<a href="https://kyzylorda-news.kz/">Kyzylorda-news.kz.</a> 2022 жылы жоғары оқу орындарында берілетін білім гранттарының саны рекордтық 73 мыңға дейін артады.
ҚР БҒМ баспаөз қызметінің мәліметінше, бұл ретте жоғары оқу орындары мен колледждер студенттерінің көп бөлігі мемлекет есебінен тегін оқу мүмкіндігін алады. Бұл туралы бүгін Үкімет отырысында ҚР білім және ғылым министрі Асхат Аймағамбетов мәлімдеді.
<blockquote>
 «Президенттің қолдауының арқасында мектеп түлектерінің бюджет есебінен оқуға мүмкіндігі артып келеді. Колледждерде білім алу үшін биыл білім беру гранттарының саны да рекордтық көрсеткішке, яғни 31 мың грантқа дейін ұлғайып отыр. Гранттардың басым бөлігі техникалық мамандықтар бойынша беріледі. Сондай-ақ біз емтихандарды алып тастадық және азаматтардың әлеуметтік осал санаттары үшін арнайы квоталарды енгіздік. Гранттар барлық колледжге берілмейді. Студент грантты жеңіп алып, белгілі бір колледжді таңдайды. Осылайша қаржыландыру студент таңдаған колледжге жіберіледі. Яғни бұл жерде «ақша студенттің соңынан ереді» қағидасы жұмыс істейді. Бұл кадрларды даярлау бойынша колледждердің бәсекеге қабілеттілігін арттырады. Ең бастысы – еңбек нарығының сұранысына сай болу», – деп айтты ҚР білім және ғылым министрі Асхат Аймағамбетов.
</blockquote>
Айта кетейік, гранттарды бөлу кезінде халықтың әлеуметтік осал топтарынан шыққан балаларға арналған квоталар саны ұлғайтылады. Яғни көп балалы немесе толық емес отбасылардың балалары, сондай-ақ ерекше қажеттіліктері бар балаларды тәрбиелеп отырған отбасыдан шыққан үміткерлердің грант алу мүмкіндігі әлдеқайда жоғары болады. Сонымен бірге биыл мемлекеттік білім беру тапсырысын бөлу кезінде инженерлік, өңдеу, құрылыс салаларына, сондай-ақ педагогикалық және жаратылыстану ғылымдарына ерекше көңіл бөлінеді. 2022 жылы Мемлекет басшысының тапсырмасы бойынша техникалық кадрларды даярлау және техникалық бағыттар бойынша мемлекеттік тапсырыс үлесі 60%-ке дейін артты.
Студенттер арасында сұранысқа ие және қажетті мамандықтарға жаңа гранттар бөлінеді.
<a href="https://24.kz/kz/zha-aly-tar/bilim-zh-ne-ylym/item/539711-biyl-universitetterge-beriletin-granttar-sany-73-my-a-dejin-artady">Хабар 24</a>

Биыл университеттерге берілетін гранттар саны 73 мыңға дейін артады

<a href="https://kyzylorda-news.kz/">Kyzylorda-news.kz.</a> Арал ауданына сапарлап, әлеуметтік нысандарды саралаған облыс әкімі Нұрлыбек Нәлібаев кеңейтілген жиын өткізіп, ауданның өзекті мәселелерін саралады.
Актив отырысына облыстық мәслихат хатшысы, ауданның зиялы қауым өкілдері, аудан ардагерлері, мәслихат депутаттары, түрлі мекеме, кәсіпорын және құқық қорғау органдарының басшылары қатысты.
Жиында аймақ басшысы аудан үшін өзекті шешімін күттірмейтін мәселелерді тізбектеп, алдағы жоспарларымен бөлісті.
<blockquote>
 «Әр азаматтың туған жеріне адал әрі жауапкершілікпен қызмет етуі перзенттік парызы деп санаймын. Қашанда халық бірлігі сарай салып, қамал алғызған. Әрбір қолға алған ісімізді бірлікпен, асқан жауапкершілікпен атқарсақ ғана кез келген қиындықтан сыр бермей шығамыз. Бұл жолда Президент ұсынған «Жаңа Қазақстан» бастамасын қолдай отырып, әрбір мәселені өзектілігіне қарай кезең-кезеңімен орнықты түрде шешетін боламыз. Киелі топырағында талай сындарлы кезеңдерді бастан өткерген Арал, бүгінде теңізі мен су маржаны арқылы әлемге әйгілі. Таңертеңнен бері бірқатар проблемалық нысандарды аралап, тұрғындармен кездестім. Елдің ахуалын, тұрғындардың жағдайы мен халықтың тұрмыс-тіршілігін көзбен көріп келемін. Ел игілігі үшін салынған, ғасыр жобасына баланған «Көкарал» бөгеті де бүгінде тікжақтауын су шаюына байланысты біршама бұзылған. Осыған байланысты жөндеу жұмыстарына техникалық-экономикалық негіздемесі әзірленіп, жоба-сметалық құжаттарын жасауға республикалық бюджеттен тиісті қаржысы бөлінді. САРАТС жобасы екінші кезеңінің толықтай жүзеге асуын теңізді өлкенің тұрғындары үлкен үмітпен күтетіндіктен, Арал өңірінің жағдайы әрдайым Мемлекет басшысының назарында», – деді облыс әкімі.
</blockquote>
Аймақ басшысы пандемия салдарынан 2 жылдан бері өткізілмеген дәстүрлі «Балықшылар слеті» биыл ұйымдастырылатынын және Қазақстан мен Өзбекстан арасындағы ынтымақтастық жөніндегі комиссияның 2-ші отырысын Арал қаласында өткізу жоспарланғанын мәлімдеді.
Жиында аудан әкімі Серік Сермағамбетов атқарылған жұмыстарды тізбелеп, түйткілді мәселелерді шешу бағытындағы жоспарымен бөлісті. Аймақ басшысы әрбір мәселенің өзектілігіне қарай түйінін тарқатуды және бюджет қаражатын тиянақты түрде жұмсау қажет екенін еске салды.
<blockquote>
 «Экономика салаларына, оның ішінде әсіресе балық шаруашылығына инвестициялар тарту, салық базасын ұлғайту, саяси тұрақтылықты сақтау, жаңа жұмыс орындарын құру және кәсіпкерлік саласын дамыту бойынша нақты жұмыстар жүргізу қажет. Қазіргі дағдарыс жағдайында бюджеттің әрбір тиыны есептеулі. Осы ретте, бюджеттен бөлінген қаражаттарды мерзімінде және толық игеріп, жобалардың сапалы жүзеге асуын қамтамасыз етіңіз», – деді облыс әкімі.
</blockquote>
Жиында мемлекет және қоғам қайраткері, Арал ауданының құрметті азаматы, бұрынғы Қазақ ССР балық шаруашылығының министрі Құдайберген Саржанов пен ардагер Шындалы Әбдраманов елім дейтін азаматтарды әрдайым қолдайтынын жеткізіп, елді бірлікке шақырса, кәсіпкер, облыстық мәслихаттың депутаты Мейрамбек Жұмашев облыс көлемінде кәсіпкерлікті қолдау қадылданған шараларға өз пікірін қосты.

Аралда биыл балықшылар слеті өтеді

<a href="https://kyzylorda-news.kz/">Kyzylorda-news.kz.</a> Қазалы ауданындағы бірқатар нысанды аралап, жұмысын саралаған облыс әкімі Нұрлыбек Нәлібаев ауданда кеңейтілген актив отырысын өткізді.
Жиынға облыстық мәслихат хатшысы Наурызбай Байқадамов, аудан әкімі Мұхтар Оразбаев, жауапты сала басшылары мен еңбек ардагерлері қатысты. Басқосуда Сырдария өзенінің су деңгейі, Қазалы ауданының әлеуметтік-экономикалық көрсеткіштері, алға қойған жоспарлар сөз болды.
Облыс әкімі вегетациялық кезеңде су тапшылығы орын алу қауіпі бар екенін атап өтіп, кешенді шаралар қабылдау бойынша нақты тапсырма берді.
<blockquote>
 «Мемлекет басшысы Қасым-Жомарт Кемелұлы Тоқаев үлкен сенім білдіріп, маған туған жеріме қызмет етуге мүмкіндік берді. Халықтың әл-ауқатын көтеру – біздің бірінші кезектегі басты міндетіміз. Қазақта «Біріккен білек жер қопарады» деген дана сөз бар. Туған жерді дамытуға күш біріктіріп, тізе қосып, кесімді пікір мен келелі шешім қабылдау үшін Өздеріңізбен кеңесіп отырудың орны бөлек. Сонымен қатар, «Қарлан» учаскесіндегі көпір құрылысының басталуы – дарияның арғы бетіндегі ағайынның бұрыннан келе жатқан тілегі болса, 250 келушіге арналған емхана құрылысының аяқталуына санаулы күндер қалды. Жыл сайын Сырдария өзеніндегі судың азайып жатқандығы бәрімізге мәлім. Өткен жылы орын алған қуаңшылық шаруаларға қиындықтар туғызды. Дегенмен, өтпелі қиындыққа мойымай, бірлікпен іс атқардық. Қазіргі кезде өзендегі су деңгейінің көтерілуіне қарамастан, вегетациялық кезеңде су тапшылығы орын алады деген болжам бар. Бүгін осы мәселелерді Өздеріңізбен толығырақ талқылау мақсатында жиналып отырмыз», – деді облыс әкімі Нұрлыбек Нәлібаев.
</blockquote>
Актив отырысында аудан әкімі Мұхтар Оразбаев ауданның макроэкономикалық көрсеткіштер бойынша есеп беріп, өзекті мәселелер бойынша ұсынысын жолдады.
Мұнымен қоса, «РЗА» АҚ-ның директоры Самұрат Имандосов пен аудандық ардагерлер кеңесінің төрағасы Оразғали Бекбанов елге тілеулес екендігін айтып, тұрғындар атынан лебізін білдірді.
Облыс әкімі экономиканың барлық салалары бойынша әлеуметтік-экономикалық дамудың оң параметрлеріне қол жеткізуді қамтамасыз етуді тапсырды. Сонымен қатар экономика салаларына инвестициялар тарту, салық базасын ұлғайту, саяси тұрақтылықты сақтау, жаңа жұмыс орындарын құру және кәсіпкерлік саласын дамыту бойынша нақты жұмыстар жүргізу қажет екенін айтты.
<blockquote>
 «Қазіргі дағдарыс жағдайында бюджеттің әрбір тиыны есептеулі. ретте, бюджеттен бөлінген қаражаттар мерзімінде және толық игеріп, жобалардың сапалы жүзеге асуын қамтамасыз етіңіз», – деді Нұрлыбек Нәлібаев.
</blockquote>
<img src="https://kyzylorda-news.kz/wp-content/uploads/2022/04/orazbaev.jpg" alt="" />
<img src="https://kyzylorda-news.kz/wp-content/uploads/2022/04/kazaly.jpg" alt="" />

Нұрлыбек Нәлібаев: Әрбір ауданның әлеуетін арттыру үшін өңірге инвестиция тарту керек

<a href="https://kyzylorda-news.kz/">Kyzylorda-news.kz.</a>&nbsp;Қызылордада жеңіл өнеркәсіппен айналысатын «Ас-кА» ЖШС директоры Дина Махатова шағын индустриялық аймақтарға қатысты мәселені көтеріп жүрген кәсіпкер.
Арнайы жұмысшы киімдерін тігумен айналысатын ол өңірде шағын индустриялық аймақтардың жұмысын жандандыру қажет деп санайды.
<blockquote>
 «Облыста осындай 6 аймақ құрылып, жұмыс жасап жатыр. Дегенмен бұл өндірістік аймақтардың жобалармен қамтылуы төмен. Есесіне жергілікті кәсіпкерлер тарапынан бос өндірістік ғимараттарда немесе ангарларларда орналасқан шағын индустриялық аймақтарға сұраныс бар», – дейді кәсіпкер.
</blockquote>
Дина Махатова тігін, жиһаз, тамақ және құрылыс материалдары өндірісімен айналысатын жергілікті кәсіпкерлер жеткілікті тәжірибе жинақтады деп санайды және осы саладағы кәсіпкерлерді кластерлік негізде топтастырып, бос орын-жайлармен қамтамасыз ету қажеттігін атап өтті.
<blockquote>
 «Мұндай шағын индустриялық аймақтар Өзбекстанды айтпағанда, еліміздің бірқатар қалаларында ашылған. Үлгі ретінде Алматы қаласын айтуға болады. Онда бұл жоба табысты жүзеге асырылуда. Кәсіпкерлерге арзан жалдау бағасымен өндірістік орындар беріледі, коммуналдық мәселелері шешілген, санитарлық қадағалау органдарымен проблема жоқ. Орынжайды сатып алғысы келетіндерге арзан әрі 2 пайызбен жеңілдетілген несие береді», – деді Дина Махатова.
</blockquote>
Кәсіпкер Дина Махатова Қызылорда облысы кәсіпкерлер палатасы Өңірлік кеңесінің мүшесі ретінде бұл мәселені облыс әкімінің орынбасарымен өткен кездесуде де көтеріп, салалық басқарма басшыларымен өзге өңірлердің тәжірибесімен бірге танысуға дайын екендігін жеткізді.

Қызылордалық кәсіпкерлер шағын индустриялық аймақ жұмысына көмек сұрап отыр

<a href="https://kyzylorda-news.kz/">Kyzylorda-news.kz.</a> ҚР Білім және ғылым министрі Асхат Аймағамбетов Алматыдағы қайғылы оқиғадан кейін мұғалімдер үшін біліктілік тесті алынып тастай ма деген сұраққа жауап берді, деп хабарлайды <a href="https://sputnik.kz/20220419/aymagambetov-biliktilik-testi-piar-24300074.html">Sputnik Қазақстан</a>.
Оның айтуынша, министрлікке біліктілік тестін алып тастау туралы өте көп ұсыныс түседі.
<blockquote>
 «2018 жылдан бастап аттестация рәсімі енгізілді. Осы тестілеуді алып тастаймын десек, барлығы бөркін аспанға лақтырып, қуанатыны түсінікті. Бірақ бізге мұндай арзан пиар қажет емес. Бізге ең керегі – білім беру сапасы. Ең бастысы, балалардың жақсы білім алғаны. Сондықтан біз біреуге ұнау үшін, біреудің тілін табу үшін мұндай шешім қабылдамаймыз. Біз елге қажетті шешімдерді қабылдаймыз. Бұл өте маңызды, мен қоғам назарын осыған аударамын», – деді Аймағамбетов үкімет үйінде өткен баспасөз мәслихатында.
</blockquote>
Ол Алматыда біліктілік тесті кезінде қаза болған мұғалімнің білімді әрі білікті маман болғанын атап өтті.
<blockquote>
 «Ол өз пәнін жақсы білгендіктен және өзіне сенімді болғаннан кейін, аттестация тапсыру қажеттілігі болмаса да, өз еркімен жазылып, қалай да болса тапсырамын деп шешім қабылдаған. Тестілеуге барар алдында, жақындарының айтуынша, мазасы болмаған. Сондықтан туыстары аздап тынығып, бүгін тестілеуге бармай-ақ қой деп өтінген. Бірақ неге мен бармаймын, мен бұл пәнді жақсы білемін деп тестілеуге барған», – деді министр.
</blockquote>
Аймағамбетов әріптестері марқұмның үйіне барып, отбасына көңіл айтқанын мәлімдеді. Отбасына тиісті көмек көрсетіледі.

Асхат Аймағамбетов: Бізге арзан пиар қажет емес

<a href="https://kyzylorda-news.kz/">Kyzylorda-news.kz.</a> Тегін экстракорпоральды ұрықтандыруға кім өтініш бере алады, қайда жүгіну керек және процедураның көрсеткіштері қандай? Бұл туралы Әлеуметтік медициналық сақтандыру қорының Қызылорда облысы бойынша филиалында айтылды.
Президент Қасым-Жомарт Тоқаевтың тапсырмасымен 2021 жылдан Қазақстанда «Аңсаған сәби» әлеуметтік бағдарламасы басталды, оның мақсаты – қосалқы репродуктивтік технологиялардың (ҚРТ) көмегімен отбасылық-демографиялық проблемаларды шешуге жәрдемдесу.
<blockquote>
 «Әлеуметтік медициналық сақтандыру қоры 2018 жылдан бастап тегін медициналық көмектің кепілдік берілген көлемі шеңберінде ЭКҰ бағдарламаларын қаржыландыруды жүргізеді. ЭКҰ-ға жолдама алу үшін тіркелген жері бойынша емханаға жүгіну қажет. Мамандар пациентті бедеулігі бар диспансерлік пациенттердің электрондық тіркеліміне қосады және бірқатар тексерулер тағайындайды. 12 ай ішінде емхананың бейінді маманның қорытындысы негізінде пациенттің құжаттарын жоғары технологиялық медициналық қызметтер жөніндегі жергілікті комиссияға жібереді. Оң шешім қабылданған жағдайда, әйел «Емдеуге жатқызу бюросы» порталында тіркеліп, рәсімге дайындала бастайды. Пациент экстракорпоралдық ұрықтандыру үшін клиниканы өз бетінше таңдауға құқылы. Жеткізушілер тізімімен қор <a href="https://fms.kz/kz/useful-to-know/vybrat-kliniku/">сайтында</a> танысуға болады», – деп хабарлады ӘМСҚ облыстық филиалының директоры Бақыт Исмаханбетов.
</blockquote>
ЭКҰ кімдерге арналған? Процедура терапевтік жолмен емдеуге келмейтін бедеулік диагнозы қойылғандарға арналған. ЭКО-ға отбасылық жұптар да, жеке адам да қатыса алады. Міндетті түрде үміткердің ерікті жазбаша келісімі болуы керек.
Қазақстан азаматы болуы және денсаулық сақтау министрлігі белгілеген медициналық параметрлерге сәйкес келуі қажет – бұл репродуктивті жас (18-ден 42 жасқа дейін), қалыпты соматикалық және эндокриндік мәртебе, жоғары фолликулярлық резерв.
Науқасқа ұрықтандырудан бас тарту бірнеше жағдайда әсер етуі мүмкін: жатырдың туа біткен немесе жүре біткен ауытқулары, соматикалық және психикалық бұзылулар, аналық без ісіктері, жедел қабыну және кез-келген локализацияның онкологиясы.
Айта кету керек, жылына бір рет МӘМС бойынша ЭКҰ процедурасынан тегін өтуге болады. МӘМС жүйесінде ЭКҰ жүргізу алдында ерлі-зайыптыларды тексеру көлемі көзделген тізбеге сәйкес жүзеге асырылады.
МӘМС жүйесінде ЭКҰ – циклдің базалық бағдарламасы көзделген, онда суперовуляцияны стимуляциялау, аналық бездердің трансвагинальды пункциясы, мұздатылған (желденген) эмбриондарды ауыстыруды қоса алғанда, асқынулардың жоғары тәуекелдерінің болуымен және эмбриондарды ынталандырылған циклде (овуляцияны стимуляциялау аясында эндометрия гиперплазиясы, эндометрия гипоплазиясы), кез келген локализацияның жіті қабыну аурулары кезінде ЭКҰ нәтижелілігін айқын төмендететін факторлардың болуымен байланысты кейінге қалдырылған тасымалдар жағдайларында жүргізіледі.
Жүктілікті диагностикалау ұрықтандырудан 12-14 күн өткен соң жүргізіледі, ультрадыбыстық зерттеу 21 күнге тағайындалады. Егер науқаста жағымсыз асқынулардың бірі пайда болса – көп жүктілік, бұл әйел денесіне жүктемені арттырады және жүктілік болжамын нашарлатады, ол резекция жасайды. Дамып келе жатқан ұрық санын азайту операциясы пациенттің жазбаша келісімі болған жағдайда ғана жүзеге асырылады.
ЭКҰ жүргізу қағидалары және ілеспе іс-шаралар туралы толық ақпарат Қазақстан Республикасы Денсаулық сақтау министрінің 2020 жылғы 15 желтоқсандағы № ҚР ДСМ-272/2020 «Қосалқы репродуктивтік әдістер мен технологияларды жүргізу қағидалары мен шарттарын бекіту туралы» бұйрығында жарияланды.
Қызылорда облысында «Аңсаған сәби» бағдарламасы аясында ЭКҰ-ға кезекте 792 әйел тұр. Өткен жылы өңірде 281 квота игерілді, оның 53 пайызы нәтижелі болды. Биыл 277 квота қарастырылған. Қызылорда облысында ЭҚҰ процедуралары жүргізілмейді.

МӘМС бойынша тегін ЭКҰ-ға кім өтініш бере алады?

<a href="https://kyzylorda-news.kz/">Kyzylorda-news.kz.</a> Қазақстандық оқушылар 26 мамырдан бастап, 17&nbsp;маусымға дейін жазғы мектепте оқиды. Бірақ мұндай шешімге кейбір ата-аналар әзірден қарсылық білдіріп жатыр. Әсіресе ыстық өңірлерде балаларды салқындатқышы жоқ, қапырық сыныптарда отырғызу дұрыс емес деп санайды. Оның үстіне 20 күндік жазғы мектеп білім деңгейі төмендеген оқушылардың мәселесін шешпейтінін айтты, деп хабарлайды&nbsp;<a href="https://stan.kz/">Stan.kz.</a>
Мәселен, Ақтөбе облысындағы 400-ден аса мектептің тек тоқсанында ғана кондиционер орнатылған екен. Оның өзінде сыныптарда емес. Соған қарамастан, мамандар жазғы мектеп үшін кабинеттерге кондиционер орнатуға міндетті емеспіз деп отыр.&nbsp;
«Жазғы мектеп оқушылардың білімін жетілдіруге тамаша мүмкіндік» деген мамандардың пікіріне кейбір ата-аналар қарсы. Олар балаларымыздың жыл бойы оқығаны жеткілікті, енді үш ай демалғаны абзал дейді. Оның үстіне күннің ыстығында сыныпта ауа болмайды, өйткені мектептер салқындатқышпен жабдықталмағанын алға тартты.
Алайда мамандар жазғы мектепте оқу дәстүрлі форматтан өзгеше болатынын айтады. Яғни икемді оқу кестесін қолданбақшы. Оқушыларға баға қойылмайды, үй тапсырмасы берілмейді. Алайда жазғы сабақ үшін барлық мектепті салқындатқыш техникалармен қамту міндетті емес екен.
<blockquote>
 «Оқу кабинеттерінде кондиционердің болуы санитарлық талаптарға сәйкес келмейді. Сыныпты желдету, сосын бір сыныпта барлық 30 баланың бірдей отыруы міндетті емес. Ол жерде икемді оқу графигі болғаннан кейін сыныпты екіге бөлу арқылы оқиды. Яғни балаларға түрлі жағдай қарастырылады», –&nbsp;&nbsp;деді Ақтөбе облыстық білім басқармасы басшысының орынбасары Нұргүл Бертілеуова.&nbsp;
</blockquote>
Ал Білім және ғылым министрлігі жазғы мектеп оқушыларға міндеттелмейтінін, соңғы шешімді ата-аналар өздері қабылдайтынын жеткізді. Бірақ біз кеңес береміз деп отыр. Сөздерінше, басқа елдерде оқушылардың сабақ үлгерімін шешу үшін оқу жылы ұзартылған.&nbsp;
<blockquote>
 «Біз оқу жылын ұзартпай, жазғы мектеп ұйымдастырдық. Барлық оқушыларға жазғы мектептен қалмауға кеңес беріп отырмыз. Жазғы мектеп біліміңізді шыңдап, олқылықтын орнын толықтыруға да мүмкіндік береді. Әрине, әртүрлі жағдайлар болуы мүмкін. Біреуі ауырып қалады, біреуі жазғы лагерьге барады және басқа да жағдайлар болады. Мұндай жағдайда жазғы мектепке қатысты соңғы шешімді ата-ана мен мектеп оқушылары өздері қабылдайды», – деп мәлімдеді Білім және Ғылым министрлігі Мектепке дейінгі және орта білім беру комитетінің төрағасы Гүлмира Кәрімова.&nbsp;
</blockquote>
Жазғы мектепке 9 бен 11-ші сыныптың оқушылары қатыспайды. Олар емтихан тапсырады. Ал мұғалімдер 56 күндік демалысқа тек жазғы мектептен кейін ғана шыға алады.

Жазғы мектеп: Соңғы шешімді ата-ана мен оқушы қабылдайды

<a href="https://kyzylorda-news.kz/">Kyzylorda-news.kz.</a> Қызылорда облыстық білім басқармасы мен «Сыбайлас жемқорлыққа қарсы іс-қимыл» агенттігінің облыстық департаментінің бірлескен «Мемлекеттік сатып алудағы жылдық жоспарды бекіту және баға саясаты» тақырыбында семинар-кеңес өтті.
Семинар-кеңеске облыстық білім басқармасының басшысы Ақзира Қасымова, «Сыбайлас жемқорлыққа қарсы іс-қимыл» агенттігінің облыстық департаментінің бірінші орынбасары Ғалия Әлімқұлова, Мемлекеттік сатып алу басқармасының басшысы Талгат Исмагулов, Қызылорда облысының ішкі мемлекеттік аудит департаментінің камералдық бақылау бөлімінің бас маманы Болат Азретәли, ревизиялық комиссия және білім беру ұйымдарының басшылары мен мемлекеттік сатып алу бойынша мамандары қатысты.
Мемлекеттік сатып алудағы жылдық жоспарды бекіту және біркелкі баға саясатын ұстануға арналған семинар-кеңесті облыстық білім басқармасының басшысы Ақзира Қасымова жүргізіп отырды. Басқарма басшысы кеңесте білім беру саласында мемлекеттік сатып алудан біршама қателіктер кетіп жатқандығын ашып айтты.
<blockquote>
 «Қателіктерді болдырмау мақсатында бүгінде үздіксіз түсіндірме жұмыстарын жүргізудеміз. Уәкілетті орган өкілдерімен білім басқармасына қарасты қала және аудандық білім беру ұйымдары өзара ақпарат алмасып, заң нормаларына қатысты жаңалықпен бөлісу, мүмкіндігінше тәжірибе алмасу қажет», – деді Ақзира Қасымова.
</blockquote>
Сонымен қатар жиында спикерлер мемлекеттік сатып алу саласындағы заңдылық талаптарының сақталуы мен жұмыстар, тауарлар және көрсетілетін қызметтер бойынша талаптардың өзгерістеріне байланысты баяндамалар жасап, оңтайлы жұмыс үйлестіру жайлы ұсыныстарын ортаға салды.
Жиын соңы семинарға қатысушылардың сұрақ-жауап алсасуымен жалғасын тапты. Білім беру ұйымдарының басшылары мен мемлекеттік сатып алуға жауапты мамандар түрлі тақырыптарда өз сауалдары мен ұсыныстарын айтып, спикерлермен тәжірибе алмасты.
<img src="https://kyzylorda-news.kz/wp-content/uploads/2022/04/bilim1.jpg" alt="" />
<img src="https://kyzylorda-news.kz/wp-content/uploads/2022/04/bilim2.jpg" alt="" />

Қызылорда: Білім саласындағы мемлекеттік сатып алу мәселесіне қатысты семинар өтті

<a href="https://kyzylorda-news.kz/">Kyzylorda-news.kz.</a> Қызылорда қаласында экологиялық ахуалға кері әсерін тигізетін ассенизатор қызметтерінің заңсыз әрекеттері тұрғындар арасында қызу талқыға түсіп, наразылық білдіріп жатыр.
Қызылорда қаласының полиция басқармасы тарапынан ассенизатор автокөліктері бойынша күнделікті жұмыстар атқарылуда.
Жыл басынан бері ассенизатор автокөліктерінің кәріз су қалдықтарын төккені үшін ҚР Әкімшілік құқық бұзушылық туралы Кодексінің 434-2 (ортақ пайдаланатын жерлерді ластау) 1-бөлігімен – 47 автокөлік иесіне (әр қайсысына 5 АЕК, яғни 15315 теңге айыппұл салынды), осы әрекетті бір жыл ішінде қайталағаны үшін 2-бөлігімен – 10 автокөлік иесіне (әр қайсысына 10 АЕК, яғни 30630 теңге айыппұл салынды), автокөлікті басқару барысында ластау әрекетін жасағаны үшін ҚР ӘҚБтК-нің 620 бабымен – 22 автокөлік иесіне (әр қайсысына 3 АЕК, яғни 9189 теңге айыппұл салынды) әкімшілік құқық бұзушылық хаттамасы толтырылды.
Одан бөлек ассенизатор автокөліктерімен жол ережесін бұзғаны үшін 64 әкімшілік хаттамалар рәсімделіп, 12 көлік айыппұл тұрағына қойылды.
Сонымен қатар белгіленбеген жерге кәріз су төккендері үшін шара қолдану мақсатында Қызылорда қаласының әкімшілігіне – 1, экология департаментіне – 4 және Қызылорла қалалық су жүйесі мекемесіне – 11 ұсыныс жолданды.
<blockquote>
 «Ассенизатор автокөліктерінің белгіленбеген жерлерге кәріз су қалдықтарын төктірмеу бағытында департамент бастығының қатаң бақылауына тұрғандығын және күнделікті бұл бағыттағы жұмыстар өз жалғасын табатын болады», – деп мәлімдеді Қызылорда қалалық Полиция басқармасының баспасөз қызметі.
</blockquote>

Қызылордада 100-ден аса ассенизатор автокөлігіне әкімшілік хаттама толтырылды

<a href="https://kyzylorda-news.kz/">Kyzylorda-news.kz.</a> 19 сәуірде атмосфералық фронталды бөліктердің өтуімен Қазақстанның басым бөлігінде жаңбыр түрінде жауын-шашын күтіледі, деп хабарлайды Қазгидромет.
Еліміздің оңтүстігінде найзағай, дауыл, шаңды дауыл болжанады. Республиканың батыс аудандарында жауын-шашынсыз ауа райы болады. Барлық өңірде желдің күшеюі байқалады. ҚазАқпарат бұл туралы Қазгидрометке сілтеме жасап хабарлайды.
Қызылорда облысының&nbsp;орталығында жел 15-20 м/с күшейеді. Ауа температурасы +23 +25 градусты көрсетіп, күн бұлтты болады.

Қызылордада жел күшейіп, күн бұлтты болады

Kyzylorda-news.kz. Қызылорда облысының әкімі Нұрлыбек Нәлібаев Қазалы ауданына жұмыс сапары аясында Әйтеке би кентіне жақын орналасқан Қазалы қаласын табиғи газға қосу салтанатты шарасына қатысты.
Аймақ басшысы тұрғындарды көптен күткен қуанышымен құттықтап, ақжарма тілегін арнады.
<blockquote>
 “Облыста барлық аудан орталықтары мен Байқоңыр қаласы «көгілдір отынға» қосылды. Мұнан бөлек, Сексеуіл, Төретам мен Ақай елді мекенін газдандыру кезең-кезеңімен жүзеге асатын болады. Биыл құны 3,2 млрд. теңгеге газдандыру жобасы жүруде. Қызылорда қаласына жақын «Наурыз», «Ж.Махамбетов», Шиелі ауданындағы «Алғабас», «Ақмая» ауылына газ тарту жұмыстары өтуде. Міне, бүгін Қазалы қаласындағы газдандыру жұмыстары толық аяқталып, пайдалануға беріліп отыр.Биыл жыл соңына дейін ауданға қарасты Жалантөс батыр, Қ,Пірімов, Басықара ауылдары газға қосылады. Нәтижесінде облыс тұрғындарының 68% табиғи газға қол жеткізетін болады. Қазыналы Қазалы қаласына газ берілуімен баршаңызды шын жүректен құттықтаймын. Әр отбасынан жылу кетпесін”, – деді Нұрлыбек Нәлібаев.
</blockquote>
Сондай-ақ, аймақ басшысы алау оты жағылған Махамбетжановтар отбасына барып, қуанышына ортақтасты.
Мердігер мекеме «МБК Құрылыс» ЖШС 1 млрд 26 млн теңгеден астам қаржыға 60 шақырымға жуық құбыр желілерін тартып, газ реттегіш құрылғылар орнатқан.

Нұрлыбек Нәлібаев: Биыл облыс тұрғындарының 68% табиғи газға қол жеткізеді

Kyzylorda-news.kz. Қызылорда облысының әкімі Нұрлыбек Нәлібаев жұмыс сапарымен Арал ауданына барды.
Алдымен ауданға қарасты Сексеуіл кентіне барып, жергілікті жердегі өзекті деген бірқатар мәселелермен танысты. Ондағы ел-жұртпен жүздесіп, өзара пікірлесті. Сапар барысында кенттегі құрылысы аяқталмаған теміржолшыларға арналып салынған 2 пәтерлі 38 тұрғын үйдің және 40 төсектік аурухана нысандарына барып, қазіргі жағдайын көрді. Аталған ғимараттардың құрылысын толық аяқтау үшін облыстық тиісті салалық басқармаға толық зерделеп, қажетті қаржы көлемін анықтап, ұсынуды тапсырды.
Одан соң, аймақ басшысы кенттегі № 283 орта мектебі ғимаратының алдында тұрғындармен жүздесті.
Кездесу барысында тұрғындар тарапынан көтерілген газ, жол және құрылыс нысандарына байланысты мәселелерге қатысты атқарылып жатқан жұмыстарды түсіндіріп өтті.
Мұнан соң, білім ошағының ішінде аудандағы аппатты деп танылған балабақшалар және болашақта бой көтеретін мектептер құрылысының жобасымен танысты.
Бұдан кейін Арал қаласындағы аудандық мәдениет үйінде актив отырысына қатысты. Жиынға түрлі сала ардагерлері, құқық қорғау органдарының басшылары, облыстық, аудандық мәслихат депутаттары, имамдар, басқарма, бөлім басшыларымен қатар ауылдық жерден келген ардагерлер кеңесінің төрағалары қатысты. 
Нұрлыбек Машбекұлы, алдымен мемлекет басшысы Қасым-Жомарт Тоқаевқа, өзіне сенім білдірген ел-жұртына, барша аралдықтарға алғысын білдіріп, алдағы уақытта сенім үдесінен шығуға жұмыс жасайтынын жеткізді. Ауданның өзекті деген проблемалық мәселелерімен бұған дейін де таныс екенін айтқан Н.Нәлібаев, Аралдың аты аймаққа емес бүкіл әлемге мәшһүр екенін алға тартты.
<blockquote>
 “Құрметті жерлестер, қасиетті рамазан айында аймақ басшысы ретіндегі алғашқы сапарымды Арал ауданынан бастап, өздеріңізбен жүздесіп жатқаныма қуаныштымын. Ер азамат үшін еліне, оның ішінде туған жеріне қызмет ету – үлкен бақыт, зор жауапкершілік. Алаштың анасына баланған Сыр елінің әлеуметтік-экономикалық, мәдени, рухани жаңғыру жолында сіздердің қолдауларыңызбен, әріптестерімізбен бірге аянбай еңбек етіп, осы кезге дейінгі жинаған тәжірибемді, алған білімім мен барлық күш-жігерімді ел игілігіне арнаймын. Президент ұсынған Жаңа Қазақстан бастамасын қолдай отырып, әрбір мәселені өзектілігіне қарай кезектілігімен орнықты түрде шешімін табу үшін жұмыс жасайтын боламыз. Таңертеңнен бері бірқатар проблемалық нысандарды аралап, тұрғындармен кездестім. Елдің ахуалын, тұрғындардың тұрмыс-тіршілігін көзбен көріп келеміз”, – деген аймақ басшысы ауданда өзекті деген бірқатар мәселелердің бар екенін атап өтті.
</blockquote>
Әсіресе «Көкарал» бөгетінің қазіргі жайы және САРАТС жобасының екінші кезеңін жүзеге асыруды барша Арал жұртшылығы үлкен үмітпен күтетіндіктен, теңіздің жағдайы Мемлекет басшысының әрдайым басты назарында екенін айтты.
Одан соң аудан әкімі Серік Сермағамбетов өңірде атқарылып жатқан жұмыстар мен ауданның әлеуметтік-экономикалық даму барысы туралы баяндама жасады.
Баяндама барысында аудан әкімі әр саланы талдап, ондағы жетістіктер мен өткен жылмен салыстырғандағы көрсеткіштерді жұртшылық назарына ұсынды. Сондай-ақ, алдағы негізгі міндеттерді саралап, бірінші кезекте қолға алынуы тиіс маңызды деген мәселелер жүзеге асырылу керектігін жеткізді. Олардың қатарында қала ішінде аспалы көпір салу мәселесі, аудан бойынша жаңа білім ошақтарын ашу, Сексеуіл кентін газдандыру сынды бірқатар мәселелер бар. 
Өз кезегінде білім саласының ардагері, зейнеткер Н.Оспанов, Аманөткел ауылының тұрғыны Ш.Әбдіраманов және облыстық мәслихат депутаты М.Жұмашев аймақ басшысына ізгі тілектерін арнап, бірқатар ұсыныстар енгізді. 
Аймақ басшысына Арал ауданының құрметті азаматы, абыз ақсақал Ш. Дәрмағамбетов Сыр өңірінің әлеуетін арттыруға арналған қарымды қызметіне сәттілік тілеп, ақ батасын берді. 
Жиыннан соң, өткен жылы реэкспозициядан өткізілген балықшылар мұражайына ат басын бұрып, ондағы Арал теңізі тарихынан және балықшылар өмірінен сыр шертетін тарихи жәдігерлермен танысып, мұражай ауласына естелік ретінде ағаш көшеттерін отырғызды. 
Мұнда аудан әкімі Серік Сермағамбетов «Балықшылар» аллеясын қайта жаңғырту, аспалы теміржол өткелі, аудан бойынша автомобиль жолдары, аудандық тарихи-өлкетану музей құрылысы, аудандық мәдениет орталығына жүргізілетін күрделі жөндеу жұмыстары және көп қабатты тұрғын үйлер және кәріз су жүйесі жұмыстарын таныстырды.
Аймақ басшысы бұдан кейін Қамбаш көлі жағасындағы «Аққұмшық» жағажайына барып, стенд арқылы қуаңшылықты еңсеру бағытында атқарылған жұмыстармен танысты. Қамбаш көлінің қазіргі деңгейін бағамдап, алдағы уақытта аймақта туристік салаға басымдық берудің маңыздылығына тоқталды.
Атап өтейік, осы кезге дейін жағадан 500 метрге дейін алшақтап кеткен «Қамбаш» көлінің суы «Бұрмақұлақ» арнасына бөгеліп, «Аспай» суағытқысының іске қосылу нәтижесінде қайта қалпына келді.
<img src="https://kyzylorda-news.kz/wp-content/uploads/2022/04/fb_img_1650321900804.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323195233.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323198353.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323202479.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323206002.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323209177.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323218768.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650323222024.jpg" alt="" />

Қазақстан және Қызылорда облысының жаңалықтары