<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев АҚШ-тың Қазақстандағы Төтенше және Өкілетті Елшісі Дэниел Розенблюммен және USAID Халықаралық даму агенттігі өңірлік миссия директорының орынбасары Моник Мосольфпен кездесті.Басқосуда аймақ басшысы Қазақстан мен Америка Құрама Штаттары арасында 30 жылдан бері ашық әрі сенімді өзара қарым-қатынас қарқынды дамығанын атап өтті.<blockquote>«Бүгінгі күні Қазақстан мен АҚШ арасында екіжақты қарым-қатынастың барлық бағыттары бойынша кеңейтілген стратегиялық серіктестік орнатылған. Жоғары деңгейдегі тұрақты ресми кездесулер, өзара сауда-экономикалық қатынастың қарқынды дамуы оның айқын дәлелі деп білеміз. Өткен жылдың қорытындысына қарағанда, Қызылорда облысы мен Америка Құрама Штаттары арасындағы тауар айналымы 10,1 млн. АҚШ долларын құрап, алдыңғы жылдың сәйкес кезеңімен салыстырғанда 3,7 есе өскен.Әлемдік қауымдастық Арал теңізінің тартылуын адамзат тарихындағы экологиялық дағдарыстың бірі ретінде бағалады. Құрғаған теңіздің зардабы тек өңірге немесе бір елге ғана емес, барша әлемге тиюде. Осы іссапарда Аралдың қазіргі жағдайымен және атқарылған жұмыстармен арнайы танысқандарыңыз, Аралды құтқару ісіне қосқан елеулі үлестеріңіз үшін алғысымызды білдіреміз», – деді облыс әкімі.</blockquote>Айта кетейік, 2021-2023 жылдары USAID Халықаралық даму агенттігінің «Оазис» жобасы шеңберінде Арал теңізінің құрғаған ұлтанындағы экожүйені қалпына келтіру мақсатында 150 гектар жерге сексеуіл тұқымы себіліп, көшеттер отырғызылды, 500 метр тереңдікте су ұңғымасы қазылып, пайдалануға берілді.Еске салсақ, Мемлекет басшысы 2021-2025 жылдар аралығында Арал теңізінің құрғаған ұлтанындағы 1,1 млн. гектарға сексеуіл екпелерін егуді тапсырған болатын. Биыл 276,2 мың гектар аумақта осы бағыттағы жұмыстар жоспарланған. Қазір 65 мың гектар ұлтанға 19,4 млн. сексеуіл көшеті отырғызылды, алдағы жылы 280 мың гектар алқапқа егіледі.Бүгінгі кездесуде АҚШ елшісі Америка мен Қазақстанның өзара тиімді әріптестігін әрі қарай дамытуға мүдделі екенін жеткізді.Өңірге жұмыс сапары барысында Дэниел Розенблюм Қызылорда облысының су шаруашылығы нысандарымен, USAID Oasis жобасының жүзеге асырылу барысымен танысты.

Облыс әкімі АҚШ Елшісімен кездесті

&nbsp;<a href="https://kyzylorda-news.kz/">Kyzylorda-news.kz</a>&nbsp; Қызылорда қаласындағы Назарбаев Зияткерлік мектебі CIS Халықаралық мектептер кеңесінің аккредиттеуінен қайта өтуде.Мектеп өмірі мен оқу үдерісін ұйымдастырудың халықаралық стандарттарға сәйкестігін бағалау үшін Сыр өңіріндегі NIS-ке Германия, Канада, Италия, Катар және еліміздегі халықаралық мектептерінен сарапшылар келді.Қауымдастық мүшелері CIS командасын қазақтың салт-дәстүрлерімен қарсы алып, мектепті таныстырды. Шетелдік сарапшылар нано, биотехнология кабинеттері мен NIS Engineering орталығында болып, оқушылардың ғылыми жобалары мен IT саласындағы өнертабыстарын тамашалады. Наурыз мерекесі қарсаңында ұйымдастырылған ұлттық ойындар сайысына қатысып, этнокөрмеде әртүрлі ұлттардың мәдениетімен танысты.Жоспар бойынша апта бойы комиссия мүшелері оқушылармен, ата-аналармен және жұмыс топтарымен әңгіме жүргізіп, «Мақсаттар мен бағыттар», «Басқару және көшбасшылық», «Оқу бағдарламасы», «Оқыту және бағалау», «Оқу және оқушылар саулығы», «Қызметкерлер құрамы», «Мектеп аумағы және материалдық-техникалық база», «Қоғаммен және жанұямен серіктестік», «Интернат» стандарттарының өкілдерімен сұхбаттасатын болады. Сонымен қатар сабақтарға, үйірме, спорттық секцияларға қатысып, тәрбиелік жобалардың жүзеге асырылу барысына бақылау жүргізеді.Айта кетейік, Қызылордағы NIS 2018 жылы Халықаралық мектептер кеңесінің аккредиттеу сертификатын алған болатын.Халықаралық мектептер кеңесі (CIS) – білім саласындағы соңғы жаңалықтар мен жоғарғы стандарттарды одан әрі ілгерілету үшін құрылған әлемдегі танымал ұйымдардың бірі. Бүгінгі таңда оның құрамына әлемнің жүздеген мемлекеттен 911 мектеп пен 622 университет енген.&nbsp;

NIS мектебі халықаралық аккредиттеуден өтуде

&nbsp;<a href="https://kyzylorda-news.kz/">Kyzylorda-news.kz</a>&nbsp; Дана халқымыз «Үйлену оңай, үй болу қиын» деп, шаңырақ көтерудің жауапкершілігі туралы бір ауыз сөзбен түйіндеп кеткен. Алайда қазір үйленудің өзі оңайға соқпай тұр. Дүркіретіп той жасау үшін несие алып, отау құрған жастардың шаңырақтары жыл өтпей шайқалып жатыр. Жуырда әлеуметтік желілерде Ranking.kz сайты жариялаған мәлімет алаңдатып қойды. Рейтинг бойынша ажырасу жөнінен әлемде Қазақстан Мальдив аралдарынан кейінгі екінші орынға шыққан. Одан кейін Ресей, Беларусь және Қытай &nbsp;келеді. Ажырасудың ең төмен көрсеткіші Үндістан, Мозамбик және Кения сияқты елдерде тіркелген. Расында, бұл ақпарат шындыққа жанаса ма? Еліміздегі ресми деректер қандай ақпаратты алға тартады? Саралап көрелік.Ұлттық статистика бюросы бұл деректердің шындыққа сай келмейтінін айтып мәлімдеме жасады. «Ажырасу коэффициенті 4,6 тең Қазақстан Мальдив аралдарынан кейін екінші орында тұрғаны туралы ақпарат шындыққа сәйкес келмейді. Бұл жалған деректің негізгі көзі https://worldpopulationreview.com/ сайтындағы мақала болған. 2022 жылдың қорытындысы бойынша елімізде ажырасу коэффициенті 1000 адамға шаққанда 2,27 құраған. &nbsp;2020, 2021 жылдармен салыстырғанда коэффициенттің төмендеуі байқалады. 2023 жылдың қорытынды деректері сәуір айында жарияланады», – делінген хабарламада.Тағы да &nbsp;деректерге жүгінер болсақ, дәм-тұзы жараспағандар саны былтыр 16,8 мың жұп болса, 2022 жылға қарағанда 5,3%-ға аз. Қалада ажырасу 5,2%-ға, ауылда 5,5%-ға азайған.&nbsp;Өңірлер бойынша отбасы құрғандар саны жөнінен Алматы алда тұрғаны белгілі болды. Өткен жылы 13,1 мың жұп некелескен. &nbsp;Одан кейінгі орында &nbsp;Түркістан облысы және Астана қаласы. Ең аз неке Ұлытау облысында тіркелген, 1,5 мың жұп.Ажырасу жөнінен де Алматы көш бастапты. Одан кейінгі орынды Қарағанды облысы мен Астана еншілеген. Ең аз ажырасу да Ұлытау облысында тіркелген, 198 жұп.Сарапшылар еліміздегі ажырасудың бірнеше себептерін атап көрсетеді. Екі жұптың арасына туыстарының түсуі, моральдық шектеулердің болмауы, сонымен бірге ажырасу процесінің жеңіл болуы да әсер еткен. Бұған қоса тұрмыстық зорлық-зомбылық, маскүнемдік, қызғаныш, жұмыссыздық, қаражаттың жетіспеушілігі және тұрғын үй сияқты материалдық мәселелер де өз әсерін тигізеді екен.Иә, отбасы болған соң ыдыс-аяқ сылдырламай тұрмайтыны және рас. Мамандар енді шаңырақ көтергендер 5 жылға дейін бір-бірін түсініп, отбасындағы кикілжіңдерге сабырлылықпен қараса әрі қарай некенің тұрақты болатынын айтады. Алайда 10-15 жыл өткен соң да орта жасқа келгенде шаңырағы шайқалып, екіге айырылып жатқандар жоқ емес. Мұндайда ең әуелі зардап шегетін – бала. Өздерінің ұстанымы мен көзқарасын алға тартып некені оңай бұза салатындар баласының өтпелі кезеңіне көңіл бөлмейді. Одан кейін бала тұйықталу, өз ортасынан алшақтау, түрлі жаман әдеттерге бой алдыру секілді жағдайларға душар болады.Ә.Мүсілімұлы атындағы №101 &nbsp;орта мектептің психологы Жанат Бекпенбетова ата-анасының ажырасуы балаға үлкен соққы болатынын айтады.<blockquote>– Кез келген бала жылулық пен қамқорлықты, мейірім мен қолдауды өзінің отбасынан күтеді. Кәмелет жасына жеткенше ата-анасына арқа сүйейді. Ал ата-анасы ажырасқанда бұл функциялардың барлығы бұзылады. Үлкендер өз басының мәселесімен әуре болады. Мұндайда көп жағдайда бала анасында қалып жатады. Әлі даму үстіндегі бала үшін жанына жақын адамдардың екіге айырылғаны кері әсер етеді. Мәселен, кей балалар өз-өзімен тұйықталып, терең ойға түсіп кетсе, екіншілері өте агрессивті болып кетеді. Бұл ата-анасының ажырасқанын қабылдамай жатқанын көрсетеді. Өйткені қажетті кезде қолдау жетпейді. Бала оны әдейілеп жасамайды. Бірақ сондай жағдайға алып келеді. Дамыған елдерде ерлі-зайыптылар бір-бірімен үйлеспегендіктен саналы түрде ажырасады. Бірақ олар баланың зардап шегетінін жақсы түсінеді. Сондықтан бала кімде қалса да екі жақтап көңіл бөліп, қиын кезеңде жанынан табыла біледі. Олар екі жақтан демеу болып, тұңғиыққа батуына, ашушаң болып кетуіне жол бермейді. Қай психологтың тәжірибесін алып қарасаңыз да, мектептегі оқушының тәртіпсіздігі, үлгерімінің нашарлауы көбіне осындай жағдайдан кейін шығады. Менің алдыма келетін оқушылардың көбі осындай, – дейді маман.</blockquote>Сарапшылардың зерттеуінше, елімізде жылына орта есеппен 140 мың отбасы шаңырақ көтерсе, оның 50 мыңы ажырасып кетеді екен. Ажырасуға арыз беретіндердің көбі – әйелдер. Олар ақылмен емес, эмоциямен әрекет етеді дейді психологтар. Неке жасының күрт өзгеруі де мамандарды алаңдатуда. Қазіргі таңда ерлер үшін некеге тұрудың орташа жасы – 27, ал әйелдер үшін 24 болып отыр. Отбасын кеш құру ажырасу санының артуына ықпал етіп отырған көрінеді.Өңірдегі ресми деректерге қарайтын болсақ, өткен жылдың қаңтар айында 347, биылғы қаңтарда 384 неке тіркелген. Ал ажырасқандар былтыр қаңтарда 35 болса, биылғы қаңтар айында 160-қа өскен. Оның ішінде қалалықтар 90, ауылдық жердегі некенің бұзылуы 70 болған.Жыл басында деректердің артуы әлеуметтік жағдайдың күрделенуін байқатса керек. Атаулы әлеуметтік көмекті алу үшін де осындай қадамға барғандар статистиканы көбейтіп отыр. Сондай-ақ мамандар екі жастың отбасылық өмірге дайын болмауы ажырасудың негізгі себебінің бірі деп түсіндіреді. Тұрмыстық зорлық-зомбылық құрбандарына арнаулы әлеуметтік қызметтер көрсету орталығының директоры Жандос Тұсмағанбетов отбасы құндылығы қазір сезім мен сертке емес, көп жағдайда мүмкіндік пен есепке құрылғанын айтады.<blockquote>– Жастар отбасылық өмірге жеңіл қарайды. Отбасын құрып, сәбилі болғаннан кейін тұрмыстағы ауыртпалықтарды көтере алмай, ұрыс-керісті үдетіп, үйдің берекесін алады. Жас отбасының ойрандалуына қаржылық, материалдық проблемадан бастап, моральдық жеке мәселелерге дейін түрткі болады. Сондықтан оның алдын алу үшін әр жас қарым-қатынасты дұрыс құрудан бастау керек. Шешім қабылдамас бұрын қыз бен жігіт тарапынан рухани дайындық пен жауапкершілік қажет. Оларды үйленбей тұрып, өмірде кездесетін түрлі жағдайлар туралы кинолар көрсетіп, арнайы психолог маманның алдынан бір өткізіп алған артық емес. Бізде қазір отбасы құндылығын насихаттауға арналған орталық көп. Бірақ олар бір күндік шарадан әрі аса алмай жатыр. Маған әріптестерім ренжуі мүмкін. Бірақ бұл – шындық, – дейді ол.</blockquote>Шаңырақтың шайқалуы, ерлі-зайыптының екіге айырылуы қоғам үшін де оңай емес. Ажырасу салдарынан жалғызілікті адамдар мен толық емес отбасылар көбейеді. Ең бастысы ұлттың зияткерлік сапасына, Абай айтқан жастардың «толық адам» болып қалыптасуына кері әсер ететіні анық. Сондықтан ажырасудың салдарымен емес, себебімен күрескен жөн секілді. Фото: Нұрболат Нұржаубай

Ата-анасының ажырасуы балаға қалай әсер етеді?

&nbsp;<a href="https://kyzylorda-news.kz/">Kyzylorda-news.kz</a>&nbsp; Халыққа жылу мен электр жарығы ауа мен ас секілді қажет, онсыз өмір – тұл. Ал енді көбіміз сол коммуналдық қызметтің бесбатпан бейнетпен келетініне көңіл қоя бермейміз.Қала халқы биылғы қыстан қысылмай шықты. Әрине, тығып тоқ пеш жағатын, сырт киіммен жататын немесе сырттан пана іздейтін заман кетті. Бұл – негізінен көпқабатты үйлердің тұрғындарына қатысты сөз. Қазір жылу мәселесі аса алаңдатпайды. Дегенмен, жылу мен жарықты өндіру мен таратудың тарқатылмаған түйіні де көп.«Қызылорда жылу-электр орталығы» МКК бас инженері Наурыз Сатхановпен бүгінгі әңгімеміз сол жайттар жайында болмақ.– Наурыз Асанханұлы, биылғы жылу маусымындағы ауқымды жұмыс қалай атқарылды? Қала бойынша орталықтандырылған жылу жүйесі қанша нысанды жылумен қамтамасыз етіп келеді?– 2023-2024 жылдарға жылу беру маусымы қала әкімінің шешімімен 2023 жылдың 13 қазанынан ресми басталған болатын. Маусымның аяқталуы ауа райының жылылығына орай биылғы 10 сәуір күні жарияланды.&nbsp; Біздің жұмысымыз маусымдық болып аталғанымен, жыл он екі ай бойы тоқтамайтын тірлік. Тоқтамайтыны, жылу қыста қажет болса, жаздай оның дайындығы жүргізіледі. Ал жарық қысы-жазы, күндіз-түні керек. Мысалы, жылу жүйесі ажыратылған соң станция конденсациялық жұмыс жасау тәртібіне көшіріліп, электр энергиясын жоғары деңгейде өндіруге күш салады. Сонымен бірге қалалық магистральдық, аумақаралық және аумақтық ішкі жылу желілерін қысымға тексеру жұмыстарына кірісіп кетеді. Жалпы Қызылорда қаласы бойынша 199,5 шақырым жылу желісі бар. Олар магистральдық жылу құбырлары, кварталаралық жылу құбырлары деп аталады. Бүгінгі таңда жылу жүйелерінің тозу көрсеткіші 45,1 пайызды құрап отыр.– Бұл қалалық жылу жүйесінің жартысы істемейді деген сөз бе?– Жоқ, олай емес. Мысалы, бір құбырдың не қондырғының жұмыс атқаратын бекітілген мерзімі болады. Жылу құбыры жиырма бес жылға жарамды болса, ол отыз жылдан бері ауыстырылмаған. Бірақ әлі жұмыс істеп тұр. Мұндай құбырлар жылу мауысымы кезінде жарылып кетуі мүмкін, соған қарамастан оларды пайдаланып келеміз. Қаланың жылу беру жұмыстары қашаннан да әкімдіктің бақылауында тұрады. Сондықтан алдағы кезеңде оларды жаңалау, ауыстыру жұмыстары қолға алынатыны анық. Жалпы қала бойынша орталықтандырылған жылу жүйесіне 1621 нысан қосылған. Олардың ішінде 808 көпқабатты, 262 жеке тұрғын үй, 24 оқу орны, 50 мектеп, 24 балабақша, 28 денсаулық сақтау, 308 шаруашылық нысаны, басқа да мекемелер бар.– Әдетте, жылу мен жарықтың төлемақысы мәселе туындатып жататын. Бұл жайын қалай шешіп отырсыздар?– Алып отырған қызмет төлеміне әр мекеме, әр адамның жауапты болуы керек. Кейбір азаматтарда осы жауапкершіліктің төмен екені өкінішті. Мысалы, сіз моншаға барсаңыз, ақы төлейсіз, ал, монша жылумен жұмыс істейді, демек, ол жылу ақысын төлеуі тиіс. Осы қарапайым қағиданы түсіну қиын емес. Қаладағы 808 көпқабатты тұрғын үйдің 389-на жылу есептегіш құралы орнатылған, 274-мен нақты есеп айырысады. 551 бюджеттік мекеменің 384-іне жылу есептегіш құралы орнатылған. Биылғы жылдың өзінде біздің мекемеден қызмет алған тұрғындар мен мекемелердің 238 млн теңге қарызы бар. Бұл жағдай жұмыс ырғағының бұзылуына әкеліп соғады. Осыған орай үздіксіз түсіндірме жұмыстарымен айналысамыз, рейдтік шаралар өткіземіз. Өйткені, қыстың көзі қырауда жылусыз қалудың зардабы ауыр. Сондықтан көпқабатты үйлер жылудан ажыратылмағанымен, кейбір мекемелер мен жер үйлерді жылу көзінен ажыратуға тура келеді. Бірақ бір ай мерзімге дейін негізгі төлемге үстеме жүрмейді. &nbsp; &nbsp;– Мекеме жұмысына толығырақ сипаттама беріп өтсеңіз…– «Қызылорда жылу-электр орталығы» МКК қала халқын жылумен және электр жарығымен қамтамасыз етеді. Бұл міндетті 2 үлкен бу қазандығы, 25 Мвт турбогенератор, 45 Мвт газтрубиналық станса, оған қоса «Оңтүстік» бу қазандығы және 20 шағын қазандық атқарады. Қызылорда қаласы сағатына 73 Мвт электр қуатын пайдаланады. Біздің мекеме 40 Мвт өндіреді. Қалған қуатты басқа қалалардағы стансалардан аламыз. Электр қуаты газ, яғни, «Ақшабұлақ» пен «Бейнеудің» сұйық отыны арқылы өндіріледі, бұрын көмір жағатынбыз. Қазір бұл жұмыс оңтайландырылды. Мекемеде 300-ге жуық адам бар. Оларды күнделікті жұмысқа алып келетін, алып қайтатын арнайы тасымал көлігі қызмет көрсетеді. Жұмыс ауысым арқылы тоқтаусыз жүретіндіктен, мекеме базасында асхана жұмыс істейді. Жұмысшылар елу пайыз жеңілдікпен тамақтанады. Кәсіподақ арқылы демалыс орындарына да елу пайыз жеңілдікпен бара алады. Жалпы, қызметкерлер мен жұмысшылардың әлеуметтік жағдайына жете мән беріледі.– Қызылорда қаласында жаңа жылу-электр орталығының салынып жатқанынан хабардармыз. Осы жөнінде де сөз қозғап кетсек. Бұл кәсіпорын іске қосылғанда «Қызылорда жылу-электр орталығы» немен айналысады?– Мемлекет басшысының еліміздегі жылуэлектр орталықтарының жұмысын жандандыру тапсырмасына сәйкес, облыстың 85 жылдығы қарсаңында аймақ басшысы Н.Нәлібаев жаңа жылу-электр ораталығының іргетасын қалауға қол жеткізді. Бұл Қызылорда халқы үшін ең үлкен жаңалық болып отыр. Қазіргі қолданыстағы жылу-электр орталығы 1964 жылы салынған. Қанша рет жөндеуден өтсе де, жылу қондырғылары мен құбырларының тозғаны да, қажетті қуатты өндіре алмайтыны да анық. Қуаттылық кернеуі 240 мегаватқа жететін жаңа жылу-электр орталығы шетелдік инвесторлардың 215 млрд теңге қаржысына салынып жатыр. Олар өз қаражатының қайтарымын он бес жыл көлемінде алады. Ең бастысы, стратегиялық нысан өз меншігімізде қалады. 2025 жылы пайдалануға берілетін ЖЭО облысымыздың электр қуатына қажеттілігін толық өтейді және артық қуатты өзге өңірлерге сатуға мүмкіндік береді. &nbsp; Жаңа орталық жылу мен электр қуатын өндіріп, оны біздің мекеме арқылы таратады. Себебі, жылу құбырлары мен шағын электр стансалары біздің мекемеге қарайды. Біраз маман жұмысшыларымыздың жаңа орынға ауысуы мүмкін. Өйткені, жаңа орталықта екі жүз адамға жұмыс орны ашылады. Жаңа орталық ескі орталықты ысырып тастайды деген ой болмауы керек. Біз де бұрынғыша жұмысымызбен айналыса береміз.– Өзіңіз айтқандай, тоқтамайтын тірліктің қамында келесі маусымның жұмысы басталып кеткен шығар. Енді 2024-2025 жылдағы жылу маусымының дайындығы туралы дерек бере кетсеңіз…– Қазақ «Қыс шанаңды жаз сайла» деп бекер айтқан ба? Дайындық бүгін басталмаса, ертең де келіп қалады. Алдағы жылдың жылу беру маусымына дайындық жұмыстарын уақытылы жүргізіп және аяқтау мақсатында барлығы 5235,58 млн теңге жоспарланып отыр. Соның 566 млн теңгесі кәсіпорын қаражаты есебінен шығады. Бюджеттік несие есебінен «Жылу энергетикалық жабдықтарды қайта құру және дамыту» бағдарламасы бойынша құрал-жабдықтарды сатып алуға қаржы-экономикалық негіздеме ұсынылды. Алты жоба бойынша 9,5 шақырым жылу желілерін қайта жаңғыртуға бюджет есебінен 6874,2 млн теңге бөлініп, мердігер мекемелер анықталды. Сонымен қатар, қаладағы ЖТ-13-тен ЖТ-15А-ға дейін магистральді жылу желілерін, «Оңтүстік» қазандықтан КЦ-1-ге дейін магистральдық жылу желілерін, қала көшесіндегі тұрғын үйлерге баратын орамаралық жылу желілерін жаңғырту жұмыстары қолға алынбақ. Атқарылатын жұмыстың тізімін соза беруге болады. Ең бастысы, сол міндеттерді сапалы орындауға күш саламыз. &nbsp;– Әңгімеңізге рахмет. Жұмыстарыңызға сәттілік тілейміз. &nbsp;

Наурыз Сатханов: Жылу мен жарықты өндіру мен тарату да тарқатылмаған түйін көп

&nbsp;<a href="https://kyzylorda-news.kz/">Kyzylorda-news.kz</a>&nbsp; Мемлекет басшысының тапсырмасымен 8 сәуір мен 11 мамыр аралығында еліміз бойынша «Таза Қазақстан» республикалық экологиялық акциясы өтуде. Бес аптаға созылатын игі бастамада «Таза өлке», «Киелі мекен», «Жасыл аймақ», «Өнегелі ұрпақ» және «Мөлдір бұлақ» сынды арнайы тақырыптар пен нақты мақсаттар бекітілген.«Киелі мекен» апталығы көпшілікті тарихи-мәдени ескерткіштердің аумағына тазалық жұмыстарын жүргізуге үндейді. Экологиялық акция аясында «Анаға тағзым» орталығының қызметкерлері облыс орталығындағы Жалаңтөс Баһадүр және Мұхтар Әуезов ескерткіштерінің аумағын абаттандырды. Қоршаған ортаға қамқорлық жасап, өскелең ұрпаққа өнегелі істі насихаттауға бағытталған шараға облыс әкімі жанындағы әйелдер істері және отбасылық демографиялық саясат жөніндегі комиссия мүшелері және еңбек ардагерлері қатысты.Шара аясында ұлттық құндылықтарымыз насихатталып, орталық қызметкерлері мен «ДАМУ LIFT» жобасы қатысушылары бастас ойнап, садақ атудан өзара бақ сынасты. Орталық жанынан құрылған «Мирас» әжелер клубының мүшелері ауылдың алты ауызын айтып, көпшілікке мерекелік көңіл күй сыйлады. Сенбілік соңында қатысушылар «Береке» аспаздық студиясы ұсынған ұлттық дәмнен ауыз тиді.<img src="https://knadmin.beoblood.kz/uploads/dd59590c_e54c_4812_98d7_4a107b7298d7_6b1ed5a5bb.jpg" alt="dd59590c-e54c-4812-98d7-4a107b7298d7.jpg">

«Анаға тағзым» орталығының қызметкерлері ескерткіштердің аумағын абаттандырды

<a href="https://kyzylorda-news.kz/">Kyzylorda-news.kz</a> 2024 жылы 16 сәуір күні Жалағаш аудан орталығында 20 мектептің әкімшілігі мен,психологтары, әлеуметтік педагогтар, тәлімгерлер барлығы 110 адам бас қосып, әдістемелік оқытуларға қатысты.&nbsp;«Біртұтас тәрбие» бағдарлама аясында Жалағаш ұстаздары «Менің бауырым» жобасының маңыздылығына тоқталып, мектептегі қауіпсіз , қолайлы ортаның әрі қарай дамуына бағыт -бағдарды анықтады; бала тәрбиесіне кім - қаншалықты әсер етеді , ата-аналарға ағарту жұмыстарын жүргізу жәйлы, әртүрлі форматта өтетін тәрбие жұмысына ерекше тоқталдық.&nbsp;Өзекті мәселе - қазіргі мектепте, отбасыда кейбір балалардың жәбірлеуіне, келеңсіз жағдайларға тап болуына қатысты әртүрлі әдістемелік тәсілдерді, әрі әрекеттердің уақытында тиимді жолдары қарастырылды.Ата-аналарға педагогикалық қолдау ретінде Балалардың әл аухатын арттыру “Өркен” ұлттық ғылыми -практикалық институтының әзірленген әдістемелік туындылармен таныстырып, цифрлы платформадағы дайын көмекші ресурстардын пайдалануы көрсетілді. Сонымен қатар әр мектептің ата аналарын оқу-тәрбие үрдісіне белсенді қатысқанын, тиімділігін, балаларының тәрбиесіне тікелей жауапты болуына, отбасыдағы тәлім тәрбие беруге білімдерін - тәжірибелерін жетілдіріп, сомдаған іс шараларын байқадық! Әрине, бұл өте пайдалы, мағынасы үлкен жұмыс!&nbsp;Сыр елінің азаматтары әр балаға бауыр,дос,жанашыр болып, адамгершілік қасиеттерді , рухани құндылықтарымен қалыптасуына жол ашары сөзсіз.

Жалағаш ауданында «Менің бауырым» еріктілер жобасы іске қосылуда

&nbsp;<a href="https://kyzylorda-news.kz/">Kyzylorda-news.kz</a>&nbsp; Жалағаш ауданына қарасты Жаңадария ауылы бақша дақылдарын егуге &nbsp;өте қолайлы, топырағы құнарлы, аяқсу жолдары жүйелі. Әсіресе, қауын-қарбыз табиғи ауа райымен, яғни, &nbsp;жаздайғы күннің ыстығымен ерекше пісіп-жетіледі.Айталық, 2016 жылы KX «AGRIKO» шаруа қожалығы алғаш рет осында қауын егіп, жоғары сапалы өнім алған. Сол жылы Жаңадария қауыны ел асып, Ресейге экспортталған еді. Бүгінде осы шаруашылық Жаңадария ауылының аумағындағы «Атжайған» деп аталатын учаскеде 12 гектар қарбыз егуде. Бұған қосымша қауын егуді де жоспарлап отыр.Жоба жетекшілерінің айтуынша, бұл қарбыздың сорты бөлек, егу жұмысы да бұрынғыдан өзгеше. Мысалы, арнайы техниканың көмегімен қарбыз тұқымы жерге біркелкі себіліп, артынша пленкамен жабылады. Бақшалық суды аса көп қажет етпейді, өйткені пленка ылғалды сақтайды. Бұл – америкалық «GLOBAL» компаниясының тасымалдауға тиімді, яғни, экспортқа шығаратын қарбыз сорты.Жаңадария ауылының әкімі Рауан Ақпанбетовтың сөзінше, KX «AGRIKO» шаруа қожалығының жетекшісі Иса Арман &nbsp;ауылда қолға алынып жатқан өзге де бастамаларға қаржылай қолдау танытып келеді.Айта кетейік, аудан орталығынан шалғай жатқан Жаңадария ауылы кешегі кеңестік кезеңде қой совхозы болды. Қызылқұмның қойнауында отар-отар қой өріп, берекесі шалқып жататын. Ауыл шаруашылығының бекіткен межесі бойынша қой түлігінен ет өндірумен қатар, жүн, тері өндірісі де өз алдына қарқынды болатын.Біле білсек, тіршіліктің түп-тамыры ауылда жатыр. Бүгінде жаңадариялықтар да «жұмыс жоқ» дегенді желеу етпей, егінін егіп, малын бағып, өз-өздерін қажетті азық-түлікпен қамтамасыз етуге дағдыланған. Фото: nz1.ru

Жалағашта қарбыздың жаңа сорты егіліп жатыр

&nbsp;<a href="https://kyzylorda-news.kz/">Kyzylorda-news.kz.</a> Аудан орталығынан шалғайда орналасқан елді мекен Бесарық ауылындағы №147 орта мектепке арналады. 76 жылдық тарихы бар мектептің тыныс-тіршілігі мен жетістіктері жайында мектеп директоры Ғалым Муталовпен сұхбаттасқан болатынбыз.– Ғалым Төлешұлы, «Өткенсіз – тарих жоқ, бүгінсіз – болашақ жоқ» деген тәмсілді жақсы білесіз. Дәстүрлі сұрақтан бастасақ, мектептің тарихы, қалануы мен қалыптасу жылдары туралы айта кетсеңіз?– Иә, ауыл тарихында өзіндік орны бар мектеп – 1948 жылы «Казрис» мектебінің Бесарықтағы бөлімшесі бас­тауыш мектеп болып Балжан сайында Досбол кепесінде ашылғанын ел біледі. Бір жыл өткен соң 1949 жылы 3 класстық мектеп үйі, 1952 жылы Жамбыл колхозының орталығынан жеті жылдық мектеп болған еді. 1967 жылы 10 жылдық білім беретін мектепке айналып, халық игілігіне жарады. 1998 жылы ауылдағы балабақша ғимараты қайта жабдықталып мектеп үйіне берілді. Ел есінде болар 2007 жылы 360 орындық типтік жобадағы жаңа ғимарат салынып, ел-жұрттың қуанышында шек болмады. Еңселі қос қабатты ғимаратта ауыл балалары білім мен тәрбие алып келеді.Мектептің тарихында 11-інші мектеп директоры болып ұжымды 2016 жылдан бері басқарып келе жатқан жайым бар. Сексен жылға жуық уақыт ішінде оқушыларға Ұлы Отан соғысының ардагерлері, Қазақ ССР-іне еңбегі сіңген мұғалім, КСРО және Қазақ ССР халық ағарту ісінің озық қызметкері, ҚР білім беру ісінің үздігі болған ұстаз ардагерлері білім беріп, тағылымды тәрбиені бойларына сінірді. Біздің мектептен түлеп ұшқан түлектер Нұрайым Ибрагимова – математика ғылымының кандидаты, Зарина Бисенбаева – медицина ғылымының кандидаты, Әсия Нұржанова – филиология ғылымының кандидаты, Светлана Насырова – медицина ғылымының кандидаты атағын иеленгенін мақтана айта аламыз. Бұл кісілер ауылымыздың, ұстаздардың мақтанышы.– Мектептің бүгінгі тыныс-тіршілігі мен педагогтардың құра­мы туралы тарқатып айт­саңыз?– Қазіргі таңда мектепте барлығы 517 оқушы және даярлық сыныпта 52 бала бар. Бастауыш сыныпта 204 оқушы, жоғарғы сыныпта 57 оқушы 28 сынып комплектісінде оқитынын айта кетейін. Оқушылардың үлгерім сапасына келетін болсақ оқу озаты – 102. 1-4 сыныптың оқушылары және әлеуметтік аз қамтылған отбасынан шыққан 108 бала бір мезгіл ыстық тамақпен қамтылғаны жасырын емес.Мектеп кітапханасында – 23101 кітап қоры бар, көркем әдебиет – 4568, оқушылар оқулықпен толық қамтамасыз етілген. Арнаулы медицина құралымен жабдықталған 2 бөлме бар, онда 2 медбике қызмет етеді.Спорт залы, акт залы, мультимедия, информатика кабинеттері интерактивті тақтамен жабдықталған. Ардагер-ұстаз, Ұлы Отан соғысы ардагеріне арналған математика кабинеті, мультимедия, биология, химия, физика оқу сыныптары пәндік оқу бағдарламасы бойынша жаңа технологиямен жабдықталып, практикалық оқу жүйелі жүргізілуде. Ер балалар шеберханасы станоктармен, ән-әуез сыныбы фортепиано және қазақ ұлттық музыкалық аспаптармен қамтамасыз етілді.Мектепте жалпы 86 мұғалім жұмысм жасайды. Педагог-зерттеуші – 14, педагог-сарапшы – 37, педагог-модератор – 16. Ұжымда тәжірибесі толысқан мұға­лімдермен қатар, жас ұстаздар білім беріп келеді. 9 пән бірлестігі құрылған. Пәндік апталықтар, семинарлар өткізу, мұғалімдердің тәжірибе алмасуы дәс­түрге айналды.– Пән олимпиадаларына қатысу деңгейі мен көрсеткіштеріне, білім сапасына, жетістіктерге тоқтал­саңыз?– Жалпы білім беретін пәндер бо­йынша республикалық олимпиадалар кезеңін өткізу ережесіне сәйкес дарынды баланы анықтау мақсатында оқушылар 11 пән бойынша олимпиада резерві құрылған. Оқушылар Қамбашқа және аудандық «Жарқын болашақ» дайындық жұмыстарына да қатысуда. Нәтижелері көңіл қуантады. Осы оқу жылында 9-11 сыныптар бойынша аудандық кезеңнен 1 оқушы ІІ орын, 3 оқушы ІІІ орын алса, биыл ауыл мектептерінде жалпы білім беретін пәндер бойынша 9-11 сыныптар арасында олимпиада бірінші рет өткізілгенін білесіздер. Облыстан 3 оқушымыз ІІ орын, 1 оқушымыз ІІІ орын алып келді. 2-4 сыныптар бойынша «Бастау» математика олимпиадасынан аудандық кезеңнен оқушымыз ІІІ орын, ал 5-6 сыныптар арасындағы ауданнан 4 оқушымыз жүлдегер атанды. Екі оқушымыз облысқа шығып, жүлделі ІІІ орынды иеленді. 7-8 сыныптар арасынан аудандық кезеңнен 5 оқушымыз жүлдемен оралса, облысқа 3 оқушымыз шығып отыр. Олардан күтер үмітіміз зор.Биыл 23 оқушы 11 сыныпты бітіреді. Үш оқушымыз «Алтын белгіге», бір оқушымыз «Үздік аттестатқа» үміткер. Оқушылар ақылы қаңтар және наурыз ҰБТ-ға қатысып, орташа балл 75 пайызды құрады. «Юстади», «Тестцентр», «Қазбілім» секілді орталықтарынан сынама тесттер алынып келеді.8-11 сынып оқушылары арасында «Дарын» ғылыми жобасының аудандық байқауында әдебиет секциясы бойынша Талшын Сейтбек І орын, облыстан ІІ орын алды. Ағылшын тілі секциясы бойынша 9 сынып оқушысы Лаура Есіркеп ІІІ орын иеленді. 2-7 сынып оқушыларының зерттеу жұмыстары мен шығармашылық жобаларының аудандық «Зерде» конкурсына 6 жұмыс қатысып, 6 сынып оқушысы Айзере Тайырбек ІІІ орынмен, 4 сынып оқушысы Жазира Аманжолова ІІ орынмен марапатталған болатын .– Білім негізі бастауышта қаланады. Бастауыш сынып мұға­лімдерінің ұшан-теңіз ең­бегін атап өту – ұстаздарға көр­сетілген құрмет.– Әрине, бастауыш сынып мұғалімдері жас балалардың тілін таба білетін, олардың жұмысын ұйымдастыра алатын, өзіне қатал талап қоя білетін, ата-аналармен ынтымақтастықта еңбек еткендіктен олар құрметке лайық. Ұстаздық қызметтің қиындығы мен қызығы мол. Себебі ол бір ғана баланы тәрбиелемейді. Оқытады, біліммен сусындатып, өмірге жолдама береді. Біздің мұғалімдеріміз оқушыларға сабақ берумен қатар, осы оқу жылында әртүрлі шығармашылық байқауларға қатысуда. Атап айтқанда, «Алтын тұғыр» бастауыш сынып педагогтарының математикалық олимпиадасында III дәрежелі дип­ломмен Ақнұр Балабатырова марапатталды. Қазақстан Республикасы «Bilim-orkenieti» ұлттық инновациялық ғылыми-зерттеу орталығы ұйым­дастырған республикалық байқауына қатысып, «Қазақстанның Құрметті педагогы» төсбелгісімен Сәрсенкүл Қайранбаева марапатталды. Об­лыстық білім басқармасының басшысы А.Есжановтан қоғамдық жұмысқа белсене араласқаны үшін «Құрмет грамотасымен» Алтынай Қойшыбаева марапатталды. «Зерде» ғылыми жоба қорғау байқауында, «Бастау» математикалық олимпиадасында, «Бала дарын» балалар шығармашылығын дамыту орта­лығының ұйымдастыруымен М.Мақатаев өлеңдерін мәнерлеп оқудан республикалық байқауында бастауыш сынып оқушылары үздіктер қатарынан көріне білді. Бастауыш сынып мұғалімдерінің нәтижелі еңбегінің арқасында, еңбектері еленіп жетістіктерге жетіп келеді.– Мектептің тәрбие саласы бойын­ша атқарылған жұмыстарға тоқталсаңыз?– 2023-2024 оқу жылында мектеп оқушыларының ұлттық құндылықтарды бойына сіңірген еңбекқор, адал, саналы, жасампаз азаматты тәрбиелеуге ықпал жасау мақсатында «Біртұтас тәрбие кешені» бағдарламасы аясында «Ұлттық мүдде, Ар-ұят, Талап» ұлттық құндылықтары негізінде жұмыстар жоспарланып жүргізілуде. «Әділетті Қазақстан – Адал азамат» Ұлттық құрылтайындағы Президенттің бала тәрбиесі қоғам болып жұмылуды қажет етеді деген ұсынымымен мектепте қоғамдық ұйымдармен әлеуметтік серіктестік орнатылып, тәрбиелік жұмыстар жүргізілуде. Аталар мектебі, Әжелер мектебі, Жеңгелер мектебі, Ата-аналар комитетінің жұмыстары, «Тоғыз айға – тоғыз жоба», «Төрт тоқсанға – төрт өнер», «Жеткіншектің жеті жарғысы», «Еңбегі адал жас өрен» жобалары жүргізілуде. Ұлттық мұраны қастерлеу, еңбекке баулу, құндылықтарды дарыту міндеттері жүзеге асырылуда. «Оқуға құштар мектеп» жобасы бойынша мектебіміз тірек мектебі болып бекітіліп, балалар кітапханасында берілген тізім бойынша шығармаларды талдау, сахналау жұмыстары басты мақсатымызға айналды. «Мектеп театры» жобасы, «Қабілет» дебат клубының жұмысы қоғамның өзекті мәселелерін көтеруге мүмкіндік бергені жақсы.Мұнан басқа «Мектеп парламенті», «Адал ұрпақ» ерікті мектеп клубы, «Жас ұлан» ұйымы жас ұрпақтың бойында рухани-адамгершілікті қалыптастыру, балалар мен жасөспірімдердің азаматтық белсенділігі мен саналығын арттыруға ықпал етуде. Сонымен қатар «Ата-аналарды педагогикалық қолдау орталығы» құрылған. Педагогикалық қолдау 1-11 сынып оқушыларының ата аналарына арналған бағдарламаларды таңдауына сәйкес жүзеге асыру ұсынылды. Бағдарлама бойынша жылына сегіз сабақты қамту мақсат етілген болатын.– Сұхбатыңызға рақмет!

Бесарықтағы білім ошағында 517 оқушы тәрбиеленуде

<a href="https://kyzylorda-news.kz/">Kyzylorda-news.kz</a> Кеше Шиелі аудандық мәслихаттың мәжіліс залында Қазақстан Республикасы Парламенті Сенатының депутаттығына үміткер Н.Байқадамов, А.Есмаханов, А.Жүнісовпен кездесу жиыны өтті.Жиынға Шиелі аудандық мәслихат депутаттары, аудандық ардагерлер кеңесінің төрағасы Өркен Исмаил, аудандық әйелдер кеңесінің төрайымы Найла Палымбет, аудандық қоғамдық кеңес төрағасы Қабілеш Бекішов пен БАҚ өкілдері қатысты. Кездесуді аудандық мәслихат төрағасы Айтбай Жандарбеков жүргізіп, кандидаттардың өмірбаянымен таныстырды.&nbsp;Парламент Сенаты депутаттығына кандидаттар өздерінің сайлауалды бағдарламаларын оқып, айтылған ұсыныс-пікірлерге жауап берді. Парламент Сенаты депутаттығына кандидаттар елдің экономикасы мен экологиясынын жақсарту бойынша қабылданатын заң жобаларын әзірлеуге айрықша көңіл бөлетінін жеткізді. Кездесу барысында кандидаттарға мәслихат депутаты Қ.Қасымов заңдарды қоғамға тиімді етіп қабылдау жолында жанжақты зерделеуді назарға алу керек екенін жеткізсе, аудандық қоғамдық кеңес төрағасы Қ.Бекішов қазақ тілінің мәртебесін көтеру бағытындағы заңнамаларды күшейту қажеттігін айтты.&nbsp;Кездесу соңында үлкен жауапкершілік пен елдің үмітін арқалағалы тұрған азаматтарға құрметті сот ардагері Т.Баймағамбетов ақ батасын беріп, алдағы сайлауға сәттілік тіледі. Айта кетейік, Қазақстан Республикасы Парламенті Сенатының сайлауы алдағы 25 сәуір күні өтетін болады.

Сенат сайлауы: Азаматтарға артылар жүк ауыр

<a href="https://kyzylorda-news.kz/">Kyzylorda-news.kz.</a> Сырдария &nbsp;ауданында&nbsp;жаппай кәсіпкерлікті дамыту бағытында&nbsp;бірқатар &nbsp;жұмыстар &nbsp;атқарылды. Өткен жылдың қорытысындысы бойынша 2856 шағын және орта кәсіпкерлік субъектілері тіркелді. Оның &nbsp;ішінде жұмыс жасап тұрған кәсіпкерлік субъектілерінің саны 2765 болып, тіркелгендерге үлесі 96,9 пайызды құрады.Ауданда шағын және орта бизнесте жұмыспен қамтылғандар саны 5091 адамды құрап, 2022 жылы – 4911 адам, 2022 жылдың тиісті кезеңімен салыстырғанда 103,6 пайызды құрады. Оның ішінде заңды тұлғаларда – 875 адам, жеке кәсіпкерлікте –1786 адам, шаруа қожалықтарда – 2430 адам.Шағын және орта кәсіпкерлік субъектілерімен 16,5 млрд.теңгенің өнімі шығарылды, 2022 жылы – 11,2 млрд.теңге, яғни 2022 жылдың тиісті кезеңімен салыстырғанда 147,3 пайызды құрады.Облыстық көрсеткіштегі аудандар арасында жұмыс жасап тұрған кәсіпкерлердің үлесі бойынша Сырдария ауданы 4 орында тұр. Бірінші Жаңақорған – 106,4 пайыз, екінші Шиелі – 104,8 пайыз, үшінші Жалағаш – 98,1 пайыз.Жұмыс жасап тұрған кәсіпкерлердің үлесін көтеру мақсатында талдау жұмыстары жүрігізілген. Талдау нәтижесімен статистика органдарында жұмыс жасамай тұрған 86 кәсіпкерлік субьектілерінің тізімі жасалған.Осыған орай бірінші кезекте аудан көрсеткіші 96,9 пайыздан төмен Қалжан ахун, Н.Ілиясов, Іңкәрдария, Бесарық, Жетікөл, ауылдары статистика органдарымен есептесіп, жұмыстарын жүргізу қажет.Жалпы 2023 жылы Сырдария ауданында мемлекеттік және өңірлік бағдарламалар аясында құны 4,9 млрд. теңгені құрайтын 454 жобаға қаржылай қолдау көрсетілді. Оның ішінде, құны 2,3 млрд. теңгенің 237 жобасы несие болса, құны 203,5 млн. теңгенің 145 жобасы грант қаражаты.Бағдарламаларға келетін болсақ, «Микробизнес-Қызылорда» бағдарламасы аясында құны 159,5 млн. теңгенің 17 жобасы кеңестің оң шешімін алып, қаржыландырылды.«Бизнестің жол картасы – 2025» бағдарламасы бойынша құны 568 млн.теңгенің 23 жобасы екінші деңгейлі банкттер тарапынан субсидияланса, құны 359 млн.теңгенің 12 жобасы ішінара кепілдендірілген.Осы бағдарламаның 5 млн. теңгеге дейінгі қайтарымсыз грант конкурсына қатысып, Н.Ілиясов ауылынан құны 5 млн. теңгенің 1 жобасы жеңімпаз атанды. «Бахила өндіру» жобасы.Сонымен қатар, «Ұлттық жоба» щеңберінде жаңа &nbsp;бизнес &nbsp;идеяларды іске асыру мақсатында 1&nbsp;380 000 теңгеден 144 адамға 198,4 млн.теңге көлемінде мемлекеттік қайтарымсыз грант берілді.«ҚазАгроҚаржы» АҚ-ның Қызылорда филиалы арқылы құны 2436 млн. теңгеге 71 ауылшаруашылық техникалары мен құрал-жабдықтары алынды.«Аграрлық несие корпорациясы» АҚ-ы арқылы құны 606,2 млн.теңгенің 72 жобасы қаржыландырылды.Сондай-ақ, «Ауыл аманаты» бағдарламасы аясында құны 3 млрд.теңгені құрайтын 489 жобаның құжаттары жинақталды.Осы бағдарлама бойынша кент және ауыл округтерден барлығы – 1460,4 млн. теңгеге 193 жоба, оның ішінде 322 млн. теңгеге&nbsp;13 &nbsp;АӨК-нің жобалары &nbsp;«Байқоныр» ӘКК АҚ-на ұсынылды.Қазіргі таңда «Ауыл аманаты» бағдарламасы бойынша несие комитетінің шешіміне сәйкесқұны 234,7 млн теңгенің 23 жобасы қаржыландырылды.Биылғы жылы ауданымызға құны 428,7 млн. теңгенің қаражаты қарастырылуда. Қазіргі уақытта кент және ауылдық округі әкімдерінен 2,6 млрд. теңгенің 445 жобасы жинақталуда.2023 жылдағы несиелендіру бойынша төменгі көрсеткіш С.Сейфуллин ауылына тиесілі. Яғни ауылшаруашылық техникаларын алған жобаларды қоспағанда 2023 жылы С.Сейфуллин ауылында 3 жоба ғана несиелендірілген.Сондай-ақ, айта кету керек несиелендіру бағытында жоғары көрсеткіштер көрсеткен Тереңөзек кенті 51 жоба, Бесарық ауылы 42 жоба, Ақжарма ауылы 24 жоба, Қоғалыкөл, Н.Ілиясов, Шіркейлі ауылдары 19 жоба және Шаған ауылы 16 жобадан қаржыландырылған. Қалған ауылдар орта деңгейде. Іңкәрдария – 8 жоба, Жетікөл – 5 жоба, Қалжан ахун – 5 жоба, Аманкелді &nbsp;– 9 жоба, А.Тоқмағанбетов – 6 жоба, Айдарлы – 11 жоба.Аудандық кәсіпкерлік, өнеркәсіп және туризм бөлімі 2024 жылы несиелендірілуге ұсынылатын жобалардың тізімін жасақтап, кент және ауылдық округтердің ұсынысы бойынша құны 3780,2 млн. теңгені құрайтын 583 жобаның тізімі жасалды.Осы жобалардың ішінде қаңтар айында «Өңірлік инвестициялық орталығы» арқылы «Іскер» бағдарламасына 72,5 млн.теңгенің 12 жоба ұсынылып, құны 27,5 млн. теңгенің 7 жобасы кеңестің оң шешімін алды.Сонымен қатар, осы жылдың наурыз айында «Өңірлік инвестициялық орталығы» арқылы «Микробизнес-Қызылорда» бағдарламасына 70 млн. теңге қаражат біздің Сырдария ауданына қаралуда. Оның ішінде бір ескеретін жайт «Микробизнес-Қызылорда» бағдарламасы биылғы жылдан бастап мал шаруашылығы, жолаушылар, жүк тасымалдау және айналым қаражатын толықтыру бағытындағы жобаларды несиелендірмейді. Осыған орай өзге бағыттағы жобаларды ұсыну қажеттігі маңызды.Сондай ақ, ағымдағы жылы 5 млн.теңгеге дейін бизнес идеяларға мемлекеттік гранттар беру құралына өзгерістер енгізілді. Мемлекеттік гранттар беру конкурсына әлеуметтік кәсіпкерлік субъектілерінің тізіліміне енгізілген кәсіпкерлер мен «Бір ауыл – Бір өнім» бағдарламасының жеңімпаздары ғана қатыса алады.Осы мүмкіндікті кент және ауылдық округі әкімдері тиімді пайдаланып, тиісті түсіндіру жұмыстарын бастады.Бөлім басшысы Алмат Сәдуақасов:<blockquote>– Жұмыс жасап тұрған кәсіпкерлік субьектілерінің үлесін көтеру мақсатында кент және ауылдық округтер мемлекеттік кірістер, статистика органдарымен тиісті жұмыстар жүргізіп, жыл қорытындысымен жұмыс жасап тұрғандардың үлесін 97,0 пайыздан төмен болмауын қамтамасыз ету қажет. Сонымен қатар Мемлекеттік және өңірлік бағдарламалар арқылы &nbsp;кент және ауылдық округтерде қаржы ұйымдарынан 2024 жылдың бірінші жарты жылдығымен кем дегенде 5 жобадан қаржыландарылуын қамтамасыз ету жоспарланған. Қаржылай қолдау алған жобаларды насихаттау және мемлекеттік бағдарламалардың талаптарын халыққа кеңінен түсіндіру мақсатында кент және ауылдық округтер БАҚ-да, өздерінің әлеуметтік желілерінде жариялау жұмыстарын жүргізуде, – деді.&nbsp;</blockquote>

Сырдарияда 454 жобаға қаржылай қолдау көрсетілді

&nbsp;<a href="https://kyzylorda-news.kz/">Kyzylorda-news.kz.</a> &nbsp;Сырдария ауданында қоғамдық саяси-ахуал тұрақты. Қашанда жергілікті халық тұрақтылықты сақтауға өз үлестерін қосуда. Өз кезегінде сан салаға бөлінген аудандық қоғамдық даму бөліміні тарапынан атқаралған іс-шараларды, жобаларды тізбектеп көпшілікке жеткізуге мақсат еттік.Мемлекеттік рәміздерді насихаттау және құрметті қалыптастыру мақсатында бұқаралық ақпарат құралдарында 43 материал және әлеуметтік желілер арқылы 72 пост жарияланды. Аудан көлемінде 5 сыртқы көрнекі ақпарат құралдары орнатылды (билборд). Бірнеше жылдан бері мемлекеттік рәміздер бір орталықтан қаржыландырып, аудандық қоғамдық даму бөлімі арқылы таратылады. Аудан көлеміндегі мемлекеттік мекемелердегі рәміздердің жай-күйі күнделікті қатаң бақылауға алынған. Сонымен қатар, ауданда мемлекеттік рәміздердің жай-күйін бақылау монитринг тобының тоқсан сайын 2 рет зерделеу жұмыстары жүргізілді. Есепті кезеңде 24 рет зерделеу жұмыстары жүргізілді. Анықталған кемшіліктер дер кезінде жойылды.&nbsp; &nbsp; &nbsp; &nbsp; 2023 жылы Сырдария ауданы бойынша қоғамдық-саяси маңызды шаралардың күнтізбелік жоспарына сәйкес 103 шара енгізілді. Ұлттық мерекелер мен мемлекеттік мерекелер, кәсіби және өзге де мерекелер бойынша – 41 шара, негізгі өткізілетін шаралар – 28, мерейтойлық шаралар – 24, еске алу шаралары – 10 шара енгізілді. Жоспарға енгізілген шаралар кең көлемде аталып өтті.Көрнекі үгіт-насихат құралдары аясында аудан бойынша 168 дана (96 тұғыр) көрнекі үгіт-насихат құралдары орналасқан. Кент бойынша көрнекі үгіт насихат құралдарының саны - 59 дана (31 тұғыр: 1 беттік - 4 дана, 2 беттік - 26 дана, 3 беттік - 1 дана). Елді мекендер бойынша көрнекі үгіт насихат құралдарының саны - 109 дана (65 тұғыр: 1 беттік - 21 дана, 2 беттік - 44 дана).&nbsp; &nbsp; &nbsp; &nbsp; 2023 жылы Сырдария ауданы бойынша 14-35 жас аралығындағы 11727 жас бар. Сырдария ауданы халқының 30 пайызын жастар құрайды.Жұмыспен қамту мәселесі бойынша 805 азамат тіркелсе, оның ішінде 231 жас тұрақты жұмысқа, 8 жас әлеуметтік жұмысқа, 141 жас жастар практикасымен,116 жас қоғамдық жұмысқа орналасқан.&nbsp; &nbsp; &nbsp; &nbsp; &nbsp;«Сырдария аудандық жастар ресурстық орталығы» коммуналдық мекемесінің жұмысын үйлестіруге жергілікті бюджеттен 21 599,0 мың теңге қаржы бөлінсе, қоғамдық даму бөлімінің «Жастарға патриоттық тәрбие беру және жастар арасында ұлттық құндылықтарды насихаттау әлеуметтік қызметін ұйымдастыру» мемлекеттік әлеуметтік тапсырысы аясында (бөлінгені-3 445,0 мың теңге, келісім шарт 2 741,3 мың теңге) қаржы бөлінді. Әлеуметтік жоба аясында 9 шара (форум-2, фестиваль-1, спорттық сайыс – 3, кездесу – 2, Жайдарман ойыны – 1) ұйымдастырылып, оған 270 адам қамтылды.&nbsp; &nbsp; &nbsp; &nbsp; Сырдария ауданында мемлекеттік жастар саясатын жүзеге асыру бойынша ұйымдастырылатын іс-шаралар жоспары аудан әкімімен бекітіліп, бүгінгі күнге жалпы 83 шара ұйымдастырылып, оған 4274 жас қамтылды.NEET санатындағы жастарды өзектендіру мақсатында&nbsp;отбасылық цифрлық картасы іске қосылып, аудан бойынша NEET санатындағы 245 жастың (тұрақты жұмыспен қамтылған – 10, бейресми жалдамалы жұмысшы –35, &nbsp; тіркелмеген жұмыссыздар – 1, &nbsp;үй шаруасында – 18, 35 жасқа толған жастар – 53, өзге мемлекетке кеткендер – 3, қайтыс болғандар – 1) тізімі анықталып, 72,65 пайызды құрап отыр.Сырдария ауданы бойынша 22 азамат пробациялық бақылауға алынған (Айдарлы а/о-1, Аманкелді а/о-3, Бесарық а/о-1, Қоғалыкөл а/о-4, Н.Ілиясов а/о-1, Ақжарма а/о-1, Шаған а/о-2, Тереңөзек кенті-8 жас). Аудандық пробация қызметі және аудандық жастар ресурстық орталығымен меморандум жасалып, шартты түрде сотталғандар мен бақылаудан бөлек, бас бостандығынан айырылғандарға әлеуметтік-құқықтық көмек көрсету мақсатында әр айдың 5 күні кездесу ұйымдастырылып, түсіндірме жұмыстары жүргізілді.Республикада танылып жүрген жобалардың бірі бұл жастар еңбек бригадасы жобасы. Аудан әкімінің қолдауымен 6 ауылдық округте (Айдарлы, Аманкелді, Бесарық, Жетікөл, Шіркейлі, А.Тоқмағанбетов) жастар бригадалары құрылып, 60 гектар жерге картоп және бау-бақша өнімдері егіліп, бригада қатарында 150 жас жұмыссыз жастар қамтылды.&nbsp; &nbsp; &nbsp; &nbsp; &nbsp; Сырдария ауданы бойынша шағын және орта бизнес саласында 678 жас кәсіпкер (жалпы тіркелген ШОК субъектілерінің саны-3196). Жастардың үлесі жалпы тіркелген бизнес субъектілерінің 21,2 пайызын құрап отыр.&nbsp; &nbsp; &nbsp; &nbsp; &nbsp; 2021-2025 жылдарға арналған кәсіпкерлікті дамыту жөніндегі ұлттық жобасы шеңберінде мемлекеттік гранттар беру мақсатында 1 380,0 мың теңгеден 23 жас кәсіпкерге 31,7 млн.теңге көлемінде мемлекеттік қайтарымсыз грант берілсе, «Аграрлық несие коорпорациясы» арқылы жастарды қолдау мақсатында жеңілдетілген 2,5 пайызбен несиеге 91 жас кәсіпкер 407,7 млн теңге, «Ауыл аманаты» бағдарламасы бойынша 5 жас кәсіпкер 27,6 млн.теңге, «Микорбизнес-Қызылорда» бағдарламасы бойынша 6 жас &nbsp;41,5 млн теңге, «Аграрлық несие коорпорациясы» арқылы «Агробизнес» бағдарламасы бойынша 2 жоба 28,5 млн теңге және «Іскер» бағдарламасы бойынша 5 жоба 23,5 млн.теңге, «Ауыл аманаты» жобасы аясында 3 жас 10,1 млн теңгеге қаржыландырылған болатын.

Сырдарияда қоғамдық саяси-ахуал тұрақты

<a href="https://kyzylorda-news.kz/">Kyzylorda-news.kz</a> «Қазақстан студенттерінің Альянсы» республикалық студенттер қозғалысының Қызылорда облыстық филиалы мен Болашақ университетінің жоғары колледжі арасында ынтымақтастық туралы меморандумға қол қойылды.&nbsp;Меморандумның мақсаты -білім беру сапасын қамтамасыз ету саласында ашықтық, айқындық және объективтілік деңгейін арттыру, ағартушылық және ақпараттық жұмыстарды күшейту, студенттердің шығармашылық қабілеттерін шыңдау, бәсекеге қабілеттілігін арттыру және қоғаммен тығыз байланыс орнатуына ықпал ету.&nbsp;Болашақ университетінің жоғары колледжі директоры Еңсепов Асқар Алиұлы студенттерге әрқашан қолдау білдіріп, ұсыныс пікірлерін тыңдайтынын жеткізді. Тараптар алдағы уақытта білім беру сапасын қамтамасыз ету саласында ашықтық деңгейін арттырып, Қызылорда студенттері Альянсының бағыттары бойынша өзара желілік іс-қимылды ұйымдастырады.&nbsp;Меморандум аясында алдағы уақытта екі жақты нәтижелі жұмыстар атқарылады.«Қазақстан студенттерінің Альянсы» – ҚР Ғылым және жоғары білім министрлігінің жанынан құрылған республикалық студенттер қозғалысы. Ұйым жастардың құқықтық мәселелерін шешуге, зияткерлік, шығармашылық, инновациялық дағдыларын дамыту мақсатында жұмыс істейді.<blockquote>«Белсенді жастардың бір алаңда тоғысуының нәтижесінде интеллектуалдық, зияткерлік, мәдени көпшілік шаралар, акциялар мен дебат байқаулары ұйымдастырылып, құқық бұзушылықтың алдын алу мақсатында әкімшілік жанынан құрылған жедел топпен, ювеналды полиция қызметкерлерімен бірге түнгі рейдтер және әртүрлі бағыттағы түсіндірме жұмыстары жүргізілуде. Қазақстан студенттері Альянсының әр өңірде филиалы бар. Апта сайын өңірлік әріптестермен, басшылықпен жиналыс өтеді. Онлайн кездесу барысында әр өңірдегі өзекті жобаларды талқылап, нәтижесін сараптаймыз. Әр аймақтың өзіндік үздік жобалары да болады. Көп жағдайда бір тақырыптағы іс-шараларды барлық аумақта бір мезетте жасауға тырысамыз. Сол кезде жастардың назарын аудартып, қызығушылығын оята аламыз деп ойлаймын. Бастысы, біз санға емес, сапаға мән береміз.Ұйым мүшелерінің саяси бағытқа қызығушылығы жоғары, өзіндік көзқарастары қалыптасқан. Қайырымдылық жұмыстарымен тұрақты айналысады. Қызылорда студенттерінің Альянсы республика бойынша жетекші ұйымның бірі. 2023 жылы еліміз бойынша «Үздік штаб» номинациясын иеленді. Бұл біз үшін үлкен жетістік. Әрі үлкен жігер сыйлаған марапат. Мұнымен тоқтап қалмаймыз, әрі қарай өз жұмысымызды жоғары деңгейде жүргізуге тырысамыз», -деді «Қазақстан студенттерінің Альянсы» республикалық студенттер қозғалысының Қызылорда облыстық филиалының төрағасы Расул Базарханұлы.</blockquote>Бүгінде облыстық штабқа қарасты 4 бөлімше бар. Атап айтқанда, Қорқыт ата атындағы Қызылорда университеті, М.Мәметова атындағы Қызылорда педагогикалық жоғары колледжі, Қызылорда медициналық жоғары колледжі және Болашақ универсиетінің жоғары колледжі. Оқу орындарында құрылған бөлімшелерде 160-қа жуық студент мүше ретінде тіркелген.

Қазақстан және Қызылорда облысының жаңалықтары