<a href="https://kyzylorda-news.kz/">Kyzylorda-news.kz</a>&nbsp; &nbsp;Сырдария аудындық кәсіпкерлік бөлімінің ұйымдастыруымен ауданда орналасқан елді мекендерде өткізілген мемлекеттік қолдау бағдарламаларына арналған&nbsp;түсіндірме жұмыстары аяқталды.Түсіндірме жұмыстарына Қалжан ахун, С.Сейфуллин, А.Тоқмағанбетов ауылдық округтері мен Тереңөзек кентінің тұрғындары, жеке кәсіпкерлер, кәсіпкерлік ынтасы бар азаматтар және қаржы ұйымдарының, облыстық «Атамекен» кәсіпкерлер палатасының, облыстық «Мансап» орталығының Сырдария ауданындағы филиалының, аудандық кәсіпкерлік, өнеркәсіп және туризм бөлімі (әрі қарай - бөлім) мен кент, ауылдық округтері әкімдері аппараттарының сала бойынша мамандары қатысты.Мемлекеттік қолдау бағдарламаларының талаптары, кепіл мүлік саясаты, қайтарымсыз гранттарға қатысу шарттары мен мүмкіндіктері, қолдау бағдарламаларына қатысушылардың санаттары, қаржы ұйымдары беретін несиелердің пайыздық мөлшерлемелері, т.б. сауалдарға қатысты мәселелер жөнінде айтылды.«Ауыл Аманаты» бағдарламасының аясында алынатын жобалардың арасында өнеркәсіптік жобаларға қаржы ұйымы тарапынан басымдық берілетіні нақтыланды.Іс-шара барысында жоғарыда аталған мәселерге байланысты қатысушы кәсіпкерлер мен кәсіпкерлік ынтасы бар азаматтар тарапынан салаға қатысты түрлі сауалдар қойылып, мамандар тақырыптарды ашып, жауаптар берді.Соңында аудандық кәсіпкерлік, өнеркәсіп және туризм бөлімінің бас маманы Л.Смағұлова бүгінгі түсіндірме жұмыстарына қатысқан қаржылай және қаржылай емес қолдау түрлерін көрсетіп жүрген ұйымдардың өкілдеріне және елді мекендерден қатысып отырған кәсіпкерлер мен кәсіпкерлік ынтасы бар азаматтарға бөлімнің атынан алғыс білдірді.

Сырдария ауданында мемлекеттік қолдау бағдарламаларына түсіндірме жұмыстары ұйымдастырылды

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Олжас Бектенов Ақтөбе облысындағы су тасқыны жағдайын тексеріп, қауіпті аймақтағы ауыл тұрғындарын эвакуациялау жұмыстарын жеделдетуді тапсырды, деп хабарлайды BAQ.KZ.</h4>Премьер-министр, Су тасқынына қарсы іс-шараларды үйлестіру және су тасқыны зардаптарын жою жөніндегі республикалық штабтың басшысы Олжас Бектенов Ақтөбе облысындағы су тасқынына байланысты жағдайды тексеріп, Мемлекет басшысының тапсырмаларының жергілікті жерлерде орындалу барысымен танысты. Атап айтқанда, бірқатар су қоймаларын тікұшақпен аралап, су тасқынынан зардап шеккен үйлерге барды, сондай-ақ ахуалдық орталықтың жұмысымен танысып, республикалық штабтың отырысын өткізді.Сол жерде Олжас Бектенов су басқан үйлердің жай-күйін қарап, тұрғындардың баспаналарын қалпына келтіру және басқа да қосымша қолдау шараларын көрсетуге қатысты сұрақтарына жауап берді. Мәселен, әкімдік тізімдері бойынша су тасқынынан зардап шеккендер санатына жатқызылған барлық азаматқа несиелер бойынша жылдың маусым айының соңына дейін 3 айға несие төлемдерін автоматты түрде кейінге шегеру мүмкіндігі беріледі, сонымен қатар төлемдерді кешіктіргені үшін айыппұлдар мен өсімпұлдар салынбайды.Жалпы облыста тасқын қаупі әлі сейілмеген. Қазір өзендердің көпшілігінде су арнасынан асып кеткелі тұр. Өңірде 772 үй су астында қалды. Облыстың 5 ауданында (Қобда, Мұғалжар, Темір, Әйтеке би, Ойыл) және Ақтөбе қаласында жергілікті ауқымдағы табиғи сипаттағы төтенше жағдай жарияланды. Су тасқынына қарсы іс-шараларға жеке құрамнан 3140 адам, 664 техника жұмылдырылды. Барлығы 8 763 адам қауіпсіз жерге көшірілді.Олжас Бектенов көлемі 15,8 млн м3 болатын Мағаджан бөгетін аралап көрді, онда қарғын су ағыны салдарынан Мағаджан су қоймасының бөгеті бұзылды. 1985 жылы пайдалануға берілген. Гидротехникалық құрылыс жекеменшік «Тұлпар» ЖШС компаниясының иелігінде. Қызылту ауылынан 25 адам, Табантал қыстағынан 11 адам эвакуацияланды.Сонымен қатар болжамдарға сәйкес, 5-11 сәуір аралығында облыстың барлық аумағында ауа температурасы айтарлықтай жылынуы мүмкін, қатты жауын-шашын күтілмейді. Осыған байланысты су тасқынынан зардап шеккен ауылдармен қатар, қайта су алып кету қаупі жоқ аймақтардағы елді мекендердің тыныс-тіршілігін де қалпына келтіруге назар аударылды.Мәселен, қазірдің өзінде 26 елді мекенде электр қуатымен жабдықтау қалпына келтірілді. «Энергожүйе» ЖШС-нің барлық бөлімшелері күшейтілген режимде жұмыс істеуде. Республикалық маңызы бар 9, облыстық маңызы бар – 3 жолда және 9 аудандық маңызы бар жолда судың тоқтауына байланысты көлік қозғалысына қойылған шектеулер алынып тасталды. Өңірде шығынды өтеу комиссиясы жұмыс істейді. Үш күн ішінде комиссияға материалдық шығындарды өтеу туралы 1623 өтініш түскен. Алгоритмге сәйкес, ТЖ орын алған күннен бастап күнтізбелік 30 күн ішінде келтірілген шығынды өтеу туралы жергілікті әкімдіктерге өтініш беріледі. Сонымен қатар Ақтөбе облысында су тасқынынан зардап шеккен және қиын жағдайға тап болған тұрғындар әкімдікке тиісті өтінішпен жүгіну арқылы бір реттік төлем ала алады.Олжас Бектенов облыс әкімдігінің ахуалдық орталығында болды. Ахуалдық орталықтың операторлары «109» қысқа нөмірі бойынша тәулік бойы жұмыс істейтін Call-орталық арқылы халықпен байланыста болады. Су тасқынына қарсы іс-шаралар басталғаннан бері 109 ахуалдық орталығына 15 мыңнан астам қоңырау түскен. 12 293 өтінім тіркелді. Ахуалдық орталық күшейтілген режимде жұмыс істеуде, оған ТЖ және су тасқынына қарсы штаб қызметтері қосылған.Қорытынды бойынша Үкімет басшысы Олжас Бектенов су тасқыны салдарын жойғаннан кейін коммуналдық және жеке меншіктегі гидротехникалық құрылыстарда жан-жақты тексерулер жүргізуді тапсырды. Ақтөбе облысында барлығы 206 гидротехникалық құрылыс бар.Фото: primeminister.kz

Су тасқынынан зардап шеккендердің несие төлемдері шегеріледі

<a href="https://kyzylorda-news.kz/">Kyzylorda-news.kz</a> &nbsp;Қазақстан Республикасы Үкіметінің Қаулысымен 2023 жылдың 25 қарашасында «Жастарға әскери-патриоттық тәрбие берудің 2030 жылға дейінгі Тұжырымдамасы» бекітілді. Сол құжаттың бір бөлігі тұтастай жастардың бойында патриоттық қасиеттерді қалыптастыру және дамыту, оларды ҚР Қарулы Күштерінің дәстүрі негізінде тәрбиелеу ісіне арналған. «Өткенін білмеген елдің ертеңі бұлыңғыр» дейді халық даналығы. &nbsp;Өскелең ұрпақ үшін кешегі от кешкен бабаларының өмірі де үлгі болуға тиіс. Осыған орай &nbsp;тарихи жадыны сақтау, ескерусіз қалған ерлердің есімдерін тірілту жолында еңбек етіп жүрген «Atamnyn Amanaty» қоғамдық бірлестігінің басқарма төрағасы Мұрат Молдағалиевке жолығып, бірнеше сұрақтар қойған едік .-Мұрат Жанатайұлы, қоғамдық бірлестік қашан құрылды және оның негізгі мақсат-міндеттері қандай?&nbsp;- «Өлі риза болмай тірі байымайды»&nbsp; дейді қазақ. 2019 жылы құрылған «Atamnyn Amanaty» қоғамдық бірлестігінің миссиясын осы бір ауыз сөзбен бейнелеуге болатын сияқты. Оның басы-қасында осынау тәмсілдің таудай салмағын сезініп, игілікті іске бел шеше кіріскен белсенді азаматтар жүр. &nbsp; &nbsp; &nbsp; &nbsp; «Atamnyn Amanaty» ҚБ Екінші дүниежүзілік соғыс кезінде қаза тапқан, хабар-ошарсыз кеткен қазақстандықтарды іздестірумен жүйелі түрде айналысатын еліміздегі бірден-бір ұйым. Әртүрлі деректер бойынша Қазақстаннан майданға 1 млн 300 мыңнан астам адам аттанып, оның 630 мыңы қаза тауып, 271 мыңнан астамы хабар-ошарсыз кеткен. Біздің бірлестік құрылғалы бері 4 мыңнан астам боздақтың аты-жөндерін, қай елде жерленгендерін анықтап, олардың артында қалған тікелей ұрпақтары мен туған-туыстарына хабарладық.&nbsp;&nbsp;Сонымен қатар, Қорғаныс министрлігінің көмегімен майдан даласында опат болған 16 отандасымыздың сүйегін елге жеткізіп, әскери құрметпен жерледік.&nbsp;&nbsp;Жеті атасына дейін жетік білген қазақ қашаннан іздеусіз, жоқтаусыз қалғаннан қорыққан. Ұрпақтан ұрпаққа жалғасып, үзілмей келе ұлы дәстүр. Ендеше сол көбінің артындағы ұрпағы да қалмаған 271 мыңнан астам боздақты &nbsp;іздемеу, жоқтамау ендігі жерде елдігімізге сын болар еді.&nbsp; Сол себепті биыл 22 маусым күні тұңғыш рет елдегі барлық мешіттерде бір мезгілде хабар-ошарсыз кеткен жауынгерлердің рухына арнайы құран бағышталып, дұға оқылды.&nbsp;&nbsp; «Atamnyn Amanaty» өзінің қызметінің халықаралық ынтымақтастықты нығайта отырып жүзеге асыруда. Қазір бұл ретте 50-ден астам меморандумдарға қол қойылды. Биыл қыркүйек айында Алматыда «Ортақ тарих. Ортақ жеңіс. Ортақ көзқарас» атты халықаралық конференция өткіздік. Осымен үшінші рет ұйымдастырылып отырған бұл форум ТМД елдеріндегі үкіметтік емес ұйымдар мен іздестіру қозғалыстарының өзара іс-қимылы үшін ашық диалог алаңына айналды десе болады.&nbsp;«Atamnyn Amanaty» өз жұмысын негізі үш бағыт бойынша жүргізеді. Бірінші бағыт, майдангерлерді әскери құжаттары бойынша архивтерден, түрлі форумдар мен қауымдастықтар арқылы іздестіру. Бұл өзі инемен құдық қазғандай дүние. Екінші бағыт – майдан даласында тікелей қазба жұмыстарын жүргізу. Біздің еркітілер тобы жыл сайын Калуга облысында өтетінн «Батыс майданы. Варшава тас жолы» халықаралық әскери-тарихи экспедициясына жыл сайын қатысады. Биыл да барып, қатысып, Ақмола облысында жасақталған 387-ші атқыштар дивизиясы соғысқан Ульяновск ауданында ескерткіш-белгі орнатып қайттық. Үшінші бағыт – ел ішінен туыстарын іздестіру, яғни ТМД ғана емес бүкіл Еуропа мемлекеттерінің аумағында қаншама жерлестеріміз жатыр. Олардың көбі Еуропаны (Сербия, Венгрия, Германия, Польша, Латвия және тағы басақ елдерді) азат ету барысында шейіт болса, енді біразы тұтқынға түсіп, концлагерьлерде қаза тапқандар. Қазір біздің қолымызда елден тысқары жерде мәңгілік мекенін тапқан 20 мыңға жуық қазақстандықтың тізімі бар. Соларды облыс-облыс бойынша бөліп, жергілікті бұқаралық ақпарат құралдарында жариялауды бастап та кеттік.&nbsp;Із-түссіз кеткен әкесінің дерегі табаны күректей сексен жыл өткен соң табылып, қабіріне туған жердің бір уыс топырағын апарып тұрып егілген қарияны көргенде еріктілер еңбегінің зая еместігін сезінесіз.&nbsp;- Іздестіру барысында жүректі шымырлатар оқиғалар мен қилы тағдырлар жиі кездесетін шығар. Бір-екі мысал келтіре кетсеңіз.&nbsp;- Кейде адам сенбейтін оқиғаларға куә боламыз. Қызылорда облысының тумасы Жантас Батырханұлы майданнан оралмаған әкесінің інісі Айтуған Меделхановты ұзақ жыл нәтижесіз іздейді. Бір күні көкесінің өзі түсіне кіріп, «Ең алдымен Зубов деген адамды тап, сол арқылы мені табасың» деп аян берген көрінеді. &nbsp;Ол біздің ұйымға өтініш бергенде бізде жалғыз ғана ілік бар еді, ол - майдангердің Ленинград облысында қаза тапқаны болатын. Волонтер Айгүл Аитова Ленинград түбінде қаза тапқандардың аты-жөндерін көтеріп, алдымен Зубовты тауып алады. Артынша Айтуған Меделханов та табылады. Олар Колпино қаласы үшін шайқаста қаза тапқан екен. Жантас аға туған жердің топырағын алып барып, көкесінің рухына құран бағыштап қайтты.&nbsp;Тағы бір мысал, Әлімбатыр Жабағинов пен Қошқар Құлмағамбетов есімді екі жауынгер бірге соғысып, бір зиратта жерленген екен. Олар майданға аттанған кезде елде қалған 5-6 жасар ұл-қыздары кейін ер жетіп, отбасын құрған көрінеді. Бірақ, ерлі-зайыптылар 80 жыл бойы әкелерінің бірге қаза тауып, бір зиратта жатқанынан бейхабар болып келген. Оны біз арқылы естіді.&nbsp;- Жастармен жұмыс, оларды отансүйгіштік рухта тәрбиелеу қоғамдық бірлестіктің тағы бір бағыты болып табылады ғой?- Дұрыс айтасыз. Бауыржан Момышұлы өзінің әйгілі «Қанмен жазылған кітабында» былай дейді: «Әскери тәрбие проблемасы - бұл жөргекте жатқан кезден бастап, найзаласқан қоян-қолтық айқасқа дейінгі аралықта жүргізіле беретін тәрбие проблемасы болып табылады. Ата-ана тәрбиесі - мектеп жасына дейінгі тәрбиенің ең басты сатысына, кезеңіне саяды. Мектеп тәрбиесі, коғамдық-жастар тәрбиесі - адамның қалыптасуындағы ең басты кезең. Адам қоғамдық тәрбиеге ақтық демі біткенше мұқтаж болады, қажет етеді». Еліміздегі орта мектептер мен жоғары оқу орындарында жастармен тәрбие жұмысы біршама жолға қойылған деуге болады. Өкінішке орай, бұл ретте назардан тыс қалып отырған екі әлеуметтік топ бар, олар – жұмысшы жастар мен орта-арнайы білім беретін оқу орындарының (колледждердің) студенттері. Жұмысшы жастар мүлде бөлек әңгіменің тақырыбы. Ал бүгін біз жоғарыда айтылған колледждерде оқитын мыңдаған студенттер жайын сөз етпекпіз.&nbsp; &nbsp; Өскелең ұрпақ өзінің өткен тарихын білуге тиіс. Мәселен, биыл &nbsp;«Аталар аманатына адалмыз» атты акция өткізіп, онда әрбір колледждің студенттері Қазақстанда жасақталып, Екінші дүниежүзілік соғысқа қатысқан двизиялар мен құрмалардың тарихын, майдан жолын зерттеп, солар жөнінде ғылыми-іздестіру жұмыстарын жасады. Сол зерттеулердің барысында «Даналық» колледжінің студенттері даңқты 101-ші атқыштар бригадасының соңғы көзі тірі солдатын – 102 жастағы майдангерді тапқан еді. Өкінішік орай, Ржев түбіндегі қанды шайқасқа қатысып, соғысты Кеннигсбергте аяқтаған Сатылған Бекмағамбетов ақсақалдың қайтыс болғаны туралы қаралы хабар Ақтөбе қаласынан жақында жетті. Батырдың топырағы торқа болсын! Оның өмір жолы жас ұрпаққа әрдайым үлгі болып қала бермек. &nbsp; «Мың естігеннен бір рет көрген артық» дейді қазақ. &nbsp;Сол себепті Астана қаласының бір топ студенттерін қала түбіндегі Ұлттық ұланға қарасты әскери бөлімге алып бардық. Жасөспірімдер казармадан бастап, қару-жарақ, әскери техникалармен, иісшіл итермен танысып, солдат ботқасынан дәм татып, жауынгерлік өмірмен етене танысты. Бір күннің ішінде олардың әскери қызметке деген көзқарастары түбегейлі өзгерді деуге болады. Көбі бұрынғы ойларынан айнып, қажет болса Отан қорғаушысы ретінде сапқа тұруға тілек білдірді. &nbsp;Қазіргі таңда біздің «Atamnyn Amanaty» қоғамдық бірлестігі әскери-патриоттық тәрбиені жандандыру бағытында бірқатар жобаларды жүзеге асыруды жоспарлап отыр. Оның ішінде &nbsp;әскери өнердің әліппесін үйрету мақсатында далалық жиындарды жиірек өткізу ойымызда бар. Мысалға, екі мәрте Кеңес Одағының батыры Т.Бигелдинов атындағы ҚР КК Әуе Күштерінің Әскери институтының базасында курсанттар демалысқа кеткен мезгілде балалар мен жасөспрімдер үшін жазғы жиын ұйымдастыруды ұсынбақшымыз. Жиын барысында олар осы жоғары оқу орнының тыныс-тіршілігімен, әскери ұшақтардың түрлерімен жақынырақ танысып, болашақ ұшқыштар машықтанатын тренажерлерді тікелей басқарып көрер еді. Жастардың бойында отансүйгіштік рухты сіңіру үшін осындай іс-шаралар ауадай қажет деп есептейміз.&nbsp;Бұдан бөлек, біз ҚР Қорғаныс министрлігінің әскери-техникалық мектептерімен де тығыз қарым-қатынас жасап, арнайы жоспар бойынша жұмыс істеп жатырмыз.&nbsp;Бүгінгі күні әскери-патриоттық тәрбие беру саласында жүйелі көзқарастың жоқтығы байқалады. Оған мүдделі тараптар арасындағы ведомствоаралық өзара бірыңғай іс-қимылдың болмауы да өз әсерін тигізуде. Сонымен қатар, бұл салада ұрпақтардың ауысуын ескере отырып, қазіргі жастардың кумирі кімдер және олар нені қалайды деген мәселелерді зерделеу арқылы жүйелі жұмыс жасаған жөн.&nbsp;&nbsp;«Жастарға әскери-патриоттық тәрбие берудің 2030 жылға дейінгі тұжырымдамасы» Үкімет қаулысымен бекітілді. Енді «Atamnyn Amanaty» қоғамдық бірлестігі де соны жүзеге асыруға белсене араласып, ортақ іске өз үлесін қосатын болады.Ұлы Жеңістің 80 жылдығы қарсаңында "Белгісіз қазақстандық сарбаз" монументін орнатуды ұсынып отырмыз. Осылайша біз бостандық жолында қаза тапқан боздақтардың алдындағы азаматтық парызымызды орындаймыз. Бұл ескерткіш соғыста хабар-ошарсыз кеткен немесе қайда жерленгені белгісіз барлық отандастарымдың рухына тағзым ететін көпшілік орынға &nbsp;айналар еді.&nbsp;Осының бәрі өскелең ұрпақты отаншылдық рухта тәрбиелеудің қамы, өтйкені оларға кешегі от кешкен ата-бабаларының өмірі үлгі-өнеге болуға тиіс. Ерлікті ұмытпу – елдікті ұлықтау деген сөз.&nbsp; &nbsp;Фото: Sputnik / Владислав Воднев

Мұрат Молдағалиев: Ерлікті ұмытпау - елдікті ұлықтау

<a href="https://kyzylorda-news.kz/">Kyzylorda-news.kz</a> &nbsp;Бүгін «Қараөзек ауылдық клубы» МКҚК-ның ұйымдастыруымен халқымыздың ақын қызы Фариза Оңғарсынованың 85 жылдығына арналған «Фариза жыры - поэзия сыры» атты әдеби-сазды кеш өтті. &nbsp; Фариза Оңғарсынова еліміздегі нәзік жанды жазба ақындарының ішіндегі шоқтығы биік тұлға. Оның жазған өлеңдерінен өрлік пен ерліктің сыршыл сұлулықтың, ұлылықтың сырын ұғуға болады. Оның отты жырлары ұлттың қуанышы да, жұбанышы да болған. Ақын қыз шығармаларында әйел тақырыбы жиі қозғап, қоғамның ащы шындығын бүкпесіз жырлай білген. Халқы оны осы үшінде ерекше құрмет тұтқан. Шарада Фариза Оңғарсынованың шығармашылығы мен өмір жолына арналған бейнематериал көрсетілді. Сондай-ақ, ақынның өлеңдері, шығармалары оқылды.&nbsp; Қайсар рухты ақын қыздың өлеңдеріне сазгерлер ән жазған. Әдеби кеште ақын сөзіне жазылған әндер де жиылған жұртшылыққа жол тартты.&nbsp; Сонымен қатар, кеште мәдениет саласының ардагері Жібек Әбдіжәлелова ауылдың оқушы жастарына ақынның шығармашылығы жтуралы кеңінен &nbsp;баяндап берді. Ал №10 кітапхана меңгерушісі Досмырзаева Мираш арнайы кітап көрмесін ұйымдастырып, көпшілікке таныстырды.&nbsp; Әдеби-сазды кешке жиналған ауыл тұрғындары мен жастар, оқушылар рухани демалып, ақын шығармашылығымен танысып қайтты.

Қараөзекте "Фариза жыры - поэзия сыры" атты кеш өтті

<a href="https://kyzylorda-news.kz/">Kyzylorda-news.kz</a> Қазақстан Республикасы Мемлекеттік жастар саясатының негізгі бағыттарының бірі – жастардың денсаулығын сақтауды қамтамасыз ету, олардың салауатты өмiр салтын қалыптастыру. Еліміздің жарқын &nbsp;болашағы – жастар дейтін болсақ, олардың арасында салауатты өмір салтына деген дұрыс түсінік қалыптастырып, санасына, салауатты өмір салтын ұстанудың денсаулыққа аса маңызды және ұстанған адамның болашағы жарқын екендігін түсіндіру ортақ міндет.Мемлекет басшысы халыққа арнаған Жолдауларында жастар саясаты мен олардың қоғамдағы рөлі төңірегінде нақты тапсырмалар беріп, жастар болашақтың негізі екенін атап өткен болатын. Сол бойынша елімізде жастарға арналған көптеген &nbsp;қоғамдық бірлестіктер мен орталықтар құрылып, қазіргі кезде сол еңбектердің жастар болашағына әсер етер маңызы зор екені дәлелденуде. Жаңа дәуірде елімізді сақтайтын, денсаулығы зор, интеллектісі жоғары ұрпақ тәрбиелеу мемлекет саясатының басты бағыты екенін ескерсек, осының бәрі жастарымызды салауатты өмір салтына тәрбиелеуден басталады. Жас ұрпақ өкілінің денсаулығына тұрмыстық жағдайлармен бірге бір-бірімен қарым-қатынасы да, мәдени деңгейі де, қоғамдық жұмыс пен оқудың әртүрлі салаларындағы белсенділігі де, яғни өмір салты неден тұрса, соның бәрі әсер етпек.Салауатты өмір салты түсінігіне не кіреді деген сұраққа келер болсақ, айқын жасалған күн тәртібінің болуы, жеке бастың тазалығы, дұрыс тамақтану, тынығу, дене еңбегімен шұғылдану, таза ауада, күн көзінде серуендеу, табиғат аясында болу, зиянды әдеттерден сақтану. Сондай-ақ үнемі дұрыс қозғалыста болу, ұлттық &nbsp;ерекшеліктерді ескеру, салт-дәстүрмен танысып, оны ұстана білу, қоршаған ортаға, қоғамға, табиғатқа жауапкершілік алу, әрбір жастың өз денсаулығына жауаптылықпен қарауы жатады. Одан бөлек, ел , жер көру және саяхат жасау, тағы сондай жақсы әдеттер мен әдептерді жатқызуға болады. Қорыта айтқанда, салауатты өмір салты нормаларын ұстана отырып, кез келген адам жеке және қоғамдық құндылықты көрсететін өзінің денсаулығын сақтауға жауапты.7 сәуір – Дүниежүзілік сенсаулық сақтау күні. Осы орайда Жосалы кентіндегі Ү.Көлдейұлы атындағы №183-орта мектептің 8-10 сынып оқушылары арасында «Біз спортпен біргеміз!» атты эстафеталық сайыс өткізілді. Мектеп директоры Г.Әшірова, педогог-психолог Г.Бүркітбаева, дене шынықтыру пәнінің мұғалімдері Құндақбаев Ербол, Садақбаев Қуаныш қатысып, ойынның шарттарын түсіндіріп, ұйымдастырса, ЖДО және СӨСҚ мамандары Әмина Кетебаева, Дариха Құлмырзаевалар сайысқа қазылық жасап, жеңімпаздарды Қармақшы Жастар денсаулығы орталығының арнайы дипломдарымен марапаттады.Сайыс барысында 8 сыныптан «Қыран» тобы, 9 сыныптан «Болашақ», «Аманат» топтары мен 10 сынып оқушыларынан құралған «Жас ұлан» командалары қатысып, қызу да тартысты ойын көрсетті. Барлық қатысушылар өте жоғары деңгейде белсенділік танытып, көпке үлгі болды. Жарыс қорытындысында І орын «Жас ұлан» тобы иеленсе, ІІ орынды «Аманат» пен «Қыран» тобы өзара бөліссе, жүлделі ІІІ орынға «Болашақ» тобы жайғасты. &nbsp;&nbsp;

Жастардың саулығы баста назарда

<a href="https://kyzylorda-news.kz/">Kyzylorda-news.kz</a>&nbsp; <a href="https://kz.otyrar.kz/2024/04/shymkentte-qolyna-pyshaq-ustap-qyzyn-a%d1%8fwsyz-uryp-soqqan-ajeldin-videosy-pajda-boldy/?fbclid=IwAR0-jRS39bQ0XJgbK2QaYxsEesS1orbyGJuhN1BEYJQPK0VhFS8Wv0PZ3fw_aem_AV56_x5DaedqdeMbxgHtknC5ArC86HZzwPLaQmCO0s-NYz9xFkxYjemuyjU0_O1Qey3rxfw8-qn-_vBqv15cmrFL">«Отырар»</a> телеарнасының редакциясына белгісіз әйел қызын аяусыз ұрып-соққан сәттің видеосы келіп түскен. <a href="https://www.instagram.com/p/C5WCpEyNmDZ/">Бейнежазбаны</a> көршісі жіберген. Ол аты-жөнін атамауды сұрады.Видеодан келіншектің жасөспірімге пышақ ала ұмтылғанын көруге болады. Ал қорғануға тырысқан қыз жан дауысымен айқайға басып, өтініп жылай бастайды. Оның бұл әрекеті келіншекті одан сайын ашуландырған секілді. Ол қызды алдымен шапалақпен ұрып, кейін шелекпен ұрып-соғады. Жасөспірім соққыдан қашып құтылмақ болған. Алайда нәтиже болмаған. Бұдан өзге әйел оны футболкасынан ұстап, жұдырықпен ұра бастайды.Жаға ұстатарлық жағдай үйдегі бейнебақылау камерасына түсіп қалған. Видеоны редакцияға жолдаған дереккөздің мәліметінше, оқиға 30 наурызда «Нұрсат» шағын ауданында болған және бұл пәтерде мұндай жанжалдар жиі орын алады екен.<blockquote>«Анасы туған қызына пышақ ала жүгірді. Мен олардың көршісімін. Олар жақында&nbsp; көшіп келген. Келіншектің бұдан өзге екі немесе үш кішкентай баласы бар. Нақты санын білмеймін. Оларға&nbsp; көмектесіңіздерші», – деп жазды анонимді дереккөз.</blockquote>Қалалық Полиция департаментіндегілер аталған факті бойынша 31 наурызда қылмыстық іс қозғалғанын мәлімдеді. Видеодағы жасөспірім әйелдің бірінші некеден туған қызы. Ол қазіргі уақытта әкесінің қамқорлығында.Келіншектің қызына мұншалықты қатыгездік танытуына не себеп болғаны белгісіз. Қазіргі таңда сотқа дейінгі тергеу жұмыстары жүріп жатыр.<blockquote>«Полиция қызметкерлері бейнежазбада көрсетілген тұлғаларды анықтады. Аталған факті бойынша 2024 жылдың 31 наурызында қылмыстық іс қозғалды. Тергеу шаралары жүргізілуде. Сараптама тағайындалды. Бұл іс Шымкент қалалық ПБ бастығының бақылауында», – деп жауап берді «редакциясы сауалына полициядағылар.</blockquote>&nbsp;

Шымкентте қолына пышақ ұстап, қызын аяусыз ұрып-соққан әйелдің видеосы тарады

<a href="https://kyzylorda-news.kz/">Kyzylorda-news.kz</a> &nbsp;Қарулы күштерге көктемгі шақыру 1 наурызда басталып, 30 маусымға дейін жалғасады. Сонымен қатар, әскери қызметтен бас тарту немесе жалтару жағдайлары көбейіп барады. Мұндай жағдайда қандай жаза қарастырылған? Бұл туралы Stan.kz ақпарат агенттігі Sarbaz.kz сайтына сілтеме жасап хабарлайды.Әскери қызметке шақыру келгеннен кейін еш себепсіз белгіленген уақытта келмеу жалтару болып саналады.Бұл қылмыс азаматтарды әскери қызметке шақырудың белгіленген тәртібін бұзуынан, нәтижесінде мемлекеттің қорғаныс қабілетіне зиян келтіруінен тұрады.Әскери есепке қою жөніндегі міндетті орындамаған және әскери қызметтен жалтарған жағдайда мұндай құқық бұзушылықтар Қазақстан Республикасы Қылмыстық кодексінің 387-бабына сәйкес, "әскери қызметтен жалтару" бойынша қылмыстық жауаптылыққа әкеп соғады:Әскери қызметтен босатуға заңды негіздер болмаған кезде әскери қызметке шақырудан жалтарған үшін 1000 АЕК-ке дейінгі мөлшерде айыппұл салу, не сол мөлшерде түзеу жұмыстарына, не төрт жүз сағатқа дейінгі мерзімге қоғамдық жұмыстарға тарту, не бір жылға дейінгі мерзімге бас бостандығын шектеу түрінде жаза қолданылады, не сол мерзімге бас бостандығынан айыру қарастырылады.Дәл сол әрекет:өзіне зиян келтіру арқылы; ауруды имитациялау арқылы; құжаттарды қолдан жасау немесе өзге де алдау тәсілі қолданылғаны үшін, – үш мың айлық есептік көрсеткішке дейінгі мөлшерде айыппұл салу, не сол мөлшерде түзеу жұмыстарына, не 800 сағатқа дейінгі мерзімге қоғамдық жұмыстарға тарту, не үш жылға дейінгі мерзімге бас бостандығын шектеу, не сол мерзімге бас бостандығынан айыру түрінде жаза қолданылады.Ескерту: егер тергеу органы істі сотқа бергенге дейін әскерге шақырылушы әскерге шақыру учаскесіне өз еркімен келсе, қылмыстық жауаптылықтан босатылады.Еске салайық, наурыз айының басында қарулы күштер бас штабы ұйымдастыру-жұмылдыру жұмыстары басқармасы бастығының орынбасары Азамат Досымов азаматтар әскерге шақыртудан жалтарса, жергілікті әскери басқару органдары оларға қажеттілік туралы хабарламаса, ақпарат аумақтағы тиісті ішкі істер органдарына жіберілетінін хабарлаған еді.

Әскери қызметтен жалтару немесе бас тарту: Қандай жаза қарастырылған?

Азамат Еркінұлы: Әрбір өрт сөндіруші – қаһарман

<a href="https://kyzylorda-news.kz/">Kyzylorda-news.kz</a> &nbsp;Перизат Сламбекова қатардағы қызметкерден жауапты орынға ие болды. Бар болғаны бес жыл ішінде білікті маман екенін байқатып, жас болса да көш бастап жүр. Аймақтағы айшықты орны бар «Далатекс» фабрикасын түрлендіреміз деген тілегі де бар.&nbsp;– Тігіншіні инесі асырайды. Цехтағы табанды еңбек қалай басталды?&nbsp;<blockquote>– Қай жаста да жетістікке жету адамның өзіне байланысты. Меніңше, ынта мен құлшыныс несібені маңдай термен табуға себеп. Далатекс фабрикасына 17 жасымда практикаға келдім. Өндірістік тәжірибе барысында істі өнімді аяқтап, тігін саласының қыр-сырын меңгердім десем артық емес. Сөйтіп оқуымды бітіре салысымен жұмысқа орналастым. Бес жыл ішінде тігінші, цех мастері қызметін абыроймен атқардым. Толымды еңбек еткенде ғана нәтижеге жетуге болады. Жас буынға жасықтық тән емес. Айтарым, тігінмен де тиісті табысты табуға мүмкіндік зор. Шын шеберлі бір шеңберде шектеліп қалмайды.&nbsp;</blockquote>–Жоғары деңгей дәрежені көтеретіні белгілі. Бүгінде Далатекс компаниясында жоғары қызметке тағайындалдыңыз. Әсер қандай?<blockquote>–Бүгінде тігін фабрикасындағы тіршілік қызу жүріп жатыр. Кәсіптің кеңейіп, мекеменің ұлғаюына байланысты өндіріске жауапты орынбасармын. Сенім білдірген компания директоры Ділмұхамед Абызовқа алғыс. 23 жасымда күрделі саланың басында тұрып, мардымды жұмыстар атқару мен үшін қуаныш. Енді білікті маман ретінде жұмысты жүйелі жүргізіп, тігін ісін жандандыруды жүзеге асырамын.&nbsp;</blockquote>–Далатекс компаниясы отандық өнімдерді шығаруда өңірде көш бастап келеді. Қазір қандай іргелі өзгерістер бар. Жетістіктермен бөліссеңіз...<blockquote>–Алғашында ерлер жейдесін шығардық. Атауы нарыққа жайылған фабрика жұмысы қарқынды. Отандық өнімді шетелге экспорттап жүргенінен де бәрі хабардар. Тіпті мектеп формасына дейін тігіп, қолжетімді бағада сатылымға шығарып келдік. Мұның бәріне тынымсыз еңбек пен табандылық тиесілі. Сондай-ақ, короновирус кезінде де халыққа қажетті медициналық маска тігіп, бірнеше данасын көпке ұсынғанымыз ұмыт болмайтыны анық.&nbsp;Ұлттық көрмелерде фабрика өнімі қойылып, жан-жақтан тапсырыстар түсуде. Бұл да цех жетістігін толықтырмақ. Сонымен қатар "Қазгермұнай", "Қаражанбас", "Қазақтелеком" және Ішкі істер органдарының қызметтік жейдесі мен басқа да мекеменің арнайы киімдерін тігеміз. Өнімдер өңірімізде ғана емес, аймақтарда да сұранысқа ие.</blockquote>– Тапжылмай отырып тігін тігу оңай емес. &nbsp;Жалпы тәулігіне қанша тапсырыс орындайсыздар?<blockquote>–Иә, тігіншінің әр ісі бейнетке толы. Киім тігісінің қалпында шығуы үшін көз майын тауысады. Кейде киім жібі сетінеп кететін жағдайлар жоқ емес. Сондықтан әрбір өнім, түскен тапсырысты тыңғылықты орындауға мән береміз. Ұжымның ұйымшылдығы да осында.Фабрикадағы тігін машинасының сартылдаған дыбысы үздіксіз жұмыс істейтінімізді аңғартады. Содан болар жылдамдыққа иек артып, тапсырысты сол мезетте аяқтауға тырысамыз. Тәулігіне 400-500 дана киім өндіріп шығарамыз.&nbsp;</blockquote>– Компанияның кәсібі кеңейіп келеді. Кадр мәселесі қалай? Сіздіңше, жастар тігінші болуға ынталы ма?<blockquote>–Тігіннен де табыс табуға болатынын айтып өттім. Қазіргі таңда құрақ-көрпе, киім-кешекке сұраныс әлдеқайда жоғары. Демек, тігінші еңбегі де елеулі деген сөз. Далатекс фабрикасына практикадан өтуге бірнеше студент келеді. Жұмыстың қауырт, уақыттың тығыздығына қарамай шеберлер тігінге бейімдейді. Әрі қарай икемі барлар жұмыс істеуге қалса болады. Бізде жастарға мүмкіндік көп. Қазір қыздар ғана емес ер-жігіттер де тігін саласына келуде. Бұл нарықта өзіндік орын қалыптастыруға үлес деп білемін.</blockquote>&nbsp;

«Далатекс» тігінші: Тәулігіне 400-500 дана киім өндіріп шығарамыз

&nbsp;<a href="https://kyzylorda-news.kz/">Kyzylorda-news.kz</a>&nbsp; &nbsp; Әдетте фантастикалық қиял-ғажайып жанрындағы фильмдерде қоғам өміріне белсене араласып, елді, жерді құтқарып жүрген батырларды теледидардан көріп жатамыз. Олар өз кезегінде балалардың үлгі тұтардай тұлғасына айналған. Алайда, мұндай батырлар тек фильмдерде ғана емес шынайы өмірде де барын ұмытпаңыз. Оған дәлел – Астанада орын алған. Көп қабатты үйлердің бірінде өмірі қыл үстінде тұрған сәбиді құтқарған қызылордалық батыр Сәбиттің ісі. Мұндай жандар қасиетті Қазалы топырағында да бар. Бүгінгі әңгіме өзінің ісіне асқан жауапкершілікпен қарап, бірнеше адам жанын арашалап қалған Думан Бурабайұлы жайында өрбімек. Өрт сөндірушінің өрт шалған үйден газ толған балонды өз өмірін бәсекеге тігіп, алып шыққан сәтіндегі суреті әлеуметтік желіде жарияланған болатын. Оның ісі қаптаған оқырман арасында қызу талқыға түсті. Сол суреттегі батыр Қазалы ауданы №9 өрт сөндіру бөлімінің азаматтық қорғау сержанты Думан Жәли еді. Ол Қазалы ауданы, Сарыкөл ауылдық округі, Абай ауылында өмірге келген. Бала күнінен өрт сөндірушілердің батылдығы мен ерлігіне сүйсіне қараған ол, «ер жеткен соң осы мамандық иесі қатарынан боламын» деп армандаған. Кейін білім ошағын тәмамдап, Отан алдындағы борышын өтеуге аттанды. Сонан соң, азаматтық міндетін атқарып, бәз баяғы бала күнгі арманын орындауды мақсат етті. Осылайша, Қазалы ауданы №9 өрт сөндіру бөлімінде өз орнын тапты. Қазіргі таңда отбасында асқар тауы – Бурабай, анасы – Айпатша және өмірлік жары – Мира Жұмабаева мен үш ұл, екі қыз тәрбиелеп отыр. «Әке көрген оқ жонар» демекші үлкен ұлының да арманы әкесі Думандай болу. Баршамыз білетіндей, өрт сөндіруші мамандығы әлемдегі ең қауіпті қызметтің бірі. Нағыз азаматқа тән мамандық ержүректілік пен батылдықты талап етеді. Ұдайы өлім мен өмірдің арасында арпалысып жүрген батырлардың құрал-саймандары сақадай сай, дайындықтары жоғары болуы керек. Себебі, бұл іс мүлт кетуді кешірмейді. Осындай қауіпте басын бәйгеге тігіп, әрбір жанның амандығы мен ел үшін еңбек етіп жүрген азаматтардың ісіне қарап, сүйсінбеске амал жоқ. Осы орайда, Думан өзінің ең алғашқы жалынды ауыздықтандырудағы сәтін былай бейнеледі: – Барша қазалылықтар білетін «Орын-ай» базары белгілі себептермен өртке оранған болатын. Сол сәтте дабыл қағылып, бригада жұдырықша жұмылып, нұсқаулар түсіндіріліп, белгілі жерге аттандық. Межелеген жерге жеткен соң жалындап тұрған нысанды көргенде біртүрлі күйге түстім. Сонан соң сезімге берілуге жол бермей, дереу өрт сөндірушінің 5 қағидасы бойынша жұмысқа кірісе кеттім. Онда бірінші қағида адам жанын арашалап қалу болғандықтан нысандағы саудагерлерді құтқаруға ұмтылдық. Кейін құнды заттарын аман алып, өртті дер кезінде ауыздықтадық. Артынша, базар ұжымы және сол жерде куә болғандардың алғысына бөленіп, бір жігерленіп алдым. Осылайша, алғашқы құтқару жұмысын сәтті аяқтадық. Әрбір өрт сөндірушінің оқыс оқиғадан аман-есен шығуы, әрине, ережелерді ұстанудың арқасы. Бірақ, үйде тілеуімізді және амандығымызды Алладан сұрап отырған анамыздың да, септігі мол екеніне кәміл сенімдімін, – деді ол. Биыл Думанның құтқарушылар қатарында жүргеніне 18 жыл толмақ. Осы уақытқа дейін ерлік көрсетіп, соған сай түрлі наградалармен марапатталған. Солардың бірі – орын алған оқыс оқиға барысында 11 адамды ажалдан арашалағаны үшін, сол күні ержүректік танытқан барша бригадамен бірге Қазақстан Республикасының Төтенше жағдайлар министрлігінің III дәрежелі төсбелгісін таққан. Өртке қарсы қызмет органдарындағы мінсіз қызметі үшін 10 жылдық медальімен марапатталды. Басқа да бекет бастығы Ғабит Неталиев, қарауыл басшысы Жұбаныш Мырқиясов, бөлімше командирі Нұрлан Айниязов, өрт сөндіруші Ғалым Нажман, жүргізуші Жеңіс Оразалиев пен Дәулетияр Теңізбай және Алтынбек Қанжарбек, өрт сөндіруші Нұрғали Аманжол сынды ұжымдастарының ауыз толтырып айтарлықтай жасаған ерліктерінің аз еместігін де тілге тиек етті. Қызметтегі әріптестері де оны мақтан тұтады. Олардың айтуынша: – Думан үлкенге құрмет, кішіге қамқорлық көрсете білген жан. Жұмыс тәртібі де үлгерімді, берілген тапсырманы бұлжытпай орындайды. Қызметтегі жас буынға білгенін үйретіп, оңы мен солын көрсетіп жүреді. Бір сөзбен айтқанда, нағыз батыр, – дейді ұжымдастары. Қорыта айтсақ, бүгінде қауіп-қатерге тосқауыл болып, жанын шүберекке түйген оғландардың еңбегі, ел назарынан тыс қалып жатқан жоқ. Тілсіз жаумен арпалысушылардың «Бізге халықтың алғысы да жетеді» деген сөзді ұран етеді.

Ажалға араша түскен азамат 

<a href="https://kyzylorda-news.kz/">Kyzylorda-news.kz</a>&nbsp; ҚР Еңбек және халықты әлеуметтік қорғау министрлігі тарапынан облыс бойынша NEET санатындағы 11 297 жастың тізімі ұсынылған болатын. Оның ішінде Жалағаш ауданы бойынша 278 жас «Отбасылық цифрлық картасы» ақпараттық жүйесінде деректерін өзектендіу керек. Қазіргі таңда аудандағы 173 жастың (62,23%) деректері өзектендірілген. Жалағаш аудандық қоғамдық даму бөлімінің басшысы Жасұлан Еспенбеттің сөзіне сүйенсек, 105 жаспен адрестік жұмыстар жүргізілген. Осы санаттағы жастармен байланысу барысында көпшілігі тұрғылықты мекен-жай бойынша тіркеуде болғанымен өзге қалада жалдамалы немесе өзін-өзі жұмыспен қамтығандар екені анықталды.Жалағаш ауданы бойынша жастар арасында жұмыссыздық деңгейі 4,2 пайызды құрайды. 2023 жылы аудандағы «Мансап» орталығына 1 341 жас жұмыс іздеуші ретінде тіркелген. Оның 968-і немесе 72,2 пайызы ұлттық жобаға қатысушылар құрамына енгізілген. Тарқатып айтсақ, әлеуметтік жұмыс орындарына 12, жастар практикасымен 257, қоғамдық жұмыстарға 252, ұрпақтар келісім-шартымен 7, алғашқы жұмыс орнымен 22 жас жұмысқа жолданған. Мұнан бөлек аудандағы 34 жас мемлекеттік грант иегері атанған. «Бастау бизнес» жобасы аясында кәсіпкерлік оқумен 187 жас қамтамасыз етіліп, мемлекеттік қолдаушараларынсыз 197 жас тұрақты жұмысқа орналасқан.«Жалағаш ауданындағы жұмыссыз (NEET) санатындағы жастарға бағытталған шараларды ұйымдастыру» әлеуметтік қызметі аясында Жалағаш ауданы жастарының «Темірқазық» қоғамдық бірлестігі аудан көлемінде жұмыссыз жастар арасында спорттық сайыстар, кездесулер, семинарлар ұйымдастырып, жүйелі жұмыстар атқаруда. Мектептерде 14 жастан бастап оқушылардың дұрыс мамандық таңдау мәселесі бойынша аудандық білім бөлімі, Жалағаш индустриалды-аграрлық колледжі, аудандық жастар ресурстық орталығының ұйымдастыруымен «Мамандық таңдау – келешекті таңдау», «Менің сүйікті мамандығым», «Бейіміне қарай мамандық таңдау», «Болашақ мамандық таңдауда отбасының рөлі», «Баланың мамандық таңдауында ата-ананың рөлі» тақырыптары аясында аудан көлемінде тренинг, дөңгелек үстел, еркін форматтағы кездесулер, тәрбие сағаттары және т.б. шаралар ұйымдастырылып келеді. Білім беру ұйымдарының жоғарғы сынып оқушыларына кәсіби бағдар беру мақсатында «Түлектер тақтасы» орналастырылған. Алдағы уақытта аудан жастарына заман талабына сай мамандықтарды кеңінен насихаттау жұмыстары жоспарлануда.Жасұлан Ерданұлы аудандық жастар ресурстық орталығының штаттық бірлігін көбейту, оның ішінде қажетті есепші, психолог мамандары мәселесі, автокөлікпен және компьютерлік техникамен қамтамасыз ету бойынша 2023 жылдың қыркүйек айында аудандық экономика және қаржы бөліміне бюджеттік өтінім жолданғанын айтады. Комиссия шешімі бойынша компьютерлік техникаларды сатып алуға қаржы қарастырылған. Қазіргі таңда мемлекеттік сатып алу порталына жариялау жұмыстары жүргізілуде.2024 жылы жастарды дамыту мен қолдауға мемлекеттік әлеуметтік тапсырыс шеңберінде 4 жобаны жүзеге асыруға жергілікті бюджеттен 10 692 млн теңге қаржы бөлінген. Тарқатып айтсақ, «Жалағаш ауданы бойынша мемлекеттік жастар саясатын жүзеге асыру» әлеуметтік қызметіне 2 млн 440 мың теңге, «Жалағаш ауданындағы жұмыссыз (NEET) санатындағы жастарға бағытталған шараларды ұйымдастыру және жастар шығармашылығын дамыту»&nbsp; әлеуметтік қызметіне 1 млн 607 мың теңге, Жалағаш ауданы әкімінің «Жалын» жастар сыйлығына байқау ұйымдастыру қызметіне 2 млн 500 мың теңге, жастар арасында ұлттық құндылықтарды насихаттау және патриоттық шараларды ұйымдастыру қызметіне 2 млн 642 мың теңге қаралған.2023 жылы ауданда 3 жобаны жүзеге асыруға жергілікті бюджеттен 4,2 млн теңге қаржы бөлінген. Жеке-жеке тоқталсақ, олардың қатарында «Жалағаш ауданындағы жұмыссыз (NEET) санатындағы жастарға бағытталған шараларды ұйымдастыру» әлеуметтік қызметі бар. Оны жүзеге асырушы ұйым – Жалағаш ауданы жастарының «Темірқазық» қоғамдық бірлестігі. Жобаның жалпы құны – 1 млн. 90 мың теңге. Сондай-ақ «Жалағаш ауданы бойынша мемлекеттік жастар саясатын жүзеге асыру» әлеуметтік қызмет жұмысын ұйымдастыру да былтыр көзделген. Жүзеге асырушы ұйым – Жалағаш ауданы жастарының «Темірқазық» қоғамдық бірлестігі. Жобаның жалпы құны – 1 млн. 800 мың теңге. Мұнан бөлек былтыр «Жастар форумы және жастар сыйлығына байқау ұйымдастыру» әлеуметтік қызметі де жүзеге асырылған. Жобаның жалпы құны – 1 млн. 400 мың теңге.&nbsp;<blockquote>–&nbsp;Аудан жастарының мемлекеттік бағдарламаларға қатысу белсенділігі жылдан-жылға артып келеді. Жастарды әлеуметтендіруге бағытталған, оның ішінде жұмыссыз және NEET санатындағы жастарды тарта отырып «Tulga bol» жәрмеңкесі және «Мүмкіндіктер алаңы»кеңес беру шарасы Жалағаш кентінің орталық базарында және ауылдық округтерде өткізілді. Шараға аудандық білім бөлімі, жұмыспен қамту және әлеуметтік бағдарламалар бөлімі, кәсіпкерлік, өнеркәсіп бөлімі, ауыл шаруашылығы мен жер қатынастары бөлімі, аудандық аурухана, Жалағаш индустриалды-аграрлық колледжі, аудандық кітапхана және балалар кітапханасы, «Samgau» Қызылорда облысының жастар қоғамдық бірлестігі («Жасыл ел» еңбек жасағы туралы мәлімет) және «Азаматтарға арналған үкімет» МККЕАҚ Қызылорда облысы бойынша филиалы халыққа қызмет көрсету бойынша Жалағаш аудандық бөлімінің мамандары қатысып, жастардың көкейіндегі сауалдарын тыңдап, мемлекеттік бағдарламалар мен мүмкіндіктер жайлы кеңінен баяндады, – дейді Жалағаш аудандық жастар ресурстық орталығының директоры Нұржан Амандық.</blockquote>Оның сөзінше, ауданда жастар арасында кәсіппен айналысатындар көбейген. Орталық директоры мұны мемлекет тарапынан салаға көрсетілген қолдаумен байланыстырады.&nbsp;<blockquote>– Мемлекеттік және өңірлік бағдарламалар аясында шағын және орта кәсіпті бастау немесе жұмыс істеп тұрған кәсібін әрі қарай дамыту бағытында аудан бойынша жыл басынан бері 206 жоба 4809,3 млн. теңгеге&nbsp;қаржыландырылды. Оның ішінде 80 жас кәсіпкердің&nbsp; жобалары 378,3 млн теңгеге қаржыландырылған. Сондай-ақ, 2023 жылы «Аграрлы несие корпорациясы» АҚ арқылы жастар кәсіпкерлігін бастау немесе дамыту бағытында аудан бойынша 100-ге жуық жоба қатысып, қазіргі таңда 80 жоба 378,3 млн теңгеге қаржыландырылды. 2023 жылы «Zhas Project» жобасы бойынша 2 жас (біріNEET санатындағы жас – дәнекерлеу жобасы, бірі мүмкіндігі шектеулі жас – тойларға қызмет ету жобасы) 2 млн теңге көлемінде грант иегері атанып, жобаны сәтті түрде жүзеге асырды. Биылғы жылы «Zhas Project» жобасы бойынша наурыз айында өтінім қабылдау басталады. Конкурс шеңберінде 10 үкіметтік емес ұйым 1 млн теңгеден 280 шағын грант бөледі. Жобаға ауданымыздың жұмыссыз (NEET) санатындағы жастарын қатыстыру жоспарлануда, – дейді орталық директоры Нұржан Райсұлы.</blockquote>Өткен жылы ауданда жастар арасында 112 құқық бұзушылық тіркелген, оның ішінде 14-35 жас аралығындағы жастармен 43 қылмыс жасалған. Жалағаш ауданының полиция бөлімінің Жергілікті полиция қызметі бөлімшесінің Ювеналды полиция тобының учаскелік полиция инспекторлары, жастар ресурстық орталығы, жастар ұйымдары және білім бөлімінің мамандары бірлесіп, жастар және жасөспірімдердің арасындағы қылмыс пен құқық бұзушылықтың алдын алуда түсіндірме жұмыстары және рейд тұрақты жүргізіп отыр. Ауданда 23 жас пробация есебінде тұрады. Осы санаттағы жастармен семинарлар, кездесулер, спорттық сайыстар өткізіледі екен.&nbsp;Ауданда ерекше білім беруді қажет ететін балаларға психологиялық-медициналық-педагогикалық консультациясы (ПМПК), Психологиялық-педагогикалық түзету кабинеті (ППТК),&nbsp; №201 мектеп-лицей жанынан логопедиялық пункт, психикалық дамуы тежелген балаларға арналған арнайы сынып, №202 орта мектеп жанынан инклюзивті ресурстық орталық және инклюзивті ортаны қалыптастыру бағытында 16 мектеп (80 пайыз), 10 балабақша (100 пайыз) арнайы мамандармен қамтылып, түзету және арнайы білім беру жұмыстарын жүргізуде. Былтыр Жалағаш аудандық ауруханасы бойынша 14 пен 35 жас аралығында 9101 жас тіркелген. Бұл аудандағы жалпы халық санының 28 пайызын құрайды. Мүмкіндігі шектеулі жастар саны – 111, аудан бойынша мүмкіндігі шектеулі тұлғалар санынан жастардың үлесі – 11,5 пайыз. Жастар денсаулығы бөлімшесінде 1 қоғамдық денсаулық сақтау дәрігері қызмет атқарады. 2023 жылға арналған «Жылдық жоспар» бекітіліп, насихаттау бағытында салааралық бағытта жалпы саны 150 іс-шара өткізіліп, 2 700 адам қамтылған. Оның ішінде 5 акция (180 адам), 71 семинар/тренинг (2255 адам), 5 спорттық шара (185 адам), 1 анкета (50 адам), 2 рет дөңгелек үстел (30 адам) өтіп, 2 мақала газет беттерінде, әлеуметтік желіде 64 ақпараттық материал жарияланған.<blockquote>– 1 маусым – Халықаралық балаларды қорғау күніне орай «Психологиялық-медициналық-педагогикалық консультация» КММ, Жалағаш ауданының мəдениет жəне спорт бөлімінің «Руханият орталығы» КМҚК, «Жалағаш достық мекені» қоғамдық бірлестігі, Жалағаш ауданы жастарының «Темірқазық» қоғамдық бірлестігі және ерікті жастардың ұйымдастыруымен ерекше балаларға арналған «Бақытты бала – бақытты ел» атты іс-шарасы өткізілді. Шара аясында эстафета, мерекелік концерт ұйымдастырылып, белсенді қатысқан бүлдіршіндерге арнайы алғыс хат пен сыйлықтар табысталды. Сонымен қатар мерекелік дастархан жайылып, батутқа тегін жолдама берілді, – дейді аудандық білім бөлімінің басшысы Талғат Садықов.</blockquote>Жалпы Жалағаш ауданына қарасты 14 ауылдық округ бар. Әр ауылдық округ бойынша арнайы жастар ісі жөніндегі мамандар бекітілген. Ауылдық округтегі жастар істерімен айналысатын мамандардың жұмыстарын жандандыру мақсатында жыл басында мемелекеттік жастар саясатын жүзеге асыру бойынша жылдық жоспар бекітіліп, жұмыстар жүйелі атқарылуда.

Жалағаш ауданы: Мемлекеттік жастар саясаты жүйелі жүзеге асуда

<a href="https://kyzylorda-news.kz/">Kyzylorda-news.kz</a>&nbsp; Арал ауданындағы №64 орта мектебі сапалы біліммен қатар, озық жобаларын сәтті ұштастырған үлгілі білім ордасы ретінде көпке танылған.&nbsp;Олай дейтін себебіміз, бұл мектеп “Жасыл бақ” жобасын жүзеге асырып, оқушылар жылыжай ісін жандандырып келеді. Бұл жобаның басты ерекшелігі&nbsp;– күзгі және қысқы мезгілде де табиғи таза өнім алуға болады. Сонымен қатар, мұнда тамшылатып суару әдісі арқылы көкөністің бірнеше түрі өсіріледі. Оқушылар мен мектеп ұстаздарының еңселі еңбегінің нәтижесінде жылыжайда бүгінге дейін 90 кг қияр, 15 кг қызанақ өнімі алынды. Ал қазіргі таңда жылыжайда 165 түп қияр егіліп, оқушылардың қатысуымен арнайы күтім жасалуда. Бұл туралы&nbsp;Қызылорда облысының Өңірлік коммуникациялар қызметі мәлімдеді.<blockquote>– Біздің мектеп 2014 жылы жаңа типтік жобада пайдалануға берілген болатын.&nbsp;Қазіргі таңда 24 сынып жиынтығында 406 оқушы білім алуда. 2018 жылдың қыркүйек айынан бастап облыстық білім басқармасының қолдауымен «Жасыл бақ» жобасын қолға алдық. Осылайша 2023 жылдың қыркүйек айында 12х6 метр көлемінде жылыжайымыз ашылған болатын. Мектеп жылыжайының басты мақсаты&nbsp;– мектеп оқушыларын сапалы көкеніспен қамтамасыз ету және білім алушыларды экомәдениет пен қоршаған ортаны қорғауға баулу болып табылады,&nbsp;– деді мектеп директоры Кенжебек Тлепов.</blockquote>Жылыжай өсіруде белсенділік танытып жүрген оқушының бірі - Ақнұр Талғатқызы табиғи өнім өндіруді ерекше жақсы көреді.Ол жетекшісімен бірге осы жылыжайда әртүрлі көкөністер егіп, күнделікті күтім жасауды әдетке айналдырған. Соның арқасында жылыжай өнімдері сапалы әрі денсаулыққа пайдалы өнімге айналды.<blockquote>-Бүгінде жылыжай ісін жандандыру үшін көптеген сынама алудамыз. Сондай-ақ, қияр, қызанақтан бөлек басқа да көкөніс түрлерін өсіруді қолға алмақпыз. Менімен бірге жылыжай өсіргісі келетін оқушылар қатары да артып келеді. Алдағы уақытта осы жылыжайды одан әрі дамыту үшін көптеген биологиялық технологияларды пайдалануды жоспарлап отырмыз, - деді оқушы Ақнұр Талғатқызы.</blockquote><img src="https://knadmin.beoblood.kz/uploads/435284541_1980015109060658_8972944165759175773_n_9ea9f94082.jpg" alt="435284541_1980015109060658_8972944165759175773_n.jpg">&nbsp;<img src="https://knadmin.beoblood.kz/uploads/435256829_1980015065727329_6780731069075017027_n_d885400ed9.jpg" alt="435256829_1980015065727329_6780731069075017027_n.jpg">Фото: Қызылорда облысының Өңірлік коммуникациялар қызметі

Қазақстан және Қызылорда облысының жаңалықтары