<a href="https://kyzylorda-news.kz/">Kyzylorda-news.kz.</a> 19 сәуірде атмосфералық фронталды бөліктердің өтуімен Қазақстанның басым бөлігінде жаңбыр түрінде жауын-шашын күтіледі, деп хабарлайды Қазгидромет.
Еліміздің оңтүстігінде найзағай, дауыл, шаңды дауыл болжанады. Республиканың батыс аудандарында жауын-шашынсыз ауа райы болады. Барлық өңірде желдің күшеюі байқалады. ҚазАқпарат бұл туралы Қазгидрометке сілтеме жасап хабарлайды.
Қызылорда облысының&nbsp;орталығында жел 15-20 м/с күшейеді. Ауа температурасы +23 +25 градусты көрсетіп, күн бұлтты болады.

Қызылордада жел күшейіп, күн бұлтты болады

Kyzylorda-news.kz. Қызылорда облысының әкімі Нұрлыбек Нәлібаев Қазалы ауданына жұмыс сапары аясында Әйтеке би кентіне жақын орналасқан Қазалы қаласын табиғи газға қосу салтанатты шарасына қатысты.
Аймақ басшысы тұрғындарды көптен күткен қуанышымен құттықтап, ақжарма тілегін арнады.
<blockquote>
 “Облыста барлық аудан орталықтары мен Байқоңыр қаласы «көгілдір отынға» қосылды. Мұнан бөлек, Сексеуіл, Төретам мен Ақай елді мекенін газдандыру кезең-кезеңімен жүзеге асатын болады. Биыл құны 3,2 млрд. теңгеге газдандыру жобасы жүруде. Қызылорда қаласына жақын «Наурыз», «Ж.Махамбетов», Шиелі ауданындағы «Алғабас», «Ақмая» ауылына газ тарту жұмыстары өтуде. Міне, бүгін Қазалы қаласындағы газдандыру жұмыстары толық аяқталып, пайдалануға беріліп отыр.Биыл жыл соңына дейін ауданға қарасты Жалантөс батыр, Қ,Пірімов, Басықара ауылдары газға қосылады. Нәтижесінде облыс тұрғындарының 68% табиғи газға қол жеткізетін болады. Қазыналы Қазалы қаласына газ берілуімен баршаңызды шын жүректен құттықтаймын. Әр отбасынан жылу кетпесін”, – деді Нұрлыбек Нәлібаев.
</blockquote>
Сондай-ақ, аймақ басшысы алау оты жағылған Махамбетжановтар отбасына барып, қуанышына ортақтасты.
Мердігер мекеме «МБК Құрылыс» ЖШС 1 млрд 26 млн теңгеден астам қаржыға 60 шақырымға жуық құбыр желілерін тартып, газ реттегіш құрылғылар орнатқан.

Нұрлыбек Нәлібаев: Биыл облыс тұрғындарының 68% табиғи газға қол жеткізеді

Kyzylorda-news.kz. Қызылорда облысының әкімі Нұрлыбек Нәлібаев жұмыс сапарымен Арал ауданына барды.
Алдымен ауданға қарасты Сексеуіл кентіне барып, жергілікті жердегі өзекті деген бірқатар мәселелермен танысты. Ондағы ел-жұртпен жүздесіп, өзара пікірлесті. Сапар барысында кенттегі құрылысы аяқталмаған теміржолшыларға арналып салынған 2 пәтерлі 38 тұрғын үйдің және 40 төсектік аурухана нысандарына барып, қазіргі жағдайын көрді. Аталған ғимараттардың құрылысын толық аяқтау үшін облыстық тиісті салалық басқармаға толық зерделеп, қажетті қаржы көлемін анықтап, ұсынуды тапсырды.
Одан соң, аймақ басшысы кенттегі № 283 орта мектебі ғимаратының алдында тұрғындармен жүздесті.
Кездесу барысында тұрғындар тарапынан көтерілген газ, жол және құрылыс нысандарына байланысты мәселелерге қатысты атқарылып жатқан жұмыстарды түсіндіріп өтті.
Мұнан соң, білім ошағының ішінде аудандағы аппатты деп танылған балабақшалар және болашақта бой көтеретін мектептер құрылысының жобасымен танысты.
Бұдан кейін Арал қаласындағы аудандық мәдениет үйінде актив отырысына қатысты. Жиынға түрлі сала ардагерлері, құқық қорғау органдарының басшылары, облыстық, аудандық мәслихат депутаттары, имамдар, басқарма, бөлім басшыларымен қатар ауылдық жерден келген ардагерлер кеңесінің төрағалары қатысты. 
Нұрлыбек Машбекұлы, алдымен мемлекет басшысы Қасым-Жомарт Тоқаевқа, өзіне сенім білдірген ел-жұртына, барша аралдықтарға алғысын білдіріп, алдағы уақытта сенім үдесінен шығуға жұмыс жасайтынын жеткізді. Ауданның өзекті деген проблемалық мәселелерімен бұған дейін де таныс екенін айтқан Н.Нәлібаев, Аралдың аты аймаққа емес бүкіл әлемге мәшһүр екенін алға тартты.
<blockquote>
 “Құрметті жерлестер, қасиетті рамазан айында аймақ басшысы ретіндегі алғашқы сапарымды Арал ауданынан бастап, өздеріңізбен жүздесіп жатқаныма қуаныштымын. Ер азамат үшін еліне, оның ішінде туған жеріне қызмет ету – үлкен бақыт, зор жауапкершілік. Алаштың анасына баланған Сыр елінің әлеуметтік-экономикалық, мәдени, рухани жаңғыру жолында сіздердің қолдауларыңызбен, әріптестерімізбен бірге аянбай еңбек етіп, осы кезге дейінгі жинаған тәжірибемді, алған білімім мен барлық күш-жігерімді ел игілігіне арнаймын. Президент ұсынған Жаңа Қазақстан бастамасын қолдай отырып, әрбір мәселені өзектілігіне қарай кезектілігімен орнықты түрде шешімін табу үшін жұмыс жасайтын боламыз. Таңертеңнен бері бірқатар проблемалық нысандарды аралап, тұрғындармен кездестім. Елдің ахуалын, тұрғындардың тұрмыс-тіршілігін көзбен көріп келеміз”, – деген аймақ басшысы ауданда өзекті деген бірқатар мәселелердің бар екенін атап өтті.
</blockquote>
Әсіресе «Көкарал» бөгетінің қазіргі жайы және САРАТС жобасының екінші кезеңін жүзеге асыруды барша Арал жұртшылығы үлкен үмітпен күтетіндіктен, теңіздің жағдайы Мемлекет басшысының әрдайым басты назарында екенін айтты.
Одан соң аудан әкімі Серік Сермағамбетов өңірде атқарылып жатқан жұмыстар мен ауданның әлеуметтік-экономикалық даму барысы туралы баяндама жасады.
Баяндама барысында аудан әкімі әр саланы талдап, ондағы жетістіктер мен өткен жылмен салыстырғандағы көрсеткіштерді жұртшылық назарына ұсынды. Сондай-ақ, алдағы негізгі міндеттерді саралап, бірінші кезекте қолға алынуы тиіс маңызды деген мәселелер жүзеге асырылу керектігін жеткізді. Олардың қатарында қала ішінде аспалы көпір салу мәселесі, аудан бойынша жаңа білім ошақтарын ашу, Сексеуіл кентін газдандыру сынды бірқатар мәселелер бар. 
Өз кезегінде білім саласының ардагері, зейнеткер Н.Оспанов, Аманөткел ауылының тұрғыны Ш.Әбдіраманов және облыстық мәслихат депутаты М.Жұмашев аймақ басшысына ізгі тілектерін арнап, бірқатар ұсыныстар енгізді. 
Аймақ басшысына Арал ауданының құрметті азаматы, абыз ақсақал Ш. Дәрмағамбетов Сыр өңірінің әлеуетін арттыруға арналған қарымды қызметіне сәттілік тілеп, ақ батасын берді. 
Жиыннан соң, өткен жылы реэкспозициядан өткізілген балықшылар мұражайына ат басын бұрып, ондағы Арал теңізі тарихынан және балықшылар өмірінен сыр шертетін тарихи жәдігерлермен танысып, мұражай ауласына естелік ретінде ағаш көшеттерін отырғызды. 
Мұнда аудан әкімі Серік Сермағамбетов «Балықшылар» аллеясын қайта жаңғырту, аспалы теміржол өткелі, аудан бойынша автомобиль жолдары, аудандық тарихи-өлкетану музей құрылысы, аудандық мәдениет орталығына жүргізілетін күрделі жөндеу жұмыстары және көп қабатты тұрғын үйлер және кәріз су жүйесі жұмыстарын таныстырды.
Аймақ басшысы бұдан кейін Қамбаш көлі жағасындағы «Аққұмшық» жағажайына барып, стенд арқылы қуаңшылықты еңсеру бағытында атқарылған жұмыстармен танысты. Қамбаш көлінің қазіргі деңгейін бағамдап, алдағы уақытта аймақта туристік салаға басымдық берудің маңыздылығына тоқталды.
Атап өтейік, осы кезге дейін жағадан 500 метрге дейін алшақтап кеткен «Қамбаш» көлінің суы «Бұрмақұлақ» арнасына бөгеліп, «Аспай» суағытқысының іске қосылу нәтижесінде қайта қалпына келді.
<img src="https://kyzylorda-news.kz/wp-content/uploads/2022/04/fb_img_1650321900804.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323195233.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323198353.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323202479.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323206002.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323209177.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323218768.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323222024.jpg" alt="" />

Аймақ басшысы Арал ауданына барды

<a href="https://kyzylorda-news.kz/">Kyzylorda-news.kz.</a> ҚР Ішкі істер министрлігі Есірткі қылмысына қарсы іс-қимыл департаменті қызылордалық әріптестерімен бірлесіп синтетика өндіретін есірткі зертханасын жойды.
Жедел ақпаратты тексеру барысында қылмыстық өндірісте күдікті болған жергілікті тұрғынға бақылау жүргізіле бастады. Бұл оны тұрмыстық химия қаптамасына жасырылған, ішінде синтетикалық есірткісі мен сұйықтығы бар сәлемдемені алып жатқан жерінен ұстауға мүмкіндік берді.
Күдіктінің пәтерін тінту кезінде есірткіні өндіру фактісін дәлелдейтін есірткі заттарының қалдықтары бар ыдыс-аяқ, электронды таразылар, бояғыштар, жеке қорғаныс құралдары табылды.
Оның телефонының ішіндегі ақпаратты зерттегеннен кейін полиция қызметкерлері есірткі жасырылған 13 жерді анықтады. Ішінде синтетикалық есіртікісі бар 21 түйір тәркіленді. Ұсталған адам көрсеткендей, ол бұл есірткілерді мессенджерлер арқылы сатқан, төлемді ақша ағындарын бақылау қиын болу үшін криптовалютамен алып отырған.
Жалпы сұйық түрдегі екі литр синтетикалық есірткі және сатылымға дайын есірткі түйірлері алынды.
Есірткі дайындау және өткізу фактісі бойынша қылмыстық іс қозғалды. Мүлкін тәркілеумен 15 жылға дейін бас бостандығынан айыру жазасы көзделген.
Қазіргі уақытта жедел-тергеу іс-шаралары жалғасуда, есірткінің барлық түсу арналары мен қатысы бар адамдар анықталуда.
ІІМ Есірткі қылмысына қарсы іс-қимыл департаменті бастығының міндетін атқарушы Асқар Мұхаметқалиев атап өткендей, синтетикалық есірткілердің тәркіленуі, одан бөлек оның өндірілуі бұл өңірге тән емес, себебі жерілікті есірткі сатушылар негізінен қызылордалық «индюхаға» деген тұтынушылардың сұранысын арттыратын құрамында жоғары процентті тетрагидроканнабинолы бар «үнді» сора түрін өсірумен айналысады.
Аталған өңірде синтетика таралуының өсу тенденциясы елімізде есірткі нарығының қайта бейімделгенін және «дәстүрлі» есірткі түрлерінің ығыстырылғанын куәландырады.
Д.МАХАНОВА

Қызылордада синтетика өндіретін есірткі зертханасы жойылды

<a href="https://kyzylorda-news.kz/">Kyzylorda-news.kz.</a> 1984 жылдан бері сәуір айының 18-інде әлемде Халықаралық ескерткіштер мен тарихи орындар күні атап өтіледі. Бұл күнді 1983 жылы ЮНЕСКО жанынан құрылған Халықаралық ескерткіштер мен көрнекті орындарды қорғау мәселелері жөніндегі кеңес ассамблеясы бекіткен болатын.
Осыған орай, ЗК- 169/1 тергеу изоляторының шаруашылық бөліміне қалдырылған сотталғандар көне қалалар тарихына онлайн форматта саяхат жасады.
Нақтырақ айтар болсақ, Қызылорда облыстық тарихи-өлкетану музейінің филиалы Т.Айтбаев атындағы көркем сурет галлериясының қорынан жасақталған көрмені тамашалады.
Олар бұл көрмеге қойылған Қазақстан суретшілер одағының мүшесі Т.Сағымбаевтің тарихи ескерткіштер тақырыбындағы бірқатар туындыларын тамашалап, осы туындылар жайында айтылған музей қызметкерінің шолуын ерекше ықыласпен тыңдады.
Жергілікті қыл қалам шеберінің ІІ-ІV ғасырдағы көне қала бейнесі «Шірік рабат» атты туындысын, VII-XI ғасырдағы оғыз елінің астанасы болған «Жаркент» қалашығы бейнелеген шығарманы және XII-XIII ғасырдағы «Сығанақ» қаласы бейнеленген туындыларды көріп, танысты.
Сондай-ақ, VII-VIII ғасырда өмір сүрген Қорқыт атаға арналған ескерткіштер туралы ақпарат алды.
<blockquote>
 «Бүгінгі онлайн көрмеден Қызылорда өлкесіндегі тарихи көне қалалар туралы көріп, білгендерімізді еске түсірдік. Көрмедегі суреттердің бояуы қанық болғандықтан бізге тым әсерлі болды. Тарихи орындарды тамашалай отырып, бейне бір сол ғасырлар әлеміне барып келгендей болдық», – деп, сотталған өз ойымен бөлісті.
 «Біз қамаудағылармен топтық және бұқаралық тәрбие жұмыстарын жиі жүргізіп отырамыз. Бұл (сабақтар, дәрiстер, жиындар, диспуттар, конкурстар, көркем өнерпаздар байқаулары, спорттық-ойын сауық iс-шаралары) Бүгін олардың мәдени әлеуетін арртырып, патриоттық тәрбие беру мақсатында, онлайн форматта көрме ұйымдастырдық. Жазасын өтеушілер қоғамнан оқшауланғанмен, оларға қамауда отыр – ақ, онлайн форматта музейлерге саяхат жасатып, көрмелерді көруге мүмкіндік жасап отырамыз», – деді, АКАӘПТЖБ-ің бастығы, әділет капитаны А.Тұрманов.
</blockquote>

Қызылордада сотталғандар көне қалалар тарихын танып білді

<a href="https://kyzylorda-news.kz/">Kyzylorda-news.kz.</a> Елдегі ведомстволық деңгейдегі марапаттардың қатары «Еңбек сіңірген сауда қызметкері» төсбелгісімен толығуы мүмкін, деп хабарлайды <a href="https://lenta.inform.kz/kz/kazakstanda-enbek-sinirgen-sauda-kyzmetkeri-tosbelgisi-payda-boluy-mumkin_a3924124">ҚазАқпарат</a>.
«Ашық НҚА» порталында жарияланан ҚР Үкіметінің қаулысында осындай шара көзделген.
Құжаттың толық атауы – «Қазақстан Республикасы Үкіметінің құрылымына кіретін кейбір мемлекеттік органдардың ведомстволық наградалары туралы «Қазақстан Республикасы Үкіметінің 2011 жылғы 15 желтоқсандағы № 1539 қаулысына өзгерістер мен толықтырулар енгізу туралы» Қазақстан Республикасы Үкіметінің қаулы жобасы.
«3. Ведомстволық наградалармен марапаттау негіздері» бөлімі: мынадай мазмұндағы «Еңбек сіңірген сауда қызметкері» төсбелгісі» деген кіші бөліммен және 82-4-тармақпен толықтырылсын», – деп жазылған қаулы жобасында.
Сондай-ақ, бұл төсбелгімен сауданы дамытуға, сауда қызметін жүзеге асырудың нысандары мен әдістерін жетілдіруге, тұтынушыларға қызмет көрсетудің жоғары мәдениетін қамтамасыз етуге сіңірген еңбегі және қосқан зор үлесі үшін, сауданың тиімділігі мен жоғары технологиялық сипатын арттыруға, озық тәжірибені таратуға бағытталған іс-шараларды әзірлегені және жүзеге асырғаны үшін, сондай-ақ қоғамдық тамақтану саласында жұмыс істейтін қызметкерлер наградталатыны айтылған.
«Еңбек сіңірген сауда қызметкері» төсбелгісі диаметрі 45 мм шеңбер нысанында жезден дайындалады. Медальдің бет жағында ортада бедерлі, шығыңқы, жылтыр элемент – «Кадукус» саудасының символы орналасқан. Айналдыра төменгі бөлігінде «Еңбек сіңірген сауда қызметкері» күрең қызыл эмальмен нақышталған, гравировканың сыртқы бөлігінде мемлекеттік тудың түсі – көгілдір эмаль көмкерілген. Шеңбердің сыртқы бөлігін жылтыр, шығыңқы бедер нысанында орындалған сегізбұрыш көмкереді.
Төсбелгінің сыртқы жағында жоғарғы бөлігінде қазақ ою-өрнегі орналасқан, ортасында «Қазақстан Республикасының Сауда және интеграция министрлігі» деген қазақша сөздер және төменгі бөлігінде сериялық нөмір ойылып жазылған.
Төсбелгі құлақша мен шығыршық арқылы ені 35 мм және биіктігі 31 мм көгілдір түсті қатқыл жібек лентамен қапталған төрт бұрышты тағанға жалғанады, киімге визорлы бекіткіші бар түйреуіш арқылы бекітіледі»,- деп жазылған құжатта.
Қаулы&nbsp;<a href="https://legalacts.egov.kz/npa/view?id=14073252">жобасы</a>&nbsp;3 мамырға дейін жария талқылауда болады.
Еске салсақ, «Ашық НҚА» порталында облыс әкімдері мен республикалық маңыздағы қала әкімдерінің цифрлық орынбасарлары пайда болуын көздейтін&nbsp;<a href="https://www.kazinform.kz/kz/akimderdin-cifrlyk-orynbasarlary-payda-boluy-mumkin_a3923921">құжат жобасы</a>&nbsp;жарияланған еді.

Қазақстанда «Еңбек сіңірген сауда қызметкері» төсбелгісі пайда болуы мүмкін

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысы ПД Әкімшілік полиция басқармасының қызметкерлерімен қызмет атқару барысында Армения мемлекетінде тіркеуде тұрған «Хундай Соната» автокөлігі тоқтатылып, тексеру барысында 42 жастағы жүргізушінің көлік құралын еш құжатсыз басқарғаны анықталды.
Аталған құқықбұзушылық бойынша ҚР ӘҚБтК-нің 230-бабының 2-бөлігімен әкімшілік хаттама рәсімделіп, автокөлік айып алаңына қойылды.Сонымен қатарол бірнеше ай ішінде «Аркан» стационарлы жылдамдық өлшегіш құрылғысына жылдамдық режимін 28 мәрте бұзғаны үшін ҚР ӘҚБтК-нің 592-бабының 1-ші және 2-ші бөлігі бойынша ұйғарым шығарылып аталған автокөліктің жүргізушісіне 520 мың 710 теңге сомасында айыппұл салынған.
Айта кететін жайт, автокөліктің міндетті сақтандыру полисі болмағандықтан, яғни құқық бұзушы жөнінде деректер базасында мәлімет болмауының салдарынан айыппұл жөнінде дер кезінде хабарлауға мүмкіндік болмаған.
Қызылорда облысы Полиция департаменті көлік құралына қатысты барлық құжаттарды уақытылы заңдастырып жүруге және жол ережесін бұзбауға шақырады.

Қызылордалық «Аркан» құрылғысына 28 мәрте түскен

<a href="https://kyzylorda-news.kz/">Kyzylorda-news.kz.</a> Ішкі істер министрлігі халықты алдаудың жаңа амалы туралы ескертті. Соңғы кезде алаяқтар оны жиі пайдаланып жүр.
Ресми мәліметке сәйкес, соңғы уақытта полиция және басқа да құқық қорғау органдары қызметкерлерінің атынан халықты алдау фактілері көбейіп кеткен. Алаяқтар қазақстандық ұялы байланыс операторларына ұқсас нөмірлерді пайдаланады.
<blockquote>
 «Олар өздерін анықтаушылар немесе тергеушілер ретінде таныстырып, полицияның бөлімшесіне ресімделген онлайн-несие туралы азаматтардың туыстары немесе таныстары қоңырау шалғанын айтып хабарласуда. Деректерді нақтылау үшін қылмыскерлер азаматтардан банк шоттары мен жеке мәліметтерін сұрайды. Соның ішінде тегі, аты, әкесінің аты, ЖСН және тағы басқа жеке мәліметтер бар», – дейді министрлік мамандары.
</blockquote>
Сондай-ақ, адамдар алаяқтарға алданып, қашықтан басқаруға арналған қосымшаларды өз құрылғыларына орнатып жатады.
Сөйтіп, барлық ақшасынан айырылады.
<blockquote>
 «Егер сізге «банктен» немесе «полициядан» қоңырау түссе, тұтқаны қойып, дұрыс ақпарат алу үшін банктің өзіне хабарласқаныңыз абзал. Полиция қызметкерлері де, банк қызметкерлері де ешқашан банктік шоттар немесе жеке деректер туралы мәліметтерді сұрамайтынын есте ұстаған жөн. Бөтен адамдарға өзіңіз туралы мәліметті, банктік шоттар жайлы деректерді, банктен абоненттік нөміріңізге келіп түскен SMS-кодтарды бермеңіз», – деп атап көрсетті тәртіп сақшылары.
</blockquote>
Есепшоттағы ақшаны қорғау үшін қарапайым қауіпсіздік шараларын сақтау қажет.
Олар:
күрделі парольдер орнату және оларды жиі ауыстыру;
төлем жүйелерінде бар барлық қауіпсіздік жүйелерін іске қосу;
SMS растау;
IP-мекенжайды бақылау;
3D-secure;
Алаяққа алданған жағдайда дереу банкке қоңырау шалып, шотты бұғаттап қою қажет. Сосын полиция бөліміне хабар беру керек.

Алаяқтар адам алдаудың жаңа жолын тапқан

<a href="https://kyzylorda-news.kz/">Kyzylorda-news.kz.</a>&nbsp;Нұр-Сұлтанда Ashyq қосымшасын әзірлеген мамандарды жеке кәсіпкер сотқа берді. Бұл туралы жобаны әзірлеуге қатысқан Виталий Пустовойтенко әлеуметтік желідегі парақшасында жазды, деп хабарлайды&nbsp;<a href="https://stan.kz/">Stan.kz</a>.
Оның айтуынша, сотқа арыз түсірген – жеке кәсіпкер. Бірақ оның сотқа не себепті арыз түсіргені әзірше белгісіз
«Алдымен ұйқысыз түндер, одан кейін жобаны тездетіп әзірлеу мен іске қосу, сосын хейтпен күрес, мемлекетке тапсыру, осымен бәрі бітті ме десем, олай емес екен. Енді, сотқа барып тұру қажет. Оған да уақыт кетеді. Бұл өнім біздікі екенін және оған өз қалауымыз бойынша иелік ете алатынымызды дәлелдеуге тура келетін шығар. Біз сыйға тарту шарты бойынша беруге шешім қабылдадық», – деп жазды Пустовойтенко әлеуметтік желідегі парақшасында.
Қалалық сотта арыздың түскенін растады. Бүгінде алдын ала отырыстың уақыты белгіленіп отыр. Алғашқы сот отырысы 20 сәуірде өтеді. Процесс ашық болады.
Айта кетсек, Ashyq қосымшасын 2021 жылдың басында коронавирус пандемиясы кезінде енгізген болатын. QR-код арқылы адамның вирус жұқтырғаны, я болмаса, науқаспен байланыста болғаны туралы мәлімет ақпараттық базадан алынып, арнайы түспен көрсетіліп тұрған.
Мобильді қосымшаның арқасында бизнес нысандары жұмыс істей бастады.
Биыл 12 наурызда ведомстоваралық комиссия Ashyq қосымшасын пайдалануды тоқтатуға шешім қабылдады.

Ashyq қосымшасын жасаған мамандардың үстінен арыз түсті

<a href="https://kyzylorda-news.kz/">Kyzylorda-news.kz.</a>&nbsp;Бүгін Қазақстанның барлық өңірінде жалпы білім беретін пәндер бойынша республикалық олимпиаданың қорытынды кезеңі басталды.
Офлайн форматта «USTUDY» тестілеу орталығы базасында өтіп жатқан білім бәйгесінің ІІ кезеңіне облыстық білім басқармасының басшысы Ақзира Қасымова келіп, оқушыларға сәттілік тіледі.
<blockquote>
 «Биылғы олимпиада «Бір қатысушы, бір компьютер, бір камера» форматы бойынша жүргізілуде. Ашықтықты бақылау үшін мүдделі емес үшінші тұлғалар – «Әділдік жолы» республикалық қоғамдық бірлестігінен, «Адалдық алаңы» мүшелері мен «Дарын» республикалық орталығының жауапты қызметкерлері қатысуда. Айта кетейін, өткен жылы олимпиадаға 56 оқушы қатысып, 26 оқушы жүлделі орынға ие болған болатын. Биыл да осы көрсеткішіміз жоғары болады деген сенімдемін. Оқушыларға сәттілік тілеймін», – деді Ақзира Бақтыбайқызы.
</blockquote>
Білім сынағына облыс көлемінде жалпы 14 пән бойынша 83 оқушы және Назарбаев Зияткерлік мектебінен 2 оқушы қатысуда. Ал тестілеудің алғашқы күніндегі жаратылыстану-математикалық бағытындағы ІІ кезеңге 22 оқушы бақ сынауда.
Айта кетейік, білім бәсекесі 18-23 сәуір аралығында өтеді. Олимпиаданың өткізілу барысы тікелей эфир арқылы YouTube желісінен қадағаланып, Syr-daryny.kz сайтында жариялануда.

Ақзира Қасымова олимпиадаға қатысушы оқушыларға сәттілік тіледі

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында биылғы жылдың бірінші тоқсанында туберкулез ауруының 97 жаңа жағдайы тіркелді. Оның 94%-ы өкпе туберкулезі, сондай-ақ 50%-нда туберкулездің жұқпалы, яғни ашық түрі анықталды. Бұл өткен жылдың осы мерзімімен салыстырғанда 17%-ке жоғары.
Індетке шалдыққандардың 70%-і әлеуметтік белсенді топтар, яғни 18-64 жас аралығындағы тұрғындар сырқаттанған.
Кәсіби құрамы бойынша жіктейтін болсақ, жұмыссыздар-38, зейнеткерлер-24, мектеп оқушылары мен студенттер-7, қалғаны басқа контингенттер үлесінде.
Тәуекел тобындағы контингенттердің флюрографиялық тексеруден уақытылы өтпеуінің, аурудың бастапқы клиникалық белгілері байқалса да, медициналық көмекке кеш жүгінуінің салдары туберкулездің ауыр ағымда өтуіне әкеп соқтырады. Жыл басынан бері ересектер арасында туберкулездің 1 асқынған түрі және 3 өлім жағдайы тіркелді. Туберкулез ошақтарына, қарым-қатынаста болған адамдарға эпидемиологиялық бақылау, зерттеу, ауру көзін анықтау шаралары медицина ұйымдары мамандарымен бірлесіп жүргізілуде.
Соңғы 2 жылда коронавирус инфекциясының пандемиясы туберкулез індетіне қарсы тиісті профилактикалық шаралардың уақытылы жүргізілуіне кері әсерін тигізді. Туберкулезді анықтау сынамаларын қоюға және екпе жүргізуге қарсылық танытқандар саны артты. Бұл сәйкесінше туберкулез ауруының эпидемиологиялық ахуалының тұрақсыз болып қалыптасуына әсер етті.
Санитариялық-эпидемиологиялық бақылау саласының қызметкерлері денсаулық сақтау ұйымдары мамандарымен бірлесіп, санитариялық-ағарту жұмыстарын жүргізуде. Мектеп оқушыларының ата-аналарымен кездесіп, екпенің маңызы туралы түсіндірді. Нәтижесінде балалар арасында туберкулез ауруын ерте анықтауға мүмкіндік беретін манту сынамасымен және туберкулезге қарсы ревакцинация жұмыстарымен 6-7 жастағы балалар оптималды деңгейде қамтылды.
Ауа барлық адамға ортақ болғандықтан туберкулез бактериясын жұқтырудан ешкім қорғалмаған. Әсiресе балалар мен егде жастағылар үшiн өте қауiптi. Туберкулезбен ауыратын адаммен жақын қарым-қатынас жиi, әрi ұзақ болса, түрлi себептермен ағзаның қорғаныш күшi әлсірегенде туберкулез таяқшалары белсендiлiк танытып, аталмыш аурудың қозуына себепшi болады.
Бүгiнде ауру ерте анықталып, емдеу шаралары уақытылы жасалған жағдайда туберкулезден толық сауығып шығу мүмкіндігі дәлелденген.
Туберкулездің алдын алудың тиімді әдісі –профилактикалық медициналық тексеруден өту.Туберкулез рентгенологиялық әдіспен анықталады, яғни кеуде қуысын флюорорграфиялық жәнерентгенологиялық тексеруден өткізу. Ал балалар арасында туберкулезді анықтаудың маңызды әдісі-туберкулин сынамасын қою. Туберкулин диагностикасы 12 айдан бастап 14 жасқа жеткен тәуекел тобындағы балаларға Манту сынамасын қою арқылы жүргзіледі.
Манту сынамасын бұрынғы қойылған сынамалардың нәтижесіне қарамастан жылына бір рет қояды. Ол БЦЖ вакцинасын егу мен қайта егу контингентін іріктеу мақсатында жасалады. Балалар үшін БЦЖ вакцинасын егу еңалдымен туберкулез менингиті, ауыр түрдегі аурулардың таралуынан қорғайды. Алғашқы екпені жаңа туылған бала перзентханада 0-4 күн ішінде алады. БЦЖ ревакцинациясы тек дені сау, қойылған Манту сынамасы теріс болған 6-7 жастағы балаларға жүргізіледі.

Қызылордада туберкулез сырқаты белең алып барады

<a href="https://kyzylorda-news.kz/">Kyzylorda-news.kz.</a>&nbsp;23 сәуірде сағат 19.00-де Қызылорда қаласында Нартай Бекежанов атындағы Қызылорда облыстық қазақ академиялық музыкалық драма театрында Қазақстанның Халық әртісі, Халық қаһарманы Роза Бағланованың 100 жылдық мерейтойына арналған «Қазақтың қаһарман қызы» атты мерекелік концерт өтеді.
Концерттік бағдарламада Қазақстанның халық әртісі Нұрғали Нүсіпжанов, Сұлушаш Нұрмағанбетова, Алтынбек Қоразбаев, Гүлнәр Сиқымбаева, Жеңіс Сейдуллаұлы, Жеңіс Ысқақова, Игорь Благодарный, Айгуль Иманбаева, Асхат Үрпеков, Шаба, Нұрлан Албан, Бауыржан Исаев, Зарина Жакенова сынды әртістер мен Құрманғазы атындағы Қазақ ұлттық оркестрі өнер көрсетеді.
Сыр елі –жыр елі талайды таңдай қаққызған тума таланттардан кенде емес. Ән мен сұлулық бәйгесінің тәжін қоса киген алаштың ай маңдайлы аруы, Ұлыбританияда өтетін жыл сайынғы «Әлемнің әйгілі әйелдері» атағын алған қазақ ханымы Роза Бағланованың 100 жылдық мерейтойы ресми түрде басталып, республика көлеміндегі іс-шараларға ұласып, енді міне, туып өскен жері Сыр елінде ғасырлық тойы тойланғалы жатыр.
Айта кетейік, қазақ өнерінің біртуар әншісіне арналған бұл керемет ән кеші Мәдениет және спорт министрлігінің ұйымдастыруымен өтеді.

Қазақстан және Қызылорда облысының жаңалықтары