заңнамалық тұрғыдан екі атауды біріктіру қажет болғанда мамандар «Сауат ашуға» тоқталған. Оның атауы өзгергенімен, ішкі мазмұны өзгеріп кеткен жоқ. Бірақ бұл жалпы халыққа ұнамады. К.Н.Шәмшидинова министр болған кезінде халыққа танымал «Әліппе» атауын қайтарамыз деп уәде берген.Қазір маңыздысы – «Әліппеден» әріп танытып, сауат ашу ғана емес, функционалдық сауаттылыққа баулу, яғни, алған білімді өмірде пайдалануға үйрету. Бұрынғы балалар «Әліппеден» бәрін алатын. Ал қазіргі балалар мектепке әріп танып, тіпті, жазуды біліп барады. Бұл мұғалімдерге өте қиын. Мұндай оқушыларға бұрынғыдан 2-3 есе артық күш жұмсауға тура келеді. Сол үшін мұғалімдерге ақпараттық технологияларды меңгеру ауадай қажет.– Мақтануға беспіз. “Шыңғысхан қазақ болған”, ІІ Екатерина айтқандай “Қазақтар өзінің кім екенін білсе, әлемді басқарады” деп кеуде ұратындар көп. Шын мәнінде ұлт ретінде әлемге не бердік?– «Кедейлер атамыз бай болған деп, қорқақтар атамыз батыр болған деп мақтанады» дегендей, мақтану да кемшілікті жасырудың бір түрі. Мақтаныш стимул болуы мүмкін, бірақ өткеніңмен мақтану бүгініңе қаншалықты ықпалды, сол маңызды. Сондықтан ұлтымыздың шектен тыс мақтануын немесе осал жақтары, кейбір келеңсіз тұсы арқылы халықты жасытатын мысалдарды «көрнекі құрал» еткенді де қаламаймын.Педагог ретінде әлемге қазақты, мемлекетті танытар ұрпақ тәрбиелеудің маңызды екенін білеміз. «Қатарың оза шауып бара жатса, арқаңның ауруы не қозбайтұғын» деп Тұрмағамбет ақын айтқандай, қазақ неге басқа ұлттардан артта қалуы керек? Жаһандануда жұтылып кету – қасірет. Ұлтты сақтау балаң мен ата-анаңды қорғаудай құнды. Қазіргі мақсат – қазақ өзінің ұлттық мәдениетін, оның ішінде тілін бірінші орынға қоюы керек. Бірінші өз елінде мойындалуы шарт.– Ағылшын тілін білуге маңыз бергеннен бастап жастардың бір бөлігі шетелден білім алып, сонда тұрақтап қалуда. Неге қазақ баласы басқа елді дамытуға жұмыс жасауы керек? Жастарды қалай алып қаламыз?– Бұл – жаһанданудың салдары. Медальдің екі беті бары сияқты, не нәрсенің де жақсы әрі нашар жағы бар. Тіл білген дұрыс. «Қанша тіл білсең, сонша адамсың» деген жанды сөз десек болар. Шетелден білім алудың артықшылығын да жоққа шығаруға болмайды. Иә, қазір шетелге жұмыс жасауға кетіп жатқандар көп. Олардың да түрлі мақсаты бар шығар. «Арқа жайлы болса, арқар ауып несі бар» дегендей, бұл елдегі талант пен еңбектің дұрыс бағаланбауының нәтижесі деп ойлаймын. Бірнеше тіл білетін, өз еңбегін басқаға мойындата алатын адам патриотизмді жоғалтып алады деп ойламаймын. Керісінше, шетелдегі жастардың Отанға деген сағынышы, елін көркейтуге деген ішкі сұранысы үдемесе, өшпейді. Егер ішкі жағдайлар дамыған елдер деңгейінде реттелсе, олар Қазақстанды дамытуға атсалысып, тәжірибесімен бөлісер еді.«Балам» деген жұрт болмаса – «жұртым» дейтін бала қайдан шықсын?» деген Ахмет Байтұрсыновтың ғасыр бұрын айтқан сөзінің аясында елдегі «Болашақ» бағдарламасын айтуға болады. Мұны шетелдіктердің өзі үнемі тілге тиек етеді. Бағдарлама шарты бойынша шетелде білім алған жастар елімізге келіп сол білімі бойынша еңбек етуі керек. Бірақ олардың елге келіп осы білімді ақтау барысында қиналатындығын байқаймыз. Бұл тағы да жоғарыдағы кемшіліктер мәселесі.– Болашақ ұстаздарға айтар бір кеңесіңіз…– Қазір көпшілік мамандық таңдауға материалдық қажеттілік тұрғысынан қарайтын болды. Мұғалімдік – мәңгілік мамандық, қысқарып қалу қаупі аз әрі соңғы кезде айлық еңбекақысы көбейіп келеді. Осы түсініктердің аясында ғана мұғалімдікті қаласаңыз, сіз бұл мамандықтың қиындықтарына төтеп бере алмайсыз. Себебі мұғалімдік мамандықты меңгеру үшін бойыңызда білгеніңізді үйрете алардай жан-жақты қабілет, ғылымды сүйген ғалымдардай табандылық, жаңа технологияларды меңгерердей үнемі ізденіс керек. Демек, қабілет, құштарлық, ең бастысы – еңбекқорлық.Негізі осындай «болу керек» дегенді көбейтіп айтамыз ғой... Бастысы, жақсы мұғалім болудан бұрын, жақсы адам болыңызшы! Хосе Мартише айтсақ, «Ең қиын мамандық – адам боп қалу». Болды, басқасы реттеле береді…– Сүбелі сұқбат үшін рақмет!

Ең қиын мамандық - адам болып қалу

<a href="https://kyzylorda-news.kz/">Kyzylorda-news.kz.</a> Туған жерден түлеген таланттар қатары аз емес. Бірі медицинада, бірі ғылымда, бірі өнерде өз жолын тауып, еңбегімен еленуде. Халықтың батасын басты орынға қоятын мұндай азаматтар мен азаматшалардың бағасын қашан да уақыт береді.Саналы ғұмырын өнер саласына арнаған, Н.Бекежанов атындағы облыстық қазақ музыкалық драма театрының актрисасы, Мәдениет қайраткері, «Қазақстанның еңбек сіңірген қайраткері» Кәмилә Әбжанованың өнегелі ғұмыры соның айғағы. Жақында актрисамен әңгімелесудің сәті түсті.– Бала Кәмилә туралы айтып өтсеңіз…– Өзім 1949 жылы 25 шілдеде Қазалы ауданы, Майлыбас ауылында жарық дүниеге келдім. Балдырған балалығым осында өтті. Отбасының тұңғышы, тоғыз баланың үлкенімін. Біздің балалық шағымыз – соғыстың ауыртпалығы ұмытыла қоймаған қиын кез. Материалдық тапшылық көп. Бар мен жоқтың қадірін сезініп, ерте есейдік.Әлі күнге дейін есімде, сол жылдары фин соғысы жүріп жатты. Әкеміз майдан даласынан ауыр жарақатпен елге оралды. Алайда, өмір бойы сол аурудың зардабын тартты. Соғыстан кейінгі жылдар ешкімге оңай болмады. Туыстарым әкемнің Роза Бағланова ән айтқанда домбырамен сүйемелдеуші болғанын, екеуі бірге біраз жерде өнер көрсеткенін айтады. Еміс-еміс есімде, Роза апамыз сахнаға шыққанда, шымылдықтың тасасына тығылып ән тыңдайтынмын. Ауылдың сахнасы ұядай ғана. Бәрі естіліп тұрады. Ауылдағылар концертке тайлы-тұяғы қалмай жиналатын. Бірде ол кісі «Менің Қазақстаным» әнін төгілте шырқағанда, өзімнің қайда тұрғанымды ұмытып, әуенге қосыла айтыппын. Өз дауысымнан өзім селт етіп, қарасам, әнші апам маған жымиып тұр екен. Анамыз да өнерден құр алақан емес. Ауыл ішінде халық әндерін нақышына келтіріп орындаушылардың бірі болған. Міне, сондықтан өнер маған әкенің қаны, ананың ақ сүтімен дарыса керек. Кішкентай кезімде-ақ бұлбұл үнді әнші атанып, атақты «Гүлдер» ансамблінің құрамында болуды армандайтынмын. Алайда есейген соң өмірге, өнерге көзқарасым өзгеріп, актриса болуға аңсарым ауды.– Театрға қалай келдіңіз?– Актерлық өнерге келуіме қазақтың тұңғыш кәсіби режиссері Асқар Тоқпанов себепші. Режиссердің шақыртуымен 1972 жылы Алматы қаласындағы М.Әуезов атындағы академиялық драма театрының студиясын, 1996 жылы Т.Жүргенов атындағы театр және кино институтының драма актері факультетін бітіріп, кәсіби білім алып шықтым. Осылайша балалық арманыма қанат бітіп, бойыма қуат біткендей сезіндім.Кәсіби білім алғаннан кейін 1972 жылы Қызылордадағы театрға жұмысқа орналастым. Қасиетті шаңырақта жүріп, жүзге жуық кейіпкерді сомдаппын. Алайда соның ішінде «Мақпалымды» ешкімге қимаймын. Жаныма жақын.– Жырау Алмас Алматов «Өнерге бір күнде және бір күнге келген жоқпыз» дейді. Осы уақытқа дейін сахнада қаншама бейнені сомдадыңыз. Десе де «осы бір кесек тұлғаны әлі ойнамадым» деген ішкі өкініш бар ма?– Әрине, сахнада ән айтуым керек еді деп өкінемін. Өйткені әнді, ән айтуды жақсы көретінмін. Алғаш студияға барғанда, эстрадаға студенттерді қабылдау уақыты бітіп қалды да, мені театрға шақырды. Сол кездері қалай актриса боламын деп ойлайтынмын. Баянды ойнай алмаймын, көзім көк. Мен қараторымын, актриса деген әдемі болу керек деп өзімді сұлу санамайтын едім. Шынында да мен қалаған рөлдер маған берілмеді. Алайда сахна – кие. Берілген әр образды жаныммен сезінуге, алып шығуға тырыстым.– Өнер жолы – қиын жол. Осы жолға бағыт алғандар қандай қиындыққа төтеп беруі тиіс?– Кез келген өнерге қадам басқан жас үшін басты қиындық – материалдық тұрақтылықтың болмауы. Өзіміз де жас болдық. Мемлекет немесе театр тарапынан қолдау жоқ. Басында баспанасы болса, жастар жергілікті театрда жұмыс істеуден қашпайтын еді. Үлкен қаладағы актер, актрисалар киноға, жарнамаға түсіп, қосымша табыс таба алады. Бірақ бізде мұндай мүмкіндік жоқ. Ал аз ғана уақыт сахнаға шықпай қалсаң, қарайып қалғаныңды сезінесің. Сахнаны аңсап жүресің.Облыс, аудан көлемінде дарынды жастар жетерлік. Тек алғашқыда олардың аяғынан тік тұруына көмектесіп, қолдау көрсету керек. Өнерді дамыту үшін алдымен өнерпаздарды қолдау маңызды.– Жарыңыз екеуіңізге жұрт сүйсіне қарайды. Жұлдызды жұп қалай табысты?– Екеумізді таныстырған да, табыстырған да – өнерге деген құштарлық, өмірге деген сүйіспеншілік. Бәкең екеуміз Алматыда бірге оқыдық. Ұстазымыз Алексей Лакшин өте мейірімді, шыншыл жан еді. «Тәрбиесіз берілген білім – адамзаттың қас жауы» деген Фараби даналығына сай шәкірттеріне өмірде де, өнерде де бағыт беруден жалықпайтын. Ұстазым Бақытбекті мақтап, есімін жиі айтатын. Оралдағы концертте алғаш таныстым. Осылайша бүкпесіз шынайы достығымыз үлкен махаббатқа ұласып кетті. Студенттік жылдардан бері біргеміз. Қазір, міне, бір әулеттің атасы мен әжесіне айналдық. Алғашқы сыншым, әріптесім әрі кәсіби кеңесшім де осы кісі. Сахнада берілген рөлді де, отбасылық ортақ мәселелерді де бірге талқылаймыз. Оның пікірі мен үшін өте маңызды.Өнер жолы – қиын жол. Десек те, бір-бірімізге көрсеткен қолдау мен түсіністіктің бағасы биік. Бірге ойнаған образдарымыз да жеткілікті. Бірде Лидия Егембердиеваның «Көресінді көрмей» пьесасы бойынша тағдыр тауқыметін тартқан қос ғашық – Өмірсерік пен Ақдидардың рөлін ойнап, халықтың қошеметіне ие болдық.– Шәкірт тәрбиелеп жүрсіз бе?– Театрда шәкірттерім көп. Қарлығаш Айтжанова, Айгүл Байдалиева, Зағипа Төлепова сынды бізден кейінгі буын жұмыс істей жүріп, тәрбиеленді. Олар да қазір орта буынға жатады. Олардың артынан тәуелсіздік алғаннан кейін туған жастар келді. Біздің ұжымдағы тәжірибелі өнерпаздар – соларға үлгі. Бір ұрпақ бір ұрпаққа қарап өсіп келеді. Тек осы жастардың бағы жансын деп тілейміз.– Сәбира Майқановамен жолыққаныңызды көпшілік біле бермейді. Естелігіңізбен бөліссеңіз…– Майқанова – біздің жерлесіміз. Туған жерге жер жете ме? Оның Сырға бүйрегі бұрып тұратын. «Әй, қыз, бері кел. Қарның ашып жүрген жоқ па?» деп үйіне жиі шақырып, тойдырып жіберетін. Қазір сол кездерді есіме алып, не деген құрмет, бауырмалдық деп ойлаймын.Сәбира апаммен танысқанша «Актрисалар сұлу болады. Мен қараторымын, көзім де көк. Ендеше, бұл оқуға неге түстім?» деп іштей таңдауымның дұрыстығына күмәнданумен жүретінмін. Ешқашан Қарагөзді ойнай алмаймын деп қынжылатын едім. Ал оны көргеннен бастап өнер сұлулықта емес, сенім мен дарында екенін шын ұқтым. Ол кісінің жақсы тұстары көп, үлгі алатын болдым. Бір рет Сәбира апаның үйіне барғанымда, сыйлыққа орамал берді. Оны мойнымнан тастамай, ырымдап жүрдім. Сол орамал Сәбира Майқановадан қалған тәбәріктей, ұлылық пен шынайылықтың символы іспетті үйімде сақтаулы.– Көпшілік театрлар бұрынғы репертуармен қалып кеткендей. Жаңа, жас драматургтер шығармашылығы неге жолға қойылмай келеді?– Жақында ғана Астанада фестиваль болды. Сонда қазақ театрына қатысты бірқатар мәселе талқыланды.Қазір Қазақстанда 35 жас режиссер бар екен. Бірақ оның 3-4-еуі ғана елімізде қызмет етуде. Қалғаны шетелдерге көшіп кеткен. Шығармашылығын сыртта жүріп дамытып, елдегі фестивальдерге қатысып кетеді. Яғни, жастар шығармашылығына кедергі жоқ. Қайта жаңа толқынның көзқарасын танытып, қойылымдарды өзгертіп отыруға мүдделіміз. Жыл сайын театрдың көркемдік кеңесіне жаңа туындылар келіп түседі. Кеңестің шешімімен қойылымға лайықты деп танылғандарын репертуарға қосып отырамыз.Кешегі фестивальде тәуелсіздік алғанымызға 30 жыл болғанына қарамастан, әлі де театрлық қойылымдарда тарихымыз толық көрсетілмегенін, осы бағытта туындылар керектігі сөз етілді. Бұл рас. Алайда көзі тірісінде жазып кеткен талай мықты жазушылар бар ғой. Тарихи, көркем шындықты ұштастыра, драмаға тігісін жатқызып алсақ, қаншама қойылым туындар еді. Мәселен, Шыңғыс Айтматов та драматург емес. Есесіне оның жазған дүниелерін кино, драма, пьеса ретінде көріп жүрміз. Бүкіл әлем Айтматовты таниды. Осы қырынан да ойланып, әрекет етуіміз керек сияқты.– Кәмилә Әбдіғалиқызы, әдемі әңгімеңізге рақмет!

Жүзге жуық кейіпкерді сомдаған қазалылық актриса

<a href="https://kyzylorda-news.kz/">Kyzylorda-news.kz.</a> Нашақорлық – қазіргі қоғамның ең өзекті проблемаларының бірі. Бүгінгі таңда жастарды еліктіріп, жөнсіз жолға тартушылардың дені өз нарығын көздеушілер.Жастар алдымен үйдегі жақындардың бақылауынан тыс қалып, мейірімге шөлдегенде өзіне қамқорлықты сырттан іздей бастайды. Дәл сол кезеңді бұрыс ойлылар өз пайдасына пайдаланады. Алдымен темекіге, түрлі ішімдікке құмартудан бастаған адам нашақорлық дертіне де тез шалдығады. Мұндай қадамға өзіне сенімсіз, жылулыққа мұқтаж немесе өзінің ішкі проблемаларын шеше алмай күйзелгендер, есірткінің көмегімен барлық проблеманы шешіп аламын деген қате пікірдегілер, бақытсыздық сезіміндегілер,кейде керісінше, эгосы жоғары, бәрін өз басынан өткізуге құмар жандар барады.Нашақордың өмірі түбегейлі өзгереді. Ол өтірікші, дөрекі, қатал және өзімшіл, соңында қылмыскер адамға айналады. Бірте-бірте оның ойлау қабілеті төмендейді. Достарының сенімін жоғалтып, жақындарынан алыстай бастайды. Соңы тек жалғыздық, ауру, өлімге әкеп соғады.Ал, нашақорлықпен күресуде қоғам боп, жақындары боп, арнайы мамандар боп ұзақ та тынымсыз күш-жігер, еңбек қажет. Сондықтан алдын алу шаралары бойынша жылда Республика бойынша "26-маусым - Нашақорлықпен күрес күніне" акциялар ұйымдастырылып, жасөспірімдер мен жастарға ақпараттандыру,түсіндірме жұмыстары жүргізіледі. Осы орайда Қармақшы Аудандық Орталық Ауруханадағы салауатты өмір салтын қалыптастыру және Қармақшы Жастар Денсаулығы Орталығының мамандары тынымсыз еңбек етуде.Кеше кешке аудандық орталық алаңда "Қармақшы Жастар Рухы" филиалының мамандарымен бірлесе отырып, жастарға түсіндірме жұмыстары жасалынды, LED экраннан бейнероликтер көрсетіліп, АТМ дар таратылды.

Қармақшыда нашақорлықпен күрес күніне акция өткізілді

<a href="https://kyzylorda-news.kz/">Kyzylorda-news.kz.</a> Қызылорда қаласы әкімдігінің мәжіліс залында қала әкімінің аппарат басшысы, әдеп жөніндегі уәкіл Жасұлан Абатовтың төрағалығымен сыбайлас жемқорлықтың алдын алу және болдырмау, мемлекеттік қызмет саласындағы заңнаманы сақтау, мемлекеттік қызметшілердің қызметтік әдеп нормалары талаптарының сақталуын қамтамасыз ету мақсатында жиын өтті.​Жиында сөз алған Қызылорда облысы әкімдігінің әдеп жөніндегі уәкілі Мақсат Шәкірбаев ҚР «Мемлекеттік қызметі туралы», ҚР «Еңбек кодексі», Әдеп кодексі заңнамаларының қатаң сақталуын және заң бұзушылықтарды болдырмау және алдын-алу бағытында нақты шаралар қабылдау керектігіне атап өтті.​Сонымен қатар, мемлекеттік қызметшілер әріптестерімен қызметтік қарым-қатынаста мемлекеттік қызметшілерге қойылатын, жалпыға бірдей қабылданған моральдық-әдептік нормаларды сақтау жөніндегі талаптары да ескертілді.​Жиын соңында аппарат басшысы, әдеп жөніндегі уәкіл &nbsp;Жасұлан Абатов дербес бөлім басшыларына, ауылдық округ әкімдеріне, Қазақстан Республикасы мемлекеттік қызметшілерінің әдеп кодексінің нормаларын сақтау, Сыбайлас &nbsp;жемқорлық көріністерінің әрбір фактісіне мұқият талдау жасау, оларды жою жөнінде шаралар қабылдауды, қызметкерлер арасында басшылардың өз бағыныштылары үшін жауапкершілігі туралы түсіндіру жұмысын жүргізу жөнінде бірқатар тапсырмалар берді.

Әдеп нормаларын сақтау - мемлекеттік қызметшінің міндеті

<a href="https://kyzylorda-news.kz/">Kyzylorda-news.kz.</a> Адам баласының есейе келе оқуда озат атанып, биік шыңдарды бағындыруы тал бесіктегі тәрбиеден басталса керек. Бұл тұста үйдегі ата-ананың баланы зеректік, алғырлыққа баулуы маңызды. Дүние тануға қызығушылығы мол өскіннің бойында жаңа дүниенің қыр-сырын меңгеруге деген дағды қалыптасады. Оларды тәрбиелеуде отбасы мен ұстаздарының еңбегі зор екенін де ұмыт қалдырмаған жөн. Соның арқасында білім бәйгесіне салсаң қатарластарынан әлдеқайда алыс шабатын оқымыстылар шығады. Бүгінде Қазалыда мұндай вундеркинд аз емес.&nbsp;Солардың бірі – Бақдәулет Қазалыдағы №266 мектеп-лицейінде әріп таныды. Білікті ұстаздар жиылған білім ордасында 6 сыныпқа дейін үздік оқыды. Осында жүріп-ақ математика, физика секілді пәндерден олимпиадаға қатысып, кез келген бәйгенің алдыңғы сапынан көрінді. Арманы асқақ жеткіншек жетінші сыныпқа көшкенде Қызылорда қаласындағы дарынды балаларға арналған білім инновация лицейіне қабылданады.Өңірдің дарындылары топтасқан орта Бақдәулеттің одан әрі шыңдалуына сеп болса керек, оқуға шындап ден қойды. Жыл өтпей-ақ Қазақстан білім олимпиадасына қатысып, мықтылармен бәсекеге түсті. Ақыры ағылшын пәнінен өткен облыстық олимпиадада алтыннан алқа тағып, республикалық кезеңге Сыр елінің абыройын асқақтатып қайтты. Додадан олжа алмай қайтпайтын өрен өткен жылы лицей ұжымының басым дауысымен дарындылардың президенті болып сайланды. Мұнымен қоса лицей көшбасшыларының құрылтайына қатысып, білім министрімен кездесу құрметіне ие болды.<blockquote>«Қазақстанның әр облысынан келген көшбасшылар жиыны өзімді қай қырымнан дамыта беру керегін ұқтырды десем болады. Өйткені дөңгелек үстел басындағы еркін кездесуде келешектегі білім реформасы жайында өрбіді. Асхат Аймағамбетовпен білім жүйесіндегі лайықты өзгерістер, Ұлттық бірыңғай тест, IELTS, SAT туралы, кітап оқудың маңызы жайында пікір алмастық. Дәл осы тұста болашақ жастардың қолында екеніне анық көзім жетті. Өйткені ел ағаларының, халықтың бізге артқан сенімі, үміті зор екенін түсіндім», – дейді Бақдәулет Дулатұлы.</blockquote>Қазірдің өзінде бес тілде еркін көсілетін білгірдің мақсаты айқын. Келешек тағы бірнеше тілді меңгеріп, шетелде білім алғысы келеді. Ол үшін алғашқы қадамды әлдеқашан жасап қойған. Шетелдің озық университеті қызығатын «портфолио» жасауға жең түре кіріскенін айтады. Тіл үйренушілер жақсы түсінеді, «тіл тасымалдаушы» деңгейіне жету үшін талапкер IELTS сынынан жоғары ұпай жинау керек. Бұл кез келген кәсіби пән мұғалімінің қолынан келе бермейді. Бақдәулет жақында ғана деңгейін тексеруге сынақ тапсырып, 8.0 ұпай алды. Бұл өңірдегі оқушылар арасындағы қол жеткізуге болатын ең жоғары ұпай екенін білдік. Тыңдалым, айтылым, оқылым, жазылым сынынан мүдірмей өткен жерлестің осыдан кейін өзіне деген сенімі еселене түскен.<blockquote>«Тіл меңгеруді мақсат еткен адам үшін IELTS-тің жоғары деңгейлік сертификатын иелену – білімнің жасырын қазынасына жолдама алумен тең. Арманға жету үшін өзіңе деген сенімділіктің маңызы зор. Айналамдағылар ағылшын тілі мұғалімі боламын деген арманыма таңдана қарайды. Мұның астарында қазақ балаларын халықаралық деңгейдегі додаларда дес бермейтін оқушы тәрбиелеп шығару, елдегі білім беру ісін ілгерілетуге құлшыныс жатқанын көп адам байқай бермейді. Ата-ана, жақындарымның еңсесін тіктейін деген мұрат-мақсат мені осындай шыңдарға шығарып келеді. Арманыма жетуде олардың сенімі жерге жықпасы анық», – дейді оқу озаты.</blockquote>Бақдәулет бос уақытында музыкалық аспапта ойнағанды, шет тілінде кітап оқуды дұрыс санайды.

Қазалылық вундеркинд

<a href="https://kyzylorda-news.kz/">Kyzylorda-news.kz.</a> Қиындығы мен қызығы мол өнер жолын жанына серік еткен жандардың қатарында Ақтан батыр ауылындағы Әбуовтер отбасы да бар. Отағасы Жұбаназар Әбуов аудан жұртшылығына аты таныс термеші, әрі күй мен жырдың да шебер орындаушысы. Ал, отанасы Ұлмекен Сансызбай ұзақ жылдар бойы мәдениет саласында еңбек етіп келе жатыр.Жуырда Ақтан батыр ауылында болып, Ұлмекен Қожаққызы басқаратын ауылдық клуб жұмысын көріп, өнерлі отбасының тыныс-тіршілігімен таныстық. Алдымен клуб үйі бөлмелерін кабинеттерін аралап, қабырғадағы ілулі тұрған өнерпаздардың жеткен жетістіктеріне көз жүгірттік. Мекеме меңгерушісі арнайы жинақталған фотоальбомдар арқылы клубтың құрылғаннан бергі тарихымен таныстырды.Әңгімеміз одан әрі өнерлі отбасы мүшелеріне қарай ойысты. Жастайынан өнерге құмартып өскен Жұбаназар Әбуұлы домбыра аспабын еркін меңгерген. Құлақ құрышын қандырып күй тартып, төгілтіп терме орындайтын өнерлі азамат түрлі ансамльдердің құрамында өнер көрсеткен. Ол бірнеше сахналық қойылымда да рөлдерді сомдап, актерлік қырынан да танылған. Бүгінде Қазалы қаласындағы арнаулы әлеуметтік қызметтер көрсету орталығында мәдени ұйымдастырушы болып істейді.Ал, жұбайы Ұлмекен Қожаққызы Жетісай қаласындағы мәдени-ағарту техикумын «Халық аспаптары оркестрінің жетекшісі және клуб қызметкері» кваливикациясын алып шыққан. Ол да домбырада еркін ойнайды. Ансамбльдер құрамында шіберлігін шыңдап, сахналық қойылымдардың бел ортасында жүрді. Жолдасы Жұбаназармен дуэт орындап, халық қошеметіне бөленді. 1986 жылы XXII партсеъезд атындағы совхозда жаңадан ашылған клуб үйіне отбасымен жұмысқа шақырылып, сол өнер ордасындағы үйірменің жетекшісі болды. Бұдан соң Ақтан батыр ауылындағы ән-әуез мектебінде домбыра аспабының мұғалімі, бір жылдан кейін аталған мектептің директорлығына тағайындалды. Бұл мектеп жабылуына байланысты Қожабақы ауылындағы мәдениет үйінде көркемдік жетекші болып қызметін жалғастырды. Одан кейінгі еңбек жолы Майдакөл ауылдық клуб меңгерушісі болып жалғасқан Ұлмекен 2014 жылдан бері Ақтан батыр ауылдық клубының меңгерушісі. Аудандық әжелер ансамблі құрамында өнер көрсетеді.Өнер жолы табыстырған Жұбаназар мен Ұлмекеннің ынтымағы жарасқан отбасында төрт ұл дүниеге келді. Олардың үлкені Елеу заңгерлік мамандықты таңдаса, Ақниет, Айниет есімді егіздер мен шаңырақтың кенжесі Жалғас ата-ана жолын жалғастыруда. Ақниет пен Жалғас облыс көлеміне танымал «Жанкент» квартетінің белді мүшесі. Бұл отбасы түрлі деңгейдегі отбасылық байқауларда топ жарып, бірнеше жүлдені қанжығалады. Жекелген марапаттары өз алдына. 2008 жылы аудандық «Өнегелі отбасы – ұрпақ қазынасы» атты сайыста «Өнерлі отбасы» номинациясын алды. Облыстық «Отбасы – алтын діңгек» және «Мерейлі отбасы» байқауларында екінші орынды иеленген.<blockquote>«Өнер жолы оңай емес. Ол төзімділікті талап етеді. Отбасы тірлігімен қатар өнерді де өрге сүйрей білдік деп ойлаймын. Балаларымыздың талабы мен ынтасы зор. Қазір немерем Бекзат та ән айтып жүр. Халық іздеп, өнерімізді бағалап жатады. Біреуге керек болу – үлкен бақыт. Жуырда Әбуовтер отбасының есепті концертін берсек деген ниетіміз бар», – деп жоспарымен бөлісті Ұлмекен Қожаққызы.</blockquote>

Қазалы: Ән әлемінде Әбуовтер

<a href="https://kyzylorda-news.kz/">Kyzylorda-news.kz.</a> Қызылорда облысында балық шаруашылығын дамытудың 2021-2030 жылдарға арналған өңірлік бағдарламасы әзірленді және бағдарлама шеңберінде 2030 жылға дейін балық экспортын 2 есеге, тауарлы балық өндіру көлемін 111 есеге арттыру көзделген болатын.Соған сәйкес, Арал ауданында қазіргі таңда балық шаруашылығын дамыту мақсатында жеке кәсіпкерлер тоған шаруашылығымен айналысуды бастады.&nbsp;Солардың бірі жеке кәсіпкер Шалғынбай Алматбаев Қарақұм ауылдық округі, Ерімбетжаға елді мекеніндегі өздігінен төгіліп тұрған су ұңғымасынан су алып, 2021 жылдан тоған шаруашылығын құрып балық өсіруді бастаған болатын.Тоғанның көлемі 10 мың шаршы метр болса, ақамур, дөңмаңдай, кәріп тұқымдас балықтарының шабақтарын салып, бүгінгі күнге 7-8 мың тоннаға жуық балық шабақтарын өсіріп жұмыстарын жалғастыруда.&nbsp;&nbsp;

Арал ауданы: Тоған шаруашылығын дамыту басты назарда

<a href="https://kyzylorda-news.kz/">Kyzylorda-news.kz.</a> Келесі жылдан бастап бірыңғай жиынтық төлем (БЖТ) алынып тасталады деген сыбысты ести сала, анығын білу үшін Әлеуметтік медициналық сақтандыру қорына хабарласып, «МӘМС-ке жарнаны қалай төлейміз?» деп сұрайтын азаматтар жетерлік. Шынымен де 2024 жылы бұл төлем түрі болмай ма? Болмаса, өзін-өзі жұмыспен қамтығандар МӘМС төлемдерін қалай төлейді? Бұл медициналық сақтандыру қорының шешімі ме? Осы және өзге де сауалдардың жауабын Әлеуметтік медициналық сақтандыру қоры стратегия департаментінің директоры Дамир Көбжасаровтан сұрап білдік.БЖТ қашан және қандай мақсатпен енгізілді?Дамир Көбжасаровтың айтуынша, бірыңғай жиынтық төлемін алып тастау Әлеуметтік медициналық сақтандыру қорының шешімі емес. БЖТ жеке кәсіпкер ретінде тіркелмеген өзін өзі жұмыспен қамтыған азаматтар үшін 5 жылға (2019 жылдың 1 қаңтарынан 2023 жылдың 1 қаңтарына дейін) уақытша енгізілген еді әрі оны тек басқа жеке тұлғаларға жеке қосалқы шаруашылық өнімдерін сататын және қызметтер көрсететін жылдық табысы 1175 айлық есептік көрсеткіштен аспаса төлей алады. Басқа жағдайда бұл төлемді пайдалануға болмайды. Алайда бұл норманы жұмыссыз әрі тұрақты жұмысы жоқ азаматтар, бала күтімі бойынша бір жарым жасқа дейінгі әлеуметтік төлемдерді алу үшін жүкті әйелдер пайдаланып келеді.&nbsp;• Бірыңғай жиынтық төлем республикалық және облыстық маңызы бар қала тұрғындары үшін бір айлық есептік көрсеткіш көлемін және басқа елді мекендердің азаматтары үшін 0,5 АЕК құрайды. Яғни, биыл БЖТ мөлшері тиісінше 3 450 теңге және 1725 теңге.&nbsp;Бірыңғай жиынтық төлем төлеуші ретінде тіркелудің артықшылығы өзін өзі жұмыспен қамтыған азаматтарды БЖТ төлемегені үшін қандай да бір жауапкершілікке тарту шарасы қарастырылмайды. Алайда өзін-өзі жұмыспен қамтыған адам бірыңғай жиынтық төлемнің бір айын уақытылы төлемесе, сақтандыру мәртебесінен айрылады. Сондықтан ай сайын төлем уақытын өткізіп алмау маңызды немесе алдағы кезеңдерге алдын ала төлем жасау керек.&nbsp;«Бірыңғай жиынтық төлемнің негізгі және жалғыз мақсаты – өзін-өзі жұмыспен қамтыған азаматтарды міндетті әлеуметтік медициналық сақтандыру, әлеуметтік сақтандыру және зейнетақымен қамсыздандыру жүйелеріне тарту. Сондықтан бұл төлемдері төмен жеңілдік кезеңі болды. Қазір жеке тұлғалардың табысын декларациялау кезең-кезеңімен енгізілу үстінде. Бұрын кәсібін тіркемеген азаматтар кәсіпкер ретінде тіркеліп немесе жалдамалы қызметкер болып жұмыс істеуі керек», – деді Дамир Көбжасаров.Келесі жылы БЖТ болмаса, басқа төлем түрі енгізіле ме?БЖТ төлеген азаматтар әрі қарай дербес төлеуші ретінде төлем жасай алады (2023 жылы – 3500 теңге). Осы жерде ескеретін жайт, азаматтардың сақтандырылған мәртебесі болуы үшін, МӘМС туралы заңға сәйкес, 12 айға төлемі болуға тиіс. Егер БЖТ төлеушілердің өткен 1 жылға төлемі болса, 2024 жылдан бастап әр ай сайын дербес төлеуші ретінде төлем жасай алады. Ал толық 12 айға төлем жасалмаса, мысалы ағымдағы жылы 7 айға төлемі болса, азаматтар төленбеген 5 айға дербес төлеуші ретінде әр айға 3500 теңгеден төлеп шыға алады. Келесі жылдан бастап ай сайын жарна төлей береді. Ал ағымдағы жылы 3-4 айға БЖТ төлеген адамдарға алдағы 12 айға төлем жасап, 1 жылға алдын ала сақтандырылған мәртебесін алған тиімді. &nbsp;Дамир Көбжасаровтың айтуынша, тұрақты табысы жоқ ауыл тұрғындарының (90 мыңға жуық адам) МӘМС жүйесінен тыс қалу қаупі бар. Қазір осыған байланысты ауылдық аймақтарда түсіндіру жұмыстары жүргізіліп жатыр.&nbsp;Әзірше, азаматтар алдағы жарты жылда БЖТ-ны төлей береді. 2024 жылы сақтандырылған мәртебесін жоғалтпау үшін азаматтар жеке кәсіпкер ретінде тіркеліп немесе дербес төлеуші ретінде жарна төлейді.&nbsp;Төлем Қазақстанның кез келген банкінде, банктердің мобильді қосымшалары арқылы және «Қазпошта» бөлімшелерінде қабылданады. Төлем жасау кезінде ақша аударылатын тұлғаның жеке сәйкестендіру нөмірін, төлем жасалатын айды көрсету керек.Егер сіздің тағы да сұрақтарыңыз болса немесе медициналық көмек алуда қиындықтар туындаса, өз емханаңыздағы «Пациенттерді қолдау қызметіне» жүгініңіз. Ал ол жерде мардымды жауап ала алмасаңыз, Қордың өзіңізге ыңғайлы арналары бойынша өтініш-шағымдарыңызды қалдыра аласыз:- fms.kz ресми сайты, - Qoldau 24/7 мобильді қосымшасы - Telegramдағы SaqtandyrýBot - 1414 Бірыңғай байланыс орталығыСондай-ақ Электронды үкіметтің egov.kz сайтындағы «Денсаулық сақтау» бөлімінде «Міндетті әлеуметтік медициналық сақтандыру жүйесіне медициналық көрсетілетін қызметті тұтынушы ретінде қатысу туралы және аударымдардың және (немесе) жарналардың аударылған сомалары туралы ақпарат ұсыну» мемлекеттік қызметі арқылы медициналық сақтандыру жүйесіндегі өз мәртебеңізді тексеруге және жүргізілген төлемдер туралы ақпарат алуға болады. &nbsp;

 МӘМС: 2024 жылы бірыңғай жиынтық төлем болмайды

<a href="https://kyzylorda-news.kz/">Kyzylorda-news.kz.</a> Алдашбай ахун ауылы ауданымыздағы байырғы елді мекендердің бірі. Ол аудан орталығынан 160 шақырымда орналасқан. Халық саны 168 отбасында 680 жан тұрады. «Майлыөзек и К» ЖШС, №111 орта мектеп, бөбекжай-бақша, фелдьшерлік пункт, клуб үйі, мешіт тұрғындарға қызмет көрсетуде.&nbsp;Сонымен қатар, ауыл тұрғындары меншігінде 943 бас мүйізді ірі қара, 419 бас жылқы, 3891 бас уақ мал, 854 түрлі құс өсірілуде. Кәсіпкерлік саласының жұмыспен қамтуда маңызды екені даусыз. Осы ретте, ауылдық округте жұмыссыздық деңгейін азайту, тұрғындар арасында шағын және орта кәсіпкерлікті дамыту мақсатында ауыл әкімшілігі қызметкерлерінің табанды түсіндірме жұмыстарының арқасында Рүстем Оңайсынов есімді азамат «Жылқы малын көбейту» бағыты бойынша «Аграрлық несие корпорациясы» АҚ арқылы несие алса, 7 көпбалалы ана және 1 жас тұрғын қайтарымсыз несие грантын жеңіп алып, кәсіптерін бастап кетті.Сондай-ақ Алдашбай ахун ауылында тұрғындарды сапалы ауыз сумен қамтамасыз ету мақсатында «Су қабылдайтын құрылғыны қайта құру» жобасы іске қосылғаны белгілі. Бұл биылғы жылы ауылда жүзеге асатын жобалардың бірі әрі бірегейі болды. Биылғы жылы Алдашбай ахун ауылындағы спорт алаңына ағымдағы жөндеу жұмыстары жүргізілсе, аудандық бюджеттен ауылдың электр желілерін жаңғырту және қосалқы станциясын кеңейту, 3 көшені орташа жөндеуден өткізу үшін жоба сметалық құжаттарын әзірлеуге, сараптамадан өткізуге қажетті қаржылары қаралып отыр.Атап айтар болсақ, осы жылға 5 жобаға 42 616,2 мың теңге бөлінді. Оның ішінде облыстық бюджеттен 22 160 мың теңге қаралды. Жекелеп тоқталсақ, Алдашбай ахун елді мекеніндегі су құбыры ғимараттарын қайта жаңғырту үшін 229,7 млн. теңге болса, аудандық бюджеттен 16 300,2 мың теңге қаралды. Елді мекендеріне электр желілерін &nbsp;жаңғырту және қосалқы станциясын кеңейту жобасына сараптама қорытындысымен жоба-сметалық құжаттама әзірлеу үшін 5 000 мың теңге, ауылдық округіндегі 3 көшеге орташа жөндеу жұмыстарына ЖСҚ әзірлеу және &nbsp;сараптамадан өткізу жұмыстарына &nbsp;(Ә.Егізбаев, Түпбөгет, Ынтымақ) 4 281,2 мың теңге, ауылдағы спорт алаңын ағымдағы жөндеу жұмыстары үшін 7 019 мың теңге қарастырылған. Төртінші деңгейлі бюджет есебінен 4 156 мың теңге бөлінді. &nbsp;Елді мекенді көгалдандыру мақсатында (аяқ су жіберу жұмыстары) 4 156 мың теңге қаржы қаралды.

Алдашбай ахун ауылында су құбыры іске қосылды

<a href="https://kyzylorda-news.kz/">Kyzylorda-news.kz.</a> Сейсенбі күні аудан әкімдігінің мәжіліс залында аудан әкімінің орынбасары Жұлдызхан Байназарұлының төрағалығымен аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның кезекті отырысы өтті.Отырысқа комиссия мүшелері, құқық қорғау органдарының басшылары қатысты. Комиссия отырысының күн тәртібіне сәйкес «Мәдениет және спорт ұйымдарына тартылған балалар мен жасөспірімдермен атқарылған жұмыстар туралы» аудандық мәдениет және спорт бөлімінің басшысы Дәурен Ержановтың, «Кәмелетке толмағандар арасында ерте жүктіліктің алдын алу туралы» аудандық аурухананың психологының, «Бала еңбегін қанауға қарсы 12 күн» Ұлттық ақпараттық науқанының өңірлік іс-шаралар жоспары аясында үстіміздегі жылдың 1-12 маусым аралығында өткізілген жұмыстардың қорытындысы туралы» аудандық білім бөлімі басшысы Гүлзира Абдазиеваның баяндамалары тыңдалды.Мәжіліс соңында аудан әкімінің орынбасары Жұлдызхан Ерқосаев комиссия мүшелерінің қозғалған мәселелер жайлы ұсыныс-пікірлерін тыңдап, алда атқарылатын жұмыстар бойынша тиісті сала басшыларына нақты тапсырмалар берді.

Қармақшыда комиссияның кезекті отырысы өтті

<a href="https://kyzylorda-news.kz/">Kyzylorda-news.kz.</a>&nbsp; Қорқыт Ата атындағы Қызылорда университеті (Korkyt Ata University) &nbsp;QS Word University Rankings – 2024 халықаралық рейтинг агенттігінің талдауы бойынша тұңғыш рет әлемнің үздік университеттерінің қатарына кірді.&nbsp;Университеттің 85 жылдық тарихы бар. Алғаш рет Азияның үздік университеттері рейтингінде 2022 жылы ТОП-551-600 орын алған. 2023 жылы ол әлемдік позицияға көтеріліп ТОП-1200-1400 орынды иемденді.Бүгінде университет 113 бағдарлама бойынша білім береді, 10 мыңнан астам студенті бар, 10 бірлескен және қос дипломдық бағдарламалар, 6 халықаралық және 16 гранттық жоба аясында ғылыми-зерттеу жұмыстары жүзеге асырылады. Шетелдік оқытушылар мен академиялық ұтқырлық бағдарламасы бойынша білім алатын студенттердің саны жылдан жылға артып келеді.2022 жылы алғаш рет «500 ғалым» жобасы бойынша 6 оқытушы шетелдік жоғары оқу орындарында ғылыми тәжірибеден өтті (Германия, АҚШ, Ресей, Беларусь), ал 2023 жылдан бастап 14 ғалым Германия, Ұлыбритания, Швейцария, Ресей, Әзірбайжан елдеріндегі жоғары оқу орындарына тағылымдамаға жолданады. Олар физика, археология, су ресурстары, жылу энергетикасы және жаңартылатын энергия көздері, құрылыс, шет тілдері, педагогика және психология саласындағы жетекші мамандар.Университетте жас ғалымдарға грант беру, ғылыми журналдардағы жарияланымдар үшін ынталандыру, жалақыны көтеру, зертханалар мен оқу кабинеттерін заманауи құрал-жабдықтармен жаңарту, ғылымда жоғары жетістіктері бар шетелдік мамандарды шақыру қарастырылған. 2023 жылы Қызылорда қаласында ІТ-технологиялар жоғары мектебін ашу мақсатында Сеул ұлттық ғылым және технология университетімен &nbsp;келісімге қол қойылды. &nbsp;<figure class="image"><img src="https://knadmin.beoblood.kz/uploads/afb4086c_3706_4a12_a486_af6ebac32c54_32cf92bdf1.jpg" alt="afb4086c-3706-4a12-a486-af6ebac32c54.jpg"></figure>

Қорқыт ата атындағы Қызылорда университеті әлемнің үздік университеттерінің қатарына кірді

<a href="https://kyzylorda-news.kz/">Kyzylorda-news.kz.</a> Қашан да мемлекет мерейі даму көрсеткішімен бірге спортшылары арқылы мәртебелі болады. Ел байрағын желбіреткен осындай озық оғландарды күрес өнеріне баулып, мерейді тасытып жүрген бапкер Самат Оспановтың есімі бүгінде көпке таныс.«Жігітті кеткен күшімен сынама, еткен ісімен сына» дейді халқымыз. Білек пен білікті бір арнаға тоғыстырып, ел ішінен болар балаларды танып, оларды шынықтырып, ілкімді ісімен танылып жүрген мақтаулы маманмен жолығу оңайға соқпады. Іздеген адамымыз біз телефон шалғанда бірде шәкірттерін жарысқа қатыстырып жатса, бірде өзі бозкілемде белдесуге бара жатқанын айтты. Бұл жайттар қырықтан асса да оның өз бабында тұғандығын байқатты.2002 жылы Түркістан облысы, Шымкент қаласындағы М.Әуезов атындағы мемлекеттік университеттен дене тәрбиесі және спорт мамандығын меңгеріп шыққан түлекті оқу орны өздеріне алып қалады. Тәжірибесіздігіне қарамай, жас маманға арнайы күрес пәнінен дәріс беруді тапсырады. Еңбек жолы басталған бірінші жылдың өзінде С.Оспановтың алғашқы шәкірттері грек-рим күресінің техникаларын меңгеріп, топ жарып, жетістіктерге қол жеткізеді. Алайда «Ер туған жеріне» деген ұстанымды ту еткен азамат, арада көп уақыт өтпей, өзі туып-өскен жеріне оралып, №17 Қазалы аудандық спорт мектебіне жаттықтырушы болып орналасады.Осы жиырма жылға жуық уақыт аралығында жас маман жан-жақты шыңдалып, шәкірттерін шыңға шығарады. Мақтаулы маманның баулыған балуандары санатында ҚР чемпионатында ересектер арасында бірнеше медальді қанжығалаған Айдос Сүлеймен, Түркия елінде, Грецияда өткен Халықаралық жарыста топ жарған Наурыз Әбибуллаев, Ернар Жолдас, ҚР біріншіліктерінің жүлдегері Раухан Серік, Әлихан Іздік, Ақтілек Жағал, Ербол Сахи, Абылай Демекбай, Арон Өмірзақтар бар.Жыл сайын ауданда өтетін Халықаралық, республикалық Елеу Көшербаев атындағы турнирде үнемі баптаған балуандары топ жарып келеді.Бұған дейін турнирдің Халықаралық сынында үміт үдесінен көрінген Ернар Жолдас биыл республикалық сынында күміске күптесе, Шымкент қаласында өткен Мардан Сапарбаев атындағы Халықаралық жарыста Айдос Сүлейменов екінші орын биігінен көрінген. Айдос Бұғыбай Қостанай қаласында ұйымдастырылған Қазақстан ауыл спорты ойындарында алтыннан алқа тағып, аудан абыройын асқақтатқан.Біз хабарласқанда жаттықтырушы Ақтөбе қаласында өтетін Есенгелді Батырғалинді еске алуға арналған турнирде қос балуаны Ардақ Бұғыбай мен Дінахмет Қожамұраттың топшысын қатайтып, топқа түсіруге бара жатқан беті екен. «Ақ жол!» дестік.Үстіміздегі жылдың 21-24 қарашасы аралығында Грецияның Лутраки қаласында грек-рим күресінен әлем чемпионаты өтті. Осы сындарлы жарыста ардагерлер арасында бақ сынаған Самат Оспанов ел құрамасынан барған елуліктен табылады. Күрестің төл отанындағы жергілікті жанкүйерлердің қарсыласын жан-жақты қолдауына қарамай, Самат грек балуанының жауырынын жерге тигізіп, үздік бестіктен табылады.Өз ісіне адалдық танытып, үнемі жан-жақты ізденіс үстінде жүретін Самат Қобландыұлының тәрбиесімен түлеген Олжас Сүлейменов, Ербол Сахи, Ербол Сүлейменов, Әлихан Іздік, Әзиз Жақсылық ұстазының жолын жалғап, жас спортшыларды додаларға дайындап жүр.<blockquote>«Әр баланың өзіндік бейімі, қабілеті болады. Біз, ұстаздар, соны танып, білуіміз керек. Өзіне үміт артып, ертеңіне жетерлік қабілетті бойына дарытып, өзіндегі талантын тәрбиелей алған кез келген өреннен жетістік, жеміс күтуге болады. Мәселен, Ернар есімді шәкіртімді 5 оқитын кезде Арал ауданы, Сексеуіл кентінен, ата-анасына өтініш айтып, алып келіп, күрес өнеріне баулыдым. Үйімде жатып, мектеп оқытып, жаттығуларын орындатып, бойындағы талантын шыңдауға атсалыстым. Нәтижесі жаман болған жоқ», – дейді кейіпкеріміз сөзінде.</blockquote>Біз де білікті бапкердің күрес үйірмесі болашақта спорт саңлақтарының ұстаханасына айналатынына сенім білдірдік.

Қазақстан және Қызылорда облысының жаңалықтары