<a href="https://kyzylorda-news.kz/">Kyzylorda-news.kz</a>&nbsp;&nbsp; «AMANAT» партиясының облыстық филиалы жанындағы Сыбайлас жемқорлыққа қарсы іс қимыл жөніндегі кеңестің отырысы өтіп, онда мемлекет қаржысын белгіленген мақсатқа сәйкес нәтижелі жұмсалуы және жалпы сыбайлас жемқорлықтың алдын алу бағытындағы жұмыстарын саралау үшін облыстық табиғи ресурстар және табиғат пайдалануды реттеу басқармасы мен экология департаментінің жауапты басшыларының есебі тыңдалды.Бүгін есеп берген басқарманың миссиясы: өңірдің қоршаған ортасын қорғау саласын басқару, экологиялық жағдайды жақсартуға және экологиялық қауіпсіздікті қамтамасыз етуге бағытталған бірыңғай табиғатты қорғау саясатын қалыптастыру болып табылса, экология департаментінің негізгі міндеттері – жобаларға мемлекеттік экологиялық сараптама жасау, табиғат пайдаланушыларға қоршаған ортаға эмиссияға рұқсат беру, қоршаған ортаның құрамдас бөліктеріне зертханалық талдау-бақылау жүргізу болып табылады.<blockquote>«Сыбайлас жемқорлық бар жерде әділетті қоғам орната алмайтынымыз анық. Мемлекет басшысы Қасым-Жомарт Кемелұлы Тоқаев Әділетті Қазақстанды құру үшін адам құқығы мен заң үстемдігі мәселесін алға қойды. Осыны басты назарға алып, жұмыс істесек, сыбайлас жемқорлықтың алдын алсақ, оны жеңе алатынмызға күмән жоқ. Біздің де негізгі міндет — қызметтегі неғұрлым сыбайластыққа «жақын» салаларды анықтау және бақылау, сол арқылы құқық бұзушылыққа жол бермеу»,- деді барлық жұмыстарды саралай келе жиынды қорытындылаған Кеңес төрағасының орынбасары Дәурен Шәріпбаев.</blockquote>

Мемлекет қаржысының мақсатты жұмсалуы мен сыбайластықтың алдын алу мәселелері қаралды

Қазақтың ән-күйін, тұрмыс-салтын зерттеген орыс этнографы Григорий Потанин: "Маған бүкіл қазақ даласы ән салып тұрғандай болып көрінеді" деп тамсаныпты. Рас, кең даланы мекендеп, еркін өмір сүрген халқымыздың бүтін болмысының өзі әнге-күйге айналып кеткен. Жиырма жыл бұрын "Ұлытау" атты аспапты этно-рок стиліндегі музыкалық ұжым Голливудта өткен Бүкіләлемдік музыка орындаушыларының чемпионатында бас жүлдені жеңіп алды. Құрманғазының "Адай" күйімен қазақтың қара домбырасын мұхиттың арғы бетіне таныстырып, америкалықтарды таң қалдырды. Одан бері де қазақтың маңдайына біткен жарық жұлдызы, сиқырлы дауысымен әлемді табындырған алтын дауысты әнші Димаш Құдайберген азуын айға білеген сол Батыстың сахнасында ұлттық аспабымыздан күмбірлете күй төгіп, халық әндерін нақышына келтіре орындап, жаһаннан жиылған жұрттың жанарын жасқа толтырды. Осыдан соң әлем қазақтың төл өнерін, соның ішінде ұлттық музыкамызды мойындамай көрсін...Таяуда жас әнші, сазгер, Қ.Қазантаев атындағы аудандық мәдениет үйінің жанынан құрылған "Жігер" этно-фальклорлық ансамблінің жетекшісі Руслан Бурабай қара домбыраның қасиетін әлемге тағы бір паш етті. Американың Техас штатында өткен "ARTIVITIES seassons" Халықаралық көпжанрлы онлайн конкурс-фестиваліне өзінің "Талас" күйімен қатысып, "Халықтық орындау" жанры бойынша І орынды иеленді. Бұл – ауданымыз үшін ғана емес, еліміз үшін де сүйіншілейтін жағымды жаңалық, үлкен жетістік.&nbsp;Руслан Бурабай Қарағанды қаласындағы Тәттімбет атындағы өнер колледжнің және Көкшетау қаласындағы Біржан сал атындағы музыкалық колледжінің халық аспаптар бөлімін бітірген. 2016 жылдан бері Қ.Қазантаев атындағы аудандық мәдениет үйінде қызмет істеп келеді. Жігерлі жас 2017 жылы "Жігер" этно-фальклорлық ансамблін құрып, ұрпақтан-ұрпаққа мирас болып келе жатқан мәдени мұрамызды жаңғыртуды қолға алыпты. Қазір сол "Жігердің" жетекшісі және мәдениет үйі жанынан ашылған домбыра үйірмесінің ұстазы. Құрамында он адамы бар "Жігер" этно-фальклорлық ансамблі құрылғаннан бері жақсы жетістіктерге қол жеткізген. Атап айтсақ, 2017 жылы Қазалы ауданында өткен "Қастерлеп жүрсін өнеріңді ұрпағың" атты облыстық фальклорлық ансамблдердің байқауында Раманқұл Әуезов атындағы арнайы жүлдені иеленсе, 2019 жылы Жамбыл облысында өткен "Көне Тараз күмбірі" атты республикалық байқауда Ықылас Дүкенұлы атындағы арнайы жүлдені жеңіп алды және сол жылы қыркүйек айында Қызылорда қаласында өткен "Қорқыт және ұлы дала сазы" атты халықаралық фестивальда жоғары дәрежеде өнер көрсетіп, дүние жүзінен жиылған түркі тектес туысқан халықтарды тәнті етті. Сонымен бірге Руслан Бурабай қазірде өзінің жеке шығармашылығына ден қойып жүр. Үлкен сахналардан орындалып жүрген бірнеше ән мен күйдің авторы. "Шабыт" және "Тәуелсіз Қазақстан" атты екі күйі "Қазақ күйлерінің энциклопедиясына" енген.&nbsp;– Менің өмірім өнермен егіз. Қазірде мамандығым бойынша сол өнер саласында қызмет етіп келемін. Мен өмірімді әуенсіз елестете алмаймын. Соның ішінде ұлттық бояуы бар әуендер жаныма жақын және ұлттық музыкалық аспаптармен орындалатын халық әндері мен жеке авторлық күйлерді хал-қадірімше насихаттап келемін. Қазірде өзім жетекшілік ететін ансамблді құрғандағы негізгі мақсатым да сол болатын. Бұл бағытта әлі алда жоспарлар бар, сол арқылы жұмысымызды жалғастыра береміз.Таяуда Америкада өткен "ARTIVITIES seassons" Халықаралық көпжанрлы онлайн конкурс-фестиваліне өзімнің авторлық туындымды қосып, "Халықтық орындау" жанры бойынша І орынды иелендім. Әрине, өнердің ордасынан, тіпті облыс орталығынан шалғай жүрген мен үшін бұл күтпеген қуаныш болды. Алайда, жақсы туынды қашанда өз бағасын алады ғой. Бұл менің талантыма беріліп тұрған баға емес, қазақ өнеріне көрсетілген құрмет деп білемін. Ал орын алған шығармаға келер болсақ, "Талас" күйі аты айтып тұрғандай, сан ғасыр бойы қазақ халқының басынан өткізіп келе жатқан аумалы-төкпелі жаугершілік заманды, талас-тартыспен өткен өмірін суреттейді, &nbsp;– дейді Руслан ініміз.Бір кездері ұстазға шәкірт болып, республикалық "Бозторғай" шығармашылық конкурсының лауреаты, республикалық "Күй құдіреті" байқауының жүлдегері, делфильік ойындардың жеңімпазы және басқа да көптеген халықаралық байқаулардың жүлдегері атанған Руслан Бурабайдың өзі де қазір шәкірт тәрбиелеп жатыр. &nbsp;

Голливудта чемпион атанды 

Фото: Ақорда<a href="https://kyzylorda-news.kz/">Kyzylorda-news.kz</a>&nbsp; Мемлекет басшысы Қасым-Жомарт Тоқаев бұқаралық ақпарат құралдары қызметкерлерін мерекемен құттықтады. Бұл туралы Ақорданың баспасөз қызметі хабарлады.<blockquote>«Құрметті журналистер!Бұқаралық ақпарат құралдарының қызметкерлері!Сіздерді кәсіби мерекелеріңізбен құттықтаймын! Еліміздің бұқаралық ақпарат құралдары қоғам санасын жаңғыртып, ұлт тұтастығын нығайту жолында айрықша рөл атқарады. Баспасөз саласын дамыту, сондай-ақ журналистердің құқықтары мен заңды мүдделерін қорғау – мемлекеттің маңызды міндетінің бірі.Қазақ журналистикасының тағылымды тарихы, аға буын қалыптастырған ерекше қолтаңбасы бар. Біз оның бай шежіресі мен ағартушылық дәстүрін барынша сақтауымыз қажет. Бүгінгі ақпарат саласының өкілдері осы сабақтастықты лайықты жалғастырып, өзіне жүктелген жауапты миссияны абыроймен атқарып келеді.Сіздер қай кезде де халыққа шынайы әрі жедел хабар таратып, кәсіби біліктіліктің озық үлгісін көрсетіп жүрсіздер. Болашақта да елдік мәселелерді көтеріп, ұлттық құндылықтарды насихаттауға белсене атсалыса бересіздер деп сенемін. Баршаңызға бақ-береке, толағай табыс, шығармашылық шабыт тілеймін!», - деп жазылған Президент құттықтауында.</blockquote>

Мемлекет басшысы бұқаралық ақпарат құралдары қызметкерлерін мерекемен құттықтады

Астана мен Қазақстанның 15 облысында ауа райына байланысты ескерту жарияланды.Астанада күндіз найзағай жарқырап, бұршақ жаууы мүмкін.Қарағанды ​​облысында аптап ыстық болып, жоғары өрт қаупі сақталады.Шығыс Қазақстан облысында жел соғып, аптап ыстық болады, жоғары өрт қаупі сақталады.Атырау, Қостанай, Батыс Қазақстан облыстарында қатты жаңбыр жауады.Алматы, Маңғыстау, Солтүстік Қазақстан облыстарында, Жетісу облысында күн күркірейді.28 маусымда Ақмола облысында түнде батыста және оңтүстікте найзағай күтіледі, күндіз облыстың басым бөлігінде найзағай ойнап, бұршақ жаууы мүмкін, облыстың батысында, солтүстігінде және оңтүстігінде бұршақ жаууы мүмкін.Солтүстікте, батыста, Қызылорда облысының орталығында найзағай ойнап, шаңды дауыл соғады, солтүстікте, шығыста, Ақтөбе облысының орталығында нөсер жауын жауып, найзағай ойнайды, кей жерлерде күн күркірейді. Күндіз облыстың солтүстігінде нөсер жаңбыр жауады, солтүстікте, батыста, орталық аудандарда найзағай ойнап, бұршақ жаууы мүмкін.28 маусым күні Абай облысында солтүстік-шығыстан жел соғады, күндіз оңтүстікте, орталықта жел 15-20 м/с күшейеді. Семей: 28 маусымда күндіз ауа температурасы 37 градусқа көтеріледі. Өрт қаупі әлі де жоғары.Күндіз Ұлытау облысының солтүстігі мен шығысында найзағай ойнап, бұрқасын болады.Күндіз Түркістан облысының тауларында найзағай ойнап, солтүстікте шаңды дауыл соғады.

Ауа райына байланысты ескерту жарияланды

Жер сүдігерден өткеннен астықты қамбаға құямын дегенше есет батырлық Нұрбол Шәкірге тыным жоқ. Жас та болса өзіне бекітіліп берілген алқаптың жауапкершілігін мойнына алған диқанның өткен жылға өкпесі де жоқ. Себебі шаруашылық төрағасы былтырғы күзгі науқан қорытындысымен кейіпкерімізге темір тұлпар табыстаған болатын.Жалағаш ауданы Аламесек ауылдық округіндегі “Қарабура Ата-1” шаруа қожалығының еңбеккері бұл салаға аяқ басқанына көп болмаса да ұжымдағы білікті мамандардан үлкен тәжірибе жинаған. Былтыр гектарынан 70 центнерден астам өнім алған ол шаруашылық төрағасы тарапынан еңбектің жоғары бағаланып жатқанын айтады.&nbsp;– Бала күнімізде қыстық шөп ору үшін атыз басына баратынбыз. Ол кезде қарапайым күрішшілер бізге жай ғана маман болып көрінетін. Жалпы диқан қауымының мол өнім алуда қандай қиындыққа да қарсы тұратынын өзіміз салаға келгенде ғана түсіндік. Ала жаздай атыз жағалаған ағалардың берген ақылымен жас та болса өзімізді жұмысымызбен көрсетіп келеміз. Өткен жылға өкпе жоқ. Жер ана өзінің ырзық-несібесін молынан төкті. Жалпы жерді қалай күтіп баптасаң, соншалықты өнімге қол жеткізесің. Сондықтан біз ол жердің құнарын жоғалпау үшін нендей күтім керек, соның бәрін жасаймыз. Төрағаның артқан сенімін ақтап келемін. Былтыр күзгі науқанның қорытындысында темір тұлпар тақымдадым. Биыл көктемгі науқан басталып кетті. Енді осы жылы да бұйыртса мол өнімге қол жеткіземін, – дейді диқан.&nbsp;1994 жылғы Жалағаш ауданы Есет батыр ауылының тұрғыны шаруашылық ұжымы өзі секілді жас мамандармен толығып жатқанын айтады. Бұл бірінші кезекте саладағы сабақтастықты сақтап қалуға да оң әсерін тигізетінін жақсы біледі. Сондықтан алдыңғы буыннан өзі де көрген-білгенін, көкейге түйгенін дамытуға тырысып жүр. Себебі ертең бұлар да саладағы үлкен буынның орнын ауыстырғанда өзінен кейінгі жастарға көрген-білгенін үйретіп, Жер-Ананы күтіп-баптаудың қыр-сырына қанықтырады.Нұрбол Шәкіраттың сөзінше, шаруашылық төрағасы Дастан Ержанов жыл сайын ұжымды айлығынан бөлек қосымша сыйақымен сүйіншілейді екен. Мұндай ұжымның еңбегі бағаланған кез келген ортада еңбек өнімділігі өз жемісін берері анық. Осының нәтижесі болар, “Қарабура Ата-1” шаруа қожалығы жыл сайын қамбаға құйылатын астық көлемін еселеп жатыр.&nbsp;– Аламесекке күріш егемін деп келген шаруашылық төрағасы еңбеккерлердің жұмысын бағалауды бірінші кезекке қойды. Оны осы ұжымдағы барлық еңбеккерден сұрасаңыз да айтып береді. Сондықтан болар, келе салып ісіміз алға басты. Алдағы уақытта да жақсы көрсеткішке қол жеткізуге ұжым болып жұмыламыз, – дейді Нұрбол Шәкір.&nbsp;Айта кетейік, Дастан Ержанов төрағалық ететін шаруашылық еңбеккерлері 7 темір тұлпар тақымдады. Ал алдыңғы жылы тағы да бірнеше автокөлік тізгіндеген ұжым биыл да мол өнімнен үмітті. Төрағасы ұжымның еңбегін лайықты бағалайтын, осы бір сыйластыққа сызат түсірмеуді көздеген дала дарабоздарының алдағы науқанда да толайым табысқа қол жеткізуіне тілектеспіз.&nbsp;

70 центр өнім алған Нұрбол

Ауданның білім бәйгесінде мерейі асып, ҰБТ қорытындысымен бірнеше жыл қатарынан алдыңғы үштіктен көрінуі – ұлағатты ұстаздар еңбегінің жемісі. №202 орта мектептің көркем еңбек пәнінің мұғалімі Ермек Бүркітбаевтың та шәкірттері білім жолында ұстаз еңбегінің, ата-ананың үмітін ақтап жүр. Ермек Алпысбайұлы – оқыту әдістемесін жоғары деңгейде меңгерген, кәсіби біліктілігін арттырумен қатар талай жетістіктерге жетіп жүрген ұлағатты ұстаз.&nbsp;– Мұғалімнің негізгі мақсаты – оқушылардың шығармашылық қабілетін, өзіндік таным біліктілігін дамыта отырып, алған білімдерін өмірде қолдана білуге үйрету. Әрине оңай жұмыс емес. Алдыңа әр үйдің еркесі келгенде бәрінің назарын өзіңе аударып, сабаққа қызығушылығын арттыру үшін еңбектену қажет. Өз іс-тәжірибемде күн сайын білім берудегі жаңаша түрлі әдіс-тәсілдерді қолданып, оқушыларды оқу-танымдық, шығармашылық іс-әрекетке ынталандырып және әр оқушының нәтижеге жетуі үшін жағдайын жасаймын. Мұғалім деген ұлы мамандықты иеленіп, арқалап жүргеніме өзімді бақытты санаймын, – дейді ол.&nbsp;Ермек Алпысбайұлы – еңбек жолының 22 жылдан астам уақытын ұстаздыққа арнап, өзінің айшықты еңбегімен дараланған тағылымға толы өмір иесі. Ұлы мамандықтың қыр-сырына енді ғана қанығып келе жатқан жас мұғалімдер үшін өнеге. Жастайынан қолөнерге құштар болған ел ағасы ағаштан, темірден ою-өрнектер, қылқаламмен суреттер салуға машықтанады. Жан-жануарлардың, табиғаттың тылсым да, таңғажайып құбылыстарын көркемдеп, өзінің шығармашылық кеңістігіне терең бойлаған өнерлі азамат. Арманына қанат байлаған ол 1999 жылы кенттегі №202 орта мектепте ұстаздық жолын бастайды. Жан-жақты, ізденімпаз ұстаз мектеп тіршілігіне белсене араласып, мектепішілік, аудандық көрмелерге, байқауларға, іс-шараларға &nbsp;&nbsp;қатысып, талантымен көзге түскен. Ермектің қолынан шыққан суреттер мектеп қабырғасына көрік беріп, ерекше әдемілік сыйлап тұрады. Ермек Алпысбайұлының педагогика саласындағы көп жылдық қызметі мен &nbsp;жетістіктері бағаланып келеді, ұстазының мерейін асырған, сантүрлі бәйгелерден оза шапқан шәкірттерінің жетістіктері жетерлік, &nbsp;өзі де көптеген облыстық &nbsp;дәрежедегі марапатқа ие болды. Ұжымдастары Е.Бүркітбаев &nbsp;жайында «Мұғалім болып жұмыс жасағалы ол өзін білікті маман, тәжірибелі ұстаз ретінде көрсете білді. Еңбек пәнінен мектепте оқушылар арасында түрлі шараларды ұйымдастырып, &nbsp;үнемі ізденіс үстінде жүреді. Жас мамандарға әдістемелік бағыт-бағдар беруде аянбайды. Оқушыларды оқыту мен тәрбиелеуде ұстаздық кәсіби шеберлігі мен ұйымдастырушылық қабілетін жоғары бағалаймыз» дейді.&nbsp;Бүгінде білікті ұстаз – өзі сабақ беретін көркем еңбек пәнін терең меңгерген, теориялық білімін күнделікті әрбір сабағында іске асырып, тәрбие мен білімді қатар ұштастырып отырған, шәкірттерін биіктерден көрсетіп жүрген маман. &nbsp;Өнердің қыр-сырын жете түсінген &nbsp;Ермек Бүркітбаев мектепте өнерлі ұстаз ретінде танылса, облыс көлемінде оқушылары талай рет марапат төрінен көрінді. &nbsp;Мәселен, шәкірті Ақбота Рахымбек жалпы білім беру ұйымдарының 5-7 сынып оқушылары арасында өткен «Мен – елімнің ертеңімін» атты облыстық сурет байқауында І орын, 1-4 сынып оқушылары арасында қашықтан «Ата Заңым – алтын қазығым!» атты облыстық сурет байқауының аудандық кезеңінде 3 сынып оқушысы Ерғазы Дарын &nbsp;І орын, «Шеберлер қаласы: ата-бабамыздың мұрасын сақтаймыз және дамытамыз» атты өлкетану сәндік-қолданбалы республикалық шығармашылық көрмесінің аудандық кезеңінде «Ұлттық колориті бар интерьердің ерекше дизайн-жобасы» бағыты бойынша оқушылары Жұбандық Әбілбеков пен Әсет Әлішер І орын иеленіп, облыстық кезеңде ІІ орын алған. Ал осы байқауда оқушысы Елшібек Ұлан &nbsp;ІІ орын иеленсе, «Ұлы өнертапқыштыққа алғашқы қадам» атты инновациялық идеялар аудандық байқауында &nbsp;жүлделі І орынға лайық деп танылды.&nbsp;Бұл іргелі білім ошағының мерейін асырып жүрген оқушылардың бірнешеуі ғана. Жалпы азаматын ардақтап, өткеніне құрметпен қарайтын Жалағашта талантты, талапты үздіктер баршылық. Ал ұдайы игі шаралар мен жарқын істердің жанынан табылған кейіпкеріміз, ұлағатты ұстаздың тағылымға толы өмірі мен еңбек жолы өскелең ұрпаққа үлгі боларлықтай. Талмай еңбек ету мен ізденістің арқасында өз еңбегінің жемісін көріп отырған Ермек Алпысбайұлының шығармашылық еңбек жолына шалқар шабыт пен табыс тілейміз.

Мерейі үстем мұғалім 

<a href="https://kyzylorda-news.kz/">Kyzylorda-news.kz</a> Ғалымдар&nbsp;айтпақшы, «мұғалім&nbsp;–&nbsp;өзінің&nbsp;білімін&nbsp;үздіксіз&nbsp;көтеріп&nbsp;отырғанда&nbsp;ғана&nbsp;мұғалім,&nbsp;ал&nbsp;оқуды,&nbsp;ізденуді&nbsp;тоқтатқанда&nbsp;оның&nbsp;мұғалімдігі&nbsp;де&nbsp;жойылады»&nbsp;деген.&nbsp;Аталған білім ошағындағы қазақ тілі мен әдебиеті пәнінің мұғалімі Марина Жақсылықова – бәсекеге қабілетті тұлға қалыптастыруда қажырлы еңбек етіп жүрген ұстаздардың бірі.&nbsp;– Қазіргі заманғы білім беру жүйесінің негізгі мақсаты – бәсекеге қабілетті маман дайындау. Мектеп оқу-білімге үйрететін орта болса, оның жүрегі – мұғалім. Білікті, білімді, ұлағатты ұстаз атану, осы қасиетті ұғымды қастерлеп, қадір тұту, арындай таза ұстау әр мұғалімнің борышы деп білемін. Ізденімпаз мұғалімнің шығармашылығындағы ерекше тұс – оның сабақты түрлендіріп, тұлғаның жүрегіне жол таба білуінде. Білім &nbsp;берудегі &nbsp;мен &nbsp;таңдаған &nbsp;педагогикалық &nbsp;&nbsp;ұстанымның &nbsp;негізгі &nbsp;мәні – оқушылардың &nbsp;ой-өрісін &nbsp;жан-жақты &nbsp;дамыту, &nbsp;оларға &nbsp;қазіргі &nbsp;заман &nbsp;талабына &nbsp;сай &nbsp;білім &nbsp;беру &nbsp;және &nbsp;тәрбиелеу. Оқушыны &nbsp;жан-жақты дамыту дегеніміз, баланың жан дүниесін, рухани &nbsp;өсуін, &nbsp;қабілеті &nbsp;мен &nbsp;дарынының &nbsp;өрістеуі, &nbsp;парасатты &nbsp;ой &nbsp;мен &nbsp;адамгершілік &nbsp;көзқарасының &nbsp;қалыптасуы &nbsp;деген сөз. &nbsp;Қазіргі &nbsp;таңда оң нәтижеге &nbsp;бағыттап &nbsp;білім &nbsp;беруге &nbsp;байланысты &nbsp;оқытудың &nbsp;әдісі, &nbsp;тәсілі &nbsp;және &nbsp;формалары &nbsp;тиімді &nbsp;және &nbsp;оқушының &nbsp;жас &nbsp;ерекшелігінің &nbsp;&nbsp;мүмкіндіктерін &nbsp;ескере &nbsp;отырып &nbsp;жүргізілуі &nbsp;қажет. &nbsp;Бұл &nbsp;жағдайда &nbsp;оқыту &nbsp;үрдісінде &nbsp;жаңа &nbsp;педагогикалық &nbsp;технологияларды &nbsp;тиімді &nbsp;пайдалану &nbsp;және &nbsp;құзыреттілікке &nbsp;бағыттау &nbsp;уақыт &nbsp;талабына &nbsp;айналып &nbsp;отыр.&nbsp;Мен бүгінгі таңда білім беру саласында 25 жылдай еңбек етіп келемін. Күн сайын алдымда отырған шәкірттеріме зер сала қараймын. Алға үмітпен талпынған олардың алдында менің де ұстаз ретінде үлкен жауапкершілігім бар екенін іштей сезінемін. Сондықтан менің өзіме қояр талабым, алдыма қойған мақсатым жоғары болуы тиіс, өйткені сол жарқыраған шамшырақты дер кезінде байқап, дер кезінде жаға білу – менің ұстаздық парызым. Сыныптағы балалардың бірі зерек те алғыр, бірі енжар, бірі баяу, бірі тым пысық. Ал менің бәріне беретін білімімнің мазмұны мен қоятын талабым бірдей де, олардың мұны қабылдауы түрліше, – деген ұстаз осы салаға келгеніне еш өкінбейтінін, керісінше еліміздің келешек абыройлы азаматтарын тәрбиелеу зор мақтаныш екенін айтады.Марина Жақсылықовамен тілдескенде өзі айтқандай мамандығына деген ерекше ықыласын, сүйіспеншілігін байқамау мүмкін емес. Ол жаңашыл ұстаз ретінде заман ағымына сай шәкірттерін жан-жақты дамыған, өмірге реалистік тұрғыдан қарайтын, терең біліммен қаруланған тұлға ретінде қалыптастыруды көздейді.&nbsp;Ұстаздың саладағы жетістіктері де аз емес. Ұстаздық еңбек жолында А.Байтұрсынұлы атындағы республикалық педагогикалық шығармашылық олимпиадасында ІІІ орынмен, білім беру саласында жас жеткіншектердің тәрбиесі мен кемел келешегіне ықпал етіп, сапалы білім, саналы тәрбие берудегі еңбегі үшін «Құрмет» грамотамен, &nbsp;Халықаралық білім мен педагогикалық шеберлікті арттыру алаңында республикалық «Тіл дүлділі» олимпиадасына шәкірт дайындағаны үшін, Абай Құнанбайұлының 175 жылдығына орай «Асыл сөзді іздесең, Абайды оқы, ерінбе!» атты республикалық онлайн эссе байқауына оқушы дайындағаны үшін, І республикалық «Абай жаққан бір сәуле» атты А.Құнанбайұлының қара сөздеріндегі афоризмдерді талдау олимпиадасында, «AL-FARABY» білім қолдау орталығының ұйымдастыруымен өткен Абай Құнанбайұлының 175 жылдығына орай республикалық «Абай жолы» атты жас көркемсөз оқу шеберлерінің арасындағы сайысқа шәкірт дайындағаны үшін алғыс хатпен марапатталса, «Рухани жаңғыру» ақпараттық-сараптамалық орталығы, «UlY DALA USTAZY», «Үздік автор – 2020» атты республикалық ғылыми практикалық конференцияда «Үздік мақала» номинациясы бойынша І дәрежелі дипломды, «Үздік тіл маманы – 2019 &nbsp;облыстық байқауында ІІ дәрежелі дипломды, Қазақстан Республикасы Білім және ғылым министрлігі «Дарын» республикалық &nbsp;ғылыми практикалық орталығы өзге ұлт өкілдерінің «Тіл – мемлекет тәуелсіздігінің символы» атты ХІІІ республикалық қашықтық олимпиадасында &nbsp;жеңімпаз бен жүлдегер дайындағаны үшін арнайы грамотаны иеленген.&nbsp;«Қазақ тілі мен әдебиеті – баланың жүрегіне бойлай еніп, оның рухани өрісін болжай алатын пән. Қазақ тілі мен әдебиетін оқытудағы мақсатым – бала қиялын қияға өрлетер ғажайып ертегілер, шыншыл да сыншыл аңыз-әңгімелер, ерлікті дәріптеген батырлар жыры, шынайы махаббатты мұрат еткен әсерлі ғашықтық жырлар, өткір де өміршең шешендік сөздер арқылы халқымыздың рухани құндылықтарын бойына сіңірген, ертеңгі еліміздің тізгінін ұстайтын жас жеткіншекті тәрбиелеу. Әрине шәкірттерім әдеби шығармаларды оқу арқылы халқының арманы мен қиялын, өткені мен бүгінгі өмірін таниды. Сүйікті кейіпкерлердің арасындағы достығы мен сүйіспеншілігінен, патриоттығы мен еңбеккорлығынан, адалдығы мен адамгершілік қасиеттерінен үлгі алып, жақсысына жаны сүйсініп, жаманынан жиреніп, өзінше ой түйіп, жан-жақты іздене біледі» деген мектеп мұғалімінің шынайы жүрегінен шыққан тәлімді сөздері мен жауапкершілік жүгінің ауыр екенін сезінген ұстаздық болмысына қайран қалып, еріксіз басыңды иесің.

Мұғалім – өзінің білімін үздіксіз көтеріп отырғанда ғана мұғалім

<a href="https://kyzylorda-news.kz/">Kyzylorda-news.kz</a> Кәсіптің түрі көп. Нарық бізді түрлі кәсіпті меңгеруге мәжбүр қылды. Тек кәсібің адал, жұмысың сапалы болса болғаны. Мемлекетке қол жаймай, өз қаржысын салып, кәсібін айналдырып отырғандар ауданда аз емес. Солардың бірі – Қанат Адамбаев. Қанат ағамыздың бірнеше жылдан бері жасап келе жатқан кәсібі қазаққа жат емес. Ата-бабамыздан келе жатқан ұсталық өнер. Бабаларымыздың ежелгі көлігі арбадан бастап, қазіргі автокөліктерді қозғалысқа түсіріп, адамзат өркениетінің бастауы болып табылатын дөңгелек ең алғаш біздің қазақ даласында жасалды. Содан бері халқымыздың тұрмыстық тілінде «шебер», «ұста», «зергер» деген сөздер пайда болып және ол күні бүгінге дейін біздің күнделікті тұрмысымызда маңызын жоймай келеді. Кешеге дейін халық арасында көрік басып, темірден түйін түйген, ағаштан ою ойған ұсталар, алтын, күмістен әшекей бұйымдар жасаған зергерлер болды. Тіпті еліміз тәуелсіздік алғанға дейін әрбір ауылда темір, ағаш ұсталары бар еді. Ауыл тұрғындарының дені базар жағаламай, тұрмысқа қажетті заттарын сол ұсталарға тапсырыс беріп жасататын. Сол ұсталар соққан темір, ағаш бұйымдарды кейбір үйлер әлі тұтынып келе жатыр.Қанат ағамыз да ағаш ұстасы. Өзінің жаратылысындағы алғырлық пен еңбекқорлық және әкенің тәрбиесімен бойына сіңірген ұқыптылық, ыждағаттылық, сабырлы мінез Қанат ағамыздың әрбір жұмысына береке үйіріп отыр. Өзі айтқандай, кәсіп иесінің ең бірінші ұстанымы – тек пайда табу емес, жұртқа адал қызмет көрсету. Шебердің қолы – алтын. Оның қолынан шыққан жиһаздар қазірде аудандағы әрбір тұрғынның үйінде бар.&nbsp;Қанат Адамбаев өз кәсібін осыдан он бес жыл бұрын бастаған. Алғашында ағаштан қолжуғыш, кішкене орындықтар жасап бастаған Қанат ол қазірде үй ішіне қажетті барлық жиһазды жасай береді. Алдын ала тапсырыс берушілер де көп екен. Тұтынушылар қазір қай заттың да сапасына мән беретін болған. Қанат ағамыздың қолынан шыққан дүниелердің барлығы да сапалы әрі сәнді.&nbsp;– &nbsp;Қазір нарық талабына қарай еңбек етіп, отбасын асырап, одан артылса кәсібін кеңейтіп, бірнеше адамды тұрақты жұмыспен қамтып отырғандардың қатары артып келеді. Біз бұған қуануымыз керек. Кәсіппен айналысамын деген ынталыларға мемлекет тарапынан түрлі бағдарламалар арқылы қолдау да көрсетіліп келеді. Тек істің көзін тауып, еңбек ету керек. Еңбек ақы, маңдай термен тапқан ақшада береке бар. Әкеміз жастайымыздан бізді адал еңбекке, түрлі кәсіпке үйретті. Мал, егін шаруашылығында жүрсе де, үйдегі басқа да шаруаларды істегенде қасынан тастамайтын. Сол жұмыстың қыр-сырына қанықтырып, бейімдейтін.&nbsp;Қазір отбасылық жеке кәсібім бар. Мықты ұста болсаң да, құрал-саймансыз ештеңе істей алмайсың. Жұмысың өнбейді. Сондықтан үйден шағын цех аштым. Тапсырыспен де, тапсырыстан бөлек те түрлі ағаштан жиһаздар жасаймын. Қазір халықтың жағдайы кешегі өтпелі кезеңдермен салыстырғанда әлдеқайда жақсы. Оның бір ғана дәлелі – бүгінде осы аудан орталығындағы ескі үйлердің жетпіс пайызы жаңаланды. Тұрғындар қалтасындағы қаражатына көлеміне қарай жаңа үлгімен үй салып жатыр. Жаңа тұрмыс жағдайына сәйкес жаңа үлгіде жасалған жиһаз керек. Кейбір тұтынушылар түгелдей бір үйдің жасауына тапсырыс береді. Әр бөлменің өз ерекшеліктеріне лайықтап қажетті жиһаздар жасап беремін. Жиһаздың негізгі шикізаты – ағаш. Ағаштарды және жасайтын жиһазыма қажетті басқа да бөлшектерді Қызылорда қаласынан алдырамын. Жасаған дүниеміздің сапасы оның ағашына да байланысты. Мәселен, қарағай қатты болғандықтан оның кепілдік мерзімі де ұзақ болады. Бірақ тапсырыс берушімен келісілген бағамыз қалтаға салмақ салмайды. Келешекте кәсібімді кеңейтпек ойым бар, – дейді кәсіпкер.&nbsp;Расында ұстаның қолына түскен ағаштың бір жапырақ жаңқасының өзі кәдеге жарап жатады. Қанат ағамыздың үйіндегі ағаштан жасалған бұйымдардың барлығы да былайғы күндері аяқтың астында жататын қалдық ағаштардан жасалған. Қазір әрқайсысының атқаратын өз қызметі бар. Отыруға жайлы, арқалы орындық, піспегі келіскен күбі, нан жаятын тақтай мен оқтау және сол сияқты тағы да басқа күнделікті қолданатын, тұрмысымызға қажетті заттар үй иесінің қолынан шыққан.Иә, "Еңбек ет те, міндет ет" дейді халқымыз. Кәсіптің қай түрі де оңай емес. Соның ішінде халқымыз дәріптеп келе жатқан ұсталық тек кәсіп қана емес, ол – кез келген адамның бойында кездесе бермейтін үлкен өнер. Бірақ бұл өнерді кәсіпке айналдырмау керек деген сөз емес. Қол еңбегі де, ой еңбегі иесіне және қоғамға пайда әкелуі керек. Әсіресе нарық талабында қолөнер шеберлерінің еңбегі бағалануы тиіс. Осы тұрғыдан алғанда Қанат Адамбаевтың қолынан шыққан сапасы мен сәні үйлескен дүниелерге деген сұраныс жоғары.&nbsp;

Ұсталық өнерді ұстанған 

<a href="https://kyzylorda-news.kz/">Kyzylorda-news.kz</a> Қазіргідей өркениетке өрлеген заманда кәсіпкерлікте де бәсекелестік орта қалыптасып үлгерді. Әсіресе бұл жөнінен нәзікжандылардың сұранысына ие болған &nbsp;сән салондарының жұлдызы оңынан туып, қала ғана емес, аудандарда да олардың саны артты. Қазір салтанатты басқосуларға барғанда, тіпті күнделікті жұмыс уақытында да өздерінің бет әлпетін әрілеуге ынта білдіретін аруларға қарап шындығында көз тояды. &nbsp;Әдемілік қашанда әйел затына &nbsp;ажарына ажар қосып, нұрландырып жібереді. Ал бәсекелестік тұтынушылар үшін де, кәсіп иесі үшін де өте тиімді. Себебі кәсіпкер өз ісінің шебері болу үшін &nbsp;сән үлгісінің жаңа түрлерін игеруге талпынып, өз тұтынушысының көңілінен шығуды қалайды. Ал тұтынушы өзінің көңілі қалағандай &nbsp;сапалы қызметке қол жеткізуге мүмкіндік алады. &nbsp;Әдемілік әлемінің падишасы саналатын нәзікжандылардың көңілінен шығу білімін шыңдаған, іскерлігін дәлелдеген шеберлердің қолынан келетін кәсіби жұмыс.&nbsp;Міне, ашылғанына төрт жарым жыл болды. Қазірде көпшіліктің ықыласына бөленіп, талғамы мен талабына сай қызмет көрсетіп жүрген «Әсел Берікқызы» сән салоны әйелдер қауымының құрметіне ие болып үлгерді. Сән орталығын ашқан Әсел Берікқызының айтуынша, ол бұған дейін көптеген тәжірибелі мамандардан дәріс алып, алған тәлімін өзі баулыған сәнгерлерге үйретіп келеді. Мемлекеттік бағдарлама арқылы үстемақысы жеңілдетілген несие алған Әсел кәсіп көзін кеңейтіп, бүгінде 7 адамды жұмыспен қамтып отыр.&nbsp;–&nbsp;Менің ойымша кез келген адам өз мақсатына жету үшін қажымай-талмай еңбектену керек. Жыл сайын сән әлемінде таңғажайып жаңалықтар болып жатыр. Соларды ғаламтордан үнемі бақылап отырамын. &nbsp;Сосын біртіндеп тәжірибемізге енгіземіз. Сән әлемінің құпиясы мол. Сол құпияны ашып, нәзікжандылардың бет әлпетін әрілеп, бүкіл сұлулығын ашуға тырысамыз. Санитарлық талаптарға қатты мән беремін. Әр тұтынушымен жұмыс жасағанда оның денсаулығына кінарат келмеуі тиіс. Менің қарамағымдағы қыздар бұл жөнінен бесаспап. Бетті әрілеу, қастың пішімін өзгерту, шаштың түрлі үлгісін жасау, тырнақты сан түрлі нақышпен әдемілеу &nbsp;біздің шебер қыздардың күнделікті кәсібіне айналған. Оларды түрлі курстарға оқуға жіберіп, жаңа қырынан танылуына жағдай жасаймын. Бірінші ашылғанда 4 қызбен бастаған болатынмын. Қатарымызға 3 қыз қосылды. Бұл біздің жұмысымыздың алға басып келе жатқаны деп ойлаймын. Тұтынушылардың талғамы өсіп келеді. Соған лайық мінсіз қызмет жасауға дайынбыз, – дейді салон иесі.«Әдемілік әлемді құтқарады» деген керемет сөз бар. Табиғаттың шебер туындысы гүлге теңескен әйелдердің ажарына нәр берген сұлулық салонының жұмысы сәтті болсын деп тілейік. Ал ажарына ақылы сай аруларымыздың нұр жүзінен әркез күміс күлкі төгіліп тұрсын.

Әсел Берікқызы: Сән әлемінің құпиясы мол

<a href="https://kyzylorda-news.kz/">Kyzylorda-news.kz</a> Қазақта «Түсі игіден түңілме» деген керемет сөз бар. &nbsp;Жүзі жылышырайлы, мейірімге толы жанарынан шуақ шашылып тұратын жандарды көргенде адамның құлазып тұрған жан дүниесі лезде жадырап сала беретін сәттер болады. Ал ол адам жанының арашасы дәрігер болса, тіпті керемет! Бүгін де сондай арайлы сәтті бастан кешірдім. &nbsp;Бұл кісімен дидарласудың себебі де бар. &nbsp;Балалары туғаннан мүгедек бірнеше ата-ана маған осы дәрігер жайлы мақала жазуды өтініп хабарласқан еді. &nbsp;Тағдырдың тауқыметін көріп, балаларының болашағы үшін алаңдаған жандардың алғысын арқалаған ақ халатты жанмен жүздесудің сәті түскеніне мен де қуандым. &nbsp;Күндегі тынымсыз қоңыраулар, шақыртулар, тапсырмалар толастады ау деген кезде ел сүйіктісіне айналған дәрігердің жұмыс кабинетіне кірдім. Өзімнің келген шаруамды айтқан кезде ол кісі сәл ойланып қалды. «Мен өз қызметімді жария етіп, мақтануды қаламаймын. Менің жаным қарапайымдылықты қалайды. Дәрігердің міндеті – науқастың тән жарасын да, жан жарасын да емдеу. Бұл – өзім бала күннен сүйген мамандығым. Сондықтан бүкіл өмірімді осы салаға арнадым» деп &nbsp;өзінің көкейіндегі ойын бүкпесіз айта жөнелді.&nbsp;Бір кезде қалта телефоны безектей жөнелді. Хабарласқан Жаңабек деген 1 сынып оқушысының анасы екен. Оның баласының көзі көрмей қалып, дәрігер оны Оренбургке квотамен ота жасауға жіберген екен. Сол баланың бір көзі көргенін айтып, ата-анасы ақжолтай қуанышпен хабарласып жатыр. &nbsp;Дәрігердің жүзіне қан жүгіріп, нұрлана түсті. «Міне, осындай жақсы хабарлар – мен үшін жеңіс! Ауруларға берілмейміз, жеңілмейміз. Бірге ерінбей күресеміз! Науқас балалары бар ата-аналарға менің берер басты кеңесім осы. Дәрігер кеңесін мүлтіксіз орындаған ата-ананың баласы сауығып кетіп жатыр. Күреспесе, мүгедек болып арбаға отырып жатыр. Денсаулықтың бәрі адамның өз қолында. Ерінбеу керек. Мезгілінде қимылдап, сауықтыру орындарына бару керек. Мен барлық науқасқа осындай талап қоямын, оны аяқсыз қалдырмай, қадағалаймын. Оның қорытындысын өзім есепке аламын. Өз жұмысымнан ләззат аламын. Әр сауыққан ана, ем жүрген бала – менің жеңісім, менің абыройым» дейді дәрігер.&nbsp;Шынында адам жанына араша түсіп отырған дәрігердің сөзінің жаны бар. Ол өзінің сан қилы жауапты жұмысының арасында уақыт тауып, балалары түрлі дертке шалдығып, мүгедек болып қалған ата-аналарға өзі хабарласып, халін сұрап, шипажайларға жолдама келсе, оларды шақырып, перзентін дереу сонда апаруға кеңес береді. Кеңес беріп қана қоймай, оларға аналық ақылын айтып, дертін асқындырмаудың алғы мүмкіндігін пайдалануды тапсырады. Бір сөзбен айтқанда, науқас бала үшін ата-анамен бірге шыр-пыры шығып, баланың оңалуына, дертпен күресуге қолдау көрсетеді. &nbsp;Нағыз өз ісінің білгірі, білікті дәрігер, біздің бүгінгі кейіпкеріміз Алмагүл Қаскенқызы Сүлекеева &nbsp;– жүрегі таза &nbsp;ақ халатты абзал жан. Ол Семей мемлекеттік медицина университетінің балалар дәрігері бөлімін бітірген. &nbsp;Семей облысы Абай ауданының &nbsp;тумасы. Еңбек жолын Қызылорда облысындағы балалар ауруханасының дәрігері болып бастаған. Мұнан соң Жалағаш аудандық перзентханасында, &nbsp;Бұқарбай батыр ауылында бала дәрігері болған. Әр жылдары &nbsp;дәрігер-реаниматор, дәрігер-инфекционист қызметінде болды. &nbsp;1998 жылдың маусымынан бері Жалағаш аудандық ауруханасы бас дәрігерінің ана мен бала жөніндегі орынбасары қызметін абыроймен атқарып келеді. 23 жыл басшылық қызметте жүргенмен өзінің қым-қуыт жұмысының арасында Алматыдағы тренерлердің халықаралық курсына қатысып, 48 дәрігер, 52 фельдшерге дәріс берген. Медицина саласындағы балалар науқасына қатысты зерттеу мақалалары газет-журналдарға жарияланған. Әр кезде алған марапаттары – дәрігердің ерен еңбегінің нәтижесі. Оның «Денсаулық саласының үздігі», «Денсаулық саласына қосқан үлесі үшін» төсбелгісі кеудесінде жарқырап тұр.&nbsp;Әсіресе дәрігердің еңбегінің қайтарымы ол дертке ұшыраған ата-ананың алғысы мен ыстық ықыласы болса керек. Осы орайда аудан тұрғыны Сәбит Қайранбаев ақ халатты абзал жанға өз алғысын жеткізді.– Менің ұлым Бердәулет Қайранбаев туғаннан сал ауруымен науқастанды. Біздің білгеніміз бұл науқастың салдары өте ауыр екен. Алайда бізге Алма Қаскенқызының қамқорлығының арқасында дертті жеңбесек те, алдын алып, арбада отырып қалмауына күш салдық. Дәрігер бізге үнемі хабарласып, баламыздың жағдайын сұрап, түрлі шипажайға, санаторийлерге жолдама беріп, жанашырлықпен қол ұшын созды. Дәрігер қадағаламағанда Алла сақтасын, дерт дендеп, ауыр жағдайға түсер едік. Ол кісіге Алла риза болсын!, – дейді ол.&nbsp;Өз кәсібіңді сүю, адал қызметің арқылы халықтың батасын алу &nbsp;– қай мамандық иесі үшін де үлкен бақыт. Ал бақыт – адамның табан ет, маңдай терімен келетін, оңай уысыңа түспейтін киелі ұғым. Бүгінгі кейіпкеріміз адам жанының шипагері Алма Қаскенқызы – өзіне де, өзгеге де бақыт сыйлаған аяулы жан, алтын жүректі дәрігер.

 Алғыс арқалаған абзал жан

<a href="https://kyzylorda-news.kz/">Kyzylorda-news.kz</a> Еңбекте соңғы жылдары кәсіпкерлік саласы алға басып, жергілікті тұрғындардың мемлекеттік бағдарламаны тиімді пайдалануға ынтасы артып келеді. Бірі қайтарымсыз грантпен тігін цехын ашуға бел буса, енді бірі кондитерлік өнім өндіруге талаптанып отыр. Олардың алды бүгінде бастаған ісінің жемісін көре бастады. Ал 1997 жылдан бері мал шаруашылығын дамытуға бел буған бейбітшілік толыбаев биыл тағы мемлекеттік бағдарламамен несие алып, мал басын асылдандыру ісін қолға ала бастады.1997 жылы “Боранбай” шаруа қожалығын құрған кейіпкеріміз бүгінде қорадағы ірі қара санын жүзден асырған. Осыған дейін асыл тұқымды ақбас бұқалар мен жергілікті сиырлар сатып алған төраға бүгінде 4-5 адамды жұмыспен қамтып отыр. Алдағы уақытта ешқандай шатысы жоқ, тек асыл тұқымды ірі қара басын көбейтуді көздеген кейіпкеріміз мемлекеттік бағдарламаның арқасында пайыздық үстемақысы төмен 15 млн теңгеге қол жеткізіпті. Бұйыртса, аққошқарлық кәсіпкер Арал ауданынан асыл тұқымды мал алып келуге жолға шыққалы отырғанын айтады.– Мал шаруашылығымен айналысып келе жатқаныма 25 жылдай уақыт болыпты. Тәуелсіздіктің алғашқы жылдарында малдың өзі де, еті де арзан болатын. Алайда болашақта оның өнімінің өтімді боларына сеніп, шаруашылық құруға бел будым. Қазір жаман емес, бастаған ісімнің жемісін көріп келемін. Қазір төрт түліктің өзінің де, етінің де нарықтағы бағасы қымбат. “Баға неге шарықтап барады?” деп байбалам салудың қажеті жоқ. Себебі бүгінде ауылда отырып, қорада мал ұстауға құлқы жоқтар да бар. Тіпті ауылдық жерде отырып, нан сатып алатындарды көріп таң қалған кездер де болды. Мал бағу оңай шаруа емес. Оны шаруашылық құрып, мал бордақылап отырғандар жақсы біледі. Себебі бүгінде мал азығы да жиі қымбаттап жатыр, нарыққа ілесу керек, – дейді кәсіпкер.&nbsp;Бейбітшілік ағамыз ата кәсіпті қолға алғалы оның бабын жасаудың да қыр-сырына әбден қаныққан. Сыртынан қараған жанға үйіп-төгіп азығын алдына қойсаң, төрт түліктің кез келгені етті мол беретін сияқты. Алайда әр үй жануарының күтімін жасаудың өзіндік әдісі бар. Мәселен, сиырдың таңғы азығын мол беріп, түсте жемдеудің аса қажеті жоқ екен. Ал кешкі азығын таңмен бірдей салу керек. Сонда ғана бағымдағы мал ерте қоң жинап, иесін шығынға батырмайтын көрінеді. Түскі азығын аз салмасаң, ірі қараның күтімінде қателікке бой алдырдым дей беріңіз.&nbsp;Жалпы екеуара әңгіме барысында шаруашылық төрағасының расында малды күтіп-баптаудың барлық әдісін меңгергенін аңғардық. Ағамыз бірақ мұнымен шектелгісі жоқ, алдағы уақытта әлі де сырттан асыл тұқымды ірі қара алып келіп, олардың санын еселеу Бейбітшіліктің күн тәртібінде тұр екен.&nbsp;– Бұрын тек сырттан асыл тұқымды ақбас бұқалар алып келіп, жергілікті сиырлармен будандастыру арқылы олардың санында өсім қалыптастырғанмын. Енді аналық сиырды да, бұқаны да таза асыл тұқымды мал асырап отырған шаруашылықтардан алып, олардың санын көбейтемін. Мұндай жетістікке қол жеткізу бағы тәуелсіздіктің арқасында бұйырып отыр. Себебі кәсіпкерлікті қолдауға арналған мемлекеттік бағдарламалар ел егемендік алғаннан кейін ғана қолға алынды. Оның жемісін бүгінде халық көріп отыр және солардың қатарында мен де бармын. Жалпы төрт түлік жесең азық, ішсең сусын, мінсең көлік. Оның пайдасын ата-бабамыз бұрын байқаса, біз енді біліп жатырмыз. мұндай шаруашылықтардың көп болғаны халық үшін де, мемлекет үшін де тиімді. Бұйыртса, жақында Арал ауданынан асыл тұқымды мал алып келемін. Мал басында өсім қалыптасса, жұмыс орындарын да көбейтуді көздеп отырмын, – дейді іскер азамат.&nbsp;Аққошқарлық кәсіпкер үшін мал азығы да биыл аса мәселе болмайды. Себебі төраға 300 гектар жайылымдық жерінің 50 гектарын жоңышқа егуге дайындап қойған. Биыл жоңышқа өсіру ісін бастап та кетті. Қажетті техникаларын да жарақтап қойған. Өзі бала-шағасымен облыс орталығында тұрғанымен бақташылар мұнда төрағаның орнын жоқтатпайды. Себебі уақытылы айлығын алып отыр.&nbsp;Құрылғанына 25 жылға жуық уақыт болған “Боранбай” шаруа қожалығының бүгінде шаруасы ширақ. Себебі мына ыстықта шаруашылықтардың көбісі мал бордақылауды күзге дейін тоқтатады екен. Жылдың төрт мезгілінде де тұтынушыларын өз өнімімен қамтамасыз етіп отырған Бейбітшілік ағамыз бүгінде сиыр етіне сұраныстың артқаны мал шаруашылығын қолға алған кәсіпкерлер үшін тиімді болып отырғанын жасырмайды.&nbsp;

Ата кәсіпті қолға алған

<a href="https://kyzylorda-news.kz/">Kyzylorda-news.kz</a> Музей – өткен тарихтан сыр шертетін жәдігерлердің құтты мекені. Сан ғасырға куә болған осынау құндылықтардың қасиетті ордасы кім-кімді болсын өзіне баурап алып, көне дәуірлер қойнауына бірге саяхаттауға шақырады. Осындай өзінің тартымды дүниелерімен қалың көрерменнің көзайымына айналған мәдени орын – жалағаш аудандық тарихи-өлкетану музейі. &nbsp;&nbsp;Тарихы 1985-ші жылдардан басталғанымен музей қазынасында талай тарихи дүниелер қатталып тұрғанын көрдік. &nbsp;Осы бір ғажап әлемнің құпиясын білмек ниетпен аудандық тарихи-өлкетану музейінің меңгерушісі ғалымжан құлымбайдан осынау &nbsp;ел үшін, &nbsp;болашақ ұрпақ үшін құнды дүниелер сақталған қастерлі мекеннің тарихы және ондағы ел назарына қойылған жәдігерлер туралы мазмұнды әңгіме айтуын сұрадық.– Ғалымжан Жалғасұлы, өзіңіз басқарып отырған аудандық музейдің қалыптасу &nbsp;тарихы мен ондағы құнды жәдігерлерге шолу жасап өтсеңіз...&nbsp;– &nbsp;Шынында өткен әр күніміз кейін тарих болып, ғасырлар шежіресінде сақталып қалатыны шындық. Соның ішінде біздің қасиетті орында ескіден жеткен мұралардың бір парасы халықтың, әсіресе кейінгі ұрпақтың көзайымына айналып жатса, онда біздің музей қызметкерлерінің еңбегінің қайтқаны деп есептеймін. Ал музейдің ашылуы ауданның бетке ұстар азаматтары &nbsp;З.Салықбаев, М.Ілиясов, М.Аяпов, Ж.Сарбалаев, А.Тілеулиевтердің ықпалымен басталғанын айта кету орынды. Осылайша 1988 жылдың 30 шілдесінде Жалағаш аудандық халық депутаттары аудандық Кеңесі атқару комитетінің №373 санды қаулысы шыққан. Онда аудандық мәдениет үйі жанынан музей ашып, оған жауапты бір қызметкер бекітіліп, сол жылы ауданның елді мекендерінен &nbsp;көптеген құнды жәдігерлерді жинақтау жұмысы басталыпты.Соғыс ардагері Орынбай Сарманов пен сол кездегі аудандық «Жаңадария» газетінің әдеби қызметкері Ахмет Тілеулиев елді мекендерге, Қарақұм мен Қызылқұм бағытына экспедицияға шығып, түрлі жәдігерлерді жинақтап, оларды аудандық мәдениет үйінің бір бөлмесіне сақтағанымен, музей үшін арнайы ғимараттың жоқтығынан жинақталған біршама құнды заттар 90-шы жылдары үшті-күйлі қолды болған.Бақытымызға орай, ауданның 60 жылдық мерейтойында сол кездегі аудан әкімі Қ.Баймахановтың қаулысымен музейдің жұмысы қайта жанданып, бұрынғы Абай атындағы кинотеатрдың ғимараты &nbsp;музей &nbsp;үйіне беріледі.Міне, нақты осы кезеңнен бастап жергілікті өлкетанушылар Ахмет Тілеулиев пен Мақсат Қарақұлов облыстық музейдің қызметкерлерімен бірлесіп, елді мекендерді аралап, экспонат жинақтауға белсене атсалысады. Соның негізінде А.Тілеулиев музейдің тақырыптық-экспозициялық жоспарын жазып шығады. Сол жоспар бойынша жасақталған экспозиция тұңғыш рет 1999 жылдың 4 қараша күні ашылып, аудан әкімінің 1999 жылғы 10 қарашадағы шешімімен аудандық тарихи-өлкетану музейі өзінің құзырлы қызметіне кіріседі. Музейдің алғашқы директоры болып Ахмет Тілеулиев тағайындалады. Сол жылдардан бері аудандағы тарихи мұралар мекені үзіліссіз жұмыс жасап келеді.– Музей экспозициясы қашан толықтай жаңартылды?– Әрине өмір болған соң тарих жаңарып, музей жаңа экспонаттармен толығып, жанданып отыратыны белгілі. Осы тұрғыда музей жұмысына леп әкелген жаңару 2009-2011 жылдар аралығына сәйкес келеді. Осы кезеңде мұнда реэкспозициялық жұмыстар жүргізіліп, музей экспозициясы толықтай жаңартылған. Мұнан соң 2020 жылдың жазында тағы бір мәрте жаңарудан өтті.&nbsp;– Бұқарбай батыр ауылында да осындай музей үйі бар. Ол қашаннан бері жұмыс жасайды?– Ол 2012 жылы Бұқарбай батыр бабамыздың 200 жылдық мерейтойы қарсаңында Бұқарбай батыр атындағы ауылдан тарихи ғимарат ашылды. Аталған музейдің ашылуына Бұқарбай батырдың шөбересі Жоламан Алданазаров зор еңбек сіңірді. Ол кісі облыс орталығы мен ауылдарды аралап жүріп, &nbsp;бабасы жайлы материалдар мен жәдігерлер жинақтап, музей қорын құнды экспонаттармен толықтырды. Онда Бұқарбай батырдың &nbsp;өзі пайдаланған қайқы қылышы, шашақты туы, күмістен соғылған мөрі, архивтік материалдар мен Бұқарбай батыр ауылының тарихы жайлы деректі мәліметтер қойылған.&nbsp;Бүгінде аудандық тарихи-өлкетану музейі мен Бұқарбай батыр атындағы тарихи үй облыстық тарихи-өлкетану музейінің филиалы ретінде толыққанды жұмыс атқарып келеді.&nbsp;– Аудан орталығындағы музейде орналасқан құнды жәдігерлеріңіздің әрбірі тарихтың тұтқасындай жеке-жеке жазуға тұрарлық қымбат дүние екен. Енді мерейлі мереке қарсаңында сол көздің қарашығындай мұражайда сақтап отырған әр дәуірдің бойтұмарындай дүниелер туралы айтып өтсеңіз...– Дұрыс айтасыз. Қымбат қазыналардың қорғаны мен жанашыры, насихатшысы болып отырғанымызға қуанамыз. Неше ғасырды артқа тастаған небір батырлар мен даңқты азаматтардың күнделікті қолмен ұстап, тұтынған заттарын көріп, одан таңғажайып әсер алатын жұртшылықпен жүздесу – біздің ұжым үшін үлкен мақтаныш пен мәртебе. Жиырма жылдан астам тарихы бар аудандық музей бағзы замандарда аудан көлемінде өмір сүрген ата-бабаларымыздың тарихы туралы сыр шертетін жәдігерлер мекені.&nbsp;Мәселен, жасалғанына жүз жылдан астам уақыт өткен &nbsp;бұйда пышақты аудандық музей өзінің алтын қорына енгізді. Бұл пышақ болат темірден соғылған. Басы өткір, шаншуға, түйреуге лайықталған бір жүзді болып келген. Пышақтың сырты, яғни түйрейтін ұшынан бастап сабының түп жағына дейінгі аралығы бірте-бірте қалыңдап барып аяқталып, бір жағына иілген.&nbsp;Бұл көне жәдігерді музейге Ақсу ауылының тұрғыны Төлеу Мәншарипов есімді жылқышы өткізген. Ескіден жеткен асыл мұра жылқышыға әкесінен мирасқа қалған екен. Қазақ халқының қару ретінде қолданатын пышағын “бұйда пышақ” деп атаған.&nbsp;Сонымен қатар біздің қорымызда 1969 жылы құрылып, елге танылған &nbsp;«Алтын арай» ансамблінің баяны, асатаяғы, қобыз, дауылпаз секілді ескі дүниелері сол кезеңді еске түсіреді.&nbsp;Қан майданда атақты әскери барлаушы болған, соғыс ардагері, белгілі қоғам қайраткері Мөрәлі Шәменовтің жұмыс үстелі, ондағы ол кісінің өзі тұтынған қолжазбалары мен заттарынан сол заманның бейнесі көз алдыңа бейнебаяндай елестеп, бойыңды тебірентіп, жаныңа рух сыйлайды. Мөрәлі ағамыздың 50-60 жылдар куәсіндей құранды ерінің тарихына үңілсек, сол кезде &nbsp;колхоз басқарғандағы көлігі ат болғанын байқауға болады. Ол кісі атқа қонып-ақ талай елдік мәселелердің шешімін тапқан. &nbsp;Тағы біздің коллекциямызда &nbsp;19 ғасырдағы шоқпар, Табын Сейіт батырдың мөрі, 20 ғасырдағы теміржолшы сүймені, революция кезіндегі «Бульдог» револьвері, 19-20 ғасырда Қазаннан шыққан құран кітаптар, Социалистік Еңбек Ері Ұзақ Еспанов пен Алдаберген Бисеновтің тұтынған заттары, ҚР Әскери-теңіз күштерінің капитан-лейтенанты, «Сұңқар» әскери кемесінің тұңғыш капитаны &nbsp;Болат Алтынбаевтың әскери киімі, патшалық кезеңнен жеткен самаурын және өзге де құнды жәдігерлер бар. &nbsp;Оларды сөзбен баяндағаннан көзбен көру бір бақыт екенін айтқым келеді.&nbsp;– Алдағы атқарылар жұмыстарға тоқталсаңыз...– Карантин уақытында да санитарлық талаптарды сақтай отырып, онлайн үлгісінде жұмыс жасадық. Музей қызметкерлерінің баяндамалары бірнеше мәрте өткізілген республикалық және халықаралық ғылыми-тәжірибелік конференциялардың жинақтарына енгізіліп, ғылыми-танымдық мақалалары республикалық және жергілікті баспасөз беттерінде жарияланды. &nbsp;Қазіргі таңда музейде 15 адам жұмыс жасауда. Мұнда аудан көлемінің миллиондаған жылдарғы (археозой эрасынан мезозой дәуірінің бор кезеңінен) геологиялық тарихынан бастап, қазіргі заманғы тарихы қамтылған 2 зал жұмыс істейді. Экспозиция хронологиялық ретпен орналастырылып, аудан тарихы жайлы сыр шертетін жәдігерлер келушілердің қызығушылығын тудырып келеді. Бүгінде біздің қорымызда 7 мыңнан астам экспонат сақталуда. &nbsp;Алдағы уақытта аудандық музей ұжымы ауданның сан ғасырлық тарихын зерттеп, зерделеу, аудан көлеміндегі тарихи-мәдени мұраларды жинақтап, музей қорын құнды экспонаттармен толықтыру және жас ұрпақты отаншылдық рухта тәрбиелеу бағытында өз жұмыстарын ұйымдастыруда табыстар биігінен көріне беретініне сенемін.&nbsp;–Әңгімеңізге рахмет! Кәсіби мерекелеріңіз құтты болсын!

Қазақстан және Қызылорда облысының жаңалықтары