<a href="https://kyzylorda-news.kz/">Kyzylorda-news.kz.</a> Бүгіннен бастап жеке тұлғалардың мобильді аударымдары бақылауда болады, деп хабарлайды «<a href="https://24.kz/kz/zha-aly-tar/o-am/item/538940-elimizde-mobildi-a-sha-audarymdary-ba-ylanady">Хабар 24</a>».
Қаржы министрінің осыған қатысты 29 наурыздағы бұйрығы бүгін күшіне енеді. Мобильді аударымдарды бақылау арқылы жеке тұлғаның кәсіпкерлікке қатысы бар-жоғы анықталады. Яғни жеке тұлғаның банк шотына қатарынан 3 ай ішінде 100 және одан да көп тұлғадан ақша түссе, онда бұл операциялар кәсіпкерлік қызметтен пайда табу деп есептеледі.
<blockquote>
 Ел арасында бұл мәселе қызу талқыланды. Наразы болып жатқандары көп. Кейбір кәсіпкерлер осыны пайдаланып, салық төлегісі келмейді. Бірақ мұның салдары қандай боларын ойлауымыз керек. Адамдар салық төлемесе, онда бюджетке ақша түспейді. Егер салық төлегісі келмеген кәсіпкер болса, онда ол баласын мектепке бермесін, емханада қаралмасын, мемлекет ұсынып отырған қызметтерді пайдаланбасын. Өйткені осының барлығы салық есебінен өтеледі. Салық төлеу бір бөлек, ал сол ақшаның қалай жұмсалып жатқанын қадағалау мүлдем басқа мәселе. Меніңше, адамдар салық төлеу керек және сол салықтың қайда жұмсалып жатқанын біліп отыру қажет. Мұны талап етуге әркімнің құқы бар», – дейді қаржы сарапшысы Арман Бейсембаев.
</blockquote>

Бүгіннен бастап мобильді ақша аударымдары бақылауда болады

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 27 адам коронавирус індетінен емделіп шықты, деп хабарлайды coronavirus2020.kz.
Аймақтар бойынша:
Нұр-Сұлтан қаласында – 5,
Алматы қаласында – 9,
Алматы облысында – 2,
Шығыс Қазақстан облысында – 1,
Қарағанды облысында – 3,
Қостанай облысында – 1,
Қызылорда облысында – 1,
Маңғыстау облысында – 2,
Павлодар облысында – 2,
Солтүстік Қазақстан облысында – 1.
Жалпы, Қазақстан бойынша 1 290 785 тұрғын науқастан айықты.

Қызылордада 1 адам коронавирустан жазылды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев «ПетроҚазақстан Құмкөл Ресорсиз» АҚ президенті Ян Миньюймен кездесті.
Басқосуда екіжақты қарым-қатынастарды жетілдіру мақсатында өңірдің мұнай-газ саласын дамыту, кен орындарын барлау және жұмысшылардың әлеуметтік жағдайын көтеру бойынша ұсыныстар талқыланды.
Аймақ басшысы газды өндіруге және өңдеуге салынған инвестицияларға назар аударуды, компания жұмысшыларының әлеуметтік жағдайы басты назарда екенін айтып, қызметкерлердің талабын ескере отырып, орнықты шешім қабылдау қажет екенін тапсырды.

Нұрлыбек Нәлібаев «ПетроҚазақстан Құмкөл Ресорсиз» АҚ президентімен кездесті

<a href="https://kyzylorda-news.kz/">Kyzylorda-news.kz.</a> 15 сәуір күні циклонның әсеріне байланысты еліміздің оңтүстігінде, оңтүстік-шығысында фронталды бөліктердің өтуіне байланысты жауын жауып, найзағай ойнайды, деп хабарлайды Қазгидромет.
Бүгін Қазақстанның өзге өңірлеріндегі күн райына антициклон жотасы әсер етіп, күн ашық болады. Республика бойынша жел күшейіп, солтүстік-батыста, солтүстікте тұман түседі.
Ал Қызылорда облысында ауа температурасы +29 +30 градусты көрсетеді. Желдің жылдамдығы 9-14 м/с.

15 сәуірге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласындағы №1 мамандандырылған өрт сөндіру бөлімінде өрт-құтқару спортынан облыстық жарыс өтті.
&nbsp;Жарыс қызмет бабында қаза болған Қазбек Төреманов, Арман Төлеубаев, Арғын Әшірбековтерді еске алуға арналған. &nbsp;Құқарушылар әріптестерін &nbsp;еске алып, 1&nbsp; минут үнсіздік жарияланды.
<blockquote>
 &nbsp;«Құрметті қонақтар мен жарысқа қатысушылар! Бүгін өткізгелі жатқан жарысымыз қызмет барысын орындау барысында қаза болған әріптестерімізге арналған. Бейбіт еліміздің батырларының есімдері әрқашан жадымызда. Жыл сайын өрт сөндіру бөлімдері арасында өрт-құтқару спортынан жарыстар өткізілуде. Өрт сөндіру-құтқару спорты –&nbsp; бұл сізге өз дағдыларыңызды шыңдауға, құтқару операциялары кезінде қызметті мүлтіксіз орындауға көмектесетіні сөзсіз», – деді Қызылорда облысы ТЖД бастығы полковник Руслан Қайрақбаев.
</blockquote>
Одан соң қызмет бабында қаза болған Арғын Әшірбековтің әкесі, полиция қызметінің ардагері Қазбек Әшірбеков, облыстық ТЖД Ардагерлер кеңесінің төрағасы Мұрат Мұсаев сөз сөйлеп, жарысқа қатысушыларға сәттілік тіледі.
Жарысқа өңірдегі 16 командадан 112 спортшы және жасөспірімдер &nbsp;қатысты. Бүгінгі жарыс бағдарламасына оқу мұнарасының 4 қабатына шабуыл сатысымен көтерілу (қызметкерлер үшін), жылжымалы үш иінді сатыны орнату және оқу мұнарасының екінші қабатына көтерілу (жасөспірімдер үшін) сынды қызмет түрлері енді.
Аталған іс-шараның кезекті кезеңдері мен жабылу рәсімі ертеңге жоспарлануда.
<img src="https://kyzylorda-news.kz/wp-content/uploads/2022/04/3bea5655-797c-4a20-b73e-10548ef5bd59.jpg" alt="" />
<img src="https://kyzylorda-news.kz/wp-content/uploads/2022/04/29b9f615-79fd-4086-bb47-105223b37a90.jpg" alt="" />

Қызылордада өрт-құтқару спортынан облыстық жарыс өтіп жатыр

<a href="https://kyzylorda-news.kz/">Kyzylorda-news.kz.</a> Бүгін облыс әкімі Нұрлыбек Нәлібаев күрес федерациясының президенті Дәулет Тұрлыхановпен кездесті. Басқосуда Сыр еліндегі бұқара спортты дамыту, оның ішінде күрес спортын кеңінен насихаттау сөз болды.
Аймақ басшысы Президент Қасым-Жомарт Кемелұлы Тоқаевтың тапсырмасына сәйкес балаларға арналған спорт үйірмелерін көбейтіп, спортпен айналысатындар санын арттыру үшін өңірде кешенді жұмыстар атқарылатынын жеткізді.
Дәулет Тұрлыханов биылғы жыл күрес спорты бойынша республикалық және әлемдік деңгейдегі сайыстар саны артқанын атап өтті. Сонымен қатар, Қызылорда облысында ұйымдастырылып жатқан еркін, әйелдер және грек-рим күресінен ҚР чемпионаты үлкен сайыстардың алдында жастарға үлкен мүмкіндік екенін жеткізіп, күрес спортына жастарды көбірек баулу қажет екеніне тоқталды.
Айта кету керек, чемпионат 16 сәуірге дейін жалғасады.

Облыс әкімі күрес федерациясының президенті Дәулет Тұрлыхановпен кездесті

<a href="https://kyzylorda-news.kz/">Kyzylorda-news.kz.</a>&nbsp;Қызылорда қалалық Полиция басқармасының криминалдық полиция қызметкерлері 3 автокөлікті ұрлап кеткен дерек бойынша күдікті облыс тұрғынын ұстады.
27 наурыз күні түнгі сағат 04:06 шамасында белгісіз адам көпқабатты үйдің ауласында тұрған «Нексия» автокөлігін белгісіз бағытқа айдап кеткен. Дәл осы тектес дерек бойынша 11 сәуір күні полиция басқармасына және Ақсай полиция бөліміне қала тұрғындары келіп, Шұғыла мөлтек ауданы аумағындағы көпқабатты тұрғын үй ауласында және жер үйдің алдында тұрған ресейлік нөмірлі «Нексия» автокөліктерінің есігін кілтпен ашып, белгісіз бағытқа айдап кеткені жөнінде «102»-ге хабарласып шағымданған.
Полиция қызметкерлеріне іздеу салған автокөлік бойынша бағыт-бағдар берілді.
26 жастағы күдіктіні Арал аудандық полиция бөлімінің қызметкерлері ұстады. Айғақ зат ретінде ұрланған автокөліктер тәркіленді. Тергеу барысында осы деректерге қатысы бар басқа да тұлғалар тексерілуде.
Аталған деректер бойынша Қазақстан Республикасының Қылмыстық кодексінің 188-бабының 3-бөлігімен (бернеше рет жасалған ұрлық) сотқа дейінгі тергеп-тексеру әрекеттері басталды. Күдікті басқарманың уақытша ұстау изоляторына қамалды.

Үш «Нексия» автокөлігін ұрлаған қызылордалық ұсталды

<a href="https://kyzylorda-news.kz/">Kyzylorda-news.kz.</a>&nbsp;Индустрия және инфрақұрылымдық даму министрі Қайырбек Өскенбаев 4 проценттік автокредит бағдарламасына кезекке тұру және құжат тапсыру тәртібін түсіндірді, деп хабарлайды&nbsp;<a href="https://stan.kz/"></a><a href="https://stan.kz/">Stan.kz</a>.
Министрдің айтуынша, алдымен бұрынғы бағдарлама бойынша кезекке тұрған адамдардың құжаттары қаралады. Бүгінде олардың саны 15 мыңға жуықтайды.
<blockquote>
 «Әрине, соларға беріледі. Банктер жаңадан адам іздегенше бірінші тіркеліп қойған адамдарға береді ғой»,&nbsp;–&nbsp;&nbsp;деді Өскенбаев.&nbsp;
</blockquote>
Министрдің айтуынша, бұған дейін автокредит берген банктер бағдарламаға қатыса береді. Себебі олардың онлайн-платформасы, яғни электронды кезек жүйесі бар.
<blockquote>
 «Бүкіл банктер қатысады. Бұл бұрынғы бағдарламаның жалғасы ғой. Сейсенбі күні үкімет шешім қабылдады. Енді оны ресми түрде тіркейді. Өзінің тәртібі бар ғой. Айдың соңында басталады», –&nbsp;&nbsp;деп атап өтті Өскенбаев.
</blockquote>
Осы орайда министр ақшаны индустрия және инфрақұрылымдық даму министрілігі емес, экология министрлігі бөлетінін ерекше атап өтті. Себебі “Жасыл даму” АҚ осы мемлекеттік органға қарайды. Сол ұйымның есебінен қаржы аударылады.
<blockquote>
 «Біз автокредит тәртібін бекіттік қой. Енді экология министрлігі ақшаны бөліп, қандай жолмен жұмсалатынын бекітуі керек. Олардікі де айдың соңында бекітіледі», –&nbsp;дейді Өскенбаев.
</blockquote>
Жеңілдетілген автокредит бағдарламасында әлеуметтік осал топтарға жеңілдік беріледі. Олар көлікті кезексіз рәсімдей алады.
<blockquote>
 «Дәл сол адамдарға арналған бағдарлама ғой. Олар кезекте бірінші болып тұрады. Соларға басымдық беріледі, жеңілдік жасалады», – деді Өскенбаев.
</blockquote>

4 проценттік автокредит: Көлікті кезексіз кімдер ала алады?

<a href="https://kyzylorda-news.kz/">Kyzylorda-news.kz.</a> 2022 жылдың қаңтар-наурыз айларында облыстың өнеркәсіп кәсіпорындары 224,4 млрд.теңгенің өнімін өндірді.
2022 жылы индустрияландыру бағдарламасының үшінші бес жылдығы аясында жалпы құны 10,7 млрд. теңгені құрайтын, 316 жұмыс орындары құрылатын 5 жобаны іске асыру жоспарланған. Олар:
1) «Құрғақ құрылыс қоспалар өндірісі» («Арал Кварц» ЖШС). Жоба құны – 1947 млн.теңге, қуаттылығы – жылына 172,8 мың тонна; Жұмыс орындары – 73 адам, жүзеге асырылу орны – Арал ауданы. Пайдалануға беру мерзімі 2022 жылдың желтоқсан айына жоспарланған.
2) «Жылына 1500 тонна құс етін өндіретін құс фабрикасы» («Қармақшы құс» АҚ). Жоба құны – 1975 млн.теңге; Қуаттылығы – жылына 1500 тонна, жұмыс орындары – 60 адам, жүзеге асырылу орны – Қармақшы ауданы. Пайдалануға беру мерзімі 2022 жылдың екінші жартыжылдығына жоспарланған.
3) «Балық өңдеу цехы» (“Тұрған тамы” ШҚ). Жоба құны-600,0 млн.теңге. Қуаттылығы – жылына 324 тонна, жұмыс орындары – 40 адам, жүзеге асыру орны – Қармақшы ауданы. Пайдалануға беру мерзімі 2022 жылдың желтоқсан айына жоспарланған.
4) «Тауық етін өндіруді қамтамасыз ету мақсатында бройлерлер өсіру және тауық етін қайта өңдеу бойынша құс фабрикасы» («Абдулла» ШҚ). Жоба құны-5,2 млрд.теңге. Қуаттылығы – жылына 3,5 мың тонна, жұмыс орындары – 120 адам, жүзеге асыру орны – Жаңақорған ауданы. Пайдалануға беру мерзімі 2022 жылдың желтоқсан айына жоспарланған.
5) «Мал сою пунктін жаңғырту және ет комбинатын салу» («Сыр Маржаны» ет өңдеу кешені» ЖШС). Жоба құны-952,7 млн.теңге. Қуаттылығы – жылына 5,0 мың тонна, жұмыс орындары – 23 адам, жүзеге асыру орны – Қызылорда қаласы. Пайдалануға беру мерзімі 2022 жылдың желтоқсан айына жоспарланған.
Есепті кезеңде өңір экономикасына 51,4 млрд. теңге инвестиция салынды, өткен жылдың тиісті кезеңімен салыстырғанда 14,9%-ға ұлғайған.
10,7 млрд. теңгеге құрылыс жұмыстары орындалды, 2021 жылдың тиісті кезеңіне НКИ- 127,7%-ды құрады.
Ауыл шаруашылығының жалпы өнімінің көлемі 14,1 млрд. теңгені немесе 2021 жылдың сәйкес кезеңіне 101,4% құрады.
Сиыр саны – 10,6 пайызға (205,4 мың бас), қой – 4,7 пайызға (607,2 мың бас), жылқы – 15,3 пайызға (192,8 мың бас), түйе – 4,9 пайызға (56,5 мың бас) өсті.
Тірілей салмақта мал және құс еті 8,7 мың тонна (101,4 пайыз), 18,0 мың тонна – сүт өнімі (102,2 пайыз) өндірілді.
2021 жылдың 4 тоқсанында жұмыссыздық деңгейі – 4,9% құрады. 2022 жылдың 1 сәуіріне 7842 жаңа жұмыс орны құрылды, оның ішінде 2889 тұрақты.
2021 жылдың қаңтар-желтоқсан айларында бір қызметкердің орташа айлық жалақысы 210 475 теңгені құрады, яғни 2020 жылдың тиісті кезеңіне 118,4 пайыз.
Тұтыну бағаларының индексі 2022 жылдың наурыз айында 2021 жылдың желтоқсан айына қарағанда 104,4 пайызды құрады, оның ішінде азық-түлік тауарларына баға индексі 106,6 пайыз, азық-түлік емес тауарларға – 104,1 пайыз, ақылы қызметке –101,4 пайыз.

Қызылорда: Өнеркәсіп кәсіпорындары 224,4 млрд теңгенің өнімін өндірді

<a href="https://kyzylorda-news.kz/">Kyzylorda-news.kz.</a>&nbsp;Бүгін облыстық мәслихаттың сессиясы алдындағы тұрақты комиссияның кеңейтілген отырысына «AMANAT» партиясының депутаттық фракциясы жетекшісі ретінде қатыстым. Жиында екі мәселе талқыланды.
Олар – 2021 жылы экономика, қаржы және жергілікті басқару мәселелері жөніндегі тұрақты комиссия мүшелері тарапынан жолданған депутаттық жолданымдар мен олардың орындалуы; – 2022-2024 жылдарға арналған облыстық бюджет жобасын талқылау барысында көтерілген облыстық мәслихат депутаттарының ұсыныс пікірлері мен сауалдарының орындалу барысы туралы мәселелер.
Өз кезегінде депутаттар сауал жолдап, мәселелерді талқылағаннан кейін тұрақты комиссия мүшелері ұсынылған жобаларды бірауыздан қолдап, облыстық мәслихаттың кезекті сессиясында қарауға ұсынды.
Жалпы аймақ дамуының өзекті мәселелері «AMANAT» партиясының Сайлауалды бағдарламасын іске асыруға арналған Жол карталары шараларымен байланысты болғандықтан фракция мүшелері жиынға белсенді қатысты.

Тұрақты комиссияда қандай мәселелер қаралды?

<a href="https://kyzylorda-news.kz/">Kyzylorda-news.kz.</a>&nbsp;Қазақстанда қатерлі ісікке шалдығу көбейді.
Былтыр 36 140 жағдай тіркелген. Қауіпті кеселге ұшырағандардың 59%-і еңбекке қабілетті жастағылар.
Сондай-ақ елде өлім-жітім бойынша қатерлі ісіктен қайтыс болу өкпе обырына ұшырағандар арасында басым. Сондықтан дәрігерлер ісікті ерте диагностикалау өте маңызды екенін айтып отыр. Онкологиялық науқастарды емдеуге жылына 66 млрд астам теңге бөлінеді. Уақытылы скринингтік тексеруден өту керек. Бұл қандай кеселдің болсын алдын алуға зор мүмкіндік береді, дейді дәрігерлер.

Қазақстанда қатерлі ісікке шалдығу көбейді

<a href="https://kyzylorda-news.kz/">Kyzylorda-news.kz.</a> Сырдария ауданының әкімі Мұрат Ергешбаев кент аумағында орналасқан жалпы жер көлемі 4 гектар құрайтын ескі тұрмыстық қатты қалдықтарды жинайтын полигонға барды.
Аудан басшысы ескі қатты тұрмыстық қалдықтар полигонының қоршалмағанын, санитарлық-экологиялық талаптарға сәйкес келмейтінін және қалдықтардың сұрыптау кешенімен жабдықталмағанын көрді.
<blockquote>
 «Полигон аумағының арнайы қоршалуы, ескі полигон ауданының 4 гектар жерін көму, қайта қалпына келтіру жұмыстары жүргізілуі қажет. Осы жұмыстар толық атқарылған жағдайда ескі қатты тұрмыстық қалдықтар полигонының қоршаған ортаға және адам денсаулығына тигізетін кері әсерлері толық жойылады. Полигон аумағындағы жинақталған тұрмыстық қатты қалдықтарды жинастыру және аймақты толығымен залалсыздандырып, қалыпты жағдайға келтіру қажет», – деді аудан әкімі Мұрат Ергешбаев.
</blockquote>
Осы орайда кент әкімі Е.Бақтияров кент тұрғындарына экологиялық зиян келтірмеу үшін тиісті жұмыстарды жауапты мамандармен бірлесіп атқаратындығын жеткізді.

Қазақстан және Қызылорда облысының жаңалықтары