<a href="https://kyzylorda-news.kz/">Kyzylorda-news.kz</a> Музей – өткен тарихтан сыр шертетін жәдігерлердің құтты мекені. Сан ғасырға куә болған осынау құндылықтардың қасиетті ордасы кім-кімді болсын өзіне баурап алып, көне дәуірлер қойнауына бірге саяхаттауға шақырады. Осындай өзінің тартымды дүниелерімен қалың көрерменнің көзайымына айналған мәдени орын – жалағаш аудандық тарихи-өлкетану музейі. &nbsp;&nbsp;Тарихы 1985-ші жылдардан басталғанымен музей қазынасында талай тарихи дүниелер қатталып тұрғанын көрдік. &nbsp;Осы бір ғажап әлемнің құпиясын білмек ниетпен аудандық тарихи-өлкетану музейінің меңгерушісі ғалымжан құлымбайдан осынау &nbsp;ел үшін, &nbsp;болашақ ұрпақ үшін құнды дүниелер сақталған қастерлі мекеннің тарихы және ондағы ел назарына қойылған жәдігерлер туралы мазмұнды әңгіме айтуын сұрадық.– Ғалымжан Жалғасұлы, өзіңіз басқарып отырған аудандық музейдің қалыптасу &nbsp;тарихы мен ондағы құнды жәдігерлерге шолу жасап өтсеңіз...&nbsp;– &nbsp;Шынында өткен әр күніміз кейін тарих болып, ғасырлар шежіресінде сақталып қалатыны шындық. Соның ішінде біздің қасиетті орында ескіден жеткен мұралардың бір парасы халықтың, әсіресе кейінгі ұрпақтың көзайымына айналып жатса, онда біздің музей қызметкерлерінің еңбегінің қайтқаны деп есептеймін. Ал музейдің ашылуы ауданның бетке ұстар азаматтары &nbsp;З.Салықбаев, М.Ілиясов, М.Аяпов, Ж.Сарбалаев, А.Тілеулиевтердің ықпалымен басталғанын айта кету орынды. Осылайша 1988 жылдың 30 шілдесінде Жалағаш аудандық халық депутаттары аудандық Кеңесі атқару комитетінің №373 санды қаулысы шыққан. Онда аудандық мәдениет үйі жанынан музей ашып, оған жауапты бір қызметкер бекітіліп, сол жылы ауданның елді мекендерінен &nbsp;көптеген құнды жәдігерлерді жинақтау жұмысы басталыпты.Соғыс ардагері Орынбай Сарманов пен сол кездегі аудандық «Жаңадария» газетінің әдеби қызметкері Ахмет Тілеулиев елді мекендерге, Қарақұм мен Қызылқұм бағытына экспедицияға шығып, түрлі жәдігерлерді жинақтап, оларды аудандық мәдениет үйінің бір бөлмесіне сақтағанымен, музей үшін арнайы ғимараттың жоқтығынан жинақталған біршама құнды заттар 90-шы жылдары үшті-күйлі қолды болған.Бақытымызға орай, ауданның 60 жылдық мерейтойында сол кездегі аудан әкімі Қ.Баймахановтың қаулысымен музейдің жұмысы қайта жанданып, бұрынғы Абай атындағы кинотеатрдың ғимараты &nbsp;музей &nbsp;үйіне беріледі.Міне, нақты осы кезеңнен бастап жергілікті өлкетанушылар Ахмет Тілеулиев пен Мақсат Қарақұлов облыстық музейдің қызметкерлерімен бірлесіп, елді мекендерді аралап, экспонат жинақтауға белсене атсалысады. Соның негізінде А.Тілеулиев музейдің тақырыптық-экспозициялық жоспарын жазып шығады. Сол жоспар бойынша жасақталған экспозиция тұңғыш рет 1999 жылдың 4 қараша күні ашылып, аудан әкімінің 1999 жылғы 10 қарашадағы шешімімен аудандық тарихи-өлкетану музейі өзінің құзырлы қызметіне кіріседі. Музейдің алғашқы директоры болып Ахмет Тілеулиев тағайындалады. Сол жылдардан бері аудандағы тарихи мұралар мекені үзіліссіз жұмыс жасап келеді.– Музей экспозициясы қашан толықтай жаңартылды?– Әрине өмір болған соң тарих жаңарып, музей жаңа экспонаттармен толығып, жанданып отыратыны белгілі. Осы тұрғыда музей жұмысына леп әкелген жаңару 2009-2011 жылдар аралығына сәйкес келеді. Осы кезеңде мұнда реэкспозициялық жұмыстар жүргізіліп, музей экспозициясы толықтай жаңартылған. Мұнан соң 2020 жылдың жазында тағы бір мәрте жаңарудан өтті.&nbsp;– Бұқарбай батыр ауылында да осындай музей үйі бар. Ол қашаннан бері жұмыс жасайды?– Ол 2012 жылы Бұқарбай батыр бабамыздың 200 жылдық мерейтойы қарсаңында Бұқарбай батыр атындағы ауылдан тарихи ғимарат ашылды. Аталған музейдің ашылуына Бұқарбай батырдың шөбересі Жоламан Алданазаров зор еңбек сіңірді. Ол кісі облыс орталығы мен ауылдарды аралап жүріп, &nbsp;бабасы жайлы материалдар мен жәдігерлер жинақтап, музей қорын құнды экспонаттармен толықтырды. Онда Бұқарбай батырдың &nbsp;өзі пайдаланған қайқы қылышы, шашақты туы, күмістен соғылған мөрі, архивтік материалдар мен Бұқарбай батыр ауылының тарихы жайлы деректі мәліметтер қойылған.&nbsp;Бүгінде аудандық тарихи-өлкетану музейі мен Бұқарбай батыр атындағы тарихи үй облыстық тарихи-өлкетану музейінің филиалы ретінде толыққанды жұмыс атқарып келеді.&nbsp;– Аудан орталығындағы музейде орналасқан құнды жәдігерлеріңіздің әрбірі тарихтың тұтқасындай жеке-жеке жазуға тұрарлық қымбат дүние екен. Енді мерейлі мереке қарсаңында сол көздің қарашығындай мұражайда сақтап отырған әр дәуірдің бойтұмарындай дүниелер туралы айтып өтсеңіз...– Дұрыс айтасыз. Қымбат қазыналардың қорғаны мен жанашыры, насихатшысы болып отырғанымызға қуанамыз. Неше ғасырды артқа тастаған небір батырлар мен даңқты азаматтардың күнделікті қолмен ұстап, тұтынған заттарын көріп, одан таңғажайып әсер алатын жұртшылықпен жүздесу – біздің ұжым үшін үлкен мақтаныш пен мәртебе. Жиырма жылдан астам тарихы бар аудандық музей бағзы замандарда аудан көлемінде өмір сүрген ата-бабаларымыздың тарихы туралы сыр шертетін жәдігерлер мекені.&nbsp;Мәселен, жасалғанына жүз жылдан астам уақыт өткен &nbsp;бұйда пышақты аудандық музей өзінің алтын қорына енгізді. Бұл пышақ болат темірден соғылған. Басы өткір, шаншуға, түйреуге лайықталған бір жүзді болып келген. Пышақтың сырты, яғни түйрейтін ұшынан бастап сабының түп жағына дейінгі аралығы бірте-бірте қалыңдап барып аяқталып, бір жағына иілген.&nbsp;Бұл көне жәдігерді музейге Ақсу ауылының тұрғыны Төлеу Мәншарипов есімді жылқышы өткізген. Ескіден жеткен асыл мұра жылқышыға әкесінен мирасқа қалған екен. Қазақ халқының қару ретінде қолданатын пышағын “бұйда пышақ” деп атаған.&nbsp;Сонымен қатар біздің қорымызда 1969 жылы құрылып, елге танылған &nbsp;«Алтын арай» ансамблінің баяны, асатаяғы, қобыз, дауылпаз секілді ескі дүниелері сол кезеңді еске түсіреді.&nbsp;Қан майданда атақты әскери барлаушы болған, соғыс ардагері, белгілі қоғам қайраткері Мөрәлі Шәменовтің жұмыс үстелі, ондағы ол кісінің өзі тұтынған қолжазбалары мен заттарынан сол заманның бейнесі көз алдыңа бейнебаяндай елестеп, бойыңды тебірентіп, жаныңа рух сыйлайды. Мөрәлі ағамыздың 50-60 жылдар куәсіндей құранды ерінің тарихына үңілсек, сол кезде &nbsp;колхоз басқарғандағы көлігі ат болғанын байқауға болады. Ол кісі атқа қонып-ақ талай елдік мәселелердің шешімін тапқан. &nbsp;Тағы біздің коллекциямызда &nbsp;19 ғасырдағы шоқпар, Табын Сейіт батырдың мөрі, 20 ғасырдағы теміржолшы сүймені, революция кезіндегі «Бульдог» револьвері, 19-20 ғасырда Қазаннан шыққан құран кітаптар, Социалистік Еңбек Ері Ұзақ Еспанов пен Алдаберген Бисеновтің тұтынған заттары, ҚР Әскери-теңіз күштерінің капитан-лейтенанты, «Сұңқар» әскери кемесінің тұңғыш капитаны &nbsp;Болат Алтынбаевтың әскери киімі, патшалық кезеңнен жеткен самаурын және өзге де құнды жәдігерлер бар. &nbsp;Оларды сөзбен баяндағаннан көзбен көру бір бақыт екенін айтқым келеді.&nbsp;– Алдағы атқарылар жұмыстарға тоқталсаңыз...– Карантин уақытында да санитарлық талаптарды сақтай отырып, онлайн үлгісінде жұмыс жасадық. Музей қызметкерлерінің баяндамалары бірнеше мәрте өткізілген республикалық және халықаралық ғылыми-тәжірибелік конференциялардың жинақтарына енгізіліп, ғылыми-танымдық мақалалары республикалық және жергілікті баспасөз беттерінде жарияланды. &nbsp;Қазіргі таңда музейде 15 адам жұмыс жасауда. Мұнда аудан көлемінің миллиондаған жылдарғы (археозой эрасынан мезозой дәуірінің бор кезеңінен) геологиялық тарихынан бастап, қазіргі заманғы тарихы қамтылған 2 зал жұмыс істейді. Экспозиция хронологиялық ретпен орналастырылып, аудан тарихы жайлы сыр шертетін жәдігерлер келушілердің қызығушылығын тудырып келеді. Бүгінде біздің қорымызда 7 мыңнан астам экспонат сақталуда. &nbsp;Алдағы уақытта аудандық музей ұжымы ауданның сан ғасырлық тарихын зерттеп, зерделеу, аудан көлеміндегі тарихи-мәдени мұраларды жинақтап, музей қорын құнды экспонаттармен толықтыру және жас ұрпақты отаншылдық рухта тәрбиелеу бағытында өз жұмыстарын ұйымдастыруда табыстар биігінен көріне беретініне сенемін.&nbsp;–Әңгімеңізге рахмет! Кәсіби мерекелеріңіз құтты болсын!

Тарихи жәдігерлер сыр шертті 

<a href="https://kyzylorda-news.kz/">Kyzylorda-news.kz</a> Еңбекте соңғы жылдары кәсіпкерлік саласы алға басып, жергілікті тұрғындардың мемлекеттік бағдарламаны тиімді пайдалануға ынтасы артып келеді. Бірі қайтарымсыз грантпен тігін цехын ашуға бел буса, енді бірі кондитерлік өнім өндіруге талаптанып отыр. Олардың алды бүгінде бастаған ісінің жемісін көре бастады. Ал 1997 жылдан бері мал шаруашылығын дамытуға бел буған бейбітшілік толыбаев биыл тағы мемлекеттік бағдарламамен несие алып, мал басын асылдандыру ісін қолға ала бастады.1997 жылы “Боранбай” шаруа қожалығын құрған кейіпкеріміз бүгінде қорадағы ірі қара санын жүзден асырған. Осыған дейін асыл тұқымды ақбас бұқалар мен жергілікті сиырлар сатып алған төраға бүгінде 4-5 адамды жұмыспен қамтып отыр. Алдағы уақытта ешқандай шатысы жоқ, тек асыл тұқымды ірі қара басын көбейтуді көздеген кейіпкеріміз мемлекеттік бағдарламаның арқасында пайыздық үстемақысы төмен 15 млн теңгеге қол жеткізіпті. Бұйыртса, аққошқарлық кәсіпкер Арал ауданынан асыл тұқымды мал алып келуге жолға шыққалы отырғанын айтады.– Мал шаруашылығымен айналысып келе жатқаныма 25 жылдай уақыт болыпты. Тәуелсіздіктің алғашқы жылдарында малдың өзі де, еті де арзан болатын. Алайда болашақта оның өнімінің өтімді боларына сеніп, шаруашылық құруға бел будым. Қазір жаман емес, бастаған ісімнің жемісін көріп келемін. Қазір төрт түліктің өзінің де, етінің де нарықтағы бағасы қымбат. “Баға неге шарықтап барады?” деп байбалам салудың қажеті жоқ. Себебі бүгінде ауылда отырып, қорада мал ұстауға құлқы жоқтар да бар. Тіпті ауылдық жерде отырып, нан сатып алатындарды көріп таң қалған кездер де болды. Мал бағу оңай шаруа емес. Оны шаруашылық құрып, мал бордақылап отырғандар жақсы біледі. Себебі бүгінде мал азығы да жиі қымбаттап жатыр, нарыққа ілесу керек, – дейді кәсіпкер.&nbsp;Бейбітшілік ағамыз ата кәсіпті қолға алғалы оның бабын жасаудың да қыр-сырына әбден қаныққан. Сыртынан қараған жанға үйіп-төгіп азығын алдына қойсаң, төрт түліктің кез келгені етті мол беретін сияқты. Алайда әр үй жануарының күтімін жасаудың өзіндік әдісі бар. Мәселен, сиырдың таңғы азығын мол беріп, түсте жемдеудің аса қажеті жоқ екен. Ал кешкі азығын таңмен бірдей салу керек. Сонда ғана бағымдағы мал ерте қоң жинап, иесін шығынға батырмайтын көрінеді. Түскі азығын аз салмасаң, ірі қараның күтімінде қателікке бой алдырдым дей беріңіз.&nbsp;Жалпы екеуара әңгіме барысында шаруашылық төрағасының расында малды күтіп-баптаудың барлық әдісін меңгергенін аңғардық. Ағамыз бірақ мұнымен шектелгісі жоқ, алдағы уақытта әлі де сырттан асыл тұқымды ірі қара алып келіп, олардың санын еселеу Бейбітшіліктің күн тәртібінде тұр екен.&nbsp;– Бұрын тек сырттан асыл тұқымды ақбас бұқалар алып келіп, жергілікті сиырлармен будандастыру арқылы олардың санында өсім қалыптастырғанмын. Енді аналық сиырды да, бұқаны да таза асыл тұқымды мал асырап отырған шаруашылықтардан алып, олардың санын көбейтемін. Мұндай жетістікке қол жеткізу бағы тәуелсіздіктің арқасында бұйырып отыр. Себебі кәсіпкерлікті қолдауға арналған мемлекеттік бағдарламалар ел егемендік алғаннан кейін ғана қолға алынды. Оның жемісін бүгінде халық көріп отыр және солардың қатарында мен де бармын. Жалпы төрт түлік жесең азық, ішсең сусын, мінсең көлік. Оның пайдасын ата-бабамыз бұрын байқаса, біз енді біліп жатырмыз. мұндай шаруашылықтардың көп болғаны халық үшін де, мемлекет үшін де тиімді. Бұйыртса, жақында Арал ауданынан асыл тұқымды мал алып келемін. Мал басында өсім қалыптасса, жұмыс орындарын да көбейтуді көздеп отырмын, – дейді іскер азамат.&nbsp;Аққошқарлық кәсіпкер үшін мал азығы да биыл аса мәселе болмайды. Себебі төраға 300 гектар жайылымдық жерінің 50 гектарын жоңышқа егуге дайындап қойған. Биыл жоңышқа өсіру ісін бастап та кетті. Қажетті техникаларын да жарақтап қойған. Өзі бала-шағасымен облыс орталығында тұрғанымен бақташылар мұнда төрағаның орнын жоқтатпайды. Себебі уақытылы айлығын алып отыр.&nbsp;Құрылғанына 25 жылға жуық уақыт болған “Боранбай” шаруа қожалығының бүгінде шаруасы ширақ. Себебі мына ыстықта шаруашылықтардың көбісі мал бордақылауды күзге дейін тоқтатады екен. Жылдың төрт мезгілінде де тұтынушыларын өз өнімімен қамтамасыз етіп отырған Бейбітшілік ағамыз бүгінде сиыр етіне сұраныстың артқаны мал шаруашылығын қолға алған кәсіпкерлер үшін тиімді болып отырғанын жасырмайды.&nbsp;

Ата кәсіпті қолға алған

<a href="https://kyzylorda-news.kz/">Kyzylorda-news.kz</a> Жалағаш ауданынан шалғайда орналасқан жаңадария ауылында 20 жылға жуық тарихы бар «әзілизация» әзіл-сықақ отауы жұмыс істеп келеді. Бүгінде өткір әзілдерімен көрермен көзайымына айналып үлгерген өнер ұжымы мәдениет саласында түрлі байқауларда бақ сынап, жетістікке жетіп те жүр. Енді театрдың тарихына көз жүгіртіп, бірқатар жеңісті сәттеріне шолу жасасақ.Осыдан жиырма жылға жуық уақыт бұрын Жаңадария ауылдық клубы жанынан «Әзілизация» театры құрылды. Рүстем Көшеров жетекшілік ететін өнер ұжымы алғашқы жылдардан-ақ түрлі байқауларға қатысып, жүлделі орындардан көрініп келеді. 2007 жылы облыстық «Тазша бала» әзіл-сықақ байқауында жүлделі 3 орынды, 2016 жылы Шиелі ауданында өткен облыстық «Мінекей, Мейірманның ізбасарлары» атты әзіл-сықақ отауларының байқауында жүлделі 3 орынды иеленсе, осы жылы Жаңақорған ауданында Қазбек Башаровты еске алуға арналған «Қазбектің қалжыңдары» атты облыстық әзіл-сықақ байқауында үздік өнер көрсетіп, көптің көзайымына айналды. Мұнымен қоса театр ұжымы Сырдария ауданының елді мекендерінде, Арал ауданы Сексеуіл станциясында, Жалағаш ауданы елді мекендерінде гастрольдік сапарларда болды. Өнер ұжымы 2019 жылы Арал ауданы «Күлкі думан» атты әзіл-сықақ отауының облыстық байқауынан ІІ орын иеленсе, ҚР Тұңғыш Президенті Н.Назарбаевтың «Болашаққа бағдар: рухани жаңғыру» бағдарламалық мақаласы аясында ұйымдастырылған халықаралық өнер фестивалінен бас жүлдемен оралған болатын. Ал республикалық «Жас дарын &nbsp;Art Kazakhstan» байқауында бас жүлде алса, «Мереке думан» халықтық әзіл-сықақ отауының 30 жылдық мерейтойына арналған республикалық байқауында ынталандыру сыйлығына ие болды. Өткен жылы Жаңақорған ауданының мәдениет және тілдерді дамыту бөлімі және М.Көкенов атындағы мәдениет үйінің қолдауымен Кейден ауылдық клубының ұйымдастыруымен «Күлкі думан» атты облыстық байқаудан «Әзілизация» әзіл-сықақ отауы І орынға ие болды. Сондай-ақ Қазалы ауданында «Ауылдың айтқыштары» атты онлайн облыстық қазақы қалжың орындаушылардың сайысында «Әзілизация» әзіл-сықақ отауы «Сахна сарбаздары» номинациясын, Арал ауданында өткен Қ.Сұлтанбаевтың шығармашылығына арналған «Сатира – өмір айнасы» атты әзіл-сықақ отауларының аймақтық онлайн байқауында алғыс хат иеленген.Қазіргі таңда өнер ұжымы «Сүттің дауы», «Кемпір келін», «Темперамент», «Қызық очки», «Теңгелер», «Өмір», «Алтын балық» интермедияларын &nbsp;сахналап жүр. «Әзілизацияның» құрамында Р.Көшеров, Д.Төлегенов, Б.Жаңабергенова, Б.Әділет, Н.Мәжит, С.Мешітбай, Н.Ізбасқан, Д.Серікбаев бар. Театр жетекшісі Рүстем Көшеровпен сөйлескенімізде алдағы жоспарларына және көпшілікке белгілі өзінің «Жаңадариям» әнінің шығу тарихынан хабардар етті.– «Жаңадариям» әні 1994 жылы Жаңадария ауылының құрылғанына 30 жыл қарсаңында шықты. 1992 жылдың күзінен 1993 жылдың көктеміне дейін 6 ай «Шойбас» кіші кәсіпорнында көмекші шопан болып жұмыс істедім. Сәрібай есімді қойшының аудан орталығында жұмыстары болып қалғанда, атқа мініп арасында бір отар қой бағамын. Бір отарда 800 дей қой бар. Жазық далада аттың үстінде жүріп, таза ауада, дауыстап өлең айтасың. Далада аспап жоқ, бір әнді ыңылдап күнде қайталап жүрдім. Келесі бірде қалам-қағаз алып шығып, ат үстінде жүріп әннің сөзін жаздым. Арасында қожалық басшысы Қыпшақбаев Ақділдә ағай келгенде екі-үш күнге ауылға демалысқа жіберіп тұратын. Енді сол кісінің келуін күттім. Бар ойым – аспаппен бірінші үйдегілерге орындап беру. Әсіресе әннің бағасын бірінші анам Қалдаш береді. Анамның баян тартып, ән айтатыны бар. Бір күні Ақділдә ағай шопырымен келіп, демалыс беріп, ауылға алып кетті. Үйге келіп, баянға салып анама орындап бердім. Сол кездері мектептің музыка пәнінің мұғалімі Пірназарова Гүлназ домбыра үйірмесінің оқушыларына орындатып жүріпті. Содан міне, биыл 25 жылдан кейін алғаш Қызылорда облыстық филармониясы жанындағы «Ақмешіт» фольклорлық ансамблі нотаға түсіріп, облысқа белгілі әнші Эльмира Қалхожаеваның орындауында сүйемелдеп, мамыр айында ауылымызда өткен Жаңадария ауылының 55 жылдығына арналған аудандық шарада тұсауын кесіп, ауыл тұрғындарына тарту жасады.Негізі театр өнер ордасы ғой. Үздік сатира, әзіл-оспақ, астарлы әзіл арқылы халықтың мұң-мұқтажын көрсетіп жатамыз. Біз сахналап жүрген әзілдердің барлығы қоғамда бар дүниелер. Біз сахна мәдениетіне кәсіби шеберлікті ұштастыра отырып, халықтың жүрегінен жол табуды ойлаймыз, мақсат етеміз. Сол мақсатқа жету жолында қаншалықты қиын әрі ұзақ болса да нәтижелі еңбек етуге тырысамыз. Әртістерге де осыны айтып отырамын. Көрерменнің көңілін табу, көзайымына айналу, сахналық образымызды кәсіби деңгейде сомдап шығу және драматургтің негізгі айтар ойын дәлме-дәл жеткізе білу әртістің шеберлігіне байланысты. Шүкір, байқаулардан қалмай қатысамыз, жеңісіміз де аз емес, бірақ алар асуымыз, бағындырар биігіміз әлі алда деп ойлаймын. Биыл «Әзілизация» әзіл-сықақ отауының &nbsp;15 жылдығына орай «Күлкі базар» атты облыстық әзіл-сықақ отауларының байқауын өткізуді жоспарлап отырмыз, – дейді театр басшысы.Айта кету керек, «Әзілизация» театр ұжымы бұған дейін де аудандық Қ.Қазантаев атындағы мәдениет үйінде Жалағаш ауданының 80 жылдығы, Жаңадария ауылының 55 жылдығы және жастар жылына арналған Жаңадария ауылдық клубы жанындағы «Әзілизация» әзіл-сықақ отауының концертін өткізген еді. &nbsp;Театр әртістерінің сомдауымен «Кемпір келін», «Сүттің дауы» музыкалық интермедиасы қойылды. Есеп беру кешінде өнер ұжымы концерттің өтуіне қолдау білдірген азаматтарға, ел ағаларына алғыс білдіріп, бірқатар азаматқа қазақы дәстүрмен шапан жапқан болатын. Талантын өнермен ұштастырған театр әртістерінің шеберлігі, сахна мәдениетін сақтаудағы біліктіліктері, өздеріне берілген кейіпкердің портретін аша білуі, сондай-ақ сахнаны әсем әнмен тербеуі көрерменнің өнерге деген қызығушылығы мен құрметін арттыра түскендей. Әйтеуір «Әзілизацияның» әзіліне қанық көрерменнің барлығы өнерпаздардың, әртістердің сахна мәдениетін сақтаудағы біліктіліктеріне ризашылықтарын білдіріп жатады.&nbsp;

«Әзілизация» күлкі сыйлайды

<a href="https://kyzylorda-news.kz/">Kyzylorda-news.kz</a> Мемлекеттің спорт саласына жасап жатқан қолдауын бүгінгі жастар жақсы сезінеді. Соның нәтижесі болар, қазіргі таңда өзіне спортты серік етіп, түрлі байрақты бәсекелерде туымызды биіктен желбіретіп, әнұранымызды әуелетуге әуес жастардың қатары көбейіп жатыр. Бұл қолдау тек жастарды спортқа машықтандырумен шектелмей, олардың бойында патриоттықты қалыптастыруға да үлкен қолғабыс болып отырғаны ақиқат. Кешегі ауданда өтіп жатқан еліміздің тұңғыш «сұңқар» әскери-теңіз кемесінің командирі, жерлесіміз Болат Алтынбаевты еске алуға арналған турнирде бақ сынауға келген жастардың қарасы қалың. Осылардың ішінде кемінде 10-15-і болашақта еліміздің мерейін үстем етер дүбірлі додаларда топ жармасына кім кепіл. Міне, мемлекеттің аталған салаға қолдау көрсетуінің негізгі мақсаты да осы.&nbsp;Кеше басталған турнирдің алғашқы кездесуінде елордадан келген бір жас спортшының шаршы алаңда шапшаңдық танытуы бізді тәнті етті. Ә дегеннен айқын басымдықпен қарсыласын қағып салды. Спорттың барлық түрін һәм оның ережесінен толыққанды хабардар болмасақ та алаң сыртында жүріп, бір иығымызды беріп тұратынымыз тағы бар. Не керек, әлгі бозбаланың кезекті кездесуін көру үшін әдейі күттім. Арада 20-25 минут өтісімен жаңағы сабазым бозкілемнен бой көрсетті. Қарсыласы өзінен едәуір ұзын екен. Десе де спортта бой емес, салмақ маңызды рөл атқаратынын жақсы білеміз. Телеарналардан көрген ескі кадрлар көз алдыма келіп, “Бұрын осы қарсыласының иығына да бойы жетпейтін спортшылардың бәсекелесін алаңда атып ұрғанын көріп, қарым-қабілетіне тәнті болатынымыз бар еді. Алғашқы кездесудегідей айла-тәсілдер қолданылса, бұған да мүмкіндік мол ғой” деп қоямын іштей. Мен жанкүйер болып отырған әлгі бала қарсыласының екі рет айла-тәсіліне түсіп қалды. Бапкері болуы керек, өзі шыққан бұрыштан біз қатарлы бір жігіттің “28 секунд уақытың қалды” деген қатқылдау дауысы шықты. Жас спортшы да тура сол сөзді күтіп тұрғандай, қос қолына жармаса берген қарсыласын атып ұрса болар ма! Осылайша бұл кездесуде де айқын басымдықпен Аян Шаттықұлының жеңіске жеткеніне тағы бір мәрте куә болдық.&nbsp;Айтпақшы төрешінің кездесу қорытындысын хабарлап жатқанынан әлгі баланың есімі Аян екенін білдік. Не керек, бапкерінен 10-15 минут уақытын бөлуін сұрадық. Келесі кездесуі де сол күні өтетінін айтқан &nbsp;Нұрекең спортшының алдағы жекпе-жекке дайындалатынын айтып, екеуара диалогты ұзаққа созбауымызды сұрады. Бапкер айтты, біз көндік.&nbsp;Спортшы жалағаштық болмаса да, Отанымыз бір ғой. Бізді ол туралы жазуға мәжбүрлеген спортшының қарым-қабілеті еді. Мына қызықты қараңыз, елорданың атынан шыққан Аянның түбі қызылордалық болып шықты. Тіпті кейіпкеріміз Жалағаштықтарға да жат емес екен. Талай осы өңірдің топырағында аунап өскен Аян Мырзабай ахун ауылына жиен болып шықты.&nbsp;Нағашы жұртынан жүлделі қайтуды мақсат еткен Аян Шаттықұлының спортпен айналысып жүргеніне де 5 жылдың жүзі болыпты. Ал “Осы бес жылдық асуда жас бала нендей жетістікке жетті?” деген сауалдың жауабын тарқатар болсақ, ауыз толтырып айтар дүние көп.Аян Шаттықұлы – спорттың самбо және дзюдо деген қос түрін қатар алып жүрген қабілетті спортшы. Оған бүгінгі кездесуде де анық көзіміз жетті десек болады. Осы аралықта ол елордада өткен дзюдодан қалалық турнирлерде ІІІ және І орыннан бой көрсеткен. Сондай-ақ осы күні өзі намысын қорғап жүрген Нұр-Сұлтан қаласында ұйымдастырылған республикалық турниде үздік үштікті түйіндепті.– Спорттың қай түрі де оңай емес, бірақ өзің икемің бар спортқа бейімделсең, үлкен додаларда топ жаруға тез жол ашылады. Менің кішкентай кезімнен дзюдоға қызығушылығым басым болды. Қазір шүкір, &nbsp;&nbsp;&nbsp;салада аз-маз жетістігім бар. Бұйыртса, әкем артқан сенімді ақтап, мемлекет мерейін үстем етер үлкен сайыстарда топ жаруға күш саламын, – дейді Аян Шаттықұлы.&nbsp;Кейіпкеріміз сырт аймақтарда ұйымдастырылған айтулы жарыстардан да олжасыз қайтпапты. Мәселен, осыған дейін Павлодар облысында өткен Шал ақынның атындағы республикалық турнирден ІІІ орынмен оралған. Сондай-ақ Ерейментауда ұйымдастырылған республикалық турнирде финалға жолдама алып, күміс медалды қанағат тұтыпты. Кейіпкеріміздің бозкілемде қарсыласынан бәсінің биік болуы жиелей түсіп, Қырғызстанда өтетін халықаралық турнирге жолдама жеңіп алды. Алайда кіл мықтылар жиылған жарыста жерлесімізге жеңіс бұйырған жоқ. Десе де әлі 15-ке де тола қоймаған жас спортшы үшін халықаралық турнирге жолдама алу дегеннің өзі үлкен жетістік екенін жақсы білеміз.&nbsp;Қазіргі таңда бапкері Нұрбек Ерімбетов Аянның Қазақстан біріншілігіне дайындалып жатқанын айтады. Кейіпкерімізді спортқа баулып жатқан білікті бапкердің де түбі жалағаштық болып шықты. Сірә, қос қызылордалықтың талай додада мерейінің үстем болуының ар жағында Сыр спортының қолтаңбасы жатса керек, біз осыған жорыдық. Ал бүгінгі бозкілемдегі бәсекеде кейіпкеріміз 46 кг салмақ дәрежесінде өнер көрсетіп жатыр екен. Біз Аянның әлі талай додада еліміздің атын шығарып, бапкері екеуі артылған сенімді ақтайтынына сенеміз.&nbsp;

Аянның шығар шыңы биік 

<a href="https://kyzylorda-news.kz/">Kyzylorda-news.kz</a> Қазақта “қимылдаған қыр асады” деген аталы сөз бар. Қазіргідей нарық заманында &nbsp;артық қаржы көзі болмаса да қиын. Осыны ескерген жалағаштықтар да &nbsp;кәсіптің түр-түрін игеріп, жағдайларын түзеп, өз отбасы ғана емес, аудан экономикасын дамытуға үлесін қосуда. Солардың бірі – жеке кәсіп иесі &nbsp;Айдана Ілиясова. Ол бүгінде кондитерлік өнімнің қазір сұранысқа ие болып отырған торт, пирожный түрлерін өзінің шағын ауласында пісіріп, жергілікті &nbsp;халықтың күнделікті &nbsp;сұранысын қанағаттандырып отыр. &nbsp;Айдананың тәттілеріне тапсырыс беретіндер саны күннен-күнге көбейіп келеді. Себебі ол өз өнімін буы бұрқыраған пештен шыққан қалпында &nbsp;тапсырыс иелерінің дастарханына жеткізеді &nbsp;немесе анасының дүкені «Қаракөзге» апарады. Жергілікті тұрғындардың «тәтті іздесең «Қаракөзден» ал. Онда бәрі бабында тұрады, ескірмейді» деуінің сыры осында болып шықты. Шынында солай екен.&nbsp;Мұны біз Айдананың жұмыс орнындағы шағын цехтан шыққан өнімдерді дереу тұтынушыларына жөнелтіп жатқанынан байқадық. Иісі бұрқыраған тәттілердің кремдері де көздің жауын алады. Торттың безендірілуі де ерекше. Айдананың сөзден &nbsp;іске жақын екені көрініп тұрды. Десе де бұл кәсіптің құпиясын меңгерген тәттілер әлемінің қожайыны Айдананы сөзге тарттық.&nbsp;– Маған бұл тәтті пісіру бұрыннан таныс. Себебі анам Сәуле Баймағамбетова бұл жағынан менің алғашқы ұстазым десе де болғандай. &nbsp;Алғашқыда өзімнің бітірген қаржыгер мамандығыммен аудандық білім бөлімінде 2010 жылдан 2020 жылға дейін жұмыс жасадым. Менің кәсіпке қызығушылығым 2018 жылы үшінші баламмен декреттік демалыста отырғанда басталды. «Тәтті әлемі» деген Динара Тасыбаеваның кондитерлік цехынан торт пісірудің құпиясын үйрене бастадым. Анамның тәтті пісіретін құрылғысын алдым. Солай алғашқы тапсырыстарды қасыма көмекшіге 1 қыз алып бастап кеттім. Халыққа қолжетімді бағада ұсынып отырдық. Ел де біздің өнімімізді көптеп ала бастады. Осындай жетістіктен кейін маған ой келді «Неге кәсібімді кеңейтпеске?» деген. Осылайша жұмыстан біржола шығып, жұмыссыз азаматтар қатарына &nbsp;тіркелдім. &nbsp;2020 жылы төртінші баламды дүниеге әкелген соң үйде баламен 2-3 ай отырдым да, &nbsp;көпбалалы ана есебінде 4 пайыз жеңілдікпен 6 млн теңге несие алдым. &nbsp;Үлкен той кезінде тапсырыстар 200 данаға дейін жасалатын. Кейін карантин кезінде шағын басқосуларда 40-50 тапсырыс түседі. Әсіресе мерекелер біздің табысымызды &nbsp;едәуір көбейтіп отырады. &nbsp;Өз кәсібіме әрдайым қуанып, одан жаныма рахат табамын. Әр шаңырақтың той дастарханында өзімнің қиялыммен өрнектеп жасаған өнімдерім тойшыл қауымға әдемі көңіл-күй сыйлап, түрлі тәттіден олар сүйсініп дәм татып тояттап отырса одан асқан бақыт бар ма?, – дейді Айдана.&nbsp;Иә, Айдананың алға қойған мақсаттары көп. Ол әлеуметтік желідегі тәтті дайындайтын &nbsp;үлкен цехтардың жаңалықтарын үнемі бақылап, өзінің күнделікті жұмыс тәжірибесіне енгізіп, үздіксіз ізденіп отырады. «Ізденген жетер мұратқа» дегендей, біз де Айдананың кәсібіне береке тілейміз.&nbsp;Кәсіпті игерсең, қаржылық жағынан тәуелділік азаятыны да жасырын емес. &nbsp;Бұдан бөлек, бүгінде мемлекет те кәсіпкерлерге ерекше көңіл бөлуде. Түрлі бағыттағы мемлекеттік бағдарламалар кәсіпкерліктің қарқынды &nbsp;дамуына мүмкіндік беріп отыр. Тек талмай еңбек етсең болғаны.&nbsp;

Кәсіп ашып, аудан экономикасының дамуына үлес қосуда

Kyzylorda-news.kz. Департаменттің негізгі бағыттарының бірі – мемлекеттік қызмет саласындағы бақылауды жүзеге асыру болып табылады.Бұл бағытта департаментке жыл басынан бері 57 өтініш түскен.&nbsp; Түскен өтініштердің 46-ы жеке тұлға, 3-і заңды тұлға, 8-і мемлекеттік қызметшілерден түскен.Қаралған өтініштерде жиі көтерілетін сұрақтар, бұл конкурс өткізу қорытындысымен келіспеу – 5, әлеуметтік қорғалу – 7, әдеп нормаларын бұзу – 5, тәртіптік жазамен келіспеу – 2, конкурс өткізу тәртібіне қатысты – 2. Құзыреттілік шегінде барлығы 23 тексеру жүргізілді (6-проф. бақылау, 17-жоспардан тыс тексеру). Нәтижесінде 143 бұзушылық анықталды.Бұзушылықтардың басым көпшілігі мемлекеттік қызметшілердің әлеуметтік мәселелеріне қатысты болып отыр.Орын алған бұзушылықтарды жою бойынша 11 нұсқама енгізіліп, барлығы орындалды.Енгізілген ұсыныстардың нәтижесінде: - 1 қызметші тәртіптік жазаға тартылды; - 2 мемлекеттік органдардың актілері (тәртіптік жаза қолдану) заңсыздығы негізінде бұзылды; - 3 әкімшілік іс қозғалды (ҚР ӘКБтК 89б. 1 тар. –1, 462 б. 3 тарм. – 1, 99 бап 2 тарм. – 1). Тексерулердің нәтижелерімен 4 мемлекеттік қызметшінің құқықтары қалпына келтірілді.Мысалы, Қармақшы ауданы әкімі аппаратына профилактикалық бақылаумен жүргізілген тексеру барысында Қазақстан Республикасы Үкіметінің 2018 жылғы 11 мамырдағы №256 қаулысымен бекітілген Бюджет қаражаты есебінен қызметтік іссапарларға, оның ішінде шет мемлекеттерге қызметтік іссапарларға арналған шығыстарды өтеу қағидаларының (бұдан әрі – Қағидалар) сақталмағандығы анықталды.Атап айтқанда, Қағидалардың 6-тармағында іссапарға жiберiлген қызметкерге iссапарға кетер алдында жол жүру ақысын, тұрғын үй- жайды жалдау бойынша шығыстарды төлеуге тиесiлi сомалар және тәулiкақы беріледi. Іс-сапардан оралғаннан кейiн қызметкер бес жұмыс күнi iшiнде іссапар бойынша шығыстар туралы растаушы құжаттарды қоса бере отырып, іссапар туралы есеп береді делінген.Алайда, Қармақшы ауданы, Т.Көмекбаев ауылдық округінің әкімі 26.09. - 01.10.2023 жыл аралығында Астана қаласына іс-сапарда болғаны белгілі болды.Дегенмен, ауыл әкіміне тексеру барысында iс-сапарға кетер алдында жол жүру ақысы, тұрғын үй-жайды жалдау бойынша шығыстары мүлдем төленбегендігі анықталды. Осындай деректер, Қармақшы аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің бас маманы (іс-сапарға шығу мерзімі 12.02.-13.02.2024 жыл), Қармақшы аудандық мәдениет және спорт бөлімінің сектор меңгерушісіне (іс-сапарға шығу мерзімі 15.02.-16.02.2024 жыл) мүлдем төленбеген.&nbsp;Департаментпен енгізілген бұзушылықты жою туралы нұсқаманың нәтижесімен қызметшілерге іс-сапар шығындары төленді. Сонымен қатар, Қазалы ауданы әкімі аппаратына профилактикалық бақылаумен жүргізілген тексеру барысында Ғ.Мұратбаев ауылдық округінің әкіміне тәртіптік жаза қолдану барысында Қазақстан Республикасы Президентінің 2015 жылғы 29 желтоқсандағы №152 Жарлығымен бекітілген «Мемлекеттік қызметшілерге тәртіптік жаза қолдану» Қағидаларының талаптары сақталмағандығы анықталды.Департаментпен енгізілген бұзушылықты жою туралы нұсқаманың нәтижесімен ауылдық округтің әкіміне тәртіптік жаза қолдану туралы бұйрықтын күші жойылып, бұзылған құқықтары қалпына келтірілді.Алдағы уақытта да аумақтық департамент азаматтардың, соның ішінде мемлекеттік қызметшілердің де құқықтарын қалпына келтіру бағытындағы жұмыстарды одан әрі жалғастыра беретін болады.

Мемлекеттік қызметшілердің құқығы қалпына келтірілді

<a href="https://kyzylorda-news.kz/">Kyzylorda-news.kz</a> Қазір көзін тапсаң кәсіптің кез келген түрімен айналысып, табысқа жетуге болады. Себебі аталған салаға мемлекет мейлінше қолдау көрсетіп отыр. Қуантарлығы жалағаштықтар бұл мүмкіндікті құр жібермей жеке табысын молайтуда үлкен жетістікке қол жеткізіп келеді. Кент тұрғыны анар алтыбаева да жақында мемлекеттік бағдарламамен пайыздық үстемақысы төмен несие алып, өз кәсібін бастап кетті.Кейіпкеріміз жолдасы Дәулетқали Дауытовпен мал шаруашылығында отбасылық бизнесті дамытуға бел буып отыр. Мемлекеттік бағдарламамен 4 млн теңге несие алған ол қазіргі таңда ірі қара басын көбейтуді қолға алыпты. Негізінен тиісті қаражатқа 14 бас сиыр алу жобада көрсетілген. Жақында ғана қолына қаржысы тиген кәсіпкер әзірге 8 бас ірі қара алған. Ал қалған сиырды сатып алу үшін шаруашылықтармен келісімге келуде.&nbsp;Анар Алтыбаева қолға алған жобаның болашағы барына еш шүбә жоқ. Себебі ауданның агарлық өңірлер қатарынан табылуы малдың жем-шөбіне келгенде үлкен мәселе тудырмайды. Оның үстіне жолдасы Дәулетқали да жарының жанынан табылып, кәсібінің алға басуына қолғабыс болатынын айтып отыр.&nbsp;– Бұл жобаны қолға алуды жоспарлап жүргенімізге көп болды. Ал оны жүзеге асыруға енді мүмкіндік болып жатыр. Мемлекет қолдау көрсеткен кәсібімнің жемісін көретінімізге де еш күмәніміз жоқ. Бастысы талап бар. Жарымның бастаған ісіне өзім қолғабыс етемін. Оның үстіне негізінен мемлекет пайыздық үстемақысы 6 пайыз несиемен кәсіпкерлерді қолдаса, көпбалалы ана ретінде Анарға 4 пайызбен қаржы беріп отыр. Жалпы іс бастаймын деген жанға қазір қолдау көп. Осы ретте жерлестеріме мүмкіндікті құр жібермей іс бастаса деп үндеу тастаймын. Қазір алған сиырларымызды фазендада ұстап отырмыз. Енді қалған алты бас ірі қараны алсақ, жобада көрсетілген талаптарды толық орындаймыз. Мал басын алдымен көбейтіп алсақ, оларды бағымда ұстап, жеке табысты көбейтуге күш салу жоспарда бар, – дейді Дәулетқали Кенжеғалиұлы.&nbsp;Бұған дейін мұндай мүмкіндік барын білмеген Дәукең енді өзі де несие алып, іс бастауға бел буып отыр. Ағамыздың қолға алатын жобасы да Анар Алтыбаеваның кәсібімен үйлеседі. Екеуі де мал шаруашылығы бағытында кәсібін жандандырып, отбасылық бизнесті дамытуға талаптанып отыр. Анар ірі қара өсіру ісін қолға алса, жолдасы жылқы шаруашылығын дамытпақ.&nbsp;– Бұл салаға үлкен мақсатпен келгендіктен бастаған ісімізді алып кететінімізге сенімдіміз. Оның үстіне жолдасым қолдау көрсетіп отыр. Алдағы уақытта оның қолға алатын жобасы менің бастаған кәсібіммен үйлескені де жұмысымыздың алға басарына сеп болады деп ойлаймын. Қоражайдан мәселе жоқ. Ал аграрлық өңірде жем-шөптен де мәселе болмайтынын өздеріңіз де жақсы білесіздер. Сондықтан өз басым, жолдасым да кәсіптің бұл түрінде үлкен табысқа қол жеткіземіз деп ойлаймыз. Қазір мал қымбат. Еттің де бағасы шарықтап тұрғанын жақсы білесіздер. Бұл да біздің кәсібіміздің алға басуына ықпал етері сөзсіз, – дейді Анар Алтыбаева.Жарасымды отбасының қолға алған жобасы бұйыртса, көп ұзамай жемісін берері сөзсіз. Оның үстіне отбасылық бизнесті қолға алғандармен әңгіме барысында олардың кәсіпке бет бұрарда үлкен мақсатпен келгенін айқын аңғардық. Өздері айтқандай, бастысы талап бар. Ал талап бар жерде жұмыстың да алға басары анық. Кент орталығында тұрып, кәсіптің бұл түрін қолға алғандар көпке үлгі болуы тиіс. Сонда ғана өңір дамып, экономикамызда тұрақты өсім қалыптасары сөзсіз.&nbsp;Жалпы жалағаштықтардың аталған салаға бетбұрысы жаман емес. Пайыздық үстемақысы төмен несиеден бөлек қайтарымсыз грантқа қол жеткізгендер де қазіргі таңда өз жобаларының жемісін көруде. Бар болғаны 555 400 теңге қайтарымсыз несие алған аудан тұрғындары да бүгінде тапсырыс аясында жұмыс жасап, табыс табуда. Мұның өзі өңірдегі кәсіпкерлік саласының серпін алуына сеп болып отыр. “Қазір барлығы мал шаруашылығымен айналысуды мақсат етеді. Кәсіптің бір түрін қолға алғандар көп болса өнімге сұраныс азаяды” деген түсініктен арылу керек. Себебі олардың саны артса да ет бағытында, сүт бағытында мал ұстап, кәсіп ашқандардың шаруасы шатқаяқтаған жоқ. Қос кейіпкеріміздің де алдағы уақытта жұмысы алға басары анық.

Отбасылық бизнесті бастаған

<a href="https://kyzylorda-news.kz/">Kyzylorda-news.kz</a> Егіс даласы жайқалып тұр. Астық алқабының жібек самалы ақырын ғана иілген дәннің сабағын ерекше тербеген көз тоймайтын көрініс. Әр атызға түскен комбайндар алып кемедей сары даланың сәнін келтіріп дала төсін дүбірлетіп барады. Молшылықтың берекесінен нәпақа сұрап, еткен еңбектің жемісін көретін күн де жақын. Биыл егін майданының көрігі қызайын деп тұр. Сыр салысының сабағына тізілген маржандай дәннің иісін айтсай. Ысталған алақанына салған дәннен жер-ананың жұпар иісі аңқып, көкірек сарайын ашып, жадыратып жіберді. Диқан тер сіңген орамалымен бетін сүртті. Шұғыласын аямай төккен мейірімді күнге &nbsp;қарап өрімдей балаларының несібесін беріп жатқан жаратқанға сансыз шүкіршілік етті. Маңдайдан моншақтаған әр тамшы тер еліміздегі тоқшылық пен берекеге бастасын деп тіледі ол.Иә, Нұрадиннің үміті алдамапты. Қырманға құйылған алтын дән осыдан бірнеше жыл бұрын Жалағаш ауданын облыс бойынша жеңіс тұғырына көтерді. Сол жеңіс салтанатының жеңімпаздары қатарында Нұрадин Әмитовтің де есімі ерекше аталып, «Бақ-Дәулет» жауапкершілігі шектеулі серіктестігі атынан темір тұлпардың иесі атанған. &nbsp;Еңбек бар игіліктің алтын тәжі секілді. Еңбек адамының күнге тотыққан жүзіне, маңдайындағы терең әжіміне қарап шыдамдылығына, қайрат-жігеріне тәнті боласын.&nbsp;Біздің бүгінгі кейіпкеріміз диқан Нұрадин Әмитов – сөзге сараң, мақтаншылықты жаны қаламайтын нағыз еңбек адамы. Ол – жастайынан еңбектің наны тәтті болатынын терең түсінген жан.&nbsp;– Әкемнің тәрбиесі ғой. Қаршадайымыздан шаруаға баулыды. Ол кісіні біраз адам таниды. Әкеміз Қасқырбай Әмитов біраз жыл Аққұм ауылында шаруашылықта бригадир болған. 10 ағайындымыз. Ата кәсіпті жалғастырған мен ғана. 25 жылдан бері &nbsp;егінжайдан нәпақа тауып, отбасымды асырап отырмын. Анамыз қазір 81 жаста. Біздің тілеуімізді тілеп, ұрпақтарының қызығын көруде. Еңбегімізді бағалап, көлік беріп жатқан шаруашылық төрағасы Серік Шуақбаевқа алғыс айтамын. Адал еңбек қана игілікті өмірдің алтын кілті, – дейді диқан жылы жымиып.&nbsp;Кейіпкеріміздің аталған шаруашылықта жұмыс жасап жатқанына бірнеше жылдың жүзі болыпты. Осыған дейін төраға артқан сенімге селкеу түсірмеген диқан былтырғы жылды да толайым табыспен тәмамдады. Биыл да мол өнімнен үмітті Нұрадин әлден көктемгі науқанның қамына кірісіп кетті.&nbsp;Салада ұзақ жылдық тәжірибесі бар кәнігі маман артынан ерген жас буынға да көрген-білгенін үйретіп келеді. Оның сөзінше, ең көп күтімді қажет ететін Сыр салысын өсіріп, одан мол өнім алудың да түрлі тәсілі бар көрінеді. Алайда ол үшін алдымен табандылық пен жауапкершілік қажет. Өзіне осы екі асыл қасиетті серік еткен диқаннан тәлім алған жас буынның да сабақтастықты әрі жалғап, аудан абыройын асқақтатуға өз үлесін қосары анық. Сондықтан жас буынды ауыл шаруашылығы саласында тәрбиелеп жатқан Нұрекеңнің еңбегі өз жемісін берері анық.&nbsp;Қазіргі таңда аталған шаруашылық көктемгі науқанның қамына кіріскен көрінеді. Төраға Серік Шуақбаев осындай кәнігі мамандарына сенім арта отырып, биыл да қамбаны астыққа толтыруға бел буып отыр. Тіректі елді мекендегі іргелі шаруашылықтың күзгі науқанды оң нәтижемен қорытындыларына біз де сенеміз. &nbsp;

Игілікті өмірдің алтын кілті 

<a href="https://kyzylorda-news.kz/">Kyzylorda-news.kz</a> Кәсіпкерлік саласына қарқын беруді көздейтін мемлекеттік бағдарламалардың жалағаштықтар бүгінде игілігін көруде. Әсіресе бұл бағдарламаның негізгі мақсаты елді мекендерде жұмыссыздық мәселесін болдырмауға бағытталуы екі қолға бір күрек таппай жүрген жандар үшін таптырмас мүмкіндік болып отыр. Олай болмағанда ше, жұмыс іздеп барған адамнан іскер азамат қалыптастыруды көздейтін мемлекеттік бағдарлама өңірде кәсіпорындар қатарының артуына сеп болуда.&nbsp;&nbsp;&nbsp;&nbsp;&nbsp;&nbsp;&nbsp;&nbsp; Екі жүзден астам аудан халқының кәсіп ашуына демеу болған “Жаппай кәсіпкерлікті дамытудың “Еңбек” мемлекеттік бағдарламасы биыл да іс бастаймын деген жалағаштықтарды қаржылай қолдауға кірісті. Бұрынғыдай емес, жұртқа берілетін қайтарымсыз қаржының көлемі де артқан. Нәтижесінде аудан халқы бағдарлама игілігін көріп, өз жобаларын жүзеге асырудың қамына кірісті. Елмен бірге комиссия мүшелері алдында өз жобасын қорғаған аққошқарлық Айбатыр Сардарбекұлы да Еңбекте жылқы шаруашылығын қолға алсам дейді.&nbsp;Бұған дейін бірнеше мекемеде жұмысшы болған ол бір айлықпен бүтін бір отбасын асырап, жеке табысты арттыру мүмкін емес екенін айтады. Осы ретте мал шаруашылығын қолға алуды көздеген ауыл тұрғыны мемлекеттік бағдарлама көмегіне жүгінуді жөн деп табады. Себебі Айбатырда шаруашылық бастап кету үшін қосымша қаржы көзі де жоқ еді.&nbsp;– Өзім тек Жалағашта ғана емес, облыс орталығына барып та жұмыс жасадым. Алайда айлықпен алысқа бармайтынымды түсіндім. Осылайша кәсіпке аяқ бассам деген ой келді. Ол үшін мен өз жобамның тақырыбын мал шаруашылығына бағыттадым. Себебі өндіріс ошағы болашақ ауылда болғандықтан аграрлық өңірде кәсіптің бұл түрімен айналысушы жан үшін шығын аз болатынын жақсы білемін. Комиссия мүшелері менің жобамды бірауыздан қолдап, маған осыдан бірнеше жыл бұрын 583 400 теңге қайтарымсыз қаржы үлестірді. Тиісті қаржыға екі жылқы алып, әуелі мал басын көбейтудің қамына кірістім. Кейін, яғни мал басы көбейгесін оларды бордақылап, жеке табысқа жұмыс жасадым, – дейді жоба авторы.&nbsp;Айекең осыдан бірнеше күн бұрын сатып алған жылқысын шаруагер жақындарының үйіріне қосып қойған. Мұнан кейін 4 млн теңге пайыздық үстемақысы төмен несие алуға болатынын естіген ол қазір соның жұмыстарына кірісіп кеткен.&nbsp;– 583 400 теңгемен мал алып, оның басын көбейту көп уақытты қажет етеді. Сондықтан комиссия мүшелерінің маған берген кеңесі табылған ақыл болды. Енді 4 млн пайыздық үстемақысы төмен несие алуға талпынып жатырмын. Қаражат қолға тисе, көп ұзамай мен де ауылда үйір жинаймын. Бір жағынан өрісте мал басы арта береді. Келесі кезекте бордақылап сату арқылы жеке табысымды да еселеймін. Бірақ бордақылау ісін кейін қолға аламын. Қанша қаржы алсам да алдымен бір-екі жыл мал басын көбейтемін, – дейді кәсіпкер.&nbsp;Ауыл тұрғындары үшін мал шаруашылығы қолайлы кәсіп екені айтпаса да белгілі. Сондықтан Айбатырдың бұл жобасы болашақта өз жемісін берері анық. Оның үстіне кәсіпкердің алдымен мал басын көбейтуіп алуды мақсат етуі бізді қуантып отыр. Ата кәсіпті алға оздыруға талпынған Айекең осылайша мемлекетке салмақ салмай өріске мал өргізсем дейді.&nbsp;Кейіпкеріміз іс бастауда мемлекеттік бағдарлама игілігін көрген аудан тұрғындарының бірі ғана. Осыдан бірнеше жыл бұрын дәл осы бағдарламамен Жалағашта 200-ден астам жоба өз жұмысын бастаған болатын. Қазіргі таңда қаржылай қолдау тапқан жоба авторлары бір жағынан жеке табысын арттыруға қол жеткізсе, келесі кезекте ауданда аталған саланың алға басуына өз үлестерін қосып отыр.&nbsp;

Ата кәсіптен адал асын тапқан Айбатыр

<a href="https://kyzylorda-news.kz/">Kyzylorda-news.kz</a> Еңбек бар бақыттың алтын қақпасы екенін кезінде данагөй ата-бабаларымыз көрегендікпен айтып, ұрпаққа ұлағат етіп қалдырған. Данышпан абай атамыз «еңбек етсең ерінбей, тояды қарның тіленбей» деп еңбектің наны тәтті екенін тереңнен толғаған. Ал елбасы ғұлама халқымыздың тағдыр тезінен өткен өсиетін қайта жаңғыртып &nbsp;«еңбек бәрін жеңбек» деп &nbsp;жұдырықтай жұмыла &nbsp;тер төгіп еңбек етсек қана тәуелсіз еліміздің болашағы жарқын, бақыты баянды болатынын айтып, елді білек сыбана еңбек етуге шақырды. &nbsp;Олай болса, тәжірибенің де, таланттың да атасы – еңбек екендігі айдан анық.&nbsp;Ал таң құланиектеніп атқаннан қара кешке дейін егіс басында еңбек майданын қыздырған диқанның еңбегі шынында көзге көрінбейтін, ұсақ-түйек күйбең тірлігі бітпейтін, маңдай термен өлшенетін ауыр бейнет. Алқапқа сепкен егіні жайқалып өскенде диқан да кең тыныстап, өзінің өлшеусіз еңбегінің өтемі бар екенін сезініп, киелі Жер-Анадан береке сұрайды. Ал сары алтындай сабағы желмен тербелген күріші бітік шығып, оның өнімі қырманға науадай құйылып, егіншінің даңқын асырып жатса, даламен жаны егіз диқан үшін мұнан асқан бақытты сәт бола қоймас, сірә! &nbsp;Біздің бүгінгі кейіпкеріміз Мырзабай ахун ауылының тұрғыны Самат Балабатыров «Егінші» жауапкершілігі шектеулі серіктестігінде 10 жылдан астам уақыт күрішші болып еңбек етіп келеді. Оның атасы Жармабай бастаған диқаншылық кәсіп бүтін әулеттің берекелі тірлігінің бастауы болып отыр.&nbsp;– Қаршадай күнімізден ащы терге малшынып, дәннің қадірін, бір үзім нанның қадірін сезіндіріп, адал еңбекке баулыған атама мың алғыс. Әкеміз Жадырасын өмірден ерте өтті. Ол кісі де механизатор болған еді. &nbsp;Шиеттей бала-шағаның бар тауқыметін анамыз Үндістан мен атамыз Жармабай көтеріп, шынайы еңбек қана табысқа жетелейтінін, жаман әдеттен аулақ болуға &nbsp;үйрететінін насихаттаумен болды. Соның жемісін жеп, табысқа жетіп отырмын. Күріштің әр гектарынан 78 центнерден өнім алдым. Былтырғы жылдың қорытындысымен озаттар қатарынан көрініп, чемпион атанып, су жаңа темір тұлпар міндім. Еңбек &nbsp;адамы үшін бұдан артық қандай қуаныш керек?!, – дейді диқан.&nbsp;Кезінде даңғайыр диқан Ыбырай Жақаев «Сыр елінің даңқын асқақ көтеріп, мерейін үстем етіп келе жатқан аса бағалы дақыл – күріш өсіру ісі менің диқандық өмірімде үлкен орын алады. Мен бұл дақылды қастерлеп баптауды, гүлдей аялап өсіруді ұнатамын. Өйткені мен мұны халық алдындағы адамгершілік парызым деп білемін» деген екен. Ол өмірінің ақырғы сәттеріне дейін еңбек қана адамды рахат өмірге жетелейтінін айтып, ұлағатқа толы ғұмырын тоқсанға жетсе де терең тебіреніспен толғап, келер ұрпаққа ғұмырнамалық кітап жазып қалдырыпты. Дала академигіне қарап бой түзеген біздің Самат Балабатыровтай жастарымыз дала төсіндегі еңбек майданын қыздырып, қас тұлпардай оза шауып, бәйге алып отыр. Ұлы даланың осындай рухты ұлдары аман болсын!

Даламен жаны егіз диқан 

<a href="https://kyzylorda-news.kz/">Kyzylorda-news.kz</a> Дүбірлеген дала төсінде еңбек еткен диқан немесе сушы, яки комбайнер білетін күріш өсірудің құпиясын “қарабура ата-1” шаруа қожалығындағы бас есепші Абдолла ағамыздан сұрасаңыз, бүгінде ұмытылып қалған егіннің шығымы мен оны күтіп-баптауға қатысты ақпаратты жадында қайта жаңғыртып, кәсіби мамандай шаруашылықтан әжептәуір әңгіме тарқатады.Әбекең деп отырған кейіпкеріміз Абдолла Шалқымаев – ауыл шаруашылығы саласында 1994 жылдан бері еңбек етіп келе жатқан білікті маман. Оған ешкімнің дауы жоқ. Салада межелі табысқа қол жеткізіп, кәсібін басқа бағытқа іскер азаматтар талай ауыстырған. Мұндайда білікті кадр үшін жұмыс табу қиын болып па? Бір маусымнан келесі маусымға дейін Абдолла Шалқымаевты жергілікті шаруашылықтардың таласа жұмысқа шақыруы ол туралы жоғарыда айта кеткен мәліметтерді қуаттай түсері анық.&nbsp;&nbsp;30 жылдан аса уақытта аталған саланың түрлі бағытында табанды еңбек еткен ағамыз бүгінде &nbsp;“Қарабура Ата-1” шаруа қожалығында бас есепші болып жұмыс жасайды. Алайда бас маманмын деп шіреніп, кабинетіндегі жылы креслоға жайғасып, компьютерден бас алмай отыру ол кісінің табиғатында жоқ әдет. Керісінше кешегі науқанда еңбеккерлермен етене жүріп, егіс басында жұмыс жасап жүр. “Мамандыққа – адалдық” деген осы шығар сірә.&nbsp;– Былтыр межелі өнімге қол жеткізген шаруашылықтың биыл да жұмысында тоқырау жоқ. Мұның бәрі дала еңбеккерлерінің еселі еңбегінің арқасы деп білемін. Біздің ұжым болып үлкен жетістікке қол жеткізуіміздің басты себебі, мұнда “сен механизаторсың, сен сушысың немесе сен күрішшісің” деген түсінік жоқ. Шаруаның бір жағы ақсап жатса, жұмыла сол олқылықтың алдын алуға күш саламыз. Мәселен, мен мұнда бас есепші болып жұмыс жасаймын. Алайда бұған дейін бірнеше жергілікті шаруашылықтың түрлі бағытында жиған тәжірибемді қазіргі буынмен бөліскім келеді. Мәселен, себілген дән еш кедергісіз бас алуы үшін оған қандай күтім қажет, соның бәрін жас күрішшілерге үйретемін. Мұндағы қажырлы мамандардың жиған тәжірибесін көппен бөлісуге бейім тұрғанынан болар, былтыр ғана ауылда өз жұмысын бастаған шаруашылықтың бүгінде шаруасы шарықтап отыр, – дейді Абдолла Шалқымаев.Кейіпкеріміз “Қарабура Ата-1” ШҚ-ның биыл да оң нәтижеге қол жеткізгенін айтады. Сөйлетсең, дән сеппес бұрын жердің өзіне қандай күтім қажеттігін жетік білетінін аңғара қоясың. Мәселен, жерді күріш орылғаннан кейін бір сүдігерлеген дұрыс көрінеді. Көктемгі науқанға дейін екі рет жыртылған жерде келер жылы арам шөп аз болады. Ал мұндай алқапта жаз бойы бапталған өнімнің шығымы жоғары болатынына шүбә жоқ.&nbsp;Әбекеңнің айтуынша, аталған шаруашылық жыл сайын еңбеккерлерге айлығынан бөлек қосымша сыйақы тағайындайды екен. Шаруашылық төрағасы Дастан Ержанов 2020 жылдың қорытынды науқанында су жаңа темір тұлпарды бас есепші Абдолла Шалқымаевтың да қанжығасына байлағаны туралы сүйінші хабар құлағымызға жетті. Еңбек адамына деген құрметтің біздің қоғамда жоғары бағаланғанын көріп, сүйсінгеніміз де рас.&nbsp;

Еңбекпен еңсе тіктеген шаруақожалық

<a href="https://kyzylorda-news.kz/">Kyzylorda-news.kz</a> &nbsp;28 маусым – Бұқаралық ақпарат құралдары қызметкерлерінің мерекесі қарсаңында партияның қалалық филиалының «Орталық» бастауыш партия ұйымына қарасты «Сыр медиа» ЖШС-нің белсенді тілшілері марапатталды.Партияның қалалық филиалының атқарған шаралары мен партиялық жобалардың, бағдарламалардың іске асуы турасында қалам тербейтін тілшілер қауымының еңбегі ерен.Басқосуда «Орталық» бастауыш партия ұйымының төрағасы Марат Аралбаев:<blockquote>– Қай істе болмасын тілшілер қауымының еңбегі орасан. Сондықтан, кәсіби мереке қарсаңында сіздерге түрлі деңгейдегі марапат табысталуда. Оның ішінде «AMANAT» партиясының да жылы лебізі бар. Алдағы уақытта партия жаңалықтарын ақпарат құралдары бетіне жариялап, атқарылған жұмыстарды оқырмандарға тұрақты түрде жеткізіп отырады деген ойдамын. Кәсіби мерекелеріңіз құтты болсын, – деді.</blockquote>Жиында белсенді тілшілерге партияның қалалық филиалының атынан Алғыс хаттар мен сыйлықтар табысталды.Фото: «Орталық» бастауыш партия ұйымы

Қазақстан және Қызылорда облысының жаңалықтары