&nbsp;15 мамыр күні республика бойынша «Мерейлі отбасы – 2024» ұлттық конкурсына құжат тапсыру шарасы басталғанын хабарлаймыз. Үміткерлерді тіркеу 15 маусымға дейін жүргізіледі. Облыс бойынша конкурстық құжаттамаларды Қызылорда қаласы және барлық аудан әкімдіктері жинақтайтын болады.«Мерейлі отбасы» ұлттық конкурсын өткізу қағидалары: 1. Жалпы ережелер. 1. «Мерейлі отбасы» ұлттық конкурсы (бұдан әрі – конкурс) өнегелі құндылықтарды жаңғыртуға және отбасы мен некенің (ерлі-зайыптылықтың) жағымды үлгісін таратуға, отбасы мәртебесін арттыруға бағытталған.Конкурс Қазақстан Республикасы Үкіметінің 2014 жылғы 5 наурыздағы № 181 қаулысымен бекітілген «Мерейлі отбасы» ұлттық конкурсын өткізу қағидаларына сәйкес өткізіледі.2. Конкурсты өткізудің мақсаты: 1) Отбасы институтын, адамгершілікті, руханиятты нығайту, жауапты ерлі-зайыптылықтың маңызын тану; 2) Ата-аналардың бала тәрбиелеудегі жауапкершілігін арттыру; 3) Отбасылық құндылықтарды, кәмелетке толған балаларының еңбекке қабілетсіз және егде жастағы ата-аналарына қамқорлығын дәріптеу және кеңінен насихаттау; 4) Қазақстандық отбасының жағымды имиджін насихаттау. 3. Мыналар: 1) қызметі Қазақстан Республикасының аумағында тыйым салынған ұйымдардың құрамына кіретін (кірген) мүшелері бар; 2) бұрын сотталған мүшелері бар отбасылар конкурсқа қатыса алмайды. 5. Конкурсқа қатысуға өтінім аудандық комиссияға бұқаралық ақпарат құралдарында көпшілікке жариялаған күннен бастап бір ай ішінде мынадай құжаттармен бірге беріледі: 1) ата-аналардың (қорғаншылардың, қамқоршылардың) жеке басын куәландыратын құжаттардың көшірмелері, балалардың туу туралы куәліктерінің көшірмелері; 2) асырап алушы (қорғаншы) отбасылар үшін – жергілікті уәкілетті органның кәмелетке толмаған балаға қорғаншылықты (қамқоршылықты) белгілеу туралы шешімінен үзінді көшірме; 3) неке қию туралы куәліктің көшірмесі (бар болса); 4) ата-аналарының біреуі қайтыс болған жағдайда, қайтыс болу туралы куәліктің көшірмесі (бар болса); 5) балаларды тәрбиелегені үшін алған көтермелеулердің, белгілі бір жетістіктері үшін алған көтермелеулердің бар екенін куәландыратын құжаттардың көшірмелері; 6) балалардың, ата-аналардың (қорғаншылардың, қамқоршылардың) жұмыс (оқу) орнынан анықтамалар және мінездемелер; 7) ұсынымдар (әріптестерінің, көршілерінің, достарының); 6. Отбасы мүшелерінің еңбектегі, спорттағы, шығармашылық, зияткерлік, ғылыми жоғары жетістіктерін куәландыратын құжаттардың көшірмелері. 7. Құжаттарды көрсетілген мерзімнен кейін ұсынған үміткерлер конкурсқа қатысуға жіберілмейді. 8. Қалалық және аудандық комиссияға ұсынылған құжаттар тізбесі &nbsp;кері қайтарылмайды. 1 шілдеге дейін қала және аудан әкімдіктері жергілікті комиссия отырыстарында бірінші кезең жеңімпаздарын анықтап, облыстық кезеңге үміткерлер туралы ақпаратты &nbsp;ұсынады. 19 шілдеге дейін облыстық комиссия отырысында 2-ші кезеңге өткен отбасылардың құжаттары қаралып, жеңімпаз отбасылардың конкурстық құжаттары альбом ретінде әзірленіп, ҚР Мәдениет және ақпарат министрлігіне жолданады.&nbsp; Сонымен қатар, 30 тамызға дейін облыстық конкурстың жеңімпаздарын марапаттау бойынша салтанатты шара ұйымдастырылатын болады.&nbsp; Жеңімпаз отбасылар туралы ақпарат «Qyzylorda» телеарнасының «Қайырлы күн Қызылорда» және «Qogam TV» телеарналарында көрсетіледі. Үміткер отбасылар Facebook мессенджерінде #Otbasym2024, #МерейліотбасыKZO2024 хештэгтері арқылы жанұялары туралы ақпаратты жариялай алады.&nbsp; «Мерейлі отбасы – 2024» ұлттық байқауының қалалық және аудандық кезеңіне құжаттар қабылдау төменде көрсетілген мекен-жайлар бойынша жүргізіледі.&nbsp; 1. Қызылорда қаласы, Ы. Жақаев көшесі №33, қала әкімдігінің ғимараты, қоғамдық даму бөлімі. 2. Арал ауданы, Астана көшесі №130, аудан әкімдігінің ғимараты, қоғамдық даму бөлімі.&nbsp; 3. Қазалы ауданы, Әйтеке би кенті, Ж. Нұрмұхаммедұлы көшесі №130, аудан әкімдігінің ғимараты, қоғамдық даму бөлімі.&nbsp; 4. Қармақшы ауданы, Жосалы кенті, Ораз Ахун көшесі №44, қоғамдық даму бөлімі.&nbsp; 5. Жалағаш ауданы, Әйтеке би көшесі №12, аудан әкімдігінің ғимараты, қоғамдық даму бөлімі.&nbsp; 6. Сырдария ауданы, Д. Қонаев көшесі №9 б, қоғамдық даму бөлімі.&nbsp; 7. Шиелі ауданы, Рысқұлов көшесі №19, аудандық қоғамдық даму бөлімі, 5 кабинет (ескі прокуратура ғимараты).&nbsp; 8. Жаңақорған ауданы, М. Көкенов көшесі №33, аудандық қоғамдық даму бөлімі.

«Мерейлі отбасы – 2024» ұлттық конкурсына құжат қабылдау басталды 

<a href="https://kyzylorda-news.kz/">Kyzylorda-news.kz.</a> &nbsp;Қызылорда облысы Әділет департаментінің басшысы И.Бакишева мен департаменттің әкімшілік бөлімінің басшысы Э.Әбдіқалықова Сырдария ауданы Сәкен Сейфуллин ауылдық округінің орта мектеп оқушыларымен «Жемқорлық-індет, онымен күресу-міндет» тақырыбында ақпараттық-түсіндіру сипатындағы семинар өткізді. Семинардың мақсаты індеттің қағидатын санаға сіңіре отырып, бүкіл қоғамды сыбайлас жемқорлыққа қарсы күреске жұмылдыру болып табылады.&nbsp;<blockquote>− Жемқорлық-мемлекеттің, қоғамның дамуына тежеу болатын, болашағына кесірін тигізетін індет. Сыбайлас жемқорлықпен күресу бүгінгі күннің күрделі мәселесі болып отыр. Оған осы бастан тоқтау қоймаса мемлекетте тұрақты өсіп-өркендеу болмайды. Сыбайлас жемқорлықпен түбегейлі күресу үшін халықтың құқықтық сауатын арттырудың маңызы зор. Сондай-ақ, сыбайлас жемқорлыққа қарсы сана қалыптасқан жағдайда ғана адам адамгершілікке жат-қылықтардан бойын аулақ ұстай бастайды, заңға қайшы келетін әрекеттерді жасауға жол бермейді. Сол себепті осы кезден бастап бұл індеттің қауіптілігін жас ұрпақтың санасына сіңдіре білуіміз қажет, − дейді департамент басшысы.</blockquote>Сыбайлас жемқорлықтың туындау себептері мен салдары, алдын алу мәселелері бойынша қолға алынған шара &nbsp;Өркениет медициналық колледжінде жалғасын тапты.&nbsp; Студенттермен кездесуге департамент басшысы мен бірге департамент басшысының орынбасары, әдеп жөніндегі уәкілі Ұ. Оразгелді &nbsp;де қатысып, жастарға сыбайлас жемқорлықтың қоғам үшін қауіптілігін жете түсіндірді. Шара барысында жастардың пікірі тыңдалып, сұрақтарына жауап та берілді.Айта кету керек, департамент тарапынан ұйымдастырылған мұндай шара алдағы уақытта да жалғасын табатын болады.&nbsp;

Сыбайлас жемқорлыққа жол жоқ

<a href="https://kyzylorda-news.kz/">Kyzylorda-news.kz.</a> Қалалық кітапханалар жүйесіне қарасты ауылдық кітапханалардың «АуылLive» жобасы аясында, 15 мамыр - Отбасы күніне орай «Абзал ана, ибалы келін» атты ене мен келін арасындағы қалалық байқау өткізілді. Аяулы аналардың өмірде алатын орны ерекше екендігін, аналардың ерен еңбегінің зор екендігін кейінгі ұрпақтың бойына сіңіріп, жастарды қазақтың салт-дәстүрін қадірлеуге, құрметтеуге баулу мақсатын мұрат еткен байқауды қалалық мәдениет және тілдерді дамыту бөлімінің басшысы Жағыпар Тажмаханов ашып беріп, қатысушы жұптарға сәттілік тіледі.Байқауға Қожабековтер «Халықтық» отбасылық ансамблінің көркемдік жетекшісі, «Қуаныш» әжелер ансамблінің жетекшісі, алтын алқа иегері, Батыр ана - Қуаныш Ахметқызы, қалалық кітапханалар жүйесінің әдіскері - Асқарова Сауле Кеңесбекқызы, педагог, «Жас отау» клубының жетекшісі Малимова Салима Шалабайқызы төрелік жасады.Байқауда енелер мен келіндер «Мен қазақтың келіні, анасымын...» атты таныстыру, «Өнерлі отбасы», «Салт-дәстүрім таусылмайтын байлығым» атты сахналық көрініс көрсету, «Кимешекті, сәукелелі киімдерін, келеді ене ертіп келіндерін» ұлттық нақыштағы киім үлгісін көрсету кезеңдері бойынша өнер көрсетті.Тақырыпқа сай «Отбасым – бақыт мекенім» атты кітап көрмесі ұйымдастырылып көрермендерге таныстырылды.Шара соңында қалалық орталықтандырылған кітапханалар жүйесінің директоры Рахметова Гулмира Шамсутдинқызы қорытынды сөз сөйлеп, әділқазы алқасы байқаудың шешімін жариялады.Байқау қорытындысы бойынша бас жүлдені - Қыстаубаева Кенжегүл, Қасымбай Айдана (Қосшыңырау ауылы) жұбы жеңіп алса, І орын - Қуандық Данагул, Сәдуақасова Жібек (Ж.Маханбетов ауылы) ІІ орынды - Жылқайдарова Алия,Садық Айгерім (Баймұрат батыр ауылы) және Алпысова Қалия, Әжібаева Жанар(Қарауылтөбе ауылы) өзара бөлісті. ІІІ орын - Шайыхназарова Манар, Нәжімат Нұргүл (Қызылөзек ауылы) жұбына бұйырды. Жеңімпаздар мен қатысушыларға арнайы дипломдар мен сыйлықтар табыс етілді.

Қызылордада  «АуылLive» жобасы аясында ене мен келін сайысы өтті

<a href="https://kyzylorda-news.kz/">Kyzylorda-news.kz.</a> &nbsp;Қызылорда қаласының М.Ералиева атындағы мәдениет үйінде 15 мамыр – Отбасы күніне орай, ұстаздық пен сазгерлікті қатар алып жүрген балалар композиторы, ҚР «Мәдениет саласының үздігі» төсбелгісінің иегері Сәкен Шынымовтың «Сазды әуен жүректерді тербеген» атты шығармашылық кеші өтті.Қалалық мәдениет және тілдерді дамыту бөлімінің қолдауымен, М.Ералиева атындағы қалалық мәдениет Үйінің ұйымдастыруымен өткен кеш ақын Нұрлыбек Сафиннің сөзіне жазылған сазгердің «Назерке» әнімен ашылды.Содан соң кеш иесін бөлім басшысы Жағыпар Тажмаханов құттықтап, өңірде балалар шығармашылығын дамытуда өз үлесін қосып жүрген сазгерге Қызылорда қаласының әкімі Серік Қожаниязовтың, облыстық мәдениет, архивтер және құжаттама басқармасының басшысы Мира Қазбекованың құттықтау хаттарын табыстады.Кеш барысында лэд экран арқылы сазгердің өмірі мен шығармашылығы туралы бейнекөрсетілімдер көрсетіліп, үйірме өнерпаздары мен мектеп, балабақша бүлдіршіндері сазгердің «Қазақстан», «Соңғы қоңырау», «Анашым» тағы басқа әндерін орындап, көрермендерге жақсы көңіл күй сыйлады.Кеш соңында өнер көрсеткен барлық өнерпаздарға алғыс хаттар тапсырылды.

Қызылорда қаласында «Сазды әуен жүректерді тербеген» атты кеш өтті

<a href="https://kyzylorda-news.kz/">Kyzylorda-news.kz.</a> &nbsp;Қалалық №20 кітапхананың ұйымдастыруымен көрнекті лирик ақын Сағи Жиенбаевтың 90 жылдығына байланысты «Даламның исі бұрқырап» атты поэзия кеші өткізілді. Шара Исатай Әбдікәрімов атындағы Қызылорда аграрлық техникалық жоғары колледжінің студентерінің қатысуымен өтті.Студенттер ақынның өлеңін жатқа оқып өмірі мен шығармашылығына арналған бейнебаянды тамашалады. Ақынның сөзіне жазылған әндер айтылып, ақынның сүйіп тыңдайтын халық әні «Ақеркені» әнін Қазанғап атындағы жоғары музыкалық колледжінің студенті Қарақат Әбдікәрім орындады.С.Жиенбаев 1934 жылы 15 мамырда Ақтөбе облысының Байғанин ауданындағы Оймауыт ауылында дүниеге келген. 1955 жылы Қызылорда қаласындағы педагогикалық институтты бітірген. Сағи Жиенбаев - лирик ақын. Ендеше, Сағи лирикасының ұтымдылығы – ондағы шындықпен шеберліктің шынайы ұштасуында, үн мен ұғымның сұлу үйлесімінде. Тірлігінде атақ-мансап қумай, мақтау- марапат күтпей, поэзиядағы бір шыққан биігінен төмен түспей кеткен Сағи Жиенбаевтың қазақ өлеңін өрге көтеруге қосқан үлесі өлшеусіз көл- көсір. Шараның мақсаты – ақынның өмірі мен өлеңін жастарға оқыту, таныстыру.

Қызылорда қаласында «Даламның исі бұрқырап» атты поэзия кеші өтті

<a href="https://kyzylorda-news.kz/">Kyzylorda-news.kz.</a> Биылғы «Үздік мейіргер-2024» атағын №4 қалалық емханының мейіргері Балнұр Күмісбай жеңіп алды.Ол Қызылорда медициналық жоғарғы колледжінде оқыған. 2019 жылдан бері №4 қалалық емханаға аймақтық мейірбике мамандығы бойынша жұмысқа орналасқан. Отбасылы, ата-ененің қолында адал келін, 2 қыздың аяулы анасы.Қазір Тасбөгет кентіндегі 16-аймақ мейірбикесі болып жұмыс жасайды. Аймақта 1400 адам, оның ішінде 1 жасқа дейінгі 600 бала тіркелген. «Д» есепте тұратын науқас саны – 700-ге жетеді.Балнұр талантты, білімді, қатарластарының алды десек болады. Әрбір ісіне жауапкершілікпен қарайды. Өйткені, атқарып жатқан қызметі немқұрайлықты кешірмейтіндігін жақсы түсінеді. Сондықтан алдына келген әрбір жанға мейірімділікпен қарап, олардың сауығуы жолында барынша қызмет етуде.Білімі мен шеберлігі бар, ісімен жан-жақты, күтім процесіне жауапты, мейірімділік көрсете білетін ерекше мамандық иелері – мейіргерлердің &nbsp;денсаулық сақтау жүйесінің алға жылжуына қосып отырған үлестері орасан екенін айта кеткен жөн. Аталған мамандық иелерін тек қана дәрігер бұйрығын орындаушы ғана емес, ойшыл, үнемі ізденісте жүретін шығармашыл тұлға деп қараған жөн. Осы ретте Балнұр өз қызметіне адал және халыққа қолынан келгенше көмек беріп жүр. &nbsp;&nbsp;

Өңірдің «Үздік мейіргері»

<a href="https://kyzylorda-news.kz/">Kyzylorda-news.kz.</a> Отбасындағы әке, ана, бала ошақтың үш тағаны секілді бірін-бірі толықтырып тұрады. Олардың ынтымағы, түсіністігі, бір-біріне деген сүйіспеншілігі барлық кедергіден алып шығады.Халықаралық отбасы күніне орай «Анаға тағзым» орталығының ұйымдастыруымен облыста алғаш рет «Ойтөбе» отбасылық зияткерлік квест ойыны өтті. &nbsp;Жобаның мақсаты – ұрпақтар сабақтастығы мен отбасы құндылығын насихаттай отырып, қарым-қатынасты нығайту.Сайысқа 4 адамнан құралған 17 отбасы қатысты. Олар «Бір қолымен бесікті, екінші қолымен әлемді тербеткен әйелдер», «Батыр бабалар», «Сыр елі – жыр елі», &nbsp;«Зиялылар», &nbsp;«Салтын сақтаған Сыр елі» секілді 50 сұрақтан тұратын 5 кезең бойынша бақ сынады.Шарт бойынша қатысушы топтар қазақ халқының дара тұлғалары, салт-дәстүр, ел тарихына қатысты сұрақтарға жауап берді. Ойын барысы туралы мағлұматтарды арнайы хэштегпен әлеуметтік желіде бөлісіп отырды.Білім бәйгесінің қорытындысы бойынша 1-орын Қашқынбаевтар отбасына, 2-орын Каукеновтер отбасына, 3-орын Байділдаевтар отбасына табысталды. «Сыр – Ана» монументінен бастау алған зияткерлік ойын «Анаға тағзым» орталығында қорытындыланды. Облыстық мәдениет, архивтер және құжаттама басқармасының басшысы Мира Қазбекова қатысушыларға Алғыс хаттар мен қаржылай сертификаттар табыстады.<blockquote>– Осындай ауқымды жобаға талап білдіріп, қатысудың өзі – үлкен жеңіс. Ойын барысында да бір-біріңізді қолдап, көмек көрсету отбасы ынтымағын танытады. Мерекелеріңіз құтты болсын, – деді басқарма басшысы.</blockquote>Жиын соңында «Анаға тағзым» орталығының басшысы Алтынай Молжанова сөз алып, байқауға белсенді қатысқандарға жылы лебізін білдірді. &nbsp;

Салт-дәстүрді дәріптеген «Ойтөбе»

<a href="https://kyzylorda-news.kz/">Kyzylorda-news.kz.</a> &nbsp; Ұзақ жыл бойы байланыс саласында қызметте болып, ел еңсесін көтеруде өзіндік қолтаңбасын қалдырған Әбдіхан Көбеев туралы көргеніміз бен көңілге түйгенімізді таразыға салар болсақ, туабітті тектілігіне, қарапайым қалпынан айнымай жүрген азаматтығына тәнті боласыз.Иә, Әбекең 1934 жылы ақ қайраңда сары сазаны тулаған, ақ шағаласы шулаған Арал теңізі жағасындағы Арал қаласында өмір есігін ашты. Ата-бабаларының қоныс тепкен орны – «Құмбазар» ауылы. Бар-жоғы отыз шақырым қашықта уезд орталығы – Қазалы қаласы қоныс тепкен. Осыдан-ақ ауыл азаматтарының ой-өрісі мен талғамы кеңдігін, яғни тіршілік үшін күреске бала жастан талпыныс жасайтынын байқауға болады. Әбекеңнің кіндік қаны тамған жердің табиғатындай болып бітім-болмысы мен қадір-қасиеті қалыптасты. Содан болар, кезіндегі Арал теңізінің маржанындай мөлдір, қиырсыз көкжиегіндей кеңпейіл, теңіздің тау іспеттес ақбас толқындарындай асқақ азаматтығы бүгінге дейін айшықталып келеді.Оның балалық шағы ашаршылықтың ызғары әлі қайта қоймаған, соғыстың қиын жылдарымен тұспа-тұс келді. Шабақ аулап талғажау етіп, сорпасымен тамақ жібіткен күйбең күндер өтті. Буыны бекіп, бұғанасы қатпай жатып-ақ қолына күрегін, иығына кетпенін артады. Құрқылтайдың ұясындай қуыс үйде сауат ашқан ол қысы-жазы балық аулап, жазда пішен, қыста қамыс орып, «адам бол, балам!» деген әке аманатын арқалаумен жүрді.<blockquote>– Әкем Жұмахмет мұғалім болып жүргенде қараша үй, аттың ерін, тағы басқа алуан түрлі тұрмыс бұйымдарын жасайтын. «Әке көрген оқ жонар, ана көрген тон пішер» дегендей, мен де мектепте жүргенде ұсталықпен айналысып, есік-терезе, сандық соғып, содан табыс тауып, отбасымызды асырауға өз үлесімді қостым, – деп еске алады ол.</blockquote>Мектеп бітіргеннен кейін Әмірхан інісіне: «Сен енді оқымайтын болсаң, ұсталықпен айналыс, ертең бала-шағаңды асырайсың ғой» деп құрал-сайманын табыс етіп, өзі 1955 жылы Ташкент қаласына жол тартады. Орта Азия политехникалық институтының «Тау-кен» факультетіне оқуға қабылданды. Ал 1956 жылы Ташкент қаласындағы Орта Азия елдеріне маман даярлайтын электротехникалық байланысшылар институтының екінші курсына ауысып, 1960 жылы ойдағыдай тәмамдап, туған топырағына оралды.Әбекең Ташкентке жетіжылдық білім алған Зәуреш есімді аруды да ала келген. Зәуреш осындағы техникумнан есепші-қаржыгер мамандығын алған соң, жолдамамен Қарағанды қаласына жұмысқа жіберілмек. Балалық шақтан бір-біріне деген сүйіспеншілігі бар екі жас 1957 жылы бас қосып, шаңырақ көтерді.Иә, ол кезде екінің бірінің қолы жете бермейтін мамандық алған Әбдіхан Көбеев туған топырағының байланыс саласы басшылығында 34 жыл бойы қалтқысыз қызмет етіп, еңбегі ерен ел ағасы атанды. Ол еңбек жолын 1960 жылы байланыс инженері қызметінен бастаған.<blockquote>– Бұл кезеңде байланыс саласының жай-күйі мүлде көңіл көншітпейтін. Қаладағы небәрі 300 нөмірлік бір телефон станциясына 750 абонент қана қосылған екен. Мен қызметке келген жылы Байланыс министрлігінің қолдауымен облыс орталығына жаңадан 20 коммутатор қондырылып, 1200 нөмірлік телефон станциясы іске қосылды. Станцияны монтаждау жұмыстарына өз үлесімді қостым. Сіңірген еңбегімнің жемісі болар, станция қала тұрғындарына пайдалануға берілген күні облыстық байланыс басқармасының бастығы А.Мұстафин мені Арал аудандық байланыс конторының бастығы қызметіне жіберді, – дейді ол.</blockquote>Ол кезде Арал ауданы аймақтағы өндіріс орындары бар іргелі аудан еді. Бірақ телефон, телеграф, радио, радиостанциялардың әбден тозығы жетіп тұрған. Әбекең көп ойланбастан аудандық партия комитетінің бірінші хатшысы Әбжәми Байшуақовтың қабылдауында болып, байланыс конторының халыққа қызмет көрсету жағдайының ешқандай сын көтермейтінін, не істеу қажеттігін бүкпесіз баян етті.Оның бастамасымен аудандық байланыс саласының жаңарып, ұлғайтылу кезеңі бастау алды. Алдымен жаңа жобамен салынған ғимарат пайдалануға берілді. Бұған дейін елді мекендерге газет-журнал, сәлемдеме «АН-2» ұшағымен, 4-5 машинамен таратылып келсе, енді әскери катер алынды. Теңіз жағалауындағы ауылдарға кесте бойынша байланыс қатынасы орнап, сол мекен тұрғындарына аудан орталығына келіп-кету мүмкіншілігі жасалды. 1920 каналдық кабель құрылысы аяқталып, пайдалануға берілді. Құрылыс аяқталысымен ғимаратқа 3000 нөмірлік АТС, радио, телеграф техникалары орнатылып, аудан халқының сұранысы өз шешімін тапты. Сондай-ақ 1965 жылы облыста тұңғыш рет 500 нөмірлік АТС Арал қаласында іске қосылады. Ал 1968-1970 жылдары Қызылорда қаласынан кейінгі екінші телеорталық Арал қаласына қондырылып, аудан халқы теледидар көретін жағдайға жетті.Әбдіхан Көбеевтің 1961-1970 жылдары Арал ауданының байланыс саласын басқарғанда атқарған ауқымды істерін санамалап шығу әсте мүмкін емес. Осы бір ерен еңбегінің жемісі болса керек, 1970 жылы Әбекең облыстық партия комитетінің шешімімен Қызылорда қаласының біріккен байланыс конторының басшысы қызметіне тағайындалды.Оның басшылығымен қала байланысында да нақты істер көріне бастайды. Нақтылай айтар болсақ, ол басшылық қызметке келгенде облыс орталығында бар-жоғы 4000 нөмірлік жалғыз АТС жұмыс істеп тұрса, 1970-1978 жылдары АТС-2, 3, 4, 5, 6 телефон станциялары орнатылып, тұтынушылар саны 28 мыңға жеткізілді.1979 жылы оның толымды тәжірибесі мен ұйымдастырушылық қабілетін ескерген басшылық облыстық өндірістік-техникалық байланыс басқармасының басшылығына бекітті. Бұл жауапты қызметті 16 жылдан астам уақыт атқарып, ел-халықтың алғысына кенелді. Республиканың 19 облысының ең соңында жүрген аймақтың байланыс жүйелерін қалыпқа түсіруге зор еңбек сіңірді. Қала, аудан орталықтарында жаңа типтік ғимараттар салынып, оған жаңартылған техника, құрал-жабдықтар орнатылды. Арал, Жаңақорған, Шиелі, Сырдария аудандарында жаңадан ғимараттар салынса, Тереңөзек, Қазалы аудандарындағы ескі ғимараттар күрделі жөндеуден өткізіліп, кеңейтілді. Елді мекендерге 50-300 нөмірлік шағын АТС қондырылып, 107 ауылдың тұрғындары аудан, облыс орталығы және еліміздің басқа қалалары тұрғындарымен тікелей сөйлесу мүмкіндігіне ие болды. 1984-1985 жылдары шалғай елді мекендерге спутник арқылы көрсететін теледидар қондырғылары орнатылды. Осының арқасында жаңадан ашылған облыстық телерадиокомитет бағдарламалары барлық ауданға таратыла бастады.Әбекең 1984 жылы Қазақ ССР Жоғарғы Кеңесінің «Құрмет грамотасымен», 1986 жылы «Халықтар достығы» орденімен марапатталды. Ал 1994 жылы «Қазақстанның Құрметті байланысшысы» атағын иеленді. «Еңбек ардагері», «Арал ауданының Құрметті азаматы», «Қызылорда облысының Құрметті ардагері» атақтары да бар, 25 жылдан астам уақыт бойы аудандық, қалалық, облыстық партия комитеттерінің пленум мүшесі және аудандық, қалалық, облыстық кеңестің депутаты болып үздіксіз сайланып, ел сенімінен шыққаны азаматтығының арқасы болар. Сөз орайы келгенде осындай айтулы азаматқа облыстың Құрметті азаматы атағын беру туралы ойымызды ортаға салғымыз бар.Әбекең 1957 жылы институт қабырғасында жүргенде Зәурешпен шаңырақ көтергенін жоғарыда жазғанбыз. Ол кісі күн-түн демей жұмыста жүреді, ерте кетеді, кеш келеді. Содан болар алғашында Зәурешті әйелім десе, кейіннен ақ Зәуреш, ақыр соңында «мамасы-ау» деген ат қойды. Ерінің алтын басын төрге шығаруға бар ғұмырын сарп еткен әйел-анаға қандайда бір болмасын ат қойып, атақ беру әбден орынды. Өкініштісі сол, 2013 жылдың қыркүйек айында Зәуреш дүниеден озып, Әбекеңнің өзегін өртеп кетті. Шүкір, ұлдарын ұяға, қыздарын қияға қондырып, бүгінде немере-шөберелерінің қызығына кенеліп отырған жағдайы бар.Бізде Әбекеңнің тумысына тән қасиеттерін қадір тұтамыз. Тоқсан жасқа келсе де ұдайы ізденіп, істің көзін тамыршыдай танып жүреді. Төзімділігі қандай, жігері жасымайды, бірақ телегейдей тасымайды.Бұл өмірден Құдай қосқан қосағы мен бауыр еті баласы мезгілсіз кетіп, арпалысқа түсті, мойымады. Басқа адам болса, жасып-жаншылып, кеудесін жерден көтере алмай қалар еді, ал Әбекең қайғыны көтерді. Тегінің амандығын, әулетінің бірлігін, перзенттерінің бақытын қорғауға арқа тосты. Ұрпақтарының ғана емес, бүкіл ел-халықтың амандығына тілекші.Сөз соңында айтпағымыз, Әбдіхан Көбеев бүгінде 90 жастың төріне шықса да, жүріс-тұрысы, сөз саптауы баяғыдай қаз-қалпында. Біз Әбекеңе осылай жүре бергейсіз, еңбегі ерен ел ағасы деген ақ тілегімізді айтамыз.Құдайберген&nbsp;САРЖАНОВ,Биғали&nbsp;ҚАЮПОВ,мемлекет және&nbsp;қоғам&nbsp;қайраткерлері,Қызылорда&nbsp;облысының&nbsp;Құрметті&nbsp;азаматтары

Ел еңсесін көтеруде өзіндік қолтаңбасын қалдырған  азамат

<a href="https://kyzylorda-news.kz/">Kyzylorda-news.kz.</a> Жүйе іске қосылған 2017 жылдың 1 шілдесінен 2024 жылдың 1 мамырға дейін Қызылорда облысының тұрғындары Әлеуметтік медициналық сақтандыру қорына 74,5 млрд. теңге аударды. Бұл туралы «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов мәлімдеді.&nbsp;Аударыдған қаржының 44,8 млрд. теңгесі жұмыс берушілердің аударымдары болса, қалған 29,7 млрд. теңге - жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі.Жинақталған қаржы сенімгерлік басқару туралы келісім бекітілген Ұлттық банкте сақталады және МӘМС пакеті шеңберіндегі қызметтер ақысын төлеуге жұмсалуда.&nbsp; &nbsp;

Қызылордалықтар Әлеуметтік медициналық сақтандыру қорына 74,5 млрд теңге аударды

<a href="https://kyzylorda-news.kz/">Kyzylorda-news.kz.</a> Қызылорда облысының энергетика және тұрғын үй-коммуналдық шаруашылық басқармасы жыл басынан бастап қарқынды жұмыс атқарып келеді. Атап айтар болсақ, газдандыру саласы бойынша биыл газбен жабдықтауға 20 жобаны жүзеге асыру үшін 5,9 млрд теңге бөлінді. Оның ішінде РБ-тен 3,9 млрд.теңге, ОБ-тен 2,0 млрд теңге.Бұл қаржыға 2023 жылдан өтпелі 14 жоба жалғастырылады және 6 жаңа жоба құрылысы басталады. Ресми мәліметтерге сәйкес, ағымдаағы жылы 11 елді мекенге табиғи газ беру жоспарлануда. Ағымдағы жылдың &nbsp;наурыз айында Бестам елді мекеніне газ берілді. Қалған 10 елді мекенде қазіргі таңда құрылыс-монтаж жұмыстары жүргізілуде. Нәтижесінде жыл соңында облыстың газбен қамту деңгейі &nbsp;78 пайызға, газдандырылған елді мекендер санын 46-ға жеткізу &nbsp;жоспарлануда.Ал, ауыз сумен қамту бойынша облыс бойынша 230 ауылдық елді мекеннің 204-і немесе халық санымен алғанда 98,4 пайызы орталықтандырылған ауыз су жүйесіне қосылған. Қалған 26 ауылда 7 мыңнан аса адам немесе ауыл халқының 1.6 пайызы қоныстанған.&nbsp;<blockquote>– Мемлекет басшысының 2021 жылғы жолдауында Үкіметке алдағы бес жыл ішінде халықтың 100 пайызын таза ауыз сумен қамтамасыз етуді тапсырған болатын. Осыған байланысты, 26 елді мекендегі халықты 100 пайыз ауыз сумен қамту бойынша кезеңдік жоспар жасалынып, жұмыстар жүргізілуде. Оның ішінде, Қазақстан Республикасы Су ресурстары және ирригация министрлігі арқылы 3 елді мекен Арал ауданы – Ақбасты, Абай, Тоқабай, ҚР Өнеркәсіп және құрылыс министрлігі арқылы 5 елді мекенге Арал ауданы –Тастүбек, Ерімбетжаға, Қазалы ауданы – Шәкен, Сарбұлақ, Шилі су жүйелерін салу және жергілікті бюджеттен 24 елді мекенге Арал ауданы (6) – Тастүбек, , Қазалы ауданы (11) – Ажар, Бірлік, Сарбұлақ, Жұбан, Шилі, Шиелі ауданы (2) – Лесхоз, &nbsp;Ақтам су тұщытқыш &nbsp;(КБМ) орнату жоспарланып отыр, – дейді сала мамандары.</blockquote>Биылғы жылы ауыз сумен қамту және су бұру жобаларына республикалық және облыстық бюджеттен 12 жобаға 2,5 млрд. теңге бөлінді. Қазіргі таңда, жобалар тиісті құрылыс-монтаж жұмыстары мерзімінде атқарылып пайдалануға берілетін болады.Электр энергетикасы саласы бойынша бүгінде өңірдегі электрмен қамту жүйелерінің жалпы ұзындығы 10490,82 шақырым электр желілер және әр-түрлі кернеуліктегі 2008 дана қосалқы станциялардан &nbsp;тұрады, олардың тозу деңгейі 66 %-ды құрайды.&nbsp;Былтырғы жылы облыстағы бірінші кезекте жөндеуді қажет ететін электрмен қамту нысандары анықталып, жаңғырту-жөндеу, ауыстыру жоспары жасалды. Оның бірінші кезеңіне облыстық бюджеттен 1,6 млрд.теңге қаражат бөлінді. Бұл қаржыға кернеулігі 10/0,4 кВ 35 қосалқы станция ауыстырылып, 27 дана кірпіштен жасалған ескі күштік трансформатор күрделі жөнделді. Оған қоса 32 шақырым желі ауыстырылды.2024 жылға екінші кезекке облыстық бюджеттен 1,5 млрд. теңге қаржы бөлініп, бөлінген қаржыға 16 дана 10/0,4 кВ-ты ТП, КТПН-ді 10/0,4кВ КТПБ-ға ауыстыру, 0,5 шақырым 35кВ Л–33,34 әуе желілерін жаңғырту, ұзындығы 128,4 шақырым 10/0,4 кВ әуе желілерін қайта жаңарту, 5,6 шақырым 0,4 кВ кабель желілерін қайта жаңарту және автотехника сатып алу, атап айтқанда 4 дана «Коммуналдық қызметтерге арналған металл платформасы бар автокөлік», «Жылжымалы электротехникалық зертхана автокөлігі», «Мамандандырылған кран-манипулятор автокөлігі» қарастырылды.Жауапты сала мамандары 2024 жылға Шиелі кентіндегі «Шиелі» 220/110/35/10 кВ қосалкы станциясын қайта жаңғырту жобасы бойынша, мемлекеттік сараптама оң қорытындысы алынып, Ұлттық қордан 1,5 млрд. теңге қаржы бөлініп, жеңімпаз анықтау мақсатында мемлекеттік сатып алу конкурсы жүргізілуде. Одан соң жылу желілерін жаңғырту &nbsp;бойынша облыста 2023-2024 жылғы жылу беру маусымы 10 сәуірден бастап аяқталып, тұрақты өтті. Тіршілікті қамтамасыз етуші кәсіпорындар штаттық режимде жұмыс жасады. Алдағы жылу маусымына дайындық пен оны өткізу жөніндегііс шара жоспары әзірленді. Барлық тіршілікті қамтамасыз етуші кәсіпорындардың дайындық жұмыстарының кестесі бекітіліп, жұмыстар жүргізілетін болады – дейді.Облыс бойынша жылу желілерінің ұзындығы 216 шақырым, тозу көрсеткіші 44.6 пайызды құрайды.&nbsp;Тозу деңгейін азайту мақсатында ағымдағы жылы 6 жоба бойынша 6,7 млрд. теңге бһлініп, 9,5 шақырым жылу желілері қайта жаңғыртылатын болады. Нәтижесінде жылу желілерінің тозуы 2,8 пайызға төмендейді.Сонымен қатар, жылу желелерін жаңғырту бойынша 8 жоба әзірленіп, экспертизаның қарауында. Облыстық бюджет нақтылауымен қосымша 16 жобаны әзірлеуге қаржы бөлініп, 6 жобаның жобалаушы мекеме анықталды, қалған 10 жоба бойынша конкурс жариялау жұмыстары жүргізілуде.2024 жылы облыс бойынша 19 абаттандыру жобасын жүзеге асыруға республикаляқ және облыстық бюджеттен 6,5 млрд. тенге бөлінді. Бұл қаржыға 56 көшеге 57 шақырым жаяу жүргіншілер жолының құрылысы, 26 көпқабатты тұрғын үйлердің қасбеттерін жөндеу және 62,5 шақырым құрайтын 54 көшені жарықтандыру жұмыстары жүргізілетін болады.&nbsp;Қазіргі таңда, Қызылорда облысында сараптама қорытындысымен апатты деп танылған 55 үй көппәтерлі тұрғын үйлер бар. Оның ішінде, Қызылорда қаласында 51 үй, Сырдария ауданында 3 үй, Жалағаш ауданында 1 үй бар. Жалғыз тұрғын жайы апатты деп танылған барлығы 663 отбасы тұрғын үй кезегінде тұр. Оның ішінде, Қызылорда қаласында 638 отбасы, Сырдария ауданы бойынша 18 отбасы, Жалағаш ауданы бойынша 7 отбасы.2024 жылы Қызылорда қаласының жалғыз тұрғын жайы апатты деп танылған 135 отбасына пәтер сатып алу үшін облыстық бюджеттен 1,6 млрд.теңге қаралды. Бүгінгі таңда, күрделі жөндеуді талап ететін кондоминиум объектілерінің үлесі 2011 жылғы 800 үйден 550 үйге азайды.Ағымдағы жылы республикалық бюджеттен 36 көпқабатты тұрғын үйді күрделі жөндеуден өткізуге 2,111 млрд.теңге қаржы қаралды. Негізінен мемлекет басшысының халықтың әлеуметтік жағынан осал топтарын қолжетімді жалға берілетін тұрғын үймен қамтамасыз ету жөніндегі тапсырмасына сәйкес жұмыстар жасалуда.Азаматтарға тұрғын үйдің жалдау ақысын төлеу бойынша қаржы операторы болып «Отбасы банк» тұрғын үй құрылыс жинақ банкі» АҚ-ы тағайындалды.Басқарма мәліметінше, қазіргі уақытта, «Отбасы банк» АҚ мен 784 азамат келісім жасалып, &nbsp; ай сайын төлем жасалуда. Тұрғын үй алу кезегінде тіркеуде тұрған азамматтар саны - 35782. Оның ішінде, Ұлы отан соғысының ардагерлері – 2, жетім &nbsp;балалар мен ата-анасының қамқорлығынсыз қалған балалар – 2251, «Алтын алқа», «Күміс алқа», алқаларымен наградталған немес бұрын «Батыр ана» атағын алған, сондай ақ 1 және 2 дәрежелі «Ана даңқы» орденімен наградталған көпбалалы аналар, көпбалалы отбасылар – 8407, халықтың әлеуметтік жағынан әлсіз топтары – 13895, мемлекеттік қызметшілер, бюджеттік ұйымдардың қызметкерлері, әскери қызметшілер және мемлекеттік сайланбалы қызмет атқаратын адамдар -10503, жалғыз тұрғын үйі Қазақстан Республикасының заңнамасында белгіленген тәртіппен авариялық жағдайда деп танылған азаматтар – 725. Қызылорда облысының энергетика және тұрғын үй-коммуналдық шаруашылық басқармасының биылғы 3 айда атқарған жұмыстары өткен жылмен салыстырғанда оң нәтиже көрсетті. Жауапты мамандар алдағы уақытта жоспар бойынша бірқатар жұмыстар атқарылатынын жеткізді.&nbsp;Аружан ЕРАЛЫ &nbsp;

Газдандыру: 20 жобаны жүзеге асыруға 5,9 млрд теңге бөлінді

<a href="https://kyzylorda-news.kz/">Kyzylorda-news.kz.</a> Қызылорда қаласы Полиция басқармасының тәрбие және кадр жұмысы бөлімшесінің инспектор психологтары Сапарова Ақнұр мен Ахбенбетова Гүлвира полицейлер үшін топтық тренинг өткізді. Бұл тренингтің мақсаты психологиялық кедергілерді жою, толық релаксация және стрессті жеңілдету, командалық рухты нығайту болып табылады.Тренинг демалыс күні СПМК-29 саяжайында спорттық форматта ұйымдастырылды. Керемет табиғат, жарқын шырынды көктер мен бейресми атмосфера релаксация үшін қолайлы жағдай жасап, тимбилдинг форматында тиімді жұмыс істеуге мүмкіндік берді.Полиция қызметкерлерінің жұмысы ерекше қауырт және күрделі екенін атап өткім келеді. Полицей мамандығы - психологиялық ауыр, денсаулыққа зиянды, қауіпті және сонымен бірге қажетті және таптырмайтын мамандықтардың бірі. Бұл күнделікті бейбітшілік пен қоғамдық тәртіпті қорғауға тура келетін нағыз ерлер мен ерікті әйелдер үшін арналған жұмыс.Өйткені, күндіз түні, қоғамдық қауіпсіздікті қамтамасыз ету үшін олар жоғары жауапкершілік аймағында және әртүрлі стресстерге жиі ұшырайды. Сондықтан психологтардың өздері ұжымдық тренинг өткізу қиындықтарды жеңуге түрткі болады деп санайды. Полицейлер өткізілген іс-шараға риза болып, тренингтің жоғары өнімділігін атап өтті.Фото: dzen.ru

Қызылордалық психологтар табиғат аясында тимбилдинг өткізді

<a href="https://kyzylorda-news.kz/">Kyzylorda-news.kz.</a>&nbsp; Жыл сайын 15 мамырда бүкіл әлем жұртшылығы Біріккен ұлттар ұйымы бекіткен халықаралық отбасылар күнін атап өтеді. Осыған орай, «Азаматтарға арналған үкімет» шаңырақ көтерген отбасылартуралы &nbsp;арнайы статистика жүргізген.Қызылорда облысында шаңырақ көтеріп, некеге тұратын азаматтар қатары жыл сайын артып келеді. 2023 жылдың II жартыжылдығын қоса есептегенде Қызылорда қаласы және аудандарда барлығы 3716 жаңа отбасыға неке куәлігі табысталған болса, оның 1407-сі осы жылы шаңырақ көтергендер қатарында. Ал аймақ көлемінде құрылған неке саны бойынша қаладан кейінгі көшті Шиелі мен Арал аудандары бастап тұр.Сонымен қатар мемлекеттік корпорация Қазақстан бойынша 10 айда 103 мыңнан астам неке тіркеген, ал 2024 жылдың басынан бері 40 мың жаңа отбасы құрылған екен.Неке – адамзат үшін ең қастерлі ұғым, отбасы болудың негізі. Толыққанды әрі бақытты шаңырақ көтерген жұптар еліміздің болашағын жарқын етпек. Сондықтан жанұя болуға бекіген жұптар көп болғай.Қазіргі таңда «Азаматтарға арналған үкімет» некені салтанатты түрде тіркеуді жүргізіп келеді. Естеріңізге сала кетейік, 2023 жылғы 1 шілдеде «Азаматтарға арналған үкіметке»&nbsp;азаматтық хал актілерін тіркеу функциялары берілген болатын.

Архив