<a href="https://kyzylorda-news.kz/">Kyzylorda-news.kz.</a>&nbsp;Бүгін Қызылорда облысы Полиция департаментінің бастығы полиция полковнигі Сұлтан Бектөре Жеңісбайұлы облыс тұрғындары алдында есептік кездесу өткізді.
Есептік кездесу Полиция департаментінің «Facebook» әлеуметтік желісіндегі ресми парақшасында тікелей эфирде өтті.
Есептік кездесудің өтуі жөнінде әлеуметтік желілерде және жергілікті бұқаралық ақпарат құралдарында алдын ала арнайы хабарландыру жарияланған болатын. Бұл хабарландыруға сәйкес, облыс және қала тұрғындары өз сауалдарын электрондық пошта, әлеуметтік желілер арқылы жолдауларына мүмкіндік алды. Онлайн конференцияға барлық басқарма, бөлім басшылары қатысып, салаларына тиісті сұрақтарға жауап берді. Одан бөлек барлық аудандық полиция бөлімдері бейнеконференц арқылы байланыста болды.
Бектөре Сұлтан халық алдындағы есеп беру кездесуінде қылмыстық ахуал мен қылмыстық құқық бұзушылықтың алдын алу бағытындағы атқарылған жұмыс туралы айтып, өткен жылды қорытындылады.
<blockquote>
 «Полиция департаментінің қызметкерлерімен жыл бойы атқарылған шаралардың нәтижесінде өңірімізде қылмыстық ахуал тұрақты, қылмыс саны төмендеді. 10 мың халыққа шаққанда қылмыс деңгейі республикада 89 бірлікті құраса, облыста бұл көрсеткіш 41-ді құрап, ахуалы тұрақты аймақтың біріміз», – деді Бектөре Сұлтан.
</blockquote>
Есеп беру барысында департамент бастығы соңғы уақытта алаяқтық фактілерінің көбейгендігін айтты. Есепті мерзімде 676 қылмыс тіркелді. Олардың басым бөлігі пәтер, жер учаскесін алу, жұмысқа орналастырумен байланысты. Интернет-алаяқтық жағдайлары да көбейді. Осы санаттағы қылмыстардың көбейгендігін айта отырып, облыс тұрғындарын сақтық шараларға ерекше назар аудару қажеттігін ескертті.
Сондай-ақ , полиция жұмысын жақсарту үшін Жол картасы шеңберінде жүргізіліп жатқан ауқымды іс-шаралар туралы айтылды. Бұған қоса, Мемлекет басшысының «Халық үніне құлақ асатын мемлекет» тұжырымдамасын іске асыру мәселелері бойынша өткен жылы 300-ге жуық азамат қабылдауда болды.
Онлайн режимде өткен есепті кездесуде облыс тұрғындары тарапынан сауалдар қойылды.
Халықтың мұң-мұқтажын тыңдап, олардың өтініштері мен ұсыныстарын жедел және сапалы қарау мәселесі полиция қызметіндегі маңызды бағыт екендігі белгілі. Тікелей эфирге мыңға жуық желі қолданушылары қатысып, департаментке жалпы 80-ге жуық пікір мен ұсыныс келіп түсті. Тұрғындардың бірі белгілі бір аймақтарда жылдамдық өлшеуіш құрылғыларын орнату, ішкі істер органдарына жұмысқа орналасу, зейнеткерлікке шығу тәртібі және жекелеген қылмыстық істер бойынша мәлімет алғысы келсе, енді бірі полиция қызметкерлеріне алғысын білдіріп, ел тыныштығын қорғау жолындағы қиын да жауапты қызметтеріне сәттілік тіледі.
Департамент бастығы тұрғындардан түскен сұрақтар мен ұсыныстарды мұқият тыңдап, зерделеп, арнайы құрылған топқа тапсырма берді. Барлық өтініштер Полиция департаменті бастығының қатаң бақылауына алынды.

Қызылорда облысы Полиция департаментінің бастығы халыққа есеп берді

<a href="https://kyzylorda-news.kz/">Kyzylorda-news.kz.</a> Қазіргі таңда жастардың бастамаларын қолдау, кәсіпкерлікті дамыту жолға қойылған. Осы орайда, жас стартаперлер өз идеяларын жүзеге асыруда түрлі байқауларда бақ сынап жүр.
Бүгінде ауқымды жобаларымен әлемдік деңгейде танылуда. Соның дәлелі – Қорқыт ата атындағы Қызылорда университеті студенттерінен құралған «Enactus» командасы «Global Race to Rethink Plastic» байқауында TOP-48 тізіміне енді. Дүниежүзі стартаперлері бақ сынаған сайыста қазақстандық 3 жоба үздіктер қатарында.
<blockquote>
 «Global Race to Rethink Plastic байқауы – кәсіпкерлік қызметтің көмегімен пластикалық қалдықтар дағдарысын жеңуге мүмкіндік береді. Біздің команда «OrgPlast» жобасын ұсынып, II кезеңіне жолдама алды. Жоба аясында күріш крахмалынан биополимер алып, ыдырайтын пластик түрін ойлап таптық. Тобымызда оқу орнының білім алушылары – Дидар Сәрсенбек, Заманбек Жақсылықов, Досым Әділхан бар»,-деді топ жетекшісі, жас кәсіпкер Темірлан Абжанов.
</blockquote>
Айта кетейік, іскер жастарға арналған байқауға 35 елден 200-ге жуық команда қатысты. Екінші кезеңнен өткен жобалар TOP-17, TOP-10 тізіміне іріктеледі. Нәтижесінде финалға шыққан командалар ENACTUS әлем чемпионатына қатысып, өз жобаларын қорғамақ. Бас жүлде 25 000 АҚШ долларын құрайды.

Қызылордалық стартаперлер әлемдік додада бақ сынайды

<a href="https://kyzylorda-news.kz/">Kyzylorda-news.kz.</a> «Қызылорда су жүйесі» мемлекеттік коммуналдық кәсіпорнының басшысы лауазымына Құлмағанбетов Талғат Бекмырзаұлы тағайындалды.
Құлмағанбетов Талғат Бекмырзаұлы 1977 жылы Қызылорда қаласында дүниеге келген.
2006-2007 жылдары «Көркейту» мемлекеттік коммуналдық кәсіпорнында техника қауіпсіздігі инженері, 2007-2008 жылдары абонент бөлімінің басшысы, 2008-2009 жылдары диспетчер бөлімінің басшысы, 2009-2010 жылдары аралығында «Көркейту» мемлекеттік коммуналдық кәсіпорнының бас инженері, 2010-2012 жылдары «Қызылорда қызмет сервис» ЖШС директоры, 2012-2013 жылдары «Тұрғын үй қызметі» МКК-ның директор орынбасары, 2013-2014 жыл аралығында «Қызылорда тазалығы» ЖШС-нің бас инженері, 2014-2017 жылдары «Қызылорда тазалығы» ЖШС-нің директоры лауазымында қызмет атқарып, 2017-2018 жылдары аралығында «Қалалық коммуналдық шаруашылығы, жолаушылар көлігі және автомобиль жолдары бөлімі» коммуналдық мемлекеттік мекемесі басшысының лауазымын атқарған.
2018 жылдың маусым айынан бастап «Қызылорда тазалығы» ЖШС директорының міндетін атқарушы қызметін атқарып келді.

«Қызылорда су жүйесі» мекемесіне жаңа басшы тағайындалды

<a href="https://kyzylorda-news.kz/">Kyzylorda-news.kz.</a>&nbsp;Бүгін Қазалыда Балалар жылына орай «Біз бақытты баламыз» атты салтанатты шара өтті.
Е.Бозғұлов атындағы №249 мектеп-лицейде өткен шараға оқуда озат атанған оқушылар мен спорттық жарыстарда шашасына шаң жұқтырмаған жүйріктер қатысты.
Шара басталмас бұрын аудан әкімі Мұхтар Оразбаевүздік шәкірттермен бірге өнерлі оқушылардың қолымен жасалған көрмелермен танысты.
Сахна шымылдығы Қарабалаевтар жанұясының өнерлі ұл-қыздарымен бірге шырқаған әсем әнімен түрілді. 
Мұнан соң Мұхтар Әуесұлы балаларды мерекемен құттықтап, ыстық лебізін жеткізді.
<blockquote>
 «Жүзімізді жадыратып, жүректегі мұзды ерітетін сәбидің сыңғыр күлкісі екені белгілі. Ата-ана үшін бөбегінің шат күлкісі мен баянды болашағынан қымбат дүние жоқ. Даңқты батыр Бауыржан Момышұлының «Дүниеде баланың у-шуына жетер не бар?! Одан асқан сазды әуен ойлап табу мүмкін емес» дегені есімізде. Балалы үйді базарға теңеген бабалардың сөзі де санамызда. Осыған орай елімізде Мемлекет басшысының бастамасымен көптеген игі істер атқарылып жатыр. Олардың басым бөлігі, әрине, болашағымыз балаларға арналған. Әсіресе, Сіздердің дұрыс білім алуға, жақсы демалыс ұйымдастыруға, спортпен шұғылдануға қабілеттеріңізді шыңдауға бар мүмкіндік қарастырылған. Бүгінде, осы бағытта ауданымызда білім ошақтары, шағын орталықтар, балабақшалар жүйелі жұмыс жасауда. Бірінші кезекте балалардың сапалы білім алуына көңіл бөлініп, барлық мектептер замауи үлгідегі техналогиялармен жабдықталуда. Өңіріміздегі жаңа мектептер мен балабақшалар да жас қазалылықтардың тәлім мен тәрбиені жақсы жерде алуы үшін салынып жатыр», – деген аудан басшысы үздік оқушыларды «Алғыс хатпен» марапаттады.
</blockquote>
Салтанатты шарада өнерлі оқушылар әуелете ән шырқап, мың бұрала би биледі.
<img src="https://kyzylorda-news.kz/wp-content/uploads/2022/04/k.jpg" alt="" />
<img src="https://kyzylorda-news.kz/wp-content/uploads/2022/04/278387961_3326190590935198_8454294493976643439_n.jpg" alt="" />
<img src="https://kyzylorda-news.kz/wp-content/uploads/2022/04/kk.jpg" alt="" />
<img src="https://kyzylorda-news.kz/wp-content/uploads/2022/04/09.jpg" alt="" />
<img src="https://kyzylorda-news.kz/wp-content/uploads/2022/04/10-1.jpg" alt="" />

Қазалыда Балалар жылына орай салтанатты шара өтті

<a href="https://kyzylorda-news.kz/">Kyzylorda-news.kz.</a>&nbsp; Қазалы ауданы Майлыбас ауылы мен Арал ауданындағы Қамыстыбас ауылының тұрғындарын жол, электр жарығы мен су мәселесі мазалайды. Олар осы және өзгеде мәселелерін «AMANAT» партиясы облыстық филиалының мобильді тобының көшпелі қабылдауы барысында атап өтті.
Алыстан келген ел азаматтарына ауылдың аманатын арқалап келген Майлыбас ауылдық округі тұрғындары көгілдір отын, су мәселесі, электр желілерін жаңғырту, жұмыссыздық, көлдерді суландыру мен инфроқұрылым шаруаларын шешуге ықпал жасалса деген тілектерін білдірді. Солардың бірі Ақсуат ауылынан келіп отырған Куаныш Рзаханұлы. Ауыл тұрғыны электр желілері мен трансформатор қондырғыларының тозуын алға тартып, қайта жаңғырту жұмыстары жүргізілсе дейді.
«AMANAT» партиясы облыстық филиалы Атқарушы хатшысының орынбасары Алтынбек Жарылқасыновтың айтуынша ауыл ішіндегі Ғ.Мұратбаев және А.Есмамбетов көшелерін түнгі жарық шамдарын жүргізу мен жолдарын жөндеу жұмыстары бойынша қазіргі таңда жобалық сметалық құжаттары әзірленіп, бюджеттік өтінім берілген, қаржылай қолдау күтілуде. Ал, жалпы Майлыбас ауылдық округіне қарасты Байқожа станциясы электр желілерін жаңадан тарту жұмыстары аясында қазіргі таңда тиісті есептемелер жүргізіліп жатқан көрінеді. 
Ал, Қамыстыбас тұрғындары болса, бұрын соңды жабылып қалған ауылдағы аурухананы қайта іске қосу, демалыс орны жағажайды ретке келтіру, сонымен қатар, сондағы жалға алынған жерлердің мерзімін ұзарту, теміржол өткелдеріндегі қауіпсіздік секілді мәселелерді көтерді.
<blockquote>
 Темір жол ауылды қиып өтеді. Ауылымыз шағын болғанымен осы шойын жолдың екі бетінде 2000 – нан аса тұрғын бар. Бұрын тұрғындардың арлы – бері өткендегі қауіпсіздігі үшін арнай бекеттерде реттеуші мамандар жұмыс жасайтын. Ол мамандарды қысқартып жіберді. Осы мәселені қайта қарап, арнайы штат бөлінсе үлкен сауап болар еді. «AMANAT» партиясы өкілдері бүгін ауылымызға келіп халықтың барлық тілегін тыңдап жатыр, көкейдегі көп мәселені жеткіздік. Біртіндеп шешіледі деп жатыр. Келген азаматтардың жұмысына сәттілік тілеймін. Халықтың алғысына бөлене берсін», – дейді ауыл тұрғыны, көп балалы ана Бақыткүл Тлеубайқызы.
</blockquote>
Жалпы Арал, Қазалы аудандарының шалғай елді мекендерінде ұйымдастырылған мобильді қоғамдық қабылдау жұмысы барасында партия мүшелері мен атқарушы органдардың өкілдеріне 40 азамат жүгінді. Кейбір мәселелер сол жерде оң шешімін тапса, қалған өтініштер бойынша кеңестер беріліп, бір бөлігі бақылауға алынды.
<img src="https://kyzylorda-news.kz/wp-content/uploads/2022/04/278319445_355154656650177_9036607411106210179_n.jpg" alt="" />
<img src="https://kyzylorda-news.kz/wp-content/uploads/2022/04/278319614_355154663316843_3733346351400509511_n.jpg" alt="" />
<img src="https://kyzylorda-news.kz/wp-content/uploads/2022/04/278337388_355154796650163_9161943731112991212_n.jpg" alt="" />

Ауыл тұрғындарын толғандырған мәселелер назарға алынды

<a href="https://kyzylorda-news.kz/">Kyzylorda-news.kz.</a> Мемлекет басшысының өкімімен Руслан Сұлтанұлы Желдібай Қазақстан Республикасы Президентінің баспасөз хатшысы лауазымына тағайындалды, деп хабарлайды Ақорданың ресми сайты.
Руслан Желдібай 1989 жылы Жамбыл облысында туған.
Т. Рысқұлов атындағы Қазақ экономикалық университетін, Уорик университетін бітірген. Еңбек жолын 2012 жылы «Қазақстан» телеарнасында редактор болып бастаған.
2012-2018 жылдары «Алматы» телеарнасында бөлім басшысы, продюсер болған.
2018-2019 жылдары Ақпарат және коммуникациялар комитетінің Интернет кеңістігіндегі және әлеуметтік желілердегі ақпараттық жұмыс жөніндегі басқарма басшысының міндетін атқарушы, басшысы лауазымын атқарған.
2019-2020 жылдары Ақпарат және қоғамдық даму министрлігінің Ақпарат комитеті төрағасының орынбасары болып қызмет еткен.
2020-2022 жылдары Президент Әкімшілігінің Ішкі саясат бөлімі меңгерушісінің орынбасары болды.
2022 жылғы ақпаннан бастап Премьер-Министр кеңсесі басшысының орынбасары лауазымын атқарды.

Мемлекет басшысының баспасөз хатшысы  тағайындалды

<a href="https://kyzylorda-news.kz/">Kyzylorda-news.kz.</a> «Мүмкіндіктер керуені» шарасы аясында С.Майқанова атындағы мәдениет үйінде «Жас ақындар» кастингі өтті.
Айтулы шараға ақын, ұстаз, «Құрмет» орденінің иегері Мамыр Байдәулетов пен «Рухани жаңғыру» орталығының Ұйымдастыру-жобалау жұмысы бөлімінің басшысы Шакизат Қаратайұлы қазылық етіп, сөз өнерінің қадірін түсінетін, шығармашылық қуат пен шынайы таланты бар жастарға бағыт-бағдар беріп, сөз қиюластырудың түрлі техникаларын, айтуға оңай, тыңдауға түсінікті жыр жазудың қыр-сырымен бөлісті. Ақын болуда шалқар шабыттан бөлек, эстетикалық талғам мен сөз құдіретінің маңыздылығы, көркемдік сапасының биік болуы жөнінде түрлі ақыл-кеңестер айтылды.
<blockquote>
 «Ақындық өнер – сөз өнерінің аса қастерлі саласы, ақын бойындағы шығармашылық қуат пен шынайы таланттың биік өлшемі. Ежелден-ақ қазақ халқы да өлең сөздің қасиетіне бас иіп, оны өнер атаулының ең биік шыңына балаған. Өлең тілінің кіршіксіз таза болуы, бөтен сөзбен былғанбауы – ақындықтың басты талабы. Бізде бунақ, шумақ, ұйқас деген түсініктер бар, бұл – өнердің техникалық жағы. Осының бәрін меңгерген ақыннан болашақта жақсы сөз шебері шығатынына сенімім мол», – деді ақын Мамыр Байдәулетов.
</blockquote>
Жыр кастингіне 20-дан аса қала жастары қатысып, өз бақтарын сынады. Шығармашылық әлеуеті жоғары ақындар алдағы уақытта шеберлік сағаттарына, ақындармен кездесулер мен түрлі жазба ақындар үйірмелеріне қатысады.

Мүмкіндіктер керуені: Жас ақындар кастингі өтті

&nbsp;<a href="https://kyzylorda-news.kz/">Kyzylorda-news.kz.</a> Ата-ана қамқорлығынсыз қалған балаларды тұрғын үй қорынан баспана алу есебіне қою 3 айға дейін қысқартылады. Бұл туралы Сенаттың жалпы отырысында балалар құқықтарын қорғауға қатысты заң жобасын бірінші оқылымда қарау кезінде сенатор Ләззат Сүлеймен айтты, деп хабарлайды <a href="https://lenta.inform.kz/kz/ata-ana-kamkorlygynsyz-kalgan-balalardy-baspana-kezegine-koyu-merzimi-kyskarady_a3922709">ҚазАқпарат</a>.
Заң жобасының негізгі қағидаларына тоқталған сенатор:
<blockquote>
 «Тұрғын үй қатынастары туралы» Заңға, ата-анасының қамқорлығынсыз қалған балаларды мемлекеттік тұрғын үй қорынан баспана алу үшін есепке қою мерзімін 6 айдан 3 айға дейін қысқарту бойынша түзетулер енгізіледі», – деді.
</blockquote>
Оның айтуынша, «Неке (ерлі-зайыптылық) және отбасы туралы» кодекске, егер кәмелетке толмаған балаға туысы, өгей әкесі (шешесі) тұлғасында дереу қамқоршы тағайындау қажет болса, тиісті органдар психологиялық даярлықтан өткізбестен қамқоршылықты белгілеуге құқылы болады.
Қазіргі заңнама бойынша баланы алу үшін 1 жыл психологиялық дайындықтан өту керек.
<blockquote>
 «Мұнымен қоса, «Халық денсаулығы және денсаулық сақтау жүйесі туралы» кодекске, мүмкіндігі шектеулі балаларға арналған медициналық оңалту орталықтарын тек астанада, облыстарда, қалалаларда ғана емес, аудан орталықтарында, қолданыстағы ауруханалар мен емханалардың базасында құру бойынша жергілікті атқарушы органдарының құзіреті бекітіледі. Аталған норма ауылдық, аудандық елді мекендегі ерекше қажеттілігі бар балалар үшін тұрақты оңалту қызметтері қолжетімді етпек. Үнемі медициналық процедураларға мұқтаж балаларды толыққанды қамтуға жол ашады», – деді Ләззат Сүлеймен.
</blockquote>

Ата-ана қамқорлығынсыз қалған балаларды баспана кезегіне қою мерзімі қысқарады

<a href="https://kyzylorda-news.kz/">Kyzylorda-news.kz.</a> Дүниежүзілік денсаулық сақтау ұйымының (ДДСҰ) COVID-19 жағдайына қатысты төтенше комитеті 11 сәуірде өткен отырысында коронавирустық пандемия әлі аяқталмағанын мәлімдеді. Комитет қазір COVID-19-ға қатысты арқаны кеңге салатын уақыт емес деген қорытындыға келді, деп хабарлады&nbsp;<a href="https://stan.kz/">Stan.kz.</a>
<blockquote>
 «Өкінішке қарай, пандемия әлі аяқталмады, вирус әлі де белсенді, өлім-жітім көрсеткіші жоғары, вирустың өзі болжауға келмейтін жолмен дамиды. Комитет бірауыздан қауіптілігін естен шығаратын сәт әлі жеткен жоқ деп шешті», –&nbsp;деді ДДСҰ&nbsp;басшысы Дидье Уссен.
</blockquote>
Өз кезегінде Дүниежүзілік денсаулық сақтау ұйымының бас директоры Тедрос Адханом Гебрейюс өткен апта пандемия басталғаннан бері COVID-19-дан қайтыс болғандар санының ең төменгі көрсеткіші болғанын айтты.
Сонымен қатар, оның айтуынша, кейбір елдерде ауру өршуінің себебінен ауруханалардың жұмысына салмақ түсіп жатыр.

«Әлі аяқталған жоқ»: ДДСҰ коронавирусқа қатысты арқаны кеңге салмауға шақырды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев алғашқы жұмыс сапарын киелі Қорқыт ата мемориалдық кешенінде ел алдында жүрген зиялы қауым өкілдері мен ардагерлермен кездесуден бастады.
Басқосуға облыстық мәслихат хатшысы, мемлекет және қоғам қайраткерлері, барлық ауданның ардагерлер кеңесінің төрағалары мен мәслихат хатшылары қатысты.
«Бірлігі жарасқан Сыр елі» атты іс-шара барысында аймақ басшысы ақсақалдар қауымы қашанда елдің бірлігі мен ынтымағын сақтауға айрықша үлес қосып жүргенін атап өтіп, ел ағаларымен жиі пікірлесіп, ұсыныстарын тыңдауға әзір екенін жеткізді.
<blockquote>
 «Ардақты ағаларым! Қасиетті Рамазан айында киелі Қорқыт бабамыздың басында өздеріңізбен бас қосқанымызға өте қуаныштымын. Маған үлкен сенім білдіріп, туған жеріме қызмет жасауға мүмкіндік берген Президентіміз Қасым-Жомарт Кемелұлына алғысым шексіз. Өздеріңіздің қолдауларыңызбен алдағы кездерде әріптестерімізбен бірге елдің, Президентіміздің сенімінен шығу үшін осы кезге дейін жинаған барлық күш-жігерімді, білімімді аямай жұмсаймын деп сендіргім келеді», – деді облыс әкімі.
</blockquote>
Өз кезегінде ардагерлер қауымы аймақ басшысының алдағы істеріне сәттілік тілеп, алғашқы қадамды жиналыстан емес, бүгінгідей киелі жерден бастағанына ризашылығын білдірді.
Кездесу соңында аймақ басшысы зиялы қауымға алғысын айтып, Президент ұсынған жаңа реформаларды бірге жүзеге асыруға, Жаңа Қазақстанды бірлесе дамытуға шақырды.
Игі шарада құрбан шалынып, аймақ басшысы мемориалдағы мұражайдың жұмысымен танысты. Мұнан кейін облыс әкімі Жосалы кентіндегі «Мәңгілік ел» монументі алдында арша көшеттерін отырғызды.
<img src="https://kyzylorda-news.kz/wp-content/uploads/2022/04/278125423_281304837524101_2880730878428166052_n.jpg" alt="" />
<img src="https://kyzylorda-news.kz/wp-content/uploads/2022/04/278440291_281304967524088_7470442661112397797_n.jpg" alt="" />
<img src="https://kyzylorda-news.kz/wp-content/uploads/2022/04/275125364_281304934190758_302414802872170955_n.jpg" alt="" />
<img src="https://kyzylorda-news.kz/wp-content/uploads/2022/04/278161283_281305010857417_1303098719852115964_n.jpg" alt="" />

Нұрлыбек Нәлібаев Қорқыт ата кешенінде зиялы қауым өкілдері және ардагерлермен кездесті

<a href="https://kyzylorda-news.kz/">Kyzylorda-news.kz.</a> Қазақстанның батыс бөлігінде циклонның әсерінен, сондай-ақ фронталды бөліктердің өтуіне байланысты республиканың оңтүстік-шығысында жаңбыр жауып, найзағай ойнайды, деп хабарлайды Қазгидромет.
ҚР территориясының өзге бөлігіне антициклон жотасы әсер етіп, күн ашық болады. Алайда осы күні республика бойынша жел күшейіп, солтүстік-батыста тұман түседі.
Қызылорда облысында ауа температурасы +27 +29 градусты көрсетеді. Желдің жылдамдығы 7-12 м/с.

14 сәуірге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Мемлекеттік қызмет істері агенттігінің Қызылорда облысы бойынша департаментінің бастамасымен «Сыр болашағы» жас мемлекеттік қызметшілер клубының жұмысы қайта жанданды.
Клубтың жұмысы – жас мамандарды мемлекеттік қызметке бейімдеу, олардың кәсіби дамуы мен қызметтік қабілеттерін шыңдауға бағытталған.
«Сыр болашағы» жас мемлекеттік қызметшілер клубы 2012 жылы құрылған. 2012-2014 жылдар аралығында қарқынды жұмыстар жүргізілген болатын. Атап айтқанда, жас мемлекеттік қызметші конкурсы, мемлекеттік қызметшілер арасында интеллектуалдық, спорттық шаралар, тимбилдинг, үйірмелер ұйымдастырылған болатын. Сол кезеңде клубқа белсенді мүше болған, конкурстардың жеңімпазы атанған мемлекеттік қызметшілер бүгінгі таңда лауазымды қызметтерде жұмыс жасауда.
Осы ретте, клубтың жұмысын қайта жандандыру бойынша іс-шараларды пысықтау мақсатында кездесу ұйымдастырылды. Кездесу Департамент басшысы, Әдеп жөніндегі кеңес төрағасы Ғалым Тұрсынбаевтың жетекшілігімен өтті.
Кездесуде клубтың жұмысына қатысты ұсыныстар айтылып, алдағы жоспарлары ортаға салынды. Клубтың алғашқы жетекшісі, бүгінгі таңда «Азаматтарға арналған үкімет» мемлекеттік корпорациясы облыстық филиалы директорының орынбасары Айдын Қайруллаев өз ұсыныстарын білдірді.
Жиын соңында жыл көлемінде атқарылатын жұмыстар жоспарланып, клуб құрамын жасақтау бағытында жұмыстарды жүргізу тапсырылды.

Қазақстан және Қызылорда облысының жаңалықтары