<a href="https://kyzylorda-news.kz/">Kyzylorda-news.kz</a> &nbsp; Қазалы ауданында кәсіпкерлік көкжиегі өсуде. Оған дәлел осындағы іскер жандардың ашқан түрлі кәсібі. Олар ешкімге шағынбастан өз қамдарын қамдауда. Сонымен қатар, мемлекеттің қолдауынан да шет қалмауға тырысуда. Солардың қатарында Ауылды қаржылай қолдау қоры тиімді шағын несиелендіру арқылы ауылдағы кәсіпкерлікті дамыту және халықтың әл-әуқатын жақсартуды көздейтін бірден-бір көмекші қоғам ретінде танымал. Аталған қоғам ауылды аймақта тиімді жүзеге асатын шағын несиелендіру жүйесі бойынша қаржылық ресурсқа мұқтаж мақсатты топтардың қажеттіліктерін қанағаттандыратын, әлеуметтік жауапкершілігі жоғары ірі компания санатында.Ауыл шаруашылығын қаржылай қолдау қоры 2017-2021 жылдарға арналған Нәтижелі жұмыспен қамту және жаппай кәсіпкерлікті дамыту бағдарламасы арқылы тартылған қаржыдан бірқатар кәсіпкерлерді қаржылай несиеледі. Осыған орай, қазалылық кәсіпкерлерге арнайы бағдарламалар арқылы төмен пайызбен қарыз беріліп, өндірісті жандандырып, жаңартуға тегін кеңестер де ұсынған болатын. Үкімет тарапынан атқарылып жатқан осындай қамқорлықты тиісті деңгейде тиімді пайдаланып, несібесін шағын кәсібінен тауып отырған жандар біздің ауданда да көптеп кездеседі. Солардың бірі – қазалылық Айнұр Әлімбет 4 процентпен үш жылға 4 миллион теңге алып, наубайхана ашты. Қордан алған қаржыға арнайы нан пісіретін электр пеші мен қажетті құрал-жабдықтарды иемденді. Ол бала күтімімен ұзақ жылдар бойы жұмыс істемеген. Қазір осы кәсібінің берекесін көріп, барлық қарызын абыроймен өтеп шықты.<blockquote>– Наубайхана ашу бұрыннан ойымда жүрген еді. Бұл берекесі мол шаруа. Ауыл ішінде пісірілген нанның сапасы жоғары, әрі бағасы тиімді болады. Маған нан өнімдерін пісіру ұнайды. Сол себепті де, осыны таңдадым, – дейді көпбалалы ана Айнұр Мертайқызы.</blockquote>Тірлігі алға басқан кәсіпкер өз жағдайын түзеп ғана қоймай, төрт адамды жұмыспен қамтып отыр. Шағын цехтан түскен пайданың арқасында іскер әйел ай сайынғы берешегін уақытылы төлеп тұрды. Сапалы өнім – өркендеу кепілі ұстанымымен кәсібін ашып, қазір аудан орталығындағы дүкендердің басым бөлігін өз өнімімен қамтамасыз етуде.– Бағдарламаның халыққа берері көп. Қаншама тұрғын соның арқасында әл-әуқатын дұрыстап алды. “Бастау бизнес” курсына қатысып, бірқатар мәліметке қанықтым. Қалай кәсіпті дамыту мен клиенттерді көбейту жолдарын үйрендім. Қажетті құжаттарды дайындау ережелерін білдім. Бизнес жоспарды әзірлеп, қаражатты алғаннан кейін наубайханаға Мирамкүл Сартай, Жанна Панова, Рүстем Панов, Миуагүл Қалабаева, нан тасушы Руслан Қанатбаев есімді көмекшілерді тарттым. кондитерлік өнімдерді жасауБүгінде күніге 500-600 дана нан пісіріледі. Алға қойған түрлі мақсат бар. Соның бірі – газ пеш алу. Әзірге тоқ пешпен барлық нан өнімдерін пісірудеміз. Газ пешке қол жеткізсем өте тиімді болар еді. Армансыз адам, қанатсыз құспен тең ғой. Жоспарларым көп. Осы ісімді кеңейткім де келеді. Дегенмен бұл келешектің еншісінде, – деп кәсіпкер Айнұр Мертайқызы өз жоспарымен бөлісті.Тұтынушылар тарапынан нан өнімдеріне деген сұраныс қашанда жоғары. Бұларсыз күнделікті астан бастап, үлкен жиындарға дейін дастарқан мәзірінің сәні кірмейтіні баршамызға аян. Оның үстіне ас атасы кез келген азық-түлік дүкендерінің сөресінде табылуы тиіс.“Еңбек еткен адамның еңсесі биік” дегендей, Айнұр Мертайқызы мұндай сұранысты толық қанағаттандырып, дәмді өнімдерін аудан нарығына саудаға шығарып қазалылықтардың алғысына бөленуде. Көпбалалы ана отбасылық кәсіпті дамытып, төрт ұлына мұра етіп қалдыруды жөн санайды. Еңбектің нанын жеп, кәсіпкерліктің көзін тапқан ол, дөңгеленген шаруасын әрі қарай үлкейтуді қолға алуда. Болашаққа сеніммен қараған Айнұр Әлімбет әлі де, бағындырар белестердің көп екеніне сенеді. Бүгінгі нарық кәсіпорыннан заман ағымына сай өнім өндіруді талап етеді. Өндірістің көлемі шағын болғанымен, сапаның сақталуы әрдайым бақылауда. Тұтынушы үшін ең бастысы – нанның дәмдік қасиеттері мен жоғары сапасы.Мұнда нанның 5-6 түрі пісіріледі. Булочка, батон, лепешка, қара нан, көмеш нан, жаппай нан мен булочканың бірнеше түрі жасалады. Тапсырыспен самса, пицца, тоқаш, бауырсақ күнделікті 100 бен 200 арасында әзірленеді. Бұлардың барлығы базар бағасынан төмен болады екен. Сондықтан тұрақты тұтынушылар қатары көбеймесе, азайған емес. Сонымен бірге, "Сезім" базарының бірінші қабатында арнайы тапсырыс алатын адамы бар. Бұл жерде бургер, бәліш, самса шәй мен кофе сатылады. Сонымен қатар, дастарқан мәзіріне қойылатын кондитерлік өнімдер: пирожный, торт тапсырыспен дайындалады. Күнделікті таңғы 6:30-да &nbsp;жұмысшылар қамыр әзірлейді. Осылайша, кешкі 19:00-ге дейін ақ адал еңбек етеді. кей кездері тапсырыс көп түскенде 24 сағат жұмыс істейді.<blockquote>– Жалпы, осы нан пісіру ісімен 26 жылға жуық отбасымен айналысып келеміз. Әуелде кішкентайлап, үйден бастадық. Газ астындағы плитаға үй ішімен булочка жасадық. Оны базарға арбамен апарып, саттық. 2010 жылдан бастап, әкем Мертай шағын наубайхана ашып, нан пісіруді толықтай қолға алды. Осы ас атасы – нанның арқасында бес баласын аяқтандандырды. Соның берекесін көрген біз де, ісін ары қарай жалғаудамыз, – дейді көпбалалы кәсіпкер Айнұр Әлімбет.</blockquote>Іскер әйелдің Қазалы ауданының экономикалық әлеуетін барынша арттыру мақсатында халық игілігі үшін қызмет атқарып жатқан өнімі өтімді, жұмысы жүйелі, әрі &nbsp;наубайхана жұмысы жандана беретіні сөзсіз.Фото: https://32.livejournal.com/2825283.html

Қазалыда күніге 600 нан өндіретін наубайхана халыққа қызмет көрсетеді

<a href="https://kyzylorda-news.kz/">Kyzylorda-news.kz</a> &nbsp;Заман құбылған сайын уақыт талабына сай адамдардың да талғамы өзгеріске ұшырауда.&nbsp;Бұл жаһандану дәуірі қазақ халқын да айналып өтпеді. Қазір паста, стейк, балық өнімдері сұранысқа ие. Алайда өзіміздің ұлттық тағамдар тек мереке күндері ғана еске түсетін болды.&nbsp;Аймақта ұлттық стильде тағам ұсынатын тек санаулы орын бар.&nbsp;Мәселен, «Бидай» ұлттық мейрамханасы, «Арафат» кафесіндегі қазақи на­қышта көмкерілген VIP бөлме, сондай­-ақ «Жеті тандыр» ұлттық тағамдар орталығы. Басқа мейрам­ханаларда ұлттық тағам­дардан ет, бауырсақ, қуырдақ, айымыз оңынан туса нарынды кездестіріп қалуымыз мүмкін. Қалада мейрамханалардан көз ашпаймыз, ал ұлттық асхана сау­сақпен санарлық. Біз білетін ұлттық тағам көп, алайда неліктен олардың дәмін тату бізге бұйырмай келеді?<blockquote>– Өзге асханалардан ерек­шелігіміз – тағамдар­дың құнарлылығы. Әр­ бір тағамның өзіндік тарихи маңызы, дайындалу жолы бар. Біздің мейрамханаға қонақ болған әрбір мейман ағарғанға тапсырыс береді. Яғни қымыз бен шұбат ерекше сұранысқаиие. Олардың дайындалу жолын сұрайтын кездері де болған. Шүкір! «Бидайға» келушілердің саны күннен күнге артып келеді.Ұлттық тағамдарымызға қызығушылық бар. Қызылордаға келетін қонақтардың көбі асханамыздан дәм татып кететіні рас. Жалпы айтқанда, қызылордалықтар қазақилыққа етене жақын. Бізге ұлттық асхана басқа қа­лаларға қарағанда таңсық емес деп ойлаймын. Әйтсе де біз білмейтін тағамдар саны жеткілікті. Ұмы­тылып бара жатқан тағамдарды жаң­ғырту мақсатында халыққа ұсы­нудамыз. Мәзірден суретін көрген жан­дарға тағамның дәмі қызық. Алайда мұндай асты дайындау үшін көп білім, сондай­-ақ уақыт керек. Жоспар көп, жаңа мәзірдің де жобасы дайын болып қалды. Ұлттық тағамдарға деген сұраныс еш толастамайтынына сенеміз. – дейді «Бидай» ұлттық мейрамханасының бас аспазы Әмір Амантайұлы.</blockquote>Айта берсек, ұлттық тағамдардың түрі көп. Алайда біз білетін өнімдердің орнын өзге асханалар айырбастап келеді. Балалық шақта аттың құлағында ойнап, қатық пен айран ішіп, құрт­-май жеп өскендер неліктен қазір бургер мен «кока колаға» әуес? Сондай­ ақ мейрамханалардағы тағамдардың да бағасы шамадан тыс қымбат. Ұлттық өнімдер туралы айтпаса да түсінікті. Құны көңіл көншітпеген тағамға тапсырыс та аз. Қоспасы құнарлы, қазақ халқының байырғы заманынан ұрпаққа мұра болып қалған ұлттық өнімдерін жаңғыртайық. Батыстың асханасын биік бағалай бергенше, өз қазан­ ошағымыздың жағдайын күйттейік.<h2 style="margin-left:0cm;text-align:center;">Наурыз көже</h2>Қазақтың Жаңа жылы – әр көктемнің мерекесі. Бұл мейрамда арасы алыстаған ағайын, туыс-­туған, дос-­жаран бас қосып, реніш-өкпе сейіледі. Мейрамның сәнін келтіріп, қазақтың әр дастарқанынан ойып тұрып орын алатын наурыз көже де ұлттық тағамдардың қатарында. Бұл туралы балалар біле бермейді. Себебі көптеген бүлдіршінге наурыз көженің дәмі ұнамауы мүмкін. Олар ес білгелі фаст­фудпен қоректеніп, ұлттық тағамдарға бой үйретпеген. Алайда наурыз көже жеті түрлі дәм қосылатын, өте құнарлы, құрамында керекті дәруменнің бәрі бар ерекше тағам.<h2 style="margin-left:0cm;text-align:center;">Ірімшік</h2>Ірімшік – табиғи тәтті, нәрлі әрі құнарлы тіскебасар. Ешкі, сиыр немесе қойдың сүтінен қайнаған сіңімді тағамдардың бірі. Барлық жастағы адамдар үшін пайдалы.<h2 style="margin-left:0cm;text-align:center;">Бауырсақ</h2>Бидай ұнынан әзірленетін тіл үйірерлік бұл нанды жақсы көрмейтін бала да, қарт-қария да жоқ. Ежелде қазақ халқы көшпелі ғұмыр кешкен. Сапарға аттанар алдында бауырсақты молынан азық етіп алатын болған. Себебі тойымды, жолда ашып, ысырап болмайтын ерекше тағам. Наурыз көже тек жаңа жылда әзірленсе, бауырсақ – әрбір мейрамда дас­тарқаннан табылатын ұлттық тағам.<h2 style="margin-left:0cm;text-align:center;">Саумал</h2>Бұл ағарғанның емдік қасиеті қашан да жоғары бағаланады. Балғын бие сүті көптеген дәрумендерге бай. Адам ағзасын тазартып, денсаулықтың бір қалыпқа түсуіне бірден ­бір көмек. Асқазан, өкпе, бауыр, ісік ауруларынан қорғап, сүйектердің қатаюына әсер етеді. Қатерлі сырқаттың алдын алады. Дәрігерлер үлкен сеніммен ішуге ұсынады.&nbsp;Фото: freepik.com

Аймақта ұлттық асхана көп пе?

<a href="https://kyzylorda-news.kz/">Kyzylorda-news.kz</a> &nbsp;Қазалы ауданындағы №21 «Алпамыс» бөбекжай-балабақшасы халыққа 10 жылға жуық үздіксіз сапалы қызмет көрсетіп келеді. Балабақшаның материалдық-техникалық базасы заман талабына сай жабдықталып, педагог мамандар заманауи технологиялар бойынша білім жетілдіру курстарынан ұдайы өтіп тұрады. Соның нәтижесінде, мұндағы қызметкерлер ұлт болашағы – бүлдіршіндерді заман талабына сай тәрбиелеуде елеулі үлес қосып келеді.Балабақша – 12 топ бойынша баланы қабылдау бөлмесі, ойын бөлмесі, жатын бөлмесі, ыдыс-аяққа арналған бөлме және қол жууға арналған бөлме; меңгеруші кабинеті, әдіскер кабинеті, логопед, дефектолог кабинеті, есепші кабинеті, педагог-психолог кабинеті, шаруашылық меңгерушісі кабинеті, музыка залы, денешынықтыру залы, медициналық кабинет және оқшаулау бөлмесімен қамтамасыз етілген. Сондай-ақ, асхана (ас дайындау бөлмесі, азық-түлік сақтау бөлмесі, азық-түлік және ет өнімдерін сақтайтын тоңазытқыш және мұздатқыш бөлмесі), кір жуатын бөлме (кір жуу машиналары орналасқан бөлме, кір үтіктейтін бөлме, төсек жаймаларын жинайтын бөлме), балабақшаны жылытатын кіші бу қазандығы орналасқан бөлмелерді қамтиды.Қазіргі таңда, бөбекжай-балабақшада 12 топ жұмыс жасап, 280 бала тәрбиеленуде. Балабақшада 69 қызметкер, оның ішінде – 35 педагог кадр және 34 техникалық қызметкерлер жұмыс жасайды.Балаларды тәрбиелеу, білім беру процесін бағдарламаға сәйкес жүйелі ұйымдастыратын тәрбиешілердің барлығы «Мектепке дейінгі оқыту мен тәрбиелеу» біліктілігі бойынша жоғары білімді педагогтер.Сонымен қатар, бүлдіршіндерге патриоттық, эстетикалық, адамгершілік тәрбие беру, өз ой-пікірін білдіре алатын, салауатты өмір салтына сай, болашақтың тірегі болатын дені сау, жан-жақты азамат етіп тәрбиелеуде балабақшада дене шынықтыру нұсқаушысы, педагог ұйымдастырушы, педагог-психолог, логопед, дефектолог мамандары, музыка жетекшісі, би жетекшісі жұмыс жасайды.Балабақшада «Нәтижеге бағытталған білім беру және педагог шығармашылығы» тақырыбында облыстық семинар, «Тәй-тәй технологиясының әдістемелік ерекшеліктері» атты облыстық оқыту семинары өтті. Шараға «Тәй-тәй» Нидерланды Халықаралық Ассоциациясының мүшесі, педагогика ғылымдарының докторы Д.К.Айджанова, облыстық оқу орталығы директорының орынбасары Г.Б.Дихамбаева қатысты.Осыдан алты жыл бұрын «Мектепке дейінгі ұйымда инновациялық технологияларды пайдалану негізінде білім сапасын арттыру жолдары» тақырыбында аудандық семинар, 2021 жылы Қызылорда облысы оқу орталығы (әдістемелік кабинет) ұйымдастыруымен «Мектеп жасына дейінгі балаларды дамытуда заманауи технологияларды қолдану» тақырыбында онлайн шығармашылық шеберханасы жоғары деңгейде өтті.Былтыр Қазалы аудандық білім бөлімінің жоспарына сәйкес, «Мектепке дейінгі ұйымда тәрбиелеу мен оқыту үшін баланы жас ерекшеліктеріне сәйкес біліктері мен дағдыларын әрекет түрлерінде ойын арқылы қалыптастыру» тақырыбында өткізілген семинарға жүзге жуық мектепке дейінгі ұйым педагогтері қатысып, жоғары көрсеткішке ие болды.Аталған семинарда балабақшаның жобасы аясында «IT балабақша заман талабы» тақырыбындағы Жобаның алғашқы қадамы жасалды. Мектепке дейінгі білім беруде ақпараттық технологияларды кеңінен пайдалану, цифрлық білім беру ресурстарын пайдаланудың сапасын арттыру мақсатында ашылған «Қызықты STEAM» кабинетінде тәрбиеленушілердің робототехникамен ойындары қатысушылардың назарына ұсынылды.Балабақша осы уақыт аралығында жоғары жетістіктерге қол жеткізді.Атап айтқанда, 2015 жыл – Қазалы аудандық «Қазақ тілі» қоғамының ұйымдастыруымен өткізілген «Ұлылықты үйлестірген Ұлы тіл» атты облыстық шығармашылық семинарға қатысушылар 22 қыркүйек ҚР Тілдер күні мерекесіне орай ұйымдастырылған «Ақерке» тобы бүлдіршіндерімен өткізілген «Жырым сенсің ана тілім» атты облыстық іс-шараға жоғары баға берді.Осы жылы Қазалы аудандық «VI Ботақан» балалар байқауы, Диплом мен бірінші орын; Қазалы аудандық «Қазақ тілі» қоғамының ұйымдастыруымен өткен «Бала бақыты – ана тілінде» атты байқау «Бас жүлде» А.Жолмырзаева; Қазалы аудандық «Үздік мектепке дейінгі ұйым» бірінші орын; облыстық «Үздік мектепке дейінгі ұйым» екінші орын; Қазалы аудандық білім бөлімінің жыл қорытындысымен «Үздік балабақша» бағамы; ҚР Тәуелсіздігінің 25 жылдығы қарсаңында өткізілген «Үздік тәрбиеші – 2016» Қазалы аудандық байқауы А.Жолмырзаева Бас жүлде иеленді; «Үздік флипчарт сабақ 2017» облыстық байқауының Қазалы аудандық кезеңінде балабақшаның ағылшын тілі маманы А.Рысмамбетова «Бас жүлде» иеленді.«Үздік флипчарт сабақ» облыстық байқауында «Үздік флипчарт сабақ» бағамымен және Дипломмен марапатталды; «Үздік балабақша тәрбиешісі – 2017» Г.Уразымбетова бас жүлде; Қазақстан Республикасы Тәуелсіздігінің 27 жылдығына орай «Тіл жанашыры» бағамымен марапатталды. Облыстық білім басқармасы, облыстық кәсіподақ комитеті ұйымдастыруымен «Жыл таңдауы – 2018» мерекелік шарасында «Білімнің бесігін тербеткен» номинациясымен марапатталды. «Talantty jastar» республикалық өнер және білім байқауына &nbsp;қатысып, хореография бөлімі бойынша Бас жүлде жеңімпазы атанған «Өрнек – 1» би тобы марапатталды. «Talantty jastar» республикалық өнер және білім байқауына қатысып, хореография бөлімі бойынша лауреат атанған «Өрнек – 2 » би тобы бірінші орын иеленді.«Бейбітшілік әлемі» Халықаралық Бірлестігінің 10 жылдығы құрметіне арналған «Мәңгі ел – Қазақстаным!» оқушылар мен жасөспірімдер фестивалінде «Би» жанрында көрсеткен айрықша өнер, дарынды қабілеті және рухани өркендеу жолындағы еңбек үшін. Хореограф А.Утеген жетекшілігімен «Би» жанр бойынша М.Жанәбіл. Музыка жетекшісі М.Шапихова жетекшілігімен «Вокал» жанр бойынша Ж.Көптілеу Тәрбиеші Р.Алғазиева жетекшілігімен «Вокал» жанр бойынша Н.Сатыбай, Педагог ұйымдастырушы М.Танирбергенова &nbsp;жетекшілігімен «Көркем сөз»жанр бойынша Бас жүлде иемденіп, Диплом және медальмен марапатталды. Сонымен бірге, «Dubai World of Peace 2019 Халықаралық Өнер фестиваліне және Ғылыми конференциясына жолдама алды. 2019 жылды «Жастар жылы» деп жариялануына орай және «Болашаққа бағдар: рухани жаңғыру», «Ұлы даланың жеті қыры» бағдарламалық мақалаларды жүзеге асыру мақсатында өткізілген отырған Республикалық «Жас Дарын Art Kazakhstan» «Өрнек» би тобы бірінші орын иеленіп, Дипломмен марапатталды. Білім және ғылым қызметкерлері кәсіподағы Қазалы аудандық комитетінің төрағасы Ә.Раман Қазалы аудандық «Қазақ тілі» қоғамының төрағасы А.Тамашевтің ұйымдастыруымен «Жастар жылының шамшырағы – жас маман» атты тәрбиешілер арасында өткізілген аудандық байқауда жүлделі бірінші орын иеленді. Сонымен қатар, 2020 жыл – Мектепке дейінгі білім беру ұйымдарының арасында өткізілген «Мектепке дейінгі ұйымның жазғы сауықтыру-шынықтыру кезеңінің үздік іс-шара жоспары» облыстық сырттай байқауында үшінші орын иеленіп, дипломмен марапатталды. 2020 жылы Жастардың белсенділігін арттыру жолында жанашырлық танытып, жыл бойы қолдау көрсеткені үшін «Үздік жастар ұйымы» номинациясымен марапатталды.Білікті басшы, қабілетті ұйымдастырушы балабақша меңгерушісі Жанат Қуанышқызы ұжымның ауызбіршілігі мен жоғары деңгейде кәсіби жетістіктерге жетуіне өз үлесін қосып келеді.

Қазалыдағы №21 «Алпамыс» балабақшасы бүлдіршіндерді заман талабына сай тәрбиелеуде елеулі үлес қосып келеді

<a href="https://kyzylorda-news.kz/">Kyzylorda-news.kz</a> Партия филиалының төрағасы Наурызбай Байқадамов Қармақшы ауданда болып, бірқатар әлеуметтік нысандардың жұмысымен танысты. Сондай-ақ партияның Сайлауалды бағдарламасы аясында Жосалы кентінің мөлтек ауданына газ жүргізу құрылысын зерделеді.«AMANAT» партиясы білім берудің қолжетімділігін арттыруды өзінің 5 жылдық Сайлауалды бағдарламасында нақты қамтыған болатын. Партия филиалының төрағасы бағдарлама айқындалған мінддеттердің орындалуын нақтылау үшін алдымен Қармақшы аграрлы-техникалық колледжінде болды. Мұнда студенттердің еш кедергісіз білім алуы үшін ондағы білім сапасы, материалдық - техникалық жағдай, мамандар жеткіліктігі, жатақхана барлығын көрді.Мұнан соң, облыс әкімінің тікелей тапсырмасымен аудан орталықтарында салынып басталған «Руханият» орталығы құрылысы, кент ішілік мөлтек аудандарға жүргізіліп жатқан газ тарту жұмыстары басында болып, әлеуметтік маңыз бар нысандардың құрылысының сапалы және уақытылы аяқталуын тапсырды.Наурызбай Байқадамов мониторинг барысында бюджеттен бөлінген әрбір қаржының тиынына дейін сұрауы бар. Бұл халықтың қаржысы. Сондықтан құрылыс жұмыстарын жүргізгенде өзімнің ұрпағым, ағайын-туысым тұтынады,- деп жауапкершілікпен қарау керектігін тілге тиек етіп, мұны тиісті органдар да, «AMANAT» партиясы да тікелей бақылауда ұстап отырғандығын атап өтті.

Әлеуметтік нысандардың сапасы партия бақылауында

<a href="https://kyzylorda-news.kz/">Kyzylorda-news.kz</a>&nbsp; Қоршаған ортаның тазалығына жауапкершілікпен қарау – әрбір азаматтың басты міндеті. Осы мақсатта «Таза Қазақстан» республикалық акциясы аясында Сыр өңірінде «Таза Қазақстан - таза аймақ» экологиялық науқаны бастау алды. Жаңақорған ауданында да атсалысып, &nbsp;әр аптада бекітілген тақырыптар бойынша аумақтарды абаттандыру және көгалдандыру жұмыстары жүргізілуде.«Тазалық – табалдырықтан басталады», демекші қоршаған ортаның тазалығына жауапкершілікпен қарау – әрбір азаматтың басты міндеті. Тазалықты жанына серік еткен тазалық қызметкерлері ерекше белсенділік танытуда. Науқанның бірінші аптасы «Таза өлке» атауымен аталып, бүгін ұйымдастырылған игі бастамаға кент әкімдігінің ұжымы, еріктілер, қоғам белсенділері мен жастар және тұрғындар белсенді қатысты.<blockquote>– Науқанға барынша үлес қосу және елімізді көркейту-көгалдандыру мақсатында кент тұрғындары мен тазалық мамандары ерекше ықылас білдіруде. Біз бұл жұмыстарды күшейтіп, түрлі шаралар, тазалық челендждері, ағаш отырғызу акцияларын, жалғызбасты қариялардың үйлерінің аумақтарын тазалау жұмыстарын қолға алдық. Бұл халықты игілікті іске шақыру. Әр адам өз үйін әдемі, ауласын таза ұстаса, өңірдің тазалығына көрік қосар еді. Бұндай акцияның тазалыққа пайдасы зор. Әр адам кішкене де болса атсалысып, үлесін қосса, тазалыққа деген жауапкершілігі де арта түседі. Туған жердің тазалығын қадағалау әрбір тұрғынның азаматтық парызы екенін естен шығармайық, – дейді кент әкімдігінің әскери маманы Алма Мамирова.</blockquote>Акцияға қатысушылар бекітілген аумақтарда әктеу, сырлау жұмыстарын жүргізіп, аялдамаларды, жолаушылар дамылдайтын орындықтарды сырлады. Бір айдан аса өткізілетін акция аясында түрлі апталықтар жарияланды. Соның негізінде айналаны абаттандырып қана қоймай, арықтар мен су жүйелерін тазалау жұмыстары да жүргізілмек. Иа, туған жерінің ауасын жұтып, суын ішіп, табиғатынан қуаттанған әрбір азамат өз ауласын таза ұстап, қадірлеуі тиіс. &nbsp;

 «Таза Қазақстан - таза аймақ» экологиялық науқаны бастау алды

Белгілі қазақ тілді блогер Алексей Лодочников су тасқынынан зардап шеккендерге көмектесу үшін "сбор" ашып, халықтан ақша жинаған блогерлерді сынға алды. Бұл туралы <a href="https://stan.kz/news-398285/">Stan.kz </a>ақпарат агенттігі хабарлайды.&nbsp;Лодочников халықтан ақша жинап жатқан блогерлердің шынайылығына күмәнданатынын және олардың еш жерде есеп бермейтінін&nbsp;айтты.&nbsp;"Қазір еліміздің көптеген облыстарында, қалаларында су тасқыны болып жатыр. Осыған байланысты қазір барлығы, екі блогердің бірі&nbsp;"сбор" ашып жатыр. Күні кеше&nbsp;көрдім,&nbsp;блогерлердің бәрі жиналып,&nbsp;"қиын-қыстау қилы заманда" деген әнді қыстырып қойып, "бір-бірімізге көмектесейік, осыған байланысты ақша жинаймыз" деп жатыр. Мен бұл “сборлардың” неге ашылып жатқанын түсінбеймін. Онсызда&nbsp;үкімет бәрін істеп жатыр, Тоқаевтың өзі&nbsp;"біз бәріне көмектесеміз,&nbsp;үйіп салып береміз, жоғалтқанымыздың орнын толтырамыз” деді. Елдегі көптеген ірі компаниялар миллиардтаған қаржы бөліп жатыр. Менің ойымша, санап қарасақ осының өзі жеткілікті ғой", –&nbsp;деді Лодочкинов әлеуметтік желіде жариялаған видеосында.Лодочкинов блогерлерді өз қаражаттарынан&nbsp;ақша жинауға шақырды."Негізі блогерлер&nbsp;кедей халық емес. Instagram парақшаларын ашып қарасаңыз, біреулерінде&nbsp;бес көлік, басқалары кейде&nbsp;миллиондап, миллиардтап табыс табамыз деп мақтанады. Оның орнына&nbsp;блогерлер жиналып, өз араларыңызда ақша жинап: "бұл барлық блогерлер атынан халыққа көмек болсын" деп беріңіздер", –&nbsp;деді Лодочников.Сондай-ақ блогер осындай "сборда" жиналған ақша үшін ешкім есеп бермейтінін айтты.&nbsp;"Бір кездері блогерлердің&nbsp;барлығы “гив” арқылы ақша жинады, ал қазір осы сборлардың арқасында ақша жинап жатырсыздар. Есеп беру деген жоқ. "5 миллион, 10 миллион теңге жинадық" деп айта салады. Бірақ олардың нақты қанша жинағанын ешкім білмейді.&nbsp;"Қазақстан халқына",&nbsp;"Біз біргеміз" деген сияқты қорлар&nbsp;жеткілікті. Халықтан ақша жинауды доғару&nbsp;керек", –&nbsp;деді блогер.Фото: видеодан алынған

"Блогерлер өз қалтасынан берсін": Қазақ тілді блогер су тасқынынан зардап шеккендер үшін ақша жинағандарды сынға алды

&nbsp;<a href="https://kyzylorda-news.kz/">Kyzylorda-news.kz</a> &nbsp; Бүгін облыс бойынша 2023-2024 жылғы жылу беру маусымы аяқталды. Жылу беру маусымында өңірдегі 1 995 нысанға тұрақты түрде жылу энергиясымен қамтылып, тіршілікті қамтамасыз етуші кәсіпорындар штаттық режимде жұмыс істеді. Бұл туралы Өңірлік коммуникациялар қызметінің ақпарат алаңында облыстық энергетика және тұрғын үй-коммуналдық шаруашылық басқармасы басшысының орынбасары Бауыржан Ізмағамбетов хабарлады.– Облыс бойынша жылу беру маусымы тұрақты өтті. Дегенмен, қазіргі таңда алдағы жылу маусымына дайындық пен оны өткізу жөніндегі облыстық штаб құрылды. Осыған байланысты барлық жауапты кәсіпорындардың дайындық жұмыстарының кестесі бекітіліп, тиісті жұмыстар жүргізілетін болады. Айта кетейін, биыл жылу желілерін жаңғырту бойынша республикалық бюджеттен 6 жобаға 6,7 млрд теңге қаржы бөлінді. Бұл қаржыға 9,5 шақырым жылу желілері жаңғыртылатын болады. Сондай-ақ, кәсіпорын тарапынан 3,5 шақырым болатын жылу құбырлары ауыстырылады, - деді Бауыржан Ізмағамбетов.2024 жылдың 15 сәуірінен мамырдың 15-іне дейінгі уақыт аралығында қаладағы жылу желілерінде 16 кгс/см2 дейінгі қысыммен магистральдық және 12 кгс/см2 ауданаралық жылу құбырларының тығыздығына гидравликалық сынақ жүргізіледі.<blockquote>– 2023-2024 жылу беру маусымында Қызылорда қаласын үздіксіз жылумен қамтамасыз еттік. Жалпы, Қызылорда қаласы бойынша 199,05 шақырым жылу желілері бар. Бүгінде олардың тозу көрсеткіші 45,1 пайызды құрап отыр. Қала бойынша орталықтандырылған жылу жүйесіне барлығы 1 621 нысан қосылған. Оның ішінде 808 көпқабатты тұрғын үй, 262 жеке тұрғын үй, 50 мектеп пен 308 шаруашылық нысаны, сонымен қатар, бірнеше мекеме бар. Сондай-ақ, қаладағы жылу желілерінің тозу көрсеткішін азайту мақсатында жалпы ұзындығы 9,5 км құрайтын жылу желілерін қайта жаңғырту жоспарлануда. Ол үшін тиісті қаржы бөлініп, мердігер мекемелер анықталды. Сонымен қатар, қаланың оңтүстік ауданындағы жылу желілерінде де ең жоғары температуралық жылу тасымалдағыш сынағы өткізіледі,- деді Қызылорда жылу электр орталығы мемлекеттік коммуналдық кәсіпорын директорының міндетін атқарушы Наурыз Сатханов.</blockquote>Фото: Қызылорда облысының Өңірлік коммуникациялар қызметі

Облыста жылу беру маусымы тұрақты өтті 

<a href="https://kyzylorda-news.kz/">Kyzylorda-news.kz</a> &nbsp;Партияның облыстық филиалының төрағасы Наурызбай Байқадамов Жалағаш ауданында болып, Сайлауалды бағдарлама аясында құрылысы жүріп жатқан кенттегі денешынықтыру-сауықтыру спорт кешені және Ақсу ауылында жүргізіліп жатқан газдандыру жұмыстарымен танысты.Жалағаш ауданы орталығынан 3 шақырым жерде орналасқан Ақсу ауылында 1676 халық саны бар. Елдімекеннің инфрақұрылымын дамыту мақсатында газдандыру жұмыстары 2023 жылдың қазан айында қолға алынды. Қазіргі таңда бас мердігер «АЭS and Limited» ЖШС тиісті жұмыстарды атқаруда. Жоба бойынша газ құбырының жалпы ұзындығы 24,5 шақырымды құрайды. Қазіргі уақытта 22,3 шақырым жер асты газ құбырлары тартылды. Көшеаралық автожолдардан тесіп өткізу арқылы газ құбырларын жалғау жұмыстары жүргізіліп жатыр. Мердігер компания өкілдері газдандыру жұмыстары белгіленген жоспарға сәйкес жүргізіліп жатқандығын, жергілікті жерден 5 жұмысшы тартылып жұмыс жасап жатқандығын жеткізді. Сонымен қатар, ағымдағы жылдың тамыз айында көгілдір отын ел игілігіне пайдалануға берілу жоспарланып отырғандығын жеткізді.Филиал төрағасы онда ел игілігіне бағытталған жұмыстардың ең бірінші кезекте сапалы болуы қажеттігін айтып, бөлінген қаржының мақсатты жұмсалуы, құрылыс сапасы нысандар халыққа пайдалануға берілгенше «AMANAT» партиясының бақылауында болатындығын жетікізді.Мониторинг жұмыстарына партияның облыстық мәслихаттағы депутаттық фракциясының мүшесі Әмірбек Шаймағанбетов, Жалағаш аудандық партия филиалының төрағасы Елеусінов Өмірзақ және сала басшылары қатысты.

Партияның облыстық филиалының төрағасы әлеуметтік нысандардың жәй күйімен танысты

Жаңақорғанда мал ұрлығы едәуір азайды

&nbsp;<a href="https://kyzylorda-news.kz/">Kyzylorda-news.kz</a> Қармақшы ауданы білім бөлімі бойынша әдістемелік кабинетінің жұмыс жоспарына сәйкес Жосалы кентіндегі №121 мектеп базасында жылдық үздік қолөнер шеберін анықтау мақсатында Көркем еңбек пәнінің мұғалімдері арасында аудандық «Өнерлі ұстаз – 2024ә қолөнершілер байқауы өтті. Байқауға қатысып жатқан ұстаздар өзара тәжірибе алмасты. Себебі шебер болу – кез келген жанның қолынан келе бермейтін іс.Байқауға бөлімдеріне қарай ұлдар бөлімі мен қыздар бөлімі бойынша қатысты. Ұлдар бөлімі бойынша ең жоғары ұпай санымен «Өнерлі ұстаз –2024» Ш.Уәлиханов атындағы №26 мектептің пән мұғалімі Мұхтар Науанов жеңімпаз атанды. Ал жүлделі ІІ орынға №277 мектеп-лицейдің мұғалімі Мейрам Жарылқасын мен №274 мектептің мұғалімі Закария Ысқақтар жайғасты. Ал ІІІ орынға №28 мектептің мұғалімі Қанат Қойбағаров пен № 275 мектеп мұғалімі Шынарбек Омаркулов ие болды. Қыздар бөлімі бойынша №277 мектептің мұғалімі Жанар Абдразакова жылдың үздігі атанып, қолөнер шебері деп танылды. Ал І орынға №85 мектептен Жанар Төлегенова жайғасса, жүлделі ІІ орынды №99 мектептен Лаззат Пушпакбаева еншіледі. Ал ІІІ орынмен №105 мектептен Айман Агусова марапатталды.Өнер мен өмірді сабақтастырып, өрелі білім беріп, өскелең ұрпақты өрге жүздіруге ниетті ұстаздардың бұл байқаудан алары мол. Сондықтан, дәстүрлі іс-шара &nbsp;алдағы уақытта да &nbsp;жалғасын таба бермек.&nbsp;

Қармақшыда «Өнерлі ұстаз – 2024» қолөнершілер байқауы өтті

<blockquote><a href="https://kyzylorda-news.kz/">Kyzylorda-news.kz</a> &nbsp;Конго-Қырым қызбасы көктем мен жаз мезгілдерінде өршиді. Ауру белгілері кене шаққаннан кейін бір апта ішінде білінеді. Бүгінде облыста 48 күдікті жағдай анықталып, оның 13-нің диагнозы расталды. Қазіргі таңда аталмыш ауруға қарсы залалсыздандыру жұмыстары қарқынды жүргізілуде. Бұл туралы Өңірлік коммуникациялар қызметінің ақпарат алаңында облыстық санитарлық-эпидемиологиялық бақылау департаменті басшысының орынбасары Әлия Әбдіқайымова хабарлады.</blockquote><blockquote>– &nbsp;Қазіргі таңда облысымызда Конго-Қырым қызбасының алдын алу шаралары басталды. Бүгінде облыс бойынша 115 елді мекен қолайсыз деп танылды. Атап айтқанда, Аралда – 11, Қазалы мен Қармақшыда – 16, Жалағаш пен Сырдария – 11, Жаңақорғанда –18, Шиеліде – 20, Қызылорда қаласында – 12 елдімекен есепке алынды. Сондықтан кенеден қауіп көп деген сөз. Яғни, біздің климаттық жағдайымыз осы кенелердің өмір сүруіне өте қолайлы болып есептеледі. Әсіресе, далалық аймақта жұмыс істейтін адамдар үшін ауру жұқтырып алу қаупі арта түседі. Бұл ретте сақтық шараларының қатаң орындалуы аса маңызды, - деді Әлия Мүтәліпқызы.</blockquote>Брифинг барысында жауапты сала мамандар Конго-Қырым геморрагиялық қызбасына қарсы жүргізіліп жатқан шараларға тоқталып, қолға алынған негізгі шаралар туралы баяндады.– Биыл өңірде кенелерден қолайсыз аймақ ретінде 115 елді мекен анықталған болатын. Осы аймақтарда көлемі 2 886 841 м құрайтын қора және 762 992 бас мал саны бар. Осы қолайсыз елді мекендерді залалсыздандыру жұмыстары 9 сәуір мен 8 маусым аралығында жүргізіледі. Сондай-ақ, арнайы «ЦИПЭК-10%» препараты қолданылатын болады. Қазіргі таңда Жаңақорған және Шиелі аудандарында залалсыздандыру жұмыстары басталды, - деді облыстық жұмылдыру дайындығы басқармасының басшысы Марат Ердәулетұлы.Конго-Қырым геморрагиялық қызбасының жасырын кезеңі 2-14 күн.&nbsp;<blockquote>– Науқас адамның қаны арқылы жұққанда 9 күнге дейін қысқаруы мүмкін. Негізгі клиникалық белгілері: науқастың дене температурасының кенеттен 39-40 градусқа дейін көтерілуі, қатты бас ауруы, көздің қызаруы және мойын, арқа, бел ауруы, жүрек айну немесе құсу, іштің ауыруы. Аурудың одан әрі дамуымен қан қысымы, бетте, мойында және дененің жоғарғы бөлігінде бөртпелердің пайда болады. Сондай-ақ, мұрыннан, қызыл иектен, асқазаннан, жатырдан қан кету, инъекция орындарында көгерулер пайда болады. Сондықтан далалық аймақтарда жүргенде барынша сақтанған абзал, - деді облыстық денсаулық сақтау басқармасы басшысының орынбасары Жаңыл Абубакирова.</blockquote>&nbsp;Осы елді мекендерді кенеге қарсы ветеринариялық препараттармен егу жұмыстары басталды<blockquote>– . Өткен жылы 194,4 мың бас ауылшарушылығы жануары кенеге қарсы егілді. Сонымен қатар, басқарма тарапынан залалсыздандыруға арналған барлық қажетті препараттар сатып алынып, тиісті елді мекендерге жолданатын болады, - деді облыстық ветеринариялық басқармасының басшысы Шахмардан Қойшыбаев.</blockquote>Фото: Қызылорда облысының Өңірлік коммуникациялар қызметі

Конго-қырым қызбасы: Сала мамандары барынша сақ болуды ескертеді

<a href="https://kyzylorda-news.kz/">Kyzylorda-news.kz</a> &nbsp;Міндетті әлеуметтік сақтандыру жүйесін іске асырудағы өзекті мәселелердің бірі – халықты жүйелі түрде сақтандыру болып табылады. Бүгінде Қызылорда облысында аталған жүйеде сақтандырылған азаматтар саны – 695 мыңнан асады. Тиісінше, бұл жалпы халықтың 85 пайызын құрап отыр. Ал, сақтандырылмаған азаматтардың жалпы үлесі 15 пайыз. Дегенмен, нәтижелі атқарылған жұмыстардың арқасында Мәмс жүйесінде сақтандырылмаған азаматтар саны айтарлықтай төмендеп келеді. Бұл жөнінде Өңірлік коммуникациялар қызметінің ақпарат алаңында «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов хабарлады.&nbsp;– Өздеріңіз білетіндей, қазіргі таңда Мәмс жүйесіне азаматтарды сақтандыру шаралары қарқынды жүруде. Жыл сайын медициналық сақтандыру қаражаты есебінен тұрғындарға кардиохирургия, нейрохирургия, урология, травматология, онкология және хирургия бойынша оталар тегін жасалуда. Мәселен, былтыр біздің аймақта 55 кардиохирургиялық, 36 нейрохирургиялық, 18 урологиялық және 6 травмотологиялық оталар жасалды. Бұдан бөлек, Мәмс жүйесіндегі басым бағыттардың бірі – оңалту қызметтері де халыққа тұрғылықты қызмет көрсетуде. Жыл сайын оңалту қызметтерін алу мүмкіндігі жақсарып, медициналық құрылғылардың да, емдеу әдістерінің де саны артып келеді. Оңалту қызметтерін көрсету үшін былтыр 40 медициналық ұйыммен келісім шарттар жасалды. Сонымен қатар, стоматологиялық көмек көрсету қызметтері де сәтті жүзеге асырылуда. Былтырдан бастап әлеуметтік медициналық сақтандыру қоры стоматологиялық қызмет көрсету үшін арнайы клиникалармен тікелей келісімшарттар жасай бастады. Бұрын бұл келісімдер емханалар арқылы жасалған еді. Соның арқасында биыл 61 медициналық ұйым стоматологиялық қызмет көрсетеді. Оның ішінде 10 – мемлекеттік, 51 - жекеменшік медициналық ұйым. Осылайша емделушілер тікелей стоматологиялық клиникаларға жолдамасыз жүгіне алады, тек әлеуметтік медициналық сақтандыру қорымен шарты болуын нақтылау қажет, - деді Бақыт Торғайбайұлы.Фото:&nbsp;Қызылорда облысының Өңірлік коммуникациялар қызметі

Қазақстан және Қызылорда облысының жаңалықтары