<a href="https://kyzylorda-news.kz/">Kyzylorda-news.kz.</a>&nbsp; Ұзақ еңбек демалысы кезеңінде медициналық сақтандыру үшін аударуға міндетті ме? Егер кәсіпкердің табысы болмаса МӘМС жүйесіне жарна төлеуі керек пе? Оқырмандардың осы және басқа да сұрақтарына Әлеуметтік медициналық сақтандыру қорының Қызылорда облысы бойынша филиалының бас сарапшысы Айгүл Аханова жауап берді2024 жылдан бастап БЖТ болмайды деген ақпарат рас па?Бірыңғай жиынтық төлемін алып тастау Әлеуметтік медициналық сақтандыру қорының шешімі емес. БЖТ жеке кәсіпкер ретінде тіркелмеген өзін өзі жұмыспен қамтыған азаматтар үшін 5 жылға (2019 жылдың 1 қаңтарынан 2023 жылдың 1 қаңтарына дейін) уақытша енгізілген еді әрі оны тек басқа жеке тұлғаларға жеке қосалқы шаруашылық өнімдерін сататын және қызметтер көрсететін жылдық табысы 1175 айлық есептік көрсеткіштен аспаса төлей алады. 2024 жылы сақтандырылған мәртебесін жоғалтпау үшін азаматтар жеке кәсіпкер ретінде тіркеліп немесе дербес төлеуші ретінде жарна төлейді. Егер БЖТ төлеушілердің өткен 1 жылға төлемі болса, 2024 жылдан бастап әр ай сайын дербес төлеуші ретінде төлем жасай алады (2023 жылы – 3 500 теңге). Азаматтардың сақтандырылған мәртебесі болуы үшін, МӘМС туралы заңға сәйкес, 12 айға төлемі болуға тиіс.Ресми түрде жұмыссыз, «Еңбек» мемлекеттік бағдарламасы аясында жеке ұйымдардың бірінде уақытша жұмыс істеймін. Жұмыс беруші мен үшін МӘМС аударымдары мен жарналарын төлеуі керек пе?«МӘМС туралы» Заңның 26-бабына сәйкес азаматтардың 15 жеңілдік санатына жұмыссыз ретінде тіркелген адамдар кіреді. Бірақ егер Сіз жұмысқа турып қызметкер болсаңыз, онда Заңның 14-бабына сәйкес жұмыс беруші Сіз үшін ай сайын МӘМС-ке аударымдар мен жарналарды төлеуге міндетті.2023 жылы жұмыс берушілердің жұмыскерлер үшін аударымдары 3% - ы құрайды, аударымдардың ең жоғары сомасы 21 000 теңгеден аспауы тиіс. Бұл 10 айлық есептік көрсеткішінің 3% - і болып саналады. Азаматтық-құқықтық сипаттағы шарт бойынша жұмыс істейтін қызметкерлер мен жеке тұлғалардың жарналары 2023 жылы табыстарының 2% құрайды. Жарнаның ең жоғары сомасы 14 000 теңгені құрайды. Бұл 10 айлық есептік көрсеткішінің 2% - і болып саналады.Егер кәсіпкердің табысы болмаса, ол нөлдік кіріс тапсырады. Бұл жағдайда қалай болады?Егер жеке кәсіпкер нөлдік декларацияны тапсырса, ол өзі үшін жарналарды төлеуге міндетті, себебі мемлекеттік кіріс органдарында жеке кәсіпкер ретінде тіркеу есебінде тұр.«МӘМС туралы» Заңның 28-бабының 5-тармағына сәйкес ЖК, ШҚ иелерінің, жеке практикамен айналысатын адамдардың ай сайынғы төлем мөлшері 2023 жылы 4900 теңгені (1,4 ЕТЖ-дан 5%) құрайды.«МӘМС туралы» Заңның 31-бабына, 1-тармағына сәйкес, жеке кәсіпкерлер мен жұмыс берушілер төлем жасамаған жағдайда төлем жасалған күнді қоса алғанда, әрбір кешіктірілген күн үшін төленбеген соманың 1,25% мөлшерінде айыппұл салынады.Егер жеке кәсіпкер, оның қызметкерлері зейнеткерлер, студенттер, мүгедектер, көп балалы аналар, тиісті марапаттары бар болса, өзі және жұмыскерлері үшін жарна төлемейді. Барлық басқа жағдайларда, тіпті ЖК басқа жеңілдікті санаттарға кіретін болса да, жарналарды төлеу қажет.Тиісінше, егер жеке кәсіпкер салық органдарымен қызметін және салық есептілігін тоқтатқан болса, жұмыс істемесе және кіріс ала алмаса, бірақ сонымен бірге жеке тұлға бола тұра, үш жасқа толғанға дейін бала күту немесе бала күтімі бойынша демалыста болса, онда бұл адам міндетті медициналық сақтандыру үшін жарна төлеуден босатылады.Ресми түрде жұмыс істейтін адам 56 күндік ұзақ демалысқа шықты. «Сақтандыру» мәртебесін сақтап қалу үшін МӘМС-ке жарнаныі қалай төлейді?&nbsp;Сіздің жұмыс берушіңіз міндетті медициналық сақтандыру төлемдерін дұрыс бөлуі қажет. Егер демалыс бірнеше кезеңді (бір айдан астам) қамтитын болса, онда міндетті медициналық сақтандыру төлемдерін кезеңдерге бөлуі тиіс. Мысалы, сіз тамыз және қыркүйек айларында демалыста болды делік. &nbsp;Бұл жағдайда есепші төлемдерді бір сомада емес, екі түрлі кезеңге (тамыз және қыркүйек) есептеуі керек.Егер сізде қосымша сұрақтар туындаған жағдайда, сіз емхананың анықтама қызметіне немесе өзіңізге ыңғайлы байланыс арнасы арқылы Әлеуметтік медициналық сақтандыру қорына жүгіне аласыз: fms.kz ресми сайты, 1414 байланыс орталығы, Qoldau 24/7 мобильді қосымшасы және Telegram-дағы SaqtandyryBot.&nbsp;

Еңбек демалысы кезінде МӘМС үшін жарна аударуға міндетті ме?

<a href="https://kyzylorda-news.kz/">Kyzylorda-news.kz.</a>&nbsp;&nbsp; Биылғы 1 шілдеден бастап Қазақстанның табиғат қорғау мекемелері қызметкерлерінің жалақысына 100% үстемеақы қосылды. ҚР Үкіметі Мемлекет басшысының аталған салада еңбек жағдайын жақсарту жөніндегі тапсырмасын орындау аясында тиісті қаулы қабылдады, деп хабарлайды ҚазАқпарат.Үкімет баспасөз қызметінің мәліметінше, құжатта адам өмірі мен денсаулығына қауіп төндіретін жұмыс үшін қосымша ақы белгілеу көзделген.Еңбек жағдайлары ерекше құрылымдардың қатарына жануарлар дүниесін қорғау, орманды қорғау және қалпына келтіру, мемлекеттік орман қорғау және т.б. мамандандырылған ұйымдар жатады.Енді қызметкерлердің орташа жалақысы атқаратын қызметі мен жұмыс өтіліне байланысты 101 мыңнан 320 мың теңгеге дейін ұлғаяды.Жалпы осы салада 12 876 қызметкердің жалақысы көтеріледі.Бұл шара білікті кадрлардың тұрақтап қалуына және жалпы жұмыстың тартымдылығын арттыруға мүмкіндік береді. &nbsp;

1 шілдеден бастап табиғат қорғау қызметкерлерінің жалақысына 100% үстеме қосылды

<a href="https://kyzylorda-news.kz/">Kyzylorda-news.kz.</a>&nbsp; Қазгидромет Қазақстан аймақтарында 18 шілдеде болатын қауіпті метеорологиялық құбылыстарға болжау консультациясын жариялады, деп хабарлайды ҚазАқпарат.Атмосфералық фронтальды бөлімдердің өтуімен ҚР басым бөлігінде тұрақсыз ауа райы сақталады, жаңбыр жауады, елдің солтүстік-батысында қатты жаңбыр болады, найзағай, бұршақ, дауыл күтіледі.Тек республиканың шығысында күн райы жауын-шашынсыз болады. Республика бойынша жел күшейеді, түнде еліміздің солтүстігінде шаңды дауыл, солтүстік-батысында түнде және таңертең тұман күтіледі.Күндіз Ақмола, Жамбыл, Алматы, Жетісу, Түркістан, Қарағанды, Жамбыл облыстарында, Ұлытау, Абай Шығыс Қазақстан облыстарының оңтүстігінде 35-41°с қатты ыстық сақаталады, Алматы облысының орталығында, Жетісу облысының солтүстігінде, оңтүстігінде, орталығында өте қатты ыстық (42°С) күтіледі.Түркістан, Жамбыл, Алматы, Шығыс Қазақстан, Павлодар, Қарағанды, Ақмола, , Ұлытау, Абай, Жетісу облыстарында, Маңғыстау облысының солтүстік-батысында, орталығында, оңтүстігінде, Қостанай облысының оңтүстігінде, Атырау облысының батысында, шығысында, Қызылорда облысының орталығында төтенше өрт қаупі сақталады.

18 шілдеге арналған ауа райы болжамы 

&nbsp;<a href="https://kyzylorda-news.kz/">Kyzylorda-news.kz.</a> «Қызылдихан» колхозының құрылғанынан бастап, өркендеу жылдарына дейінгі аралықты қаншама адам еңбек етті. Осы тұста, бүгінгі өрісі ке-ңейген шаруа қожалық жұмысын жандандыруда еңбеккерлердің тынымсыз жұмысы нәтижесін беруде. Соған байланысты шаруа қожалықтың төрағасы Алданберген Құлбаевқа арнайы сұрақтарымызды қойып, іргелі шаруашылықтың кәнігі мамандары жөнінде сұраған едік.– Алданберген Бодыбайұлы, жұртшылық Сіздің осы өңірге жасаған еселі еңбегіңізді жоққа шығармайтыны анық. Сол себепті де ең алдымен қызметкерлер жөнінде емес, өзіңізге қатысты сауал қойғымыз келіп отыр. Сіздің шаруашылық жұмысын қалай жандандырғаныңызды білеміз. Енді өзіңіздің ататегіңіз туралы айтып берсеңіз?– Мен қарапайым теміржолшының баласымын. Әкем Бодыбай теміржол саласында еңбек еткен. Бізді жетілдіріп, жастайымыздан еңбекке араластық. Біз – әулие кісі болған Қарамырзаұлы Дүйсек қажының ұрпағымыз. Ол кісі қазақ халқына қызмет етіп, ықыласқа бөленген тұлға. Негізінен, ертеректе қазақ елінен қажылық өтеуге Меккеге жермен барған үш адам бар. Оның біріншісі Құнанбай қажы болса, екіншісі – Ақмешіттің қазығын қаққан, Сыр өңіріне белгілі Мырқы деген кісі. Ал үшіншісі – біздің бабамыз Дүйсек қажы. Бұл кісілердің есімі қасиетті Түркістан өңіріндегі Қожа Ахмет Яссауи кесенесінде жазулы тұр. Дүйсек қажыдан Құлбай, Құлбайдан Әбжәли, Бодыбай, Кәмәли тарайды. Әбжәлиден Тынысбек және Серік, ал Бодыбайдан Айтбай ағам екеуміз тараймыз. Дүйсек қажы 1830 жылы туған. Дін жолында қызмет етіп, Меккеге барған. Бір үйір жылқы, бір отар қоймен оншақты үй көшіп-қонып отырып, 10-12 айдың ішінде қажылық өтейтін болған. Ол кісілер жаз жайлауда Нұра бойында тұрақтайтын болса, қытымыр қыста Сыр өңірін қыстаған. Бабамыз 5 әйел алған. Оның ұрпақтарының үлкені – Жәкей. Жәкейден Малбағар, Малбағардан Жақсыбай туады. Жәкеев Жақсыбай – қазір біздің үлкеніміз. Ал екінші әйелінен біздің атамыз Құлбай туған. Ал үшінші әйелінен Кен-жеғұл атамыз туылады. Осы үшеуінен ұрпақ бар. Дүйсек қажы 1922 жылы 92 жасында өмірден өткен. Ол кісінің жерленген жерін ұрпақтары көп жылдан бері іздестіргенбіз. Содан бізге Батыс өңірінен Дүйсек қажының бейіті Ырғыз ауданының арғы жағында орналасқаны жөнінде және оның құлап жатқаны туралы хабар жетті. Соған байланысты жуырда Жәкеев Жақсыбай, Кенже-ғұлов Өмірбек үшеуміз баба басына бардық. Бабамыз Әйтеке би ауданының Аққұм атындағы ауылдан 25 шақырым жерде, Қарақай өзенінің жоғарғы тұсында жатыр екен. Бір ғасыр бұрын салынған бейіттің құлаған жерлерін қайта өргізіп, белгі қойдық. Сол өңірдегі тұрғындарға арнайы ас беріп, Құран бағыштадық. Бір қызығы, сол жерге жақын маңайда Әбілхайыр ханның кесенесі орналасқан. Оған арнайы баруға уақытымыз тығыз болды. Десе де мұның астарында тарихи сабақтастық бар екені анық. Біздің ататегіміз осылай өріледі.– Енді шаруашылыққа қатысты сауалға көшсек. 2008 жылы шаруа қожалық тізгінін қайта қолға алу қаншалықты қиын болды?– &nbsp;Маған ауылдың адамдары келіп, шаруашылық жұмысын қайта жандандыруға өтініштерін білдірді. Сол бойынша 2008 жылы «Қызылдихан-ға» келдім. Әрине, ол кезеңдерді қазір айту оңай. Бірақ нақ сол шақтың ауырт-палығы өте қиын болды. Техника дейтін техника жоқтың қасы, қызметкерлер жан-жаққа кеткен. Қарызға батқан, табысы жоқ. Содан барлығын 0-ден бастауға тура келді. Инвестор таптық, марқұм Өтебай және тағы бір-екі маман-мен жүріп, кадрларды жасақтай бастадық. Шаруашылық есепшісіне Ақша-гүлді алдырдық. Құмкөлде, Жалағашта жүрген ауыл адамдарын жұмысқа тарттық. Алғашқы жылы егін егілген жоқ, ал келер жылғы көктемде егістік жерлерге күріш дәні себілді. Аяқтан тұрғанша бар жұмысты үйлестіре білдік. Несібемізге орай, егін еккен жылдары мол өнім алып отырдық. Оның шаруа-шылық әлеуетінің жақсаруына сеп болды. Содан жұмыс жүйеге келді, ақы-рындап техникалар жаңалана бастады. Шаруалар да еңсе тіктеді. Аудан, облыста алдыңғы қатардан көріне бастадық. Мұның барлығы – қызылдихан-дық еңбеккерлердің ерен еңбегінің нәтижесі. Қазір шаруашылықтың әлеуеті артты. Жыл сайын мол өнім алынып, қызметкерлер жағдайы жақсарды. Тех-никалар жаңарды, қырман салынды. Бұл ғасырға жуық тарихы бар «Қызыл-диханның» айтулы жетістігі екені сөзсіз.– Шаруашылық жұмысында еңбеккерлер еңбегі ерен екенін айт-тыңыз. Осыған арнайы тоқталып өтсеңіз.– Иә, шаруашылық жұмысында қажырлы еңбек етіп, күндіз-түні тыным таппайтын майталман мамандарды ерекше атап өткен жөн. Олардың қата-рында агроном, диқандар, механизаторлар көп. Мәселен, егін егу ісінде Жан-келді Смайлов – кәнігі маман. Бірнеше жыл қатарынан озат болды. Ал Бауыр-жан Қоқымбаевтың күріш егу ісіндегі жұмысына көңілің тояды. Оған тиесілі жерден бұрындары егін шығымдылығы аз болатын. Ал қазір диқан мол өнім алып келеді. Ол облыс, аудан озаты ретінде үлгі етіліп жүр. Талғат Қожабаев, Ерлан Жүсіпбаев, Садық Маханов, Жылқыайдар Бәйімбетов, Әбу Үсенбаев секілді диқандар барда шаруашылық қамбасы астықпен көмкеріле береді. Себебі, маңдайалды диқандардың ала жаздайғы егінді күтіп-баптау жұмысына жауапкершілік танытып, үнемі егістік басынан табылады. Олар өзінің жұмыстарын жақсы біледі. Ерте көктемнен егін егу жұмысында, оны ысырапсыз жинап алуда майталман механизаторлардың қызметі зор. Егістік жерлерді айдауда, егінге дайындауда Қайрат Қалиев жанкештілік танытады. Ал тұқым себу ісінде механизатор Әбілдә Жаманқыз ерекше ептілік көрсетеді. Егін егіліп болып, оған қосымша күш беру үшін тыңайтқыш себіледі. Міне, осы жұмысты атқаруда Серікбол Бекішовтен асатын маман жоқ. Көк трактор тізгіндеген маманның кейде «ішек, бүйрегі жоқ па» деп қаласың. Бір тынбайды, тоқтамайды, бір өзі сеуіп шығады.&nbsp; Берекелі алтын күзде өз ісінің мамандары күріш ору, бастыру жұ-мыстарын жылдам аяқтайды. Механизаторлар Әбсадық Маханов, Жасұлан Нұрымбетов, Руслан Бисенбаев, Әбілда Жаманқыз, Хайрулла Нұрболаттар егінді төкпей-шашпай жинауда ықтияттық танытады. Әбсадық ұлы Алмас екеуі «Магдонмен» күрішті орып тастаса, ізін ала күріш бастыру комбай-нымен Әбілдә, Жасұлан, Русландар күрішті сабағынан айырады. Осылайша, өз ісінің шебері болған мамандардың арқасында жұмыс жыл сайын өніп келе-ді. Олардан бөлек басқа қызметкерлер де өзіне жүктелген міндетті атқарып, шаруашылықтың дамуына үлес қосуда. Сондықтан барлығына шынайы алғы-сымды білдіремін.

Алданберген Құлбаев: «Қызылдихан» шаруашылығын ұстап тұру – басты міндетім 

<a href="https://kyzylorda-news.kz/">Kyzylorda-news.kz.</a>&nbsp; Халқымыз бағасын анық беріп, ұлттық құндылықтарымыз дәріптелетін өнегелі өнері¬міздің бірі – айтыс. Кезіндегі Шөже, Балта, Орынбай, Кемпірбай, Тезекбай, Сүйінбай, Жамбыл, Түбек, Омарқұл, Тәбия, Мұрат, Сүгір, Жаскілең, Бала Омар, Біржан, Сара сияқты орақ тілді, от ауызды айтыс ақындарының салған жолы бүгінге дейін жетіп, ұлттық өнер ғана емес, қызыққа толы дода ретінде өз жалғасын тауып келеді. Сан ғасырдан бері жасап келе жатқан ұлттық өнеріміз замана көшімен жаңарып, жаңғыруда. Төл өнердің бірнеше жанры мен түрі бар. Оның ішінде өтірік өлеңге негізделген айтыстың да мәні зор екені мәлім.Ауданда Сыр елінің бас ақыны, айтыскер ақын, өтірік өлеңнің хас шебері Замаддин Ибадуллаевты еске алуға арналған облыстық өтірік өлең айтысы өтті. Жыр додасы Сырдария ауданы әкімдігінің қолдауымен Қызылорда облыстық халық шығармашылығы мәдени-продюсерлік орталығының және Ақжарма ауылдық мәдениет үйінің ұйымдастыруымен жоғары деңгейде өтті. Сүбелі сөз аламанын белгілі айтыскер ақын, «Құрмет» орденінің ие¬гері, Сырдария ауданының «Құрметті азаматы» Мамыр Байдәулетов жүргізді. Ал ақындар шабытына мәдениет саласының ардагері, ауылдық қоғамдық кеңестің төрағасы Құдайберген Шыманов, үш дүркін «Алтын домбыра» иегері, халықаралық дәрежедегі айтыскер ақын Мұхтар Ниязов пен айтыскер ақын, айтыс ақындары мен жыршы-термешілердің Халықаралық Одағының Қызылорда филиалы бойынша төрағасы, қазылар алқасының мүшесі Нұрмат Мансұров әділ төрелік жасады.Айтыстың ашылуында аудан әкімі Берік Сәрменбаев сөз сөйлеп, халықты жырмен сусындатуға келген ақындарға сәттілік тіледі. Сонымен қатар зерделі сөз зергері Замаддин Ибадуллаев туралы еске алып, осындай айтыс додасының алдағы уақытта да жалғас табатынын айтты.<blockquote>– Айтыс – қазақ халқы үшін ұлттық құндылыққа айналып үлгерген өнер түрі. Оны қазақтың төл өнері деп мақтанамыз. Халқымыз «айты» десе ішкен асын жерге қоятыны содан. Сыр өңірінің сөз өнерін айтқанда ойымызға бірден айтыстың ақтаңгері болып өткен Замаддин Ибадуллаев түседі. Айтыс өнерінде өзіндік із қалдырған Замаддин Ибадуллаев осы Ақжарма ауылында туып, Сыр сүлейлерінің жыр-термелерін жаттап өскен. Ақынның көзі тірісінде «Ақжарма жырлар», «Жылдар мен жырлар», «Бағдары ауған пенделер» деп аталатын кітаптары жарыққа шықты. Көптеген шәкірттер тәрбиеледі. Бүгінде еліміздің, Сыр өңірінің намысын қорғап жүрген ақындар Замаддин Ибадуллаевтан бата алған. Заңғар ақын 1984 жылы Кенен Әзірбаевтың 100 жылдық мерейтойына арналған республикалық ақындар айтысыда жеңімпаз болды. 1986 жылы Алматы қа¬ла¬сында ұйымдастырылған республикалық ақындар айтысында топ жарды. Өтірік өлең айтысының үлгісін көрсетіп, елімізге белгілі болды. Бүгін міне, қасиетті Ақжарма ауылында, заңғар ақын туған топырақта Сыр елінің бас ақынын еске алуға арналған облыстық жас ақындар айтысы өткізіліп отыр. Бұл – айтыс өнерінің хас шебері бола білген заңғар ақынға деген құрметіміз. Оның шабытты жырлары, артында қалдырған мол мұрасы еш ұмытылмайтыны анық, – деген аудан басшысы арқалы ақындарға шырқау шабыт тіледі.</blockquote>Содан кейін кестелі сөз өрнегімен халықтың айтысқа деген шөлін қандыру үшін кезек ақындарға берілді. Айтысқа Қызылорда қаласы мен бес ауданнан сегіз ақын қатысып, өтірік өлеңге үлкен астар сыйғызып, көрерменнің ыстық ықыласына бөленді. «Тазшаның аманатын арқаладым» деген тақырыпты арқау еткен айтыста ақындар Замаддин Ибадуллаев салған соқпақ жолмен өтірік өлең¬нің өрнегін көрсете білді. Айшықты сөз өрнектерін орынды қолданып тыңдарманның делебесін қоздырған ақындар аудандағы жетістіктер мен келелі мәселелерді де жырға қосты. Облыстық ақындар айтысында сегіз қатысушы төрт жұп құрды. Сырдариялық ақын Мұхамеджан Мансұров пен Шиелі ауданының ақыны Бекжан Ержігіт алғашқы жұп болды. Одан кейін қармақшылық Сырым Әділбеков пен қызылордалық Мөлдір Айтбай кестелі сөз өрнегін құрды. Үшінші жұп қармақшылық Тұрар Бекмырза мен қазалылық Бекзат Серіков болса, айтысты қорытындылау аралдық Бексұлтан Орынбасаров &nbsp;пен Сырдария ауданының намысын қорғаған Ерасыл Байментай жұбына бұйырды. Ал ақтық бәсекеге үздіктерден іріктелген екі жұп қатысты. Олар Бексұлтан мен Бекзат жұбы және Мөлдір мен Ерасыл жұбы.<blockquote>– Сырдария ауданына қарасты Ақжарма ауылында айтыскер ақын, өтірік өлеңнің хас шебері Заметдин Ибадуллаевты еске алуға арналған «Тазшаның аманатын арқаладым» атты облыстық жас ақындар айтысы ұйымдастырылып, көппен бірге көрермені болдым. Аталған іс-шараға аудан әкімі Берік Сәрменбаев қатысып, құттықтау сөз сөйледі. Жас ақындар жұртшылыққа өтірік те көсіліп те тартысты айтыс көрсетті.&nbsp; Аламан айтыстың жеңімпаздары мен қатысушыларына қаржылай сыйлықтар табысталды. Осындай ұлттық құндылықтарымызды дәріптеуге арналған сапалы дүниелеріміз көп болсын.&nbsp; Қазақ өнері дами берсін, – деді облыстық мәслихат депутаты Жұмабек Ембергенов.&nbsp;</blockquote>Сүбелі сөз сайысын қорытындылау қазылар алқасына оңай болмағаны анық. Себебі бірінен бірі оза шауып, жалындап тұрған жастардың таланты мен дарыны көпшілікті тәнті етті. Өтірік өлеңдер айтысының қорытындысы бойынша бас бәйгені сырдариялық ақын Ерасыл Байментай жеңіп алды. Айта кетейік, Ерасыл – Ақжарма ауылының тумасы, заңғар ақынның шәкірті. Ал жүлделі бірінші орынды Арал ауданының наысын қорғаған Бексұлтан Орынбасаров, екінші орынды Қызылорда қаласынан келген Мөлдір Айтбай, &nbsp;ал үшінші орынды қазалылық Бекзат Серіков иеленді. Сонымен қатар, айтысқа қатысушы ақындар Шиелі ауданынан келген Бекжан Ер¬жігіт, Қармақшы ауданынан Тұрар Бекмырзаев пен Сырым Әділбеков, Сырдария ауданынан Мұхамеджан Мансұровқа ынталандыру сыйлықақы берілді.Аламанның Ақжарма ауылында өтуі де тегіннен тегін емес. Заңғар ақын Замаддин Ибадуллаев – осы ауылдың тумасы. Айтыс өнерінің ақтаңгері атанған Замаддин Ибадуллаев 1939 жылы Сырдария ауданына қарасты Ақжарма ауылында дүниеге келген. Сыр сүлейлерінің жыр термелерін жастайынан зердесіне тоқып өскен талантты ақын Замаддин Ибадуллаевтың жалынды жастық шағы еңбек даласында өткен. Шаруашылықта еңбек ете жүріп, өлеңге деген құштарлығының арқасында ауылдағы той-томалақтың көрігін қыздырған дарынды ақын 1980 жылдан бастап айтыс сахнасынан көрінген. Жырсүйер қауымға кестелі өлең арнап, айтыс өнерінің дамуына, оның ішінде өтірік айтыс жанрының жаңа белес¬ке көтерілуіне айрықша үлес қосқан. Замаддин Ибадуллаевтың өңірдің әдебиеті мен мәдениетіне қосқан қажырлы еңбегі ескеріліп, «Ерен еңбегі үшін», «Ел ардақтысы», «Сырдария ауданының 90 жылдығы» медальдарымен марапатталған. 2019 жылы «Сырдария ауданының Құрметті азаматы» атағы беріліп, 80 жасқа толған мерейтойына орай облыстық деңгейде айтыс ұйымдастырылғанын да айта кету орынды. Бір сөзбен айтқанда, ақын артына баға жетпес мұра қалдырды. Ардақты ақынның шәкірттерінің өзі бір төбе. Олардың қатарында Мамыр Байдәулетов, Айдос Рахметов, Мұхтар Ниязов, Нұрмат Мансұровтардың есімін ерекше атауға болады. Бұл ақынның айтыс өнерінің ұрпақтан-ұрпаққа мирас етіліп, кеңінен таралуына қосқан үлесінің жарқын көрінісі. Артына өшпес үлгі-өнеге қалдырған ақын 2020 жылы дүниеден озды.<blockquote>– Бұл айтыс өтірік өлең айтысы болғандықтан кәдімгі айтыстардан өзгеше болды. Замаддин атамыз айтыста сол кездегі қоғам¬дағы ысырапшылдық пен экологияны, Арал теңізінің тартылып бара жатқанын, теңіз суы азайған соң балықтарының жойылып бара жатқанын, бәрін керісінше өтірік өлеңмен жеткізген. Мысалы: Аралға Сырдың суы сыймаған соң Амалын таппай елім сасып жатыр. Балықтар Аралдағы үріккеннен Лек-лек боп Қапшағайға қашып жатыр деп күрмеуі қиын мәселені қалай жеткізген десеңізші?! Өтірік өлең айтысы болғандықтан ақындар жаңа бір серпінмен жырлады. Қоғамдағы өзекті мәселелерді негіздеп өтіріктен өлең өріп көрермендер көңілінен шығып отырды. Жалпы айтқанда, керемет айтыс өтті. Ақындардың шабытын шыңдап, көрерменді бір желпіндірген айтысты ұйымдастыруға мұрындық болған жандарға және демеушілік қолдау көрсеткен ақынның ұр-пақтары мен «Ақжарма 2» шаруашылығының төрағасы Марат Бисенов аға мен осы айтысты ұйымдастырып, жүлде қорын ұйымдастыруға зор үлес қосқан Сырдария ауданы әкімінің салалық орынбасары Димаш Серікбайұлына алғысымды білдіремін, – дейді Ақжарма ауылдық мәдениет үйінің директоры Айтмағанбет Темірханов.</blockquote>

Сырдарияда облыстық ақындар айтысы өткізілді

<a href="https://kyzylorda-news.kz/">Kyzylorda-news.kz.</a>&nbsp; Биыл Арал ауданында егін шаруашылығы қарқынды дамып, оң нәтиже беруде. Дегенмен ауданда төтенше жағдай жарияланған уақытта көптеген олқылықтар орын алған еді. Міне, содан кейін жағдай біршама тұрақталғанмен, екпін егін шаруашылығына түсті. Мал азығындық жем-шөп мәселесін шешу өз алдына,халық тұтынатын бақша өнімдерінің де үлесі күрт азайып кетті. Осындай мәселеден туындаған шешім аймақ басшысының тарапынан қабылданып, өткен жылы облыс әкімі Н.Нәлібаев бақша дақылдарын дайындау үшін өңірдегі егіншілік жердің аумағын еселеп арттыруды тапсырды. Бұл мақсатқа қол жеткізуде егіншілікке ебі бар әрбір азаматты қол қусырып қалмай, бақша дақылдарын егумен айналысуға шақырды. Айталық, биыл аймақ бойынша бақша дақылдарын егу үшін өңірде 3342 гектар жер арнайы дайындалған. Оның 3282 гектарына, атап айтқанда, 1021 гектар жерге картоп, 866 гектар жергекөкөніс, 1395 гектар жерге бақша дақылдары егілді.Тұрғындар қосымша жер дайындауды сұрап, егін егуге ынтасын білдіруде. Бұл бақшалық жер дайындаудың шаруаға қолайлы, тұрмыс сапасын арттыруға оң әсер еткенін көрсетеді.Осы ретте облыс әкімі қала, аудан әкімдері мен жауапты басқарма басшыларына алдағы уақытта бақшалық жерді жергілікті халықтың сұранысына сәйкес жоспарлап дайындауды тапсырды. Сондай-ақ дақылдардың нақты су тұтыну нормасына сәйкес су беру кестесін шаруалармен келісіп, жиын-терімнің уақытына дейін бұл бағыттағы жұмыстардың барлығына лайықты деңгейде бақылау болатындығы айтылды.&nbsp;Бүгінде шіліңгір шілденің де бел ортасынан астық. Қазақ бұл айды «шілденің қауын пісірер ыстығы» десе, ендігі жерде егіншіліктің жемісін жей бастайтынымыз белгілі. Қазіргі уақытта базар сөрелеріне жеткізіліп жатқан жергілікті өнімдер екенін ескерсек, еңбектің рәтті болып жатқанын байқаймыз. Бұл істе шаруалармен қатар ауыл тұрғындарының да белсенді екенін айта кетуіміз керек. Олар да аптап ыстыққа қарамай бау-бақша жұмыстарымен айналысуды қолға алған. Нәтиже де жоқ емес.&nbsp;Мәселен, Бекбауыл ауылдық округінің тұрғындары сонау 2000 жылдардан бері қол үзіп қалған егіншілік кәсіпті қайта қолға алып жатыр. Бұл бағыттағы жұмыстар өткен 2022 жылдан бастап қарқынды қолға алынуда. Сол бір берекелі бастаманы қолға алған 10-ға жуық ауыл тұрғындары егіншілікпен қарқынды айналысып келеді. Сонымен қатар ауыл тұрғындары аудан әкімдігінің бау-бақша жұмыстарына арнап берген су айдау насосымен және жеке тұрғындар өзінің насос құралдарымен бау-бақша өндіруді қолға алды.Бүгінде сол еңбегінің жемісін жей бастаған жандардың бірі –Бекбауыл ауылдық округіне қарасты Үкілісай елді мекенінің тұрғыны Қуаныш Есентаев. Ол 2-3 гектар жерге қауын, қарбыз, тағы басқа дәнді дақылдар егіп, қазіргі таңда Үкілісай ауылы тұрғындарын бау-бақша өнімдерімен қамтамасыз етуде. Қуаныш №265 Үкілісай негізгі мектебіндегі ұстаздық жұмысымен қатар осы жылы бау-бақша жұмыстарымен айналысып жатыр.Соқаның ұшымен, білектің күшімен ризығын жерден тауып жеген аралдық ағайынның бұл жолы тілегі қабыл. Табиғат-Ананың тосын құбылыстарынан өтіп, егіншілік кәсіптің жемісін жей бастады. Бастысы – төккен терінің өтеуін жерден тілейтін жандардың жігері жасып қалмаса болғаны. Еңбек етемін деушілерге көрсетілген қолдаудың арқасында әрбір істен нәтиже күтіп жүрміз.&nbsp;

Арал ауданында егін шаруашылығы оң нәтиже беруде

<a href="https://kyzylorda-news.kz/">Kyzylorda-news.kz.</a> Арал ауданында &nbsp;17-19 шілде күндері аралығында «Түнгі қаладағы балалар» жедел профилактикалық іс-шарасы аясында рейдтік іс-шара жұмыстары жүргізілуде.&nbsp;Арал ауданы полиция бөлімінің жергілікті полиция қызметі бөлімшесінің ювеналды полиция тобының учаскелік полиция инспекторлары аудан көлемінде жасөспірімдер арасындағы қылмысты ескерту және оның алдын алу бойынша түсіндірме жұмыстарын жүргізіп жатыр. Тәуліктің кешкі және түнгі уақытында кәмелетке толмағандардың арасындағы құқық бұзушылықтың жолын кесіп, кәмелетке толмағандардың құқығын қорғау саласындағы әкімшілік құқық бұзушылықтарды анықтауға жұмыс жүргізіп жатыр. Жасөспірімдердің құқықтық сауаттылығын арттыру, балаларға қатысты қылмыстық қол сұғушылықтардың алдын алу бойынша түсіндірме жұмыстары жүргізілуде.&nbsp;Тәртіп сақшылары кәмелетке толмағандардың жүріс-тұрыстарына бақылау жасап, заңды өкілдерінің қарауынсыз түнгі уақытта көшеде және ойын-сауық орындарында бей-берекетсіз жүретін жасөспірімдерді анықтап, қылмысқа бейім, тәртібі қиын балаларды полиция органдарының есебіне алды.&nbsp;<blockquote>«Түнгі қаладағы балалар» жедел профилактикалық шарасы жыл сайын дәстүрлі түрде өткізіліп келеді. &nbsp;Қазақстан Республикасының «Әкімшілік құқықбұзушылық туралы» Кодексіне сәйкес, кәмелеттік жасқа толмаған балаларға түнгі сағат 23:00-ден таңғы 6-ға дейін ата-анасының және оған құқы бар заңды өкілдердің қарауынсыз ойын-сауық мекемелерінде немесе үйден тыс жерлерде жүруге болмайды.&nbsp;Ол үшін ата-анасы әкімшілік жауапкершілікке тартылады. Аулаларда, саябақтарда, жастар көп жиналатын ойын-сауық орындарында рейдтік қадағалау жұмыстары кеңінен жүргізілуде. Сондықтан құрметті ата-аналар жасөспірім балаларды қадағалап отыруды үнемі естен шығармайық, – делінген полиция бөлімінің таратқан хабарламасында.</blockquote><figure class="image"><img src="https://knadmin.beoblood.kz/uploads/361388471_755299079704000_2561813892759547972_n_dc606bfa52.jpg" alt="361388471_755299079704000_2561813892759547972_n.jpg"></figure>

Аралда «Түнгі қаладағы балалар» жедел профилактикалық іс-шарасы өтіп жатыр

<a href="https://kyzylorda-news.kz/">Kyzylorda-news.kz.</a> Театрға барғанда қойылымды тамашалап, рухани байып шығамыз. Ой саларлық көркем дүние көпке дейін естен шықпай, айтып жүреміз. Алайда оның қаншама еңбекпен дүниеге келгенін, сахнаға дейін маңдай терін төккен сан түрлі мамандық иелерінің бейнетін сезіне бермейміз. Әр спектакльдің сәтті шығып, көрермен жүрегіне жол табуы үшін ұжым біркісідей жұмыла еңбек етеді. Ал қойылым дайын болғанда билет сату, жарнама жасау деген бейнеті шашетектен асатын жұмыс тағы бар. Бір спектакльді қоюға атсалысатын суретші, жарық пен дыбыс берушілер, сондай-ақ, мәдени ұйымдастырушының еңбегін білеміз бе?Жанат Жаңбырбайқызының Жастар театрында мәдени ұйымдастырушы болып қызмет істегеніне алты жылдан асыпты. Ұжым 2016 жылы әуелі үйірме болып ашылған.&nbsp;<blockquote>– Онда 16-25 жас аралығындағы талапты жастарды жиып, вокал мен театр өнеріне баулыған О.Нұрмахановтың «Алғашқы махаббат» қойылымын ешқандай қаражатсыз сахналағанын ұмыта қойған жоқпыз. Араға жыл салып режиссер-сценаристің бастамасын сол кездегі қала басшысы қолдады. Міне, Жастар театры осылай құрылып еді. «Штат бөлетінін естігенде қатты қуандық. Шақырту алғанымда жауапты да өте күрделі жұмыс екенін білсем де келістім. Өйткені, өмір көріністерін драмалық әрекеттер арқылы көз алдыңа алып келетін театр өнері жасымнан жаныма жақын болды. Жұрт білер-білмес, сахнаның сыртында жұмыс көп, – дейді мәдени ұйымдастырушы.</blockquote>Жастар театры құрылғалы «Алғашқы махаббат», «Қыз қасқыр», «Қалың елім, қазағым, қайран жұртым», «Отырардың жасыны», «Неге?», «Ұлардың дауысы», «Екі бала – екі шал», «Олимптің күйреуі», «Қызылорданың қыздары» атты спектакльдерді сахналап, көрермен ықыласына бөленді.Жанат өнерге кездейсоқ келген жоқ. Әкесі Жаңбырбай талантты адамдарымен тығыз байланыста болған, ал анасы Айжамалдың өлең шығаратын қасиеті бар. Оның ән айтуға және поэзияға деген ықыласы бала күнінде оянған. Дайындықты әркез көрермен ретінде тамашалайтын Жанат кейде концерт жүргізеді, қажет болса ән айтып, актер ретінде пролог оқиды. Бұл өнеріне ұжымдағы әріптестері сүйсіне қарайды.Қаладағы №23 мектепте оқып жүргенінде байқауға қатысқаны әлі есінде. Е.Әбдіхалықованың «Сыр елім!» атты патриоттық әнін орындап, бас жүлдеге ие болады. Елена демекші, кейіпкеріміздің есімін сан қырлы өнерпаздың өзі қойыпты. Сондықтан болар, мінезі көпшіл, ашық-жарқын, нағыз өнер адамына тән қасиетке ие.Кейін Елена сапармен келгенде Оңталап ағасы мұны ертіп апарып, «Өзің атын қойған баяғы қара қызың сенің өлеңіңмен бас жүлде алды», – деп таныстырған. Бұл сәтті Жанат ұмытқан емес.<blockquote>– Кішкентайымнан өнер адамдарының тәлім-тәрбиесін көрдім. Әкемнің бала күнгі достары Бекұзақ Тәңірбергенов, Рысбек Әшімов, ақын Оңталап Нұрмаханов біздің үйде жиі бас қосатын. Ондайда шағын театр турппасы көшіп келгендей әсерде боламын. Әкем Аралдан Қызылордаға ертеректе қоныс аударған. Сөйтсе де, сыйластықтары үзілмеді, – дейді кейіпкеріміз. &nbsp;</blockquote>Бүгінде Жастар театры десе елең етпейтін жан жоқ. Өйткені, өрімдей талантты жастар көрерменін қалыптастырып үлгерді. Алғашқы қойылымнан-ақ қоғамда орын алып жатқан келеңсіз оқиғаны ой елегінен өткізіп, көпшілік тарапынан сұранысқа ие болатын дүниені сахналап, сол арқылы көрерменге ой салады. Мұны театрдың артықшылығы десек те болатын шығар.<blockquote>– Маған ең ұнағаны – «Қыз қасқыр» қойылымы. Онда қазақ қоғамындағы «көкек аналар» образы көрсетілді. Туған баласын көшедегі қоқысқа тастап кеткен тасбауыр аналарға ой саларлық көркем дүние. Әр қойылымның астарында үлкен тәрбиелік мән болады. Одан өміріме сабақ аламын, – деп ағынан жарылды ол.</blockquote>Бір шаңырақтың келіні атанып, жас та болса театрдағы негізгі қызметін мүлтіксіз атқарып жүрген Жанатқа сәттілік тіледік.

Көрермен ықыласына бөленген Жастар театры

<a href="https://kyzylorda-news.kz/">Kyzylorda-news.kz.</a> Қызылорда облысында қалыптасқан эпидемиологиялық ахуалға орай, облыс әкімінің тапсырмасына сәйкес басқарма тарапынан тиісті жұмыстар атқарылып келеді.2023 жылы мал иелері қаржысы есебінен 117,4 мың бас (мүйізді ірі қара – 45,7 мың бас, Уақ мал – 60,5 мың бас, Түйе – 3,0 мың бас, Жылқы – 8,2 мың бас) ветпрепараттармен (ивен, ивермек тағы басқа) алдын ала егілді.Кенеге қарсы ветпрепараттармен егу экто паразиттермен қоса эндо паразиттерді де жойып алдын алады.Айта кету қажет, облыстық, қалалық және аудандық баспасөз құралдарында КҚГҚ ауруының клиникасы, емдеу, алдын алу, кенеден сақтану шаралары, аурудың зардаптары туралы халық арасында кеңінен насихаттық-түсіндірме жұмыстары тұрақты жүргізіліп келеді.Облыс әкімінің 24.02.2023 жылғы № 33 қаулысымен бекітілген Конго – Қырым геморрагиялық қызбасының алдын алу бойынша санитариялық –эпидемияға қарсы, санитариялық-профилактикалық іс-шараларды ұйымдастыру және жүргізу жөніндегі жоспарды басшылыққа ала отырып, облыстық санитариялық-эпидемиологиялық бақылау департаментінің хабарламасына сәйкес ветеринариялық ұйымдар арқылы бүгінгі таңда 32 (отыз екі) мал иелерінің қора-жайларын залалсыздандыру жұмыстары жүргізілді.Сонымен қатар, мал жайылымдары мен далалық жерлерде, егіс алқаптарында еңбек ететін адамдар кенелерден сақ болғаны жөн.&nbsp; Жұмыс кезінде ұзын жеңді, ашық түсті киім киіп, шалбардың балағын шұлықтың ішіне салып, денені барынша жабық ұстаған жөн. Малды күту және қырқым кезінде арнаулы қорғаныс киімдер мен қолғап киюді естен шығармаған абзал. Жұмыс соңында аса сақтықпен (жалаңаш қолмен алуға болмайды) денесі мен киімдерін кенеден тазартып отыруды әдетке айналдыруы қажет.Кене шаққанда өздігіңізбен емделуге болмайды. Себебі, денеге жабысқан кенені дұрыс алмасаңыз, жағдайыңыз тіптен нашарлап кетуі мүмкін. Өзіңіз жұлып тастасаңыз, тұмсығы теріде қалып қояды. Оны байқау өте қиын.Егер сіз денеңізден кене байқасаңыз, оған сұйық май жағудың қажеті жоқ. Май жаққан кезде кене күйзеліске ұшырап, жараға одан да көп зарарлы сілекей бөледі. Оны сығудың да қажеті жоқ. Одан да жіп алып, кенені тұмсық астынан жіңішке жіппен байлап, асықпай, жұлқымай, кене мұртшаларын толық шығарғанша ақырын тарту керек. Шаққан жерді антисептик немесе спиртпен өңдеу керек. Өзіңізді кене шаққанын байқасаңыз, мазасыздансаңыз немесе күдіктенсеңіз міндетті түрде уақытылы дәрігерлерге жүгіну қажет.

Қызылордада кенеден сақтану шаралары күшейтілді

<a href="https://kyzylorda-news.kz/">Kyzylorda-news.kz.</a>&nbsp; Үкіметтік емес сектордың қызметін қолдау мақсатында 2017 жылдан бастап Ақпарат және қоғамдық даму министрлігі үкіметтік емес ұйымдарды сыйлықақы түрінде ынталандыру тетігін енгізді.ҮЕҰ үшін сыйлықақы - бұл республикалық, салалық және өңірлік деңгейлердегі әлеуметтік міндеттерді шешуге қосқан үлесі үшін үкіметтік емес ұйымдарға бюджет қаражаты есебінен берілетін ақшалай сыйақы.Жылдар ішінде 341 ҮЕҰ сыйлықақы иегерлері атанды (2017 жылы – 59 ҮЕҰ, 2018 жылы – 63 ҮЕҰ, 2019 жылы – 63 ҮЕҰ, 2020 жылы – 38 ҮЕҰ, 2021 жылы-64 ҮЕҰ, 2022 жылы – 54 ҮЕҰ).ҮЕҰ-ға арналған сыйлықақы келесі 16 маңызды сала бойынша әлеуметтік міндеттерді шешуге қосқан үлесі үшін ҮЕҰ-ға беріледі («Қазақстан Республикасындағы мемлекеттік әлеуметтік тапсырыс, стратегиялық әріптестікті іске асыруға арналған мемлекеттік тапсырыс, үкіметтік емес ұйымдарға арналған гранттар және сыйлықақылар туралы» Заңның 5-бабына сәйкес) <a href="https://adilet.zan.kz/kaz/docs/Z050000036_):">https://adilet.zan.kz/kaz/docs/Z050000036_):</a>&nbsp; 1) білім беру, ғылым, ақпарат, дене шынықтыру және спорт саласындағы мақсаттарға қол жеткізу;&nbsp; 2) азаматтардың денсаулығын сақтау, салауатты өмір салтын насихаттау;&nbsp; 3) қоршаған ортаны қорғау;&nbsp; 4) жастар саясаты мен балалар бастамаларын қолдау;&nbsp; 5) отбасылық-демографиялық және гендерлік мәселелерді шешуге жәрдемдесу; 6) халықтың әлеуметтік тұрғыдан осал топтарын қолдау;&nbsp; &nbsp;7) жетім балаларға, толық емес және көп балалы отбасылардағы балаларға көмек көрсету;&nbsp; 8) халықты жұмыспен қамтуды қамтамасыз етуге жәрдемдесу; &nbsp;9) азаматтар мен ұйымдардың құқықтарын, заңды мүдделерін қорғау;&nbsp; 10) мәдениет пен өнерді дамыту;&nbsp; 11) тарихи-мәдени мұраны қорғау;&nbsp; &nbsp;12) қоғамдық келісімді және жалпыұлттық бірлікті нығайту; 13) өздерінің есебінде тұрған адамдарға әлеуметтік-құқықтық көмек көрсету кезінде пробация қызметіне жәрдемдесу; 14) мемлекеттік қызметтер көрсету сапасына қоғамдық мониторинг жүргізу; 15) азаматтық қоғамды дамытуға, оның ішінде үкіметтік емес ұйымдар қызметінің тиімділігін арттыруға жәрдемдесу; &nbsp;16) волонтерлік бастамаларды дамыту және қолдау.Қазақстан Республикасының Ақпарат және қоғамдық даму министрлігі 2023 жылғы 1 шілдеден бастап 1 қыркүйекте (қоса алғанда) ҮЕҰ-ға арналған сыйлықақыны алуға өтінімдер қабылдауды жүргізеді (сыйлықақылар ҮЕҰ-ға арналған сыйлықтарды беру қағидалары негізінде беріледі <a href="https://adilet.zan.kz/kaz/docs/V1800017041).">https://adilet.zan.kz/kaz/docs/V1800017041).</a>Конкурсқа қатысуға жіберіледі:- Қазақстан Республикасының аумағында тіркелген ҮЕҰ; - &nbsp;2022 жылдың қорытындысы бойынша ҮЕҰ Дерекқорына мәліметтерді уақтылы ұсынған ҮЕҰ; -Соңғы үш жылда сыйлық иегерлері болып табылмайтын ҮЕҰ. Конкурсқа қатысуға жіберілмейді: -үкіметтік емес ұйымның филиалдары немесе өкілдіктері; - 2022 жылдың қортытындысы бойынша ҮЕҰ Дерекқорына мәліметтерді ұсынбаған не уақтылы ұсынбаған ҮЕҰ; - Соңғы 3 (үш) жыл ішінде сыйлықақы алған ҮЕҰ. Сыйлықақыға қатысу үшін құжаттар тізбесі мыналарды қамтиды: 1) Қағидаларға 1-қосымшаға сәйкес нысан бойынша үкіметтік емес ұйымдарға арналған сыйлықақы беру конкурсына қатысуға өтініш; &nbsp; &nbsp; &nbsp;2) осы Қағидаларға 2-қосымшаға сәйкес нысан бойынша сыйлықақыға үміткердің сауалнамасы; &nbsp; &nbsp; &nbsp;3) осы Қағидаларға 3-қосымшағасәйкес нысан бойынша сыйлықақыға үміткердің қызметі туралы сипаттама (растайтын материалдармен бірге); &nbsp; &nbsp; &nbsp;4) соңғы 3 (үш) жыл ішінде ұсынылған бағыт бойынша іске асырылған жобаларды және бірлескен жұмыс барысында қол жеткізілген нәтижелерді растау мақсатында байланыс деректері көрсетілген, өтінім берген үкіметтік емес ұйымның қызметі туралы қоғамдастық (үкіметтік емес ұйымдар), мемлекеттік органдар өкілдерінің ұсынымдары (екіден кем емес); &nbsp; 5) марапаттау дипломдарының, грамоталарының, алғыс хаттардың көшірмелері (болған жағдайда); &nbsp; &nbsp; &nbsp;6) үміткердің немесе үміткер туралы мақалалардың, жарияланымдардың көшірмелері (болған жағдайда); 7) құрылтай құжаттарының көшірмелерін. Ескерту: төменде сыйлықақыға өтінім беруге арналған қосымшалардың нысандары қоса беріледі. Сыйлықақы алуға ҮЕҰ өтінімдері ҚР Ақпарат және қоғамдық даму министрлігінің Азаматтық қоғам істері комитетіне 1 шілдеден 1 қыркүйекке дейін қоса алғанда (Астана қаласы уақытымен сағат 18:30-ға дейін) ueu_syilygy@qogam.gov.kz (PDF форматында) электрондық мекенжай арқылы жолданады немесе қағаз және электрондық тасығыштарда(CD-дискілерде немесе USB-флэш-жинақтаушыларда DOC, DOCX, PDF форматында)қолма-қол Астана қаласы, Мәңгілік Ел даңғылы 8, «Министрліктер үйі», 14-кіреберіс мекенжай бойынша жолдауға болады.ҮЕҰ-дан өтінімдер екі кезеңде қаралады:- бірінші кезеңде сараптамалық қоғамдастық, ҮЕҰ өкілдерінен тұратын жұмыс тобы тиісті бағыттар бойынша сыйлықақы алуға ізденушілердің өтінімдерін зерделейді және бағалайды; - өтінімнің екінші кезеңінде Комиссия жұмыс тобының бағалары негізінде шешім қабылдайды.&nbsp; Сұрақтар туындаған жағдайда келесі нөмірлер бойынша хабарласуға болады: 8 (7172) 74-09-97, 74-05-11, 74-02-17.Ескерту!Өтінімді ueu_syilygy@qogam.gov.kz. электрондық мекенжайға жолдаған жағдайда техникалық ақауларды болдырмау мақсатында жоғарыда көрсетілген нөмірлер бойынша міндетті түрде бізге хабарласуды сұраймыз.&nbsp;&nbsp;&nbsp;&nbsp;&nbsp;

ҮЕҰ үшін сыйлық беру конкурсының ережесі

<a href="https://kyzylorda-news.kz/">Kyzylorda-news.kz.</a> Бүгін «AMANAT» партиясының «Ауыл Аманаты» жобасы аясында Керделі ауылдық округінің тұрғындарымен кездесу өтті.Кездесуге «AMANAT» партиясы Шиелі аудандық филиалының төрағасы Болат Сыздық, аудан әкімінің орынбасары Ерсұлтан Апетов, аудандық ауылшаруашылығы және жер қатынастар бөлімінің басшысы Мұрат Әшірбеков, Атамекен кәсіпкерлік палатасының басшысы Бекзатхан Бауыржанұлы, Аудандық кәсіпкерлік, өнеркәсіп және туризм бөлімінің жауапты маманы қатысты.Шараның мақсаты: Ауыл тұрғындарына 2,5 пайыз болатын жеңілдетілген несие беру, ауыл шаруашылығы кооперативтеріне құрал-жабдық пен техника сатып алу үшін субсидиялар қарастыру «Ауыл аманаты» жобасының ұтымды тұстарын түсіндіру.Кездесу барысында арнайы топ өкілдері бағдарлама 2023-2025 жылдарға арналған және несиелер биылғы жылдан бастап беріледі деп жоспарлануда. «Ауыл аманаты» жобасы бойынша ауыл тұрғындары өз бизнесін дамытуға немесе кооператив құрамында жеңілдетілген несие ала алады, сондай-ақ техниканы лизингке рәсімдеуге болады. Қарыз алу шарттары да өте тиімді, себебі ондағы пайыздық мөлшерлеме әлдеқайда төмен екендігін айтты.Сонымен қатар, ауыл тұрғындары жобаға қатысты түрлі сұрақтарын қойып, заңдылық аясында жауаптарын алды.Жаңа жобаның Мемлекет басшысының ауылдарды қолдауға арналған жоспарларымен қатар жүретіндіктен, оның алтын бесігіміз ауылдар үшін маңызы мол болмақ.

Жоба аясында ауыл тұрғындарымен кездесу өтті

<a href="https://kyzylorda-news.kz/">Kyzylorda-news.kz.</a> Көшпелі өмір сүрген баба мұрасы күні бүгінге дейін құндылығын жойған жоқ. Өркениетті заманда сәбиге арналған небір бұйымдар шықса да, бесікті алмастыра алған емес. Себебі жұртшылықтың оған сұранысы жоғары. Ал қалада бесік сатушылар көп болғанымен, оны қолдан жасайтындар некен-саяқ. Солардың бірі – Қожахметовтер отбасы.Қала тұрғыны Жібек Қожахметованың кәсіпкерлік саласында жүргеніне 15 жылдан асқан. Тұрмысқа қажетті жиһаз өндіруді қолға алған ол жұбайы Айтбай Қожахметовпен бірге отбасылық кәсіпті дөңгелетіп келеді. Осынша уақыт жиһаз өндірісін жолға қойған олар бесік жасап, сатылымға шығаруды жөн көріпті.&nbsp;<blockquote>«Жиһаз өндірісімен айналысқанымызға 15 жыл уақыт болды. Жұбайым 17 жасынан бастап жиһаз жасайды. Кезінде «Сыр жиһазы» аталған өндіріс ошағы оның бұл жолдағы алғашқы баспалдағы деуге болады. Менің мамандығым – сызу және бейнелеу пәні мұғалімі. Заманның қиын кезеңінде мұғалім мамандығын дизайн саласына ауыстырдым. Мен де «Сыр жиһазында» дизайнер болып еңбек еттім. Жолдасыммен сонда танысып, отбасын құрдық. Кейін бірге отбасылық кәсібімізді ашуға ниеттеніп, сол мақсатта іздене бастадық. Қазір «Алтын ағаш Қызылорда» ЖШС құрылып, қала тұрғындарын үй жиһазымен қамтамасыз етудеміз», – дейді Жібек Нұрмағанбетқызы бізбен әңгімесінде.</blockquote>«Тәуекел түбі жел қайық, өтерсің де кетерсің» демеуші ма еді, халқымыз. Жас та болса өз ісін бастауға деген құлшыныстың, мақсатқа жету жолындағы маңдай тердің нәтижесінде кейіпкерлеріміз қалада жиһаз жасайтын өндіріс ошағын ашып, бүгінде өз тұтынушысы қалыптасқан мекемеге айналған.Өз кезегінде кәсіпкерлердің бесік жасау ісін қалай бастағанын сұрадық. Күрделі ірі жиһаздарды жасап шығарғанымен, бесік жасаудың жауапкершілігі бір бөлек. Әрі оның өзіндік жасалу жолы бар.<blockquote>«Бесік жасау жолдасымның сүйікті ісі. Жас кезінде жақын туыстарының сәбилеріне бесік жасаған екен. Кейін үлкен жиһаздарға сұраныс артып бірыңғай жиһаз жасаумен айналысты. Алайда кейін бесік жасауды &nbsp;қайта жандандыруды жөн көріп, 2017 жылдан бастап бесік жасауды қолға алдық. Ол тұста тек тапсырыспен екі, үш бесік ғана жасайтынбыз. Кейін бесік сатушыларға көтерме бағамен сататын болдық. &nbsp;Жақында бесік жасау үшін арнайы цех ашып, мемлекеттің қолдауымен жеңілдетілген несие алып заманауи құрылғылармен жабдықтадық. Солай бесік жасау ісі біршама оңтайландырылды», – дейді кейіпкеріміз.&nbsp;</blockquote>Мұндағы бесіктердің ерекшелігі салмағының жеңілдігінде. Ал бесікке қажетті қарағай, қайың ағашы сынды шикізатты Алматы қаласынан алдырады. Одан бөлек, ағаш өнімдерін жергілікті жерден сатып алады. Бүгінде «Элит бесік» атауымен танымал дүкеннің өніміне қазақы ою ойылып басылған әрі заманауи үлгіде жасалған. Дүкенде жиналмалы бесік те бар. Алайда оны тек арнайы тапсырыспен ғана жасайды екен.&nbsp;<blockquote>«Көбіне қарапайым бесікті алады. Жиналмалы бесікке жолда алып жүргенге, пайдаланбайтын кезде жинап қоюға өте ыңғайлы болғандықтан қызы алысқа ұзатылған немесе көпқабатты үйдің тұрғындары тапсырыс береді. Ал бағасы бірдей», – дейді кәсіпкер.</blockquote>«Элит бесік» дүкенінде цехтан шыққан өнімдер сатылады. Сонымен бірге балаға қажетті өзге де жабдықтар бар. Бір ерекшелігі кейіпкерлеріміз тек бесік жасап қоймай, оған қажетті жөргек, құс жастық, көрпе, жаялық, жабу сынды жабдығын да өздері тігеді. Расымен, мезгілге сай түрлі матадан тігілген жабдықтар көздің жауын алады.&nbsp;Отбасылық кәсіпті жүргізіп отырған кейіпкеріміз әңгіме барысында кей тұрғындардың ісіне іштей қынжылатынын да жасырмады. Яғни бесікті киелі санаған халқымыздың бүгінгі ұрпағы баланың ақ отауын далаға тастауы еді. Иә, кей тұрғындардың мұндай әрекеті соңғы кездері жиі көрініс табуда. Әлеуметтік желілерде бесікті қоқысқа тастағандардың әрекеті көпшіліктің наразылығын тудыруда. Қазақылықтың қаймағы бұзылмаған Сыр өңірінде мұндай жағдайдың орын алуы өкінішті-ақ.&nbsp;<blockquote>«Өзім бірнеше рет бесіктің қоқыста жатқанын байқадым. Көбісі көне, тозығы жеткен деп тастайтын болар. Бірақ бесіктің киесі барын ұмытпау керек. Мұндай көріністі көргенде қорықпай тастағандарына &nbsp;таңғаламын. Алдағы уақытта осындай берекесіздік болмаса екен деген ниетпен көне бесіктерді қайта өңдеуден өткізсем деген жоспарым бар. Әзірге ойдағы мақсатты іске асыру үшін ізденістемін. Сәтін салып бұл істі де қолға алсақ, қасиетті бесігіміз қоқыста жатпайтын шығар», – дейді ренішін білдірген кәсіпкер.</blockquote>Бүгінде кәсіпкер бесік жасауда 7 адамды жұмыспен қамтып отыр. Ұлттық мұрамызды заманға сай жаңғыртып, кәсіп аясын кеңейтуге мемлекеттің қолдауы да сеп болғандай. Қолдан келер істі уақыт талабына сай жүзеге асырып, үйлестіре білген Қожахметовтер осылайша өндіріс ошағын ашып, өзіміздің өніммен қамтамасыз етуде. Қазір олар жасаған бесік ел аумағынан бөлек, Өзбекстан, Италия, Испания елінде қолданыста жүр.&nbsp;Халқымызда бесік – киелі мүлік саналады. Қазақ тұрмысында дүние есігін ашқан сәбидің өсіп, жетілуінде бесіктің алар орны ерекше болған. Бесікке бөленген баланың ұйқысы тыныш, төсегі таза, әрі сыртқы сұқ көзден, жаман энергиядан, өзге де қауіпті жағдайдан қорғалады деп сенген жұртымыз оны киелі санаған.

Қазақстан және Қызылорда облысының жаңалықтары