<a href="https://kyzylorda-news.kz/">Kyzylorda-news.kz.</a> Мал бағып, нәпақасын төрт түліктен тауып жүрген ауылдағы ағайынның бейнетін бәріміз білеміз. Ала жаздай дала төсінде тер төгіп, малдың жем-шөбін шашпайтөкпей жинап алып, ауру-сырқауының алдын алу, күн сайын қора-қопсысын тазалап, жайылып жүріп өрістеп кеткенін сандалып соңынан іздеу де бір ақырет. Малсақ адамның жыл он екі ай көретіні – осы. Ол ол ма, төрт түлікті төрт аяқты түз тағысынан қору былай тұрсын, екі аяқты барымташының залалы мен зардабы жанға батады.«Малым – жанымның, жаным – арымның садақасы» деп отырған берекелі елдің берекесін қашырып, жылқысын үйірімен үйіріп әкететін осы әккілер. Әрине, біз айла-тәсілдерін біле бермеспіз. «Сайда саны, құмда ізі қалмай, ұшты-қилы жоғалып кетіп жатқан ұрлық малдар мен ұстатпай жүрген ұрылар шынында қайда жүр?» деген сұраққа Жаңақорған аудандық сотының судьясы Эльдар Рысқұлов брифинг барысында жауап берді. Оның айтуынша, соңғы жылдары мал ұрлығы үлкен мәселеге айналған. Мәселен осы ағымдағы жылы аудандық соттың іс жүргізуінде сотталушы С есімді азаматқа қатысты Қазақстан Республикасы ҚКнің 188-1-бабы 3-бөлігі 1) тармағымен қылмыстық іс қаралды.<blockquote>«Сотта және іс құжаттарында анықталғандай, сотталушы 2021 жылдың 20 желтоқсанында Жаңақорған ауданы, Түгіскен ауылында тұратын танысы Н есімді азаматтың үйіне қарыз ақшасын сұрау үшін келген. Алайда барымташы берешегі бар азаматтың ақшасы жоқ екенін біліп, ауыл маңындағы жайылымда жүрген малдарды зерделей бастайды. Кешкі сағат 20.00 шамасында ауылдан 5-6 шақырым қашықтықта орналасқан жайылымда жүрген мал ішінен жәбірленуші А есімді ауыл тұрғынына тиесілі бір өгізшені көреді. Оны өзі мініп барған мініс атымен қуалап жүріп ұстап, арнайылап алып барған арқанды өгізшенің мойнына байлап, жетектейді. Солай қарызы бар азамат Н-ның үйіне алып келіп, өгізшені Түркістан қаласындағы мал базарға сатып беруін сұрап, өзі үйіне қайтып кеткен», – деп істің негізін түсіндірді.</blockquote>Ұры бұл әрекетін жалғастырып, 2023 жылдың 21 қаңтарында кешкі сағат 22:00 шамасында танысының үйіне қайтадан қарыз ақшасын сұрауға келген. Аталған азаматта ақшаның жоқ екенін білген соң, осы күні ауылдың күн батыс жақ бетіндегі жайылымдық жерге барып, топтасып жайылып жүрген жылқылардың ішінен жәбірленушіге тиесілі 1 жасар тайын арқандайды. Уақыт оздырмай танысы Н-ның үйіне алып келіп, соңғыдан Түркістан қаласындағы мал базарына сатып беруін сұрап, тайды сол үйде қалдырып, өзі жол жүреді. Осының салдарынан жәбірленушіге 250 000 теңге мүліктік шығын келген.<blockquote>«Сотталушының мал ұрлығын, яғни бөтеннің малын бірнеше рет жасырын жымқырғаны, сотталушының пиғылы мен іс-әрекетінде оған тағылған айыптағы қылмыстың құрамының нақты болғаны, сотталушының өзінің айыбын мойындауымен қатар, оқиға орнын қараптексеру хаттамасымен, іс бойынша жәбірленушілердің жауаптарымен, куәлердің іске тіркелген жауаптарымен, беттестіру хаттамаларымен және іс бойынша зерттелген құжаттармен дәлелін тапты. Аудандық соттың үкімімен сотталушы ҚР ҚК-нің 188-1-бабы 3-бөлігі 1) тармағымен кінәлі деп танылып, 5 жыл мерзімге бас бостандығынан айыру жазасы тағайындалды», – деді судья.</blockquote>«Қазақтың бір міні – мал ұрлығы». Өкінішке қарай, Абай атамыз айтқан осы бір міннен әлі де арыла алмай келеміз. Иә, «көш – жүре түзеледі» дейміз. Бірақ, еріншектік пен енжарлық, пиғыл мен пейілдің түзелетін түрі жоқ. Оңай олжаға кенелудің жолын іздеген барымташылықты кәсіп етіп алған. Оған да құрық салатын кез келер, тек бейқамдықты бәсеңдету керекпіз. Құқық қорғау саласы қызметкерлерінің сөзінде жан бар, өйткені көпшілік төрт түлігі қолды болғаннан біршама уақыттан кейін хабар береді. Осының салдарынан қылмысты ашу ұзақ уақытты алатыны айтпаса да түсінікті. Сондықтан ең брінші өз-өзімізге сақ болғанымыз жөн…Ауыл тұрғындарының табыс көзі қолдарындағы азын-шоғын малы. Өнімін пайдаланып, ауысқанын сатып, сонымен тірлік етіп отырғандары жасырын емес. Маңдай термен бағып отырған малы оңай олжаға құныққандардың қолында кетіп жататыны өкінішті. Мұндай келеңсіз жәйт біздің ауданды да теріс айналып өтпеген. Жыл сайын қайталанып келеді.&nbsp;«Малым – жанымның, жаным – арымның садақасы» деп отырған ауылдағы ағайынның берекесін қашырып, қорадағы немесе жайылымдағы малына құрық салатын «екіаяқты» әккілердің айла-тәсіліне не деуге болады? Сайда саны, құмда ізі қалмай, ұшты-қилы жоғалып кетіп жатқан ұрлық малдар мен ұстатпай жүрген ұрылар шынында қайда жүр?. Оларды ұстап тиісті жазасын беруге кім немесе нендей жағдай кедергі. Міне осы тектес сауалдардың жауабын білу үшін аудандық полиция бөлімінің жедел уәкілі полиция аға лейтенанты Мәткәрім Құрбанға жолыққан едік.Оның айтуынша, соңғы жылдары мал ұрлығы үлкен мәселеге айналған. Мәселен, қолдағы мәліметтерге сүйенсек, биылғы жылдың қорытындысы бойынша жыл басынан бері 16 мал ұрлығы тіркеліп оның 8-і ашылған. Ал былтырғы жылы 14 малұрлығы орын алып, оның 11-і ашылған екен. Бұл пайыздық тұрғыдан өткен жылмен есептегенде қылмыс санының артуын, сәйкесінше, екі аяқты қасқырлардың ізін суытпай ұсталуы да тергеу жұмыстарының жемісті нәтижесі арқасында орын алып жатқанын айта кеткен жөн. Десе де бұл жерде «көп жүрген жыланның аяғы көрінеді» демекші, мұндай жағдайда ұрының ұзаққа баруы екіталай.Жауапты маманның бізге берген мәліметінше, жыл басынан бері мал ұрлаумен айналысатын 3 қылмыстық топ құрықталған. Олар шамамен 10-нан аса сиыр-жылқыны жымқырған. Ішінде саудалап үлгергені де бар.Арыздар мен шағымдардың көрсеткішіне сәйкес, биылғы жылы жұмыс нәтижелі болып, малдың иелеріне қайтарылған фактісі де тіркелген.Жан-жақты зерттеу барысында малдың қолды болуына өзіміз де себепкер болатын сияқтымыз. Қазір нағыз науқанның уақыты. Жаз бойы жылқыны сауын үшін ұстаймыз да, осы сәтте еркіне жібереміз. Қысқа жем-шөп, отынсу қамдаудың өзі мал түгендеуге мойын бұрғыза қоймайды. Қол байлайды. «Мына төбенің тұсында жүрген шығар» деп, өзімізді өзіміз сендіреміз де, жағамыз жайлауда жүреді. Сол орыннан табылмай, үйге келмесе сабылып 2-3 күн іздеп уақытты жоғалтамыз. Содан құқық қорғау органдарына шағымданамыз. Осы уақыт аралығында ұры да ізін суытып үлгереді.Біраз уақыт бұрын мынадай бір оқиғаны құлағым шалып қалғаным бар. Осыдан он шақты жыл бұрын бірнеше ауданның жылқыларын үйір-үйірімен айдап, ізін суытып жүрген қылмыстық топ пайда болған. Қанша жылдан бері қолға түсіре алмаған. Ойлағандарын жүзеге асырған соң, ізім-қайым жоқ болатын көрінеді.Сол топ кезекті қылмыстық істеріне кіріскен. Үйір жылқыны жайылымынан ұзатып алып шығып, жүк көлігіне тиеп жатқан сәтте бір байтал ұрылардың ырқына көнбей, зытып шыққан. Артынан мотоцикл мен аттылы адамдар қанша қуса да жануар жеткізбепті. Содан үйірінен айырылған жануар жүріп өткен жолымен жобалап отырып, үйіне жетіпті. Осылайша үй иесі жануардың ізін барлаған күйі талайды қан қақсатқан ұрылардың үстінен түскен екен. Не десек те, Абай атамыз «қазақтың міні – мал ұрлығы» деп өз заманында дөп басып айтса да, өкінішке орай, қылмыстың бұл түрі азаяр емес.Расымен қазір мал тұрмақ, үйдегі иттің де төлқұжаты бар. Құжатсыз қимылдай алмайсыз. Саудалайтын тауарыңыздың құжаты болмаса құны да төмен. Ал, ұрлықы малды қалай саудалайды деген сұрақ баршамызды ойландырады. Оның құжаты қайда? Мемлекеттік базаға тіркелген бе? Егер, сойып сатар болса, оның анықтама құжаты қайсы? Мал сою бекетінде басылған мөрі қайда? Бұл мәселелер заң жүзінде бекітілгенімен қазақшылыққа, таныс-тамырлыққа салынып, мән бермейтініміз жасырын емес. Осы тақырып аясында да қылмыстық істерді мысал ете кетейік. Кент тұрғыны Б. есімді ақсақалдың өткен жылдың желтоқсанында екі бас жылқысы жоғалған. Ауылдан ұзап кете қоймайтынын біліп, қолды болғанын сезеді де, тиісті органдарға шағымданады. Содан 4 ай ізіне түскен екен. Тергеушілер Қызылорда, Шымкентті шарлайды. Ақыры Жетісай қаласының маңындағы мал бордақылайтын цехтан табылады. Анығында, терісі табылған. «Ш» деген таңбадан аңғарады. Көп ұзамай күдіктілер де қолға түседі. Сөйтсе, ұры алыстан келмепті, ауылының азаматтары екен. Арнайы «ГАЗель» көлігін жалдап, тиеп жіберген. Оны оңтүстіктің сауданың қазанында қайнаған саудагер жігіттері арзан бағаға сатып алған көрінеді.Қысқасы бұл қылмыстың белең алуына алыпсатарлар жол ашып беріп тұр. Ал, «сойылып сатылған күннің өзінде анықтама құжатын қажет етпей ме?» дегенге келсек, бұған бей-жай қарамау алдымен мына сіз бен бізден бастау алуы тиіс.Аталмыш қылмыспен күресудегі тағы бір күрделі мәселе, қылмыскерлерді қолға түсіруде шұғыл-іздестіру шаралары ұйымдастырылып, оған полицияның бірқатар күш-құрылымдары жұмсалып, қылмыс енді ашылды дегенде, жәбірленушілер арыздарын қайтып алып немесе келтірілген шығын жөнінде алдыңғы жауаптарын өзгертіп, бүкіл тергеу жұмысын жоққа шығаратын жағдай тіркелетінін естіп жүрміз.<blockquote>«Мұндай мәселе бізде әзірге тіркелген жоқ. Жалпы қылмысты жасайтын да, ашатын да халық. Ұры анықталған соң, кешірімге барады. Шөбімізді өртеп, өзімізге қастандық жасар деген үреймен қаймығады. Ал, бір дәндеп алған ұры бір жыл тыныш жүрер, одан кейін әдетіне қайта басады. Ол жазадан құтылу үшін шыққан шығынның, жалдаған адвокаттарының қаржысын қайта өндіру үшін байырғы әдетіне көшеді. Сондықтан біздер мүмкіндігінше қылмыстың өтеуі жаза екенін ұғындыруда жұмыс істеуге міндеттіміз» – дейді Құрбан Серікұлы.</blockquote>«Сақтансаң – сақтаймын деген». Бүгінгі таңда қолданыстағы «чиптің» көмегі мол дейді мамандар. Бағасы түрлеріне қарай – 70, 80 мың теңге. Үйіріңіздегі айғырдың немесе бас білетін жылқының мойнына трекер арқылы орнату қажет. Сосын ұялы телефоныңызға қосымшасын жүктеп, картаның көмегімен қайда жүргенінен хабардар болып отырасыз. Көбісі, қымбатсынып, мақұл көрмейді. Десек те, біраз шаруа қожалығының иелері игіліктеріне жаратуда. Құрылғы арқылы мал ұрлаған қылмыскерлерді ұстау оңайға соғады», – дейді мамандар.Ұры айтып келмейтіні белгілі. Сондықтан мына заманда қораңызға құлып салғанды әдетке айналдырған жөн. «Ел ішіндеміз ғой» деген жалған сенімнен арылған абзал.Қорытындылайық. Дәл соғым уақытында сан соғатындар саны қаншама. Жалпы бізде ғана емес, еліміздің барлық өңірлерінде науқанның нақ өзі қазір. Қылмыстық кодекстің 188-1-бабы мал ұрлау, яғни бөтеннің малын жасырын жымқыру заңы бойынша қылмыскерді 5 жылға дейін бас бостандығынан айыру көзделген. Қылмыстың өтеуі – жаза. Ендеше жаза қатаңдап, қылмыскер саны азайса игі еді…

Жаңақорғанда мал ұрлығы назардан тыс емес

<a href="https://kyzylorda-news.kz/">Kyzylorda-news.kz.</a> Сыр брендіне айналған Жаңақорған қарбыздарының алғашқы легі экспортқа жөнелтілді. Көштің басын Ақүйік ауылдық округінің диқандары бастап, жайылмалық шаруалар да қарбыз артуды бастады. Арғысы Ресей, бергісі Түркістан, тіпті Елорда төріне дейін жол тартатын өнімнің жайы қалай? Биыл сұраныс артты ма? Жалпы дала еңбеккерлерінің тыныс-тіршілігін білу үшін егіс даласына жол тарттық.Алдымен Бірлік диқандарынан бастайық. Биыл ақүйіктік ағайын 100 гектар алқапты игеруде.&nbsp;<blockquote>«30 гектар қарбыз егілді. Одан бөлек, 15 гектар қауын, 17 гектар асқабақ, 3 гектар картоп, 35 гектар жүгері дәнін тастадық. Биыл өнім жоғары. Қарбыздың әр гектарынан 70 тоннадан өнім беруде. Әзірге Ресей еліне, оның ішінде Краснодар, Қазан қаласына экспортталуда. Камаз иелері көбіне тәжік, түрік ағайындары. Кенттегі нарыққа бір аптаның көлемінде шығаратын боламыз. Айналдырған 3-4 күннің ішінде 10 гектар қарбыз артылды. Ал қауын 3-4 күнде піседі», – деді ауыл әкімі.</blockquote>– Биыл агроаймақта қанша шаруашылық еңбек етуде?– Жалпы 26 тұрғын биыл егін шаруасына дем беруде. Оның ішінде жеке шаруашылықтар мен ауыл тұрғындары да бар. Мақсат – ауылдағы тұрмысы төмен отбасыларды жұмыспен қамту, маусымдық жұмыс арқылы әлеуметтік әлеуетін арттыру. Қазір қосымша 20 тұрғын қосымша жұмысқа тартылуда. Ауыл әкімі «Есен ата» шаруа қожалығының төрағасы Нұрғали Оңалбаевқа жөн сілтеді. «Биыл өнім жақсы, 30 теңгеден алып кетуде. Бұйырса аудан орталығына да сатылымға шығарамыз, әзірге көрші елдерден сұраныс өте жоғары. Маусымдық жұмыс болғаннан соң, өнімге барша күтіммен қарадық. Көшеттеп отырғызғандықтан ертелеу жинадық» – деді шаруашылық төрағасы.Ауыл шаруашылығы ел экономикасының маңызды драйвері. Халықты азық-түлікпен қамтамасыз етіп, әл-ауқатын көтеруде егіннің алар орны бөлек. Әсіресе, қазіргі карантин жағдайында жергілікті өнімге сұраныс жоғары, өйткені сапасы сын көтереді, бағасы да арзан. 2018 жылы Жаңақорған кенті, Ақүйік, Сүттіқұдық, Төменарық, Қаратөбе және Қандөз ауылдық округінде агро аймақ ашылған болатын. Берілген жерлер қоршалып, аяқ су жеткізілді. Құрылған агро аймақтардан еңбекке ынталылар қарекет жасап, маусымдық жұмыстан өз үлесін алуға еңбектенді. Нәтижесінде, тұрғындар еңбегіне қарай өнімін көрді. Берілген мүмкіндікті ұтымды пайдаланған ақүйіктік ағайынның тындырымды тірлігі осындай.Ауылшаруашылығы бөлімінің мәліметінше, кенттегі қарбыз жақында экспортталады. Ал Сыр өңірінің брендіне айналған Жайылманың қарбызы көліктерге артылуда.<blockquote>«Биыл 450 гектар егілген қарбыздың 45 гектары көшеттеп отырғызылды, бүгінгі күнге дейін 30 гектары жиналды. Әр гектарынан 300 центнердан, яғни мың тоннаға жуық қарбыз жиналды. Орташа баға – 28-30 теңгеден. Әзірге Қостанай қаласына 700 тоннасы жөнетілсе, қалған 300 тоннасы Ресей еліне аттанды. Биыл қарбыз жылдағыдай жоғары өнім беруде. Сұраныс та жақсы», – деді.</blockquote>Иә, Жайылма қарбызы елдің түкпір-түкпіріндегі нарықты жаулауға қауқарлы. Тіпті көрші өңірдің диқандары ірі мегаполистерге өз өнімдерін «Жайылманың қарбызы» деп сататынын жиі естиміз. Мұның сыры – ауылдағы ағайынның «бір ауыл – бір кәсіп» қағидатына сүйеніп, қарбыз кластерін дамытуға ниет танытып отырғанынан.Ауылда еңбекке жарамдының барлығы егін алқабынан табылады. Таңның атысы, күннің батысы қарбызды егуден бастап, арамшөптен тазалау, суару, содан кейін шірітіп алмай жинап, сатқанға дейін тайлы-таяғына дейін дамыл таппайды.Осы тұста, өткен жылы Жайылманың бренді болған бақша өнімдері де шетел асты. Жалпы, аудан бойынша 4854 тонна бақша өнімі экспортталса, оның 4754-і жайылмалық диқандардың дәмді қауын-қарбызы. Яғни, брендті бақша өніміне шетел нарқында сұраныстың мол екенін байқатады. Жақында ғана, жаңалықтардан Мақтаарал ауданының қарбызы Ресей нарқына жол тартты деген ақпаратты естідік. Содан күннің жексенбі екеніне қарамастан Жайылма ауылы диқандарының биылғы бет алысын білмекке ауылдық округ әкіміне хабарластық.Ә дегеннен әрбір шаруа қожалықтың еккен дақылы мен гектарын және ауылдағы ауыл шаруашылығы бағытында атқарылып жатқан жұмыстарды жіктеп берді. Өзге әріптестері секілді мәліметті «электрондық поштаға» жіберемін деп бас маманына сілтемей, дер кезінде қажетті ақпаратты өзі айтып берді. Әкімнің сөзінен белгілі болғандай, биыл «Бектас» ш/қ 40 га, «Жиделі» ш/қ 45 га, «Шоқымазар» ш/қ 34 га, «Мырзатай» ш/қ 28 га, «Өтеш» ш/қ 26 га, «Береке и О» ш/қ 22 га, «Асхат» ш/қ 21 га, «Диқанбаба» ш/қ 11 гектар аумаққа дәнді дақыл еккен. Оның ішінде, ауылдық округ бойынша 28 гектар аумаққа қарбыз көшеті отырғызылып, бүгінде түйнектеу алдында екен.<blockquote>«Жайылма ауылы қашанда бақша және көкөніс өнімдерімен танымал. Жылдан жылға бақша дақылдарын ерте пісірудің әдісін дамытып, көшеттеп егу тәсілін қолға алғалы жақсы нәтиже беруде. Десе де, биыл қауын дәні жерге себілмеді. Өйткені, платинада жиналған су тек 90 күндік қарбызды пісіруге жетеді. Ал, қауын ары қарай мерзімі созылатындықтан су жетпей қалу ықтималдығын ескеріп, басымдықты қарбызға бердік. Оған қоса, су үнемдеу мақсатында 83 гектар ескі жоңышқаны бір суаруға іліндіріп, қазіргі таңда бірінші орымды жинап жатырмыз» – деді ауыл әкімі.</blockquote>Сондай-ақ әкім ауыл шаруашылығы өнімдерін әртараптандыру бағытында нәтижелі жұмыс жасап жатқандығын жеткізді. Шаруа қожалықтарында мал азықтарын дамыту үшін 30 га дәндік жүгері және жеке шаруашылықтар 25 га, көкөніс 30 га картоп еккені белгілі болды. Оған қоса, мемлекеттің қолдауын сезініп, демеу қаржыға ие болған қожалық иелерін атады.– Мемлекет басшысы биылғы Жолдауында жергілікті жерлерде шағын және орта кәсіпкерлікті дамытып, тұрғындарды жұмыспен қамтуға баса назар аударуға пәрмен берген болатын. Бұл бағытта кәсіпке ынтасы бар азаматтарға мемлекет тарапынан толыққанды қолдау көрсетілуде. Осы тұста, «Ауыл шаруашылығын қаржылай қолдау қоры» АҚ Қызылорда облыстық филиалы жайылмалық тұрғындармен тығыз қарым-қатынас орнатып, кәсіптерінің бастау алуына ұйытқы болуда. Биылдың өзінде аталмыш қолдау қорынан 11 кәсіпкер 6 пайыздық несиелік мөлшермен 20 миллион қаржы алып, бақша өнімдерін егуді бастап кетті – деген ауыл әкімі елдімекенде кәсіпкерлер саны да күн санап артып келе жатқанын тілге тиек етті. Жайылма ауылдық округі бойынша бүгінде 33 кәсіпкер заң жүзінде салық органдарына тіркеліп, кәсібін өрге дөңгелетуде. Оның 11-і әлгінде айтқан бақша өнімдерін егумен айналысса, қалғаны түрлі салалық бағытта бизнесін жүргізуде екен. Қолдау қорынан бөлек, жақында ғана ауыл тұрғыны Кенбаев Самат «Өңірлік қаржы орталығы» арқылы 2 млн 200 мың теңгеге қол жеткізіп, мал бордақылау бағытында атакәсіпті бастап кетіпті. Оған қоса, осы қаржы орталығы арқылы құрама жем цехын ашқан Мұхтар Оспанов биыл алғаш рет «Сенім» шаруа қожалығына тиесілі 10 га аумаққа жүгері еккен. Цехқа қажетті шикізатты жинап алғаннан кейін, ауданды жеммен қамтамасыз етуге бел буып отыр.<blockquote>«Қазіргі таңда «қимылдағанның қыр асатынын» елдің бәрі біледі. Жастайымнан осы егіншілік кәсіпке бейім болып, несібемді осы саладан таптым. Десе де, тұтынушы саны артқан сайын, кәсібімді кеңейту басты мақсат болатын. Содан мемлекет қамқорлығын сезінбек ниетте «Өңірлік қаржы орталығы» арқылы қомақты несиеге қол жеткіздім. Шүкір, қазір дамудың даңғыл жолына түсіп, шағын цехтың шырайы кіре бастады», – дейді Мұхтар Оспанов.</blockquote>Иә, мемлекет отандық өндірушілерге қолдау көрсетіп, бизнес үшін қолайлы жағдай жасады. Енді жаһандық нарыққа шығатын, бәсекеге қабілетті өнім шығару – барша шаруалар мен диқандардың іскерлігін шыңдай түседі. Шетел нарқын бағындыруда жайылмалық диқандардың да өзіндік орны айрықша.Анығын айтқанда, көктем басталысымен баладан бастап, еңкейген қарияға дейін қарбыз науқанына үлесін қосып, ала-жаздайғы еңбектің сәтті аяқталуына тілекші болады. Шыққан күнмен таласа ауыл сыртындағы алқапқа асығатын елдің жаз бойғы еңбегі де, тіршілігі де осы. Енді бұл қатарға Ақүйік пен жаңақорғандықтар да қосылды. Ең бастысы, жерге еткен еңбек жерде қалмайды.

Жаңақорғанның қарбызы экспортқа шықты

<a href="https://kyzylorda-news.kz/">Kyzylorda-news.kz.</a> 23 маусым – Полиция күні мерекесі, 24 маусым – Судья және сот қызметкерлері күні мерекесі аясында аудан әкімі Берік Сәрменбаев аудандық сот қызметкерлері мен тәртіп сақшыларын құттықтады. Аудан әкімдігінің мәжіліс залында өткен қабылдауға сала басшылары, ардагерлер және қызметкерлері қатысты.&nbsp;<blockquote>– 23 маусым – Полиция күні мерекесімен шын жүректен құттықтаймын! Бұл күн &nbsp;қазақстандық полицияны құрған ардагерлер мен оның қатарында еңбек ететін қызметкерлердің еңбектерін бағалап, алғысқа бөлеп, ел тыныштығы мен қауіпсіздігі жолында тынымсыз еңбек етіп жүрген тәртіп сақшыларына құрмет көрсететін күн. Ауданымыздағы полиция қызметкерлері де тұрғындардың тыныштығы мен қауіпсіздігіне қызмет жасап, аянбай еңбек етуде. &nbsp;Қоғамдық тәртіпті сақтау бағытында да қырағылық танытып, нәтижелі қызмет атқарып келеді. Сондықтан ауданның тәртіп сақшыларына зор алғысымды білдіремін. Сонымен қатар, 2022 жылғы 31 наурызындағы Қазақстан Республикасы Үкіметінің қаулысына сәйкес 24 маусым күні Қазақстандағы мерекелік күндердің тізбесі Судья және сот қызметкері күнімен толықтырылды. Сондықтан Құрметті Сот саласының қызметкерлері Сіздерді де кәсіби мерекелеріңізбен шын жүректен құттықтаймын! Әділ төрелік жасап, сот жүйесінің дамуы мен қалыптасуына қосқан зор үлестеріңіз үшін ризашылығымды &nbsp;білдіремін. Баршаңызды кәсіби мерекелеріңізбен құттықтай отырып, дендеріңізге саулық, отбасыларыңызға амандық, қызметте толағай табыс тілеймін! – деді аудан басшысы құттықтауында. Аталған іс-шарада сала қызметкерлері облыс және аудан әкімінің алғыс хаттарымен марапатталып,еңбегі еселенген сала ардагерлері мен ерен еңбегімен көзге түскен бірқатар полицейге төсбелгілер табыс етілді.</blockquote><blockquote>– Сырдария құқық қорғау саласының мамандарына жиі құрмет көрсетіліп тұрады. Кәсіби мереке қарсаңында сот саласы қызметкерлерінің мерейі тасыды десем қателеспеймін. Қазіргі уақытта сот саласы жаңғырып, кәсіби мамандарға жаңа міндеттер жүктелуде. Біз қашанда ашықтық қағиданы ұстанамыз. Біліктілігі жоғары мамандарды қызметке тартып, әділдік орнауына барлық жағдай жасаймыз. Мал ұрлығы секілді бірнеше қылмыстың орын алғандығын дәлелдеп, қылмыскерлерге тиісті жаза кесуге мүдделеміз. Өз кезегінде медиация, билер кеңесі секілді қызметтерді үнемі жетілдіріп отырамыз. Аудан тұрғындары сан түрлі арыз-шағыммен келеді. Негізінен, қос тарапты сотқа дейін жеткізбей бітістіру – маңызды рөл ойнайды. Кәсіби мереке қарсаңында біздің сала мамандарын ынталандыра білген аудан басшысына алғыс айтамыз, – аудандық сот төрағасы Руслан Алдамбергенов. &nbsp;&nbsp;</blockquote>Шын мәнінде, өткен жылдың 31 наурызынан бастап, &nbsp;Қазақстандағы мерекелік күндердің тізбесі судья және сот қызметкері күнімен толықтырылды, ол жыл сайын республикада 24 маусымда атап өтіледі. Өз кезегінде құқық қорғау саласының ардагері, аудандық Қоғамдық кеңес төрағасы Марат Еспенбетов сала мамандарын кәсіби мерекемен құттықтады.&nbsp;<blockquote>– Мен бірнеше жыл құқық қорғау саласында қызмет еттім. Біздің кезімізде жұмыс істеу тәсілі өзгеше болатын. Жанкештілікпен қоғам тынышытығын күзететін сала мамандары бар құрметке лайық. Қазіргі уақытта көптеген оқиғалар орын алуда. Тәртіп сақшылары қоғамдық тәртіпті орнату үшін кәсіби біліктіліктеріне сүйенеді. Қазіргі уақытта аудандық полиция бөлімі жас мамандармен толығуда. Сонымен бірге учаскелік полиция қызметіне біліктілігі жоғары мамандар тартылуда. Біз сала ардагері ретінде жас мамандармен байланыс орнатып тұрамыз. Сонымен бірге жақында құқық қорғау саласында қызмет еткен көптеген ардагерді еске алдық. Арнайы құрбандыққа мал шалып, олардың рухына Құран бағыштадық. Өздеріңізге белгілі, тәртіп сақшылары күні-түні ұйқы көрместен, қызметін қалтқысыз атқаруға күш-жігерін салады, – дейді сала ардагері.</blockquote>Расында, 23 маусым – Полиция күні мерекесі аясында құқық қорғау қызметіне бағынысты сан түрлі сала мамандары өздерінің жылы лебіздерін жеткізді.&nbsp;<blockquote>– Үнемі біз артылар міндеттің жүгі ауыр. Сала мамандары қылмескермен бетпе-бет келіп, күніне қаншама құқық бұзушылықты анықтайды. Полиция қызметкеріне қойылатын талап жоғары. Әрине, әрбір маманның отбасында ата-анасы, жұбайы, балалары күтіп отырады. Біз қашанда &nbsp;жергілікті халықтың тыныштығына жауап беріп, қоғам үшін адал қызмет еткіміз келеді, – деді Азамат Оспанов. &nbsp;&nbsp; &nbsp;</blockquote>

Сырдарияда құқық қорғау саласының мамандарына құрмет көрсетілді

<a href="https://kyzylorda-news.kz/">Kyzylorda-news.kz.</a>&nbsp; Адам өмірі мен оның денсаулығы бәрінен де маңызды. Балалардың қауіпсіздігі одан да көп жауапкершілікті талап етеді. Осы орайда Сырдария аудандық ауруханасының мамандары кент орталығында орналасқан балабақшаларға арнайы бас сұғып, балаларға медициналық тексеру жұмыстарын жүргізді. Білікті мамандар аудан орталығындағы «Бақ-нұр бөбек» және «Аяла» балабақшаларында болды. Балабақша тәрбиешілері медицина қызметкерлерімен бірлесе жұмыс жүргізіп, ұдайы кеңес алып отырады. Себебі балабақшаға келушілердің ауру-сырқау жұқтырып алмауы өте маңызды.<blockquote>– Кішкентай баланың иммунитеті қалыпты үлкен адамдарға қарағанда төмен болады. Сондықтан ауру жұқтыру қаупі басым. Әсіресе бір бала ауырып, оны басқалары да жұқтыруы қиын жағдай. Осындай жағдайдың алдын алу үшін денсаулық сақтау саласы мамандарымен ұдайы бірлесе жұмыс жасап, кеңес алып, балаларды медициналық тексеруден өткізіп отырамыз, – дейді балабақша қызметкерлері.</blockquote>Ал дәрігерлер балаларды профилактикалық медициналық тексеруден өткізудің маңызды екенін айтады.<blockquote>– Бұл ауруларды ерте сатыда анықтауға және аурулардың дамуын, қауіп факторларын, қосалқы аурулардың туындауын болдырмауға және балалар денсаулығын нығайтуға бағытталған тексерулер өз нәтижесін береді. Өз кезегінде балалардың денсаулығын басты назарда ұстау – маңызды рөл ойнайды. Біз қашанда балаларда кездесетін созылмалы дерттерді алдын алу керекпіз. Аудан бойынша орналасқан балабақша тәрбиеленушілерін тексеру барысында медбикелерге бірқатар ақыл-кеңестер айта білдік. Бұл ретте, бала деусаулығына бей-жай қарамау керектігін ата-аналарға ескертеміз. Уақытылы көптеген дерттерге арналған екпені қабылдау өз өзектілігін жоймайды. Қазіргі балаларды ішек инфекциясынан сақтауда күн тәртібінен түспейді. Жеміс-жидек пен көкеністі абайлап қолданған дұрыс. Себебі, өңірімізде балалар арасында жедел ішек инфекциясы анықталуда. Жалпы, денсаулық қадірін жіті түсіуіміз керек – дейді ақ халатты абзал жандар. &nbsp;</blockquote>

Сырдариялық дәрігерлер балалар денсаулығын жіті тексерді

<a href="https://kyzylorda-news.kz/">Kyzylorda-news.kz.</a> Жас буынның уақытты ұтымды пайдаланып, бос уақытын тиімді пайдалануда үйірмелердің алар орны ерекше. Әсіресе, ауыл жастарының белгілі-бір өнер түріне ынтасын аударып, олардың қандай өнерге неге икемді екенін де танып білу маңызды. Осы бағытта аудандан көптеген үйірме жұмыс жасап, оның біршамасы «Үздік» атанған.&nbsp;Жалпы, ауданда клуб жанынан құрылған 111 үйірме жұмыс жасайды. Оның 15-і кент орталығында болса, 96-сы елді-мекендердің клуб жанынан ашылған. Осы үйірмелерде 1126 бала өнердің әр бағытында тәрбиеленуде. Әсіресе, ән мен биден, сахналық көріністерден өнер көрсетіп, түрлі шыңдарды бағындырып жүргендері аз емес.Мәселен, Байкенже ауылдық клуб үйінің жанынан құрылған Құралай Әлиеваның жетекшілігіндегі «Ырғақ» ән үйірмесінің асқан асулары көп. Үйірмеде тәлім алатын алты оқушы халықаралық жарыстарға дейін барып, жүлделі оралған. Мәселен, үйірме оқушысы Сұлтанахмет Төлегенов облыстық «Бозторғай – 2022» байқауынан ІІІ-орын алса, Жәния Жанболатқызы Республикалық «Асыл мұра – 2022» ән-би байқауынан І-орынды қанжығасына байлаған. Сонымен қатар, «Ғұмырдария – 2021» халықаралық байқауынан С.Төлегенов пен Ескендір Ералы бас жүлдені, Нұрасыл Қансейіт ІІ-орынды иемденген. Сондай-ақ, Байкенже ауылында «Ырғақ» ән үйірмесімен қатар, «Дастан» домбыра үйірмесі мен «Бай өлке» әзіл-сықақ драма үйірмесі жұмыс жасайды.Жаңарық ауылдық клуб үйінің жанынан құрылған «Самғау» би үйірмесі үйірме 2010 жылдан бері жұмыс жасап келеді. Құрамында 16 бала бар. Жетекшісі Жадыра Ахметова. Үйірме оқушылары қатарынан облыстық «Бозторғай» сайысына қатысып жүлделі оралған. 2021 жылы VІ-Республикалық «Асыл мұра» ән-би байқауының «Би» жанрының І дәрежелі лауреаты атанған. Ал, 2023 жылы аудандық «Ең үздік би үйірмесі» сайысының І-орнын қанжығасына байлаған. Осы үйірмемен қатар, Жаңарықта «Үркер» домбыра үйірмесі мен «Вокал» ән үйірмесі жұмыс жасайды.&nbsp;Бесарық бекетіндегі клуб үйінде «Бауырсақ» қуыршақ үйірмесі 2016 жылдан бері қарай жұмыс жасап келеді. Үйірме шәкірттері өз кезегінде ауылдағы бала бақшаларды аралап, «Шалқан», «Қызыл телпек», «Алтын балық» ертегілерін сахналап жүр. Аптасына екі рет дәріс оқылатын үйірме құрамында бүгінде 10 дарынды бала тәлім алуда. Үйірме жетекшісі Роза Мәдиеваның тынымсыз еңбегінің арқасында үйірме ауданда үздік танылды. Олар ауданда ұйымдастырылған «Үздік драма үйірмесі – 2023» байқауынан І-орныды иемденген.Кейден ауылдық клуб үйі жанындағы директоры Балмұхамед Әбжаппаровтың ұйымдастырған «Күлеміз бе, қайтеміз?» драма үйірмесіне қосымша ауылдың дарынды балаларының басын қосқан, оқушылар арасынан көңілді тапқырлар клубы бүгінде көпке танымал. Құрамында 10 бала ойнайтын КТК тобы 2013 жылы құрылып, облыстық «Жас ұлан» балалар жайдаманынан ІІІ-орынды қанжығасына байлаған. Ауданнан 2023 жылы оқушылар арасындағы КТК ойындарынан І-орынды, 2022 жылы «Жазғы кубоктан» І-орынды, аймақтық «Жайдарман-2022» І-орынды жеңіп алған. Сонымен қатар құрамадағы оқушылар «Күлеміз бе, қайтеміз?» әзіл-сықақ отауының құрамында да өнер көрсетеді. Жаңарықта драма үйірмесімен қоса, «Көркем сөз» көркем сөз оқу үйірмесі, «Алтын дауыс» ән үйірмесі жұмыс жасайды.Қожакент ауылдық округінде клуб үйінің жанынан құрылған «Сырлы саз» домбыра үйірмесі де бірнеше жылдан бері жұмыс жасап келеді. Фархат Бакировтың жетекшілігіндегі үйірмеде 15 бала өнермен сусындауда. Үйірме аудандық «Жас таланттар» домбырашылар сайысынан І-орынды жеңіп алған. Сонымен қоса, Қармақшы ауданында өткен облыстық «Үздік домбыра үйірмешілері» сайысы мен аудандық Құрманғазы Сағырбайұлының 200 жылдығына арналған байқаудан жүлделі орын алды. Сонымен қатар, жасөспірімдердің қабілет-қарымын шыңдап, зейінін арттыру бүгінгі күннің өзекті мәселесі. Экононикасы дамыған озық елдің отыздығына енуді мақсат тұтқан еліміз жас өрендерді ерте жастан ғылымға, жаңа технологияға бейімдеуді үрдіске айналдыуда. Осы бағытты негізге алған аудандық оқушылар орталығында үйірме жұмыс істейді. Біз бүгін осы үйірме жетекшісі Дастан Қадыровты әңгімеге тарттық.– IT технопаркі бізде 2017 жылдан бастап робототехника үйірмесі жұмыс жасап келеді. Қазіргі заманауи жабдықтармен жабдықталған. Робототехника кабинеті LEGO mindstorms EV 3 жинақтарымен жабдықталған. Оның ішіндегі бөлшектер майда детальдары. Балалардың ойлау қабілетін, қолдын моторикасын дамытады. Бүгінде ауылдағы мектептерде де робототехника үйірмелері ашылуда. Бұрын қаланың білім ордаларында мұндай сабақтар жүргізілсе, енді ауыл балалары инновациялық игіліктерді меңгеруіне мүмкіндігі мол. IT технопаркінде 3 үйірме бар. Олар Smartlab, 3D әлемі, робототехника. Smartlab үйірмесінде балалар IT программалық тілдерді үйренеді. 3D әлемі 3 өлшемді сызба сызады. Жасаған сызба жұмыстарын 3D принтерімен шығарады.– Қазіргі таңда аудан орталығындағы мектептерден робототехника үйірмесіне 36 оқушы келіп дәріс алады. Шыны керек, күн өткен сайын балалардың қызығушылығы артып келеді. Техника құрастыру оңай емес. Оған уақыт, білім, күш-жігер қажет. Робототехника үйірмесінен қатысушылар математика, информатика, физика, ағылшын геометрия, пәніндегі формулалармен жан-жақты зерделі жұмыс істейді. Мәселен, олар математика пәнінен бір формула үйренсе үйірмеде сол формуланы пайдаланып тәжірибе жүзінде шындайды. Физикалық күш арқылы роботты, оның қимылын жасайды. Программалары көбіне ағылшын тілінде. Робот жасау арқылы балалардың ойлау қабілеті дамиды, теориялық ілімді тәжірибе жүзінде жүзеге асырады. Оқушылар 3 топқа бөлініп әр топта 12 оқушыдан болады. Олар роботты құрастыруды және бағдарламалау негіздерін үйренеді. Үйірмеге жас ерекшеліктеріне қарай 9 жастан жоғары жеткіншектерді, ал кейде ынтасы жақсы оқушыларды да қабылдаймыз. Мұнда олар роботтардың жеңілінен бастап күрделісіне дейін жасап шығады, – дейді.Оның сөзінше, оқушылары түрлі деңгейде робототехника бойынша облыстық, республикалық жарыстарда көзге түсіп жүлделі орындарды алып жүр. Әр бала өз қиялындағы еркін тақырыпта роботын қағазға түсіріп, оның бөлшектерін құрап, әрі бағдарламасын әзірлейді. Өзінің арнайы бағыттайтын датчиктері бар. Мәселен, бірі түсті ажыратады, екіншісі кедергіні ажыратып, үшіншісі бөлменің температурасын ажыратады. Тек құрастырып қана қоймай, компьютермен бағдарлама жазады. Жарыс болса жарыстың ережесіне сәйкес қылып жазады. Бұл процесс баланың шыдамдылық төзімділігімен қатар зейініңде арттырады. Робот баланың ойлау қабілетін жақсартып, өмірге деген қадамына сенімділік білдіреді. Соның нәтижесінде жас буынмен бірге еліміздің робототехника саласы да бой көтеруде. Адам өмірін жеңілдетуге арналған роботтарды күнделікті өмірде қолданатын уақыт та алыс емес.Біз үздік үйірмелердің бірқатарына тоқталып өттік. Өнері ұландардың басын қосқан мұндай үйірмелер келешек қазақ көгінде жарқырай сан өнерпаздың тұсауын кесіп жатпасына кім кепіл?

Жаңақорғандағы үздік үйірмелер қандай?

<a href="https://aikyn.kz/211660/aua-rayy-zhanbyr-zhauyp-dauyl-sogady-2">ФОТО</a><a href="https://kyzylorda-news.kz/">Kyzylorda-news.kz.</a> Синоптиктер демалыс күндерге арналған ауа райы болжамын жариялады.Алдағы демалыс күндері Қазақстандағы тұрақсыз ауа райына атмосфералық фронтальды бөлімдер әсер етеді. Сондықтан найзағай ойнап, жаңбыр жауады, қатты жел соғып, бұршақ жаууы да мүмкін.26 маусымда солтүстікте, 24-25 маусымда шығыста, 24 және 26 маусымда еліміздің оңтүстік-шығысында қатты жаңбыр жауады, оңтүстік-шығыста шаңды дауыл болады. 26 маусымда түнде еліміздің солтүстік-батысында топырақ бетінде 1 градус үсік болады деп күтіліп отыр.

Демалыс күндері ауа райы қандай болады?  

<a href="https://kyzylorda-news.kz/">Kyzylorda-news.kz.</a> Кеңес одағы кезінде өңірдегі барлық кеңшар, ұжымшарларда атшаптырымдық алма бақтары болды. Онда қаншама бағбан еңбек етті. Жеміс шырыны, әртүрлі қайнатылған тосап шығаратын зауыттар қарқынды жұмыс істеп тұрғанын бүгінде көзі тірі жандар жоққа шығармайды. Ол тұста Үкімет тарапынан алма бақтарын ұстап тұру үшін қомақты қаражат бөлініп, өнім кәдеге асып жатушы еді. Қазір сол кездегі жайқалған бақтардың орны қаңырап бос жатқанын көргенде етегіне бидай төксең, етігіне сүрінер еріншектігімізге еріксіз налисың. Кезінде Д.Қонаев түскен бақтарда бүгінде тіс шұқуға жарайтын ағаш таппайтыныңа еңсең түседі.&nbsp;Адам денсаулығына пайдасы зор жемістің құрамында алма қышқылы, темір, май, қант, силлолоза, алуан түрлі дәрумендер, минералды заттар мол. Иісі мұрын жаратын алмалар асқазан, ішек, жүрек ауруларына да мыңда бір ем. Әтеген-айы сол, бүгінде тәтті жемістің орнын көрші Қытайдан келетін алмалар басқан. Құрт екеш құрт та жемейтін ол алмалар қазір төрімізге еніп, дастарқанымыздан берік орын алғаны рас. Табиғи, таза жеміс жоқтың қасы болып тұр. Сиверс алмасын да, апортты да армандаудан басқа амал жоқ. Үкімет бүгінде алма бақтарын жаңғырту үшін әр гектарына 549 мың теңгеден субсидия бөліп отыр. Ал жасыл түп жеміс бергенше оны баптап өсіруге қалған жылдары 70-80 мың теңгеге дейін қаражат бөлінеді.Қайбір жылдары Батыс Еуропа – Батыс Қытай күре жолы пайдалануға берілгелі бірнеше ауылдың тұсында алма егу жұмыстары іске асты. Мәселен Тартоғайдағы «Әлібаев» шаруа қожалығы 2017 жылы 5 гектар алқапқа 10 мың түп алма ағашын екті. Шаруалар биыл өнім береді деп күтіп отыр. Ал Бала бидегі «Дәулет» жеке кәсіпкерлігі бұл кәсіпті 2019 жылы қолға алған. Алманың 5 түрлі сұрпынан 20 мың түп еккен диқандар көшеттің жерсінгенін айтады. Әйтсе де бидайкөлдегі баққа егілген алма ағаштары түгелдей қурап қалған.&nbsp; Алма бағын жандандыру жағы қазір көрші Жаңақорған ауданында қарқынды қолға алынып жатыр. Ал бір таңғалатынымыз, кезінде 264 гектар аумаққа алма, 111 гектар жерге жүзім егілген Алмалы ауылынан қазір сол жемістерді таппайсың. Кезінде іскер басшы Мұхит Исмаил Алмалы совхозының директоры болған тұста жыл сайын алма бақтан 1200 тонна алма жиналатын деген деректер бар. 560 тонна жеміс сақтауға арналған мұздатқыш қоймасы, үш ауысыммен жұмыс істейтін цехы, 20 шақты жылыжайы да болған деседі. Мұндағы алма жыл он екі ай бойы аудан халқын қамтуға жетіп артылған. Кейіннен алма бақ таран-таражға түсіп, жерін ауыл тұрғындары бөлісіп алады.&nbsp;Қазірде Алмалыға алма егуге мүмкіндік мол. Ауылдың тұсынан Л-6 каналы өтеді. Жері де егін егуге бейімделген, ескі су өткізетін құбырлары мен су жолдары сақталған. Мұндай бақтар тек Алмалы емес кезінде &nbsp;Еңбекші, Ақмая секілді өзге де елді мекендерде болған. Осы орайда Ақмая ауылының әкімі Бағлан Сағындықовты сөзге тарттық. Айтуынша ауылдағы ескі алма бақтың орнын қайта жандандырмақ ниетте. Ол үшін не істеу керегін де біледі.<blockquote>«Қазір кәсіпкерлермен келіссөз жүргізіп жатырмыз. Өкініштісі ауыл азаматтары алма баққа қызығушылық танытпай отыр. Ал сырттан келетін кәсіпкерлер жерімен қоса өздеріне алғысы келеді. Бірақ біз оған келіспейміз», – дейді.</blockquote>Алма бақ – отбасылық бизнесАлма бақтары – бұл отбасылық бизнес. Көзін таба білген кәсіпкерлер үшін алма бағына инвестиция құю – ұрпақтан-ұрпаққа жалғасатын табыс көзі. Бүгінде екінің бірі кәсіп жасау арқылы табыс көзін арттыруды ойлайды. Дегенмен бәрі бірдей онсыз да қаптап тұрған қызмет көрсететін орындардың санын арттырғанша, өндіріс саласына қарай бет бұрған дұрыс. Мәселен, алма экспорты. Шиелінің топырағына бұл жеміс жат емес. Оның үстіне бұл кәсіптің «жілігін шағып, майын ішкен» майталман мамандар да жетерлік. Алманы егіп, ол пісіп жетілемін дегенше бірнеше жылды сарп етуге тура келер. Дегенмен, кәсіптің бұл түрінен пайда шаш етектен болары рас. Оның үстіне соңғы уақытта дәл осы алма өсірумен айналысатын бағбандарға мүмкіндік артып отыр. Біріншіден, бұл жеміске сұраныс мол болса, екіншіден, осы саланың маңызды бөлігі – импорт болып отыр, ал үшіншіден, мемлекет несие мөлшерлемелерін субсидиялау және өндіріс шығындарының бір бөлігін қайтару арқылы отандық өндірушілерге қолдау көрсетіп келеді.2025 жылға қарай елімізде бау-бақшадан жиналатын жеміс-жидек көлемін 420 мың тоннаға жеткізу жоспары бар. Ол үшін сапасы жоғары көшеттерді таңдап, будандастыру және жерсіндіру мәселесінде ғылыми-зерттеу жұмыстарын жүзеге асыруды тоқтатпау керек. Сонда ғана ішкі нарықты алмамен толық қамтамасыз етіп қана қоймай, алманы қыруар қаржыға сыртқа сата аламыз.Алманың 50 процентін сырттан тасимызЕлімізде сатылатын алманың 50%-ы сырттан келеді. Ал, ішкі нарықты өз алмамызбен қамту үшін алма бақ көлемін арттыру қажет. Жоғарыда аталған шаруашылықтардан бөлек, әр ауылда шама-шарқынша бұрынғыдай бақша өнімдері егілсе жұрттың «жұғымсыз» жемістеріне жәутеңдемес едік. Қазақстан алманың отаны саналса да, &nbsp;алма экспорты жөнінен әлемде тек 42-ші орында тұр.&nbsp; Қазір нарық заманы. Алдағы уақытта бұрынғы алма бақтарды қайта жандандыратын болса, біріншіден, ауылдың келбеті артып, көріктене түсер еді. Екіншіден, жұмыссыздар саны едәуір азаяды. Үшіншіден, халықтың қалтасына қомақты қаржы түсіп, әлеуеті артатыны анық. Ең бастысы тек экономикаға оң әсер етіп қана қоймай, экологиялық жасыл белдеу қалыптастыруға ықпалы орасан болмақ.Сондықтан ауыл әкімдері мен ардагер ақсақалдар жастарды көптеп алма, жүзім егуге қайтадан баулып, кезіндегі жеміс бақтарын қалпына келтіруге атсалысса игі. Жол жөндеу, абаттандыру, мектеп, балабақша құрылысы секілді шаруалар ағымдағы, міндетті түрде орындалатын жұмыстар. Ауыл басшысы тек тапсырыс береді, оған мемлекеттен қаржы бөлініп, арғы қарайғы шаруасына мердігерлер жауапты болады. Ал ауыл әкімдерінің жұмысы салық көзін ұлғайтып, ауылдағы жұмыссыз азаматтарға кәсіп көзін ашуға ықпал жасау, жоғын түгендеуімен көрінері сөзсіз. Егер ауылдың өткенін жаңғыртып, «өлгенін тірілтуге» күш салсақ, бұл болашақ ұрпақ үшін де жасаған ең үлкен сыйымыз болар еді.&nbsp;Білікті бағбандар «жер ұзақ уақыт пайдаланусыз тұра берсе эрозияға ұшырап, құнарын жоғалтады» дейді. Сондықтан уақыт оздырмай ата кәсіпке айналған алма бақты жандандыруға жанымызды салайық. Ауылдың атына заты сай болғаны қажет-ақ. Оның үстіне шетелдің құнары күмән туғызатын жемісін жегенше, өзіміздің бағбандар күтіп-баптаған, дәмі бал татитын алманы алаңсыз алып, артығын сатып, пайда қылғанға не жетсін?!

Шиелілік бағбандар алманың түрлі сортын еккен

<a href="https://kyzylorda-news.kz/">Kyzylorda-news.kz.</a> Адам денсаулығын жақсарту мақсатында жоспарлы ем жүргізу – маңызды рөл ойнайды. Өз кезегінде аудандық емхананың дәрігер-фтизиатры Ләззат Ибраймова Аманкелді ауылдық дәрігерлік амбулаториясында мониторинг жұмыстарын жүргізген болатын.Сонымен қатар, амбулатория қызметкерлеріне «Туберкулездің алдын алу, диагностикалау, қадағалау» тақырыбында түсіндірме жұмыстарын жүргізді. &nbsp;<blockquote>– Қай кезде де, денсаулық сақтау саласын жетілдіру арқылы жергілікті халықтың сырқаттануын азайта аламыз. Біз жоспарлы түрде Аманкелді ауылының тұрғындарына &nbsp;тексеру жұмыстарын жүргізіп келеміз. &nbsp;Бұл ретте, &nbsp;ауыл тұрғындарының туберкулезге шалдығу көрсеткішін төмендету мақсатында жүйелі жұмыстар жасап келеміз. Егерде туберкулез ауруына шалдыққан &nbsp;кісілер анықталған жағдайда жоспарлы ем қабылдауға ауруханаға жолдаймыз. Халық арасында аталған дертке шалдығуды болдырмау үшін барлық іс-шараларды қабылдаймыз. Дегенмен, жергілікті тұрғындар жоспарлы профилактикалық тексеруден өтуден бас тартып жатады. Нәтижесінде, арушаңдық деңгей көбейіп жатады, – деді білікті дәрігер.&nbsp;</blockquote>Арнайы бұйрыққа сәйкес медициналық-санитариялық алғашқы көмек мамандарының жалпы практика дәрігерлері, учаскелік терапевтер және педиатрлар туберкулездің алдын алудағы міндеттері сараланды, Аудандық/ауданаралық, қалалық емханалардың консультациялық диагностикалық бөлімшелерінің мамандандырылған фтизиатриялық кабинеттерінің фтизиатр-дәрігерлерінің міндеттемелері, туберкулез кезінде медициналық оңалтуды ұйымдастыру, амбулаториялық-емханалық көмек көрсететін денсаулық сақтау ұйымдары мамандарының балалардағы туберкулезді диагностикалау алгоритмі жолға қойылған. Амбулаториялық-емханалық көмек көрсететін денсаулық сақтау ұйымдары мамандарының өкпеден тыс туберкулезді диагностикалау алгоритмі туралы жалпы түсінік берді.<blockquote>– Жақында аудан әкімі Берік Сәрменбаевтың тапсырмасына сәйкес, Аманкелді ауылында қан талдау аппаратын алу жұмыстары жүргізілген болатын. Осы жолы аудандық емхананың дәрігер-фтизиатры Ләззат Ибраймова тұрғындардың денсаулығы жіті бақылады. Әрбір адамның денсаулығы жақсы болған жағдайда медицина саласының сапалы қызметін аңра аламыз. Біз сала мамандарының жұмысына сәттілік тілейміз, – деді аудандық мәслихат депутаты Нұрман Абдрасиов.</blockquote>&nbsp;&nbsp;

Дәрігерлер Аманкелді ауылында зерделеу жұмыстарын жүргізді

.<a href="https://kyzylorda-news.kz/">Kyzylorda-news.kz.</a> Бүгін аудан әкімі Берік Сәрменбаев мемлекеттік қызметшілерді кәсіби мерекесімен құттықтап, қабылдау өткізді. Аталған іс-шараға облыстық мәслихат депутаты Жұмабек Ембергенов, аудандық ардагерлер кеңесінің төрағасы Мұса Келдібаев, аудандық қоғамдық кеңестің төрағасы Марат Еспенбетов, аудан прокурорының орынбасары Ғалымжан Дүйсенбаев, дербес бөлім басшылары, кент және ауыл әкімдері қатысты.<blockquote>– Мемлекет пен қоғамға қызмет ету – әрбір азамат үшін абыройлы іс. Еліміздің гүлденуі мен экономикамыздың дамуы жолында мемлекеттік қызметшінің қосар үлесі ерекше. Мемлекеттік қызметшілер жұмыста қарапайым, өмірде өзгелерге үлгі болуы тиіс. Сондықтан ел үшін қызмет ету – мерейлі міндет, зор абырой. Сіздерді кәсіби мерекемен құттықтай отырып, дендеріңізге саулық, отбасыларыңызға амандық, қызметте толағай табыс тілеймін, – деді Берік Әбдіғаппарұлы құттықтау сөзінде.&nbsp;</blockquote>Сонымен қатар мемлекеттік қызметтің түрлі саласында еңбек етіп жүрген мамандар облыс және аудан әкімінің алғыс хатымен, арнайы мемлекеттік қызметкерлерге арналған төс белгімен марапатталды.&nbsp; Өз кезегінде облыстық мәслихат депутаты Жұмабек Ембергенов сала мамандарын кәсіби мерекемен құттықтады.&nbsp;<blockquote>– &nbsp;Мемлекеттік қызмет жұмыс жасау адамға үлкен жауапкершілік жүктейді. Кәсіби мамандар арнайы ант берген күннен бастап, еліміздің дамуына өлшеусіз еңбек етеді. Қазіргі уақытта сала мамандары үлкен жауапкершілікті сезінеді. Әрине, тынмысыз еңбек лайықты түрде ескерілуі тиіс. Шын мәнінде, мемлекеттік қызметтегі &nbsp;сан салада &nbsp;көш ілгерілілеу бар. Бұның барлығы кәсіби мамандардың табысты еңбегінің арқасы деп білемін. Халықпен етене жақын араласып, &nbsp;әкімдіктер мен бөлімдердің, тиіс мекемелердің жұмысын жандандырған саламамандарына шынайы ризашылығымды білдіремін, – деді аудандық мәслихат депутаты.&nbsp;</blockquote>Жалпы, ауданда жергілікті бюджеттен қаржыландырылатын мемлекеттік әкімшілік қызметшілердің жалпы штаттық саны 128 бірлікті құрайды. Мемлекеттік қызметшілердің орташа жасы қазір 40 жас болса, орташа еңбек өтіл 10 жыл. Аудан әкімдігіне қарасты мемлекеттік мекемелерде жұмыс жасайтын мемлекеттік қызметшілердің 48-і әйел. Қазіргі уақытта 119 мемлекеттік қызметші нақты жұмыс жасауда.<blockquote>– Күннен-күнге мемлекеттік қызметішіге қойылатын талап жоғары екеніне көз жеткізіп келеміз. Құжаттамалық жұмыстармен қатар, кәсіпкерлік, қаржы, экономика, ауылшаруашылығы, мәдениет және спорт, жер қатынастары, білім секілді бірне салада мемлекеттік қызметкерлер бар. Біз олардың жұмысын жоғары бағалаймыз, – дейді аудандық ардагерлер кеңесінің төрағасы Мұса Келдібаев.</blockquote>&nbsp;&nbsp;

Берік Сәрменбаев:  Мемлекеттік қызмет – абыройлы міндет

<a href="https://kyzylorda-news.kz/">Kyzylorda-news.kz.</a> Қызылорда қаласы және оған қарасты кент, ауыл тұрғындарымен кездесуден соң шаһар басшысы Асылбек Шәменов бейсенбі күні қалалық мәслихат төрағасы, қалалық құқық қорғау салаларының бірінші басшыларымен бірге тұрғындарды жеке қабылдады.Алдын ала жарияланған хабарлама бойынша қабылдауға келген тұрғындардың қарасы қалың. Олар өздерін толғандырған мәселе туралы тиісті сала басшыларына ашық жеткізуге мүмкіндік алды.&nbsp;Қалада ел игілігі үшін атқарылып жатқан жұмыс жетерлік. Десе де қабылдауға келген жұртшылық көбіне шешімін таппай жүрген жеке мәселесі төңірегінде жүгінеді. Әкім қабылдауына келгендердің арасында жұмыссыз азаматтар, мүмкіндігі шектеулі жандар, көпбалалы аналар бар. Олар өз кезегінде жұмыссыздық жайын, жер алу, тұрғын үй кезегі сынды мәселе көтерді.Қала әкімі Асылбек Шәменов тұрғындарды толғандырған сұрақтарға жауап беріп, мәселені шешуде тиісті сала басшыларына тапсырма берді. Өз кезегінде құқық қорғау органдарының басшылары азаматтарға заң аясында түсіндірме жүргізді.Тұрғындарды қабылдау барысында 100-ге жуық азаматтың өтініші қаралған. Ал қала әкімі Асылбек Шәменовке 82 тұрғын мәселесімен жүгінген.

Қызылорда қаласының әкімі тұрғындарды қабылдады

<a href="https://kyzylorda-news.kz/">Kyzylorda-news.kz.</a> Жаңақорған ауданында баспанамен қоса құрылыс материалының бағасы да шарықтап кетті. Барлық жерде тұрғын үй, мектеп, балабақша, тағы басқа әлеуметтік нысандар көптен салынып жатыр. Жаңа тұрғын үйлер қатары артты. Материал бағасы жыл сайын көтерілсе де сұраныс түспей тұр. Биыл үй салып бастаған ағайындар жоспарланған қаражаттан екі есе шығындалып жатырмыз дейді. Осыған орай ой қорытып, баспанаң болса, соны сылап-сипап отыра тұруға кеңес берсек те артық емес. Өйтпегенде ше, биыл сәуір айында құрылыс бағасы 70 пайызға көтерілген.Бұл мәселеге мемлекет басшысы Қасым-Жомарт Тоқаев алаңдаушылық білдіріп, жауаптыларға тапсырма жүктеген еді. Басты мақсат – құрылыс материалдары мен тұрғын үй бағасының өсуін тежеу. Құрылыс материалдарының қымбаттауына әсер еткен бірден бір фактор – импорт. Яғни, нарықтағы бағаға шетелдік компаниялар мен жекелеген делдалдардың әрекеті әсер еткен. Ал, Қазақстан құрылысшылар одағының төрағасы Талғат Ерғалиевтің айтуынша, құрылыс материалдары 30-190 пайыз мөлшерінде қымбаттаған. Құрылыс материалының қымбаттауымен қоймай, жұмыс механизмі мен көрсетілетін қызметтердің де құны әжептәуір өскен. Құрылысшылар жыл сайынғы 10-15 пайыздық қымбаттауға үйреніп те қалды.Бірақ 2022 жылғы қымбатшылық ерекше болды. Дәл мұндай баға өсімі соңғы 10 жылда болмаған дейді.<blockquote>«Біріншіден, девальвация болып, теңге 31 пайызға құнсызданды. Біз материалдардың 60 пайызын шетелден алып келетіндіктен, теңге мен шетел валютасы арасындағы айырмашылық материал құнына әсерін тигізеді. Екіншіден, рубль де қымбаттады. Соған сай Ресейден әкелінетін материалдар да қымбаттап кетті. Рубльдің құн¬сыздануынан Ресейде де баға өсті, алайда ресейлік өндірушілер үшін өз өнімін Қазақстанға емес, Қытай мен Еуропаға сатқан қолайлы. Өйткені ол елдерде баға әлдеқайда жоғары. Сондықтан тауарлардың басым бөлігі сол елдерге кетті де, нарықта тапшылық пайда болды, ал тапшылық бағаны өсіріп жіберді. Осылайша, сұраныс пен ұсыныстан құралатын нарық заңы жұмыс істеді: ұсыныс аз, сұраныс бар – баға өсе бастады», – деді Ерғалиев.</blockquote>Егер құрылыс базарына бас сұғып, қажетті затттардың бағасын қарасаңыз, күні кеше арзан тұрған заттардың бағасы едәуір қымбаттағанын анық байқауға болады. Кент азаматы Айдар Құрманбеков үлкен үйдің құрылысын осы көктемде бастаған екен. Қажетті материалдарды алғашында басқа бағамен алса, кейіннен әлдеқайда қымбатқа сатып алыпты. Айтуынша, жоспарлаған сома еселеніп барады.<blockquote>«Сәуір айының басында біраз материал алдық, мысалы, 16 арматураны 450 теңгеден алғанбыз. Соның жетпегенін мамырда 650 теңгеден алдық. Сол бір айдың ішінде 200 теңгеге қымбаттап кеткен. М350 маркалы бетон – 12 230 теңгеден бастап 21 120 теңгеге дейін өсті. Цемент те қымбат. Ауданда бірнеше сауда нүктелерін аралап шықсаңыз, бұған көзіңіз жетеді. Айталық, көктемде құрылыста жиі пайдаланылатын 1 OSB тақтасының бағасы 3 мың теңгенің ар жақ – бер жағында тұрса, бүгінде ондай баға түгілі, материалдың өзін табу қиын. Бірақ олардың да бағасы аспандап кеткен. Оңтайлы бағаға тұрмақ, керек затыңыз табылса қуанасыз. Үлкен ағамның айтуымен үйдің төбесін жабатын қаңылтырды Шиеліден әкелдім. Несін жасырайын, бізге қарағанда ол жақтың базарында қанағат бар екен. Дейтұрғанмен қазірде сада орындарында нарықты бақылайтын ешқандай бір мониторинг жоқ секілді. Содан соң базардағы бағаға тәртіп бола ма?» – дейді қынжыла.</blockquote>Иә, біз тілдескен қарапайым халықтың пікірі осылай өрбіген соң, Жаңақорған ауданындағы «Ақ жол», «Ержан», «Талды су», «Шаңырақ», «АI Madi» және бірнеше ағаш базарына бас сұқтық. Саудагерлердің сөзінше, құрылыс материалдары карантин енгізілгеннен бастап қымбаттаған. Мәселен, темірдің құны бірден 70 пайызға шарықтаған. Цемент екі есеге өскен. Қызыл кірпіштің құны да қырық құбылып тұр. «Бағаның өсуі бізге байланысты емес» дейді сатушылар.<blockquote>«Бізге келушілер тауардың бағасын ести салысымен, бірден реніштерін білдіріп, «қанағат етпейсіңдер ме?» деп жатады. Біздің қолымызда тұрған ештеңе жоқ қой. Құрылысқа қажетті заттарды өзіміз өндіріп жатқан жоқпыз. Бізге сырттан камазбен келеді. Шыны керек, үстіне көп қосуға да ыңғайсыз. Өйткені, келу бағасының өзі айтарлықтай қымбат. Биыл қатты көтерілді. Екі есе көтерілді ғой. Былтыр 6 мың теңгеден сатылған шипрларың биыл 14-15 мың. Бізге құрылыс материалдары барлық мемлекеттен келеді. Соның ішінде ең көбі Ресей, Түркия, Қытай, Иран, Араб елдерінен тасымалданады. Пандемияның салдарынан олардың бағасы артты. Есесіне бізде де, қымбатқа сатылып жатыр. Ол әрине құрылысқа, соның ішінде үй бағасына да әсер етеді. Биыл өзі өте ауыр жыл болып тұр ғой», – дейді сатушы Қанат Баймұратов.</blockquote>Шынымен де, бізге келетін құрылыс материалының негізгі түрлері Ресейден келеді. Соның бірі ағаш. Онсыз үй салу мүмкін емес. Іргетасынан бастап шатырына дейін пайдаланатын құрылыс материалының бұл түрінің қалдығы да кез келген жерде пайдаға асады. Ең ақыры ұсақ жаңқасынан ДВП, ДСП жасалып, төбеге де жылулық ретінде қолданылады. Кент орталығындағы базарда бір текше метр ағаш – 55-60 мың теңге. Өзге заттарды несиеге немесе қарызға келістіруге болатын болса, ағашты тек нақтылай ақшаға саудалайтынын айтып отыр ағаш базардағы сатушы Бақыт Әлменов.<blockquote>«Байқасаңыздар, басқа тауарлардың бағасы қыста аздап түсуі мүмкін. Бірақ ағаштың бағасының тұрақтылығына кепілдік бере алмаймыз. Өйткені ол жақта рубльмен есептелінеді. Біздің теңгеге шаққанда 4-5 есе құнды. Ағаштың құны енді арзандамайды. Жыл сайын өсуі де заңды. Біз текше метрлеп сатпаймыз. Бәрібір сол баға шығады. Екінші жағынан уақытты алады. Сатып алушылар ағаштың көлемі мен санын айтады. Сол бойынша есептеп береміз. Қыс бойы тапсырыс беріп, ауламызға жинай береміз. Осындай кезеңде таусылып қалмауын ескереміз. Ағаш өз құнын еш уақытта жоғалтпайды», – дейді сатушы.</blockquote>Көп қолданылатын құрылыс материалдарының тағы бір негізгі түрі – қаңылтыр шатырлар. Бұл да қалдықсыз материал. Оның түсінің оннан астам түрі бар. Ал түссіз қаңылтыр шатырлар арзан болады. Сапасына келсек үш түрі бар. Жұқа, орташа, қалың. Сіз қалтаңыздағы қаражаттың көлеміне қарай таңдайсыз. Ұзындығы 6, ені 1,20 метр түрлі түсті профлистің бағасы – 15 мың теңге. Мұнымен шатырды жабу ыңғайлы әрі тез. Сонымен қатар заман талабына сай үйіңіз бен қақпаңызға сән береді. Ал түссіз қаңылтырларды шаруа қожалықтары қораның төбесін жабуға, мал ауласын қоршауға көп алады екен.Сонымен қатар, пластикалық терезелерді жасаушылар да көктемнен бері есік-терезені өндіру бағасын көтеріп жіберген. Осыдан біршама уақыт бұрын бір терезені 25 мыңға жасатсаңыз, енді 40-45 мың теңгенің айналасында. Біздің ауданымызда пластик есік-терезе жасайтын ұсталар аз емес. Солардың бірі Самат Қамбаровтың сөзінше есік, терезені өздері жасағанымен, қажетті заттарды сырттан алдырғасын, баға үнемі өзгеріп отырады дейді.– Шыны керек, біз пластиктен жасалатын бұйымдарды өзіміз құрастырып жасағанымызбен, оған қажетті заттарды өзіміз өндірмейміз ғой. Басқа жақтан алдыртамыз. Әр алдыртқан кезде әртүрлі бағада келеді. Ол зауыттан «неге қымбат» деп сұрасақ, доллар өсті дегенді алға тартады. Біз барынша халыққа тиімді бағада жұмыс жасап жатырмыз. Осыдан екі-үш жыл бұрын орташа размердегі терезені 20-25 мыңға жасауға болатын. Қазір, кем дегенде 40 мыңға жасап береміз, – дейді пластик құрастырушы.Байқағанымыздай, құрылыс материалдарын сөз еткенде, бізде көбіне сыртқа тәуелділік басым. Жылдан-жылға жағдайдың жақсарғанымен қымбатшылық қиыншылығы қыспақтап тұр. Сәулетті үй тұрғызғымыз келеді, несиеге ұрынамыз. Банкке бір қарыз, құрылысшыға тағы тәуелділік туындайды. Бүйте берсе күрке тұрғызу да күрделеніп кететін түрі бар. Бұдан қарапайым халық қана қағажу көреді.

Жаңақорғанда құрылыс бағасы қандай?

<a href="https://kyzylorda-news.kz/">Kyzylorda-news.kz.</a> Бүгін партияның облыстық филиалы жанындағы Өңірлік даму жөніндегі аймақтық Кеңестің отырысы өтті. Жиынға облыстық партия филиалының Атқарушы хатшысының орынбасары Алтынбек Жарылқасынов қатысты. Ол өз сөзінде кеңестер партияның негізгі диалог алаңдары екенін атап өтіп, аманаттықтардың алдында тұрған бірқатар маңызды міндеттерді жеткізді. Сонымен қатар кеңестер аймақтың жол картасының орындалуына бақылау жасап отыру керектігін жеткізді.Басқосуда Кеңес құрамына өзгерістер енгізілді. Сонымен қатар Жол картада көрсетілген электрмен жабдықтау іс-шараларының іске асырылу барысы қаралып, Кеңестің жұмыс жоспары талқыланып, жұмысты жетілдіруге қатысты ұсыныстар ортаға салынды.Бүгінгі күні өңірде электрмен және жылумен жабдықтау желілерінің тозуы жоғары. Осыған байланысты алдағы 5 жылда электр желілерін қайта жаңғырту бойынша 3 жоба жүзеге асырылады. Олар Жаңақорған кентіндегі 10/0,4 кВ электр желілік жүйені жаңғырту, Сырдария ауданы, Шаған ауылдық округінің тұрғын аймақтарын электрмен қамту, және Шиелі кентінде 220/35/10 кВ «Шиелі» ҚС қайта жаңғырту» жобалары. Бұл жұмыстардың нәтижесінде электр желілерінің тозу деңгейі 69%-дан 65%-ға дейін төмендетіледі.Аймақтық Жол картасының 2,4 бөлігі, 63 тармағында 918.17 км электр желілеріне күрделі және ағымдағы жөндеу жұмыстарын жүргізу жоспарланған. Бүгінгі күні 100,7 км желі жөндеуден өткізілді. Осы бағытта атқарылған жұмыстар барысы туралы облыстық энергетика және тұрғын үй-коммуналдық шаруашылық басқармасы басшысының орынбасары Олжас Исмалаев хабарлама жасады.Басқарма басшысы орынбасарының айтуынша электр жүйелерінің тозу деңгейін 30 пайызға төмендету үшін 153 млрд.теңге қаржы қажет. Бұл ауқымды қаражат болғандықтан, облыстық бюджет есебінен былтыр 548 млн.теңге бөлініп, «КРЭК» АҚ-ның жарғылық капиталы ұлғайтылған. Қызылорда қаласының 35/10 кВ-лық «Силикатная», «Промышленная» және «Комсомол» қосалқы станцияларындағы күштік трансформаторларауыстырылған.Сонымен қатар, жыл басында облыстағы жөндеуді қажет ететін электрмен қамту нысандары анықталып, жаңғырту-жөндеу, ауыстыру жоспары жасалған. Оның бірінші кезеңіне облыстық бюджеттен 1,6 млрд.теңге қаражат бөлінген. Бұл қаржыға кернеулігі 10/0,4 кВ 35 қосалқы станция ауыстырылып, 27 дана кірпіштен жасалған ескі күштік трансформатор күрделі жөнделген және 32 шақырым желі ауыстырылмақ.<blockquote>«Қызылорда электр тарату тораптары» АҚ тарапынан 738 км электр желілерінің бағаналарын күрделі жөндеу, 355 км электр желілерінің бағаналарына ағымдағы жөндеу, 55 дана әр түрлі кернеулі қосалқы стансаларға күрделі жөндеу, 44 дана қосалқы стансаларға ағымдағы жөндеу жұмыстары жоспарланды. Бүгінгі күнге жұмыстарының 34 пайызы орындалып отыр», - деді Олжас Исмалаев.</blockquote>Отырыста Кеңес мүшелері тарапынан түрлі ұсыныстар ортаға салынып, хаттамаға енгізілді.

Қазақстан және Қызылорда облысының жаңалықтары