&nbsp; <a href="https://kyzylorda-news.kz/">Kyzylorda-news.kz.</a>&nbsp; &nbsp;Қызылорда қаласының &nbsp;әкімі Серік Қожаниязов көктемнің алғашқы мерекесі – Алғыс айту күніне орай еңбек адамдарына құрмет көрсетті. Оның ішінде коммуналдық қызмет саласы мамандарымен кездесті.Алдымен тұрғындардың игілігі үшін қысы-жазы қаланың тазалығын басты міндеті деп білетін &nbsp;«Қызылорда тазалығы» &nbsp;мен халықты ауызсумен қамтамасыз ететін «Су жүйесі» мекемесіне барып, мерекемен құттықтады.<blockquote>– Еліміздегі ең маңызды әрі күрделі саланың бірі – коммуналдық сала. Сіздердің жұмыстарыңыз бүкіл халықтың тұрмыс-тіршілігінде маңызды рөл атқарады. Ауа райының қолайсыздығына қарамай, күні-түні еңбек етіп жүрген өздеріңізге шынайы алғысымды білдіремін. Сіздердің өлшеусіз еңбектеріңіз біз үшін қашанда құнды болып қала бермек, – деді қала әкімі.</blockquote>Сондай-ақ қос мекеменің бірқатар қызметкерлеріне арнайы Сарыағаш шипажайына тегін жолдама мен Алғыс хат табыстады.Бүгінгі күні қала тазалығына өз үлесін қосып жүрген тазалық мекемесінің механизаторы Рүстембек Ибраев еңбегінің еленгеніне ризашылығын білдірді.Қала әкімі су жүйесі қызметкерлеріне де құрмет көрсетті.Коммуналдық қызмет саласы бұл – мемлекеттің, экономиканың, халықтың әл-ауқатынына тікелей әсер ететін сала. &nbsp;Сондықтан облыс әкімінің қолдауымен өткен жылы коммуналдық шаруашылықты дамыту үшін арнайы техникалық көліктер беріліп, қалаішілік жүйелі жұмыс атқарылды.<blockquote>– «Су жүйесі» мекемесінде 2013 жылдан бері жөндеуші болып жұмыс істеймін. Біздің жұмыстағы ең қиын сәттің бірі – түнде жүретін уақыт. Яғни су құбырынан ақау кеткенде &nbsp;жөндеуге барамыз. Осы еңбегімізді бағалап, шипажайға тегін жолдама берген қала әкіміне алғыс айтамын, – деді жөндеуші Берік Сүлейменов.</blockquote>Мұнан соң қала әкімі ардагерлерді ұлықтап, 101 жастағы қария Күлмарам Қонысбаеваның &nbsp;үйіне барып, Алғыс айту күнімен құттықтады.Ақжаулықты әже бүгінде екі баласынан төрт немере, он екі шөбере, бір шөпшек сүйіп отыр.<img src="https://knadmin.beoblood.kz/uploads/1417f653_3d5c_4c3c_be82_07f9a3428391_cbdf81a161.jpg" alt="1417f653-3d5c-4c3c-be82-07f9a3428391.jpg"><img src="https://knadmin.beoblood.kz/uploads/bdff0b7f_33ee_4501_b6af_e6319c6375be_101c4f1bfe.jpg" alt="bdff0b7f-33ee-4501-b6af-e6319c6375be.jpg"><img src="https://knadmin.beoblood.kz/uploads/67b1f40b_276f_487b_bb36_b13e843f8d67_14a7cd9a41.jpg" alt="67b1f40b-276f-487b-bb36-b13e843f8d67.jpg">

Қала әкімі еңбек адамдарына құрмет көрсетті

<a href="https://kyzylorda-news.kz/">Kyzylorda-news.kz.</a> 1 наурыз – Алғыс айту күніне орай Шиеліде «Ардагерлерді ардақтайық» партиялық жобасы аясында партия ардагерлері және партия белсенділерімен кездесу өтті.Салтанатты жиынға "AMANAT" партиясы Шиелі аудандық филиалының төрағасы Болат Сыздық, партия ардагері Найла Палымбет және бастауыш партия ұйымдарының төрағалары және белсенді жастар қатысты.Шара барысында "AMANAT" партиясы Шиелі аудандық филиалының төрағасы Болат Сыздық ашып беріп, барша партия мүшелерін "Алғыс айту" күнімен құттықтап алғысын білдірді.Ардагерлер алғыс айту күнінің тарихынан сыр шертіп, кешегі қилы заманда қазақ халқы тағдырдың жазуымен елге келген өзге этнос өкілдеріне кең құшақ жайып, бауырына тартқаны, бір үзім нанын бөліскені туралы баяндап берді. Аталған мерекенің басты мақсатының бірі – өскелең ұрпақты достыққа, бір-біріне деген құрмет пен толеранттылыққа, отансүйгіштікке тәрбиелеу, Қазақстанда этносаралық келісім мен ұлтаралық қарым-қатынасты нығайту екенін атап өтті.Әңгімеден соң қызметкерлер ардагермен бірге естелік суретке түсіп, өмір жасының ұзақ болуын тілеп, жылы лебіздерін білдірді.Сондай-ақ "AMANAT" партиясының жұмысына белсенді араласып, өздерінің қоғамдағы белсенділігі және іскерлігімен көзге түскен бірқатар партия ардагерлеріне құрмет көрсетіліп, сыйлықтар табысталды.

Шиеліде ардагерлер ардақталды

<a href="https://kyzylorda-news.kz/">Kyzylorda-news.kz</a>.&nbsp; Көп балалы отбасы – ол бақытқа, шаттыққа толы жанұя, береке-бірліктің, сыйластық пен татулықтың, адамгершілік құндылықтардың тоғысқан жері. «Балалы үй базар, баласыз үй қу мазар» деп, дана халқымыз бекер айтпаған. Бала – үйіміздің берекесі, көз қуанышымыз, жүрегіміздің жұбанышы және ұлтымыздың баға жетпес құнды қазынасы десек артық болмас. Кеңес Одағының батыры Үрмәш Түктібаев атындағы ауыл Қазалы ауданының орталығынан жетпіс бес шақырым қашықтықта орналасқан. Алға ауылдық округіне қарасты елді мекеннің аты республика көлеміне таныс. Қалай дейсіз ғой?! Батыр атымен аталуы өз алдына бөлек әңгіме. Басқа ауылдардан бөлектігі, бұнда алтын құрсақты аналар қатарының көптігінде. Көз тимесін Түктібаев ауылында 24 егіз тұрады. Осыдан төрт жыл бұрын дүние дидарын ашқан үшемдер – Айғаным, Айғант, Асылым есімді балдырғандар да ата-анасының көз қуанышы болып өсіп келеді. Ауылда екі мыңға жуық адам тұрады, үш жүзден астам отбасы тату-тәтті өмір сүріп келеді. Түктібаевтардың басым көпшілігі ата кәсіп мал шаруашылығымен айналысады. Сонымен қатар, бау-бақша егіп, ырзық-несібесін Жер Анадан теріп жүргендер жетерлік. Әсіресе, жергілікті қауынның дәмі таңдайдан кетпейді. Үрмәш Түктібаев 2000 жылдардан бері қарай «Егіздер ауылы» аталып кеткен. Мұнда жылына бірнеше егіз туылады. Қазір алақандай ауылда 24 егіз жұп тұрады. Ең үлкені 40-тан асса, ең кенжесінің жасы бесте. Шапағат және Толғанай Аманжоловалар әпкелі-сіңілі жақын туыстар санатында. Дүние есігін ашқаннан бері жұптары жазылған емес. Егіздердің сырт-келбеті бір-біріне қатты ұқсамағанымен, мінездері аумайды. Екеуі де бауырмал, жақындарына қамқорлық танытып тұрады. Анасы Перизаттың айтуынша, Толғанай гуманитарлық бағыттағы пәндерді ұнатады екен. Ал, Шапағат жаратылыстану пәндерін сүйіп оқиды. Екеуі де анасына үй шаруасына қолғабыс жасап, берілген тапсырманы тиянақты орындайды. "Мен бес баланың анасымын. Егіздерім – ортаншы балаларым. Негізінен сыңарлар менің әулетімде болған. Толғанай мен Шапағат бір-біріне өте жақын қарым-қатынаста. Біреуі ауырса, екіншісінің де денсаулығы сыр береді. Бір-бірінен ұзақ уақыт жырақта жүре алмайды. Сағынысып, бір-бірін іздеп тұрады", – дейді анасы Перизат Дауылбаева. Ендігі кейіпкеріміз – Ақжан және Маржан Жақсыкелді. Бұл екеуі де оқуда зерек, әрі озаттар қатарынан көрінеді. Сыныпта бір партада отырады, үй тапсырмасын да бірге орындайды. Қайда жүрсе де, бір-бірінен алыстамайды. Қыздардың түрлері де ұқсайды, қызығушылықтары да бірдей. Егіздер ән айтқанды, би билегенді ұнатады. Ақжан мен Маржанның ата-анасы балаларының болашағына үлкен сеніммен қарайды. Балаларын – байлыққа балаған бұл отбасымызда сегіз бала өсіп келеді. «Үшемдердің мінезі үш түрлі, еркеліктері басым. Біреуіне қабақ шытсаң, қалғандары да ренжіп қалады. Бір-бірімен ойнайды, ұзақ уақытқа бір-бірінен ажыратуға болмайды. Жүректері нәзік, өте бауырмал», – дейді көп балалы ана Айгерім Маханбетжанова. Екі мәрте егіз тапқан Алмагүл апаның Нұрқанаты мен Ерқанаты 1997 жылы дүниеге келді. Араға тоғыз жыл салып, Бекзат пен Саят Шаттықовтар отбасы қатарын толықтырды. Қазір Нұрқанат, Ерқанат және Бекзат Астана қаласында тұрады. Ерқанат отбасын құрған. Шаңырағының құрамы көбейіп, бір баланың әкесі атанып үлгерді. Бүгінде Бекзат мамандық меңгеріп, оқу оқуда. Сыңары Саят Түктібаев ауылында ата-анасының жанында қолғабыс етуде.&nbsp; Биыл мектепті тәмамдайды. Алтын құрсақты Алмагүл анаға телефон шалып, балаларының ұқсастығы мен бүгінгі тыныс-тіршілігі туралы сұраған едік. Бір қызығы алғашқы егіздерін дүниеге әкелгенде ешкім сенбепті. – Жүкті кезімде бірнеше мәрте ультра дыбыстық тексеруден өтсем де ешқайсысы егіз бала дүниеге келеді деп айтпады. 1997 жылдың 1 сәуірінде Нұрқанатым мен Ерқанатымды босандым. Жақын-жуыққа егізді болдым десем, ешкім сенбейді. 1 сәуір – күлкі күніне бізді алдап отырсың деп бәрі қалжың ретінде қабылдағаны бар, – дейді Алмагүл Алданбергенова.&nbsp; Бұл отбасының тұңғышы Ләззат. Ол тұрмыста. Бес баланы өмірге әкеліп, тәлімді тәрбие беріп отырған Киікбай Нағызалиев пен Алмагүл Алданбергенова немерелердің сүйікті ата-әжесі. Бір ғана ауылды емес, бүкіл қауымды шаттыққа бөлеген жаңалық – 2019 жылы Ү.Түктібаев ауылында болған еді. «Өмірге үшем келді» деген қуанышты хабар бұқаралық ақпарат құралдары арқылы лезде республикаға тарады. Осыдан төрт жыл бұрын қуанышты жағдай ауыл тұрғындары – Қуаныш Алтынбаев пен Айгерім Маханбетжанованың отбасында орын алды. Жарық дүниеге Айғант, Айғаным және Асылым есімді үшем келді.&nbsp; Бүгінде қыздар тәтті қылықтарымен жақындарын қуантудан жалыққан емес. Үш қыздың сырт келбеті бір-біріне қатты ұқсамайды. Ата-анасының айтуынша, үшемдердің мінезі де әртүрлі. – Ортаншы қызым – Айғаным пысық, үлкенім – Айғант аңқаулығы бар. Ал, кіші қызым – Асылым әлі мінез шығара қоймады. Үшеуі бір-біріне өте жақын. Өсе келе бірге ойнауды үйренді. Бірі ауырса, екеуінің де мазасы қашады. Қазір аналары үйде балалардың тәрбиесімен айналысып отыр. Балалардың ержетіп, есейіп кетуі оңай шаруа емес. Үшемдер болса, тіптен бөлек әңгіме. Бұл бізге Құдайдың берген үлкен сыйы. Барымыз да, бақытымыз да балаларымыз, – дейді үшемдердің әкесі Қуаныш Алтынбаев. Қазіргі қоғамның рухани жаңғыру сатысында отбасы құндылықтарын сақтау маңызды. Отбасы – мемлекеттің бір бөлшегі. Азаматты тәрбиелеп шығаратын ең үлкен мектеп те – осы. Сондықтан, қоғам жаңғыруы мәселесінде осыған үнемі көңіл бөлінуі тиіс. Отбасылық саясатты қалыптастыруда атқарылатын шаралар әлі де көп. Соның ішінде, отбасылық құндылықтарды насихаттау және көпбалалы отбасыларды ынталандыру бағытындағы жәрдемақы түрлерін әр кезеңнің талабына сай жетілдіріп отыру – бүгінгі күннің маңызды мәселесі болып отыр. &nbsp;

Түктібаев ауылында 24 егіз тұрады

<a href="https://kyzylorda-news.kz/">Kyzylorda-news.kz</a>. Соңғы кезде әлем бойынша, сондай-ақ елімізде есірткі ахуалы күрделенуде. Мәселен, бүгінгі синтетикалық есірткі арзан әрі қолжетімді. Сондықтан бұл үлкен әлемдік мәселеге айналып отыр. Қызылорда ОПД Есірткі қылмысына қарсы іс-қимыл басқармасы бастығының міндетін атқарушы полиция подполковнигі Дөненов Ардақ Әбішұлы осы мәселеге кеңінен тоқталды.– Қазіргі таңда жастар оңай жұмыс тапқысы келеді. Оған қоса әлеуметтік желіде жұмыс берушілер көп. Олардың заңдылығына қалай көз жеткіземіз?– Өкінішке орай, бүгінгі жастар синтетикалық препараттарды «тұтынады».&nbsp;Олардың кең таралуына соңғы үлгідегі технологияның әсері мол. Атап айтсақ, қазір әлеуметтік желілер, бақыланбайтын мессенджерлер, шетелде тіркелген жасырын төлем жүйелері, тыйым салынған заттарды сатудың жаңа байланыссыз әдісінің бір бөлігіне айналды.Енді сол «сатушы» мен «алушының» ортасындағы адамдарға бөлек тоқтап өткім келеді.&nbsp;Қарап отырсаңыз, интернетте оңай табыс табу туралы хабарландырудан көзің сүрінеді. Олар әдетте желілік маркетингке немесе алаяқтық схемаларға «шақыру» болып табылады. Бірақ олардың арасында қауіпті ұсыныстар да бар. Мұндай хабарландырудың артында құрамында есірткі&nbsp; және психотроптық заттарды әр жерге қойып кету үшін курьер жұмысының жасырын ұсыныстары да жоқ емес. Жасөспірімдер мұндай ұсыныстардың қармағына ілініп, жеңіл ақша табу мүмкіндігіне таңданып, есірткі сатушылардың жазасыздық туралы уәделеріне сенеді. Бірақ, ол өтірік.– Закладкаларды қалдырудың ең көп таралған орындарына тоқталсаңыз...– Бүгінде есірткіні әр жерге тығып кету тәсілімен сату әдістері, дилер немесе делдалмен кездесу толығымен жойылды.&nbsp;Кепілгер (закладчик, минер, кладмен, курьер) келісім бойынша белгілі бір жерге шағын пакетті орналастырады, ал тапсырыс беруші тауарды еш қиындықсыз алады. Тығып кеткен есірткі заты – закладка деп аталады. Ол белгіленген жерге жасырын орналастырылған кішкене герметикалық пакетке салынған есірткі заты.Закладкаларды қалдырудың ең көп таралған орындары – пошта жәшіктері, терезе төсеніштері, тұрғын үй кіреберістері, батареялар, электр қалқандары, аялдамалар, гараждар. Ойын алаңдары мен гүлзарлар да танымал. Бірақ олар үлкен аумақты болғандықтан, ол жерден закладканы табу әлдеқайда қиын. Кез-келген адам қолын терезе астына сырғытып, «қазына» тауып ала алады. Тегін закладкаларды арнайы іздейтін жасөспірімдер мен балаларда болуы мүмкін.Есірткі сатушылар закладчиктерді жұмыс орындары жайлы вакансиялар ұсынатын және өздерінің «түйіндемелерін» қалдыратын сайттар арқылы іздейді. Таралу аймағына байланысты жұмысшылар тек ірі қалаларда ғана емес, сонымен қатар аймақтарда да ізделуі мүмкін.Парасатты адамдарды тарту үшін вакансиялар заңды жұмыс іздеу сайттарында орналастырылады. Ал жұмыс іздеген адам жинақтаушы, тасымалдаушы, жүргізуші вакансияның орнына, сәл өзгеше сипаттағы ұсыныстар алады. Көбінесе ересек азаматтарды лауазымға қояр талабы аз, жақсы табыс қызықтырады. Ал ондай жұмысқа жасөспірім немесе студентті алуға дайын болса, соңғылары ойланбай келіседі.Кладмендер, әсіресе жастар жұмыс мессенджерлердегі қарым-қатынасқа негізделгендіктен, шифрланған арналар мен арнайы құрылған аккаунттар бойынша жұмыс істейді. Олар мұндай қызмет үшін ықтимал жауапкершілікті түсінбейді, бұл жағдай оларды жалдауды жеңілдетеді.&nbsp;Сонымен қатар, курьер тауарды алып қашып кетпеу, пайдаланбау үшін кейде дилерлер қызметкерді төлқұжатын қолына ұстап тұрып суретке түсіреді. Қойылған шарттарды закладчик орындамаған жағдайда фотосуретін бірден интернетке жүктейді. Алдаған жағдайда оданда қатал шара көріледі –&nbsp; физикалық зорлық -зомбылық.– Заңсыз іс-әрекеттің зардабы қандай?&nbsp;– ҚР Қылмыстық кодексіне сәйкес (297-бап) кладменнің жұмысы есірткілерді, психотроптық заттарды, сондай-ақ олардың аналогтарын заңсыз өткізу (немесе жөнелту) ретінде бағаланады.Жаза көбіне тәркіленген есірткі заттың&nbsp; көлеміне, сатқан орнына және басқа да факторларына байланысты болады. Атап айтсақ, бес жылдан жиырма жылға дейінгі мерзімге бас бостандығынан айыруды немесе мүлікті тәркілеп өмір бойына бас бостандығынан айыруды қамтиды.Назар аударуға керекті белгілер – баланың телефонында қабырғалардың, үйлердің, кіреберістердің, аялдамалардың, қоршаулардың және т.б. фотосуреттер болады. Жеке заттар арасында жабысқақ таспалар, зип-пакеттер, қалта электронды таразылар, таблеткалары бар блистер немесе тамшы құтылар табылады. Дабыл белгілері – қарым-қатынас шеңберінің күрт өзгеруі, бала тұйық, алшақ, ашуланшақ болады, тәкаппарлық танытады, бос уақытын қалай өткізетіні туралы ештеңе айтпайды, үнемі біреумен хат алмасады және байланыс кезінде телефон экранын жабады.Есірткі тарататын адамдар әдетте көрінбейді. Олар бұл ісімен айналысу мерзімі бір айдан аспайды. Өйткені бірден ұсталады.&nbsp; Жасаған әрекеті үшін жаза өте қатал. Тіпті жоғары табыс олардың темір тордың артында өткізген жылдарына тұрарлық емес.– Сұқбатыңызға рақмет!

Ардақ Дөненов: Есірткісіз қоғам құру қолымызда

&nbsp; <a href="https://kyzylorda-news.kz/">Kyzylorda-news.kz</a>.&nbsp; Қазалы аудандық партия филиалының мәжіліс залында «Жер аманаты» және «Ауыл аманаты» жобаларының аудан көлемінде іске асырылуы бойынша бірлескен отырыс өткізілді. Басқосуға аудандық мәслихат депуттары және аталған жобалардың жүргізілуіне қатыстатын дербес бөлім, мекеме басшылары мен мамандары, бірқатар ауылдық округ әкімдері қатысты. Жиынға төрағалық еткен партия филиалының төрағасы Ғазиз Әліш жоспарланған жұмыстардың орындалу маңыздылығына тоқталды. «Аталған жобалар партия мен үкіметтің бірлескен жобалары, партияның сайлауалды бағдарламасындағы негізгі тармақтарынының бірі. Сондықтан қай тұрғыдан алғанда, соған орай бақылау да жоғары болады. Маңызды жиынға бірқатар дербес бөлім, мекеме басшылары және ауылдық округ әкімдері мен мамандары арнайы қатысты. Өткен жылы жинаған мол тәжірибе бар. Сондықтан партияның аудандық филиалымен бірлесе, тұрғындарға «Ауыл аманаты» жобасы бойынша ақпараттық-түсіндіру бойынша жүргізілетін жұмыстарды жалғастырып, жобаның ауқымын кеңейтуге барынша жұмыс жасауымыз қажет», – деді Ғазиз Әлмәмбетұлы. Өз кезегінде аудандық ауыл шаруашылығы мен жер қатынастары бөлімінің басшысы Еркін Сейтов сөз алып, жобалар аясында соңғы екі айдағы жасалған жұмыстарға тоқталып өтті. &nbsp;

Мемлекеттік жобалардың іске асырылуы қадағаланады

<a href="https://kyzylorda-news.kz/">Kyzylorda-news.kz</a>.&nbsp; Қызылорда қаласы бойынша білім бөлімінің ұйымдастыруымен білім беру ұйымдары басшыларының инновациялық және кәсіби маңызды тәжірибесін анықтау және тарату, білім беру жүйесіндегі мәртебені көтеру және кәсіби имиджді қалыптастыру мақсатында «Бір мектеп – бір жоба» облыстық байқауының қалалық кезеңі өткен болатын.Ә.Мүсілімов атындағы №101 мектеп-лицей базасында байқаудың жеңімпаздарын марапаттау рәсімі өтті. Шараға Қызылорда қаласы бойынша білім бөлімінің басшысы Ерлан Теңізбайұлы мен қалалық кәсіподақ кометінің төрағасы Орынша Міржақыпқызы қатысты.<blockquote>Білім – адамзаттың терең және үйлесімді дамуын бекітетін құралдардың бірі, әлеуметтік тұрақтылық пен ұлттық қауіпсіздіктің маңызды факторы. Бүгінгі таңдағы қоғам кәсіби білімі жетік, құзіретті, бәсекеге қабілетті мамандарды талап етеді. Білікті ұстаз, білімді маман болу үшін – әрбір мұғалім өз білімін үздіксіз көтеріп отыруы тиіс. Сіздер «Бір мектеп – бір жоба» байқауы аясында ашық сабақ өткізіп, жоба қорғадыңыздар. Сіздерге шығармашылық жетістік тілеймін, – деді Ерлан Теңізбайұлы.</blockquote>Байқауға қатысқан барлық басшылар арнайы алғыс хаттар мен қалалық кәсіподақ комитетінің ақшалай сыйлықтары табысталды.«Бір мектеп – бір жоба» байқауының облыстық кезеңіне №264 мектеп-лицейінің директоры Бек Сұлтанбекұлы, №101 мектеп-лицейінің директоры Айгүл Алтынбекқызы, №10 мектеп-лицейінің директоры Асылбек Бақытбекұлы жолдама алды.

«Бір мектеп – бір жоба»: Директорлар байқауында облыстық кезеңге кімдер жолдама алды?

Қазалы ауданының тұрғындары үшін – 1 мамыр Алғыс айту күні бейбіт өмір мен ынтымақтаса тұрмыс кешіп отырған ел тұрғындарына да ыстық ықылас пен достық ниеттің дәстүрі, асыға күтер мейрамы. Бұл – әрбір қазақстандық азамат үшін Отанға деген сүйіспеншілік пен патриоттық сезімнің, азаматтық борыш пен жалпы ұлттық келісімнің мерекесі. Қоғамдық келісім мен саяси тұрақтылық – мемлекеттің ең маңызды байлығы. Еліміздің басқа өңірлері секілді Қазалы жеріне де кезінде белгілі себептермен сан ұлттың өкілі қоныс аударған. Олар бүгіндері бір-бірімен тату өмір сүруде. Қазақпен құдандалы болып, қыз беріп, келін алып туыстық қарым-қатынасты арттырды. Мереке қарсаңында қазақ отбасына келін болып отырған өзге ұлт өкілдерімен тілдесіп қайтқан едік.Ольга ТАЙҒАРАЕВА: Ұлттық салт-дәстүрдің барлығын меңгердім<img src="https://knadmin.beoblood.kz/uploads/ccc05f64_31d6_464b_8644_e81e4e9a9b1d_c3c04c7a34.jpg" alt="ccc05f64-31d6-464b-8644-e81e4e9a9b1d.jpg">– Мен орыс ұлтының өкілімін. Қармақшы топырағында дүниеге келдім. 1989 жылы отбасымызбен Қазалыға қоныс аудардық. Жолдасымды мектеп оқушысы кезінен танимын. Қазалы қаласындағы М.Горький атындағы №16 мектепте білім алдым. Қазір Қазалы аграрлы-техникалық колледжінде жұмыс істеймін. Жолдасыммен 1997 жылы наурыз айында отау құрдық. Шүкір, үш ұл, үш қыздың ата-анасы атандық.Жолдасым қайтарымсыз несие алып, мал шаруашылығымен айналысып отыр. Отбасылық кәсіпке барлығымыз да қол ұшын береміз. Болашақта кәсібімізді кеңейтіп, мал басын көбейтуді жоспарлап отырмыз.Бала кезден қазақы ортада өскен соң ба, мен үшін келін болып түскенде ештеңе тосын болмады. Лезде сіңісіп кеттім. Келін болып, енген шаңырағым да керемет жандардан болды. Үйдегі үлкендер жақсылығымды асырып, білместігімді жасырды. Қонақжай қазақ халқының салт-дәстүрінің барлығын меңгердім, әрі орындап та жүрмін.Шахноза АЙТМЕТОВА:&nbsp;Қазақ қашан да бауырмал халық<img src="https://knadmin.beoblood.kz/uploads/a29d0081_2403_4785_ac07_00410286b72a_865d87d791.jpg" alt="a29d0081-2403-4785-ac07-00410286b72a.jpg">– Түркістан қаласының туып-өстім. Өзбек ұлтынанмын. Он алты жыл бұрын Қазалы ауданының Бейсенби деген азаматын кездестіріп, оған тұрмысқа шықтым. Бүгінде көпбалалы отбасы қатарына еніп, алты бала өсіріп отырмыз. Үлкенім 7-сыныпта, кейінгілері 6, 3 және 1 сыныпта оқиды. Кенже екі қызымыз балабақшаға барады.Үйде қарт адам енем бар. Қазір қазаққа тән барлық жөн-жоралғыны білемін. Екінші анамнан да үйренгенім көп. Отбасылық кәсіппен айналысамыз. Әйтеке би кенті орталығынан шайхана аштық. Көктемде көшет сатып, саудамен айналысамыз. Қазалының жасыл желекке оранып, тұрғындарға ерекше көңіл күй сыйлау үшін түрлі гүлдерді де тапсырыспен алып, халыққа ұсынамын. Жалпы, өзім дәмді ас әзірлегенді ұнатамын. Әйел болғандықтан әдемілікке жаным құмар. Бау-бақша өнімдерін де, бір кісідей күтіп-баптаймын.Мені ешкім, ешқашан «сен өзбексің» деп бөлген емес. Қазақ халқының осы дархан көңілі ерекше ұнайды.Қазақ қашан да бауырмал халық. Әрқашан татумыз, доспыз және бір-бірімізбен қойын-қолтық қараласа өмір сүрудеміз. Барлығымыз туған жердің төсінде, құшағын жайған бейбіт елдің ішінде, ел бірлігін сақтауға атсалысып, әрқайсысымыз әржерде, өз саламызда татулыққа, келісімге, бірлікке өз үлесімізді қосудамыз.&nbsp;Нәбира БАРКОВА:&nbsp;«Халықтар&nbsp;достығы» жай айтылған сөз емес<img src="https://knadmin.beoblood.kz/uploads/23cfcb22_9e70_46d4_9a8d_b0fc6eb04857_57437a9d81.jpg" alt="23cfcb22-9e70-46d4-9a8d-b0fc6eb04857.jpg">– «Халықтар достығы» жай айтылған сөз емес. Әр кезеңдерде қазақ елі өзінен пана іздеп келгендердің бәрін бауырына басып, төрінен орын беріп, қандай қиын кезеңдердің өзінде бір үзім нанды бөліп жеген. Сөйтіп, қаймағы бұзылмаған көпұлтты мемлекет болды. Бүгінде түрлі ұлттар мен ұлыстардың барлығы бір шаңырақ астында бірүйдің баласындай ғұмыр кешіп келеді.Мен өзім туған ауылымдағы Қ.Пірімов атындағы №103 орта мектепті бітірген соң Қостанай қаласындағы Ахмет Байтұрсынов атындағы университетке грант негізінде оқуға түстім. «Қайта өңдеу өнімдерінің технологиясы» мамандығын меңгердім. Мамандығым бойынша «РЗА» күріш заводында еңбек еттім.Жолдасым Айбек Жұбатыровпен 2021 жылы шаңырақ көтердім. Бір қызымыз бар. Үйде ата-енеммен тұрамын. Үлкендерге сәлем саламын. Орамал тағамын. Ұлтым өзге болғанымен, қазақы ауылда өскендіктен біршама салт-дәстүрді кішкене күнімнен білемін. Келін болып түскеннен кейін екінші анам білмегенімді үйретіп, үлкен өмірге әлі де баулып келеді.&nbsp;Қазір кәсіппен айналысамын. Бала күтіміне байланысты демалысқа шыққан соң алғашында интернет арқылы резинарт (смоламен жұмыс) туындыларын жасадым. Әсіресе, сағат картина мен ыдыстарға деген қызығушылығым басым болды.Қазір интернеттің заманы.&nbsp;Оны тек, дұрыс бағытта пайдалана білу&nbsp;керек. Копильник жасауға қатты қызықтым. Бірақ алғашқы сәтсіздіктен кейін&nbsp;копильникті бастауға оқтала алмай жүрдім. Қызығып жүргенімді жолдасым байқап,&nbsp;қолдау көрсетті. Сонымен курсын сатып алып, сабаққа қатысып, жұртпен жарысып,&nbsp;жасай бастадым. Жасаған жұмысымды отбасы мүшелері көріп, батасын берді.&nbsp;Осы күндері табыс көзіне айналдырып отырмын.Түйін: Өткен ғасырдың 1995 жылы Қазақстанда дүние жүзінде бұрын соңды болмаған Қазақстан халқы Ассамблеясы құрылды. Бүгінгі таңда ол бес жүзге жуық ұлттық-мәдени бірлестіктің басын қосып, татулықтың үздік үлгісін көрсетіп келеді. Ұйым әр халықтың дәстүр-салтын, ұлттық құндылықтарын дәріптей отырып, өзге этностың мәдениетіне деген сыйластықты қалыптастыруға үлесін қосты. Кешегі алмағайып заманда жер аударылып келгендерге көрсетілген қазақ халқының қонақжайлығы, жанашырлығы мен адамгершілігі қазіргі тастай татулықтың алғышартына айналды десек қателеспейміз. Сондықтан елдің тарихи тұрғындарына алғыс ретінде, ортақ Отанның гүлденуіне тілектестігін білдіру үшін қазақстандықтар 1 мамырда Алғыс айту күнін атап өтеді. Қазалы жұртшылығы да бұл мерекені көтеріңкі көңіл күймен қарсы алды.«Ырыс алды – ынтымақ» деген халық даналығының астарында үлкен мән бар. Ел бірлігі, достық пен бауырмалдық, бекем бірлік біздің баға жетпес байлығымыз.Қоғамдық келісім мен саяси тұрақтылық – біздің басты құндылығымыз. Бұл жетістікті бағалау, оны сақтау жолында аянбай еңбек ету әрбір Қазақстан азаматының міндеті болып табылады. Міне, осылайша туған жердің төсінде, құшағын жайған бейбіт елдің ішінде ел бірлігін сақтауға ұлт өкілдері барынша атсалысуда.&nbsp;&nbsp;

Қызылорда: Бауырмал ұлтқа алғаусыз алғыс

<a href="https://kyzylorda-news.kz/">Kyzylorda-news.kz</a>. Көктем шығысымен Қазалы ауданында екі айлық санитарлық тазалық жұмыстары басталатыны белгілі. Бұл уақытта тұрғындар айналаны күл-қоқыстан тазартып, тал егу жұмыстарын бастайды.Көктемгі тазалық жұмыстарына байланысты Қазалы ауданы әкімі Мейрамбек Шермағанбеттің төрағалығымен мәжіліс өтті. Алқалы отырысқа Әйтеке би кенті мен Қазалы қаласында орналасқан барлық мекеме-кәсіпорындарының басшылары қатысты.Жиында тазалықтың адам өміріндегі маңыздылығына тоқталған Мейрамбек Зинабдинұлы Қазалы ауданының тұрғындары мен мекеме-кәсіпорын ұжымдарын елдік іске белсене араласып, көркейту-көгалдандыру шараларына біркісідей атсалысуға шақырды.<blockquote>– Ауданда наурыз және мамыр айлары аралығы көктемгі санитарлық тазарту, көркейту және көгалдандырудың екі айлығы болып жарияланды. Осыған орай, Әйтеке би кенті жеті аймаққа бөлініп, аудандық мәслихат төрағасы, аудан әкімінің орынбасарлары мен аппарат басшысы белгіленген аймаққа жауапты болып бекітілді.</blockquote>Әйтеке би кенті – ауданымыздың айнасы, оның айналасын үнемі таза ұстап отыру – осы отырған баршамызға ортақ іс. Тазалық – әркімнің өз ауласынан, табалдырығынан басталады. Сондықтан, әрбір тұрғын өз ауылын таза ұстауға, көркейтуге үлес қосуы керек. Біз көшелерді қанша сәндеп-жөндегенмен, көше бойындағы қоқыстар пен үйлердің қоршауы жөнделіп, сырланбаса, мұның бәрі бекер екені белгілі, – деген аудан басшысы барлық мекеме-кәсіпорындар мен кәсіпкерлік нысандардың иелері сенбі күнін күтіп отырмай, тазалық жұмыстарын жүргізулері қажет екенін нық жеткізді.Мұнан соң Әйтеке би кенті әкімі Мұрат Әбсұлтанов Әйтеке би кентіндегі тазалық жұмыстары бойынша атқарылған және алда жоспарланған жұмыстар жөнінде айтып берді.Басқосуда Қазалы ауданы әкімі аудандық полиция бөлімі, білім, денсаулық сақтау, аудандық қоғамдық даму бөлімі, Жастар ресурстық орталығы, аудандық кәсіпкерлік, өнеркәсіп және туризм бөлімі мен Әйтеке би кенті әкіміне күн тәртібіндегі мәселеге байланысты тиісті жұмыстар атқаруды тапсырды.«Абырой барлығымызға да ортақ. Сондықтан, белгіленген аймақтарға ұжым болып ауызбіршілікпен шығып, тазалық жұмыстарын жүргізсек, бұл біздің перзенттік парызымыз. Біз қашанда үлкеніміз қайда жүрсе, сонда бағыт алған ұрпақпыз. Өздеріңіз бас болып, барлық жұмысты бірге істеуге атсалыссаңыздар», – деген Мейрамбек Зинабдинұлы мәжілісті қорытындылады.

Мейрамбек Шермағанбет: Тазалық – әркімнің өз ауласынан басталуы тиіс

<a href="https://kyzylorda-news.kz/">Kyzylorda-news.kz</a>.&nbsp; Қай мамандық та қадірлі, қастерлі. Елге қызмет көрсетудің осалы болмайды. Бәрі де жауапкершілік пен талапқа бағытталған. Мысалы, ұстаз жас өскінді тәрбие мен білімге баулыса, дәрігер дертке шипасын дарытады, емін береді. Құрылысшы зәулім ғимараттар тұрғызса, диқан дән сеуіп, елді астықпен асырайды. Осылайша әрі қарай да көптеген мамандықты тізбектей беруге болады. Бірақ осылардың бәрінің басын біріктіріп, ортақ арнаға тоғыстырып, елдегі хал-ахуалды жүйеге келтіріп отыратын ерекше мамандық иелері бар – ол мемлекеттік қызметші. Яғни елге адал қызмет ету, жайын жасау, жағдайымен санасу – осы мамандық иелерінің басты құзырына кіреді. Бүгінде салаға жастығы мен саналы өмірін арнаған аға-апаларымыз аз емес. Солардың бірі – Қармақшы ауданы, Дауылкөл ауылдық округі әкімі аппаратының бас маманы &nbsp;Сайлаукүл Балғожина. Ол &nbsp;38 жыл үздіксіз қызмет етіп келе жатқан мемлекеттік қызметші. &nbsp;"Дарақ бір жерден көктейді" дегендей, осынша уақыт абыройлы еңбек ету – адам бойынан ізгілікті, мамандыққа деген құрметті, ел-халыққа деген адал қызметті байқатса керек. Жуырда әпкеміз өзі ұзақ жылдар қызмет еткен ұжымы, ауылдастары мен сыйлас дос-жарандарының игі тілегі, зор &nbsp;қошеметімен зейнеткерлік демалысына шықты.&nbsp;Ауылдастары оның үнемі жұмыста талапшыл, бастаған ісіне сергек қарап, соңына дейін жеткізе білетін, әрбір ісінен үлгі алуға тұрарлық, әсіресе мемлекеттік қызметте жүрген жастарға ол кісінің еңбек жолы өнеге екенін марқая айтады. Енді білікті маманның өмір жолына тоқталып өтсек, ол 1963 жылы жүз шайырдың құтты мекені болған Тұрмағамбет ауылында дүниеге келген. Орта мектепті бітірген соң Қызылордадағы Н.Гоголь атындағы Қызылорда педагогикалық институтына оқуға түсіп, оны «Қазақ тілі мен әдебиеті» пәнінің мұғалімі мамандығы бойынша бітіріп шыққан. 1984 жылы ауыл орталығындағы №29 мектепке бастауыш сынып мұғалімі, аға тәлімгер болып жұмысқа орналасып, 2 жыл ұстаздық етсе, 1986 жылы Дауылкөл ауылдық кеңесі атқару комитетінің хатшылығына сайланбалы жолмен тағайындалған. Міне, сол жылдан бері үздіксіз қазірге дейін осы қызметті абыроймен атқарып, зейнет жасына жетіп отыр. Ол қызмет атқарған уақытында ел-халықпен тығыз байланыста болып, ауылдың әлеуметтік-экономикалық &nbsp;дамуына үлесін қосты. Елді мекеннің қоғамдық-саяси өміріне жанашыр ретінде белсене араласты. Қызметін адал атқарып, тұрғындардың құрметіне бөленді.&nbsp;С.Балғожинаның зейнеткерлік демалысына шығуға арналған мерекелік іс-шара Дауылкөл ауылдық мәдениет үйінде өтті. Онда ауылдық округтің әкімі Мұрат Алдамұратов сөз сөйлеп, аудан әкімінің Құттықтау хатын оқып берді. Сонымен қатар "Тұрмағамбет" ЖШС директоры Нұржан Пірмантаев, ауылдық ардагерлер кеңесінің төрағасы Жарылқасын Дәулетов, құрбысы Бердігүл Райымбаева, сыныптасы Клара Қожабаева және ауылдық округтердегі әріптестері жылы лебіздерін жеткізді. Одан бөлек, Қазақстан Журналистер одағының мүшесі, ақын Үрліхан Өңдібаева, ақын ұстаз Зарипа Тасымова жырдан шашу шашты. Мәдениет саласының ардагері Зәуре Кәрібаева тамылжыта ән салса, &nbsp; ауылдық жыраулар үйірмесінің үйірме мүшелері жиналған көпшілікті өздерінің өнеріне тәнті етті. &nbsp;Сайлаукүл Балғожина жары Айтмағамбет Нұрымбаевпен бірге отбасында ұл-қызынан тараған немерелерінің қызық-қуанышына бөленіп отырған бақытты жандар. Қыздары Гүлнұр мұғалім болса, ұлдары Алмас ана жолын қуған мемлекеттік қызметкер.

Мемлекеттік қызмет – абыройлы міндет

<a href="https://kyzylorda-news.kz/">Kyzylorda-news.kz</a>.&nbsp; Адам баласын еңбектің шығармайтын белесі болмайды. Бұл өмірдің өзгермейтін заңдылығы, бұлжымас қағидасы. Бұған дейін де осылай жол салынған, және ол солай кете бермек. Білім мен білік қатар өрбіген жерде, қоғам дамып, алға басады. Жаңарулар мен жаңғырулар пайда болып, елдің өмірінде көптеген алғы істер орын алады. Жүрегі елім деп соққан талайдың бақыты алға озып, еңбегі көрінетін де, халқынан әділ бағасын алатын да – осы &nbsp;тұс. Міне, біз бүгін қаламымызға ақау етіп отырған тұлғамыз қарапайым еңбекпен өсіп-өніп, білім-білігінің, адамгершілігінің арқасында атқа қонып, төрге озған азамат – Әлімбай Білжанов.&nbsp;Әлекең Жосалы кентінің іргесінде жатқан Иіркөл ауылының тумасы. Осындағы №106 сегізжылдық мектептің 1-сыныбына барып, орта білімді Дүр Оңғардағы №107 мектепте алады. Мектеп қабырғасында жүріп-ақ өзінің қағілез мінезімен айналасын баурап алған оқушы Әлімбайдың кітапқа деген қызығушылығы сол кезден басталған-ды. Оның білімге деген ұмтылысы қалаға қарай басын бұрып, ынтықтырды да тұрды. Ондағы мақсат – жоғары білім алып, маман атану болатын. Оның бұл арман-аңсары алдамады да. Мектептен алған білімін жетілдіре түсіп, Алматы қайдасың деп тартып тұрды.Бағыты – Қазақтың Еңбек Қызыл Ту орденді ауылшаруашылық институты. Емтихандарды ойдағыдай тапсырған ауылдың қара домалақ баласы республиканың түкпір-түкпірінен жиналған бозбала, бойжеткендердің ортасынан бір-ақ шығып, студент атанып шыға келді. Институттың "Ауыл шаруашылығын механикаландыру" факультетінен "Инженер-механик" мамандығы бойынша қолына диплом алып, еңбек жолына түседі.&nbsp; Жоғары оқу орнындағы әскери кафедраны қоса бітіргендіктен ол 1983 жылы Талдықорған қаласы жанындағы Еркін қыстағында 2 айлық &nbsp;әскери дайындықтан өтеді. Осы жылы ҚазКСР ауылшаруашылығы министрлігінің жолдамасымен Жаңақорған ауданына жіберіліп, сондағы "Госкомсельхозтехника" бірлестігіне жөндеуші болып жұмысқа орналасады.&nbsp;Дегенмен, 1984 жылы жанұя жағдайына байланысты туған жеріне келіп, ауданның Жосалы кеңшарына автогараж меңгерушісі қызметіне қабылданады. Бір ескерерлігі, ол уақытта қазіргідей емен де семен институт бітіріп келіп жатқан мамандар болмайтын. Екі-үш диплом түгілі бір жоғары оқу орнына түсіп, оны бітіріп шығудың өзі үлкен беделге саналтын. Оқуға түсу де кез келгеннің маңдайына біте бермейтін бақ десек, қате болмас. Оны бүгінгі аға буын өкілдері жақсы біледі.&nbsp;Ауылға келіп қызмет істеп жатқан жас жігіт өзінің өмірлік серігін кездестіріп, 1986 жылы отбасын құрды. Сөйтіп жүріп Қызылордадағы облыстық агроөнеркәсіп комитетіне қарасты механикаландыру бөлімінің "Транспорт және тасымалдау" тобына жол қауіпсіздігі инженері болып қызметке орналасады. Екі жылдан соң топтың "Казагропромтранс" өндірістік бірлестігіне өтуіне орай сонда теміржол жүк тасымалы және 2-ші дәрежелі жол қауіпсіздігі инженері болып қызметін жалғастырады. &nbsp;Осыған дейін еңбек жолында бірқатар тәжірибе жинап, біліктілігін таныта білген азаматтың іскерлігі басшылық тараптардың ауызында жүрген. 1989 жылы Жосалы кеңшары дирекциясының шақыртуымен облыстық агропромкомитеттің жолдамасымен кеңшарға қызмет ауыстырады. Ол осында 1990-1996 жылдар аралығында жауапкершілігі жоғары бас инженер-механик болып &nbsp;талмай, шаршамай еңбек етті. 1996 жылы жанұя жағдайына байланысты &nbsp;Иіркөл ауылына ауысып, шаруашылықта техника қауіпсіздігі инженері қызметін шаруашылық тарағанша атқарды.&nbsp;Мұнан соң Әлекеңнің қызмет сапары ел басқару ісімен тығыз байланысты. Үш ауылдық округтің тізгіні сеніп, тапсырылып, небір ұйқысыз күндер мен түндерді өткізді. Және ол сенімді ақтады да. 2007 жылдан басталған ауыл әкімінің қызметін бүгінгі күнге дейін абыроймен алып келді. Атап айтқанда, Иіркөл, Қармақшы және Төребай би ауылдарын басқарып, елден алғыс алған жайы бар. Қазақ халқында "Алғыс алған арымайды" деген қанатты сөз бар. Қай қызметті атқарса да алдымен ауылдың ақсақал-қарасақалдарымен ақылдасып, іс бастайтын басшының бәлки, көпшілдігі, кез келген жанмен тіл табыса білетіні осы бір жүгі ауыр қызметтерді атқарып, абырой биігінен көрінуінің қыры мен сыры да осында жатқандай көрінеді. &nbsp;Әлімбай ағамыз бастаған ісін соңына дейін апаратын, қашан да ойын ашық та тура айта білетін, елдің де, жердің де ау-жайын біркісідей меңгерген қарым-қабілетімен ерекшеленетін азамат екенін өзі басқарған ауыл халқы мен ұжымы жақсы біледі. Алпыстың үшін толтырып отырған ағамыз қазіргі таңда көпшіліктің құрметімен зейнеткерлік демалысына шығуда. Әлімбай Махмұтұлы жайында замандастарының да айтар жылы лебізі жетерлік.&nbsp;<blockquote>– Әлекеңді 2003 жылдан бері қызмет бабымен жақсы танимын. 2007 жылы Иіркөл ауылының әкімі кезінен бастап жеке басымыз ғана емес, отбасымызбен де жақын араласа бастадық. Ол кісінің ең мықты жері – азаматкершілігі. Өте білімді, сауатты. Ойын бүкпей айта алады. Жұмысына адал, ісі таза. Нағыз мемлекеттік қызметкер десек артық емес. Осы уақытқа дейін 3 ауылдық округтің әкімі болып халыққа абыроймен қызмет етті. Үлкенге де, кішіге де иіліп құрмет жасай біледі. Аталарды, аналарды сыйлай алады. Ұрпағын жақсы тәрбиелеп отыр. Балаларының бәрі алтын асықтай, тәлім-тәрбиелі. Жан-жары Роза Мұқамеджанқызы білім саласының маманы, білікті мұғалім. Туған ағамдай болып кеткен ағамыз. Жалғыз маған ғана емес, біз секілді көптеген азаматтың біразын өзінің қанатының астына алып, қамқорлық жасап жүреді. Атжолын көрсетіп, ақылын айта алатын үлкен жүректі азамат. Ең бастысы – барған жерлерінде қай ауылда қызмет жасамасын, сол ауылда шиеленісті де күрделі мәселелердің түйінін тарқатып, елдің дамуына, ауызбірлігіне қызмет жасады. Сол халыққа қолынан келгенше көмегін берді. Әкіммін деп шіреніп тұрған емес. &nbsp;Галстугімен, кеңсе киімімен істелініп жатқан жұмыс бітпей жатса, майға да, суға да, отқа да кіріп кетіп, елмен бірдей терін төгіп жұмыс істеген азамат, мінекей зейнет демалысына шығып жатыр екен. Осындай құрметке бөленіп отыр. Сондықтан да біздің білдіретін лебізіміз – алдағы уақытта осы елдің бір беделді ақсақалы, әлде де ел-халықтың бірлігіне, дамуына өзінің сүбелі үлесін, ақыл-парасатын қосатын тұтқасы, сондай бір сыйлы, құрметті елағасы болатынына сенеміз. Мемлекеттік қызметте ізінен еріп келе жатқан жастар осы кісіден үлгі алса болады деген тілегімізді жеткізгім келеді, – дейді замандасы Орынбек Жұмағалиұлы жүрекжарды тілегін жеткізе.</blockquote>"Әрбір сыйлы азаматтың артында адал да жанашыр жары тұрады" дейді дана халқымыз. Әлімбай ағамыздың үйге алаңдамай, қызмет етіп, қонағын құдайдай күтіп алатын отанасы Роза Есетованың да еңбегі зор. &nbsp;Олар бүгінде 5 бала тәрбиелеп отырған бақытты жандар.

Халық игілігіне қызмет қылған әкім

&nbsp;<a href="https://kyzylorda-news.kz/">Kyzylorda-news.kz</a>.&nbsp; &nbsp;Жаңақорған ауданында ресми тіркелген аң шаруашылығы жоқ. Сыр мен Қаратау бөктерінен қоян, түлкі, қарсақ, тағы басқа аңдар өреді. Қаратау маңындағы жекеге өткен жерлердің иелері қоршап алып, жерге иелік етуде. Қорықшылар тек ерекше қорғалатын аумақтағы аң-құстарға жауапты. Әкімшіліктің немесе шаруа қожалығы жеріндегі дала жануарлары сол шаруа қожалықтарының иелігіне жатпайды. Шаруа қожалықтары да өз жеріндегі аң-құстарды рұқсатсыз ата алмайды. Талапқа сай жылына жүз қоянға дейін атуға жолдама беріледі.Бұл туралы Жаңақорған ауданы орман қорғау және күзету жөніндегі инженер Бақытжан Исматов былай дейді:<blockquote>– Ауданда арнайы жолдаманы &nbsp;келіп аулаушылардың қатары аз. Қазір бұрынғыдай емес, бей-берекет аңға шығу азайды. Егер жоғарыдағыдай талаптарды орындап, аулаушылар келіп жатса, бес қорықшымыз бар. Күзде үйрек, қаз, қасқалдақ, құр, шалшықшы аулау мерзімі 6 қыркүйектен 30 қарашаға дейін, ал шілге 6 қыркүйектен 15 қарашаға дейін мерзім белгіленген, – дейді орман қорғау және күзету жөніндегі инженер Бақытжан Исматов.&nbsp;</blockquote>Аңшылық талап-ережесіне сай, тұяқты жануарлардың аталығына жылда 1 тамыздан 31 желтоқсанға дейін, қабанға 6 қыркүйектен 31 желтоқсанға дейін рұқсат етілген. Қыста қоян, түлкі, қарсақ, күзен аулау 1 қарашадан бастап ақпан айының ортасына дейін жалғасады. Облыс аумағында сүтқоректілердің 62 және құстардың 214 түрі мекендейді. Олардың ішінде 35 сүтқоректі мен құстың 80 түрі аңшылық-кәсіптік бағыттарға жатады. Ал аңның 10 түрі мен 35 құс «Қызыл кітапқа» енген.Технология дамыған сайын табиғатты қорғау өзекті тақырыпқа айналып келеді. Тарихтың тереңіне үңілсек, ХХ ғасырдың алғашқы жартысындағы қолдан жасалған аштық пен қуғынсүргін, одан кейінгі тың және тыңайған жерлерді игеру мен ядролық сынақ алаңдарының жергілікті халықтың өсіп-өркендеуін қаншалықты тежегенін аңғару қиын емес. Сыр өңірінде ғана мекендеген керқұлан, аққұлан, тарпаң, жолбарыстан қалай айырылғанымызды ғалымдардың еңбегінен ғана оқыпбіліп жүрміз.Саны азайған, тіпті тұқымы мүлде жойылудың алдында тұрған жан-жануарларымыз бен өсімдіктеріміз туралы түсінігіміз де аз. «Қызыл кітапқа» енген қазынамыздың қадіріне кім жетті? Аймаққа ғана тән ландшафттың тағдырына тұрғындар алаңдай ма? Ашкөздік танытып жүрген жерлестерге қандай шара көруге болады? Алдымен осы сұрақтарға жауап іздеген едік. Браконьер деген кім? Осы сөздің түп-төркінін ақтармақ мақсатта «ҚазАқпарат» баспасынан жарық көрген экология саласына арналған 17-томында браконьер – қаскөй, браконьерство – қаскөйлік деп аударылыпты. Кейін 2002 жылы «Мектеп» баспасынан жарық көрген «Экология және табиғат қорғау» деп аталатын кітапта: қаскөйлік (браконьерства) – аң аулау, балық аулау ережесін және жануарлар әлемін қорғау туралы заңның талаптарын бұзып, жабайы жануарларды аулау немесе жою деп көрсетіліпті. Міне, осы нұсқа тура мағынаға жақын деуге болады. Әйтсе де, барконьер сөзінің әлі күнге дейін қазақы баламасын қолданысқа енгізе алмай келеміз. Тіл жанашыры ретінде осы сөзді әріден зерттеп көрдік. Шынында да француздың «braconnier» деген сөзінен шыққан бұл термин жабайы жан-жануарлар мен өсімдіктерді заңсыз аулап, өндіруге қатысты ұғымды білдіріп тұр емес пе? Тақырыпты терминнің айналасында емес, браконьерлікпен күреске арнағанды жөн көріп отырмын. Заңсыз аңшылықпен айналысқандарға қылмыстық кодекстің 337 бабы мен заңсыз балық аулау ҚК 335-бабы қылмыстық теріс қылық ретінде емес орташа ауырлықтағы қылмыс қатарында, ол үшін 4 жылға дейін бостандығынан айыру жазасы бар. Сондай-ақ топпен жүріп заңсыз аң аулаушылардың ісі ауыр қылмыстар қатарына өтіп, 6 жылдан 1 жылға дейінгі аралықта бостандығынан айыру жазасының белгіленуі де табиғатты қорғауға серпін берер деген үміт бар. Табиғат инспекторларына бағынбау, өміріне қауіп төндіру енді полиция қызметкерлері мен арнайы мемлекеттік орган, әскери қызметкерге қарсы келумен пара-пар.&nbsp;Жасыратыны жоқ, табиғат байлығын қорғауға жауапты комитеттер соңғы ширек ғасырда жиі ауысты. Тарқатып айтсақ, бірнеше жыл қоршаған ортаны қорғау министрлігіне, одан соң, қоршаған орта және су ресурстары министрлігіне, бірде Ауыл шаруашылығы министрлігіне, арасында табиғи ресурстар және қоршаған ортаны қорғау министрлігіне, бірде ҚР Экология, геология және табиғи ресурстар министрлігінің құзырына қарады. Тұрақтылық болмай, басымдыққа жеткілікті деңгейде мән берілмегендіктен бұл уақытта саладағы түйткілді мәселелер бұрынғыдан қордалып, салмақтана түсті. Кімге қараса да, жыл сайын табиғатты қорғау бағытында мемлекет тарапынан қолдау жоғары деңгейде жүрді. Мәселен, маусымдық рейдтер, ландшафтарды қорғауға субсидиядан бастап, дариядан тасып-төгілген қайрандардағы балық шабақтарын құтқару үшін жыл сайын қомақты қаражат бөлініп келеді. Сонда да табиғатымыз көркеюдің орнына сұрықсызданып бара жатқандай. Неге? Оған басты себеп – ашкөздік ғана секілді.<blockquote>«Дәніккеннен құныққан жаман» дегендей, аңшылықпен тек әуестік үшін айналысып, ондағы ереже мен тәртіпке мойынсұнбай ашкөздікпен табиғатқа залал келтірушілер тіпті аңқұс пен өсімдікті былай қойып, оны қорғаушыларға қару кезенетін жағдайға жеттік. Онсыз да материалдықтехникалық қамтамасыз етілу жағынан артта қалып, мардымсыз жалақыны місе тұтып жүрген орманшы, қорықшы, инспектор қауымды мазақ қылушылар тіпті қорқытып-үркіткеніне көнбей, қарсылық көрсеткен жағдайда өлтіріп кетуден де тартынбайтынын естіп жүрміз. Қоғамдағы түйіткілді мәселе төңірегінде Президент Қасым-Жомарт Кемелұлы «Соңғы уақытта болған қайғылы оқиғалар ұйымдасқан қылмыстың тағы бір түрі – браконьерлік мәселесінің бетпердесін ашты. Бүгінде браконьерлер сақадай-сай жабдықталып, қаруланған және өздерінің жазалана қоймайтынына сенімді секілді. Өткен жылдың өзінде жануарлар әлемін қорғап жүрген екі инспектор браконьерлердің қолынан қаза тапқаны осы мәселенің бір ұшын шығарғандай болды. Бұл бірінші рет орын алған жағдай емес, бұл істің тамыры тереңге жайылған, соның ішінде бұл құқық қорғау органдарының салғырттығынан болып отыр. Олар ұлттық байлығымыз – табиғатымызға аяусыздықпен қарап, орны толмас зиянын келтіруде» деп сөзін шегелеген еді. Өзгені сөз етпегенде өз ауданымызда аң-құс ату мен балық аулауды жыл он екі ай кәсіп етушілер көп. Соның салдарынан Қаратау мен Сыр өзені маңында қоян, түлкі, борсық саны азайған. Мұны зерттеп жүрген ғалым, «Кондратов тәжiрибе көрсететін орман тұқымбағы» ЖШС директоры Аманжол Кекілбаев әлеуметтік зерттеуінде былай деген еді: «Сырдария мен Қаратау аралығында он жылда бір рет Андров тәжірибесіне сай сынама жасалып келеді. Сол сынама нәтижесі соңғы жылдарда сұр қоян, борсық, түлкі түспеді. Бұл табиғат байлықтарының күрт азайып бара жатқанын аңғартады» депті.</blockquote>Мұны жергілікті саятшы, ел ағасы Ерболат Әлиев те құптады. Тоғайда толып жүретін қоянқабыландар соңғы уақытта көзге түсе бермейтінін әңгіме еткені бар еді. Түлкіден тымақ, ішік пішіп, кәдеге жарататын Күмісай Ысқаққызы да соңғы жылдары түлкі терісін табу мүмкін еместігін, соған байланысты кәсібі тоқтап қалғанын айтты. Пікір білдірушілер арасында еңбек ардагері Сергей Якуповтың сөзі үлкен ой салды.<blockquote>&nbsp;– Жаңақорғанға көшіп келгенімде тұрғылықты халық аңшылық пен балық аулау кәсібін мүлде білмейтін еді. Көбісіне өзім үйреткенмін. Қазір арада елу жыл өткенде ойланып қарасам, бізден асып түсіп, қырып-жоюдан көш бастап тұр. Әр жаратылыстың қанын мойынға жүктеу нағыз қаскөйден шығады деп санаймын. Аң мен құстың төлдейтін мезгілін өткізіп, арнайы уақытта саятшылық етуді ұмытты. Табиғат талан-таражға төзбейді, сондықтан болар, экологиялық ахуал да, ауа райы да ауыспалы-құбылмалы болып жатыр деп ойлаймын, – деді ардагер. Балық аулауды бала күннен кәсіп еткен Бақыт Ырысбек көлдерде балықтарды тоқпен соғып, қырып салушыларды сынап, өз пікірін жеткізді. – Балықтың уылдырық шашатын уақытында да өзен-көл жағалап, балықтар әлемін жойып жатқандарға наразымын. Тоқ соққанда бүкіл судағы тіршілік жойылып, өлі әлемге айналады. Ірілерін сорттап алып, майда шабағын шашып кететін жағдайлар көп. Соңы өзен-көлдің суы ластанып, экологиялық апатқа әкелуде. Осындай қаскөйлерге қоғам болып қарсылық білдірмесек, алдағы он жылда балық та көзден бұлбұлдай ұшары анық, – деді жанашыр азамат. Еңбек жолында табиғатты қорғау ісімен етене болған, түрлі салада тәжірибе жинақтаған заңгер Әбдімәулен Сабырханов та әлеуметтік желіде үн қатты.</blockquote>– Кім көрінген қар жауды деп қансонарға шыға берсе, Сыр табиғатынан не қалады? Ата-дәстүріміздегі саятшылық мәдениетті бойға сіңірмей, табиғатты сүюді қалыптастырмай бұл ашкөздіктен арылмаспыз. Әр тіршілік иесінің киесі, наласы, сұрауы бар. Ата-бабалардан аманат болған сұлу табиғатты келешек ұрпаққа жеткізу әрбіріміздің адамзаттық борышымыз, – дейді ол. Осы тақырыпта сөз еткен Құмсахаба мешітінің имамы Ержан Сейітжаппаров:<blockquote>«Әріден әпсананы қозғасақ, табиғат пен адамның арасындағы байланыс құдіретті күштің барын сезесіз. Табиғатқа жанашырлық танытпаған елдің болашағы бұлыңғыр екені даусыз. «Тұздыкөл» туралы аңыз әңгіменің желісі тұмса табиғатқа жасалған қастықтың соңы тұтас бір елдің құлдырап, жер бетінен жойылуына себеп болады. Кезінде жер жаһанға әмірі жүрген елдің орны бір сәтте-ақ тұзы бұрқыраған қара сорға айналуынан-ақ туған жерге әр адамзат махаббат мейірімін төгуі қажет екенін аңғарасыз», – деп түйді ойын.</blockquote>Біз де әпсанамен мақаланы түйіндеуді жөн көрдік.

Жаңақорғанда жылына 100  қоянға дейін атуға жолдама беріледі

<a href="https://kyzylorda-news.kz/">Kyzylorda-news.kz</a>.&nbsp; Халыққа арналған жаңа тұрғын үй бағдарламасы, наурыздағы ҰБТ, блогерлердің жарнамасы, ауыр жүк көліктеріне шектеу – осы және өзге де өзгерістер туралы <a href="https://sputnik.kz/">Sputnik Қазақстан</a> сайты жариялады.&nbsp;<h3 style="margin-left:0px;">Қазақстан бірыңғай уақытқа ауысты</h3>Бүгіннен бастап бүкіл ел UTC+5 уақыт белдеуіне көшті. Осылайша республиканың 20 өңірінде <a href="https://sputnik.kz/20240229/sagat-auysady-qazaqstandyqtar-ne-isteui-kerek-42563949.html">уақыт теңесті.</a>Астана, Алматы, Шымкент қалалары мен Ақмола, Алматы, Жамбыл, Қарағанды, Қостанай, Павлодар, Солтүстік Қазақстан, Түркістан, Шығыс Қазақстан, Абай, Жетісу, Ұлытау облыстары 1 наурызға қараған түні жергілікті уақытты 1 сағатқа артқа жылжытты.Ғалымдардың сөзіне сенсек, UTC+6 уақыт белдеуі табиғи күн уақытына сәйкес келмейді. Адам денсаулығы үшін күн сәулесіне, яғни табиғи уақытқа барынша жақын тұрақты уақыт белдеуін қолданған дұрыс.<h3 style="margin-left:0px;">"Отау" бағдарламасы</h3>1 наурыздан бастап Қазақстанда "Отау" <a href="https://sputnik.kz/20240216/otbasy-bank-zhana-turgyn-uy-bagdarlamasyn-iske-qosady-42339722.html">бағдарламасы іске қосылады</a>. Оған Отбасы банк салымшылары, оның ішінде тұрғын үй кезегінде тұрған азаматтар қатыса алады. Қатысушылардың жас аралығы – 18 бен 63 жас.Өтінім берген кезде депозитте жиналған сома 1 млн теңгеден кем болмауға тиіс."Отау" бағдарламасының шарттары:алғашқы жарна – 20%-дан басталады;жылдық мөлшерлеме – 9% (ЖТСМ 9,2% бастап).несие мерзімі – 19 жылға дейін.Бағдарламаға қатысуға өтінішті 30 сәуірге дейін Баспана маркет (otbasybank.kz) порталында беруге болады.Өтінім беру уақыты аяқталғаннан кейін otbasybank.kz сайтында қатысушылар тізімі автоматты түрде жасақталады. Оған ең көп ұпай жинағандар кіреді.<h3 style="margin-left:0px;">Блогерлер жарнаманы таңбалауға міндеттеледі</h3>2 наурыздан бастап блогерлер онлайн жарнамаға белгі қоюға міндетті болады.Онлайн-жарнаманы таңбалау ережелерін бекітетін бұйрық "Әділет" порталында жарияланған болатын. Ережеге сәйкес инфлюенсерлер (блогерлер) коммерциялық немесе шарттық негізде орналастыратын онлайн-жарнаманы таңбалауға тиіс. Олар жарияланым басында немесе соңында онлайн ортада белсенді қолданылатын төмендегідей тұжырымдардың бірін көрсету керек: "жарнама", "жарнамалық материал", "серіктестік материал", "демеушілік материал", "жарнама құқығында","демеушімен төленген", "PR құқығында".Әлеуметтік жарнаманы (қайырымдылық және коммерциялық емес сипаттағы басқа да қоғамдық пайдалы мақсаттарға қол жеткізуге бағытталған) және жедел хабар алмасу қызметтерінде (мессенджерлер) жарияланатын жарнаманы арнайы белгілеудің қажеті жоқ.Естеріңізге сала кетейік, былтыр шілде айында президент "Онлайн-платформалар және онлайн-жарнама туралы" заңға қол қойды. Заң Қазақстанда қауіпсіз онлайн орта құруға бағытталған.<h3 style="margin-left:0px;">Наурыздағы ҰБТ</h3>Наурыз айында өтетін ҰБТ-ға қатысу үшін өтініш қабылдау 10 наурызда аяқталады. ҰБТ-ға тіркелу Ұлттық тестілеу орталығының app.testcenter.kz. сайтында немесе UTO қосымшасы арқылы жүргізіліп жатыр.Тестілеудің өзі 1-31 наурыз аралығында өтеді.Наурыздағы ҰБТ-ға шартты түрде ақылы негізде күндізгі оқу нысаны бойынша жоғары оқу орындарына қабылданған, өткен жылғы мектеп және колледж түлектері, Қазақстан азаматы емес ұлты қазақ тұлғалар, сондай-ақ мектеп бітіретін түлектер жоғары оқу орындарына ақылы негізде түсу үшін қатысады.Қатысушылар тестілеу өткізілетін орынды, күнді және уақытты өздері таңдайды.<h3 style="margin-left:0px;">Әуе рейстері</h3>Қазақстандық Qazaq Air әуе компаниясы 15 наурыздан Түркістаннан Самарқанға ұша бастайды.Рейстер аптасына екі рет – жұма және жексенбі күндері орындалады. Жолаушылар De-Havilland Dash 8-Q400 типті ұшақтармен тасымалданады.Рейстер санының көбеюі Қазақстан мен Өзбекстан арасындағы сауда-экономикалық, іскерлік, инвестициялық және туристік ынтымақтастықты одан әрі дамытуға ықпал етеді деп күтілуде.<h3 style="margin-left:0px;">Ауыр жүк көліктері үшін шектеу енгізіледі</h3>1 наурыздан бастап Қазақстанның сегіз өңірінде ауыр жүк көліктерінің қозғалысына шектеу енгізіледі. Бұл жыл сайын көктем мезгілінде қолға алынатын шара.Республикалық маңызы бар жолдарды қыстан кейін сақтау және күтіп ұстау үшін бір оське жүктемесі 8 тоннадан асатын автокөліктердің қозғалысы уақытша шектеледі. Атап айтқанда, Алматы, Атырау, Жамбыл, Ұлытау, Қызылорда, Маңғыстау, Жетісу және Түркістан облыстары "Бесінші жол-климаттық аймаққа" кіреді. Шектеу шаралары 1 сәуірге дейін қолданылады.Дәл осындай шектеулер 23 наурыз бен 1 мамыр аралығында Ақмола, Ақтөбе, Абай, Шығыс Қазақстан, Батыс Қазақстан, Қарағанды, Қостанай, Павлодар және Солтүстік Қазақстан облыстарында да енгізіледі.Алайда жүктерді және жолаушыларды халықаралық тасымалдауды жүзеге асыратын, төтенше жағдайлардың алдын алу және жою жөніндегі іс-шараларға тартылған, зардап шеккендерге гуманитарлық көмек, азық-түлік, багаж, дәрі-дәрмек тасымалдайтын, сондай-ақ жол-құрылыс жұмыстарымен айналысатын автокөліктерге бұл шектеу қолданылмайды.<h3 style="margin-left:0px;">Шекарадағы өткізу бекеттерінің жұмыс режимі өзгереді</h3>Елдің барлық аумағы бірыңғай уақыт белдеуіне ауысуына байланысты шекарадағы автомобиль өткізу пунктерінің жұмыс регламентіне өзгерістер енгізілді.2024 жылғы 1 наурыздан бастап мына өткізу бекеттері сағат 07.00-ден 19.00-ге дейін жұмыс істейді.Ресей Федерациясымен:"Найза", Павлодар облысы"Қоянбай", Абай облысы"Байтанат", Абай облысы.Қытаймен:"Нұр Жолы", Алматы облысы"Достық", Алматы облысы"Қолжат", Алматы облысы"Бақты", Шығыс Қазақстан облысы"Майқапшағай", Шығыс Қазақстан облысы.Қырғыз Республикасымен:"Кеген", Алматы облысы.<h3 style="margin-left:0px;">Рамазан айы басталады</h3>Биыл қасиетті Рамазан айы 11 наурызда басталады.Шариғат бойынша балиғат жасына келген, ақыл-есі дұрыс әрбір мұсылманға Рамазан айында ораза ұстау – парыз. Алайда қасиетті айда ораза тұтуды кей жандарға кейінге қалдыруға рұқсат етіледі. Олар: жолаушылар; науқас адамдар; жүкті немесе омырауда баласы бар әйелдер.Қадір түні 5-нен 6 сәуірге қараған түнге түсіп тұр.Барша мұсылман үшін оразаның аяқталғанын білдіретін ұлық мейрам Ораза айт 10 сәуірде болады.Фото: РИА Новости / Михаил Воскресенский

Архив