<a href="https://kyzylorda-news.kz/">Kyzylorda-news.kz</a>&nbsp; «Ежелден ел тілегі, ер тілегі, адал ұл ер боп туса, ел тірегі», – дейді даңқты қолбасшы Бауыржан Момышұлы. Елге қызмет ету, Отанды қорғау – ұлы іс. Туған өлкенің түйір тасы мен бір уыс топырағын да, көздің қарашығындай қастерлеу – бәріміздің Отан алдындағы қасиетті парызымыз. Десе де, бұл ретте, айбынды ер-азаматтардың атқарар рөлі орасан. Ер мінезімен елге қорған болар Отан қорғаушылардың мерекесі қарсаңында Қазалы ауданының қорғаныс істері жөніндегі бөлімінің бастығы, подполковник Нұрлан Көлбаевпен сұхбаттасқан едік.– Нұрлан Құрманғалиұлы, қорғаныс істері жөніндегі бөлім десе, көпшіліктің ойында тек «әскерге алып кететін орын» деген түсінік қалыптасқан. Жалпы, бөлімнің міндеті туралы тарқата айтсаңыз...– Негізі, қорғаныс бөлімі Қазақстан Республикасының жергілікті әскери басқару органдары қатарында бейбіт және соғыс уақытында жергілікті атқарушы органдармен бірлесе жұмыс атқарады. Сол арқылы адам және көлік ресурстарын жұмылдыруды жүргізу жоспарын, азаматтарды әскерге шақыру учаскелеріне тіркеуді, Қазақстан Республикасының Қарулы Күштеріне, басқа да, әскерлері мен әскери құрылымдарына мерзімді әскери қызметке, запастағы офицерлерді әскери қызметке шақыруды және Қазақстан Республикасының Қарулы Күштеріне келісімшарт бойынша әскери қызметке қабылдауды, ауданның әскери-экономикалық әлеуетінің есебін жүргізуді қамтамасыз етеді.Қазіргі таңда біздің бөлімде жұмылдыру, жасақтау және материалдық-қамтамасыз ету бөлімшелері өздеріне қойылған міндеттерді жүзеге асырады.– Әскерге шақырылушылар қандайталаптарға сай келуі керек? Қандай жағдайда шақыртудан кейінге қалдырылады?– Қазақстан Республикасының 2012 жылғы 16 ақпандағы №561-ІV «Әскери қызмет және әскери қызметшілердің мәртебесі туралы» заңының талаптарына сәйкес, әскерге шақырылушы азаматтардың денсаулығы жарамды, соттылығының болмауы және Отан қорғауға деген ниетінің болуы қажет.Ал, мерзімді әскери қызметке шақыру науқаны кезінде кейінге қалдырылуы және әскерге шақырылудан босатылуы Қазақстан Республикасының 2012 жылғы 16 ақпандағы №561-ІV «Әскери қызмет және әскери қызметшілердің мәртебесі туралы» заңының 35 бабына сәйкес отбасы жағдайына (отбасында мүгедек, ата-анасы болмаған жағдайда, ата-анасының зейнеткерлік жасқа толуына, некеде тұруы және тағы басқа), білім алу жағдайы (күндізгі бөлім және жоғары білімін жалғастыру) үшін және басқа да себептері (ауыл мұғалімдері мен дәрігерлері) бойынша әскер қатарына жіберу кейінге қалдырылады.– Денсаулығы жарамды деп қалдыңыз. Қазіргі жеткіншектердің денсаулығы қалай?– Қазір денсаулығы сыр берген жастар көп. Медициналық комиссияның сараптамасынан өткенде көзі нашар көретін, асқазаны ауыратындар жиі кездеседі. Одан бөлек ерте жастан құрылыста жұмыс істеймін деп бел-омыртқасы қисайып, грыжамен ауыратындары да бар. Осы ретте жас жігіттерге айтпағым, мектептен кейін әскерге немесе әскери оқу орындарына барыңыздар. Қазір әскери қызметтегі жандарға жеңілдік көп.– Мысалы қандай жеңілдіктер?– Әскерге аттанған жанның кредиті болса, 13 ай каникул беріледі. Ай сайын айлық төленеді. Әскер қатарында өзін дұрыс көрсете білсе, Қазақстан Республикасы аймағындағы жетпіске жуық арнайы оқу орнына ешқандай емтихансыз грант негізінде оқуға түсуіне сертификат беріледі. Үш жыл келісімшарт арқылы жұмыс істеуіне болады. Осы салада еңбек ететін жандарға отбасындағы адам санына байланысты пәтерақы төленеді. Тегін қызметтік формамен қамтамасыз етіледі.– Мектеп бітіруші түлектерге құлаққағыс ретінде әскери оқу орындарын атай кетсеңіз...– Кеңес Одағының екі мәрте батыры Талғат Бигелдинов атындағы Әуе қорғаныс күштерінің әскери институты, Радиоэлектроника және байланыс әскери-инженерлік институты, Сағадат Нұрмағамбетов атындағы Құрлық әскерлерінің әскери институты 11-сыныптап бастап, ал, Ш.Уәлиханов атындағы Қорғаныс министрлігінің әскери колледжі 9 және 11-сынып бітірушілерді оқуға қабылдайды. Толық ақпаратты біздің бөлімнен алуға болады.– Өкінішке орай, жастар арасында «Әскерге барып, бір жылымды босқа жоғалтқым келмейді. Соғыс болса, барамыз ғой» деген кереғар пікірдің бары рас. Қалай ойлайсыз жеткіншектер әскерге баруға неге құлықсыз?– Отан – отбасынан басталады. Әр шаңырақта ата-ана балаларының бойына патриоттық сезімді жас күнінен сіңіре білу керек деп ойлаймын. Әсіресе, ер балаларға әскерге барудың маңыздылығы туралы жиі айтылуы тиіс. Бұдан кейін, мектепте алғашқы әскери дайындық пәнінің де әсері мол.– Әскерге барудан жалтарып жүргендерге жаза бар ма?– Қазақстан Республикасының Қылмыстық кодексінің 387 бабына, Қазақстан Республикасының Әкімшілік құқық бұзушылық кодексінің 647, 648, 649 және 650 баптарына сәйкес мерзімді әскери қызметке барудан жалтарып жүрген азаматтарға айыппұл негізінде жауапкершілікке тарту құқық қорғау органдарымен бірлесіп шешіледі.– Бөлімде жастарға әскери-патриоттық тәрбие беруге байланысты нендей шаралар ұйымдастырылуда?– Қазақстан Республикасы Конституциясының 36-бабында «Қазақстан Республикасын қорғау – оның әрбір азаматының қасиетті парызы және міндеті болып табылады» деп жазылған. Осыған сәйкес, Қазалы ауданындағы жастармен әскери-патриоттық жұмыстар жергілікті атқару органдарымен бірлесе жүйелі ұйымдастырылуда. Қазалы ауданы көлеміндегі білім беру мектептерінде жастарға үгіт насихат жұмыстарын жүргізу мақсатында «Жас сарбаз» әскери-патриоттық клубтар ашылды. Оқу орындарында оқитын жастарды патриоттыққа тәрбиелеу бағытында және алдағы уақытта әскер қатарында Отан алдындағы борышын өтеуге дағдыландыру үшін Қазалы ауданындағы ардагерлер кеңесінің төрағасы, Ауған соғысының ардагерлерімен және әскери қызметін атқарып келген жастармен кездесулер жиі өткізіліп тұрады.Сондай-ақ, мектеп жасындағы жастарды әскери оқу орындарына түсуі үшін мақсатты жұмыстар атқарылуда. Алматы қаласындағы құрлық әскерлерінің институты мен радиоэлектроника және байланыс әскери институты, Ақтөбе қаласындағы әскери әуе күштерінің институтына құжаттар қабылдау жыл сайын жүргізіледі.– Қазіргі таңда қандай жұмыстар атқарылып жатыр?– Қазалы ауданының қорғаныс істері жөніндегі бөлімінде күнделікті міндеттерінен бөлек, Қазақстан Республикасының Қарулы Күштеріне, басқа да, әскерлері мен әскери құрылымдарына мерзімді әскери қызметке шақыру жұмыстары жоғары басшылықтан келген наряд негізінде басталды. Осыған сәйкес, Қазалы ауданында шақыру қатарына жататын азаматтарды көктемгі және күзгі мерзімді әскери қызметке жіберу жұмыстарын ұйымдастыру мақсатында жергілікті басқару органдарымен бірлесіп, жоспар жасалды. Соған сәйкес, Қазалы ауданы әкімінің қаулысы шығарылып, аудандық шақыру және шақырылушы азаматтардың мерзімді әскери қызметке жарамдылығын анықтау мақсатында медициналық комиссиялары құрылды.Осы уақытқа дейін Ұлттық қауіпсіздік комитетінің Шекара қызметінің, Мемлекеттік күзет қызметі және Қарулы Күштердің әскери бөлімдері толығымен жасақталып, қойылған тапсырма орындалу үстінде. Алдағы уақытта Ішкі істер министрлігінің Ұлттық ұлан әскери бөлімдері әскерге шақырылушы азаматтармен жасақталады.Осы сұхбатты пайдалана отырып, қарулы күштер жауынгерлері мен ардагерлерін Отан қорғаушылар күнімен шын жүректен құттықтаймын. Бұл мереке күні Ұлы Отан соғысы ардагерлеріне, ерлік пен батылдықтың өлшеусіз үлгісін көрсеткен барлық жерлестерге, Ауғанстанның отты жолдарынан өткен ержүрек жауынгерлерге тағзым етеміз. Сіздерге шын жүректен бақыт пен татулық, әрбір отбасына ізгілік пен игілік тілеймін. Олардың денсаулығы мықты болып, ел үшін табысты қызмет ете берсін. Ержүрек және жігерлі адамдардың бұл мерекесі әрдайым қуаныш пен бақыт әкелсін.– Әңгімеңізге рахмет.Сұхбаттасқан,Ұлболсын ТАЛАПБАЕВА

Нұрлан Көлбаев: Отан қорғауға деген ниет болу қажет

<a href="https://kyzylorda-news.kz/">Kyzylorda-news.kz</a>&nbsp; Отан дегенде көзге ең алдымен не елестейді? Алдымен, кең байтақ атамекен. Дархан дала төсінде тай-құлындай тебісе өскен бала мен бар мейірімін бойына дарытқан әке-шеше. Бейбітшілік. Көк аспанда еркін қалықтаған қыран, желмен желбірейтұғын көк байрақ. Иә, тәуелсіз елдің болашақ ұрпағы осындай тыныштықта бейбіт өмір сүруде. Әсілінде, бізге бұл оңай жолмен келген жоқ. Отан үшін отқа түсіп, кеудесін оққа тосқан ата-бабаларымыз «Қой үстінде бозторғай жұмыртқалаған» заманды аңсады, армандады. Оңайлықпен келмеген бейбіт күн бақ болып басымызға қонды.1991 жыл, 25 қазан. Қазақ КСР мемлекеттік Қорғаныс комитеті құрылды. Одан соң республиканың қорғаныс мәселелерін толық түрде жеке шешуге көшу үшін қорғаныс комитеті Қазақстан Республикасы Қорғаныс министрлігі болып қайта құрылды. 1992 жыл, 7 мамыр. Президент жарлыққа қол қойды. Қазақстан аумағында орналасқан қарулы күштер мүліктерімен қоса, республиканың қарауына өтті. Иә, дәл осы күн Қазақстан Республикасының Қарулы Күштерінің құрылған күні, 7 мамыр – Отан қорғаушылар күні деген тарихи датаға енді. Қазір Қазақстан өз азаматтарының әскери қызмет атқаруының жағдайы мен тәртібін анықтайды, өз аумағында әскердің, қару-жарақтың және техниканың орналасу мәселесін шешеді. Қазақстан Республикасының Қарулы Күштеріне жалпы, мақсаттағы күштер, әуе-қорғаныс күштері, мемлекеттік шекараны қорғау күштері және ұлттық гвардия мен ішкі әскерлер кіреді. Өз кезегіне қарай, қарулы күштер түрлі бөлімдерден және әр түрлі құрама мен арнайы әскерлерден тұрады.«Отан қорғаушылар күні» дегенде көз алдымызға не келеді? Алдымен, форма киген сарбаздар, әскер, қорғаныс істері қызметкерлері ойға оралады. Дегенмен ел қорғаны болу иыққа таққан шенге не қаз-қатар сап түзеген әскерге байланысты емес. Бастысы – Отанына адал, елін, жерін сүйген нағыз патриот болу. Жігіт әскерге барып-келсе арқадан қағып, нағыз өмірге шыңдалып келдің дейміз. Әрине, батылдыққа үйретіп, айбыныңды асыратын да сол – әскер. Ол – елім деген жас жалыннан құралады. Ал, осындай, жалынды жастардың басын біріктіріп, Отан қорғау ісіне шынықтыруға әскерге аттандыратын аудандық Қорғаныс істері жөніндегі бөлім бар.Мұнда жұмылдыру, азаматтарды мерзімдік әскери қызметке жіберу, келісім-шарт бойынша әскери қызметке тағайындау, әскери-оқу орындарына қабылдауға құжаттар дайындап, тілек білдірген түлектердің оқуға түсуіне қолдау білдіру, соларға үгіт-насихат жүргізіліп отырады. Әрі әскерге шақырылушылар мен әскери міндеттілерді есепке алумен, запастағы офицерлердің есебін жүргізумен айналысып, жиындар өткізеді. Жалпы, аудандық бөлім облыс көлемінде алдыңғы шептен көрінуде. Жылына екі мәрте әскерге шақырылым ұйымдастырылатын болса, сол науқанда бірнеше бала әскерге аттандырылуда. Ал, әскерге барғысы келмейтін жігіттерге ұдайы насихат жұмысы жүргізіліп, рейдтер өтеді. Оған аудандық білім, ішкі саясат бөлімдері мен кент, ауылдық округ әкімшіліктері қолдау көрсетеді. Онымен қоса, Ауған, Тәжік-Ауған соғыстарының ардагерлері, Чернобыль, Невада-Семей ардагерлері, жалпы қоғам болып жастардың Отан алдындағы борышын өтеуге баруға үлесін қосып келеді.Иә, «Ер ел үшін туады, ел үшін өледі». Халықтың ұлы болу – әрбір ер азаматтың арманы болуы керек. Ал, Отан алдындағы азаматтық борышын өтеу – нағыз қайсарлықтың көрінісі болып қала бермек.Бұл соғыс кімді аяды дейсіз? Біреуді жалғызынан айырып, біреуді жапан түзде оққа ұшырды. Бірін әкесінен, бірін бауырынан ажыратты. Бірін зар илетіп, бірін мүгедек етті бұл соғыс. Азаннан қара түнге дейін ұлын күткен ана, қара қағазын қолына қысып, жолын тосып, зар жылады. Бүгінгі ұрпақ мұны көзбен көрмесе де талайын жылатқан жаңғырық әлі құлақ түбінде тұрғандай. Иә, жер бетіне шығыны мен орны толмас қасіретін әкелген Ұлы Отан соғысының Жеңіспен аяқталғанына – 79 жыл. Ешкім, ешқашан ұмытылмайды.9 мамыр – Ұлы Жеңіс мерекесі. Бейбіт аспан аясында көк байрағымыздың желбірейтін, халқымыздың жасампаз айбынын көрсететін күн. Бұл – батырлық пен батылдықтың, жанқиярлық пен жүректіліктің мерекесі. Тұтқиылдан дұшпан қарсылығына ұшырап, жау күшінен әлдеқайда әлсіз әскердің төрт жыл дегенде бес қаруын асынып, жеңіске жетуі – халқымыздың бойындағы қайсарлықтың белгісі еді. Ұлы даланың ұлдары соғыс майданында намысты қолдан бермеді. Жау шебіне атой салған 500-ден аса қазақстандық жерлесіміз Кеңес Одағының Батыры атағын алса, олардың 96-сы өз ұлтымыздан болғанын есімізден қалай шығармақпыз. Бауыржан Момышұлы, Талғат Бигельдинов, Әлия Молдағұлова, Мәншүк Мәметованы ұмыту мүмкін емес. Майданға алынған 1 миллион 200 мың қазақстандық аттанды. Ал, өзгелермен қатар, жойқын қақтығысқа аттанған – 10 500 қазалылықтың, 5 мыңы ғана елге аман оралған.Қазақ соғыс кезінде сталиндік қуғын-сүргінге тап болған талай ұлт пен ұлысқа құшағын ашып, талайына пана болды. Жеңісті жақындатуда соғыс шебінде кескілескен ұрыс жүріп жатса, тылда да жанкешті еңбек майданы жүріп жатты. Жыр алыбы Жамбылдың «Ленинградтық өренім» атты өлеңін бүкіл Кеңес одағы жатқа айтты. Барлық радиолакацияда күніне бірнеше мәрте қайталанды. Рух берді, демеу болды, дем берді.Естеліктер, қуаныш, сағыныш. Мұндайда сұрапыл соғысты есіне қайта түсірген аталарға қарап тағы мұңаямыз. Басынан не өтпеді десеңші. Сондағы батыр әкелердің соғысқа қатысқаны – ұрпағының, яки біздің бейбітшілікте өмір сүруімізді қалағаны еді. Осылайша олар аттың жалында, түйенің қомында жүріп бізге бейбіт өмірді сыйлады. Уақыт өткен сайын Ұлы Жеңістің маңызы артып келеді. Ал бізге нағыз патриоттықтың үлгісін көрсеткен аталардың қатары сиреп кеткен. «Біздің көрген соғысты сендерге Алла көрсетпесін» дейтін олар. Майдан мен тылдың біртұтас қимыл-әрекеті сол Ұлы Жеңісті әкелді де. Зұлмат жылдың ізі өшкен жоқ әлі. Соғыс өртінің шарпуы тимеген шаңырақ жоқ шығар, сірә? «Майдан», «тыл» деген атау ғана. Әйтпесе, бірі – мылтықты, бірі – мылтықсыз. Екеуі де жанкешті шайқас болатын. «Тылдағы еңбек болмаса, майданда жеңіс те болмас еді» деген еді Бауыржан Момышұлы. Сол еңбекпен біте қайнасып, талмай-тынбай қызмет еткен тыл ардагерлері қазір арамызда бар. Өкініштісі олардың да арасы сиреп бара жатқаны. Уақытқа кім тоқтау болар дейсіз?Ер азаматты оқ, бала-шағаны жоқ қинаған заман еді ол кезде. Қаншама адам қорғансыз, асыраушысыз қалды. Талай тарлан, небір боздақ құрбан болды. Талай жесір көзінің жасын бұлады, талай бала «әкешім» деп жылады. Бір кездері айдарынан жел ескен ер-азаматтар ауылы ақжаулықтылар ауылына, жайнаңдаған жастар мекені қариялар мекеніне айналған сол бір қасіретті шақты ойға алсаң жүрегің сыздайды. Иә, сұрапыл соғыста қаншама адам қыршыннан қиылды. Олар Отан үшін өз жанын пида етті. Ал олардың әрқайсысының анасы, баласы, сүйген жары, үлкен арманы бар еді. Алайда олар елге қауіп төнгенде оның барлығын құрбан етті. Бұл – шынайы ерлік болатын. Отан үшін отқа түсіп, өскелең ұрпаққа Жеңіс сыйлаған әрбір ардагерге бүгінде ұрпақтары тағзыметеді....Ресей мен Украина арасындағы дау ушығып, соғыстың қызыл алаңына айналды. Палестина мен Израиль ше? Көркем қалалардың тас-талқаны шығып, бейбіт тұрғындар қаза табуда. Қазіргі бұл соғыстың зардабы бір емес бірнеше елге тиіп, бірнеше компаниялардың қызметі тоқтады. Арадағы алауыздықтан біздің елдің адамдарының ойы да екіге бөлінді. Ой сан-саққа кеткен талайы соғыстың оңай емесін ұқты. Жанын шүберекке түйіп, бейбіт заманда бейбіт адамның оққа ұшқанын көру, есту кімге де болмасын ауыр. Әлемде соғыс болмасыншы...

Елдікке жеткізген ерлікті ешкім ұмытпайды

<a href="https://kyzylorda-news.kz/">Kyzylorda-news.kz</a>&nbsp; Әлемді дүр сілкіндірген екінші дүниежүзілік соғыстың қасіреті мен Ұлы Жеңістің қасиетін, батыр аталарымыз бен апаларымыздың ерлігін ешкім де, ешқашанда ұмытпақ емес. 9 мамыр – Жеңіс күні. Бұл мереке әлемді тыныштықта тербететін бейбітшілік пен ынтымақтастықтың әрқашан жеңетінін дәлелдеді. 1418 күнге созылған сұрапыл соғыста Отанын қорғаған қаһарман жауынгерлердің айбыны мен тылдағы жеңісті жақындатқан жұмысшылардың ерлік еңбектері біздің санадан мәңгі өшпейді.Елу миллионнан астам өмірді жалмаған екінші дүниежүзілік соғыс әр қазақ отбасы үшін орны толмас қайғы-қасірет әкелді. Аяқ астынан басталған әділетсіз арпалысқа Қазақстаннан екі миллионға жуық түрлі ұлт өкілдері әскер қатарына шақырылды. Майдан даласынан – 394 мың қазақ боздағы қайтпай қалды. Бірінің әкесі, бірінің ағасы қаза тапты. Қаншама көкөрім боздақтардың қыршын жасы қиылды. Қауызын ашпай, көктей қырқылған жандардың қатарында – 10 500-ден аса қазалылық жерлесіміз бар. Отан қорғауға Қазалыдан аттанғандардың – 5 мыңдайы ғана жаралы, әрі науқас күйінде елге оралды.Еркіндік пен қатыгездік тайталасқан айқаста ерен ерлік танытқан қазалылық алты азамат Үрмәш Түктібаев, Геннадий Шляпин, Яков Михайлюк, Владимир Счастнов, Мақаш Балмағамбетов, Біліс Нұрпейісов Кеңес Одағының батыры атанды.Бүгінде қан майданнан оқ пен оттың арасынан аман қалып, туған жерге табаны тиген Ұлы Отан соғысы ардагерлерінің қатары жыл санап азайып кетті. Қазір арамызда қалғаны – Тілеуберген Тобаберген ғана.Адамзат тарихына «Ұлы Отан соғысы» деген атпен қалған жойқын қақтығысқа аттанған сол бір сұрапыл сәттер куәгері Тілеуберген Тобабергенов атамыз. Мерейлі мереке қарсаңында ерлік пен өрліктің өшпес өнегесіне айналған майдангердің шаңырағына ат басын бұрдық.«Отан» деген қасиетті сөздің қадірін қастер тұтатын, Әйтеке би кентінің тұрғыны Тілеуберген Тобабергеновтің жастық шағының от пен оқтың ортасында өткеніне ешқашан өкінген емес. «Тәубе» деуден таймайды.Қазалы ауданының №2 ауылдық кеңесіне қарасты Жамбыл колхозында дүниеге келген кейіпкеріміз Тобаберген мен Рыскүлдің тұңғышы болып өмір есігін ашады.Колхозда әкесі егінші, анасы сауыншы болып, жер емген ата-анадан тәлім-тәрбие алып өскен ұл еңбекке ерте араласады. Бұғанасы қатпай жатып, колхоздың түрлі жұмыстарына қолқабыс етеді. Отбасында да соңынан ерген бауырларына қамқор болып, жастайынан жауапкершілік жүгін сезініп өседі.«Ел санасына төңкеріс енгізген «Соғыс» атты салқын сөзді естіген жұртта ес қалмады. Бірі әлі не болғанын түсіп үлгермесе, бірі жағдайға мойынсұнып, жанын шүберекке түюде. «Ер басында күн туса, Етігімен су кешер» дегендей, тез байламға келуіме тура келді. Бойда бұла күш, жастық жігер сынға түсуге дайын болса да, алдымнан қандай қиындықтың күтіп тұрғанын топшылай алдым деу қиын», – дейді соғыс куәгері сол сәттен сыр тартып. Әскери комиссариатқа өзі сұранып барған бозбаланы шығарып салып тұрған әке: «Балам, ел көргенді, бірге көресің! Сенің бабаларың жаудан қайтпаған. Алла жолыңды оңғарып, аман-есен орал!» – дейді жігерін жанып. Көз жасын орамалының ұшымен білдірмей сүртіп тұрған ана іштей егіліп тұрса да, көзі күлімдеп: «Қыдыр атаң қорғанышың болсын!» – дегенді әрең айтып, қол бұлғап қала береді. Өскен ортасынан бұрын-соңды ұзап көрмеген Тілеуберген ұшқан ұяның неге туған жер аталатынын терең ұғына түсті.Тіркеспелі ағаш вагондардарды жетелеген пойыз бірнеше күн жүріп, Шығыстағы Өзбекстанның астанасына әкеледі. Тәшкент маңындағы Шыршық стансасына жеткізілген жігіттер қаруды пайдалану, жедел әрекет жасау сынды әскери ұрыс-қимылдарға машықтанады. Бір айдан соң эшелонға тиеліп, Мәскеу іргесіндегі Смоленск қаласына жеткізіледі.«Әскери дайындық, аңшылық мүлдем бөлек дүние. Алғашқы әсер туралы айтуға әлі қиналамын. Көрмеген адамға айтып жеткізу қиын. Сезіну бір бөлек. Ойлануға, қорғануға, пысықтауға уақыт тапшы. Табандылық пен ұстамдылық, қобалжымау маңызды», – дейді майдангер.150-ші зеңбіректі атқыштар полкі құрамына енеді. Атқыштар ұрыс даласындағы үнемі алғы шептен табылатын негізгі тактикалық күш.Араға жыл салып, 291-атқыштар полкі құрамына қосылып, Польша, Чехословакия, Белорусьті жау қоршауынан босату үшін қауырт қақтығысқа кіріседі. Стратегиялық маңызды шаһарларды қорғауда тойтарыс береді. Бірбеткей, намысқой жігіт жаумен бетпе-бет келіп, қиын тапсырмаларды орындауда қаруластары арасында дараланады.1943 жылы Кенигсберг қаласына келеді. Тәжірибелі мергендер майданның бұл жерінде де, қанқұйлы шайқасқа түседі. Қоршауды бұзып, мыңнан астам фашистің көзін жояды. Қаруластарының қатары азайғанына қарамай, командир бұйрығымен аз күш алға ұмтыла түседі. Сол сәтте снаряд жарқыншағы тиіп, жауырынан қатты жарақаттанады. Үш ай әскери госпитальда емделгенімен, отты күннен қалған ойық жанға емес, тәнге терең салынған таңба әлі тұр.Соғыс әлі жүріп жатыр. Күш азайған. «Қолға қару алуға жараймын, қалғанын пешенемнен көрермін» деген Тілеуберген Калининградты жаудан азат етуге атсалысады. Атақшы маршал Г.Жуков басшылық ететін 158 гвардиялық полкінің 28-автомат ротасы сапында кескілескен күндерді басқыншылар аяғын бастырмау үшін жанталасады. Бұл кезеңде де, қолынан жарақаттанады.Рахымжан Қошқарбаев Рейхстагқа Жеңіс туын тіккен айтулы күнді қатардағы жауынгер дәл сол Берлинде қарсы алды. Бас қолбасшы И.В.Сталиннің Алғыс хаты, омырауында жарқыраған «Кинигсверг қаласын азат еткені үшін», «Германияны жеңгені үшін», «Ерен еңбегі үшін» медальдары ерлікке лайықты құрмет белгісі.Азаттық жолында жан аямай шайқасып, Жеңісті жақындатуға үлкен үлесін қосқан ер соғыс біткен соң неміс-фашист тұтқындарын күзетуге қалдырылады. Екі жылдан соң елге оралады. Ата-ана, тілеулестің тілегі орындалды. Қиналғанда жақындарының Тілеуберген деп ат қойғанын тұмар етіп, өзін қамшылай түсіп, аман қалуына Алланың бір белгісі деп топшылайтын.Елге келісімен қазіргі теміржол бойындағы әскерилендірілген күзет мекемесіне күзетші болып орналасады. Осы орында он жыл нәтижелі жұмыс істейді. 1958 жылы аудандағы белді құрылыс мекемесі «ПМК-86»-ға ауысады. Ауыр техникаларды тізгіндеп, зейнетке шыққанша тер төгедіҒасырға жуық ғұмыр кешкен қазалылық соғыстың соңғы сарбазы шеруге шығып, мерекелік шараға бармаса да, әлі тың. Оның сырын қызы – Марал Дүзбай ауыр еңбек пен белсенді азаматтық ұстанымынан таймағанымен байланыстырады. Қадірменді қария кездесуімізде елді жақсылыққа білім, тәртіп, еңбек жеткізетінін айтты. Сондай-ақ, бейбітшілік – басты байлық, Тәуелсіздік – төл тұмарларың болуы керек дегенді де, санамызға зерделеді.

Тілеуберген Тобаберген: Тәуелсіздік – төл тұмарың болуы керек

<a href="https://kyzylorda-news.kz/">Kyzylorda-news.kz</a>&nbsp; Тергеу ішкі істер органдарында қылмыстарды тергеуді, анықтауды және ашуды қамтамасыз ететін және тергеу, анықтау және әскери-тергеу бөліністерін үйлестіруді жүзеге асыратын бағыт болып табылады.&nbsp;Негізгі функцияларына ішкі істер органдарының тергеуіне жатқызылған қылмыстардың жан-жақты, толық және объективті тергелуін қамтамасыз ету мақсатында тергеу, анықтау бөліністерін және әскери-тергеу бөліністерін ұйымдастырушылық-әдістемелік басқару және аймақтық бақылау; тергеу, анықтау бөліністерінің және әскери-тергеу бөліністерінің қызметін ақпараттық-аналитикалық қамтамасыз ету; қылмыс жасаған адамдарды уақтылы әшкерелеу және қылмыстық жауапкершілікке тарту, жасалған қылмыстар үшін жазаның бұлтартпастығын қамтамасыз ету; әскери қылмыстардың алдын алу, анықтау, жолын кесу және ашу кіреді. Сонымен қатар, қылмыстық істерді тергеу барысында азаматтардың, ұйымдардың және мемлекеттің құқықтары мен заңды мүдделерін қорғау; қылмыстық іс жүргізу саласындағы халықаралық ынтымақтастық пен қылмыстар профилактикасы мен қылмыстарды анықтаудың, ашудың және тергеудің отандық және шетелдік оң тәжірибені зерделеу, жалпылау және ішкі істер органдарының практикасына енгізу жатады. Сондықтан да, тергеу – ең ауыр, ең күрделі қызметтердің бірі саналады. Бұл саланың тарихы да, тереңнен бастау алады. Тікелей адам тағдырын шешетін тергеушілердің маңыздылығы мен ішкі істер органдарындағы орны ерекшеленіп тұрады.Кеңес Одағы ыдырағаннан кейін еліміздің тәуелсіздігімен қатар тергеу аппаратының да дербес даму кезеңі басталды. Бірақ алғашқы сәттен-ақ ішкі істер органдары үлкен сынаққа ұшырады. Әлеуметтік жағдайдың төмен болуына байланысты Қазақстанда қылмыстық топтар бас көтеріп, қанат жайды. Қылмыскерлер заңның осалдығын пайдаланып, еркін әрекет етті. Қызметтегі түрлі өзгерістер мен қиындықтарға қарамастан тергеушілер өз міндеттерін адал орындады. Қылмыс орындарына барып, айғақтар мен дәлелдемелер жинап, күдіктілерден жауап алды.Бассыздықты жойып, ұйымдасқан қылмыстық топтарды құрықтау мақсатында 1995 жылы Қазақстанда тергеу органдарының елеулі реформасы жүргізілді. Осы жылдың 6 қазанында Президент Жарлығымен республикада Мемлекеттік тергеу комитеті құрылып, жеке дара ведомствоға айналды. Алайда басқа қылмыстардың назардан тыс қалуына, ішкі істер органдарымен өзара байланыстың болмауына және басқа құқық қорғау органдарымен бәселекестіктің орнауына байланысты 1997 жылы 5 қарашада Мемлекеттік тергеу комитеті таратылып, ондағы тергеу аппараты Ішкі істер министрлігі жүйесіне берілді. Кейіннен алдын-ала тергеу жүргізуге құқығы бар басқа да органдар анықталды. Олар Ұлттық қауіпсіздік комитеті, Экономикалық қылмысқа және сыбайлас жемқорлыққа қарсы күрес агенттіктері болды. 2015 жылы Қазақстан Республикасы қылмыстық сот өндірісінің негіздері түбегейлі қайта өңделіп, жаңа Қылмыстық кодекс пен Қылмыстық-процестік кодекс қолданысқа енді. Осы орайда алдын-ала тергеудің орнына сотқа дейінгі тергеп-тексеру жүйесі енгізілді. Бұл қылмыстық іс жүргізу барысын электронды форматқа ауыстыруға алғашқы қадам болды. Заман ағымымен келген өзгеріс қылмыстық процестің ашық болуына, жалған құжаттарды жасау қауіптерін барынша азайтуға, онлайн режимде жүйелік ведомстволық бақылау мен прокурорлық қадағалауды жүргізуге мүмкіндік берді. Жаңа кезеңге аяқ басқан сайын тергеушілердің де біліктілігі артып келеді. Оған дәлел – 2020 жылы ашылған қоғамда резонанс тудырған қылмыстар. Оның бірі – республикамыздың 15 өңірінде 18 мыңға жуық адамға 30 млрд-тан астам теңгеге шығын келтірген қаржы пирамидалары. Тергеу қызметі 30-дан астам қылмыстық істі тіркеп, күдіктілердің кінәсін дәлелдеп, жәбірленушілерге келтірілген шығынды қайтару үшін үлкен жұмыс атқарды. Осындай тағы бір мысал – Бахрейнде адам саудасымен айналысқан қылмыстық топтың әрекетіне қойылған тосқауыл. Ішкі істер министрлігі қыздарды сексуалдық құлдықта ұстағандарды әшкерелеп, жәбірленушілердің елге оралуына көмектесті. Бұл істің ашылуында да тергеушілер маңызды рөл атқарды. Бүгінде 60 жылдық тарихы бар тергеу қызметі – ішкі істер органдарындағы негізгі салалардың бірі. Қылмыстық процестің үш буынды моделі бойынша жұмыс істейтін бұл жүйе жылдан жылға дамып келе жатқанын айта кеткен жөн. Қазақстандық тергеушілердің жұмысына шетелдік озық тәжірибелер енгізіліп, халықаралық қатынастар нығайтылуда. Көршілес елдердің тергеу қызметтерімен, Интерпол ұйымымен байланыс жолға қойылған. Тергеу бөлімшелері қызметкерлерінің қоғамдық қауіпсіздікті нығайтып, азаматтарымыздың құқықтарын сақтап, жұмыстарына адал болуына бар жағдай жасалуда.Осы ретте қоғамдық тәртіп пен азаматтар қауіпсіздігін қорғауда ішкі істер органдары жүйесінде тергеушілер мен анықтаушылардың рөлі айрықша маңыздылығы айтпаса да, түсінікті. Бүгінде Қазалы аудандық полиция бөлімінің тергеу-анықтау бөлімшесі әріптестері арасында абырой биігінен көрініп келеді. Қырағылық пен білім, сауаттылықты қажет ететін орында мамандар кәсіби табыстарға жету жолында уақыт талабына сай, ізденіс үдесінен табылуда.Маңызды қызметтің жүгін абыроймен арқалап жүрген тергеушілер өз ісінің майталмандары ретінде қылмыскерлерді аса сақтылықпен құрықтап қана қоймай, бұлтартпайтын айғақтар арқылы, оның ақ пен қарасын айырып, Қазақстан Республикасы заңына сүйене отырып, тергеу амалдарын жүргізеді.Тергеуші мамандығы қашан да, шынайылық пен төзімділікті, сауаттылықты талап еткен. Қылмыстық кодекстің баптарына сәйкес, істі жан-жақты зерттейді. Адам тағдырына деген жауапкершілік үшін ақиқаттың ақ жолынан ауытқымау кез келген адамның қолынан келе бермейді де. Тергеу қызметінің ең ауыр жүгі – ар алдындағы адалдық. Осындай ауыр жұмыстың жүгін арқалаған тергеушінің әр күні ғана емес, әр сағатының өзі қым-қуыт оқиғамен өріліп жатады. Ал, полиция қызметінде тергеушілік ісіне ғұмырын арнаған жеке адамдардан бөлек, тұтастай бір әулеттер де аз емес. Бүгінгі күні қоғамдағы тәртіп пен берекені бұзып, айналаны дүрбелеңге салатын қылмыстар мен құқық бұзушылықтар қатары жеткілікті екені сіз бен бізге мәлім. Ал, қылмыскерлердің жасаған қылмысының ақ-қарасын ажыратып, кінәлілерді анықтап, қоғам тыныштығын күзету жолында қызмет ететін тергеушілердің еңбектері ерен деп айтсақ артық болмас. Нағыз өз ісіне берілген мамандардың ұстанатын талап үделері бар. Әдетте, тергеуші өзінің қызметтік міндеттерін орындаған кезде үш арнадан бастау алады. Біріншісі – процессуалдық нормалар. Екінші – тактикасы, тергеуші қылмысты із суытпай тез арада ашып, кінәліні анықтау мақсатында өзінің тактикалық жүйесін, әдіс-тәсілін күні бұрын анықтап қоюы керек. Ал, үшіншісі – әдептілік қағидалары. Соған сай, тергеушілердің тегеуріні мықты болуы керек.Қылмыс атаулыны құрықтап, қылмыскерді іздеп тауып, олармен бетпе-бет тілдесетін, бар кінәсін бұлтартпайтын айғақтармен мойындататын маманның бірі – тергеуші. Тергеуші мамандығы қызметте сауаттылық пен білімділікті, ой ұшқырлығы мен төзімділікті талап етеді. Тергеушінің негізгі қағидаты – азаматтардың құқықтары мен бостандықтарын сақтау, заң шеңберінен аспауы керек.Басқаша айтқанда, қылмыстық істі тергеудегі басты кейіпкер – тергеуші. Сондықтан, олар ең алдымен, адамның жан дүниесін әбден біліп алуға міндетті. Ал, тергеушінің түпкі тұтқасы – оның әдептілігі мен кәсібилігі. Тергеуші өз жұмысында жағымсыз фактілермен жиі кездеседі, сондықтан да, эмоцианалды тұрғыдан тұрақты, ұстамды, төзімді болуы тиіс. Тергеуші заңды жақсы меңгеріп, қылмыстық-процестік заңнаманы жақсы білуі және олардың талаптарын сақтауы міндетті. Тәжірибе мен біліктілікті тең ұстап, әділдіктің ақ жолынан таймау, алдыңа келген әр жанның шынайы бет-бейнесін тану, психологиялық қарым-қатынасты бағыттай білу кез келген заңгердің қолынан келе бермейтін ауыр да, жауапты іс. Сондықтан да бұл істің мамандары әрқашан қызметте тәжірибе алмасып, тығыз байланыста қызмет атқарады. Әрбір жауапты істі жауапкершілікпен нәтижелі аяқтауға асығатыны тағы бар.Деректерге көз жүгіртсек, өткен жылдың 9 айында Қазалы ауданында 240 қылмыстық іс тіркелген. Оларды түрлі бағыттарына қарай саралап, оң шешімін табуға атсалысқан. Тергеушілердің тегеурінді талаптары арқылы сотқа – 106 іс жолданған. Олардың – 10-ы ауыр, 42-сі аса ауыр. Бұлтартпас айғақтар арқылы кінәлілерді дәл табу биыл да, оң көрсеткіш көрсетіп отыр.2024 жылдың жыл басынан бері – 64-қылмыстық құқық бұзушылық іс қаралған. Өткен жылдың үш айында құқық бұзушылық іс – 93-ті көрсеткен. Тергеу өндірісіне – 46 қылмыстық іс түскен. Анықтау өндірісінде – 18-іс болса, 29 қылмыстық іс тергеу, 12 қылмыстық іс анықтаумен шешімін тапқан. Мерзімі асырылып, тергелген қылмыстық істер саны біреу ғана. Қылмыстық істерді сотқа жолдау бағытында жеделдік бар. Осы уақыт аралығында – 23 қылмыстық іс жолданса, &nbsp;8 іс тоқтатылған. Қайта тергеуге қайтарылған, ақтау үкімімен шыққан істер жоқ. Таңдаулылылар тоғысқан бөлімшеде іріктелген мамандар ғана қызмет атқарады. Аға тергеуші, полиция майоры Ғанибек Рысмамбет, тергеушілер, полиция капитаны Көбейсін Нұрбол, полиция аға лейтенанты Асхат Ғанилар тәжірибесі толысқан қызметкерлер. Аға анықтаушы, полиция майоры Оразбай Әбдіхалықов, анықтаушы, полиция капитаны Арман Ерғараевтар әмбебап маманға айналған.<blockquote>«Тергеушілер мен анықтаушылар алдында қашан да үлкен міндет, зор жауапкершілік тұрады. Бір іс бір іске, бір күн бір күнге ұқсамайды. Қандай жағдай орын алса да, қырағылық пен жауапкерішлік жүгін көтеруге күш саламыз», – дейді Қазалы аудандық полиция бөлімі бастығының тергеу жөніндегі орынбасары, бөлімше меңгерушісі полиция подполковнигі Бауыржан Тұрман.</blockquote>

Тергеу қызметі – тегеурінді жүйе

<a href="https://kyzylorda-news.kz/">Kyzylorda-news.kz</a>&nbsp; Қазалы ауданының тұрғыны Жеткербай Махамбет тұрақты оқырмандарына өзінің жастық шағындағы естелігімен бөлісті. Ол ел мен жер және отан алдындағы кеудесін кере мақтанышпен өткерген әскердегі қилы да, әсерлі сәтін айтып берді. Соңына дейін мән бере оқып шықсаңыз, біраз ойға шомдыратын дүние бар. Бәлкім ол кездің керемет шағы шығар.Ақсақалдың айтуынша, адамның өмірінің белгіленген мөлшері жоқ. Оның бағасы жасаған жасымен емес, еңбегімен, қоғамға адамдарға тигізген пайдасымен, отанға деген сүйіспеншілігі, соңында қалған ұрпағының бойына сіңірген үлгі-өнегесімен өлшенеді.Жас ұрпақ мектеп қабырғасында жүргенде өз денсаулығының мықты болуына көңіл бөліп, спортпен шұғылданып, алғашқы әскери өнерге ден қойса, азаматтық парызын өтеуге барғанда қиналмай, қорықпай, айналасындағылардың қай-қайсысымен де, тез тілтабысып кететін болады. Өйткені, ол өзіне сенімді екенін көрсетеді. Адал адам отбасына, әулетіне, қызметіне, жеріне, еліне, Отанына адал болуы керек.<blockquote>– Мен әскери борышымды өтеуге үш жыл кейін бардым. 1966 жылы, №70 кәсіптік-техникалық училищесінде еңбек шебері болып жүріп, азаматтық борышымды өтеуге 25 желтоқсанда армия қатарына шақырылдым. 1967 жылы №7 Алматы-Москва поезында жаңа жылды жолда қарсы алдық. Бізді әскери теңіз флотының капитаны бастап, Солтүстік мұзды мұхитына Мурманск облысының Севедоморск қаласына алып келді. Бұл жерде дәрігерлік тексеруден өткізіп, көбісін жағадағы әскери жасақтарға жіберді. Біздер Қазақстаннан барған қазақ балалары сынақтан сүрінбей өтіп, әскери формамызды киіп сол жердегі корабльдерге бөліндік. Төрт жігітпіз. Қазалыдан екеу, Қызылорда және Шиеліден. Мина таситын корабльге келдік. Корабльде бір ай оқып, корабльдің құрылысы, әскери флот жарғысын жаттап, емтихан тапсырдық. Корабльдің командирі Борис Апушкин келіп, бізбен танысып, оңболсын айтып, жағдайымызды сұрап жатыр. Біз кірген корабльде он бір ұлт өкілі болды. Басқарып жүрген аға сержанттар, старшиналармен танысып, бір үйдің баласындай тату-тәтті әскери міндетімізді абыроймен атқаруға кірістік, – дейді қазалылық Жеткербай Махамбет.</blockquote>Жауынгерлік достықтағы басты нәрсе – өзара түсіністік, адамның адамгершілігін құрметтеп, сыйлай білу, жолдасының іс-әрекетін мадақтап, көтере білуге ұмтылу, қасиеті болса, тіке айтып, тоқтата білу, сөйтіп, өзің де, қаһармандық іс жасауға құлшыну болмақ. Әскери қатарында жүргенде адамның барлық қасиеті сынға түседі. Егер, елде жүргенде адамның кейбір ерекшеліктері байқалмаса, ол азаматтық парызын өтеу үстінде ашылады. Әскердегі адамның психологиясын қилы, жеке және қоғамдық өмірде адал қасиеттеріне әскери кезең әсер етпей қоймайды. Азамат әскери борышын өтеп жүріп, соғыс әдіс-тәсілдерін, қолдағы қаруларды қалай пайдалану, нысанаға дәл тию, дұшпанды одан бұрын жайрату, өлу үшін емес өмір сүру үшін машықтанады. Жастарға әскери комиссарияттан шақыру қағазын алып келген сәтте-ақ қорқыныш сезім пайда болады. Бұл қорқыныш парыз сезімінің күресі. Ал, парыз адамгершілік сезімі. Намыс, ар-ұят адамды кез келген опасыз сәтте қорғайды. Өлімнен ұят күшті. Адам өзінің ар-намысын және азаматтық абыройын қорғай отырып, ең ұлы сезім азаматтық парызын орындау үшін ата-ана, ағайын-туыстардың да қауіпсіз болуын ойлап, саналы түрде өз басын қауіп-қатерге тігуге мәжбүр болады.<blockquote>– 1967 жылы Солтүстік мұзды мұхиттан үш корабль, ортамызда басшы корабліміз бар. қақ теңізге жол тарттық. Қыстың кезі. Ашулы арыстандай ақ көбігін аспанға атып, долданып жатыр. Неше түрлі жыртқыш балықтар, акула, қос аяқ, касаткалар ауыздарын ашып, корабльді айнала жүзіп жүр. Біздер қару-жарағымызды сайлап, артиреллияларды дайындап келеміз. Біздің мақсатымыз – шетелдің корабльдерін біздің шекарамызға жібермеу. Мұзды мұхиттың бір аралына жақындағанда алыстан мұз таулары көрінді. Судың бетінде екі қабатты үйдей үсті толған шағалалар және теңізде жүзетін бөтен құстар. Сөйтіп, екі күнде солтүстік мұзды мұхит северное теңіздері артта қалып, Норвегия теңізі жағалауында келеміз. Биік ұштары біздей таулар көрінді. Тау етегінде түзу, қалың өскен қарағайлар менмұндалап көз тартады. Осы қалпымызбен аман-есен Атлант мұхитына келіп жеттік. Бұл жерде командиріміз дабыл қағып, «Абай болыңыздар! Ретсіз палубаға шықпаңыздар, дауыл соғатын жер» деп ескертіп жатқанмен біздің басымызға мұхит беті теп-тегіс айнадай жарқырап жатыр. Суда дельфиндер ойнап, балықтар секіріп, киттер тобымен төбесінен су атқылап жүзіп жатты. Жақындағаннан алып құйрықтарын салп еткізіп, сүңгіп кетеді де, 50-60 метр жерден қайта шығады. Енді жоспарымызда Жерорта бейтарап теңізі. Бұл жерде американдық вертолет, самолет қонатын үлкен кеме жүріп өтті. Германияның мина таситын торпедасы бар кемелері мен катерлері жүрген. Соған кездестік. Олар туын түсіріп, белгі беріп, сәлемдесіп жатыр. Бізде сәлемдесіп өттік. Біздің командиріміз ағылшынша сөйлеп, жарыс ұйымдастыратын болдық. Ортаға бензин құйған бөшкені тастап, соны екі жақтан ататын болдық. Үш рет айналып ату кезінде біздің зенит артериясының матростары бірінші тигізіп, бөшкені жарды. Жеңіс біздікі. Содан кейін жылдамдыққа басып, жарыс ұйымдастырдық. Бұл жарыста да, біз көш ілгері болдық. Кемелер бір-біріне белгі беру арқылы тарастық. Жерорта теңізінен Қара теңізге жеткенше, тағы қос теңізден өттік. Бұл жерлерде гректер билеген жер екен. Енді Босфор бұғазына келіп, Стамбул қаласынан өтіп, Қара теңізге бет алдық. Стамбул қаласының жағасында әскери жасақтар орналасқан. Осман империясынан қалған қорғандар, темір қоқыстар, тастан қаланған үйлер, София мешіті көрінеді. Біздер кемеде қатар-қатар тұрып, өтудеміз. Алдымызда Қара теңіз. Кемеміз барлығымызды радио арқылы бір айдың ішінде екі мұхит, жеті теңізден жер шарының экваторынан аман-есен өтіп, өз елімізге келеміз деп құттықтап жатыр. Бізде бір-бірімізді құттықтап мәзбіз. Ел тұтас дүние – оның қадірі зор. Туған жердің құдыреті ел тағдырымен байланысты және ел мен жерге деген адал махаббатын, өшпес сағынышын, асыл қасиетін шалғайда ел ішінен шығып, қиырға қара үзіп кетіп, алыста жүргендер ғана айрықша анық сезеді. Қадір-құнын жетік біледі. Сондай қашықта жүрсекте, Отанға деген сүйіспеншілігіміз артпаса, кеміген емес. Әскери теңіз флотының ортаңғы Севастополь қаласына келіп тұрақтап, әскери борышымызды жалғастырып, енді кемені жөндеу мақсатында келесі қаладағы кеме жөндейтін зауытқа келіп тұрдық. Сол жерде арнайы құрылғы көмегімен кемені көтеріп, матростарды бөтен кемеге жіберіп, тек қана, оны жөндейтін адамдарды алып қалдық, – дейді Жеткербай Махамбет.</blockquote>Қазалылық қарияның естелігін оқып отырып, оның бүгінгі жастардың әрекетіне қынжылатыны байқалады. Сол себептен де болар, ол осы бір естелігін жария етуді жөн көрді. Әрбір ер азамат өз Отанын туған жерін, отбасын қорғауға құлшынысын оятқысы келгені құптарлық іс. Осы қарт кісінің жан-дүниесін ақтара жеткізген ойынан кейін жастардың әскерге баруға деген ойы оңалар деген сенім бар.<blockquote>– Ол кезде кемедегі зенит артериясының аға сержантының қасында өз командам бар. Жөндеу жұмысына кірісіп кеттік. Әскери қызмет соңында жоғарғы орталық штатта үш айлық партия мектебі ашылып, мені соған оқуға жіберді. Оны бітіргеннен кейін партия қатарына өтіп, коммунист болып ауылға оралдым. Менің айтарым, бойында барлық абзал қасиеттері бар адамды тәрбиелеу әскерге алынғанға дейінгі кезеңде жүргізілетін тәрбие жұмысы болуы тиіс. Қазақ халқы "ұяда не көрсең, ұшқанда соны ілерсің" дейді. Балаға адамның азаматтық, бойындағы барлық жақсы қасиеттері ананың ақ сүтімен бірге берілуі қажет. Сонда ғана, Отанын, өз елін, жерін қорғайтын патриот шықпақ, – деп ойын тәмамдады Жеткербай Махамбет.</blockquote>Ел тыныш болып, аспанымызда көк байрағымыз желбірегені қандай керемет көрініс десеңізші.

Жеткербай Махамбет: Ұяда не көрсең, ұшқанда соны ілерсің

<a href="https://kyzylorda-news.kz/">Kyzylorda-news.kz</a>&nbsp; Қызылорда қаласындағы М.Мамбетова атындағы педогогикалық колледждің ағылшын пәні бойынша 1-ші курс студенті Гүлбибі Жақсыбай майдангердің шөбересі. Ол өзінің қайсар мінезді атасы жайлы естелікті айтудан жалықпайды.– Менің әкемнің әкесінің әкесі Жақсыбай Қонақов деген кісі 1942-1945 жылдар аралығында Ұлы Отан соғысына қатысқан.1943 жылы жеңіл, 1945 жылы орта дәрежелі түрде жаудың оғынан жарақат алып әскери госпитальдан емделіп, соғысқа қатысуын жалғастырғаны жайлы әскери билетінде көрсетіліпті.«Ленинградты алғаны үшін», «Сталинградты алғаны үшін, «Германияны жеңгені үшін» медальдарымен «Бреслевль бекінісін алғаны үшін» Бас қолбасшы И.В.Сталиннің алғыс хатымен марапатталған және Ұлы Отан соғысының ІІ дәрежелі орденінде алған әскерден кіші сержант шенімен 1945 жылдың тамызында елге қайтқан. Жеңіс салтанатын Германияның астанасы Берлинде тойлаған. Елге келген соң да, Қожабақы, Абай, Сталин колхоздарында егін де еккен, бақташы да, шопан да болған.Бейбіт замандағы ерен еңбектері де ескеріліп, В.М.Лениннің 100 жылдық мерекелік, Еңбек ардагері медальдарымен қатар Ұлы Жеңістің 30, 40 жылдық мерекелік медальдарында иеленген. Бұл кісі жайлы кеңінен Алматыда тұратын шежіреші Мырзағұл Айтенов атаның «Шөмекейлер шежіресі» кітабында, өзімнің атам Беганыштың «Менің әкем майдангер» кітапшасында жазылған, – дейді Гүлбибі Жақсыбай.Жақсыбай атамның 8 ер, 2 қыз баласынан тараған ұрпақтары Қазалыда, Қ.Пірімов, Ақай ауылдары мен Байқоңыр, Астана Алматы, Қызылорда қалаларында өніп-өсіп жапырақтарын жайып жатырған жайы бар.1996 жылдың 12-сәуірінде дәл космонавтар күні 93 жыл өмір сүріп, бақилыққа аттанып, Қ.Пірімов ауылына қарасты «Көбек төбе» қорымынан мәңгілік мекенін тапты. Мен ғасыр жасаған соғыс және еңбек ардагерінің шөбересі екенімді мақтан тұтамын. Тегім Жақсыбай болғандықтан Ұлы Отан Соғысының аяқталғанына – 79 жыл мерекесіне орай атамды еске алып отырған жайым бар дегенді алға тартады.

Гүлбибі Жақсыбай: Мен атамды мақтан тұтамын

<a href="https://kyzylorda-news.kz/">Kyzylorda-news.kz</a> Сол бір сұм соғыс жылдарындағы отты күндер адамзат санасынан еш өшпек емес, себебі оның құндылығы ғасырлар бойы жаңа бас буын ұрпаққа өсиет. Жеңісті жақындатқан жауынгер аталарымызға қандай құрмет көрсетсекте лайықты. Айбынды білектерімен Отан үшін бар күштерін сарқыған кешегі жігіттер бүгінгі, өнегелі аталарымызды ардақтау-абыройлы міндет. Міне, кешегі бейбіт аспанды кейінгі ұрпақ үшін киелі болсын деп қан-майданға аттанған жауынгердің бірі, менің әкем – Сейітхан Байдүйсенов.1925 жылы 16 қаңтарда Бірлік колхозы, Ақүйік өзені бойында дүниеге келген әкем Сейтхан кешегі Отан үшін от кешкен екінші дүниежүзілік соғыста Украйна майданында №271 атқыштар дивизиясында полк барлаушысы болып, жаудан Киев, Харьков, Житомир, Винница қалаларын азат етіп, «Қызыл жұлдыз» орденімен, екі рет «Ерлігі үшін» медалімен, және Жеңістің мерейтойлық мерекелік медалдарымен марапатталған соғыс ардагері ретінде кейінгі жас ұрпаққа өнеге боп, тарихта мәңгі қалмақ.Әкемнің майдан жолындағы әскери ғұмырнамасы 2010 жылы Алматыда жарық көрген «Ерлікті сүйген ел нұрлы» атты эпопеялық жылнамалар, тарихи шежірелер жазылған қаһармандық кітаптың қасиетті парақтарына жазылды.2005 жылы Астанада өткен «Ұлы Жеңістің 60 жылдық» әскери парадына қатысты. Елбасының қабылдауында болып, шексіз құрметке бөленді. Тәуелсіздік алғаннан кейін «Астана қаласына-10 жыл» мерекелік медалімен марапатталды. Ұлы Жеңістің 60 жылдығында Украйна президенті Л.Кучманың «60 РОКІВ визволення Украйни ВІД фашистських загарбників» атты мерекелік медалімен марапатталды.Тау тұлғадай болған әкемнің дара жолы тарихи сәттермен байланысты. Елдегі қиыншылықтарға қарамастан 1933 жылы Бірлік колхозында ең алғаш ашылған мектептің тұңғыш оқыған 14 баланың бірі ретінде сауатын ашқан алғашқы шәкірт ретінде С. Қожанов атындағы №55 «Бірлік» орта мектебінің тарихына жазылды.Соғыс бітіп, ел еңсесін тіктеп, бейбіт өмірге көшкен кезде әкем халық ағарту салаларында 1971 жылға дейін қызмет етті. Интернат тәрбиешісінен бастап, оқу ісінің меңгерушісі, мектеп директоры, аудандық оқу бөлімінде мектеп инспекторы болды. 1971 жылдың маусым айынан бастап 1985 жылдың 19 қаңтарына дейін Ақүйік ауылдық советі атқару комитетінің төрағасы болып кызмет етті. Осы қызметпен облыс көлеміндегі дербес зейнеткер қатарына шықты.Әкемнің Кеңес заманындағы еңбегі бір бөлек те, тәуелсіздік алғаннан кейінгі жеке қожалық құрған еңбегі бір бөлек. Ауылдық кеңесті 15 жыл басқарған адам тәуелсіздіктің алғашқы қиын жылдарында «бұл не болды деп» салысы суға кетпей, бірден қожалық құрып, елге үлгі көрсетті.1995 жылы аудан әкімінің рұқсатымен Ақүйік өзені бойынан 3 га жер алып, шаруа қожалығын ашып, шағын 12 квт электр жарығын беретін су күшімен су диірменін іске қосты. Тоқырау жылдары ауыл тұрғындарын ұнмен қамтамасыз етіп, көмегін көрсетті. Тоқсан бес жылдық ғұмыры артында қалған ұрпағына үлгі, кейінгі жас толқын-жастарға өнеге болары сөзсіз. Адам өмірінің соңғы сәттері ұлы күреспен өтетініне көзім жетті. Адам баласы жарық дүниеге тойған ба? Алматы қаласына 1000 жыл толғанда 100-ге толып, дүниеден көшкен қазақтың Хабиба Елебекова деген кейуана актрисасы өмірінің соңғы сәтінде Мәдидің «Қарқаралы» әнін айтып өмірден өтіпті. Бұл енді – нағыз өнер адамына тән ұлылықтың үлгісі болса керек!Ал, менің Отан үшін от кешкен от жүректі әкем соңғы демі біткенше намазынан жаңылмай, Жаратушы бір Аллаға мадақ айтып өтті. Бұл – жарық дүниеге деген іңкәрліктің үлгісін көрсеткен, еш уақытта ұмытылмайтын, қайталанбайтын қимас сәттер жүрегімізде мәңгі сақталатын шамшырақтай боп қала берді. Әкем қолына таяқ ұстамай, бойын тік ұстап, намазын қаза қылмай, құдайға құлшылықты мешітте өткізді. Өзінің әдеп жолымен, ізетімен әдемі қартая білудің үлгісін көрсеткен, көркемдіктің, рухани тазалықтың символы болған адам.Әкем Сейтхан Байдүйсенұлы – өмірде тек тазалықты, әділдікті ту етті. Табиғатты аялап, отырған жерін бауға айналдырды. Еліне, халқына қызмет жасады. Соғыстан аман оралып, бау-шарбағын түзеп, ұрпақ өсірді. Қандай қиыншылық болса да алдыңғы шептен көріне білді.Ия, осындай батыр аталарымыздың өмір жолы өскелең ұрпақты ұлтжандылыққа, Отанды сүюге тәрбиелеуге өнеге болары сөзсіз. Жеңіс жолын жақындатқан жауынгер аталарымыздың есімі ұрпақ жадында мәңгілікке сақталады. <img src="https://knadmin.beoblood.kz/uploads/53824744_225c_4160_b190_64141ce44809_388b6185fb.jpg" alt="53824744-225c-4160-b190-64141ce44809.jpg">

Майдангер ерлігі – жас ұрпаққа өнеге

<a href="https://kyzylorda-news.kz/">Kyzylorda-news.kz</a> Қорғаныс министрі генерал-полковник Руслан Жақсылықов Жеңіс күнімен құттықтады, деп хабарлайды El.kz ақпарат агенттігі.Құрметті сарбаздар мен сержанттар, офицерлер мен генералдар!Қымбатты отандастар!9 мамырда біз Жеңіс күнін атап өтеміз.Ұлтына, дініне немесе әлеуметтік мәртебесіне қарамастан, бейбітшілік пен теңдік үшін болған бұл соғыста адамзат жеңіске жетті.Жыл өткен сайын қанды шайқастың куәгерлері азайып барады.Содан бері 79 жыл өтсе де, біздің халықтарымыздың өз Отаны мен бүкіл Еуропаны фашист басқыншыларынан азат етудегі&nbsp; ерлігі ешқашан ұмытылған емес. 1945 жылы 9 мамырда ІІ дүниежүзілік соғыстың қанды парағы жабылды.Қазақстанның қаһарман ұлдары мен қыздары өзге республикалардың өкілдерімен бірге жауға қарсы тұрды. Біздің аталарымыз бен әкелеріміз Брест бекінісіне, Мәскеу мен Ленинградты қорғауға, Сталинград пен Курск шайқастарына, бұрынғы Кеңес Одағының, Шығыс және Орталық Еуропаның оккупацияланған аумақтарын босатуға және Берлинде Рейхстагқа Жеңіс туы тігілген күнге дейін қан төкті.Сол кезде соғыс тылы саналған Қазақстанда еңбектеген жастан еңкейген кәріге дейін ортақ жеңіс жолында жан аямай тер төкті.Қазақстандықтар эвакуацияланған мыңдаған жас мамандар мен жер аударылған азаматтарды, балаларды, жараланған жауынгерлерді, жүздеген ұйымдар мен зауыттарды қабылдады.Бүгінгі жастар соғыс батырларын біліп өсуі керек. Сол себепті біз үшін ұрпақтар сабақтастығы өте құнды.Соғыс – өткен тарих. Қазіргі жас ұрпақ тарихтан сабақ ала отырып, гүлденген Қазақстанды сенімді түрде құрып жатыр.Бүгін біз сол жылдардағы қайғылы оқиғалар ешқашан қайталанбауы үшін күн сайын халқымыз бен болашақ ұрпағымыз үшін қауіпсіздікті сақтауымыз қажет.Жеңіс күніне орай өз атымнан және Қорғаныс министрлігінің жеке құрамы атынан шын жүректен шыққан құттықтауымды қабыл алыңыздар!Соғыс ардагерлеріне, Қарулы күштердің барлық жеке құрамына және ел азаматтарына мықты денсаулық, амандық және ашық аспан тілеймін!

Бүгінгі жастар соғыс батырларын біліп өсуі керек - қорғаныс министрі

<a href="https://kyzylorda-news.kz/">Kyzylorda-news.kz</a> Еліміз тәуелсіздігін алған жылдан бастап Қазақстан күнтізбесінде жаңа мемлекеттік мерекелер пайда болды. Сондай атаулы мерекенің бірі – Отан қорғаушылар күні!«Отан отбасынан басталады» демекші, қазақтың қанындағы ел мен жерге деген сүйіспеншілік, оған қорған болу – ананың ақ сүтімен дарыған қасиет. Халқымыз қаншама адам төзгісіз қиын-қыстау, зұлмат замандарды бастан өткеріп, бүгінде тәуелсіздікке қол жеткізіп, бейбіт өмір кешуде. Туған елін сүйіп, ақтық демі қалғанша жерін қорғаған айбынды жауынгерлер мен тылдағы жұмысшылардың ерен еңбегі елдің есінде мәңгі сақталады.Осы орайда жылдағы дәстүр бойынша Шиелі ауданы әкімдігінің мәжіліс залында «Отан қорғаушылар күніне» арналған мерекелік салтанатты жиын өтті. Шиелі ауданы әкімінің орынбасары Болатбек Ысмағұлов құттықтау сөз сөйлеп, егемендігімізді еселеп, айбынымызды асқақтатып тұрған айтулы мерекемен құттықтады.– Баршаңызды 7 мамыр – Отан қорғаушылар күні мерекесімен құттықтаймын. Халық даналығында «Отан үшін соғыссаң – күймейсің, арың үшін алыссаң – өлмейсің» деген сөз бар. Егеменді еліміздің отын сөндірмей, қорғаныс жүйесін бекем ұстауда өз үлесін қосып келе жатқан және елімізде орын алған су апаты болған аймақтарға дер кезінде жәрдем көрсетуге аттанған азаматтарға алғысымды білдіремін. Елімізге амандық, дендеріңізге саулық, отбасыларыңызға татулық, бірлік, байлық тілеймін – деп, қауіпсіздік пен қоғамдық тәртіпті қамтамасыз ету мақсатында өз қызметтік міндеттеріне адалдықпен қарап, кәсіби шеберлік көрсетіп жүрген бірқатар сала мамандарын аудан әкімінің алғыс хатымен марапаттады.Мереке қарсаңында марапат биігінен көрінген озаттар қатарындағы Б.Құдайбердіұлы, С.Сейітбекұлы, А.Нұрахмедұлы, Ә.Әбділдаұлы, Қ.Тасболатұлы, Н.Қиясұлы, Р.Нұраханұлы, С.Әбдіқадірұлы, Ә.Нұрқалиұлы, А.Өмірбекұлы, Т.Қарабекұлы, Ж.Нысанбекұлы, Е.Оразалиұлына аудан әкімінің алғыс хаты табысталды. Сонымен қатар еліміздің су басқан аймақтарына көмек қолын созуға барған автокөлік жүргізушілері Қ.Бектұрғанұлы, Б.Іргебайұлы, Н.Әбжалиұлы, А.Ақылбекұлы, М.Мұхаметқалиұлы, М.Базарбекұлы, Ә.Әбдіразақұлы және Шиелі ауданының айнасына айналған «Өскен өңір» газетінің ақпараттық агентінің фототілшісі Б.Әбжанұлы мерекелік жиында алғыс хат алып, құрметке бөленді.Салтанатты жиынға қатысқан Шиелі аудандық ардагерлер кеңесінің төрағасы Өркен Исмаил, Шиелі аудандық мәслихат төрағасы Айтбай Жандарбеков, Шиелі аудандық қоғамдық кеңес төрағасы Қаблеш Бекішев, Шиелі аудандық қорғаныс істері жөніндегі бөлімінің бастығы Руслан Шарипаев айтулы мерекенің маңызына тоқталып, марапат иелерін құттықтады.Ер – елінің қорғаны. Халқына шаттық күлкі мен тыныш өмір сыйлауда әскеріміздің атқарып жатқан қызметі зор. Кез келген елдің өрістеп дамуы, ондағы азаматтардың елге, Отанға деген шынайы отансүйгіштік және ұлтжандылық сезіміне тікелей байланысты. Еліміздің әрбір азаматы ұлты мен дініне қарамай татулықтың туын желбіретіп, ұланғайыр кең байтақ даламызды сақтап қалуда, туған жерімізді құрмет тұтып, өңіріміздің өркендеуі жолында аянбай еңбек етуі керек.

Шиелі: Еңбек еленген күн

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Тоқаев қазақстандықтарды Жеңіс күнімен құттықтады, деп хабарлайды El.kz ақпарат агенттігі.&nbsp;Құрметті отандастар!Баршаңызды Жеңіс күнімен құттықтаймын!Біз 9 мамырда бейбіт өмір мен тыныштықты қорғау жолында құрбан болып, майдан даласынан қайтпай қалған батырларымыздың рухына тағзым етеміз. Соғыс және тыл ардагерлеріне шексіз ризашылық білдіріп, айрықша құрмет көрсетеміз.Қазақстан адамзаттың ортақ жеңісіне, жер бетінде әділдік пен бостандықтың салтанат құруына өлшеусіз үлес қосты. Аға буынның екінші дүниежүзілік соғыс кезіндегі ерлігі мен еңбегі өскелең ұрпақ үшін қайсарлықтың, жанқиярлықтың және отаншылдықтың озық үлгісі болып қалатыны сөзсіз.Бүгінде біз ұлтымыздың қаһарман ұл-қыздарының арқасында алаңсыз еңбек етіп, ұрпақ өсіріп, жарқын болашаққа қадам басып келеміз. Сол үшін оларға мәңгі қарыздармыз. Ешкім де ешқашан ұмытылмайды!Ардагерлерімізге әрдайым бас иемізБейбітшіліктің қадірін түсініп, оны сақтай білейік!Баршаңызға зор денсаулық, толағай табыс тілеймін!Жеңіс күні құтты болсын!

Президент қазақстандықтарды Жеңіс күнімен құттықтады

<a href="https://kyzylorda-news.kz/">Kyzylorda-news.kz</a> Жуырда Шиелі ауданы әкімдігі жанындағы жастар істер жөніндегі кеңес отырысы өтті. Жиынды Шиелі ауданы әкімінің орынбасары Болат Ысмағұлов жүргізіп отырды. Басқосуға кеңес мүшелері, дербес бөлім, мекеме басшылары, Шиелі аудандық полиция бөлімі, кент және ауылдық округ әкімдері, жастар қоғамдық бірлестіктерінің жетекшілері мен жастар өкілдері, жастармен жұмыс істейтін мамандар және БАҚ өкілдері қатысты.&nbsp;Кеңес отырысының күн тәртібінде үш мәселе қаралып, баяндама жасалды. Яғни, қолжетімді және сапалы білім беруді қамтамасыз ету мен жастардың ғылыми-техникалық әлеуетін дамыту бағытындағы жұмыстар, Бәйгеқұм ауылдық округіндегі мемлекеттік жастар саясатының жүзеге асырылу барысы туралы және Ақмая ауылдық округіндегі мемлекеттік жастар&nbsp; саясатының іске асырылуы жайлы хабарлама айтылды.&nbsp;<blockquote>– Жастар кез келген сәтте еліміздің өсіп-өркендеуіне, өңіріміздің қоғамдық-саяси өміріне араласып, белсенділік таныта білуі керек. Олар қашанда аға буын салып берген сара жолын жалғастырушылар. «Біз болашақты қалай құрамыз, болашақта қандай игі істерді атқарамыз?» деген сұрақтарға бүгіннен бастап жауап іздеуіміз қажет. Ауданда жастарды қолдау, олардың бастамаларының іске асуына кеңінен жәрдем беру – басты мақсат, –&nbsp; деді Шиелі ауданы әкімінің орынбасары.&nbsp;</blockquote>Сондай-ақ, тыңдалған мәселелер бойынша, баяндамашыларға сұрақтар қойылды. Бірінші сауал Шиелі аудандық білім бөлімі басшысының міндетін атқарушы Марат Ақпанбетовке жолданды. Ол қойылған сұраққа жауап беріп, берілген тапсырманы түртіп алды. Таяуда Қызылорда облыстық білім басқармасы тарапынан аудандардағы жалпы орта білім беретін мектептердің рейтингісі жасалды. Рейтингте білім сапасы, ұлттық бірыңғай тестілеу қорытындысы, оқушылардың олимпиада, ғылыми жоба, спорттық сайыстардағы нәтижелері, балалар мен жасөспірімдер арасындағы құқық бұзушылықтар мен қылмыстардың тіркелуі, педагогтардың кәсіби байқаулармен сайыстардағы жетістіктері сарапталған.Келесі мәселе бойынша Бәйгеқұм ауылдық округінің әкімі Даулет Сейтқалиұлы жастардың бос уақыттарын тиімді ұйымдастыру бағыты мен ауыл жастары арасында кәсіпкерлік, шағын бизнестерді дамыту, жастарға мемлекет тарапынан беріліп жатқан гранттарға ауылдық округтегі жастардың қатыстырылуын, «Neet» санатындағы жастардың өзектендірілген сандық көрсеткіштерін азайту мақсаты&nbsp; жайлы кеңінен&nbsp;талқылады. Үшінші мәселеде Ақмая ауылдық округінің әкімі Бағлан Сағындықов «Neet» санатындағы жастардың өзектендірілген сандық көрсеткіштерін азайту мақсатында қандай жұмыстарды атқарып жатқандығын&nbsp; түсіндірді. Айта кетейік, Шиелі ауданы бойынша «Отбасының цифрлық картасында» анықталған NEET санатындағы жастардың саны бойынша Ақмая ауылдық округінің жастары көп екендігі анықталып отыр. Атап айтқанда – 33 жас.Келелі отырыста Шиелі кенті және ауылдық округ әкімдеріне тапсырмалар берілді. Жазғы мезгілде демалысқа келген студенттер мен мектептердің жоғары сынып оқушыларын «Жасыл қала – жасыл ауыл» жалпы ұлттық жобасы аясында көркейту-көгалдандыру жұмыстарын ұйымдастыру жайлы және ауылдық елді мекендердегі «NEET» санатына жататын, жұмыссыз, әлеуметтік жағынан аз қамтылған тұрмысы төмен отбасынан шыққан жастардың маусымдық «Жасыл ел» бағдарламасына құжаттар тапсырып, жұмыспен қамтылуын жүктеді.&nbsp; Шараның соңында&nbsp;күн тәртібінде қаралған мәселелерге сәйкес, хаттама рәсімделіп, жауапты мекемелерге жолданатын болды.&nbsp;

Шиеліде жастар кеңесінің отырысы өтті

<a href="https://kyzylorda-news.kz/">Kyzylorda-news.kz</a> «Қазгидромет» 9 мамырға арналған ауа райы болжамын жариялады, деп хабарлайды El.kzақпарат агенттігі.<blockquote>Оңтүстік циклонның және онымен байланысты атмосфералық фронтальды учаскелердің өтуімен Қазақстанның басым бөлігінде жаңбыр жауып, найзағай ойнайды, республиканың солтүстік-батысында қатты жаңбыр жауады. Тек еліміздің қиыр солтүстігі мен шығысында жауын-шашынсыз ауа райы күтіледі. Республика бойынша жел күшейеді, оңтүстікте бұрқасын, солтүстік-батыста және солтүстікте бұршақ жаууы мүмкін, солтүстік-батыста және оңтүстікте шаңды дауыл соғады, - делінген хабарламада.</blockquote>Қарағандының батысында, оңтүстігінде, солтүстігінде, Ұлытау облысының орталығында, батыста, Түркістан облыстарының шөлейт аймақтарында, Абай облысының оңтүстігінде, батыста, оңтүстікте жоғары өрт қаупі күтіледі.Батыс Қазақстан облысының орталығында, Ақтөбе облысының оңтүстігінде, батысында және Қызылорда облысының шығысында өрт қаупі сақталады.Фото: freepik.com

Қазақстан және Қызылорда облысының жаңалықтары