<a href="https://kyzylorda-news.kz/">Kyzylorda-news.kz</a> «Таза Қазақстан» республикалық акциясы аясында Қызылорда қаласында «Таза Қазақстан - таза аймақ» экологиялық науқаны бастау алды. Оның аясында әр аптада бекітілген тақырыптар бойынша аумақтарды абаттандыру және көгалдандыру жұмыстары жүргізіледі. Нэкологиялық жоба аясында қалада науқанның бірінші аптасы «Таза өлке» атауымен аталып, бүгін ұйымдастырылған игі бастамаға барлық мекеме ұжымдары, үкіметтік емес ұйым өкілдері, еріктілер, қоғам белсенділері мен жастар және тұрғындар белсенді қатысты. Акцияға қатысушылар бекітілген аумақтарда тал көшеттерін отырғызып, сквер-аллеяларды тазалап, аяқ су жүретін арық көздерін аршыды. Ал, арнайы мекеме жұмысшылары аялдамаларды, жолаушыларға арналған орындықтарды, бағдаршамдарды жуып, жарық бағаналарын сырлады. Айта кету керек, 2-ші наурыз бен 4 мамыр аралығына облыс әкімінің өкімімен жарияланған екі айлық санитарлық тазалық, көркейту-көгалдандыру шарасы басталғалы қалаішілік арықтар аршылып, негізгі каналдар тазаланды. Соның нәтижесінде 8000-ға жуық тал көшеттері отырғызылды. Екі айлық аяқталғанша 35 мың түп саялы ағаш егіледі. Жас өскіндерге жаңадан құрылған «Жасыл-Қызылорда» мекемесі күтім жасайды.

Қызылорда қаласында «Таза қазақстан - таза өлке» жобасымен 2 айлық науқан жүргізілуде

<a href="https://kyzylorda-news.kz/">Kyzylorda-news.kz</a> "Таза Қазақстан" республикалық акциясы аясында Сыр өңірінде "Таза Қазақстан - таза аймақ" экологиялық науқаны бастау алды. Науқан аясында 6-13 сәуір аралығында «Таза өлке» санитарлық тазалық шарасы өтуде. Мемлекет басшысы бұған дейін облыстар мен қалаларды абаттандыру және көгалдандыру жөнінде науқанды бастауды тапсырған болатын.Мемлекет басшысы 2020 жылғы 1 қыркүйектегі Жолдауында 5 жыл ішінде елді мекендерге 15 млн түп ағаш отырғызуды тапсырған болатын. Осыған сәйкес, Қызылорда облысының елді мекендерін көгалдандырудың және жасыл аймақтар құрудың 2021-2025 жылдарға арналған өңіраралық жоспары бекітілді.Жоспарға сәйкес 2024 жылы елді мекендер аумағында 100,1 мың дана, жасыл аймақ құру бойынша 108,6 мың дана ағаш көшеттерін егу жоспарланып отыр.Президенттің тапсырмасына сәйкес бүгін облыс көлемінде санитарлық тазалық акциясы ұйымдастырылып, Қызылорда қаласы мен барлық аудандарда 1000 саялы ағаш көшеті таратылып, отырғызылды. Аталмыш акцияға облыс әкімінің орынбасары Б. Жахановта үн қосып, қаламыздың сол жағалауында құрылысы салынып жатқан жаңа автовокзал ғимаратының аумағында тазалық шарасына қатысып, ағаш екті.Облыс бойынша орман молықтыру және жергілікті жердегі көгалдандыру жұмыстарына қажетті көшеттермен қамтамасыз ету үшін 8 орман шаруашылығы мекемелерінде 158 га уақытша тұқымбақтар орналасқан, барлығы 17,5 млн дана әртүрлі жергілікті жерге жерсіндірілген саялы ағаш (үйеңкі, шаған, қаратал, айлант, катальпа, сырталы, терек, жиде, легиструм) және сексеуіл көшеттері өсірілуде.Жыл басынан бері бүгінгі күнге дейін орман шаруашылығы мекемелерінің тұқымбағында өсірілген терек, қаратал, үйеңкі, айлант, катальпа секілді облыс бойынша 28 мыңнан астам ағаш көшеттері таратылып, егілді.Бұдан бөлек, Қызылорда-Жезқазған бағытындағы автожолының бойында 3000 га алаңда жасыл аймақ құру жұмыстары жүргізілді. Бүгінгі таңда бұл жұмыс толығымен аяқталды.

1000 түп ағаш көшеті егілді 

<a href="https://kyzylorda-news.kz/">Kyzylorda-news.kz</a> Айтыс – қазақтың төл өнері. Кешегі қадау-қадау ғасырлардан бері жалғасып келе жатқан айтыс өнерінің алтын арқауы үзілмейтіндігі –тарих пен уақыттың өзі дәлелдеген шындық. Қиыннан қиыстырып, суырыла сөз саптау, қоғамның келбетіне үн қосу, ел мүддесін ескеру – нағыз айтыс ақынының қасиеті. Иә, Шиелі жұртшылығы да – айтыс өнеріне жақын халық. Сондай-ақ әрдайым тектілігінен танбай, өткеніне салауат айтып, талантты ұлқызын ұмытпай, ұлықтайтын киелі өлке. Осы үрдістен танбай жуырда Шиеліге қарасты Жөлек ауылында сыр жүйріктерінің басын қосқан дүбірлі айтыс өтті.Аталған шара Жөлектен шыққан мәдениет майталмандары Зәкір Жақыпов, Оразкүл Алтынбекова және Ержан Бәйімбетовті еске алуға арналды. Айтысқа елімізге танымал жерлестеріміз, шашасына шаң жұқпаған үш дүркін «Алтын домбыра» иегері Мұхтар Ниязов, шиелілік ақындардың ұстазына айналған Мәдениет қайраткері Кенжебай Жүсіп, көптеген додада дара келген республикалық айтыстардың жеңімпазы Иран-Ғайып Күзембаев, «Айтыстың ақтаңгері» Мейірбек Сұлтанхан, Сыр жүйріктері Нұрмат Мансұров, Зухра Төлепова, көптеген айтыстарда жеңімпаз атанған шиелілік дарабоз Ержан Әміров және аралдық жүйрік Ержеңіс Әбдиев қатысты.&nbsp;Шараны Шиелі аудандық мәслихат төрағасы Айтбай Жандарбеков ашып беріп, ауылдағы ауқымды шараға қолдау білдіріп, қиыннан қиыстырып уақыт тауып келген барша ақындарға алғысын айтты.&nbsp;<blockquote>– Айтсаң аңызға, тарқатсаң тарихқа сыймайтын Жөлек ауылы – сонау ІХ ғасырдан бастап, атағы хан базарына дейін көтерілген киелі топырақ. Халықаралық Жібек жолымен сабақтаса отырып сәуле шашқан Жөлек ауылының тарихы тым тереңде. Бүгінгі Зәкір Жақыпов, Оразкүл Алтынбекова, Ержан Бәйімбетов сынды мәдениет майталмандарын еске алуға арналған «Жөлек жауһарлары» атты облыстық ақындар айтысының ашылуымен шын жүректен құттықтаймын.&nbsp;</blockquote>Қара сөзбен темір балқытып, тұлпар тағалаған текті халық үшін айтыстың орны ерекше. Атадан қалған асыл сөзді ұрпақтан ұрпаққа жеткізіп, ұлтты ұйыстырған айтыскер ақындар халық руханиятының барометрі секілді. Бүгінгі сөз додасының жөні бөлек, бітімі басқа болмақ. Өмірден өтсе де, есімдері ел есінде сақталған тұлғаларды құрметтеп, шақыртуымызды қабыл алған барша ақындарға алғыс білдіремін. Біздің өңірімізді айтыс өңірінің алтын бесігі деуге толық негіз бар. Бүгінгі бәйге айтыс десе ішкен асын жерге қоятын ағайын үшін үлкен қуаныш екені сөзсіз. Қара домбыраның күмбір үнімен дана халқымыздың сөз өнерін жандарыңызға жалау етіп, дүйім елдің құрметіне бөленген салтанатты сапарларыңыз үзілмесін деп тілек білдіремін, – деді.&nbsp;Ақындар айтыс барысында мәдениет майталмандарын жырға қосып, әрі қағытпа қалжыңдарымен, ұтымды ойларымен айтысқа келген қалың көрерменнің ықыласына бөленді.&nbsp;Кеш соңында Жөлек ауылының әкімі Мейірбек Жолдасбеков айтысқа келген барша ақындар мен көрерменге алғыс білдіріп, ақындарға аудан әкімінің Алғыс хаты мен арнайы сый-сияпаттар табыстады. Туған жердің өткенін санада жаңғыртып, бүгінін ұлықтап, болашақты жас ұрпаққа аманаттау ел ағаларының қасиетті парызы десек, өткізілген айтыс тарих күнпарағына алтын әріптермен мәңгі жазылмақ...

Шиелі: Жөлектегі айтыстың жөні бөлек

<a href="https://kyzylorda-news.kz/">Kyzylorda-news.kz</a>&nbsp; Нәтижелі жұмыспен қамтуды және жаппай кәсіпкерлікті дамытуға арналған мемлекеттік бағдарламалар халықты еңбекке шақыруға, оларға кәсіп ашып беруге, әлеуметтік аз қамтылған отбасыларды қолдауға бағытталғаны белгілі. Бүгінде ауданда аталған бағдарламалардың &nbsp;ұсынған мүмкіндіктерін тиімді пайдаланып, өз кәсібін бастағандардың қатары көбеюде. Сондай-ақ қайтарымсыз гранттардың жемісін көріп жүргендер де арамызда жетерлік. Мемлекет ұсынған мүмкіндікті құр жібермей, қайтарымсыз грантқа қол жеткізген кәсіпкердің бірі – ІІІ интернационалдық Әсем Нұрмаханова.&nbsp;Қыз баласы жастайынан тамақ пісіруге, киім тігуге икемді келеді емес пе? Кейіпкеріміз Әсем де бала күнінен тәттілер әзірлеуге қызығыпты. Балалық шақтан бастау алған қызығушылық бүгінде кәсібіне айналып, оның жемісін көруде. Алғашында өз қаражатымен тапсырыс қабылдауды бастаған ол, сұраныс арта бастаған соң кәсіпкер атануға бел байлайды. Ауылдағы кәсіпкерлік ісі бойынша маманға жүгініп, кеңес алады. Маманның нұсқауымен «Бастау бизнес» жобасы аясында кәсіпкерлік білімін жетілдіреді. Бизнес жоспарын да ойдағыдай қорғап, 2020 жылдың соңында қайтарымсыз грант иеленеді. Берілген грант қаржысына торт пісіруге арналған пеш пен кәсіби миксер сатып алып, кәсібін дөңгелете береді. Әсемнің торт дайындап, көптің көңілінен шығып жүргеніне қазір төрт жылдай уақыт болған. Алғашында үйден басталған кәсіп, қазір жұмысын шағын цехта жалғауда. Қосымша бір адамды жұмыспен қамтып отыр.<blockquote>– Торт пісіру ісіне қатты қызықтым. Тәттілерді өз қалауымша сәндеп, дәмін келтіріп отбасымды қуантқым келді. Торт пісіру ісіне бар жан-дүниеммен кірісемін. Балалық қызығушылықпен бойыма сіңген қасиет бүгінде өмірімнің мәніне, тірлігімнің көзіне айналып отыр. Қазір де әрбір тәттіні ерекше махаббатпен дайындаймын. Заманауи торттардың барлық түрін, тұтынушының талғамына қарай жасап беремін. Көршілес ауылдардан да тұрақты тұтынушыларым бар. Тапсырыстан бөлек, ауылдың дүкендеріне де өз өнімдерімді қолжетімді бағада қойып жүрмін, – дейді кәсіпкер.&nbsp;</blockquote>Ойлап қарасақ, асты дәмді ету кез келгеннің қолындағы іс емес. Сондықтан да тағамы тәтті асханалар мен өнімі ерекше дүкендерді тұрғындар бекер іздемесе керек. Кез келген өнім дайындайтын орынның мол табыс табуы сондағы аспаздың ерекше ептілігіне тікелей байланысты. Осы ретте Әсемнің тәттілеріне күмән келтіруге болмайды. Оның қолынан шыққан самса, чебуреки, тәтті пирогтар бүгінде үлкен сұранысқа ие. Дүкенге келушілердің де, той-жиынға арнайы тапсырыс берушілердің де қатары көп. Осындай дәмді тағамдар жасайтын кәсіпкер күнделікті табысына көңілі толатынын айтады.<blockquote>– Жеке кәсіп ашып, көпшілікке тәтті тағамдар түрін ұсынып, олардан алғыс алып отырғаныма қуаныштымын. Әлі де алға қойған мақсатым көп. Жеке кәсібімді жылдар өте ұлғайтқым келеді. Санаулы тағам түрлерімен шектеліп қалмай, олардың санын арттыру да жоспарда бар. Тәтті пісіруге ешқашан ерінген емеспін. Керісінше бұл іс мені шабыттандырады. Өзімнің сүйікті ісіммен асханада таңнан кешке дейін жүре беруге дайынмын. Тек тапсырыс берушілер мен дүкен тұтынушыларының көңілінен шығуды ойлаймын, – дейді ол.&nbsp;</blockquote>Бүгінде туған күндердің тортсыз өтпейтіні белгілі. Сондықтан да тортқа деген сұраныс көп. Егер өнім көңілден шықса, тұтынушының қайта тапсырыс беретіні анық.&nbsp;<blockquote>– Қашанда дастарханымның сәні болатын торттарымды Әсемге тапсырамын. Себебі әрдайым балғын, дәмі тіл үйірердей, әрі жұмсақ болады. Құрамы да сапалы заттардан жасалады. Үнемі жұмысына жауапкершілікпен қарайды. Айтқан уақытымда дайын тұрады. Әр тортты ерекше дизайнмен дайындап береді. Мұндай өнерді бағаламауға болмайды. Ісіне береке тілеймін, – дейді ауыл тұрғыны Рима Тұрманова.</blockquote>Адам өзіне ұнайтын іспен айналысқанда ғана, еңбегінің жемісін көреді. Ал өзің қалаған іспен айналысуға бүгінде мемлекеттен берілер көмек көбеюде. Бұл кәсіп бастауға ниетті жандар үшін қуантарлық жайт. Мемлекет ұсынған 555 мың қаржымен бастау алған кәсіп, қазір өркен жайған. Күнделікті табысын ыждаһатпен орынды жұмсай білген жан цехын жаңа дүниелермен толтырған. Бұл ретте қаржылық сауат пен таза маңдай терді айта кеткен жөн. Төрт жылғы табанды еңбектің нәтижесі – тұтынушы көңілінен шығатын жұмысы жүйелі цех. Бұл ретте кейіпкеріміз мемлекеттен көмек алғаннан кейін де, тынымсыз еңбектену керектігін айтады. Иә, көмекті алу бір бөлек, оны әрі қарай жалғастыру бөлек дүние.<blockquote>– Жастар жас шыбық секілді, қалай майыстырсаң сонда майысады. Дегенмен, адамның өзінің алдына қойған айқын мақсаты, өзіндік пікірі болуы керек. Сол мақсатқа жету үшін аянбай еңбек еткен дұрыс деп ойлаймын. Сонда ғана жақсы жетістіктерге жете аласыз, – дейді Әсем Нұрмаханова.&nbsp; Кәсіпкердің алдағы уақытта осы ісін жандандырып, ары қарай үлкен жобаға айналдыру жоспарында бар. Ендеше, жалынды жастың тілегінің орындалуына біз де тілекшіміз. Алдына үлкен мақсат қойған жан сол жолдан таймаса, биіктерге жетері хақ.</blockquote>&nbsp;

Мемлекеттен қайтарымсыз қаржы алған қармақшылық тәтті өнім бизнесімен айналысуда 

<a href="https://kyzylorda-news.kz/">Kyzylorda-news.kz</a> &nbsp;&nbsp;Биыл Жалағаш ауданына қарасты Аққұм ауылында құрылыс қарқынды, әсіресе жол құрылысы жанданған.&nbsp;Аққұмның әкімі Алтынбек Асан­бе­­ковтың айтуынша, ауылда 14 ішкі көше бар. 10 көшенің жөн­деу жұмыстарына 472 млн теңге мем­лекеттен қар­жы қаралған. Былтыр оның 2-еуі күрделі жөндеуден өтсе, биыл­­ғы жылдың еншісінде тағы 8 көше бар екен. Бүгінде мер­дігер мекеме Лекеров пен Дос­панбетов көшелерін тегіс­теу, асфальт төсеуге дайындық жұмыс­тарын жүргізуде.<blockquote>– Ауылымызды дамыту, инфра­құрылымды жақсарту, әлеуметтің әлеуе­­тін арттыру мақсатында биыл бір­­­қатар ауқымды жобаны жүзеге асы­руды жоспарлап отырмыз. Жол құрылысы қар­қын­ды жүруде. Еш­қандай қиындық туғы­за­тындай мә­селе жоқ. Жол құрылы­сынан басқа жобарларымыз да бар. Айта кетейін, былтыр елді ме­кен­нің аулаішілік су тарату желісінің құрылысын жүргіздік, бүгінде нысан пайдалануға берілді. Еңбек және Аққұм ауыл­дарының ішкі көшелерінде ор­наласқан түнгі жа­рықшамдар за­­­­­ма­науи түрлі-түсті кес­кіндегі шам­дар­­­­мен ауыс­тырылды. Биыл­­ К.Бе­кенов көшесін де жа­рық­тандыру жұ­мыстары бар. Сон­­дай-ақ былтыр «Бірлік-А» ШҚ-ның қолдауымен 2,8 млн теңгеге Нұр­қожаев көшесі мен орталық алаңға жа­рықтандыру жұ­мыс­тары жа­салды. Осындай демеу­ші­лердің есебінен биыл да балалар ойын алаңын салу жос­парда бар, – дейді ауыл әкімі.</blockquote>Иә, жұмыстың белсенділігі жо­ғары, мердігер мекеме де ауа райы қолайлы болып, ешқандай қиын­дықтар туын­дамаса, құрылыс жұ­мыс­тарын тезі­рек аяқтап, тұрғын­дардың игілігіне табыстауға ниетті. Өйткені бұл 2 кө­шеден кейін тағы 6 көшенің құрылыс жұ­мыстары кезегін күтіп тұр. Бір қызығы, жол құрылысы жұмыс­тарына ауыл азаматтарын да тартқан, яғни жұмыссыз жүргендер ауылдың көркеюіне үлес қосу арқылы екі қолға бір күрек тапқан жайы бар.Алдымен жолдың бетін толықтай қырып болған соң кө­шені әбден те­гістеп, топырақ жаяды. Мұнан кейін бетіне қиыр­шық тас тө­се­леді. Содан кейін ас­фальт тө­сеу жұ­мыстары жү­реді. Жалпы 2 кө­шенің ұзын­дығы 2 ша­қы­рым­нан аса­ды, ал асфальт­тың қа­лыңдығы төселген та­сы­мен есеп­тегенде 15 см, ал ас­фальт­­тың өзі 7-8 см қалыңдықта болады.&nbsp;Құт-берекенің ортасы саналатын ауылды дамыту, тұрғындарға қо­лай­лы орта туғызу ел үшін ең басты қадам екені сөзсіз. Ауыл дамыса, қараша халықтың әл-ауқаты кө­теріледі. Сон­дықтан болар, өңір басшысы Ардақ Ибраимов ауданға қарасты елді ме­кендерді көтеретін түрлі жобаларды жүзеге асыруға аса мән беруде. Оның дәлелі бүгінде ауданда ауыл жолдарын жөндеу, әлеуметтік тұрғыдағы маңыз­ды нысандарды жаңарту, инже­нерлік инфрақұрылымдарын да­мы­ту жұ­мыс­тары қарқын алуда. Айтып-айтпай не керек, ең бастысы, күре­жолдың бойында орналасқан Ақ­құмда көз ұшы­нан қызу тіршіліктің табы анық байқалады…

Жалағашта жол құрылысы жанданды

Қармақшы ауданының спортында серпін бар

<a href="https://kyzylorda-news.kz/">Kyzylorda-news.kz</a> Мәдениет пен тіл – қашан да бірін-бірі толықтырып тұратын егіз ұғым. Олардың ел дамуына қосар үлесі айрықша. Өйткені аталған сала тарапынан жасалып келе жатқан келелі істер кемел келешекке бастайтын даңғыл жол болмақ. Олай болса, Шиелі ауданының мәдениет саласы осы уақытқа дейін қандай жетістіктерге жетті? Қандай ілкімді істер қолға алынды? Осы мақсатта Шиелі аудандық мәдениет және тілдерді дамыту бөлімінің басшысы Аруна Әзімханға байланысқа шықтық.Оның айтуынша, бөлім ҚР Тіл туралы Заңын негізге ала отырып, Шиелі ауданы тіл саясаты мәселелері бойынша әлеуметтанулық және талдамалық зерттеу жұмыстарын жүргізеді. Жергілікті атқарушы органдарға, ұлттық компанияларға көрнекі ақпаратты дұрыс жазу, бизнес саласындағы көрнекі ақпаратты (хабарландырулар, жарнама прейскуранттар, баға көрсеткіштері, басқа да көрнекі ақпарат) мемлекеттік тілде рәсімдеу қажеттігі бойынша консултациялық түсіндіру жұмысын ұйымдастырады.&nbsp;Бұдан бөлек, 2024 жылдың 26-27 наурызы аралығында көрнекі ақпараттарда тіл туралы заңнамалардың сақталуын зерделеу мақсатында мониторинг жұмыстары атқарылды. Сонымен қатар Халықаралық «Қазақ тілі қоғамы» қоғамдық бірлестігі Қызылорда облысы Шиелі аудандық филиалы басшысы Сұлтан Сағындық пен мәдениет және тілдерді дамыту бөлімінің мамандары бірлесіп, кентке қарасты кәсіпкерлік нысандарды және халыққа қызмет көрсету орындарын, сауда орталықтары мен басқа да жеке кәсіп нысандарындағы жарнамаларды зерттеді. Бұнда олар көрнекі ақпараттардағы тіл нормаларының сақталуы, мемлекеттік тілдің қолданылуын зерделеу бойынша мониторинг жұмыстарын бағдарлады.&nbsp;Мониторинг нәтижесінде 20 нысанның көрнекі ақпараты мен жарнамалары зерделеніп, 4 нысаннан кемшіліктер анықталды. Қазақстан Республикасының Тіл туралы Заңының «Деректемелер мен көрнекті ақпарат тілі» атты 21-бабына сәйкес түсіндірме жұмыстары жүргізіліп, кәсіпкер нысан иелеріне ұсыныс хат берілген.&nbsp;Қазіргі таңда бөлімде жұмыс өте қарқынды. Алдағы уақытта мемлекеттік мекемелерге, кәсіпкерлік субъектілерге, квазимемлекеттік секторға, олардың тіл заңнамасы талаптарының орындалуына әдістемелік көмек көрсетіледі. Қазақстан халқы тілдері күнін мерекелеу шеңберінде тілдік ортаны дамыту мен құрудың өзекті мәселелері жөніндегі іс-шараларды өткізу және оларды бұқаралық ақпарат құралдарында насихаттау мақсатында «Көрнекі ақпараттағы көкей тесті» мәселе тақырыбында семинар, «Тілім менің тірлігімнің айғағы» атты дөңгелек үстел өткізіледі. Сондай-ақ жоспарда қазақ тіліндегі контентті ұлғайту және мемлекеттік тілді қолдану аясын кеңейту мақсатында «Мемлекттік тіл және БАҚ» атты байқау ұйымдастыру жоспарға қойылған. Әңгіме соңында бөлім басшысы барлық іс-шараларға шолу жасап, алда әлі де бірталай жұмыстар атқарылатынын жеткізді.&nbsp;Иә, тіл мәртебесі қоғамда бірінші орында болу қажет. Себебі тіл ұлт мерейін үстем етіп, елімізді өркендетеді. Оған ешкімнің таласы болмаса керек. Ал онымен жұмыс істейтін аудан мамандарының қазіргі жұмысы жүйелі.

Ана тіліміздің Шиелідегі ахуалы қалай?

<a href="https://kyzylorda-news.kz/">Kyzylorda-news.kz</a> &nbsp;Әлеуметтік желі арқылы табыс тауып отырған блогерлердің гонорары белгілі болды. Бұл туралы<a href="https://stan.kz/bir-minuttik-zharnama-3-million-tenge-otandik-blogerler-398159/"> Stan.kz </a>ақпарат агенттігі хабарлайды.TikTok желісінде Гүлназира есімді желі қолданушысы отандық блогерлердің жарнама құнын жария етті.<blockquote>“Жалпы бизнес бастауды жоспарлап жүрсеңіз, әуелі&nbsp;Instagram желісін қолға алыңыз. Әлеуметтік парақшаңызды дамытпай,&nbsp;бизнес ашпаңыз. Бизнесіме жарнама жасатқым келіп, біраз блогерге хабарластым. Былайша айтқанда, амбассадор болуға ұсыныс айтқым келді.&nbsp;Қатты таңғалып отырмын. Әбілова Мерей 4 миллион 600 мың теңге сұрады. Аптасына екі-үш рет келіп, сторис түсіріп кетеді. Айына бір рет reels-видео түсіреді. Соған осындай сумма сұрап отыр. Кенжебекова жеңілдік жасап, 11 миллион теңге сұрады. Негізі 13 миллион теңге екен. Айына бір-ақ&nbsp;reels-видео түсіреді. Аптасына 3 сторис салады. Сол үшін 13 миллион теңге төлеуім керек екен. Одан кейін Әсел Асқарға хабарласып көрдім. Ол 3 миллион теңге деді. Бір-ақ сторис түсіріп бере алады екен. Келіп, бизнесті көзбен көреді. Отандық блогерлердің гонорарын естіп, қатты шок алып&nbsp;отырмын”, – деп жазды желі қолданушысы.</blockquote>Желі қолданушылары блогерлердің табысын сынап, “халықтың қалтасын қағып отыр” деп айыптады.“Кенжебековаға не жоқ?!”, “Ауадан ақша жасап отырғандар екен”, “11 миллион теңге болса, Жанәбіловтердікін сұрауға қорқып отырмын”, “Амилайға екі жәшік сыра берсең, тегін түсіріп береді”, “Халықтың жағдайымен санаспай, аспандағы бағаны қойып жүр” деп жазып жатыр желі қолданушылары.&nbsp;Фото: Блогерлердің жеке парақшасынан алынды

"Бір минуттық жарнама – 3 миллион теңге": Отандық блогерлердің гонорары белгілі болды

<a href="https://kyzylorda-news.kz/">Kyzylorda-news.kz</a> Жүйе іске қосылған 2017 жылдың 1 шілдесінен 2024 жылдың 1 сәуірге дейін Қызылорда облысының тұрғындары Әлеуметтік медициналық сақтандыру қорына 72,5 млрд. теңге аударды. Бұл туралы «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов мәлімдеді.&nbsp;Аударылған қаржының 43,6 млрд. теңгесі жұмыс берушілердің аударымдары болса, қалған 28,9 млрд. теңге - жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі.&nbsp;Жинақталған қаржы сенімгерлік басқару туралы келісім бекітілген Ұлттық банкте сақталады және МӘМС пакеті шеңберіндегі қызметтер ақысын төлеуге жұмсалуда.&nbsp; &nbsp;Фото: Нұрболат Нұржаубай

Қызылордалықтар медициналық сақтандыру қорына 72,5 млрд теңге аударды

<a href="https://kyzylorda-news.kz/">Kyzylorda-news.kz</a> Өткен айда Жалағаш ауданында қызылшаның алғашқы болжамды жағдай диагнозымен 8 науқас есепке алынды. Бұл 100 мың халыққа шаққанда 22,1 пайыздық көрсеткішті құрап отыр. Тіркелген науқастардың алтауы 14 жасқа толмаған бала, 2-еуі ересектер арасында анықталған.Қазіргі уақытта кей эпидемиялық ауру­лардың көрсеткіші төмендесе, бірқатарында өсім байқалады. Оның ішінде қызылша ауруы өршіп барады. Тіпті соңғы 10 жылда болмаған жағдай тіркелуде.Жалпы Жалағаш ауданында ғана емес, елімізде қызылшаның эпидемиялық жағдайы әлі де тұрақсыз, соңғы деректерге сүйенсек, Қазақстанда бұл дерттің 26 168 жағдайы тіркелген, оның 80 пайыздан астамы 14 жасқа дейінгі балаларға тиесілі, 83 пайызы – егілмеген балалар. Сондай-ақ аурудан 2 бала көз жұмған. «Оның екеуі де 1 жасқа толмауына байланысты жұқ­палы инфекцияға қарсы екпе алып үлгермегендіктен» дейді ма­мандар.&nbsp;Бұл кесел бізді де айналып өтпеді. Ауданда наурыз айында тір­келген 8 қы­зылша ауруымен есепке алынған науқастардың 2-еуі қызылшаға қарсы егіл­ген, 3 баланың егу жасына жет­пегеніне, 1 балада егуге медициналық шек­теулері болғанына байланысты қы­зыл­шаға қарсы егілмеген, 2 науқастың егу туралы құ­жаттары жоқ болуына байланысты егу ста­тустары белгісіз. Тіркелген науқастар үй ошағында 20 адаммен, ұйымдасқан ұжымдарда 18 адаммен тығыз байла­ныста болған. Олардың бәрі есепке алынып, тексерістен өтті.&nbsp;Бүгінде балалармен қоса ере­сектер де ауруда. Осыған байланысты науқас адам немесе науқастанған баланың анасы бала бойында қызылша ауруының белгілері байқала бастаса, дер кезінде дәрігерге көрініп, уақытылы ем алу керек. Сапалы және дұрыс тағайындалған ем науқасты қызылшадан болатын әртүрлі асқыну жағдайынан құтқара аладыҚызылша ауруымен сақтанудың тиімді жолдары жеке бас тазалық шараларының қарапайым ережелерін сақтау, үй-жай­ларды жиі желдету, науқастармен қа­рым-қатынасты уақытша үзу, ауыр­ған жағдайда оқшаулану, таза ауада жиі болу, балаларды қы­зылшаға қарсы профилактикалық егу ша­расының күн тізбесінде көрсетілген мер­зімдеріне сәй­кес уақытылы ектіру болып табылады.<blockquote>– Қызылша бойынша эпиде­мио­логия­лық ахуалдың тек біздің елде емес, бүкіл әлемде күрделенуінің себебін Дүние­жүзілік денсаулық сақтау ұйымы коронавирус пандемиясы салдарынан халық арасында қызылша ауруына қарсы вакцинациялау барысының әлсіреп, екпе­ден бас тартушылар санының артуымен байланыстырады. Себебі ұжымдық им­мунитет бәсеңдеген сайын ауру жұқтырып алу қаупі күшейе түседі. Қауіп тобында – екпе алмаған, иммунитеті әлсіз адамдар. Сондықтан қызылшаның алдын алудың ең тиімді және сенімді әдісі вакцинация болып табылады. Қызылшаға қарсы егу – вирусты жасанды жолмен тоқтату, нәтижесінде ағза өзін қорғайтын иммунитет жасайды. Ең алғашқы вакцинация балаларға 12 айлығында, екіншісі 6 жаста жасалады. Егу тұрақты қорғанысты тудырады. Мына жайтты ескерген жөн, жоспарлы екпеден бас тарту тек өзіңіздің ғана емес, басқа да балалардың өміріне қауіп төндіреді, – дейді ауданның бас санитары Гүлзираш Айымбетова.</blockquote>Денсаулықты сақтау өз қолымызда. Жоғарыда айтылған жайттар бойыңызда байқалса, міндетті түрде мамандарға тексерілу керек. Кеселден құтылудың басты жолы – тек екпе алу. Сондықтан арнайы екпе алудан бас тартпай, өз денсаулығымызды сақтайық.

Қызылша: 8 науқас есепке алынды

<a href="https://kyzylorda-news.kz/">Kyzylorda-news.kz</a> &nbsp;Республика бойынша «Таза Қазақстан» экологиялық акциясы басталды. Аталған акция аясында «Таза Қазақстан – таза аймақ» экологиялық науқаны бастау алды. Қызылорда облысының әкімі Нұрлыбек Нәлібаев қызылордалықтарды тазалық науқанына үн қосып, туған жерді түлетуге шақырды.&nbsp;Қадірлі жерлестер!Ардақты ағайын!Қазақылықтың қаймағы бұзылмаған, тату тірлік пен береке-бірліктің бесігі – Сыр өңірінде бүгіннен республикалық «Таза Қазақстан» акциясы аясында «Таза Қазақстан – таза аймақ» экологиялық науқаны бастау алды.Тазалық пен тәртіп – кез-келген аймақтың табысты дамуының кепілі ғана емес, тұрғындардың мәдениеттілігінің өлшемі.Мемлекет басшысы Қасым-Жомарт Кемелұлы «Қалалар мен ауылдардың сәулетті, саябақтар мен ауланың таза болуы, ең алдымен, басқа біреуге емес, өзімізге керек. Азаматтарымыз қоғамдық орындар мен қоршаған ортаға жанашыр көзбен қарауға тиіс» - деген болатын.Біздің айналамыздағы игіліктер адамдар үшін жасалған. Тазалық біз үшін басты құндылық.«Ауылына қарап, азаматын таны» дегендей, әр елді мекеннің тазалығы, сәулетті көркі тұрғындардың жанашырлығына байланысты. Себебі әр көшенің, әр үйдің, әр ауланың тазалығы – тұтас қала мен ауылдың айнасы.Ұлы жол алғашқы қадамнан басталады. Осы ретте, тазалық айлығы аясында облыс халқы туған жерді түлетуге атсалысады деп сенеміз. Сыр – Алаштың анасы!Барша жерлестерімді, еңбек ұжымдары мен кәсіпкерлерді игі бастаманы өз үйінен бастап, аулалар мен көшелерде, мөлтек аудандарда жүзеге асыруға, қала мен ауылдарда тазалық жұмыстарына ұйытқы, жақсы істерге дәнекер болуға шақырамыз.Тазалық &nbsp;біз бен Сізден басталады! Туған жерімізді бірге көркейтейік!

Аймақ басшысы тазалық науқанына атсалысуға шақырды 

<a href="https://kyzylorda-news.kz/">Kyzylorda-news.kz</a> &nbsp;Бүгін Жалағаш ауданы, Таң ауылында ел Президентінің аумақтарды абаттандыру және көгалдандыруды бастау жөніндегі тапсырмасына және облыс әкімі Н.Нәлібаевтың ауыл аймақтарда санитарлық тазарту жұмыстарын жүргізу жөніндегі Үндеуіне сәйкес «Таза Қазақстан» экологиялық акциясы өткізілді.Акция барысында Таң елді мекенінде ағаш отырғызу, санитарлық тазалық жұмыстарын жүргізу, аллеяларды және аяқ су келетін арықтар мен каналдарды тазарту жұмыстары атқарылды.Акцияға аудан әкімі Ардақ Ибраимов, Қазақстанның Еңбек Ері Шағыртаев Имамзада Қуанышбайұлы қатысып, шараның маңыздылығын арттыра түсті.Сондай-ақ, акцияға ауыл тұрғындары, ауыл ардагерлері, белсенді жастар, еріктілер де өз үлестерін қосты. Жалпы Жалағаш ауданында бүгінге күнге дейін барлығы 7500-ге жуық ағаштар отырғызылып, ауданды көркейту және көгалдандыру жұмыстары белсенді ұйымдастырылуда.1300-ге жуық тұрғыны бар үлгілі елді мекен тұрғындары тазалықты өз аулаларынан бастауды әдетке айналдырған. Таң ауылына кіреберістен ақ біркелкі жасыл-желектің жайқалуында, абаттандыру жұмыстарының елді мекенге көрік беруінде ауыл тұрғындарының еңбегі зор. Бірлік пен ынтымақты ту еткен жергілікті халық өз аулаларынан бастап, өздері тұратын өлкенің көшелеріне дейін тазалық жұмыстарын жүргізіп, белсене атсалысып келеді.Өткізілген акцияға елді мекендегі шаруашылық құрылымдарынан 20 техника және 360 адам белсенді түрде қатысты.

Қазақстан және Қызылорда облысының жаңалықтары